ახალი ამბები
აქციები დასტაბილურებულ სიტუაციას კვლავ რისკის ქვეშ აყენებს - ჯანდაცვის მინისტრი
აქციები დასტაბილურებულ სიტუაციას კვლავ აყენებს რისკის ქვეშ. სწორედ ესაა მიზეზი, რის გამოც ადამიანებს მოვუწოდებთ, ნუ დაარღვევენ იმ წესებს, რომელიც მოწოდებულია,- ამის შესახებ ჯანდაცვის მინისტრმა ეკატერინე ტიკარაძემ მთავრობის ადმინისტრაციაში გამართულ ბრიფინგზე განაცხადა. ამასთან, როგორც ტიკარაძე აცხადებს, ინფიცირების მაჩვენებელმა 1.79-დან 1.26-მდე დაიკლო და ეს კოეფიციენტი დასტაბილურდა. „ოქტომბერში, სანამ ჩვენ არ გვყავდა გამოჯანმრთელებული პაციენტების რიცხვი, რომელსაც დღეს ვაანონსებთ, ჩვენი ინფექციის მაჩვენებლის კოეფიციენტი აღემატებოდა 1.79-ს, მას შემდეგ, რაც მოვუწოდეთ მოქალაქეებს და რიგ ადგილებში სავალდებულოც გავხადეთ პირბადე, ასევე დისტანციური მუშაობა, კოეფიციენტმა მნიშვნელოვნად დაიკლო, დავასტაბილურეთ კოეფიციენტის მაჩვენებელი და ის გახდა 1.26. ეს არის ძალიან კარგი შედეგი იმ მინიმალური აქტივობებით და ეფექტიანი მუშაობით, რომელიც განვახორციელეთ“,- განაცხადა ტიკარაძემ. მისივე თქმით, მზადაა ოპოზიციასთან მოლაპარაკების მაგიდასთან დაჯდეს და მოუწოდებს მათ, პირადი ინტერესები ბოროტად არ გამოიყენონ. „ჩვენ ოპოზიციასთან მიმართებაში მზად ვართ დავსხდეთ მოლაპარაკების მაგიდასთან, ეს მნიშვნელოვანია. ნებისმიერი მოლაპარაკება და შეთანხმება შეიძლება მოხდეს ბევრად უფრო ცივილურად და ეფექტურად, არ გამოვიყენოთ ბოროტად ჩვენი ემოციები და პირადი ინტერესები. არ გავავრცელოთ ინფექცია ქვეყანაში. ეს არის დღეს ჯანდაცვის სამინისტროს მთავარი ამოცანა“, - განაცხადა ეკა ტიკარაძემ. შეგახსენებთ, რამდენიმე დღეა რაც ოპოზიციური პარტიების ლიდერები, მათი მხარდამჭერები და სამოქალაქო აქტივისტები დედაქალაქის მასშტაბით აქციებს მართავენ. აქციის მონაწილეები ცესკოს არჩევნების გაყალბებაში ადანაშაულებენ და ვადამდელი არჩევნების დანიშვნას მოითხოვენ.
პაატა იმნაძე: დღეს 125 ინფიცირებულიდან, ერთი იღუპება
„დღეს 125 ინფიცირებულიდან ერთი იღუპება, რამდენი 125-იც მეტი იქნება, იმდენად მეტი დაიღუპება“, - ამის შესახებ დაავადებათა კონტროლის ცენტრის დირექტორის მოადგილემ, პაატა იმნაძემ საკოორდინაციო საბჭოს დასრულების შემდეგ გამართულ ბრიფინგზე განაცხადა. „ჩვენ ვართ ისეთ პერიოდში, როდესაც, რატომღაც, ყოველგვარი შეზღუდვა აღიქმება პოლიტიკური აქტივობის შეზღუდვად. ამ დროს, ყველაფერი კეთდება ისე, რომ აღქმაშიც არ იყოს ვინმესთვის პოლიტიკურ შეზღუდვებთან კავშირი. ჩვენ ამ გზით უნდა ვიაროთ. ჩვენი ქვეყნის ეკონომიკა არ არის ისეთი ძლიერი, რომ მკაცრი შეზღუდვები კიდევ დავაწესოთ, ამიტომ ამ დანის პირზე გვიწევს სიარული - აქეთ შეზღუდვები და თან, ქვეყანაში ეკონომიკის ფუნქციონირება. იმედია, ჩვენი მოსახლეობა გაითვალისწინებს იმასაც, რომ რეალობა ასეთია: დღეს 125 ინფიცირებულიდან ერთი იღუპება. რამდენი 125-იც მეტი იქნება, იმდენად მეტი დაიღუპება“, - განაცხადა პაატა იმნაძემ. საქართველოში დღეს კორონავირუსის 2775 ახალი შემთხვევა გამოვლინდა, 3560 გამოჯანმრთელდა, 22 გარდაიცვალა. ვირუსით ინფიცირების პირველი ფაქტი საქართველოში 2020 წლის, 26 თებერვალს გამოვლინდა. პანდემიის შესახებ ჯანდაცვის მსოფლიო ორგანიზაციამ 2020 წლის 11 მარტს გამოაცხადა. მანამდე, ჩინეთმა, 21 იანვარს დაადასტურა, რომ კორონავირუსი გადამდებია. ჩინეთში ეპიდემია 2019 წლის დეკემბერში დაიწყო
კორონავირუსთან ბრძოლაში სტომატოლოგები და პენსიონერი ექიმები ერთვებიან
დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, კორონავირუსის მართვაში შესაძლოა, სტომატოლოგებმაც მიიღონ მონაწილეობა. ამირან გამყრელიძის განცხადებით, სტომატოლოგებს შესაბამისი განათლება აქვთ და შეიძლება მიიღონ მონაწილეობა კორონავირუსის მართვის პროცესში. „სტომატოლოგები, რომლებიც ბევრნი არიან ქვეყანაში, აქვთ შესაბამისი სამედიცინო განათლება, მათ ნასწავლი აქვთ საგნები სამედიცინო ინსტიტუში, კარგად იციან ადამიანის ჯანმრთელობის მონაცემები და შეუძლიათ გამოყენებული იყოს კორონავირუსის მართვაში. ასევე მე-4 დამე-5 კურსის სტუდენტებს, რომელთაც ძირითადი კლინიკური საგნები აქვთ გავლილი, შეიძლება ამ პერიოდში იმუშაონ. საჭიროა ქვეყანაში ამ ტიპის მოძრაობა “, – განაცხადა ამირან გამყრელიძემ. გარდა ამისა, ჯანდაცვის სამინისტრო კორონავირუსით დაავადებული პაციენტების მართვის პროცესში პენსიონერი ექიმების ჩართვასაც გეგმავს. როგორც ჯანდაცვის მინისტრმა, ეკატერინე ტიკარაძემ საკოორდინაციო საბჭოს სხდომის დასრულების შემდეგ განაცხადა, პენსიონერი ექიმები აღნიშნულის მზადყოფნას გამოთქვამენ. ტიკარაძის განმარტებით, ჯანდაცვის სამინისტრო უკვე დაუკავშირდა პენსიონერ ექიმებს და მათ რესურსს სახელმწიფო აქტიურად იყენებს. „რა თქმა უნდა, ძალიან მნიშვნელოვანია ჩვენი პენსიონერი ექიმების ჩართულობა. მათი მხრიდანაც გვაქვს ჩვენ გამოხმაურება და სპეციალური ბაზებით, რომელიც რეგულირების სააგენტოში არის, მოვიძიეთ მათი საკონტაქტო ინფორმაცია და მათი მხრიდან არის მზაობა, შესაბამისად, მათი რესურსი აქტიურად არის გამოყენებული სახელმწიფოს მხრიდან, თუმცა ამ ეტაპისთვის მიმდინარეობს კიდევ დამატებითი მობილიზება ყველა იმ სხვა პროფილის ექიმებისა, რომლებიც ფლობენ შესაბამის უნარ-ჩვევებს და შეუძლიათ პაციენტების მართვა,“ – განაცხადა ტიკარაძემ.
