პოლიტიკა
კელი დეგნანი: პარტიები შეთანხმდნენ საკონსტიტუციო ცვლილებების მნიშვნელობაზე, ეს არის სწორი ნაბიჯი საქართველოს დემოკრატიული განვითარებისთვის
საქართველოში აშშ-ის ელჩის, კელი დეგნანის განცხადებით, ქართველი პოლიტიკური ლიდერები თანხმდებიან, რომ საკონსტიტუციო ცვლილებები საქართველოს დემოკრატიული განვითარებისთვის აუცილებელია. ელჩმა ჟურნალისტებს განუცხადა, რომ ეს საქართველოს დემოკრატიული განვითარებისთვის სწორი ნაბიჯია. „პარტიები შეთანხმდნენ იმაზე, რომ საჭიროა ამ ტიპის საკონსტიტუციო ცვლილებები. შეთანხმდნენ ამ საკონსტიტუციო ცვლილებების მნიშვნელობაზე. ამაზე საუბარი ჯერ კიდევ 2019 წელს დაიწყო და ეს აისახა მარტის შეთანხმებაში, რომლის თანახმადაც, ბარიერი დაიწია. შესაბამისად, ოქტომბრის არჩევნები ჩატარდა დაბალი ბარიერით. შემდგომ კიდევ გაგრძელდა მოლაპარაკებები, დისკუსია. პოლიტიკური ლიდერები შეთანხმდნენ, რომ, ეს არის ის, რაც სჭირდება საქართველოს ამ ეტაპზე და ეს არის სწორი ნაბიჯი საქართველოს დემოკრატიული განვითარებისთვის, რაც უზრუნველყოფს, რომ მეტი პარტია, მრავალფეროვანი აზრი იქნება წარმოდგენილი საქართველოს პარლამენტში. ეს პასუხობს საქართველოს საუკეთესო ინტერესებს. ამას ადასტურებს ასევე ის ფაქტი, რომ პირველ მოსმენაზე ეს კონსტიტუციური ცვლილებები პარლამენტში გავიდა. ქართველი პოლიტიკური ლიდერები თანხმდებიან, რომ აუცილებელია ეს ცვლილებები საქართველოს დემოკრატიული განვითარებისთვის“, - განაცხადა კელი დეგნანმა. ამავე თემაზე: ირაკლი კობახიძე: თუ საკონსტიტუციო ცვლილებებს მივიღებთ, პროპორციული სისტემა და 5%-იანი ბარიერი 2024 წლიდან უნდა ამოქმედდეს დეგნანი: ზოგიერთს ალბათ არ ესმის, რომ დემოკრატია აზრთა მრავალფეროვნებას მოითხოვს. მხოლოდ ერთი პარტიის დომინირება უმრავლესობის ტირანიის რისკს ქმნის
ბენ ჰოჯესი: კლასიკური რუსული „ომი“ არის ეს - ყველანაირი ინსტრუმენტის, ბერკეტების, მუქარის ენის, დეზინფორმაციის, მიგრანტების გამოყენებით
Europetime-თან ექსკლუზიურ ინტერვიუში CEPA-ს (ევროპის პოლიტიკის ანალიტიკური ცენტრი) სტრატეგიული კვლევების კათედრის ხელმძღვანელი (ევროპაში აშშ-ის შეირაღებული ძალების მეთაური 2014-2017 წლებში) ბენ ჰოჯესი საუბრობს ბელარუსი-პოლონეთის საზღვარზე მიმდინარე პროცესებზე, უკრაინის საზღვართან რუსეთის ჯარის თავმოყრაზე და განიხილავს თეორიებს, როგორ შეიძლება განვითარდეს პროცესები. ბენ ჰოჯესი მიიჩნევს, რომ მიგრანტების შეიარაღება პოლონეთთან, ლიეტუვასთან და ლატვიასთან ბელარუსის საზღვრის გასწვრივ არ არის შემთხვევითი და ის დაკავშირებულია რუსეთის ფედერაციის აქტივობებთან უკრაინასა და მის გარშემო; კერძოდ, ეს შეიძლება იყოს დაზვერვითი ხასიათის, საბოტაჟის ან ყურადღების გადატანის მცდელობასთან დაკავშირებული ქმედებები, ან ყველა ზემოაღნიშნული. „სუვალკის დერეფანი, პოლონეთი-ლიეტუვის ტერიტორიის ეს ვიწრო ნაწილი, რომელიც ბელარუსსა და კალინინგრადს შორის მდებარეობს, სტრატეგიულად მნიშვნელოვანია, რადგან, როგორც მოგეხსენებათ, ის არის სახმელეთო კავშირი ჩვენს ბალტიისპირელ მოკავშირეებს (ლიეტუვა, ლატვია და ესტონეთი) და დანარჩენ NATO/ევროკავშირს შორის. თუ რუსეთის ფედერაციის და ბელარუსის შეიარაღებული ძალები დაკეტავენ მას, მაშინ რეალური პრობლემა შეგვექმნება. არსებობს ამის შესაძლებლობა (არა გარდაუვალი), მაგრამ იმ შემთხვევაში თუკი მიგრანტებთან დაკავშირებული სიტუაცია ბელარუსის საზღვარზე (რომელიც მთლიანად ბელარუსისა და რუსეთის ფედერაციის შექმნილია) გადაიზრდება სერიოზულ პრობლემაში, რა დროსაც რუსეთის ფედერაციამ შესაძლოა, გადაწყვიტოს, რომ უნდა ჩაერიოს „ჰუმანიტარული კრიზისის“ ან სხვა რაღაცის გამო და ამ პროცესში „დროებით“ დახურავს დერეფანს, თავისი ორი გზითა და ერთი რკინიგზით. ნაკლებად სავარაუდოა, თუმცა ჩემი აზრით, სავსებით შესაძლებელი. მთლიანობაში, სწორედ ეს არის კლასიკური რუსული „ომი“ - ყველანაირი ინსტრუმენტის, ბერკეტების, მუქარის, ენის, დეზინფორმაციის, მიგრანტების გამოყენებით“, - აღნიშნავს ევროპის პოლიტიკის ანალიტიკური ცენტრის სტრატეგიული კვლევების კათედრის ხელმძღვანელი. ბენ ჰოჯესის შეფასებით, უკრაინაში მიმდინარე კინეტიკური კონფლიქტის გაფართოება არ არის გარდაუვალი, თუმცა იმ შემთხვევაში, თუ კრემლი გადაწყვეტს მოქმედებას, არსებული კონფიგურაცია მას ამის საშუალებას მისცემს. ჩემი აზრით, უკრაინაში და მის გარშემო განვითარებულ მოვლენები არის ერთგვარი გაგრძელება, მომდევნო ფაზა იმისა, რაც მოხდა უკრაინაში და მის ირგვლივ ჯერ კიდევ გაზაფხულზე. მას შემდეგ, მიუხედავად თავდაცვის მინისტრ შოიგუს ცრუ განცხადებებისა, ვფიქრობ, ყველასთვის ცხადი გახდა, რომ რუსეთის ფედერაციის (RF) შეიარაღებული ძალები ნამდვილად არ დაბრუნებულან თავიანთ ყაზარმებში - რუსეთმა ადგილზე დატოვა ლოგისტიკის დიდი ნაწილი „ზაპად-21“ წვრთნების შემდეგ. ბოლო რამდენიმე თვის განმავლობაში გაჟღერდა უამრავი ძალიან მკვეთრი/უხეში გზავნილი პრეზიდენტ პუტინის მიერ, ასევე იყო კითხვები და ტრაბახი უკრაინის მომავლისა და მისი ლეგიტიმურობის შესახებ. თუ შევხედავთ ბოლო დროს განვითარებულ მოვლენებს - ჯარების გადაადგილებას/განლაგებას, შეგვიძლია ვთქვათ, რომ ზეწოლის და სამხედრო შესაძლებლობების სტაბილური ესკალაცია რეგიონში არც არასოდეს შეჩერებულა. რა თქმა უნდა, ამას საქართველოზეც აქვს გავლენა, თუ გათვალისწინებით ყირიმთან და აზოვის ზღვასთან მის სიახლოვეს. ჩვენ ვიცით, რომ რუსები მხოლოდ მაშინ ჩერდებიან, როცა მათ აჩერებენ. NATO-ს და ჩვენი პარტნიორების, მათ შორის უკრაინისა და საქართველოს მხრიდან საჭირო იქნება მტკიცე გადაწყვეტილება, რათა კრემლს ნათლად დავანახოთ, რომ ჩვენ არ მოვითმენთ ევროპული ქვეყნების სუვერენიტეტისა და საერთაშორისო სამართლის შემდგომ დარღვევას“, - განაცხადა ბენ ჰოჯესმა Europetimet-თან ექსკლუზიურ ინტერვიუში. ამავე თემაზე: ბენ ჰოჯესთან ექსკლუზიური ინტერვიუ სრულად ცნობისთვის, გერმანული გამოცემა, Bild-ის ინფორმაციით, რუსეთი უკრაინისთვის ზღვაზე გასასვლელის ბლოკირებას და კიევის ალყაში მოქცევას გეგმავს. გამოცემის წყაროს ცნობით, შეტევა სამფაზიანი იქნება და თავდასხმა ერთდროულად დაიწყება ანექსირებული ყირიმიდან და ოკუპირებული დონბასიდან.
