სამართალი
სტრასბურგის სასამართლომ სააკაშვილის საქმეში დროებითი ზომის შესახებ მიუთითა
ადამიანის უფლებათა ევროპულმა სასამართლომ, საქმეში სააკაშვილი საქართველოს წინააღმდეგ (განცხადება No54641/21) მომჩივნის ჯანმრთელობის მდგომარეობასთან დაკავშირებით დროებით ზომაზე მიუთითა. ევროსასამართლოს ცნობით, სასამართლომ მოითხოვა, რომ მთავრობამ აცნობოს მას სააკაშვილის ამჟამინდელი ჯანმრთელობის მდგომარეობის შესახებ, უზრუნველყოს მისი უსაფრთხოება ციხეში და უზრუნველყოს ის შესაბამისი სამედიცინო დახმარებით. მისივე ცნობით, სასამართლოს რეგლამენტის 39-ე მუხლის თანახმად, სასამართლოს შეუძლია, დროებითი ზომების შესახებ მიუთითოს ადამიანის უფლებათა ევროპული კონვენციის მონაწილე სახელმწიფოს. მისივე განმარტებით, დროებითი ღონისძიებები არის გადაუდებელი ზომები, რომლებიც კარგად დამკვიდრებულ პრაქტიკას წარმოადგენს და გამოიყენება მხოლოდ მაშინ, როდესაც არსებობს გამოუსწორებელი ზიანის გარდაუვალი რისკი. „სასამართლოს ცნობით, სააკაშვილს ორჯერ ჩაუტარა გამოკვლევა ექიმთა ჯგუფმა, რომლებმაც დაადასტურეს, რომ ის შიმშილობს, იღებს მხოლოდ სითხეებსა და ვიტამინებს და დაკარგა წონის 10%, თუმცა რაიმე სერიოზული გაუარესება არ ყოფილა. სააკაშვილმა სამოქალაქო საავადმყოფოში გადაყვანა მოითხოვა, მაგრამ მოთხოვნა არ დაკმაყოფილდა. სააკაშვილი ამტკიცებდა, რომ ციხის საავადმყოფო არ იყო სათანადოდ აღჭურვილი მისი საჭიროებების დასაკმაყოფილებლად და რომ მისი უსაფრთხოების გარანტია არსებობდა. ამგვარად, მან მოითხოვა, ეყრდნობოდა მე-2 (სიცოცხლის უფლება) და მე-3 მუხლებს (არაადამიანური და ღირსების შემლახველი მოპყრობის აკრძალვა) მრავალპროფილურ სამოქალაქო საავადმყოფოში გადაყვანა, როგორც რეკომენდებულია სამედიცინო კოლეგიისა და საქართველოსა და უკრაინის სახალხო დამცველების მიერ. საჩივარი ევროპულ სასამართლოში 2021 წლის 10 ნოემბერს შევიდა. 2021 წლის 10 ნოემბერს სასამართლომ გადაწყვიტა, მიეთითებინა საქართველოს მთავრობისთვის, რომ სასამართლოს რეგლამენტის 39-ე მუხლის შესაბამისად, ეცნობებინა სასამართლოს განმცხადებლის ჯანმრთელობის ამჟამინდელი მდგომარეობის შესახებ, უზრუნველყოს მისი უსაფრთხოება ციხეში და უზრუნველყოს მისთვის შესაბამისი სამედიცინო მომსახურება შიმშილობის შემდგომ, აღდგენის პერიოდში. ასევე უნდა შემუშავდეს განმცხადებლის (სააკაშვილის) გამოჯანმრთელების გეგმა. ამავე დროს, სასამართლომ მოუწოდა განმცხადებელს, შეეწყვიტა შიმშილობა. მან მხარეებს შესთავაზა, წარადგინონ ინფორმაცია ამ დროებით ზომებთან დაკავშირებით, ორ კვირაში (2021 წლის 24 ნოემბრამდე). სასამართლომ ასევე გადაწყვიტა საქმისთვის პრიორიტეტი მიენიჭებინა 41-ე მუხლის შესაბამისად“, - აღნიშნულია განცხადებაში. ამავე თემაზე რას გულისხმობს სტრასგბურგის სასამართლოს გადაწყვეტილება ექსპრეზიდენტ სააკაშვილთან დაკავშირებით
ევროკავშირი ბელარუსის წინააღმდეგ სანქციებს აფართოებს
ევროკავშირმა ახალი სასანქციო კრიტერიუმები დაამტკიცა. ახალი პაკეტი შეზღუდვებს ითვალისწინებს იმ ფიზიკური და იურიდიული პირებისთვის, რომლებიც ევროკავშირში მიგრანტთა არაკანონიერ გადაყვანას ახორციელებენ. ევროკავშირის საბჭოს განცხადებით, დღევანდელი გადაწყვეტილება ევროკავშირის მტკიცე განწყობას ასახავს, წინ აღუდგეს მიგრანტების ინსტრუმენტალიზაციას პოლიტიკური მიზნებისთვის. „ჩვენ აღვკვეთავთ ამ არაადამიანურ და უკანონო პრაქტიკას. ამავდროულად, ჩვენ ხაზგასმით აღვნიშნავთ რეჟიმის მიერ საკუთარი მოსახლეობის წინააღმდეგ მიუღებელ რეპრესიებს და შესაბამის რეაგირებას მოვახდენთ“, - განაცხადა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჯოზეფ ბორელმა. შეგახსენებთ, 10 ნოემბერს, ევროკომისიის პრეზიდენტმა ვაშინგტონში, ჯო ბაიდენთან გამართული შეხვედრის შემდეგ განაცხადა, რომ ევროკავშირი ბელარუსის წინააღმდეგ სანქციებს გააფართოებს. ამასთან, ურსულა ფონ დერ ლაიენმა ბელარუსი „ჰიბრიდულ თავდასხმაში“ დაადანაშაულა. ცნობისთვის, Europetime-თან ექსკლუზიურ კომენტარში, NATO-ს ოფიციალური პირი მიგრანტთა ხელოვნურ კრიზისზე პასუხისმგებლობას ბელარუსს აკისრებს. NATO-ს შეფასებით, ლუკაშენკოს რეჟიმის მიერ მიგრანტების „ჰიბრიდული ტაქტიკის“ ნაწილად გამოყენება უკანონო, მიუღებელი და არაჰუმანურია. „NATO-ს ელჩებმა ამ კვირაში განიხილეს პოლონეთისა და ბელარუსის საზღვარზე არსებული ვითარება. NATO-ს მოკავშირეები პოლონეთის მიმართ სრულ სოლიდარობას გამოხატავენ. ალიანსი ასევე დგას სხვა მოკავშირეების გვერდით, რომლებზეც გავლენა მოახდინა ბელარუსის მიერ მიგრანტების ინსტრუმენტალიზაციამ. ბელარუსს ეკისრება პასუხისმგებლობა კრიზისზე და ლუკაშენკოს რეჟიმის მიერ მიგრანტების, როგორც „ჰიბრიდული ტაქტიკის“ ნაწილად გამოყენება არაჰუმანური, უკანონო და მიუღებელია. NATO სიტუაციის ახლოდან მონიტორინგს განაგრძობს. გენერალური მდივანი ამ საკითხზე მჭიდრო კავშირშია მოკავშირე მთავრობებთან. NATO მზადაა, შემდგომი დახმარება გაუწიოს ჩვენს მოკავშირეებს და განამტკიცოს თავდაცვა და უსაფრთხოება რეგიონში“, - განუცხადა Europetime-ს NATO-ს ოფიციალურმა პირმა.
