საზოგადოება
ფრანგი სცენარისტი და რეჟისორი ჟან-კლოდ კარიერი გარდაიცვალა
ფრანგი სცენარისტი და რეჟისორი ჟან-კლოდ კარიერი 89 წლის ასაკში გარდაიცვალა. მისი გარდაცვალების შესახებ მედიას მისმა შვილმა კიარა კარიერმა აცნობა. ინფორმაციას En24news-ი ავრცელებს. როგორც კიარა კარიერმა აღინიშნა, ჟან-კლოდ კარიერს რაიმე კონკრეტული დაავადება არ აწუხებს და ის სახლში, ძილის დროს გარდაიცვალა. რეჟისორის ქალიშვილის თქმით, კარიერის დაკრძალვას აპირებენ იმ ადგილას, სადაც ის დაიბადა - საფრანგეთის სოფელ კოლუმბიერ-სურ-ორბესში. კარიერს დაწერილი აქვს 140-ზე მეტი ფილმის სცენარი.
9 თებერვლამდე 11.2 ათასი ტონა ვაშლის ექსპორტი განხორციელდა
2020 წლის 1 აგვისტოდან 2021 წლის 9 თებერვლამდე პერიოდში განხორციელდა 11.2 ათასი ტონა ვაშლის ექსპორტი, რომლის ღირებულებამ 4.8 მლნ აშშ დოლარი შეადგინა. ინფორმაციას გარემოს დაცვისა და სოფლის მეურნეობის სამიისტრო ავრცელებს. "აღნიშნულ პერიოდში განხორციელებული ვაშლის ექსპორტის მოცულობა 13-ჯერ აღემატება 2019/2020 წწ ანალოგიურ პერიოდში განხორციელებული ექსპორტის მოცულობის მაჩვენებელს, ხოლო ექსპორტის ღირებულება 4.3 მლნ აშშ დოლარით გაიზარდა. 2020 წელს წარმოებული ვაშლის ექსპორტი ძირითადად განხორციელდა რუსეთის ფედერაციაში, კერძოდ 10.8 ათასი ტონა. რუსეთის ფედერაციის გარდა, ექსპორტი განხორციელდა აგრეთვე ყაზახეთში, სომხეთში, უნგრეთში, თურქმენეთში, სინგაპურსა და ჰონკონგში", - ნათქვამია განცხადებაში.
ოკუპირებული ცხინვალის ე.წ სასამართლომ რამაზ ბეღელურს 2-თვიანი წინასწარი პატიმრობა შეუფარდა
ოკუპირებული ცხინვალის ე.წ სასამართლომ რამაზ ბეღელურს 2-თვიანი წინასწარი პატიმრობა შეუფარდა. როგორც ცნობილია, დაკავებულის ოჯახს ცხინვალიდან ამ დრომდე არავინ დაკავშირებია. ოჯახის თქმით,რამაზ ბეღელურს ჯანმრთელობის პრობლემები აქვს, მას ინსულტი 2-ჯერ გადაიტანა. ცნობისთვის, ოკუპანტებმა სოფელ გუგუტიანთკარის მკვიდრი 2 თებერვალს დააკავეს.
7 თებერვლამდე განხორციელებულმა მანდარინის ექსპორტმა 19.0 მლნ დოლარი შეადგინა
2020 წლის 1 აგვისტოდან 2021 წლის 7 თებერვლამდე პერიოდში განხორციელდა 39.0 ათასი ტონა მანდარინის ექსპორტი, რომლის ღირებულებამ 19.0 მლნ აშშ დოლარი შეადგინა. ინფორმაციას გარემოს დაცვისა და სოფლის მეურნეობის სამინისტრო ავრცელებს. მათი თქმით, აღნიშნულ პერიოდში განხორციელებული მანდარინის ექსპორტის მოცულობა 7.8 ათასი ტონით (25%), ხოლო ექსპორტის ღირებულება 2.8 მლნ აშშ დოლარით (17%) აღემატება 2019/2020 წწ ანალოგიური პერიოდის მაჩვენებლებს. "2020 წელს წარმოებული მანდარინის ექსპორტი ძირითადად განხორციელდა რუსეთის ფედერაციაში (22.5 ათასი ტონა), სომხეთსა (8.7 ათასი ტონა) და უკრაინაში (5.3 ათასი ტონა). აღნიშნული ქვეყნების გარდა, ექსპორტი განხორციელდა აგრეთვე მოლდოვაში, თურქმენეთში, ბელორუსიაში, ყაზახეთში, ლიეტუვაში, სლოვენიაში, ტაჯიკეთში, ყირგიზეთში, აზერბაიჯანში, აშშ-სა და გერმანიაში", - ნათქვამია განცხადებაში.
