ახალი ამბები
პრემიერი: კოვიდბარათი არის საინფორმაციო ტიპის ბარათი, რომელიც ყველა მოქალაქეს შეუძლია, ნებისმიერ დროს აიღოს
საქართველოს პრემიერ-მინისტრის ირაკლი ღარიბაშვილის განცხადებით, კოვიდბარათი არის საინფორმაციო ტიპის ბარათი, რომელიც ყველა მოქალაქეს შეუძლია, ნებისმიერ დროს აიღოს. ამის შესახებ მან ჟურნალისტებს წყალტუბოში განუცხადა. მთავრობის მეთაურმა აღნიშნა, რომ ჯერ მხოლოდ ერთხელ არის აცრილი Pfizer-ის ვაქცინით და პროტოკოლით განსაზღვრული ვადა მეორე აცრისთვის, არ გასულა. „თქვენ იცით, ესწრებოდით კიდეც, მე ერთხელ ვარ აცრილი Pfizer-ით და მაქვს კიდევ რამდენიმე კვირა, პროტოკოლით განსაზღვრულია 21-28 დღე ან მაქსიმუმ 42 დღემდე, ჯერ არ არის გასული 28 დღე, მადლობა, რომ ასე ზრუნავთ ჩემს ჯანმრთელობაზე, მაგრამ ის, რომ ჩემი პირადი ნომრით, უნებართვოდ, ჩემი ნებართვის გარეშე შედიან თქვენი თანამშრომლები და მართლაც ასეთ სიყალბეს ჩაიდენენ, არის ძალიან სამარცხვინო საქციელი. გაავრცელეს ინფორმაცია, თითქოს ავიღე გაყალბებული კოვიდ-ბარათი. ამის თაობაზე იუსტიციის სამინისტრომ გაავრცელა ინფორმაცია. ეს არის ჩვეულებრივი საინფორმაციო ბარათი, რომელიც ჩემი დავალებით იუსტიციის სამინისტრომ დაამზადა და ყველა მოქალაქეს შეუძლია, ნებისმიერ დროს აიღოს. ეს ბარათი შეიცავს შემდეგ ინფორმაციას, თუ ადამიანი არის ვაქცინირებული, რამდენი დოზით, რამდენჯერ, ბოლო PCR-ტესტის შედეგები და ასევე, მას ჰქონდა თუ არა გადატანილი კოვიდი. ეს არის ძალიან მარტივი საინფორმაციო ბარათი, რომელსაც დავარქვით კოვიდბარათი. მისასალმებელია, რომ სახელმწიფო ინსპექტორმა ამის თაობაზე გაავრცელა განცხადება და დაინტერესება გამოიჩინეს. მე მივესალმები ამ ფაქტს. არ შეიძლება, ადამიანის ნებართვის გარეშე მისი პირადი მონაცემების გამოყენება“, - განაცხადა პრემიერ-მინისტრმა. ცნობისთვის, გუშინ, 3 სექტემბერს, საქართველოს პრემიერ-მინიტრმა ირაკლი ღარიბაშვილმა კოვიდბარათი აიღო. "მთავარმა არხმა" კი საქართველოს პრემიერი ვაქცინის მეორე დოზაზე იმის საილუსტრაციოდ დაარეგისტრირა, რომ ეჩვენებინა, მას არ ჰქონდა კორონავირუსის მეორე აცრა გაკეთებული და შესაბამისად, კოვიდპასორტის აღების უფლება. ამავე თემაზე: ინსპექტორის სამსახურმა პრემიერ-მინისტრის ვაქცინაციის მეორე დოზაზე რეგისტრაციის ფაქტზე მოკვლევა დაიწყო ირაკლი ღარიბაშვილმა ქუთაისის იუსტიციის სახლში კოვიდბარათი აიღო
ამირან გამყრელიძე: თუ საზოგადოებრივი ტრანსპორტი აღდგება, შეზღუდვის დაწესების სხვა ალტერნატივა უნდა განვიხილოთ
დაავადებათა კონტროლის ეროვნული ცენტრის გენერალური დირექტორის, ამირან გამყრელიძის განცხადებით, თუ საზოგადოებრივი ტრანსპორტი აღდგა, საჭირო გახდება სხვა ალტერნატიული შეზღუდვის დაწესება. მისივე თქმით, საზოგადოებრივი ტრანსპორტი მაინც ერთ-ერთი მნიშვნელოვანი ბუსტერია. "საზოგადოებრივი ტრანსპორტი მაინც ერთ-ერთი მნიშვნელოვანი ბუსტერია, განსაკუთრებით მეტრო, ინფექციის გავრცელების. ამიტომ, ვფიქრობთ, რომ საზოგადოებრივი ტრანსპორტი თუ აღდგა, მაშინ სხვა ალტერნატივა უნდა განვიხილოთ შეზღუდვის დაწესების. ყველაფერი დამოკიდებულია იმაზე, თუ იმ კვირის განმავლობაში რა ტემპით იქნება შემცირება ყოველდღიური ახალი შემთხვევების,"- აცხადებს ამირან გამყრელიძე. ამავე თემაზე: საზოგადოებრივ ტრანსპორტზე შეზღუდვა გახანგრძლივდა
ციციშვილის კლინიკაში კორონავირუსით ინფიცირებული 25 დღის ჩვილი გარდაიცვალა
ციციშვილის კლინიკაში კორონავირუსით ინფიცირებული ახალშობილი გარდაიცვალა. ამის შესახებ ინფორმაცია Europetime-ს ციციშვილის ბავშვთა ახალი კლინიკის სამედიცინო დირექტორმა მაია ჩხაიძემ დაუდასტურა. როგორც ცნობილია, ჩვილი 25 დღის იყო. მას თანმხლები დაავადებები ჰქონდა ის მართვით სუნთქვაზე იმყოფებოდა. "ჩვილი 25 დღის იყო. ახალშობილი 1 კვირის წინ, 17 დღის იყო, როცა შემოვიდა უმძიმეს მდგომარეობაში ბათუმიდან, უკვე მძიმე მდგომარეობაში, მართვით სუნთქვაზე იყო. ერთი კვირის განმავლობაში აგრძელებდა მკურნალობას რეანიმაციულ განყოფილებაში. ჰქონდა თანმხლები დაავადებები სეფსისი, გულის თანდაყოლილი მანკი, ფილტვის ქსოვილის დაზიანება, რესპირატორული დისტრესი. იყო უმძიმეს მდგომარეობაში" ,- განაცხადა მაია ჩხაიძემ. როგორც ჩხაიძემ აღნიშნა, გარდა ამისა, მართვით სუნთქვაზე იმყოფებოდა კიდევ ორი პაციენტი. ერთ-ერთი მათგანის აპარატიდან მოხსნა კი გუშინ მოხერხდა. "ამჟამად ერთი ჩვილი, რომელიც ერთი თვის არის, ისევ მძიმე მდგომარეობაშია და მართვით სუნთქვაზე იმყოფება", - აღნიშნა ჩხაიძემ. ამავე თემაზე: საქართველოში კორონავირუსი კიდევ 2 684 ადამიანს დაუდასტურდა, გარდაიცვალა 83
