ახალი ამბები
„სტრატეგია აღმაშენებელი“ სადეპუტატო მანდატებზე უარს ამბობს
„სტრატეგია აღმაშენებელი“ სადეპუტატო მანდატებზე უარს ამბობს. შესაბამისი გადაწყვეტილება ლიდერმა გიორგი ვაშაძემ პოლიტსაბჭოს დასრულების შემდეგ გამართულ ბრიფინგზე გაახმოვანა და აღნიშნა, რომ ის წევრები, რომლებიც საპარლამენტო არჩევნების შედეგების მიხედვით პარლამენტში მოხვდნენ, სიის ჩახსნასთან დაკავშირებით განცხადებას დაწერენ. „გუნდში დეტალური მსჯელობა გვქონდა. რა თქმა უნდა, არც გვქონდა სხვა მოსაზრება, ერთობლივად მივიღეთ გადაწყვეტილება, რომ ჩვენ დავწერთ ხვალ განცხადებებს და ჩავხსნით ჩვენს სიებს. საპარლამენტო არჩევნებთან დაკავშირებით ვაგრძელებთ ჩვენს ბოიკოტს. მეორე მხრივ, რა თქმა უნდა, ყველანაირად მოწადინებულები ვართ, რომ შეთანხმება შედგეს, ვაპირებ მოლაპარაკებებში მონაწილეობას,“ - განაცხადა გიორგი ვაშაძემ. ვაშაძის თქმით, ერთპარტიული პარლამენტის შეკრება, ქართული დემოკრატიის მარცხია. „სიტუაცია ძალიან მძიმეა და ის, რომ ხვალ ერთპარტიული პარლამენტი იქნება, ეს არის არა ვინმეს გამარჯვება, არამედ, პირიქით, ვფიქრობ, რომ ეს არის უზარმაზარი პრობლემა და უზარმაზარი მარცხი, ქართული დემოკრატიის, რომელიც ქვეყანაში არის და ყველა ერთად უნდა დავფიქრდეთ, რომ ამ უმძიმესი პროცესიდან ვიხსნათ ქვეყანა და სახელმწიფო. ჩვენ, „სტრატეგია აღმაშენებლის“ გუნდს ისევე, როგორც აქამდე, ყოველთვის გვექნება ჩვენი დამოუკიდებელი პოზიციები სხვადასხვა საკითხთან დაკავშირებით და კიდევ უფრო მნიშვნელოვნად მიმაჩნია მეტი კონსოლიდაცია იმ ადამიანების, ვინც ფიქრობს, რომ უნდა ჩაერთოს ქვეყნის აღმშენებლობის პროცესში", - განაცხადა გიორგი ვაშაძემ. შეგახსენებთ, რომ მეათე მოწვევის პარლამენტის პირველი სხდომა 11 დეკემბერს გაიმართება.
ლელომ სია გამოიწვია და საპარლამენტო მანდატებზე უარი თქვა - ჯაფარიძე
ლელომ სია გამოიწვია და საპარლამენტო მანდატებზე უარი თქვა - ამის შესახებ პარტია „ლელოს“ ლიდერმა, ბადრი ჯაფარიძემ განაცხადა. ჯაფარიძის შეფასებით, საპარლამენტო არჩევნების ნამდვილობას მხოლოდ „ქართული ოცნება“ აღიარებს. „ყველა ოპოზიციური პარტია ცალსახად აცხადებს, რომ არჩევნები ჩატარდა დიდი დარღვევებით და ჩვენ თუ ამას არ შევეწინააღმდეგებით, შემდეგ არჩევნებსაც დარღვევებით მივიღებთ, ამიტომ გადაწყვიტა პარტიამ, გამოიწვიოს სია და უარი თქვა მანდატებზე, თუმცა ეს არ ნიშნავს, რომ ჩვენ ვამბობთ უარს დიალოგზე „ქართულ ოცნებასთან“. დიალოგს ჩვენ გავაგრძელებთ, რათა შევთანხმდეთ ვადამდელი არჩევნების ჩატარებაზე, რადგან ჩვენ უნდა განვმუხტოთ პოლიტიკური კრიზისი ქვეყანაში. პოლიტიკური კრიზისი მხოლოდ იმ შემთხვევაში განიმუხტება, თუ შევჯერდებით ვადამდელ არჩევნებზე, ახალი არჩევნების ჩატარების სისტემაზე და ახალ ადმინისტრაციაზე, რომლის კონტროლითაც უნდა ჩატარდეს ეს არჩევნები. ჩვენ ერთხელ და სამუდამოდ უნდა დავასრულოთ გაყალბებული დამახინჯებული არჩევნების პრაქტიკა ამ ქვეყანაში“, - განაცხადა ჯაფარიძემ. ცნობისთვის, მეათე მოწვევის პარლამენტი 11 დეკემბერს შეიკრიბება.
Facebook Messenger-ის მუშაობაში გლობალური შეფერხება დაფიქსირდა
ვებ-გვერდ Downdetector-ის ინფორმაციით, Facebook Messenger-ის მუშაობაში გლობალური შეფერხება დაფიქსირდა. სერვისთან წვდომისას პრობლემები ძირითადად ევროპის ქვეყნებში მცხოვრებ მომხმარებლებს შეექმნათ. კერძოდ, მომხმარებელთა უმეტესობა (53%) შეტყობინებებს ვერ იღებს, სერვერთან წვდომა უჭირს მომხმარებელთა 31%-ს, 15%-კი აპლიკაციაში ავტორიზაციას ვერ ახერხებს.