COVID19: ბოლო 24 საათის მონაცემები
ბოლო 24 საათში, სააქართველოში კორონავირუსი კიდევ 829 ადამიანს დაუდასტურდა, 566 გამოჯანმრთელდა, 8 კი გარდაიცვალა. ინფორმაციას მთავრობის ადმინისტრაცია ავრცელებს. მათივე ცნობით, ბოლო 24 საათში ქვეყნის მასშტაბით ჩატარდა 18 331 კვლევა ტესტით, მათ შორის 12 700 კვლევა ანტიგენის ტესტით და 5 631 PCR ტესტით. ჯამში ინფიცირებულთა საერთო რაოდენობა შეადგენს 263 057-ს, გამოჯანმრთელებულთა რაოდენობა 254 916-მდე გაიზარდა, 3 306 კი გარდაიცვალა. რაც შეეხება დადებითობის მაჩვენებელს, 8 თებერვლის მდგომარეობით, დადებითობის დღიური მაჩვენებელი არის 4.52%, ბოლო 14 დღის მანძილზე - 3.74%, ხოლო 7 დღის მანძილზე - 3.63%. 829 ახალი შემთხვევიდან 314 თბილისში გამოვლინდა, აჭარა - 37, იმერეთი - 150, ქვემო ქართლი - 37, შიდა ქართლი - 63, გურია - 43, სამეგრელო - ზემო სვანეთი - 95, კახეთი - 73, მცხეთა-მთიანეთი - 9, სამცხე-ჯავახეთი - 7, რაჭა-ლეჩხუმი და ქვემო სვანეთი - 1. მიმდინარე აქტიური შემთხვევა: 4 809, საიდანაც: 2 149 ადამიანი მკურნალობს საავადმყოფოში, მათ შორის, თბილისის საავადმყოფოებში - 996, აჭარაში - 172, იმერეთში - 464. მძიმე პაციენტი: 480. მათ შორის, თბილისში - 203, აჭარაში - 48, იმერეთში - 117. ხელოვნური სუნთქვის აპარატზე: 127, მათგან თბილისში - 91, აჭარაში- 6, იმერეთში - 17. 301 ადამიანი მოთავსებულია კლინიკურ-სასტუმროებში, მათ შორის 162 - თბილისში, 128 - აჭარაში, 11 - იმერეთში. 2 359 ინფიცირებული მკურნალობს ბინაზე. საკარანტინე სივრცეებში მოთავსებულია 430 ადამიანი, მათ შორის, თბილისში - 213, ხოლო აჭარაში - 119. სულ 6 ოქტომბრიდან - 8 თებერვლის პერიოდში, სახელმწიფო საზღვრიდან საკარანტინე სივრცეებში გადაყვანილია - 22 683 პირი. ამ ეტაპისთვის თვითიზოლაციაშია 12 970 ადამიანი, მათ შორის თბილისში - 7 685 პირი, აჭარაში - 723, იმერეთში - 1 389
ნიკოლოზ სამხარაძემ და ევროკავშირის სადამკვირვებლო მისიის ხელმძღვანელმა ზაზა გახელაძის დაპატიმრების საკითხი განიხილეს
საგარეო ურთიერთობათა კომიტეტის თავმჯდომარე, ნიკოლოზ სამხარაძე ევროკავშირის სადამკვირვებლო მისიის ხელმძღვანელს საქართველოში (EUMM), მარეკ შჩიგელს შეხვდა. გავრცელებული ინფორმაციით, მხარეებმა, ოკუპირებულ რეგიონებთან დაკავშირებულ საკითხებზე ისაუბრეს. ხაზი გაესვა ევროკავშირის სადამკვირვებლო მისიის, როგორც საქართველოში მყოფ ერთადერთ საერთაშორისო სამოქალაქო სადამკვირვებლო მისიის როლს და მნიშვნელობას. ერთ-ერთი მნიშვნელოვანი საკითხი, რაც მხარეებმა შეხვედრისას განიხილეს, ეს იყო ზაზა გახელაძის დაპატიმრება და მისთვის დე ფაქტო სასამართლოს მხრიდან 12 წლით პატიმრობის აღკვეთის შეფარდება. „აუცილებელია, რომ ეს საკითხი სასწრაფოდ იქნას დაყენებული უმაღლეს დონეზე, როგორც დე ფაქტო ხელისუფლების ასევე, რუსეთის ფედერაციის ხელისუფლებისგან მოვითხოვოთ ზაზა გახელაძის დაუყოვნებლივი გათავისუფლება“, - აღნიშნა შეხვედრისას ნიკოლოზ სამხარაძემ. მისი თმით, ევროკავშირის მონიტორინგის მისიის ხელმძღვანელმა დახმარება აღგვითქვა და აღნიშნა, რომ ის მუდმივად მუშაობს არა მხოლოდ გახელაძის საკითხზე, არამედ სხვა უკანონო პატიმრების საკითხზეც. მისივე თქმით, უახლოეს მომავალში, როდესაც იქნება კონტაქტი როგორც დე ფაქტო ასევე, რუსეთის ფედერაციის ხელისუფლებასთან მონიტორინგის მისია ძალ-ღონეს არ დაიშურებს, რათა ეს საკითხი ძალიან მაღალ დონეზე დადგეს დღის წესრიგში. შეხვედრისას მხარეებმა, ოკუპირებულ რეგიონში არსებულ ძალიან მძიმე ჰუმანიტარულ ვითარებაზეც ისაუბრეს, რაც ნიკოლოზ სამხარაძის თქმით, კიდევ უფრო დაამძიმა კოვიდ 19-ის პანდემიამ და ასევე, იმ ფაქტმა, რომ არც აფხაზეთის და არც ცხინვალის რეგიონის მცხოვრებლებს არ აქვთ უფლება გადმოვიდნენ დანარჩენი საქართველოს ტერიტორიაზე. შეხვედრისას, ყურადღება გამახვილდა ასევე, მონიტორინგის მისიის როლზე, როგორც მიუკერძოებელ დამკვირვებელზე, რომელიც ობიექტურ ინფორმაციას აწვდის არა მხოლოდ ევროკავშირს, არამედ, მთლიანად საერთაშორისო საზოგადოებას იმაზე, თუ რა ხდება ოკუპირებულ რეგიონებში. „მნიშვნელოვანი საკითხი, რაზეც ასევე ვისაუბრეთ, არის ევროკავშირის მისიის როლი რუსეთიდან მომდინარე საფრთხეების გასანეიტრალებლად და შემდგომი აგრესიისგან თავის დასაცავად, რაშიც ევროკავშირის მონიტორინგის მისიას ძალიან დიდი პასუხისმგებლობა აქვს. ჩვენ მოხარულები ვართ, რომ ეს მისია 2020 წლის დეკემბერში კიდევ ორი წლით გაგრძელდა“, - განაცხადა შეხვედრის დასრულების შემდეგ ნიკოლოზ სამხარაძემ.
