ძებნის რეზულტატი:
სალომე ზურაბიშვილმა გიგი უგულავა და ირაკლი ოქრუაშვილი შეიწყალა
საქართველოს პრეზიდენტმა სალომე ზურაბიშვილმა "ევროპული საქართველოს" ერთ-ერთი ლიდერის გიგი უგულავას და თავდაცვის ყოფილი მინისტრის ირაკლი ოქრუაშვილის შეწყალების აქტი გამოსცა. ამის შესახებ პრეზიდენტმა საგანგებო ბრიფინგზე განაცხადა. პრეზიდენტის განცხადების ტექსტს სრულად გთავაზობთ: "მივიღე გადაწყვეტილება გამოვცე უგულავას და ოქრუაშვილის შეწყალების აქტი. სანამ მათი შეწყალება ძალაში შევა, მინდა მივმართო საზოგადოებას, რომლისთვისაც დღევანდელი ჩემი გადაწყვეტილება იოლი გასაგები ვერ იქნება და შესაძლოა ვერც მაპატიოს. სანამ ჩემი, ამ ურთულესი გადაწყვეტილების მიზეზს ავხსნი, შეწყალების არსი, კიდევ ერთხელ, ყველას გასაგებად, უნდა განვმარტო: 1. არ ვიწყალებ პოლიტპატიმრებს, რამეთუ ჩემი სრული პასუხისმგებლობით ვახცადებ, რომ საქართველოში დღეს არ არსებობენ პოლიტპატიმრები. ზვიადის და მერაბის შემდეგ, და წინა ხელისუფლების მიერ ასეულობით პოლიტპატიმრით ციხეების გადავსების მაგივრად, დღეს საბედნიეროდ ვცხოვრობთ დემოკრატიულ საქართველოში. გასაგები რომ იყოს, დავამატებ, პოლიტიკოსი, რომელიც ციხეში იხდის სასჯელს, მძიმე და ყველასთვის ცნობილი სისხლის სამართლის დანაშაულის ჩადენისთვის, პოლიტპატიმარი არ ეწოდება - იგი მხოლოდ და მხოლოდ დამნაშავე პოლიტიკოსია. ამ თემით სპეკულირება ემსახურება ქვეყნის დისკრედიტაციას, ამდენად სრულიად მიუღებელია და უნდა დასრულდეს! 2. არ ვიწყალებ უდანაშაულო ადამიანებს. შეწყალება არცერთ შემთხვევაში არ ნიშნავს სასამართლო განაჩენის გადასინჯვას ან გადაფასებას. დამნაშავე რჩება დამნაშავედ, სასჯელისგან თავისუფლდება და არა დანაშაულისგან. ანუ შეწყალება არავითარ შემთხვევაში არ ნიშნავს დამნაშავეს გამართლებას! 3. არავის, არც მანამდე, და არც ეხლა არ ვიწყალებ სხვისი თხოვნით, კარნახით, ზეწოლით, მუქარით, რეკომენდაციით, შიშით.... და ეს უკვე არაერთხელ დავამტკიცე! პრეზიდენტის ამ ექსკლუზიურ უფლებამოსილებაზე ,,უნდათი“ არავინ არ უნდა საუბრობდეს! მითუმეტეს, არ ვიწყალებ ჩემს გარეშე მიღწეული შეთანხმების საფუძველზე, რომელშიც არც მონაწილეობა მიმიღია და არც ინფორმირებული ვყოფილვარ. თუმცა არაერთხელ შევთავაზე მხარეებს საპრეზიდენტო პლატფორმის გამოყენება. მიმაჩნია, რომ პოლიტიკური შეცდომაა დამნაშავეების ბედი პირდაპირ თუ ირიბად, განიხილებოდეს თუნდაც საკონსტიტუციო, თუ საარჩევნო შეთანხმების ფარგლებში. 4. ეს შეწყალება არ ეფუძნება ჩვეულებისამებრ ჰუმანურ პრინციპებს ან ფაქტობრივ გარემოებებს, რომლის გამო შესაძლოა, ადამიანს შეუმსუბუქდეს სასჯელი ან სრულად გაუუქმდეს. ხაზი მინდა გავუსვა იმას, რომ მე ამ გადაწყვეტილებას ვიღებ, არა როგორც სალომე ზურაბიშვილი, რომელმაც ყველაზე კარგად იცის ამ ადამიანების რეალური ქმედებები და დანაშაულები ქვეყნის წინაშე, არამედ როგორც ქვეყნის პრეზიდენტი. როგორც კონსტიტუცია ამის უფლებას მანიჭებს, მარტო, ჩემი პასუხისმგებლობით. მხოლოდ და მხოლოდ ქვეყნის ინტერესებიდან გამომდინარე ვიღებ ამ გადაწყვეტილებას. როგორც საზოგადოებამ კარგად იცის, მე ამ ქვეყანაში ჩამოვედი არც პირადი ამბიციების, არც მატერიალურ ან სხვა ინტერესების დასაკმაყოფილებლად. მე მხოლოდ და მხოლოდ ჩემი სამშობლოს ბედი და მომავალი მაინტერესებდა და მაინტერესებს დღესეც. ამის გამო მოვითმინე და კიდევ მოვითმენ შეურაცხყოფას. ჩემი პრინციპულობა არსად წასულა და ზუსტად პრინციპულობის გამო ჩემს ემოციებს და პირად შეხედულებებს ქვეყნის ინტერესებზე მაღლა ვერ დავაყენებ! ახლა მთავარი- ანუ რატომ ვიღებ ამ გადაწყვეტილებას? დღეს ქვეყანა, იმის მიუხედავად, რომ ყველას მიერ აღიარებული წარმატებით გაუმკლავდა კრიზისს, იმის მიუხედავად, რომ ისეთი დემოკრატიული, თავისუფალი და სტაბილურია, როგორიც არასდროს ყოფილა დამოუკიდებლობის შემდეგ, დგას მწავე პოლიტიკური კრიზისის საფრთხის წინაშე. პირდაპირ ვიტყვი, რომ მიღწეულ შეთანხმებაში, რომელსაც მეც მივესლამე, რჩება გარკვეული ბუნდოვანება (რომლის პასუხისმგებლობა ორივე მხარეზეა), რომელმაც