პოლიტიკა
ბაიდენი უფრო მკაცრი იქნება რუსეთის მიმართ შეკავების ძლიერი გზავნილის გაჟღერების თვალსაზრისით - ეველინ ფარკასი
აშშ-ის 44-ე პრეზიდენტის ბარაკ ობამას ადმინისტრაციის თავდაცვის დეპარტამენტის ყოფილ მაღალჩინოსან ეველინ ფარკასის განცხადებით, არჩეული პრეზიდენტი ბაიდენი უფრო მკაცრი იქნება რუსეთის მიმართ შეკავების ძლიერი გზავნილის გაჟღერების თვალსაზრისით, რუსეთმა ნატოს წითელი ხაზები რომ არ გადაკვეთოს და ეცდება ამ ქოლგის ქვეშ ისეთი ქვეყნებიც მოაქციოს, როგორიც უკრაინა და საქართველოა. ამის შესახებ ფარსკასმა „ამერიკის ხმასთან“ ინტერვიუში განაცხადა. „ვფიქრობ, აშშ-ის მომავალი ადმინისტრაციის ჩართულობა საქართველოსთან იქნება იგივე დონეზე, როგორც ეს ობამას ადმინისტრაციის დროს იყო. საქართველოში სიტუაცია ძალიან დაძაბულია - ისევე როგორც ეს ამერიკაშია ახლა. მიმდინარეობს ძალიან რთული პოლიტიკური ბრძოლა. ვფიქრობ, ამერიკა გააგრძელებს საქართველოს დახმარებას იმაში, რომ ის მოქნილ, მტკიცე დემოკრატიად ჩამოყალიბდეს, რადგან ეს ქართველი ხალხის სურვილია. ასევე ვფიქრობ, გავაგრძელებთ საქართველოს დახმარებას ნატოს წევრობისთვის მოსამზადებლად. თუმცა, ნატოში გაწევრიანებას, ამასთან ერთად, ქართველების მხრიდან ერთგვარი შემოქმედებითი მიდგომა და მძიმე შრომაც დასჭირდება. ვფიქრობ, ნატოსთან დაკავშირებით, საქართველომ უნდა დააკმაყოფილოს არსებული კრიტერიუმები. ამავდროულად კი, ნატომ უნდა გადაწყვიტოს, მისცემს თუ არა რუსეთის მთავრობას ვეტოს [უფლებას] ქართველი ხალხის გადაწყვეტილებაზე, თუ რომელ ალიანსს დაუკავშიროს საკუთარი ქვეყანა. ამასთან, თუ იმას გულისხმობთ, მოველი თუ არა რუსეთის მიმართ ხელშეწყობის ან ზედმეტად მეგობრული დამოკიდებულების ქონას, პასუხია - არა. თუმცა, მაქვს იმის მოლოდინი, რომ ეს პრეზიდენტი მოვა და რუსეთთან ძალიან მტკიცე იქნება. ცხადია, ის რუსეთს თანამშრომლობას შესთავაზებს, სადაც ეს შესაძლებელია, მაგრამ მას ძალიან მტკიცე მიდგომა ექნება“, - განაცხადა ეველინ ფარკასმა ინტერვიუში.
კახა კალაძე შტაბის დაწვაზე ნიკა მელიას განცხადებას პასუხობს
„სამარცხვინოა პოლიტიკური ავანტიურისტის პირადი მოხმარების პარტიის უუფლებო წევრის განცხადება“, - თბილისის მერი კახა კალაძე „ნაციონალური მოძრაობის" ერთ-ერთი ლიდერის, ნიკა მელიას განცხადებას პასუხობს, რომლის მიხედვითაც გლდანში მესამე მიკრორაიონში გაერთიანებული ოპოზიციის ერთ-ერთი შტაბი კობიაშვილ-კალაძესთან ძალიან ახლო ურთიერთობაში მყოფი, „კანონიერი ქურდის“ ნოდარ შუკაკიძის დავალებით გადაწვეს. „საერთოდ არ ვუპასუხებდი ამ განცხადებას, რომ არა არჩევნების მეორე ტური. ასევე, მინდა, კიდევ ერთხელ ხაზი გავუსვა და ჩემი პატივისცემა გამოვხატო გლდანისა და გლდანელების მიმართ. რაც შეეხება განცხადებას, სამარცხვინოს ვუწოდებდი. კონკრეტული კრიმინალის, უცხო ქვეყნის მოქალაქის, პოლიტიკური ავანტიურისტის პირადი მოხმარების პარტიის უუფლებო წევრი აკეთებს ამ ტიპის და ამ შინაარსის განცხადებებს, რაც არის მხოლოდ და მხოლოდ სამარცხვინო. რასაც ისინი აკეთებდნენ, წარმოუდგენიათ და თავად შეუძლიათ გააკეთონ, ჰგონიათ, რომ იგივეს გაკეთება შეუძლია სხვასაც“, - აღნიშნა კახა კალაძემ. ნიკა მელიას ოფისის დაწვაზე შსს-მ გამოძიება დაიწყო. შემთხვევა გამთენიისას მოხდა, არავინ დაშავებულა, თუმცა დამწვარია შტაბში არსებული ინვენტარი.
ნიკა მელიას განცხადებით, მისი შტაბი „კობიაშვილ-კალაძესთან ახლო ურთიერთობაში მყოფი ე.წ. კანონიერი ქურდის“ დავალებით გადაწვეს
"ერთიანი ნაციონალური მოძრაობის" ერთ-ერთი ლიდერის ნიკა მელიას განცხადებით, გლდანში მესამე მიკრორაიონში გაერთიანებული ოპოზიციის ერთ-ერთი შტაბი კობიაშვილ-კალაძესთან ძალიან ახლო ურთიერთობაში მყოფი, კანონიერი ქურდის ნოდარ შუკაკიძის დავალებით გადაწვეს. ამის შესახებ მელიამ ჟურნალისტებთან განაცხადა. მისივე თქმით, აღნიშნული უბანი მმართველმა გუნდმა პირწმინდად წააგო და ახლა მოძალადეობრივი აქტი განახორციელეს. „ახლა ვარ, „გაერთიანებული ოპოზიციის“ გლდანის ერთ-ერთი შტაბის წინ, ეს გახლდათ გლდანის რაიონის მესამე მიკრორაიონში არსებული შტაბი. ესაა ის რაიონი, სადაც დამაჯერებლად მოვიგეთ ჩვენ ოპოზიციამ და კობიაშვილ-კალაძე დავამარცხეთ. შედეგად მოჰყვა ის, რომ რევანშისტულმა, მოძალადე ხელისუფლებამ გადაწვა შტაბი. ახლა, დავასახელებ კონკრეტულ პირებს, რომლებმაც ამაში მონაწილეობა მიიღეს ესაა - კობიაშვილ-კალაძესთან ძალიან ახლო ურთიერთობაში მყოფი კანონიერი ქურდი ნოდარ შუკაკიძე, რომელიც საბერძნეთის საპატიმროში იმყოფება და გლდანის დანაშაულებრივ სამყაროსთან მჭიდრო კავშირი აქვს და ასევე მისივე ძმის ლევან შუკაკიძის საშუალებით აკონტროლებს საარჩევნო პროცესებს. ესენი არიან ნოდარ შუკაკიძე კანონიერი ქურდი და კობიაშვილ-კალაძე და ლევან შუკაკიძე, რომელიც აქ ძალიან ახლოს ცხოვრობენ. ეს უბანი პირწმინდად წააგეს და ახლა მოძალადეობრივი აქტი განახორციელეს. ვუცხადებ ბრძოლას კანონიერ ქურდებს!“, - განაცხადა მელიამ. ცნობისთვის, გლდანის მესამე მიკრო რაიონში „ნაციონალური მოძრაობის“ გლდანი-ნაძალადევის მაჟორიტარი დეპუტატობის კანდიდატის, ნიკა მელიას საარჩევნო შტაბის ოფისი დარბიეს. საქმეზე შინაგან საქმეთა სამინისტრომ გამოძიება სისხლის სამართლის კოდექსის 187-ე მუხლით დაიწყო. ამ მუხლით სხვისი ნივთის დაზიანებისთვის სისხლის სამართლებრივი პასუხისმგებლობა დგება.