საკოორდინაციო საბჭო რეკომენდაციით მიმართავს ტაქსის მძღოლებს, სეზონურ გრიპის ვირუსზე ვაქცინაცია ჩაიტარონ
უწყებათაშორისი საკოორდინაციო საბჭო ტაქსის მძღოლებს რეკომენდაციით მიმართავს, სეზონურ გრიპის ვირუსზე ვაქცინაცია ჩაიტარონ. პრემიერმინისტრის პრესსამსახურის ინფორმაციით, უწყებათაშორისი საკოორდინაციო საბჭოს დღევანდელ სხდომაზე კორონავირუსთან მიმართებაში არსებული სიტუაცია განიხილეს. „უწყებათაშორისო საკოორდინაციო საბჭოს სხდომაზე გაანალიზდა სეზონური გრიპების სეზონის მოახლოებასთან დაკავშირებული საფრთხეები და ვაქცინაციის პროცესი მაღალი რისკის ჯგუფებში. არსებული ვითარების ანალიზის საფუძველზე, საკოორდინაციო საბჭო რეკომენდაციით მიმართავს ტაქსის მძღოლებს, მიმართონ შესაბამის სამედიცინო დაწესებულებებს და ჩაიტარონ ვაქცინაცია სეზონური გრიპის ვირუსზე, გაუფრთხილდნენ როგორც საკუთარ, ისე მათი მგზავრების ჯანმრთელობას“, - ნათქვამია პრემიერის პრესსამსახურის მიერ გავრცელებულ ინფორმაციაში.
ერთპარტიული პარლამენტი წარმომადგენლობითი ორგანოს ფუნქციას ვერ შეასრულებს - საერთაშორისო გამჭვირვალობა
ერთპარტიული პარლამენტი წარმომადგენლობითი ორგანოს ფუნქციას ვერ შეასრულებს - ამის შესახებ „საერთაშორისო გამჭვირვალობა საქართველო“ აცხადებს და განცხადებას ავრცელებს. როგორც განცხადებაშია ნათქვამი, საქართველო, კონსტიტუციის უკანასკნელი ცვლილებების თანახმად, საპარლამენტო რესპუბლიკაა და შესაბამისად, პარლამენტის გამართული ფუნქციონირება საკვანძო მნიშვნელობისაა ქვეყნის განვითარებისათვის. "პარლამენტი ხალხის წარმომადგენლობითი ორგანოა, ის საქართველოს მოსახლეობის არჩევანსა და მის ნებას უნდა გამოხატავდეს. ერთპარტიული პარლამენტი ვერ შეასრულებს წარმომადგენლობითი ორგანოს ფუნქციას, ვერ შეძლებს გამართულად ფუნქციონირებას და მთავრობის კონტროლს. პარლამენტის თანამდებობები სრულად ვერ დაკომპლექტდება და ბევრ გადაწყვეტილებას პარლამენტი ვერ მიიღებს ხმათა არასაკმარისი რაოდენობის გამო. ოთხმოცდაათი წევრით წარმოდგენილი პარლამენტი ვერ მიიღებს ისეთ გადაწყვეტილებებს, რომელთა მიღებასაც 100 ან 113 ხმა ჭირდება და ძალიან გართულდება 90 ხმის მობილიზებაც. ასეთი გადაწყვეტილება კი არაერთია“, - აღნიშნულია ორგანიზაციის განცხადებაში. ამასთან, მათივე ნობით, აღნიშნულ ვითარებაში პარლამენტი კანონების და გადაწყვეტილებების ნაწილის მიღებასაც ვერ შეძლებს. „პარლამენტი სრული შემადგენლობის ორი მესამედით (100 ხმა) იღებს საკონსტიტუციო ცვლილებებს, ასევე კანონს სასოფლო სამეურნეო მიწის საკუთრების შესახებ. პარლამენტი სრული შემადგენლობის სამი მეოთხედით (113 ხმა) იღებს კონსტიტუციურ კანონს ერთი მოწვევის პარლამენტის ფარგლებში. პარლამენტი სრული შემადგენლობის სამი მეხუთედით (90 ხმა) ირჩევს სახალხო დამცველს, ამტკიცებს საკონსტიტუციო შეთანხმებას, ირჩევს საკონსტიტუციო სასამართლოს მოსამართლეებს, ირჩევს იუსტიციის უმაღლესი საბჭოს წევრებს, უნდობლობას უცხადებს საზოგადოებრივი მაუწყებლის სამეურვეო საბჭოს. პარლამენტი სრული შემადგენლობის ორი მესამედით(100 ხმა) ახორციელებს პრეზიდენტის იმპიჩმენტს. პარლამენტი სრული შემადგენლობის სამი მეოთხედით (113 ხმა) ახორციელებს იმ ხელშეკრულების რატიფიცირებას, დენონსირებას და გაუქმებას, რომელიც ეხება სახელმწიფოს ტერიტორიულ მთლიანობას ან სახელმწიფო საზღვრის შეცვლას“, - აღნიშნულია ორგანიზაციის მიერ გამოქვეყნებულ ინფორმაციაში. ამასთან, „საერთაშორიო გამჭვირვალობა საქართველოს ინფორმაციით, თანამდებობის პირების ნაწილთა ადგილები ვაკანტური დარჩება. „ნდობის ჯგუფი 5 წევრის ნაცვლად, 3 წევრით იქნება წარმოდგენილი, ვინაიდან ოპოზიციის კვოტას, რეგლამენტის თანახმად, უმრავლესობა ვერ შეავსებს. ეს იმას ნიშნავს, რომ უსაფრთხოების სექტორის კონტროლი, რომელიც ტრადიციულად სუსტია, ფაქტიურად ვერ განხორციელდება; პარლამენტის თავმჯდომარეს 4 მოადგილის ნაცვლად, 2 მოადგილე ეყოლება, რადგან 2 მოადგილე ოპოზიციური ფრაქციებიდან უნდა იყოს არჩეული; ვაკანტური დარჩება კომიტეტის