ჯო ბაიდენმა გამოსცა ბრძანებულება, რომელიც 11 სექტემბრის ტერაქტთან დაკავშირებული ნაწილი მასალების გასაჯაროებას ითვალისწინებს
ჯო ბაიდენმა გამოსცა ბრძანებულება, რომელიც 11 სექტემბრის ტერაქტთან დაკავშირებული ნაწილი მასალების გასაჯაროებას ითვალისწინებს. ბაიდენის განცხადებით, 11 სექტემბრის 20 წლისთავის წინ, ამერიკელი ხალხი იმსახურებს უფრო სრულყოფილი სურათის დანახვას იმაზე, რაც ხელისუფლებამ იცის ამ თავდასხმების შესახებ. "როდესაც მე ვმონაწილეობდი საპრეზიდენტო არჩევნებში, მე ვიღებდი ვალდებულებას, 2001 წლის 11 სექტემბერს ამერიკაში განხორციელებული ტერაქტების შესახებ დოკუმენტების გამჭვირვალობა უზრუნველყოფილიყო. იმ ტრაგიკული დღის მე-20 წლისთავს რომ ვუახლოვდებით, მე პატივს ვცემ ამ ვალდებულებას", - განაცხადა ჯო ბაიდენმა. ბაიდენის თქმით, მნიშვნელოვანია, რომ შეერთებული შტატების მთავრობამ შეინარჩუნოს მაქსიმალური გამჭვირვალობა და საიდუმლო მასალები დარჩეს მხოლოდ კონკრეტულ და აუცილებელ შემთხვევებში. ბაიდენმა იუსტიციის დეპარტამენტს და სხვა უწყებებს დაავალა, დაეწყოთ ექვსთვიანი პროცესი 11 სექტემბრის ტერაქტებზე FBI-ს გამოძიებასთან დაკავშირებული დოკუმენტების გასაჯაროების მიზნით.
ფინეთის საგარეო საქმეთა მინისტრი: ავღანეთიდან ევაკუაციის პროცესში საქართველოსა და ფინეთს შორის თანამშრომლობა ნამდვილად სამაგალითო იყო
ფინეთის საგარეო საქმეთა მინისტრი პეკკა ჰაავისტო ქართველ კოლეგას, დავით ზალკალიანს, საქართველოს მიერ ავღანეთის დედაქალაქ ქაბულში განხორციელებული საევაკუაციო ოპერაციებში შეტანილი წვლილისთვის მადლობას უხდის და შესაბამის წერილს უგზავნის. ინფორმაციას საგარეო საქმეთა სამინისტრო ავრცელებს. "ქაბულში განხორციელებული საერთაშორისო საევაკუაციო ოპერაცია, მოითხოვდა კარგ და სწრაფ თანამშრომლობას საერთაშორისო დონეზე. თბილისი მოულოდნელად გახდა ფინეთის მოქალაქეებისა და ფინეთის დაცვის ქვეშ მყოფი ავღანელების ევაკუაციის მნიშვნელოვანი კერა. მოქნილობა, რომელიც საქართველოს ხელისუფლებამ გამოიჩინა თბილისის აეროპორტის გამოყენების კუთხით, ძალიან ღირებული იყო. ევაკუაციის პროცესში საქართველოსა და ფინეთის ხელისუფლებებს შორის შესანიშნავი თანამშრომლობა ნამდვილად სამაგალითო იყო და ის წარმოადგენს ჩვენი მეგობრული ურთიერთობების გამოვლინებას. მინდა გამოვხატო ჩვენი გულწრფელი მადლიერება და ველი თქვენთან კიდევ ერთხელ პირადად შეხვედრის შესაძლებლობას," - ნათქვამია ფინელი დიპლომატის წერილში. აღსანიშნავია, რომ წერილი დავით ზალკალიანს 2021 წლის 4 სექტემბერს გამართულ მიღებაზე, ფინეთის რესპუბლიკის ელჩმა, კირსტი ნარინენმა გადასცა. ცნობისთვის, ავღანეთიდან საევაკუაციო პროცესში საქართველო ჩართულია: თბილისის აეროპორტში NATO-ს სამხედრო-სატვირთო თვითმფრინავები განლაგდა. ევაკუაციის პროცესის დაწყების პირველივე დღეებიდანვე, თბილისი იყო ერთ-ერთი მნიშვნელოვანი ჰაბი, რომელიც პარტნიორების მხრიდან იყო გამოყენებული. საქართველოს მთავრობის განცხადებით, უკვე განხორციელდა დაახლოებით 6000-მდე ადამიანის ევაკუაცია. ამის შესახებ რიგი ქვეყნების ოფიციალური უწყებებიც საუბრობდნენ და საქართველოს როლს უსვამდნენ ხაზს. მაგალითად, 25 აგვისტოს, ნორვეგიის საგარეო საქმეთა სამინისტრომ გაავრცელა ინფორმაცია, რომ მხარესთან თანამშრომლობით, ქაბულიდან თბილისის გავლით, ოსლოს აეროპორტში დაეშვა თვითმფრინავი, რომელმაც ავღანეთიდან ადამიანები ჩაიყვანა. ამავე თემაზე: ავღანეთიდან საევაკუაციო პროცესში საქართველო ჩართულია: თბილისის აეროპორტში NATO-ს სამხედრო-სატვირთო თვითმფრინავები განლაგდა. ვიქტორია ნულანდმა ავღანეთიდან ევაკუაციის პროცესში რიგი ქვეყნების, მათ შორის საქართველოს როლზე ისაუბრა აშშ ავღანეთიდან ევაკუაციის პროცესში ლოგისტიკური მხარდაჭერისთვის საქართველოს მადლობას უხდის
ინსპექტორის სამსახურმა პრემიერ-მინისტრის ვაქცინაციის მეორე დოზაზე რეგისტრაციის ფაქტზე მოკვლევა დაიწყო