ქართველი ექსპერტები მაიკ პომპეოს: განთავსდეს ამერიკული შეიარაღებული ძალების მუდმივი წარმომადგენლობა საქართველოში
უსაფრთხოებისა და საგარეო პოლიტიკის საკითხებზე მომუშავე ექსპერტები აშშ-ის სახელმწიფო მდივანს, მაიკ პომპეოს ღია წერილით მიმართავენ და გამოდიან ინიციატივით, საქართველოში ამერიკის მუდმივი სამხედრო წარმომადგენლობა განთავსდეს. მათი შეფასებით, ეს კიდევ უფრო დააახლოებს საქართველოს NATO-ს წევრობასთან. „ჩვენ,უსაფრთხოებისა და საგარეო პოლიტიკურ საკითხებზე მომუშავე სპეციალისტები საქართველოდან, გულწრფელად მივესალმებით თქვენს ვიზიტს საქართველოში ამ ცხელ პერიოდში. ჩვენ გვაერთიანებს სურვილი, გაგიზიაროთ ხედვები საქართველო-აშშ-ის პარტნიორობის გაღრმავებაზე თავდაცვისა და უსაფრთხოების საკითხებში. საქართველოსთვის ამერიკის შეერთებული შტატები მთავარი მოკავშირეა. ასევე, გვჯერა საქართველოს წვლილის დასავლური ინტერესების განმტკიცებაში ევროპასა და მსოფლიოში. საქართველო არის ქვაკუთხედი ჩვენი მოკავშირეების წარმომადგენლობის აღმოსავლეთ-დასავლეთის კორიდორში, რაშიც აშშ-ის არაერთმა ადმინისტრაციამ ჩადო ინვესტიცია. ჩვენი ხედვით, ევროატლანტიკური სისტემა აშშ-ის ლიდერობით არის ერთადერთი გარანტია ერთიანი, თავისუფალი და მშვიდობიანი ევროპის. ბოლო წლებში სამხრეთ კავკასია და შავი ზღვის რეგიონი გეოპოლიტიკური არასტაბილურობის ადგილი გახდა. უსაფრთხოების რისკების უმეტესობა მომდინარეობს რუსეთის ამბიციისგან რომ აღადგინოს საბჭოთა პერიოდის "გავლენის სფეროები", რომელსაც მოსკოვი განიხილავს, როგორც „ახლო საზღვარგარეთს“. ახლახან რუსეთმა მთიან ყარაბაღში სამხედრო ძალების განთავსებით გააფართოვა მისი რეგიონულ-სამხედრო წარმომადგენლობა. დამოუკიდებლობის ხელახალი მოპოვებიდან საქართველოს თავისუფლებისმოყვარე მოქალაქეები ცდილობდნენ, შეექმნათ ფუნქციური დემოკრატია. ამ პროექტში აშშ შეუცვლელ მოკავშირედ იქცა, რამაც საქართველო აქცია, პრეზიდენტ რონალდ რეიგანის სიტყვებით რომ ვთქვათ „მანათობელ ქალაქად გორაკზე“ რომელმაც გადალახა სახელმწიფოებრიობის მარცხი და წარმატებით შეებრძოლა კორუფციის საბჭოთა მემკვიდრეობას. ქართველები აშშ-სთან მეგობრობას ცალმხრივად არ იღებენ. მათი 90%-ზე მეტი აფასებს იმას, რომ აშშ-სა და საქართველოს ჯარისკაცები ამაყად მსახურობენ ამერიკულ მისიებში ერაყსა და ავღანეთში. ჩვენ ვაფასებთ ამერიკის მხრიდან ძლიერ მხარდაჭერას საქართველოს სუვერენიტეტისა და ტერიტორიული მთლიანობის მიმართ. გვჯერა, რომ აშშ-ს რეგიონალური და გლობალური ინტერესების გათვალისწინებით, ქართველი ხალხის მხარდაჭერისათვის, მთავარი ნაბიჯები იქნება შემდეგი: განთავსდეს ამერიკული შეიარაღებული ძალების მუდმივი წარმომადგენლობა საქართველოში. ამგვარი პოლიტიკა შეიძლება მოიცავდეს მოკავშირე ძალების (ევროკავშირი/აშშ) როტაციას, ასევე საჰაერო პატრულირების ელემენტებს, რამაც უნდა უზრუნველყოს ამერიკელებისა და მოკავშირე ძალებისთვის შეუფერხებელი ოპერირება შავი ზღვისა და სამხრეთ კავკასიის რეგიონში. ამავე დროს, აშშ-ს სამხედრო წარმომადგენლობა საქართველოში აღმოფხვრის მყისიერ საფრთხეებს და საქართველოს კიდევ უფრო დააახლოებს ნატოს წევრობასთან. ამავე დროს, საქართველოს შესაძლებლობები შეიტანოს მნიშვნელოვანი კონტრიბუცია ჩვენს სტრატეგიულ პარტნიორობაში კიდევ უფრო გაიზრდება, დემოკრატიული ინსტიტუტების გაძლიერებასთან ერთად. ამ თვალსაზრისით ჩვენ მივესალმებით აშშ-ს მონაწილეობას საქართველოს პოლიტიკური კრიზისის გადაჭრის საკითხში. მადლიერები ვართ აშშ-ის მნიშვნელოვანი და მდგრადი მხარდაჭერისთვის წლების განმავლობაში საქართველოს დემოკრატიის გასაძლიერებლად. სრულად ვუჭერთ მხარს საქართველო-აშშ-ის ალიანსის გაძლიერების პროცესს, მათ შორის, აშშ-ის სამხედრო წარმომადგენლობას საქართველოშ, რაც საერთო ევრო-ატლანტიკურ უსაფრთხოებას წაადგება“, - ნათქვამია წერილში, რომელსაც ხელს აწერენ: ზვიად აძინბა, იაეკა აკობია, ირაკლი ალასანია, ირინა არაბიძე, ფიქრია ასანიშვილი, გიორგი ასტამაძე, ნატო ბოჩიაშვილი, გიორგი ბადრიძე, ზურაბ ბატიაშვილი, ზაზა ბიბილეიშვილი, ლევან ბოძაშვილი, ეთო ბუზიაშვილი, მიხეილ დარჩიაშვილი, დავით დარჩიაშვილი, ჯაბა დევდარიანი, პაატა გაფრინდაშვილი, კახა გოგოლაშვილი, გიორგი გოგუაძე, თორნიკე გორდაძე, გიორგი გვალია, შოთა ღვინერია, გია ჯაფარიძე, თედო ჯორბენაძე, ნინო კალანდაძე, ნოდარ ხარშილაძე, თინა ხიდაშელი, ბექა კობახიძე, ბათუ ქუთელია, ხათუნა ლაგაზიძე, ეკა მეტრეველი, გრიგოლ მგალობლიშვილი, ხათუნა მშვიდობაძე, გიორგი მუჩაიძე, სოფო პეტრიაშვილი, ალექსი პეტრიაშვილი, თენგიხ ფხალაძე, მირიან ფოხაძე, ირაკლი ფორჩხიძე, დავით რაქვიაშვილი, გიორგი რუხაძე, თორნიკე შარაშენიძე, ვასილ სიხარულიძე, თორნიკე თურმანიძე, გელა ვასაძე, თემურ იაკობაშვილი.
ერდოღანი ყარაბაღში თურქ სამხედროებს გზავნის
თურქეთის პრეზიდენტმა რეჯეფ თაიფ ერდოღანმა აზერბაიჯანში თურქი სამხედროების გაგზავნის შესახებ ბრძანებულება მოამზადა. პროექტი პარლამენტში უკვე გადაზავნილია დასამტკიცებლად, - იუწყება საინფორმაციო სააგენტო “Anadolu”. «ცენტრის დისლოკაციის ადგილს აზერბაიჯანი განსაზღვრავს. მასში იმოქმედებენ სამხედრო მოსამსახურეები, საჭიროების შემთხვევაში კი – სამოქალაქო სპეციალისტებიც. ცენტრის მუშაობა მიმართული იქნება სამხრეთ კავკასიაში მშვიდობისა და სტაბილურობის უზრუნველყოფაზე აზერბაიჯანის ტერიტორიული მთლიანობის უზრუნველყოფის ჭრილში, რაც ასახულია გაერო-ს უშიშროების საბჭოსა და ეუთო-ს რეზოლუციებშიც” - ნათქვამია ბრძანებულების პროექტი. მასში ასევე აღნიშნულია, რომ “აზერბაიჯანში სამხედროების გაგზავნა თურქეთის ეროვნულ ინტერესებსაც შეესაბამება”. ცნობისთვის: რუსეთი და თურქეთი მთიანი ყარაბაღის კონფლიქტის ზონაში ცეცხლის შეწყვეტის რეჟიმის გასაკონტროლებლად ერთობლივი ცენტრის ჩამოყალიბებაზე შეთანხმდნენ. თუმცა შემდგომში რუსეთის ხელისუფლების წარმომადგენლები ირწმუნებოდნენ, რომ "არანაირი თურქი სამხედროები ყარაბაღში არ შევიდოდნენ" და რომ დიახ, სადამკვირვებლო მისიაში თურქული მხარის მონაწილეობა მართლაც იყო შეთანხმებული, მაგრამ "დაკვირვების განხორციელება დისტანციურადაცაა შესაძლებელი, მაგალითად, დრონების გამოყენებით".
საქართველოს პრეზიდენტი მაია სანდუს მოლდოვის პრეზიდენტად არჩევას ულოცავს
საქართველოს პრეზიდენტი მაია სანდუს მოლდოვის პრეზიდენტად არჩევას ულოცავს. ამის შესახებ ის ტვიტერზე წერს. სალომე ზურაბიშვილი ხაზს უსვამს იმ ფაქტს, რომ რეგიონში კიდევ ერთი ქალი პრეზიდენტი იქნება. საქართველოს პრეზიდენტი აღნიშნავს, რომ მოუთმენლად ელოდება ერთობლივ მოშაობას და ევროპისკენ საერთო გზაზე სვლას. მოლდოვის პრეზიდენტის არჩევნების მეორე ტურში, რომელიც 15 ნოემბერს ჩატარდა, ხმების 57%-ით გაიმარჯვა ქვეყნის ყოფილმა პრემიერ-მინისტრმა, პროევროპული ორიენტაციის კანდიდატმა მაია სანდუმ. მან პრორუსულად განწყობილი იგორ დოდონი დაამარცხა. Congratulations with a deserved victory @sandumaiamd, President- elect of Moldova. Another woman President in our region is extremely important. I look forward to working together and forging our common path to Europe.#WomenLeadtheChange 🇬🇪 🇲🇩 🇪🇺 — Salome Zourabichvili (@Zourabichvili_S) November 16, 2020
გლდანში ნიკა მელიას საარჩევნო შტაბის ოფისი დაწვეს
გლდანის მესამე მიკრო რაიონში „ნაციონალური მოძრაობის“ გლდანი-ნაძალადევის მაჟორიტარი დეპუტატობის კანდიდატის, ნიკა მელიას საარჩევნო შტაბის ოფისი დაწვეს. შტაბის წევრების ინფორმაციით, შტაბს ესროლეს ქვები და დამსხვრეულია მინები. ასევე, გამოყენებულია ე.წ. მოლოტივს კოქტეილი, რის შედეგადაც ოფისში ცეცხლი გაჩნდა. „ერთ-ერთ შტაბში, რომელიც მდებარეობს გლდანის მესამე მიკროში, დილით ისროლეს ორი დიდი ქვა, ჩამტვრეულია მინები. ასევე, ისროლეს ნაჭრით და ბენზინით სავსე ბოთლები, რომლითაც ცეცხლი გააჩინეს. შენობა დამწვარია, ამ დროს შტაბში არავინ არ იმყოფებოდა. ჩვენი ინფორმაციით, აღნიშნულ ფაქტზე გამოძიება დაწყებულია“, - აცხადებს თამარ ზერეკიძე. არსებული ინფორმაციით, უკვე ამოღებულია იქვე მდებარე აფთიაქის კამერის ჩანაწერები. შინაგან საქმეთა სამინისტროს ინფორმაციით, გამოძიება 187-ე მუხლით დაიწყო, რაც სხვისი ნივთის დაზიანებას ან განადგურებას გულისხმობს.