კითხვის ნიშნის ქვეშ შეიძლება დააყენოს საკონსტიტუციო ცვლილებები, საარჩევნო კოდექსის ცვლილებები, და მაშასადამე, საფრთხე შეუქმნას ჩვენს ერთ-ერთ მთავარ მიზანს - სამართლიანი და მშვიდი არჩევნების ჩატარებას. ოპოზიცია ამ სიტუაციით მანიპულირებას ცდილობს, არეულობის გამოწვევას, ისევ ქუჩაში პროცესესების გადატანას და ამით დესტაბილიზაციის პროვოცირებას. თუმცა ამისი ძალა ნაკლებად გააჩნია. მეორე მხრივ, ისიც არ სჩანს, რომ ,,ქართულ ოცნებას“ პოლიტიკური ვითარებიდან სწრაფი გამოსვლის და სიტუაციის განმუხტვის ბერკეტი გააჩნდეს. აქედან გამომდინარე, ვთვლი, რომ გამოსავლის პოვნა, სიტუაციის განმუხტვა, სტაბილურობის შენარჩუნება და ქვეყნის საერთაშორისო პრესტიჟის შენარჩუნება მე მევალება! ამიტომაც მივიღე ეს გადაწყვეტილება. ვერ დავუშვებ ორი დამნაშავის გამო, რომ სიტუაცია გამძაფრდეს. ვერ დავუშვებ ახალ პოლარიზაციას და დაპირისპირებას. ვერ დავუშვებ რომ ამათ გამო, საერთაშორისო თანამეგობრობის მიერ აღიარებული შეთანხმება არ შესრულდეს. სხვა შემთხვევაში ქვეყანა ვერ გაუმკლავდება, ვერც კორონას, ვერც ეკონომიკურ და ვერც სოციალურ გამოწვევებს. ჩვენი სტაბილური, დემოკრატიული და ევროპული მომავალი ამ სასწორზე დევს! რადაც არ უნდა მიღირდეს - და მერწმუნეთ ეს ნაბიჯი ჩემი მანდატის ერთ-ერთ ურთულეს გადაწყვეტილებად დარჩება - მე ორ ადამიანს ქვეყნის მომავალს ვერ გადავაყოლებ. დღეს ჩემ თავზე ვიღებ ამ მძიმე ტვირთს, ვათავისუფლებ, საზოგადოების დიდი უმრავლესობისთვის, ოდიოზურ ფიგურებს და ამავდროულად, ერთხელ და სამუდამოდ ვათავისუფლებ ქვეყანას იმ წარსულისგან, რომელიც რეალურად წინსვლაში გვაფერხებს და საფრთხეს უქმნის მომავალს. საქართველოში ჩატარდება სამართლიანი და დემოკრატიული არჩევნები და ამას ხელს ვერავინ შეუშლის!" შეგახსნებთ, რომ 2020 წლის 10 თებერვალს უზენაესმა სასამართლომ „ევროპული საქართველოს“ ლიდერ გიგი უგულავას თავისუფლების 3 წლით აღკვეთა შეუფარდა. პროკურატურა უგულავას 48 მილიონი ლარის მითვისებას ედავებოდა. საქმე ეხება თბილისის განვითარების ფონდის საქმეს. რაც შეეხება ირაკლი ოქრუაშვილს, 20 ივნისის საქმეზე განაჩენი სასამართლომ 13 აპრილს გამოიტანა. „გამარჯვებული საქართველოს“ ლიდერი 2019 წლის 25 ივლისს დააკავეს. პროკურატურა მას 20-21 ივნისის საქმეზე საქართველოს პარლამენტთან საპროტესტო აქციის დროს ჯგუფური ძალადობის ორგანიზებას ედავება.
"კომენდანტის საათის" დარღვევისთვის კიდევ 83 პირი დაჯარიმდა
შინაგან საქმეთა სამინისტროს ინფორმაციით, საგანგებო მდგომარეობის რეჟიმის და ე.წ. კომენდანტის საათის დარღვევის 93 ახალი ფაქტი გამოვლინდა. მათგან ყველაზე მეტი – 83 პირი დაჯარიმდა ე.წ. კომენდანტის საათის დარღვევისთვის, 8 – მგზავრთა გადაყვანისა და ავტომობილით გადაადგილების წესის დარღვევისთვის, ხოლო 1 – თვითიზოლაციის წესის დარღვევის. შინაგან საქმეთა სამინისტრო კვლავ მოუწოდებს მოქალაქეებს, დაიცვან საგანგებო მდგომარეობის ფარგლებში დაწესებული შეზღუდვები, წინააღმდეგ შემთხვევაში, აფრთხილებს, რომ გამოყენებული იქნება კანონით გათვალისწინებული, შესაბამისი ზომები. საქართველოს ტერიტორიაზე მყოფი ყველა პირი ვალდებულია, დაიცვას საგანგებო რეჟიმი და დაემორჩილოს საზოგადოებრივი ჯანმრთელობის სფეროში მოქმედ საქართველოს კანონმდებლობის მოთხოვნებს. საგანგებო მდგომარეობის რეჟიმის დარღვევა იწვევს ადმინისტრაციულ პასუხისმგებლობას – ფიზიკური პირის დაჯარიმებას 3 000 ლარით, ხოლო იურიდიული პირის – 15 000 ლარით.
საქართველოში ბოლო 24 საათში COVID–19 ექვს პირს დაუდასტურდა
საქართველოში კორონავირუსით ინფიცირების შემთხვევათა რაოდენობა 6-ით გაიზარდა და 677 გახდა. ამის შესახებ ინფორმაცია მთავრობის მიერ შექმნილ სპეციალურ ვებ-გვერდზე stopcov.ge-ზე არის განთავსებული. კარანტინის რეჟიმშია 3873 ადამიანი, ხოლო სტაციონარში მეთვალყურეობის ქვეშ - 404 პირი. ინფორმაციისთვის: 677 ინფიცირებული ადამიანიდან 393 გამოჯანმრთელებულია, ხოლო 12 გარდაიცვალა. ამასთან, უცხოეთიდან სამკურნალოდ გადმოყვანილია საქართველოს 3 მოქალაქე.