თეთრი სახლი: მნიშვნელოვანია, გვახსოვდეს, საიდან მოდის პროვოკაციული ქმედებები. ეს არ არის შეერთებული შტატები და არც უკრაინა
თეთრი სახლის ოფიციალურმა წარმომადგენელმა, ჯენ ფსაკიმ განაცხადა, რომ NATO-ში ქვეყნების გაწევრიანების საკითხს ალიანსი წყვეტს და არა რუსეთი. მისი თქმით, მნიშვნელოვანია, გვახსოვდეს, საიდან მოდის პროვოკაციული ქმედებები და მათ შორის აშშ და უკრაინა არ არიან“, - აღნიშნა თეთრი სახლის პრესსპიკერმა. „NATO-ს წევრები წყვეტენ, ვინ გახდება ალიანსის წევრი. ამას რუსეთი არ წყვეტს. მნიშვნელოვანია, გვახსოვდეს, საიდან მოდის პროვოკაციული ქმედებები. ეს არ არის შეერთებული შტატები, ეს არ არის უკრაინა“, - აღნიშნა თეთრი სახლის პრესსპიკერმა. ამავე თემაზე: ამერიკის ელჩი სერგეი ლავროვს: ნათლად ჩანს, რომ საფრთხე ჩრდილოეთიდან მოდის და არა უკრაინიდან, ან საქართველოდან სერგეი ლავროვი: ისინი, ვინც NATO-ს ბუქარესტის სამიტის თეზისებს იმეორებენ, ცეცხლს ეთამაშებიან ენტონი ბლინკენი: NATO-ს კარი ღიაა მათ შორის უკრაინისთვის და საქართველოსთვის ცნობისთვის, რიგაში NATO-ს მინისტერიალის დღის წესრიგის ერთ-ერთი საკითხი შავი ზღვის რეგიონში არსებული უსაფრთხოების გარემო და ბოლო პერიოდში განვითარებული პროცესები იყო, მოკავშირეებმა ასპირანტი ქვეყნების საგარეო საქმეთა მინისტრებისგან მოისმინეს რეგიონული უსაფრთხოების საკითხებზე მათი ხედვები და იმსჯელეს როგორც რეგიონიულ, ასევე გლობალური უსაფრთხოების უზრუნველყოფის პროცესში ამ ქვეყნების წვლილზე. მინისტერიალის ფარგლებში, მონაწილეებმა ასევე განიხილეს საქართველოსა და უკრაინის მიერ ალიანსში გაწევრიანების გზაზე გადადგმული ნაბიჯები. საქართველოს ვიცე-პრემიერი, საგარეო საქმეთა მინისტრი დავით ზალკალიანი, დელეგაციასთან ერთად, ჩრდილოატლანტიკური ალიანსის მიწვევით, მონაწილეობდა რიგაში, NATO-ს წევრი ქვეყნების საგარეო საქმეთა მინისტრების შეხვედრაში. მინისტერიალის ფარგლებში საგარეო უწყების ხელმძღვანელი უკრაინის საგარეო საქმეთა მინისტრთან ერთად მონაწილეობდა ჩრდილოატლანტიკური საბჭოს სესიაში, სადაც სიტყვით მიმართა კოლეგა მინისტრებს.
ენტონი ბლინკენი: NATO-ს კარი ღიაა მათ შორის უკრაინისთვის და საქართველოსთვის
აშშ-ის სახელმწიფო მდივანი Euronews-თან ინტერვიუს დროს NATO-ში საქართველოს გაწევრიანების საკითხსაც შეეხო. ენტონი ბლინკენის შეფასებით, NATO-მ მრავალი წლის წინ ბუქარესტის სამიტზე მკაფიოდ განაცხადა, რომ მისი კარი ღიაა მათ შორის უკრაინისთვის და საქართველოსთვის და სხვა ქვეყნებისთვის, რომლებიც დაინტერესებულნი არიან გაწევრიანებაში, თუ/როდესაც დააკმაყოფილებენ წევრობის მოთხოვნებს. „ვაშინგტონისა და NATO-ს ხელშეკრულებაში მკაფიოდ გაწერილია, რომ ალიანსის კარი ღია იქნება მათთვის, ვისაც გაწევრიანება სურს და კრიტერიუმების დაკმაყოფილება შეუძლია. ასე რომ, ჩვენ კიდევ ერთხელ დავადასტურეთ ეს NATO-ს ბოლო შეხვედრაზე: NATO-ს კარი ღიაა, მაგრამ ეს არ წარმოადგენს საფრთხეს რუსეთისთვის, რადგან NATO თავდაცვითი ალიანსია. ეს გამჭვირვალე ალიანსია. ის არ არის მიმართული რუსეთის წინააღმდეგ. რეალურად, სამწუხაროდ, ერთადერთი აგრესიული ქმედება, რომელიც ჩვენ ვნახეთ ევროატლანტიკურ სივრცეში ბოლო წლებში, იყო რუსეთის აგრესია საქართველოს წინააღმდეგ, შემდეგ კი უკრაინის წინააღმდეგ. და ჩვენ არ გვსურს ამის განმეორება უკრაინაში“, - განაცხადა ენტონი ბლინკენმა. ცნობისთვის, რიგაში NATO-ს მინისტერიალის დღის წესრიგის ერთ-ერთი საკითხი შავი ზღვის რეგიონში არსებული უსაფრთხოების გარემო და ბოლო პერიოდში განვითარებული პროცესები იყო, მოკავშირეებმა ასპირანტი ქვეყნების საგარეო საქმეთა მინისტრებისგან მოისმინეს რეგიონული უსაფრთხოების საკითხებზე მათი ხედვები და იმსჯელეს როგორც რეგიონიულ, ასევე გლობალური უსაფრთხოების უზრუნველყოფის პროცესში ამ ქვეყნების წვლილზე. მინისტერიალის ფარგლებში, მონაწილეებმა ასევე განიხილეს საქართველოსა და უკრაინის მიერ ალიანსში გაწევრიანების გზაზე გადადგმული ნაბიჯები. საქართველოს ვიცე-პრემიერი, საგარეო საქმეთა მინისტრი დავით ზალკალიანი, დელეგაციასთან ერთად, ჩრდილოატლანტიკური ალიანსის მიწვევით, მონაწილეობდა რიგაში, NATO-ს წევრი ქვეყნების საგარეო საქმეთა მინისტრების შეხვედრაში. მინისტერიალის ფარგლებში საგარეო უწყების ხელმძღვანელი უკრაინის საგარეო საქმეთა მინისტრთან ერთად მონაწილეობდა ჩრდილოატლანტიკური საბჭოს სესიაში, სადაც სიტყვით მიმართა კოლეგა მინისტრებს.