არჩევნების მეორე ტურისთვის 8 612 110 ლარი დაიხარჯება
საქართველოში, 21 ნოემბერს ჩანიშნული არჩევნების მეორე ტურისთვის, 8 612 110 ლარი დაიხარჯება. შესაბამისი დადგენილება საკანონმდებლო მაცნეზეა განთავსებული. თანხის ნახევარზე მეტი - 4 566 700 ლარი შრომის ანაზღაურებაა, დანარჩენი ნაწილი კი სხვა ხარჯებსა და სხვადასხვა ტიპის მომსახურების შესყიდვას მოხმარდება. 31 ოქტომბრის არჩევნების მომზადებისა და ჩატარებისთვის ცესკოს 42,7 მლნ ლარზე მეტი ჰქონდა გამოყოფილი. არჩევნების შედეგებს ზღვარგადალახული პარტიები გაყალბებულს უწოდებენ, არ აპირებენ მეორე ტურში მონაწილეობასა და პარლამენტში შესვლა.
ნიკა მელიას შტაბზე თავდამსხმელი, მკაცრად დაისჯება - ქართული ოცნება
„ქართული ოცნების“ პროპორციული სიის წარმომადგენლის ბექა დავითულიანის განცხადებით მკაცრად პასუხს მიიღებს ვინც გლდანის ოპოზიციონერი მაჟორიტარობის კანდიდატის, ნიკა მელიას საარჩევნო შტაბში ცეცხი გააჩინა. ბექა დავითულიანმა ეს განცხადება „ქართული ოცნების“ ოფისში გამართულ ბრიფინგზე გააკეთა. „გამოძიებული იქნება ბოლომდე და აუცილებლად, ვინც არ უნდა იყოს, ხაზგასმით ვამბობ ამას, ვინც არ უნდა იდგეს ამ ოფისის დაწვის საქმის უკან, აუცილებლად, უმკაცრეს პასუხს მიიღებს. ვინ დგას ამის უკან, ამას გამოძიება გაარკვევს“, - განაცხადა დავითულიანმა. გლდანის ოპოზიციონერი მაჟორიტარობის კანდიდატის, ნიკა მელიას საარჩევნო შტაბის მინა ჩაამსხვრიეს და ცეცხლი წაუკიდეს. საქმეზე შინაგან საქმეთა სამინისტრომ გამოძიება სისხლის სამართლის კოდექსის 187-ე მუხლით დაიწყო. ამ მუხლით სხვისი ნივთის დაზიანებისთვის სისხლის სამართლებრივი პასუხისმგებლობა დგება.
IRI არჩევნებთან დაკავშირებით ანგარიშს აქვეყნებს
საერთაშორისო რესპუბლიკურმა ინსტიტუტმა ტექნიკური საარჩევნო შეფასების მისიის შუალედური ანგარიში გამოაქვეყნა, რომელიც მოიცავს 31 ოქტომბრის საპარლამენტო არჩევნების ანალიზსა და რეკომენდაციებს 21 ნოემბერს ჩანიშნული მეორე ტურებისთვის. „საქართველოში ჩატარებულმა არჩევნებმა ვერ დააკმაყოფილა საკონსტიტუციო და საარჩევნო ცვლილებებით დაწესებული ახალი სტანდარტები და საარჩევნო ადმინისტრაციის მიმართ მოსახლეობის ნდობა შეამცირა. სასიცოცხლოდ მნიშვნელოვანია, რომ საქართველოს მთავრობამ შეძლოს მომავალი არჩევნების სანდოობისა და გამჭვირვალობის გაუმჯობესება და მეორე ტურებამდე გამოასწოროს ის ხარვეზები, რომლებიც 31 ოქტომბერს დაფიქსირდა", - განაცხადა საერთაშორისო რესპუბლიკური ინსტიტუტის ევრაზიის დირექტორმა, სტივენ ნიქსმა. როგორც განცხადებაშია ნათქვამი, მიუხედავად იმისა, რომ 31 ოქტომბრის საპარლამენტო არჩევნები მშვიდობიან გარემოში, ქვეყნის კანონმდებლობის დაცვით ჩატარდა, წინასაარჩევნო პერიოდსა და არჩევნების დღეს დაფიქსირებულმა დარღვევებმა, ნეგატიურად იმოქმედა არჩევნების სრული პროცესის სანდოობაზე. დამკვირვებელთა მიერ დაფიქსირებული დარღვევებიდან აღსანიშნავია ადმინისტრაციული რესურსის გამოყენება, ამომრჩევლის მოსყიდვა, ამომრჩევლებსა და დამკვირვებლებზე ზეწოლა, საუბნო საარჩევნო კომისიის შემაჯამებელ ოქმებში ციფრებით მანიპულირება და შედეგების მართვის პროცესი, რომელიც საერთაშორისო სტანდარტების დასაკმაყოფილებლად არასაკმარისად გამჭვირვალე იყო. 2020 წლის 21 ნოემბერს ჩანიშნული მეორე ტურებისა და 9 საპარლამენტო ოპოზიციურ პარტიებს შორის მიმდინარე მოლაპარაკებების ფონზე, მისიის ანგარიში სთავაზობს საქართველოს მთავრობას, პოლიტიკურ პარტიებს, სამოქალაქო საზოგადოებასა და მედიას მომავალი არჩევნების სანდობიის გასაუმჯობესებლად შემუშავებულ რეკომენდაციებს. ანგარიში იხილეთ მბულზე: ანგარიში
მოლდოვის პრეზიდენტის არჩევნებში, ხმების 57%-ით, მაია სანდუ იმარჯვებს
15 ნოემბერს ჩატარებულ, მოლდოვის პრეზიდენტის არჩევნების მეორე ტურში ხმების თითქმის 100% დათვლილია. წინასწარი შედეგებით, ხმების 57%-ით, პროევროპული ორიენტაციის კანდიდატი მაია სანდუ იმარჯვებს. მოლდოვის მოქმედმა პრეზიდენტმა, პრორუსულად განწყობილმა იგორ დოდონმა 43% მიიღო. მაია სანდუმ უპირველეს ამოცანად საერთო მიზნების გარშემო საზოგადოების გაერთიანება დაასახელა. „ყველას გვინდა ვიცხოვროთ საკუთარ სახლში, გვქონდეს სახელმწიფო, რომელიც დაგვიცავს და განვითარებული ეკონომიკა, რათა ადამიანებს ქვეყნიდან წასვლა არ უწევდეთ“, - უთხრა მედიას სანდუმ. მოლდოვის პრეზიდენტის არჩევნების პირველ ტურში, რომელიც 1 ნოემბერს ჩატარდა, მაია სანდუმ ყველაზე მეტი ხმა მიიღო, მაგრამ ვერ შეძლო გამარჯვებისთვის აუცილებელი 50%-იანი ბარიერის გადალახვა.
ბელარუსში სამართალდამცავებმა 1100-ზე მეტი პირი დააკავეს
ბელარუსში კვირას გამართული საპროტესტო აქციების დროს სამართალდამცავებმა 1100-ზე მეტი პირი დააკავეს. ინფორმაციას ადამიანის უფლებების დაცვის ცენტრი „ვიესნა“ ავრცელებს. ცენტრის ვებ-გვერდზე გამოქვეყნებულია დაკავებული პირების სია და აღნიშნულია, რომ დემონსტრანტები მინსკის გარდა ნოვოგრუდოკში, ბობრუისკში, ვიტებსკიში, გომელსა და სვეტლოგორსკშიც დააკავეს. ცნობისთვის, ბელარუსში საპროტესტო აქციები 9 აგვისტოს საპრეზიდენტო არჩევნების შემდეგ არ წყდება. მოსახლეობის ნაწილი და ოპოზიცია არჩევნების ოფიციალურ შედეგებს არ აღიარებს და ალექსანდრე ლუკაშენკოს გადადგომას მოითხოვს.
ამერიკის მიერ ინფრასტრუქტურისა და როტაციული ძალების გაზრდაზე ჰოჯესის გზავნილი ლოგიკურ გადაწყვეტილებამდე მივა - ექსპერტი ზურაბ ბატიაშვილი
სახელმწიფო მდივნის მაიკ პომპეოს ტურნეს დაწყებამდე, რომელიც საქართველოში ვიზიტსაც მოიცავს, დაზუსტდა, რომ თურქეთში მისი ვიზიტის დროს ქვეყნის ხელისუფლების წარმომადგენლებთან შეხვედრები დაგეგმილი არ არის. „საფრანგეთის შემდეგ პომპეო თურქეთს ეწვევა, სადაც შეხვდება მსოფლიო პატრიარქ ბართლომეოსს და სამოციქულო ნუნციოს მთავარეპისკოპოსს, პოლ რასელს. ამასთან, რუსტემ ფაშას მეჩეთს ესტუმრება. მდივანი პომპეო აპირებს, გამოიყენოს ეს შესაძლებლობები რელიგიური საკითხების განსახილველად და როგორც მოგეხსენებათ, რელიგიური თავისუფლების ხელშეწყობა და რელიგიური ნიშნით დევნის წინააღმდეგ ბრძოლა აშშ–ის ადმინისტრაციისა და მდივან პომპეოსთვის მთავარი პრიორიტეტია. გარდა ამისა, სახელმწიდო მდივანი შეხვდება ელჩებს, ჩვენი მისიების, საელჩოების და სტამბულში მდებარე გენერალური საკონსულოს თანამშრომლებს", – განაცხადეს სახელმწიფო დეპარტამენტის წარმომადგენლებმა დღეს გამართულ ბრიფინგზე. ექსპერტები საინტერესოდ მიიჩნევენ ამერიკის სახელმწიფო მდივნის ვიზიტს და ზოგადად იმ ქვეყნების ჩამონათვალს, რომელსაც ეს ტურნე მოიცავს. როგორც ცნობილია, საქართველოში ჩამოსვლამდე პომპეო ჯერ საფრანგეთში, შემდეგ თურქეთსა და საქართველოში ჩადის. ჩვენი ქვეყნის დატოვების შემდეგ კი მიემგზავრება ისრაელსა და არაბთა გაერთიანებულ საემიროებში, ყატარსა და საუდის არაბეთში. სახელმწიფო მდივნის ბოლო გაჩერება ევროპაში თბილისი იქნება. ამ საკითხზე, ისევე როგორც ყარაბაღზე, ზოგადად, პომპეოს ვიზიტსა და რეგიონში ახალ რეალობაზე ,,ევროპათაიმი“ ექსპერტს, რონდელის ფონდის მკვლევარს ზურაბ ბატიაშვილს ესაუბრება: _გასათვალისწინებელია, რომ ბაიდენი ხდება ამერიკის პრეზიდენტი, რომელსაც თავის დროზე ვიც-ეპრეზიდენტის პოზიციაზე ყოფნის დროს მოუწია ბევრ საკითხთან შეხება და წინასაარჩევნო პერიოდშიც გააკეთა ისეთი განცხადებები, რომლებიც თურქეთ-ამერიკის ურთიერთობებში, მაინცდამაინც კარგი მიმართულებით განვითარებას არ უნდა მიანიშნებდეს. თუ გავიაზრებთ იმას, რომ რომ ამერიკის სახელმწიფო მდივანი ჩადის რომელიმე ქვეყანაში და ვერ ხერხდება იქ შეხვედრა უმაღლესი თანამდებობის პირებთან, ეს ნამდვილად უპრეცედენტო ამბავია. ეს თავის მხრივ აჩენს მოლოდინებს რომ შესაძლებელია კიდევ უფრო დაიძაბოს ურთიერთობები. საქართველოში კი ჩამოდის ისეთ ვითარებაში, როცა ყარაბაღის მეორე ომი ახალი დამთავრებულია, რომელიც ფაქტობრივად, რუსეთის ხელახლა გაძლიერების ნიშანი. შექმნილ ვითარებაში, რა თქმა უნდა, საქართველოზე რუსეთის მხრიდან ზეწოლა გაიზრდება, ასეთ მომენტში გვჭირდება ძალიან ხელშესახები უსაფრთხოების გარანტიები. რადგან ნატოში გაწევრიანება ვერ ხერხდება, ასეთი შეიძლება იყოს, ამერიკული სამხედრო კომპონენტის გადმოტანა, ან დაარსება ახლიდან, რადგან ამის გარეშე ჩვენ ფაქტობრივად განწირულები აღმოვჩნდებით და