ჯორჯიის შტატში ჯო ბაიდენმა დონალდ ტრამპს გადაასწრო
აშშ-ს შტატ ჯორჯიაში ხმების დათვლა გრძელდება. დათვლილია 99%. ამ დრომდე შტატში დონალდ ტრამპი ლიდერობდა, თუმცა, ბოლო მონაცემებით, მას ჯო ბაიდენმა გადაასწრო. ამ დროისთვის ბაიდენი ტრამპს 917 ხმით უსწრებს. მას ჯამში 2 449 371 ხმა აქვს, ტრამპს კი 2 448 454 ხმა. ჯორჯიის გარდა შედეგებს ითვლიან პენსილვანიაში, ჩრდილოეთ კაროლინაში, ნევადასა და არიზონაში. ჩრდილოეთ კაროლინა - დათვლილია 94% - დონალდ ტრამპი 50.1%, ჯო ბაიდენი 48.7% პენსილვანია - დათვლილია 97% - დონალდ ტრამპი 49.6%, ჯო ბაიდენი 49.3% არიზონა - დათვლილია 90% - ჯო ბაიდენი 50.1%, დონალდ ტრამპი 48.5% ნევადა - დათვლილია 84% - ჯო ბაიდენი 49.4%, დონალდ ტრამპი 48.5% ბოლო მონაცემებით ბაიდენს საარჩევნო კოლეგიაში 253 ხმა აქვს მოპოვებული, მას კიდევ ჩვიდმეტი ხმა სჭირდება. ჯორჯიაში გამარჯვების შემთხვევაში ის 16 ხმას მოიპოვებს, ნევადაში 6 ხმას, არიზონაში კი 11-ს. დონალდ ტრამპი არჩევნების მოპარვაზე საუბრობს და ხმების დათვლის შეწყვეტას ითხოვს. მის გუნდში ამბობენ, რომ იმ შტატებში, სადაც ტრამპი მცირე სხვაობით დამარცხდა, ხმების გადათვლას მოითხოვენ.
ეკატერინე ტიკარაძის განცხადებით, ქვეყანაში კორონავირუსის სამკურნალოდ 68 კლინიკაში 5 116 საწოლია მობილიზებული
ჯანდაცვის მინისტრის ეკატერინე ტიკარაძის განცხადებით, ქვეყანაში კორონავირუსის სამკურნალოდ 68 კლინიკაში 5 116 საწოლია მობილიზებული. როგორც ტიკარაძემ მთავრობის ადმინისტრაციაში გამართულ ბრიფინგზე განაცხადა, ამ ეტაპზე სულ 7 267 ათასი საწოლის მობილიზების რესურსი არსებობს. ამასთან. მისი თქმით, საყურადღებოდ რჩება სამედიცინო პერსონალის მობილიზება. „დღეს კლინიკაში განთავსებული გვყავს 4 223 ადამიანი, რომელიც მკურნალობას გადის. 359 ადამიანი იმყოფება ტრიაჟში და ამ ეტაპისთვის კოვიდისთვის მობილიზებული საწოლფონდი 68 კლინიკაში არის 5 116 საწოლი, თუმცა ამ კლინიკების ბაზაზე დამატების გარეშე გვაქვს რესურსი 7 267 საწოლის მობილიზების. ჯანდაცვის სამინისტრო კვლავ მუშაობს იმასთან დაკავშირებით, რომ გაიზარდოს საწოლფონდის მოცულობა და ასევე კლინიკების ჩართულობა კოვიდში, მაგრამ ყველაზე საყურადღებოდ რჩება ადამიანური რესურსი. ყველაზე კრიტიკულია სწორედ სამედიცინო პერსონალის მობილიზება. ჩვენ გავატარეთ არაერთი ღონისძიება, რომელიც საკმაოდ გვეხმარება პაციენტების მართვაში, ესენი არიან ჩვენი სტუდენტები, რომლების გადამზადებაში კოვიდის მიმართულებაში ჯანდაცვის სამინისტროს დაეხმარება განათლების სამინისტრო, რისთვისაც მინდა მათ მადლობა გადავუხადო. ასევე მადლობა მინდა გადავუხადო ყველა იმ სტუდენტს, რომელთაც მოხალისედ გამოხატეს მზაობა და ჩაერთნენ უხილავ მტერთან ბრძოლაში. ისინი გადანაწილებული არიან როგორ კლინიკურ სექტორში, ასევე აქტიურად არიან ჩართული იმ ორი ონლაინ კლინიკის შემთხვევების მართვაში, რომელიც ჯანდაცვის სამინისტროს ფრთის ქვეშ შეიქმნა რამდენიმე კვირის წინ“,- განაცხადა ტიკარაძემ.
