ძებნის რეზულტატი:
შეზღუდვები, რომელიც იტალიაში 6 ნოემბრიდან ამოქმედდა
იტალიის მთავრობამ კორონავირუსის შემაკავებელი ღონისძიებების, ახალი განკარგულება გამოსცა. ახალი ნორმები 5 ნოემბრიდან 3 დეკემბრამდე მოქმედებს, ზომები კი რისკის ზონების მიხედვით განსხვავდება. კერძოდ, სტანდარტული შეზღუდვები ეროვნულ დონეზე (მწვანე ზონა) ასეთია: საღამოს საათებში გადაადგილების შეზღუდვა - 22.00სთ-დან 5:00 საათამდე დასაშვებია გადაადგილება სამსახურეობრივი, გადაუდებელი აუცილებლობის ან ჯანმრთელობის მიზეზების გამო. - მკაცრად რეკომენდირებულია ყველა ფიზიკური პირისათვის, მთელი დღის განმავლობაში, არ იმოგზაუროს საზოგადოებრივი ან კერძო სატრანსპორტო საშუალებებით, გარდა სამუშაოს, სწავლის, ჯანმრთელობის მიზეზებისა. - სავალდებულო იქნება ავტო სერთიფიკატი საღამოს 10 საათის შემდეგ ეროვნული კომენდანტის საათის ფარგლებში. - ავტო სერთიფიკატის მოდული შეგიძლიათ ჩამოტვირთოთ აქ👇 https://www.interno.gov.it/.../modello_autodichiarazione ბარები და რესტორნები - კვების ობიექტების საქმიანობა (ბარების, კაფეების, რესტორნების, სანაყინეების, საკონდიტრო მაღაზიების ჩათვლით) დასაშვებია 5:00სთ-დან 18:00 საათამდე. - 18:00 საათის შემდეგ აკრძალულია საკვებისა და სასმელის მოხმარება საზოგადოებრივ ადგილებში; - ნებადართულია სახლში გამოძახების სერვისი საღამოს 10 საათამდე. დისტანციური სწავლების ზრდა - უფროსკლასელებისთვის (scuole secondarie di secondo grado)100% ონლაინ სწავლება. - დიდაქტიკური და საგანმანათლებლო საქმიანობა დაწყებითი კლასებისათვის გაგრძელდება სკოლაში, პირბადეების სავალდებულო გამოყენებით, ექვს წლამდე ასაკის ბავშვების გარდა. ნიღბის ტარება ბავშვებისათვის სავალდებულო იქნება მერხებთან ჯდომის დროსაც. Smart working მკაცრად რეკომენდებულია Smart working-ი, როგორც სახელმწიფო სტრუქტურებში, ასევე კერძო სექტორში. ადგილობრივი საზოგადოებრივი ტრანსპორტის ღონისძიებების გაძლიერება - ადგილობრივი ტრანსპორტისა და რეგიონალური სარკინიგზო ტრანსპორტისთვის დასაშვებია ტევადობა არაუმეტეს 50 პროცენტისა. სავაჭრო ცენტრები დაიხურება შაბათსა და კვირას - სავაჭრო ცენტრები დაიხურება დღესასწაულებსა და წინასადღესასწაულო დღეებში, გარდა სავაჭრო ცენტრებში არსებული აუცილებელი მაღაზიებისა, როგორიცაა აფთიაქები, სასურსათო მაღაზიები თამბაქოს და გაზეთების ჯიხურები. მუზეუმების დახურვა - მუზეუმებისა და სხვა კულტურული ინსტიტუტებისა და ასოციაციების გამოფენები შეჩერებულია. ზომები მაღალი რისკის დონის რეგიონებისათვის (ე.წ. ნარინჯისფერი ზონები) მოძრაობის ლიმიტი - აკრძალულია ნებისმიერი გადაადგილება მაღალი რისკის დონის მქონე ადგილებში (მუნიციპალიტეტებს შორისაც), გარდა სამსახურეობრივი, გადაუდებელი აუცილებლობის ან ჯანმრთელობის მიზეზების გამო. ბარები და რესტორანები - შეჩერებულია კვების ობიექტების საქმიანობა. - დასაშვებია მხოლოდ სახლში მიტანის სერვისი22.00 საათამდე. - სურსათისა და სასმელის მაღაზიები რჩება ღია ბენზინგასამართ სადგურებზე, ავტობანზებზე საავადმყოფოებსა და აეროპორტებში. საპარიკმახეროები და სილამაზის ცენტრები ღია რჩება. ზომები უმაღალესი რისკის დონის რეგიონებისათვის (ე.წ. წითელი ზონები) მოძრაობის ლიმიტი - აკრძალულია ნებისმიერი გადაადგილება მაღალი რისკის დონის მქონე ადგილებში (მუნიციპალიტეტებს შორისაც), გარდა სამსახურეობრივი, გადაუდებელი აუცილებლობის ან ჯანმრთელობის მიზეზების გამო. - ნებადართულია დაბრუნება თქვენს საცხოვრებელ მისამართზე. საცალო სავაჭრო საქმიანობისა და ბაზრების შეჩერება - შეჩერებულია საცალო კომერციული საქმიანობა, გარდა საკვები პროდუქტებისა და პირველადი მოხმარების ნივთების მაღაზიებისა. - იხურება ბაზრობები და ბაზრები, გარდა, მხოლოდ საკვები პროდუქტების რეალიზაციის მიზნით. - ღია რჩება საგაზეთო ჯიხურები, თამბაქოს მაღაზიები, აფთიაქები. ბარები და რესტორნები - შეჩერებულია კვების ობიექტების საქმიანობა - დასაშვებია მხოლოდ სახლში მიტანის სერვისი22.00 საათამდე. სპორტი - სპორტული საქმიანობა აკრძალულია, მათ შორის, სპეციალიზირებულ სპორტულ ცენტრებში. - დასაშვებია სპორტული აქტივობა ინდივიდუალურად, სახლის მიმდებარე ტერიტორიაზე, იმ პირობით, რომ ნებისმიერ შემთხვევაში დაცულ იქნება მინიმუმ ერთი მეტრის დისტანცია სხვა პირებთან, რესპირატორული დამცავი პირბადეების გამოყენებით. სკოლა: ბაგა ბაღი, ბაღი და დაწყებითი კლასები - სკოლის გაკვეთილები ჩატარდება საგანმანათლებლო დაწესებულებებში, მხოლოდ საბავშვო ბაღების, დაწყებითი და საშუალო კლასებისთვის. დანარჩენი მოსწავლეებისთვის გაკვეთილები ჩატარდება მხოლოდ დისტანციურად. Smart working - სახელმწიფო დამსაქმებლები ზღუდავენ პერსონალის ყოფნას სამუშაო ადგილზე, გარდა საციცოცხლოდ მნიშვნელოვანი შემთხვევებისა, როცა სამსახურში გამოცხადებას საჭიროებს საგანგებო სიტუაციების მართვა. საპარიკმახეროები და სილამაზის ცენტრები ღია რჩება. წყარო
