ახალი ამბები
საფრანგეთისა და გერმანიის ერთობლივი განცხადება: საპარლამენტო პროცესი გაამყარებდა მიღწეულ შედეგს
გერმანია და საფრანგეთი საქართველოს მოუწოდებენ, დემოკრატიული რეფორმების გზაზე სვლა განაგრძოს და ხაზს უსვამენ რომ საპარლამენტო პროცესი გაამყარებდა როგორც მიღწეულ შედეგს, ისე მის განხორციელებას, საბოლოო ჯამში კი - საქართველოს სახელმწიფო ინსტიტუტების მიმართ ნდობას. აღნიშნულის შესახებ ნათქვამია საფრანგეთის და გერმანიის საელჩოების მიერ დღეს გავრცელებულ ერთობლივ განცხადებაში „საქართველომ, გერმანიისა და საფრანგეთის ახლო პარტნიორმა, უკანასკნელი ორი ათწლეულის მანძილზე მნიშვნელოვანი დამოკრატიული განვითარება განიცადა. მან განამტკიცა კავშირები ნატოსთან და ევროკავშირთან და სამაგალითო როლს თამაშობს აღმოსავლეთ პარტნიორობის ფარგლებში. მძლავრი ინსტიტუტების ჩამოყალიბება და პლურალიზმის კარგი ფუნქციონირება ძლიერი დემოკრატიის აუცილებელი საფუძვლებია. შესაბამისად, ჩვენ მივესალმებით პოლიტიკურ კონსენსუსს, რომელსაც ყველა პოლიტიკურმა პარტიამ მიაღწია წლის დასაწყისში, საარჩევნო სისტემაში აუცილებელი ცვლილებების შეტანასთან დაკავშირებით. ქართველებმა აჩვენეს მზადყოფნა, ესარგებლათ განახლებული საპარლამენტო პლურალიზმით, რომელსაც ეს რეფორმა სთავაზობდათ. ამომრჩეველთა მაღალი აქტივობა არჩევნების პირველი ტურის დროს დამაიმედებელია, ხოლო პანდემიის ფონზე - შესანიშნავი. თუმცა, ეუთოს დემოკრატიული ინსტიტუტებისა და ადამიანის უფლებების ოფისისა და ადგილობრივი სამოქალაქო საზოგადოების დამკვირვებლებმა მიუთითეს გარკვეულ ნაკლოვანებებზე საარჩევნო პროცესში“, - აღნიშნულია განცხადებაში ორი ქვეყნის საელჩო ხაზს უსვამს, საქართველოში ყველა პოლიტიკური ძალა თანხმდება, რომ საარჩევნო და სასამართლო სისტემის შემდგომი რეფორმები პოლიტიკური დღის წესრიგის შუაგულში დარჩეს. „ასეთი დისკუსიისთვის პარლამენტი არის შესაფერისი ადგილი, ვინაიდან საპარლამენტო პროცესი გაამყარებდა როგორც მიღწეულ შედეგს, ისე მის განხორციელებას და საბოლოო ჯამში - საქართველოს სახელმწიფო ინსტიტუტების მიმართ ნდობას. გვსურს, ხაზი გავუსვათ ჩვენს მხარდაჭერას საერთაშორისო მედიატორების მიმართ ევროკავშირიდან და შეერთებული შტატებიდან. მათ მიერ საქართველოში ყველა პოლიტიკური პარტიის დახმარების მიზანი იყო, კონკრეტული რეფორმის განხორციელება საქართველოს დემოკრატიული ინსტიტუტების განმკიცების მიზნით.იმ დროს, როცა საქართველო მთელი რიგი რეგიონული გამოწვევების წინაშეა, მით უფრო მნიშვნელოვანია ქვეყნის ერთიანობის შენარჩუნება. საფრანგეთი და გერმანია მზად არიან, რომ როგორც პარტნიორებმა, საქართველოს მხარი დაუჭირონ დემოკრატიის გზაზე, რომელიც მან აირჩია. აფხაზეთის სეპარატისტული რეგიონის რუსეთის ფედერაციასთან შემდგომი ეკონომიკური ინტეგრაციის შესახებ ახლახან გამართული მოლაპარაკებების კონტექსტში, კვლავ გამოვხატავთ ჩვენს მტკიცე მხარდაჭერას საქართველოს ტერიტორიული მთლიანობისა და სუვერენიტეტის მიმართ მის საერთაშორისოდ აღიარებულ საზღვრებში. ჩვენ კვლავ მოვუწოდებთ ყველა მხარის მიერ, რუსეთის ჩათვლით, ევროკავშირის მედიატორობით ხელმოწერილი 2008 წლის 12 აგვისტოს შეთანხმების სრულად შესრულებისა და ჟენევის საერთაშორისო მოლაპარაკებების ფარგლებში კონკრეტული შედეგების მიღწევის აუცილებლობისკენ“, - ნათქვამია საფრანგეთის და გერმანიის ერთობლივ განცხადებაში, რომელიც დღეს საქართველოსთან დაკავშირებით გაავრცელეს.
პოლიციამ "საქართველოს ბანკზე" თავდასხმაში ბრალდებული ესებუას ძმა დააკავა
პოლიციამ "საქართველოს ბანკზე" თავდასხმაში ბრალდებული ბადრი ესებუას ძმა დააკავა. შს სამინისტროს ინფორმაციით, ის ცეცხლსასროლი იარაღის, საბრძოლო მასალის, ფეთქებადი ნივთიერებისა და ასაფეთქებელი მოწყობილობის მართლსაწინააღმდეგო ტარების ბრალდებით დააკავეს. “ოპერატიული ინფორმაციის საფუძველზე, ვინაიდან არსებობდა ვარაუდი, რომ ბ.ე.-ს მიმალვაში მყოფ ძმასთან ჰქონდა კონტაქტი და მისთვის უნდა გადაეცა სხვადასხვა ნივთები, პოლიციის მიერ მის მიმართ ხორციელდებოდა ოპერატიულ-სამძებრო ღონისძიება - ვიზუალური კონტროლი. ღონისძიების მიმდინარეობისას ბ.ე.-მ მიმალვა სცადა, რა დროსაც პოლიციამ ის დააკავა. დაკავებულის კუთვნილი „ბმვ“-ს მარკის ავტომანქანის ჩხრეკის შედეგად ამოღებულია 2 ხელყუმბარა, ავტომატური ცეცხლსასროლი იარაღისთვის განკუთვნილი ვაზნები, საძილე ტომარა, კვების პროდუქტები და ტანსაცმელი. ცეცხლსასროლი იარაღის, საბრძოლო მასალის, ფეთქებადი ნივთიერების და ასაფეთქებელი მოწყობილობის მართლსაწინააღმდეგო ტარების ფაქტზე გამოძიება სისხლის სამართლის კოდექსის 236-ე მუხლით მიმდინარეობს. დანაშაული 4-დან 7 წლამდე ვადით თავისუფლების აღკვეთას ითვალისწინებს”,- აღნიშნულია ინფორმაციაში.
