უცხოეთი
ევროკავშირმა და სომხეთმა დაკავშირებადობის სფეროში პარტნიორობის შეთანხმება გააფორმეს
ევროკავშირმა და სომხეთმა დაკავშირებადობის სფეროში პარტნიორობის შესახებ შეთანხმება გააფორმეს. ევროკომისიის პრეზიდენტ ურსულა ფონ დერ ლაიენის განცხადებით, შეთანხმება ევროკავშირს, სამხრეთ კავკასიასა და ცენტრალურ აზიას აკავშირებს. ევროკომიის პრეზიდენტმა განაცხადა, რომ სომხეთი უზრუნველყოფს კასპიის ზღვასა და ცენტრალური აზიისკენ უმოკლეს გზას. როგორც მან აღნიშნა, გზა ადრე დაკეტილი იყო, მაგრამ ახლა, სომხეთის თამამი გადაწყვეტილების წყალობით, ვითარება შეიცვალა. მან დღესვე, ერევანში მიმდინარე სომხეთ-ევროკავშირის პირველ სამიტზე განაცხადა, რომ უკრაინიდან ირანამდე დაძაბულობა მძვინვარებს, სამხრეთ კავკასიაში ვითარება განსხვავებულია, ძველი ჭრილობები ხორცდება და ევროპას მშვიდობის ხელშეწყობა სურს. ურსულა ფონ დერ ლაიენის განცხადებით, სომხეთს შეუძლია, რეგიონული ცენტრი და გზაჯვარედინი გახდეს. ევროკომისიის პრეზიდენტის თქმით, თავის მხრივ, ევროპა მზად არის, ხელი შეუწყოს, მათ შორის, ფიზიკურად, სატრანსპორტო და ენერგეტიკულ კავშირებს. „ევროკავშირი და სომხეთი არასდროს ყოფილან უფრო ახლოს. დღეს კი, ჩვენი პარტნიორობა სრულიად ახალ დონეზე აგვყავს. ხელი მოეწერა ევროკავშირსა და სომხეთს შორის დაკავშირებადობის სფეროში პარტნიორობის შესახებ შეთანხმებას. ტრანსპორტიდან დაწყებული ენერგეტიკითა და ციფრული ქსელებით დამთავრებული, ამას შეუძლია, სომხეთი კონტინენტების გზაჯვარედინზე მდებარე სტრატეგიულ ცენტრად აქციოს,“ - ამბობს ურსულა ფონ დერ ლაიენი. თავის მხრივ, ევროპული საბჭოს პრეზიდენტი ანტონიო კოშტაც და ხაზს უსვამს, რომ ევროკავშირი-სომხეთის პირველი სამიტი ევროკავშირსა და სომხეთს შორის პარტნიორობის გაღრმავების მნიშვნელოვან ეტაპს აღნიშნავს. „ეს მომენტი შესაძლებელი გახდა სომხეთის მიერ ბოლო წლებში მიღწეული მნიშვნელოვანი მიღწევების წყალობით. მათ შექმნეს უნიკალური შესაძლებლობა, რომ ხელშესახები სარგებელი მოეტანათ ჩვენი მოქალაქეებისთვის, ბიზნესებისა და საზოგადოებებისთვის,“ - წერს კოშტა სოციალურ ქსელში. შეთანხმებას ხელი ერევანში, ევროკავშირი-სომხეთის პირველი სამიტის ფარგლებში მოეწერა. ევროპული საბჭოს ცნობით, ევროკავშირი-სომხეთის სამიტი ორმხრივი ურთიერთობების განმტკიცებაზე იქნება ორიენტირებული, განსაკუთრებით ენერგეტიკის, ტრანსპორტისა და ციფრული ტექნოლოგიების სფეროში დაკავშირებადობის საკითხებზე. სომხეთი-ევროკავშირის სამიტის წინ, 4 მაისს ერევანმა ევროპული პოლიტიკური გაერთიანების სამიტს უმასპინძლა. ლიდერები ასევე განიხილავენ სამხრეთ კავკასიაში მშვიდობის, უსაფრთხოების, დაკავშირებადობისა და კეთილდღეობის უზრუნველყოფის კუთხით მიღწეულ პროგრესს, მიმდინარე გლობალურ გამოწვევებს, მათ შორის, ახლო აღმოსავლეთსა და უკრაინაში ბოლო დროს განვითარებულ მოვლენებს.
