ახალი ამბები
უვიზო მიმოსვლის შესაძლო შეზღუდვაზე ცნობას, პრემიერმა დეზინფორმაციის და სახელმწიფოს წინააღმდეგ საქმიანობის კლასიკური მაგალითი უწოდა
„გუშინ ვიხილეთ მორიგი, კლასიკური დეზინფორმაცია, თითქოს, რაღაც საფრთხე ემუქრებოდა უვიზო რეჟიმს, ეს არის სამწუხაროდ ჩვენი ოპოზიციის ხელწერა, მათი სახე, რა თქმა უნდა, ეს არის ტყუილი, რაც გუშინვე დადასტურდა, მათ შორის ევროპელი ლიდერების მხრიდან“, - ასე შეაფასა საქართველოს პრემიერ-მინისტრმა ირაკლი ღარიბაშვილმა Euobserver-ის მიერ გავრცელებული ინფორმაცია, რომ საქართველოსთვის უვიზო მიმოსვლის შეზღუდვაზე ევროკავშირში დისკუსიაა. ირაკლი ღარიბაშვილის თქმით, ხელისუფლების ერთ-ერთი მთავარი მიღწევა და ხელშესახები პროგრესი უვიზო რეჟიმია. „ჩვენი მოქალაქეები დღეს თავისუფლად გადაადგილდებიან ევროპის მიმართულებით. მანამდე, წინა მთავრობის დროს, ეს წარმოუდგენელი იყო და ალბათ ამაზე ვერავინ იოცნებებდა. ჩვენ ამასა მივაღწიეთ და გუშინ ვიხილეთ მორიგი, კლასიკური დეზინფორმაცია, თითქოს რაღაც საფრთხე ემუქრებოდა უვიზო რეჟიმს. ეს არის სამწუხაროდ ჩვენი ოპოზიციის ხელწერა, მათი სახე. რა თქმა უნდა, ეს არის ტყუილი, გუშინვე დადასტურდა ეს, მათ შორის ევროპელი ლიდერების მხრიდან, რომ არავითარი მსგავსი არ იგეგმება და ეს არც მოხდება“, - აღნიშნა ირაკლი ღარიბაშვილმა.
პარტია „საქართველოსთვის“: გიორგი გახარიას თმის ნიმუშების კვლევით ნარკოტიკის მოხმარება არ დაუდასტურდა
პარტია „საქართველოსთვის“ ინფორმაციით, ავსტრიაში, ვენის ლაბორატორიის, FTC-Forensisch-Toxikologisches Labor-ის დასკვნით, გიორგი გახარიას თმის ნიმუშის კვლევის შედეგად, არც ერთი ნარკოტიკული ნივთიერების მოხმარება არ დადასტურდა. ამასთან დაკავშირებით ინფორმაციას თავად პარტიის პრესსამსახური ავრცელებს. მისი მიხედვით, 2021 წლის 14 სექტემბერს ვენის (ავსტრია) ლაბორატორიაში „FTC-Forensisch-Toxikologisches Labor“ ჩატარდა გიორგი გახარიას თმის ნიმუშის კვლევა ნარკოტიკულ ნივთიერებებზე.
თავდაცვის სამინისტროს დავით კეზერაშვილის წინააღმდეგ სარჩელი შეაქვს
საქართველოს თავდაცვის სამინისტროს, დავით კეზერაშვილისა და მისი თავდაცვის მინისტრობის დროს სახელმწიფო შესყიდვების დეპარტამენტის უფროსის, ალექსანდრე ნინუას წინააღმდეგ, თავდაცვის უწყების მიმართ დანაშაულებრივი ქმედებით მიყენებული ზიანის ანაზღაურების მოთხოვნით, საქალაქო სასამართლოში სარჩელი შეაქვს. თავდაცვის სამინისტროს მიერ გავრცელებულ ინფორმაციაშია ნათქვამი, რომ ამ სისხლის სამართლის საქმეზე სასამართლოს უმაღლეს ინსტანციაში უკვე დადგა გამამტყუნებელი განაჩენი და საქართველოს უზენაესი სასამართლოს გადაწყვეტილებით, ბრალდებულები, დავით კეზერაშვილი და ალექსანდრე ნინუა ცნობილი არიან დამნაშავეებად. „სასამართლოების სამი ინსტანციის განაჩენებით დადგენილია, რომ ალექსანდრე ნინუას მიერ მისთვის დაკისრებული ვალდებულებების არაჯეროვანი შესრულების გამო, საქართველოს თავდაცვის სამინისტროს დებიტორულ დავალიანებად დაერიცხა 5 060 000 ევრო, რამაც სახელმწიფოს კანონიერი ინტერესის არსებითი დარღვევა გამოიწვია, ხოლო დავით კეზერაშვილმა სამსახურებრივი მდგომარეობის გამოყენებით მიითვისა მის მართლზომიერ მფლობელობასა და გამგებლობაში არსებული საქართველოს თავდაცვის სამინისტროს დიდი ოდენობით საბიუჯეტო სახსრები. აღნიშნული საქმე შეეხება მხოლოდ ერთ შემთხვევას, როდესაც სახელმწიფოსგან 5 მილიონზე მეტი ევროს მიტაცება მოხდა. სისხლის სამართლის საქმე არ გახლავთ მხოლოდ კორუფციასთან დაკავშირებული შემთხვევა, რადგან აღნიშნული თანხა უბრალოდ გადარიცხულ იქნა ოფშორულ კომპანიაში, ყოველგვარი საქონლის შეძენისა და მიწოდების გარეშე. ეს ქმედება ნათლად ასახავს იმ არაკეთილსინდისიერ დამოკიდებულებას სახელმწიფო ბიუჯეტის მიმართ, რასაც წინა ხელისუფლება მიზანმიმართულად ავლენდა. კიდევ ერთხელ ხაზგასმით აღვნიშნავთ, რომ აღნიშნული სისხლის სამართლის საქმე არ არის მხოლოდ კორუფციული გარიგება, არამედ ეს არის წინა ხელისუფლების მიერ ბიუჯეტიდან ორგანიზებულად თანხის მიტაცების შემთხვევა”, - ნათქვამია ინფორმაციაში. ამასთან დაკავშირებით, კომენტარი ჟურნალისტებთან გააკეთა ირაკლი ღარიბაშვილმა. „ბატონი კეზერაშვილის წინააღმდეგ შეტანილი სარჩელი შეეხება გაფლანგულ ათეულობით და ასეულობით მილიონ დოლარს, რომელიც მისი მინისტრობის დროს მოხდა თავდაცვის სამინისტროში. „ერთ-ერთი ფაქტი დადასტურდა, როცა სასამართლომ დამნაშავედ ცნო ბატონი კეზერაშვილი დაუსაბუთებელი, გაუგებარი პროგრამების დაფინანსებისთვის. კერძოდ, თუ არ ვცდები, 5 მილიონი დოლარი გადაირიცხა ერთ-ერთ ოფშორულ კომპანიაზე და არც სერვისი არ იყიო გაწეული და არც არავითარი შეიარაღება არ ჩამოსულა. ასეთი ფაქტი არის უამრავი დაა გამოძიება ყველა ამ ფაქტს გასცემს შესაბამის პასუხს“, - განაცხადა ირაკლი ღარიბაშვილმა.
აუდიტის სამსახურმა ბანერების განთავსებისთვის გაწეული ხარჯის შესწავლა დაიწყო
2 ოქტომბრის თვითმმართველობის არჩევნების წინ განთავსებული ე.წ. სისხლიანი ბანერებისთვის გაწეული ხარჯის კანონიერების დასადგენად, სახელმწიფო აუდიტის სამსახურმა ადმინისტრაციული წარმოება დაიწყო. სახელმწიფო აუდიტის სამსახურმა ბანერების განთავსების ადგილების მფლობელი კომპანიისგან ბანერების დამკვეთის, მათი განთავსებისათვის გამოყოფილი ადგილების, ტირაჟის, განთავსების ხანგრძლივობისა და ღირებულების შესახებ ინფორმაცია გამოითხოვა. აუდიტის სამსახურის პოლიტიკური ფინანსების მონიტორინგის დეპარტამენტის შუალედური ანგარიშის მიხედვით, „2021 წლის სექტემბერში ქვეყნის მასშტაბით გარე რეკლამისათვის განკუთვნილ ადგილებში განთავსდა პოლიტიკური შინაარსის ბანერები წარწერით: „არა ნაცებს, არა ბოროტებას, არა ღალატს“. ამ ბანერებზე განთავსებული მასალა მიმართულია რამდენიმე პოლიტიკური ძალის მხარდაჭერისგან თავის შეკავებისკენ. სახელმწიფო აუდიტის სამსახურმა დაიწყო ადმინისტრაციული წარმოება ზემოაღნიშნული ბანერების განთავსების მიზნით გაწეული ხარჯის კანონიერების დასადგენად“. მმართველ პარტიაში აცხადებენ, რომ ბანერები კერძო პირების ინიციატივაა. ამავე თემაზე NCDC „ალმას“ 2021 წლის 7 მაისს გაფორმებულ ხელშეკრულებაზე მიუთითებს
კელი დეგნანი: თითოეული არჩევნები წინაზე უკეთესი უნდა იყოს, სწორედ ეს იქნება დემოკრატიული განვითარების მიმართ ქვეყნის ერთგულების ნიშანი
„თითოეულმა არჩევნებმა უნდა აჩვენოს გაუმჯობესება - ის რომ, უკეთესია წინაზე, სწორედ ეს იქნება ნიშანი ქვეყნის ერთგულებისა დემოკრატიული განვითარების მიმართ“, - განაცხადა ამერიკის ელჩმა კელი დეგნანმა ჟურნალისტებთან სოფელ ყარაფილაში, სადაც სატურალური სასმელის, „კომბუჩას“ საწარმო გაიხსნა. ამერიკის ელჩის განცხადებით, საქართველო არის ეუთოს წევრი და ეს ორგანიზაცია დიდი პატივისცემით და ავტორიტეტით სარგებლობს მთელ მსოფლიოში, მის დამკვირვებლებს გავლილი აქვთ პროფესიული ტრენინგი და შესაბამისად, მათი დასკვნები და მოხსენებები დეტალურ ანალიზს ეფუძნება. „ვერ ვხედავ, რატომ არ უნდა იყოს მათი კვლევების მიმართ ნდობა, რადგან წარსულში ეს ყოველთვის იყო“, - დაამატა კელი დეგნანმა. კელი დეგნანის შეფასებით, გამოკითხვები ადასტურებს, რომ ამ არჩევნებზე ამომრჩეველთა დიდი აქტივობა იქნება და ეს კარგია. „იმედი მაქვს, იქნება მშვიდობიანი და წყნარი საარჩევნო გარემო იმისთვის, რომ ადამიანებს მიეცეთ საშუალება, მივიდნენ საარჩევნო უბნებზე და გამოხატონ თავისი ნება. ჩვენ გამოვთქვით შეშფოთება დაშინების, შევიწროების იმ ფაქტებთან დაკავშირებით, რაზეც იყო ცნობები. წინასაარჩევნო კამპანიის პერიოდში, და ზოგადად, ასეთი ფაქტების ადგილი არ არის. ასეთი ფაქტები და ასევე, სიძულვილის ენა კიდევ უფრო ხელს უწყობს საზოგადოების ერთმანეთთან დაშორებას, რომელიც ისედაც პოლარიზებულია. ასევე მიუღებელია თავდასხმები მედიის, სამოქალაქო საზოგადოების წინააღმდეგ, ჟურნალისტებმა უნდა შეძლონ საკუთარი საქმიანობის მშვიდ გარემოში განხორციელება, მოქალაქეების ინფორმირება იმისთვის, რომ მოქალაქეებს ინფორმირებული არჩევანის გაკეთება შეეძლოთ. შესაბამისად, ეს არის ძალიან მნიშვნელოვანი ნაწილი ქვეყნის დემოკრატიული განვითარებისათვის. თითოეულმა არჩევნებმა უნდა აჩვენოს გაუმჯობესება - ის რომ, უკეთესია წინაზე, სწორედ ეს იქნება ნიშანი ქვეყნის ერთგულებისა დემოკრატიული განვითარების მიმართ და იმედი მაქვს, ამ არჩევნებზე ასე იქნება. საელჩოს მხრიდან, ჩვენ გვეყოლება დაახლოებით 100 დამკვირვებელი, ეს იქნება არაფორმალური ჯგუფი, თუმცა ამ არჩევნებზე დააკვირდება ბევრი საერთაშორისო და ადგილობრივი დამკვირვებელი. ეს კიდევ ერთხელ მიუთითებს იმაზე, თუ რამდენად მნიშვნელოვანია ეს არჩევნები საქართველოს საერთაშორისო პარტნიორებისა და მეგობრებისთვის. შესაბამისად, ყურადღება ამ პროცესების მიმართ ძალიან დიდი იქნება და ეს არ შეეხება მხოლოდ არჩევნების დღეს - ეს შეეხება როგორც წინასაარჩევნო კამპანიას, ასევე არჩევნების დღეს და შემდგომში განვითარებულ მოვლენებს. ამ პროცესებს ყველა ყურადღებით დააკვირდება და შესაბამისად, ჩვენ მოვუწოდებთ მშვიდი გარემოსკენ არჩევნების დროს, რათა მოსახლეობამ თავისი არჩევანის დაფიქსირება შეძლოს“, - აღნიშნა ამერიკის ელჩმა. კელი დეგნანს ასევე ჰკითხეს, საარჩევნო პერიოდში მმართველი გუნდის სტრატეგიაზე და ამ კუთხით სიძულვილის ენის გამოყენებაზე, ამერიკის ელჩის თქმით, საქართველოს მთავარი სტრატეგია უნდა იყოს ისეთ საკითხებზე მუშაობა, როგორიც არის უმუშევრობა, ინფლაცია, ეკონომიკური განვითარება და ეს უნდა იყოს ის საკითხები, რომლებზეც პოლიტიკური აქტორები უნდა მუშაობდნენ. შეგახსენებთ, ოპოზიციის დიდი ნაწილი 2 ოქტომბრის ადგილობრივ არჩევნებს რეფერენდუმად განიხილავს და დარწმუნებულია, რომ ადგილობრივ არჩევნებში დამარცხების შემდეგ, მმართველ ძალას ვადამდელი არჩევნების დანიშვნა მოუწევს. „ჩვენ ვაპირებთ გამარჯვებას, ბრძოლას თითოეული ამომრჩევლის ხმის დასაცავად და შემდეგ კოალიციური მმართველობისთვის მზადებას“, - აღნიშნა „ნაციონული მოძრაობის“ თავმჯდომარე ნიკა მელიამ 29 სექტემბერს, კოლეგებთან ერთად გამართულ პრესკონფერენციაზე. თავის მხრივ, „ქართული ოცნება“ გამარჯვებაში დარწმუნებულია და აცხადებს, რომ ვადამდელ არჩევნებს არ განიხილავს, საქართველოში ექსპრეზიდენტ მიხეილ სააკაშვილის ჩამოსვლის შემთხვევაში კი, მის დაკავებას აანონსებს. ექსპრეზიდენტმა გამოაქვეყნა ავიარეისის ბილეთი, რომელშიც ჩამოსვლის დროდ არჩევნების დღე, ორი ოქტომბერი და 23:05 საათია მითითებული. ამავე თემაზე: კელი დეგნანი ექსპრეზიდენტის გეგმებზე: მნიშვნელოვანია სტაბილურობა და შესაბამისად, ყველამ ამას უნდა შევუწყოთ ხელი
კელი დეგნანი ექსპრეზიდენტის გეგმებზე: მნიშვნელოვანია სტაბილურობა და შესაბამისად, ყველამ ამას უნდა შევუწყოთ ხელი
„ყველანი ვთანხმდებთ, რომ ძალიან მნიშვნელოვანია და საჭიროა მშვიდი გარემო, პოლიტიკური დაპირისპირების და დაძაბულობის ადგილი არ არის“, - ამის შესახებ ამერიკის ელჩმა კელი დეგნანმა ექსპრეზიდენტ მიხეილ სააკაშვილის ჩამოსვლის საკითხზე დასმული შეკითხვის საპასუხოდ განაცხადა. „ვერ გამოვთქვამ სპეკულაციებს, რა შეიძლება გააკეთოს ან არ გააკეთოს მიხეილ სააკაშვილმა, ძალიან ბევრი კომენტარი გაკეთდა, მათ შორის მიხეილ სააკაშვილის მხრიდანაც, თუმცა ჩვენ ყველანი ვთანხმდებთ, რომ ძალიან მნიშვნელოვანი და საჭიროა მშვიდი გარემო, პოლიტიკური დაპირისპირების და დაძაბულობის ადგილი არ არის. მნიშვნელოვანია სტაბილურობა და შესაბამისად, ყველამ ამას უნდა შევუწყოთ ხელი და იმედია, ასეც იქნება ხვალ და არჩევნების შემდეგაც“, - განუცხადა ელჩმა ჟურნალისტებს. ამერიკი ელჩი სოფელ ყარაფილაში იყო, სადაც სატურალური სასმელის, „კომბუჩას“ საწარმო გაიხსნა. შეგახსენებთ, ექსპრეზიდენტმა გამოაქვეყნა ავიარეისის ბილეთი, რომელშიც ჩამოსვლის დროდ არჩევნების დღე, ორი ოქტომბერი და 23:05 საათია მითითებული. ოპოზიციის დიდი ნაწილი 2 ოქტომბრის ადგილობრივ არჩევნებს რეფერენდუმად განიხილავს და დარწმუნებულია, რომ ადგილობრივ არჩევნებში დამარცხების შემდეგ, მმართველ ძალას ვადამდელი არჩევნების დანიშვნა მოუწევს. „ჩვენ ვაპირებთ გამარჯვებას, ბრძოლას თითოეული ამომრჩევლის ხმის დასაცავად და შემდეგ კოალიციური მმართველობისთვის მზადებას“, - აღნიშნა „ნაციონალური მოძრაობის“ თავმჯდომარე ნიკა მელიამ 29 სექტემბერს, კოლეგებთან ერთად გამართულ პრესკონფერენციაზე. თავის მხრივ, „ქართული ოცნება“ გამარჯვებაში დარწმუნებულია და აცხადებს, რომ ვადამდელ არჩევნებს არ განიხილავს, საქართველოში ექსპრეზიდენტ მიხეილ სააკაშვილის ჩამოსვლის შემთხვევაში კი, მის დაკავებას აანონსებს.