საქართველოს სახელმწიფო საზღვრის უკანონო კვეთის საქმეზე მიხეილ სააკაშვილის სასამართლო პროცესი გაიმართება
საქართველოს სახელმწიფო საზღვრის უკანონო კვეთის საქმეზე მიხეილ სააკაშვილის სასამართლო პროცესი გაიმართებაამის შესახებ საქართველოს ყოფილი პრეზიდენტის, მიხეილ სააკაშვილის ადვოკატმა, დიმიტრი საძაგლიშვილმა განუცხადა. ადვოკატის თქმით, მიხეილ სააკაშვილის ჯანმრთელობის მდგომარეობა გაუარესებულია. ბექა ბასილაიამ განაცხადა, რომ სასამართლო პროცესზე მიხეილ სააკაშვილის დასწრების ეშინიათ და სავარაუდოდ, ეცდებიან, მიზეზად კვლავ „სუს-ის მითიური გამოძიება და მიხეილ სააკაშვილის ჯანმრთელობის მდგომარეობა მოიტანონ“. „დღესაც არ მომხდარა კონსილიუმის ვიზიტი პენიტენციურ დაწესებულებაში და მიხეილ სააკაშვილი მოითხოვს კონსილიუმთან შეხვედრას. ასევე, პარიტეტის საფუძველზე დაკომპლექტებული კონსილიუმის დაშვებას მასთან, თუმცა, ხელისუფლების მიერ შექმნილი კონსილიუმის შემადგენლობის შესვლაც გარეშე, პარიტეტის საფუძველზე დაკომპლექტებული კონსილიუმის გარეშეც არის მისი მოთხოვნა“, - განაცხადა საძაგლიშვილმა“, - განაცხადა ადვოკატმა. ცნობისთვის, 16 ნოემბერს, თბილისის საქალაქო სასამართლოში საქართველოს სახელმწიფო საზღვრის უკანონო კვეთის საქმეზე მიხეილ სააკაშვილის სასამართლო პროცესი გაიმართება. სხდომა 11:00 საათზეა ჩანიშნული. პენიტენციურმა სამსახურმა მიხეილ სააკაშვილის სასამართლოში გადაყვანაზე კვლავ უარი თქვა შეგახსენებთ, 14 ნოემბერს გახდა ცნობილი, რომ გლდანის სასჯელაღსრულების სამკურნალო დაწესებულებიდან, სადაც ასევე იმყოფება მიხეილ სააკაშვილი, მსჯავრდებული დეკანოზი გიორგი მამალაძე კორონავირუსის დადასტურების გამო სამოქალაქო კლინიკაში გადაიყვანეს. ამასთან, ექსპრეზიდენტის პირადმა ექიმმა, 13 ნოემბერს განაცხადა, რომ მიხეილ სააკაშვილს ძლიერი სისუსტე აქვს და ის ლოგინიდან ვეღარ დგება. მოგვიანებით, N18 სამკურნალო დაწესებულების მთავარმა ექიმმა ექსპრეზიდენტ სააკაშვილის მდგომარეობაზე კომენტარი გააკეთა და აღნიშნა, რომ სააკაშვილის სიცოცხლეს საფრთხე არ ემუქრება.
მესამე პრეზიდენტის საქმის მოსამართლე: სასამართლო არ გეგმავს პროცესების ციხეში გაგრძელებას
"სასამართლო არ გეგმავს პროცესების ციხეში გაგრძელებას, ტყუილს მოკლე ფეხები აქვს", - ამის შესახებ მიხეილ სააკაშვილის საქმის მოსამართლემ ბადრი კოჭლამაზაშვილმა სასამართლო პროცესზე განაცხადა. როგორც მან განმარტა, სასამართლო პროცესები ციხეში მასაც ჩაუტარებია, თუმცა, ამისთვის საკმარისი საფუძველი და აუცილებლობა უნდა არსებობდეს. „დაცვის მხარის მოლოდინი, რომ სასამართლო პროცესების პენიტენციურში ჩატარებას აპირებს, რომ თითქოს, ფარსში მონაწილეობს, ამას აქვე დავუსვამ წერტილს - სასამართლო არ გეგმავს პროცესების ციხეში გაგრძელებას და ტყუილს მოკლე ფეხები აქვს! მოგეხსენებათ, პენიტენციურშიც შეიძლება ჩატარდეს პროცესები, კანონმდებლობა ამის შესაძლებლობას იძლევა, მეც მქონია სხდომა ციხეში, მაგრამ ამისთვის საკმარისი საფუძველი უნდა იყოს და აუცილებლობა. როგორც წესი, ეს ბრალდებულის იმგვარი მდგომარეობაა, რაც ეტაპირების საშუალებას არ აძლევს, მაგრამ ბრალდებული ითხოვს ამას. მოცემულ შემთხვევაში, ბრალდებულის მდგომარეობა, გაცხადებული ინფორმაციით არის მძიმე, მაგრამ ბრალდებული არ ითხოვს ამას. ბუნებრივია, მის გარეშე ვერ მივიღებთ გადაწყვეტილებას. რაც შეეხება დისტანციურ ფორმას, დაცვის მხარის მხრიდან არ მომისმენია ამაზე ინფორმაცია, თუ მოგვაწვდით ამ ინფორმაციას მოხარული ვიქნები",- განაცხადა კოჭლამაზაშვილმა.
შსს „ნაციონალური მოძრაობის“ ორგანიზებით დღეს დაგეგმილ საპროტესტო აქციასთან დაკავშირებით განცხადებას ავრცელებს
შსს „ნაციონალური მოძრაობის“ ორგანიზებით დღეს დაგეგმილ საპროტესტო აქციასთან დაკავშირებით განცხადებას ავრცელებს. უწყების განცხადებით აღნიშნული აქციის გაცხადებული მიზანია, თბილისში სატრანსპორტო კოლაფსის გამოწვევა. „ერთიანი ნაციონალური მოძრაობის“ ორგანიზებით დაგეგმილია საპროტესტო აქცია, რომლის ფარგლებშიც სატრანსპორტო კვანძების, კერძოდ, მტკვრის მარჯვენა და მარცხენა სანაპიროებზე მოძრაობის გადაკეტვა იგეგმება. შეკრებებისა და მანიფესტაციების შესახებ“ საქართველოს კანონის მე-11 მუხლის თანახმად, შეკრების მონაწილეებს ეკრძალებათ განზრახ შექმნან დაბრკოლებები ტრანსპორტის გადაადგილებისთვის. ამავე კანონის მე-11 პრიმა მუხლის თანახმად, დაუშვებელია ტრანსპორტის სავალი ნაწილის ავტომანქანებით, სხვადასხვა კონსტრუქციით ან/და საგნით გადაკეტვა. საქართველოს