პოლიტიკა
თურქეთის ინფორმაციით, ნახიჩევანთან დამაკავშირებელი რკინიგზის მშენებლობა იგეგმება
თურქეთის ტრანსპორტისა და ინფრასტრუქტურის მინისტრი ადილ კარაისმაილოღლუ აცხადებს, რომ ყარაბაღის შეთანხმების ფონზე ანკარა აზერბაიჯანის რეგიონ ნახიჩევანთან დამაკავშირებელი რკინიგზის მშენებლობას გეგმავს. მინისტრის თქმით, პროექტის წინასწარი დაგეგმვის და შესწავლის შედეგები მალე გახდება ცნობილი. მანამადე, თურქეთის საგარეო საქმეთა მინისტრმა მევლუთ ჩავუშოღლუმ განაცხადა, რომ ყარაბაღის შეთანხმების ფარგლებში ნახიჩევანის დერეფნის გაჩენით სარგებელს რეგიონის ქვეყნების გარდა, ჩინეთიც მიიღებს. ნახიჩევანი არის რეგიონი, რომელიც ირანსა და სომხეთს შორისაა მოქცეული. ამასთან, ნახიჩევანს 8კმ-იანი საზღვარი აქვს თურქეთთან. გარდა ამისა, სომხეთის სახელმწიფო ტერიტორიებს გარდა, მთიან ყარაბაღსა და ნახიჩევანს შორის მოქცეულია ის ტერიტორიებიც, რომელთაც აზერბაიჯანი ოკუპირებულად მიიჩნევდა და რომელთა ნაწილიც მიმდინარე წლის 27 სექტემბერს დაწყებული ომის შემდეგ დაიკავა.
ოპოზიცია პომპეოს ვიზიტისას მდუმარე აქციას გამართავს
ოპოზიცია აშშ-ს სახელმწიფო მდივნის, მაიკ პომპეოს ჩამოსვლისას მდუმარე აქციას გამართავს. როგორც ევროპული საქართველოს ლიდერმა, გიგი უგულავამ თქვა, აქციაზე არ იქნება პოლიტიკური გამოსვლები და მთავარი მესიჯი იქნება, რომ არჩევნები გაყალბებულია. "ჩვენ ვგეგმავთ აბსოლუტურად განსხვავებული ფორმატის აქციას 17 ან 18 ნოემბერს, რომელიც იქნება ერთი მხრივ მიძღვნილი ტოტალური გაყალბების წინააღმდეგ და ამავე დროს იქნება ერთგვარი საზეიმო დახვედრა ბატონი პომპეოსი. იქნება დაკრული სტიკერები, სოციალური დისტანცია აბსოლუტურად დაცული, მოქალაქეებს ექნებათ შესაძლებლობა, მოვიდნენ, დადგნენ და თქვან ერთადერთი – გაყალბებულია. იქნება მხოლოდ მდუმარე ფორმა საზოგადოების უდიდესი ნაწილის ერთი მესიჯით, რომ არჩევნები გაყალბებულია და ვესალმებით ჩვენს სტრატეგიულ პარტნიორს", – თქვა გიგი უგულავამ. საგარეო საქმეთა სამინისტროს ინფორმაციით, 17 ნოემბერს, საქართველოში აშშ-ს სახელმწიფო მდივანი, მაიკ პომპეო ჩამოვა. ვიზიტი ორდღიანია. შეგახსენებთ, 31 ოქტომბრის საპარლამენტო არჩევნების შედეგების გამოქვეყნებას ოპოზიცური პარტიებისა და ამომრჩევლების პროტესტი მოჰყვა. ისინი არჩევნების შედეგებს არალეგიტიმურად – გაყალბებულად მიიჩნევენ და რიგგარეშე არჩევნების ჩატარებას მოითხოვენ. არც ერთი ოპოზიციური პარტია საქართველოს მე-10 მოწვევის პარლამენტში არ შედის და საქართველოს ისტორიაში პირველად პარლამენტი ერთპარტიულად შეიკრიბება. მანდატებზე უარი თქვეს ევროპულმა საქართველომ, ლელომ, ლეიბორისტულმა პარტიამ, გირჩმა, ენმ-ძალა ერთობაშიამ, სტრატეგია აღმაშენებელმა, მოქალაქეებმა და პუტინისტურმა პატრიოტთა ალიანსმა.
სერგეი ლავროვი - ყარაბაღში არანაირი თურქი სამშვიდობოების გაგზავნა არ მოხდება
თურქეთის სამშვიდობო მისიები მთიანი ყარაბაღის ტერიტორიაზე არ გაიგზავნება, - რუსული მედიის ინფორმაციით, ამის შესახებ რუსეთის საგარეო საქმეთა მინისტრმა სერგეი ლავროვმა განაცხადა. ”თურქეთის რესპუბლიკის სამშვიდობო ნაწილები არ გაიგზავნება მთიან ყარაბაღში. ეს ლიდერების მიერ ხელმოწერილ განცხადებაში გარკვევითაა ნათქვამი,“- განაცხადა სერგეი ლავროვმა. მისი თქმით, თურქი დამკვირვებლების მობილობის საზღვრები შემოიფარგლება იმ გეოგრაფიული კოორდინატებით, რომლებიც განისაზღვრება რუსულ-თურქული მონიტორინგის ცენტრის განსათავსებელად აზერბაიჯანის ტერიტორიაზე, ტერიტორიის იმ ნაწილში, რომელიც არ არის ყარაბაღთან ახლოს და რაზეც შეთანხმება დამატებით მოხდება. ცნობისათვის, რუსეთის თავდაცვის სამინისტროს ინფორმაციით, თურქეთმა და რუსეთმა ხელი მოაწერეს მემონარდუმს, რომელიც ცეცხლის შეწყვეტის მონიტორინგის განმახორციელებელი ერთობლივი ცენტრის შექმნას ითვალისწინებს. გავრცელებული ინფორმაციით, რუსულ-თურქული ერთობლივი ცენტრი აზერბაიჯანში განთავსდება. თურქული მედიის ინფორმაციით კი, თურქეთის პრეზიდენტმა, რეჯეფ თაიფ ერდოღანმა განაცხადა, რომ „თურქეთი მთიან ყარაბაღში სამშვიდობო ძალებს შეუერთდება და ცეცხლის შეწყვეტის შეთანხმების განხორციელებას რუსეთთან ერთად გააკონტროლებს“.
აფხაზეთმა მთიანი ყარაბაღიდან დევნილებს დერეფანი უნდა გაუხსნას - ახრა ავიძბა
აფხაზეთის დე ფაქტო პრეზიდენტის ყოფილმა თანაშემწემ საერთაშორისო საკითხებში, ახრა ავიძბამ განაცხადა, რომ აფხაზეთმა მთიანი ყარაბაღიდან დევნილებს დერეფანი უნდა გაუხსნას. „რთულ სიტუაციაში ადამიანებს დახმარების ხელი უნდა გავუწოდოთ, როგორც ეს ჩვენ ისტორიაში არაერთხელ გაუკეთებიათ წინაპრებს“, - დაწერა ავიძბამ ფეისბუკის გვერდზე. ავიძბა მიიჩნევს, რომ თანამემამულეებმა, პოლიტიკურმა ძალებმა და აფხაზეთის სომხურმა დიასპორამ „პრეზიდენტ“ ასლან ბჟანიას უნდა მიმართონ, რუსეთის პრეზიდენტ ვლადიმირ პუტინთან დღევანდელი შეხვედრისას განიხილოს „დერეფანი არცახის რესპუბლიკიდან ლტოლვილებისთვის“. ახრა ავიძბა დონბასელი სეპარატისტების მხარდასაჭერად უკრაინაში იბრძოდა, რისთვისაც „დონეცკის სახალხო რესპუბლიკის გმირის“ წოდება მიანიჭეს. ავიძბა აქტიურად მონაწილეობდა ოკუპირებულ აფხაზეთში შექმნილ პოლიტიკურ კრიზისში, რომელსაც 2020 წლის იანვარში მოჰყვა დე ფაქტო პრეზიდენტის პოსტიდან რაულ ხაჯიმბას გადადგომა. ნოემბრის დასაწყისში რუსეთის ტერიტორიაზე, სოჭში მყოფმა ავიძბამ განაცხადა, რომ მთიან ყარაბაღში მოხალისეები გააცილა. ახრა ავიძბამ აფხაზეთის ე.წ. პრეზიდენტის თანაშემწის თანამდებობა 9 ნოემბერს დატოვა და მიზეზად ის დაასახელა, რომ „საერთო საქმისადმი რწმენა დაკარგა". დე ფაქტო პრეზიდენტის ადმინისტრაციის ინფორმაციით, აფხაზეთის "პრეზიდენტ" ასლან ბჟანიას, დღეს რუსეთის პრეზიდენტი მიიღებს.
სომხეთში ოპოზიციის რამდენიმე ლიდერი დააკავეს
სომხეთის ეროვნული უსაფრთხოების სამსახურმა ოპოზიციის რამდენიმე ლიდერი დააკავა, - ამის შესახებ ინფორმაციას ადგილობრივი მედია ავრცელებს. მათივე ინფორმაციით, დაკავებულია „დაშნაკცუთიუნის“ პარტიის წევრი არცვიკ მინასიანი, პარტია „სამშობლოს“ წევრი, არსენ ბაბაიანი და პარტია „ეროვნული დღის წესრიგის“ წევრი, არა აკოფიანი. ერევანში გუშინ 17 ოპოზიციური პარტიის მიერ ორგანიზებული მასობრივი საპროტესტო აქცია გაიმართა, რომლის მონაწილეებიც ნიკოლ ფაშინიანის პრემიერ-მინისტრის თანამდებობიდან გადადგომას მოითხოვდნენ. სამართალდამცავებმა აქციის დროს 129 ადამიანი დააკავეს. ოპოზიცია და საზოგადოების ნაწილი მთიან ყარაბაღში საბრძოლო მოქმედებების დასრულების შესახებ მიღებულ განცხადებას აპროტესტებენ, რომელსაც სომხეთის პრემიერ-მინისტრმა ნიკოლ ფაშინიანმა რუსეთის პრეზიდენტ ვლადიმერ პუტინსა და აზერბაიჯანის პრეზიდენტ ილჰამ ალიევთან ერთად 9 ნოემბერს მოაწერა ხელი. სომხეთის დედაქალაქ ერევანში საპროტესტო აქციის გამართვა დღესაც იგეგმება.
უკრაინის პრეზიდენტი საავადმყოფოში გადაიყვანეს
უკრაინის პრეზიდენტი ვოლოდიმირ ზელენსკი, რომელსაც რამდენიმე დღის წინ კორონავირუსი დაუდასტურდა, საავადმყოფოში გადაიყვანეს. უკრაინული მედიის ცნობით, პრეზიდენტი მკურნალობის კურსს კიევში მდებარე „კლინიკა ფეოფანიაში“ გადის. ბოლო მონაცემებით, პანდემიის დაწყების დროიდან უკრაინაში კოვიდ-ინფიცირების 500 865 შემთხვევაა აღრიცხული. გარდაცვლილია 9 145 პაციენტი. ქვეყანაში შეზღუდვები მოქმედებს. ოქტომბერში უკრაინაში ჰოსპიტალიზებული კოვიდ-ინფიცირებული პაციენტების რაოდენობამ წინა თვლის მაჩვენებელს 80%-ით გადააჭარბა. ქვეყნის მთავარი სანიტარული ექიმის განცხადებით, ამ დროისთვის კლინიკებს გეგმიური ჰოსპიტალიზება შეწყვეტილი აქვთ და მხოლოდ იმ კოვიდ-ინფიცირებულებს ემსახურებიან, რომლებსაც დაავადების მძიმე მიმდინარეობა უვლინდებათ.
ჯორჯიის შტატში ბიულეტენებს ხელახლა, ხელით დაითვლიან
აშშ-ის ჯორჯიის შტატში ბიულეტენებს ხელით გადაითვლიან, - მედიის ინფორმაციით, ამ გადაწყვეტილების შესახებ ჯორჯიის სახელმწიფო მდივანმა, ბრედ რაფენსფერგერმა განაცხადა. ხმების დათვლის პროცესი შტატის 159-ვე ოლქში დაიწყება და სავარაუდოდ, 20 ნოემბრისთვის დასრულდება. აღსანიშნავია, რომ ჯორჯიაში ხმა დაახლოებით 5 მილიონმა ამომრჩეველმა მისცა და შტატში ჯო ბაიდენი დონალდ ტრამპს 14 000-ზე მეტი ხმით უსწებს. ცნობისაათვის, მოქმედი პრეზიდენტი დონალდ ტრამპი არჩევნების შედეგებს არ აღიარებს და რამდენიმე შტატში, მათ შორის ჯორჯიასა და უისკონსინში, ხმების ხელახლა დათვლას ითხოვს.
მთიანი ყარაბაღის სამშვიდობო ოპერაციებში რუსული სამხედრო ვერტმფრენებიც ჩაერთვებიან
მთიანი ყარაბაღის კონფლიქტის დარეგულირების მიზნით სამშვიდობო ოპერაციებში „მი-8“ და „მი-24“ ტიპის სამხედრო ვერტმფრენებიც ჩაერთვებიან, - ამის შესახებ ინფორმაციას რუსული მედია ავრცელებს. მათივე ინფორმაციით, რუსეთის შეიარაღებული ძალების გენერალური შტაბის მთავარი ოპერატიული სამმართველოს უფროსმა სერგეი რუდსკოიმ განაცხადა, რომ ოთხშაბათს რუსეთმა მთიან ყარაბაღში 414 რუსი სამშვიდობო, რამდენიმე ათეული სამხედრო მანქანა, ტექნიკა და რვა სამხედრო ვერტმფრენი და დრონი გააგზავნა. მთიან ყარაბაღში რუსული კონტინგენტი, საერთო ჯამში, ცეცხლსასროლი იარაღით შეიარაღებული 1 960 სამხედრო მოსამსახურით, 90 ჯავშანტრანსპორტიორით, 380 ერთეულით ავტომობილითა და სხვა ტექნიკით იქნება წარმოდგენილი. შეგახსენებთ, რუსეთის პრეზიდენტ ვლადიმერ პუტინს, აზერბაიჯანის პრეზიდენტ ილჰამ ალიევსა და სომხეთის პრემიერ-მინისტრ ნიკოლ ფაშინიანს შორის მთიან ყარაბაღში კონფლიქტის დასრულების მიზნით 9 ნოემბერს გაფორმებული ხელშეკრულება სხვა პირობებთან ერთად რეგიონში რუსი სამშვიდობოების განთავსებასაც ითვალისწინებს.