საგარეო უწყება - 16 მაისის მონაცემებით, ადგილზე დახმარება გაეწია უცხოეთში მყოფ 20 538 მოქალაქეს, ხოლო სამშობლოში დაბრუნდა 11 235
საზღვარგარეთ საქართველოს დიპლომატიური მისიები, საქართველოს საკოორდინაციო საბჭოს მითითებით და საგარეო საქმეთა სამინისტროს ცენტრალურ აპარატთან კოორდინაციით, განაგრძობენ დადგენილი კრიტერიუმებით საზღვარგარეთ მყოფი საქართველოს მოქალაქეების დახმარებას. ამის შესახებ ინფორმაციას საგარეო საქმეთა სამინისტრო ავრცელებს. მათივე ცნობით, 2020 წლის 16 მაისის მონაცემებით, საქართველოს დიპლომატიურმა წარმომადგენლობებმა ადგილზე დახმარება აღმოუჩინეს 20,538 მოქალაქეს, ხოლო სამშობლოში - მთავრობის ხელშეწყობით - საკოორდინაციო საბჭოს მიერ დაგეგმილი რეისების, სახმელეთო და საზღვაო გზებით, ორგანიზებულად დაბრუნდა 11,235 მოქალაქე. „საქართველოს საგარეო საქმეთა სამინისტროს ვებ-გვერდზე ყოველ დღე ახლდება მონაცემები COVID-19-ის გავრცელების პირობებში უცხოეთში მყოფი საქართველოს მოქალაქეების დახმარების შესახებ. აღნიშნული მონაცემები ორი სახის ინფორმაციას შეიცავს, კერძოდ სამშობლოში დაბრუნებამდე უცხოეთში მყოფ მოქალაქეებზე ზრუნვა და მათი ეტაპობრივი დაბრუნების სტატისტიკა. როგორც ცნობილია, მოქალაქეების სამშობლოში ეტაპობრივი დაბრუნების ეფექტიანი ორგანიზების და მათი ადგილზე დახმარების მიზნით, მოქალაქემ უნდა შეავსოს ელექტრონული ფორმით სპეციალური განაცხადი, რომელიც გამოქვეყნებულია სამინისტროს ვებ-გვერდსა და საქართველოს დიპლომატიური წარმომადგენლობების ვებ-გვერდებზე. აღნიშნულ განაცხადში მოცემული მონაცემების დამუშავების შემდგომ მიღებული იქნება შესაბამისი გადაწყვეტილება. https://mfa.gov.ge/MainNav/CoVID-19-sakitkhebi/CoVID-19-mfa-stats.aspx ახლო მომავალში, საკოორდინაციო საბჭოს მიერ განსაზღვრული ავიარეისების ფარგლებში, დაგეგმილია შემდეგი ფრენების განხორციელება: 18 მაისი - ლარნაკა-თბილისი; 20 მაისი - ათენი-თბილისი; 22 მაისი - რომი-თბილისი“, - ნათქვამია ინფორმაციაში.
რუსეთში, ბოლო 24 საათში კორონავირუსის 9200 ახალი შემთხვევა გამოვლინდა, 119 ადამიანი დაიღუპა
რუსეთში, ბოლო დღე-ღამის მანძილზე კორონავირუსის 9200 ახალი შემთხვევა გამოვლინდა და საერთო ჯამში ინფიცირებულთა რაოდენობამ 272 043-ს გადააჭარბა. ამასთან, ქვეყანაში უკანასკნელი 24 საათის განმავლობაში ვირუსით 119 ადამიანი დაიღუპა და მთლიანობაში გარდაცვლილთა რაოდენობამ 2 537-ს მიაღწია. ოფიციალური ინფორმაციით, ამ დროისთვის, რუსეთში ვირუსისგან 63 166 ადამიანი გამოჯანმრთელდა, ხოლო აქტიური შემთხვევების რაოდენობა 206 340-ს შეადგენს.
ბოლნისში კორონავირუსი კიდევ ექვს პირს დაუდგინდა
ბოლნისში კორონავირუსი კიდევ ექვს პირს დაუდგინდა. ბოლნისის ადგილობრივი მუნიციპალიტეტის ინფორმაციით, ახალი დადასტურებული შემთხვევიდან ოთხი სოფელი გეტადან, ხოლო ორი სოფელი მუშევანიდანაა. ამ ორივე დასახლებაში მკაცრი საკარანტინო რეჟიმი მოქმედებს. სოფელ გეტას კლასტერთან ამ დროისთვის 17 დადასტურებული შემთხვევა ფიქსირდება. სოფელ გეტაში ზომები 15 მაისიდან გამკაცრდა. სოფელ მუშევანში ინფიცირებულთა რიცხვი, დღეს დადასტურებული ორი შემთხვევის გათვალისწინებით, უკვე 40-მდე გაიზარდა. ამ დასახლებაში მკაცრი საკარანტინო რეჟიმი 25 აპრილის შემდეგ მოქმედებს. საერთო ჯამში, ლაბორატორიაში გაგზავნილი იყო 156 პირის საკვლევი მასალა. ამ დროისთვის ბოლნისის მუნიციპალიტეტში უკვე 145 დადასტურებული შემთხვევა ფიქსირდება, მათგან 51 გამოჯანმრთელდა, სამი ინფიცირებული კი გარდაიცვალა. ოფიციალური ინფორმაციით, საქართველოში ამ დროისთვის კორონავირუსის 677 შემთხვევა ფიქსირდება.
სუს-ი - ფახულანისა და საბერიოს მონაკვეთზე საოკუპაციო ძალების მიერ უკანონო ე.წ. ბორდერიზაცია ხორციელდება
ოკუპირებული აფხაზეთის მიმართულებით, სოფელ ფახულანისა და სოფელ საბერიოს მონაკვეთზე, ოკუპირებულ ტერიტორიაზე საოკუპაციო ძალების მიერ უკანონო ე.წ. ბორდერიზაცია ხორციელდება, კერძოდ ხდება ადრე უკანონოდ გავლებული მავთულხლართების შეცვლა და დამატებითი უკანონო ინსტალაციების აღმართვა, – ამის შესახებ სახელმწიფო უსაფრთხოების სამსახურში აცხადებენ. მათივე ინფორმაციით, აღნიშნული ფაქტის შესახებ გააქტიურებულია ცხელი ხაზი და ინფორმირებულია ევროკავშირის სადამკვირვებლო მისია. „უკანონო ე.წ. ბორდერიზაცია აზიანებს ადგილზე არსებულ უსაფრთხოების გარემოს და ართულებს ადგილობრივი მოსახლეობის ყოველდღიურ ცხოვრებას“, – აცხადებენ სუს-ში.