ირაკლი ოქრუაშვილს კორონავირუსი დაუდგინდა
„გამარჯვებული საქართველოს“ ლიდერ ირაკლი ოქრუაშვილს კორონავირუსი დაუდგინდა. ამის შესახებ ოქრუაშვილი სოციალურ ქსელში თავად წერს. მისივე განმარტებით, სწორედ ამის გამო არ ჩანდა ბოლო ორი დღე აქციებზე. „საინტერესო 47-ე წელი შევასრულე (ცესკოს დათვლით 57-ე). საერთოდ არ მიყვარს საკუთარი დაბადების დღე, არც მისი აღნიშვნა და არც მასზე საუბარი. სხვა მიზნით ვწერ პოსტს. სად აღარ "აღმინიშნავს" დაბადების დღე, მიტინგზე, აეროპორტში, ტყეში, ციხეში და ა.შ. ცხოვრება ყოველთვის საინტერესო საჩუქრით მაჯილდოვებდა. წელს, ვფიქრობდი რა საჩუქარს მომიმზადებს იღბალი-მეთქი და მივიღე განსაკუთრებული - ლაბორატორიის დადებითი პასუხი კორონაზე. ამის გამო არ ვჩანდი ბოლო ორი დღე აქციებზეც და ტელევიზიებშიც, რადგან პასუხს ველოდი და სამწუხაროდ, 8 ნოემბერსაც მომიწევს აქციის გამოტოვება. გადამდები რომ არ ვიყო, აუცილებლად მოვიდოდი, თუმცა 8-ში მხოლოდ "იწყება" და აუცილებლად დაგეწევით რამდენიმე დღეში. უჩემოდ ბარიკადები არ იქნება... მადლობა ყველას, მოლოცვაზე მეტად 8 ნოემბერს რუსთაველზე მისვლისთვის“, - წერს ირაკლი ოქრუაშვილი სოციალურ ქსელში.
Facebook-მა ალტ-ინფოსთან და პატრიოტთა ალიანსთან დაკავშირებული ანგარიშები წაშალა
Facebook-ი, გასულ თვეს რამდენიმე ქვეყანაში, მათ შორის საქართველოში არაავთენტური, კოორდინირებული ქცევის გამო ანგარიშების წაშლის თაობაზე, განცხადებას ავრცელებს. განცხადებაში ნათქვამია, რომ სოციალური ქსელიდან დაიბლოკა ალტ-ინფო. ასევე წაიშალა 2 პოლიტიკურ პარტიასთან, პარტიოტთა ალიანსთან და ქართულ არჩევანთან დაკავშირებული გვერდები. "ჩვენ წავშალეთ 50 ანგარიში, 49 გვერდი, 4 ჯგუფი, 8 ღონისძიება და ინსტაგრამის 19 ანგარიში, რომელიც დაკავშირებული იყო ალტ-ინფოსთან. ისინი მოქმედებდნენ საქართველოში და სამიზნეს ადგილობრივი მომხამარებლები წარმოადგენდნენ. ამჟამად ალტ-ინფო Facebook-ზე აკრძალულია. ეს ქსელი აღმოვაჩინეთ რეგიონში არაავთენტური კოორდინირებული ქმედებების გამოძიებისას. შეფასებისას გამოვიყენეთ არასამთავრობო ორგანიზაცია ISFED-ის ანგარიშები". - ნათქვამია განცხადებაში. რაც შეეხება პოლიტიკურ პარტიებთან დაკავშირებულ ანგარიშებს: "ჩვენ წავშალეთ 54 ანგარიში, 14 გვერდი, 2 ჯგუფი და ინსტაგრამის 21 ანგარიში, რომლებიც დაკავშირებული იყო 2 ქართულ პოლიტიკურ პარტიასთან - პატრიოტთა ალიანსთან და ქართულ არჩევანთან. ისინი საქართველოში მოქმედებდნენ და სამიზნეს ადგილობრივი აუდიტორია წარმოადგენდა. ეს ქსელი აღმოვაჩინეთ ISFED-ის და სამართლიანი არჩევნების საერთაშორისო საზოგადოების მიერ გამოქვეყნებული ანგარიშების განხილვის შედეგად". - ვკითხულობთ განცხადებაში.
რუმინეთი „კომენდანტის საათს“ აწესებს და სკოლებს ხურავს
რუმინეთი ორშაბათიდან „კომენდანტის საათს“ აწესებს და ყველა სკოლას ხურავს, - ამის შესახებ ინფორმაციას Guardian-ი ავრცელებს. გამოცემის ცნობით, ახალი შეზღუდვები ძალაში ერთი თვის განმავლობაში დარჩება. ქვეყნის ხელისუფლებამ აღნიშნული გადაწყვეტილება მას შემდეგ მიიღო, რაც ბოლო 2 კვირის განმავლობაში რუმინეთში კორონავირუსით ინფიცირების შემთხვევები გაორმაგდა. აღსანიშნავია, რომ რუმინეთში, ბოლო 24 საათში კორონავირუსის 9 714 ახალი შემთხვევა დადასტურდა, რაც რეკორდულად მაღალი დღიური მაჩვენებელია ქვეყნისთვის. რუმინეთში, პანდემიის დაწყების დროიდან კორონავირუსის 276 000-ზე მეტი შემთხვევაა დადასტურებული, აქედან 7 500-ზე მეტი ადამიანი დაიღუპა.
ომბუდსმენი აქციებთან დაკავშირებით საგანგებო მიმართვას ავრცელებს
სახალხო დამცველი ოპოზიციურ პოლიტიკურ პარტიებს მოუწოდებს, შექმნილი ძალიან მძიმე ეპიდემიოლოგიური მდგომარეობის გათვალისწინებით, საპროტესტო აქციების ორგანიზების პროცესში უზრუნველყონ ვირუსის გავრცელების პრევენციისთვის დადგენილი ყველა წესის და შეზღუდვის განუხრელად დაცვა. ამის შესახებ სახალხო დამცველის განცხადებაშია აღნიშნული. ომბუდსმენი ასევე საქართველოს მთავრობას მოუწოდებს, ქვეყანაში კოვიდ 19-ით დაინფიცირების ტემპის შენელების მიზნით, უზრუნველყოს უკვე დადგენილი ყველა პრევენციული ღონისძიების ეფექტური აღსრულება. „საზოგადოებისთვის ცნობილია, რომ ბოლო პერიოდში ქვეყანაში ყოველდღიურად მნიშვნელოვნად იმატებს კოვიდ ინფიცირებულთა რიცხვი და სამწუხაროდ იზრდება გარდაცვლილთა რაოდენობაც. უკანასკნელ პერიოდში სახალხო დამცველის აპარატს არაერთი პირი მიმართავს, რომელიც აცხადებს, რომ სამედიცინო დაწესებულებებში შექმნილი მდგომარეობის გამო, ვერ იღებს ხარისხიან სამედიცინო მომსახურებას; გართულებულია კოვიდ 19-ის მკურნალობაზე ხელმისაწვდომობაც. ასევე, უკანასკნელ დღეებში მასობრივ საინფორმაციო საშუალებებსა და სოციალურ მედიაში ვრცელდება ცნობები სამედიცინო დაწესებულებებში არსებულ რთულ ვითარებასთან დაკავშირებით. წლებია საქართველოს სახალხო