ირაკლი ღარიბაშვილი: მინუმუმ 100 000 ჩვენი მხარდამჭერის მშვიდობიანი დემონსტრაცია შეგვიძლია, ნებისმიერ დროს ჩავატაროთ
პრემიერ-მინისტრმა ჟურნალისტების შეკითხვის საპასუხოდ კიდევ ერთხელ განაცხადა, რომ სახელმწიფოს აქვს სრული მზაობა, დაიცვას წესრიგი და ექსპრეზიდენტს ჩამოსვლისთანავე დააკავებენ. მას ჰკითხეს „ოპოზიციიონერ თაკო ჩარკვიანის გეგმებს, რომელიც მხარდამჭერების მობილიზებით აპირებს, უზრუნველყოს ექსპრეზიდენტისთვის დახვედრა და ის უსაფრთხოების უზრუნველყოფას ითხოვს“. პრემიერს ასევე დაუსვეს შეკითხვა, ნიშნავდა თუ არა მისი განცხადება „ქართული ოცნების“ მხარდამჭერთა მობილიზაციაზე, სამოქალაქო დაპირისპირების დაანონსებას. პრემიერმა ჟურნალისტებს განუცხადა და აღნიშნა, რომ სამოქალაქო დაპირისპირება ოპოზიციამ დააანონსა, როდესაც თქვა, რომ ხელს შეუშლის მიხეილ სააკაშვილის დაკავებას და არა მან. ირაკლი ღარიბაშვილის თქმით, ოპოზიციას 5 ათასი მხარდამჭერის მობილიზებაც კი არ შეუძლია. „ჩვენი მხარდამჭერების მობილიზება ერთ საათში შეგვიძლია და მინუმუმ 100 000 ჩვენი მხარდამჭერის მშვიდობიანი დემონსტრაცია შეგვიძლია, ნებისმიერ დროს ჩავატაროთ. სააკაშვილს არ სჭირდება 1000 კაცი, მას სჭირედება 10 გამოცდილი პოლიციელი, რომელიც მას დააკავებს“, - განაცხადა ირაკლი ღარიბაშვილმა. შეგახსენებთ, ოპოზიციის დიდი ნაწილი 2 ოქტომბრის ადგილობრივ არჩევნებს რეფერენდუმად განიხილავს და დარწმუნებულია, რომ ადგილობრივ არჩევნებში დამარცხების შემდეგ, მმართველ ძალას ვადამდელი არჩევნების დანიშვნა მოუწევს. „ჩვენ ვაპირებთ გამარჯვებას, ბრძოლას თითოეული ამომრჩევლის ხმის დასაცავად და შემდეგ კოალიციური მმართველობისთვის მზადებას“, - აღნიშნა „ნაციონალური მოძრაობის“ თავმჯდომარე ნიკა მელიამ 29 სექტემბერს, კოლეგებთან ერთად გამართულ პრესკონფერენციაზე. თავის მხრივ, „ქართული ოცნება“ გამარჯვებაში დარწმუნებულია და აცხადებს, რომ ვადამდელ არჩევნებს არ განიხილავს, საქართველოში ექსპრეზიდენტ მიხეილ სააკაშვილის ჩამოსვლის შემთხვევაში კი, მის დაკავებას აანონსებს. ექსპრეზიდენტმა გამოაქვეყნა ავიარეისის ბილეთი, რომელშიც ჩამოსვლის დროდ არჩევნების დღე, ორი ოქტომბერი და 23:05 საათია მითითებული.
ევროპარლამენტის დამკვირვებლები თბილისში არიან
ევროპარლამენტიდან სადამკვირვებლო მისია საქართველოს ეწვია. დამკვირვებლების ვიზიტი 3 ოქტომბრამდე გაგრძელდება. ევროპარლამენტის დელეგაცია შვიდი ევროპარლამენტარისგან შედგება: მიჰაილ გალარი (EPP, გერმანია) დელეგაციის თავმჯდომარე, მირიამ ლექსმანი (EPP, სლოვაკეთი), მარინა კალიურანდი (S&D, ესტონეთი), კატალინ ჩე (Renew, უნგრეთი), მარკეტა გრეგოროვა (Greens/EFA, ჩეხეთი), ჯორდი სოლე (Greens/EFA, ესპანეთი), ანა ფოტიგა (ECR, პოლონეთი). ევროპარლამენტარები ოფიციალური პროგრამის ფარგლებში, შეხვდებიან ევროკავშირის ელჩს, ეუთოს წამყვან ჯგუფს, ცენტრალურ საარჩევნო კომისიას, პოლიტიკური პარტიების, წამყვანი არასამთავრობო ორგანიზაციებისა და მედიის წარმომადგენლებს. დელეგაცია ასევე შეხვდება საქართველოს პრეზიდენტსა და პრემიერ მინისტრს. შეგახსენებთ, ოპოზიციის დიდი ნაწილი 2 ოქტომბრის ადგილობრივ არჩევნებს რეფერენდუმად განიხილავს და დარწმუნებულია, რომ ადგილობრივ არჩევნებში დამარცხების შემდეგ, მმართველ ძალას ვადამდელი არჩევნების დანიშვნა მოუწევს. „ჩვენ ვაპირებთ გამარჯვებას, ბრძოლას თითოეული ამომრჩევლის ხმის დასაცავად და შემდეგ კოალიციური მმართველობისთვის მზადებას“, - აღნიშნა „ნაციონული მოძრაობის“ თავმჯდომარე ნიკა მელიამ 29 სექტემბერს, კოლეგებთან ერთად გამართულ პრესკონფერენციაზე. თავის მხრივ, „ქართული ოცნება“ გამარჯვებაში დარწმუნებულია და აცხადებს, რომ ვადამდელ არჩევნებს არ განიხილავს, საქართველოში ექსპრეზიდენტ მიხეილ სააკაშვილის ჩამოსვლის შემთხვევაში კი, მის დაკავებას აანონსებს. ამავე თემაზე: რა მოლოდინები აქვთ ევროპარლამენტარებს 2 ოქტომბრის არჩევნებიდან - Europetime-ის ექსკლუზიური ინტერვიუები ევროდეპუტატებთან ექსკლუზივი: ევროპარლამენტიდან თვითმმართველობის არჩევნებზე დამკვირვებელთა დელეგაცია საქართველოს 30 სექტემბერს ეწვევა
ანგელა მერკელმა ოლაფ შოლცს არჩევნებში გამარჯვება მიულოცა
გერმანიის კანცლერმა ანგელა მერკელმა „სოციალ-დემოკრატ“ ოლაფ შოლცს საპარლამენტო არჩევნებში წარმატება მიულოცა. - ინფორმაციას გამოცემა DW კანცლერის ოფისის პრესსამსახურზე დაყრდნობით ავრცელებს. ”კანცლერი და მინისტრები ასრულებენ თავიანთ საქმეს, ვიდრე ახალი ფედერალური მთავრობა არ შეუდგება მოვალეობის შესრულებას. კანცლერი განაგრძობს საგარეო კავშირების გაღრმავებას, მათ შორის საზღვარგარეთ ვიზიტებითა და სხვა ქვეყნების სახელმწიფოთა და მთავრობათა მეთაურებთან შეხვედრებითა და მოლაპარაკებებით“, - იტყობინება ანგელა მერკელის პრესსამსახური. მედია წერს, რომ „ქრისტიან-დემოკრატიული კავშირის" და „ქრისტიან-სოციალური კავშირის“ ბლოკის კანცლერობის კანდიდატმა არმინ ლაშეტმა ოლაფ შოლცს მისალოცი წერლი გაუგზავნა. გერმანიაში, „სოციალ-დემოკრატები“ სამთავრობო კოალიციის შექმნაზე მოლაპარაკებების დაწყებას მიმდინარე კვირას გეგმავენ. Reuters-ის ცნობით, „სოციალ-დემოკრატები“ სამთავრობო კოალიციის შექმნას „მწვანეებთან“ და „თავისუფალ დემოკრატებთან“ ერთად იმედოვნებენ. „მწვანეები“ და „თავისუფალი დემოკრატები“, რომლებსაც ბევრ საკითხზე განსხვავებული პოზიცია აქვთ, აცხადებენ, რომ ჯერ ერთმანეთთან გამართავენ მოლაპარაკებებს. „ოპტიმისტურად ვარ განწყობილი. ჩვენ შევძლებთ კოალიციის შექმნას პრაგმატიზმით და თანამშრომლობის მზადყოფნით“, - განაცხადა „სოციალ-დემოკრატების“ კანცლერობის კანდიდატმა, ოლაფ შოლცმა. გერმანიაში გამართულ საპარლამენტო არჩევნებში მცირე უპირატესობით, „სოციალ-დემოკრატიულმა პარტიამ“ გაიმარჯვა. „სოციალ-დემოკრატებმა“ ხმების 25,7% მოიპოვეს. 24,1%-ით მეორე ადგილზეა მემარჯვენე-ცენტრისტული „ქრისტიან-დემოკრატიული კავშირისა“ და „ქრისტიან-სოციალური კავშირის“ ბლოკი, „მწვანეებმა“ ხმების 14,8% მიიღეს, „თავისუფალმა დემოკრატიულმა პარტიამ“ - 11,5% მოიპოვა, ულტრა-მემარჯვენე პარტიამ „ალტერნატივა გერმანიისთვის“ კი - 10.3%.