პუტინი 12 ნოემბერს, ასლან ბჟანიას მიიღებს
რუსეთის პრეზიდენტი, ვლადიმირ პუტინი ხვალ, 12 ნოემბერს, ოკუპირებული აფხაზეთის დე ფაქტო პრეზიდენტს ასლან ბჟანიას მიიღებს. ამის შესახებ ინფორმაციას დე ფაქტო პრეზიდენტის პრესსამსახური ავრცელებს. „მოლაპარაკებების დროს, რომელიც სოჭში გაიმართება, იგეგმება ორმხრივი სავაჭრო-ეკონომიკური და კულტურულ-ჰუმანიტარული ურთიერთობების მდგომარეობისა და პერსპექტივის განხილვა, განიხილება ასევე რუსეთის ფედერაციასა და აფხაზეთის რესპუბლიკას შორის მოკავშირეობისა და სტრატეგიული პარტნიორობის შესახებ 2014 წლის 24 ნოემბრის შეთანხმების რეალიზაციის მიმდინარეობა და საკითხები, რომლებიც შეეხება რეგიონული უსაფრთხოების უზრუნველსაყოფად საგარეო-პოლიტიკურ კოორდინაციასა და ურთიერთქმედებას“, - აღნიშნულია განცხადებაში. ოკუპირებული აფხაზეთის დე ფაქტო პრეზიდენტი ასლან ბჟანია მოსკოვში ვიზიტით ოქტომბრის ბოლოდან იმყოფება. რუსეთის პრეზიდენტის პრესმდივანმა დმიტრი პესკოვმა მაშინ განაცხადა, რომ უახლოეს მომავალში პუტინი ბჟანიასთან შეხვედრას არ გეგმავდა. მოსკოვში ვიზიტის ფარგლებში ბჟანია რუსეთის პრეზიდენტის ადმინისტრაციის ხელმძღვანელის მოადგილეს, დმიტრი კოზაკოვს შეხვდა.
საქართველოს მოქალაქეებს ისლანდიაში შესვლა შეეზღუდათ
საქართველოს მოქალაქეებს ისლანდიაში შესვლა შეეზღუდათ. საქართველოს საგარეო საქმეთა სამინისტროს ინფორმაციით, ახალი კორონავირუსის გავრცელების პრევენციის მიზნით ისლანდიის რესპუბლიკაში შემოღებული წესების თანახმად, შეზღუდულია ყველა მესამე ქვეყნის, მათ შორის საქართველოს მოქალაქეების ისლანდიაში შესვლა. გამონაკლისების თაობაზე ინფორმაცია ხელმისაწვდომია ვებ-გვერდზე: https://www.logreglan.is/english/regarding-travel-restrictions-to-iceland-as-a-result-of-covid-19/ რომელ ქვეყანაში რა შეზღუდვები მოქმედებს საქართველოს მოქალაქეების შესვლაზე, იხილეთ დაწვრილებით: ავსტრია – შეზღუდულია საქართველოს მოქალაქეების შესვლა. თუმცა, საქართველოს მოქალაქეებს, რომლებიც არ ფლობენ ავსტრიის ბინადრობის ნებართვას ან გრძელვადიან ვიზას, უფლება აქვთ გამონაკლისი სახით, ტრანზიტული მიზნით ისარგებლონ ავსტრიის აეროპორტებით. ამისათვის მათ თან უნდა იქონიონ დანიშნულების ქვეყანაში გასამგზავრებელი საჭირო დოკუმენტაცია. იმ შემთხვევაში, თუ მგზავრებს უწევთ ტრანზიტული ზონის დატოვება, მათ სხვა დოკუმენტაციასთან ერთად, უნდა წარადგინონ ბოლო 72 საათის განმავლობაში გაცემული კოვიდ ტესტის შედეგი (PCR Test). აგრეთვე, დაიშვებიან სამედიცინო დახმარების მიღების მიზნით მიმავალი მგზავრები, თუ ისინი წარადგენენ აქტუალურ PCR-ტესტს და სამედიცინო დაწესებულების მიერ გაცემულ შესაბამის ცნობას. ნებადართულია ბიზნესმენების, ხელოვანებისა და სპორტსმენების ვიზიტების განხორციელება დადასტურებულ პროექტებსა თუ ღონისძიებებში მონაწილეობის მიღების მიზნით, რაც ასევე დადასტურებული უნდა იყოს შესაბამისი დოკუმენტაციით. სპეციალური განკარგულების თანახმად, გამონაკლისის სახით ავსტრიაში შემოსვლა შეუძლიათ ასევე ავსტრიის უნივერსიტეტებში ჩარიცხულ ქართველ სტუდენტებს, რომლებმაც საზღვარზე უნდა წარადგინონ აქტუალური PCR-ტესტი და უნივერსიტეტში ჩარიცხვის დამადასტურებელი დოკუმენტი (Studienzulassung). ხსენებული შეზღუდვები მოქმედებს 2020 წლის 31 დეკემბრამდე. ბელგიის სამეფო – შეზღუდულია შესვლა. საქართველოდან ბელგიაში შესვლის მსურველ საქართველოს მოქალაქეებს ესაჭიროებათ ბელგიური ეროვნული ვიზა ან ბინადრობის უფლება. სავალდებულო კარანტინი ბელგიაში შემცირდა ეროვნული უსაფრთხოების საბჭოს გადაწყვეტილებით და 1 ოქტომბრიდან არის 7 დღე, 14 დღის ნაცვლად. მგზავრმა უნდა შეავსოს აღნიშნული ფორმა წინასწარ: https://travel.info-coronavirus.be/fr/public-health-passenger-locator-form ბოსნია და ჰერცეგოვინა – დაშვებულია, ტესტის პირობით. ბოსნიისა და ჰერცეგოვინას მინისტრთა საბჭოს გადაწყვეტილებით, 2020 წლის 12 სექტემბრიდან, ბოსნიისა და ჰერცეგოვინას ტერიტორიაზე შესვლა შეეძლება ნებისმიერ უცხოელს. საზღვრის კვეთისას, მგზავრებმა უნდა წარადგინონ PCR-ტესტის უარყოფითი შედეგის დამადასტურებელი დოკუმენტი. ტესტი უნდა იყოს ჩატარებული არაუგვიანეს 48 საათისა, ბოსნიისა და ჰერცეგოვინას მიმართულებით გამგზავრებამდე. ბულგარეთი – დაშვებულია. საქართველო შეყვანილია იმ ქვეყნების სიაში, რომლის მოქალაქეებსაც შეუძლიათ კარანტინის/თვითიზოლაციის გარეშე შესვლა ქვეყნის ტერიტორიაზე, უშუალოდ საქართველოდან ან თურქეთიდან მგზავრობის შემთხვევაში. ასევე, ევროკავშირის/შენგენის სივრცის წევრი სახელმწიფოებიდან საქართველოს მიმართულებით მგზავრ საქართველოს მოქალაქეებსაც შეუძლიათ ბულგარეთის ტერიტორიაზე შესვლა, ტრანზიტის შემთხვევაში. მესამე ქვეყნებიდან/ის გავლით, მიმავალმა საქართველოს მოქალაქეებმა, ქვეყნის ტერიტორიაზე შესასვლელად, უნდა წარმოადგინონ ბოლო 72 საათის განმავლობაში ჩატარებული PCR ტესტის უარყოფითი შედეგის მაჩვენებელი ცნობა. ყველა სხვა ქვეყნიდან, მათ შორის მესამე ქვეყნებიდან, ქვეყანაში შესვლისას, სავალდებულოა ბოლო 72 საათის განმავლობაში ჩატარებული COVID-19 ტესტის სერტიფიკატის წარდგენა (უარყოფითი შედეგით). გაერთიანებული სამეფო – შეზღუდულია. მოქმედებს 14-დღიანი კარანტინი და თვითიზოლაცია. ბრიტანეთში ნებისმიერი სახის ტრანსპორტით მიმავალმა პირმა ელექტრონულად უნდა წარადგინოს საკონტაქტო ინფორმაცია, კერძოდ, მისამართი, სადაც გაატარებს 14-დღიანი თვითიზოლაციის პერიოდს. მათთვის, ვისაც დასარჩენი ადგილი არ აქვს, მთავრობა „შესაბამის სივრცეს გამოყოფს“. ვინც აღნიშნული ზომების დაცვაზე უარს განაცხადებს, შესაძლოა ქვეყანაში არ შეუშვან. პოლიციას მიენიჭება უფლებამოსილება მიიღოს გამაფრთხილებელი ზომები, ხოლო უკიდურეს შემთხვევაში გამოიყენოს ძალა. ყველა პირი, ვინც ამ საკარანტინო წესს დაარღვევს, შესაძლოა 1000 გირვანქა სტერლინგით დაჯარიმდეს. 14-დღიანი სავალდებულო თვითიზოლაციის წესს არ ექვემდებარებიან ნებისმიერ ქვეყნიდან (მათ შორის საქართველოდან) მიმავალი შემდეგ კატეგორიებში შემავალი პირები: პანდემიასთან ბრძოლაში ჩართული სამედიცინო პერსონალი;სატვირთო ავტომანქანებისა და სხვა სატრანსპორტო საშუალებების მძღოლები;კონკრეტული კატეგორიის „საკვანძო მუშახელი“;დიპლომატები და მათი ოჯახის წევრები;ირლანდიიდან, მენის კუნძულიდან და სრუტის კუნძულებიდან მომავალი პირები. გერმანია – შეზღუდულია. 9 ნოემბრიდან შეიცვალა რისკის ქვეყნებს მიკუთვნებული ქვეყნებიდან გერმანიის ფედერაციულ რესპუბლიკაში შესვლის წესები, რომელიც შეეხება როგორც საჰაერო, ისე საზღვაო და სახმელეთო საზღვრით შემავალ პირებს. რისკის ქვეყნებიდან გერმანიაში შესული პირები ვალდებულნი იქნებიან იყვნენ 10 დღე თვითიზოლაციაში კერძო ბინაში ან სასტუმროში. გერმანიაში შემოსვლამდე ისინი ვალდებულნი არიან ვებ-გვერდის www.einreiseanmeldung.de მეშვეობით მოახდინონ მგზავრობის რეგისტრაცია. PCR ტესტის გაკეთება შესაძლებელი იქნება, როგორც წესი, მხოლოდ თვითიზოლაციის მე-5 დღიდან. ამდრომდე შესაძლებელი იყო საზღვარზე ნეგატიური 48-საათიანი კოვიდ ტესტის წარმოდგენით თვითიზოლაციის ჩანაცვლება. ამასთან, გამონაკლისები, მაგ. ტრანზიტული გავლა, ვიზიტი 72 საათამდე, ოფიციალური ვიზიტები, მაღალი რანგის დიპლომატების ვიზიტი და ა. შ. რეგულირებულია ცალკე ფედერალურ მიწების მთავრობათა მიერ ყოველ მიწაზე ინდივიდუალურად. ტურისტული მიზნით მგზავრობა ნებადართული აღარ არის. შესვლაზე შეზღუდვა არ ვრცელდება: პირებზე, რომელთაც გააჩნიათ ევროკავშირის/შენგენის წევრი ქვეყნების და დიდ ბრიტანეთში ხანგრძლივი ბინადრობის უფლება;ევროკავშირის, შენგენის, დიდი ბრიტანეთის, ისლანდიის, ნორვეგიის და ლიხტენშტეინის მოქალაქეების ოჯახის წევრებზე (მეუღლე, არასრულწლოვანი და დაუქორწინებელი შვილი, არასრულწლოვან პირთა მშობელი);სხვა დანარჩენი პირებისათვის, შესვლა დაშვებული იქნება მხოლოდ გადაუდებელი აუცილებლობის შემთხვევაში.ჯანდაცვის სფეროს პერსონალი, მეცნიერ-მკვლევარები, მომვლელი პერსონალი;მაღალკვალიფიციური მუშახელი;სტუდენტები (რიგ შემთხვევაში).ტრანზიტული გავლა გერმანიაში ევროკავშირის სხვა სახელმწიფოში, შენგენის წევრ-ქვეყანაში ან დიდ ბრიტანეთში შესასვლელად დასაშვებია იმ შემთხვევაში, თუ: არ არსებობს დანიშნულების სახელმწიფოში პირდაპირი შესვლის საშუალება;გერმანიაში, როგორც ტრანზიტულ ქვეყანაში გავლის პერიოდი არ უნდა აღემატებოდეს დანიშნულების სახელმწიფოში შესასვლელად საჭირო გონივრულ ვადას;პირს გააჩნია დანიშნულების ქვეყანაში შესვლის ნებართვა.ტრანზიტული გავლის დროს წარმოსადგენია 1,2, და მე-3 პუნქტებში აღნიშნული გარემოებების დამადასტურებელი დოკუმენტები (სახმელეთო ან საჰაერო სამგზავრო ბილეთი დანიშნულების ქვეყანაში და სხვა). ზემოაღნიშნული პირობებით შესაძლებელია გერმანიაში ტრანზიტული გავლა როგორც საჰაერო, ასევე სახმელეთო გზით. დანიის სამეფო – შეზღუდულია. 23 ოქტომბერს, დანიის საკოორდინაციო საბჭოს გადაწყვეტილებით, საზღვარი ჩაიკეტა საქართველოს მოქალაქეებისთვის. საზღვრის ჩაკეტვის შემდეგ, საქართველოს მოქალაქეებს ქვეყნაში შესვლა შეეძლებათ მხოლოდ დასაბუთებული აუცილებლობის შემთხვევაში (worthy purpose). ამავდროულად, საზღვარზე უნდა წარადგინონ COVID19-ტესტი, ჩატარებული ბოლო 72 საათში. ესპანეთი – შეზღუდულია. ესპანეთის სამეფომ საქართველო ამოიღო ე.