დამცველი საუბრობს საქართველოს ჯანდაცვის სისტემაში არსებულ მწვავე გამოწვევებზე. ინფრასტრუქტურულ პრობლემებთან ერთად, ქვეყანაში ყოველთვის იდგა კვალიფიციური სამედიცინო პერსონალის სიმცირის საკითხი; ეს უკანასკნელი კი შესაძლოა, სერიოზულ ბარიერად იქცეს მიმდინარე კრიზისის მართვის პროცესში. მითუმეტეს იმ ფონზე, როცა ხშირია და იმატებს სამედიცინო პერსონალის დაინფიცირების შემთხვევები. ჯანდაცვის სექტორში შექმნილი ურთულესი ვითარების პარალელურად, ქვეყანაში ძალიან გაზრდილია მოსახლეობის მობილობა. განსაკუთრებით საგულისხმოა არჩევნების შედეგებთან დაკავშირებით საჩივრების განხილვისა და სხვადასხვა საარჩევნო უბნის შედეგების ხელახალი გადათვლის მოთხოვნით მიმდინარე საპროტესტო აქციები, რა დროსაც ვერ ხერხდება სოციალური დისტანციის და შესაბამისი უსაფრთხოების წესების დაცვა. აღნიშნული ცხადია, კიდევ უფრო ზრდის ინფიცირების რისკებს და ამძიმებს ეპიდემიოლოგიურ ვითარებას. სახალხო დამცველი მიიჩნევს, რომ არსებული მდგომარეობიდან გამომდინარე, სასიცოცხლოდ მნიშვნელოვანია გატარდეს შესაბამისი ღონისძიებები სამედიცინო სექტორზე გაზრდილი დატვირთვის რაციონალური გადანაწილებისა და შემცირებისათვის, რათა სამედიცინო პერსონალს მიეცეს შესაძლებლობა ხარისხიანი სამედიცინო მომსახურება გაუწიოს, როგორც დაინფიცირებულ პაციენტებს, ასევე სხვა მოწყვლად ჯგუფებს. აღნიშნულის გათვალისწინებით, სიცოცხლის და ჯანმრთელობის უფლების დაცვაზე ზედამხედველობის კონსტიტუციური ვალდებულების და საკუთარი მანდატის ფარგლებში, საქართველოს სახალხო დამცველი მოუწოდებს: საქართველოს მთავრობას, ქვეყანაში კოვიდ 19-ით დაინფიცირების ტემპის შენელების მიზნით, უზრუნველყოს უკვე დადგენილი ყველა პრევენციული ღონისძიების ეფექტური აღსრულება“,-აღნიშნულია განცხადებაში. სახალხო დამცველი მიმართავს ასევე საარჩევნო ადმინისტრაციებს, სამართლიანი და გამჭვირვალე პროცედურების დაცვით, დროულად განიხილონ არჩევნებთან დაკავშირებული დასაბუთებული საჩივრები და უზრუნველყონ სადაო საარჩევნო უბნების შედეგების გადათვლა, რაც მნიშვნელოვნად შეამცირებს საარჩევნო ადმინისტრაციების გარეთ მიმდინარე მწვავე საპროტესტო აქციებს და შესაბამისად მოსახლეობის მობილობას. „ოპოზიციურმა პოლიტიკურმა პარტიებმა შექმნილი ძალიან მძიმე ეპიდემიოლოგიური მდგომარეობის გათვალისწინებით, საპროტესტო აქციების ორგანიზების პროცესში უზრუნველყონ ვირუსის გავრცელების პრევენციისთვის დადგენილი ყველა წესის და შეზღუდვის განუხრელად დაცვა, რაც შეამცირებს ზიანს ადამიანების ჯამრთელობისა და სიცოცხლის მიმართ. კიდევ ერთხელ მოვუწოდებთ საქართველოში მცხოვრებ ყველა პირს განუხრელად შეასრულონ ის მოთხოვნები და რეკომენდაციები, რომელიც უკავშირდება კარანტინს და თვითიზოლაციას; ასევე პირბადით სწორად სარგებლობას, მათ შორის, უკვე ღია სივრცეებში, ჰიგიენური წესების და სოციალური დისტანციის დაცვას, რაც დღესდღეობით ერთადერთი და ყველაზე ეფექტური გზაა საკუთარი და სხვა ადამიანების ჯანმრთელობისა და სიცოცხლის უფლების დასაცავად“,-აღნიშნულია განცხადებაში.
ქალს, რომელიც COVID-19–ით ინფიცირებული მშობლების დახმარების გზებს ეძებდა, დედ–მამა გარდაეცვალა
ახალგაზრდა ქალს, რომელიც კორონავირუსით ინფიცირებული მშობლების დახმარების გზებს მათ შორის სოციალური ქსელის მეშვეობით ეძებდა, დედ–მამა გარდაეცვალა. რამდენიმე დღის წინ მოქალაქე მარი კაკაურიძე “ფეისბუქში“ პირად გვერდზე წერდა, რომ კოვიდ–ინფიცირებული დედ-მამა ადგილების არარსებობის გამო, ვერც ერთი კლინიკის რეანიმაციულ განყოფილებაში ვერ მოათავსა, არადა მათი ჯანმრთელობის მდგომარეობა მძიმე იყო: „ორივე მშობლები მძიმედ კოვიდ–ინფიცირებული მყავს. რეანიმაცია ესაჭიროებათ! თუ ვინმე მყავდა ნაცნობი, ყველა შევაწუხე, „იქნებ ერთისთვის მაინც მიპოვოთ–მეთქი“ და ამ დრომდე არაფერია. იქნებ დამეხმაროთ და ერთის სიცოცხლე მაინც შემინარჩუნოთ! გემუდარებით“, - მიმართავდა გოგონა საზოგადოებას. 6 ნოემბერს ცნობილი გახდა, რომ ცოლ–ქმარი გარდაიცვალა. როგორც კაკაურიძე ყვება, კლინიკა „ბოლონდში“ მამის მოთავსება შეძლო, თუმცა კლინიკიდან პაცენტი სამ დღეში გაწერეს და უთხრეს, რომ „ინფექცია არ ჰქონდა“. ვინაიდან კაცის მდგომარეობა მძიმე იყო, ოჯახმა ის კლინიკა „გორმედში“ გადაიყვანა, სადაც მამაკაცი გარდაიცვალა. რაც შეეხება დედას, კაკაურიძე ამბობს, რომ მას არც ტესტირება ჩაუტარეს, არც ჰოსპიტალიზაცია მიიჩნიეს საჭიროდ სასწრაფო დახმარების ექიმებმა და ქალი სახლში გარდაიცვალა. „აღარ მყავს არც ერთი. გარდაცვალების შემდეგ ჩემთან არავინ მოსულა. ახლა მეც საავადმყოფოში ვარ“,– განუცხადა ახალგაზრდა ქალმა „ტვ პირველს“. შეგახსენებთ, რომ გასული დღე–ღამის განმავლობაში საქართველოში კოვიდ–ინფიცირების მორიგი რეკორდული დღიური ნამატი – 2 775 ახალი შემთხვევა გამოვლინდა, გარდაიცვალა 22 პაციენტი.