საფრანგეთი საქართველოს ხელისუფლებას მოუწოდებს, ყველაფერი გააკეთოს იმისთვის, რომ მუნიციპალური არჩევნები ევროკავშირის სტანდარტებს შეესაბამებოდეს
საფრანგეთი მოუწოდებს საქართველოს ხელისუფლებას, ყველაფერი გააკეთოს იმისთვის, რომ მუნიციპალური არჩევნები ევროკავშირის სტანდარტებს შეესაბამებოდეს. ამის შესახებ საუბარია კომუნიკეში, რომელიც ტრიუმფალურ თაღთან, საფრანგეთის რესპუბლიკის პრეზიდენტისა და საქართველოს პრეზიდენტის, სალომე ზურაბიშვილის შეხვედრის შესახებ, საფრანგეთის რესპუბლიკის პრეზიდენტის ოფიციალურ ვებგვერდზე გამოქვეყნდა. ემანუელ მაკრონმა სალომე ზურაბიშვილთან ერთად უხელმძღვანელა 1921 წლის იანვარში საფრანგეთის მიერ საქართველოს ცნობის ას წლისთავთან დაკავშირებულ ცერემონიას. „ეს საგანგებო ცერემონია ხაზს უსვამს ორ ქვეყანას შორის ურთიერთობის მნიშვნელობასა და საფრანგეთის მიერ გასულ საუკუნეში შესრულებულ განსაკუთრებულ როლს საქართველოს თავისუფლების, ტერიტორიული სუვერენიტეტისა და დამოუკიდებლობის დაცვაში. ეს საერთო ისტორია და ფრანგ და ქართველ ხალხს შორის დამყარებული მჭიდრო კავშირები საფუძვლად უდევს განსაკუთრებულ ურთიერთობას, რომელიც ჩვენ ორ ქვეყანას თავისუფლების იდეის გარშემო აერთიანებს. მისი განსახიერება არის ვიცე-პოლკოვნიკ ამილახვარის სამსახური და თავგანწირვა თავისუფალი საფრანგეთისთვის 1942 წელს, ელ ალამეინში, ვიცე-პოლკოვნიკისა, რომელიც ცნობილია ამ სიტყვებით: „ჩვენ, უცხოელები, მხოლოდ ერთი ფორმით თუ დავუმტკიცებთ საფრანგეთს მადლიერებას ჩვენი მიღებისთვის, ეს არის მისთვის სიკვდილი“. საფრანგეთი, რომელიც საქართველოს გვერდით იდგა მისი ისტორიის ყველაზე რთულ მომენტებში, გააგრძელებს მის მხარდაჭერას სტაბილურობის შენარჩუნებასა და დემოკრატიის განმტკიცებაში. ის ადასტურებს თავის ერთგულებას საქართველოში ფუნდამენტური უფლებების მუდამ უფრო ღრმა დამკვიდრების, სახელდობრ პრესის თევისუფლების, და დემოკრატიული და სასამართლო ინსტიტუტების გაძლიერების მიმართ, უმაღლესი ევროპული სტანდარტების შესაბამისად. საფრანგეთი მოუწოდებს საქართველოს ხელისუფლებას, ყველაფერი გააკეთოს იმისთვის, რომ მომავალი მუნიციპალური არჩევნები შეესაბამებოდეს ევროკავშირის დემოკრატიულ ღირებულბებს, ნორმებსა და სტანდარტებს. ის განსაკუთრებული ყურადღებით იქნება დამოუკიდებელი საქართველოს დემოკრატიული ინსტიტუტების დესტაბილიზაციის ნებისმიერი მცდელობის მიმართ, რომელიც ქართველი ხალხის მისწრაფების და ევროკავშირის ინტერესების საწინააღმდეგო იქნებოდა. საფრანგეთის რესპუბლიკის პრეზიდენტი მჭიდრო კონტაქტზე დარჩება საქართველოს პრეზიდენთან, რათა გააგრძელოს მუშაობა ორ ქვეყანას შორის კავშირების გაძლიერების სასარგებლოდ“, - ნათქვამია კომუნიკეში.
კორონავირუსი 1743 ადამიანს დაუდასტურდა, 29 კოვიდინფიცირებული გარდაიცვალა
ბოლო 24 საათის განმავლობაში, საქართველოში კორონავირუსი კიდევ 1743 ადამიანს დაუდასტურდა, გამოჯანმრთელდა 2266 პაციენტი, 29 კოვიდინფიცირებული კი გარდაიცვალა. ამის შესახებ ინფორმაციას დაავდებათა კონტროლის ეროვნული ცენტრი ავრცელებს. ბოლო 24 საათში ქვეყნის მასშტაბით ჩატარდა 36 047 კვლევა ტესტით, მათ შორის 20 685 კვლევა ანტიგენის ტესტით და 15 362 PCR ტესტით. დღემდე გამოვლენილი დადასტურებული შემთხვევების საერთო რაოდენობა შეადგენს 613 012-ს. ჯამში გამოჯანმრთელებულთა რაოდენობა 585 071-მდე გაიზარდა. პანდემიის გავრცელებიდან დღემდე ვირუსს ჯამში 8 946 ადამიანა ემსხვერპლა. დადებითობის დღიური მაჩვენებელი არის 4.84%, ბოლო 14 დღის განმავლობაში - 6.04%, ხოლო 7 დღის განმავლობაში - 5.65%. თბილისში დაინფიცირდა - 571, აჭარა - 85, იმერეთი - 315, ქვემო ქართლი - 94, შიდა ქართლი - 79, გურია - 47, სამეგრელო - ზემო სვანეთი - 189, კახეთი - 262, მცხეთა-მთიანეთი - 54, სამცხე-ჯავახეთი - 35, რაჭა-ლეჩხუმი და ქვემო სვანეთი - 12. ამ დროისთვის სულ 18 969 კოვიდინფიცირებულია, 4 223 ადამიანი მკურნალობს საავადმყოფოში, მათ შორის, თბილისის საავადმყოფოებში - 1 513, აჭარაში - 400, იმერეთში - 896. 1 045 მძიმე პაციენტია, მათ შორის, თბილისში - 370, აჭარაში - 124, იმერეთში - 296. ხელოვნური სუნთქვის აპარატზეა - 260, მათგან თბილისში - 152, აჭარაში - 22, იმერეთში - 27. 734 ადამიანი მოთავსებულია კლინიკურ-სასტუმროებში, მათ შორის 383 - თბილისში, 195 - აჭარაში. 14 012 ბინაზე მკურნალობს. საკარანტინე სივრცეებში მოთავსებულია 52 ადამიანი, მათ შორის, თბილისში - 43, ხოლო აჭარაში - 9. სულ 6 ოქტომბრიდან - 29 სექტემბრის პერიოდში, სახელმწიფო საზღვრიდან საკარანტინე სივრცეებში გადაყვანილია - 25 192 ადამიანი. თვითიზოლაციაშია - 15 583.
ირაკლი კობახიძე: კანონი რომ გვაძლევდეს საშუალებას, სააკაშვილის არდაკავება შეიძლება, უკეთესიც ყოფილიყო ჩვენთვის
„ქართული ოცნებისთვის“ მიხეილ სააკაშვილის არდაკავება უკეთესიც იქნებოდა, თუმცა, კანონი ამის საშუალებას არ იძლევა - „ქართული ოცნების" თავმჯდომარე ირაკლი კობახიძემ საქართველოს ექსპრეზიდენტის, მიხეილ სააკაშვილის ჩამოსვლის საკითხზე დაკავშირებით ისაუბრა, „ჩვენთვის ამას არსებითი მნიშვნელობა არ აქვს. ჩვენი მოლოდინი არ არის „ოპტიმისტური", რადგან 17-ჯერ რომ მოიტყუება კაცი და იმავე ტყუილს იმეორებს მეთვრამეტედ, იქ მოლოდინი როგორიც შეიძლება იყოს, თავად შეგიძლიათ, განსაჯოთ. 17-ჯერ დაპირდა საკუთარ მხარდამჭერებს ჩამოსვლას და 17-ჯერ გადააგდო ეს ხალხი და მეთვრამეტედაც არ გაუჭირდება, ამის დიდოსტატია. ჩამოვა, მოხვდება იქ, სადაც უნდა მოხვდეს, ანუ დააპატიმრებენ მყისიერად, ეს არის ძალიან მარტივი სცენარი. ჩამოვა თუ არ ჩამოვა, ორივე შემთხვევაში, წაგებული რჩება „ნაციონალური მოძრაობა," თუმცა, ქვეყანა დაისვენებს, როდესაც ის მოხვდება იმ დაწესებულებაში, სადაც ეკუთვნის მოხვედრა. კანონი რომ გვაძლევდეს მისი არ დაკავების საშუალებას, ეს შეიძლება, უკეთესიც კი ყოფილიყო ჩვენთვის - წარმოიდგინეთ ქუჩაში გაშვებული მიხეილ სააკაშვილი, აბსოლუტური კლოუნი. საბოლოო ჯამში, ის მხარს უჭერს ჩვენს საარჩევნო შანსებს, თავისი ქმედებებით, რადგან ვიცით, რომ საზოგადოებაში არის სერიოზული შიში „ნაცმოძრაობის“ დაბრუნებასთან დაკავშირებით და ნებისმიერი ასეთი აქტი ამ შიშებს ამძაფრებს“, - განაცხადა ირაკლი კობახიძემ. ექსპრეზიდენტმა მიხეილ სააკაშვილმა გამოაქვეყნა ავიარეისის ბილეთი, რომელშიც ჩამოსვლის დროდ არჩევნების დღე, ორი ოქტომბერი და 23:05 საათია მითითებული. მმართველი გუნდი აცხადებს, რომ სააკაშვილს ჩამოსვლისთანავე დააკავებენ.
საქართველოში მიწისძვრა მოხდა
დღეს, 02:44 საათზე, საქართველოში მიწისძვრა მოხდა. ეპიცენტრი დმანისთან, სოფელ ფოკასთან იყო. მისი სიმძლავრე 3.4 (ML) მაგნიტუდას შეადგენდა.
EU-მ და WHO-მ საქართველოს მასობრივი ვაქცინაციის პროცესის მხარდასაჭერად 300 მაცივარი გადასცეს
ევროკავშირმა და ჯანმრთელობის მსოფლიო ორგანიზაციამ საქართველოს მასობრივი ვაქცინაციის პროცესის მხარდასაჭერად 300 მაცივარი გადასცეს. ინფორმაციას ჯანმოს საქართველოს ოფისი ავრცელებს. ევროკავშირმა და ჯანმრთელობის მსოფლიო ორგანიზაციამ საქართველოს 300 სამედიცინო მაცივარი და სპეციალიზებული ვაქცინაციის ავტომობილი გადასცეს. ეს მხოლოდ მცირედი ჩამონათვალია იმ დახმარებისა, რომელსაც ევროკავშირი უწევს საქართველოს COVID19-ის პანდემიასთან გასამკლავლებლად და მასობრივი ვაქცინაციის მხარდასაჭერად, მათ შორის ყველაზე დაუცველ ჯგუფებს შორის. „აღჭურვილობასთან, მედიკამენტებთან, ტესტებთან და სხვა მოწყობილებებთან ერთად ეს 300 მაცივარი არის კიდევ ერთი დასტური ევროკავშირის ძალისხმევისა, რათა დაეხმაროს საქართველოს წარმატებით გაუმკლავდეს COVID19-ის პანდემიას. WHO–სთან ერთად, ჩვენ ვდგავართ ქართველ ხალხთან და ვართ საქართველოს ჯანდაცვის სისტემის გაძლიერების მომხრენი“, - განაცხადა კატალინ გერმანმა. „კორონავირუსთან ბრძოლის პროცესში ევროკავშირი და ჯანმრთელობის მსოფლიო ორგანიზაცია ძალიან დიდ დახმარებას გვიწევენ. დღეს მათ გადმოგვცეს სამედიცინო მაცივრები და ვაქცინის გადამზიდავი სპეციალური ტრანსპორტი, რაც ხარისხიანი ვაქცინის უსაფრთხოდ მოწოდების პროცესს გაამარტივებს. ვაქცინაციის პროგრამის დაგეგმვის, ასევე განხორციელების პროცესში ევროკავშირი და ჯანმო სამინისტროს ერთგული პარტნიორია. ამისათვის, კიდევ ერთხელ, მინდა დიდი მადლობა ვუთხრა მათ“, - აღნიშნა საქართველოს ჯანდაცვის მინისტრის პირველმა მოადგილემ თამარ გაბუნიამ. „მოწოდებული აღჭურვილობა დაეხმარება საქართველოს მიაღწიოს ჯანმრთელობის მსოფლიო ორგანიზაციის მიერ რეკომენდირებულ და ასევე, ეროვნული გეგმით განსაზღვრულ სამიზნე ნიშნულს. აღნიშნული დახმარება განსაკუთრებით ხელს შეუწყობს ვაქცინაზე ხელმისაწვდომობის ზრდას სოფლად და შორეულ რეგიონებში მცხოვრები პირებისთვის“, - აცხადებს სილვიუ დომენტე, ჯანმრთელობის მსოფლიო ორგანიზაციის საქართველოს ოფისის ხელმძღვანელი. ეს დახმარება ევროკავშირისა და ევროპის გუნდის მიერ გაწეული უფრო ფართო მხარდაჭერის პაკეტის ნაწილია, რომლის მოცულობაც ახალი და გადანაწილებული დახმარების სახით 1.5 მილიარდ ლარს შეადგენს და რომლის მიზანია, საქართველოს პანდემიასთან გამკლავებაში დაეხმაროს. ეს არის მსოფლიო მასშტაბით ერთ სულ მოსახლეზე ევროკავშირის მიერ გაწეული დახმარების ერთ-ერთი ყველაზე მაღალი მაჩვენებელი და ამ უპრეცედენტო კრიზისის პერიოდში საქართველოს მიმართ ევროკავშირის ძლიერ სოლიდარობაზე მიანიშნებს.
ნათია თურნავა: აზერბაიჯანულ მხარეს შავი ზღვის ფსკერზე მაღალი ძაბვის გადამცემი კაბელის პროექტში მონაწილეობა შევთავაზეთ
საქართველომ აზერბაიჯანს შავი ზღვის ფსკერზე მაღალი ძაბვის გადამცემი კაბელის პროექტის განვითარების შესახებ საკუთარი გეგმები გააცნო, რომლის საშუალებითაც ქვეყანა ევროკავშირის ბაზარს მიუერთდება. როგორც ეკონომიკის მინისტრმა ნათია თურნავამ განაცხადა, ქართულმა მხარემ აზერბაიჯანულს ამ პროექტში მონაწილეობა შესთავაზა. „იყო საინტერესო საუბრები ენერგეტიკის სფეროში ჩვენი ურთიერთობების უფრო მეტად გაფართოებაზე. იმიტომ, რომ წლების განმავლობაში აზერბაიჯანი არის ჩვენი ნომერ პირველი მიმწოდებელი როგორც გაზის, ასევე ელექტროენერგიის იმპორტის თვალსაზრისით. ჩვენ გავაცანით ჩვენი გეგმები შავი ზღვის ფსკერზე მაღალი ძაბვის გადამცემი კაბელის პროექტის განვითარების შესახებ, რითაც ჩვენ ევროკავშირის ბაზარს მივუერთდებით და დავპატიჟეთ, რომ ამ პროექტში მონაწილეობა მიიღონ. ისინი დიდი ინტერესით მოეკიდნენ ამას“, - განაცხადა ნათია თურნავამ ბაქოში, საქართველოსა და აზერბაიჯანის მთავრობათაშორისი ეკონომიკური კომისიის სხდომის შემდეგ. „აზერბაიჯანთან ჩვენ გვაკავშირებს არამხოლოდ წმინდა პრაგმატული ეკონომიკური ურთიერთობები, არამედ, მეგობრობა, სტრატეგიული პარტნიორობა წლების განმავლობაში. „კარგია, რომ კომისია ჩატარდა საკმაოდ ხანგრძლივი პერიოდის შემდეგ, ათი წელია, არ ჩატარებულა და ახლა ჩავატარეთ. ეს მოასწავებს იმას, რომ ორივე მხარე მზად არის, ჩვენი ეკონომიკური თანამშრომლობის მეტი ინტენსიფიკაცია მოხდეს. განვიხილეთ, თუ როგორ გავზარდოთ ურთიერთ სავაჭრო ბრუნვა, მათ შორის ქართული ექსპორტი აზერბაიჯანში. ეს შეეხება საცემენტო, ასევე მეტალურგიის პროდუქციას, ასევე სოფლის მეურნეობის და კვების მრეწველობის პროდუქციას. ვსაუბრობდით იმაზე, რომ იყოს თანაბარი, არადისკრიმინაციული მიდგომები და ეს აბსოლუტურად პოზიტიურად არის აღქმული ჩვენი კოლეგების მხრიდან, რადგან, ჩვენ გვაკავშირებს არამხოლოდ წმინდა პრაგმატული ეკონომიკური ურთიერთობები, არამედ, მეგობრობა, სტრატეგიული პარტნიორობა წლების განმავლობაში“, - აღნიშნა ნათია თურნავამ.