სახელმწიფო ინსპექტორის სამსახურმა პრემიერ-მინისტრ ირაკლი ღარიბაშვილის ვაქცინაციის მეორე დოზაზე რეგისტრაციის კანონიერების შემოწმების ფაქტზე მოკვლევა დაიწყო. ამის შესახებ ინფორმაციას ინსპექტორის სამსახური ავრცელებს. უწყება მოუწოდებს ყველა პირს, თავი შეიკავოს, მონაცემთა სუბიექტის თანხმობის გარეშე, კორონავირუსის საწინააღმდეგო აცრაზე პირთა თვითნებური დარეგისტრირებისგან. "2021 წლის 3 სექტემბერს, ერთ-ერთი ტელეკომპანიის ეთერში გასული სიუჟეტით და ამავე ფაქტზე მოქალაქეთა მომართვით ცნობილი გახდა, რომ საქართველოს პრემიერ-მინისტრის პერსონალური მონაცემების გამოყენებით, ამ უკანასკნელის თანხმობის გარეშე, ჟურნალისტმა პრემიერ-მინისტრი დაარეგისტრირა COVID-19-ის საწინააღმდეგო ვაქცინაციის პროცესის მართვის ელექტრონულ სისტემაში - https://booking.moh.gov.ge/, კორონავირუსის საწინააღმდეგო აცრის მეორე დოზის გაკეთების მიზნით. სახელმწიფო ინსპექტორის სამსახურმა დაიწყო ვაქცინაციის პროცესის მართვის ელექტრონულ სისტემაში მონაცემთა სუბიექტის რეგისტრაციის პროცესის კანონიერების შემოწმება. სახელმწიფო ინსპექტორის სამსახური მოუწოდებს ყველა პირს, თავი შეიკავოს, მონაცემთა სუბიექტის თანხმობის გარეშე, ზემოაღნიშნულ სისტემაში კორონავირუსის საწინააღმდეგო აცრაზე პირთა თვითნებური დარეგისტრირებისგან, რათა თავიდან იქნეს აცილებული სხვა პირთა უფლებების დარღვევა და ხელი არ შეეშალოს ვაქცინაციის პროცესის ადმინისტრირებას", - ნათქვამია უწყების განცხადებაში. ცნობისთვის, გუშინ, 3 სექტემბერს, საქართველოს პრემიერ-მინიტრმა ირაკლი ღარიბაშვილმა კოვიდბარათი აიღო. "მთავარმა არხმა" კი საქართველოს პრემიერი ვაქცინის მეორე დოზაზე იმის საილუსტრაციოდ დაარეგისტრირა, რომ ეჩვენებინა, მას არ ჰქონდა კორონავირუსის მეორე აცრა გაკეთებული და შესაბამისად, კოვიდპასორტის აღების უფლება. ირაკლი ღარიბაშვილმა ქუთაისის იუსტიციის სახლში კოვიდბარათი აიღო
დავით ზალკალიანმა არარეზიდენტ ელჩებს უმასპინძლა
საქართველოს ვიცე-პრემიერმა, საგარეო საქმეთა მინისტრმა დავით ზალკალიანმა, არარეზიდენტ ელჩებს ცერემონიების სასახლეში უმასპინძლა. ამის შესახებ ინფორმაციას საგარეო საქმეთა სამინისტრო ავრცელებს. უწყების ცნობით, სიტყვით გამოსვლისას, დავით ზალკალიანმა უცხოელ დიპლომატებს ახალ თანამდებობებზე დანიშვნა მიულოცა და მომავალ საქმიანობაში წარმატება უსურვა, მან ასევე ყურადღება გაამახვილა კოორდინირებული მუშაობის მნიშვნელობაზე. „ერთად ყოფნისა და ძალისხმევის კოორდინაციის აუცილებლობა ყველაზე კარგად კორონავირუსის პანდემიამ გვიჩვენა, როდესაც, საზღვრების დაკეტვისა და სხვა შემზღუდავი ღონისძიებების ფონზე დღის წესრიგში დადგა მოქალაქეთა სამშობლოში დაბრუნების, ტვირთების მიწოდების ახალი რეგულაციების შემუშავებისა და აუცილებელი სამედიცინო აღჭურვილობითა და შემდეგ ვაქცინებით უზრუნველყოფის საკითხები,“ - აღნიშნა დავით ზალკალიანმა. მისივე თქმით, საქართველო არის საერთაშორისო თანამეგობრობის პასუხისმგებელი წევრი, რომელიც პატივს სცემს და განუხრელად იცავს საერთაშორისო სამართლის ნორმებსა და პრინციპებს და ამისაკენ მოუწოდებს სხვებსაც. საგარეო უწყების ხელმძღვანელმა ელჩებს საქართველოს სამომავლო გეგმები გააცნო, ქვეყნის საგარეო პოლიტიკის მთავარ მიმართულებებზე ისაუბრა და ხაზი გაუსვა საქართველოს წინაშე არსებულ მთავარ გამოწვევას - საქართველოს ტერიტორიების ოკუპაციას. „საქართველოს ხელისუფლება ძალისხმევას არ იშურებს, რომ საერთაშორისო საზოგადოების მხარდაჭერითა და ქმედითი ჩართულობით ჩვენ შევძლოთ საქართველოს ტერიტორიების დეოკუპაცია, კონფლიქტის მშვიდობიანი მოგვარება, საოკუპაციო ხაზებით გაყოფილი საზოგადოებების შერიგება და ქვეყნის გამთლიანება. ახლახან დავიწყეთ უმნიშვნელოვანესი პროცესი - შევქმენით სამთავრობო კომისია დეოკუპაციისა და კონფლიქტის მშვიდობიანი მოგვარებისთვის სახელმწიფო სტრატეგიის შემუშავებისა და განხორციელების მიზნით. რამდენიმე კვირის წინ საზოგადოებას წარვუდგინე საქართველოს საგარეო პოლიტიკის 10 წლის გეგმა, სადაც ხაზი გავუსვი, რომ საქართველოს ტერიტორიული მთლიანობის აღდგენასთან ერთად, ჩვენთვის განმსაზღვრელია ქართველი ხალხის ისტორიული არჩევანი, რომელიც დაფიქსირებულია საქართველოს კონსტიტუციაში - ევროკავშირსა და ჩრდილო ატლანტიკურ ალიანსში გაწევრიანება,“ - განცხადა ზალკალიანმა. მისივე თქმით, საქართველო აქტიურად არის ჩართული გლობალური და რეგიონული უსაფრთხოების განმტკიცებაში. „ჩვენ, როგორც ევრო-ატლანტიკური ოჯახის მომავალი წვერი ქვეყანა ვცდილობთ ჩვენი წვლილი შევიტანოთ ევროპული უსაფრთხოების არქიტექტურის შენარჩუნებაში. საქართველო აქტიურად თანამშრომლობს მის დასავლელ პარტნიორებთან უსაფრთხოების ისეთ გამოწვევებთან გასამკლავებლად როგორიც არის ტერორიზმი, ჰიბრიდული საფრთხეები, კიბერ-დანაშაული, ენერგოდამოკიდებულების შემცირება, გლობალური კლიმატური ცვლილებები, შეიარაღებაზე კონტროლის და გაუვრცელებლობის საკითხები და სხვა,“ - განმარტა მინისტრმა. ამასთან, დავით ზალკალიანმა ყურადღება გაამახვილა საქართველოს მნიშნველოვან როლზე გლობალური უსაფრთხოების კუთხით. „გლობალური უსაფრთხოების კონტექსტში საქართველოს უნიკალური როლის და ფუნქციის დადასტურება იყო ავღანეთში უკანასკნელ პერიოდში განვითარებული კრიზისული მოვლენებისას, საქართველოს ქმედითი მონაწილეობა ჰუმანიტარულ და საევაკუაციო პროცესებში. თბილისის საერთაშორისო აეროპორტში მოწყობილი რეგიონალური სატრანზიტო ჰაბის მეშვეობით განხორციელდა 2500-მდე სამოქალაქო პირის ევაკუაცია და რამდენიმე ათეული სატრანზიტო ფრენა,“ - აღნიშნა ზალკალიანმა. აღსანიშნავია, რომ სულ საქართველოში 24 არარეზიდენტი ელჩი ჩამოვიდა. 1-3 სექტემბერს, მათ შეხვედრები გამართეს საქართველოს საგარეო საქმეთა მინისტრის მოადგილეებთან, შემდგომ კი, საქართველოს პრეზიდენტს, სალომე ზურაბიშვილს რწმუნებათა სიგელები გადასცეს. ამავე თემაზე: საქართველოს პრეზიდენტს 24 ქვეყნის არარეზიდენტმა ელჩმა რწმუნებათა სიგელები გადასცა
ყვარელში, ჩაგურგურას ხეობაში ხანძარია
ყვარელში, ე.წ ჩაგურგურას ხეობაში ხანძარია. ამის შესახებ ინფორმაციას Europetime-ს საგანგებო სიტუაციების მართვის სამსახურში დაუდასტურეს. როგორც უწყებაში აცხადებენ, ადგილზე იმყოფებიან მეხანძრე-მაშველები და ხანძრის ქრობის სამუშაოები ინტენსიურ რეჟიმში მიმდინარეობს. ხანძრის სალიკვიდაციო სამუშაოებში, ცოცხალ ძალასთან ერთად ჩართულია სასაზღვრო პოლიციის ვერტმფრენიც. ამ ეტაპზე უცნობია ხანძრის გაჩენის მიზეზი ის, თუ რა ტერიტორიაა დამწვარი. ხანძარი ორი დღის წინ გაჩნდა. სამუშაოებს ქარი და რთული რელიეფი უშლის ხელს.
ენტონი ბლინკენი ოფიციალური ვიზიტით გერმანიას ეწვევა
Deutsche Welle-ს ცნობით, აშშ-ის სახელმწიფო მდივანი ენტონი ბლინკენი ოთხშაბათს, 8 სექტემბერს გერმანიას ეწვევა. გავრცელებული ინფორმაციით, ბლინკენი ავღანეთში არსებულ სიტუაციას გერმანიის საგარეო საქმეთა მინისტრ ჰეიკო მაასთან და სხვა ქვეყნების წარმომადგენლებთან ერთად განიხილავს. გერმანიაში აშშ-ის საჰაერო ძალების ბაზაზე ვიზიტის დროს, აშშ-ის სახელმწიფო დეპარტამენტის უფროსი შეხვდება ევაკუირებულ ავღანელებს და ასევე მიიღებს მონაწილეობას კონფერენციაში, რომელში 20-ზე მეტი ქვეყნის მინისტრები მონაწილეობენ. გერმანიაში ჩასვლამდე, სახელმწიფო მდივანი 5 სექტემბერს ყატარში ჩავა, სადაც გაერთიანებული საამიროების ხელმძღვანელობას შეხვდება.
NATO რუსეთს სამხედრო წვრთნების ჩატარებისას მეტი გამჭირვალობისკენ მოუწოდებს
NATO-ს გენერალურმა მდივანმა იენს სტოლტენბერგმა რუსეთს მოუწოდა, ღიად ისაუბროს "Zapad-2021"-ის სამხედრო წვრთნებისა და ჯარისკაცების რაოდენობის შესახებ, რადგან პოლონეთში, ბალტიისპირეთსა და უკრაინაში მოსკოვის განზრახვებთან დაკავშირებით განგაში იზრდება. სტოლტენბერგის თქმით, "დასავლეთის" სახელწოდებით ცნობილი წინა სამხედრო წვრთნების ჩატარებისას, რომელიც NATO-ს წევრი სახელმწიფოების საზღვრებთან მიმდინარეობდა, დამკვირვებლები აღნიშნავდნენ, რომ მიუხედავად საერთაშორისო მოწოდებებისა, რუსეთი განგებ ზრდიდა წვრთნებში მონაწილე ტექნიკისა და სამხედროების რაოდენობას. "რაც ჩვენ ადრე ვნახეთ არის ის, რომ წვრთნებში მონაწილე ჯარების რაოდენობა მნიშვნელოვნად აღემატება გამოცხადებულ რიცხვებს", - თქვა სტოლტენბერგმა და მოუწოდა მოსკოვს, შეასრულოს თავისი ვალდებულებები, რაც განსაზღვრულია ვენის დოკუმენტით (საერთაშორისო ხელშეკრულება ევროპაში სამხედრო წვრთნების შესახებ) "რუსეთი უნდა მოიქცეს პროგნოზირებადი და გამჭვირვალე გზით",- განაცხადა სტოლტენბერგმა. გავრცელებული ინფორმაციით, სწავლების ძირითადი ეტაპი 10 სექტემბერს დაიწყება. მასში რუსეთისა და ბალარუსის სამხედროები მიიღებენ მონაწილეობას. NATO-ს ინფორმაციით, რუსეთი 60-დან 70 ათასამდე სამხედრო მოსამსახურის ჩართვას გეგმავს წვრთნებში. რუსეთის მიერ გამოქვეყნებულ ოფიციალურ ინფორმაციაში კი აღნიშნულია, რომ წვრთნებში 12 700 სამხედრო იღებს მონაწილეობას.