ყურძნის ხარისხის კონტროლი გამკაცრდება
ქართული ღვინის ხარისხის გაუმჯობესების მიზნით, რთველი 2021-ის ფარგლებში, ყურძნის ხარისხის კონტროლი გამკაცრდება. ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს. მათი თქმით, ჩასაბარებელი ყურძნის შაქრიანობა, რომელიც შესაბამისი ნორმატიული დოკუმენტაციებითაა დადგენილი, განსაზღვრავს ყურძნის ხარისხს, რაც შემდგომ მის საბაზრო ღირებულებაზეც აისახება. გარდა ამისა, კონტროლი განხორციელდება ადგილწარმოშობის ჯიშების სპეციფიკაციებით განსაზღვრულ მოსავლიანობის ლიმიტზე. აღნიშნული საკითხი გარემოს დაცვისა და სოფლის მეურნეობის მინისტრის მოადგილემ, ოთარ შამუგიამ კახეთის სამხარეო ადმინისტრაციის ხელმძღვანელებთან, ადგილობრივ მაჟორიტარ დეპუტატებთან და მუნიციპალიტეტების მერებთან თელავში გამართულ შეხვედრაზე განიხილა. „ძალიან მნიშვნელოვანია, ქართული ღვინის ხარისხის გაუმჯობესების მიმართულებით დაგეგმილი ღონისძიებების შესახებ ინფორმაცია დროულად იყოს მიტანილი მევენახე ფერმერებამდე. ამ მიმართულებით აქტიურად იმუშავებენ სამინისტროს საინფორმაციო-საკონსულტაციო სამსახურები, რომლებიც ღვინის ეროვნული სააგენტოს წარმომადგენლებთან ერთად, უახლოეს დღეებში დაიწყებენ შეხვედრებს რეგიონებში, ადგილობრივი ხელისუფლების წარმომადგენლებთან და ფერმერებთან. გარდა ამისა, მიმდინარე წელს იგეგემება ვენახების კადასტრის პროგრამის დასრულება კახეთისა და რაჭა-ლეჩხუმის რეგიონებში, რაც მნიშვნელოვანია მევენახეობა-მეღვინეობის დარგის განვითარების და ხარისხიანი ღვინის წარმოების ხელშეწყობისთვის“, - განაცხადა მინისტრის მოადგილემ. ღვინის ეროვნული სააგენტოს თავმჯდომარემ, ლევან მეხუზლამ ხაზგასმით აღნიშნა, რომ ქართული ღვინის ხარისხის გაუმჯობესება მუდმივი პროცესია და სწორედ ვენახის მოვლასა და ყურძნის კონდიციაზეა დამოკიდებული ქართული ღვინის ხარისხი, მისი საერთაშორისო რეპუტაცია და, შესაბამისად, საექსპორტო ფასი. სოფლის განვითარების სააგენტოს რეგიონებთან ურთიერთობის დეპარტამენტის უფროსმა, ლაშა შალამბერიძემ შეხვედრაზე იმ აქტივობებზე ისაუბრა, რომელთა ფარგლებშიც, ფერმერები ამომწურავ ინფორმაციას მიიღებენ სამინისტროს მიერ დაგეგმილ და მიმდინარე პროექტებზე, მათ შორის, მაღალი ხარისხის ქართული ღვინის წარმოების მიზნით დაგეგმილ ღონისძიებებზე. კახეთის სამხარეო რწმუნებულის მოვალეობის შემსრულებლის, ირაკლი შიოშვილის განცხადებით, კადასტრის პროგრამის დასრულება და მის საფუძველზე რთველის ჩატარება განსაკუთრებით მნიშვნელოვანია კახეთის რეგიონისთვის, სადაც ვენახების ფართობები ყოველწლიურად იზრდება; რთველის ორგანიზებულად ჩატარება კი, ხელისუფლების ერთ-ერთი პრიორიტეტია.
პოლიციამ, ყალბი საბანკო ამონაწერის დამზადების გამო, ერთი ადამიანი დააკავა
უკანასკნელ პერიოდში, საბანკო დაწესებულებებიდან კრედიტის უკანონოდ მიღების მიზნით, ყალბი დოკუმენტაციის წარდგენის შემთხვევების ზრდის გათვალისწინებით, საქართველოს ფინანსთა სამინისტროს საგამოძიებო სამსახურის თანამშრომლების მიერ დაიგეგმა და გატარდა შესაბამისი ღონისძიებები, რომელთა შედეგად, ყალბი დოკუმენტების დამზადება-გასაღების ფაქტზე, დაკავებულია ერთი პირი. აღნიშნულ ინფორმაციას ფინანსთა სამინისტროს საგამოძიებო სამსახური ავრცელებს. "გამოძიებით დადგინდა, რომ ბრალდებულმა, მიმდინარე წლის თებერვლის დასაწყისში, 750 (შვიდას ორმოცდაათი) ლარის სანაცვლოდ, ბანკიდან კრედიტის მიღების მსურველ ერთ-ერთ პირს დაუმზადა ყალბი საბანკო ამონაწერი, რომლის თანახმადაც, მოქალაქეს ხელფასის სახით ყოველთვიურად ვითომდა ერიცხებოდა 2 740 (ორი ათას შვიდას ორმოცი) ლარი. საგამოძიებო მოქმედებების შედეგად, ამოღებულია დანაშაულებრივი გზით მოპოვებული ფულადი თანხა, ოც სხვადასხვა პირზე გაცემული ყალბი საბანკო ამონაწერები და ყალბი დოკუმენტების დასამზადებლად განკუთვნილი ერთ-ერთი კომერციული ბანკისა და მიკროსაფინანსო ორგანიზაციის შტამპები", - ნათქვამია განცხადებაში. გამოძიება მიმდინარეობს საქართველოს სისხლის სამართლის კოდექსის 210-ე, 362-ე და 208-ე მუხლების პირველი ნაწილებით, რაც სასჯელის სახით ითვალისწინებს თავისუფლების აღკვეთას 2-დან 5 წლამდე ვადით. გრძელდება შესაბამისი ღონისძიებები, აღნიშნული დანაშაულის ჩამდენი სხვა პირების დადგენა-მხილების მიზნით.
თეთრი სახლის პრესმდივანი: ჯო ბაიდენი ტრამპის იმპიჩმენტის პროცედურას დიდ დროს ვერ დაუთმობს
"ჯო ბაიდენი საკმაოდ დაკავებულია და დონალდ ტრამპის იმპიჩმენტის პროცედურას დიდ დროს ვერ დაუთმობს", - ამის შესახებ თეთრი სახლის პრესმდივანმა ჯენ ფსაკმა ორშაბათს განაცხადა. ინფრომაციას CNN-ი ავრცელებს. როგორც პრესმდივანმა განაცხადა, ბაიდენს მთელი კვირის გრაფიკი უკვე გადატვირთული აქვს. "თავად პრეზიდენტი გეუბნებოდა, რომ საკმაოდ დატვირთულები ვართ და მას უკვე აქვს კვირის სრული განრიგი", - განუცხადა ჟურნალისტებს ჯენ ფსაკმა. მისი თქმით, ჯო ბაიდენის გრაფიკი მოიცავს ვიზიტებს ჯანმრთელობის ეროვნულ ინსტიტუტებსა და თავდაცვის დეპარტამენტში, გარდა ამისა, ის შეხვდება ბიზნესის ლიდერებს, მერებს და გუბერნატორებს. ასევე, ფსაკის თქმით, ბაიდენი კავშირზე იქნება წარმომადგენელთა პალატის სპიკერ პელოსისთან და სხვა კონგრესმენებთან. როგორც პრესმდივანმა განაცხადა, ჯო ბაიდენი იმპიჩმენტის პროცესის განმავლობაში ამ საკითხთან დაკავშირებით კომენტარს არ გააკეთებს. ცნობისთვის, დღეს აშშ-ის სენატში ყოფილი პრეზიდენტის, დონალდ ტრამპის იმპიჩმენტის პროცესი დაიწყება. აშშ-ის კონგრესის წარმომადგენელთა პალატის მიერ ტრამპის იმპიჩმენტის რეზოლუციის ტექსტში მითითებულია, რომ მას ბრალად ამბოხის წაქეზება ედება.