პრემიერი: აზერბაიჯანთან ეკონომიკური თანამშრომლობის გარღმავება, ჩვენი სავაჭრო ბრუნვის გაორმაგება და მეტი ინვესტიცია აუცილებელია
„ჩემთვის დიდი პატივია, ვიმყოფებოდე ბაქოში, ჩვენს მეგობარ და მეზობელ სახელმწიფოში - აზერბაიჯანში, რომელიც ჩემთვის ძალიან ძვირფასია; ჩემი ვიზიტი წელს უკვე რიგით მეორეა აზერბაიჯანის რესპუბლიკაში; მინდა, გავიხსენო ჩვენი ნაყოფიერი შეხვედრა ჩემი პირველი ვიზიტის დროს და როგორც მაშინ მოვილაპარაკეთ, ახლა ვატარებთ მთავრობათაშორისი ეკონომიკური კომისიის რიგით მერვე სხდომას, რომელიც ძალიან მნიშვნელოვანია ჩვენი ქვეყნებისთვის, - განაცხადა საქართველოს პრემიერ-მინისტრმა ირაკლი ღარიბაშვილმა საქართველო-აზერბაიჯანის მთავრობათაშორისი ეკონომიკური კომისიის სხდომაზე, რომელიც ბაქოში საქართველოსა და აზერბაიჯანის რესპუბლიკის პრემიერ-მინისტრების თავმჯდომარეობით გაიმართა. ირაკლი ღარიბაშვილის შეფასებით, აზერბაიჯანი საქართველოს არამხოლოდ მეგობარი და მეზობელი სახელმწიფოა, არამედ ერთ-ერთი მთავარი სტრატეგიული პარტნიორია. „რიგი ფაქტორებისა და გარემოებების გამო, ეს კომისია, 10 წელია, არ გამართულა, მაგრამ მიხარია, რომ ჩვენ მოვილაპარაკეთ, ვთქვით და გავაკეთეთ და დღეს უკვე შევიკრიბეთ ამ კომისიის ფარგლებში. აზერბაიჯანი საქართველოს არამხოლოდ მეგობარი და მეზობელი სახელმწიფოა, არამედ ერთ-ერთი მთავარი სტრატეგიული პარტნიორია, ჩვენი ქვეყნის მთავარი სავაჭრო-ეკონომიკური პარტნიორი. რა თქმა უნდა, ჩვენ ძალიან ვაფასებთ ორმხრივ ურთიერთობებს. თანამშრომლობა ვითარდება ვაჭრობის, ეკონომიკის, მიმართულებით. ინვესტიციების კუთხით, აზერბაიჯანი, რამდენიმე წელია, გამოკვეთილი ლიდერია, ჩვენს ქვეყანაში. დღეს მქონდა შესაძლებლობა, შევხვედროდი პრეზიდენტ ილჰამ ალიევს, რომელთანაც ძალიან ნაყოფიერი საუბარი მქონდა. ჩვენ ვისაუბრეთ მათ შორის ეკონომიკური თანამშრომლობის საკითხებზე. ვთქვით, რომ აუცილებელია ამ ურთიერთობების კიდევ უფრო გაღრმავება და განმტკიცება და ჩვენი სავაჭრო ბრუნვის გაორმაგება, კიდევ მეტი ინვესტიცია. ჩვენ გვაქვს ბრწყინვალე თანამშრომლობა არამხოლოდ ვაჭრობისა და ეკონომიკის, არამედ, ყველა მიმართულებით, იქნება ეს ჰუმანიტარული თუ კულტურის მიმართულება. მინდა აღვნიშნო, რომ პანდემიის პერიოდში ჩვენ დიდი დახმარება მივიღეთ აზერბაიჯანისგან, ჩვენი მეგობრებისგან, ჩვენი ძმებისგან. მინდა, ამისთვის საჯაროდ გადაგიხადოთ მადლობა. ჩვენ ბოლო წლებში ვაჩვენეთ დიდი პროგრესი ყველა მიმართულებით, მაგრამ მჯერა, რომ პოტენციალი გაცილებით დიდია და აუცილებელია ამ პოტენციალის სრულად ათვისება. დღევანდელი შეხვედრა იძლევა კარგ შესაძლებლობას, რომ კიდევ ერთხელ განვიხილოთ ყველა მიმდინარე საკითხი და დავსახოთ სამომავლო გეგმები“, - განაცხადა ირაკლი ღარიბაშვილმა. აზერბაიჯანის რესპუბლიკის პრემიერ-მინისტრმა თავის მხრივ აღნიშნა, რომ საქართველოს პრემიერის მეორე ვიზიტი აზერბაიჯანში, საქართველოსა და აზერბაიჯანს შორის არსებული ურთიერთობების მაღალი დონის მაჩვენებელია. „მომავალ წელს აზერბაიჯანსა და საქართველოს შორის დიპლომატიური ურთიერთობების 30 წელი სრულდება. დამოუკიდებლობის პერიოდში, ურთიერთნდობასა და მხარდაჭერაზე დაფუძნებული ჩვენი ურთიერთობები წარმატებით ვითარდება და მიაღწია სტრატეგიული პარტნიორობის დონეს. ჩვენს ქვეყნებს შორის არსებობს აქტიური პოლიტიკური დიალოგი. აზერბაიჯანი და საქართველო საერთაშორისო ორგანიზაციებში ყოველთვის უჭერენ ერთმანეთს მხარს. რთულ პერიოდში, ჩვენ ყოველთვის ერთმანეთის გვერდში ვიდექით და თანადგომას ვუწევდით ერთმანეთს. განსაკუთრებით მინდა აღვნიშნო, რომ საქართველოში მცხოვრები აზერბაიჯანელები და აზერბაიჯანში მცხოვრები ქართველები მნიშვნელოვან როლს თამაშობდნენ ჩვენი ურთიერთობების განვითარებაში. ბატონო პრემიერ-მინისტრო, ამ საკითხში თქვენს პოზიციასა და ყურადღებას მაღალ შეფასებას ვაძლევთ. აზერბაიჯანი დიდ მნიშვნელობას ანიჭებს საქართველოსთან თანამშრომლობის განვითარებასა და გაძლიერებას. ჩვენი ურთიერთობები ყველა სფეროში მაღალ დონეზეა, განსაკუთრებით სავაჭრო-ეკონომიკურ, ენერგეტიკის, ტრანსპორტის, ტრანზიტის, ინვესტიციებისა და ჰუმანიტარულ სფეროებში. ჩვენს მიერ ერთობლივად განხორციელებული ფართომასშტაბიანი, ენერგეტიკული და სატრანსპორტო პროექტები ზრდის ჩვენს ეკონომიკურ შესაძლებლობებს. ჩვენი ქვეყნები მნიშვნელოვან როლს თამაშობენ რეგიონის განვითარებაში და ევროპის ენერგეტიკული უსაფრთხოების უზრუნველყოფაში. ამავე დროს, ჩვენი თანამშრომლობის კიდევ უფრო განვითარებისთვის კარგი შესაძლებლობები გაგვაჩნია ციფრული ეკონომიკის, სოფლის მეურნეობის, საინფორმაციო-საკომუნიკაციო ტექნოლოგიების, ჯანდაცვის და სხვა სფეროებში. ამ შესაძლებლობების რეალიზებისთვის, ერთობლივი მთავრობათაშორისი კომისიის მორიგი სხდომის ჩატარება აუცილებელი იყო. სხვადასხვა მიზეზის გამო, გარკვეული პერიოდის განმავლობაში ამ კომისიის სხდომა არ ჩატარებულა. თქვენი ბოლო ვიზიტის დროს, თქვენთან შეხვედრისას ჩვენ ამას განსაკუთრებით ხაზი გავუსვით და სამუშაოების დაჩქარებისთვის შესაბამის სახელმწიფო უწყებებს დავალებები მივეცით. კომისია ორმხრივი ეკონომიკური ურთიერთობების განვითარებისთვის მნიშვნელოვანი პლატფორმაა. მოხარული ვარ, რომ დღეს ამ კომისიის სხდომას ვატარებთ. ბატონო პრემიერ-მინისტრო, დარწმუნებული ვარ, რომ ჩვენი საუბრები, მიღებული გადაწყვეტილებები და ხელმოწერილი დოკუმენტები ხელს შეუწყობს ჩვენს ქვეყნებს შორის ურთიერთობების გაფართოებას. დარწმუნებული ვარ, რომ თქვენი ვიზიტი წარმატებული იქნება და მნიშვნელოვან წვლილს შეიტანს აზერბაიჯანისა და საქართველოს ურთიერთობების განვითარებაში“, - განაცხადა ალი ასადოვმა.