საქართველოში კორონავირუსით ინფიცირებული 638 მძიმე პაციენტია, მათ შორის 293 პირი ხელოვნური სუნთქვის აპარატზე
ამ დროისთვის ქვეყანაში კორონავირუსით ინფიცირებული 638 მძიმე პაციენტია, მათ შორის 293 პირი ხელოვნური სუნთქვის აპარატზე იმყოფება. უწყებათაშორის საკოორდინაციო საბჭოსთან არსებული ოპერაციული შტაბის უფროსის, ალექსანდრე ხოჯევანიშვილის განცხადებით, მძიმე პაციენტებიდან თბილისში არის 316, ხოლო აჭარაში - 100. რაც შეეხება ხელოვნური სუნთქვის აპარატზე მყოფ 293 პირს, მათგან თბილისში - 150, აჭარაში კი 94 მკურნალობს. მისივე ინფორმაციით, ამ ეტაპზე აქტიური ინფიცირებული შემთხვევა არის 15 332. 4 489 ადამიანი მკურნალობს საავადმყოფოში, მათ შორის, თბილისის საავადმყოფოებში - 2 198, აჭარაში - 723. „2 446 ადამიანი არის კოვიდსასტუმროში, მათ შორის, 1 127 - აჭარაში, ხოლო 822 - თბილისში. 8 397 პირი მკურნალობს ბინაზე. საკარანტინო სივრცეში გვყავს 3 160 ადამიანი, მათ შორის, თბილისში - 682, აჭარაში-1 426. სულ 6 ოქტომბრიდან - 4 ნოემბრის პერიოდში, საზღვრიდან გადაყვანილია - 12 110 პირი. დღეის მდგომარეობით, თვითიზოლაციაში იმყოფება 28 690 ადამიანი, საიდანაც თბილისში არის 2 819 პირი, აჭარაში - 11 423, იმერეთში - 4 177“, - განაცხადა ალექსანდრე ხოჯევანიშვილმა.
სერბეთის პატრიარქს ახალი კორონავირუსი დაუდასტურდა
სერბეთის პატრიარქს ირინეოსს ახალი კორონავირუსი დაუდასტურდა და ბელგრადში, კოვიდ საავადმყოფოშია გადაყვანილი. სერბეთის მართლმადიდებელი ეკლესიის ინფორმაციით, პატრიარქს ახალი კორონავირუსისთვის დამახასიათებელი სიმპტომები ჯერჯერობით არ გამოვლენია და ის თავს მშვენივრად გრძნობს. "რეგულარული ტესტირების ფარგლებში და ეპიდემიოლოგიური ვითარების შეფასების შემდეგ, ჩატარდა PCR ტესტირება, რამაც სერბეთის პატრიარქს ირინეოსს ახალი კორონავირუსი დაუდასტურა - სიმპტომების გარეშე. მისი უწმინდესობა გადაყვანილია ბელგრადში, კოვიდ სასტუმროში". - წერია განცხადებაში.
Bloomberg-ის სავაჭრო სისტემაში 1 დოლარის ღირებულება 3.40 ლარი გახდა
Bloomberg-ის სავაჭრო სისტემაში ლარი დღეს მკვეთრად გაუფასურდა - ვაჭრობა 3.35-ის კურსით გაიხსნა, რის შემდეგაც დროის მოკლე პერიოდში დოლარის ღირებულება 3.40-მდე გაიზარდა. ეს ჯერ ოფიციალური გაცვლითი კურსი არაა; მას საქართველოს ეროვნული ბანკი 17:00-ზე გამოაქვეყნებს, თუმცა, სავარაუდოდ, აღნიშნული გაუფასურება ოფიციალურ კურსზეც მოახდენს გავლენას. რაც შეეხება დოლარის ოფიციალურ კურსს, ის დღეისთვის 3.3409 ლარს შეადგენს. ჯამურად ბოლო 5 სამუშაო დღის განმავლობაში დოლარის ოფიციალური ღირებულება 13 თეთრით გაიზარდა. ორშაბათს სებ-მა ლარის კურსის მერყეობის შესარბილებლად $60 მილიონიანი ინტერვენცია განახორციელა. ჯამურად, 2020 წლის განმავლობაში სავალუტო აუქციონების გზით ეროვნულმა ბანკმა $710 მილიონი დოლარი გაყიდა.
ეპიდემიოლოგიური ვითარებიდან გამომდინარე, ესპანეთის სამეფომ საქართველო უსაფრთხო ქვეყნების სიიდან ამოიღო
ევროკავშირის 22 ოქტომბრის რეკომენდაციაზე დაყრდნობით და საქართველოში არსებული ეპიდემიოლოგიური სიტუაციიდან გამომდინარე, ესპანეთის სამეფომ საქართველო უსაფრთხო ქვეყნების სიიდან ამოიღო. ამ დრომდე საქართველო მიეკუთვნებოდა იმ მცირე ქვეყნების სიას, რომლებიც ესპანეთის მთავრობამ უსაფრთხოდ მიიჩნია. ესპანეთის სამეფოში უვიზო რეჟიმის ფარგლებში მოგზაურობა საქართველოს მოქალაქეთათვის ნებადართული 2020 წლის 4 ივლისიდან იყო. COVID19-ის პანდემიით გამოწვეული მდგომარეობიდან გამომდინარე ესპანეთში შესვლის აკრძალვის შესახებ გადაწყვეტილება ძალაში პირველი ნოემბრიდან შევიდა. ჯანდაცვის მსოფლიო ორგანიზაციამ კორონავირუსის პანდემია 2020 წლის 11 მარტს გამოაცხადა. ეპიდემიამ ჩინეთში 2019 წლის დეკემბერში იფეთქა. 21 იანვარს ჩინეთმა დაადასტურა, რომ კორონავირუსი გადამდებია.