წ „მწვანე“ ქვეყნების სიიდან. ცვლილება ძალაში შედის 1 ნოემბრის 00:00 საათიდან. შეიზღუდა უვიზო რეჟიმის ფარგლებში საქართველოს მოქალაქეების შესვლა. გამონაკლისით სარგებლობენ ქვემოთ მოცემული კატეგორიის მოქალაქეები: • ევროკავშირის და შენგენის ზონის ქვეყნების ან ანდორის ბინადრობის ნებართვის მქონე მოქალაქეები რომელიც მიემართებიან საკუთარ საცხოვრებელ ადგილზე, ფლობენ ესპანეთის სამეფოში შემოსვლის უფლებას. • ევროკავშირის და შენგენის ზონის ქვეყნების გრძელვადიანი ვიზის მქონე მოქალაქეები, რომელიც მიემართებიან საცხოვრებელ ადგილზე, ფლობენ ესპანეთის სამეფოში შესვლის უფლებას, შესაბამისად, სტუდენტური და სამუშაო ვიზებიც შედის ამ კატეგორიაში. მგზავრებმა ესპანეთში შემოსვლამდე 48 საათით ადრე უნდა შეავსონ სპეციალური ონლაინ სარეგისტრაციო ფორმა ვებ-გვერდზე: https://www.spth.gob.es/ და მიღებული QR-კოდი წარადგინონ საზღვარზე. მგზავრებს ქვეყანაში შემოსვლისას აეროპორტში უზომავენ სიცხეს, ხოლო სიცხის აღმოჩენის შემთხვევაში გადაჰყავთ სამედიცინო დაწესებულებაში სადაც სახელმწიფოს ხარჯზე უტარდება COVID-19-ზე ტესტი. დადებითი პასუხის შემთხვევაში პაციენტი გადაყვანილი იქნება მის მიერ ონლაინ სარეგისტრაციო ფორმაში მითითებულ მისამართზე, სადაც პაციენტი თვითიზოლაციის რეჟიმში იქნება ექიმების მეთვალყურეობის ქვეშ. ესტონეთი – შეზღუდულია. ესტონეთში გამგზავრება შეეძლებათ მხოლოდ კორონავირუსის სიმპტომების არ მქონე შემდეგი კატეგორიის პირებს: ტალინში აკრედიტებულ დიპლომატებს და მათი ოჯახის წევრებს;სამთავრობო დელეგაციების წევრებს, რომლებიც ესტონეთში მიემგზავრებიან ოფიციალური მოწვევის საფუძველზე;სამუშაო ან სასწავლო მიზნით მიმავალ პირებს (ექვემდებარებიან 14-დღიან თვით-იზოლაციას);საერთაშორისო სამხედრო თანამშრომლობით გათვალისწინებული მისიით მიმავალ პირებს;სამედიცინო სფეროს წარმომადგენლებს, რომლებიც პასუხისმგებელი არიან გადაუდებელი დახმარების აღმოჩენაზე;მგზავრთა გადამყვანი და ტვირთების გადამზიდავი საერთაშორისო სატრანსპორტო საშუალებების პერსონალს და პირებს, რომლებიც პასუხისმგებელი არიან სატრანსპორტო საშუალებების შეკეთებასა და ტექნიკურ გამართვაზე;პირებს, რომლებსაც ეხებათ კრიტიკული სერვისების უწყვეტობის უზრუნველყოფა;პირებს, რომელთა ესტონეთში შემოსვლა მიზნად ისახავს ესტონეთში მოქმედი კომპანიების ტექნიკური მოწყობილობების შეკეთებას, ტექნიკურ გამართვას ან საგარანტიო მომსახურებას, ასევე ინფორმაციულ და საკომუნიკაციო ტექნოლოგიებთან დაკავშირებულ საქმიანობას, რომელთა შესრულება აუცილებელია კომპანიის ოპერირების უზრუნველსაყოფად;პირებს, რომლებიც კვეთენ ესტონეთის საზღვარს სამშობლოში დასაბრუნებლად;პირებს, რომლებიც უშუალოდ ენათესავებიან ესტონეთის მოქალაქეს ან ბინადრობის ნებართვის მქონე პირებს;სპორტული შეჯიბრებების, ასევე, საჯარო ღონისძიებების მონაწილეებს ან ორგანიზატორებს;პირებს, რომლებსაც ესტონეთის პოლიციისა და საზღვრის დაცვის სამსახურმა, სპეციალური აპლიკაციის საფუძველზე, მიანიჭა ესტონეთში შემოსვლის ნებართვა. (ექვემდებარებიან 14-დღიან თვით-იზოლაციას; ასეთი ნებართვა, როგორც წესი, გაიცემა გადაუდებელი ოჯახური მიზეზების გათვალისწინებით). ირლანდია – ამ ეტაპზე, გაიცემა მხოლოდ გრძელვდადიანი და გადაუდებელი (emergency) ვიზა. მოქმედებს ერთი საერთო რეგულაცია შემომსვლელ ყველა პირთათვის განურჩევლად მოქალაქეობისა და ჩამოსული ქვეყნისა - სავალდებულოა 2-კვირიანი თვითიზოლაცია ახალი რეგულაციის დარღვევის შემთხვევაში, ჯარიმა 2500 ევროს შეადგენს ან 6 თვით თავისუფლების აღკვეთას ითვალისწინებს. ამ რეგულაციისგან თავისუფლდებიან პილოტები, გემის ეკიპაჟის წევრები, საერთაშორისო გადამზიდავები, ტრანზიტული მგზავრები და დიპლომატები. ისლანდია – დაშვებულია, ტესტის პირობით. ნებადართულია, თუმცა მგზავრებმა უნდა გაიარონ წინასწარი რეგისტრაცია და აირჩიონ ორჯერადი PCR ტესტის ჩატარება ან 2 კვირიანი კარანტინი. ტესტირება ფასიანია, წინასწარ გადახდის შემთხვევაში ფასი 9000 ისლანდიური კრონა (დაახლ. 65 აშშ დოლარი) და ადგილზე 11000 კრონა (დაახლ. 78 აშშ დოლარი) https://visit.covid.is/ - წინასწარი რეგისტრაციის ბმული. იტალია – დაშვებულია, 14-დღიანი თვითიზოლაციის პირობით. ჩასვლისას მგზავრები ავსებენ სპეციალურ ფორმას: https://www.esteri.it/mae/en/ministero/normativaonline/decreto-iorestoacasa-domande-frequenti/focus-cittadini-italiani-in-rientro-dall-estero-e-cittadini-stranieri-in-italia.html სასურველია, რომ მოგზაურმა შეავსოს აღნიშნული ფორმა წინასწარ: https://entercroatia.mup.hr/ თვითიზოლაციის ვალდებულება რამდენიმე გამონაკლისს უშვებს, მათ შორის, სატრანსპორტო საშუალებების ეკიპაჟების; იტალიაში ხანმოკლე სამუშაო ვიზიტის (120 სთ-მდე); ჯანმრთელობასთან ან გადაუდებელ საჭიროებასთან დაკავშირებული ვიზიტის; აეროპორტის ტრანზიტის შემთხვევებისთვის. ვინაიდან, ჯერჯერობით შეჩერებულია პირდაპირი ფრენები იტალიასა და საქართველოს შორის, და შესაძლოა იტალიის ტერიტორიაზე შემოსვლა სხვადასხვა ავიაკომპანიების მეშვეობით, მოქალაქემ თან უნდა იქონიოს ავტო-დეკლარაციის შევსებული ანკეტის რამდენიმე კოპია, საჭიროებისამებრ გამოსაყენებლად. კვიპროსი – შეზღუდულია. საქართველო კვიპროსმა შეიყვანა C კატეგორიის ქვეყნებში. C კატეგორიის ქვეყნებიდან ტურისტების ან ვიზიტორების შესვლა კვიპროსში აკრძალულია. შესვლის უფლება აქვთ მხოლოდ: კვიპროსის მუდმივ მაცხოვრებლებს და სპეციალური ნებართვის მქონე პირებს (მაგ. დიპლომატებს). საზღვრის კვეთისას სავალდებულოა 72 საათით ადრე ჩატარებული PCR ტესტის უარყოფითი პასუხის წარდგენა. კვიპროსში შესვლიდან 14 დღის განმავლობაში სავალდებულოა თვითიზოლაცია, რომლის დასრულებამდე 48 სათით ადრე, ვიზიტორებმა მეორედ უნდა ჩაიტარონ ტესტი, საკუთარი ხარჯებით. გამგზავრებამდე 24 საათით ადრე სავალდებულოა ე.წ. Flight Pass შევსება. https://cyprusflightpass.gov.cy/ ლატვია – დაშვებულია, თვითიზოლაციის პირობით. საქართველოს მოქალაქეები 19 სექტემბრიდან ექვემდებარებიან სავალდებულო 10 დღიან თვითიზოლაციას. ვალდებულება არ ვრცელდება იმ პირებზე, რომლებიც ლატვიის გავლით მიემგზავრებიან სხვა ქვეყნებში. ასეთ შემთხვევაში, ჩამოსულმა მგზავრმა მაქსიმუმ 12 საათში უნდა დატოვოს ლატვიის ტერიტორია. აღნიშნული წესი არ ვრცელდება ლატვიაში აკრედიტებულ დიპლომატებზე. ეპიდემიოლოგიური ვითარებიდან გამომდინარე, ლატვიის მთავრობის გადაწყვეტილებით, 12 ოქტომბრიდან, ლატვიის რესპუბლიკაში შემოსვლის მსურველმა პირებმა 48 საათით ადრე უნდა შეავსონ ელექტრონული კითხვარი შემდეგ ვებ გვერდზე www.covidpass.lv. კითხვარის შევსების შემდეგ, პირს ელექტრონულად მიენიჭება QR კოდი, რომელიც მან ლატვიის საზღვრის კვეთისას უნდა წარუდგინოს მესაზღვრეს. კითხვარში პირის მიერ მოხდება სახელის, გვარის, პერსონალური საიდენტიფიკაციო კოდის, ლატვიაში საცხოვრებელი ადგილის და ტელეფონის ნომრის მითითება, ასევე იმ ქვეყნის/ქვეყნების მითითება, სადაც ბოლო 14 დღის განმავლობაში იმყოფებოდა პირი. არასრულწლოვანი პირებისთვის კითხვარის შევსება მოხდება მშობლების ან მეურვეების მიერ. კითხვარში ასახული ინფორმაცია ავტომატურად ეგზავნება ლატვიის სამართალდამცავ ორგანოებს - სახელმწიფო პოლიციას, საზღვრის დაცვის სამსახურს, აგრეთვე დაავადებათა პრევენციისა და კონტროლის ცენტრს. პირადი მონაცემების შენახვა მოხდება 30 დღის განმავლობაში. აღნიშნული ვადის გასვლის შემდეგ, პერსონალური მონაცემები ავტომატურად წაიშლება. თვითიზოლაცია არ შეეხებათ ლატვიაში აკრედიტებულ დიპლომატებს. ლიეტუვა – შეზღუდულია. საქართველოდან ლიეტუვაში შესვლის მსურველ საქართველოს მოქალაქეებს ესაჭიროებათ ლიეტუვის ეროვნული ვიზა ან ბინადრობის უფლება და/ან ისინი უნდა იყვნენ ლიეტუვის მოქალაქის ან ლიეტუვაში მუდმივი ბინადრობის ნებართვის მქონე პირის ოჯახის წევრები. ამასთან, საქართველოს მოქალაქეებს ევალებათ წინასწარ ჩატარებული (ბოლო 72 საათის განმავლობაში) კოვიდ-ტესტის უარყოფითი პასუხის წარდგენა ლიეტუვის საზღვარზე; საქართველოდან შემოსულ ყველა პირს - საქართველოს მოქალაქეთა ჩათვლით - ლიეტუვაში შემოსვლის შემდეგ, 2 კვირა თვითიზოლაციაში ყოფნა მოუწევთ. ლიეტუვაში შემოსვლის მსურველებს ესაჭიროებათ ელექტრონული ფორმის შევსება და QR კოდის წარდგენა თვითმფრინავში, ავტობუსსა თუ ბორანში ჩასხდომამდე: https://keleiviams.nvsc.lt/en/form 14-დღიანი თვითიზოლაციის პერიოდის შემცირება შესაძლებელია იზოლაციის მე-8 დღეს კოვიდ-ტესტის ჩატარებით - უარყოფითი შედეგის შემთხვევაში, შესაძლებელია პერიოდის შემცირება 10 დღემდე. ლუქსემბურგი – დაშვებულია. გაიხსნა საზღვარი ევროკავშირის საბჭოს მიერ აღიარებულ ყველა ქვეყანისთვის უპირობოდ. ნიდერლანდები – შეზღუდულია. გამონაკლისის სახით, საქართველოდან ნიდერლანდებში შესვლა შეუძლია საქართველოს მოქალაქეს/საქართველოში მუდმივად მცხოვრებ პირს, რომელიც: ფლობს ევროკავშირის წევრი ქვეყნის, შენგენის ზონის ქვეყნის ან გაერთიანებული სამეფოს მოქალაქეობას ან/და ცხოვრობს ამ ქვეყნებში. ნიდერლანდებში შესვლის უფლება აქვთ ასეთი პირების ოჯახის წევრებსაც;ფლობს ნორვეგიის, ისლანდიის, შვეიცარიის, მონაკოს, ანდორას, სან მარინოს ან წმინდა საყდრის (ვატიკანის) მოქალაქეობას ან ბინადრობის ნებართვას. ნიდერლანდებში შესვლის უფლებით შეიძლება ისარგებლონ ასეთი პირის ოჯახის წევრებმაც, რომლებიც მგზავრობენ მასთან ერთად, ან ერთიანდებიან უკვე ნიდერლანდებში მყოფ ასეთ პირთან. აღნიშნული ოჯახის წევრმა უნდა შეამოწმოს, ვრცელდება თუ არა მასზედ სავიზო მოთხოვნები; ფლობს ბინადრობის ბარათს ან ბინადრობის ნებართვას გრძელვადიანი რეზიდენტების შესახებ ევროკავშირის 2003/109/EEC დირექტივის შესაბამისად. ნიდერლანდებში შესვლის უფლებით შეიძლება ისარგებლონ ასეთი პირის ოჯახის წევრებმაც, რომლებიც მგზავრობენ მასთან ერთად, ან ერთიანდებიან უკვე ნიდერლანდებში მყოფ ასეთ პირთან. აღნიშნული ოჯახის წევრმა უნდა შეამოწმოს, ვრცელდება თუ არა მასზე სავიზო მოთხოვნები; სხვა გამონაკლისები და დეტალები მოცემულია: https://www.geoconsul.gov.ge/ka/newsFeed/nId/212 ნორვეგია – შეზღუდულია, თუმცა გამონაკლისები ეხება შემდეგ კატეგორიებს: ბინადრობის ნებართვის მქონე პირებს, ოჯახის წევრის, პარტნიორის/შეყვარებულის მოსანახულებლად მიმავალ პირებს; სტუდენტებს. ე.