"სოფლის მეურნეობის ანტიკრიზისული გეგმით გათვალისწინებული სიკეთეების შესახებ ინფორმაცია თითოეულ ფერმერამდე უნდა მივიტანოთ"
გარემოს დაცვისა და სოფლის მეურნეობის მინისტრი ლევან დავითაშვილი და პრემიერ-მინისტრის მრჩეველი რეგიონული განვითარების საკითხებში სოზარ სუბარი სახელმწიფო რწმუნებულებს შეხვდნენ. „სოფლის მეურნეობის ანტიკრიზისული გეგმა „ზრუნვა სოფელზე და ფერმერებზე“ კომპლექსურია და მნიშვნელოვანია, რომ მოსახლეობამდე სწორად მივიტანოთ. ფერმერებმა უნდა იცოდნენ, რომ სახელმწიფოს მხარდაჭერა, დახმარების პაკეტი, რომელიც მთავრობამ შეიმუშავა კრიზისული პერიოდის დასაძლევად, მათთვის ახალ შესაძლებლობებს აჩენს. ჩვენ მიერ შემუშავებული პროგრამები კარგი შესაძლებლობაა თითოეული ფერმერისთვის, მიიღოს მეტი შეღავათი სახელმწიფოსგან, განავითაროს მეურნეობა, რაც, საბოლოოდ, სოფლის მეურნეობის დარგის განვითარებაზე, აგროწარმოების ზრდასა და ქვეყნის აგროსასურსათო უსაფრთხოების უზრუნველყოფაზე აისახება“, – განაცხადა მინისტრმა. ლევან დავითაშვილმა ანტიკრიზისული გეგმის შესახებ მოსახლეობის მაქსიმალური ინფორმირებულობის უზრუნველყოფაში ადგილობრივი თვითმმართველობის ჩართულობის მნიშვნელობაზე ისაუბრა. შეხვედრაზე აღნიშნა, რომ სამინისტროს შესაბამისი სამსახურები სახელმწიფო რწმუნებულებთან ერთად იმუშავებენ ყველა იმ რგოლთან, რომელიც ფერმერებს სოფლის მეურნეობის ანტიკრიზისული გეგმით გათვალისწინებული პროგრამების შესახებ ინფორმაციას გააცნობს. როგორც პრემიერ-მინისტრის მრჩეველმა რეგიონული განვითარების საკითხებში, სოზარ სუბარმა აღნიშნა, მნიშვნელოვანია რომ დღევანდელი გამოწვევები ქვეყანამ ღირსეულად დაძლიოს და კრიზისი მინიმალურად აისახოს თითოეულ ადამიანზე. „ბოლო წლებში ძალიან სერიოზული დახმარებები ხორციელდება სოფლის მეურნეობის განვითარებისთვის. Covid-19-ით გამოწვეული კრიზისის დასაძლევად, დახმარებების პაკეტი გაიზარდა. ის, ფაქტობრივად, გათვლილია ყველა იმ ადამიანზე, ვინც სოფლად ცხოვრობს და საქმიანობს. აუცილებელია, რომ სოფლის მეურნეობის ანტიკრიზისული გეგმით გათვალისწინებული პროგრამების შესახებ ინფორმაცია მაქსიმალურად მივიდეს ფერმერებამდე, რაშიც ადგილობრივი თვითმმართველობის ორგანოების ყველა რგოლის აქტიური ჩართულობა განსაკუთრებით მნიშვნელოვანია”, – განაცხადა სოზარ სუბარმა. შეხვედრის მონაწილეებმა სოფლის მეურნეობის კუთხით რეგიონებში არსებულ პრიორიტეტულ საკითხებზე იმსჯელეს. ინფორმაციას გარემოს დაცვისა და სოფლის მეურნეობის სამინისტროს პრესსამსახური ავრცელებს.
საქართველოში ამერიკულ ბიზნესთან დაკავშირებით ოთხი კონგრესმენი აშშ-ის სახელმწიფო და სახაზინო მდივნებს წერილით მიმართავს
აშშ-ის კონგრესის ოთხი წევრი სახელმწიფო მდივან მაიკ პომპეოსა და სახაზინო მდივან სტივენ მნუჩინს წერილით მიმართავს და ამერიკელი ბიზნესის დაცვისკენ, ასევე რუსეთთან და ირანთან ივანიშვილის კავშირების შეფასებისკენ მოუწოდებს. ამის შესახებ ნათქვამია წერილის თანაავტორის, სენატორ ტედ კრუზის გვერდზე გამოქვეყნებულ პრესრელიზში. პრესრელიზს თან ახლავს პომპეოსა და მნუჩინისთვის განკუთვნილი წერილის ტექსტი, რომელსაც სენატის საგარეო ურთიერთობათა კომიტეტის წევრ ტედ კრუზთან ერთად ხელს აწერენ სენატორი ჯონ კორნინი, კონგრესმენები ჯოდი ერინტონი და მარკვეინ მალინი. წერილში ამერიკელი კანონმდებლები სახელმწიფო და სახაზინო მდივნებს მოუწოდებენ, ჩაატარონ ბრიფინგი საქართველოში მმართველობის საკითხებთან დაკავშირებულ პრობლემებზე საპასუხოდ, კერძოდ კი, საქართველოს „უკანონო ფინანსურ კავშირებზე ამერიკის მეტოქეებთან და მტრებთან, მათ შორის ირანთან, რომელიც ემუქრება აშშ-ის ეროვნულ უსაფრთხოებასა და ბიზნეს ინტერესებს“. „გწერთ, რათა გამოვხატოთ ჩვენი შეშფოთება საქართველოში კარგი მმართველობის გაუარესებისა და პოტენციური უკანონო ფინანსური საქმიანობის გამო. ჩვენს განსაკუთრებულ და მზარდ შეშფოთებას იწვევს საქართველოს კავშირები ამერიკის მტრულ მეტოქეებთან და მტრებთან, რომლებიც ჩვენს გეოსტრატეგიულ და ბიზნეს-ინტერესებს აზარალებს. ბოლო ერთი წლის განმავლობაში საქართველოში პირდაპირი უცხოური ინვესტიციები დაახლოებით 50 პროცენტით შემცირდა, ხოლო გადასახადები და ბიუროკრატიული ბარიერები დასავლური ბიზნესისთვის გაიზარდა. კარგ მმართველობასთან დაკავშირებულმა ამ საკითხებმა პირდაპირ გამოუთხარა ძირი ამერიკული კომპანიების ოპერირებისა და საქართველოსთან ჩვენი ურთიერთობების გაღრმავების შესაძლებლობას. ტეხასური კომპანია „ფრონტერა რესურსი“ საქართველოს ნავთობისა და გაზის მზარდ სექტორში უმსხვილესი ამერიკელი ინვესტორია. მათ ნავთობისა და გაზის აღმოჩენაში 500 მილიონ დოლარზე მეტი ოდენობის ინვესტიცია ჩადეს. ბოლო დროს, „ფრონტერა“ გახდა მახრჩობელა რეგულაციებისა და შეზღუდვების სამიზნე და ახლა საქართველოს მთავრობის მხრიდან შესაძლო ექსპროპრიაციის წინაშეა. 