მთელი გზა დასავლეთის მიმართულებით, შეიძლება წყალში ჩაყრილი აღმოჩნდეს. _ის ფაქტი, რომ ასეთი მაღალი დონის სტუმართან ფაქტობრივად ვერ ხერხდება ქვეყნის ოფიციალური წარმომადგენლების შეხვედრა, გარკვეულწილად, ალბათ წარმოაჩენს კიდეც ორი ქვეყნის დამოკიდებულებასაც ერმანეთის მიმართ. რა ფუნდამენტური საკითხებია ის რაზეც მათი ხედვები და ინტერესები ვერ მოდის თანხვედრაში? თურქეთსა და აშშ-ის შორის არის ძალიან ბევრი ფუნდამენტური საკითხი, საიდანაც მათი ხედვები ერთმანეთისგან განსხვავდება. ეს განსხვავებები დაიწყო ჯერ კიდევ მაშინ, როცა საბჭოთა კავშირი დაიშალა და თურქეთს არ ქონდა საფრთხე საბჭოთა კავშირის სახით. ამის შემდეგ თურქეთმა ნელნელა, მაგრამ მკაფიოდ დაიწყო დამოუკიდებელი პოლიტიკის გატარება, რაც კიდევ უფრო თვალშისაცემი გახდა ერდოღანის მმართველობის დროს. ახლა როდესაც, თურქეთ-ამერიკაზე ვსაუბრობთ, ვსაუბრობთ, მათ შორის არსებულ განსხვავებებზე, ეს ეხება სირიის კონფლიქტს, თურქეთი მხარს უჭერს, ოპოზიციას, მაგრამ ამერიკელები მხარს უჭერენ პროქურთულ ძალებს, რომელსაც თურქეთი ტერორისტულ ორგანიზაციად და თავისთვის საფრთხედ განიხილავს. სირიაშია ასეა, ასეა საბერძნეთთან ურთიერთობაში, სადაც ევროკავშირმაც და ამერიკამაც საბერძნეთის პოზიცია დაიკავეს. იგივე ეხება რუსული წარმოების S-400-ების შეძენის საკითხს, თურქეთი გარიცხეს ფ-35 პროგრამიდან, ეს არის თანამედროვე სამხედრო თვითმფრინავები, რომლის შეძენასაც თურქეთი გეგმავდა. არამხოლოდ მიწოდებას, არამედ ნაწილებსაც აწარმოებდა თურქეთი. გარდა ამისა სენატში უკვე მომწიფებულია სანქციები, რომელსაც დიდი ხნის განმავლობაში, აჩერებდა ტრამპი, რადგან ტრამპსა და ერდოღანს ახლო პირადი ურთიერთობა ჰქონდათ. ბაიდენი ამის გაჩერებას არ აპირებს, მით უმეტეს, ბაიდენს გაცხადებული აქვს მხარდაჭერა საბერძნეთის და სირიელი ქურთების მიმართ. ძალიან ბევრი საკითხი იქნება, რომელშიც ამერიკის და თურქეთის ხედვები არ დაემთხვევა. _თქვენ ბრძანეთ რომ გამოსავალი იქნებოდა თუ მოხერხდებოდა ამერიკული სამხედრო კომპონენტის საქართველოში გადმოტანა. სწორედ, რამდენიმე დღის წინ, გენერალმა ჰოჯესმა, ჩვენს გამოცემასთან ინტერვიუში განაცხადა, რომ კარგი იქნებოდა თუ აშშ გაზრდიდა ინფრასტრუქტურას და როტაციულ ძალებს საქართველოში, არის თუ არა ეს ერთგავრი გზავნილი პომპეოს ვიზიტის წინ, მით უფრო იმ ახალ რეალობასთან მიმართებით, რაც ყარაბაღში ახლა ხდება? ამერიკაშიც უკვე კარგად ხედავენ იმ საჭიროებას, რომელიც საქართველოსთვის მნიშვნელოვანია. როცა ასეთი მსჯელობა იწყება, ნიშნავს იმას, რომ სიტუაცია მწიფდება და შეიძლება რაღაც გადაწყვეტილებამდე მივიდნენ. ეს შეიძლება არ იყოს ნატო, მაგრამ შეიძლება იყოს საქართველოში ბაზის განთავსება. რაღაც სამხედრო კონტიგენტის განთავსება, ან რაღაც კომპონენტები, რაც თავისთავად უსაფრთხოების გარანტიებში შედის. თუ აქ იქნება ამერიკული ბაზა, ეს რუსეთისთვის იქნება შემაკავებელი ფაქტორი. _რა გავლენა შეიძლება იქონიოს საქართველოს სატრანზიტო პოტენციალზე ყარაბაღში შექნილმა ახალმა რეალობამ? ეს ნაკლებად ახდენს გავლენას. ის გზა, რომლის გახსნაზეც საუბარია ნახჩევანსა და აზერბაიჯანს შორის, ჯერ არ არსებობს, უნდა დაპროექტდეს. მეორე თემაა სომხეთი და რუსეთი რამდენად იქნება თანახმა. ერთია რუსეთთან ხელმოწერილი ხელშეკრულებები და მეორე, რამდენად შეასრულებს ის ამას. ეს თუ იქნება, არამხოლოდ ნახჩევანსა და აზერბაიჯანს, არამედ თურქეთსა და აზერბაიჯანს შორის, თურქეთსა და დანარჩენ თურქულ სამყაროსთან დამაკავშირებელი გზა, ეჭვი მეპარება, რუსეთი ამას დათანხმდეს. მას შეუძლია უამრავი სხვადასხვა მიზეზით შეაჩეროს და ის დახარჯული თანხაც, შესაძლოა, წყალში გადაყრილი აღმოჩნდეს.