ეუთოს 28-ე მინისტერიალზე „ოთხეული“ საქართველოს მხარდამჭერი განცხადებით გამოვიდა
ეუთოს 28-ე მინისტერიალის ფარგლებში, ეუთოს გასულმა (ალბანეთი), მოქმედმა (შვედეთი) და მომავალი ორი წლის (პოლონეთი და ჩრდილოეთ მაკედონია) თავმჯდომარეებმა ერთობლივი განცხადება გააკეთეს (STOCKHOLM “QUADRIGA” STATEMENT: OUR COMMITMENTS, OUR SECURITY, OUR OSCE). დოკუმენტში ე.წ. „ოთხეულმა“ გამოხატა მხარდაჭერა საქართველოს სუვერენიტეტისა და ტერიტორიული მთლიანობის მიმართ საერთაშორისოდ აღიარებულ საზღვრებში; გამოითქვა შეშფოთება საქართველოს აფხაზეთისა და ცხინვალის/სამხრეთ ოსეთის რეგიონებში ადამიანის უფლებათა გაუარესებული მდგომარეობის გამო. „ოთხეული”, ეუთოს სახელით, ურყევად უჭერს მხარს ჟენევის საერთაშორისო მილაპარაკებებს და ადასტურებს მზაობას, ევროკავშირსა და გაეროსთან ერთად უხელმძღვანელოს ამ ფორმატს. აგრეთვე, ხაზგასმულია ჟენევის მოლაპარაკებების ძირითად საკითხებზე -ძალის არ გამოყენება, საერთაშორისო უსაფრთხოების მექანიზმების შექმნა, დევნილთა და იძულებით გადაადგილებულ პორთა დაბრუნება - პროგრესის საჭიროება. დოკუმენტში „ოთხეული“ ასევე მოუწოდებს 2008 წლის ცეცხლის შეწყვეტის შეთანხმებით ნაკისრი ვალდებულებების სრულად და დაუყოვნებლივ შესრულებისკენ. საქართველოს საგარეო საქმეთა სამინისტროს განცხადებით, „ოთხეულის“ განცხადება არის ერთგვარი დასკვნითი დოკუმენტი, რომელსაც ეუთოს გასული წლისა და მომდევნო თავმჯდომარეები მინისტერიალის ფარგლებში პოლიტიკურ გადაწყვეტილებებზე კონსენსუსის არარსებობის პირობებში ამზადებენ.
ლიზა იასკო: ექიმები ამბობენ, რომ მიხეილ სააკაშვილის ჯანმრთელობის მდგომარეობა უმჯობესდება, სინამდვილეში ცუდადაა
"მიკვირს, როდესაც ექიმები ამბობენ, რომ მიხეილ სააკაშვილის ჯანმრთელობის მდგომარეობა უმჯობესდება, სინამდვილეში ცუდად არის, სახე და სხეული შესიებული აქვს, აქვს კანთან დაკავშირებული პრობლემები, გამონაყარი, რომელიც ნერვულ ფონზეა გამოწვეული", – ამის შესახებ უკაინის რადას დეპუტატმა, ლიზა იასკომ გორის სამხედრო ჰოსპიტალში სააკაშვილის მონახულების შემდეგ ჯანმრთელობის მდგომარეობასთან დაკავშირებული კითხვის საპასუხოდ განაცხადა. მისი თქმით, სააკაშვილს დასვენება სჭირდება. „მიკვირს, როდესაც ექიმები ამბობენ, რომ მისი ჯანმრთელობის მდგომარეობა უმჯობესდება. ამ სამ დღეში ვნახე, რომ ის სინამდვილეში ცუდად არის, სახე და სხეული შესიებული აქვს, აქვს კანთან დაკავშირებული პრობლემები, გამონაყარი, რომელიც ნერვულ ფონზეა გამოწვეული. ექიმი არ ვარ და ამ ყველაფერზე კომენტარის გაკეთება არ შემიძლია, მაგრამ ვხედავ მის სახეზე, რომ ყველაფერი რიგზე არაა. აქვს მხედველობის პრობლემები, ძალიან დაეცა ჰემოგლობინის დონე, თავს სუსტად გრძნობს და ყოველდღიური ურთიერთობისას ვხვდები, რომ მას ესაჭიროება დასვენება", - განაცხადა ლიზა იასკომ.
ავსტრიის ახალი კანცლერობის კანდიდატი დასახელდა
ავსტრიის სახალხო პარტიის (ÖVP) ხელმძღვანელობამ პარტიის ახალ ლიდერად შინაგან საქმეთა მინისტრი კარლ ნეჰამერი დაასახელა მას შემდეგ, რაც სებასტიან კურცმა ყველა პოლიტიკური პოსტი დატოვა. მომავალი ფედერალური კანცლერის პოსტსაც კარლ ნეჰამერი დაიკავებს. იუწყება France 24. პარტიაში შეხვედრა მას შემდეგ დაიგეგმა, რაც კურცმა, რომელიც ჩართული იყო კორუფციულ სკანდალში, პარტიის ლიდერის თანამდებობის დატოვების შესახებ განაცხადა. ალექსანდრე შალენბერგმა, რომელმაც ოქტომბერში კანცლერის თანამდებობა დაიკავა, განაცხადა, რომ მზად არის გადადგეს, რადგან კანცლერისა და პარტიის ხელმძღვანელის პოსტები ერთიდაიგივე პირმა უნდა დაიკავოს. შალენბერგი ნეჰამერის მთავრობაში სავარაუდოდ, შინაგან საქმეთა მინისტრის თანამდებობაზე განაგრძობს მუშაობას. რაც შეეხება ნეჰამერს, ის 2017 წელს გახდა დეპუტატი, ხოლო შინაგან საქმეთა მინისტრი 2020 წლის იანვარში.