წ. „მესამე ქვეყნებიდან“ დაიშვებიან ნორვეგიაში ოჯახის ან მყარი პარტნიორული კავშირის მქონე (მინიმუმ 9 თვის ურთიერთობა) პირები. ოჯახის წევრებად მიიჩნევიან მეუღლეები, პარტნიორები და თანამაცხოვრებლები, მშობლები და შვილები 21 წლამდე, ასევე აღმავალი და დაღმავალი ხაზის ნათესავები. მათ შეეძლებათ ნორვეგიაში მყოფი ოჯახის წევრ(ებ)ის მონახულება. ვისაც გამონაკლისის წესით შეუშვებენ, დაექვემდებარებიან 10-დღიან კარანტინს სახლში ან წინასწარ შერჩეულ სხვა ადგილას. პოლონეთი – შეიზღუდა, დაშვებულია მხოლოდ გარკვეული კატეგორიები. ტურისტული მგზავრობა არ არის დაშვებული. პოლონეთის რესპუბლიკაში შემოსვლა შეუძლიათ: 1. პოლონეთის მოქალაქეებს; 2. უცხო ქვეყნის მოქალაქეებს, რომლებიც პოლონეთის მოქალაქეების ოჯახის წევრები არიან (მეუღლე, შვილი); 3. პოლონეთის ბარათის (ე.წ. Karta Polaka) მფლობელებს; 4. დიპლომატებს და მათი ოჯახის წევრებს; 5. პოლონეთის ტერიტორიაზე დროებითი, ან მუდმივი ბინადრობის ნებართვის მქონე უცხო ქვეყნის მოქალაქეებს; 6. დასაქმების ნებართვის მქონე (სეზონური სამუშაო ნებართვა, დამსაქმებლის დეკლარაცია უცხოელის დასაქმებაზე, ან სამუშაო ნებართვა) უცხო ქვეყნის მოქალაქეებს, რომლებიც დასაქმებულები არიან პოლონეთის ტერიტორიაზე, ან საზღვარზე წარადგენენ სამუშაოს დაწყების დამადასტურებელ დოკუმენტებს; 7. უცხო ქვეყნის იმ მოქალაქეებს/მძღოლებს, რომლებსაც ხალხი გადაჰყავს, ან ტვირთი გადააქვთ; 8. უცხო ქვეყნის იმ მოქალაქეებს/მძღოლებს, რომლებიც ტრანზიტული მიზნით გადიან პოლონეთის ტერიტორიას; 9. პოლონეთში მოსწავლის, სტუდენტის ან დოქტორანტის სტატუსის მქონე პირებს; 10. მეცნიერებს, რომლებიც კვლევებს აწარმოებენ პოლონეთის ტერიტორიაზე; 11. ევროკავშირის წევრი ქვეყნის მოქალაქეს, ევროპული ეკონომიკური ზონის შეთანხმების მხარის, ევროპის თავისუფალი ვაჭრობის ასოციაციის წევრი ქვეყნის და შვეიცარიის კონფედერაციის მოქალაქეებს და მათ ოჯახის წევრებს (მეუღლე, შვილი) 12. ევროკავშირის ტერიტორიაზე მუდმივი ბინადრობის ნებართვის მქონე მოქალაქეებს და მათი ოჯახის წევრებს (მეუღლე, შვილი), რომლებიც ტრანზიტული მიზნით გადიან პოლონეთის ტერიტორიას; ავიამიმოსვლაზე დაწესებული შეზღუდვები: აიკრძალა პირდაპირი საჰაერო მიმოსვლა საქართველოსთან. პირდაპირი ჩარტერული რეისით ჩამოსული მგზავრები ექვემდებარებიან 10-დღიან თვითიზოლაციას. საზღვრის კვეთისას მოქალაქე ვალდებულია მიუთითოს მისამართი, სადაც გაივლის თვითიზოლაციას/კარანტინს. 10-დღიან თვითიზოლაციას არ ექვემდებარებიან: 1. პოლონეთის მოქალაქეები და მათი ოჯახის წევრები; 2. პოლონეთში მოსწავლის, სტუდენტის და დოქტორანტის სტატუსის მქონე უცხო ქვეყნის მოქალაქეები; 3. პოლონეთის და მოკავშირე ქვეყნების შეიარაღებული ძალების ჯარისკაცები და დანარჩენი ძალოვანი სტრუქტურების წარმომადგენლები; 4. დიპლომატიური მისიების წევრები და მათი ოჯახის წევრები; 5. ევროკავშირის და ევროპის თავისუფალი ვაჭრობის ასოციაციის წევრი ქვეყნის მოქალაქეები და მათი ოჯახის წევრები; 6. ე.წ. ტრანზიტული მგზავრები და მათი ოჯახის წევრები, რომლებსაც გააჩნიათ ევროკავშირის, ან ევროპის თავისუფალი ვაჭრობის ასოციაციის წევრ ქვეყანაში მუდმივი ბინადრობის ნებართვა, რომლებიც პოლონეთის გავლით მიემგზავრებიან მუდმივად საცხოვრებელ ქვეყანაში. პორტუგალია – შეიზღუდა პორტუგალიის რესპუბლიკაში საქართველოს მოქალაქეების შესვლა. შეზღუდვა არ ეხება საქართველოს იმ მოქალაქეებს, რომლებიც პორტუგალიაში მიემგზავრებიან სასწავლებლად, სამუშაოდ ან ოფიციალური ვიზიტით. ასევე, პორტუგალიის ბინადრობის ნებართვის მქონე პირებს და ტრანზიტულ მგზავრებს. პორტუგალიაში შემოსვლის მსურველებმა უნდა წარმოადგინონ ბოლო 72 საათის განმავლობაში გაკეთებული PCR ტესტის შედეგები. რუმინეთი – დაშვებულია თვითიზოლაციის პირობით. 7 ოქტომბრიდან, რუმინეთის საგანგებო სიტუაციების ეროვნული კომიტეტის მიერ დამტკიცებული მაღალი ეპიდემიოლოგიური რისკის ქვეყნების განახლებულ სიაში (სიაში არის საქართველოც) არსებული ქვეყნების მოქალაქეები, რუმინეთში შემოსვლისას, დაექვემდებარებიან 14 დღიან კარანტინს. გასათვალისწინებელია, რომ მგზავრები, რომლებიც რუმინეთის ტერიტორიაზე ყოფნას გეგმავენ არა უმეტეს 3 დღისა (72სთ.), გათავისუფლდებიან კარანტინის/ თვითიზოლაციის ვალდებულებისგან, თუ წარმოადგენენ უკანასკნელ 48 საათში გაცემულ სამედიცინო ცნობას ვირუსის არქონის შესახებ. კარანტინიდან /თვითიზოლაციიდან გასვლა შესაძლებელი იქნება მე-10 დღეს, თუკი მე-8 დღეს გაკეთებული ტესტის პასუხი უარყოფითი აღმოჩნდება. ბუქარესტში აკრედიტებული დიპლომატიური მისიების, საკონსულო დაწესებულებების და სხვა დიპლომატიური წარმომადგენლობების წევრები და დიპლომატიური პასპორტების მფლობელები გათავისუფლდებიან კარანტინიდან, თუ მათ არ აღენიშნებათ კოვიდ 19-ის სიმპტომები. ფრენები ამერიკის შეერთებული შტატებიდან/ რეგიონებიდან, რომლებიც მითითებულია ჩამონათვალში, კვლავ აგრძელებენ ოპერირებას. საბერძნეთი – შეზღუდულია. 26 ოქტომბრიდან შეიზღუდა საქართველოს მოქალაქეების შესვლა, გარდა: ევროკავშირის წევრი სახელმწიფოების მოქალაქეების მეუღლეები და 18 წლამდე არასრულწლოვანი შვილები;პირები რომლებიც მოემგზავრებიან გადაუდებელი საჭიროების გამო როგორიცაა, ჯანმრთელობის მდგომაროება, ოჯახური მდგომაროება, საქმიანი ვიზიტი, ის პირები ვინც საჭიროებს საერთაშორისო დაცვას;სამედიცინო სფეროს თანამშრომლები, ჯანდაცვის სფეროს მკვლევარები იმ შემთხვევაში თუ შემოსვლისას დაასაბუთებენ ვიზიტის მიზნობრიობას და საჭიროებას;ევროკავშირის წევრი სახელმწიფოს გრძელვადიანი ბინადრობის ნებართვის მქონე პირები;სამთავრობო დელეგაციის წევრები;დიპლომატიური თანამდებობის პირები, საერთაშორისო ორგანიზაციების თანამშრომლები, ჰუმანიტარული ორგანიზაციების თანამშრომლები, სამხედრო უსაფრთხოების თანამშრომლები;სატრანსპორტო სფეროს თანამშრომლები, მათ შორის მეზღვაურები, საჰაერო ხომალდების თანამშრომლები, სატვირთო ტრანსპორტის მძღოლები;ტრანზიტული მგზავრები;სტუდენტები;მოხუცი და შეზღუდული შესაძლებლობების მქონე პირების მომვლელები, რომელთაც გააჩნიათ შესაბამისი მეურვეობის დამადასტურებელი დოკუმენტები;სასოფლო სამეურნეო სფეროში დასაქმებული სეზონური მუშები. (ასეთ პირები ვალდებულები არიან წარადგინონ დოკუმენტები, რომ გავლილი აქვთ სამედიცინო ლაბორატორიული გამოკვლევები);მესამე სახელმწიფოს მოქალაქეები რომლებიც ვერ ხვდებიან ვერცერთ ზემოთჩამოთვლილი კატეგორიაში აქვთ უფლება მიმართონ ადგილსამყოფელ ქვეყნებში საბერძნეთის საკონსულო სამსახურებს და მათი პერსონალური ან ბიზნეს ინტერესებიდან გამომდინარე დასაბუთებულად მოითხოვონ გამონაკლისის დაშვება. გამგზავრებამდე 24 საათით ადრე სავალდებულოა ელ. ფორმის შევსება https://travel.gov.gr/#/ საფრანგეთი – შეზღუდულია. ამ ეტაპისთვის საფრანგეთში საქართველოს მოქალაქეები შედიან შეზღუდვების გარეშე, მაგრამ ქვეყნის ტერიტორიაზე მოქმედებს საყოველთაო კარანტინი. საფრანგეთის ხელისუფლებამ ცვლილებები შეიტანა საფრანგეთის ტერიტორიაზე საქართველოდან მიმავალ მგზავრთა შესვლასთან დაკავშირებულ რეგულაციებში. შეზღუდვები დაწესდა საქართველოდან და ევროკავშირის შენგენის ზონის სხვა არაწევრი ქვეყნებიდან საფრანგეთის მეტროპოლიაში შესვლაზე. 11 ნოემბრიდან თუ რომელი კატეგორია შეძლებს საფრანგეთის ტერიტორიაზე შესვლას იხილეთ მითითებულ ბმულზე: https://geoconsul.gov.ge/ka/newsFeed/nId/22 სერბეთი – საქართველოს მოქალაქეებზე შეზღუდვა არ არის. სერბეთში რუმინეთიდან, ბულგარეთიდან, ხორვატიიდან ან ჩრდილო მაკედონიიდან, შემოსვლის შემთხვევაში სავალდებულოა 48 საათით ადრე გაკეთებული PCR ტესტის წარდგენა. სლოვაკეთი – დაშვებულია, მხოლოდ გარკვეული კატეგორიისათვის. საქართველოს მოქალაქეს/მესამე ქვეყნის მოქალაქეს სლოვაკეთში გამგზავრება შეუძლია იმ შემთხვევაში, თუ ფლობს სლოვაკეთში ცხოვრების/მუშაობის უფლებას, არის სლოვაკეთის მოქალაქის ან სლოვაკეთში ცხოვრების/მუშაობის მქონე პირის ოჯახის წევრი. თუ საქართველოს მოქალაქე შედის მწვანე ზონის ქვეყნიდან ამ შემთხვევაში, მას ვალდებულება აქვს ქვეყანაში შესვლისთანავე დარეგისტრირდეს შემდეგ ვებ-გვერდზე: www.korona.gov.sk გაიაროს 5 დღიანი თვითიზოლაცია და მეხუთე დღეს ჩაიტაროს PCR ტესტი. თუ მოქალაქე შედის სლოვაკეთში ყვითელი ზონის ქვეყნიდან მას აქვს ვალდებულება წარადგინოს ბოლო 72 საათის განმავლობაში გაკეთებული ტესტი და დარეგისტრირდეს ამავე ვებ გვერდზე. თუ მოქალაქეს ბოლო 14 დღის განმავლობაში იმყოფებოდა მაღალი რისკის ანუ წითელი ზონის ქვეყანაში ასეთ შემთხვევაში აქვს ვალდებულება წარადგინოს ბოლო 72 საათის განმავლობაში გაკეთებული ტესტი და დარეგისტრირდეს ამავე ვებ გვერდზე www.korona.gov.sk გაიაროს 5 დღიანი თვითიზოლაცია და შემდეგ PCR ტესტი. იმ მოქალაქეებს, რომლებიც ბოლო 14 დღის განმავლობაში იმყოფებოდნენ წითელი ზონის/მაღალი რისკის ქვეყნებში, სლოვაკეთში ჩასვლა შეუძლიათ მხოლოდ ავსტრიის, პოლონეთის და/ან ჩეხეთის გავლით (ცნობისთვის ჩეხეთი სლოვაკეთს წითელ ზონაში ყავს შეყვანილი). სლოვაკეთის ტერიტორიაზე პირდაპირი საჰაერო გზით დაბრუნების შემთხვევაში ზემოთ მოცემულ ვებ-გვერდზე დარეგისტრირება წინასწარ არის სავალდებულო. სლოვენია – შეზღუდულია. სლოვენიამ საქართველო შეიყვანა ე.