შინაგან საქმეთა სამინისტრო დაგეგმილი აქციის ორგანიზატორებსა და მონაწილეებს შეახსენებს, რომ აღნიშნული წესების დარღვევა გამოიწვევს პასუხისმგებლობას ადმინისტრაციულ სამართალდარღვევათა კოდექსის შესაბამისად. გარდა ამისა, სისხლის სამართლის კოდექსის 226-ე მუხლის თანახმად, დანაშაულს წარმოადგენს ჯგუფური მოქმედების ორგანიზება, რომელიც უხეშად არღვევს საზოგადოებრივ წესრიგს ან დაკავშირებულია ხელისუფლების წარმომადგენლის კანონიერი მოთხოვნისადმი აშკარა დაუმორჩილებლობასთან, ასევე, ტრანსპორტის, საწარმოს, დაწესებულების ან ორგანიზაციის მუშაობის შეფერხება და აგრეთვე ასეთ მოქმედებაში აქტიური მონაწილეობა. აღნიშნული ქმედების ჩადენა ითვალისწინებს თავისუფლების აღკვეთას 3 წლამდე ვადით. შინაგან საქმეთა სამინისტრო მიმდინარე აქციების და შეკრებების დროს მოქალაქეებსა და პოლიტიკურ ლიდერებს მოუწოდებს, დაიცვან საქართველოს კონსტიტუცია, პატივი სცენ პოლიციელთა პროფესიულ საქმიანობას, არ გასცდნენ მშვიდობიანი შეკრების კანონით დადგენილ ფარგლებს, დაემორჩილონ პოლიციის მოთხოვნას და დაიცვან საზოგადოებრივი წესრიგი. კანონდარღვევის ნებისმიერი ფაქტი პოლიციის მხრიდან მყისიერად იქნება აღკვეთილი და მოჰყვება შესაბამისი რეაგირება. ამასთან, საჭიროების შემთხვევაში, საზოგადოებრივი წესრიგის აღდგენის მიზნით შინაგან საქმეთა სამინისტრო გამოიყენებს კანონით გათვალისწინებულ პროპორციულ ძალას და სპეციალურ საშუალებებს“, - აღნიშნულია განცხადებაში. ამავე თემაზე: ნიკა მელია: ხვალ, ჩვენი აქციებით გადაიკეტება საავტომობილო მოძრაობა თბილისის ორივე სანაპიროზე
პენიტენციურმა სამსახურმა მიხეილ სააკაშვილის სასამართლოში გადაყვანაზე კვლავ უარი თქვა
სპეციალურმა პენიტენციურმა სამსახურმა მიხეილ სააკაშვილს სასამართლოში გადაყვანაზე კვლავ უარი თქვა. როგორც განცხადებაშია აღნიშნული, სპეციალური პენიტენციური სამსახურის მიერ სახელმწიფო უსაფრთხოების სამსახურიდან გამოთხოვილი ინფორმაციის თანახმად და უწყებიდან მიღებული ინფორმაციიდან გამომდინარე, მსჯავრდებულ მიხეილ სააკაშვილის წარმოდგენა სასამართლო სხდომის დარბაზში მისი უსაფრთხოების საკითხებიდან გამომდინარე, გარკვეულ რისკებთან არის დაკავშირებული. უწყებაში განმარტავენ, რომ ამ ეტაპზე მსჯავრდებულ მ. სააკაშვილს შეწყვეტილი აქვს მკურნალობის არსებითი ნაწილი, სასამართლო პროცესზე გაყვანა და დასწრება წარმოადგენს დამატებით რისკს მისი ჯანმრთელობისთვის. „სახელმწიფო უსაფრთხოების სამსახურის წარმოებაშია სს საქმე, დანაშაული, გათვალისწინებული სსკ-ის 315 მუხლის პირველი ნაწილით, სახელმწიფო უსაფრთხოების სამსახურის მიერ საჯაროდ გავრცელებული განცხადებით კი ცნობილი გახდა, რომ იგეგმებოდა მ. სააკაშვილის პენიტენციურ დაწესებულებაში ეტაპირებისათვის ხელის შეშლის მიზნით, დაწესებულებასთან მისასვლელი საავტომობილო გზების ბლოკირება, რიგი პოლიტიკური პარტიების წარმომადგენელთა საკუთრებაში არსებული ავტომანქანების საშუალებით. მათ განზრახული ჰქონდათ აღნიშნული დესტრუქციული ხასიათის მოქმედებების განხორციელება, რომელშიც მონაწილეობას მიიღებდა დაახლოებით 500-600 ავტომანქანა, რაც გამოიწვევდა უკონტროლო სიტუაციას, ქაოსსა და შექმნილი ვითარება ხელს შეუშლიდა მიხეილ სააკაშვილის ეტაპირების პროცესს. აღნიშნული სახის ქმედებებს შესაძლოა ადგილი ჰქონდეს მისი სასამართლო დარბაზში ესკორტირების შემთხვევაშიც. აღსანიშნავია, რომ სპეციალური პენიტენციური სამსახურის მიერ სახელმწიფო უსაფრთხოების სამსახურიდან გამოთხოვილი ინფორმაციის თანახმად და უწყებიდან მიღებული ინფორმაციიდან გამომდინარე მსჯავრდებულ მ. სააკაშვილის წარმოდგენა სასამართლო სხდომის დარბაზში მისი უსაფრთხოების საკითხებიდან გამომდინარე, გარკვეულ რისკებთან არის დაკავშირებული. ამ ეტაპზე მსჯავრდებულ მ. სააკაშვილს შეწყვეტილი აქვს მკურნალობის არსებითი ნაწილი, სასამართლო პროცესზე გაყვანა და დასწრება წარმოადგენს დამატებით რისკს მისი ჯანმრთელობისთვის. შესაბამისი გადაწყვეტილების მიღების შემთხვევაში, სპეციალური პენიტენციური სამსახური უზრუნველყოფს ბრალდებულ/მსჯავრდებულ მ. სააკაშვილის დისტანციურ მონაწილეობას სასამართლო სხდომაში, ასევე შესაძლებელია სასამართლო სხდომის N18 ბრალდებულთა და მსჯავრდებულთა სამკურნალო დაწესებულებაში გამართვა“, - ნათქვამია განცხადებაში. ცნობისთვის, თანხების გაფლანგვის საქმეზე სასამართლო პროცესი, რომელზეც საქართველოს ყოფილი პრეზიდენტი მიხეილ სააკაშვილია ბრალდებული, თბილისის საქალაქო სასამართლოში დღეს, 11:00 საათზე ჩატარდება.