2019 წელს სხვა ამერიკული კომპანია „კონტი ჯგუფი“ ანალოგიური გზით განდევნეს კონსორციუმიდან, რომელიც ანაკლიაში პორტს აშენებს, რამაც პროექტი შეაჩერა. ეს გართულებები და წინააღმდეგობები ღრმად აღინიშნება გეოპოლიტიკური შედეგებით, „ფრონტერას“ ენერგორესურსების აღმოჩენის სამუშაოს მიზანი იყო, რომ საქართველო გამხდარიყო სტაბილური და ენერგოდამოუკიდებელი. ანაკლიაში პორტის მშენებლობის პროექტი მიმართული იყო რუსეთის საპორტო ინფრასტრუქტურაზე საქართველოს დამოკიდებულების შემცირებისკენ. მეტიც, კანონიერი ბიზნესის გაძევების შემდეგ, მისი ადგილი უკანონო ვაჭრობამ დაიკავა. ქართული ბიზნესი და საქართველოს ფინანსური სისტემა წლების განმავლობაში ცნობილი იყო სანქციებზე მომუშავე ამერიკული მაღალჩინოსნებისთვის, როგორც ირანისთვის დაწესებული ამერიკული სანქციების გვერდის ავლის საშუალება, ჯერ კიდევ 2013 წლიდან, როდესაც ჩვენი ხელისუფლებისთვის ცნობილი გახდა, რომ სამმა ირანელმა ბიზნესმენმა თბილისში მცირე საბანკო ინსტიტუტზე კონტროლი მოიპოვა და იყენებდა მას ფულის გადასაადგილებლად დამატებით საქმიანობასთან ერთად, რომელიც დაკავშირებული იყო ფულის გადაცვლასთან, შავი ზღვის სანაპიროს გასწვრივ კომპანიებთან და ავიახაზთანაც კი. ქვეყნის დასავლური ორიენტაცია მის მრავალრიცხოვან პორტებთან ერთად ხდის მას იდეალურ სამიზნედ ირანელებისთვის. მართლაც, ბოლო დროს გავრცელებული ცნობები მეტყველებს იმაზე, რომ ბათუმის პორტი კვლავ წარმოადგენს სამიზნეს ირანის უკანონო ნავთობსაქმიანობისთვის. ჩვენ ვითხოვთ ბრიფინგს იმასთან დაკავშირებით, თუ რა დონეზე: · ჩართულია საქართველოს ამჟამინდელი მთავრობა პარტია „ქართული ოცნების“ ხელმძღვანელობით კანონიერი ამერიკული ბიზნესის განდევნის ძალისხმევაში. · მოტივირებული ნებისმიერ მსგავსი საქმიანობა გეოპოლიტიკური მოსაზრებებით, მათ შორის პარტია „ქართული ოცნების“ თავმჯდომარის, ბიძინა ივანიშვილისა და რუსეთის მთავრობას შორის კავშირების შესახებ ცნობები. · აყენებს საფრთხეს საქართველოში შავი ზღვის პორტებთან დაკავშირებული საქმიანობა მნიშვნელოვან ამერიკული ეროვნულ ინტერესებს უსაფრთხოების სფეროში. საქართველო კავკასიაში სტრატეგიული პარტნიორია და ნატო-ს ასპირანტი მოკავშირეა. სამხედრო თვალსაზრისით, ქართველებმა ავღანეთში ჩვენი მისია უზრუნველყვეს რესურსებით. გეოგრაფიულად, ქვეყანა სთავაზობს მნიშვნელოვან მარშრუტს ვაჭრობისა და ენერგეტიკისთვის კასპიის ზღვიდან აღმოსავლეთ ევროპამდე. აშშ-საქართველოს საიმედო პარტნიორობა ამერიკის ინტერესების საჭიროებებში შედის, რაც თავის მხრივ, ითხოვს, რომ საქართველო მიუბრუნდეს და განავითაროს კარგი მმართველობა. ჩახლართული გეოსტრატეგიული და ბიზნეს ინტერესები საჭიროებს ფართო რეაგირებას ფედერალური მთავრობის მხრიდან და, როგორც ყოველთვის, ჩვენ მზად ვართ, უზრუნველვყოთ რესურსის მიწოდება, რომელიც გჭირდებათ აშშ-ის ეროვნული უსაფრთხოების დასაცავად“, – ნათქვამია წერილში.
საფრანგეთის ნაციონალური ორკესტრის მუსიკოსები კარანტინში „ბოლეროს“ ასრულებენ [ვიდეო]
საფრანგეთის ნაციონალური ორკესტრის მუსიკოსები კარანტინში ცნობილი ფრანგი კომპოზიტორის მორის რაველის ნაწარმოებს „ბოლეროს“ ასრულებენ. ვიდეოს ინტერნეტში მილიონობით ნახვა აქვს. „რთულ პერიოდში, რომელსაც ჩვენ ყველა განვიცდით, საფრანგეთის ეროვნული ორკესტრის მუსიკოსებს გაუჩნდათ სურვილი, მანძილის მიუხედავად, ერთად შეესრულებინათ ნაწარმოები, რათა თითოეულ ადამიანს შესთავაზონ და გაუზიარონ ის, რაც მათ ყველაზე კარგად გამოსდით – მუსიკა“, – ნათქვამია საფრანგეთის ეროვნული ორკესტრის განცხადებაში. ორკესტრის წარმომადგენელთა თქმით, სოციალური დისტანცირების პირობებში მუსიკა ადამიანების საუკეთესო დამაკავაშირებელია. მუსიკოსები იმედოვნებენ, რომ რაველის ნაწარმოების ნოტები სიხარულისა და ნუგეშის მომგვრელი იქნება ადამიანებისთვის კორონავირუსით გამოწვეულ რთულ პერიოდში.
გახარია – პოლიტიკურ მომავალზე: "ყველაფერი შესაძლებელია"
საქართველოს პრემიერ–მინისტრი გიორგი გახარია ირწმუნება, რომ საარჩევნო სიაზე არ უფიქრია. ჟურნალისტებმა მას ჰკითხეს, არის თუ არა შესაძლებელი, თავად იყოს „ქართული ოცნების“ საარჩევნო სის სათავეში. გახარიას განცხადებით, ამ საკითხზე კონსულტაციები ადრეა, რადგან ხელისუფლებას ჯერჯერობით სხვა კონკრეტული ამოცანები აქვს. „ყველაფერი შესაძლებელია ან ყველაფერი არ არის შესაძლებელი. ნუ ვჩქარობთ. ჯერ ჩვენ გვაქვს კონკრეტული ამოცანები - ეს არის პანდემია, ეკონომიკური კრიზისი, საერთოდ წარმოდგენა არ მაქვს და არც მიფიქრია ამ სიაზე, ადრეა. რა დროს კონსულტაციებია. ჩვენ დღეს იმდენი მიმდინარე საკითხი გვაქვს საოპერაციო დონეზე გასაკეთებელი, საერთოდ არც გვიფიქრია ამაზე“,- განაცხადა გახარიამ.
საფრანგეთიდან სამხედრო პროდუქციის მიღება გადაიდო
თავდაცვის და უშიშროების კომიტეტის თავმჯდომარის ირაკლი სესიაშვილის განცხადებით, თავდაცვის სამინისტროს 75 მილიონი ლარით უმცირდება ხარჯი, აქედან 30 მილიონი არის საერთაშორისო ხელშეკრულება, რომლის ფარგლებშიც საფრანგეთს სამხედრო პროდუქცია უნდა მოეწოდებინა, მაგრამ პროდუქციის მოწოდება გადაიდო. მისი თქმით, საუბარია პროექტების არა გაჩერებაზე, არამედ ვადის გადაწევაზე. „შესაბამისად, ამ პროდუქციის მოწოდების მზაობა როგორც კი იქნება, ეს თანხები აისახება უკვე მომავალი წლის ბიუჯეტში. ეს ხელშეკრულება არის საერთაშორისო ხელშეკრულება, რომლის ფარგლებშიც ჩვენ საფრანგეთისგან ვიღებთ გარკვეულ სამხედრო პროდუქციას, შესაბამისად, პანდემიის გათვალისწინებით წარმოიქმნა მოწოდების და ინსტალაციის პრობლემა და ამანაც ვადაში გადაიწია, თუმცა, პროექტი ჩვეულებრივ გაგრძელდება და ცხადია, ამ პროექტით ჩვენი ქვეყნის თავდაცვისუნარიანობა გაძლიერდება. როგორც კი პისტკრიზისული პერიოდი გაივლის, ეს ყველაფერი აღდგება, არც ერთი პროექტი არ ჩერდება,"- განაცხადა სესიაშვილმა.
