ახალი ამბები
„მტკიცე სული 2025“ საქართველოსა და თურქეთში ჩატარდება
25 ივლისიდან 6 აგვისტოს ჩათვლით საქართველოში მრავალეროვნული საერთაშორისო სწავლება „მტკიცე სული 2025“ (Agile Spirit 2025) გაიმართება. საქართველოს თავდაცვის სამინისტროს ცნობით, Agile Spirit 2025 მიზნად ისახავს მონაწილე ქვეყნების თავდაცვის ძალებს შორის მზადყოფნის დონის ამაღლებას, ურთიერთთავსებადობისა და ოპერატიული შესაძლებლობების გაძლიერებას. სწავლების მთავარი შემადგენელი კომპონენტებია სამეთაურო-საშტაბო ნაწილი, ქართულ-ამერიკული ტაქტიკური კონვოი სენაკი-ვაზიანის საავტომობილო გზის მონაკვეთზე, კომბინირებული სწავლება საბრძოლო სროლებით, სპეციალური ოპერაციების ძალების ერთობლივი აქტივობები და საქართველოს თავდაცვის ძალების საბრძოლო მომზადების ცენტრის (CTC) ვალიდაცია. Agile Spirit 2025 საქართველოსა და თურქეთში ჩატარდება. საქართველოში დაგეგმილ Agile Spirit 2025-ს ერთობლივად უხელმძღვანელებენ საქართველოს თავდაცვის ძალების დასავლეთის სარდლობა და აშშ-ის ჯორჯიის შტატის ეროვნული გვარდია. მასში საქართველოს, აშშ-ის, თურქეთის, პოლონეთის, გერმანიის, იტალიის, საბერძნეთის, მოლდოვის, რუმინეთის, ბულგარეთის, სლოვაკეთის, ლიეტუვის და უკრაინის სამხედრო მოსამსახურეები მიიღებენ მონაწილეობას. სწავლებაში დამკვირვებლებად იქნებიან წარმოდგენილნი სომხეთისა და იაპონიის შეიარაღებული ძალების წარმომადგენლები. „Agile Spirit 2025 რამდენიმე ლოკაციაზე ჩატარდება, კერძოდ: კრწანისში, NATO-საქართველოს წვრთნებისა და შეფასების ერთობლივ ცენტრში, ვაზიანში - საბრძოლო მომზადების ცენტრსა და ვაზიანის პოლიგონებზე, ნორიოს საწვრთნელ არეალში, მუხროვანსა და სენაკში - მე-2 ქვეით ბრიგადაში. სწავლებაში წარმოდგენილი იქნება საქართველოს თავდაცვის ძალების შეიარაღებაში არსებული ჯავშანტექნიკა და საჰაერო საშუალებები. სწავლებაში მონაწილეობისთვის საქართველოში მოზიდულია აშშ-ის არმიის საბრძოლო მანქანები და მრავალფუნქციური ვერტმფრენები UH60 „შავი ქორი“, ასევე, თურქეთის რესპუბლიკის შეიარაღებულ ძალებში არსებული შვეულმფრენი პუმა AS332. სწავლების აღსრულება დაიწყება 21 ივლისს ამერიკულ-თურქული ერთობლივი საჰაერო სადესანტო ოპერაციით თურქეთში, ადანის პროვინციასთან ახლოს,“ ნათქვამია თავდაცვის სამინისტროს მიერ გავრცელებულ ინფორმაციაში. სწავლებას საქართველო მეთორმეტედ უმასპინძლებს.
უზბეკეთმა, ავღანეთმა და პაკისტანმა ტრანსავღანური რკინიგზის პროექტზე შეთანხმებას მოაწერეს ხელი
ქაბულში, ავღანეთის, უზბეკეთისა და პაკისტანის საგარეო საქმეთა მინისტრებს შორის პირველი შეხვედრა გაიმართა. გაფორმდა სამთავრობათაშორისი ჩარჩო შეთანხმება უზბეკეთ-ავღანეთ-პაკისტანის ტრანსავღანური რკინიგზის პროექტისთვის ტექნიკურ-ეკონომიკური დასაბუთების (Feasibility Study, FS) შემუშავების თაობაზე, იტყობინება Trend. „დღევანდელი პირველი სამმხრივი შეხვედრა უზბეკეთის, ავღანეთისა და პაკისტანის საგარეო საქმეთა მინისტრებს შორის ისტორიულ წინგადადგმულ ნაბიჯს წარმოადგენს ურთიერთნდობის გაღრმავების, კეთილმეზობლური ურთიერთობებისა და რეგიონული თანამშრომლობისკენ. ავღანეთის, უზბეკეთისა და პაკისტანის საგარეო საქმეთა მინისტრებმა ხელი მოაწერეს სამმხრივ ჩარჩო შეთანხმებას უზბეკეთ-ავღანეთ-პაკისტანის ტრანსავღანური რკინიგზის ტექნიკურ-ეკონომიკური დასაბუთების შესამუშავებლად — პროექტისთვის, რომელიც სტრატეგიულ მნიშვნელობას ატარებს მთელი ევრაზიისთვის. აღნიშნული დერეფანი ხელს შეუწყობს ვაჭრობის გაძლიერებას, ავღანეთის ეკონომიკურ აღდგენას და მისცემს მას წვდომას გლობალურ ბაზრებზე სამხრეთული პორტების მეშვეობით. უზბეკეთმა კიდევ ერთხელ დაადასტურა თავისი ერთგულება ვაჭრობის გაძლიერების, სოფლის მეურნეობაში, ფარმაცევტიკაში, ტექსტილსა და სამშენებლო სექტორებში თანამშრომლობის გაფართოებისა და ტერმეზის საერთაშორისო სავაჭრო ცენტრის გამოყენების გაზრდის მიმართ,“ – აღნიშნა საიდოვმა.
პოლონეთმა უნგრეთთან დიპლომატიური ურთიერთობების დონე შეამცირა
პოლონეთი ამცირებს დიპლომატიური ურთიერთობების დონეს უნგრეთთან, რადგან ვარშავასა და ბუდაპეშტს შორის „ბევრი პრობლემა“ არსებობს, – განაცხადეს პოლონური მხარის წარმომადგენლებმა. მათივე თქმით, პირველი და უმთავრესი მიზეზი ამ ნაბიჯის მიღებისა იყო პოლონეთის ყოფილი ვიცე-მართლის მინისტრის, მარჩინ რომანოვსკისათვის უნგრეთის მიერ პოლიტიკური თავშესაფრის მინიჭება. 15 ივლისს პოლონეთმა უნგრეთიდან თავისი ელჩი გაიწვია და მის ნაცვლად ბუდაპეშტში მხოლოდ დროებითი წარმომადგენელი (chargé d'affaires) დატოვა. ეს ოფიციალურად ნიშნავს დიპლომატიური ურთიერთობების დონის შემცირებას. დაპირისპირება უკავშირდება უნგრეთის მიერ პოლიტიკური თავშესაფრის მიცემას მარჩინ რომანოვსკისთვის — პოლონეთის ყოფილი ვიცე-მართლის მინისტრისთვის, რომელსაც 11 სხვადასხვა ბრალდება ედება, მათ შორის ორგანიზებულ დანაშაულში მონაწილეობა და ბიუჯეტის თანხების უკანონო გამოყენება. პოლონეთმა ეს ნაბიჯი შეაფასა როგორც „მტრული აქტი“, რომელიც არღვევს ევროკავშირის წევრებს შორის თანამშრომლობის პრინციპებს. უნგრეთმა თავის მხრივ განაცხადა, რომ მაინც სურთ პოლონეთთან ისტორიული მეგობრობის შენარჩუნება. პოლონეთსა და უნგრეთს შორის დაძაბულობა გრძელდება 2022 წლიდან, როცა რუსეთი უკრაინაში შეიჭრა. პოლონეთი მტკიცედ უჭერს მხარს უკრაინას და ევროკავშირის ღირებულებებს. უნგრეთის პრემიერი ვიქტორ ორბანი კი, ხშირად პრორუსულ პოზიციებს იკავებს.
რუსეთის შეჭრის შემდეგ პირველად, უკრაინულმა მწარმოებელმა სატვირთო თვითმფრინავი An-124 გერმანიაში გადაიყვანა
უკრაინულმა კომპანიამ „Antonov“-მა 17 ივლისს განაცხადა, რომ განახლებული სატვირთო თვითმფრინავი An-124 „რუსლანი“ გასულ კვირას უკრაინიდან გერმანიაში გადაიყვანეს, რაც იშვიათი შემთხვევაა ომის პირობებში. „თვითმფრინავის გადატანა არ არის მხოლოდ ტექნიკური მიღწევა - ის სიმბოლურად გამოხატავს უკრაინელი ავიამშენებლების მდგრადობას, პროფესიონალიზმს და ერთიანობას,“ - ნათქვამია კომპანიის განცხადებაში. განახლებული თვითმფრინავი ახლა საერთაშორისო ოპერაციებს მოემსახურება. კომპანიამ ასევე დაადასტურა, რომ მისი ამჟამინდელი ფლოტი გადაყვანილია უსაფრთხო ადგილებში, შიდა უსაფრთხოების პროტოკოლების შესაბამისად. თვითმფრინავი კიევიდან 11 ივლისს გაფრინდა — ეს იყო მისი პირველი ფრენა მას შემდეგ, რაც უკრაინული ცა 2022 წლის თებერვალში, რუსეთის სრულმასშტაბიანი შეჭრის შემდეგ, უსაფრთხოების მიზნით დაიხურა. Antonov-ის კიდევ ერთი თვითმფრინავი, მსოფლიოში ყველაზე დიდი სატვირთო თვითმფრინავი, An-225 Mriya a, რუსული საჰაერო დარტყმის დროს, კიევის მახლობლად განადგურდა.