ერდოღანის თქმით, ევროპას თურქეთი უფრო მეტად სჭირდება, ვიდრე თურქეთს — ევროპა
თურქეთის პრეზიდენტმა რეჯეფ თაიფ ერდოღანმა „მოუწოდა ევროკავშირს, თავი შეიკავოს ისეთი ქმედებებისა და რიტორიკისგან, რამაც შეიძლება, შეარყიოს ანკარის „კონსტრუქციული პოზიცია.“ მისი თქმით, „ევროკავშირმა უნდა გააცნობიეროს, რომ თურქეთის, როგორც სრულუფლებიანი წევრის გარეშე, იგი გლობალური აქტორი ან მიზიდულობის ცენტრი ვერ იქნება.“ „არ უნდა დავივიწყოთ, რომ თურქეთი აღარ არის ძველი თურქეთი და არც მსოფლიოა შემოსაზღვრული მხოლოდ დასავლური სახელმწიფოების გავლენის სფეროთი,“ - განაცხადა თურქეთის პრეზიდენტმა. ერდოღანმა აღნიშნა, რომ „სამწუხაროდ, თურქეთის მიმართ ევროკავშირის სტრატეგიული მიოპია კვლავ ნარჩუნდება და ეს ბლოკის საკმაოდ ბევრ ინსტიტუტში ნათლად შეიმჩნევა.“ „...ხვალ ეს საჭიროება კიდევ უფრო გაიზრდება,“ - აღნშინა თურქეთის პრეზიდენტმა. ერდოღანის თქმით, თურქეთი იმედოვნებს, რომ „ევროპაში გადაწყვეტილების მიმღები პირები უარს იტყვიან თავიანთ პოლიტიკურ და ისტორიულ ცრურწმენებზე და ყურადღებას გაამახვილებენ თურქეთთან გულწრფელი, ნამდვილი და თანასწორუფლებიანი ურთიერთობების განვითარებაზე.“
„აუცილებელია TAP-ის პროექტის გაფართოება“ - სომხეთის შემდეგ, მელონი აზერბაიჯანში ჩავიდა
აზერბაიჯანის პრეზიდენტი ილჰამ ალიევი ბაქოში შეხვდა იტალიის პრემიერ-მინისტრ ჯორჯია მელონის. ეს იტალიის პრემიერ-მინისტრის პირველი ვიზიტია 2013 წლის შემდეგ. მელონი დღეს სამუშაო ვიზიტით აზერბაიჯანში იმყოფებოდა. აზერბაიჯანის პრეზიდენტმა ილჰამ ალიევმა ერთობლივ პრესკონფერენციაზე განაცხადა, რომ აზერბაიჯანი და იტალია სტრატეგიული პარტნიორები არიან. „დღეს აზერბაიჯანში თქვენი ვიზიტი კიდევ ერთხელ ხაზს უსვამს ჩვენი ქვეყნების ურთიერთობების ღრმა შინაარსს,“ - განაცხადა ილჰამ ალიევმა. ჯორჯია მელონიმ იტალიასა და აზერბაიჯანს შორის თანამშრომლობის განვითარების მზადყოფნა გამოთქვა. „დარწმუნებული ვარ, რომ იტალიასა და აზერბაიჯანს შორის მეგობრული ურთიერთობები კიდევ უფრო განვითარდება და უფრო მაღალ დონეს მიაღწევს,“ - აღნიშნა იტალიის პრემიერ-მინისტრმა. იტალია აზერბაიჯანის ყველაზე მსხვილი სავაჭრო პარტნიორია. მათ შორის ვაჭრობის მოცულობამ 2025 წელს დაახლოებით 12 მილიარდი აშშ დოლარი შეადგინა. ორ ქვეყანას მჭიდრო კავშრები აქვს ენერგეტიკის სფეროში - იტალიის მიერ მოხმარებული ბუნებრივი აირის 16% აზერბაიჯანიდან არის იმპორტირებული. „რუსეთის მიერ უკრაინის წინააღმდეგ ომის დაწყების შემდეგ, იტალიაში გაზისა და ნავთობის ექსპორტმა გადამწყვეტი როლი ითამაშა იმ ქვეყნის ენერგეტიკულ უსაფრთხოებაში, რომელსაც მე წარმოვადგენ - წარმოვადგენ დიდი სიამაყით. ჩვენ ვისაუბრეთ ამ კავშირების განმტკიცებაზე,“ - განაცხადა იტალიის პრემიერ-მინისტრმა. მელონის თქმით, ენერგეტიკა კვლავ ერთ-ერთ მთავარ საკითხად რჩება ევროპის საბჭოს დონეზე, ასევე, ორმხრივ კონტაქტებში, მათ შორის, გაერთიანებულ სამეფოსთან. მან ხაზგასმით აღნიშნა, რომ ენერგეტიკასთან ერთად მნიშვნელოვანია კრიტიკულად მნიშვნელოვანი ნედლეულის საკითხები, რომლებიც ევროპის სუვერენიტეტისა და სტრატეგიული ავტონომიის ელემენტს წარმოადგენს. მელონიმ ასევე განაცხადა, რომ იტალია ცდილობს წვლილი შეიტანოს ამ სფეროების განვითარებაში. გასულ წელს აზერბაიჯანმა 25 მილიარდი კუბური მეტრი ბუნებრივი აირის ექსპორტი განახორციელა, საიდანაც 9,5 მილიარდი იტალიის ბაზარზე მოდის. დღეს ჩვენ განვიხილეთ ამ მოცულობის გაზრდის საკითხი. ამისათვის, რა თქმა უნდა, აუცილებელია TAP-ის [ტრანსადრიატიკის მილსადენი] პროექტის გაფართოება, რომელიც სამხრეთის გაზის დერეფნის განუყოფელი ნაწილია. ის გარკვეულწილად უკვე გაფართოვდა, მაგრამ ეს პროცესი უნდა გაგრძელდეს,“ - აღნიშნა ალიევმა. aლიევმა და აზერბაიჯან-სომხეთის ურთიერთობებიც განიხილეს. მე კიდევ ერთხელ დავადასტურე იტალიის სრული მხარდაჭერა ნორმალიზაციის გზაზე, რაც ასახავს ისტორიულ ეტაპს შეერთებული შტატების მხრიდან იმპულსის შედეგია. მე მჯერა, რომ 2026 წელი ამ მხრივ შეიძლება, მნიშვნელოვანი გახდეს, რადგან უმნიშვნელოვანესია, რომ ამ დინამიკური რეგიონის სრული პოტენციალი იყოს გამოყენებული,“ - აღნიშნა მელონიმ. „ჩვენ აღვნიშნეთ აზერბაიჯანსა და ევროკავშირს შორის დიალოგის გაძლიერების მნიშვნელობა. ენერგეტიკა და ტრანსპორტი ცალსახად ისეთი სფეროებია, სადაც ევროპას შეუძლია და უნდა ითამაშოს უფრო მნიშვნელოვანი როლი. ამ გზით უზრუნველყოფილი იქნება ინვესტიციების მხარდაჭერა და აზერბაიჯანის უფრო ფართო ინტეგრაცია ენერგეტიკულ ქსელებსა და საერთაშორისო სატრანსპორტო მარშრუტებში,“ - განაცხადა იტალიის პრემიერ-მინისტრმა. ორმხრივი შეხვედრის შემდეგ ილჰამ ალიევმა ჯორჯია მელონის სამუშაო სადილზე უმასპინძლა. მელონი ბაქოში ერევნიდან გაემგზავრა. იტალიის პრემიერი ორშაბათს, 4 მაისს ერევანში დაესწრო „ევროპის პოლიტიკური თანამეგობრობის“ სამიტს. მელონი არ არის ერთადერთი ევროპელი ლიდერი, რომელიც მიმდინარე პერიოდში სამხრეთ კავკასიის ორივე ქვეყანას ეწვია. აზერბაიჯანსა და სომხეთში იმყოფებოდა უკრაინის პრეზიდენტი ვოლოდიმირ ზელენსკიც. ერევნიდან ბაქოში მიემგზავრება ევროკავშირის უმაღლესი წარმომადგენელი საგარეო პოლიტიკისა და უსაფრთხოების საკითხებში, კაია კალასიც. 4 მაისს ჟურნალისტებს საფრანგეთის პრეზიდენტმა ემანუელ მაკრონმაც განუცხადა, რომ ილჰამ ალიევს პირადად შეხვდება. ალიევი ვიდეოზარით ჩაერთო სამიტს. მაკრონი კვლავ სომხეთშია. ორშაბათ საღამოს მან და ფაშინიანმა ერთმანეთი ღირსების მედლითა და ორდენით დააჯილდოვეს. სამშაბათს, 5 მაისს დაგეგმილია მაკრონის ვიზიტი ქალაქ გიუმრიში, სადაც გაიმართება კონცერტი ღია ცის ქვეშ. გიუმრიში მდებარეობს რუსეთის სამხედრო ბაზა.