დღეს უსაფრთხო ინტერნეტის საერთაშორისო დღეა
9 თებერვალს საქართველოში უსაფრთხო ინტერნეტის საერთაშორისო დღე აღინიშნება. ამით საქართველო უერთდება მსოფლიო ინიციატივას, რომლის მიზანია მხარი დაუჭიროს ინტერნეტის და ციფრული ტექნოლოგიის პოზიტიურ და უსაფრთხო გამოყენებას ბავშვებისა და მოზარდების, ახალგაზრდებისა და მშობლების მიერ ინფორმირებულობის დონის ამაღლების გზით. უსაფთხო ინტერენტის დღის (Safer Internet Day) ჩატარება დაიწყო 2004 წელს. ამჟამად ყოველწლიურად ეს დღე 130-ზე მეტ ქვეყანაში აღინიშნება.
თენგიზ ცერცვაძე: ძალიან მეშინია, გაბოროტებულმა ადამიანებმა რამე არ მოიმოქმედონ, რაც დაავადების აფეთქებას გამოიწვევს
„ისე მიდის საქმე, რომ ყველაფერი ძალიან მალე უნდა გაიხსნას. ალბათ ორი კვირაში, მაქსიმუმ ერთ თვეში. მაგრამ მე ძალიან მეშინია, რაც გუშინწინ მოხდა. ძალიან მეშინია, რომ იმ გაბოროტებულმა ადამიანებმა, რომლებმაც ვერ გადაიტანეს ის, რომ ქვეყანა წარმატებით მართავს კოვიდპანდემიას, რამე არ მოიმოქმედონ, რაც აფეთქებას გამოიწვევს. თუ ეს არ მოხდება, ყველაფერი ძალიან მალე გაიხსნება“, - განაცხადა დღეს ინფექციური საავადმყოფოს ხელმძღვანელმა ჟურნალისტებთან საუბრისას. თენგიზ ცერცვაძის განცხადებით, კომენდანტის საათიც ყოველგვარი დოლ-გარმონის გარეშე მოიხსნება და „დაუმორჩილებლობის აქცია“, (რედ: სადაც სხვადასხვა მუსიკალური ინსტრუმენტის თანხლებით გამოხატეს პროტესტი), საჭირო არ არის. „იმის მაგივრად, რომ ერთმანეთს დავუდგეთ გვერდით, პირბადეების ტარებით, სოციალური დისტანცირებით და სხვა, რა მოხდა - ძალიან ცუდი რამ. იყო საპროტესტო აქცია კომენდანტის საათის გაუქმების მოთხოვნით. ეს მიმაჩნია პოპულისტურ, გაუმართლებელ, პროვოკაციულ ნაბიჯად და რატომ. ქვეყანა შესანიშნავად მართავს კოვიდსიტუაციას, საათივით აწყობილად მუშაობს კლინიკური სექტორი, მაქსიმალურად მოიხსნა შეზღუდვები - იმის მაგივრად, რომ ამას მადლიერება და გვერდით დგომის სურვილი გამოეწვია, ზოგიერთში გამწარების და გაბოროტების სურვილი გამოიწვია - რომ თუ ყველაფერი კარგად არის, ისინი ფუნქციას კარგავენ, ეს აშკარად იკითებოდა, რაც ძალიან სამწუხაროა“, - აცხადებს ინფექციონისტი თენგიზ ცერცვაძის განცხადებით, დაუმორჩილებლობის აქციის მონაწილეებს ქვეყანაში პანდემიის დასრულება არ აინტერესებთ და პირიქით, აღიზიანებთ, რომ პანდემია დაძლევისკენ მიდის. ამავე თემაზე: თენგიზ ცერცვაძე: ისე მიდის საქმე, რომ ყველაფერი ძალიან მალე უნდა გაიხსნას
ფონიჭალაში ბავშვების სავარაუდო ნიშნობის ფაქტზე შსს-მ გამოძიება დაიწყო
ფონიჭალაში 11 და 15 წლის ბავშვების სავარაუდო ნიშნობის ფაქტზე შსს-მ გამოძიება დაიწყო. რამდენიმე დღის წინ სოციალურ ქსელში ბავშვების “ნიშნობის” ამსახველი ვიდეო გავრცელდა. კადრებში ნიშნობის ბეჭდების გაცვლის პროცესი ჩანს. შსს-ს ცნობით გამოძიება სისხლის სამართლის კოდექსის 150-ე პრიმა მუხლით დაიწყო, რაც ქორწინების იძულებას გულისხმობს. გამოძიებამ მცირეწლოვნების მშობლები გამოკითხვაზე დაიბარა. "ვიდეომასალაში აღბეჭდილი გარემოებების დადგენის მიზნით, აღნიშნულ სისხლის სამართლის საქმეზე ტარდება ყველა რელევანტური საგამოძიებო და საპროცესო მოქმედება", - შსს-ში.