აშშ-ის ქალაქებში საპროტესტო აქციებზე სამართალდამცავებმა ათობით ადამიანი დააკავეს
აშშ-ის ქალაქ ნიუ-იორკში საპრეზიდენტო არჩევნების დასრულების შემდეგ საპროტესტო აქციები გაიმართა, რომლის დროსაც სამართალდამცავებმა 50-მდე პირი დააკავეს. Reuters-ის ინფორმაციით, საპროტესტო მსვლელებები მოეწყო ქალაქ პორტლენდშიც, სადაც პოლიციამ 10 ადამიანი დააკავა და პიროტექნიკა, უროები და ცეცხლსასაროლი იარაღი ამოიღო. დემონსტრანტები ხმების დათვლის პროცესის შეუფერხებლად გაგრძელებას მოითხოვდნენ. საპროტესტო აქციები გაიმართა ატლანტაში, დეტროიტსა და ოკლენდშიც.
Apple-ი 10 ნოემბერს სპეციალურ ღონისძიებას აანონსებს
Apple-ი 10 ნოემბერს სპეციალურ ღონისძიებას მართავს, თუმცა, არ აკონკრეტებს რას მიეძღვნება ის. როგორც Reuters- წერს, ექსპერტები ელოდებიან, რომ კომპანია ახალ Mac-ის კომპიუტერებს წარადგენს. შეგახსენებთ, Apple-მა გასულ თვეს ახალი iPhone-ები წარადგინა, მანამდე კი სექტემბერში Apple Watch-ი და სხვა პროდუქტები. ხოლო ივნისში განაცხადა, რომ წლის ბოლომდე წარადგენდა ახალ Mac კომპიუტერებს, რომელსაც საკუთარი სილიკონის პროცესორი ექნებოდა. ამგვარად, შესაძლოა, 10 ნოემბრის ღონისძიებაზე სწორედ ახალ კომპიუტერებს უნდა ველოდოთ კომპანიისგან. ცნობისთვის, Apple Silicon Mac-ი იქნება ერთგვარი დასაწყისი კომპანიისთვის Intel-ის პროცესორებიდან საკუთარი პროცესორებზე გადასვლაში. Intel-ი Apple-ს პროცესორებს 2006 წლიდან აწვდიდა. Apple-ის ღონისძიებაზე ახალი კომპიუტერების გარდა, ელოდებიან სხვა ახალ პროდუქტებსაც, მაგალითად AirPod-ის ყურსასმენებს.
ქუთაისის ხანდაზმულთა პანსიონატის ბენეფიციარებს კორონავირუსი დაუდასტურდათ
ქუთაისის ხანდაზმულთა პანსიონატის 3 მობინადრეს და 10 თანამშრომელს კორონავირუსი დაუდასტურდა. ისინი საჩხერის სამედიცინო ცენტრში გადაიყვანეს. პანსიონატში, სადაც კარანტინი გამოცხადდა, კიდევ რამდენიმე პირის ტესტირების პასუხს ელოდებიან. ქუთაისის ხანდაზმულთა პანსიონატში 98 ბენეფიციარი ცხოვრობს. დაწესებულების ადმინისტრაცია ვარაუდობს, რომ ინფექცია გავრცელდა ერთ-ერთი კოვიდინფიცირებული თანამშრომლისგან, რომელსაც სიმპტომები არ ჰქონდა. ხანდაზმულთა პანსიონატები იმ სამიზნე ჯგუფებშია, სადაც ტესტირება გარკვეული პერიოდულობით უნდა ჩატარდეს. საქართველოში დღეს დილით დადასტურებული 2401 შეთხვევიდან 368 იმერეთის რეგიონშია.
ქუჩაში მიმდინარე პოლიტიკური პროცესები, ვირუსის პიკს დააჩქარებს - პრემიერი
საქართველოს პრემიერმინისტრის გიორგი გახარიას განცხადებით, ქუჩაში მიმდინარე პოლიტიკური პროცესები, ვირუსის პიკს დააჩქარებს. ამის შესახებ მან უწყებათაშორისი საკოორდინაციო საბჭოს სხდომაზე განაცხადა, რომელიც მთავრობის მეთაურის ხელმძღვანელობით ვიდეოკონფერენციის ფორმატით გაიმართა. "ჩვენ გადავდივართ ახალ ფაზაზე, დღეს უკვე კორონავირუსით ინფიცირების 2400-ზე მეტი ახალი შემთხვევა გვაქვს; იმ პოლიტიკური პროცესებიდან გამომდინარე, რომელიც ქუჩაში მიმდინარეობს და ევროპაში ვირუსის გავრცელების დინამიკის გათვალისწინებით, როგორც ჩანს ზრდა გაგრძელდება, ეს ფაქტია და ამისთვის მზად უნდა ვიყოთ", - აცხადებს პრემიერი. მან ხაზი გაუსვა ყველა შესაბამისი უწყების მაქსიმალური მობილიზაციის მნიშვნელობას, რათა საჭირო ღონისძიებები, მათ შორის წერტილოვანი შეზღუდვები კიდევ უფრო ეფექტურად გატარდეს. „რა თქმა უნდა, ის პოლიტიკური აქტივობა, რაც ქუჩაში ხდება, ძალზედ დააჩქარებს ჩვენთან პიკის მოსვლას. უფრო მძიმე სიტუაცია იქნება, ვიდრე ველოდით, რადგან მობილობა, რომელსაც ქუჩის აქციები იწვევს, რა თქმა უნდა პირდაპირ კავშირშია ინფიცირების სწრაფ ზრდასთან. ამიტომ, საჭიროა აბსოლუტურად ყველა სამინისტროს და შესაბამისი უწყებების სრული მობილიზაცია. გარდა ამისა, რა თქმა უნდა, ჩვენ ადაპტაციის სტრატეგიას არ ვცვლით, მაგრამ ადაპტაციის პარალელურად ძალზედ ეფექტურად უნდა ვიფიქროთ, რა შეიძლება იყოს წერტილოვანი შეზღუდვების პაკეტი, რომელიც კიდევ უფრო ეფექტური იქნება. არ ვსაუბრობთ ქვეყნის მასშტაბით სისტემურ შეზღუდვებზე, არამედ წერტილოვან შეზღუდვებზე“, - განაცხადა პრემიერმინისტრმა. მთავრობის მეთაურმა ხაზგასმით აღნიშნა თვითიზოლაციის ინსტრუმენტის ეფექტურობა ვირუსის გავრცელების ჯაჭვის გაწყვეტის პროცესში, ასევე - ბინაზე მკურნალობის მნიშვნელობა ჰოსპიტალური სექტორის გადატვირთვის თავიდან აცილებაში. „როდესაც ადამიანს პირველი სიმპტომი უჩნდება, მიუხედავად იმისა, აქვს თუ არა მას ტესტის დადებითი პასუხი ან მოასწრო თუ არა ტესტის აღება, მაშინვე უნდა გადავიდეს თვითიზოლაციაში, რადგან თვითიზოლაცია ამ ჯაჭვის გაწყვეტის ყველაზე კარგი და ეფექტური საშუალებაა. ბინაზე მკურნალობა - ოჯახის ექიმები, ძალიან მნიშვნელოვანია, მოქალაქეების მაქსიმალურად დიდ რაოდენობას ჰქონდეს საშუალება, წყნარად, მშვიდად, ბინაზე იმკურნალოს, რადგან ბინაზე მკურნალობა არის ერთ-ერთი ყველაზე ეფექტური გამოსავალი იმისთვის, რომ ჯანდაცვის სისტემა არ გადაიტვირთოს და არ დაგვრჩეს გარეთ ის ხალხი, რომელსაც სპეციალური სამედიცინო სერვისებით მკურნალობა პირველ რიგში სჭირდება. გარდა ამისა, კოვიდ-სასტუმროებში, რომელზეც გუშინ ვისაუბრეთ, სასწრაფოდ, დღესვე უნდა შევიტანოთ ელემენტარული თერაპიული ელემენტები და ეს უნდა იყოს არა მხოლოდ კოვიდ-სასტუმროები ჩვენი მოქალაქეებისთვის, რომლებსაც თვითიზოლაციის შესაძლებლობა არ აქვთ, არამედ კოვიდ-სასტუმრო თერაპიული მართვის ელემენტებით და სამედიცინო მეთვალყურეობით და მხოლოდ და მხოლოდ მძიმე შემთხვევების ჰოსპიტალიზება. რადაც არ უნდა დაგვიჯდეს, ჰოსპიტალიზაციის მაჩვენებლის 15%-მდე დაწევა არის ერთადერთი და კრიტიკულად მნიშვნელოვანი ფაქტორი, რომელმაც ჩვენ ეს კრიზისი უნდა გადაგვალახინოს. ამიტომ ჰოსპიტალიზაციის პროტოკოლებიდან დაწყებული, მანუალური მართვით დამთავრებული, ყველაფერი უნდა გავაკეთოთ იმისთვის, რომ ეს 26% დავიყვანოთ 15%-მდე“, - განაცხადა გიორგი გახარიამ. პრემიერმა ასევე ისაუბრა ანტიგენზე დამყარებული სწრაფი ტესტებით გაფართოებული ტესტირების მნიშვნელობაზე. „ეს მოგვცემს შესაძლებლობას, იმ შემთხვევაში, თუ ბინაზე მკურნალობა, კოვიდ-სასტუმრო და ჰოსპიტალიზაცია სწორად გვაქვს დალაგებული, ანტიგენის სწრაფი ტესტირებით, აღვჭურვავთ ადამიანს ცოდნით, რომ ის ინფიცირებულია და უკვე შექმნილია ინფრასტრუქტურა იმისთვის, რომ იმის მიხედვით, რა სიმძიმის არის, როგორ უმკურნალოს საკუთარ თავს. ეს არის ჩვენი კრიტიკული წერტილები, რომელიც უნდა გავიაროთ: პირველი - რა თქმა უნდა ჰოსპიტალიზაციის მაჩვენებლის 15%-მდე ჩამოწევა, ერთმნიშვნელოვნად; მეორე - კოვიდ-სასტუმროებში თერაპიული მართვის ელემენტების შეტანა და ბინაზე მკურნალობა პირველადი ჯანდაცვის რგოლით; პირბადე, თვითიზოლაცია და ანტიგენის სწრაფი ტესტი - ეს არის ის ინსტრუმენტები, რომელიც უნდა დაგვეხმაროს, ეს კრიზისი, პიკი გადავიაროთ. კიდევ რა არის მთავარი - წერტილოვანი შეზღუდვებიდან, რომელზეც დღეს ვმსჯელობთ, გამოვყოთ რა არის მთავარი დღევანდელი მდგომარეობისთვის. სულ სხვა ვითარება იყო ერთი თვის წინ, დღეს ცოტა სხვა სიტუაციაა, რადგან სხვა აქტივობაა, ქუჩაში მიმდინარე პოლიტიკურ პროცესს ვგულისხმობ, ამიტომ წერტილოვანი შეზღუდვების ეფექტურობის თვალსაზრისით ცოტა გადასახედი გვექნება. რასაც ვუყურებ, ევროპაშიც ძალიან მძიმდება სიტუაცია და ყველგან არის ერთადერთი კრიტერიუმი - არ მოხდეს ჰოსპიტალური სისტემის გადატვირთვა. იქ იწყება შემდეგ უმართავი პროცესები. ჰოსპიტალურ სისტემაზე გადის ახლა გამარჯვების ან დამარცხების ხაზი, ამიტომ, ეკა, ძალიან გთხოვთ, ეს გაითვალისწინეთ“, - მიმართა პრემიერ-მინისტრმა ჯანდაცვის მინისტრ ეკატერინე ტიკარაძეს.