წ. „წითელ სიაში“, რაც გულისხმობს 14 დღიან სავალდებულო თვითიზოლაციას. თუ მოქალაქე სლოვენიის საზღვარზე წარმოადგენს ევროკავშირის ან შენგენის ტერიტორიაზე აღებულ კოვიდ-19 უარყოფით ტესტს, რომელიც აღებულია არა უგვიანეს 48 საათისა, მაშინ არ არის აუცილებელი თვით-იზოლაცია. ტესტი ასევე შეიძლება ჩატარდეს სლოვენიაში და უარყოფითი პასუხის შემთხვევაში პირს შეუძლია დაუყოვნებლივ დაასრულოს სავალდებულო თვითიზოლაცია. ამ შემთხვევაში ტესტის საფასურს იხდის თავად პირი. გამონაკლისი - დიპლომატიური პასპორტის მფლობელთათვის. ტრანზიტი კვლავ 12 საათის განმავლობაშია დაშვებული. უნგრეთი – შეზღუდულია. უცხოეთის მოქალაქეებს (Non-Hungarian nationals) - ეკრძალებათ უნგრეთში შემოსვლა. გამონაკლისი დაიშვება შემდეგ შემთხვევებში:ა) პირადად გამოცხადება სასამართლო ორგანოში ან ოფიციალურ ადმინისტრაციულ პროცესზე, რის შესახებაც წერილობით იუწყება ზემოხსენებული სასამართლო ან ადმინისტრაციული ორგანო;ბ) კომერციული ან სხვა სამუშაო საქმიანობასთან დაკავშირებული ვიზიტი, რომლის შესახებაც მოწვევის წერილში იუწყება ცენტრალური ადმინისტრაციული ორგანო, დამოუკიდებელი სუბიექტი (მაგ. კომპანია) ან ავტონომიური ადმინისტრაციული ორგანო;გ) ვიზიტი სამედიცინო დაწესებულებაში, რის აუცილებლობასაც ადასტურებს მიმღები სამედიცინო დაწესებულების ოფიციალური წერილი;დ) უცხოელი სტუდენტები, რომლებიც განათლებას იღებენ უნგრეთის უნივერსიტეტებში;ე) საზღვრის გადაკვეთა სატვირთო გადაზიდვებთან დაკავშირებით რომლის მიზანს წარმოადგენს გადაზიდვების საწყის წერტილამდე მისვლა ან დანიშნულების ადგილიდან დაბრუნება, რაც დადასტურებული იქნება დამსაქმებლის მიერ გაცემული დოკუმენტით;ვ) ოჯახის წევრის ქორწილზე, ნათლობაზე ან დაკრძალვაზე დასწრება;ზ) ნათესავების მოვლა-პატრონობა;თ) მნიშვნელოვან საერთაშორისო სპორტულ, კულტურულ და რელიგიური ხასიათის ღონისძიებებზე დასწრება;ი) სხვა გონივრული მიზეზი, რომელიც არ არის მითითებული ჩამონათვალში;უნგრეთის მოქალაქეებთან თანაბარი უფლებებით სარგებლობენ: ა) პირები, რომელთაც აქვთ უნგრეთში მუდმივი ბინადრობის ნებართვა (ასევე ამ პირების ოჯახის წევრები, ნათესაური კავშირის დამადასტურებელი დოკუმენტის წარდგენის შემთხვევაში); ბ) პირები, რომელთაც აქვთ უნგრეთში 90 დღეზე მეტი ხნით ბინადრობის ნებართვა და საზღვრის გადმოკვეთისას წარადგენენ ამ დოკუმენტს; (D კატეგორიის ვიზაც ამ ტიპის ბინადრობის ნებართვას უთანაბრდება). ფინეთი – შეზღუდულია. ფინეთში შესვლა შესაძლებელი იქნება მხოლოდ სამუშაო, სასწავლო ან სხვა აუცილებელი მიზნისთვის. ამ შემთხვევაში, საქართველოს მოქალაქე დაექვემდებარება აუცილებელ ორ კვირიან თვითიზოლაციას.ასევე რეკომენდირებულია PCR ტესტის ჩატარება ქვეყანაში შესვლამდე 72 საათით ადრე და შესვლის შემდეგ 72 საათის განმავლობაში. ტესტირების პასუხის მიღებამდე მოქალაქე უნდა დარჩეს თვითიზოლაციაში. დადებითი პასუხის შემთხვევაში პირი დაექვემდებარება აუცილებელ კარანტინს. შვედეთი – შეზღუდულია, საქართველო ამოღებულია „უსაფრთხო ქვეყნების“ სიიდან. შვედეთი 2 ნოემბრიდან შეზღუდავს საქართველოდან მომავალი მგზავრების ქვეყნის ტერიტორიაზე შემოსვლას. შვეიცარია – 3 ნოემბრიდან საქართველოს მოქალაქეებისათვის დაწესდა შვეიცარიაში შესვლის შეზღუდვები. საქართველო, სხვა ქვეყნებთან ერთად, კვლავ შეყვანილი იქნა მაღალი რისკის ქვეყნების სიაში. ზოგადად, შეზღუდვა ეხება ყველას, ვისაც სურს შვეიცარიაში მგზავრობა ნებისმიერი მაღალი რისკის ქვეყნიდან ან რეგიონიდან გარდა შვეიცარიის მოქალაქეებისა. შვეიცარიის მთავრობის N818.101.24 განკარგულებაში შესული ბოლო ცვლილებების შესაბამისად, საქართველოს მოქალაქეები შვეიცარიაში შემოსვლას შესძლებენ მხოლოდ განსაკუთრებულ შემთხვევებში: • ოჯახის ახლო წევრები, ანუ მეუღლე / ცოლი, რეგისტრირებული პარტნიორი და მცირეწლოვანი შვილები;• იმ შემთხვევაში თუ ოჯახის ახლობელი ადამიანი გარდაიცვალა ან უკიდურესად მძიმე მდგომარეობაში იმყოფება. კერძოდ: მეუღლე, პარტნიორი, მშობელი, ძმა ან და, შვილი, შვილიშვილი, ან და-ძმა.• შვეიცარიაში შესვლა აუცილებელია სამედიცინო მკურნალობის გასაგრძელებლად, რომელიც დაიწყო შვეიცარიაში ან საზღვარგარეთ;• უცხოელი მეუღლისა და შვეიცარიის მოქალაქის უცხოელი არასრულწლოვანი შვილები, რომელთაც სურთ შვეიცარიაში დაბრუნდნენ შვეიცარიის მოქალაქესთან ერთად განსაკუთრებული სიტუაციის გამო, მაგალითად, ევაკუაციის შემთხვევაში;• ოფიციალური ვიზიტების შემთხვევაში განსაკუთრებული აუცილებლობის გათვალისწინებით, როგორიცაა საერთაშორისო ვალდებულებები;• ეკიპაჟის წევრები დაგეგმილი, სპეციალური და ჩარტერული ფრენების გათვალისწინებით;• ოჯახის ახლო წევრები (ბავშვები, შვილიშვილები, მშობლები; და-ძმები) სამედიცინო დახმარების გაწევისა და მოვლის მიზნით. ჩეხეთი – შეზღუდულია. ევროკავშირის წვერი ქვეყნების მოქალაქეები და ბინადრობის მქონე პირები შედიან ჩეხეთში შესაბამისი რეგულაციების დაცვით. საქართველოს მოქალაქეს ჩეხეთში შესვლის უფლება აქვს, მხოლოდ იმ შემთხვევაში, როცა ფლობს ბინადრობის ნებართვას, ან გრძელვადიან ვიზას. შესვლისას საზღვარზე უნდა წარადგინოს ბოლო 72 საათში გაკეთებული PCR ტესტის პასუხი. ხორვატია – დაშვებულია, თვითიზოლაციის ან PCR ტესტის პირობით. ხორვატიაში შესვლა ნებადართულია ტურიზმის მიზნით. სავალდებულოა წინასწარ გადახდილი განთავსების დამადასტურებელი დოკუმენტაციის წარდგენა. იმ შემთხვევაში, თუ საზღვროს კვეთისას პირი წარადგენს ხორვატიის საზღვრის გადაკვეთამდე 48 საათით ადრე ჩატარებული PCR ტესტის უარყოფით პასუხს, ის არ დაექვემდებარება თვითიზოლაციას ან კარანტინს. იმ შემთხვევაში, თუ პირი წარადგენს 48 საათზე უფრო ხანდაზმულ ტესტს, მას მოუწევს თვითიზოლაციაში გადასვლა და ხორვატიაში საკუთარი ხარჯებით განმეორებითი ტესტის ჩატარება. ყველა მგზავრისათვის რეკომენდირებულია განაცხადის შევსება შემდეგ ვებ-გვერდზე: https://entercroatia.mup.hr/ წყარო
თურქეთი მთიან ყარაბაღში სამშვიდობო ძალებს შეუერთდება
თურქეთმა და რუსეთმა ხელი მოაწერეს ურთიერთგაგების მემორანდუმს მთიან ყარაბაღში რუსეთ-თურქეთის ცენტრის შექმნის შესახებ, რომელიც ცეცხლის შეწყვეტის რეჟიმის განხორციელების პროცესს გააკონტროლებს, - თურქული მედიის ინფორმაციით, ამის შესახებ ქვეყნის პრეზიდენტმა რეჯეფ თაიფ ერდოღანმა განაცხადა. მისივე თქმით, მხარეებმა დოკუმენტი დღეს დილით გააფორმეს. „თურქეთი მთიან ყარაბაღში სამშვიდობო ძალებს შეუერთდება და ცეცხლის შეწყვეტის შეთანხმების განხორციელებას რუსეთთან ერთად გააკონტროლებს“, - განაცხადა ერდოღანმა. მან აზერბაიჯანელ ხალხს მთიანი ყარაბაღის ოკუპაციისგან გათავისუფლება მიულოცა. „ვულოცავ აზერბაიჯანელ ხალხს და ჩემს ძმას ილჰამ ალიევს ყარაბაღის სრულ გათავისუფლებას ოკუპაციისგან. შეთანხმების თანახმად, სომხეთი აზერბაიჯანს ქალბაქარს 15 ნოემბრამდე გადასცემს, აღდამსა და გაზახს 20 ნოემბრამდე, ქალბაჯარს - 1 დეკემბრამდე. ოკუპაციის შედეგად საკუთარი მიწებიდან განდევნილი აზერბაიჯანელები გაეროს ლტოლვილთა უმაღლესი კომისარიატის ზედამხედველობით თავიანთ ტერიტორიებზე დაბრუნდებიან,” - განაცხადა რეჯეფ თაიფ ერდოღანმა. შეგახსენებთ, რომ 9 ნოემბერს ნიკოლ ფაშინიანმა აზერბაიჯანის და რუსეთის პრეზიდენტებთან, ილჰამ ალიევთან და ვლადიმირ პუტინთან ერთად ხელი მოაწერა მთიან ყარაბაღში სამხედრო მოქმედებების შეწყვეტის შეთანხმებას, რომლის თანახმადაც რუსეთი მთიან ყარაბაღში სამშვიდობო კონტინგენტს განათავსებს და 1969 სამხედროს, 90 ჯავშანმანქანას და 380 ერთეულ საავტომობილო და სპეცტექტიკას გააგზავნის.
ევროპარლამენტარები - გვაშფოთებს საქართველოში არჩევნების შემდეგ შექმნილი სიტუაცია, მზად ვართ კონსტრუქციული როლი შევასრულოთ
ევროპარლამენტარები ანდრიუს კუბილიუსი, რასა იუკნევიჩიენჩი და სიგიზმუნდ პავილიონისი საქართველოში საპარლამენტო არჩევნების შემდეგ განვითარებულ მოვლენებთან დაკავშირებით ერთობლივ განცხადებას ავრცელებენ. როგორც განცხადებაშია აღნიშნული, ყოველთვის იყვნენ საქართველოს, მისი სუვერენიტეტისა და ტერიტორიული მთლიანობის ურყევი მხარდამჭერები. „გვაშფოთებს ოქტომბრის საპარლამენტო არჩევნების შემდეგ შექმნილი სიტუაცია. მიუხედავად იმისა, რომ არჩევნები კონკურენტუნარიანი იყო და ამომრჩევლებს რეალური ალტერნატივა ჰქონდათ, არჩევნების ჩატარებაზე გავლენა მოახდინა ამომრჩეველზე ზეწოლის გავრცელებულმა ბრალდებებმა, რამაც საზოგადოების ნდობის შემცირება გამოიწვია. სიტუაციას ამძიმებს ის ინფორმაცია, რომ ოპოზიციასა და არასამთავრობო ორგანიზაციებს ფაქტობრივად უარი ეთქვათ შესაძლებლობაზე, სამართლიანად განეხილათ დასაბუთებული პრეტენზიები და მიემართათ არსებული ინსტიტუტებისათვის. ნებისმიერი საჩივრის სამართლიანი და გამჭვირვალე განხილვა კვლავ რჩება ქართველ პოლიტიკოსებსა და ხალხს შორის ნდობის დამყარების წინაპირობად. საქართველოს მთავრობა, მმართველ პარტიასთან ერთად, ატარებს პასუხისმგებლობას, უპასუხოს არსებულ პრობლემებს და მიაღწიოს დიალოგს ოპოზიციასთან, რათა იპოვოს სწრაფი გამოსავალი ქართული დემოკრატიისთვის არსებული რთული ვითარებიდან,“- ნათქვამია ევროპარლამენტარების განცხადებაში. ისინი საერთაშორისო ორგანიზაციებს საჩივრებისა და დარღვევების შეფასებისა და საბოლოო დასკვნების წარდგენისკენ მოუწოდებენ. „ჩვენ კიდევ ერთხელ მოვუწოდებთ სანდო და ინკლუზიური სამართლებრივი პროცესისკენ საარჩევნო დარღვევების აღმოფხვრის მიზნით, რათა უზრუნველყოფილი იყოს ამომრჩეველთა ნების პატივისცემა. ჩვენ მოვუწოდებთ საერთაშორისო ორგანიზაციებს, რომლებიც აკვირდებოდნენ არჩევნების პირველ ტურს (განსაკუთრებით ეუთო/ოდირს და ევროსაბჭოს საპარლამენტო ასამბლეას), შეაფასონ საჩივრები და დარღვევების მტკიცებულებები და წარადგინონ საბოლოო დასკვნები,“- აღნიშნულია განცხადებაში. ევროპარლამენტარები გამოთქვამენ მზადყოფნას, ხელისუფლებას, ოპოზიციასა და ხალხს შორის დიალოგში კონსტრუქციული როლი შეასრულონ. „გვწამს, რომ საქართველოს ხელისუფლება გამოიყენებს იურიდიულ საშუალებებს დემოკრატიული პროცესების ფარგლებში, რაც საქართველომ ბოლო ათწლეულების განმავლობაში ააშენა, არჩევნების დარღვევებთან დაკავშირებული საჩივრებისა და მტკიცებულებების შესაფასებლად და ოპოზიციასა და ხალხთან ინკლუზიური დიალოგის გასამართად, რომლებიც ქუჩებში საპროტესტო აქციებს მართავენ. ჩვენ მზად ვართ დავეხმაროთ და განვახორციელოთ კონსტრუქციული როლი ამ დიალოგში. მოვუწოდებთ საქართველოს ხელისუფლებას, შეზღუდონ პოლიციის ძალის გამოყენება მშვიდობიანი დემონსტრანტების წინააღმდეგ და არ განახორციელონ ქუჩებში ძალადობის პროვოცირება. სამხრეთ კავკასიის რეგიონში განვითარებული მოვლენების ფონზე, საქართველოს სჭირდება პოლიტიკური მდგრადობა და ერთიანობა, რათა განახორციელოს ამბიციური ევროპული დღის წესრიგი. შესაბამისად, ჩვენ კიდევ ერთხელ მოვუწოდებთ ყველა პოლიტიკურ მხარეს, სასწრაფოდ აიღონ პასუხისმგებლობა, რათა უზრუნველყონ, რომ საქართველომ მოახდინოს საკუთარი ძალისხმევის კონცენტრირება ევროინტეგრაციის მიზნით და ჰყავდეს პარლამენტი, რომელსაც ექნება ფართო ლეგიტიმაცია და გაუმკლავდება გამოწვევებს," - აღნიშნულია ევროპარლამენტარების განცხადებაში.