საქართველომ და აზერბაიჯანმა სხვადასხვა სფეროში თანამშრომლობის შესახებ მემორანდუმები გააფორმეს
საქართველო-აზერბაიჯანის მთავრობათაშორისი ეკონომიკური კომისიის სხდომის შემდეგ, რომელიც ბაქოში ორი ქვეყნის პრემიერ-მინისტრების თავმჯდომარეობით გაიმართა, ირაკლი ღარიბაშვილმა და ალი ასადოვმა ხელი მოაწერეს კომისიის მე-8 სხდომის ოქმს. თანამშრომლობის შესახებ მემორანდუმები გაფორმდა ორი ქვეყნის შესაბამის უწყებებს შორის. ხელი მოეწერა საქართველოს კულტურის, სპორტისა და ახალგაზრდობის სამინისტროსა და აზერბაიჯანის რესპუბლიკის კულტურის სამინისტროს შორის 2021-2024 წლებისთვის კულტურის სფეროში თანამშრომლობის პროგრამას; შეთანხმებას საქართველოსა და აზერბაიჯანის მთავრობებს შორის სტანდარტიზაციის, მეტროლოგიისა და შესაბამისობის შეფასების სფეროში თანამშრომლობის შესახებ; შეთანხმებას საქართველოსა და აზერბაიჯანის მთავრობებს შორის საქართველოსა და აზერბაიჯანის რესპუბლიკას შორის სახელმწიფო საზღვარზე გამტარი პუნქტების შესახებ; ასევე - ურთიერთგაგების მემორანდუმებს სსიპ „აწარმოე საქართველოში“ და აზერბაიჯანის რესპუბლიკის მცირე და საშუალო ბიზნესის განვითარების სააგენტოს, სსიპ „აწარმოე საქართველოში“ და აზერბაიჯანში ექსპორტისა და ინვესტიციების ხელშეწყობის ფონდს შორის. „აზერბაიჯანთან ჩვენ გვაკავშირებს არამხოლოდ წმინდა პრაგმატული ეკონომიკური ურთიერთობები, არამედ, მეგობრობა, სტრატეგიული პარტნიორობა წლების განმავლობაში“, - განაცხადა საქართველოს ეკონომიკის მინისტრმა ნათია თურნავამ ბაქოში, საქართველოსა და აზერბაიჯანის მთავრობათაშორისი ეკონომიკური კომისიის სხდომის შემდეგ განაცხადა. მისი თქმით, შეხვედრაზე განიხილეს ერთობლივი პროექტების განხორციელების შესაძლებლობები და ქვეყნებს შორის სავაჭრო ბრუნვის გაზრდის საკითხი. „კარგია, რომ კომისია ჩატარდა საკმაოდ ხანგრძლივი პერიოდის შემდეგ, ათი წელია, არ ჩატარებულა და ახლა ჩავატარეთ. ეს მოასწავებს იმას, რომ ორივე მხარე მზად არის, ჩვენი ეკონომიკური თანამშრომლობის მეტი ინტენსიფიკაცია მოხდეს. განვიხილეთ, თუ როგორ გავზარდოთ ურთიერთ სავაჭრო ბრუნვა, მათ შორის ქართული ექსპორტი აზერბაიჯანში. ეს შეეხება საცემენტო, ასევე მეტალურგიის პროდუქციას, ასევე სოფლის მეურნეობის და კვების მრეწველობის პროდუქციას. ვსაუბრობდით იმაზე, რომ იყოს თანაბარი, არადისკრიმინაციული მიდგომები და ეს აბსოლუტურად პოზიტიურად არის აღქმული ჩვენი კოლეგების მხრიდან, რადგან, ჩვენ გვაკავშირებს არამხოლოდ წმინდა პრაგმატული ეკონომიკური ურთიერთობები, არამედ, მეგობრობა, სტრატეგიული პარტნიორობა წლების განმავლობაში. იყო საინტერესო საუბრები ენერგეტიკის სფეროში ჩვენი ურთიერთობების უფრო მეტად გაფართოებაზე. იმიტომ, რომ წლების განმავლობაში აზერბაიჯანი არის ჩვენი ნომერ პირველი მიმწოდებელი როგორც გაზის, ასევე ელექტროენერგიის იმპორტის თვალსაზრისით. ჩვენ გავაცანით ჩვენი გეგმები შავი ზღვის ფსკერზე მაღალი ძაბვის გადამცემი კაბელის პროექტის განვითარების შესახებ, რითაც ჩვენ ევროკავშირის ბაზარს მივუერთდებით და დავპატიჟეთ, რომ ამ პროექტში მონაწილეობა მიიღონ. ისინი დიდი ინტერესით მოეკიდნენ ამას“, - განაცხადა ნათია თურნავამ. ამავე თემაზე: პრემიერი: აზერბაოჯანთან ეკონომიკური თანამშრომლობის გარღმავება, ჩვენი სავაჭრო ბრუნვის გაორმაგება და მეტი ინვესტიცია აუცილებელია
საქართველოს პრემიერმა მის მიერ გაეროში წარდგენილი სამშვიდობო ინიციატივა აზერბაიჯანის პრეზიდენტთან განიხილა
„პრემიერის მიერ გაეროში წარდგენილ სამშვიდობო ინიციატივაზე აზერბაიჯანის ლიდერთან იყო საუბარი ყველა ვთანხმდებით, რომ რეგიონში გრძელვადიან მშვიდობას და სტაბილურობას ალტერნატივა არ აქვს, ამიტომ, ჩვენი ინიციატივა ძალიან მოწონებულია“, - განაცხადა საგარეო საქმეთა მინისტრმა, რომელიც აზერბაიჯანში ვიზიტისას პრემიერს ახლავს თან. როგორც ვიცე-პრემიერმა აღნიშნა, ამ ინიციატივას აქვს მნიშვნელოვანი საერთაშორისო მხარდაჭერა სქართველოს მთავარი სტრატეგიული პარტნიორების, ევროკავშირის და ამერიკის შეერთებული შტატების მხრიდან. „უაღრესად წარმატებული ვიზიტი იყო. ეს ბოლო სამ თვეში მეორე ვიზიტია. პირველი გახლდათ ოფიციალური ვიზიტი, რა დროსაც შეთანხმდა ამ ვიზიტის განხორციელება, რადგანაც საქართველო-აზერბაიჯანს შორის მთავრობათაშორისი ეკონომიკური კომისია უკვე ათი წელია არ ჩატარებულა სხვადასხვა მიზეზის გამო და ზუსტად სამ თვეში მოხერხდა გამართვა და ჩვენ დღეს ჩავატარეთ სრულმასშტაბიანი კომისიის სხდომა, სადაც 6 დოკუმენტი გაფორმდა სხვადასხვა სექტორული თანამშრომლობის კუთხით. მოგეხსენებათ, აზერბაიჯანი არის ჩვენი სტრატეგიული პარტნიორი, ჩვენი ერთ-ერთი მნიშვნელოვანი მეზობელი და აუცილებელია, რომ აზერბაიჯანთან ჩვენ გვქონდეს ძალიან სერიოზული, ღრმა და ყოვლისმომცველი ორმხრივი ურთიერთობები და ეს ურთიერთობები სტრატეგიულ დონეზეა ასული. საუბარი იყო ყველა მნიშვნელოვან ინფრასტრუქტურულ პროექტზე, ასევე ეკონომიკური და სავაჭრო ურთიერთობების გაორმაგების თვალსაზრისით შემდგომ ნაბიჯებზე, ასევე იმაზე, თუ რაოდენ ეფექტური იყო თანამშრომლობა პანდემიის პირობებში. ასევე საუბარი იყო იმაზე, რომ რეგიონში არის ახალი გეოპოლიტიკური გარემო და მოგეხსენებათ, რომ სქართველოს პრემიერ-მინისტრმა სულ ცოტა ხნის წინ გაეროს გენერალური ასამბლეის უმაღლესი ტრიბუნიდან მსოფლიოს წინაშე ახალი ინიციატივა წარადგინა სამხრეთ კავკასიის სამშვიდობო სამეზობლო ინიციატივის სახელით და ამ თემებზე იყო საუბარი აზერბაიჯანის ლიდერთან, ასევე სამთავრობო შემადგენლობის წარმომადგენლებთან და უნდა აღინიშნოს, რომ ყველა ვთანხმდებით, რომ რეგიონში გრძელვადიან მშვიდობას და სტაბილურობას ალტერნატივა არ აქვს, ამიტომ, ჩვენი ინიციატივა ძალიან მოწონებულია. პირველ რიგში, ამაზე ჩვენ ვსაუბრობთ უშუალოდ ამ ინიციატივის მთავარ მონაწილეებთან, მეზობლებთან - აზერბაიჯანთან და სომხეთთან. რა თქმა უნდა, სომხებთანაც გვექნება ამ თემაზე საუბარი. მნიშვნელოვანია აღინიშნოს ისიც, რომ ამ ინიციატივას აქვს ასევე მნიშვნელოვანი საერთაშორისო მხარდაჭერა ჩვენი მთავარი სტრატეგიული პარტნიორების, ევროკავშირის და ამერიკის შეერთებული შტატების მხრიდან საუბარია იმაზე, რომ ჩვენ დავიწყოთ ისეთ კონკრეტულ პროექტებზე და იდეებზე საუბარი, რომელიც შემდეგომ განვითარდება, რომელზეც შესაძლებელია კონსესუსი სამ მეზობელ სახელმწიფოს შორის. თუნდაც სატრანსპორტო ლოგისტიკური მიმართულების თვალსაზრისით ერთობლივ პროექტებზე, ასევე მცირე ეკონომიკურ პროექტებზე, ბიზნესის თანამშრომლობის კუთხით შემდგომ განვითარებაზე, კულტურულ თანამშრომლობაზე, ხალხთა შორის ურთიერთობაზე, რადგან სწორედ ასეთი პატარა მცირე ნაბიჯებით, კონკრეტული პროექტებით შესაძლებელი იქნება შემდგომ გაფართოება, შესაძლებელი იქნება, რომ ამას