მიხეილ სააკაშვილს ხვალინდელ სასამართლო პროცესზე დასწრება სურს
ექსპრეზიდენტს სასამართლოში ხვალინდელ პროცესზე დასწრება სურს. მიხეილ სააკაშვილის ადვოკატის თქმით, სასამართლში სააკაშვილის გადაყვანის ყველანაირი საფუძველი არსებობს. ამის შესახებ ჟურნალისტებს ბექა ბასილაიამ განუცხადა. მისივე თქმით, იმ შემთხვევაში, თუ მიხეილ სააკაშვილს ისევ არ მიეცემა პროცესზე დასწრების შესაძლებლობა, კიდევ ერთხელ დადასტურდება, რომ ხელისუფლებას მიხეილ სააკაშვილის გამოჩენის ეშინია. ხვალ მიხეილ სააკაშვილის პროცესი ე.წ. პიჯაკების საქმეზე 11:00 საათზეა ჩანიშნული. „სასამართლოდან მოთხოვნა, მიხეილ სააკაშვილის გადაყვანასთან დაკავშირებით, გაიგზავნა პარასკევს, შესაბამისად, ყველანაირი სამართლებრივი პროცედურული საფუძველი, მიხეილ სააკაშვილის გადაყვანის არსებობს. მიხეილ სააკაშვილს აქვს უფლება, უშუალოდ მიიღოს პროცესში მონაწილეობა, ხოლო სახელმწიფო ვალდებულია, უზრუნველყოს ეს უშუალობა და მიხეილ სააკაშვილი წარმოადგინოს სასამართლოს წინაშე. ჯანმრთელობის მდგომარეობა რა თქმა უნდა, ძალიან რთული და მძიმეა, მაგრამ მიხეილ სააკაშვილი აცხადებს, რომ მოიკრებს მაქსიმალურად ძალ-ღონეს და დაესწრება ამ პროცესს. მთავარია, უზრუნველყონ მისი გადაყვანა, მისი არგადაყვანის არანაირი სამართლებრივი საფუძველი არ არსებობს“, - განაცხადა ბექა ბასილაიამ. მიხეილ სააკაშვილის პირველი სასამართლო პროცესი თბილისის საქალაქო სასამართლოში 10 ნოემბერს მის გარეშე გაიმართა. ცნობისთვის, სპეციალურმა პენიტენციურმა სამსახურა მიხეილ სააკაშვილს სასამართლო პროცესზე ვერგადაყვანის მიზეზად ოპოზიციის „შესაძლო დესტრუქციული ქმედებები და ასევე, ექსპრეზიდენტის ჯანმრთელობის მდგომარეობა დაასახელა. რაც შეეხება კონსილიუმის საკითხს, საქართველოს ექსპრეზიდენტის ადვოკატი შოთა თუთბერიძე აცხადებს, რომ დეზინფორმაციაა, თითქოს მიხეილ სააკაშვილი ეწინააღმდეგებოდა ექიმების ვიზიტს ციხეში. მისი თქმით, მიხეილ სააკაშვილი, ცხადია, ითხოვს, პარიტეტული კონსილიუმის დაუყოვნებლივ ფორმირებას და რაც შეიძლება სწრაფად შესვლას ციხეში, თუმცა, მიუხედავად ამისა, ის არ ეწინააღმდეგება არცერთი წუთით ამჟამად არსებული კონსილიუმის ვიზიტს. „ის მზად არის შეხვდეს როგორც მთლიან კონსილიუმს, ასევე მათ ინდივიდუალურად. ასევე, ვფიქრობთ და მოვითხოვთ მიხეილ სააკაშვილთან კონსილიუმის ვიზიტი ვიდრე პარიტეტული კონსილიუმი შეიქმნება, უნდა განხორციელდეს ყოველგვარი შეფერხებისა და ხელოვნური ბარიერების გარეშე, - აცხადებს შოთა თითბერიძე. 14 ნოემბერს გახდა ცნობილი, რომ გლდანის სასჯელაღსრულების სამკურნალო დაწესებულებიდან, სადაც ასევე იმყოფება მიხეილ სააკაშვილი, მსჯავრდებული დეკანოზი გიორგი მამალაძე კორონავირუსის დადასტურების გამო სამოქალაქო კლინიკაში გადაიყვანეს. ამასთან, ექსპრეზიდენტის პირადმა ექიმმა, 13 ნოემბერს განაცხადა, რომ მიხეილ სააკაშვილს ძლიერი სისუსტე აქვს და ის ლოგინიდან ვეღარ დგება.
ტორესა მოსი გათავისუფლდა
„გირჩი - მეტი თავისუფლების“ წევრის, მწერლის, ტორესა მოსის მხარდასაჭერად ლიტერატურის სფეროს წარმომადგენლებმა აქცია გამართეს. პროტესტის მონაწილეებმა ხელისუფლებას მიმართეს. „სოლიდარობის აქტია ეს ჩვენი კოლეგის, ტორესა მოსის და სხვა მოქალაქეების და აქტივისტების მიმართ, რომლებიც დაიჭირა დანაშაულებრივად რეჟიმმა. ეს არის საერთო კონტექსტი ჩვენი პროტესტის: გაყალბებული არჩევნების, მესამე პრეზიდენტის ეგზეკუციის და საერთოდ იმ პროცესის, რომელიც დამოკიდებულია საქართველოს დაღმასვლასთან, რუსეთის ქვეშ“, - განაცხადა მწერალმა და დრამატურგმა, ლაშა ბუღაძემ. „ყველანი შეშფოთებულები ვართ იმით, რაც ხდება ჩვენს ქვეყანაში და სამწუხაროდ ვითარება ყოველ დღე უარესდება და უარესდება. სამწუხაროდ, ყველაფერი კეთდება იმისათვის, რომ ისედავ პოლარიზებული საზოგადოება კიდევ უფრო აგრესიულად იყოს ერთმანეთის მიმართ განწყობილი“, - განაცხადა ლიტერატურის მუზეუმის ხელმძღვანელმა, ლაშა ბაქრაძემ. ადმინისტრაციული საქმის განხილვა 19 ნოემბერს ჩაინიშნა. შეგახსენებთ, სუს-ის შენობებთან აქტივისტებმა პროტესტი დააფიქსირეს და შესასვლელების ბლოკირება მანქანებით მოახდინეს. ამავე თემაზე: „გირჩი - მეტი თავისუფლების” წევრმა შიმშილობა დაიწყო
"გირჩი - მეტი თავისუფლების" წევრს 6-დღიანი პატიმრობა მიუსაჯეს
"გირჩი - მეტი თავისუფლების" წევრს, ბორის ყურუას 6-დღიანი პატიმრობა მიუსაჯეს. ბორის ყურუა სხვა აქტივისტებთან ერთად, 10 ნოემბერს, სუს-თან გამართულ აქციაზე დააკავეს. "გირჩი - მეტი თავისუფლების" ლიდერის, ზურაბ ჯაფარიძის თქმით, ყურუა ერთ-ერთი ტელევიზიის ეთერში ჩართვას ელოდებოდა და მას არაფერი დაუშავებია. სახელმწიფო უსაფრთხოების სამსახურის შენობასთან სამართალდამცველებმა ოპოზიციის აქციიდან 20-ზე მეტი აქტივისტი დააკავეს. 10 ნოემბერს, შინაგან საქმეთა სამინისტრომ ადმინისტრაციული წესით ჯამში ოპოზიციის 46 აქტივისტი დააკავა. თბილისში საპროტესტო აქცია ერთდროულად ე.წ მოდულის შენობასთან, იუსტიციის სამინისტროთან და ჯანდაცვის სამინისტროსთან იმართებოდა.
ექსპრეზიდენტ სააკაშვილის ამერიკელმა ადვოკატმა პირველი კომენტარი გააკეთა
საქართველოს ექსპრეზიდენტის ამერიკელი ადვოკატი ექსპრეზიდენტს შეხვდა. ამერიკელი ადვოკატის ინფორმაციით, მიხეილ სააკაშვილი მხნედ არის. გლდანში, სასჯელაღსრულების სისტემის მე-18 სამკურნალო დაწესებულებიდან გამოვლის შემდეგ, ჯონ სენდვეგმა განაცხადა, რომ დაწესებულებაში, სადაც მიხეილ სააკაშვილი იმყოფება, ადეკვატურად ვერ იქნება დაცული ვერც მისი ჯანმრთელობა და ვერც უსაფრთხოება, რაც სერიოზულ შეშფოთებას იწვევს. მისი თქმით, დაწესებულება არ არის საკმარისად აღჭურვილი საიმისოდ, რომ მდგომარეობის დამძიმების შემთხვევაში, პაციენტს ადეკვატური დახმარება გაუწიონ. რაც შეეხება უსაფრთხოების მხარეს. ადვოკატის თქმით, ამავე საპატიმროში არიან ის პირებიც, რომლებიც სააკაშვილის პრეზიდენტობის დროს გაასამართლეს. სენვიდიგ თქმით, საერთაშორისო სამართლის ნორმების თანახმად, საქართველო ვალდებულია, იზრუნოს პატიმარზე. ამერიკელმა ადვოკატმა ასევე შემაშფოთებელი უწოდა გავრცელებულ ვიდეოჩანაწერებსაც, რომელიც მიხეილ სააკაშვილის იძულებით გადაყვანას ასახავს სასჯელაღსრულების სისტემის მე-18 სამკურნალო დაწესებულებაში.