ვიცეპრემიერი დამსაქმებლებს მოუწოდებს, თანამშრომლები სახლიდან ამუშაონ
ვიცეპრემიერი მაია ცქიტიშვილი დამსაქმებლებს მოუწოდებს, თანამშრომლები სახლიდან ამუშაონ. ამის შესახებ მან უწყებათაშორისი საკოორდინაციო საბჭოს სხდომაზე განაცხადა, რომელიც მთავრობის მეთაურის ხელმძღვანელობით ვიდეოკონფერენციის ფორმატით გაიმართა. “ჩვენ უკვე მოვუწოდეთ ჩვენს საჯარო სექტორს, რომ მაქსიმალურად გადავიდნენ დისტანციურ რეჟიმში და მოვუწოდეთ კომერციულ სექტორსაც, ყველა ჩვენს დამსაქმებელს და კიდევ გვინდა, მოვუწოდოთ ყველა დამსაქმებელს, რომ მაქსიმალურად მოვახერხოთ და ჩვენი თანამშრომლები ვამუშავოთ სახლიდან”, - განაცხადა ცქიტიშვილმა. შეგახსენებთ, რომ დღეს, 5 ნოემბერს, კორონავირუსის 2401 ახალი შემთხვევა დაფიქსირდა.
მანიფესტაციების ჩატარების შეზღუდვას ოპოზიცია არ დაემორჩილება - ბადრი ჯაფარიძე
"ლელო საქართველოსთვის" ერთ-ერთი ლიდერი ბადრი ჯაფარიძე პრემიერ-მინისტრ გიორგი გახარიას განცხადებას გამოეხმაურა, რომელიც წერტილოვანი შეზღუდვების შესაძლო გადახედვას შეეხება. როგორც ჯაფარიძე განმარტავს, ისინი ამ შეზღუდვას არ დაემორჩილებიან, თუკი, ის სპეციალურად იმისთვის იქნება, რომ აქცია არ გაიმართოს. "თუ შეზღუდვა სპეციალურად არის გათვალისწინებული იმისთვის, რომ მანიფესტაცია არ ჩატარდეს, ოპოზიცია ამ შეზღუდვას არ დაემორჩილება, რადგან ეს იმას ნიშნავს, რომ გაკეთებულია სპეციალურად, იმისათვის, რომ ხალხმა არ გამოხატოს თავისი პროტესტი", - განაცხადა ჯაფარიძემ. შეგახსენებთ, რომ დღეს პრემიერ-მინისტრმა გიორგი გახარიამ საკოორდინაციო საბჭოს სხდომაზე განცხადება გააკეთა. „სულ სხვა ვითარება იყო ერთი თვის წინ, დღეს ცოტა სხვა სიტუაციაა, რადგან სხვა აქტივობაა, ქუჩაში მიმდინარე პოლიტიკურ პროცესს ვგულისხმობ, ამიტომ წერტილოვანი შეზღუდვების ეფექტურობის თვალსაზრისით ცოტა გადასახედი გვექნება, - განაცხადა პრემიერ-მინისტრმა.
საბერძნეთში სამკვირიანი საყოველთაო კარანტინი წესდება
საბერძნეთში 7 ნოემბრიდან საყოველთაო კარანტინი ამოქმედდება, - ამის შესახებ ინფორმაციას Reuters-ი ავრცელებს. ახალი შეზღუდვების თანახმად, საბერძნეთში საცალო ვაჭრობის ობიექტები, გარდა სუპერმარკეტებისა და აფთიაქებისა, დაიხურება. მოქალაქეებს კი სახლიდან გასასვლელად სპეციალური ნებართვა დასჭირდებათ. ამასთან, ქვეყანაში დაწყებითი სკოლები ღია დარჩება, მაგრამ საშუალო სკოლები დაიხურება. საბერძნეთის პრემიერ-მინისტრის, კირიაკოს მიცოტაკისის განცხადებით, ახალი შეზღუდვები ძალაში სამი კვირის განმავლობაში იქნება. „მე ვამჯობინე მკაცრი ზომების დაწესება უფრო ადრე, ვიდრე დაგვიანებით“, – განაცხადა კირიაკოს მიცოტაკისმა. საბერძნეთში, ბოლო 24 საათში კოვიდ-19-ის 2 646 შემთხვევა გამოვლინდა, რაც ქვეყნისთვის რეკორდული მაჩვენებელია. პანდემიის დაწყების დროიდან კი საბერძნეთში ინფიცირების 46 892 შემთხვევაა დადასტურებული, აქედან 673 ადამიანი დაღუპულია.
ირმა ხეცურიანი და ნინა თიბილაშვილი მსოფლიოს საუკეთესო ეტლით მოფარიკავეთა შორის დასახელდნენ
ქართველი პარასპორტსმენები, ირმა ხეცურიანი და ნინა თიბილაშვილი მსოფლიოს 2019 წლის საუკეთესო ეტლით მოფარიკავეთა შორის დასახელდნენ. განათლების, მეცნიერების, კულტურისა და სპორტის სამინისტროს ინფორმაციით, ეტლით მოსარგებლეთა და ამპუტანტთა სპორტის საერთაშორისო ფედერაციამ (IWAS) გასული წლის შედეგებით 18 პარამოფარიკავე გამოარჩია. "ირმა ხეცურიანი ბ კატეგორიის ხმლით მოფარიკავე ქალთა შორის 165 ქულით პირველ ადგილზე გავიდა. ნინა თიბილაშვილი კი 80 ქულით 23 წლამდე ხმლით მოფარიკავეთა შორის საუკეთესო ქალ პარასპორტსმენად აღიარეს", - ნათქვამია სამინისტროს განცხადებაში.