ოქმები ხელახლა უნდა გადაითვალოს - NDI
"მთავრობამ დამატებითი ძალისხმევა უნდა გაწიოს იმისთვის, რომ სწრაფად და სწორად განიხილოს საჩივრები, ჩაატაროს ხელახალი დათვლა და გამართოს განმეორებითი არჩევნები, სადაც ეს საჭიროა" - ამის შესახებ ამერიკის ხმასთან ინტერვიუში ეროვნულ-დემოკრატიული ინსტიტუტის საქართველოს ოფისის დირექტორმა, ალან გილამმა თქვა. მისი შეფასებით, მთავრობამ უნდა გამოიძიოს ძალადობისა და დაშინების ცნობები, ასევე, კანონის სრული ძალით გაასამართლოს დამრღვევები და მიიღოს ყველა ზომა მომავალში მსგავსი შემთხვევების თავიდან ასაცილებლად. "მეორე რაუნდის მოახლოებასთან ერთად, ხელისუფლებამ ბევრი უნდა გააკეთოს იმის უზრუნველსაყოფად, რომ ამ არჩევნების მიმართ, საზოგადოებას ნდობა ჰქონდეს" - ამბობს გილამი. 2 ნოემბერს ყველა ოპოზიციურმა პარტიამ, რომელმაც გადალახა საარჩევნო ზღვარი, უარი თქვა პარლამენტში შესვლასა და მეორე ტურში მონაწილეობის მიღებაზე. მანდატებზე უარი თქვა ევროპულმა საქართველომ, ლელომ, ლეიბორისტულმა პარტიამ, გირჩმა, ენმ-ძალა ერთობაშიამ, სტრატეგია აღმაშენებელმა, მოქალაქეებმა და პროპუტინურმა პატრიოტთა ალიანსმა.
„ნაციონალური მოძრაობის” აქტივისტები ავტოკოლონებით მსვლელობებს მართავენ
„ნაციონალური მოძრაობის” აქტივისტები ავტოკოლონებით მსვლელობებს მართავენ. აქტივისტები საავტომობილო კოლონებით მსვლელობას ოთხ ლოკაციაზე გამართავენ. ესენია: ცესკო, შსს, მთავრობის ადმინისტრაცია და მოდულის შენობა. “ჩვენი აქცია დაკავშირებულია იმ პროცესებთან, რასაც ხედავთ. მთელი საქართველოს მასშტაბით, საოლქო კომისიებში ხდება გაყალბებული ოქმებისა და არარეალური მონაცემების გადატანა. გვინდა, რომ ცენტრალურ საარჩევნო კომისიასთან კიდევ ერთხელ გავაპროტესტოთ ეს პროცესები. არც ცესკო, არც საოლქო კომისიები და არც ერთი სახელმწიფო ინსტიტუტი რეალურად არ ფუნქციონირებს და ეს ყველაფერი იმართება შუშის სასახლიდან”,- განაცხადა “ნაციონალური მოძრაობის” წარმომადგენლმა მიხეილ კაკაურიძემ. შეგახსენებთ, რომ ოპოზიცია 2020 წლის საპარლამენტო არჩევნების შედეგებს არ აღიარებს და ახალ არჩეულ პარლამენტს ბოიკოტს უცხადებს.
ეჭვი არ გვეპარება, ხმების დათვლის შემდეგ გამარჯვებულად გამოგვაცხადებენ - ჯო ბაიდენი
აშშ-ის პრეზიდენტობის „დემოკრატი“ კანდიდატი ჯო ბაიდენი აცხადებს, რომ დარწმუნებულია, არჩევნებში ის და ვიცე-პრეზიდენტობის კანდიდატი სენატორი კამალა ჰარისი გაიმარჯვებენ, თუმცა მხარდამჭერებს მოუწოდებს, ხმების ბოლომდე დათვლამდე სიმშვიდე შეინარჩუნონ. „ეჭვი არ გვეპარება, როდესაც ხმების დათვლა დასრულდება, გამარჯვებულად მე და სენატორ ჰარისს გამოგვაცხადებენ. ასე რომ, ყველას მოგიწოდებთ, სიმშვიდე შეინარჩუნოთ,“- განაცხადა ჯო ბაიდენმა. ამომრჩეველთა კოლეგიის ხმების მიხედვით, აშშ-ის საპრეზიდენტო არჩევნებში ამ ეტაპზე ჯო ბაიდენი ლიდერობს. CNN-ის ინფორმაციით, ბოლო მონაცემებით, პრეზიდენტობის „დემოკრატ“ კანდიდატს 253 ხმა აქვს, მოქმედ პრეზიდენტ დონალდ ტრამპს კი 213.
სკოლების დახურვა უკანასკნელი ზომა უნდა იყოს - ჰანს კლუგე
ჯანდაცვის მსოფლიო ორგანიზაციის ევროპის ბიუროს ხელმძღვანელი, ჰანს კლუგე აცხადებს, რომ კორონავირუსის პანდემიის წინააღმდეგ ბრძოლის ფარგლებში სკოლების დახურვა უკანასკნელი ზომა უნდა იყოს. „სკოლების დახურვა უკანასკნელი ზომა უნდა იყოს იმისთვის, რომ კოვიდ 19-ის დაკარგული თაობის წარმოქმნა ავიცილოთ თავიდან,“- განაცხადა ჰანს კლუგემ. მისი თქმით, ევროპაში ახლა კოვიდ-19-ის აფეთქებაა და რეგიონს მძიმე დრო ელის. „ჩვენ ვხედავთ, რომ აფეთქებაა, იმ გაგებით, რომ რეგიონში შემთხვევების 1 მილიონით გაზრდას მხოლოდ რამდენიმე დღე სჭირდება. გულწრფელები უნდა ვიყოთ, ცოტა რთული დრო გვექნება,“- განაცხადა კლუგემ. მან პირბადის ტარებისა და სოციალური დისტანციის დაცვის მნიშვნელობაზეც გაამახვილა ყურადღება. „პირბადეების გამოყენებითა და სოციალური შეკრებების მკაცრად გაკონტროლებით ევროპის რეგიონში თებერვლამდე 266 000 სიცოცხლის გადარჩენას შევძლებთ,“ - განაცხადა ჯანმო-ს წარმომადგენელმა.