როდის აიცრება ეკატერინე ტიკარაძე კოვიდვაქცინის მეორე დოზით - მინისტრის განმარტება
ჯანდაცვის მინისტრმა, ეკატერინე ტიკარაძემ კიდევ ერთხელ განმარტა, როდის აიცრება კოვიდვაქინის მეორე დოზით. მინისტრმა „რუსთავი 2“-ის ეთერში განაცხადა, რომ იმ პერიოდისთვის, როდესაც ის Astrazeneca-ს ვაქცინით აიცრა, ამ ტიპის ვაქცინით აცრა მისი ასაკისა და სქესისთვის დასაშვები იყო, თუმცა მეორე დოზით აცრამდე კორონავირუსით დაინფიცირდა, ვაქცინების დადგენილებაში კი გარკვეული ცვლილებები შევიდა. ეკატერინე ტიკარაძის თქმით, ვაქცინის მეორე დოზას წლის ბოლომდე გაიკეთებს, თუმცა რომელი ვაქცინა იქნება ეს, კონსულტაციების საფუძველზე გაირკვევა. „ამაზე არის ძალიან ბევრი კითხვა საზოგადოებაში და ახსნა არის ძალიან მარტივი. მე პირველი დოზა გავიკეთე Astrazeneca-ს ვაქცინით, რომელიც იმ პერიოდისთვის იყო მიღებული ჩემი ასაკის მოქალაქეებისთვის და ასევე სქესისთვის, რომ შეიძლებოდა ყოფილიყო ჩათვლილი, როგორც უსაფრთხო ვაქცინა, თუმცა შემდეგ იყო სხვადასხვა მოსაზრება და იმ პერიოდში, ვიდრე მე მეორე ვაქცინა მეკუთვნოდა, უკვე ვიყავი ინფიცირებული. მერე გამოვიდა ახალი დადგენილება, რითაც უკვე გარკვეულ რისკებს შეიცავდა და ამან, რა თქმა უნდა, ჩემს ჯანმრთელობაზეც მცირედი გავლენა მოახდინა, რის შემდეგაც უკვე კონსულტაციები ჩაითვალა საჭიროდ, უკვე რომელი ვაქცინით უნდა გავაგრძელო აცრა. დღეს უკვე ცნობილია, რომ დასაშვებია, ადამიანებმა, რომლებიც არ არიან სხვა ტიპის ვაქცინით აცრილები, მიიღონ დამატებითი დოზა Pfizer-ის ვაქცინის. ეს იყო საკმაოდ რთული პროცესი, რომელიც, რა თქმა უნდა, რაც უფრო ადრე გახდებოდა საჯარო, შეიძლება ,გარკვეული კამათის ან დისკუსიის საგანი გამხდარიყო, იყო ეს სიმართლე თუ ტყუილი. ვინაიდან ჩვენ არ გვქონდა კონკრეტული პასუხები ამასთან მიმართებით, რა თქმა უნდა, მეც მქონდა გარკვეული დუმილის ვალდებულება როგორც ჩემს ჯანმრთელობასთან მიმართებით, ასევე, რომ არ დამენერგა პანიკა მოსახლეობაში. თუმცა, მას შემდეგ, რაც უკვე უფრო ცხადი ხდება, რა შეიძლება იყოს ჩემი შემდგომი გზამკვლევი ვაქცინაციაზე, მივიღებ ვაქცინის ჩემს კუთვნილ დოზას“, - აცხადებს ეკატერინე ტიკარაძე. ცნობისთვის, ბოლოს მინისტრს ოქტომბერში ჰკითხეს, როდის აპირებდა მეორე დოზით ვაქცინაციას. ეკატერინე ტიკარაძე 2021 წლის მარტში აიცრა Astrazeneca-ს ვაქცინით. ივნისში მას კორონავირუსი დაუდასტურდა. ამავე თემაზე: ეკატერინე ტიკარაძე მის მეორე დოზით აცრაზე: შეგატყობინებთ. ნებისმიერი სამედიცინო მანიპულაცია არის ადამიანის ინდივიდუალური საკითხი
გენერალი მარკ მილი: აშშ თვალყურს ადევნებს საკმარის შემაშფოთებელ ინდიკატორებს უკრაინის მახლობლად რუსული სამხედრო ძალების მოქმედებების შესახებ
„შეერთებული შტატები თვალყურს ადევნებს საკმარის ინდიკატორებსა და გაფრთხილებებს უკრაინის მახლობლად რუსული სამხედრო ძალების მოქმედებების შესახებ, რაც „ღრმა შეშფოთებას" იწვევს. რუსული რიტორიკა სულ უფრო მძაფრი ჩანს“, - განაცხადა აშშ-ის გენშტაბის ხელმძღვანელმა მარკ მილიმ Reuters-ის ცნობით. გენერალმა უარი თქვა სპეკულირებაზე, თუ რა ვარიანტები შეიძლება განიხილოს შეერთებულმა შტატებმა რუსეთის შეჭრის შემთხვევაში. მაგრამ ხაზი გაუსვა უკრაინის სუვერენიტეტის მნიშვნელობას ვაშინგტონისთვის და NATO-ს ალიანსისთვის. „საქმე ეხება აშშ-ისა და NATO-ს წევრი ქვეყნების ეროვნული უსაფრთხოების ინტერესებს, თუ რუსეთი ღია სამხედრო აგრესიას მიმართავს იმ ქვეყნის წინააღმდეგ, რომელიც 1991 წლიდან დამოუკიდებულია“, - აღნიშნა გენერალმა. ცნობისთვის, უკრაინის თავდაცვის მინისტრმა 3 დეკემბერს, პარლამენტში დაზვერვის ანგარიშებზე დაყრდნობით განაცხადა, რომ რუსეთმა 94 000-ზე მეტი ჯარისკაცი განათავსა უკრაინის საზღვრებთან და შესაძლოა მოემზადოს იანვრის ბოლოს ფართომასშტაბიანი სამხედრო შეტევისთვის. ალექსეი რეზნიკოვმა აღნიშნა, რომ დაზვერვა აანალიზებს ყველა სცენარს, მათ შორის ყველაზე უარესს. მისივე თქმით, რუსეთის მხრიდან ფართომასშტაბიანი ესკალაციის ალბათობა არსებობს. მინისტრის თქმით, უკრაინა პროვოცირებას არ მოახდენს, თუმცა მზადაა, შეტევას უპასუხოს. ამავე თემაზე: ჯო ბაიდენის თქმით, რუსეთის შესაძლო თავდასხმისგან უკრაინის დასაცავად ინიციატივათა ახალ პაკეტს განიხილავს
ინტერპოლმა რუსეთს ჩეჩენ ოპოზიციონერზე ძებნის გამოცხადებაზე უარი უთხრა
ინტერპოლმა რუსეთს უარი უთხრა, ძებნა გამოეცხადებინა ჩეჩენ ოპოზიციონერ ბლოგერზე. ტუმსო აბდურახმანოვი თავის ვიდეობლოგებში ადამიანის სისტემატურად საუბრობს უფლებების დარღვევასა და სხვა სამართალდარღვევებზე ჩეჩნეთის რეგიონში. ამის შესახებ აბდურახმანოვმა თავის იუთუბ არხზე განაცხადა და აღნიშნა, რომ ინტერპოლმა კონსტიტუციის დარღვევად მიიჩნია მასზე ძებნის გამოცხადება. მედიის ცნობით, ბლოგერი იძულებული გახდა, დაეტოვებინა ჩეჩნეთის რეგიონი და რუსეთი და ამჟამად შვედეთში ცხოვრობს. რუსეთში აბდურახმანოვის წინააღმდეგ სისხლის სამართლის საქმე ექსტრემისტული საქმიანობისკენ მოწოდების გამო აღიძრა.