ავსტრიამ ჯაშუშობის ბრალდებით სამი რუსი დიპლომატი ქვეყნიდან გააძევა
ავსტრიამ ჯაშუშობის ბრალდებით სამი რუსი დიპლომატი ქვეყნიდან გააძევა. Reuters-ის ცნობით, დიპლომატიური შენობების სახურავებზე განთავსებული დიდი რაოდენობით სატელიტური ანტენების გამო, რომლებიც შესაძლოა, ჯაშუშობისთვის გამოიყენონ, კერძოდ, სხვა სახელმწიფოების დიპლომატიური წარმომადგენლობების სატელიტური კომუნიკაციების მოსმენის მიზნებისთვის, ავსტრიამ სამი რუსი დიპლომატი „პერსონა ნონ გრატად“ გამოაცხადა. „მიუღებელია, რომ დიპლომატიური იმუნიტეტის ჯაშუშობისთვის გამოყენება მოხდეს,“ - განაცხადა ავსტრიის საგარეო საქმეთა მინისტრმა, ბეატე მაინლ-რეისინგერმა. ავსტრიის საგარეო საქმეთა სამინისტროს გადაწყვეტილებას ვენაში რუსეთის საელჩო გამოეხმაურა და განაცხადა, რომ ამას „მკაცრი რეაქცია“ მოჰყვება. ავსტრიის საგარეო უწყების ცნობით, რუსმა დიპლომატებმა ქვეყანა უკვე დატოვეს.
ზელენსკი ერევანში ფაშინიანს შეხვდა: მნიშვნელოვანია, რომ ქვეყნებს შორის აქტიური დიალოგის აღდგენის პროცესში ვართ
ევროპული პოლიტიკური საზოგადოების სამიტის ფარგლებში, პრემიერ-მინისტრ ნიკოლ ფაშინიანისა და უკრაინის პრეზიდენტ ვოლოდიმირ ზელენსკის შეხვედრა გაიმართა. სომხური მხარის ცნობით, შეხვედრის განმავლობაში მხარეებმა სომხეთ-უკრაინის ორმხრივი ურთიერთქმედების განვითარების პერსპექტივები განიხილეს და ხაზი გაუსვეს ურთიერთინტერესის სფეროებში თანამშრომლობის გაღრმავების მნიშვნელობას. თანამოსაუბრეებმა ასევე გაცვალეს აზრები რეგიონულ და გლობალურ განვითარებასთან დაკავშირებით. ხაზგასმით აღინიშნა სტაბილური და ხანგრძლივი მშვიდობის ხელშეწყობის აუცილებლობა. ზელენსკის ცნობით კი, ნიკოლ ფაშინიანთან შეხვედრაზე რეგიონში არსებული ვითარება და უსაფრთხოების გამოწვევები განიხილა. „ასევე, განვიხილეთ ეკონომიკური თანამშრომლობის განვითარების საკითხი. წინადადება წამოვაყენე, რომ აღდგეს ეკონომიკური თანამშრომლობის ერთობლივი სამთავრობათაშორისო კომისიის მუშაობა და შემდეგი შეხვედრა მიმდინარე წელს კიევში შედგეს,“ - წერს ზელენსკი X-ზე. „ეს სომხეთში ბოლო 24 წლის განმავლობაში უკრაინის პრეზიდენტის პირველი ვიზიტია. მნიშვნელოვანია, რომ ჩვენს ქვეყნებს შორის აქტიური დიალოგის აღდგენის პროცესში ვართ“, - აღნიშნავს უკრაინის პრეზიდენტი. დღეს, უკრაინის პრეზიდენტმა ერევანში მიმდინარე ევროპული პოლიტიკური გაერთიანების მერვე სამიტის მონაწილეებს მიმართა. ვოლოდიმირ ზელენსკი