2775 ახალი შემთხვევა და 22 გარდაცვლილი - სტატისტიკა რეგიონების მიხედვით
დღეის მდგომარეობით, 24 საათის განმავლობაში გამოვლენილია ინფიცირების 2 775 ახალი დადასტურებული შემთხვევა, – ამის შესახებ უწყებათაშორის საკოორდინაციო საბჭოსთან არსებული ოპერაციული შტაბის უფროსმა ალექსანდრე ხოჯევანიშვილმა, მთავრობის ადმინისტრაციაში გამართულ ბრიფინგზე განაცხადა. მან კორონავირუსთან დაკავშირებით უახლეს სტატისტიკურ მონაცემებსა და ბოლო 24 საათში მთავრობის მიერ გატარებული ღონისძიებების შესახებ ისაუბრა. „დღეის მდგომარეობით, 24 საათის განმავლობაში გამოვლენილია ინფიცირების 2 775 ახალი დადასტურებული შემთხვევა. პირველი ინფიცირების შემთხვევიდან დღემდე ქვეყანაში გამოვლენილი კოვიდ-19-ის დადასტურებული შემთხვევების საერთო რაოდენობა 51 993-ს შეადგენს. გამოჯანმრთელებული ადამიანების ზრდის კუთხით დღეის მდგომარეობითაც ვინარჩუნებთ პოზიტიურ დინამიკას. კერძოდ, ბოლო 24 საათში გამოჯანმრთელდა 3 560 პირი, ხოლო ჯამში გამოჯანმრთელებულთა რაოდენობა გაიზარდა 37 019-მდე. სამწუხაროდ, ბოლო 24 საათში გარდაიცვალა 22 ადამიანი, მათ შორის თბილისში - 8, აჭარაში - 6, იმერეთში - 7, ხოლო ქვემო ქართლში - 1 ადამიანი. 2020 წლის 26 თებერვლიდან დღემდე სულ გვაქვს 423 გარდაცვალების შემთხვევა. დღეს გამოვლენილი 2 775 შემთხვევიდან, დედაქალაქისა და რეგიონების მიხედვით მაჩვენებლები გამოიყურება შემდეგი სახით: თბილისში გამოვლენილია 1 044 შემთხვევა, აჭარაში - 503, იმერეთში - 526, ქვემო ქართლში - 207, შიდა ქართლში - 177, გურიაში - 89, სამეგრელო - ზემო სვანეთში - 117, კახეთში - 36, მცხეთა-მთიანეთში - 43, სამცხე-ჯავახეთში - 25, რაჭა-ლეჩხუმსა და ქვემო სვანეთში - 8. ამ ეტაპზე აქტიური ინფიცირებული შემთხვევა არის 14 525. 4 618 ადამიანი მკურნალობს საავადმყოფოში, მათ შორის, თბილისის საავადმყოფოებში - 2 279, აჭარაში - 734. მძიმე პაციენტი გვყავს 619, მათ შორის, თბილისში - 336, აჭარაში - 83. აქედან, ხელოვნური სუნთქვის აპარატზე არის 268 პირი - მათ შორის, თბილისში - 124, აჭარაში - 79. 2 438 ადამიანი არის კოვიდ-სასტუმროში, მათ შორის, 1 174 - აჭარაში, ხოლო 841 - თბილისში. 7 469 პირი მკურნალობს ბინაზე. საკარანტინე სივრცეში გვყავს 3 094 ადამიანი, მათ შორის, თბილისში - 689, აჭარაში-1 353. სულ 6 ოქტომბრიდან - 5 ნოემბრის პერიოდში, საზღვრიდან გადაყვანილია - 12 445 პირი. დღეის მდგომარეობით, თვითიზოლაციაში იმყოფება 31 370 ადამიანი, საიდანაც თბილისში არის 3 146 პირი, აჭარაში - 13 764, იმერეთში - 4 155“, - განაცხადა ალექსანდრე ხოჯევანიშვილმა.
მსოფლიოში კორონავირუსით დაინფიცირებულთა რაოდენობამ 49 მილიონს გადააჭარბა
მსოფლიოში კორონავირუსით დაინფიცირებულთა საერთო რაოდენობამ 49 მილიონს გადააჭარბა. Worldometers-ის მონაცემებით, პანდემიის დაწყებიდან, საერთო ჯამში, 49 016 480 ადამიანი დაინფიცირდა. მათგან 1 239 375 პაციენტი გარდაიცვალა, ხოლო 34 979 953 პირი გამოჯანმრთელდა. ამჟამად აქტიური შემთხვევების რიცხვი 12.7 მილიონს აჭარბებს. აღსანიშნავია, რომ მსოფლიოში დაინფიცირებულთა რაოდენობის 48 მილიონიდან 49 მილიონამდე გაზრდას მხოლოდ 2 დღე დასჭირდა. კოვიდინფიცირებულების რაოდენობით აშშ, ინდოეთი, ბრაზილია, რუსეთი და საფრანგეთი ლიდერობენ.
თუ დაითვლით კანონიერ ხმებს, მე ადვილად მოვიგებ - ტრამპი
თუ დაითვლით კანონიერ ხმებს, მე ადვილად მოვიგებ, თუ დაითვლით უკანონო ხმებს, მათ შეუძლიათ არჩევნები მოგვპარონ, - ამის შესახებ აშშ-ის მოქმედმა პრეზიდენტმა დონალდ ტრამპმა თეთრ სახლში გამართულ ბრიფინგზე განაცხადა. „უკვე ნამდვილად გავიმარჯვე რამდენიმე მნიშვნელოვან შტატში, მათ შორის ფლორიდაში, აიოვაში, ინდიანაში, ოჰაიოში. ჩვენ ისტორიული რიცხვებით მოვიგეთ,“- განაცხადა ტრამპმა. მან ქვეყანაში ჩატარებული საარჩევნო პროცედურა კიდევ ერთხელ გააკრიტიკა. „აღმაშფოთებელი არჩევნები გვქონდა. ბევრი სისულელე და ტყუილი იყო და ამას ჩვენს ქვეყანაში ვერ ავიტანთ,“- აღნიშნა დონალდ ტრამპმა. „რესპუბლიკელი“ სენატორი ადამ კინზინგერი აშშ-ის მოქმედ პრეზიდენტს, მოუწოდებს, მტკიცებულების გარეშე არჩევნების გაყალბებაზე საუბარი შეწყვიტოს. „ცხადია, გვინდა, რომ ყველა ხმა დაითვალონ, ყველა კანონიერი ხმა. (რა თქმა უნდა) მაგრამ თუ თქვენ ლეგიტიმურად ხართ შეშფოთებული თაღლითობასთან დაკავშირებით, მაშინ წარადგინეთ მტკიცებულება სასამართლოში. შეაჩერეთ დეზინფორმაციის გავრცელება, ეს სიგიჟეა“, – წერს კინზინგერი სოციალურ ქსელ „ტვიტერში“. ამომრჩეველთა კოლეგიის ხმების მიხედვით, აშშ-ის საპრეზიდენტო არჩევნებში ამ ეტაპზე ჯო ბაიდენი ლიდერობს. CNN-ის ინფორმაციით, ბოლო მონაცემებით, პრეზიდენტობის „დემოკრატ“ კანდიდატს 253 ხმა აქვს, მოქმედ პრეზიდენტ დონალდ ტრამპს კი 213.