თავმჯდომარის ერთი მოადგილის თანამდებობაც, რადგან კომიტეტის თავმჯდომარის 3 მოადგილიდან 1 ოპოზიციის წარმომადგენელი უნდა იყოს; საპროკურორო საბჭოში პარლამენტს 2 წევრის ნაცვლად, 1 წევრი ეყოლება, ვინაიდან ერთი წევრი აუცილებლად საპარლამენტო ოპოზიციის წარმომადგენელი უნდა იყოს; საზოგადოებრივი მაუწყებლის სამეურვეო საბჭოს საკონკურსო კომისიის შექმნის საჭიროების შემთხვევაში, მასში 9 წევრის ნაცვლად, 6 წევრი იქნება წარმოდგენილი, რადგან ოპოზიციის უფლებაა 3 წევრი წარუდგინოს პარლამენტს; საპენსიო სააგენტოს საინვესტიციო საბჭოს წევრთა კანდიდატურების შესარჩევ კომისიაში პარლამენტს 3-ის ნაცვლად, 2 წევრი ეყოლება, რადგან ოპოზიცია ვერ წარადგენს წევრს მისი შემადგენლობიდან“, - აცხადებენ ორგანიზაციაში. ამასთან, მათივე ცნობით, ვერ შეიქმნება დროებითი საგამოძიებო კომისია და ეთიკის საბჭო. ასევე, პარლამენტში დებატები აზრს დაკარგავს. დროებითი საგამოძიებო კომისია საპარლამენტო კონტროლის მნიშვნელოვანი მექანიზმია. პარლამენტის რეგლამენტის თანახმად, ოპოზიციის წარმომადგენლები დროებითი საგამოძიებო კომისიის წევრთა მინიმუმ ნახევარს უნდა შეადგენდნენ. შესაბამისად, პარლამენტში, სადაც ოპოზიცია არ არსებობს, დროებითი საგამოძიებო კომისია ვერ შეიქმნება. პარლამენტის წევრთა ეთიკის კოდექსის ამოქმედებისათვის პარლამენტში უნდა შეიქმნას ეთიკის საბჭო, რომელიც განიხილავს ეთიკის კოდექსის დარღვევებს და მოახდენს დარღვევებზე რეაგირებას. პარლამენტის რეგლამენტის თანახმად, ეთიკის საბჭოში საპარლამენტო უმრავლესობის წარმომადგენლობა არ უნდა აჭარბებდეს ეთიკის საბჭოს წევრთა რაოდენობის ნახევარს. რეგლამენტის თანახმად, დებატებისთვის გამოყოფილი დრო ფრაქციებზე ნაწილდება; ფრაქციას სიტყვისთვის მაქსიმუმ 15 წუთი ეძლევა. შესაბამისად, მნიშვნელოვნად შემცირდება დებატების დრო და ის მხოლოდ უმრავლესობის მიერ აზრის გამოხატვის ფორმას შეიძენს. მუდმივმოქმედი საპარლამენტო დელეგაციები მხოლოდ უმრავლესობის წევრებით დაკომპლექტდება და ამ დელეგაციებს საერთაშორისო ორგანიზაციები არ დაამტკიცებენ მუდმივმოქმედი საპარლამენტო დელეგაციების შემადგენლობა განისაზღვრება პროპორციული წარმომადგენლობის კვოტების გათვალისწინებით. ოპოზიციის არ არსებობის შემთხვევაში საპარლამენტო დელეგაცია მხოლოდ სახელისუფლებო პარტიის დელეგაციად იქცევა. აღსანიშნავია, რომ საერთაშორისო ორგანიზაციები სავალდებულოდ მოითხოვენ საპარლამენტო დელეგაციებში ოპოზიციის მონაწილეობას, ისევე, როგორც მაგალითად გენდერულ ბალანსს (მაგ. ევროპის საბჭოს საპარლამენტო ასამბლეის რეგლამენტი, ნატოს საპარლამენტო ასამბლეის რეგლამენტი). ქვეყნის მიერ წარდგენილი მუდმივმოქმედი საპარლამენტო დელეგაცია კი უფლებამოსილებას მხოლოდ საერთაშორისო ორგანიზაციის მიერ დამტკიცების შემდეგ იძენს. შესაბამისად, ქვეყანას შესაძლოა ოთხი წელი არ ჰყავდეს დელეგაციები მნიშვნელოვან საერთაშორისო ორგანიზაციებში“, - აღნიშნულია ორგანიზაციის მიერ გამოქვეყნებულ ინფორმაციაში.
ბელარუსის ხელისუფლებამ სახმელეთო საზღვრების ჩაკეტვის გადაწვეტილება მიიღო
ბელარუსის ხელისუფლებამ სახმელეთო საზღვრების ჩაკეტვის გადაწვეტილება მიიღო. „დოიჩე ველეს“ ინფორმაციით, ახალი შეზღუდვების მიხედვით, მოქალაქეებს ქვეყნის დატოვების უფლება მხოლოდ განსაკუთრებული მიზეზის არსებობის შემთხვევაში ექნებათ. ბელარუსის მთავრობამ პანდემიასთან ბრძოლაში ახალი შეზღუდვების დაწესების გადაწყვეტილება მინისტრთა საბჭოზე მიიღო. დოკუმენტში ნათქვამია, რომ ქვეყნის დატოვების უფლება სხვა ქვეყნის მოქალაქეებს და საზღვარგარეთ დროებითი ცხოვრების უფლების მქონე ადამიანებს ექნებათ. ბელარუსის მოქალაქეებს სხვა ქვეყანაში გამგზავრება მკურნალობის მიღების ან ნათესავის გარდაცვალების გამო შეეძლებათ. ამასთან, ექვს თვეში ერთხელ ბელარუსიდან გასვლა სწავლისა და სამსახურის მიზეზით გახდება შესაძლებელი. ბელაურისის სახმელეთო საზღვრების დროებით ჩაკეტვის შესახებ გადაწყვეტილება ძალაში დოკუმენტის ხელმოწერიდან 10 დღეში შევა.