საქართველოში სრულად ვაქცინირებულია 454 486 ადამიანი
ბოლო 24 საათის განმავლობაში საქართველოში კორონავირუსის საწინააღმდეგო აცრა 25 670-მა ადამიანმა გაიკეთა. ამის შესახებ ინფორმაციას დაავადებათა კონტროლის ეროვნული ცენტრი ავრცელებს. მათივე ცნობით, ქვეყანაში ჯამში 1 285 061 აცრა გაკეთდა. 1 დოზით ვაქცინირებულია 831 256 ადამიანი - მოზრდილი მოსახლეობის 29.1% სრულად ვაქცინირებულია 454 486 ადამიანი - მოზრდილი მოსახლეობის 15.9%
საქართველოში კორონავირუსი კიდევ 2 684 ადამიანს დაუდასტურდა, გარდაიცვალა 83
ბოლო 24 საათის განმავლობაში საქართველოში კორონავირუსი კიდევ 2684 ადამიანს დაუდასტურდა, გამოჯანმრთელდა 2 695 პაციენტი, 83 კოვიდინფიცირებული კი გარდაიცვალა. ინფორმაციას დაავადებათა კონტროლის ეროვნული ცენტრი ავრცელებს. ამ დროისთვის საქართველოში კორონავირუსის 562 627 შემთხვევაა დადასტურებული. მათ შორის გამოჯანმრთელდა 509 181, გარდაიცვალა 7732 პაციენტი. Stopcov.ge-ზე გამოქვეყნებული ინფორმაციის თანახმად, ინტენსიური ტესტირების ფარგლებში, ბოლო 24 საათში ქვეყნის მასშტაბით ჩატარდა 38 625 კვლევა ტესტით, მათ შორის 22 317 კვლევა ანტიგენის ტესტით და 16 308 PCR ტესტით. დადებითობის მაჩვენებელ: 3 სექტემბრის მდგომარეობით, დადებითობის დღიური მაჩვენებელი არის 6.95%, ბოლო 14 დღის მანძილზე - 9.46% ხოლო 7 დღის მანძილზე - 8.60%. დღეს ქვეყანაში გამოვლენილი ინფიცირების 2 684 ახალი შემთხვევიდან თბილისში გამოვლინდა 1 080, აჭარა - 212, იმერეთი - 262, ქვემო ქართლი - 224, შიდა ქართლი - 198, გურია - 78, სამეგრელო - ზემო სვანეთი - 238, კახეთი - 232, მცხეთა-მთიანეთი - 90, სამცხე-ჯავახეთი - 43, რაჭა-ლეჩხუმი და ქვემო სვანეთი - 27. ინფიცირების მიმდინარე აქტიური შემთხვევა: 45 688, საიდანაც: 7 061 ადამიანი მკურნალობს საავადმყოფოში, მათ შორის, თბილისის საავადმყოფოებში - 3 068, აჭარაში - 856, იმერეთში - 1 088. მძიმე პაციენტი: 1 575, მათ შორის, თბილისში - 699, აჭარაში - 182, იმერეთში - 337. ხელოვნური სუნთქვის აპარატზე: 400 , მათგან თბილისში - 239, აჭარაში - 42, იმერეთში - 37. 2 453 ადამიანი მოთავსებულია კლინიკურ-სასტუმროებში, მათ შორის 1 177 - თბილისში, 791 - აჭარაში. 36 174 ინფიცირებული მკურნალობს საცხოვრებელ ბინაზე. საკარანტინე სივრცეებში მოთავსებულია 102 ადამიანი, მათ შორის, თბილისში - 99, ხოლო აჭარაში - 3. სულ 6 ოქტომბრიდან - 3 სექტემბრის პერიოდში, სახელმწიფო საზღვრიდან საკარანტინე სივრცეებში გადაყვანილია - 25 126 პირი. ამ ეტაპისთვის თვითიზოლაციაში იმყოფება 39 046 ადამიანი, მათ შორის თბილისში - 18 437 პირი, აჭარაში - 5 144, იმერეთში - 3 847.
ბაიდენის ადმინისტრაციამ 65,3 მილიარდი დოლარის გეგმა წარადგინა, რომელიც პანდემიებისთვის მზადყოფნას ითვალისწინებს
ბაიდენის ადმინისტრაციამ 65,3 მილიარდი დოლარის ოდენობის გეგმა წარადგინა, რომელიც მიზნად მომავალი პანდემიებისთვის აშშ-ის მზადყოფნის სტრატეგიის გაუმჯობესებას ისახავს, რადგან ქვეყანა მზად არის ნებისმიერი მომავალი ბიოლოგიური საფრთხისათვის. ამის შესახებ ინფორმაციას TheHill-ი ავრცელებს. როგორც გამოცემა წერს, თეთრი სახლი 7-10 წლის განმავლობაში 65.3 მილიარდი დოლარის დახარჯვას გეგმავს, რათა ქვეყანამ "სწრაფად და ეფექტურად" მოახდინოს რეაგირება მომავალ ეპიდემიებსა და პანდემიებზე. ერიკ ლენდერმა, თეთრი სახლის მეცნიერებისა და ტექნოლოგიის პოლიტიკის ოფისის (OSTP), განუცხადა ჟურნალისტებს, რომ "სასიცოცხლოდ მნიშვნელოვანია" 15 -დან 20 მილიარდი დოლარით დაიწყოს ეს პროგრამა, რათა ამ „ძალისხმევას ბიძგი მიეცეს“. მისი თქმით, იმის გონივრული ალბათობა არსებობს, რომ კიდევ ერთი სერიოზული პანდემია შეიძლება მოხდეს, შესაძლოა, მომდევნო ათწლეულის განმავლობაში. "ხუთი წლის შემდეგ ჩვენ უნდა ვიყოთ უფრო ძლიერები ინფექციური დაავადებების შესაჩერებლად, სანამ ისინი გახდებიან გლობალური პანდემიები, როგორიცაა COVID-19,"-თქვა მან და დასძინა: "არსებობს გონივრული ალბათობა იმისა, რომ კიდევ ერთი სერიოზული პანდემია, რომელიც შეიძლება იყოს COVID-19- ზე უარესი, მალე მოხდეს, შესაძლოა მომდევნო ათწლეულის განმავლობაში. მომავალი პანდემია, სავარაუდოდ, არსებითად განსხვავდება COVID-19-ისგან. ასე რომ, ჩვენ მზად უნდა ვიყოთ ვირუსული საფრთხეების გამკლავებისთვის".