კოფეინის ზემოქმედების შესახებ კვლევა ჩატარდა
კოფეინი შესაძლოა, ხელს უწყობდეს ქრონიკული სტრესით გამოწვეული დეპრესიის პრევენციას, ნაწლავებისა და ტვინის ურთიერთკავშირის გავლენით — ასეთია ჩინეთის ჩუნცინის სამედიცინო უნივერსიტეტის მეცნიერების დასკვნა. კვლევა გამოქვეყნდა ჟურნალში European Journal of Pharmacology (EJP). ექსპერიმენტისას, რომელიც ლაბორატორიულ თაგვებზე ჩატარდა, მეცნიერებმა მოახდინეს ქრონიკული სტრესის სიმულაცია — რაც ადამიანებში დეპრესიულ სიმპტომებთან ასოცირდება. ერთ ჯგუფს ექსპერიმენტის დაწყებამდე კოფეინი მიაწოდეს. მათი ქცევა, ნაწლავის მდგომარეობა და ანთებითი მარკერები შეადარეს იმ თაგვებს, რომლებიც სტრესის ზემოქმედების ქვეშ იყვნენ, მაგრამ კოფეინი არ მიუღიათ. შედეგები შთამბეჭდავი აღმოჩნდა: კოფეინის მიღების მქონე თაგვები ისე აქტიურად იქცეოდნენ, როგორც კონტროლის ჯგუფის თაგვები, რომლებიც სტრესს არ გამოუცდიათ. მათ არ დაუკარგავთ ინტერესი ტკბილი წყლის მიმართ, არ დაუკარგავთ წონა და არ ჰქონიათ დეპრესიის ნიშნები. ამავე ჯგუფში არ დაფიქსირდა ნაწლავის ბარიერის დაზიანება, ანთებითი მოლეკულების დონე კი, სისხლსა და ჰიპოკამპში (ტვინის ის ნაწილი, რომელიც განწყობას აკონტროლებს) ნორმის ფარგლებში დარჩა. ნაწლავის კედლის მთლიანობისთვის პასუხისმგებელი ცილების დონე არ შემცირებულა, ხოლო მათი ნაწლავის მიკრობიოტა ჯანმრთელ თაგვებთან მსგავსად შენარჩუნდა. ავტორები ხაზს უსვამენ, რომ კვლევა ჯერ კიდევ წინასწარ ეტაპზეა. ის მიანიშნებს კოფეინის პრევენციულ ეფექტზე — ჯერჯერობით არ არის ცნობილი, შეუძლია თუ არა მას უკვე არსებული დეპრესიის შემსუბუქება. თუმცა აღმოჩენები აძლიერებს მოსაზრებას, რომ საჭიროა დამატებითი კვლევა კვებას, ნაწლავის მიკრობიოტასა და მენტალურ ჯანმრთელობას შორის კავშირის გასარკვევად.
დიდმა ბრიტანეთმა და გერმანიამ „ისტორიული შეთანხმება“ გააფორმეს
დიდი ბრიტანეთი და გერმანია ლონდონსა და ბერლინს შორის პირდაპირი რკინიგზის შექმნაზე შეთანხმდნენ. დიდი ბრიტანეთი და გერმანია ახალ, პირდაპირი სარკინიგზო ხაზის შექმნაზე შეთანხმდნენ. ეს შეთანხმება შედის ფართო კავშირების სამოქმედო გეგმაში, რომელსაც ხელი მოეწერა გერმანიის კანცლერ ფრიდრიხ მერცის პირველი ოფიციალური ვიზიტისას დიდ ბრიტანეთში. ცნობისთვის, დიდი ბრიტანეთის პრემიერ-მინისტრმა კირ სტარმერმა და გერმანიის კანცლერმა ფრიდრიხ მერცმა 17 ივლისს ლონდონში ხელი მოაწერეს ხელშეკრულებას, რომელიც ეხება კავშირების განმტკიცებას თავდაცვის სფეროში და სამართალდამცავთა შორის თანამშრომლობის გაძლიერებას ლა-მანშის სრუტის გამოყენებით ადამიანთა ტრეფიკინგის აღსაკვეთად. „ეს ისტორიულ დღეა გერმანიისა და ბრიტანეთის ურთიერთობაში. ჩვენ გვსურს, უფრო მეტად ვითანამშრომლოთ, განსაკუთრებით მას მერე, რაც გაერთიანებული სამეფო ევროკავშირს გამოეყო," - განაცხადა მერცმა. ხელშეკრულება დიდ ბრიტანეთსა და გერმანიას შორის შარშან გაფორმებულ პაქტს ეფუძნება. თავდაცვის სფეროს ნაწილში თანამშრომლობა გულისხმობს იმას, რომ ორი ქვეყანა უფრო მჭიდროდ ითანამშრომლებს რუსეთის მხრიდან მომდინარე, მზარდი საფრთხის მოსაგერიებლად. როგორც ცნობილია, დიდი ბრიტანეთი და გერმანია უკრაინის ყველაზე ძლიერ ევროპელ მხარდამჭერ სახელმწიფოებს შორის არიან.
მერცის თქმით, უკრაინას „ძალიან მალე“ ექნება სისტემები, რომლითაც დიდ მანძილზე დარტყმა შესაძლებელია
ფრიდრიხ მერცის თქმით, უკრაინას „ძალიან მალე“ ექნება სისტემები, რომლებსაც დიდ მანძილზე დარტყმა შეუძლიათ. ამის შესახებ გერმანიის კანცლერმა ფრიდრიხ 17 ივლისს განაცხადა. მას დეტალები არ დაუკონკრეტებია. „უკრაინა გაცილებით უკეთეს მდგომარეობაში იქნება, გამოიყენებს ამ სისტემებს და მიიღებს ჩვენგან მხარდაჭერას ამ სისტემებთან დაკავშირებით, მომდევნო კვირებისა და თვეების განმავლობაში.“ მერცის თქმით, ახლა გერმანია, როგორც საფრანგეთი, ბრიტანეთი და აშშ, აღარ დაარღვევენ მიწოდებული იარაღის მოქმედების რადიუსს, რაც იმას ნიშნავს, რომ უკრაინა შეძლებს ამ იარაღის გამოყენებას თავდაცვისთვის, მათ შორის - რუსეთის ტერიტორიაზე არსებულ სამიზნეებზე. გერმანია და უკრაინა ასევე შეთანხმდნენ ერთობლივად რაკეტების წარმოებაზე, რომლის პირველი პარტია უახლოეს კვირებში იქნება მზად. მერცმა აღნიშნა, რომ ეს ნაბიჯი მიზნად ისახავს უკრაინის თავდაცვის შესაძლებლობების გაზრდას, და გერმანია დაეხმარება უკრაინას ამ ტიპის იარაღის წარმოებაში როგორც საკუთარ ტერიტორიაზე, ასევე, უკრაინაში.
თეთრი სახლის პრესსპიკერის თქმით, თუ 50 დღეში ცეცხლის შეწყვეტის ან სამშვიდობო შეთანხმება არ იქნება, რუსეთის წინააღმდეგ ზომები ამოქმედდება
თეთრი სახლის პრესსპიკერმა ქეროლაინ ლევიტმა განაცხადა, რომ თუ 50 დღეში ცეცხლის შეწყვეტის ან სამშვიდობო შეთანხმება არ იქნება, რუსეთის წინააღმდეგ ძალიან დიდი ტარიფები და მეორადი სანქციები იქნება გამოყენებული. მანამდე, აშშ-ის პრეზიდენტი დონალდ ტრამპი აღნიშნავდა, რომ კიევს დამატებით შეიარაღებას მიაწვდიან. „როგორც პრეზიდენტმა ცხადად თქვა, 50 დღეში თუ ცეცხლის შეწყვეტის ან სამშვიდობო შეთანხმება არ იქნება, თუ რუსეთი უარს იტყვის ცეცხლის შეწყვეტის სამართლებრივ შეთანხმებაზე, ძალიან დიდი ტარიფები და მეორადი სანქციები იქნება გამოყენებული. ასე რომ, ქვეყნები, რომლებიც ნავთობს ყიდულობენ რუსეთისგან, ასევე, დასანქცირდებიან და ეს, რა თქმა უნდა, დიდ ზიანს მიაყენებს რუსეთის ეკონომიკას,” - განაცხად ლევიტმა. სააგენტო Reuters-ი წყაროზე დაყრდნობით წერს, რომ კიევში შესაძლოა, მომავალ კვირაში გაიმართოს Patriot-ის ტიპის სისტემების მქონე ქვეყნების კონფერენცია. თავის მხრივ, NATO-ს მეთაური ალექსუს გრინკევიჩი აცხადებს, რომ უკრაინას Patriot-ის სისტემები რაც შეიძლება სწრაფად გადაეცემა.
დიდ ბრიტანეთს სომხეთში ახალი ელჩი ჰყავს
დიდმა ბრიტანეთმა სომხეთში ახალი ელჩი დანიშნა. ჯონ გალაგერს, რომელიც ერევანში დიპლომატიურ მისიას 2020 წლიდან ხელმძღვანელობდა, ალექსანდრა კოული ჩაანაცვლებს. ელჩი მოვალეობის შესრულებას 2025 წლის სექტემბერში შეუდგება. ადრე (2018-2020) კოული საქართველოში, შემდეგ კი, კატარში მისიის ხელმძღვანელის მოადგილის თანამდებობას იკავებდა. ახალ დანიშვნამდე კი, ის ახლო აღმოსავლეთისა და ჩრდილოეთ აფრიკის რეგიონში საგანგებო სიტუაციების დაგეგმვის დეპარტამენტს ხელმძღვანელობდა.