პარლამენტის პირველი სხდომა ყველაფერს წერტილს დაუსვამს - უდუმაშვილი
პარლამენტის პირველი სხდომა ყველაფერს წერტილს დაუსვამს - ამის შესახებ „ნაციონალური მოძრაობის“ წევრმა, ზაალ უდუმაშვილმა განაცხადა. როგორც მან აღნიშნა, ყველა დეპუტატი, რომელიც ცესკო-ს მონაცემებით პარლამენტშია შესული, ინდივიდუალურ განცხადებას დაწერს, ხოლო პარტიის ხელმძღვანელობა სიებს ჩახსნის. „ვერ გეტყვით ზუსტად, ვინმე თუ გეგმავს პარლამენტში შესვლას. ეს მისი პრობლემაა. ფაქტია, ოპოზიცია ერთიანია ამ გადაწყვეტილებაში და ალბათ, ხვალ, როდესაც პირველი სხდომა ჩატარდება პარლამენტში, უკვე ყველაფერს წერტილი დაესმება. რაც შეეხება გეგმებს, როგორც აქამდე მოდიოდა ოპოზიცია ერთიანად და სტრატეგია გვქონდა შემუშავებული, ზუსტად ასე გავაგრძელებთ ბრძოლას. პოლიტიკა არ კეთდება მხოლოდ პარლამენტში. დღეს გავივლით კონსულტაციებს იურისტებთან, რომ არ დავარღვიოთ პროცედურული საკითხები, კონკრეტულად როდის უნდა დაიწეროს ეს განცხადებები. მე „ნაციონალური მოძრაობის“ და „ძალა ერთობაშიას“ სახელით ვლაპარაკობ. ყველა დეპუტატი, რომელიც ცესკო-ს მონაცემებით შესულია პარლამენტში, დაწერს ინდივიდუალურ განცხადებას, ხოლო პარტიის ხელმძღვანელობა ჩახსნის იმ სიებს, რომელიც ცესკო-შია. ამით დასრულდება ჩვენი მხრიდან ეს პროცესი, რაც ეხება საპარლამენტო მანდატებს. შემდეგ უკვე დაიწყება სულ სხვა პოლიტიკური პროცესები ქვეყანაში და სულ სხვა რეალობა დადგება. არანაირი აქცია და პერფორმანსი არ იქნება. ძალიან საინტერესო იქნება. ვფიქრობ, მთავარი აქცია და პერფორმანსი იქნება ტელევიზორში, როდესაც მეათე მოწვევის პარლამენტი ერთპარტიულად შეიკრიბება“, - განაცხადა ზაალ უდუმაშვილმა. მეათე მოწვევის პარლამენტის პირველი სხდომა 11 დეკემბერს გაიმართება.
„რემდესივირს“ საქართველოში დეკემბრის ბოლომდე შემოიტანენ - ტიკარაძე
ჯანდაცვის მინისტრის, ეკატერინე ტიკარაძის ინფორმაციით, „რემდესივირს“ საქართველოში დეკემბრის ბოლომდე შემოიტანენ. როგორც მინისტრმა აღნიშნა, შესაბამისი ხელშეკრულება უკვე გაფორმებულია. „ხელშეკრულება უკვე გაფორმებულია და მიმდინარეობს ტრანსპორტირების პროცესი. თვის ბოლომდე ადგილზე გვექნება „რემდესივირი“, - განაცხადა ტიკარაძემ.
ელჩის მეუღლე რეზიდენციასთან შეკრებილ ჟურნალისტებს ყავითა და დონატებით გაუმასპინძლდა
ევროკავშირის ელჩის, კარლ ჰარცელის რეზიდენციასთან შეკრებილ ჟურნალისტებს ელჩის მეუღლე ყავითა და დონატებით გაუმასპინძლდა. ჟურნალისტები რეზიდენტიასთან "ქართული ოცნებისა" და ოპოზიციის მორიგ შეხვედრასთან დაკავშირებით იმყოფებოდნენ. გავრცელებული ინფორმაციით, აღნიშნული შეხვედრა დღეს არ გაიმართება. პარლამენტის პირველი სხდომა კი ხვალ, 11 დეკემბერსაა ჩანიშნული.
ამირან გამყრელიძე საახალწლო დღეებში შეზღუდვების გაგრძელებას არ გამორიცხავს
ამირან გამყრელიძე საახალწლო დღეებში შეზღუდვების გაგრძელებას არ გამორიცხავს. როგორც მან საკოორდინაციო საბჭოს დასრულების შემდეგ განაცხადა, აღნიშნული დამოკიდებულია ეპიდსიტუაციასა და საბჭოს ერთობლივ გადაწყვეტილებაზე. "საკოორდინაციო საბჭოზე ყოველდღიურად ხდება ეპიდსიტუაციის ანალიზი, როცა ჩვენ მივუახლოვდებით 24-ს, შესაბამისად მიიღება გადაწყვეტილება. ეს ყველაფერი განხილვის საგანია. ექიმები ყოველთვის რადიკალურები ვართ, მაგრამ საკოორდინაციო საბჭო ბევრი უწყებითაა დაკომპლექტებული, აქ გასათვალისწინებელია ქვეყნის და მოსახლეობის ეკონომიური მდგომარეობის. ერთის მხრივ არ გაუარესდეს ეპიდსიტუაცია და მეორეს მხრივ ადამიანებს ქონდეთ შემოსავალი. თუ გავხსნით და უნდა გაიხსნას წინასაახალწლოდ გარკვეული რაღაცები, შემსუბუქება უნდა იყოს, მაშინ ყველა პრევენციული ღონისძიება მკაცრად უნდა იყოს დაცული და აღსრულებული. ხელაღებით, ყოველგვარი ანალიზის გარეშე, რომ გაიხსნას ყველაფერი და ის, რაც "შავ პარასკევს" მოხდა მსგავსი განვითარდეს, ზუსტად წინასაახალწლოდ გვექნება დიდი პიკი. ამიტომ თუ რამეს ჩვენ ამ ორ კვირაში მივაღწევთ და რაღაც სტაბილიზაციის ელემენტები ოდნავ ჩანს, ის წყალში არ უნდა გადავყაროთ, უნდა ვიყოთ ძალიან ფრთხილად", - განაცხადა გამყრელიძემ. მანვე მოსახლეობას, პირბადის შინ და გარეთ ტარებისკენ მოუწოდა და აღნიშნა, რომ თუ პირბადის ტარების ნიშნული 95%-ზე ავა, გავრცელება საგრძნობლად შემცირდება.