BBC: ინგლისში, შინაური ცხოველების გატაცება სისხლის სამართლის დანაშაული ხდება
BBC-ის ცნობით, მას შემდეგ, რაც პანდემიისას, "ლოკდაუნის" დროს, მკვეთრად გაიზარდა შინაური ცხოველების ქურდობა, ინგლისში, შინაური ცხოველების გატაცება სისხლის სამართლის დანაშაულად ჩაითვლება. როგორც გამოცემა წერს, შინაური ცხოველის ქურდობა ახლა მფლობელის ქონების დაკარგვად ითვლება. თუმცა, პარლამენტარებს სურთ კანონით განსაზღვრონ ემოციური დისტრესი, რომელიც შეიძლება გამოიწვიოს შინაური ცხოველის დაკარგვამ. გავრცელებული ინფორმაციით, გასულ წელს დაახლოებით 2 000 ძაღლი მოიპარეს. ანგარიშის თანახმად, პოლიციის მიერ დაფიქსირებული ცხოველების ქურდობის ათი შემთხვევიდან შვიდ შემთხვევაში ძაღლები გაუჩინარდნენ. ახალ კანონმდებლობაში სასჯელის სიმძიმე ჯერ არ არის ცნობილი. საქველმოქმედო ორგანიზაცია Dogs Trust- ის მონაცემებით, დიდი ბრიტანეთის პირველი მასშტაბური ჩაკეტვის დროს, ძაღლების ხუთი ყველაზე ძვირფასი ჯიშის ღირებულება "მნიშვნელოვნად" გაიზარდა, ზოგიერთ შემთხვევაში 89%-ით.
გიორგი გახარია: კალაძეს უთქვამს, ვერ გავიგე რისთვის მოვიდაო, ალბათ, მართლა შევცდი და ტყუილად მივედი
"კალაძეს უთქვამს, "ვერ გავიგე რა უნდოდაო, რისთვის მოვიდაო", სამწუხაროდ, ეს ნათქვამი მაძლევს მე იმის თქმის შესაძლებლობას, რომ, ალბათ, მართლა შევცდი და ტყუილად მივედი", - ამის შესახებ პარტია "საქართველოსთვის" ლიდერმა და თბილისის მერობის კანდიდატმა გიორგი გახარიამ "TV პირველის" ეთერში განაცხადა. როგორც გახარიამ აღნიშნა, კალაძესთან შეხვედრით მას უნდოდა პატივი ეცა იმ წლებისთვის, რომელიც მათ ერთმანეთთან აკავშირებდათ და ეს მისთვის "ღირებულებების და ფასეულობების თემაა". "მე დღისით, მზისით, დაახლოებით 11 საათზე მივედი ღიად, მერიაში, 21-ე სართულზე კალაძესთან მხოლოდ და მხოლოდ ერთადერთი მიზნით, გამეფრთხილებინა, რომ დღეს მე გავხდებოდი მისი კონკურენტი და დავაყენებდი ჩემს კანდიდატურას მერობისთვის. ეს იყო და ეს, ამის იქით საერთოდ არაფერი არ ყოფილა...ჩემთვის ეს იყო უბრალოდ პატივისცემა იმ წლების თანამშრომლობის, რომელიც ჩვენ გვაკავშირებდა. ეს ჩემი პრინციპია, ეს ჩემი ფასეულობები იყო და მე ვთვლი, რომ სწორად მოვიქეცი" ,- განაცხადა გიორგი გახარიამ. ჟურნალისტის კითხვას, ჩააყენა თუ არა საქმის კურსში კახა კალაძე მაშინ, როდესაც პრემიერმინისტრის თანამდებობიდან გადადგომას აპირებდა, გახარიამ უპასუხა: "პრემიერობიდან რომ წავედი, კალაძე საქმის კურსში არ ჩამიყენებია და არც უნდა ჩამეყენებინა, თუმცა პრემიერობიდან რომ წავედი, სწორედ იგივე პრინციპით, იგივე ფასეულობით გავაკეთე ის ზარი, რომელიც გავაკეთე ბიძინა ივანიშვილთან. სწორედ იმიტომ, რომ არ მინდოდა მასაც ტელევიზორიდან გაეგო ჩემი გადადგომის შესახებ". "ეს მხოლოდ ფასეულობების თემაა. ზოგიერთს ეს არ ესმის. მე არ მინახავს, უბრალოდ, შეიძლება, ვცდები, მაგრამ ძაან გული დამწყდა, თუ ეს სიმართლეა, თურმე კალაძეს უთქვამს, ვერ გავიგე რისთვსი მოვიდა, რა უნდოდაო. ეს ნათქვამი მაძლევს იმის თქმის შესაძლებლობას, რომ ალბათ მართლა შევცდი და ტყუილად მივედი", - განაცხადა გიორგი გახარიამ. ამავე თემაზე: კახა კალაძე: შევხვდი გახარიას, მან მითხრა, რომ აპირებდა კანდიდატობას, ეს რომ ტელევიზიით არ გამეგო კახაბერ ქემოკლიძე თბილისის მერისა და ყოფილი პრემიერის შეხვედრაზე: კარგია, რომ ეს სტანდარტი დაწესდა
ენტონი ბლინკენი: "თალიბანმა" უნდა შეასრულოს საერთაშორისო საზოგადოების წინაშე აღებული ვალდებულებები
აშშ-ის სახელმწიფო მდივანმა, ხაზი გაუსვა ბაიდენის ადმინისტრაციის მოლოდინს, რომ ავღანეთში "თალიბანის" მეთაურობით ჩამოყალიბებული ნებისმიერი მთავრობა საერთაშორისო საზოგადოების წინაშე აღებული ვალდებულებების შესაბამისად იმოქმედებს. როგორც ბლინკენ აღნიშნა, ასეთი ვალდებულებები მოიცავს მოგზაურობის თავისუფლების უზრუნველყოფას, ტერორიზმთან ბრძოლას, ქალთა და უმცირესობათა უფლებების პატივისცემასა და ანგარიშსწორების არდაშვებას. "ჩვენ ვუყურებთ რა ქმედებებს, რა პოლიტიკას ახორციელებს ავღანეთის ახალი მთავრობა, ეს არის ყველაზე მნიშვნელოვანი", - განაცხადა ბლინკენმა. მისი თქმით, ბაიდენის ადმინისტრაციას აქვს მოლოდინი, რომ ნებისმიერ მთავრობას, რომელიც ახლა ჩამოყალიბდება, "რეალური ინკლუზიურობა" ექნება. საბოლოო ჯამში, მოლოდინი არის ისეთი მთავრობის ხილვა, რომელიც შეასრულებს ნაკისრ ვალდებულებებს.