ირაკლი კობახიძემ ევროკომისიის წერილთან დაკავშირებით კომენტარი გააკეთა
პრემიერ-მინისტრმა ირაკლი კობახიძემ ევროკომისიის წერილთან დაკავშირებით კომენტარი გააკეთა. მანამდე, ევროკავშირის უმაღლესი წარმომადგენელი საგარეო საქმეთა და უსაფრთხოების საკითხებში კაია კალასი განმარტავდა წერილის შინაარს, რომელიც საქართველოსთვის რეკომენდაციებს მოიცავს და „დედლაინად“ აგვისტოს ბოლო სახელდება. კალასის თქმით, არის რეკომენდაციები, რომლებიც საქართველოს ვიზალიბერალიზაციის შეჩერების ანგარიშშია მოცემული. კერძოდ, როგორც ცნობილია, ევროკომისია მაკა ბოჭორიშვილს წერილს უგზავნის, რომელშიც ხელისუფლებისგან 8 რეკომენდაციის შესრულებას მოითხოვს. ირაკლი კობახიძის თქმით, ევროპაში მოქალაქე ვიზით წავა, თუ უვიზოდ, ეს არ არის ეგზისტენციალური საკითხი, ხოლო „რასაც გვთავაზობენ, რომ მშვიდობა დაგვირღვიონ და სტაბილურობა“, ეს, მისივე თქმით, ეგზისტენციალურ საკითხია. „ყველაფერთან დაკავშირებით გვაქვს მკაფიო პასუხი. როდესაც საუბარია პატიმრებზე, ძალიან მკაფიო პასუხი გვაქვს იმასთან დაკავშირებით, რომ თითოეულმა პატიმარმა კონკრეტული დანაშაული ჩაიდინა. ამაზე დაგვიწყონ საუბარი. კეთილი ინებონ და დაგვისაბუთონ, თუ აქვთ სამართლებრივი კითხვები რომელიმე საქმესთან დაკავშირებით. ასეთი კითხვები არ არსებობს და ცარიელი პოლიტიკური ულტიმატუმებია, რაც სამწუხაროა. რაც შეეხება კანონებს, ჩვენი ქვეყნისთვის ძალიან მნიშვნელოვანია ის კანონი, რომელიც უკავშირდება ოჯახურ ღირებულებებს, არასრულწლოვნების ინტერესების დაცვას, გამჭვირვალობას. ეს კანონები გამჭვირვალობის შესახებ არის, არის კანონი რევოლუციების გამჭვირვალობის შესახებ, თუ ვინმეს უნდა საქართველოში დააფინანსოს რევოლუციური პროცესები, ეს გააკეთონ გამჭვირვალედ, თუ ეს არ უნდათ, ეს გაუგებარია. მზად ვართ, ჯანსაღი დისკუსია გავმართოთ ყველა სუბიექტთან ყველა საკითხზე. მნიშვნელოვანია, ქართულ საზოგადოებას არ წარმოუჩინონ ევროკავშირი, როგორც საბჭოთა კავშირი. საბჭოთა კავშირში რა ხდებოდა? მოდიოდა დირექტივები მოსკოვიდან, თუ არ შესრულდებოდა, დაგსჯიდნენ. რისგან განსხვავდება მოსკოვისგან ბრიუსელი?! ბრიუსელი არ უნდა დაემსგავსოს საბჭოთა მოსკოვს. ადამიანის ფუნდამენტურ უფლებებთან პირდაპირ შესაბამისობაშია ყველა ნაბიჯი, რაც გადაიდგა ჩვენი მხრიდან. ჩვენ პასუხისმგებელი ვართ, საქართველოში მშვიდობა იყოს შენარჩუნებული, სტაბილურობა და განვითარება. არ არის სწორი ქართველი ხალხის შანტაჟი იმის გამო, რომ მან ხელისუფლებაში არ დააბრუნა სისხლიანი პოლიტიკური ძალა. თუ ვინმე ასე აყენებს საკითხს, ან მშვიდობა და სტაბილურობა, ან ვიზალიბერალიზაციაა.... გამჭვირვალობის კანონის მიღებას რომ გვიკრძალავენ, ეს ნიშნავს, რომ ჩვენთვის უნდათ მშვიდობის და სტაბილურობის წართმევა. როდესაც გეუბნებიან, შენ არ უნდა მიიღო კანონი, რომელიც უცხო ძალას უზღუდავს ქვეყანაში რევოლუციის მოწყობას, ეს მაგას ნიშნავს, რომ გემუქრებიან სტაბილურობის და მშვიდობის დაკარგვით. თუ ასე დადგება საკითხი, ან მშვიდობა და სტაბილურობა, ან ვიზალიბერალიზაცია, რა თქმა უნდა, უპირატესობას მივანიჭებთ მშვიდობასა და სტაბილურობას. ეს ქართველი ხალხის არჩევანია, ასე გვიყენებენ საკითხს. ჩვენ მშვიდობას და სტაბილურობას ვირჩევთ, არ დავთმობთ!.... ვიზალიბერალიზაცია ნიშნავს, რომ საქართველოს მოქალაქეს დასჭირდება ვიზა, რათა საქართველოდან გაემგზავროს ევროპაში, რაც შეეხება დანარჩენს, მშვიდობა, სტაბილურობა, ოჯახური ღირებულებები, ეს არის ეგზისტენციური საკითხები. ევროპაში წახვალ ვიზით, თუ უვიზოდ, ეს არ არის ეგზისტენციალური საკითხი. რასაც გვთავაზობენ მშვიდობა დაგვირღვიონ, სტაბილურობა, ეს არის ეგზისტენციალური საკითხები. როდესაც ეგზისტენციალური საკითხი უპირისპირდება არა ეგზისტენციალურს, უპირატესობა უნდა მიანიჭო ეგზისტენციალურს,“ - აღნიშნა პრემიერმა. რაც შეეხება ევროკავშირის რეაგირებას, თუ რეკომენდაციები არ შესრულდება, კალასის თქმით, ამას შედეგები მოჰყვება, რათა საზოგადოებამაც დაინახოს, რომ მისი მთავრობა ევროპულ გზაზე არ არის და კანდიდატის სტატუსს სერიოზულად არ აღიქვამს. ევროკავშირის უმაღლესმა წარმომადგენელმა წერილის გარკვეული პუნქტები დაასახელა. „საქართველოსადმი გაგზავნილ წერილს რაც შეეხება: როგორც იცით, უვიზო მოგზაურობის რეჟიმი საქართველოსთვის 2017 წლიდან გვაქვს. ეს დიდი სარგებელია, რომელსაც ევროკავშირი აძლევს ქვეყნებს და, შესაბამისად, არის რეკომენდაციები, რომლებიც გადაეცა საქართველოს ვიზალიბერალიზაციის შეჩერების [მექანიზმის] ანგარიშში. ამას მთლიანად არ წავიკითხავ აქ, უბრალოდ აღვნიშნავ რაღაცებს. მაგალითად ვალდებულებები, რომლებიც საქართველოს მთავრობას აქვს - უზრუნველყოს და დაიცვას საქართველოს ყველა მოქალაქის ფუნდამენტური უფლებები, მათ შორის შეკრებისა და გამოხატვის თავისუფლებები, პრივატულობის უფლება, საჯარო საქმეებში მონაწილეობის უფლება, და ასევე დისკრინიმაციის აკრძალვა - ეს მხოლოდ ერთი პუნქტია. კიდევ 8 მსგავსი პუნქტია. ასე რომ, ვინაიდან, მათ ეს “დედლაინი” მიეცათ აგვისტოს ბოლომდე ამის შესასრულებლად, კითხვაა - როგორ რეაგირებას მოვახდენთ, თუ რეკომენდაციები არ შესრულდება? და როდესაც გვესმის, მაგალითად, რომ 8-დან 7 ოპოზიციონერი ლიდერი ციხეში ჩასვეს, ეს არ შეესაბამება პირველ პუნქტს, რომელიც აღვნიშნე. ასე რომ, აქამდე პოზიცია გვქონდა, რომ არ გვინდა ქართველი ხალხისთვის ზიანის მიყენება უვიზო მიმოსვლის გაუქმებით, რომელსაც მართლა აქვს მათთვის მნიშვნელობა, თუმცა, ამავდროულად, ეს ასევე, ევროკავშირის სანდოობის საკითხია. თუ ეს რაღაცები გვაქვს და ეს სარგებლიანი რამეა - ბონუსია, რომელსაც ქვეყანას ვაძლევთ, რომელიც არ ასრულებს პირობებს - ამას შედეგები მოყვება, რათა საზოგადოებამაც დაინახოს, რომ მთავრობა ევროპულ გზაზე არაა და კანდიდატის სტატუსს სერიოზულად არ აღიქვამს,” - განაცხადა კალასმა 15 ივლისს.
ფაშინიანი მაკრონს „სამხრეთ კავკასიის რეგიონში მშვიდობის დამყარების ძალისხმევისთვის“ აქებს
სომხეთის პრემიერ-მინისტრი ნიკოლ ფაშინიანი საფრანგეთის პრეზიდენტ ემანუელ მაკრონს „სამხრეთ კავკასიის რეგიონში ხანგრძლივი და სამართლიანი მშვიდობის დამყარების ძალისხმევისთვის“ აქებს. ის ასევე აღნიშნავს, რომ მაკრონის პრეზიდენტობის დროს „სომხეთსა და საფრანგეთს შორის განსაკუთრებული ურთიერთობა“ სტრატეგიული პარტნიორობის ახალ დონეზე ავიდა. ფაშინიანმა ასევე იმედი გამოთქვა, რომ 2025 წელს სომხეთში მაკრონის ვიზიტი შედგება. „გულითადად ვიხსენებ ჩემს ვიზიტს პარიზში 7 დეკემბერს და ჩემს მონაწილეობას ღვთისმშობლის ტაძრის ამაღელვებელ და სიმბოლურ გახსნაში. მინდა, კიდევ ერთხელ მადლობა გადავუხადო მეგობარ საფრანგეთს და ასევე, მადლობა გადაგიხადოთ თქვენ, პირადი ძალისხმევისთვის და მუდმივი მხარდაჭერისთვის, რომელიც მიმართულია სომხეთის სუვერენიტეტის, სტაბილურობისა და დემოკრატიის განმტკიცებისთვის, ასევე, სამხრეთ კავკასიის რეგიონში ხანგრძლივი და სამართლიანი მშვიდობის დამყარებისთვის,“ წერს ფაშინიანი მაკრონისადმი დაბადების დღის მისალოც წერილში. რა საკითხებზე ესაუბრა მაკრონი ივანიშვილს ცნობისთვის, აზერბაიჯანისგან განსხვავებით, რომელსაც დაძაბული დიპლომატიური ურთიერთობები აქვს პარიზთან, საფრანგეთსა და სომხეთს წლებია, თბილი ურთიერთობები აქვთ. 2024 წლის გაზაფხულზე საფრანგეთმა რუსეთი და აზერბაიჯანი ახალ კალედონიაში - საფრანგეთის ტერიტორიაზე, რომელიც წყნარ ოკეანეში, ავსტრალიასა და ფიჯის შორის მდებარეობს, შიდა საქმეებში ჩარევასა და ანტიფრანგული, ძალადობრივი ქმედებების წახალისებაში დაადანაშაულა. აზერბაიჯანის პრეზიდენტმა 18 დეკემბერს გამოქვეყნებული ინტერვიუს დროს კიდევ ერთხელ გააკრიტიკა ემანუელ მაკრონის ხელისუფლება, რომელსაც ალიევი სომხეთ-აზერბაიჯანის კონფლიქტში საფრანგეთის პოზიციების, მათ შორის, იარაღის მიწოდების გამო უპირისპირდება. „იარაღი, რომელსაც მაკრონის მთავრობა აწვდის სომხეთს, არის თავდასხმითი იარაღი, ლეტალური იარაღი, რაც ტაქტიკურ საფრთხეს უქმნის აზერბაიჯანს,“ - განაცხადა ალიევმა. 