CNN - აშშ-ის 50-ვე შტატმა და კოლუმბიის ოლქმა საპრეზიდენტო არჩევნების შედეგები ოფიციალურად დაამოწმა
აშშ-ის 50-ვე შტატმა და კოლუმბიის ოლქმა საპრეზიდენტო არჩევნების საკუთარი შედეგები ოფიციალურად დაამოწმა,- ამის შესახებ ინფორმაციას CNN-ი ავრცელებს. ტელეკომპანიის ცნობით, დასავლეთ ვირჯინია გახდა უკანასკნელი შტატი, რომელმაც ოთხშაბათს საპრეზიდენტო არჩევნების შედეგები დაადასტურა, ანუ ოფიციალურად გამოაცხადა, რომ სარჩევნო კოლეგიაში შტატის ხუთი ხმა პრეზიდენტ დონალდ ტრამპს ეკუთვნის. შემდეგი მნიშვნელოვანი ნაბიჯი საარჩევნო კოლეგიის შეკრებაა, რომელიც, კანონის თანახმად, 14 დეკემბერს უნდა გაიმართოს. საარჩევნო კოლეგიის წევრების ხმებს კონგრესის ერთობლივ სხდომაზე ითვლიან, რომელიც 6 იანვარს გაიმართება. CNN-ი იუწყება, რომ წინასწარი პროგნოზით არჩეულმა პრეზიდენტმა, ჯო ბაიდენმა, საარჩევნო კოლეგიის 306 ხმა მოაგროვა, ხოლო დონალდ ტრამპმა - 232. აღსანიშნავია, რომ პრეზიდენტად დამტკიცებისთვის საარჩევნო კოლეგიის 538 ხმიდან 270 ხმაა საჭირო.
„ქართულ ოცნებასა“ და ოპოზიციას შორის მოლაპარაკებების მეხუთე რაუნდი დღეს აღარ გაიმართება
„ქართული ოცნებისა“ და ოპოზიციის წარმომადგენლებს შორის შეხვედრა დღეს აღარ გაიმართება. Europetime-ისთვის ჯერ უცნობია შეხვედრის გადადების მიზეზი. ამ თემაზე არც მხარეები საუბრობენ. ოპოზიციასა და „ქართულ ოცნებას“ შორის მოლაპარაკებების მეოთხე რაუნდი შეთანხმების გარეშე დასრულდა.
4 570 ახალი შემთხვევა და 43 გარდაცვლილი - 10 დეკემბრის სტატისტიკა
ბოლო 24 საათში გამოვლინდა ვირუსით ინფიცირების 4 570 ახალი დადასტურებული შემთხვევა, - ამის შესახებ უწყებათაშორის საკოორდინაციო საბჭოსთან არსებული ოპერაციული შტაბის უფროსის მოადგილემ, ბერდია სიჭინავამ, მთავრობის ადმინისტრაციაში გამართულ ბრიფინგზე განაცხადა. მან კორონავირუსთან დაკავშირებით, 10 დეკემბრის მდგომარეობით არსებულ უახლეს სტატისტიკურ მონაცემებსა და მთავრობის მიერ გატარებული ღონისძიებების თაობაზე ისაუბრა. “ინტენსიური ტესტირების ფარგლებში, ბოლო 24 საათში ქვეყნის მასშტაბით ჩატარდა 19 636 კვლევა ტესტით, მათ შორის 11 718 კვლევა ანტიგენის სწრაფი ტესტით და 7 918 PCR ტესტით. ჩატარებული ტესტირების შედეგად, ბოლო 24 საათში გამოვლინდა ვირუსით ინფიცირების 4 570 ახალი დადასტურებული შემთხვევა, ხოლო ქვეყანაში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 178 953-ს. ბოლო 24 საათში ვირუსისგან გამოჯანმრთელდა 3 045 პირი, ხოლო ჯამში გამოჯანმრთელებულთა რაოდენობა გაიზარდა 148 332-მდე. სამწუხაროდ, ბოლო 24 საათში გვაქვს კორონავირუსით გარდაცვალების 43 ახალი შემთხვევა. პანდემიის გავრცელებიდან დღემდე ვირუსს ჯამში 1 657 პირი ემსხვერპლა. დღეს ქვეყანაში გამოვლენილი ინფიცირების 4 570 ახალი შემთხვევიდან, თბილისში გამოვლენილია 2 067 შემთხვევა, აჭარა-331, იმერეთი-708, ქვემო ქართლი-352, შიდა ქართლი-214, გურია-72, სამეგრელო - ზემო სვანეთი-325, კახეთი-272, მცხეთა-მთიანეთი-133, სამცხე-ჯავახეთი-75, რაჭა-ლეჩხუმი და ქვემო სვანეთი-21. ამ ეტაპზე ინფიცირების მიმდინარე აქტიური შემთხვევა არის 28 938, საიდანაც, 6 918 ადამიანი მკურნალობს საავადმყოფოში, მათ შორის, თბილისის საავადმყოფოებში-3 017, აჭარაში-991, იმერეთში-1 357. ამ ეტაპზე მძიმე პაციენტია 1 130 პირი, მათ შორის, თბილისში-515, აჭარაში -155, იმერეთში-259. მძიმე პაციენტებიდან ხელოვნური სუნთქვის აპარატზე იმყოფება 453 პირი, მათგან თბილისში-205, აჭარაში-54, იმერეთში-77. 3 524 ადამიანი მოთავსებულია კლინიკურ-სასტუმროებში, მათ შორის, 1 144-თბილისში, 1 715-აჭარაში, 370-იმერეთში. 18 496 პირი ვირუსის მკურნალობს კურსს გადის საცხოვრებელ ბინაზე. საკარანტინე სივრცეებში მოთავსებულია 1 019 ადამიანი, მათ შორის, თბილისში-299, აჭარაში-138, ხოლო იმერეთში-28. სულ 6 ოქტომბრიდან - 9 დეკემბრის პერიოდში, სახელმწიფო საზღვრიდან საკარანტინე სივრცეებში გადაყვანილია-20 139 პირი. ამ ეტაპისთვის თვითიზოლაციაში იმყოფება 50 724 ადამიანი, მათ შორის თბილისში-19 817 პირი, აჭარაში - 10 336, იმერეთში-5 647“,-განაცხადა ბერდია სიჭინავამ.