უკრაინის, ლიეტუვისა და პოლონეთის პრეზიდენტები საერთაშორისო თანამეგობრობას მოუწოდებენ, უკრაინის წინააღმდეგ აგრესიის გამო, რუსეთის მიმართ სანქციები გააძლიეროს
უკრაინის, ლიეტუვისა და პოლონეთის პრეზიდენტები ერთობლივი განცხადებით საერთაშორისო თანამეგობრობას მოუწოდებენ, უკრაინის წინააღმდეგ მიმდინარე აგრესიის გამო, რუსეთის მიმართ სანქციები გააძლიეროს. ლიდერები განსაკუთრებული შეშფოთებას გამოთქვამენ რეგიონში უსაფრთხოებისა და სტაბილურობის მუდმივი გაუარესებით, მათ შორის ჰიბრიდული საფრთხეების გამო, რომელიც რუსეთის აგრესიის შედეგია. ამასთან, განცხადების ავტორები გამოხატავენ სოლიდარობას მიგრანტთა კრიზისის გამო, რომელიც ხელოვნურად შეიქმნა და ორკესტრირებულია მინსკის მიერ. განცხადების ავტორები აღნიშნავენ, რომ ეს ჰიბრიდული შეტევა წარმოადგენს პირდაპირ საფრთხეს მთელი ევროპის უსაფრთხოებისთვის. „საერთაშორისო თანამეგობრობას მოვუწოდებთ, გააძლიეროს სანქციები რუსეთის მიმართ უკრაინის წინააღმდეგ მიმდინარე აგრესიის გამო და კრემლს კიდევ ერთხელ მოვუწოდებთ სიტუაციის დეესკალაციისკენ უკრაინის საზღვრებიდან და დროებით ოკუპირებული ტერიტორიებიდან ჯარების გაყვანით“, - ნათქვამია განცხადებაში. ამავე თემაზე: ჯო ბაიდენის თქმით, რუსეთის შესაძლო თავდასხმისგან უკრაინის დასაცავად ახალ პაკეტს განიხილავს
ჯო ბაიდენის თქმით, რუსეთის შესაძლო თავდასხმისგან უკრაინის დასაცავად ინიციატივათა ახალ პაკეტს განიხილავს
აშშ-ის პრეზიდენტი ჯო ბაიდენი აცხადებს, რომ ამზადებს ახალ ინიციატივას, რათა შეაჩეროს რუსეთის გეგმები უკრაინაში შეჭრასთან დაკავშირებით. ჯო ბაიდენის თქმით, რუსეთის შესაძლო თავდასხმისგან უკრაინის დასაცავად ახალ პაკეტს განიხილავს. აშშ-ის პრეზიდენტმა აღნიშნა, რომ ის „ძალიან გაურთულებს“ რუსეთს უკრაინაში ნებისმიერი შეჭრის გეგმის განხორციელებას. უკრაინის თავდაცვის მინისტრმა 3 დეკემბერს, პარლამენტში დაზვერვის ანგარიშებზე დაყრდნობით განაცხადა, რომ რუსეთმა 94 000-ზე მეტი ჯარისკაცი განათავსა უკრაინის საზღვრებთან და შესაძლოა მოემზადოს იანვრის ბოლოს ფართომასშტაბიანი სამხედრო შეტევისთვის. ალექსეი რეზნიკოვმა აღნიშნა, რომ დაზვერვა აანალიზებს ყველა სცენარს, მათ შორის ყველაზე უარესს. მისივე თქმით, რუსეთის მხრიდან ფართომასშტაბიანი ესკალაციის ალბათობა არსებობს. მინისტრის თქმით, უკრაინა პროვოცირებას არ მოახდენს, თუმცა მზადაა, შეტევას უპასუხოს. ამავე თემაზე: ბლინკენი ლავროვს: თუ უკრაინასთან დაკავშირებით, რუსეთი სამხედრო ესკალაციის გზას აირჩევს, მოსკოვს ეს ძვირი დაუჯდება
იტალიის საგარეო უწყება ქვეყნის ყველა ინსტიტუციას ურჩევს, არ ეკონტაქტონ თვითმარქვია წარმომადგენლებს: არ ვაღიარებთ საქართველოს ოკუპირებული რეგიონების დამოუკიდებლობას
იტალიის საგარეო საქმეთა მინისტრის მოადგილე მანლიო დი სტეფანოს განცხადებით, იტალია ადასტურებს საქართველოს სუვერენიტეტისა და ტერიტორიული მთლიანობისადმი მტკიცე მხარდაჭერას და არ აღიარებს საქართველოს ოკუპირებული რეგიონების დამოუკიდებლობას. „მოვუწოდებთ იტალიის ყველა ინსტიტუციას - ეროვნულს, რეგიონულს და ადგილობრივს, შეინარჩუნონ თანმიმდევრულობა მთავრობის მიერ გამოხატულ პოზიციებთან და თავი აარიდონ თვითმარქვია წარმომადგენლებთან კონტაქტს, რაც მხოლოდ გაუგებრობას იწვევს. კონფლიქტი საქართველოში კვლავ იწვევს სამოქალაქო პირთა შორის მსხვერპლს და ტანჯვას და ჩვენ მხარი უნდა დავუჭიროთ კონფლიქტის მშვიდობიან გადაწყვეტას საქართველოს მთლიანობისა და სუვერენიტეტის დაცვით“, - განაცხადა იტალიის საგარეო საქმეთა მინისტრის მოადგილემ, მანლიო დი სტეფანომ თავის ქართველ კოლეგასთან, ხათუნა თოთლაძესთან დღეს რომში გამართული შეხვედრისას. საქართველოს საგარეო უწყების ცნობით, შეხვედრაზე ხათუნა თოთლაძემ და მანლიო დი სტეფანომ განიხილეს საქართველო-იტალიის ურთიერთობებთან დაკავშირებულ საკითხთა ფართო სპექტრი; პოლიტიკის, ეკონომიკისა და სოციალური საკითხების სფეროში თანამშრომლობის თემები; განსაკუთრებული ყურადღება გაამახვილეს ორ ქვეყანას შორის კულტურის სფეროში არსებულ კავშირებზე, განხორციელებულ და დაგეგმილ საერთო პროექტებზე. შეხვედრაზე მიმოიხილეს საქართველოს ევროპული და ევროატლანტიკური ინტეგრაციის პროცესის აქტუალური ასპექტები. განსაკუთრებული აქცენტი გაკეთდა ოკუპაციის თემაზე და საქართველოს ოკუპირებულ ტერიტორიებზე არსებულ ვითარებაზე. „ვისაუბრეთ ორ ქვეყანას შორის არსებულ შესანიშნავ ორმხრივ ურთიერთობებზე და დიპლომატიური ურთიერთობების დამყარების 30 წლისთავთან დაკავშირებით, ისევე, როგორც მრავალმხრივ ფორმატში და ევროკავშირთან ურთიერთობების თვალსაზრისით დაგეგმილ აქტივობებზე“, - აღნიშნა დი სტეფანომ.