თბილისის მერია 300 მიკროავტობუსის შესაძენად ტენდერს გამოაცხადებს
თბილისის მერია 300 მიკროავტობუსის შესაძენად ტენდერს გამოაცხადებს,- ამის შესახებ დედაქალაქის მერმა კახა კალაძემ განაცხადა. მისი თქმით, მერიას საგანგებო მდგომარეობის გამო მრავალი ტენდერის შეჩერება მოუწია, მათ შორის მიკროავტობუსების შესყიდვისთვის გამოცხადებულის. "მინდა, დედაქალაქის მოსახლეობას დღევანდელი მდგომარეობა გავაცნო. თბილისის მუნიციპალიტეტს შემოსავლების ნაწილში დაახლოებით, 150 მლნ ლარზე მეტი დააკლდა და შესაბამისად, ამ ეტაპზე, ზოგიერთი პროექტის განხორციელებისგან თავს შევიკავებთ, თუმცა მინდა ვთქვა, რომ თანხით, რომელიც მუნიციპალიტეტს ცენტრალური ხელისუფლებისგან სპეციალური ტრანფერის სახით ეძლევა, მიკროავტობუსების ჩანაცვლების პროგრამას განვახორციელებთ, რაც მიგვაჩნია, რომ მოსახლეობისთვის ყველაზე მნიშვნელოვანი საკითხია“, - აღნიშნა კალაძემ. მისი თქმით, მერიამ უკვე გამოაცხადა ბაზრის კვლევა. „უახლოეს მომავალში კი გამოვაცხადებთ ტენდერს და მერია 300 ერთეულ მიკროავტობუსს კვლავ შეისყიდის. რაც შეეხება დანარჩენ პროექტებს, რომლებიც მსოფლიო პანდემიის გამო მუნიციპალიტეტის შემოსავლებით ვეღარ დაფინანსდება, უკვე ვაწარმოებთ მოლაპარაკებას საერთაშორისო საფინანსო ინსტიტუტებთან, ასევე, ფინანსთა სამინისტროსთან გვქონდა საკმაოდ მჭიდრო კომუნიკაცია და მიღებულია გადაწყვეტილება, რომ ეს პროექტები დაფინანსდება საერთაშორისო საფინანსო ინსტიტუტების მიერ“, - აღნიშნა კალაძემ.
COVID-19-ით სამედიცინო სექტორის კიდევ ერთი წარმომადგენელი დაინფიცირდა
თბილისის ინფექციური საავადმყოფოს სამედიცინო დირექტორის მარინა ეზუგბაიას ინფორმაციით, საქართველოში გამოვლენილი კორონავირუსის ოთხი ახალი შემთხვევიდან ერთი საბურთალოს კლასტერს უკავშირდება, ორი იმპორტირებულია, ხოლო ერთი ერთი სამედიცინო პერსონალია. ეზუგბაიას თქმით, მისთვის უცნობია, თუ რომელი კლინიკის თანამშრომელია ახალ ინფიცირებულებს შორის. „ოთხი დადასტურებული შემთხვევიდან ერთი გახლავთ საბურთალოს წყაროდან, დაავადებულთან კონტაქტირებული პირი, ორი არის შემოტანილი, იმპორტირებული შემთხვევა, კიდევ ერთი სამედიცინო პერსონალია. ეს სამედიცინო პერსონალი არ არის ჩვენი ცენტრის“,- განაცხადა მარინა ეზუგბაიამ. მიისვე ცნობით, ამჟამად კოვიდ-ცენტრებში 119 პაციენტი მკურნალობს.
გახარია – ფერმერებს: „მარტივია ყველაფრის მოთხოვნა“
პრემიერ–მინისტრი გიორგი გახარია სოფელ ნიქოზის სანერგე მეურნეობაში შიდა ქართლის რეგიონის ფერმერებს შეხვდა და ქვეყანაში არსებულ ვითარებაზე ესაუბრა. როგორც გახარიამ აღნიშნა, ვიზიტის მიზანი ფერმერებისგან იდეების მოსმენა და შესაძლებლობების ფარგლებში დახმარების გაწევაა. „ბოლო დღეების განმავლობაში იმდენი წუწუნი მესმის ჯანიანი ბიჭების, ქალაქში ტურისტი აღარ არის, რა გვეშველება, მთავრობა რას შვრები, როდის ჩამოვა ტურისტი, მოგვეხმარეთ და ეს ქენით და ის ქენით. რეალურად ყველას უნდა ახსოვდეს, რომ ადამიანი, მამაკაცი, ახალგაზრდა, ჯანით და ენერგიით სავსე, თუ აქვს შესაბამისი სურვილი, სამართლიანობა, ღირსება, ყოველთვის შეძლებს ამ ქვეყანაში საქმე გააკეთოს ისე, როგორც ამას ფერმერი გიორგი მჭედლიძე აკეთებს. 6 თვის წინ ვიყავით ვაშლის ბაღებში, სადაც ასევე შესანიშნავი ბაღებია. იქაც ვსაუბრობდით, ბევრ რამეზე შევთანხმდით. საქმის კეთება ვისაც უნდა ყოველთვის შეძლებს, მიუხედავად რთული პირობებისა, რა პირობებში ახლა ქვეყანას უწევს ცხოვრება, საქმე აკეთოს. ყველანაირი წუწუნისა და ვიღაცებზე გადაბრალების გარეშე. ეს კაცი არის ამის მაგალითი,“ - განაცხადა გიორგი გახარიამ. მან ფერმერებს იდეების გაზიარებისკენ მოუწოდა. „სხვა ყველაფერი იქნება წუწუნი, მომეხმარეთ; ვაიმე, რა ვქნა; ეს ყველაფერი როდის გამოსწორდება, ტურისტი როდის ჩამოვა; სახელმწიფო, გამიუქმე ყველა გადასახადი, არაფრის გადახდა არ მინდა და ა.შ. სახელმწიფოს სოციალური პასუხისმგებლობა აქვს იმაზე, რომ პირველ რიგში დაეხმაროს სოციალურად დაუცველებს და ყველა იმ ადამიანს, ვისაც დახმარება პირველ რიგში სჭირდება. ჯანმრთელ, განათლებულ ადამიანს, რა თმა უნდა, უნდა შეუქმნას პირობები იმისთვის, რომ ის ჯერ თავის თავს მიეხმაროს და შემდეგ სხვებსაც. ვისაუბროთ საქმეზე. მითხარით რაღაც ისეთი, რაც შესაძლებელი იქნება, იმას გავაკეთებთ. ეგაა და ეგ. ლოკალურად თუ დახმარება გჭირდებათ იმისთვის, რომ სეზონი გადავატაროთ და 2021 წელს ეკონომიკურად უფრო ძლიერად შევხვდეთ, ამისთვისაც შეგვიძლია, რაღაც ნაბიჯები გადავდგათ, ოღონდ ეფექტუირი, რაც რეალისტური იქნება და არა ის, რომ გამიუქმეთ გადასახადები. მარტივია ყველაფრის მოთხოვნა. უნდა გვესმოდეს, რომ ეს წელი წლის ბოლომდე საკმაოდ რთული იქნება. მიუხედავად