საგარეო საქმეთა სამინისტრომ ჟენევის საერთაშორისო მოლაპარაკებების 51-ე რაუნდთან დაკავშირებით განცხადება გაავრცელა
2020 წლის 10-11 დეკემბერს, ერთწლიანი წყვეტის შემდეგ, ჟენევის საერთაშორისო მოლაპარაკებების 51-ე რაუნდი გაიმართა, რომლის ფარგლებშიც განხილვის მთავარ თემას კორონავირუსის (COVID-19) პანდემიის პირობებში ადგილზე გამწვავებული უსაფრთხოებისა და ჰუმანიტარული ვითარება, რუსეთის მიერ დე-ფაქტო ანექსიის პროცესის გააქტიურება და უკანონოდ დაკავებული საქართველოს მოქალაქეების დაუყოვნებლივ გათავისუფლების საკითხი წარმოადგენდა. ამასთან დაკავშირებით, საგარეო უწყებამ განცხადება გაავრცელა, რომლის მიხედვითაც საქართველოს დელეგაციამ მწვავედ დასვა რუსეთის ფედერაციასა და ოკუპირებულ აფხაზეთის რეგიონს შორის ერთიანი სოციალურ-ეკონომიკური სივრცის ფორმირების შესახებ ე.წ. პროგრამის დამტკიცება, რომელიც საქართველოს განუყოფელი რეგიონების რუსეთის სივრცეში ეტაპობრივად ინტეგრაციას ემსახურება. „ქართველი მონაწილეები გამოეხმაურნენ მედიაში გავრცელებულ ინფორმაციას 2020 წლის 12 ნოემბერს სოჭში რუსეთის პრეზიდენტსა და სოხუმის საოკუპაციო რეჟიმის ლიდერს შორის გამართულ შეხვედრაზე ე.წ. სამოკავშირეო სახელმწიფოს შექმნის საკითხის განხილვას, რაც ანექსიის ფორმალურად გაფორმებისაკენ მიმართულ დესტრუქციულ ნაბიჯად შეფასდა. საქართველოს დელეგაციამ ხაზი გაუსვა, რომ აღნიშნული წარმოადგენს რუსეთის მორიგ აგრესიულ მცდელობას, დააკანონოს ევროპაში სუვერენული საზღვრების ძალისმიერი გზით ცვლილების პრაქტიკა, რაც უხეშად არღვევს საერთაშორისო სამართლის ფუნდამენტურ ნორმებსა და პრინციპებს და ძირს უთხრის წესებზე დაფუძნებულ საერთაშორისო სისტემას. _ქართველმა მონაწილეებმა ვრცლად ისაუბრეს კორონავირუსის (COVID-19) პანდემიის ფონზე რუსეთის მიერ გახშირებულ პროვოკაციებზე, აფხაზეთისა და ცხინვალის რეგიონების უკანონო მილიტარიზაციასა და რეგულარულ სამხედრო წვრთნებზე, სოფელ ჩორჩანას მიმდებარედ მცოცავი ოკუპაციის გაგრძელებაზე, საოკუპაციო ხაზზე მავთულხლართებისა და ხელოვნური ბარიერების აღმართვაზე, რაც ადგილზე ვითარების დესტაბილიზაციის მცდელობად შეფასდა. აღინიშნა, რომ მსგავსი დესტრუქციული ნაბიჯებით რუსეთის ფედერაცია უხეშად არღვევს 2008 წლის 12 აგვისტოს ცეცხლის შეწყვეტის შეთანხმებას ისევე, როგორც გაეროს გენერალური მდივნის მოწოდებას პანდემიის პირობებში გლობალური მასშტაბით ცეცხლის დაუყოვნებლივ შეწყვეტის თაობაზე. საქართველოს წარმომადგენლებმა აღნიშნეს, რომ პარალელურად რუსეთის ფედერაცია აგრძელებს ჰიბრიდული ომის ინსტრუმენტების გამოყენებას, მათ შორის, კიბერთავდასხმებსა და დეზინფორმაციის აქტიურ კამპანიას საქართველოს სახელმწიფო ინსტიტუტებისა და რიჩარდ ლუგარის სახელობის საზოგადოებრივი ჯანდაცვის ლაბორატორიის წინააღმდეგ. საქართველოს დელეგაციამ დასვა რუსეთის საოკუპაციო ძალების მიერ ადგილობრივი მაცხოვრებლების უკანონო დაკავებებისა და გატაცებების საკითხი და მოითხოვა ირაკლი ბებუას, ზაზა გახელაძის, გენადი ბესტავისა და უკანონო ტყვეობაში მყოფი, საქართველოს სხვა მოქალაქეების დაუყოვნებლივ გათავისუფლება. _თანათავმჯდომარეებმა, თანამოდერატორებმა, აშშ-ისა და საქართველოს წარმომადგენლებმა ვრცლად ისაუბრეს საოკუპაციო ხაზზე თავისუფალი გადაადგილების შეზღუდვის მძიმე ჰუმანიტარულ შედეგებზე, რაც კიდევ უფრო ამწვავებს კონფლიქტის შედეგად დაზარალებული მოსახლეობას ისედაც რთულ სოციალურ ყოფას. ამ კონტექსტში, ყურადღება გამახვილდა ცხინვალის საოკუპაციო რეჟიმის მიერ სამედიცინო ევაკუაციის ეთნიკურ ნიადაგზე შეზღუდვის ფაქტებზე, რამაც ადგილობრივთა გარდაცვალების არაერთი ფატალური შემთხვევა გამოიწვია. მოლაპარაკებების მნიშვნელოვანი ნაწილი დაეთმო ოკუპირებულ ტერიტორიებზე დარჩენილი ქართველების ეთნიკურ დისკრიმინაციას, გალისა და ახალგორის რაიონების, ასევე კოდორის ხეობის მაცხოვრებლების მძიმე ჰუმანიტარულ მდგომარეობას და ხაზგასმით აღინიშნა მათი ფუნდამენტური უფლებებისა და თავისუფლებების დაცვის კრიტიკული საჭიროება. ამ თვალსაზრისით აღინიშნა ასევე ადგილობრივი სამოქალაქო აქტივისტების შევიწროებისა და დისკრიმინაციის შეწყვეტის აუცილებლობა. საქართველოს დელეგაციამ ყურადღება გაამახვილა აფხაზეთისა და ცხინვალის რეგიონების დანარჩენი საქართველოსგან იზოლირების გააქტიურებულ მცდელობებზე და საშიშ ტენდენციად შეაფასა ადგილობრივი მოსახლეობის მიზანმიმართული რუსიფიკაციის პროცესი. ამ კონტექსტში კვლავ აღინიშნა ოკუპირებულ ტერიტორიებზე მცხოვრები ქართველებისათვის მშობლიურ ენაზე განათლების მიღების უზრუნველყოფის აუცილებლობა. ამ ფონზე ხაზი გაესვა საქართველოს აფხაზეთისა და ცხინვალის რეგიონებში ევროკავშირის სადამკვირვებლო მისიის (EUMM) შესვლის, ასევე ადამიანის უფლებათა დაცვის საერთაშორისო ორგანიზაციების წვდომის საჭიროებას. კორონავირუსის (COVID-19) პანდემიის გათვალისწინებით, განსაკუთრებული ყურადღება დაეთმო კონფლიქტით დაზარალებული მოსახლეობისთვის ჰუმანიტარული დახმარების შეუზღუდავად განხორციელების აუცილებლობას, რაც 2008 წლის 12 აგვისტოს ცეცხლის შეწყვეტის შეთანხმების ერთ-ერთი მნიშვნელოვანი კომპონენტია. შექმნილ ვითარებაში ხაზი გაესვა სამშვიდობო მოლაპარაკებების