თბილისში იტალიური სახლის ნაწილი დაიწვა
თბილისში, გრიგოლ ხანძთელის ქუჩაზე საცხოვრებელ სახლში ხანძარია უკვე ლოკალიზებულია. ინფორმაციას საგანგებო სიტუაციების მართვის სამსახური ავრცელებს. მათივე ცნობით, შემთხვევის შედეგად არავინ დაშავებულა. „შინაგან საქმეთა სამინისტროს საზოგადოებრივი უსაფრთხოების მართვის ცენტრ „112"-ში შემოვიდა ინფორმაცია თბილისში, გრიგოლ ხანძთელის ქუჩაზე საცხოვრებელ სახლში გაჩენილი ხანძრის შესახებ. ცეცხლი გავრცელებული იყო იტალიური ტიპის სამსართულიანი სახლის სასხვენო გადახურვაზე. ადგილზე უმოკლეს დროში გამოცხადდნენ საგანგებო სიტუაციების მართვის სამსახურის თანამშრომლები და დაიწყეს ხანძრის ქრობის სამუშაოები. სახანძრო-სამაშველო ჯგუფების მიერ შენობიდან დროულად მოხდა 12 მოქალაქის უსაფრთხო ადგილას უვნებლად გამოყვანა. მათ სიცოცხლეს და ჯანმრთელობას საფრთხე არ ემუქრება. ადგილზე მუშაობდა 12 სახანძრო-სამაშველო ჯგუფი. მობილიზებული იყო ყველა შესაბამისი სამსახური“, - ნათქვამია გავრცელებულ ინფორმაციაში.
თენგიზ ცერცვაძე: ისე მიდის საქმე, რომ ყველაფერი ძალიან მალე უნდა გაიხსნას
„ისე მიდის საქმე, რომ ყველაფერი ძალიან მალე უნდა გაიხსნას“, - ამის შესახებ ინფქციური საავადმყოფოს ხელმძღვანელმა განაცხადა, როდესაც უპასუხა შეკითხვას, როდის გაიხსნება სპორტ დარბაზები. „ისე მიდის საქმე, რომ ყველაფერი ძალიან მალე უნდა გაიხსნას. ალბათ ორი კვირაში, მაქსიმუმ ერთ თვეში, მაგრამ მე ძალიან მეშინია, რაც გუშინწინ მოხდა, მე ძალიან მეშინია, რომ იმ გაბოროტებულმა ადამაინებმა, რომლებმაც ვერ გადაიტანეს ის, რომ ქვეყანა წარმატებით მართავს კოვიდპანდემიას, რამე არ მოიმოქმედონ, რაც აფეთქებას გამოიწვევს. თუ ეს არ მოხდება, ყველაფერი ძალიან მალე გაიხსნება“, - აღნიშნა თენგიზ ცერცვაძემ. მან „დაუმორჩილებლობის აქციაზეც“ ისაუბრა და განაცხადა, რომ კომენდანტის საათიც ყოველგვარი დოლ-გარმონის გარეშე მოიხსნება. მისივე თქმით, აქციის მონაწილეთა მიზანი, როგორც ჩანს, ეპიდსიტუაციის გამწვავება იყო. თენგიზ ცერცვაძის თქმით, დაუმორჩილებლობის აქციის მონაწილეებს ქვეყანაში პანდემიის დასრულება არ აინტერესებთ და პირიქით, აღიზიანებთ, რომ პანდემია დაძლევისკენ მიდის. „როგორც ცეცხლთან, ისე არ შეიძლება პანდემიასთან თამაში, ვიწრო პარტიული ამბიციების გავლენების ქვეშ. აქ ყველა უნდა ვიყოთ პრინციპული, თანმიმდევრულ და უნდა ვაკეთოთ ის, რისი კეთებაც საჭიროა“, - აღნიშნა თენგიზ ცერცვაძემ. საქართველოში კორონავირუსი დღეს კიდევ 204 ადამიანს დაუდასტურდა, 736 კი გამოჯანმრთელდა. დადებითობის მაჩვენებელი მნიშვნელოვნად შემცირდა.
ამირან გამყრელიძე: ხანდაზმულებში „ასტრაზენაკას“ ვაქცინამ დამაკმაყოფილებელი, დამცველობითი უნარი ვერ აჩვენა
ზოგიერთმა ქვეყანამ „ასტრაზენეკას“ ვაქცინით 65 წელს ზემოთ მოსახლეობის აცრაზე რეკომენდაცია არ გასცა, თუმცა ევროკავშირის წამლის სააგენტომ ის ყველა ასაკის ჯგუფისთვის დაამტკიცა - ამის შესახებ დაავადებათა კონტროლის ეროვნული ცენტრის დირექტორმა ამირან გამყრელიძემ პირველი არხის ეთერში განაცხადა. გამყრელიძის განმარტებით, ამის მიზეზი გახდა კვლევები, რომელმაც ზოგიერთ ქვეყანაში აჩვენა, რომ 65 წელს ზემოთ მოქალაქეებში „ასტრაზენაკას“ ვაქცინამ ისეთი დამცველობითი უნარი ვერ გამოიჩინა, როგორც სხვა ასაკობრივ ჯგუფებში. მისი თქმით, სხვადასხვა გამოცემების მიერ გამოქვეყნებული კვლევების მიუხედავად, ეს მოსაზრება დასაბუთებული არ არის და ევროკავშირის წამლის სააგენტოს პრეპარატთან დაკავშირებით დასკვნაში ცვლილებები არ შეუტანია. „ამ სტატიებში „ატრაზენაკას“ მიერ წარმოებულ გართულებებზე არ არის საუბარი, ძირითადად საუბარია, რომ ზოგიერთ ქვეყანაში სხვადასხვა კვლევებმა აჩვენა, რომ 65 წელს ზემოთ მოქალაქეებში ისეთი დამცველობითი უნარი ვერ გამოიჩინა ამ ვაქცინამ, როგორიც სხვა ასაკობრივ ჯგუფში. ამიტომ, ზოგიერთმა ქვეყანამ არ მისცა რეკომენდაცია 65 წელს ზემოთ მოსახლეობის აცრაზე. ასევე გამოჩნდა პირველი სტატიები სამხრეთ აფრიკულ შტამთან დაკავშირებით, რომ „ასტრაზენეკას“ ვაქცინას ნაკლები დამცველობითი უნარი აქვს ამ შტამზე, მაგრამ ჯერჯერობით ამის შესახებ არც ევროკავშირის წამლის სააგენტოს და არც ჯანმრთელობის მსოფლიო ორგანიზაციის დასკვნა არ არსებობს. ეს ორი მარეგულირებელი არის ჩვენთვის მთავარი. წამლის სააგენტომ ეს ვაქცინა დაამტკიცა ყველა ასაკის ჯგუფისთვის. ჯანმრთელობის მსოფლიო ორგანიზაციას ჯერ არ დაუმტკიცებია და თებერვლის ბოლოსთვის დაამტკიცებს, ამიტომ, ვნახავთ როგორი იქნება ჯანმრთელობის მსოფლიო ორგანიზაციის რეკომენდაცია. რა თქმა უნდა, ამ რეკომენდაციებს მივყვებით და მივიღებთ გადაწყვეტილებას“, – განაცხადა ამირან გამყრელიძემ. შეგახსენებთ რომ "ფაიზერის" ვაქცინის გარდა, საქართველოში "Astra Zeneka"-ს ვაქცინის შემოტანაც განიხილება.