საქართველოს პრეზიდენტს 24 ქვეყნის არარეზიდენტმა ელჩმა რწმუნებათა სიგელები გადასცა
საქართველოს პრეზიდენტ სალომე ზურაბიშვილს 24 ქვეყნის არარეზიდენტმა ელჩმა რწმუნებათა სიგელები გადასცა. ამის შესახებ ინფორმაციას პრეზიდენტის ადმინისტრაცია ავრცელებს. საქართველოს პრეზიდენტს რწმუნებათა სიგელები გადასცეს: პარაგვაის რესპუბლიკის საგანგებო და სრულუფლებიანმა ელჩმა საქართველოში სეფერინო ვალდეს პერალტამ, სომალის ფედერალური რესპუბლიკის საგანგებო და სრულუფლებიანმა ელჩმა საქართველოში ჯამა აბდულაჰი მოჰამედიმ, დანიის სამეფოს საგანგებო და სრულუფლებიანმა ელჩმა საქართველოში ოლე ეგბერგ მიკელსენიმ, ზიმბაბვეს რესპუბლიკის საგანგებო და სრულუფლებიანმა ელჩმა საქართველოში მიეტანი ჩაუკემ, გვატემალის რესპუბლიკის საგანგებო და სრულუფლებიანმა ელჩმა საქართველოში ხაირო დავიდ ესტრადა ბარიოსიმ, ალბანეთის რესპუბლიკის საგანგებო და სრულუფლებიანმა ელჩმა საქართველოში კასტრიოტ რობომ, ეკვატორული გვინეის რესპუბლიკის საგანგებო და სრულუფლებიანმა ელჩმა საქართველოში მოისეს მბა ნჩამამ, პაკისტანის ისლამური რესპუბლიკის საგანგებო და სრულუფლებიანმა ელჩმა საქართველოში ბილალ ჰაიმ, მალტის რესპუბლიკის საგანგებო და სრულუფლებიანმა ელჩმა საქართველოში ჯორჯ ა. საიდ-ზამიტიმ, სერბეთის რესპუბლიკის საგანგებო და სრულუფლებიანმა ელჩმა საქართველოში აცა იოვანოვიჩიმ, მონტენეგროს საგანგებო და სრულუფლებიანმა ელჩმა საქართველოში დრაგიცა პონორაციმ, კამბოჯას სამეფოს საგანგებო და სრულუფლებიანმა ელჩმა საქართველოში კიმ ჰენგ მეასიმ, ფინეთის რესპუბლიკის საგანგებო და სრულუფლებიანმა ელჩმასაქართველოში კირსტი ნარინენიმ, ირლანდიის საგანგებო და სრულუფლებიანმა ელჩმა საქართველოში მარტინა ფინიმ, ბანგლადეშის სახალხო რესპუბლიკის საგანგებო და სრულუფლებიანმა ელჩმა საქართველოში მოსუდ მანანიმ, იორდანიის ჰაშემიტური სამეფოს საგანგებო და სრულუფლებიანმა ელჩმა საქართველოში სამი ასემ ღოშემ, მავრიტანიის ისლამური რესპუბლიკის საგანგებო და სრულუფლებიანმა ელჩმა საქართველოში შიეხ სიდ’აჰმედ ელ ბეკაიე ჰამადიმ, ბოსნია და ჰერცეგოვინას საგანგებო და სრულუფლებიანმა ელჩმა საქართველოში ადის ალაგიჩიმ, პორტუგალიის რესპუბლიკის საგანგებო და სრულუფლებიანმა ელჩმა საქართველოში ჟაიმ ვან ზელერ ლეიტაომ, ბურკინა ფასოს საგანგებო და სრულუფლებიანმა ელჩმა საქართველოში ბრაჰიმა სერემ, ანგოლას რესპუბლიკის საგანგებო და სრულუფლებიანმა ელჩმა საქართველოში ჟოზე გონსალვეს მარტინს პატრისიომ, უზბეკეთის რესპუბლიკის საგანგებო და სრულუფლებიანმა ელჩმა საქართველოში ბახრომ აშრაფხანოვიმ, ფილიპინების რესპუბლიკის საგანგებო და სრულუფლებიანმა ელჩმა საქართველოში მარია ელენა პალო ალგაბრემ, ნიგერიის ფედერაციული რესპუბლიკის საგანგებო და სრულუფლებიანმა ელჩმა საქართველოში შინა ფატაი ალეგემ. "რწმუნებათა სიგელების გადაცემის ოფიციალური ცერემონია ორბელიანების სასახლეში გაიმართა", - ნათქვამია ადმინისტრაციის მიერ გავრცელებულ ინფორმაციაში.