რუსეთში გაქურდეს სამხედრო თვითმფრინავი, რომლითაც ვლადიმერ პუტინიც სარგებლობს
რუსეთის ქალაქ ტაგანროგის სამხედრო ავიაბაზეზე, სამხედრო თვითმფრინავი Il-80 (ილიუშინ 80) გაქურდეს. ინფორმაციას The Guardian-ი ავრცელებს. ადგილობრივი მედიის ცნობით, ქურდებმა გასაიდუმლებული თვითმფრინავის სატვირთო ლუქის გახსნა და ბორტზე შეღწევა მოახერხეს. რუსეთის შინაგან საქმეთასამინისტრო არ ასაჯაროებს დეტალებს, თუმცა გავრცელებული ინფორმაციით, მოპარულია რადიო მოწყობილობა. ასევე უცნობია, კონკრეტულად რომელი თვითმფინრავი გაქურდეს, რადგან რუსეთს მსგავსი ტიპის ოთხ თვითმფრინავს ფლობს. ჯერჯერობით ისიც უცნობია, რამდენად მნიშვნელოვანი შეიძლება იყოს მოპარული რადიო მოწყობილობა.
პირველად საქართველოს ჩემპიონატების ისტორიაში - შეხვედრას ქალ მსაჯთა გუნდი განსჯის
ეროვნული ლიგის ბოლო, მე-18 ტურის შეხვედრა „საბურთალოსა“ და „სამტრედიას“ შორის არცერთი გუნდისთვის არაფერს წყვეტს, თუმცა მატჩი მაინც გამორჩეული იქნება იმ მხრივ, რომ საქართველოს ჩემპიონატების ისტორიაში პირველად, მას ქალ მსაჯთა გუნდი მოემსახურება. ეროვნული ლიგის ოფიციალური ვებგვერდის ცნობით, მთავარი არბიტრი ხათუნა მაისურაძე იქნება. მას ქეთევან გაიპარაშვილი და სოფო რიჟამაძე დაეხმარებიან, ხოლო მეოთხე მსაჯად ვიკა სახურია იმუშავებს. ამასთან, მაისურაძის ერთ-ერთმა დამხმარე არბიტრმა, ქეთევან გაიპარაშვილმა წლის დასაწყისში მნიშვნელოვანი შეხვედრა განსაჯა - ის პირველი ქართველი არბიტრი ქალია, რომელიც მაღალი დონის საფეხბურთო მატჩს, საქართველოს სლავა მეტრეველის სახელობის სუპერთასის შეხვედრას მოემსახურა. გაიპარაშვილი 23 თებერვალს, „მიხეილ მესხი 2“-ზე გამართული 2020 წლის სუპერთასის მატჩში საქართველოს ჩემპიონ თბილისის „დინამოსა“ და დავით ყიფიანის სახელობის თასის მფლობელი „საბურთალოს“ შორის მთავარ არბიტრს, გიორგი კიკაჩეიშვილს ეხმარებოდა.
ერთწლიანი წყვეტის შემდეგ, ჟენევის საერთაშორისო მოლაპარაკებების მორიგი რაუნდი გაიმართება
10-11 დეკემბერს ჟენევის საერთაშორისო მოლაპარაკებების 51-ე რაუნდი გაიმართება. საქართველოს საგარეო საქმეთა სამინისტროს ინფორმაციით, ფაქტობრივად ერთწლიანი წყვეტის შემდეგ, ევროკავშირის, გაეროსა და ეუთოს შუამავლობით, ასევე აშშ-ის მონაწილეობით მოლაპარაკებების მორიგი რაუნდის ჩატარებას განსაკუთრებული მნიშვნელობა ენიჭება. მოლაპარაკებების ფარგლებში საქართველოს დელეგაცია დააყენებს რუსეთის ფედერაციისა და საოკუპაციო რეჟიმების მხრიდან უკანონო და პროვოკაციული ქმედებების და მათი მძიმე შედეგების საკითხს, რაც განსაკუთრებით გამწვავდა პანდემიის ფონზე და ადგილზე ვითარების ესკალაციის შესაძლებლობის გაზრდის გარდა, კიდევ უფრო ართულებს კონფლიქტით დაზარალებული მოსახლეობის მდგომარეობას. მოლაპარაკების აღნიშნულ რაუნდზე ქართული მხარე ისაუბრებს რუსეთის ფედერაციის მხრიდან საქართველოს ოკუპირებული რეგიონების ანექსიისკენ გადადგმული ნაბიჯების შესახებ, მათ შორის ე.წ. ერთიანი სოციალურ-ეკონომიკური სივრცის ფორმირების „პროგრამის“ დამტკიცებისა და საოკუპაციო რეჟიმის წარმომადგენელთა შორის გამართულ შეხვედრებზე ე.წ. „სამოკავშირეო სახელმწიფოს“ შექმნის განხილვის საკითხს. ყურადღება გამახვილდება ევროკავშირის შუამავლობით 2008 წლის 12 აგვისტოს დადებული ცეცხლის შეწყვეტის შეთანხმების დარღვევებზე, საქართველოს ოკუპირებულ ტერიტორიებზე მიმდინარე უკანონო მილიტარიზაციაზე, სამხედრო წვრთნებსა და ე.წ. ბორდერიზაციის პროცესზე და ხაზი გაესმევა რუსეთის ფედერაციის მხრიდან აღნიშნული შეთანხმების სრულად შესრულების აუცილებლობას. „ქართული მხარე განსაკუთრებულ ყურადღებას გაამახვილებს საოკუპაციო რეჟიმის მხრიდან უკანონოდ დაკავებული საქართველოს მოქალაქეების გათავისუფლებას. მათ შორის, ირაკლი ბებუას დაკავების საკითხს, რომელსაც სწორედ ჟენევის მოლაპარაკებების წინ მიუსაჯეს 9 წლიანი “პატიმრობა”, რაც საოკუპაციო რეჟიმის მხრიდან წარმოადგენს პროვოკაციულ ქმედებას. განხილული იქნება ახალგორისა და გალის რაიონებში არსებული რთული ჰუმანიტარული სიტუაცია და ხაზი გაესმება თავისუფალი