გიორგი გობრონიძე მაიკ პომპეოს ვიზიტზე: ეს არის ერთგვარი სიგნალი რეგიონული მოთამაშეებისთვის, რომ აქ არსებობს ამერიკული ინტერესი
საგარეო პოლიტიკის საკითხებში ექსპერტი, გიორგი გობრონიძე მაიკ პომპეოს ტურნეს აბსოლუტურად ლოგიკურ სვლად მიიჩნევს ამერიკული დიპლომატიისთვის, რადგან პრაქტიკულად, ყარაბაღში გეოპოლიტიკური რეალობა, თვისობრივად კი ძალთა ბალანსი შეიცვალა. მისივე შეფასებით, საქართველოს სტაბილურობის როლი ძალიან მნიშვნელოვანია და ამერიკის პირველი დიპლომატი ალბათ ეცდება, რომ ამ სტაბილურობის მნიშვნელობაც აუხსნას საქართველოს. გიორგი გობრონიძე „ევროპათაიმთან“ საუბრისას აცხადებს, რომ მნიშვნელოვანია, აშშ-მ მკაფიოდ დააფიქსიროს თავისი ინტერესის შესახებ და თავისი მოკავშირის მიმართ ერთგულებისა და მხარდაჭერის დემონსტრირება მოახდინის. „ეს ვიზიტი დიდი ხნით ადრე რომ დაგეგმილიყო, როგორც სტანდარტულად ხდება ხოლმე მსგავსი ვიზიტების შემთხვევაში, უფრო მალე გასაჯაროვდებოდა და საზოგადოებასაც ექნებოდა ინფორმაცია. შესაბამისად, მრჩება შთაბეჭდილება, რომ პრაქტიკულად, ეს არის პირდაპირ კავშირში ბოლო პერიოდის მოვლენებთან, რომელიც ყარაბაღის რეგიონში განვითარდა. ეს არის აბსოლუტურად ლოგიკური სვლა ამერიკული დიპლომატიისთვის გამომდინარე იქედან, რომ პრაქტიკულად, ყარაბაღში შეიცვალა გეოპოლიტიკური რეალობა და თვისობრივად შეიცვალა ძალთა ბალანსიც - აქამდე, სომხეთი და აზერბაიჯანი თანაბარ სიბრტყეში განიხილებოდნენ, არ იყო რუსეთის სამხედრო ჩართულობა კონფლიქტში; თურქეთი არ იყო ამ დოზით წარმოდგენილი კავკასიის რეგიონში; შესაბამისად, მნიშვნელოვანია, რომ აშშ-მ მკაფიოდ დააფიქსიროს თავისი ინტერესის შესახებ და თავისი მოკავშირის მიმართ ერთგულებისა და მხარდაჭერის დემონსტრირება მოახდინის. შესაბამისად, ერთგვარი სიგნალი არის გაგზავნილი რეგიონული მოთამაშეებისთვის, რომ აქ არსებობს ამერიკული ინტერესი და ასევე არის სიგნალი საქართველოსთვის, რომ ამ რთულ პერიოდში (როგორც გეოპოლიტიკური, ასევე სხვა მიმართულებებით, ეკონომიკური კრიზისი, პოლიტიკური ტურბულენტობა) არ ვრჩებით მარტო და მოკავშირე ჩვენს გვერდით ყოფნაზე უარს არ ამბობს“, - აცხადებს გიორგი გობრონიძე. ექსპერტი ამ ვიზიტს მაინცდამაინც მიმდინარე საარჩევნო პროცესებს ვერ უკავშირებს, რადგან ამისთვის აშშ-ს საქართველოს მთავრობასთან კომუნიკაციის სხვა არხებიც აქვს, თუნდაც საელჩოს სახით. „არ ვამბობ, რომ არჩევნებზე, პოლიტიკურ სტაბილურობასა და მის მნიშვნელობაზე არ მოხდება ხაზგასმა, რადგან არაერთხელ აღნიშნეს ამერიკელმა დიპლომატებმა, რომ საქართველოში მშვიდობა, სტაბილურობა, მდგრადი განვითარება მნიშვნელოვანი განმსაზღვრელია მთლიანად კავკასიის რეგიონში სტაბილურობისა და მდგრადი განვითარების თვალსაზრისით - პრაქტიკულად, საქართველო არის ერთადერთი სახელმწიფო, რომელიც მეტ-ნაკლებად საგარეო პოლიტიკური თვალსაზრისით მდგრადობასა და სტაბილურობას ინარჩუნებს“. გიორგი გობრონიძის განცხადებით, სომხეთში უნდა ველოდოთ მოვლენათა საკმაოდ რთულ განვითარებას, რადგან სომხური საზოგადოება ომში განცდილი წარუმატებლობის შემდეგ, ძალიან იმედგაცრუებული და შოკირებულია. ამასთან, არის მძიმე ემოციური ფონი, რასაც მძიმე სოციალურ-ეკონომიკური ფონიც ემატება. ასევე არის დიდი იმედგაცრუება სომხურ საზოგადოებაში მმართველი რგოლის მიმართ. ამ ფონზე კი აზერბაიჯანი გამარჯვების ეიფორიაშია. შეიძლება, აზერბაიჯანი სხვა გამოწვებების წინაშე აღმოჩნდეს, რადგან არ ხდება ისე, რომ მარტო ტერიტორია დაბრუნდა და ყველაფერი კარგად არის. მოხდა ის, რაც არ დაფიქსირებულა 90-იან წლების პირველ ნახევარში, როდესაც რუსეთი მაშინაც ითხოვდა სამშვიდობო კონტინგენტის განლაგებას მთიანი ყარაბაღის რეგიონში. ამასთან, აზერბაიჯანს მოუწია თურქეთის დახმარებით სარგებლობა და როგორც ცნობილია, საერთაშორისო ურთიერთობებში ყველაფერს აქვს ფასი და მათ შორის, არც თურქეთის დახმარება იქნება უფასო. რეგიონში სტაბილურობის მიღწევა კიდევ უფრო გართულებულია, ჩვენ არ ვიცით, რა გაგრძელება მოჰყვება ამ ყველაფერს და როგორი იქნება რუსული სამხედროების ყოფნა მოცემულ პერიოდში. ბევრი იმასაც არ ელოდა, რომ რუსეთი ჩაერეოდა, თუმცა აღმოჩნდა, რომ სცენარი მზად აქვს. ამაზე ისიც მეტყველებს, რამდენად სწრაფად გადაისროლეს სამხედრო ძალები. ამ ფონზე საქართველოს სტაბილურობის როლი ძალიან მნიშვნელოვანია და ამერიკის პირველი დიპლომატი ალბათ ეცდება, რომ ამ სტაბილურობის მნიშვნელობაც აუხსნას საქართველოს და შეგვიძლია გამოვყოთ ორი მიმართულება - 1. უშუალოდ, ქვეყნის შიგნით არსებული ვითარება; მიმდინარე პროცესები და ამ თვალსაზრისით ამერიკის ჩართულობა და შესაძლო მხარდაჭერის ვარიანტების განხილვა; 2. დაფიქსირება ქართულ-ამერიკული პარტნიორობის ერთგულებისა და საქართველოს, როგორც მისი მოკავშირისადმი უპირობო მხარდაჭერისა, განსაკუთრებით იმ ფონზე, როდესაც რეგიონში ახალი რეგიონული ძალები მაინც ახდენენ პოზიციათა გაძლიერებას და პრაქტიკულად ცვლიან გეოპოლიტიკურ ძალთა ბალანსს, ან მიზიდულობის ცენტრებს“, - აცხადებს გიორგი გობრონიძე.
ერევანისა და ბაქოს თხოვნის საფუძველზე, საქართველომ რუსი სამშვიდობოებისთვის საჰაერო დერეფანი გახსნა
ერევანისა და ბაქოს თხოვნის საფუძველზე საქართველომ რუსი სამშვიდობოებისთვის საჰაერო დერეფანი გახსნა, - ამის შესახებ საქართველოს პრემიერ - მინისტრის სპეციალურმა წარმომადგენელმა რუსეთთან ურთიერთობის საკითხებში ზურაბ აბაშიძემ გამოცემა „ეხო კავკაზს“ განუცხადა. „რაც შეეხება საქართველოს მონაწილეობას სამშვიდობო კონტინგენტის ლოგისტიკური (მხარდაჭერის) საკითხში, ამ პროცესში გადაწყვეტილება მიიღება სამშვიდობო კონფიგურაციის საფუძველზე, ქვეყნის ეროვნული ინტერესების გათვალისწინებით. ამ ეტაპზე საკითხის აქტუალობიდან გამომდინარე, როგორც სომხური, ასევე აზერბაიჯანული მხარეების თხოვნით, მოხდება რუსეთის სამშვიდობო კონტინგენტის ნაწილის, გამონაკლისის სახით, გადაყვანა დაპირისპირების ზონაში საქართველოს საჰაერო სივრცის გავლით, წინასწარ შეთანხმებულ და შეზღუდულ ვადებში. ამის შესახებ ინფორმირებულები არიან ჩვენი პარტნიორები“, - განაცხადა აბაშიძემ. შეგახსენებთ, რომ 9 ნოემბერს ნიკოლ ფაშინიანმა აზერბაიჯანის და რუსეთის პრეზიდენტებთან, ილჰამ ალიევთან და ვლადიმირ პუტინთან ერთად ხელი მოაწერა მთიან ყარაბაღში სამხედრო მოქმედებების შეწყვეტის შეთანხმებას, რომლის თანახმადაც რუსეთი მთიან ყარაბაღში სამშვიდობო კონტინგენტს განათავსებს და 1969 სამხედროს, 90 ჯავშანმანქანას და 380 ერთეულ საავტომობილო და სპეცტექტიკას გააგზავნის.