ვერც ერთი სისტემა ვერ გაუძლებს თუ ყველანი ერთად გავხდებით ავად - პაატა იმნაძე
დაავადებათა კონტროლისა და საზოგადოებრივი ჯანდაცვის ცენტრის დირექტორის მოადგილე, პაატა იმნაძე მოსახლეობას კოვიდ-19-ის გავრცელების პრევენციისთვის დაწესებული მოთხოვნების შესრულებისკენ მოუწოდებს და აცხადებს, რომ ვერც ერთი სისტემა ვერ გაუძლებს დატვირთვას, თუ მოქალაქეები ელემენტარულ წესებს არ შეასრულებენ: "ერთხელ გაზაფხულზე ვთქვი და მეორედ, მგონი, შემოდგომაზე ვთქვი და მერე ამაზე ატყდა ერთი ამბავი. მე რასაც ვამბობ, პასუხს ვაგებ ხოლმე ჩემს სიტყვებზე და ეს არ არის ხოლმე არავის დაშინება. ეს არის ხოლმე სამწუხარო რეალობის დანახვება, რაც მოგველის. თუ არ დავიცავთ ელემენტარულ წესებს. ამას კიდევ გავიმეორებ, ვერც ერთი ჯანდაცვის სისტემა. და მე მგონი კარგად უყურებთ მედიას, რა ხდება ყველაზე განვითარებულ, ყველაზე მაგარ ქვეყნებში, ყველაზე მაგარი ჯანდაცვის სისტემით. ვერც ერთ ქვეყანაში, ვერც ერთი ჯანდაცვის სისტემა, ახლა სულ რომ გერმანული საავადმყოფოები აქ გადმოვიტანოთ, თავისი გერმანელი ექიმებით, ვერ გაუძლებს, თუ ჩვენ ყველა ერთად გავხდებით ავად და ეს მოხდება, თუ არ დავიცავთ ელემენტარულ წესებს. აი, ეს არის რეალობა”, - განაცხადა პაატა იმნაძემ საკოორდინაციო საბჭოს სხდომის დასრულების შემდეგ გამართულ ბრიფინგზე ეპიდვითარების მოსალოდნელ გაუარესებაზე საუბრისას. გასული დღე-ღამის განმავლობაში, საქართველოში გარდაიცვალა COVID-19-ით დაავადებული 20 პაციენტი. გარდაცვლილთა საერთო რიცხვი 401-მდე გაიზარდა. გასულ 24 საათში საქართველოში დადასტურდა კორონავირუსის 2401 შემთხვევა. ეპიდემიის პერიოდში ეს ყველაზე მაღალი მაჩვენებელია. წინა დღესთან შედარებით 106-ით მეტი ახალი შემთხვევაა. თებერვლიდან, როცა საქართველოში კორონავირუსით ინფიცირების პირველი ფაქტი დადასტურდა, სულ აღრიცხულია 49 218-ს შემთხვევა. გასული დღე-ღამის განმავლობაში 2289-ით გაიზარდა კორონავირუსისგან განკურნებულთა რიცხვი. სულ გამოჯანმრთელებულია 33 459.
Wizzair-მა 18 დეკემბრამდე ქუთაისიდან ყველა ფრენა გააუქმა
ავიაკომპანია Wizzair-მა ქუთაისის აეროპორტიდან დეკემბრის მეორე ნახევრამდე ყველა ფრენა გააუქმა. სამოქალაქო ავიაციის სააგენტოს ცნობით, ავიაკომპანიამ გადაწყვეტილება კორონავირუსის შემთხვევების ზრდის ფონზე დაწესებული შეზღუდვების გამო მიიღო. "ავიაგადამზიდველი დროებით, 19 დეკემბრამდე აუქმებს უკვე განახლებულ ფრენებს რიგა-ქუთაისი-რიგას მიმართულებით, ასევე, ავიაკომპანიამ 18 დეკემბრამდე გადადო ოპერირების განახლება დორტმუნდი-ქუთაისი-დორტმუნდის მიმართულებით და 2021 წლის 12 იანვრამდე ვილნიუსი-ქუთაისი-ვილნიუსის მიმართულებით. რეგულარული რეისების გაუქმების მიზეზი ლატვიის, გერმანიისა და ლიეტუვას მიერ, ადგილზე ეპიდსიტუაციის გაუარესების გამო დაწესებული სასაზღვრო და სანიტარული შეზღუდვები სახელდება" - აცხადებს ავიაციის სააგენტო. ამავე შეზღუდვების გამო, 28 ნოემბრამდე დანიშნული რეგულარული რეისები გააუქმა AirBaltic-მა, თუმცა ავიაკომპანია შეასრულებს სარეპატრიაციო ფრენებს საქართველოს მოქალაქეების ჩამოყვანის და უცხო ქვეყნის მოქალაქეების ქვეყნიდან გაყვანის მიზნით. ცვლილებებია ავიაკომპანია Georgian Airways-ის ფრენის განრიგშიც. ავიაკომპანია თბილისი-ბერლინი-თბილისის და თბილისი-ვენა-თბილისის მიმართულებებზე ოპერირებას გააგრძელებს მხოლოდ ერთი სიხშირით. შესაბამისად, თბილისი-ბერლინი-თბილისის საჰაერო ხაზზე უქმდება 6, 13, 20 და 27 ნოემბრის რეგულარული რეისები, ხოლო თბილისი-ვენა-თბილისის საჰაერო ხაზზე 5, 12, 19 და 26 ნოემბრის ფრენები. "გამომდინარე იქედან, რომ COVID-19 პანდემიის პირობებში ავიაციის სექტორისთვის ვითარება რთულად პროგნოზირებადია და მსოფლიოში ინფიცირების შემთხვევების ზრდის ფონზე, სახელმწიფოების მიერ კვლავ წესდება სასაზღვრო და სანიტარული შეზღუდვები, მოქალაქეებს მოვუწოდებთ, გამოიჩინონ სიფრთხილე მგზავრობის დაგეგმვის დროს, ყურადღებით გაეცნონ დანიშნულების ქვეყნის მიერ დაწესებულ რეგულაციებს, ავიაკომპანიების