18 დეკემბრის ინტერვიუ ალიევთან რუსეთის სამთავრობო პროპაგანდისტული არხებისთვის - „სახელმწიფო ტელე-რადიო კომპანიისა“ (ВГТРК) და „რია ნოვოსტისთვის“ (РИА Новости) ჩაწერა ტელეწამყვანმა დმიტრი კისელიოვმა. ამ ინტერვიუში ილჰამ ალიევმა განაცხადა, რომ დადებითი მოვლენა იყო 2022 წლის 22 თებერვალს [უკრაინაში რუსეთის სრულმასშტაბიან შეჭრამდე ორი დღით ადრე] მისი და ვლადიმერ პუტინის მიერ რუსეთ-აზერბაიჯანის „სამოკავშირეო თანამშრომლობის შესახებ დეკლარაციის“ ხელმოწერა. „მას შემდეგ სიტუაცია ჩვენს რეგიონში და მსოფლიოში საკმაოდ შეიცვალა. მაგრამ ეს გავლენას ვერ ახდენს რუსეთ-აზერბაიჯანის თანამშრომლობაზე… ეს უფრო მაღალი ფორმაა თანამშრომლობის, იმის გათვალისწინებით, რომ მეზობელი ქვეყნები ვართ კავკასიასა და კასპიის ზღვის რეგიონში,“ - განაცხადა ალიევმა, რომელიც ასევე შეეხო საქართველოში მიმდინარე პროცესებს - მან მაკრონი კვლავ გააკრიტიკა. „კარგია, რომ ვითარება [საქართველოში] უკვე სტაბილიზაციის მიმართულებით მიდის. და აქაც, კიდევ ერთხელ, ხედავთ, რომ მაკრონის ყურები გამოჩნდა. კაცი თავის ქვეყანაში ვერ ისვენებს, უნდა, აუცილებლად შეძვრეს საქართველოში,“ - განაცხადა პრეზიდენტმა ალიევმა რუსეთის სამთავრობო მედიასთან ინტერვიუში. „ქართულ ოცნებას“ არჩევნებში გამარჯვება მიულოცეს როგორც აზერბაიჯანის ისე სომხეთის პრეზიდენტებმა. ყაველაშვილს პრეზიდენტად არჩევა მეზობელი ქვეყნების ლიდერებმა მიულოცეს შეგახსენებთ, რუსთაველის გამზირზე, პარლამენტის წინ და საქართველოს სხვა ქალაქებში 28 ნოემბრიდან აპროტესტებენ მთავრობის გადაწყვეტილებას იმის შესახებ, რომ 2028 წლის ბოლომდე დღის წესრიგში არ დააყენონ ევროკავშირში გაწევრიანებაზე მოლაპარაკების გახსნის საკითხი. 11 დეკემბერს, საფრანგეთის პრეზიდენტმა „ქართული ოცნების დამფუძნებელს ბიძინა ივანიშვილს დაურეკა და ერთი საათის განმავლობაში ესაუბრა. ამ სატელეფონო საუბარს წინ უძღოდა მაკრონის შეხვედრა პრეზიდენტ ზურაბიშვილთან და სამმხრივი დისკუსია საქართველოს პრეზიდენტს, ემანუელ მაკრონსა და დონალდ ტრამპს შორის. 7 დეკემბერს, პრეზიდენტმა მაკრონმა პარიზში, პარიზის ღვთისმშობლის ტაძრის გახსნის პარალელურად მიიღო საქართველოს პრეზიდენტი, რომელიც ოპოზიციის მსგავსად, 26 ოქტომბრის საპარლამენტო არჩევნების შედეგებს არ აღიარებს. 28 ნოემბრის შემდეგ პოლიციამ აქციის ოთხასზე მეტი მონაწილე დააკავა, მათ შორის, სისხლის სამართლის წესით დააკავა 30-ზე მეტი ადამიანი, რომელთაც რამდენიმეწლიანი პატიმრობა ემუქრებათ. არასამთვრობო ორგანიზაციები და სახალხო დამცველი, რომელმაც საპატიმროში მოინახულა აქციის მონაწილეები, მოქალაქეების მიმართ სამართალდამცავი ორგანოს წარმომადგენლების მხრიდან სასტიკ მოპყრობაზე მიუთითებენ.
აშშ-ის სახაზინო დეპარტამენტმა ვახტანგ გომელაური დაასანქცირა
19 დეკემბერს აშშ-მა ვახტანგ გომელაურისა და მირზა კეზევაძის წინააღმდეგ სანქციები შემოიღო და "გლობალური მაგნიტსკის" სიაში შეიყვანა. ამის შესახებ განცხადებას აშშ-ის სახაზინო დეპარტამენტი ავრცელებს. კერძოდ, შინაგან საქმეთა მინისტრი, ვახტანგ გომელაური და განსაკუთრებულ დავალებათა დეპარტამენტის დირექტორის მოადგილე, მირზა კეზევაძე აშშ-ის სახაზინო დეპარტამენტის "სპეციალურად განსაზღვრულ პირთა სია"-ში (SDN List) მოხვდნენ. როგორც ცნობილია, SDN List-ი "ადამიანის უფლებებზე ანგარიშვალდებულების მაგნიტსკის გლობალური აქტის" საფუძველზე შეიქმნა და 2017 წლიდან მოქმედებს. სახაზინო დეპარტამენტის განცხადებაში აღნიშნულია, რომ ვაშინგტონის ეს ნაბიჯი კოორდინირებული იყო დიდ ბრიტანეთთან, რომელმაც დღეს, ასევე, შემოიღო სანქციები შს მინისტრის, ვახტანგ გომელაურისა და კიდევ ოთხი ძალოვნის წინააღმდეგ. "საქართველოს არჩევნების ფონზე, შინაგან საქმეთა სამინისტროს საკვანძო ოფიციალური პირები ჩართული იყვნენ სასტიკ და ბოროტ ზეწოლაში საკუთარი ხალხის წინააღმდეგ, მათ შორის განზრახ ჟურნალისტების სამიზნეში ამოღებასა და ძალადობის გამოყენებაში. შეერთებული შტატები ერთგული რჩება იმის, რომ პასუხი აგონ მათ, ვინც ცდილობს თავისი მოქალაქეების უფლებების შეზღუდვასა და ფუნდამენტური უფლებებისთვის ძირის გამოთხრას - საქართველოში და მსოფლიოს მასშტაბით," - განაცხადა აშშ-ის სახაზინო დეპარტამენტის მდივნის მოვალეობის შემსრულებელის მოადგილე ბრედლი სმიტმა. სახაზინო დეპარტამენტის განცხადებით, სანქციებში იგულისხმება განსაზღვრული პირებისთვის (გომელაური, კეზევაძე) მთლიანი ქონების და იმ ქონებაში ინტერესების დაბლოკვა, რომელიც აშშ-ში მდებარეობს ან ამერიკელი მოქალაქეების ფლობაში და განკარგვაშია. ასევე, იბლოკება ნებისმიერი საკუთრება, რომელიც პირდაპირ ან არაპირდაპირ, ცალ-ცალკე ან მთლიანობაში, 50%-ით ან მეტად სანქცირებული პირების კუთვნილებაშია. "დამატებით, ფინანსური ინსტიტუტები და სხვა პირები, რომლებიც დასანქცირებულ პირებთან გარკვეულ ტრანზაქციებში ან აქტივობებში ჩაერთვებიან, შესაძლოა სანქციების ან აღსრულებითი ქმედებების სამიზნე გახდნენ,“ - ნათქვამია განცხადებაში. ამასთან, აკრძალვები მოიცავს ნებისმიერი განსაზღვრული [დასანქცირებული] პირისთვის შემოწირუბლობების გაკეთებას ან მათგან, მათთვის, ან მათი სარგებლისთვის ფინანსების, საქონლის ან სერვისების მიწოდებას. დღესვე, დიდი ბრიტანეთისა და ჩრდილოეთ ირლანდიის გაერთიანებულმა სამეფომ გომელაური და შსს-ს კიდევ ოთხი მაღალჩინოსანი დაასანქცირა. ინფორმაციისთვის, "მაგნიტსკის სია" შექმნილია 2012 წლის დეკემბერში, აშშ-ის კონგრესის მიერ მიღებული “მაგნიტსკის აქტის” საფუძველზე, რომლის მიზანი თავდაპირველად რუსეთის იმ ოფიციალური პირების დასჯა იყო, რომლებსაც კავშირი ჰქონდათ კორუფციასთან მებრძოლი ადვოკატის სერგეი მაგნიტსკის სამართლებრივ დევნასა და ციხეში სიკვდილთან. სერგეი მაგნიტსკი 2008 წელს დააპატიმრეს - მას შემდეგ, რაც რუსეთის სამინისტროებში მომუშავე ოფიციალურ პირებს ბრალი დასდო კომპლექსური სქემის შემუშავებაში, რომელმაც მათ სახელმწიფო რეზერვებიდან 230 მილიონი დოლარის მოპარვის საშუალება მისცა. გარდაცვალებამდე მას ციხეში სცემდნენ და სამედიცინო დახმარებაზე უარს ეუბნებოდნენ. 37 წლის მაგნიტსკის ციხეში სიკვდილის საქმე რუსეთში ადამიანის უფლებების დარღვევისა და კანონის უზენაესობის უგულებელყოფის ერთგვარ სიმბოლოდ იქცა. აშშ-ის მიერ შემოღებული კანონი ითვალისწინებს სიაში შეყვანილ პირებზე ვიზის გაცემის აკრძალვას და მათი ანგარიშების გაყინვას. ამასთან, კანონი მხოლოდ მაგნიტსკის საქმით არ შემოიფარგლება და ადამიანის უფლებების უხეში დარღვევის სხვა შემთხვევებთან დაკავშირებული პირების დასჯასაც ითვალისწინებს.