ბენ ჰოჯესი: ვიმედოვნებ, აშშ გაზრდის საქართველოში ინფრასტრუქტურას, განსაკუთრებით როტაციული ძალების და სტრატეგიული საჰაერო გადაზიდვების მხარდაჭერის კუთხით
ევროპაში აშშ-ის სახმელეთო ჯარების ყოფილი სარდალი, გენერალ-ლეიტენანტი ბენ ჰოჯესი იმედოვნებს, რომ აშშ გაზრდის საქართველოში თავის ინფრასტრუქტურას, განსაკუთრებით როტაციული ძალების და სტრატეგიული საჰაერო გადაზიდვების მხარდაჭერის კუთხით, ისევე როგორც შავ ზღვაში თავის წარმომადგენლობას. „ევროპათაიმთან“ ექსკლუზიურ ინტერვიუში ჰოჯესი აცხადებს, რომ სომხეთში არსებული რუსეთის ბაზების მნიშვნელობა, რომელიც საქართველოს ტერიტორიასთან ახლოსაა, საკმაოდ გაიზარდა, შესაბამისად, საქართველომ და მისმა პარტნიორმა აშშ-მ, ამას ყურადღება უნდა მიაქციონ. _ბატონო გენერალო, ბოლო ინტერვიუ რომელიც თქვენთან ჩავწერეთ, ყარაბაღის კონფლიქტთან დაკავშირებით, ცუდი სცენარის განვითარებად, რუსეთის სამშვიდობოების განლაგება მიიჩნიეთ. როგორ შეაფასებდით იმას, რაც ახლა მოხდა? _მისასალმებელია, რომ სამხედრო დაპირისირებები და განსაკუთრებით სამოქალაქო პირების მკვლელობები დასრულდა. ასევე მისასალმებელია, რომ აზერბაიჯანმა თურქეთის მხარდაჭერით მიიღო გადაწყვეტილება კონფლიქტის ზონაში საომარი ქმედებების შეჩერების შესახებ. იმედი მაქვს, შეთანხმება გაგრძელდება და ორივე მხარე შეეცდება მის შესრულებას. თუმცა, ვფიქრობ, რომ სხვა ქვეყნებიც შეძლებდნენ სამშვიდობო მისიის განხორციელებას კრემლის ნაცვლად. ჩემი აზრით, იქ განლაგებული რუსული ძალები უფრო ოკუპანტებს წარმოადგენენ, ვიდრე მშვიდობისმყოფელებს, ისევე როგორც დნესტრისპირეთში, აფხაზეთსა და „სამხრეთ ოსეთში“, სადაც სინამდვილეში „ტერიტორიის მპყრობელებად“ უფრო გვევლინებიან, ვიდრე მშვიდობის მყოფელებად. _რა ცვლილებებს გამოიწვევს ეს რეგიონში? როგორი იქნება თურქეთის და რუსეთის გავლენები კავკასიაში, რა თანაფარდობით და რა პერსპექტივებით? თურქეთმა აჩვენა, რომ შესწევს უნარი, გავლენა იქონიოს რეგიონზე; ასევე მოახდინა ზოგიერთი მისი შესაძლებლობის მაღალ დონეზე მოდერნიზაციის დემონსტრირება; დაგვანახა, რომ შეუძლია ხარისხიანი ტრენინგისა და კონსულტაციის უზრუნველყოფა, როგორც ეს აზერბაიჯანული ძალების შემთხვევაში გააკეთა. თუმცა ჯერჯერობით ვერ ვიტყვი, რა შედეგების მომტანი იქნება გრძელვადიან პერსპექტივაში ყოველივე ეს რეგიონში თურქეთისთვის. ფაქტია, თურქეთის გადმოსახედიდან, მისთვის საკმაოდ პოზიტიური ტენდენცია აღინიშნება. ამ ეტაპზე, სავარაუდოდ, თურქეთი გამოიყენებს ამას პასუხისმგებელი და პოზიტიური მიდგომისთვის რეგიონში, სტაბილურობისა და უსაფრთხოების გაუმჯობესების კუთხით, აგრეთვე იმისთვის, რომ უფრო მეტი გააკეთოს, რათა დაუპირისპირდეს კრემლის აგრესიას შავი ზღვის რეგიონის დანარჩენ ნაწილში. _რა ბედი ეწვევა ამ ახალი კონფიგურაციით, იმ მნიშვნელოვან მარშრუტებსა და კორიდორებს, რომლებიც გადის აღნიშნულ ტერიტორიებზე და აკავშირებს დასავლეთსა და აღმოსავლეთს? ეს არის მთავარი სტრატეგიული კითხვა - ახალი გარემოებები ხელს შეუწყობს თუ პირიქით, ხელს შეუშლის აზერბაიჯანი-საქართველოს აღმოსავლეთ-დასავლეთის კორიდორის განვითარებას, რომელიც ევროპას ევრაზიასთან აკავშირებს; ეს არის ერთადერთი დერეფანი (გაზის, ტელეკომუნიკაციის და საჰაერო მგზავრობისთვის), რომელიც რუსეთზე და ირანზე არ გადის. ხოლო რუსული სახმელეთო ძალების, როგორც ოკუპანტების იქ ყოფნა, სავარაუდოდ, დადებითად არ აისახება დერეფნის განვითარებაზე. _საქართველოსთვის როგორც სატრანზიტო კორიდორის მქონე ქვეყნისთვის, რას მოიტანს ან შეცვლის ეს ყველაფერი? ზოგადად როგორ აისახება ეს ახალი ,,წესრიგი' მასზე? სომხეთში არსებული რუსეთის ბაზების მნიშვნელობა, რომელიც საქართველოს ტერიტორიასთან ახლოსაა განლაგებული, საკმაოდ გაიზარდა. ამრიგად, საქართველომ და მისმა პარტნიორებმა, როგორიცაა აშშ, ამას ყურადღება უნდა მიაქციონ. ვიმედოვნებ, აშშ გაზრდის საქართველოში თავის ინფრასტრუქტურას, განსაკუთრებით როტაციული ძალების და სტრატეგიული საჰაერო გადაზიდვების მხარდაჭერის კუთხით, ისევე როგორც შავ ზღვაში თავის წარმომადგენლობას. ეს არის ძლიერი სახელმწიფოების შეჯიბრის ნაწილი, რომლებიც ახდენენ იმის დემონსტრირებას, რომ ეს რეგიონი ყველასთვის მნიშვნელოვანია. და ჩვენ ჩავდებთ ინვესტიციებს დიპლომატიაში, ინფორმაციასა და კერძო ეკონომიკაში, აგრეთვე გავაგრძელებთ თანამშრომლობას უსაფრთხოების კუთხით.
მოძრაობა "ჯავახკის" ლიდერი, ვაჰაგნ ჩახალიანი, სომხეთის პარლამენტში შეჭრილ მომიტინგეთა შორის გამოჩნდა
მოძრაობა "ჯავახკის" ლიდერი, ვაჰაგნ ჩახალიანი, სომხეთის პარლამენტში შეჭრილ მომიტინგეთა შორის გამოჩნდა. გასულ თვეს აზერბაიჯანული მედია წერდა, რომ ჩახალიანი მთიან ყარაბაღში მოკლეს. მაშინ სომხეთს ჩახალიანის გარდაცვალების ფაქტი არ დაუდასტურებია. სომხეთის პარლამენტში მომიტინგეები მას შემდეგ შეიჭრნენ, რაც პრემიერმინისტრმა ნიკოლ ფაშინიანმა გამოაცხადა, რომ აზერბაიჯანთან და რუსეთთან შეთანხმება შედგა. მომიტინგეთა ნაწილი პარლამენტის სპიკერს, არარატ მირზოიანს, დაესხა თავს და ფიზიკურად გაუსწორდა. ჩახალიანი საქართველოს მოქალაქეა. ის მოძრაობა "ჯავახკის" ლიდერი იყო, 2009 წელს დააპატიმრეს და მასობრივ არეულობებში თანამონაწილეობის, იარაღის ტარება-შენახვა-შეძენისა და ხულიგნობის მუხლით 10-წლიანი პატიმრობა მიუსაჯეს. ჩახალიანმა საპატიმრო 2013 წელს ამნისტიით დატოვა.
ეს ვიზიტი საქართველოსა და აშშ-ს შორის სტრატეგიული პარტნიორობის მნიშვნელობის დადასტურებაა - პრემიერი
საქართველოს პრემიერ-მინისტრი გიორგი გახარია უწყებათაშორისი საკოორდინაციო საბჭოს სხდომაზე საქართველოში ამერიკის შეერთებული შტატების სახელმწიფო მდივნის მაიკ პომპეოს დაგეგმილ ვიზიტს გამოეხმაურა და აღნიშნა, რომ ეს კიდევ ერთი დადასტურებაა საქართველოსა და ამერიკის შეერთებულ შტატებს შორის სტრატეგიული პარტნიორობის მნიშვნელობის და იმ დონის, რომელიც ისტორიულად ჯერ არ ყოფილა. როგორც მთავრობის ადმინისტრაციის მიერ გავრცელებულ განცხადებაშია ნათქვამი, პომპეოს ვიზიტის ფარგლებში განიხილავენ სამხრეთ კავკასიის რეგიონში მიმდინარე მოვლენებს, ქვეყნის დემოკრატიზაციის შემდგომ პროცესს, ეკონომიკურ საკითხებსა და უსაფრთხოებას. „რა თქმა უნდა, პირველ რიგში, ამ შეხვედრის ფარგლებში ჩვენ განვიხილავთ ამერიკის შეერთებულ შტატებსა და საქართველოს სტრატეგიული პარტნიორობის ქარტიით გათვალისწინებულ საკითხებს. რა თქმა უნდა, ჩვენ, პირველ რიგში, განვიხილავთ სამხრეთ კავკასიის რეგიონში მიმდინარე მოვლენებს, ქვეყნის დემოკრატიზაციის შემდგომ პროცესს, ეკონომიკურ საკითხებს, უსაფრთხოებას. ეს ყველაფერი არის ის თემები, რომლებზეც ჩვენ ვემზადებით სასაუბროდ და რომლებიც შემოთავაზებული იყო სასაუბროდ ჩვენი კოლეგების მხრიდან. ყველას კარგად უნდა გვესმოდეს, რომ ეს არ არის მხოლოდ ჩვენი სტრატეგიული პარტნიორის, ქვეყნის, სახელმწიფო მდივნის ვიზიტი, ეს არის საქართველოს მეგობრის ვიზიტი ჩვენს ქვეყანაში და ჩვენ ყველაფერს გავაკეთებთ იმისთვის, რომ ამ ვიზიტმა კიდევ უფრო გააღრმაოს, დღეს ისედაც მაღალ ნიშნულზე მყოფი სტრატეგიული პარტნიორობა აშშ-სა და საქართველოს შორის, განსაკუთრებით, დღეს რეგიონისთვის იმ კრიტიკულად მნიშვნელოვანი მიმართულებებით, როგორიც არის, რა თქმა უნდა, სამხრეთ კავკასიაში მიმდინარე პროცესები, რაც ჩვენი ქვეყნის ყოველდღიურ ცხოვრებაზეც, უსაფრთხოებაზეც და მომავალზეც სერიოზულ ზეგავლენას იქონიებს. ამიტომ, მიუხედავად კოვიდისა, გლობალური პანდემიისა, მიუხედავად ყველა იმ გამოწვევებისა, რომლის წინაშეც ჩვენ ვართ, ჩვენ ახლა სრულად კონცენტრირებული უნდა ვიყოთ ამ ვიზიტის მოსამზადებლად“, - განაცხადა პრემიერ-მინისტრმა. ცნობისთვის, მაიკ პომპეო საქართველოს 17 ნოემბერს ორდღიანი ვიზიტით ეწვევა.
თენგიზ ფხალაძე: ''დარწმუნებული ვარ სახელმწიფო მდივანი ძლიერ გზავნილებს ჩამოიტანს''
''დარწმუნებული ვარ სახელმწიფო მდივანი ძლიერ გზავნილებს ჩამოიტანს'' - როგორც "ევროპათაიმთან" საუბარში, საქართველოს პრეზიდენტის მრჩეველი საგარეო პოლიტიკის საკითხებში, ჯიპა-ს ასოცირებული პროფესორი თენგიზ ფხალაძე, აღნიშნავს, აშშ სახელმწიფო მდივნის ვიზიტი უმნიშვნელოვანესია და საქართველომ ეს შესაძლებლობა ბოლომდე უნდა გამოიყენოს. "ვიზიტი უდავოდ მნიშვნელოვანია როგორც ქვეყანაში, ასევე ქვეყნის გარეთ არსებული რეალობების გათვალისწინებით. დეტალები ჯერ უცნობია, მაგრამ დარწმუნებული ვარ სახელმწიფო მდივანი ძლიერ გზავნილებს ჩამოიტანს როგორც ეროვნული უსაფრთხოების, ასევე დემოკრატიის განმტკიცებისა და საქართველო-ამერიკის ურთიერთობათა შემდგომი განვითარებისათვის. მნიშვნელოვანია, რომ ეს შესაძლებლობა ბოლომდე გამოვიყენოთ და ამ საკითხებთან დაკავშირებით ჩვენი ინიციატივებიც შევთავაზოთ სტრატეგიულ პარტნიორს", - განუცხადა "ევროპათაიმს" თენგიზ ფხალაძემ. შეგახსენებთ, რომ ამერიკის შეერთებული შტატების სახელწიფო მდივანი, საქართველოს 17-18 ნოემბერს სტუმრობს. ვიზიტის ფარგლებში სახელმწიფო მდივანი შეხვედრებს პრემიერ-მინისტრ გიორგი გახარიასთან, საქართველოს პრეზიდენტთან სალომე ზურაბიშვილთან, საგარეო საქმეთა მინისტრ დავით ზალკალიანთან და სრულიად საქართველოს კათოლიკოს-პატრიარქ ილია II-სთან გამართავს.
აშშ-ის სახელმწიფო დეპარტამენტი მაიკ პომპეოს საქართველოში ვიზიტთან დაკავშირებით ოფიციალურ ინფორმაციას ავრცელებს
აშშ-ის სახელმწიფო დეპარტამენტი მაიკ პომპეოს საქართველოში ვიზიტთან დაკავშირებით ოფიციალურ ინფორმაციას ავრცელებს. როგორც უწყების ვებგვერდზე გამოქვეყნებულ პრესრელიზშია აღნიშნული, მაიკ პომპეო თბილისში შეხვედრებს გამართავს, რათა საქართველოს სუვერენიტეტისა და ტერიტორიული მთლიანობის მიმართ აშშ-ის მხარდაჭერა გამოხატოს. „თბილისში მაიკ პომპეო შეხვდება საქართველოს პრეზიდენტ სალომე ზურაბიშვილს, პრემიერ-მინისტრ გიორგი გახარიასა და საგარეო საქმეთა მინისტრ დავით ზალკალიანს, რათა გამოხატოს ჩვენი მხარდაჭერა საქართველოს სუვერენიტეტისა და ტერიტორიული მთლიანობისადმი და მოუწოდოს დემოკრატიული რეფორმების კუთხით შემდგომი პროგრესის მიღწევისკენ. სახელმწიფო მდივანი ასევე შეხვდება საქართველოს კათოლიკოს-პატრიარქს, ილია მეორეს“, - აცხადებენ სახელმწიფო დეპარტამენტში. გავრცელებულ განცხადებაში ასევე აღნიშნულია, რომ საქართველოს გარდა აშშ-ის სახელმწიფო მდივანი 13-23 ნოემბერს საფრანგეთს, თურქეთს, ისრაელს, არაბთა გაერთიანებულ საამიროებს, კატარსა და საუდის არაბეთსაც ეწვევა. სახელმწიფო მდივანი, საქართველოს 17-18 ნოემბერს სტუმრობს.