ამირან გამყრელიძე: შეზღუდვების მოხსნის გამო, არ უნდა შეიქმნას ილუზია, რომ ვირუსი დავამარცხეთ
დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, მუნიციპალირი ტრანსპორტის ამოქმედება კორონავირუსის გავრცელების ყველაზე დიდი რისკფაქტორია. მისი თქმით, შეზღუდვების შემსუბუქების გამო არ უნდა შეიქმნას ილუზია, რომ ვირუსი დავამარცხეთ. "შეზღუდვების შემსუბუქება ხდება იმიტომ, რომ ეპიდსიტუაცია სტაბილიზაციისკენ წავიდა, მნიშვნელოვნად შემცირდა ყველა ინდიკატორი – ახალი შემთხვევები 100 ათას მოსახლეზე, სიკვდილიანობა, დადებითობის მაჩვენებელი. შეზღუდვების ყველანაირი შემსუბუქება ინფექციის გავრცელების მომატებული რისკფაქტორია და კიდევ მეტი რისკფაქტორია ისეთი შემსუბუქება, როგორიც არის მუნიციპალური ტრანსპორტი. ეს არის ერთ-ერთი ყველაზე მაღალი მობილობის ფაქტორი, მაგრამ, თუ ვიცავთ ყველა პირობას და რეგულაციას, პირველ რიგში, ვატარებთ პირბადეს, რისკფაქტორი მნიშვნელოვნად მცირდება. არ უნდა შევიქმნათ ილუზია, რომ კორონავირუსი დავამარცხეთ, აღარ არის და იმიტომ შევამსუბუქეთ შეზღუდვები. შემსუბუქების პარალელურად, მკაცრად უნდა გაკონტროლდეს რეგულაციები. ინფექცია არსად გამქრალა, ვირუსი ცირკულირებს. სტატისტიკა ყოველდღიურად მერყეობს 400-600 შემთხვევას შორის. ეს 5-6-ჯერ ნაკლებია, ვიდრე გვქონდა ნოემბერ-დეკემბერში, მაგრამ მაინც გასათვალისწინებელია. თუ ყველა რეგულაცია იქნება დაცული, ეპიდაფეთქების ალბათობა ნაკლები იქნება", - აცხადებს ამირან გამყრელიძე. შეგახსნეებთ, რომ დღეიდან ყველა ქალაქში, მათ შორის თბილისში მუნიციპალური ტრანსპორტი ამოქმედდა. 15 თებერვლიდან გაიხსნება სკოლები, საბავშვო ბაღები და ღია სივრცეში კვების ობიექტები.
AP News-ი: ჯო ბაიდენის ადმინისტრაცია გაეროს ადამიანის უფლებათა საბჭოში დაბრუნებას გეგმავს
AP News-ის ცნობით, აშშ-ის სახელმწიფო მდივანი ენტონი ბლინკენი დღეს განაცხადებს, რომ ვაშინგტონი ჟენევაში დაფუძნებულ გაეროს ორგანიზაციას დამკვირვებლის სტატუსით უბრუნდება და სამომავლოდ ქვეყნის სრულუფლებიან წევრად არჩევას შეეცდება. ბაიდენის ადმინისტრაციის თქმით, საბჭოში რეფორმებია საჭირო. 2021 წლის ბოლომდე აშშ-ის მხოლოდ დამკვირვებლის სტატუსი ექნება, ხმის მიცემის უფლების გარეშე, ადმინისტრაციას სამი სრულუფლებიანი წევრის ადგილიდან ერთის დაკავება სურს. ამ ეტაპზე სრულუფლებიანი წევრი ავსტრია, დანია და იტალიაა. აშშ-მ საბჭო 2018 წელს ტრამპის ადმინისტრაციის გადაწყვეტილების საფუძველზე დატოვა. ადმინისტრაციის აღნიშნული გადაწყვეტლებისთვის დიდი რაოდენობით კრიტიკა მიიღო. 2018 წელს ტრამპის გადაწყვეტილებას, საბჭო ისრაელის მიმართ აშშ-ის ყოფილი პრეზიდენტის არაერთგვაროვან დამოკიდებულებას აბრალებს.