ფორმატების გამართულად ფუნქციონირების მნიშვნელობას. აღინიშნა, რომ ჟენევის საერთაშორისო მოლაპარაკებების ისევე, როგორც ინციდენტების პრევენციისა და მათზე რეაგირების მექანიზმების (IPRMs) წინააღმდეგ მიმართული ნებისმიერი დესტრუქციული ნაბიჯი პირდაპირ აისახება ადგილზე მშვიდობასა და უსაფრთხოებაზე. ამ კონტექსტში აქცენტი გაკეთდა გალის IPRM-ის წინაპირობების გარეშე აღდგენისა და ერგნეთის მექანიზმის შეუფერხებლად მუშაობის აუცილებლობაზე. _საქართველოს დელეგაციამ კვლავ დასვა დავით ბაშარულის, გიგა ოთხოზორიასა და არჩილ ტატუნაშვილის მკვლელობის საქმეებზე მართლმსაჯულების აღსრულებისა და აფხაზეთის რეგიონში უკანონოდ განთავსებულ რუსეთის სამხედრო ბაზაზე ირაკლი კვარაცხელიას გარდაცვალების საკითხი. ვრცელი დისკუსია შედგა დღის წესრიგის ისეთ მთავარ საკითებზე, როგორიცაა ძალის არგამოყენება და უსაფრთხოების საერთაშორისო მექანიზმები. საქართველოს დელეგაციამ აღნიშნა, რომ საქართველოს ტერიტორიაზე უკანონო სამხედრო ყოფნითა და რეგულარული სამხედრო წვრთნებით მოსკოვი აგრძელებს საქართველოს წინააღმდეგ ძალის გამოყენებასა და ძალის გამოყენებით მუქარას, რაც კრიტიკულად აუცილებელს ხდის რუსეთის მიერ ძალის არგამოყენების ვალდებულების დადასტურებასა და შესრულებას. საქართველოს წარმომადგენლების განცხადებით, ცეცხლის შეწყვეტისა და ძალის არგამოყენების გარანტირება ოკუპირებულ ტერიტორიებზე უსაფრთხოების საერთაშორისო მექანიზმების შექმნითა შესაძლებელი, რაც მდგრად საფუძველს შექმნის ადგილზე გრძელვადიანი მშვიდობისა და უსაფრთხოების უზრუნველსაყოფად. ამ კონტექსტში, ქართველმა მონაწილეებმა კიდევ ერთხელ მოითხოვეს საქართველოს ტერიტორიიდან რუსეთის საოკუპაციო ძალების გასვლა და ადგილზე უსაფრთხოების საერთაშორისო მექანიზმების შექმნა, ევროკავშირის შუამავლობით 2008 წლის 12 აგვისტოს დადებული ცეცხლის შეწყვეტის შეთანხმების პირობების დაცვით. ტრადიციულად, დღის წესრიგის ერთ-ერთ მთავარ საკითხს აფხაზეთისა და ცხინვალის რეგიონებიდან ეთნიკური წმენდის შედეგად გამოდევნილი იძულებით გადაადგილებულ პირებისა და ლტოლვილების უსაფრთხო და ღირსეული დაბრუნება წარმოადგენდა. ევროკავშირის, გაეროს, ეუთოს, აშშ-ისა და საქართველოს წარმომადგენლების მხრიდან აღინიშნა დევნილთა დაბრუნების თემის საგნობრივი განხილვის აუცილებლობა. თუმცა რუსეთისა ფედერაციისა და მისი საოკუპაციო რეჟიმების წარმომადგენლებმა კვლავ სცადეს აღნიშნული ჰუმანიტარული თემის პოლიტიზირება და მოლაპარაკებები დატოვეს. ქართველმა მონაწილეებმა მადლობა გადაუხადეს ჟენევის საერთაშორისო მოლაპარაკებების თანათავმჯდომარეს, სამხრეთ კავკასიაში ეუთოს სპეციალურ წარმომადგენელს, რუდოლფ მიხალკას სამშვიდობო მოლაპარაკებების პროცესში გაწეული ძალისხმევისთვის და წარმატება უსურვეს მას მომავალ საქმიანობაში“, - აღნიშნულია განცხადებაში. მისივე მიხედვით, მოლაპარაკებების მორიგი რაუნდი 2021 წლის 23-24 მარტს გაიმართება. ჟენევის საერთაშორისო მოლაპარაკებები შექმნილია 2008 წლის 12 აგვისტოს ცეცხლის შეწყვეტის შესახებ შეთანხმების საფუძველზე. დისკუსიები მიმდინარეობს ორი სამუშაო ჯგუფის ფარგლებში, სადაც მოლაპარაკებების მონაწილეები ინდივიდუალური სტატუსით არიან წარმოდგენილნი. პირველი სამუშაო ჯგუფის ფარგლებში განიხილება საქართველოს ოკუპირებულ ტერიტორიებზე უსაფრთხოებისა და სტაბილურობის საკითხები, ხოლო მეორე სამუშაო ჯგუფში - ოკუპირებული აფხაზეთისა და ცხინვალის რეგიონებში ადამიანის უფლებებისა და ჰუმანიტარული კუთხით არსებული მდგომარება, ასევე იძულებით გადაადგილებულ პირთა და ლტოლვილთა საკუთარ საცხოვრებელ სახლებში უსაფრთხო და ღირსეულ დაბრუნებასთან დაკავშირებული საკითხები. მოლაპარაკებები იმართება ევროკავშირის, გაეროსა და ეუთოს თანათავმჯდომარეობით და საქართველოს, რუსეთის ფედერაციისა და ამერიკის შეერთებული შტატების მონაწილეობით. სამუშაო ჯგუფის შეხვედრებს ესწრებიან აგრეთვე ყოფილი სამხრეთ ოსეთის ავტონომიური ოლქის დროებითი ადმინისტრაციის ხელმძღვანელი და აფხაზეთის ავტონომიური რესპუბლიკის მთავრობის თავმჯდომარე ისევე, როგორც ცხინვალისა და სოხუმის საოკუპაციო რეჟიმების წარმომადგენლები.
რუსეთს არ შეუძლია, ვეტო დაადოს ნატო-ს გაფართოებას - ბაიბა ბრაჟე
რუსეთს არ შეუძლია, ვეტო დაადოს ნატო-ს გაფართოებას, - ამის შესახებ ატლანტიკურ საბჭოში გამართულ დისკუსიაზე ნატო-ს გენერალური მდივნის თანაშემწემ, ბაიბა ბრაჟემ განაცხადა. „რუსეთს არ შეუძლია, ვეტო დაადოს ნატო-ს გაფართოების გადაწყვეტილებას. ისტორიაში ამის მაგალითები ვნახეთ და ეს ფაქტია. ამავე დროს, ნატო-საც არ შეუძლია, დაადოს ვეტო საქართველოს ან უკრაინის გაწევრიანებას. ყველაფერი დიდწილად დამოკიდებულია ნატო-ს პოლიტიკური გადაწყვეტილების მიღების პროცესზე. მანამდე კი, ჩვენ პრაქტიკულ საკითხებზე ვმუშაობთ. გასულ კვირაში გაიმართა ნატო-ს მინისტერიალი, რომელსაც საქართველოს და უკრაინის საგარეო საქმეთა მინისტრები ესწრებოდნენ. ასე რომ, პრაქტიკული სამუშაო გრძელდება, რათა საქართველოსა და უკრაინის სტანდარტები ამაღლდეს, რათა მათ პოლიტიკური და სამხედრო გადაწყვეტილებების პოტენციალის სრულად გამოყენება შეძლონ“, - განაცხადა ნატო-ს გენერალური მდივნის თანაშემწემ.
