რუსეთის პრეზიდენტი ვლადიმერ პუტინი უკრაინის წინააღმდეგ ახალ შეტევას ამზადებს და ამავდროულად აშშ-სთან და მის მოკავშირეებთან კონფლიქტისთვის ემზადება, - ნათქვამია Bloomberg-ის სტატიაში.
გამოცემა წერს, რომ პუტინი მოემზადა, რათა კონფლიქტი მრავალი წელი გაგრძელდეს.
„კრემლს სურს აჩვენოს, რომ თვეების განმავლობაში უკან დახევის შემდეგ მის ძალებს ინიციატივის დაბრუნება შეუძლიათ. კრემლი ცდილობს კიევსა და მის მოკავშირეებზე ზეწოლით, შეთანხმდნენ ზავზე, რომელიც საშუალებას მისცემს რუსეთს ოკუპირებულ ტერიტორიებზე კონტროლი შეინარჩუნოს“, - ასე აღწერეს ვითარება რუსმა ოფიციალურმა პირებმა და მათმა მრჩევლებმა Bloomberg-თან საუბარში.
„პუტინიც კი ვერ უარყოფს რუსული არმიის სისუსტეებს, რომლის გაძლიერებასაც ათწლეულები სჭირდება. რუსულმა ჯარებმა უკრაინაში თავდაპირველი მიღწევების ნახევარზე მეტი დაკარგეს“, - წერს სააგენტო.
Bloomberg-ის წყაროების ცნობით, მუდმივმა წარუმატებლობამ ფრონტზე, კრემლში ბევრი აიძულა, რომ უფრო რეალისტური ყოფილიყო თავის ამბიციებთან მიმართებით და ეღიარებინა, რომ ფრონტის ამჟამინდელი ხაზის შენარჩუნებაც კი მიღწევაა.
თუმცა, პუტინი დარწმუნებულია, რომ რუსეთი მზადაა, აანაზღაუროს დანაკარგები, რაც წარუმატებლობის მიუხედავად გამარჯვების საშუალებას მისცემს.
კრემლთან დაახლოებული Bloomberg-ის წყაროების ვარაუდით, შეტევა შესაძლოა, თებერვალ-მარტში განახლდეს.
მათი კომენტარები ემთხვევა უკრაინისა და მისი მოკავშირეების შიშებს, რომ შეტევა შესაძლოა, დაიწყოს მანამ, ვიდრე კიევი აშშ-დან და ევროპიდან საბრძოლო ტანკებს მიიღებს.
„პუტინის გადაწყვეტილება ომის მორიგი სასიკვდილო ესკალაციის მაუწყებელია. რუსეთის პრეზიდენტი მიიჩნევს, რომ მას სხვა ალტერნატივა არ აქვს, გარდა იმისა, რომ მოიგოს. მობილიზაციის ახალი რაუნდი ამ გაზაფხულზეა მოსალოდნელი“, - ამბობენ Bloomberg-ის წყაროები და მათი შეფასებით, რუსეთის ეკონომიკა და საზოგადოება სულ უფრო მეტად ერგება ომის საჭიროებებს.
„აშშ-სა და ევროპის სადაზვერვო სააგენტოებს აინტერესებთ, აქვს თუ არა რუსეთს რესურსი ახალი ძირითადი შეტევისთვის, რადგან უკრაინის მოკავშირეები პირველად ემზადებიან საბრძოლო ტანკების გაგზავნისთვის, რომლებიც უკრაინულ ძალებს რუსული ხაზების გარღვევაში დაეხმარებიან“, - ნათქვამია სტატიაში.
ცნობისთვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა.
რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა.
ომის დანაშაულში ბრალდებული პირველ რუსი ჯარისკაცს უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა.
„რუსეთის საჰაერო თავდასხმა უკრაინის ქალაქ მარიუპოლის თეატრზე, სადაც ასობით მშვიდობიანი მოქალაქე აფარებდა თავს, ომის აშკარა დანაშაულია", - განაცხადა უფლებადამცველმა ორგანიზაცია Amnesty International-მა 30 ივნისს, როდესაც მრავალი გადარჩენილი ადამიანი გამოკითხა და ვრცელი ციფრული მტკიცებულება შეაგროვა. 23 ივლისს, Human Rights Watch-მა რუსეთის მიერ ოკუპირებულ სამხრეთ უკრაინის ტერიტორიაზე ადამიანების გატაცებისა და წამების შესახებ ანგარიში გამოაქვეყნა.
Human Rights Watch-ის მიერ სექტემბრის დასაწყისში გამოქვეყნებული ანგარიშის მიხედვით, უკრაინელები იძულებით გადაჰყავთ რუსეთში ან რუსეთის მიერ უკრაინის ოკუპირებულ ტერიტორიებზე.