რას წერს OSCE/ODIHR-ი საბოლოო ანგარიშში
საქართველოში 2024 წლის 26 ოქტომბერს ჩატარებულ საპარლამენტო არჩევნებთან დაკავშირებით, ეუთო/ოდირი (OSCE/ODIHR) საბოლოო ანგარიშს აქვეყნებს. ეუთოს (ევროპის უსაფრთხოებისა და თანამშრომლობის ორგანიზაციის) ვებგვერდზე 20 დეკემბერს გამოქვეყნებული პრესრელიზის სათაურში გამოთქმულია "შეშფოთება ამომრჩეველთა მიმართ განხორციელებულ ზეწოლაზე, სახელმწიფო ინსტიტუტების დამოუკიდებლობაზე." OSCE/ODIHR კონკრეტული ქმედებების მოწოდებით გამოდის. 2024 წლის არჩევნებზე გამოქვეყნებულ 53-გვერდიან დასკვნაში ეუთო წერს: „არჩევნები ჩატარდა სერიოზული შეშფოთების ფონზე, რაც ეხებოდა ბოლო პერიოდში მიღებული კანონმდებლობის გავლენას ფუნდამენტურ თავისუფლებებსა და სამოქალაქო საზოგადოებაზე, ნაბიჯებს საარჩევნო პროცესში ჩართული ინსტიტუტების დამოუკიდებლობის შესამცირებლად და ამომრჩევლებზე ზეწოლას. ამ ყველაფერმა, შერწყმულმა არჩევნების დღეს გამოვლენილ პრაქტიკასთან, მოახდინა კომპრომიტირება ზოგიერთი ამომრჩევლის შესაძლებლობისა, მიეცა ხმა შურისძიების შიშის გარეშე“. „მთლიანობაში, საარჩევნო კომისიებისა და სასამართლოების მიერ კენჭისყრის დღეს და შემდგომ პერიოდში დაწერილი საჩივრების საფუძვლიანი განხილვის არარსებობამ, - ტექნიკური საფუძვლებით ან არასაკმარისი დასაბუთებით საჩივრების უარყოფამ, ასევე, საბოლოო ჯამში, ძირი გამოუთხარა პროცესის სათანადოდ ჩატარებას და მისი ეფექტური გამოსწორების შესაძლებლობას.“ „საჩივრების არასათანადოდ განხილვა“ ეუთოს თანახმად, „არჩევნები ჩატარდა სერიოზული შეშფოთების ფონზე, რომელიც უკავშირდება ახლადმიღებული კანონმდებლობის გავლენას ძირითადი თავისუფლებებისა და სამოქალაქო საზოგადოების უფლებებზე, საარჩევნო პროცესში ჩართული ინსტიტუტების დამოუკიდებლობის შესუსტების მცდელობებს და ამომრჩევლებზე ზეწოლას, რაც, საარჩევნო დღის პრაქტიკასთან ერთად, ზოგი ამომრჩევლისთვის შიშის გარეშე ხმის მიცემის შესაძლებლობას ზღუდავდა“. ODIHR-ის შეფასებით, არჩევნების შემდგომი მოვლენები და საჩივრები არასათანადოთ იქნა განხილული, რამაც შეზღუდა სამართლებრივი მექანიზმების ეფექტიანობა. გავლენა „არჩევნების მთლიანობაზე“ ასევე, წერია, რომ „საპროტესტო აქციების ძალადობრივი დაშლა და მასობრივი დაკავებები სერიოზულ შეშფოთებას იწვევს მშვიდობიანი შეკრების თავისუფლების დაცვის მიმართ საერთაშორისო ვალდებულებების შესრულებაზე“. „ჩვენს საბოლოო ანგარიშში აღინიშნა ბევრი პრობლემა, რაც უარყოფითად აისახა ამ არჩევნების მთლიანობაზე და ძირი გამოუთხარა საზოგადოების ნდობას პროცესის მიმართ“, – აღნიშნა ODIHR-ის მისიის ხელმძღვანელმა, ოუენ მერფიმ. „მნიშვნელოვანია, რომ საქართველოს ხელისუფლებამ სასწრაფოდ უპასუხოს ყველა აღძრულ პრობლემას და დაიცვას დემოკრატიული პრინციპები“, - განაცხადა მან. ხმის მიცემის ფარულობის დარღვევაზე ODIHR-მა ასევე აღნიშნა, რომ მართალია, საარჩევნო კანონმდებლობა უზრუნველყოფდა დემოკრატიული არჩევნების საკანონმდებლო საფუძველს, მაგრამ „ბოლო ცვლილებები, რაც ხშირ შემთხვევაში პოლიტიკური მიზნებისთვის იყო გამოყენებული, უარყოფითად აისახა პროცესზე“. ანგარიში ხაზს უსვამს, რომ „საჩივრები როგორც ხმის მიცემის დღემდე და ამ დღის შემდეგ ხშირად არ იყო სათანადოდ სიღრმისეულად განხილული და ტექნიკური საფუძვლით არ განიხილებოდა, რაც არღვევდა სათანადო განხილვის უფლებას. ანგარიშის თანახმად, არჩევნების დღეს დაფიქსირდა ხმის მიცემის ფარულობის დარღვევის ხშირი შემთხვევები, პროცედურული შეუსაბამობები და ზეწოლისა და მუქარის შესახებ შეტყობინებები, მათ შორის - პროცესის ვიდეოჩანაწერის გზით, რამაც ნეგატიურად იმოქმედა საზოგადოებრივ ნდობაზე. ეუთო/ODIHR-ი რეკომენდაციას უწევს ხელისუფლებას, უზრუნველყოს საჩივრების ეფექტიანი განხილვა, გაზარდოს საარჩევნო პროცესის გამჭვირვალობა და განამტკიცოს საზოგადოებრივი ნდობა პროცესისადმი. ანგარიშში ასევე მითითებულია, რომ საერთაშორისო ვალდებულებების დარღვევით, დემონსტრაციები ძალადობრივად იქნა დაშლილი, დააკავეს ჟურნალისტები და დაფიქსირდა ბრალდებები წამებისა და არაადამიანური მოპყრობის შსახებ. ეუთოს მანდატზე ODIHR-ი ხაზს უსვამს, რომ ის, თავისი მანდატის შესაბამისად, არ აღიარებს ან არ ამტკიცებს არჩევნებს, არამედ უზრუნველყოფს საარჩევნო პროცესის სრულყოფილ და მიუკერძოებელ შეფასებას უნივერსალური პრინციპების და საერთაშორისო ვალდებულებების საფუძველზე. „ორგანიზაცია მზადაა დაეხმაროს საარჩევნო პროცესში ჩართულ მხარეებს პრობლემების გადაწყვეტის მიზნით შემდგომ დიალოგსა და კონკრეტულ ქმედებებში“, - წერს ეუთო. ანგარიში არაერთ რეკომენდაციას მოიცავს - როგორც საკანონმდებლო, ისე პრაქტიკულ ცვლილებებს, რათა გაიზარდოს საზოგადოებრივი ნდობა, ამომრჩევლებს მიეცეთ შიშის გარეშე ხმის მიცემის შესაძლებლობა და გაუმჯობესდეს საარჩევნო პროცესის გამჭვირვალობა და მთლიანობა საქართველოში. რეაქციები პრემიერ-მინისტრმა ირაკლი კობახიძემ დასკვნის გამოქვეყნების შემდეგ, 20 დეკემბერს, საგანგებო ბრიფინგზე განაცხადა: „მთლიანობაში ეუთო/ოდირის დასკვნიდან ირკვევა, რომ არჩევნები იყო თავისუფალი და კონკურენტული. ეს იკითხება საერთო შინაარსიდან. მე მინდა მადლობა გადავუხადო ეუთო/ოდირს“. თუმცა ოპოზიციური პარტიები, არჩევნებზე დამკვირვებლები და კომენტატორები მიიჩნევენ, რომ დასკვნა ისტორიულად მკაცრია მთელი საარჩევნო პროცესის მიმართ. „შეიძლება, ითქვას, რომ უკვე ოდირის შეფასებითაც - ეს არის ყველაზე ცუდი არჩევნები, რაც ამ საუკუნეში საქართველოში ჩატარებულა“, - წერს თავის მხრივ, საბა ბრაჭველი, „ღია საზოგადოების ფონდის“ იურისტი. 2020 წლის არჩევნების შესახებ ეუთო წერდა, რომ „საქართველოს საპარლამენტო არჩევნები იყო კონკურენტული და საბოლოო ჯამში, ფუნდამენტური უფლებებისადმი პატივისცემით ჩატარებული.“
საქსტატი: ნოემბერში, წინა თვესთან შედარებით, ბოსტნეულზე ფასები 17.9%-ით გაიზარდა, ასევე, გაზრდილია ფასები შაქარზე, სხვა ტკბილეულზე, ზეთსა და თევზეულზე
საქსტატის ცნობით, ნოემბერში, წინა თვესთან შედარებით, ბოსტნეულზე ფასები 17.9%-ით, შაქარზე, ჯემზე და სხვა ტკბილეულზე 3.4%-ით, ზეთსა და ცხიმზე 3.3%-ით გაიზარდა. ამის შესახებ ინფორმაციას სტატისტიკის ეროვნული სამსახური ავრცელებს. მათივე ცნობით, 2.6%-ით მოიმატა თევზეულის ფასმაც, ასევე რძე, ყველი და კვერცხი 1%-ით გაძვირდა. „საქსტატის ინფორმაციით“ ფასები შემცირდა შემდეგ ქვეჯგუფებზე: ხილი და ყურძენი (-3.6%), ყავა, ჩაი და კაკაო (-1.2%), ხორცი და ხორცის პროდუქტები (-0.4%). „სურსათი და უალკოჰოლო სასმელები: ჯგუფში ფასები გაიზარდა 2.2 პროცენტით, რაც თვის ინფლაციაზე 0.74 პროცენტული პუნქტით აისახა. ფასები მომატებულია ქვეჯგუფებზე: ბოსტნეული და ბაღჩეული (17.9 პროცენტი), შაქარი, ჯემი და სხვა ტკბილეული (3.4 პროცენტი), ზეთი და ცხიმი (3.3 პროცენტი), თევზეული (2.6 პროცენტი), მინერალური და წყაროს წყალი, უალკოჰოლო სასმელები და ნატურალური წვენები (1.9 პროცენტი), რძე, ყველი და კვერცხი (1.0 პროცენტი),“ - აღნიშნულია ინფორმაციაში. სტატისტიკის ეროვნული სამსახურის ინფორმაციით, ნოემბერში, წინა თვესთან შედარებით, ინფლაციის დონემ საქართველოში 0.7 პროცენტი, ხოლო წლიური ინფლაციის დონემ 1.3 პროცენტი შეადგინა. ინფორმაციას სტატისტიკის ეროვნული სამსახური ავრცელებს. მათივე ცნობით, საბაზო