ქართველი სპორტსმენები გენდერული ძალადობის წინააღმდეგ კამპანიას შეუერთდნენ
საქართველოს განათლების, მეცნიერების, კულტურისა და სპორტის სამინიტროს მხარდაჭერითა და ორგანიზებით, ქართველმა სპორტსმენებმა გენდერული ძალადობის წინააღმდეგ გამართულ ყოველწლიურ, 16-დღიან გლობალურ კამპანიაში (25 ნოემბერი - 10 დეკემბერი) მიიღეს მონაწილეობა და საზოგადოებას პრობლემის გადასაჭრელად მეტი აქტიურობისკენ მოუწოდეს. კამპანიას შეუერთდნენ სპორტის სხვადასხვა სახეობის წარმომადგენლები. ვაზისუბნის სარაგბო ბაზაზე, ამერიკულ ფეხბურთში ეროვნული ჩემპიონატის ფინალის დასრულების შემდეგ, სადაც ერთმანეთს „თბილისის ჯვაროსნები“ და „რუსთავის ფოლადი“ დაუპირისპირდა, სპორტსმენებმა დაგმეს ოჯახში და გენდერული ნიშნით გამოხატული ძალადობა. საკალათბურთო სუპერლიგის მატჩის - „თსუ“ - „ტიტები“ მონაწილეებმა მატჩის შემდგომ ერთობლივი ფოტო გადაიღეს, დაგმეს გენდერული ნიშნით და ოჯახში ძალადობა, ამასთან ძალადობის მსხვერპლებს მოუწოდეს, რომ ძალადობის შემთხვევაში მიმართონ სახელმწიფოს - დარეკონ 112-ზე ან სპეციალურ ცხელ ხაზზე - 116 006. კამპანიაში სხვა მოთამაშეებთან ერთად მონაწილეობა მიიღეს საქართველოს ეროვნული ნაკრების კალათბურთელებმა - ლუკა ზაქრაძემ, საბა ლობჯანიძემ, მაიკლ დიქსონმა და ნაკრების ერთ-ერთმა მწვრთნელმა, მანუჩარ მარკოიშვილმა. კამპანიაში ჩაერთნენ ფეხბურთელებიც და საქართველოს ჩემპიონატის დასკვნით ტურში, „საბურთალოსა“ და „სამტრედიას“ შორის გამართული მატჩის დაწყებამდე ერთობლივად დაგმეს ძალადობა. სიმბოლურია, რომ პირველად საქართველოს ჩემპიონატების ისტორიაში, „კრისტალბეთ ეროვნული ლიგის“ მატჩს ქალთა სამსაჯო ბრიგადა მოემსახურა. 2020 წლის სეზონის ბოლო ტურის მატჩის მთავარი არბიტრი ხათუნა მაისურაძე გახლდათ, მას ასისტენტობა გაუწიეს ქეთევან გაიპარაშვილმა და სოფო რიჟამაძემ, ხოლო მეოთხე მსაჯის ფუნქცია ვიკა სახურიამ შეასრულა. 10 დეკემბერს, ოლიმპიურ სასახლეში დაიწყო ვაჟ ხელბურთელთა საქართველოს ეროვნული ჩემპიონატი, რომლის ყველა მონაწილე ასევე შეურთდა გლობალურ კამპანიას და დაგმო გენდერული ნიშნით ძალადობა. სპეციალურად კამპანიისთვის, საქართველოს ჩერლიდინგის ფედერაციამ ვიდეორგოლი გაავრცელა, სადაც სპორტსმენები და ფედერაციის წარმომადგენლები საზოგადოებას გენდერული ძალადობის წინააღმდეგ ბრძოლაში გაერთიანებისკენ მოუწოდებენ. მსოფლიო მასშტაბის კამპანია გენდერული ძალადობის წინააღმდეგ 1991 წლიდან იმართება და მიზნად ისახავს ძალადობის წინააღმდეგ საზოგადოების ცნობიერების ამაღლებასა და მგრძნობელობის გაზრდას. ასევე, ქალთა მიმართ ძალადობისა და ოჯახში ძალადობის საკითხებზე საზოგადოებრივი ცნობიერების ამაღლებასა და ქალთა უფლებების ირგვლივ სამოქალაქო კონსოლიდაციის გაძლიერებას. სპორტი თავისი სოციალური ბუნებიდან გამომდინარე, გმობს და ეწინააღმდეგება ყოველგვარ ჩაგვრასა და ძალადობას, რასაც ქართველი სპორტსმენები ყოველწლიურად ადასტურებენ კამპანიაში ჩართულობით.
ყველაფერი, რაც კორონავირუსის საწინააღმდეგო ვაქცინების შესახებ უნდა ვიცოდეთ
ბოლო პერიოდის განმავლობაში, პანდემია გარდამტეხ ფაზაში შევიდა - ვირუსის მეორე ტალღის პარალელურად, მსოფლიო მედიცინამ მოკლე დროში შთამბეჭდავი შედეგი აჩვენა და სამი იმედის მომცემი ვაქცინა შექმნა. Moderna-სა და Pfizer/BioNTech-ის ვაქცინებმა 95%-მდე ეფექტიანობა აჩვენეს და შედეგად, კორონავირუსის დამარცხებისკენ მიმავალ გზაზე მნიშვნელოვანი გარღვევა მოახდინეს. მათ კვალდაკვალ მისდევს ოქსფორდის მიერ შექმნილი ვაქცინა, რომლის ეფექტიანობა 70%-ია. როდის დაიწყება ვაქცინაცია დიდი ბრიტანეთი მსოფლიოში პირველი ქვეყანაა, რომელმაც Pfizer/BioNTech-ის შექმნილი ვაქცინის გამოყენება დაიწყო. როდის დაიწყება ვაქცინაცია სხვა ქვეყნებში აშშ-ში ვაქცინაცია უახლოეს 24 საათში დაიწყება - Pfizer/BioNTech-ის ვაქცინა უკვე დაამტკიცეს. წინასწარი შეკვეთების რაოდენობამ უკვე 2.8 მლრდ-ს გადააჭარბა. ევროკავშირს 700 მლნ დოზა ვაქცინის მიღება სურს - 300 მლნ Pfizer-ის და 400 მლნ ოქსფორდის. 700 მლნ ვაქცინა აქვს შეკვეთილი შეერთებულ შტატებსაც, ინდოეთს 500 მლნ, იაპონიას - 290 მლნ. ინდონეზიასა და ბრაზილიას 100-100 მლნ. ევროკავშირში, შეერთებულ შტატებში, იაპონიაში, ბრიტანეთში, კანადასა და ავსტრალიაში შეკვეთილი ვაქცინების რაოდენობა მოსახლეობის რაოდენობას აჭარბებს. სხვა ქვეყნებში ზოგ შემთხვევაში 20%-ს ჩამორჩება. როდის დაიწყება ვაქცინაცია საქართველოში ბოლო ცნობებით ვარაუდობენ, რომ შესაძლოა იანვრის ბოლოს ან თებერვლის დასაწყისში. მანამდე კი, დაავადებათა კონტროლის ცენტრის დირექტორმა ამირან გამყრელიძემ განაცხადა, რომ საქართველოს ისეთი კონტრაქტი აქვს გაფორმებული მომწოდებელთან, რომ შეუძლია ჯანმოს მიერ დამტკიცებული რომელიმე ვაქცინიდან ერთ-ერთი შეარჩიოს. საქართველოს 4 მილიონი ამერიკული დოლარი აქვს გადახდილი ვაქცინის მილიონ 400 ათასი დოზის შესაძენად. „ჩვენ არ ვიცით, ჯერ რომელი იქნება… შემოტანის დრო უნდა იყოს მარტი-აპრილი, ახლა ჩვენ ვმუშაობთ დანერგვის გეგმაზე“, - აღნიშნა ამირან გამყრელიძემ. რა იქნება შემდეგი ნაბიჯი Pfizer-ი და Moderna კვლევებს კვლავ განაგრძობენ, რათა უფრო მეტი მონაცემი შეაგროვონ. ლიცენზიის მინიჭების შემდეგ, დაავადებათა კონტროლისა და პრევენციის ცენტრი რეკომენდაციებს გასცემს იმასთან დაკავშირებით, თუ პირველად ვინ უნდა მიიღოს ვაქცინა. თუ ყველაფერი გეგმის მიხედვით წავა, შესაძლებელია, ვაქცინების განაწილების პროცესი წლის ბოლოს დაიწყოს.