„ქართული ოცნება“ ხელახალ არჩევნებს არ განიხილავს, ოპოზიციამ სამი მთავარი აქცია დაგეგმა
მაშინ, როდესაც რუსთველის გამზირზე ოპოზიცია საპროტესტო აქციას მართავდა, „ქართული ოცნების“ ლიდერებმა ოპონენტებს ბრიფინგიდან უპასუხეს და კიდევ ერთხელ შეახსენეს, რომ მმართველი გუნდი ხელახალ არჩევნებს არ განიხილავს. მამუკა მდინარაძემ სახელმწიფო დეპარტამენტის განცხადებაც მოიყვანა, რომელშიც მისი თქმით, მკაფიო გზავნილია ოპოზიციისთვის, რომ მეორე ტურისთვის მოემზადონ. სხვა გეგმა აქვს ოპოზიციას - პარლამენტთან მიმდინარე აქციაზე შეკრებილებს, მომავალი დღეების სამოქმედო გეგმა სიტყვით გამოსვლისას „ევროპული საქართველოს„ ერთ-ერთმა ლიდერმა გიგი უგულავამ გააცნო და სამი საპროტესტო აქცია დააანონსა. პირველი აქცია ამერიკის შეერთებული შტატების სახელმწიფო მდივნის, მაიკ პომპეოს საქართველოში ვიზიტისას გაიმართება. გარდა ამისა, შემდეგი აქცია ჩატარდება არჩევნების მეორე ტურის დღეს, 21 ნოემბერს. რაც შეეხება მესამე საპროტესტო აქციას, ის იმ დროს გაიმართება, როდესაც მეათე მოწვევის პარლამენტი პირველად შეიკრიბება. ოპოზიციის მოთხოვნებშია, ხელახალი არჩევნები, ცესკოს თავმჯდომარის, თამარ ჟვანიას გადადგომა, საარჩევნო ადმინისტრაციის ახალი წესით დაკომპლექტება და „პოლიტპატიმრების“ გათავისუფლება. საერთაშორისო პარტნიორების მონაწილეობით დღეს მოლაპარაკებების მეორე რაუნდი გაიმართა, თუმცა კონკრეტული შედეგისთვის მხარეებს ჯერ არ მიუღწევიათ. სახელმწიფო დეპარტამენტში გამართულ ბრიფინგზე დღეს განაცხადეს, რომ 21 ნოემბერს, საპარლამენტო არჩევნები მეორე ტური 16 მაჟორიტარულ ოლქში გაიმართება და თავისუფალი, სამართლიანი საარჩევნო პროცესი კრიტიკულად მნიშვნელოვანია ქართული დემოკრატიისთვის და ქართველი ხალხი აქტიურად მონაწილეობს ამ პროცესში. მასალაში გამოყენებულია რადიო თავისუფლების ფოტო რუსთაველის გამზირიდან
ალექსანდრე ლუკაშენკომ პირობა დადო, რომ მისი შვილები პრეზიდენტები არ გახდებიან
ბელარუსის პრეზიდენტმა ალექსანდრე ლუკაშენკომ პირობა დადო, რომ მისი შვილები პრეზიდენტები არ გახდებიან. „პრეზიდენტის თანამდებობიდან წასვლის შემდეგ არც ერთი ჩემი შვილი პრეზიდენტი არ გახდება. ვიმეორებ, არც ერთი შვილი“, - განაცხადა ალექსანდრე ლუკაშენკომ. 6 ნოემბერს ევროკავშირმა ლუკაშენკოს და 14 ბელარუს მაღალჩინოსანს სანქციები დაუწესა. ყოველდღიური მასობრივი პროტესტი ქვეყანაში 9 აგვისტოს საპრეზიდენტო არჩევნების შემდეგ დაიწყო, რომელშიც გამარჯვებულად კვლავ ალექსანდრე ლუკაშენკო გამოცხადდა. იგი უკვე მეექვსე ვადით იყრიდა კენჭს.მომიტინგეები ლუკაშენკოს გადადგომას და ხელახალი არჩევნების დანიშნვას მოითხოვენ. პროტესტის ჩახშობის მცდელობებს უკვე სულ მცირე, ოთხი მოქალაქე ემსხვერპლა, კიდევ 6 დაკარგულად ითვლება, დაშავებულთა და დაკავებულთა ზუსტი რაოდენობა უცნობია. ევროკავშირის ქვეყნები და აშშ არჩევნების შედეგებს არ სცნობენ.
ოპოზიციის მთავარ მოთხოვნად ხელახალი არჩევნები რჩება
„გირჩის“ ლიდერის, ზურაბ ჯაფარიძის განცხადებით, ოპოზიციის მთავარ მოთხოვნად კვლავ ხელახალი არჩევნები რჩება. როგორც ჯაფარიძემ ჟურნალისტებს აშშ-ის ელჩის რეზიდენციაში შეხვედრის დასრულების შემდეგ განუცხადა, ამ მთავარ მოთხოვნაზე შეიძლება დაშენდეს სხვა მოთხოვნებიც, კერძოდ, საარჩევნო ადმინისტრაციის და საარჩევნო კანონმდებლობის ცვლილება. „მთავარი მოთხოვნა არის ხელახალი არჩევნები იმიტომ, რომ არ არსებობს სამართლებრივი პროცედურები, რომელიც მიგვიყვანს იმ შედეგებამდე, რომელიც 31 ოქტომბერს გამოხატულ ქართველი ხალხის მიერ გამოხატულ ნებას ასახავს. ოპოზიციის მხრიდან ერთადერთი მთავარი საკითხი, რომელზეც მერე შეიძლება დაშენდეს სხვა საკითხები, როგორიც არის საარჩევნო ადმინისტრაციის ცვლილება, საარჩევნო კანონმდებლობის ცვლილება და ა.შ. მთავარი საკითხი არის ხელახალი არჩევნების საკითხი“, - განაცხადა ზურაბ ჯაფარიძემ. ამასთან, ჯაფარიძემ აღნიშნა, რომ ჯერჯერობით არ არის მიღებული გადაწყვეტილება, შეხვდება თუ არა ამერიკის შეერთებული შტატების სახელმწიფო მდივანი მაიკ პომპეო ოპოზიციის წარმომადგენლებს. „თუმცა, მგონია, რომ მნიშვნელოვანია მას ჰქონდეს ოპოზიციასთან შეხვედრა, რათა ჩვენი პოზიცია მოისმინოს იმ მთავარ ამბავზე, რომელიც ახლა ქვეყანაში ხდება. ეს არის გაყალბებული არჩევნები და ბოიკოტი ახალი პარლამენტის. თავისთავად ის ფაქტი, რომ აშშ-ს თუნდაც წარმავალი ადმინისტრაციის სახელმწიფო მდივანი ჩამოდის საქართველოში, ეს არის ძალიან მნიშვნელოვანი“, - განაცხადა ჯაფარიძემ.