ინფლაციამ კი 2024 წლის ნოემბერში, გასული წლის შესაბამის პერიოდთან შედარებით 1.6 პროცენტი შეადგინა, ხოლო თამბაქოს გარეშე წლიური საბაზო ინფლაციის მაჩვენებელი ასევე 1.6 პროცენტით განისაზღვრა. „ყოველთვიური ინფლაციის მაჩვენებლის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე: სურსათი და უალკოჰოლო სასმელები: ჯგუფში ფასები გაიზარდა 2.2 პროცენტით, რაც თვის ინფლაციაზე 0.74 პროცენტული პუნქტით აისახა. ფასები მომატებულია ქვეჯგუფებზე: ბოსტნეული და ბაღჩეული (17.9 პროცენტი), შაქარი, ჯემი და სხვა ტკბილეული (3.4 პროცენტი), ზეთი და ცხიმი (3.3 პროცენტი), თევზეული (2.6 პროცენტი), მინერალური და წყაროს წყალი, უალკოჰოლო სასმელები და ნატურალური წვენები (1.9 პროცენტი), რძე, ყველი და კვერცხი (1.0 პროცენტი), პური და პურპროდუქტები (0.7 პროცენტი). ამასთან, ფასები შემცირდა შემდეგ ქვეჯგუფებზე: ხილი და ყურძენი (-3.6 პროცენტი), ყავა, ჩაი და კაკაო (-1.2 პროცენტი), ხორცი და ხორცის პროდუქტები (-0.4 პროცენტი); ჯანმრთელობის დაცვა: ჯგუფში ფასები მომატებულია 0.9 პროცენტით, რაც თვის ინფლაციაზე 0.09 პროცენტული პუნქტით აისახა. ფასები, ძირითადად, გაიზარდა სამედიცინო პროდუქციის, აპარატურის და მოწყობილობის (1.4 პროცენტი) და ამბულატორიული სამედიცინო მომსახურების (0.3 პროცენტი) ქვეჯგუფებზე; ტრანსპორტი: მოცემულ პერიოდში ფასები შემცირდა 1.5 პროცენტით. შესაბამისად, ჯგუფის წვლილმა თვის ინფლაციაში -0.17 პროცენტული პუნქტი შეადგინა. ფასები, ძირითადად, შემცირებულია სატრანსპორტო მომსახურებაზე (-2.5 პროცენტი) და პირადი სატრანსპორტო საშუალებების ექსპლუატაციაზე (-1.5 პროცენტი). წლიური ინფლაციის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე: სურსათი და უალკოჰოლო სასმელები: ჯგუფში ფასები გაიზარდა 3.1 პროცენტით, რაც წლიურ ინფლაციაზე 1.0 პროცენტული პუნქტით აისახა. ფასები მომატებულია ქვეჯგუფებზე: ბოსტნეული და ბაღჩეული (15.5 პროცენტი), ყავა, ჩაი და კაკაო (7.8 პროცენტი), შაქარი, ჯემი და სხვა ტკბილეული (7.0 პროცენტი), მინერალური და წყაროს წყალი, უალკოჰოლო სასმელები და ნატურალური წვენები (6.1 პროცენტი), ზეთი და ცხიმი (5.0 პროცენტი), ხილი და ყურძენი (3.6 პროცენტი), თევზეული (1.3 პროცენტი), პური და პურპროდუქტები (0.9 პროცენტი), ხორცი და ხორცის პროდუქტები (0.5 პროცენტი). ამასთან, ფასები შემცირდა რძის, ყველისა და კვერცხის ქვეჯგუფზე (-1.5 პროცენტი); სხვადასხვა საქონელი და მომსახურება: ჯგუფში ფასები გაიზარდა 6.6 პროცენტით, რაც 0.35 პროცენტული პუნქტით აისახა მთლიან ინდექსზე. ფასები მომატებულია ქვეჯგუფებზე: პირადი ნივთები, სხვა კატეგორიებში ჩაურთველი (23.4 პროცენტი), დაზღვევა (12.9 პროცენტი), საფინანსო მომსახურება (4.5 პროცენტი), პირადი ჰიგიენა (3.6 პროცენტი); ალკოჰოლური სასმელები, თამბაქო: ჯგუფში ფასები გაიზარდა 5.1 პროცენტით, რაც წლიურ ინფლაციაზე 0.34 პროცენტული პუნქტით აისახა. ფასები გაიზარდა როგორც ალკოჰოლურ სასმელებზე (7.5 პროცენტი), ისე თამბაქოს ნაწარმზე (2.1 პროცენტი); კავშირგაბმულობა: ჯგუფში ფასები შემცირებულია 12.9 პროცენტით, რაც წლიურ ინფლაციაზე -0.48 პროცენტული პუნქტით აისახა; საცხოვრებელი, წყალი, ელ.ენერგია, აირი: ჯგუფში დაფიქსირდა ფასების 3.7 პროცენტიანი კლება, რაც -0.32 პროცენტული პუნქტით აისახა წლიურ ინფლაციაზე. ფასები შემცირებულია ქვეჯგუფებზე: ელექტროენერგია, აირი და სათბობის სხვა სახეები (-5.2 პროცენტი) და ფაქტიური გადასახადი საცხოვრებელზე (-2.7 პროცენტი). ამასთან, ფასები მომატებულია საცხოვრებლის მიმდინარე მოვლასა და შეკეთებაზე (5.8 პროცენტი),“ - აღნიშნულია ინფორმაციაში.
შუა დერეფნით ტვირთების გადაზიდვა 63%-ით გაიზარდა
ტრანსკასპიური საერთაშორისო სატრანსპორტო მარშრუტის (TITR, შუა დერეფანი) ტვირთების გადაზიდვის მოცულობა 2024 წლის 11 თვის განმავლობაში 63%-ით გაიზარდა და მან 4,1 მილიონ ტონას მიაღწია. ყაზახეთის ტრანსპორტის სამინისტროს ცნობით, ცნობით, 2024 წლის იანვარ-ნოემბერში TITR-ით საკონტეინერო გადაზიდვები 2,6-ჯერ გაიზარდა და მან 50 500 TEU შეადგინა. „ტრანსკასპიური საერთაშორისო სატრანსპორტო მარშრუტი აგრძელებს სტაბილურად ზრდას, რასაც ადასტურებს გამტარუნარიანობის ზრდა წელიწადში 6 მილიონ ტონამდე, მათ შორის, 100,000 TEU კონტეინერის ტრანსპორტირება. განსაკუთრებული ყურადღება ექცევა ინფრასტრუქტურის მოდერნიზაციას, რომელიც მიზნად ისახავს სიმძლავრის გაზრდას და მომსახურების ხარისხის გაუმჯობესებას, “ - აცხადებენ სამინისტროში. ტრანსკასპიური საერთაშორისო სატრანსპორტო მარშრუტი, ასევე ცნობილი როგორც შუა დერეფანი, არის საერთაშორისო სატრანსპორტო მარშრუტი, რომელიც გადის ჩინეთში, ყაზახეთში, კასპიის ზღვის ზონაში, აზერბაიჯანში, საქართველოსა და შემდგომში გადაჭიმულია თურქეთსა და ევროპის ქვეყნებში. ამ დერეფნის ნაწილია ბაქო-თბილისი-ყარსის რკინიგზა.
"საქართველოს ლეგიტიმური პრეზიდენტი სალომე ზურაბიშვილია" - ევროპელი პოლიტიკოსების ნაწილი
რამდენიმე ევროპელი პოლიტიკოსი მიხეილ ყაველაშვილის პრეზიდენტად არჩევასთან დაკავშირებით აცხადებს, რომ "საქართველოს ლეგიტიმური პრეზიდენტი სალომე ზურაბიშვილია." ევროპელი პოლიტიკოსები ნაწილი 26 ოქტომბრის საპარლამენტო არჩევნების შემდეგ საქართველოშიც იმყოფებოდა. „მიხეილ ყაველაშვილის საქართველოს ახალ პრეზიდენტად "არჩევა" მორიგი ნაბიჯია საქართველოს ყველა კონსტიტუციური ინსტიტუტის "გლაიხშალტუნგის" (ნაცისტების მოგონილი ტერმინი, რომელიც მათ მიერ გერმანიაში ტოტალიტარული რეჟიმის გამყარებას აღწერს - რ.თ.). მმართველი პარტია აღრმავებს დაყოფას საქართველოში, გეგმავს გადატრიალებას და ლიბერალური დემოკრატიის განადგურება სურს," - დაწერა გერმანიის ბუნდესტაგის საგარეო ურთიერთობათა კომიტეტის თავმჯდომარემ, მიხაელ როთმა x-ზე. მომდევნო პოსტში მიხაელ როთმა აღნიშნა, რომ "საქართველოს ლეგიტიმური პრეზიდენტი სალომე ზურაბიშვილია". თავის მხრივ, ლიეტუველმა ევროპარლამენტარმა რასა იუკნევიჩიანემ დაწერა, რომ "ივანიშვილი სახელმწიფოს მიტაცებას განაგრძობს". „დღეს საქართველოში ნამდვილი არჩევნები არ ყოფილა. რაც ჩატარდა ფარსი იყო, ზუსტად ისე, როგორც რუსეთში, ბელარუსსა და სხვა ავტოკრატიებში," - წერს ლიეტუველი პოლიტიკოსი, რომელიც 11-13 დეკემბერს საქართველოში იყო ჩამოსული სხვა ექვს ევროპარლამენტართან ერთად. „საქართველოში ერთადერთი ლეგიტიმური თანამდებობის პირი პრეზიდენტი ზურაბიშვილია, არჩეული თავისუფალი არჩევნების შედეგად," - აღნიშნავს იუკნევიჩიანე მსგავსი გზავნილი ჰქონდა ესტონეთის პარლამენტის საგარეო საქმეთა კომიტეტის თავმჯდომარეს მარკო მიჰელსონსაც. "დღეს საქართველოს პარლამენტს, გაყალბებული არჩევნების შედეგად შეკრებილს, სურს ქვეყნის ახალი პრეზიდენტის არჩევა, ულტრა-მემარჯვენის და პრო-რუსის, როცა ყოველდღე ქართველები პროტესტს მართავენ დემოკრატიისა და ევროპისადმი თავისი ერთგულების გამოსახატად. ჩემი სრული მხარდაჭერა სალომე ზურაბიშვილს, რომელიც ქართველი ხალხის მისწრაფებებს განასახიერებს," - დაწერა მან x-ზე. ნატალი ლუაზომ ასევე გააზიარა მარკო მიჰკელსონის პოსტი. მიხეილ ყაველაშვილს პრეზიდენტად არჩევა ჯერჯერობით აზერბაიჯანის პრეზიდენტმა ილჰამ ალიევმა, სომხეთის პრეზიდენტმა ნიკოლ ფაშინიანმა და ბელორუსის ლიდერმა ალექსანდრ ლუკაშენკამ მიულოცეს.