ევროპაში „კოვიდ-19“-ით გარდაცვლილთა რიცხვი გაორმაგდა
ჯანდაცვის მსოფლიო ორგანიზაციის ცნობით, ევროპაში „კოვიდ-19“-ით გარდაცვლილთა რიცხვი გაორმაგდა. როგორც ორგანიზაციაში აცხადებენ, ბოლო ექვს კვირაში ევროპის ქვეყნებში კორონავირუსით გარდაცვლილთა რაოდენობამ თითქმის 100%-ით მოიმატა. როგორც ორგანიზაციის წარმომადგენელი მარია ვან კერკხოვე ამბობს, პარალელურად, ევროპაში ახალი ინფიცირებულების რიცხვი მცირედება. ამასთან ერთად, ჯანდაცვის მსოფლიო ორგანიზაციაში აცხადებენ, რომ ბოლო ერთ კვირაში ვირუსით დაღუპულთა რაოდენობა მთელ მსოფლიოში 60 პროცენტით გაიზარდა.
უკრაინა, რუსეთსა და ოკუპირებულ აფხაზეთს შორის „საერთო სოციალურ-ეკონომიკური სივრცის შეთანხმებას" გმობს
უკრაინის საგარეო საქმეთა სამინისტრო, რუსეთსა და ოკუპირებულ აფხაზეთს შორის „საერთო სოციალურ-ეკონომიკური სივრცის შეთანხმებას" გმობს. როგორც უწყების მიერ გავრცელებულ განცხადებაშია ნათქვამი, კიევი არ აღიარებს ამ „პროგრამის“ მიღებას და და მსგავს ქმედებებს რუსეთის მიერ საქართველოს ოკუპირებული ტერიტორიების ანექსიის მორიგ მცდელობად აფასებს. „რუსეთის ფედერაცია განაგრძობს აგრესიას მეზობელი სახელმწიფოების მიმართ და მათი სუვერენული ტერიტორიების ოკუპაციას, უხეშად არღვევს საერთაშორისო სამართლის პრინციპებსა და ნორმებს, თანმიმდევრულად და მიზანმიმართულად აფერხებს საერთაშორისო და რეგიონალურ უსაფრთხოებას. რუსეთის ფედერაციის ეს ქმედებები უარყოფითად აისახება საქართველოს ოკუპირებულ ტერიტორიებზე არსებულ ჰუმანიტარულ ვითარებაზე, განსაკუთრებით მნიშვნელოვნად უარესდება გაერო-ს გენერალური ასამბლეის 2008-2020 წლებში მიღებული რეზოლუციების შესრულება აფხაზეთიდან იძულებით გადაადგილებულ პირთა და ლტოლვილთა მდგომარეობის შესახებ. უკრაინა თანმიმდევრულად უჭერს მხარს საქართველოს სუვერენიტეტსა და ტერიტორიულ მთლიანობას, როგორც სტრატეგიულ პარტნიორს, მის საერთაშორისოდ აღიარებულ საზღვრებში. რუსეთმა უნდა შეაჩეროს საქართველოს ოკუპირებული ტერიტორიების უკანონო ანექსიის პროცესი და შეასრულოს 2008 წლის 12 აგვისტოს ცეცხლის შეწყვეტის ხელშეკრულებით ნაკისრი ვალდებულებები“, - ნათქვამია უკრაინის საგარეო საქმეთა სამინისტროს განცხადებაში.
3907 ახალი შემთხვევა და 50 გარდაცვლილი - 12 დეკემბრის სტატისტიკა
ბოლო 24 საათში ვირუსით ინფიცირების 3 907 ახალი დადასტურებული შემთხვევა გამოვლინდა. ამის შესახებ უწყებათაშორის საკოორდინაციო საბჭოსთან არსებული ოპერაციული შტაბის უფროსის მოადგილემ, ბერდია სიჭინავამ, მთავრობის ადმინისტრაციაში გამართულ ბრიფინგზე განაცხადა. “ინტენსიური ტესტირების ფარგლებში, ბოლო 24 საათში ქვეყნის მასშტაბით ჩატარდა 18 907 კვლევა ტესტით, მათ შორის 11 064 კვლევა ანტიგენის სწრაფი ტესტით და 7 843 PCR ტესტით. ჩატარებული ტესტირების შედეგად, ბოლო 24 საათში გამოვლინდა ვირუსით ინფიცირების 3 907 ახალი დადასტურებული შემთხვევა, ხოლო ქვეყანაში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 187 006-ს. ბოლო 24 საათში ვირუსისგან გამოჯანმრთელდა 3 780 პირი, ხოლო ჯამში გამოჯანმრთელებულთა რაოდენობა გაიზარდა - 154 241-მდე. სამწუხაროდ, ბოლო 24 საათში გვაქვს კორონავირუსით გარდაცვალების 50 ახალი შემთხვევა. პანდემიის გავრცელებიდან დღემდე ვირუსს ჯამში 1 744 პირი ემსხვერპლა. დღეს ქვეყანაში გამოვლენილი ინფიცირების 3 907 ახალი შემთხვევიდან: თბილისში გამოვლენილია 1 588 შემთხვევა, აჭარა-333, იმერეთი-599, ქვემო ქართლი-263, შიდა ქართლი-263, გურია-114, სამეგრელო - ზემო სვანეთი-299, კახეთი-243, მცხეთა-მთიანეთი-83, სამცხე-ჯავახეთი-94, რაჭა-ლეჩხუმი და ქვემო სვანეთი-28. ამ ეტაპზე ინფიცირების მიმდინარე აქტიური შემთხვევა არის 30 995, საიდანაც, 6 817 ადამიანი მკურნალობს საავადმყოფოში, მათ შორის, თბილისის საავადმყოფოებში-2 925, აჭარაში-910, იმერეთში-1 377. ამ ეტაპზე მძიმე პაციენტია 1 165 პირი, მათ შორის, თბილისში-529, აჭარაში-151, იმერეთში-267. მძიმე პაციენტებიდან ხელოვნური სუნთქვის აპარატზე იმყოფება 442 პირი, მათგან თბილისში-209, აჭარაში-54, იმერეთში-59. 3 227 ადამიანი მოთავსებულია კლინიკურ-სასტუმროებში, მათ შორის 1 111-თბილისში, 1 506-აჭარაში, 307-იმერეთში. 20 951 პირი ვირუსის მკურნალობის კურსს გადის საცხოვრებელ ბინაზე. საკარანტინე სივრცეებში მოთავსებულია 1 012 ადამიანი, მათ შორის, თბილისში-280, აჭარაში-145, ხოლო იმერეთში-28. სულ 6 ოქტომბრიდან - 11 დეკემბრის პერიოდში, სახელმწიფო საზღვრიდან საკარანტინე სივრცეებში გადაყვანილია-20 243 პირი. ამ ეტაპისთვის თვითიზოლაციაში იმყოფება 51 190 ადამიანი, მათ შორის თბილისში-20 098 პირი, აჭარაში-9 912, იმერეთში-5 828, - განაცხადა ბერდია სიჭინავამ.
