რუსეთის საგარეო საქმეთა სამინისტრომ აშშ-ის 61 მოქალაქესთან მიმართებით პერსონალური სანქციები გამოაცხადა. სანქცირებული პირები მსხვილი კომპანიების ყოფილი და მოქმედი ტოპ მენეჯერები და მაღალჩინოსნები არიან.
- რუსეთის წინააღმდეგ ევროკავშირის სანქციების მეექვსე პაკეტი დამტკიცებულია
- რას შეიძლება, მოიცავდეს რუსეთის წინააღმდეგ ევროკავშირის სანქციების მეშვიდე პაკეტი
„ეს რუსი პოლიტიკური და საზოგადო მოღვაწეების, ასევე შიდა ბიზნესის წარმომადგენლების წინააღმდეგ აშშ-ის მუდმივად მზარდი სანქციების საპასუხოდ გაკეთდა", - წერს რუსული მედია.
სანქციები ეხება აშშ-ის ფინანსთა მინისტრ ჯანეტ იელენს, ენერგეტიკის მინისტრს ჯენიფერ გრენჰოლმს, თეთრი სახლის კომუნიკაციების დირექტორს კეიტ ბედინგფილდს და Netflix-ის ერთ-ერთ ლიდერს რიდ ჰასტინგსს.
სიაში ასევე მოხვდნენ OneWeb-ის, Delta Airlines-ის, Universal Pictures-ის, CBS-ის, Moody's, Nasdaq-ის ტოპ მენეჯერები. სანქციებში მოხვედრილ პირებს ეკრძალებათ რუსეთში შესვლა.
ცნობისთვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. რუსეთი ბომბავს საბავშვო ბაღებს, სკოლებს, საცხოვრებელ კორპუსებს, საავადმყოფოებს, სამშობიაროებს და სხვა სამოქალაქო დანიშნულების შენობა-ნაგებობებსა და ინფრასტრუქტურას. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა.
14 აპრილს უკრაინის უმაღლესმა რადამ რუსეთის შეიარაღებული ძალების მოქმედებები უკრაინელი ხალხის წინააღმდეგ გენოციდად აღიარა. 19 აპრილს, რუსეთმა აღმოსავლეთ უკრაინაში აქტიური იერიში დაიწყო. 21 აპრილს, ლატვიისა და ესტონეთის პარლამენტებმა უკრაინაში რუსეთის ქმედებები გენოციდად აღიარეს. 28 აპრილს, უკრაინაში რუსეთის ქმედებები გენოციდად ასევე აღიარა კანადის პარლამენტმა. 11 მაისს, უკრაინაში რუსეთის ქმედებები გენოციდად ჩეხეთის სენატმაც აღიარა. 6 მაისს, ირლანდიის სენატმა რუსეთის ქმედებები უკრაინაში გენოციდად მიიჩნია.
რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა. დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს.
ომის დანაშაულში ბრალდებული პირველ რუსი ჯარისკაცს უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა.