გაეროს ექსპერტთა ჯგუფმა, 23 სექტემბერს წარმოადგინა პირველადი შედეგები გამოძიების, რომელიც კიევში, ჩერნიგოვში, ხარკოვსა და სუმის ოლქებში ჩატარდა.
14 სექტემბრის მონაცემებით, უკრაინის ხელისუფლებამ განაცხადა, რომ უკრაინის შეიარაღებულმა ძალებმა კონტრშეტევის დროს, დაახლოებით 6000 კვ. კმ. დაიბრუნეს. რუსეთის კონტროლის ქვეშ მყოფი სამხრეთ რეგიონის გასათავისუფლებლად მთავარი კონტრშეტევის მოლოდინი ივლისის დასაწყისიდან გაჩნდა, როდესაც თავდაცვის მინისტრი, ოლექსი რეზნიკოვი ამბობდა, რომ პრეზიდენტმა ვოლოდიმირ ზელენსკიმ ოკუპირებული სამხრეთის გათავისუფლების ბრძანება გასცა. უკრაინა აცხადებდა, რომ დეოკუპაციის მიზნით, კონტრშეტევებს განაგრძობს.
- ლიეტუვამ, ლატვიამ, ესტონეთმა, პოლონეთმა და ჩეხეთმა რუსეთის ხელისუფლება ტერორისტულ რეჟიმად გამოაცხადეს. ამასთან, ევროპის საბჭოს საპარლამენტო ასამბლეამ ერთხმად მიიღო რეზოლუცია, რომლითაც რუსეთი ტერორისტულ რეჟიმად აღიარა.
- 23 ნოემბერს, ევროპარლამენტმა რუსეთი ტერორიზმის სპონსორ სახელმწიფოდ გამოაცხადა.
- 24 ნოემბერს, ნიდერლანდების პარლამენტმა, რუსეთი ტერორიზმის სპონსორ სახელმწიფოდ აღიარა.
11 ნოემბერს, უკრაინის შეიარაღებული ძალების ქვედანაყოფები ქალაქ ხერსონში შევიდნენ. უკრაინის პრეზიდენტმა ვოლოდიმირ ზელენსკიმ უკრაინელი სამხედროების მიერ ქალაქზე კონტროლის დაბრუნებას, ისტორიული უწოდა.
რუსეთი უკრაინის ქალაქებს მათ შორის კრიტიკულ ინფრასტრუქტურას ბომბავს. დასავლეთი კიევს საჰაერო თავდაცვის სისტემებს და სხვა საჭირო დახმარებას აწვდის. ამასთან, ევროპის უმსხვილესი ქალაქები უკრაინას, ელექტროენერგიის გენერატორებსა და ტრანსფორმატორებს გადასცემენ.
ევროპარლამენტის პრეზიდენტმა რობერტა მეცოლამ და ფლორენციის მერმა დარიო ნარდელამ „იმედის გენერატორების“ ინიციატივა წამოიწყეს. მისი მიზანია, ელექტროენერგიით უზრუნველყოს ქვეყნის ძირითადი ობიექტები, მათ შორის საავადმყოფოები, სკოლები, წყლის სადგურები, მოვლის ცენტრები, თავშესაფრები და საკომუნიკაციო სისტემები.
ომის დაწყებიდან 11 თვის თავზე, იანვარში, რუსეთის მხრიდან მოსალოდნელი ახალი შეტევის ფონზე და უკრაინის საჭიროებების საპასუხოდ, გერმანიამ დაადასტურა, რომ უკრაინაში 14 ერთეულ Leopard 2-ის ტიპის ტანკს გაგზავნის.
უკრაინის შეიარაღებული ძალების აღმოსავლეთის დაჯგუფების წარმომადგენელმა სერჰი ჩერევატიმ 25 იანვარს განაცხადა, რომ უკრაინის ჯარებმა დონეცკის ოლქის ქალაქი სოლედარი დატოვეს და წინასწარ მომზადებული პოზიციებისკენ გადაიწიეს. მისი განმარტებით, ეს ნაბიჯი პირადი შემადგენლობის სიცოცხლის შესანარჩუნებლად გადაიდგა. ჩერევატის თქმით, უკრაინელმა სამხედროებმა მტერს დიდი დანაკარგები მიაყენეს, რომელიც შეიძლება, ჩეჩნეთის ორ ომში რუსეთის დანაკარგებს შეედაროს. მანვე აღნიშნა, რომ უკრაინის დამცველებმა არ მისცეს მტერს საშუალება, გაერღვია ფრონტის ხაზი დონეცკის მიმართულებით. მისივე თქმით, უკრაინელი სახედროები არც ალყაში მოქცეულან და ტყვედაც არავინ ჩავარდნილა.
NATO-ს გენერალური მდივნის იენს სტოლტენბერგის შეფასებით, გერმანიის გადაწყვეტილება უკრაინას გამარჯვებაში დაეხმარება.