შსს-მ რეგულაციების დარღვევის 735 ფაქტი გამოავლინა
შინაგან საქმეთა სამინისტროს ინფორმაციით, სამართალდამცველების მიერ განხორციელებული მონიტორინგის შედეგად, ბოლო 24 საათის განმავლობაში მთელი ქვეყნის მასშტაბით, დაწესებული შეზღუდვების ფარგლებში მოქმედი რეგულაციების დარღვევის 735 ფაქტი გამოვლინდა. პოლიციამ ადმინისტრაციულ სამართალდარღვევათა კოდექსის 42(10)-ე მუხლის შესაბამისად 93 ფიზიკური პირი დააჯარიმა. დაჯარიმებულთა შორის არიან მოქალაქეები, რომლებმაც 21 საათიდან დილის 5 საათამდე დაწესებული გადაადგილების შეზღუდვის წესი დაარღვიეს. გარდა ამისა, 24 საათის განმავლობაში პირბადის ტარების წესის დარღვევის ფაქტზე, ადმინისტრაციულ სამართალდარღვევათა კოდექსის 42(11)-ე მუხლის შესაბამისად 642 ფიზიკური პირი დაჯარიმდა. „შინაგან საქმეთა სამინისტრო კვლავ მოუწოდებს მოქალაქეებს, დაიცვან დაწესებული შეზღუდვები, წინააღმდეგ შემთხვევაში, გამოყენებული იქნება კანონით გათვალისწინებული, შესაბამისი ზომები. საქართველოს ტერიტორიაზე მყოფი ყველა პირი ვალდებულია, დაემორჩილოს საზოგადოებრივი ჯანმრთელობის სფეროში მოქმედ საქართველოს კანონმდებლობის მოთხოვნებს. შინაგან საქმეთა სამინისტრო მოუწოდებს მოქალაქეებს, გამოიჩინონ მაღალი საზოგადოებრივი პასუხისმგებლობა და დაემორჩილონ არსებულ რეგულაციებს. პირბადის ტარების წესის დარღვევა იწვევს ადმინისტრაციულ პასუხისმგებლობას და ასკ-ის 42(11) -ე მუხლის შესაბამისად ჯარიმას 20 ლარის ოდენობით. იზოლაციისა და კარანტინის წესის დარღვევა იწვევს ადმინისტრაციულ პასუხისმგებლობას და ასკ–ის 42(10)-ე მუხლის შესაბამისად ფიზიკური პირის დაჯარიმებას 2 000 ლარით, ხოლო იურიდიული პირის – 10 000 ლარის ოდენობით. განმეორებითი ჯარიმა კი სისხლისსამართლებრივ პასუხისმგებლობას ითვალისწინებს“, - ნათქვამია ინფორმაციაში.
საქართველოში კოვიდინფიცირებულთა გარდაცვალების ყველაზე მაღალი მაჩვენებელი დაფიქსირდა
დაავადებათა კონტროლის ეროვნული ცენტრის მონაცემებით, დღეს საქართველოში Covid-19-ით გარდაცვალების 50 შემთხვევა, ყველაზე მაღალი მაჩვენებელი დაფიქსირდა. დღევანდელი მონაცემებით, ახალი კორონავირუსით გარდაცვლილთა რაოდენობამ ჯამში 1744 მიაღწია. ვებ გვერდ stopcov.ge-ზე გამოქვეყნებული სტატისტიკის თანახმად, ბოლო 24 საათში 3780 პაციენტი გამოჯანმრთელდა . გამოჯანმრთელებულთა საერთო რაოდენობაა 154 241 . სტაციონარში მეთვალყურეობის ქვეშ 6817 პაციენტი იმყოფება, კარანტინის რეჟიმში - 1012, კლინიკურ სასტუმროში მყოფი პირები - 3227. დადასტურებულმა ახალმა შემთხვევებმა დღეს 3907-ს მიაღწია. აქედან 6 817 ადამიანი მკურნალობს საავადმყოფოში ბოლო თვეების განმავლობაში, საქართველოში Covid 19-ით- 187 006 ადამიანი დაინფიცირდა.
რუსეთმა, ჟენევაში, ძალის გამოუყენებლობის თემა გაააქტიურა
ჟენევის დისკუსიებზე, მხარეებმა, ძალის გამოუყენებლობის შესახებ შეთანხმებაზე არსებითი მუშაობის განახლების მნიშვნელობას გაუსვეს ხაზი. ამის შესახებ ინფორმაციას რუსეთის საგარეო საქმეთა სამინისტროს ავრცელებს. მათი ინფორმაციით, ამ შეთანხმებას უდიდესი მნიშვნელობა აქვს სამხრეთ კავკასიაში სტაბილურობისა და უსაფრთხოების განმტკიცებისთვის იმ ფონზე, აშშ-სა და ნატოს სამხედრო აქტივობა რეგიონში იზრდება. “პრაქტიკული თვალსაზრისით, რუსულმა, აფხაზურმა და სამხრეთ ოსურმა მხარეებმა ხაზი გაუსვეს საქართველოსა და მის მეზობლებს, აფხაზეთსა და სამხრეთ ოსეთს შორის ძალის გამოუყენებლობის შესახებ შეთანხმებაზე არსებითი მუშაობის განახლების მნიშვნელობას. ამ დოკუმენტს უდიდესი მნიშვნელობა აქვს სამხრეთ კავკასიაში სტაბილურობისა და უსაფრთხოების განმტკიცებისთვის. მისი აქტუალობა განსაკუთრებით იზრდება აშშ-სა და ნატოს სამხედრო აქტივობის ზრდის გათვალისწინებით საქართველოსა და რეგიონში. სამწუხაროდ, საქართველოს დელეგაციამ კვლავ ვერ გამოავლინა კონსტრუქციული მიდგომა ამ საკითხის განხილვაში", - ნათქვამია განცხადებაში. რუსეთის საგარეო საქმეთა სამინისტროს ინფორმაციით, დისკუსიების მონაწილეებმა აღნიშნეს, რომ საოკუპაციო ხაზზე არსებული ვითარება, ზოგადად, მშვიდია. „რუსეთმა მოუწოდა ყველა დაინტერესებულ მხარეს, გამოიჩინონ თავშეკავება, მოძებნონ საერთო ენა დიალოგის გზით არსებულ მოლაპარაკებათა ფორმატში, მათ შორის ერგნეთსა და გალში „ინციდენტების პრევენციისა და მათზე რეაგირების მექანიზმების“ ფარგლებში,”- აღნიშნულია რუსეთის საგარეო უწყების მიერ გავრცელებულ ინფორმაციაში. შეგახსენებთ, ჟენევის საერთაშორისო დისკუსიების 51-ე რაუნდი 10-11 დეკემბერს გაიმართა.
