დიდი ბრიტანეთის დაზვერვის კიბერუსაფრთხოების სააგენტოს დირექტორი ჯერემი ფლემინგი თვლის, რომ ამ ექვსი თვის განმავლობაში, ფართომასშტაბიანი ომის მიუხედავად, რუსეთმა ვერ მოიპოვა უპირატესობა უკრაინაზე კიბერსივრცეში და საინფორმაციო ომს აგებს.
ფლემინგი აღნიშნავს, რომ „თავდაპირველად რუსეთმაც და უკრაინამაც კარგად იცოდნენ, რომ ომის ერთ-ერთი მნიშვნელოვანი განზომილება, გარდა თავად ბრძოლის ველისა, არის ინფორმაციული ბრძოლა გავლენისთვის და საკუთარი ნარატივები. რამდენადაც ეს ბარბაროსული და დესტრუქციული ომია, ის ასევე ძალიან თანამედროვე და ციფრული კიბერომია“.
მისი თქმით, რუსეთის მხრიდან ციფრულ და საინფორმაციო სივრცეში თავდასხმების თავდაპირველი გეგმები, თავიდანვე წარუმატებელი იყო.
„მათ მიერ გამოყენებული თავდასხმის კიბერსაშუალებები იყო უპასუხისმგებლო და განურჩეველი. საინფორმაციო ოპერაციები იყო მოუხერხებელი და შეფერხებული. ხდებოდა სადაზვერვო ინფორმაციის გამოქვეყნება. ამასთან, რუსი სამხედროების მცდელობა, რომ გაენადგურებინათ უკრაინის ციფრული ინფრასტრუქტურა, წააწყდა სტაბილურ, პროფესიონალურ და უკრაინელი სპეციალისტების ეფექტიან წინააღმდეგობას“, - აღნიშნავს ფლემინგი.
ის დადებითად აფასებს უკრაინის კიბერ წინააღმდეგობას და წერს, რომ ეს შეიძლება, „ისტორიაში ყველაზე ეფექტიანი თავდაცვითი კიბერაქტივობა იყოს".
ცნობისათვის, 2022 წლის 24 თებერვალს რუსეთის პრეზიდენტმა ვლადიმერ პუტინმა უკრაინაში სრულმასშტაბიანი ომი დაიწყო. 12 აპრილს, აშშ-ის პრეზიდენტმა ჯო ბაიდენმა რუსეთის პრეზიდენტი ვლადიმერ პუტინი გენოციდში დაადანაშაულა.
14 აპრილს უკრაინის უმაღლესმა რადამ რუსეთის შეიარაღებული ძალების მოქმედებები უკრაინელი ხალხის წინააღმდეგ გენოციდად აღიარა. 19 აპრილს, რუსეთმა აღმოსავლეთ უკრაინაში აქტიური იერიში დაიწყო. 21 აპრილს, ლატვიისა და ესტონეთის პარლამენტებმა უკრაინაში რუსეთის ქმედებები გენოციდად აღიარეს. 28 აპრილს, უკრაინაში რუსეთის ქმედებები გენოციდად ასევე აღიარა კანადის პარლამენტმა. 11 მაისს, უკრაინაში რუსეთის ქმედებები გენოციდად ჩეხეთის სენატმაც აღიარა. 6 მაისს, ირლანდიის სენატმა რუსეთის ქმედებები უკრაინაში გენოციდად მიიჩნია.
რუსეთის ძალებმა 2022 წლის 4-დან 31 მარტამდე უკრაინის დედაქალაქ კიევიდან ჩრდილო-დასავლეთით 30 კილომეტრში მდებარე ქალაქ ბუჩის ოკუპაციის დროს ომის აშკარა დანაშაულები ჩაიდინეს, ნათქვამია Human Rights Watch-ის 21 აპრილს გამოქვეყნებულ დეტალურ ანგარიშში. ორგანიზაციამ ომის დანაშაულის და კაცობრიობის წინააღმდეგ პოტენციური დანაშულის მტკიცებულებები შეაგროვა.
ომის დანაშაულში ბრალდებული პირველ რუსი ჯარისკაცს უკრაინის სასამართლომ სამუდამო პატიმრობა მიუსაჯა. 31 მაისს, კიდევ ორ რუს ჯარისკაცს უკრაინის სასამართლომ ომის დანაშაულისთვის 11 წლით თავისუფლების აღკვეთა მიუსაჯა.
„რუსეთის საჰაერო თავდასხმა უკრაინის ქალაქ მარიუპოლის თეატრზე, სადაც ასობით მშვიდობიანი მოქალაქე აფარებდა თავს, ომის აშკარა დანაშაულია", - განაცხადა უფლებადამცველმა ორგანიზაცია Amnesty International-მა 30 ივნისს, როდესაც მრავალი გადარჩენილი ადამიანი გამოკითხა და ვრცელი ციფრული მტკიცებულება შეაგროვა. 23 ივლისს, Human Rights Watch-მა რუსეთის მიერ ოკუპირებულ სამხრეთ უკრაინის ტერიტორიაზე ადამიანების გატაცებისა და წამების შესახებ ანგარიში გამოაქვეყნა.
დასავლეთი რუსეთს მძიმე სანქციებს უწესებს და უკრაინას სამხედრო და ეკონომიკურ დახმარებას უწევს.