გადაადგილების უზრუნველყოფის მნიშვნელობას, განსაკუთრებული ყურადღება გამახვილდება გადაუდებელი სამედიცინო ევაკუაციის დაუბრკოლებლად განხორციელების აუცილებლობაზე, ისევე როგორც ეთნიკური ნიშნით დისკრიმინაციის შეწყვეტის აუცილებლობაზე. ოკუპირებულ რეგიონებში არსებული მწვავე უსაფრთხოებისა და ჰუმანიტარული გარემოს გათვალისწინებით განსაკუთრებული ყურადღება დაეთმობა გალში ინციდენტების პრევენციისა და მათზე რეაგირების მექანიზმის (IPRM) შეხვედრების ყოველგვარი წინაპირობების გარეშე აღდგენის, ისევე როგორც ერგნეთის შეხვედრების შეუფერხებელი ფუნქციონირების საკითხებს. საქართველოს დელეგაცია განსაკუთრებულ აქცენტს გააკეთებს რუსეთის მიერ 2008 წლის 12 აგვისტოს ცეცხლის შეწყვეტის შეთანხმების პირობების სრულად შესრულების აუცილებლობაზე. ჟენევის საერთაშორისო მოლაპარაკებების 51-ე რაუნდის დღის წესრიგის ერთ-ერთი მთავარი თემა იქნება აფხაზეთისა და ცხინვალის რეგიონებიდან იძულებით გადაადგილებულ პირთა და ლტოლვილთა უსაფრთხო და ღირსეული დაბრუნება“, - ნათქვამია ინფორმაციაში, რომელსაც საგარეო უწყება ავრცელებს.
ევროკავშირის წარმომადგენლობა საქართველოში, ხუთ ახალ პროექტს აანონსებს
საქართველოში ევროკავშირის წარმომადგენლობა ადამიანის უფლებათა საერთაშორისო დღესთან დაკავშირებით განცხადებას ავრცელებს. „ადამიანის უფლებათა დღე გვახსენებს, რომ ადამიანის უფლებების ხელშეწყობა და დაცვა უნდა დარჩეს ევროკავშირის მუშაობის მთავარ პრიორიტეტად როგორც საქართველოში, ასევე მსოფლიოში. ჩვენ ვერ ვიქნებით გულდამშვიდებულები. კრიზისული სიტუაციები განსაკუთრებული გამოცდაა ადამიანის უფლებების რეალიზაციისა და დემოკრატიული ღირებულებების პატივისცემისათვის. „კოვიდ-19“-ის მიმდინარე პანდემია და მისი სოციალურ-ეკონომიკური შედეგები უარყოფითად აისახება ადამიანის უფლებების დაცვაზე, აძლიერებს არსებულ უთანასწორობას და ზრდის ზეწოლას მოწყვლად სიტუაციებში მყოფ პირებზე. ევროკავშირი მზად არის, იმუშაოს ქართველ პარტნიორებთან გამოვლენილი მოწყვლადობის მოსაგვარებლად და შემდგომი რისკების შესამსუბუქებლად. ჩვენი ვალდებულება საქართველოში ადამიანის უფლებების დაცვასთან დაკავშირებით უცვლელად მტკიცეა. ამ კვირაში ჩვენ ვაანონსებთ ხუთ ახალ პროექტს, მათ შორის ჩვენი პროგრამის „ევროკავშირი ადამიანის უფლებებისთვის“ (EU4 Human Rights) ფარგლებში. ეს ძალისხმევა ხელს შეუწყობს საქართველოს სამთავრობო ინსტიტუტებს, პარლამენტს, ადგილობრივ ხელისუფლებას და სამოქალაქო საზოგადოების ორგანიზაციებს, უზრუნველყონ ადამიანის უფლებები და მონიტორინგი გაუწიონ მათ, გააძლიერონ ბავშვთა უფლებების დაცვა, გენდერული ძალადობის წინააღმდეგ ბრძოლა, შეზღუდული შესაძლებლობის მქონე პირთა უფლებების დაცვა, უმცირესობების უფლებები, მონაცემთა დაცვა და გააფართოონ სამართალდამცავი ორგანოების ანგარიშვალდებულება. წინ ბევრი სამუშაო გველის. ამ ახალი დახმარების დაწყება ახალი მთავრობისა და პარლამენტის მუშაობის დაწყებას ემთხვევა და ველოდებით ახალი, 2020 წლის შემდგომი, ადამიანის უფლებათა სტრატეგიისა და მისი თანმხლები სამოქმედო გეგმის მიღებას. რამდენიმე დღის წინ ევროკავშირმა მიიღო ადამიანის უფლებებისა და დემოკრატიის ახალი სამოქმედო გეგმა 2020-2024 წლებისთვის, რომელიც განსაზღვრავს ჩვენი ამბიციის დონეს და ყველა მესამე ქვეყანასთან ურთიერთობაში ჩვენს პრიორიტეტებს აწესებს. ამ სამოქმედო გეგმით ევროკავშირი კვლავ ადასტურებს მტკიცე მზაობას ხელი შეუწყოს საყოველთაო ღირებულებების წინ წამოწევას. ადამიანის ღირსების, თავისუფლების, დემოკრატიის, თანასწორობის, კანონის უზენაესობისა და ადამიანის უფლებების პატივისცემა კვლავაც იქნება ევროკავშირის შიდა და გარე პოლიტიკის ყველა ასპექტის საფუძველში. ინვესტიცია ადამიანის უფლებებში, დემოკრატიასა და კანონის უზენაესობაში აუცილებელია უფრო სამართლიანი, უფრო მდგრადი და ინკლუზიური საზოგადოების მისაღწევად. ევროკავშირი კიდევ ერთხელ ადასტურებს თავის მზაობას, ამ პროცესში საქართველოს გვერდში ედგას“, – ნათქვამია საქართველოში ევროკავშირის წარმომადგენლობის განცხადებაში.