შეტყობინებებს და ოფიციალურ წყაროებზე განთავსებულ განცხადებებს და განრიგებს" - აცხადებს სამოქალაქო ავიაციის სააგენტო. ზაფხულში საქართველო იმ ქვეყანათა სიაში შევიდა, რომლებსაც ევროკავშირმა საზღვრები პირველი ივლისიდან გაუხსნა, თუმცა, მაშინ საქართველოს მთავრობამ რეგულარული ფრენები მხოლოდ რიგის, მიუნხენის და პარიზის მიმართულებით დაუშვა - თვეში ჯამში, დაახლოებით, 20 ფრენა. ასევე სრულდებოდა აირზენას ჩარტერები. ამის გამო, უნგრულმა ავიაკომპანია Wizzair-მა ქუთაისის აეროპორტში ბაზას განუსაზღვრელი დროით დახურა. ავიაკომპანიამ საქართველოდან რეისების უმეტესობა (ბერლინი, პრაღა, ტალინი, მემინგენი, თესალონიკი, ბოლონია, რომი, მილანი, გდანსკი, კრაკოვი, კატოვიცე, პოზნანი, ვროცლავი, ვენა, ლარნაკა ) 2021 წლის აპრილ- მაისამდე გადადო. იქამდე კი, ქუთაისიდან არაერთი დაანონსებული თუ მოქმედი ფრენა (პარიზი, ბრიუსელი, ეინდჰოვენი, სტოკჰოლმი, კოპენჰაგენი, ბარი, ბაზელი, კიოლნი, ფრანკფურტი, ნიცა, ჰამბურგი, კარლსრუე/ბადენ-ბადენი, ჰერაკლიონი, ნეაპოლი, ნიურნბერგი, პიზა, ვენეცია, ტურკუ) საერთოდ გააუქმა. ავიაკომპანიამ გაზაფხულამდე მხოლოდ ვარშავის, დორტმუნდის, რიგის, ვილნიუსის, ათენის, ბუდაპეშტის და აბუ-დაბის მიმართულებები დატოვა, თუმცა რეისები მხოლოდ რიგაში, ოქტომბრის თვეში შესრულდა. დაბალბიუჯეტიან კომპანიებს - Wizzair-ს და Ryanair-ს ხელისუფლება ფრენის ნებართვას 7 თვის განმავლობაში არ აძლევდა, რადგან ეკონომიკის მინისტრის თქმით, დაბალბიუჯეტიან კომპანიებს კვირაში ერთი და ორი ფრენა არ აწყობთ". ნათია თურნავა ამბობდა, რომ Wizzair-ს და Ryanair-ს ათზე მეტ მიმართულებაზე სურდათ ფრენა, რისთვისაც, მისი აზრით, საქართველო და მსოფლიო მზად არ იყო.
1 დოლარი - 3.40 ლარი, 1 ევრო - 4.01 ლარი - ეროვნული ბანკი
5 ნოემბრის ვაჭრობის შედეგად, საქართველოს ეროვნული ვალუტა აშშ დოლართან მიმართებით მკვეთრად გაუფასურდა. კურსის ცვლილებამ 5.91 თეთრი შეადგინა, რის შედეგადაც ერთი დოლარის ოფიციალური ღირებულება 3.40 ლარი გახდა. ეროვნული ვალუტა დოლართან მიმართებით ასეთი გაუფასურებული ბოლოს მარტის ბოლო რიცხვებში იყო. ევროსთან მიმართებით კი, ლარი 10 თეთრით გაუფასურდა, შედეგად ერთი ევრო 4.0137 ლარი ღირს. ჯამურად ბოლო 4 სამუშაო დღის განმავლობაში დოლარის ოფიციალური ღირებულება 15.6 თეთრით გაიზარდა.ორშაბათს სებ-მა ლარის კურსის მერყეობის შესარბილებლად $60 მილიონიანი ინტერვენცია განახორციელა. ჯამურად, 2020 წლის განმავლობაში სავალუტო აუქციონების გზით ეროვნულმა ბანკმა $710 მილიონი დოლარი გაყიდა.
ამირან გამყრელიძემ პოლიტიკურ პროცესებში ჩართულებს რეკომენდაციით მიმართა
საქართველოში ჯანდაცვის სპეციალისტების რჩევებს მიმდინარე პოლიტიკურ პროცესებთან დაკავშირებული რეკომენდაციაც დაემატა. ამირან გამყრელიძე პოლიტიკურ პროცესებში ჩართულებს მოუწოდა, გაუწიონ ანგარიში იმას, რომ ადამიანის უფლებებში უპირველესია სიცოცხლის და ჯანმრთელობის უფლება. ამირან გამყრელიძის თქმით, დიდი თავყრილობები ერთ-ერთი ყველაზე დიდი რისკია ინფექციის გავრცელების და ამიტომ აუცილებელია არსებული რეკომენდაციების დაცვა. მან კოვიდტესტის სტატისტიკაც შეაფასა. „ვაფართოებთ ანტიგენზე დამყარებულ სწრაფ დიაგნოსტიკას და დღიური გამოყენების მაჩვენებელი სავარაუდოდ, 14-15 ათასამდე ავა“, - აღნიშნა დაავადებათა კონტროლის ცენტრის ხელმძღვანელმა. საქართველოში დღეს კორონავირუსის 2 401 ახალი შემთხვევა გამოვლინდა, გამოჯანმრთელდა 2 289 პაციენტი, გარდაიცვალა 20 პაციენტი. თავის მხრივ, პაატა იმნაძე გვახსენებს, რომ ვერც ერთი ჯანდაცვის სისტემა ვერ გაუძლებს, თუ ჩვენ ყველა ერთად გავხდებით ავად და ეს მოხდება, თუ არ დავიცავთ ელემენტარულ წესებს. ვირუსით ინფიცირების პირველი ფაქტი საქართველოში 2020 წლის, 26 თებერვალს გამოვლინდა. პანდემიის შესახებ ჯანდაცვის მსოფლიო ორგანიზაციამ 2020 წლის 11 მარტს გამოაცხადა. მანამდე, ჩინეთმა, 21 იანვარს დაადასტურა, რომ კორონავირუსი გადამდებია. ჩინეთში ეპიდემია 2019 წლის დეკემბერში დაიწყო.