თეა წულუკიანი: არ უნდა ყოფილიყო არავითარი დანდობა. ეს იყო შეცდომა
კულტურის მინისტრმა თეა წულუკიანმა ხელისუფლებაში მოსვლის შემდეგ, „ქართული ოცნების“ მიერ გამოცხადებულ კოჰაბიტაციას შეცდომა უწოდა. წულუკიანმა პარლამენტში მინისტრის საათის ფორმატში სიტყვით გამოსვლისას დეპუტატებთან სიტყვიერი დაპირისპირების შემდეგ განაცხადა, რომ დანდობა არ უნდა ყოფილიყო. „როდესაც ჩვენ ამ თუ სხვა მოწვევის პარლამენტში და შემადგენლობებში ვთქვით, რომ არ ღირს პოლემიკა და პასუხის გაცემა, იქ დავმარცხდით. როდესაც ჩვენ ვთქვით 2013 წელს, რომ ესენიც ჩვენი ქვეყნის შვილები არიან და მოდით, შევეცადოთ მათთან ერთად ვმართოთ ქვეყანა, მაშინ იყო ეს ყველაზე დიდი შეცდომა. ის კაცი, რომელიც დღეს გალიაში ზის, მაშინვე უნდა ჩამჯდარიყო იმ გალიაში, საიდანაც ახლა საკუთარი ცოლის დაპატიმრებას ითხოვს. ეს არის მეგობრებო ჩვენი შეცდომები, როდესაც ჩვენ დავუჯერეთ რჩევებს და აქ ვერ დავწვრილმანდები, მაგრამ მოვა დრო და ყველაფერს გავიხსენებ, ვინ რა რჩევა როდის მოგვცა იმისთვის, რომ თანაგვეცხოვრა, იმისთვის რომ დაგვენდო. ეს იყო შეცდომა. მისაყვედურეთ, რამდენიც გინდათ გულახდილობისთვის. იმიტომ, რომ ჩვენ ქვეყანას ამით დავაკარგვინეთ ბევრი დრო, დავხარჯეთ ჯანმრთელობა და ნერვები. არ უნდა ყოფილიყო არავითარი დანდობა და კანონით, სამართლიანად ყველას უნდა გასცემოდა ის პასუხი, რასაც იმსახურებდა”, - განაცხადა თეა წულუკიანმა.
რატი იონათამიშვილი: თეა წულუკიანის იუსტიციის სამინისტროში მუშაობა სწორედ რუსეთთან საქმის მოგებით არის მნიშვნელოვანი თითოეული ქართველისთვის
„პარადოქსია, როცა პროევროპელი პოლიტიკოსი თეა წულუკიანს მიღწევებზე ეკითხება, იმ ადამიანს, რომელიც იყო იმ სამინისტროს ხელმძღვანელი ზუსტად მაშინ, როცა საქართველომ ორჯერ მოუგო სტრასბურგის სასამართლოში დავა რუსეთს“, - განაცხადა დამოუკიდებელი დეპუტატის, სალომე სამადაშვილის მისამართით საპარლამენტო უმრავლესობის წარმომადგენელმა, რატი იონათამიშვილმა პლენარულ სხდომაზე, სადაც დეპუტატები კულტურის, სპორტისა და ახალგაზრდობის მინისტრს, თეა წულუკიანს მინისტრის საათის ფორმატში უსმენენ. მისი თქმით, თეა წულუკიანის იუსტიციის სამინისტროში მუშაობა სწორედ რუსეთთან საქმის მოგებით არის მნიშვნელოვანი თითოეული ქართველისთვის. „ეს არის ის ფაქტი, რომელსაც ვერავინ გავექცევით. ამით თქვენც უნდა ამაყობდეთ, რადგან ამ პროცესში მარტო ჩვენთვის ან რომელიმე მოქალაქისთვის არა, საქართველოსთვის მოიგო თეა წულუკიანმა ჩვენთან ერთად“, - განაცხადა რატი იონათამიშვილმა.
ელისო ბოლქვაძე: მჯერა, რთული დიპლომატიური დიალოგი ერებს შორის მშვიდობის გასამყარებლად, ხელოვნების ენით გახდება შესაძლებელი
„დღეს, საქართველოში, კულტურის პოლიტიკა განხილულია როგორც უმნიშვნელოვანესი პრიორიტეტი ქვეყნის განვითარებისთვის. საქართველო თავისი მდიდარი, შთამბეჭდავი ისტორიით და მისწრაფებებით გამორჩეული და უძველესი ერია, რომელიც მსოფლიომ კიდევ უფრო კარგად უნდა გაიცნოს და დააფასოს. სწორედ კულტურა განსაზღვრავს ერის მნიშვნელოვან ღირებულებებს. განათლება და კულტურა არის ის მიმართულებები, რომლებიც ქვეყნის განვითარების მთავარი ქვაკუთხედია“, - ამის შესახებ კულტურის კომიტეტის თავმჯდომარემ ელისო ბოლქვაძემ პარლამენტის პლენარულ სხდომაზე განაცხად, სადაც მინისტრის საათის ფორმატში, კულტურის მინისტრს მოუსმინეს. მისი თქმით, განათლების, მეცნიერებისა და კულტურის კომიტეტის ხელმძღვანელობისას, თეა წულუკიანის მიერ უმნიშვნელოვანესი ნაბიჯები გადაიდგა გელათის სამონასტრო კომპლექსის კონსერვაცია-რესტავრაციის პროცესში გამოვლენილი ხარვეზების მოგვარების მიზნით. ასევე, მის მიერ პრიორიტეტულ საკითხად იქნა მიჩნეული ოქროს ფონდისა და შალვა ამირანაშვილის სახელობის ხელოვნების მუზეუმის გადარჩენა. „მჯერა ქალბატონი თეას აქტიური მონაწილეობით მოხერხდება უდიდესი მნიშვნელობის მქონე კულტურული მემკვიდრეობის ძეგლების გადარჩენა. კიდევ ერთხელ გამოვხატავთ მზაობას მხარი დავუჭიროთ კულტურის, სპორტისა და ახალგაზრდობის სამინისტროს, რათა ქვეყანას გააჩნდეს კულტურის პოლიტიკის ერთიანი ხედვა, რომელიც მიმართული იქნება არსებული გამოწვევების დაძლევასა და ქვეყანაში შემოქმედებითი პროცესის ჰარმონიზაციისა და განვითარებისკენ“, - განაცხადა კულტურის კომიტეტის თავმჯდომარემ.