Covid19-ის საწინააღმდეგო ვაქცინა კანადამაც დაამტკიცა
კანადამ კორონავირუსის პირველი ვაქცინა დაამტკიცა. ინფორმაციას The Guardian-ი ავრცელებს. კანადა მესამე ქვეყანა გახდა, გაერთიანებული სამეფოსა და ბაჰრეინის შემდეგ, რომელმაც Pfizer-BioNTech-ის ვაქცინის გამოყენებაზე ნებართვა გასცა. ქვეყნის ჯანდაცვის სამინისტროს განცხადებით, „ არსებობს მტკიცებულებები“ რომლებზე დაყრდნობითაც ვაქცინა „უსაფრთხო და მაღალი ხარისხისაა“. კანადაში 16 წელს გადაცილებული პირებს ექნებათ უფლება, კორონავირუსის საწინააღმდეგო ინექცია მიიღონ.
უკრაინაში სკოლები, რესტორნები და კაფეები იხურება
უკრაინაში კორონავირუსის სწრაფი გავრცელების შესაჩერებლად მკაცრი საკარანტინო შეზღუდვები წესდება. Reuters-ის ინფორმაციით, ამის შესახებ უკრაინის პრემიერ-მინისტრმა დენის შმიგალმა განაცხადა. მისი თქმით, შეზღუდვები გულისხმობს სკოლების, კაფეების რესტორნების, სპორტდარბაზებისა და გასართობი ცენტრების დახურვას და მასობრივ შეკრებებზე აკრძალვის დაწესებას. შეზღუდვები 8-დან 24 იანვრამდე იმოქმედებს.
აუცილებელია, მოქალაქეებმა შინ და გარეთ დაიწყონ პირბადის ტარება - ბიძინა კულუმბეგოვი
აუცილებელია, მოქალაქეების 90-95%-მა შინ და გარეთ დაიწყოს პირბადის ტარება - ამის შესახებ იმუნოლოგ-ალერგოლოგმა ბიძინა კულუმბეგოვმა პრემიერ-მინისტრ გიორგი გახარიასა და ჯანდაცვის სფეროს ექსპერტებს შორის გამართული შეხვედრის შემდეგ განაცხადა. როგორც მან აღნიშნა, შეხვედრისას საუბარი შეეხო ქვეყანაში არსებულ ეპიდემიოლოგიურ სიტუაციას და გაფართოებული ტესტირების ფონზე შემთხვევების გამოვლენის დინამიკაში დაკვირვების აუცილებლობას, რათა სწორი დასკვნები გაკეთდეს. „უნდა დავაკვირდეთ 7-14-დღიან მონაცემებს და შემდგომ ვიმსჯელოთ. ზოგადად საუბარი იყო მსოფლიოში არსებულ სიტუაციაზე, ევროპის ბევრმა ქვეყანამ დაანონსებული შეზღუდვების გამკაცრების ან ძალაში დატოვების გადაწყვეტილება მიიღო, განვიხილეთ იგივე გერმანიის და სკანდინავიის ქვეყნების მაგალითები. ასევე ვიმსჯელეთ, როგორი იქნება მოსახლეობის დამყოლობა. მიუხედავად იმისა, რომ 65%-მდე გაიზარდა პირბადის ტარება, რაც ძალიან კარგია, ჩვენ ეს არ გვაწყობს. აუცილებელია, ადამიანების 90-95%-მა შინ და გარეთ დაიწყოს ნიღბის ტარება, რაც მოგვცემს ინფიცირების რაოდენობის მკვეთრი შემცირების საშუალებას და შესაბამისად, ეკონომიკას უფრო მეტი თავისუფლება მიეცემა. ამიტომ, ამ ორკვირიანი დაკვირვების შედეგად მოგვეცემა შესაძლებლობა, ვიმსჯელოთ, როგორი იქნება 24 დეკემბერი-2 იანვრის გადაწყვეტილებები, რათა არ დაზიანდეს ერთის მხრივ ეპიდემიის სწორი მართვა და მეორეს მხრივ ეკონომიკასაც მიეცეს დაპირებული შეზღუდვების შემსუბუქების პირობებში მუშაობის საშუალება“, - განაცხადა ბიძინა კულუმბეგოვმა. იმუნოლოგ-ალერგოლოგის, ბიძინა კულუმბეგოვის კომენტარს მთავრობის ადმინისტრაცია ავრცელებს.