უკრაინის სახალხო დამცველი გაეროს კომიტეტს ექსპრეზიდენტ სააკაშვილთან დაკავშირებულ ვიდეოზე რეაგირებისკენ მოუწოდებს
უკრაინის სახალხო დამცველის, ლუდმილა დენისოვას შეფასებით, დღეს გავრცელებულ ვიდეოში ნაჩვენებია მიხეილ სააკაშვილის წამება და მის მიმართ არასათანადო მოპყრობა, რაც ადამიანის უფლებათა და ძირითად თავისუფლებათა დაცვის კონვენციის მე-3 მუხლის უხეში დარღვევაა. მისივე შეფასებით, საქართველოს იუსტიციის სამინისტროს სპეციალური სასჯელაღსრულების სამსახურის არასათანადო საქციელით დაირღვა სამოქალაქო და პოლიტიკური უფლებების შესახებ საერთაშორისო ხელშეკრულების მე-7 მუხლი და წამებისა და სხვა სასტიკი, არაადამიანური ან დამამცირებელი მოპყრობის ან სასჯელის წინააღმდეგ გაეროს კონვენციის 1-ლი მუხლი. ის მოუწოდებს გაეროს წამების წინააღმდეგ კომიტეტს და წამების ან არაადამიანური ან დამამცირებელი მოპყრობის ან სასჯელის პრევენციის ევროპულ კომიტეტს, რეაგირება მოახდინონ უკრაინის მოქალაქის მიხეილ სააკაშვილის მიმართ წამების გამოყენებაზე, მისი გლდანის სასჯელაღსრულების დაწესებულების საავადმყოფოში გადაყვანის დროს. ადამიანის უფლებათა ევროპული სასამართლოს პრეცედენტული სამართლის თანახმად, მოპყრობა განიხილება არაადამიანურად, როდესაც სისასტიკის მინიმალური დონეც კი მიღწეულია მსხვერპლის ასაკისა და ჯანმრთელობის მდგომარეობიდან გამომდინარე და ღირსების შემლახავია, თუ მისი მიზანი მსხვერპლში შიშის, ტანჯვისა და არასრულფასოვნების გამოწვევა და ამით მისი დამცირებაა. ადამიანის უფლებათა ევროპული სასამართლო ხაზს უსვამს, რომ ნებისმიერი წამება ან არაადამიანური ან ღირსების შემლახავი მოპყრობა ან სასჯელი აკრძალულია საქმის გარემოებების ან მსხვერპლის ქცევის მიუხედავად“, - აღნიშნულია განცხადებაში.
სახელმწიფო ინსპექტორის სამსახურმა ექსპრეზიდენტ სააკაშვილთან დაკავშირებული ვიდეოჩანაწერის გასაჯაროების კანონიერების შესწავლა დაიწყო
სახელმწიფო ინსპექტორის სამსახურმა ექსპრეზიდენტ სააკაშვილთან დაკავშირებული ვიდეოჩანაწერის გასაჯაროების კანონიერების შესწავლა დაიწყო. სახელმწიფო ინსპექტორის სამსახური აცხადებს, რომ მონაცემთა გასაჯაროებისას დაცული უნდა იყოს ადამიანის პატივი და ღირსება. სპეციალური პენიტენციური სამსახურისა და საქართველოს იუსტიციის სამინისტროს მიერ 11 ნოემბერს გამოქვეყნებულ კადრებზე მიუთითებს, რომლებზეც აღბეჭდილია საქართველოს მესამე პრეზიდენტის მიხეილ სააკაშვილის №18 დაწესებულებაში იძულებით შეყვანისა და მისი საკანში განთავსების ფაქტი, სახელმწიფო ინსპექტორის სამსახურის თქმით, მიუხედავად იმისა, რომ სახელმწიფო ინსპექტორის სამსახურის მიერ არაერთხელ გავრცელდა მოწოდება იმის თაობაზე, რომ ყველა უწყება და პირი სიფრთხილით მოკიდებოდა საქართველოს მესამე პრეზიდენტის პერსონალური მონაცემების გასაჯაროების საკითხს, ბოლო პერიოდში სისტემატური ხასიათი მიიღო მისი პერსონალური მონაცემების შემცველი ვიდეოჩანაწერების გავრცელებამ საჯარო ინტერესის დაკმაყოფილების მოტივით. „სახელმწიფო ინსპექტორის სამსახური კიდევ ერთხელ შეახსენებს ყველას, რომ მაღალი საჯარო ინტერესის პარალელურად, მონაცემთა გასაჯაროებისას დაცული უნდა იყოს ადამიანის პატივი და ღირსება. „ამასთან, იმ პირობებში, როცა სახელმწიფო ინსპექტორის სამსახურში მიმდინარეობს მესამე პრეზიდენტის პერსონალური მონაცემების მოპოვებისა და გასაჯაროების არაერთი ფაქტის კანონიერების შესწავლა, რომლებზეც ამ ეტაპზე არ არის მიღებული საბოლოო გადაწყვეტილება, კატეგორიულად მიუღებელია სპეციალური პენიტენციური სამსახურისა და საქართველოს იუსტიციის სამინისტროს მიერ ამგვარი პრაქტიკის გაგრძელება და მესამე პრეზიდენტის პერსონალური მონაცემების გასაჯაროება. აღნიშნულ ფაქტზეც, სახელმწიფო ინსპექტორის სამსახურმა დაიწყო ვიდეოჩანაწერის გასაჯაროების კანონიერების შესწავლა. ამასთან, როგორც საზოგადოებისთვის ცნობილია სახელმწიფო ინსპექტორის სამსახურში მიმდინარეობს გამოძიება საქართველოს მესამე პრეზიდენტის მიხეილ სააკაშვილის მიმართ განხორციელებული შესაძლო არაადამიანური მოპყრობის ფაქტზე, საქართველოს სისხლის სამართლის კოდექსის 144-ე ტერცია მუხლის მე-2 ნაწილის ,,ა“, ,,ბ“, ,,ე“ და ,,ზ“ ქვეპუნქტებით გათვალისწინებული დანაშაულის ნიშნებით. აღნიშნული სისხლის სამართლის საქმის გამოძიების ფარგლებში, გამოძიების დაწყების დღესვე სახელმწიფო ინსპექტორის სამსახურმა წერილობით მიმართა სპეციალურ პენიტენციურ სამსახურს მიხეილ სააკაშვილის №12 დაწესებულებიდან №18 დაწესებულებაში ტრანსპორტირებისა და მისი №18 დაწესებულებაში განთავსების ამსახველი ვიდეოჩანაწერების არსებობა-არარსებობის დადასტურებისა და მათი დაარქივების მოთხოვნით. იმ პირობებში, როცა სპეციალურ პენიტენციურ სამსახურს სახელმწიფო ინსპექტორის სამსახურისთვის ამ დრომდე არ დაუდასტურებია ასეთი ჩანაწერების არსებობის ფაქტი და შესაბამისად, არ მომხდარა სასამართლო განჩინების საფუძველზე მათი გამოთხოვა, სპეციალური პენიტენციური სამსახურისა და იუსტიციის სამინისტროს მხრიდან აღნიშნული კადრების გასაჯაროება (რომელიც მათ შორის, წარმოადგენს სახელმწიფო ინსპექტორის სამსახურის წარმოებაში არსებულ სისხლის სამართლის საქმეზე მტკიცებულებას), საფრთხეს უქმნის ეფექტიანი გამოძიების ჩატარებას. ზემოაღნიშნულიდან გამომდინარე, მოვუწოდებთ საქართველოს იუსტიციის სამინისტროს და სპეციალურ პენიტენციურ სამსახურს, შეწყვიტონ საქართველოს მესამე პრეზიდენტის პერსონალური მონაცემების შემცველი ვიდეოჩანაწერების გასაჯაროება, პატივი სცენ ადამიანის პატივს, ღირსებას და პირადი ცხოვრების ხელშეუხებლობას. ასევე, თავი შეიკავონ სახელმწიფო ინსპექტორის წარმოებაში არსებული სისხლის სამართლის საქმის შეფასებისაგან, ვინაიდან მიხეილ სააკაშვილის მიმართ შესაძლო არაადამიანური მოპყრობის ფაქტის გამოძიება წარმოადგენს სახელმწიფო ინსპექტორის სამსახურის კომპეტენციას“, - აღნიშნულია განცხადებაში.