იმისა, რომ ეპიდემიას ვმართავთ, მაინც რისკის ქვეშ ვართ“,– განაცხადა გახარიამ. მისი თქმით, სოფლის მეურნეობა არის ის დარგი, რომელსაც შეუძლია არა მარტო გამოკვებოს ქვეყანა, არამედ ექსპორტის მიმართულებით პოტენციალი ჰქონდეს. „სოფლის მეურნეობა არის ის დარგი, რომელსაც შეუძლია რაღაც მიმართულებებით არა მარტო გამოკვებოს ეს ქვეყანა, არამედ ექსპორტის მიმართულებით პოტენციალიც ჰქონდეს. არ არის ეს მარტივი. მიწები ძალიან დაქუცმაცებულია, ზოგან წყლის პრობლემაა, ზოგან ცოდნის პრობლემაა, ძალიან ბევრი პრობლემაა, მაგრამ ნელ-ნელა აქეთ უნდა წავიდეთ. სოფლის მეურნეობის ინდუსტრიალიზაცია უნდა მოხდეს, მაგრამ ვერ მოხდება ეს ერთ დღეში, მაგრამ აქ არის იმის კარგი მაგალითი, როგორ შეიძლება ქცევის ამ წარმატებულ მოდელზე დაყრდნობით ახალგაზრდებმა და ყველა ჩვენგანმა გააკეთოს ეფექტური და შედეგიანი სამუშაო. ჩვენ როდესაც გადავწყვიტეთ, რომ სოფლის მეურნეობა ყოფილიყო მეორე დარგი, რომელსაც ჩვენ უნდა დავხმარებოდით, მარტივი ახსნა ჰქონდა ამას. გასაგებია, პირველი დარტყმა ტურიზმმა მიიღო, მეორე დარტყმა მიიღო სოფლის მეურნეობამ იმიტომ, რომ სოფლის მეურნეობას, რაც ჰქონდა დაგეგმილი, იყო იმ ტურიზმზეც გათვლილი, რომელიც ვერ ჩამოვიდა. შესაბამისად, ახლა ჩვენ გვესმის, რომ სოფლის მეურნეობა არის ის დარგი, რომლის დახმარებაც აუცილებელია ეკონომიკურადაც და რა თქმა უნდა, ფერმერს ახლა სჭირდება დახმარება“, - განაცხადა გიორგი გახარიამ.
რუსეთში ბოლო 24 საათში კორონავირუსით 8 404 ადამიანი დაინფიცირდა და 216 დაიღუპა
რუსეთში ბოლო 24 საათში კორონავირუსის 8 404 ახალი შემთხვევა დადასტურდა და დაინფიცირებულთა საერთო რაოდენობა 493 657 -მდე გაიზარდა. რუსეთის კორონავირუსთან ბრძოლის ოპერატიული შტაბის მონაცემებით, ქვეყანაში “კოვიდ 19”-ით კიდევ 216 ადამიანი გარდაიცვალა და დაღუპულთა რიცხვმა 6358-ს მიაღწია. რაც შეეეხება კორონავირუსისგან გამოჯანმრთელებულებს, მათი რაოდენობა რუსეთში 252 000-ს აჭარბებს.
სამხრეთ ოსეთის ტერიტორია არ არსებობს, ეს საქართველოს ოკუპირებული ნაწილია – აშშ-ის ელჩი ეუთოში
ეუთოში აშშ-ის წარმომადგენელმა, ჯეიმს სტიუარტ გილმორმა ვენაში, ეუთოს მუდმივმოქმედი საბჭოს სხდომაზე გამოსვლისას განაცხადა, რომ „არ არსებობს სამხრეთ ოსეთის ტერიტორია. ეს არის საქართველოს ოკუპირებული ნაწილი, ეს საქართველოს ტერიტორიაა“. “პირველ რიგში, მინდა გამოვეხმაურო კომენტარს სამხრეთ ოსეთის ტერიტორიაზე მისვლის შესახებ. სამხრეთ ოსეთის ტერიტორია არ არსებობს. ეს საქართველოს უკუპირებული ნაწილია. ეს ტერიტორია საქართველოს ტერიტორიაა. კომენტარი გაკეთდა სამხრეთ ოსეთის საზღვართან დაკავშირებით. სამხრეთ ოსეთის საზღვარი არ არსებობს. ეს მთლიანად საქართველოს ტერიტორიაა”, – განაცხადა გილმორმა. მან უკანონო ბორდერიზაციის განახლების შესახებაც გააკეთა კომენტარი და თქვა, რომ აშშ აღშფოთებულია რუსეთის მხარდაჭერილი ჯგუფების მიერ ინტენსიურ “ბორდერიზაციით” საოკუპაციო ხაზის გასწვრივ მდებარე 12 სოფელთან. “მოვუწოდებთ ღობეების, ნიშნების, ბარიერების, ნებისმიერი ახალი კონსტრუქციის აღმართვის დაუყოვნებლივ შეჩერებისკენ, რომელიც მიმართულია “ბორდერიზაციის” გასამყარებლად ადმინისტრაციული გამყოფი ხაზების გასწვრივ; ეს აქტივობები მოსკოვის მხრიდან 2008 წლიდან დღემდე საქართველოს ტერიტორების მიტაცების მცდელობათა სერიის გაგრძელებაა.”- განაცხადა გილმორმა. მან ასევე აღნიშნა, რომ რუსეთი ლუგარის ლაბორატორიის შესახებ დეზინფორმაციას ავრცელებს, რათა პანდემია გამოიყენოს საზიანო გავლენების გასაძლიერებლად. “ლუგარის ცენტრი დაარსდა იმისათვის, რომ გამოევლინა და ებრძოლა ისეთ ეპიდემიებთან, როგორიც COVID-19-ია. ლიმიტირებული კვლევის კანონიერი მეთოდებით, პროაქტიული დაგეგმვით და დაავადებათა მონიტორინგით, სანდო საჯარო გზავნილებით და ჯანდაცვის უწყების ოფიციალურ პირებთან კოორდინირებული კომუნიკაციით, მან მიაწოდა ინფორმაცია ჯანდაცვის უწყებას საქართველოში და ხელი შეუწყო ადამიანების გადარჩენას. მოსკოვის ეჭვები საბჭომ არ უნდა განიხილოს”, – თქვა ეუთოში აშშ-ის ელჩმა ჯეიმს სტიუარტ გილმორმა. 26 მაისს რუსეთის საგარეო საქმეთა სამინისტრომ ოფიციალურ ვებგვერდზე გამოაქვეყნა ვრცელი განცხადება, რომელშიც პრეტენზიებს და შეშფოთებას გამოთქვამდა იმის გამო, რომ მის ექსპერტებს ლუგარის ლაბორატორიაში შესვლის და შემოწმების უფლება არ ეძლევათ. განცხადებაში წერია, რომ „ლუგარის სახელობის ჯანდაცვის კვლევითი ცენტრის“ ბაზაზე უცხო სახელმწიფოების მიერ წარმოებული სამხედრო-ბიოლოგიური საქმიანობა კითხვებს ბადებს. მათ ხელში არსებული ინფორმაციით, ლაბორატორიაში მიმდინარე კვლევებს ამერიკული სამხედრო უწყებები და მათთან აფილირებული სტრუქტურები აფინანსებენ.