კოსოვოს ყოფილი პრეზიდენტი გადადგომიდან რამდენიმე საათში დააკავეს
კოსოვოს ყოფილი პრეზიდენტი, ჰაშიმ ტაჩი თანამდებობიდან გადადგომის შემდეგ რამდენიმე საათში დააკავეს, -ამის შესახებ ინფორმაციას BBC-ი ავრცელებს. ჰაშიმ ტაჩიმ პრეზიდენტის პოსტი გუშინ დატოვა. მან ეს გადაწყვეტილება მას შემდეგ მიიღო, რაც ჰააგის სპეციალურმა სასამართლომ მისთვის ომის დანაშაულის გამო ბრალის წაყენების გადაწყვეტილება დაადასტურა. კოსოვოს საკითხებზე მომუშავე საგანგებო პროკურატურამ, ჰაშიმ ტაჩის ბრალი სავარაუდო ომის დანაშაულისა და კაცობრიობის წინააღმდეგ დანაშაულის, მათ შორის 100-მდე მკვლელობის შემთხვევის გამო ივნისში წარუდგინა. ჰაშიმ ტაჩი ბრალდებებს უარყოფს. ტაჩი პრეზიდენტის პოსტს 2016 წლიდან იკავებდა. მანამდე ის პრემიერ-მინისტრი იყო. როგორც „ევრონიუსი“ წერს ის ერთ-ერთი პარტიზანი ლიდერი იყო 1990-იან წლებში სერბეთისგან კოსოვოს დამოუკიდებლობისთვის ბრძოლაში.
სუს-ში დავასახელე ისინი, ვინც დესტრუქციული სცენარისთვის იყვნენ მომზადებული - კობახიძე
ქართული ოცნების აღმასრულებელი მდივნის ირაკლი კობახიძის განცხადებით, სახელმწიფო უსაფრთხოების სამსახურს ე.წ. რევოლუციური სცენარის ფარგლებში ნაციონალური მოძრაობის ლიდერებისა და აქტივისტების სამზადისთან დაკავშირებით მიაწოდა ინფორმაცია. როგორც კობახიძემ აღნიშნა, გამოკითხვისას დაასახელა ინფორმაციის წყარო და ასევე წარადგინა იმ ადამიანთა სიები, რომლებიც "დესტრუქციული სცენარისთვის ემზადებოდნენ". "დამიკავშირდნენ სახელმწიფო უსაფრთხოების სამსახურიდან იმ ინფორმაციასთან დაკავშირებით, რომელიც მე გავავრცელე რამდენიმე დღის წინ. საუბარია ბრიფინგზე, რომელიც უკავშირდებოდა ე.წ. რევოლუციური სცენარის ფარგლებში ნაცმოძრაობის ლიდერებისა და აქტივისტების სამზადისს. მე მქონდა ამასთან დაკავშირებით ინფორმაცია, დავასახელე დღეს ჩემი ინფორმაციის წყარო, ასევე შინაარსი და წარვადგინე იმ ადამიანების სიები, რომელებიც იყვნენ მომზადებული ასეთი დესტრუქციული სცენარისთვის. რა თქმა უნდა უნდა დაინტერესებულიყო გამოძიება და დღეს ამასთან დაკავშირებით შედგა გამოკითხვა", - განაცხადა კობახიძემ. მან კონკრეტული გვარებიც დაასახელა. კერძოდ, ოცნების ლიდერი აცხადებს, რომ რევოლუციური სცენარი სააკაშვილის მიერ იყო შედგენილი და მასში ენმ-ის სხვა ლიდერებთან ერთად, ჩართული იყვნენ დევით ჭანკოტაძე და დიმიტრი შაშკინი. "დავასახელე მათ შორის მათი ლიდერების გვარები. ეს ყველაფერი მიეკუთვნება იმ სცენარს, რომელიც შედგენილია მიხეილ სააკაშვილის მიერ, რომელიც არის მთავარი ლიდერი ამ კრიმინალური, დესტრუქციული პოლიტიკური ძალის და მასთან ერთად ამ კუთხით მოქმედებდნენ რამდენიმე წარმომადგენელი ამ პარტიის, მაგალითად დევი ჭანკოტაძე, დიმიტრი შაშკინს, იყვნენ სხვებიც. ეს ყველაფერი იგეგმებოდა მათ მიერ", - თქვა კობახიძემ. მისივე განცხადებით, ოპონენტებს გარკვეული გეგმები არჩევნების შემდგომ პერიოდშიც ჰქონდათ და გამოძიებას ამის შესახებაც მიაწოდა ინფორმაცია. "არჩევნების შემდგომ პერიოდთან დაკავშირებითაც იყო გარკვეული გეგმები და ამაზეც ჩემი ინფორმაცია მივაწოდე სახელმწიფო უსაფრთხოების სამსახურს", - აღნიშნა ირაკლი კობახიძემ. მან სახელმწიფო უსაფრთხოების სამსახურის შენობა რამდენიმე წუთის წინ დატოვა.