ნინო ლომჯარია ვიდეოკადრებზე: ირღვევა პირადი ცხოვრების ხელშეუხებლობის უფლება
"სრულიად არაპროპორციული და შეურაცხმყოფელი ფორმით კადრების გავრცელებით, ირღვევა მისი პატივის, ღირსებისა და პირადი ცხოვრების ხელშეუხებლობის უფლება", - ამის შესახებ სახალხო დამცველმა ნინო ლომჯარიამ საქართველოს ყოფილი პრეზიდენტის, მიხეილ სააკაშვილის შესახებ პენიტენციური სამსახურის მიერ გავრცელებულ ვიდეოსთან დაკავშირებით განცხადა. ომბუდსმენი მოითხოვს, იუსტიციის მინისტრმა და სპეციალურმა პენიტენციურმა სამსახურმა პატივი სცენ პატიმართა უფლებებს და შეწყვიტონ მიხეილ სააკაშვილის პერსონალურ მონაცემთა, პატივისა და ღირსების დარღვევა. „იუსტიციის სამინისტრომ/სპეციალურმა პენიტენციურმა სამსახურმა N18 სამედიცინო დაწესებულებაში მიხეილ სააკაშვილის მისი ნების საწინააღმდეგოდ, ძალის გამოყენებით შესახლების ამსახველი კადრების გავრცელებით პატიმრის პატივის, ღირსებისა და პირადი ცხოვრების ხელშეუხებლობის უფლება დაარღვია. ხაზგასასმელია, რომ ვიდეოჩანაწერები სრულად და უწყვეტად არ ასახავს რელევანტურ ეპიზოდს, ხოლო კომპილაციაში მოხვედრილ რამდენიმე ეპიზოდში პატიმარი ნახევრად შიშველ, დამამცირებელ მდგომარეობაშია აღბეჭდილი. გარდა ამისა, ვიდეოჩანაწერების ანალიზით დადასტურდა, რომ მიხეილ სააკაშვილის N18 დაწესებულებაში გადაყვანა მოხდა მოტყუებით და მისი ნების საწინააღმდეგოდ, რასაც სახალხო დამცველი 2021 წლის 8 ნოემბერსვე აცხადებდა. იუსტიციის მინისტრის ცნობით, ვიდეოჩანაწერების ნაკრების გავრცელება მიზნად ისახავდა ადვოკატის განცხადებების უარყოფას მიხეილ სააკაშვილის მიმართ სავარაუდო არასათანადო მოპყრობასთან დაკავშირებით. როგორც ცნობილია, მიხეილ სააკაშვილის მიმართ სავარაუდო არასათანადო მოპყრობის ფაქტზე სახელმწიფო ინსპექტორის სამსახურში გამოძიება მიმდინარეობს. სახელმწიფო ინსპექტორის ცნობით (https://bit.ly/3c3j7og), გამოძიების მიერ მოთხოვნილი ვიდეოჩანაწერები პენიტენციურ სამსახურს ამ დრომდე არ მიუწოდებია. შესაბამისად, გაურკვეველია, თუ რატომ გადაწყდა აღნიშნული ვიდეომასალის გასაჯაროება და არა მისი სრული სახით მიწოდება საგამოძიებო ორგანოსთვის. სახალხო დამცველს მიაჩნია, რომ აბსტრაქტულ ლეგიტიმურ მიზანზე მითითებით და სრულიად არაპროპორციული და შეურაცხმყოფელი ფორმით პატიმარ მიხეილ სააკაშვილის კადრების გავრცელებით ირღვევა მისი პატივის, ღირსებისა და პირადი ცხოვრების ხელშეუხებლობის უფლება. ადვოკატის პოზიციის გასაბათილებლად, გამოძიებისთვის აღნიშნული ვიდეომასალების სრულად მიწოდებასთან ერთად, შესაძლებელია შერჩეულიყო უფლების ნაკლებად მზღუდავი სხვა საშუალება. სახალხო დამცველი მოითხოვს- იუსტიციის მინისტრმა და სპეციალურმა პენიტენციურმა სამსახურმა პატივი სცენ პატიმართა უფლებებს და შეწყვიტონ მიხეილ სააკაშვილის პერსონალურ მონაცემთა, პატივისა და ღირსების დარღვევა“,-აღნიშნულია განცხადებაში. ცნობისთვის, სპეციალური პენიტენციური სამსახური მიხეილ სააკაშვილის გლდანის ციხის სამკურნალო დაწესებულებაში გადაყვანის კადრებს ასაჯაროებს. კადრებში ჩანს, რომ მიხეილ სააკაშვილი უარს აცხადებს სასწრაფო დახმარების მანქანიდან გადმოსვლაზე, რის შემდეგაც ის რეანიმობილიდან იძულებით გადმოიყვანეს.
იუსტიციის მინისტრი: მიხეილ სააკაშვილი შიმშილობას თუ შეწყვეტს, რუსთავის მე-12 დაწესებულებაში დაბრუნდება
საქართველოს იუსტიციის მინისტრ რატი ბრეგაძის განცხადებით, მიხეილ სააკაშვილი შიმშილობას თუ შეწყვეტს, ის მე-12 დაწესებულებაში დაბრუნდება. მისივე თქმით, მიხეილ სააკაშვილი მე-12 დაწესებულებიდან მე-18 დაწესებულებაში მოტყუებით არ გადაუყვანიათ, არამედ მან იცოდა, რომ სამკურანლო დაწესებულებაში გადადიოდა. „ამას აცხადებს თავად პატიმარი, თუმცა თქვენ ხედავთ, რომ ის გამოდის, მიდის თავისი ნებით. და საერთოდ, გადაწყვეტილებას, თუ სად იქნება პატიმარი გადაყვანილი, იღებს არა თავად პატიმარი, არამედ სპეციალური პენიტენციური სამსახური საჭიროებიდან გამომდინარე. ვისაც მსგავსი კითხვები უჩნდება, კარგად გაეცნოს კანონმდებლობას და მიიღებს ყველა პასუხს. ჩვენ არავის ვატყუებთ. ჩვენ ვახორციელებთ ჩვენს მოვალეობას ამ ქვეყნისა და კანონის წინაშე. მან იცოდა, რომ გადადიოდა კლინიკაში და სამკურანლო დაწესებულებაში. იცოდა, რომ გადადიოდა სამკურნალო დაწესებულებაში და გადაწყვეტილებას, სად იქნება პატიმარი გადაყვანილი, იღებს არა პატიმარი, არამედ სპეციალური პენიტენციური სამსახური მისი ჯანმრთელობისა და უსაფრთხოების ფაქტორებიდან გამომდინარე“, - განაცხადა რატი ბრეგაძემ. რატი ბრეგაძის თქმით, სპეციალური პენიტენციური სამსახურის მიერ გავრცელებულ დღევანდელ კადრებში ნაჩვენებია „შესახლების ფაქტი და ეს კადრები. „კადრებში ნაჩვენებია შესახლების ფაქტი, თუ როგორ მოხდა შესახლება. აგრეთვე, სწორედ ეს კადრები აჩვენებს საზოგადოებას, თუ როგორ იტყუება ერთ-ერთი ადვოკატი, თითქოს რეანიმობილი გაჩერდა დაწესებულებიდან 30 მეტრის მოშორებით. ეს კადრები აჩვენებს იმ ფაქტს, რომ პატიმარმა ფიზიკური შეურაცხყოფა მიაყენა ჩვენს თანამშრომელს და როგორ დააზიანა სამედიცინო ტექნიკა“, - განაცხადა რატი ბრეგაძემ. ამავე თემაზე რას გულისხმობს სტრასგბურგის სასამართლოს გადაწვეტილება ექსპრეზიდენტ სააკაშილთან დაკავშირებით