მდინარაძე პასუხობს შეკითხვას, რა იქნება ხელისუფლების სამოქმედო გეგმა, თუ ზურაბიშვილი პრეზიდენტის სასახლეში დარჩება
თუ სალომე ზურაბიშვილი პრეზიდენტის სასახლეში დარჩება“, ამ შემთხვევაში რა იქნება ხელისუფლების სამოქმედო გეგმა“, საპარლამენტო უმრავლესობის ლიდერი მამუკა მდინარაძე მედიის ამ შეკითხვას კითხვითვე პასუხობს. მდინარაძემ ასევე აღნიშნა, რომ „სალომე ზურაბიშვილი პრეზიდენტის ინსტიტუტის დამახინჯებულ აღქმას ტოვებს.“ „ანუ თქვენ ამბობთ, რომ ხელისუფლებას მიიტაცებს? ხელისუფლების შტო საერთოდ არ არის, სიმბოლური თანამდებობაა, მაგრამ მიიტაცებს პრეზიდენტის ინსტიტუტს? ანუ თქვენ ამბობთ, დანაშაულს ჩაიდენს? ინაუგურაციის შემდეგ, სალომე ზურაბიშვილი იქნება, თუ თქვენ გადაწყვეტთ ასეთი რაღაცის გაკეთებას, ე.ი. გინდათ იქ შეჭრილხართ და გინდა, შესულხართ და აღარ გამოსულხართ. ანუ თქვენ რას მეკითხებით, რომ ამ შემთხვევაში, მოქალაქე სალომე ზურაბიშვილი გამაგრდება პრეზიდენტის სასახლეში და დანაშაულს ჩაიდენს? მე მგონი, ყველაფერი ნათელია,“ - აცხადებს მდინარაძე. მისი შეფასებით, “მიხეილ ყაველაშვილი უკვე შემდგარი პროფესიონალი პოლიტიკოსია.“ „მას შემდეგ, რაც საქართველოს კონსტიტუციაში შევიდა ცვლილება, რომ კოლეგიის მიერ ყოფილიყო საქართველოს პრეზიდენტი არჩეული, ეს არის პირველი შემთხვევა და მათ შორის უფლებამოსილებას შეიძენს საქართველოს პრეზიდენტი, რომელიც, კონსტიტუციის მიხედვით, არაპირდაპირი გზით იქნება არჩეული. როგორც ცნობილია, კოლეგიაში შედიან საქართველოს პარლამენტის წევრები, თვითმმართველობის წარმომადგენლები, აჭარისა და აფხაზეთის მთავრობების უმაღლესი საბჭოს წარმომადგენლები. ზურაბიშვილი პრეზიდენტის ხვალინდელ არჩევას პროვოკაციას და პაროდიას უწოდებს: „აქ ვარ და აქ ვიქნები“ მიხეილ ყაველაშვილის დასახელებისას, მთავარი კრიტერიუმი რაც კი შეიძლებოდა ყოფილიყო, ეს არის სამშობლოს უღალატობა და არა რომელიმე გუნდის და პატრიოტიზმი. მიხეილ ყაველაშვილს თუკი რაიმე თვისება გააჩნია, უწინარესად, ამ თვისებაზე უნდა ვილაპარაკოთ. გარდა ამისა, ის უკვე შემდგარი პროფესიონალი პოლიტიკოსია და ადამიანია, რომელსაც თავის დროზე მთელი საქართველო ვგულშემატკივრობდით. დღეს ასე არ არის, მაგრამ დიდი უმრავლესობა გულშემატკივრობს, იმიტომ, რომ ქართველი ხალხის მიერ არჩეული ხელისუფლება, შესაბამისი ლეგიტიმაციით, ირჩევს საქართველოს პრეზიდენტს,“ - განაცხადა მდინარაძემ. საარჩევნო კოლეგიამ საქართველოს პრეზიდენტად მიხეილ ყაველაშვილი აირჩია
ომბუდსმენის შეფასებით, პარლამენტის მიერ მიღებული „მნიშვნელოვანი საკანონმდებლო ცვლილებები“ არ შეესაბამება ადამიანის უფლებების დაცვის სტანდარტებს
საქართველოს სახალხო დამცელის ლევან იოსელიანის განცხადებით, საქართველოს პარლამენტმა ბოლო ერთი კვირის განმავლობაში მნიშვნელოვანი საკანონმდებლო ცვლილებები მიიღო, რომელთაგანაც რამდენიმე, სახალხო დამცველის შეფასებით, არ შეესაბამება ადამიანის უფლებების დაცვის სტანდარტებს. ლევან იოსელიანის განცხადებაში აღინიშნება, რომ რომ საკანონმდებლო ცვლილებების არსებითი ხასიათის მიუხედავად, ეს საკანონმდებლო პროცესი წარიმართა დაჩქარებული წესით, დაინტერესებული საზოგადოების თუ შესაბამისი დარგის სპეციალისტების ჩართულობის გარეშე, რაც ზოგადად აზიანებს საკანონმდებლო პროცესს და არ არის მისასალმებელი. “რაც შეეხება განხორციელებული საკანონმდებლო ცვლილებების შინაარს, საქართველოს პარლამენტმა განიხილა „საჯარო სამსახურის შესახებ“ საქართველოს კანონში შესატანი ცვლილებები. მართალია იურიდიულ საკითხთა კომიტეტმა გაიზიარა სახალხო დამცველის პირველი მოსმენით საკომიტეტო განხილვის დროს წარდგენილი მოსაზრებები რეორგანიზაციის საფუძვლებთან დაკავშირებით, თუმცა სამწუხაროა, რომ საბოლოოდ მიღებული საკანონმდებლო პროექტით საჯარო სამსახურში რეორგანიზაციით გათავისუფლებულ პირებს აღარ ექნებათ საჯარო სამსახურში აღდგენის მოთხოვნის უფლება, რაც მათ სხვა საფუძვლით სამსახურიდან გათავისუფლებულ მოხელეებთან არათანაბარ მდგომარეობაში ჩააყენებს. გარდა ამისა, მეორე მოსმენით განხილვისას წარმოდგენილ იქნა ახალი ცვლილებები, რომლის თანახმად, პირველადი სტრუქტურული ერთეულის ხელმძღვანელი და მისი მოადგილე აღარ ჩაითვლებიან პროფესიულ საჯარო მოხელეებად, მათი დანიშვნა მოხდება ადმინისტრაციული ხელშეკრულებით, აღნიშნული კი მნიშვნელოვნად ამცირებს ამ პირთა შრომითი უფლებების დაცვის გარანტიებს და ეწინააღმდეგება თავად საჯარო სამსახურის ისეთ პრინციპებს, როგორიცაა კარიერულ წინსვლაზე, დამსახურებასა და სტაბილურობაზე დაფუძნებული სამსახური. ამავე დროს ეს რეგულაციები გავრცელდება საქართველოს საჯარო სამართლის იურიდიულ პირებში, ანალოგიურ საფეხურზე დასაქმებული პირების მიმართაც. ამავე კვირას, კანონმდებლობაში შეტანილი ცვლილებებით აიკრძალა შეკრება მანიფესტაციებზე ნიღბის ტარება. მიუხედავად იმისა რომ ბევრი დასავლური ქვეყანა იცნობს მსგავს შეზღუდვას, უმრავლეს შემთხვევაში როგორც ამ ქვეყნების კანონმდებლობა, ისე ადამიანის უფლებათა საერთაშორისო სტანდარტები, ასევე ადამიანის უფლებათა ევროპული სასამართლოს პრაქტიკა მიუთითებს რომ ეს აკრძალვა არ არის უპირობო და ბლანკეტური. მნიშვნელოვანია ამ შემთხვევაში კანონმდებლობა იცავდეს ბალანსს გამოხატვის თავისუფლებასა და უსაფრთხოების დაცვის ინტერესებს შორის. ასევე, ცვლილებები განხორციელდა „ადმინისტრაციულ სამართალდარღვევათა კოდექსში“ რომლის თანახმად, უკვე დადგენილი ცალკეული დარღვევებისთვის განსაზღვრული ჯარიმები მნიშვნელოვანად გაიზარდა და რიგ შემთხვევაში დაწესდა დამატებით ადმინისტრაციული პატიმრობა. საქართველოში მოსახლეობის ფინანსური მდგომარეობის გათვალისწინებით, შესაძლოა ეს საკმაოდ მძიმე ტვირთი იყოს ინდივიდებისათვის,” - აღნიშნულია განცხადებაში.