სალომე სამადაშვილი თეა წულუკიანს: ეს ქვეყანა და მისი ათასწლიანი კულტურის მემკვიდრეობა უკეთესს იმსახურებს კულტურის მინისტრისგან
პარლამენტის სხდომაზე, სადაც მინისტრის საათის ფორმატში თეა წულუკიანს მოუსმინეს, ოპოზიციონერმა დეპუტატმა, სალომე სამადაშვილმა კულტურის, სპორტისა და ახალგაზრდობის მინისტრს მიმართა. „ქალბატონო თეა, თქვენ დღეს მე მკითხეთ ,რატომ გადმოვინაცვლე „ნაციონალური მოძრაობის“ რიგებიდან, აქ ამ რიგებში. ჩემი გადაწყვეტილება დიდწილად განპირობებული იყო იმით, რომ საქართველოს პოლიტიკაში ჩვენ გაგვენეიტრილებინა ის, რაც დღეს მოვისმინეთ თქვენს გამოსვლაში - სიძულვილი, წარსულზე საუბარი და არცერთი სიტყვა ამ ქვეყნის მომავალზე, სადაც ჩვენ ყველამ ერთად უნდა ვიცხოვროთ. ვიდრე დაიწყებთ ადამიანების ბიოგრაფიებზე საუბარს, მიმოიხედეთ თქვენს გარშემო. დღეს თქვენს რიგებში ძალიან ბევრი ადამიანია, ვინც იმ საოცარი სისხლიანი 9 წლიანი რეჟიმის პირობებში ძალიან აქტიურად თანამშრომლობდა იმ ხელისუფლებასთან და დღეს აქ ოპოზიციის მხარეს, აქ მგონი მარტო მე ვარ, რომელსაც არასდროს უთანამშრომლია ბიძინა ივანიშვილის პოლიტიკურ რეჟიმთან. კითხეთ საკუთარ თავს - რატომ მოხდა ასე? რატომ ხართ იქ, სადაც ხართ? რატომ აღმოჩნდით დღეს ასეთ მდგომარეობაში ქვეყნის კულტურის მინისტრი, რომ 9 წელიწადია, მართავთ ამ ქვეყანას და როდესაც გთხოვთ, დაასახელოთ ერთი მიღწევა მაინც, თქვენ ჩემთვის სათქმელი არაფერიც არ გაქვთ. თქვენი სიძულვილის წყაროც სწორედ აქედან მოდის, იმიტომ რომ ადამიანებს, რომლებსაც სჯერათ საკუთარი თავის და ადამიანებს, რომლებსაც შეუძლიათ, პოლიტიკაში პოზიტიური მემკვიდრეობა შექმნან, მათ სიძულვილი არ სჭირდებათ. ძალიან დიდი მორალური განსხვავებაა, ქალბატონო თეა, თქვენსა და ჩემს შორის. მე პოლიტიკური განსხვავებები შეიძლება მქონდეს, მათ შორის, მიხეილ სააკაშვილთან, მაგრამ არ ვითანამშრომლებ და სამსახურში არ ჩავუდგები იმ რეჟიმს, რომელიც ჩემს ყოფილ თანაგუნდელებს დილეგში აგდებს. მომავალში აქ რომ დაბრუნდებით, შეეცადეთ რამე გვესაუბროთ თქვენს მიღწევებზე სიძულვილის ენის საუბრის ნაცვლად. ეს ქვეყანა და მისი ათასწლიანი კულტურის მემკვიდრეობა უკეთესს იმსახურებს კულტურის მინისტრისგან“, - განაცხადა სალომე სამადაშვილმა. თეა წულუკიანი დღეს პარლამენტში თაკო ჩარკვიანს და სალომე სამადაშვილს დაუპირისპირდა. კულტურის მინისტრმა თაკო ჩარკვიანის ერთ-ერთი სატელევიზიო ინტერვიუდან ერთ-ერთი ნაწილი ჩართო ტელეფონში, რომელშიც დეპუტატი წულუკიანს აკრიტიკებს. საპასუხოდ ის შოუს მოწყობაში დაადანაშაულეს, რაზეც კულტურის მინისტრმა უპასუხა, რომ ის „შოუს მინისტრიც“ არის.
თბილისის საკრებულოში 3 ფრაქცია შეიქმნა
თბილისის საკრებულოში 3 ფრაქცია დაკომპლექტდა. „ქართული ოცნება“ საკრებულოში ერთი ფრაქციით იქნება წარმოდგენილი, რომლის შემადგენლობაში 29 წევრია. ფრაქციის თავმჯდომარედ 28 ხმით ოთარ გრიგოლია აირჩიეს. „ნაციონალური მოძრაობის“ ფრაქციას ირაკლი ნადირაძე უხელმძღვანელებს. კიდევ ერთი ფრაქცია „თბილისი საქართველოსთვის“ 3 დეპუტატით იქნება წარმოდგენილი და მას ყოფილი პრემიერ-მინისტრისგიორგი გახარიას პარტიის წევრი ზაზა თავაძე უხელმძღვანელებს. ამასთან, თბილისის საკრებულოში, მეშვიდე მოწვევის საკრებულოს პირველ სხდომაზე, წარმომადგენლობით ორგანოში მოქმედი კომისიების თავმჯდომარეები აირჩიეს. უწყების ცნობით, საკრებულოში სულ 11 კომისიაა, რომლებსაც უხელმძღვანელებენ: იურიდიულ საკითხთა და ადამიანის უფლებათა დაცვის კომისია - ლევან ჟორჟოლიანი. ქონების მართვის და საფინანსო საბიუჯეტო კომისია - ირაკლი ხელაძე. ჯანმრთელობის დაცვის და სოციალურ საკითხთა კომისია - ზურაბ ჩიკვილაძე. განათლებისა და კულტურის კომისია - კახა ლაბუჩიძე. გარემოს დაცვის კომისია - ნიკოლოზ კახეთელიძე. ეკონომიკური განვითარების, საინვესტიციო პოლიტიკისა და საერთაშორისო ურთიერთობების კომისია - ლევან არველაძე. სახელდებისა და სიმბოლიკის კომისია - ნინო ვარდოსანიძე. სპორტისა და ახალგაზრდულ საქმეთა კომისია - გიორგი ჩაკვეტაძე. ურბანული დაგეგმარების და საქალაქო მეურნეობის კომისია - რევაზ სოხაძე. სარევიზიო კომისია - ლევან ჯაფარიძე. სატრანსპორტო საკითხთა კომისია - შალვა ოგბაიძე. „ახალი მოწვევის საკრებულოს სხდომაზე საკრებულოს ფრაქციები დაარეგისტრირეს და თავმჯდომარეები აირჩიეს. თბილისის საკრებულოში 3 ფრაქცია დაკომპლექტდა. ფრაქცია „ქართული ოცნება-დემოკრატიული საქართველო“, რომლის შემადგენლობაში 29 წევრი იქნება. ფრაქციის თავმჯდომარედ ოთარ გრიგოლია აირჩიეს. ფრაქცია „ნაციონალური მოძრაობას“ ირაკლი ნადირაძე უხელმძღვანელებს. ფრაქცია 13 წევრისგან შედგება. ფრაქცია „თბილისი საქართველოსთვის“ 3 დეპუტატით იქნება წარმოდგენილი და მას პარტია „საქართველოსთვის“ წევრი ზაზა თავაძე უხელმძღვანელებს. ასევე, რეგლამენტის თანახმად, საკრებულოს ფრაქციის რეგისტრაციისა და საკრებულოს კომისიების წევრთა რაოდენობა და პროპორციული წარმომადგენლობის კვოტები დაამტკიცეს. ახლადარჩეულმა საკრებულომ, დღევანდელ სხდომაზე, საკრებულოს ასევე, რეგლამენტის თანახმად, საკრებულოს ფრაქციის რეგისტრაციისა და საკრებულოს კომისიების წევრთა რაოდენობა და პროპორციული წარმომადგენლობის კვოტები დაამტკიცეს. ახლადარჩეულმა საკრებულომ, დღევანდელ სხდომაზე, საკრებულოს კომისიების შემადგენლობა ცნობად მიიღო.“, - ნათქვამია გავრცელებულ ინფორმაციაში.