"თუ არ გავაძლიერებთ საერთაშორისო პარტნიორებთან თანამშრომლობას, დაუცველები და მოწყვლადები ვიქნებით ამ სიტუაციაში"
მთიან ყარაბაღში, საბრძოლო მოქმედებები, შეთანხმების საფუძველზე შეწყდა. შეთანხმების თანახმად, სომხეთი იღებს ვალდებულებას აზერბაიჯანს გადასცეს მთიანი ყარაბაღის ავტონომიურ ოლქს მიღმა არსებული აზერბაიჯანული რაიონები, რომლებსაც ახლა სომხეთი აკონტროლებს. ასევე სომხურმა ძალებმა უნდა დატოვონ მთიანი ყარაბაღიც. კონფლიქტის ზონაში შედის რუსი სამშვიდობოების ჯგუფი. აგრეთვე, სომხეთი იღებს ვალდებულებას რომ უზრუნველყოფს, არ შეაფერხებს ნახიჩევანისა და დანარჩენი აზერბაიჯანის დამაკავშირებელი გზის მშენებლობას. რუსეთის, როგორც მშვიდობისმყოფელის ხსენება, საზოგადეობაში, ერთგვარ ირონიას იწვევს. რა როლი ითამაშა აქამდე და როგორი იქნება ის მომავალში, ქმნის თუ არა კავკასიის რეგიონში შექმნილი ახალი რეალობა საფრთხეებს საქართველოსთვის, როგორი უნდა იყო ჩვენი პოზიცია, ამ და სხვა საკითხებზე, „ევროპათაიმი“ საქართველოს პრეზიდენტის მრჩეველს საგარეო პოლიტიკის საკითხებში ( 2014-2018), ჯიპა-ს ასოცირებულ პროფესორს, თენგიზ ფხალაძეს ესაუბრა. - როგორ შეაფასებთ მთიან ყარაბაღში განვითარებულ მოვლენებს, ომის დასრულებას, თუ შეიძლება ამას ასე ვუწოდოთ, და როგორია რუსეთის როლი? - უპირველეს ყოვლისა ვიტყვი, რომ მშვიდობა დამყარდა, უფროს სწორად შეწყდა ცეცხლი, მაგრამ ეს არ არის ყარაბაღის კონფლიქტის საბოლოო გადაწყვეტა. დღევანდელი სტატუს-ქვო არის შემდეგი - აზერბაიჯანმა მოახერხა და დაიბრუნა ტერიტორიების ძალიან მნიშნელოვანი და სერიოზული ნაწილი, თუმცა ამავდროულად, რუსეთმაც დაიბრუნა თავისი სამხედროების ყოფნის უფლება აზერბაიჯანის ტერიტორიაზე. როგორც მოგეხსენებათ, ბოლო ობიექტი, რომელიც მათ კონტროლქვეშ იყო, კაბალის რადიოლოკაციური სადგურია, რომელიც ჯერ კიდევ ჰეიდარ ალიევის დროს დაიხურა და რუსეთის ძალებმა აზრბაიჯანის ტერიტორია დატოვეს. დღეს კი რუსეთმა მიიღო აზერბაიჯანის ტერიტორიაზე ყოფნის უფლება მშვიდობისმყოფელის მანტიით, იმ კონფლიქტში, რომელიც იმთავითვე მის მიერ იყო ინსპირირებული და შემდგომ პერიოდშიც ყველაფერს აკეთებდა იმისთვის, რომ მშვიდობა არ დამყარებულიყო. თუნდაც ბოლო წლების განმავლობაში რუსეთი იყო ის ქვეყანა, რომელიც იარაღით ამარაგებდა, როგორც ერთ, ისე მეროე მხარეს. ასე რომ რეალობა გვაქვს ასეთი: გვაქვს ცეცხლის შეწყვეტის შეთანხმება, რაც მნიშნელოვანია იმით, რომ შეწყდა სისხლისღვრა (ყველაზე დიდი ტრაგედიაა, როცა ადამიანები იღუპებიან), მაგრამ გავითვალისწინოთ ის, რომ რუსეთმა მიიღო დამატებითი ბერკეტები რეგიონში, და ეს არის ბერკეტია- როგორც აზერბაიჯანზე, ასევე სომხეთზე ზემოქმედებისათვის. - ის რეალობა, რაც ახლა იქმნება კავკასიაში, რამდენად და როგორ აისახება საქართველოს სატრანზიტო პოტენციალზე? - სატრანზიტო პოტენციალზე, თუ იმას ვგულისხმობთ, რომ ნახიჩევანისკენ იხსნება ვიწრო კორიდორი, ეს აბსოლუტურად სხვა რამეა. სხვათაშორის გასათვალისწინებელია, რომ ამ კორიდორს, ამ შეთანხმებით, რუსეთის უსაფრთხოების ფედერალური სამსახურის შეიარაღებული ჯგუფები გააკონტროლებს. ამიტომ ვერანაირად ვერ განვიხილავთ ამ ვიწრო დერეფანს, როგორც საერთაშორისო სატრანზიტო გადაზიდვებისათვის გამოსაყენებელს. თუმცა საქართველოსთვის გასათვალისწინებელია ის მოცემულობა, რომელიც გუშინ დამყარდა, რუსეთის გაძლიერება რეგიონში. საქართველოსთვის ძალიან ყურადსაღები უნდა იყოს ეს ფაქტორი. თუ არ გავაძლიერეთ აქტივობები და თუ ვერ მოვახერხეთ ჩვენი პარტნიორების მეტად დაინტერესება საქართველოთი და საქართველოს უსაფრთხოებაში ვართ საკმაოდ დაუცველები და მოწყვლადი ამ სიტუაციაში. ამ ინტერესის გაძლიერება კი შეიძლება სწორედ, ისეთი პროექტებით, რომელიც ხელს უწყობს საქართველოს, ერთის მხრივ, სატრანზიტო ფუნქციის გაძლიერებას (ამ მხრივ, ძალიან მნიშნელოვანია ინფრასტრუქტურული პროექტები, მათ შორის, ისეთი პროექტი, როგორიც იყო ანაკლიის პორტი), და მეორეს მხრივ, ძალიან ბევრი რამ იქნება დამოკიდებული ჩვენს დიპლომატიურ აქტივობაზე ნატოს ქვეყნებთან, როგორც ორმხრივ, ისე მრავალმხრივ ფორმატში. ორმხრივ ფორმატში ვგულისხმობ, უპირველეს ყოვლისა ამერიკის შეერთებულ შტატებთან ურთიერთობაზე, ისევე როგორც თურქეთთან და სხვა ქვეყნებთან, მრავალმხრივ ფორმატში ურთიერთობებს. ეს არის შავი ზღვის უსაფრთხოების თემა, რაშიც კიდევ უფრო უნდა გავვაქტიურდეთ და თავად ნატო, რომელში ინტეგრაციაც, საქართველოსთვის დღეს უაღრესად მნიშნელოვანია, მით უფრო როცა რუსეთი ძლიერდება ამ რეგიონში. - ახსენეთ ანაკლია, თქვენი აზრით რა ბედი ეწევა ამ პროექტს? განხორციელდება თუ არა მისი მშენებლობა, მითუფრო, რომ ახლა კიდევ უფრო დადასტურებულად წარმოჩინდა როგორი საჭიროა მსგავსი პროექტები ქვეყნის, არა მხოლოდ ეკონომიკური არამედ უსაფრთხოების კუთხითაც? - ანაკლიის პორტი დღეს სამწუხაროდ შეჩერებულია, მაგრამ თუ ჩვენ მოვახერხებთ, რომ ეს პროექტი ხელახლა დაიძრას და განხორციელდეს, ეს იქნება ძალიან მნიშვნელოვანი საქართველოსთვის. ეს იქნება მისი კეთილდღეობისა და უსაფრთხოების დამატებითი გარანტია. მე ვფიქრობ, რომ ჩვენ რითაც უნდა ვიყოთ დაკავებული, სწორედ მსგავსი პროექტების განვითარებაა. რაც უფრო მეტი საერთაშორისო აქტორის ინტერესი იქნება საქართველოში წარმოდგენილი, რაც უფრო მსხვილი კომპანიები იქნებიან ჩართულები, მით უფრო მეტი იქნება ჩვენი ქვეყნის დაცულობა. მაგალითისთვის შემიძლია ვთქვა, რომ თავის დროზე, სწორედ ბაქო-თბილისი-ჯეიჰანმა და ბაქო-თბილისი-ერზუმმა განაპირობა ის, რომ რუსეთის სამხედრო ბაზები საქართველოდან გავიდა. რომ არა ეს პროექტები, არც ეს არ მოხდებოდა. ასეთ პროექტებს არ აქვს მხოლოდ კომერციული მნიშვნელობა, ისინი თავიანთი პოლიტიკური დატვირთვით არიან მნიშვნელოვანნი. ჩვენს ინტერესებშია მსგავსი პროექტები განვითარდეს და საქართველო მაქსიმალურად მიმზიდველი გახდეს უცხოური ბიზნესისათვის, დღეს ამის პოტენციალი ნამდვილად გაგვაჩნია. დღეს ამას კიდევ უფრო მეტი მნიშნელობა აქვს, ვიდრე აქამდე. - რუსეთმა გაიმყარა პოზიციები იქ, სადაც სურდა, რამდენადაა აზრბაიჯანისთვის ეს გამარჯვება... - დღევანდელი გადასახედიდან, აზერბაჯანი ტერიტორიულად უკეთეს ვითარებაშია, ვიდრე იყო ორი და სამი თვის წინ, რადგან მან დაიბრუნა ეს ტერიტორიები, თუმცა ვიმეორებ რომ ეს არ ნიშნავს, რომ პრობლემა ამოიწურა. ჯერ კიდევ კითხვის ნიშნებია იმაზე, რამდენად მართებულად და ჯეროვნად შესრულდება მიღწეული შეთანხმება. სამწუხაროდ, ჩვენი გამოცდილებიდან გამომდინარე, ეს ძალიან მნიშნელოვანი თემაა, აქ რუსეთი ყველანაირად შეეცდება თავისი პოზიციები გაიუმჯობესოს. თუმცა აზერბაიჯანი რამდენად იქნება მოწყვლადი ყოველივე ამის მიმართ, დიდწილად დამოკიდებული იქნება იმაზე, რამდენად ძლიერი და დაცული იქნება საქართველო. ამიტომ საქართველოს მნიშნელობა, რეგიონულ კონტექსტში კიდევ უფრო იზრდება და რუსეთის ინტერესი ჩვენს მიმართ, არ კლებულობს, ამიტომ ჩვენს დაცულობას დიდი მნიშნელობა აქვს. - როგორია თურქეთის როლი და მნიშვნელობა ამ კონფლიქტში? - თურქეთი თავისთავად ცხადია დაინტერესებული მხარეა და მას ეს არც დაუმალავს, თურქეთმა ძალიან ბევრი რამ გააკეთა იმისთვის, რომ დახმარებოდა აზერბაიჯანს. მიუხედავად იმისა, რომ განცხადებები იყო, რომ თურქეთი მიიღებს სამშვიდობო პროცესში მონაწილებას, უშუალოდ მშვიდობისმყოფელებთან დაკავშირებით, ჩანაწერი შეთანხმებაში არ არის. თუ ამის მიღმა არის კიდევ სხვა შეთანხმება, არ ვიცი, მაგრამ ამაში, საუბარია რუს სამშვიდობოებზე და არა თურქებზე. ვნახოთ რა ფორმით იქნება თურქეთი ჩართული. თურქეთისთვის მნიშნელოვანია არა მხოლოდ აზერბაიჯანი, არამედ, სტაბილური და განვითარებული საქართველოც. ამ კონტექსტში, თურქეთი, ჩვენი შეურყევადი პარტნიორია. ძალიან მნიშვნელოვანია თურქეთთან ორმხრივი თანამშრომლობა. - მაშინ როცა ითქვა რომ რუსი სამშვიდობოები შევლენ ყარაბაღში, ჩნდება ერთგვარი ,,დეჟავიუს’’ შეგრძნება საქართველოსთან მიმართებაში, მითუმეტეს, როცა ვკითხულობთ, რომ საუბარია 5 წელიწადზე, შემდგომი განგრძობის პერსპექტივით, პირველი, რაც გვახსენდება, დღეს რუსი სამშვიდობოების დანატოვარი კვალი, უდიდესი სამხედრო ბაზებია აფხაზეთში... - გეთანხმებით, შეუძლებელია ასეთი გრძნობა არ გაჩნდეს, მაგრამ გეტყვით იმას, რომ ამ შემთხვევაში რუსეთი კიდევ უფრო მომგებიან პოზიციაში, რადგან თუ შევხედავთ იმ მანდატს, რომელიც მას საქართველოში ჰქონდა, ეს მანდატი აფხაზეთის მხარეს იყო გაეროს მანდატი, ცხინვალის შმეთხვევაში, კი ეუთოსი. რუსეთმა ახლა რაც მოახერხა, არის ის, რომ მან საერთაშორისო ორგანიზაციების მიღმა, მხოლოდ და მხოლოდ მხარეების ხელმოწერით მიიღო ეს სტატუსი, რაც თავისთავად მოქმედების მეტ თავისუფლებას და ნაკლებ ანგარიშვალებულებას აძლევს. მეორე - თუ შევხედავთ, იმას, რამდენად სწრაფად მოხდა რუსეთის შეიარაღებული ძალების კონტინგენტის პერედისლოკაცია, ვნახავთ, რომ ამისთვის ისინი მზად იყვნენ მანამ, სანამ ხელშეკრულებას ხელი მოეწერებოდა. ამისთვის რუსეთი, ძალიან დიდი ხანი ემზადებოდა, კარგად აკვირდებოდა სიტუაციებს, აკეთებდა შესაბამის გათვლებს, სცენარები მუშავდებოდა და ერთ-ერთი განხორციელებული ფაზა, ვნახეთ, ამ მოცემულობაში, შეუძლებელია დეჟავიუს შეგრძნება არ გაჩნდეს, ისედაც ცხადია, რომ ეს კონფლიქტები იმთავითვე რუსეთის მხრიდან იყო ინსპირირებული და მხარდაჭერილიც. - სულ ახლახანს გავრცელდა ინფორმაცია, რომ 17-18 ნოემბერს საქართველოს ამერიკის შეერთებული შტატების სახელმწიფო მდივანი, მაიკ პომპეო ეწვევა. რა იქნება ამ ვიზიტის მთავარი მესიჯი, მითუფრო იმ ფონზე რა პროცესებიც რეგიონში მიმდინარეობს? - ვიზიტი უდავოდ მნიშვნელოვანია როგორც ქვეყანაში, ასევე ქვეყნის გარეთ არსებული რეალობების გათვალისწინებით. დეტალები ჯერ უცნობია, მაგრამ დარწმუნებული ვარ სახელმწიფო მდივანი ძლიერ გზავნილებს ჩამოიტანს როგორც ეროვნული უსაფრთხოების, ასევე დემოკრატიის განმტკიცებისა და საქართველო-ამერიკის ურთიერთობათა შემდგომი განვითარებისათვის. მნიშვნელოვანია, რომ ეს შესაძლებლობა ბოლომდე გამოვიყენოთ და ამ საკითხებთან დაკავშირებით ჩვენი ინიციატივებიც შევთავაზოთ სტრატეგიულ პარტნიორს. სპეციალურად "ევროპათაიმისთვის"