მაკრონი: მინდა, მჯეროდეს, რომ ღია, თავაზიანი დიალოგის გზა არსებობს, ევროპა მშვიდობის პროექტია, ევროპა არ არის შანტაჟი
საფრანგეთის პრეზიდენტმა ემანუელ მაკრონმა დღეს, ქართველი ხალხისადმი ვიდეომიმართვაში ხაზი გაუსვა დიალოგის მნიშვნელობას და აღნიშნა, რომ „ამ დიალოგმა ქართველებს საშუალება უნდა მისცეს, ხელახლა აიღონ ხელში საკუთარი ბედი.“ მაკრონი ყურადღებას ამახვილებს იმ სარგებელზე, რისი მოტანაც ევროკავშირს შეუძლია და ხაზს უსვამს, რომ ევროკავშირი პატივს სცემს ხალხთა სუვერენულ ნებას, ერების ისტორიასა და იდენტობას, როგორიცაა, ქართველი ხალხის ათასწლოვანი ისტორია. ევროკავშირი არ კარნახობს რა არის ეროვნული ინტერესი. საფრანგეთის პრეზიდენტი აღნიშნავს, რომ ევროპა არ არის შანტაჟი, ის მშვიდობის პროექტია. მოცემული გზავნილი სათაურით - “საფრანგეთის რესპუბლიკის პრეზიდენტის ვიდეომიმართვა ქართველ ხალხს,“ დღეს საღამოს, საქართველოში საფრაგეთის საელჩომ გაავრცელა. „საქართველოსთვის კანდიდატის სტატუსის მინიჭების პირველი წლისთავის წინა დღეს, მნიშვნელოვნად მივიჩნიე, ეს გზავნილი ამ მოკლე ვიდეოს მეშვეობით გადმომეცა. პირველ რიგში, მინდა გითხრათ, რომ საქართველოს კონსტიტუციაში ჩაწერილი ქართველი ხალხის ევროპული მისწრაფებების ღალატი არ შეიძლება. საქართველოს ევროპული ოცნება არ უნდა ჩაქრეს. ევროპული გზის ეს არჩევანი თქვენი სუვერენული გადაწყვეტილებაა, ევროპულ ოჯახთან შეერთების ეს არჩევანი არის ის, რაც დღეს მშვიდობიანად გამოხატულია თბილისში და ქვეყნის რამდენიმე ათეულ ქალაქშიც. საქართველოსთვის კანდიდატის სტატუსის მინიჭებით, ევროპულმა საბჭომ დადებითი პასუხი გასცა ამ მისწრაფებას. ეს არჩევანი გულისხმობს გარკვეული მოვალეობებისა და ვალდებულებების შესრულებას დროთა განმავლობაში. გზა დასახულია, საქართველოს ახლა შეუძლია, ხელიხელჩაკიდებულმა იმუშაოს ევროკავშირის 27 წევრ სახელმწიფოსთან, თავდაჯერებულად, რათა ააშენოს ეს ევროპული მომავალი, ან დაელოდოს და გადაავადოს, მაგრამ რას დაელოდოს და რატომ? ვუბრუნდები იმას, თუ რას წარმოადგენს ეს ევროპული არჩევანი. ევროკავშირი არ ავალდებულებს. ევროპა სთავაზობს, თანასწორი პარტნიორობის გზის დასახვით, კეთილდღეობისა და საერთო ღირებულებებისთვის. ევროპა არ აშინებს, არ იყენებს მუქარას. ევროპა არ ცდილობს ქაოსის დათესვას, ევროპა არ ცდილობს მეზობლების დესტაბილიზაციასა ან დამორჩილებას ომით ან ჰიბრიდული საშუალებებით. ის არ ცდილობს თავის მოქალაქეებს შორის განხეთქილების ან დაბნეულობის დათესვას. ევროკავშირი პატივს სცემს ხალხთა სუვერენულ ნებას, ერების ისტორიასა და იდენტობას, როგორიცაა, ქართველი ხალხის ათასწლოვანი ისტორია. ევროკავშირი არ კარნახობს, რა არის ეროვნული ინტერესი. ის პატივს სცემს ტერიტორიულ მთლიანობას, კერძოდ საქართველოსას. ევროკავშირი არ უჭერს მხარს სეპარატისტებს თქვენს ქვეყანაში. ევროკავშირი წარმოადგენს მშვიდობის პროექტს, რომელიც ევროპის მშენებლობის საფუძველია მისი დაარსებიდან. ევროკავშირს არც აგრესიული ომი დაუწყია სუვერენული სახელმწიფოს წინააღმდეგ. დიახ, ევროპა ეს არის სოლიდარობა, მშვიდობის არჩევანი, ერთი ოჯახისთვის საერთო სტრატეგიული ინტერესების კოლექტიური დაცვა. ევროპა არ არის შანტაჟი, ეს არის წესების მიღება, როგორც უთანხმოებების მოგვარების საშუალება. საქართველოს გადასაწყვეტია თავისი ბედი. ამისთვის კი, ქართველების ხმას უნდა მოუსმინონ და პატივი სცენ. და ბოლოს, მინდა, კიდევ ერთხელ გითხრათ, რომ ჩვენ თქვენ გვერდით ვდგავართ თქვენი ევროპული და დემოკრატიული მისწრაფებების მხარდასაჭერად. საქართველოს ვერ ექნება ევროპულ გზაზე წინსვლის იმედი, თუ მშვიდობიან დემონსტრაციებს ძალის არაპროპორციული გამოყენებით ახშობენ, თუ სამოქალაქო საზოგადოების ორგანიზაციებს, ჟურნალისტებს, ოპოზიციური პარტიების წევრებს ავიწროებენ, თუ გამოხატვისა და შეკრების თავისუფლებას არ იცავენ. მინდა, მჯეროდეს, რომ არსებობს გზა, ქვეყნის ევროპული მისწრაფებების შესაბამისად, გზა ღია, თავაზიანი დიალოგისა ყველა პოლიტიკურ ძალასთან და სამოქალაქო საზოგადოების ორგანიზაციასთან. ეს დიალოგი ყველა ქართველის პასუხისმგებლობაა. მან ქართველებს საშუალება უნდა მისცეს, ხელახლა აიღონ ხელში საკუთარი ბედი. ეს გზა თქვენია. ამიტომაც დიდი ნდობა მაქვს ქართველი ხალხის მიმართ და დიდი ნდობა მაქვს ყველას მიმართ, ვისთვისაც ძვირფასია ეს პატივსაცემი ევროპული გზა და არ სურს, დანებდეს დაშინებას, პროპაგანდას, კიბერშეტევებს, ინფორმაციის მანიპულაციას. გაუმარჯოს საქართველოსა და საფრანგეთის მეგობრობას და გაუმარჯოს ევროპას!“
დიდი ბრიტანეთისა და ჩრდილოეთ ირლანდიის გაერთიანებულმა სამეფომ გომელაური და შსს-ს კიდევ ოთხი მაღალჩინოსანი დაასანქცირა
დიდი ბრიტანეთისა და ჩრდილოეთ ირლანდიის გაერთიანებულმა სამეფომ 19 დეკემბერს დაასანქცირა საქართველოს შინაგან საქმეთა მინისტრი ვახტანგ გომელაური და უწყების კიდევ ოთხი მაღალჩინოსანი. 19 დეკემბერს გამოქვეყნებულ განცხადებაში წერია, რომ სანქციები წესდება „შეერთებულ შტატებთან კოორდინირებული ქმედებით“. სანქცირებულები არიან: ვახტანგ გომელაური - შინაგან საქმეთა მინისტრი; ალექსანდრე დარახველიძე - შსს-ს მინისტრის პირველი მოადგილე; სულხან თამაზაშვილი - თბილისის პოლიციის დეპარტამენტის დირექტორი; ზვიად ხარაზიშვილი - განსაკუთრებულ დავალებათა დეპარტამენტის უფროსი; მილერი ლაგაზაური - განსაკუთრებულ დავალებათა დეპარტამენტის უფროსის, ზვიად ხარაზიშვილის მოადგილე. ბრიტანეთის მთავრობის განმარტებით, მათ სანქციებს უწესებენ, რადგან პასუხისმგებელნი არიან ჟურნალისტებსა და მშვიდობიან დემონსტრანტებზე ძალადობრივ თავდასხმებზე. ზვიად ხარაზიშვილსა და მილერი ლაგაზაურს შეერთებული შტატების სახაზინო დეპარტამენტისგან 2024 წლის 16 სექტემბრის შემდეგ აქვთ სანქციები დაწესებული „მაგნიტსკის აქტზე“ დაყრდნობით. ზვიად ხარაზიშვილსა და მილერი ლაგაზაურს შეერთებული შტატების სახაზინო დეპარტამენტისგან 2024 წლის 16 სექტემბრის შემდეგ აქვთ სანქციები დაწესებული „მაგნიტსკის აქტზე“ დაყრდნობით. საგარეო უწყების განმარტებით, სანქციები გულისხმობს მოგზაურობის აკრძალვას ბრიტანეთში და უძრავი ქონების გაყინვას, - რაც „მათი დიდი ბრიტანეთიდან და მისი ეკონომიკიდან გარიცხვას ნიშნავს.“ ბრიტანეთის მთავრობა წერს, რომ „საქართველოს ხელისუფლებამ დაიწყო დემონსტრაციების, სამოქალაქო საზოგადოების, მედიისა და ოპოზიციის წარმომადგენლების სისტემატური დარბევა მას შემდეგ, რაც საზოგადოებრივი წინააღმდეგობა გაუწია „ქართული ოცნების“ გადაწყვეტილებას, შეაჩეროს ქვეყნის ევროპული მომავლისკენ სვლა.“ „მომიტინგეების, ოპოზიციის ლიდერებისა და ჟურნალისტების მიმართ განხორციელებული შოკისმომგვრელი ძალადობა არის საშინელი თავდასხმა დემოკრატიაზე და ქართველი ხალხის უფლებაზე, გამოიყენოს თავისი ფუნდამენტური თავისუფლებები.“ მისი თქმით, „დღევანდელი ქმედება აჩვენებს, რომ გაერთიანებული სამეფო დგას საქართველოს ხალხის გვერდით და განიხილავს ყველა ვარიანტს, რათა პასუხისმგებელი პირები პასუხისმგებელნი იყვნენ.“ საელჩოს განმარტებით, სანქციები „გაგრძელებაა გაერთიანებული სამეფოს მთავრობის მიერ გასულ კვირას მიღებული ზომების, შეეჩერებინა საქართველოს მთავრობის პროგრამების მხარდაჭერა და შეეზღუდა თავდაცვის სფეროში თანამშრომლობა,“ - განაცხადა ბრიტანეთის საგარეო საქმეთა მინისტრმა დევიდ ლემიმ. შეგახსენებთ, 13 დეკემბერს აშშ-მ საქართველოს ოფიციალურ და კერძო პირებს სავიზო შეზღუდვები დაუწესა. ლიეტუვის საგარეო საქმეთა მინისტრმა 15 დეკემბერს განაცხადა, რომ ესტონეთთან კოორდინაციით გააფართოვეს სანქცირებული ქართველი პოლიტიკოსების სია და მას დაამატეს კიდევ 17 პირი, მათ შორის პრემიერ-მინისტრი ირაკლი კობახიძე, რადგან არ შეეგუებიან მშვიდობიანი მომიტინგეების, ჟურნალისტებისა და ოპოზიციის მიმართ ძალადობას. უფრო ადრე სანქცირების შესახებ გამოაცხადა ესტონეთის საგარეო საქმეთა სამინისტრომ. ლიეტუვის მიერ სანქცირებულთა სიაში არიან იგივე პირები, რომლებსაც 5 დეკემბერს პერსონალური და ეკონომიკური სანქციები დაუწესა უკრაინამ, გარდა „ქართული ოცნების" საპატიო თავმჯდომარე ბიძინა ივანიშვილისა, რომელსაც საქართველოს შსს-ს 10 მაღალჩინოსანთან ერთად ლიეტუვამ, ესტონეთმა და ლატვიამ სანქციები 2 დეკემბერს დაუწესეს. 16 დეკემბერს ორშაბათს ევროკავშირის საგარეო საქმეთა მინისტრებმა საქართველოზე იმსჯელეს და გადაწყვიტეს, რომ ქართული დიპლომატიური და სამსახურებრივი პასპორტებისთვის ევროკავშირში უვიზოდ მიმოსვლა შეჩერდება.