თეა წულუკიანი: პატიმართან მოპყრობის საბაზისო წესებს ვიცავთ
ვიცე-პრემიერის განცხადებით, ცალსახად არის მითითებული, რომ სტრასბურგის სასამართლო მოუწოდებს მიხეილ სააკაშვილს შიმშილობის შეწყვეტისკენ, უფრო მეტიც, არამცთუ მოუწოდებს, სასამართლოს რეგლამენტის 39-ე მუხლით, ის მას ავალებს, რომ შეწყვიტოს შიმშილობა. თეა წულუკიანის თქმით, როდესაც ერთი მხარე იღებს, ან რომელიმე მხარე იღებს დავალებას 39-ე მუხლის საფუძველზე, ეს დავალება უნდა შესრულდეს, წინააღმდეგ შემთხვევაში შეიძლება ჩაითვალოს, რომ მოცემული მხარე თუ ამ დავალებას არ ასრულებს, ის არ არის კეთილსინდისიერი. „საუბარი ამ წერილში არ არის და ვერც ვერავინ დააბრალებს ამ წერილს, რომ სააკაშვილი გადაყვანილი იყოს სამოქალაქო კლინიკაში, ამაზე ამ წერილში საუბარი არ არის, თუმცა საუბარია, რომ როგორც კი სააკაშვილი შეწყვეტს შიმშილობას, მას გაეწიოს სათანადო მკურნალობა და უზრუნველყოფილი იყოს ციხეში მისი უსაფრთხოება. ეს არის ელემენტარული საბაზისო წესები პატიმართან მოპყრობის, რასაც ჩვენ ყოველთვის, ყველა პატიმართან მიმართებით ვიცავდით და მომავალშიც პენიტენციური სამსახური დაიცავს“, - განაცხადა კულტურის მინისტრმა თეა წულუკიანმა. რას გულისხმობს სტრასგბურგის სასამართლოს გადაწვეტილება ექსპრეზიდენტ სააკაშილთან დაკავშირებით
კარლ ჰარცელი სტრასბურგის სასამართლოს გადაწყვეტილებაზე: დაბალანსებული მიდგომა და დამაიმედებელი ნაბიჯია
ევროკავშირის ელჩი მიესალმება ადამიანის უფლებათა ევროპული სასამართლოს გადაწყვეტილებას, ჩაერთოს საქმეში. კარლ ჰარცელის თქმით, ეს არის დამაიმედებელი პირველი ნაბიჯი. ევროკავშირის ელჩმა კარლ ჰარცელმა მედიასთან განაცხადა, რომ სტრასბურგის სასამართლოს გადაწყვეტილება არის დაბალანსებული მიდგომა. „როგორც იცით, შუალედურ ღონისძიებაში საუბარია გარკვეულ მოთხოვნებზე. პირველი, ბატონ სააკაშვილთან დაკავშირებული მოთხოვნა, რომ დაასრულოს შიმშილობა და ამის პარალელურად მთავრობასთან დაკავშირებული მოწოდება, რომ უზრუნველყოფილი იყოს უსაფრთხოება და ჯანმრთელობის მდგომარეობა და მიიღოს შესაბამისი მკურნალობა. ყველაფერ ამის შესახებ სასამართლოს ინფორმაცია 24 ნოემბრამდე უნდა მიეწოდოს. ვფიქრობ, ეს არის დაბალანსებული მიდგომა, რომელიც, იმედია, გამოიწვევს სიტუაციას როდესაც გარკვეულ მნიშვნელოვან საკითხებთან დაკავშირებით წინსვლა იქნება შესაძლებელი, განსაკუთრებით კი ყველაზე მწვავე საკითხთან, მიხეილ სააკაშვილის ჯანრთელობისა და უსაფრთხო მდგომარეობასთან დაკავშირებით. მოვუწოდებ ყველას, პატივი სცენ ამ გადაწყვეტილებას და იმოქმედონ რაც შეილება სწრაფად მის განსახორციელებლად“, - ევროკავშირის ელჩმა.
საფრანგეთის ელჩი: ხელისუფლების პასუხისმგებლობაა, უზრუნველყოს სააკაშვილის ჯანმრთელობის და უსაფრთხოების დაცვა
„ყველა პატიმარს აქვს ღირსების დაცვის უფლება და განსაკუთრებით, ყოფილი პრეზიდენტის საქმის შემთხვევაში, ამ საკითხთან დაკავშირებით არსებული მისი მეგობრების წუხილები ლეგიტიმურია“, - ამის შესახებ საფრანგეთის ელჩმა დიეგო კოლასმა ჟურალისტებს განუცხადა. მისი თქმით, მნიშვნელოვანია, რომ მიხეილ სააკაშვილის ჯანმრთელობა და უსაფრთხოება იყოს დაცული. ხელისუფლების პასუხისმგებლობაა, უზრუნველყოს ამის სრულად დაცვა. საფრანგეთის ელჩი ხელისუფლებას ურჩევს, ფართო კონსულტაციები გამართოს, ყველა ვარიანტი მუდმივი განხილვის ქვეშ იყოს, რათა პასუხი გაეცეს ყველა შეშფოთებას. „ხელისუფლებას აღელვებს პენიტენციური სისტემის მთლიანობა და ესეც ლეგიტიმურია. ბატონი სააკაშვილის მეგობრებსა და მომხრეებს აწუხებთ მისი ღირსება. ეს არის ლეგიტიმური შეშფოთება ყველა დაკავებულისთვის და განსაკუთრებით ქვეყნის ყოფილი პრეზიდენტისთვის“, - აღნიშნა დიეგო კოლასმა. ამასთან, ელჩმა კომენტარი არ გააკეთა სტრასბურგის სასამართლოს გადაწყვეტილებაზე. ამ გადაწყვეტილების შესახებ მეც ახლა წავიკითხე და ვერაფერს დავამატებ, ყველაფერი ნათლად წერია“, - აღიშნა დიეგო კოლასმა.