შემოუერთდნენ უკვე ევროკავშირი, ამერიკის შეერთებული შტატები, სხვა პარტნიორები, საერთაშორისო ორგანიზაციები და ამაზე შემდგომ აიგოს ის დიდი თანამშრომლობა, რომელმაც უნდა მოიტანოს რეგიონში გრძელვადიანი მშვიდობა და სტაბილურობა“, - განაცხადა დავით ზალკალიანმა. როგორც ვიცე-პრემიერმა აღნიშნა, დღეს ბაქოში გამართული მთავრობათაშორისი კომისიის ფარგლებში ხელი მოეწერა რამდენიმე მემორანდუმს, რომლებიც ხელს შეუწყობს გრძელვადიან მშვიდობას და მნიშვნელოვანი ინფრასტრუქტურული პროექტების განვითარებას. „მემორანდუმები, რასაც დღეს ხელი მოეწერა, არის სამთავრობო კომისიის შიგნით განხილული თემების და დიკუსიის შედეგი. ეს მემორანდუმები არის უკვე იმ კონკრეტული მიმართულებით, სექტორალური კუთხით თანამშრომლობა, რომელიც ხორციელდებოდა და მომავალშიც განხორციელდება საქართველოსა და აზერბაიჯანს შორის. ესეც რა თქმა უნდა, ხელს შეუწყობს გრძელვადიან მშვიდობას და სტაბილურობას და მნიშვნელოვანი ინფრასტრუქტურული პროექტების განვითარებას“, - განაცხადა დავით ზალკალიანმა. ამავე თემაზე: ირაკლი ღარიბაშვილი ილჰამ ალიევს შეხვდა ილჰამ ალიევი: საქართველოს პრემიერის დღევანდელი ვიზიტი ახალ ბიძგს მისცემს ჩვენს თანამშრომლობას ირაკლი ღარიბაშვილი: ილჰამ ალიევთან შეხვედრაზე რეგიონული ტრანსფორმაციის მნიშვნელობა განვიხილეთ
საპატრიარქო „სუს-ის ფაილებზე“ განცხადებას ავრცელებს
საპატრიარქოს განცხადებით, „სუსის მასალების“ გავრცელება უპირველეს ყოვლისა, წინასაარჩევნო დებატებში ეკლესიის ჩართვას და მისი მსახურების დისკრედიტაციას ისახავს მიზნად. „გაურკვეველი წარმომავლობის გამოქვეყნებულ ფაილებში ტყუილ-მართლის გარჩევა შეუძლებელია; ერთი კი ცხადია: ამ მასალამ ეკლესიისადმი მტრულად განწყობილ ძალებს მისცა ცილისწამების, პატივის, ღირსებისა და რეპუტაციის შემლახველი ჭორების გავრცელების საშუალება, რაშიც სხვებთან ერთად აქტიურად არიან ჩართულნი თავისი სკანდალური ქმედებებით ცნობილი რამდენიმე სასულიერო პირი, ე.წ. თეოლოგები საინფორმაციო საშუალებები და ზოგიერთი ტელევიზია. ამასთან იკვეთება აღნიშნული ტელევიზიებისა და, ზოგადად, მასმედიის ორმაგი სტანდარტიც: საზოგადოებას კარგად ახსოვს, როგორი მკვეთრად უარყოფითი რეაგირება ჰქონდათ მათ (ისევე, როგორც ყველას) არც თუ ისე დიდი ხნის წინ მასმედიის წარმომადგენლებზე და სხვა პირებთან დაკავშირებული პირადი ცხოვრების ამსახველი კადრების ეთერში გაშვებაზე. ახლა კი თვითონ არიან დანაშაულის ხელშემწყობნი, - ცილისწამების მთავარი და ყველაზე ფართომასშტაბიანი გამავრცელებელნი, მათ შორის შერჩევითობის პრინციპით. მაგ. ადრინდელ მნიშვნელოვან მოვლენებზე რომ არაფერი ვთქვათ, მათ ეთერში არაფერი გაჟღერებულა თუნდაც იმ საუბრების შესახებ, სადაც მღვდელმთავრების დაპატიმრებასა და საპატრიარქოს შტურმით აღებაზეა საუბარი; ეს ხომ მეტად საგულისხმო ინფორმაციაა?! ცნობილია, საეკლესიო სასჯელის დადება, უნდა ემყარებოდეს უტყუარ მტკიცებულებებს; ამიტომაც აღნიშნული ფაილები, მათთან დაკავშირებული სერიოზული პრობლემების გამო, გადაწყვეტილების მისაღებად გამოუყენებელია. თუ კონკრეტული სასულიერო პირის შეუფერებელი ქმედების შესახებ რეალური მტკიცებულებების მოპოვება მოხდება, კომისიის მხრიდან საკითხის შესწავლისა და ფაქტების დადასტურების შემთხვევაში, აუცილებლად იქნება შესაბამისი რეაგირება. გვინდა, ასევე, განვაცხადოთ: იმ შემთხვევაში, თუ ნამდვილად ხდებოდა მღვდელმსახურთა უკანონო თვალთვალი და მოსმენები, ეს არის ყოვლად მიუღებელი, რადგან ასეთი ქმედება, უპირველეს ყოვლისა, საფრთხეს უქმნის სასულიერო პირებისა და მრევლის კომუნიკაციას და არღვევს ქრისტიანულ სწავლებაში აღსარების გაუთქმელობის უმთავრეს და ხელშეუხებელ პრინციპს, დაცულს, როგორც საქართველოს, ასევე, საერთაშორისო კანონმდებლობით. ეკლესია, თავისთავად, ყოველთვის იცავდა და დაიცავს აღსარების საიდუმლოს და არავის მისცემს უფლებას, აღსარების გაუთქმელობა აღმოჩნდეს საფრთხის წინაშე. პირველ რიგში, სწორედ ამის გამო ჩვენთვის უმნიშვნელოვანესია სახელმწიფოს მხრიდან სრულყოფილი გამოძიების დროულად დასრულება. ბრალის დადასტურების შემთხვევაში კი მკაცრი რეაგირება უნდა მოხდეს როგორც სასულიერო, ისე საერო პირთა უკანონო თვალთვალისა და მოსმენების გამო, ასევე იმ ადამიანების მიმართ, რომლებიც არიან მასალის გავრცელებაზე პასუხისმგებელნი“, - აღნიშნულია განცხადებაში.
დავით ზალკალიანი: საქართველოსთან მიმართებით ვიზალიბერალიზაციის შეჩერების არანაირი მექანიზმი არ ამოქმედდება
„აღებულ ვალდებულებებს პირნათლად ვასრულებთ, ამიტომ შეჩერების არანაირი მექანიზმი საქართველოსთან მიმართებით არ ამოქმედდება, - განაცხადა საქართველოს საგარეო საქმეთა მინისტრმა, დავით ზალკალიანმა ჟურნალისტების შეკითხვის საპასუხოდ, რომელიც Euobserver-ის მიერ გავრცელებულ ინფორმაციას ეხებოდა. როგორც დავით ზალკალიანმა განაცხადა, სავიზო ლიბერალიზაციის ბოლო ანგარიშში უაღრესად პოზიტიურად არის შეფასებული საქართველოს მხრიდან ვიზალიბერალიზაციის შესრულება. „მინდა, დავამშვიდო, დავაწყნარო ყველა და ასევე იმედი გავუცრუო იმ ადამიანებს, რომლებმაც ეს ამბავი აიტაცეს. ვიცი, რომ აღტკინება არის ჩვენ ოპონენტებში ამის გამო. წარმოუდგენელია, როდესაც ოპონენტები ხარობენ სავარაუდოდ ქვეყნის წარუმატებლობით, მინდა, მათ იმედები გავუცრუო და ვუთხრა, რომ ეს არის ძალიან დიდი ტყუილი. უნდა ითქვას, რომ ამ სტატიაში კონკრეტულად საქართველოზე არ არის საუბარი. მოლდოვასა და აღმოსავლეთ ბალკანეთის ქვეყნებზეა საუბარი. არათუ გაზრდილია თავშესაფრის მაძიებელთა რაოდენობა, პირიქით 75 პროცენტით არის შემცირებული. ეს არის ტყუილი. არაფერი არ გვემუქრება, ყველაფერი არის კარგად. ბოლო სავიზო ლიბერალიზაციის ანგარიში, რომელიც გამოქვეყნდა, არის უაღრესად პოზიტიური, სადაც დადებითი შეფასება აქვს ვიზალიბერალიზაციის შესრულებას და ჩვენ აღებულ ვალდებულებებს პირნათლად ვასრულებთ, ამიტომ არანაირი შეჩერების მექანიზმი საქართველოსთან მიმართებაში არ ამოქმედდება. მინდა ვთქვა, რომ გერმანიის პრეზიდენტმა შტაინმაიერმა გააკეთა მგონი მსგავსი განცხადება, რომ არანაირი მსგავსი რაღაც ნაბიჯები არ იგეგმება, ამიტომ კიდევ ერთხელ მინდა, ოპონენტებს გავუცრუო იმედები და ვუთხრა, რომ ნუ ხარობენ ქვეყნის წარუმატებლობით, მაშინ, როდესაც ქვეყანა აშკარად ადგას წარმატების გზას. ჩვენი ევროკავშირის ინტეგრაცია, მათ შორის თავისუფალი ვაჭრობა და სავიზო ლიბერალიზაცია ეს არის შეუქცევადი პროცესი და ჩვენ არ გადავუხვევთ არც ერთი ჩვენი ნაკისრი ვალდებულებიდან“, - განაცხადა დავით ზალკალიანმა. თავის მხრივ, გერმანიის პრეზიდენტმა ყალბი უწოდა ინფორმაციას, თითქოს, გერმანია საქართველოს, უკრაინისა და ბალკანეთის ქვეყნებისთვის უვიზო რეჟიმის გაუქმების განხილვას ითხოვს.