აშშ-ის უზენაესმა სასამართლომ დონალდ ტრამპის სარჩელი არ მიიღო
უპრეცედენტო სარჩელი, რომელსაც 18 შტატის გენერალური პროკურორი და 106 რესპუბლიკელი კონგრესმენი უჭერდა მხარს, ტრამპის იურისტებმა ტეხასის შტატში შეიტანეს, თუმცა სასამართლომ ის არ მიიღო. სარჩელში ტრამპი და მისი მხარდამჭერები აშშ-ის საპრეზიდენტო არჩევნების შედეგების გაუქმებას ოთხ შტატში, პენსილვანიაში, ჯორჯიაში, მიჩიგანსა და უისკონსინში ითხოვდნენ. ოთხივე შტატში გამარჯვება ჯო ბაიდენმა მოიპოვა. მომჩივანი მხარე ამტკიცებდა, რომ აღნიშნულ შტატებში საარჩევნო პროცედურები კენჭისყრამდე განზრახ შეცვალეს, რათა დემოკრატ კანდიდატს უპირატესობა მიეღო და შესაბამისად, ამ შტატებში შედეგები უნდა გაუქმდეს. აშშ-ის უზენაეს სასამართლოში განაცხადეს, რომ ტეხასს აღნიშნული საქმის განსახილველად უფლებამოსილება არ გააჩნია. დონალდ ტრამპს აშშ-ის საპრეზიდენტო არჩევნების შედეგები ამ დრომდე არ უღიარებია. აშშ-ის მოქმედი პრეზიდენტი ამტკიცებს, რომ არჩევნები გაყალბდა. აშშ-ის საარჩევნო კოლეგია 14 დეკემბერს შეიკრიბება. სხდომაზე ჯო ბაიდენს გამარჯვებულად ფორმალურად დაამტკიცებენ. აშშ-ის 46-ე პრეზიდენტის ინაუგურაცია 20-21 იანვარს გაიმართება.
ეუთო, ჟენევის საერთაშორისო დისკუსიების 51-ე რაუნდს განცხადებით ეხმაურება
ეუთო, ჟენევის საერთაშორისო დისკუსიების 51-ე რაუნდს განცხადებით ეხმაურება. განცხადება, ეუთო-ს ვებგვერდზეა გამოქვეყნებული. ინფორმაციის თანახმად, რამდენიმე მონაწილის მიერ შეხვედრის დატოვების გამო, მონაწილეებმა, იძულებით გადაადგილებულ პირთა საკითხის განხილვა, ვერ შეძლეს. „კოვიდ19-ის პანდემიის მიერ შექმნილი უპრეცედენტო გამოწვევების ფონზე, ეს იყო ჟენევის საერთაშორისო მოლაპარაკებების პირველი და ერთადერთი რაუნდი, რომელიც 2020 წელს ჩატარდა. ჟენევის საერთაშორისო დისკუსიების 51-ე რაუნდის მონაწილეებმა განიხილეს ჩორჩანა-წნელისში არსებული ვითარება, ბოლო დროს მომხდარი დაკავებები, დაკარგული ადამიანების საკითხი და კონფლიქტით დაზარალებული მოსახლეობისთვის საარსებო საშუალებების ხელმისაწვდომობის უზრუნველყოფის მნიშვნელობა. განსაკუთრებული ყურადღება დაეთმო ერთი მხრივ ძალის გამოუყენებლობის დღის წესრიგის მთავარ საკითხს, ხოლო მეორე მხრივ, კოვიდ-19-ის გავლენას ადგილზე ჰუმანიტარულ ვითარებაზე. დადებითად აღინიშნა ამ გამოწვევების ერთობლივი მოგვარების მცდელობები. მონაწილეებმა ვერ შეძლეს დევნილთა და ლტოლვილთა საკითხებთან დაკავშირებულ საკითხებზე მსჯელობა, ზოგიერთი მონაწილის მიერ შეხვედრის დატოვების გამო", - აღნიშნულია ინფორმაციაში. ადგილზე უსაფრთხოების მდგომარეობა შეფასდა, როგორც შედარებით მშვიდი და სტაბილური. „ერგნეთში ინციდენტების პრევენციისა და მათზე რეაგირების მექანიზმის (IPRM) აღდგენა წელს გამართული ორი შეხვედრით დადებითად შეფასდა. თანათავმჯდომარეებმა ხაზი გაუსვეს გალის ინციდენტების პრევენციისა და მათზე რეაგირების მექანიზმის (IPRM) რეგულარული შეხვედრების განახლების აუცილებლობას. თანათავმჯდომარეებმა კიდევ ერთხელ მოუწოდეს მონაწილეებს გაზარდონ ძალისხმევა ნდობის ასამაღლებლად და უზრუნველყონ კონსტრუქციული თანამშრომლობა საერთაშორისო ჰუმანიტარულ და უფლებადამცველ ორგანიზაციებთან“, - ნათქვამია ინფორმაციაში. ჟენევის დისკუსიების მონაწილეები შეთანხმდნენ, რომ შემდეგი შეხვედრა ჟენევაში 2021 წლის 23-24 მარტს ჩატარდება.
რუსთავში Сovid 19-ით 60 წელს გადაცილებული დები გარდაიცვალნენ
რამდენიმე კვირიანი მკურნალობის შემდეგ, რუსთავის ცენტრალური საავადმყოფოში 60 წელს გადაცილებული დები კორონავირუსით გარდაიცვალნენ. ექიმების განმარტებით, დებს განსაკუთრებული მძიმე თანმხლები დაავადებები არ აღენიშნებოდათ, თუმცა ვირუსმა სუნთქვის მწვავე უკმარისობა გამოიწვია. რამდენიმე კვირიანი მკურნალობის მიუხედავად, პაციენტების ჯანმრთელობის მდგომარეობა დამძიმდა და დების გადარჩენა შეუძლებელი გახდა. "ინფო რუსთავის" ინფორმაციით,რუსთავის თეატრის ტექნიკური რეჟისორი 63 წლის ნაილი და მისი და ნანა იაშაგაშვილი ნოემბრის თვეში დაინფიცირდნენ. სამედიცინო დაწესებულებაში სუნთქვის მწვავე უკმარისობით ერთსადაიმავე დღეს გადაიყვანეს. ეპიდემიოლოგ მაია რაზმაძის ცნობით, იაშაგაშვილები კოვიდ19-ით ერთმანეთისგან დაინფიცირდნენ. დღემდე რუსთავის საავადმყოფოშია მოთავსებულია ერთ-ერთი დის მეუღლე. "ინფო რუსთავის" ინფორმაციით, ამ დრომდე კლინიკაში მკურნალობს ერთ-ერთი დის მეუღლე.
აშშ-ში ვაქცინაცია უახლოეს 24 საათში დაიწყება _ Pfizer-ის ვაქცინა უკვე დაამტკიცეს
აშშ-ის სურსათისა და წამლების სააგენტომ Pfizer-ის ვაქცინა დაამტკიცა. მოქმედმა პრეზიდენტმა დონალდ ტრამპმა უკვე განაცხადა, რომ ვაქცინაცია უახლოეს 24 საათში დაიწყება. Twitter-ზე გავრცელებულ ვიდეომიმართვაში მან Pfizer/BioNTech-ის ვაქცინა ისტორიაში ერთ-ერთ ყველაზე მნიშვნელოვან მიღწევად დაასახელა. „ნამდვილად კარგი სიახლე მაქვს: დღეს ჩვენმა ქვეყანამ სამედიცინო სასწაული ჩაიდინა. 9 თვეში ჩვენ უსაფრთხო ვაქცინის შექმნა შევძელით“, - განაცხადა დონალდ ტრამპმა. შეერთებულ შტატებში კოვიდინფიცირების 16,295,458 შემთხვევაა დაფიქსირებული. გარდაიცვალა 302 750. გამოჯანმრთელდა 9,507,419.