მეთიუ ბრაიზა: საქართველო ნატოს წევრი უნდა გახდეს. ქვეყანა ყველა კრიტერიუმს აკმაყოფილებს
მაშინ, როდესაც საქართველოს საპარლამენტო არჩევნებიდან დაახლოებით ერთი კვირის შემდეგ, პოლიტიკური პროცესები ისევ ოპოზიციის პროტესტის ფონზე მიმდინარეობს, აშშ-ს არჩევნებში გადამწყვეტი დღეა. სავარაუდოდ დღეს გაირკვევა, ვინ იქნება საქართველოს სტრატეგიული პარტნიორი ქვეყნის ლიდერი. „მოპარულ არჩევნებზე“ განცხადებები აქტუალურია როგორც საქართველოში, ასევე აშშ-ში. ამის გამო დონალდ ტრამპა ეუთოს წარმომადგენლის კრიტიკაც კი დაიმსახურა, როდესაც ტრამპმა განაცხადა, რომ კენჭისყრის პროცესში თაღლითობას ჰქონდა ადგილი. „ამ რიტორიკით წახალისებულმა ტრამპის მომხრეებმა შესაძლოა ძალადობა მიიჩნიონ ლეგიტიმურ იარაღად“, - მიიჩნევს აშშ-ის საპრეზიდენტო არჩევნებზე ეუთოს საერთაშორისო სადამკვირვებლო მისიის ხელმძღვანელი. ჯო ბაიდენის შტაბი გამარჯვებში დარწუნებულია, ამის საფუძველს მას ბოლო მონაცემი აძლევს. ორივე კანდიდატის საგარეო პოლიტიკურ ხედვაზე აშშ-ის სახელმწიფო მდივნის მოადგილის ყოფილ თანაშემწეს ვკითხეთ. მეთიუ ბრაიზა „ევროპათაიმს“ საქართველოს შიდა პოლიტიკურ პროცესებსა და ამერიკული ინვესტიციების თემაზეც ესაუბრა. მეთიუ ბრაიზა: დონალდ ტრამპი ნატოს დიდი გულშემატკივარი არასდროს ყოფილა. ის მომხრე არ არის, რომ მოკავშირეებთან ერთად ითანამშრომლოს ალიანსთან. პრეზიდენტმა აირჩია დაპირისპირების პოლიტიკა ირანთან, ჩინეთთან და ჩრდილოეთ კორეასთან მიმართებით. ის ნამდვილად არ არის ფოკუსირებული სამხრეთ კავკასიის რეგიონზე. რაც შეეხება ჯო ბაიდენს, მას სხვაგვარი მიდგომა აქვს - ის კარგად იცნობს რუსეთის აგრესიულ მისწრაფებებს სამხრეთ კავკასიასა და შავი ზღვის რეგიონში. ობამას ადმინისტრაციაში ის უკრაინის საკითხებზე მუშაობდა მაშინ, როდესაც რუსეთმა ყირიმის ანექსია მოახდინა. ღრმად აქვს გააზრებული ნატოს მნიშვნელობა და უკიდურესად მნიშვნელოვნად მიაჩნია მოკავშირეებთან ერთად გადაჭრას პრობლემები. ვფიქრობ, ტრამპისგან განსხვავებით, ბაიდენი არ აირჩევს დაპირისპირების გზას - ის არც მეგობრულად იქნება ჩრდილოეთ კორეასთან, თუმცა არც კონფრონტაციაში შევა. _როგორ შეაფასებთ საქართველოში ჩატარებულ არჩევნებს და ოპოზიციის გადაწყვეტილებას, უარი თქვან პარლამენტში შესვლაზე? გავეცანი ამერიკის საელჩოს განცხადებას და ეუთო/ოდირის შეფასებებს, რომლის მიხედვითაც არჩევნები კონკურენტულ და ზოგადად თავისუფალ გარემოში ჩატარდა, თუმცა იყო გარკვეული დარღვევებიც, რაც შემდგომში უნდა გამოსწორდეს. ოპოზიციამ პროტესტის ასეთი ფორმა აირჩია. ეს გასაგებია, თუმცა ვფიქრობ უკეთესია, თუ პოლიტიკური ლიდერები ამომრჩევლის იტერესებისთვის პარლამენტში იბრძოლებენ. კარგი არ არის, რომ ოპოზიცია ბოიკოტის გზას ირჩევს. _ საქართველოსთვის მნიშვნელოვანია პორტების განვითარება, მეტი ამერიკული ინვესტიციები. რა მოსაზრება გაქვთ ანაკლიის ღრმაწყლოვანი პორტის პროექტზე, ასევე როგორც ცნობილია, ამერიკული კომპანია „Tramo Group-ი“ ბათუმის პორტში აშენებს მინერალური სასუქების ტერმინალს. პროექტის თანახმად, ცენტრალური აზიის ქვეყნებიდან შავი ზღვის ნავსადგურში აზერბაიჯანისა და საქართველოს გავლით ლოგისტიკური დერეფანი შეიქმნება. რა მნიშვნელობა აქვს ამ პროექტს საქართველოსთვის და რა უნდა გააკეთოს ხელისუფლებამ მეტი ამერიკული პირდაპირი ინვესტიციის მოსაზიდად? ჩემი აზრით, მნიშვნელოვანი პროექტია. ნებისმიერ შემთხვევაში, მეტი ამერიკული ინვესტიციის მოსაზიდად, საქართველოს მთავრობამ საინვესტიციო გარემო უფრო უნდა გააუმჯობესოს. სამწუხაროდ, ანაკლიის პროექტის შეჩერება უკიდურესად ნეგატიურად აღიქვეს ვაშინგტონში. მნიშვნელოვანია, საქართველოს მთავრობამ მკაფიოდ განაცხადოს, რომ მისი მიზანია, გააძლიეროს საინვესტიციო გარემო; პატივი სცეს სამართლებრივ შეთანხმებებს კომერციულ სუბიექტებსა და კომპანიებს შორის. საქართველოს ძალიან კარგი პოზიციები აქვს აშშ-სთან ურთიერთობის კუთხით, რადგან ნატოს ასპირანტი ქვეყანაა და აშშ-ში, ძალიან ბევრ ადამიანს სურს, რომ საქართველო ნატოს წევრი იყოს. საქართველო უნდა გახდეს ნატოს წევრი, ის ყველა კრიტერიუმს აკმაყოფილებს. რაც შეეხება ყურადღების გამახვილებას საინვესტიციო გარემოზე, დარწმუნებული ვარ, რომ საქართველოს მთავრობას ამის გაკეთება შეუძლია. _თქვენ ერთ-ერთ ინტერვიუში აღნიშნავდით, რომ დასანანი იქნება, თუ საქართველო რეგიონული ციფრული ჰაბის პროექტში არ მიიღებს მონაწილეობას - საუბარია პროექტზე, რომლის განხორციელებაზეც აზერბაიჯანული კომპანია „აზერტელეკომი“ მუშაობს და რომლის ერთ-ერთი საკვანძო ნაწილიც „კავკასუს ონლაინის“ ოპტიკურ-ბოჭკოვანი კაბელებია. რა მოლოდინები გაქვთ, ამ პროექტის, ასევე ანაკლიის პროექტის მომავალთან დაკავშირებით? _არ ვიცი, როგორ განვითარდება მოვლენები. რაც შეეხება ზოგადად ციფრული ჰაბის პროექტს, თუ ეფექტური, სწრაფი, ოპტიკურ - ბოჭკოვანი ქსელი პირდაპირ თბილისზე გაივლის, შესაძლოა, თბილისში დიდი მონაცემთა ცენტრები აშენდეს. ასე რომ, ის ფაქტი, რომ ამ პროექტმა წინ ვერ წაიწია, დიდი მარცხია. ესეც ნეგატიურად აღიქვეს როგორც აშშ-ში, ასევე ევროპის დედაქალაქ ბრიუსელში. მაგრამ ვიმედოვნებ, საქართველოს მთავრობაში გამოიძებნება გზები ამ პროექტის განხორციელებისთვის