ბიზნესის წარმომადგენლებმა პრემიერთან შეხვედრაზე „კომენდანტის საათის“ წესში ცვლილებების შეტანა მოითხოვეს
დღეს საქართველოს პრემიერ-მინისტრი გიორგი გახარია მხსვილი ბიზნესის წარმომადგენლებს შეხვდა. ამის შესახებ ინფორმაცია მთავრობის ადმინისტრაციამ გაავრცელა. შეხვედრაზე ყურადღება გამახვილდა პოსტპანდემიური ეკონომიკური აღდგენის ეტაპზე. „ვფიქრობთ, 2 კვირაში მივაღწევთ, რომ დარჩენილი შეზღუდვები თანდათან გაუქმდეს", - ამის შესახებ საქართველოს ბიზნესასოციაციის პრეზიდენტმა, სოსო ფხაკაძემ პრემიერ-მინისტრ გიორგი გახარიასა და მსხვილ დამსაქმებლებს შორის გამართული შეხვედრის შემდეგ განაცხადა. მისი თქმით, ეპიდემიოლოგების მიერ დაწესებული მოთხოვნები ზედმიწევნით უნდა შესრულდეს. „ჩვენ დავაყენეთ ძალიან კონკრეტული საკითხი, რომ დარჩენილ შეზღუდვებზე ძალიან მალე ვიმსჯელოთ. ისევ მივიღეთ დაპირება, რომ დააკვირდებიან ეპიდსიტუაციას მომავალი ორი კვირის განმავლობაში. ვისაუბრეთ გარკვეულ პარამეტრებზე კორონავირუსის ახალ შემთხვევებთან დაკავშირებით. ვფიქრობთ, ორ კვირაში ჩვენ იმასაც მივაღწევთ, რომ დარჩენილი შეზღუდვები თანდათანობით გაუქმდეს. იყო თხოვნა და ეს ჩვენთვის გასაგებია, რომ ჩვენი თანამშრომლების ჯანმრთელობის დაცვისთვის უნდა გავაკეთოთ ყველაფერი. კონკრეტულად, ეს ნიშნავს იმას, რომ ეპიდემიოლოგების მიერ დაწესებული მოთხოვნები ზედმიწევნით უნდა დავიცვათ“, - განაცხადა სოსო ფხაკაძემ. საცალო გაყიდვების კომპანია ICR Group-ის დამფუძნებელის კახა ხაზარაძის განცხადებით, პრემიერს კომენდანტის საათით 2 საათით გადაწევა სთხოვეს. მისი თქმით, შეზღუდულ დროში სამუშაოს შემდეგ თანამშრომლების სახლებში გადაყვანა ინფიცირების რისკების მატარებელია, ამიტომ სექტორი კომენდანტის საათის გადაწევას ითხოვს. „დავაყენე საკითხი და ვთქვი, რომ ტრანსპორტის 21:00 საათამდე ამოქმედების საკითხი პრობლემატურია, რადგან სავაჭრო ობიექტები 19:00 საათზე იკეტება და რჩება 2 საათიანი პერიოდი ხალხის გადაყვანისთვის. თუ ადრე იყო სავაჭრო ობიექტებში ინფიცირების რისკი, ახლა იქმნება გადაყვანის დროს ინფიცირების რისკი, ამიტომ ვითხოვთ კომენდანტის საათის 2 საათით გადატანას. მოინიშნა, გვითხრა რომ მოკლე პერიოდში დაგვიბრუნდება და გავაგრძელებთ მაგ საკითხებს კონსულტაციებს“, - განაცხადა კახა ხაზარაძემ. „კოკა კოლა ბოთლერს ჯორჯიას" დამფუძნებლის, თემურ ჭყონიას შეფასებით გიორგი გახარიასა და კერძო სექტორს შორის შეხვედრამ კონსტრუქციულ რეჟიმში ჩაიარა. როგორც მან აღნიშნა, საუბარი იმდენად კონსტრუქციული იყო, რომ დაიბნა. „საკითხები მეგობრული იყო, კონსტრუქციული. ჩემდა გასაკვირად ძალიან საინტერესო შეხვედრა იყო, სერიოზულად, ყოველგვარი მლიქვნელობის გარეშე. ბიზნესის მნიშვნელობა გაცილებით გაზრდილია და ურთიერთობაში პირადად იღებს ვალდებულებას თავის თავზე რომ ხელშეწყობილი იყოს და ჩქარი ტემპით განვითარდეს. მე არაფერი მითქვამს პირველად ცხოვრებაში, იმიტომ რომ იმდენად კონსტრუქციულად წავიდა საუბარი, დავიბენი“, - განაცხად თემურ ჭყონიამ. კითხვაზე რატომ არ დააყენა მისთვის მნიშვნელოვანი საკითხები, ბიზნესმენმა უპასუხა, რომ შეხვედრაზე ამჯობინა დისკუსია არა კონკრეტული ბიზნესების, არამედ საზოგადოებისთვის მნიშვნელოვან საკითხებზე წარმართულიყო. „ჩემი მხრიდან არაფერი მითქვამს. დამიძახეს და მოვედი. სახელმწიფოებრივ საკითხებზე უნდა იყოს საუბარი და ჩემს თავს მე თვითონ მოვუვლი. რა თქმა უნდა ბიზნესი სახელმწიფოა, მაგრამ ბიზნესმა თავის თავს უნდა მოუაროს. ჩვენ თუ ვისაუბრებთ უნდა ვისაუბროთ ერთობლივად რა შეგვიძლია უფრო დიდი გავაკეთოთ სახელმწიფოსთვის და ბიზნესი რომელიც თავის თავს ვერ უვლის იმას სახელმწიფო ვერ მოუვლის", - განაცხადა ჭყონიამ. ვითიბი ბანკის გენერალური დირექტორის, არჩილ კონცელიძის განცხადებით, პრემიერთან შეხვედრის მთავარი თემა პანდემიური მდგომარეობიდან გამოსვლა იყო. მთავრობის ადმინისტრაციაში პრემიერთან შეხვედრის შემდეგ არჩილ კონცელიძემ ჟურნაილსტებს უთხრა, რომ კითხვები ბიზნესსაც ჰქონდა. „ძირითადად საუბარი პანდემიიდან გამოსვლის საკითხებზე იყო, რა გაკეთდება. დაახლოებით 15 კითხვა ბიზნესმა დასვა. გვაინტერესებდა პანდემიის და შეზღუდვების მოხსნის პრინციპები და როდის დაიწყება ეკონომიკის სრული გახსნა. რაზეც გვიპასუხეს, რომ დაავადების რაოდენობასთანაა მიბმული და რომ შეზღუდვების მოხსნას ნაბიჯ-ნაბიჯ უნდა ველოდოთ“, - განაცხადა ვითიბი ბანკის პრეზიდენტმა. შეხვედრის დასრულების შემდეგ „თიბისი ბანკის“ გენერალურმა დირექტორმა ვახტანგ ბუცხრიკიძემ იმ 2 ძირითად საკითხზე, რაზეც შეხვედრის დროს გამახვილდა ყურადღება. „პრემიერ-მინისტრმა