ბათუმის პორტში ამერიკული სამხედრო გემი შევიდა
ბათუმის პორტში ამერიკული სამხედრო გემი USS Porter შევიდა. ეს არ არის პირველი შემთხვევა, როდესაც ხომალდი საქართველოს სტუმრობს. უსაფრთხოების და სტაბილურობის მხარდასაჭერად ამერიკული გემი ბათუმის აკვატორიაში 2015 და 2019 წლებშიც იმყოფებოდა. "ვიზიტის მიზანი საზღვაო უსაფრთხოების ოპერაციებისა და რეგიონული საზღვაო სტაბილურობის გასაძლიერებლად ჩვენს ნატო–ს წევრ და მოკავშირე ქვეყნებთან ერთად ერთობლივი მზაობისა და საზღვაო შესაძლებლობების განვითარებაა", – ნათქვამია საქართველოში აშშ–ის საელჩოს მიერ გავრცელებულ ინფორმაციაში. USS Porter მართვადი სარაკეტო გამანადგურებელია. მას წყალქვეშა ნავების და ბალისტიკური რაკეტების მოგერიება შეუძლია. გემი აშშ-ის მეექვსე ფლოტის სხვადასხვა მისიებში მონაწილეობს.
ლიეტუვას ელჩი - საქართველო, იყავი მტკიცე და ევროპული მისწრაფებები შეგისრულდება
ევროკავშირს ბევრად მეტის შეთავაზება შეუძლია, საქართველო, იყავი მტკიცე და ევროპული მისწრაფებები შეგისრულდება, - ამის შესახებ ლიეტუვას ელჩი საქართველოში, გიედრიუს პუოჯუნასი, „ტვიტერში“ წერს, რითაც ის საქართველოსა და ევროკავშირს შორის ასოცირების შეთანხმების გაფორმების ექვს წლისთავს ეხმაურება. “2014 წელს საქართველომ ხელი მოაწერა ევროკავშირთან ასოცირების ხელშეკრულებას და ევროკავშირის ოჯახთან კიდევ უფრო დაახლოების გზას დაადგა. საქართველო უკვე სარგებლობს უვიზო რეჟიმითა და ღრმა და ყოვლისმომცველი თავისუფალი სავაჭრო სივრცის შეთანხმებით, ევროკავშირს ბევრად მეტის შეთავაზება შეუძლია. საქართველო, იყავი მტკიცე და ევროპული მისწრაფებები შეგისრულდება“, – წერს პუოჯუნასი.
გობლი – ბათუმის ტერმინალზე: "აჩენს იმედს, რომ საქართველო ნატო–ს დაუახლოვდეს, სწორედ ამიტომ ეწინააღმდეგება რუსეთი ამ პროექტს"
ამერიკის შეერთებული შტატების სახელმწიფო მდივნის ყოფილი მრჩევლის, ევრაზიის ქვეყნების დამოუკიდებელი მკვლევარის პოლ გობლის განცხადებით, ბათუმის პორტის ტერმინალის ისევე, როგორც ანაკლიის პროექტები აჩენენ იმედს, რომ საქართველო დაუახლოვდეს ნატო–ს, სწორედ ამიტომ ეწინააღმდეგება რუსეთი მათ განხორციელებას. ამის შესახებ გობლმა "აქცენტთან" საუბრისას განაცხადა. „ზოგადად ყველაფერი, რაც საქართველოს დასავლეთთან აახლოებს შესაძლებლობას ქმნის, გაჩნდეს იმედი, რომ ქვეყანა ალიანსში მოხვდება. სწორედ ეს და არა ეკონომიკური შედეგები არის ის, რის გამოც მოსკოვი მსგავსი პროექტების წინააღმდეგ ასე მძლავრად მუშაობს“, – განაცხადა გობლმა „აქცენტთან“ საუბრისას. კითხვაზე, „შესაძლოა თუ არა, ბათუმის ტერმინალის პროექტმა ანაკლიის ბედი გაიზიაროს, მით უფრო იმ ფონზე, როცა ამ პროექტის წინააღმდეგ აქტიურად მუშაობს რუსული პროპაგანდისტული მანქანა და ავრცელებს დეზინფორმაციას?", ექსპერტმა შემდეგი განაცხადა: „თბილისმა უნდა გააცნობიეროს, რომ ამ შემთხვევაში მოსკოვის ქმედებები არის ეგზისტენციალური საფრთხე ქვეყნის მომავლისთვის, ისეთივე სერიოზული, როგორც ოკუპაცია. რაც შეეხება იმას, რა უნდა მოიმოქმედოს საქართველოს მთავრობამ ამ დეზინფორმაციის საპირწონედ, საქმე დიპლომატიური გზით და დასავლეთის ქვეყნების მედიაში საპასუხო ინფორმაციის განთავსებით უნდა მოაგვაროს. მან ეს უნდა გააკეთოს ახლა“. შეგახსენებთ, რომ ბათუმის პორტში „კარბამიდის ტერმინალის" მშენებლობას კომპანია “Wondernet Exspress Investment Group” და ამერიკული უმსხვილესი ტრეიდული კომპანია “Trammo” ახორციელებენ. ტერმინალის ასაშენებლად 20 მილიონ დოლარზე მეტი ოდენობის ინვესტიცია ჩაიდო. ტერმინალი აღჭურვილია მინერალური სასუქების გადატვირთვისთვის საჭირო თანამედროვე ტექნოლოგიით და წლის განმავლობაში 1 200 000 ტონამდე სასუქის გადამუშავებას შეძლებს. აღსანიშნავია ისიც, რომ ბათუმის ტერმინალის მშენებლობა დასასრულს უახლოვდება და წლის ბოლოსთვის იგი უკვე სრულ მზადყოფნაში იქნება. „ტრამო“ „ფორბსის“ უმსხვილეს ამერიკულ კომპანიების სიაში 56-ე ადგილს იკავებს.