მიხეილ სარჯველაძე თეა წულუკიანს: თქვენ იმსახურებთ მადლიერებას ნაკეთები საქმეებისთვის
„თქვენ იმსახურებთ მადლიერებას, იმ ნაკეთები საქმეებისთვის, რომელიც რეალურად წარმოაჩენს ამ ქვეყანაში წარმატების მიღწევის ძალიან დიდ პერსპექტივებს“, - ამის შესახებ „ქართული ოცნების“ ერთ-ერთმა ლიდერმა მიხეილ სარჯველაძემ პარლამენტის პლენარულ სხდომაზე განაცხადა, სადაც მინისტრის საათის ფორმატში კულტურისა და სპორტის მინისტრს თეა წულუკიანს მოუსმინეს. „მე მინდა ბოდიში მოგიხადოთ იმისთვის, რაც თქვენ დღეს აქ მოისმინეთ. ეს არის მიუღებელი ადამიანურად და ეს არის ფსკერზე ქვემოთ, აბსოლუტურად დაუშვებელი ადამიანურობის, ჰუმანიზმის, ქართველობის, პარლამენტარიზმის, ნებისმიერი კრიტერიუმით რაც არ უნდა ვთქვათ. ამ ფონზე, მინდა გადაგიხადოთ დიდი მადლობა თუნდაც იმისთვის, რომ ოპოზიციიდან გამოთქმულ არც ერთ კრიტიკულ სიტყვას თქვენ არ იმსახურებთ. თქვენ იმსახურებთ მადლიერებას, იმ ნაკეთები საქმეებისთვის, რომელიც რეალურად წარმოაჩენს ამ ქვეყანაში წარმატების მიღწევის ძალიან დიდ პერსპექტივებს, რომელიც იშლება ყოველდღიურად ამ საქმიანობის შედეგად. მე ყოველთვის მექნება იმედი, რომ იქ, სადაც თქვენ ბრძანდებით, თქვენი გუნდია, რეალურად შესაძლებელია რომ საქართველო წარმოჩნდეს კაცობრიობაში როგორც ლიდერი“, - განაცხადა სარჯველაძემ.
გიორგი ვაშაძე თეა წულუკიანს: სიძულვილის ენა კულტურის ახალი სტანდარტია, რომელსაც კულტურის მინისტრი გვთავაზობს?
„ეს კულტურის კი არა უკულტურობის მინისტრობაა, რაც თქვენ დღეს აქ წარმოაჩინეთ. მართლა საოცრებაა, რომ თქვენ წარმოადგენთ დღეს კულტურის სფეროს საქართველოში, - მიმართა „სტრატეგია აღმაშენებლის“ ლიდერმა გიორგი ვაშაძემ საქართველოს კულტურის, სპორტისა და ახალგაზრდობის საქმეთა მინისტრს თეა წულუკიანს, რომელსაც პარლამენტში „მინისტრის საათის“ ფორმატში უსმენენ. „ქალბატონო თეა, თქვენი გამოსვლა ისევ და ისევ სავსე იყო სიძულვილის ენით, იმით, რომ გაუგებარი ეპითეტებით მოიხსენიებთ კულტურის სფეროს ამა თუ იმ წარმომადგენელს. ანუ ეს არის კულტურის ახალი სტანდარტი, რომელსაც კულტურის მინისტრი გვთავაზობს? ასე აპირებთ კულტურის სფეროში მოღვაწეობის თუ მუშაობის გაგრძელებას? ანუ კულტურის სფეროს ის წარმომადგენლები, რომლებიც თქვენს აზრს სრულად არ გაიზიარებენ, მათ აზრს არ მოისმენთ და იქნებით მხოლოდ მათი მინისტრი, ვინც ტაშს დაგიკრავთ ყველაფერზე? ეს კულტურის მინისტრობა კი არა უკულტურობის მინისტრობაა, რაც თქვენ დღეს აქ წარმოაჩინეთ. მართლა საოცრებაა, რომ თქვენ წარმოადგენთ დღეს კულტურის სფეროს საქართველოში თქვენი დამოკიდებულებით, თუნდაც ჟურნალისტებთან, თუნდაც კულტურის სფეროს წარმომადგენლებთან, სხვადასხვა ადამიანებთან იმ სიძულვილის ენით, რაზეც თქვენს გამოსვლაში ისაუბრეთ. არავის არაფერი დაამახსოვრდება, რაზეც ისაუბრეთ, გარდა იმ ეპითეტებისა, რითაც მოიხსენიეთ თქვენი ჯგუფები, ადამიანები, თუ ცალკეული პირები. მართლა მაინტერესებს, ასე აპირებთ კულტურის სფეროს გაძღოლას? ეს არის ახალი სტანდარტი საქართველოში?“, - მიმართა გიორგი ვაშაძემ თეა წულუკიანს. საპასუხოდ, მინისტრმა ვაშაძე იუსტიციის სახლის უხარისხოდ აშენებაში დაადანაშაულა. „2013 წლის 3 დეკემბერს გიორგი ვაშაძის აგებული იუსტიციის სახლის სახურავი ჩამომენგრა თავზე. ბატონმა დავით აღმაშენებელმა ეს იუსტიციის სახლი ისე ააშენა, რომ იმ პეტალებში, რომელიც სახურავია, შიგნით აქვს ჰაერი, ჩატოვეს არმატურები. ქარის პირობებში ეს ნაგავი იმხელა ვიბრაციას იწვევდა, რომ სახურავი ჩამოვარდა. ადამიანები შემთხვევით გადარჩნენ“, - განაცხადა თეა წულუკიანმა. „ბატონი გიორგი ვაშაძე, რომელიც არის დავით აღმაშენებელი, თქვა, თქვენ ხართ უკულტურობის მინისტრი, მწერლების მაკონტროლებელი, შეურაცხყოფები მოდის და შემდეგ არის კითხვა, რას აპირებთ მწერალთა კავშირთან დაკავშირებითო. მინდა, მას შევახსენო და ასევე სალომე სამადაშვილს, რომ მწერალთა კავშირი თქვენ გააუქმეთ და მე რატომ მეკითხებით, რას ვაპირებ მწერალთა კავშირთან დაკავშირებით? რა გაცინებთ ქალბატონო სალომე, თქვენ არ გახსოვთ ალბათ, ბრიუსელში იყავით მაშინ და ესპრესოს ჭიქით ხელში ალბათ აკვირდებოდით დიპლომატის მშვიდი სახით, რა ხდებოდა საქართველოში. გაგიკვირდებათ და მე თქვენ ძალიან დიდ პატივს გცემთ და გამიხარდა, რომ გაგაცინეთ“, - მიმართა კულტურის მინისტრმა დეპუტატებს.