ნაიჯელ ოუენსმა საერთაშორისო კარიერა დაასრულა
ცნობილმა უელსელმა არბიტრმა, ნაიჯელ ოუენსმა საერთაშორისო კარიერა დაასრულა და სანაკრებო შეხვედრებზე აღარ იმუშავებს. აღნიშნული ინფორმაცია თავად ოუენსმა, „ტვიტერზე“ გაავრცელა. ოუენსმა გასულ თვეში, მე-100 საერთაშორისო შეხვედრაზე, „შემოდგომის ერთა თასზე“, საფრანგეთისა და იტალიის მატჩზე იმსაჯა. აღნიშნული თამაში უელსელი რეფერის საერთაშორისო კარიერაში ბოლო იქნება. ოუენსი 2015 წლის მსოფლიო თასის ფინალური მატჩის მთავარი არბიტრი იყო და როგორც აცხადებს, კვლავ იმუშავებს „პრო 14“-ისა (PRO14) და უელსის შიდა ჩემპიონატის მატჩებზე. 49 წლის არბიტრის საერთაშორისო დებიუტი 2003 წელს, „ბორჯღალოსნების“ თამაშზე შედგა, როცა საქართველოს ნაკრები პორტუგალიას დაუპირისპირდა. With a heavy heart, the time has come to hang up the whistle and boots at international level. I owe more to rugby than rugby will ever owe to me. Thank you for all the support over the many years. 🏉🏴☺️Diolch o galon a hwyl fawr. https://t.co/230HqhLswL — Nigel Owens MBE (@Nigelrefowens) December 11, 2020
ოპოზიციური პარტიების ნაწილმა ცესკოს საარჩევნო სიების ჩახსნაზე მიმართა
ხუთმა ოპოზიციურმა პარტიამ საარჩევნო სიების ჩახსნასთან დაკავშირებით ცენტრალურ საარჩევნო კომისიას მიმართა. "სიის ჩახსნასთან დაკავშირებით განცხადება ცესკოში ჩავაბარეთ. სტრატეგია აღმაშენებელმა 4 მანდატზე თქვა უარი, მაგრამ სია მთლიანად ჩაიხსნა. დღეს შეიძლება ყოფილიყო სხვა დღე საქართველოში, დღეს შეიძლება ყოფილიყო მრავალპარტიული პარლამენტი, ყოფილიყო კოალიციური მთავრობის ფორმირება. ამის ნაცვლად მივიიღეთ ერთპარტიული პარლამენტი", - განაცხადა „სტრატეგია აღმაშენებლის“ ლდიერმა სერგო ჩიხლაძემ. განცხადებას ხელს შემდეგი პარტიები აწერენ: ერთიანი ნაციონალური მოძრაობა - გაერთიანებული ოპოზიცია, სტრატეგია აღმაშენებელი, ევროპული საქართველო, ლელო, ლეიბორისტული პარტია. ცსკ-ს განცხადებების განსახილველად 3-დღიანი ვადა აქვს.
ლიეტუვა შეეცდება, საქართველომ ევროკავშირის წევრობის კანდიდატის სტატუსი მიიღოს - სეიმი
ლიეტუვის სეიმმა საგარეო და ევროპული პოლიტიკის გრძელვადიანი ორიენტირების შესახებ რეზოლუცია მიიღო, რომლის პოლიტიკის პრიორიტეტები საქართველოს ევროინტეგრაციის მხარდაჭერასაც ითვალსწინებს. ლიეტუვის სეიმის მიერ გამოქვეყნებულ განცხადებაში ნათქვამია, რომ ევროკავშირის საბჭოში 2025 და 2027 წელს პოლონეთისა და ლიეტუვის თავჯდომარეობის პერიოდში ლიეტუვის პარლამენტი შეეცდება, რომ ევროკავშირის ასოცირებულმა პარტნიორებმა - მოლდოვამ, საქართველომ და უკრაინამ მიიღონ ევროკავშირის წევრობის კანდიდატის სტატუსი და დაიწყოს მათთან ევროკავშირის გაწევრიანების მოლაპარაკებები. დღესვე, ქვეყნის ახალმა მთავრობამ, ინგრიდა შიმონიტეს მეთაურობით, ფიცი დადო და აღმოსავლეთ პარტნიორობის პროგრამა დაამტკიცა, რომელიც საქართველოს მარდაჭერასაც ითვალისწინებს. „ჩვენ გავაგრძელებთ ნატო-ს ღია კარის პოლიტიკის, ნატო-სა და ევროკავშირის წევრობისკენ უკრაინისა და საქართველოს მისწრაფების, ასევე აღმოსავლეთ პარტნიორობის ქვეყნებში დემოკრატიული პროცესების აქტიურ მხარდაჭერას. ჩვენ აქტიურ როლს შევასრულებთ ევროკავშირისა და ნატო-ს აღმოსავლეთ სამეზობლოში, გვექნება ძლიერი ორმხრივი თანამშრომლობა თავდაცვის სფეროში, რა დროსაც დავეხმარებით უკრაინას, საქართველოს და მოლდოვას შეიარაღებული ძალების ტრანსფორმირებაში, ასევე ჰიბრიდული და კიბერსაფრთხეების წინაშე მათი მდგრადობის გაძლიერებაში“, – ნათქვამია ლიეტუვის ახალი მთავრობის პროგრამაში, რომელიც სეიმის ოფიციალურ ვებგვერდზეა გამოქვეყნებული. ლიეტუვის ახალი მთავრობა მიიჩნევს, რომ ჩრდილოეთ ევროპის ქვეყნები აღმოსავლეთ პარტნიორობის პროგრამაში უფრო აქტიურად უნდა ჩაერთონ. „ჩვენ უნდა შევქმნათ თანამოაზრე დემოკრატიული ქვეყნების უფრო ფართო კოალიციები, ტრანსატლანტიკური და საერთაშორისო კავშირები, რათა დავეხმაროთ ბელარუსებს თავისუფლებასა და დემოკრატიისთვის ბრძოლაში, ასევე, გავაძლიეროთ მოლდოვის, საქართველოსა და უკრაინის ევროკავშირში წევრობის პერსპექტივები 2027 წელს ევროკავშირის საბჭოში თავმჯდომარეობამდე“, - ნათქვამია დოკუმენტში. ლიეტუვის ახალი მთავრობა მხარს უჭერს რუსეთის რეჟიმის წინააღმდეგ მიზნობრივ და ეკონომიკურ სანქციებს. „ჩვენ არა მხოლოდ დავუჭერთ მხარს მოლდოვის, საქართველოს, უკრაინისა და სხვა ქვეყნების ევროკავშირისა და ნატო-სკენ სწრაფვას, არამედ ასევე გრძელვადიანი პერსპექტივაში დავეხმარებით მათ, დაიბრუნონ რუსეთის მიერ ოკუპირებული და ანექსირებული ტერიტორიები“, - წერია ლიეტუვის მთავრობის პროგრამაში, რომელიც სეიმმა დღეს დაამტკიცა.
ქართველი მეზღვაურები დასაქმებას ესტონეთშიც შეძლებენ
საზღვაო ტრანსპორტის სააგენტოს ინფორმაციით, ესტონეთმა ქართული სერტიფიკატები აღიარა და ხელი მოეწერა საქართველოსა და ესტონეთს შორის ურთიერთაღიარების მემორანდუმს. სააგენტოს ცნობით, დიდი ბრიტანეთის და ავსტრალიის შემდეგ 2020 წელს მესამე წევრი ქვეყნის დასაქმების ბაზარი გაეხსნა ქართველ მეზღვაურებს. „ქართულ სერტიფიკატებს მსოფლიოს 54 ქვეყანა და მათ შორის უკვე ევროკავშირის წევრი 20 სახელმწიფო აღიარებს. ამ დროშების ქვეშ მსოფლიო ფლოტის 80 პროცენტზე მეტი დაცურავს“, - აცხადებენ საზღვაო ტრანსპორტის სააგენტოში.