სალომე ზურაბიშვილი ავღანეთში ქალთა და გოგონათა უფლებების დაცვის შესახებ ქალ ლიდერთა ერთობლივ მოწოდებას შეუერთდა
საქართველოს პრეზიდენტი, სალომე ზურაბიშვილი შეუერთდა ქალ ლიდერთა ერთობლივ მოწოდებას, ავღანეთში ქალთა და გოგონათა უფლებების დაცვისა და გაძლიერების შესახებ. ამის შესახებ ინფორმაციას პრეზიდენტის ადმინისტრაცია ავრცელებს. მოწოდება, რომელსაც საქართველოს პრეზიდენტი შეუერთდა სლოვაკეთის პრეზიდენტის, ზუზანა ჩაპუტოვასა და ისლანდიის პრემიერ-მინისტრის, კატრინ იაკობსდოტირის ინიციატივაა. ,,ჩვენ, ლიდერ ქალებს, გვინდა დავარწმუნოთ ავღანელი ქალები და გოგონები, რომ ყურადღებით დავაკვირდებით მათ ქვეყანაში განვითარებულ მოვლენებს და გავაგრძელებთ მათი უფლებებისა და შესაძლებლობების მხარდაჭერას“, - ნათქვამია ქალი ლიდერების მოწოდებაში, რომელიც საერთაშორისო თანამეგობრობას მოუწოდებს, დიდი ყურადღება გაამახვილონ იმ ადამიანების მდგომარეობასა და უფლებებზე, ვინც ამჟამად ავღანეთში ყველაზე დაუცველია. პრეზიდენტის ადმინისტრაციის ცნობით, მოწოდებას შეუერთდა დანიის პრემიერ-მინისტრი მეტე ფრედერიქსენი, ესტონეთის პრემიერ-მინისტი კაია კალასი, ფინეთის პრემიერ-მინისტრი სანა მარინი, საბერძნეთის პრეზიდენტი ეკატერინი საკელაროპულუ, ლიეტუვის პარემიერ-მინისტრი ინგრიდა სიმონიტე, მოლდოვას პრეზიდენტი მაია სანდუ, ახალი ზელანდიის პრემიერ-მინისტრი ჯასინდა არდენი და ნორვეგიის პრემიერ-მინისტრი ერნა სოლბერგი.
შესაძლოა, იტალიაში კოვიდვაქცინაცია ყველასთვის სავალდებულო გახდეს
იტალიაში კორონავირუსის საწინააღმდეგო ვაქცინით აცრა შესაძლოა, ყველასთვის სავალდებულო გახდეს, ვისაც აცრის ჩატარება ასაკობრივად უწევს. ამის შესახებ ინფორმაციას Reuters ავრცელებს. Reuters-ის ცნობით, იტალიის პრემიერ-მინისტრის განცხადებით, თვის ბოლოდან იგეგმება ვაქცინის მესამე, ბუსტერ დოზების გაკეთება რისკჯგუფებში შემავალი მოაქალაქეებისთვის. ამასთანავე, მთავრობამ უკვე დააწესა სავალდებულო ვაქცინაცია სამედიცინო სფეროს წარმომადგელებისთვის, თუ მათ სურთ ანაზღაურება, თუმცა, პრემიერ-მინისტრის თქმით, მას შემდეგ, რაც ევროპის ჯანდაცვის მარეგულირებელი ორგანო ვაქცინებს სრულ ავტორიზაციას მიანიჭებს, ვაქცინაცია შესაძლოა, ყველასთვის სავალდებულო გახდეს. ამჟამად ევროპის წამლის სააგენტოს გადაუდებელი გამოყენებისთვის ავტორიზაცია ოთხი ვაქცინისთვის აქვს მინიჭებული. პრემიერმა ჟურნალისტებს განუცხადა, დარწმუნებულია, რომ თვის ბოლოსთვის, 12 წლის და მეტი ასაკის იტალიელები 80% სრულად ვაქცინირებული იქნება. ამჟამად ეს მონაცემი 70.5%-ს შეადგენს. მისი თქმით, მთავრობა გეგმავს, გააფართოოს ე.წ. მწვანე საშვის მოქმედება, რომელსაც ამჟამად სრულად აცრილი პირები შორ მანძილებზე მოგზაურობისა და გასართობ აქტივობებში ჩასართავად იყნებენ. დოკუმენტი ასევე სავალდებულოა სკოლების პერსონალისთვისაც. ოფიციალურმა პირებმა განაცხადეს, რომ გასულ კვირას ისინი განიხილავდნენ სქემის გაფართოებას ყველასთვის, ვინც მუშაობს საჯარო სამსახურში ან სუპერმარკეტში. ახალმა გადაწყვეტილებებმა იტალიელების ნაწილის პროტესტი გამოწვია, რადგან ისინი მიიჩნევენ, რომ მათი უფლებები ირღვევა.
გაერთიანებული სამეფოს ვაქცინაციისა და იმუნიზაციის კომიტეტი 12-15 წლის ჯანმრთელი ბავშვების ვაქცინაციაზე უარს ამბობს
გაერთიანებული სამეფოს ვაქცინაციისა და იმუნიზაციის კომიტეტი 12-15 წლის ჯანმრთელი ბავშვების ვაქცინაციაზე უარს ამბობს. ამის შესახებ ინფორმაციას BBC ავრცელებს. უწყების განცხადებით, ამ ასაკობრივ ჯგუფში ვაქცინაცია ყველაზე მაღალი რისკის მქონე ბავშვებს უნდა ჩაუტარდეთ, რომლებსაც თანხმლები დაავადებები აქვთ, მათ შორის გულის, ფილტვის, თირკმლისა და ღვიძლის ქრონიკული დაავადებები და ნევროლოგიური დაავადებები. ვინაიდან ბავშვები დაბალი რისკის ქვეშ არიან, ვაქცინაციისა და იმუნიზაციის ერთობლივმა კომიტეტმა გადაწყვიტა, რომ ვაქცინაცია მხოლოდ "უმნიშვნელო სარგებელს" მოიტანს და, შესაბამისად, "არასაკმარისი" მტკიცებულება არსებობს ამ ასაკობრივ ჯგუფში მასობრივი ვაქცინაციის შესთავაზებლად. როგორც BBC წერს, ჯანმრთელი ბავშვების ვაქცინაციაზე მიღებული ეს გადაწყვეტილება დაფუძნებული იყო Pfizer-ის ვაქცინის უკიდურესად იშვიათ გვერდით მოვლენაზე, რაც იწვევს გულის ანთებას. ამავე თემაზე: საქართველო 12 წელს გადაცილებული ბავშვების აცრაზე ჯანმოს რეკომენდაციას ელოდება 12 წელს გადაცილებული ბავშვების აცრაზე საქართველო სხვა ქვეყნის მაგალითებსაც განიხილავს