ჯორჯიის შტატში არჩევნებზე საუბრისას ABC News-მა, თბილისში გახსნილი საარჩევნო უბანი აჩვენა
ჯორჯიის შტატში არჩევნებზე საუბრისას ABC News-მა, თბილისში გახსნილი საარჩევნო უბანი აჩვენა. ამერიკული ტელეკომპანია ABC News-ის ეთერში, ჯორჯიის შტატში ხმების დათვლის თემაზე ჩართვის დროს ჟურნალისტებმა, საქართველოს საპარლამენტო არჩევნებისთვის, თბილისში, 55-ე სკოლაში გახსნილი უბნის ფოტო შეცდომით გამოიყენეს. ინფორმაციას რადიო თავისუფლება ავრცელებს. ეს ფოტო ჯორჯიის შტატში საპრეზიდენტო არჩევნებისთვის გახსნილი უბნების ფოტომასალასთან ერთად იყო წარმოდგენილი.
მეტროსადგურებში მგზავრთა ნაკადი გაკონტროლდება
დედაქალაქის მერია, საზოგადოებრივი ჯანდაცვის უსაფრთხოების მიზნითა და ქვეყანაში არსებული ეპიდემიოლოგიური ვითარების გათვალისწინებით, ეპიდემიოლოგებისა და საკოორდინაციო საბჭოს რეკომენდაციით, თბილისის მეტროპოლიტენში სპეციალურ ღონისძიებებს განახორციელებს. გადატვირთული მეტროსადგურების შესასვლელებში, პიკის საათებში, მგზავრთა ნაკადის კონტროლი მოხდება რიგების მართვის მეშვეობით, რათა შეძლებისდაგვარად თავი დავიზღვიოთ ვირუსის შესაძლო გავრცელებისგან. ამ ეტაპზე, აღნიშნული ღონისძიებების განხორციელება იგეგმება "ვარკეთილის", "ახმეტელის თეატრის", "დიდუბისა" და "სადგურის მოედნის" მეტროსადგურებზე. მეტროპოლიტენის თანამშრომლები მუდმივად დააკვირდებიან მგზავრთა ნაკადს. როდესაც ნაკადი კრიტიკული იქნება და ვირუსის გავრცელების კუთხით საფრთხეს შექმნის, მეტროსადგურების ჩასასვლელებში, რიგის მართვის მეშვეობით ადამიანების დაშვების შეფერხება მოხდება. მოვუწოდებთ მოსახლეობას, გავუფრთხილდეთ ერთმანეთს, გაუფრთხილდეთ საკუთარ ჯანმრთელობას და ზედმიწევნით დავიცვათ საქართველოს მთავრობის მიერ დადგენილი რეკომენდაციები.
სუს-ში დავასახელე ისინი, ვინც დესტრუქციული სცენარისთვის იყვნენ მომზადებული - კობახიძე
ქართული ოცნების აღმასრულებელი მდივნის ირაკლი კობახიძის განცხადებით, სახელმწიფო უსაფრთხოების სამსახურს ე.წ. რევოლუციური სცენარის ფარგლებში ნაციონალური მოძრაობის ლიდერებისა და აქტივისტების სამზადისთან დაკავშირებით მიაწოდა ინფორმაცია. როგორც კობახიძემ აღნიშნა, გამოკითხვისას დაასახელა ინფორმაციის წყარო და ასევე წარადგინა იმ ადამიანთა სიები, რომლებიც "დესტრუქციული სცენარისთვის ემზადებოდნენ". "დამიკავშირდნენ სახელმწიფო უსაფრთხოების სამსახურიდან იმ ინფორმაციასთან დაკავშირებით, რომელიც მე გავავრცელე რამდენიმე დღის წინ. საუბარია ბრიფინგზე, რომელიც უკავშირდებოდა ე.წ. რევოლუციური სცენარის ფარგლებში ნაცმოძრაობის ლიდერებისა და აქტივისტების სამზადისს. მე მქონდა ამასთან დაკავშირებით ინფორმაცია, დავასახელე დღეს ჩემი ინფორმაციის წყარო, ასევე შინაარსი და წარვადგინე იმ ადამიანების სიები, რომელებიც იყვნენ მომზადებული ასეთი დესტრუქციული სცენარისთვის. რა თქმა უნდა უნდა დაინტერესებულიყო გამოძიება და დღეს ამასთან დაკავშირებით შედგა გამოკითხვა", - განაცხადა კობახიძემ. მან კონკრეტული გვარებიც დაასახელა. კერძოდ, ოცნების ლიდერი აცხადებს, რომ რევოლუციური სცენარი სააკაშვილის მიერ იყო შედგენილი და მასში ენმ-ის სხვა ლიდერებთან ერთად, ჩართული იყვნენ დევით ჭანკოტაძე და დიმიტრი შაშკინი. "დავასახელე მათ შორის მათი ლიდერების გვარები. ეს ყველაფერი მიეკუთვნება იმ სცენარს, რომელიც შედგენილია მიხეილ სააკაშვილის მიერ, რომელიც არის მთავარი ლიდერი ამ კრიმინალური, დესტრუქციული პოლიტიკური ძალის და მასთან ერთად ამ კუთხით მოქმედებდნენ რამდენიმე წარმომადგენელი ამ პარტიის, მაგალითად დევი ჭანკოტაძე, დიმიტრი შაშკინს, იყვნენ სხვებიც. ეს ყველაფერი იგეგმებოდა მათ მიერ", - თქვა კობახიძემ. მისივე განცხადებით, ოპონენტებს გარკვეული გეგმები არჩევნების შემდგომ პერიოდშიც ჰქონდათ და გამოძიებას ამის შესახებაც მიაწოდა ინფორმაცია. "არჩევნების შემდგომ პერიოდთან დაკავშირებითაც იყო გარკვეული გეგმები და ამაზეც ჩემი ინფორმაცია მივაწოდე სახელმწიფო უსაფრთხოების სამსახურს", - აღნიშნა ირაკლი კობახიძემ. მან სახელმწიფო უსაფრთხოების სამსახურის შენობა რამდენიმე წუთის წინ დატოვა.