მოლაპარაკების მაგიდაზე დარჩა ერთადერთი საკითხი - ოპოზიციის შეთავაზება ახალი არჩევნების შესახებ
მოლაპარაკების მაგიდაზე დარჩა ერთადერთი საკითხი - ოპოზიციის შეთავაზება ახალი არჩევნების შესახებ, - აღნიშნულის შესახებ „ევროპული საქართველოს“ ერთ-ერთმა ლიდერმა დავით ბაქრაძემ ამერიკის შეერთებული შტატების ელჩის რეზიდენციაში გამართულ შეხვედრის შემდეგ განაცხადა. როგორც ბარქაძე აღნიშნავს, მხარეებს შორის განსხვავებული პოზიციებია, თუმცა, ისინი შეთანხმდნენ, რომ დიალოგი გაგრძელდება. „ჯერჯერობით კონკრეტულ შედეგზე საუბარი ნაადრევია. უნდა გვესმოდეს, რომ მხარეთა პოზიციებს შორის ძალიან დიდი განსხვავებაა. სამწუხარო ფაქტი გახლავთ ნამდვილად ცესკოს გუშინდელი სხდომა და სრულიად უკანონო და სამარცხვინო გადაწყვეტილება, რომელიც მიიღეს, რომლითაც ოპოზიციას წაართვეს სასამართლოში გასაჩივრების უფლება, რომლითაც დახურეს კარი ოლქების და უბნების შედეგების გადათვლის და გადამოწმებისთვის, რომლითაც დაარღვიეს არსებული ვადები და დააჩქარეს გადაწყვეტილების მიღება. ამიტომ, ცესკოს ეს გადაწყვეტილება იყო ფაქტორი, რომელმაც ძალიან დაავიწროვა ჩვენი მოლაპარაკების თემა და შესაბამისად, მოლაპარაკების მაგიდაზე დარჩა ერთადერთი საკითხი - ოპოზიციის შეთავაზება ახალი არჩევნების შესახებ. ჯერჯერობით, პოზიციები ერთმანეთისგან დაშორებულია, მხარეები განსხვავებულ პოზიციაზე დგანან, მაგრამ ჩვენ შევთანხმდით, რომ დიალოგი და პროცესი გაგრძელდება და ამ დიალოგის ამოცანა გახლავთ სწორედ ის, რომ ძალიან დაშორებული პოზიციებიდან ნაბიჯ-ნაბიჯ მივიდეთ იმ კომპრომისამდე, რომელიც საჭიროა ამ ქვეყანაში სტაბილურობისთვის. სტაბილურობას სჭირდება აღქმა, რომ ქვეყანას ჰყავს ლეგიტიმური ხელისუფლება, სტაბილურობას სჭირდება აღქმა, რომ ქვეყანაში არსებობს კონსოლიდირებული საზოგადოება და ნორმალური პოლიტიკური პროცესი, ამ ყველაფერს ჩვენი შეფასებით, სჭირდება ახალი არჩევნები, ეს არის განხილვის თემა. პროცესი გაგრძელდება და უახლოეს დღეებში ჩვენ ველით კიდევ ახალ შეხვედრას“, - განაცხადა ბაქრაძემ.
არჩილ თალაკვაძე: დიალოგი არ დასრულებულა, კარი დიალოგისთვის და შეთანხმებისთვის ღიაა
საქართველოს პარლამენტის თავმჯდომარის, არჩილ თალაკვაძის განცხადებით, დიალოგი არ დასრულებულა, კარი დიალოგისთვის და შეთანხმებისთვის ღიაა. როგორც თალაკვაძემ აღნიშნა, შეთანხმება მიღწეულია, რომ კიდევ ერთ შეხვედრას ჩატარდეს. „მოლაპარაკებები გრძელდება. მოგეხსენებათ, რომ საპარლამენტო არჩევნები ჩატარებულია. ჩვენ მივესალმებით დიალოგის ფორმატს და მაქსიმალურად ვცდილობთ დავაახლოვოთ პოზიციები, რათა დემოკრატიამ და ჩვენი ქვეყნის პოლიტიკურმა სისტემამ განაგრძოს სტაბილურად ფუნქციონირება. ჩვენ, რა თქმა უნდა, არ გვაქვს მოლოდინი, რომ ამ ფორმატში დიალოგი პოლიტიკურ პარტიებს შორის დასრულდება და ამოიწურება. ჩვენ მზად ვართ, რომ ეს დიალოგი განვაგრძოთ საქართველოს მე-10 მოწვევის პარლამენტში. ვფიქრობ, რომ ახლა ჩვენი საზოგადოების და ქვეყნის ინტერესებში არის პოლიტიკური სტაბილურობა, არის უფრო მეტი თანამშრომლობის შესაძლებლობის მოძებნა პოლიტიკურ პარტიებს შორის. ჩვენს მიერ ჩატარებული რეფორმები ამის შესაძლებლობას აძლევს ნამდვილად ყველას. მოდით, გამოვიყენოთ ეს შესაძლებლობა“, - განაცხადა თალაკვაძემ.
მაიკ პომპეო საფრანგეთს ესტუმრა
აშშ-ის სახელმწიფო მდივანი მაიკ პომპეო ოფიციალური ვიზიტით საფრანგეთს ესტუმრა. „როიტერის“ ინფორმაციით, ვიზიტის ფარგლებში შეხვედრები დაგეგმილია პრეზიდენტ ემანუელ მაკრონთან და საგარეო საქმეთა მინისტრ ჟან ივ ლე დრიანთან. განსახილველ საკითხებს შორის არის - ეკონომიკა, უსაფრთხოება და კონტრტერორიზმი. „შესანიშნავია საფრანგეთში, აშშ-ის უძველეს მეგობარ და მოკავშირე ქვეყანაში ყოფნა. ჩვენი პარტნიორობა ეფუძნება საერთო ღირებულებებს - დემოკრატიას, თავისუფლებასა და კანონის უზენაესობას“, - დაწერა პომპეომ „ტვიტერში“. საფრანგეთის შემდეგ პომპეოს ვიზიტი დაგეგმილი აქვს თურქეთში, საქართველოში, ისრაელში, ყატარსა და საუდის არაბეთში.
ელისაშვილი: ველოდებით „ქართული ოცნების“ გონივრულ შეთავაზებას, რათა პროტესტიც აღარ გაგრძელდეს
ველოდებით გონივრული წინადადება შემოგვთავაზოს „ქართულმა ოცნებამ“, - ამის შესახებ პარტია „მოქალაქეების“ ლიდერმა ალეკო ელისაშვილმა აშშ-ის ელჩის რეზიდენციაში შეხვედრის დაწყებამდე განაცხადა. როგორც ელისაშვილმა აღნიშნა, ეს უნდა იყოს წინადადება, რომლითაც არც პროტესტი გაგრძელდება და ქვეყანაც დამშვიდდება. “ზუსტად ამას ველოდები, რომ „ქართულმა ოცნებამ“ ისეთი გონივრული კომპრომისი შემოგვთვაზოს, რომ პროტესტიც აღარ გაგრძელდეს და ქვეყანაც დამშვიდდეს“, - განაცხადა ელისაშვილმა. კითხვაზე, რა იქნება საუკეთესო გზა ამ შემთხვევაში, ელისაშვილმა ასე უპასუხა: „ადეკვატური წინადადება მათი მხრიდან“. აშშ-ის ელჩის რეზიდენციაში ოპოზიციის ლიდერებისა და უმრავლესობის წარმომადგენლების მორიგი შეხვედრა მიმდინარეობს. შეგახსენებთ, რომ პირველი შეხვედრა ამერიკის ელჩის რეზიდენციაში 12 ნოემბერს გაიმართა. აღნიშნულ შეხვედრაზე მხარეებმა ელჩებს არჩევნებთან დაკავშირებით თავიანთი მტკიცებულებები წარუდგინეს.