ისაუბრა, თუ რა მაჩვენებლებზე არის დამოკიდებული და როგორ შეიძლება, თანდათანობით, გაზაფხულის ბოლოს, ზაფხულში, მთლიანი ბიზნესი გაიხსნას. მეორე საკითხი უფრო ეხებოდა საშუალოვადიან განვითარებას, ბიზნესი უფრო მეტად კონკურენტუნარიანი გახდეს და ეკონომიკა უფრო მოძლიერდეს, რა სტრუქტურული რეფორმები უნდა გატარდეს, პრივატიზაცია კიდევ უფრო გაიზარდოს და რა ფუნდამენტალური ცვლილებები არის ეკონომიკაში საჭირო. საუბარი იყო, რომ პრემიერ-მინისტრი მზად არის, 24 საათიან რეჟიმში შეხვდეს ბიზნესმენებს. ითქვა, რომ ეს არ იქნება ერთჯერადი შეხვედრა და ფაქტიურად, ყოველთვიურ რეჟიმში მოხდება ბიზნესებთან შეხვედრა. შეხვედრაზე სხვადასხვა ინდუსტრიის წარმომადგენლები იყვნენ, რომლებიც პრაქტიკულ კითხვებს სვამდნენ, რომელ საათიდან რომელ საათამდე შეიძლება ემუშავათ, რამდენად შესაძლებელია, რომ შაბათ-კვირას დაიწყონ მუშაობა. პრემიერ მინისტრმა ჩაინიშნა კითხვები და მოწოდება იყო, რომ კონკრეტულ კითხვებზე კონკრეტული პასუხები გაიცემა. შეხვედრაზე აღინიშნა, რომ განათლება არის პრიორიტეტული და განათლება არის ყველაზე მნიშვნელოვანი, შემდეგ სავაჭრო სფერო, რესტორნები და ა.შ.“, - განაცხადა ვახტანგ ბუცხრიკიძემ. IG დეველოპმენტის დამფუძნებელი მინდია საბანაძემ განაცხადა, რომ ხელისუფლება და პრემიერი მოტივირებულია, რომ ეკონომიკა რაც შეიძლება სწრაფ რეჟიმში ამუშავდეს. მისი თქმით, პრემიერმა საფუძველი ჩაუყარა ყოველთვიურ შეხვედრებს და საკითხები, რაც რთული გადასაწყვეტია, პირდაპირი კომუნიკაციის რეჟიმში გვარდება. „ყველას კარგად გვესმის, რა მდგომარეობაში უწევს ხელისუფლებას, მართოს სიტუაცია. პრემიერიც კარგად აცნობიერებს ამ ვითარებას. პრემიერმა საფუძველი ჩაუყარა ყოველთვიურ შეხვედრებს, განხილვებს, დისკუსიას და ის საკითხები, რაც რთულია გადასაწყვეტად, ეს საკითხები პირდაპირი კომუნიკაციის რეჟიმში გვარდება. მოტივირებულია მთლიანად ხელისუფლება და პრემიერი, რომ რაც შეიძლება სწრაფ რეჟიმში ამუშავდეს ეკონომიკა. ყველა ის სექტორი, რაც გაჩერებულია მათ ამუშავებაზეა საუბარი. ეს არის დამოკიდებული დადებითობის 4%-ზე. თუ ვინმეს შეეხო პანდემიასთან დაკავშირებული პრობლემები, დამერწმუნეთ, პირველი ჩვენი კომპანიაა და გაბრაზებული ჩვენც ვართ, მაგრამ რეალობა ისაა, რომ პრემიერი ცდილობს, ყველაფერს აკეთებს და გვერდით გვიდგას“, - განაცხადა მინდია საბანაძემ.
სინოდი სასულიერო პირების ვაქცინაციის საკითხს 11 თებერვალს განიხილავს
11 თებერვალს წმინდა სინოდის სხდომა გაიმართება. გაიკეთებენ თუ არა კორონავირუსის საწინააღმდეგო ვაქცინას სასულიერო პირები, ამ საკითხს წმინდა სინოდის სხდომაზე გადაწყვეტენ. ამის შესახებ Europetime-ს საპატრიარქოს საზოგადოებასთან ურთიერთობის სამსახურის ხელმძღვანელმა ანდრია ჯაღმაიძემ ჯერ კიდევ იანვარში განუცხადა. „ვაქცინის შესახებ ჩვენ ჯერ არ ვიცით ბევრი არაფერი. არც პროცედურის შესახებ. ძალიან ამორფულია სიტუაცია. ვერ გეტყვით ვერაფერს. არაფერი არ ვიცი. ვაქცინაციასთან დაკავშირებით ჯერ არ ყოფილა ისეთი მსჯელობა, რომელიც საერთო აზრს შეკრებდა. არსებობს რაღაც ცალკეული მოსაზრებები, თუმცა კონკრეტულად ვერაფერს ვერ გეტყვით იმიტომ, რომ არ ვიცით საპატრიარქოს უმაღლეს ორგანოში რა გადაწყდება. თუმცა ჯერჯერობით, სინოდის გადაწყვეტილებამდე ვაქცინაცია ებაყოფლობითი - ვისაც სურს, გაიკეთებს. ვისაც სურს - არა“, - განუცხადა Europatime-ს რამდენიმე კვირის წინ, საპატრიარქოს საზოგადოებასთან ურთიერთობის სამსახურის უფროსმა. მოგვიანებით მიტროპოლიტმა დიმიტრიმ განაცხადა რომ ეპიდემიასთან და პანდემიასთან ბრძოლის ყველაზე საუკეთესო საშუალება ყოველთვის ვაქცინაცია იყო. საქართველოში უახლოეს მომავალში მოსახლეობის ნაწილის აცრა „ფაიზერის“ ვაქცინით გახდება შესაძლებელი.
ბრიტანეთის საელჩო: ზაზა გახელაძის დაუყოვნებლივ გათავისუფლებას მოვითხოვთ
გაერთიანებული სამეფოს საელჩო ზაზა გახელაძის დაუყოვნებლივ გათავისუფლებას მოითხოვს. ამის შესახებ განცხადება საელჩომ სოციალურ ქსელში გაავრცელა. „გაერთიანებული სამეფო ზაზა გახელაძის დაუყოვნებლივ განთავისუფლებას მოითხოვს. ბატონ გახელაძეს „სამხრეთ ოსეთის“ რეგიონში 12 წლითა და 6 თვით უკანონო თავისუფლების აღკვეთა მიესაჯა. საქართველოს ნებისმიერ მოქალაქეს უნდა შეეძლოს საქართველოს საერთაშორისოდ აღიარებული საზღვრების ფარგლებში თავისუფლად გადაადგილება გაერთიანებული სამეფო მხარს უჭერს საქართველოს სუვერენიტეტსა და ტერიტორიულ მთლიანობას", - ნათქვამია საელჩოს განცხადებაში. ოკუპირებული ცხინვალის ე.წ სასამართლომ ზაზა გახელაძეს 12 წლითა და 6 თვით პატიმრობა მიუსაჯა.