გლდანის დაწესებულებაში ჩატარდა მიხეილ სააკაშვილის გამოკითხვის და ექსპერტიზის პროცედურა
სასჯელაღსრულების სისტემის მე-18 სამკურნალო დაწესებულებაში გვიან ღამით დასრულდა საქართველოს ყოფილი პრეზიდენტის, მიხეილ სააკაშვილის გამოკითხვა. რუსთავის მე-12 პენიტენციური დაწესებულებიდან თბილისში, გლდანის მე-18 დაწესებულებაში გადაყვანისას მიხეილ სააკაშვილის მიმართ შესაძლო არაადამიანურ მოპყრობას სახელმწიფო ინსპექტორის აპარატი იძიებს. დაახლოებით 8-საათიანი პროცედურის შემდეგ, გამომძიებელმა გიორგი მიქელაძემ ჟურნალისტებს უთხრა, რომ მიხეილ სააკაშვილს ჩაუტარდა სამედიცინო ექსპერტიზაც და დაილუქა ტანსაცმელი, რომელიც გლდანის დაწესებულებაში შესვლისას ეცვა. გამომძიებლის თანახმად, ექსპრეზიდენტს ვიზუალურად დაზიანების კვალი არ აღენიშნება, თუმცა, საბოლოო დასკვნას სასამართლო ექსპერტიზის ეროვნული ბიურო გასცემს. მიქელაძის განცხადებით, გამოკითხვისას სააკაშვილისგან მიღებული ინფორმაციის შინაარსზე გამოძიების ინტერესებიდან გამომდინარე ვერ ილაპარაკებს. თავის მხრივ, მიხეილ სააკაშვილის ადვოკატმა შოთა თუთბერიძემ, რომელიც გამოკითხვას ესწრებოდა, მედიას უთხრა, რომ მიხეილ სააკაშვილს დაზიანება აქვს ქვედა კიდურებზე. „მიხეილ სააკაშვილმა მიაწოდა ინფორმაცია სახელმწიფო ინსპექტორის წარმომადგენელს მის მიმართ ჩადენილი დანაშაულების შესახებ. ამასთან, მას აღენიშნება ფიზიკური დაზიანებები, რომელთა ფოტოგრაფირებაც მოხდა და ასევე, მოხდა ფიქსაცია ამ დაზიანებების. რაც ახლა ვიზუალურად ჩანს, მას დაზიანება აქვს ქვედა კიდურებზე. თუმცა, არსებობს ეჭვი, რომ შეიძლება ვიზუალურად შეუმჩნეველი დაზიანებები ჰქონდეს სხეულის სხვა ნაწილებშიც“, - განაცხადა თუთბერიძემ. მისივე ინფორმაციით, დახეულია ტანსაცმელი, რომელიც მიხეილ სააკაშვილს ეცვა რუსთავის ციხიდან გლდანის დაწესებულებაში გადაყვანისას. ადვოკატის თანახმად, სახელმწიფო ინსპექტორის სამსახურის გამომძიებელი გიორგი მიქელაძე პროცედურას არ ესწრებოდა და გამოკითხვაში სხვა გამომძიებელი მონაწილეობდა.
ნიკა გვარამია სტრასბურგის სასამართლოს გადაწყვეტილებაზე: ჩვენი მოთხოვნა დროებითი ღონისძიების მიღების შესახებ დაკმაყოფილდა
"მივიღეთ გადაწყვეტილება სტრასბურგიდან, რომ სააკაშვილის საქმე აყვანილია პრიორიტეტზე - ჩვენი მოთხოვნა დროებითი ღონისძიების მიღების შესახებ დაკმაყოფილდა", - საქართველოს ყოფილი პრეზიდენტის, მიხეილ სააკაშვილის ადვოკატმა ნიკა გვარამიამ ბრიფინგზე განაცხადა, რომ სტრასბურგის სასამართლომ მიხეილ სააკაშვილს შიმშილობის შეწყვეტისკენ მოუწოდა. "სააკაშვილის საქმე აყვანილია პრიორიტეტზე და მხარეებს მოგვეცა გარკვეული ვადა სარჩელის შესატანად. ჩვენი მოთხოვნა დროებითი ღონისძიების მიღების შესახებ დაკმაყოფილდა. სასამართლო მიხეილ სააკაშვილს მოუწოდებს, რომ შეწყვიტოს შიმშილობა, თუმცა, მოწოდებით ის აღიარებს იმ ფაქტს, რომ საქართველოს მესამე პრეზიდენტი საქართველოს ხელისუფლების მითოლოგიური განცხადებები და კლოუნადა იმასთან დაკავშირებით, რომ არ შიმშილობს, ამოწურულია. სასამართლომ დაავალა საქართველოს ხელისუფლებას, რომ მყისიერად აცნობოს ამჟამინდელი მდგომარეობა მიხეილ სააკაშვილის ჯანმრთელობის შესახებ და ასევე დეტალურად მიაწოდოს ინფორმაცია ყველა იმ სამედიცინო პროცედურის შესახებ, რომელიც გატარდა მასთან დაკავშრებით გლდანის #18 დაწესებულებაში. ამასთან, სტრასტბურგის სასამართლომ დაავალა სახელმწიფოს, რომ აუცილებლად გაითვალისწინოს ის გარემოება, რომ ვალდებულია უზრუნველყოს პატიმრის უსაფრთხოება და ადეკვატური მკურნალობა ციხეში და ზოგადადაც. ასევე შეახსენა, რომ იმ შემთხვევაში თუ სააკაშვილი შეწყვეტს შიმშილობას, სტრასბურგის სასამართლომ სახელმწიფოს დაავალა, რომ მისი ადეკვატური რეაბილიტაცია, მკურნალობა და უსაფრთხოება ისევ უნდა იყოს უმაღლესი ხარისხით უზრუნველყოფილი. ასევე დაგვევალა ჩვენ, რომ ყოველდღიურად განახლებული ინფორმაცია მივაწოდოთ სტრასბურგის სასამართლოს მიხეილ სააკაშვილის მდგომარეობასთან დაკავშირებით და 24 ნოემბერს კიდევ ერთხელ ეს ინფორმაციები შეჯერდეს და კვლავ იმსჯელებს სასამართლო იმასთან დაკავშირებით, რაც ხდება. სასამართლო ასევე ახსენებს სახელმწიფოს, რომ მის მიერ ნებისმიერი ამ განაწესის დარღვევა არის კონვენციის დარღვევა და ჩაითვლება სახელმწიფოს მიერ კონვენციის შეუსრულებლობად“, - განაცხადცა ნიკა გვარამიამ.
იუსტიციის მინისტრი: სტრასბურგის სასამართლომ არ დააკმაყოფილა სააკაშვილის საჩივარი კერძო კლინიკაში გადაყვანაზე და შიმშილობის შეწყვეტა მოსთხოვა
სტრასბურგის სასამართლომ არ დააკმაყოფილა სააკაშვილის საჩივარი კერძო კლინიკაში გადაყვანასთან დაკავშირებით და მოსთხოვა შიმშილობის შეწყვეტა, - ამის შესახებ საქართველოს იუსტიციის მინისტრის რატი ბრაგაძის განცხადებაშია ნათქვამი. მინისტრი აცხადებს, რომ მთავრობამ 2021 წლის 24 ნოემბრამდე ევროპულ სასამართლოს უნდა მიაწოდოს ინფორმაცია მომჩივნის ჯანმრთელობისა და უსაფრთხოების თაობაზე. „საქართველოს მთავრობას სტრასბურგის სასამართლოს 2021 წლის 10 ნოემბრის წერილით ეცნობა, რომ ამავე თარიღში მიხეილ სააკაშვილის წარმომადგენლებმა მიმართეს ადამიანის უფლებათა ევროპულ სასამართლოს შემდეგი მოთხოვნით: დაუყოვნებლივ მოხდეს მიხეილ სააკაშვილის გადაყვანა №18 სამკურნალო დაწესებულებიდან (სადაც, მომჩივანი მხარის განმარტებით, არ არის სათანადოდ დაცული მისი ჯანმრთელობა და უსაფრთხოება) მრავალპროფილიან სამოქალაქო კლინიკაში. სტრასბურგის სასამართლომ მომჩივნის ზემოაღნიშნული მოთხოვნა არ დააკმაყოფილა და სახელმწიფოსთვის სამოქალაქო კლინიკაში გადაყვანის ნაცვლად, მომჩივან მხარეს დაჟინებით მოუწოდა შიმშილობის შეწყვეტა. საქართველოს მთავრობამ 2021 წლის 24 ნოემბრამდე ევროპულ სასამართლოს უნდა მიაწოდოს ინფორმაცია მომჩივნის ჯანმრთელობისა და უსაფრთხოების თაობაზე”, - აღნიშნავს რატი ბრეგაძე.