რუსეთის გადაწყვეტილებას, უკრაინის დრონებით თავდასხმების შიშის გამო, მეორე მსოფლიო ომში საბჭოთა კავშირის გამარჯვებისადმი მიძღვნილ ყოველწლიურ აღლუმზე სამხედრო ტექნიკა არ გამოფინოს, მოსკოვის მზარდი სისუსტის დასტურად მიიჩნევს. „ეს ზაფხული იქნება მომენტი, როდესაც პუტინი გადაწყვეტს, რა გააკეთოს შემდეგ: გააფართოოს ეს ომი თუ დიპლომატიური გზებით გადავიდეს. ჩვენ კი, ის დიპლომატიისკენ უნდა წავიყვანოთ,“ - აღნიშნა ზელენსკიმ. ზელენსკის განცხადებით, რუსეთი აღარ არის ისეთი ძლიერი, როგორც ადრე. „რუსეთმა 9 მაისს აღლუმი გამოაცხადა, თუმცა ამ აღლუმზე სამხედრო ტექნიკა არ იქნება. თუ ეს სიმართლეა, ეს იქნება პირველი შემთხვევა მრავალი წლის შემდეგ, როდესაც ისინი ვერ შეძლებენ აღლუმზე იარაღის წარმოდგენას. მათ არ აქვთ საშუალება სამხედრო ტექნიკის შესაძენად — და ეშინიათ, რომ დრონები შესაძლოა, წითელ მოედანზეც გამოჩნდნენ. ეს ბევრს ამბობს. ეს აჩვენებს, რომ ახლა ძლიერები აღარ არიან. ამიტომაც უნდა გავაგრძელოთ მათზე ზეწოლა სანქციების მეშვეობით,“ - აღნიშნა ზელენსკიმ ერევანში მიმდინარე ევროპული პოლიტიკური გაერთიანების მერვე სამიტზე. უკრაინის პრეზიდენტმა ასევე განაცხადა, რომ რუსეთის მიერ წარმოებული ომი უკრაინისა და ევროპის წინააღმდეგ, ისეთივე ინტენსივობით გრძელდება, როგორც ადრე. „მადლობელი ვარ ყველა ლიდერის სამხედრო მრეწველობისა და რუსული ბანკების წინააღმდეგ მიმართული სანქციებისთვის. ჩვენ უნდა გავაგრძელოთ ეს ზეწოლა. სანამ ეს ომი გრძელდება, უკრაინისადმი მტკიცე მხარდაჭერა უნდა გაგრძელდეს. ჩვენ უნდა ვკონცენტრირდეთ იმაზე, თუ რას გავაკეთებთ, თუ რუსეთი არ შეწყვეტს ამ ომს. ჩვენ გვჭირდება უწყვეტი ზეწოლა და მშვიდობა. და, რა თქმა უნდა, მთავარია: ჩვენ უნდა ვიპოვოთ მოქმედი დიპლომატიური ფორმატი და ევროპა უნდა იყოს წარმოდგენილი ნებისმიერ მოლაპარაკებათა მაგიდასთან,“- თქვა უკრაინის პრეზიდენტმა. მან ხაზგასმით აღნიშნა, რომ მუდმივად უნდა ჰქონდეთ კავშირი აშშ-სთან და ესმოდეთ მათი პოზიციები. თუმცა მისივე თქმით, კარგი იქნებოდა, თუ რუსეთთან მოლაპარაკებებისთვის ერთიანი ევროპული ხმის ჩამოყალიბებას შეძლებდნენ. „მადლობას გიხდით მე-20 სანქციების პაკეტისთვის - მადლობელი ვარ ყველა ლიდერის, ევროკავშირის, ანტონიუს, ურსულას, დიდი მადლობა - და განსაკუთრებით იმ სანქციებისთვის, რომლებიც რუსული ნავთობის, სამხედრო ინდუსტრიისა და რუსული ბანკების წინააღმდეგ არის დაწესებული. ჩვენ უნდა გავაგრძელოთ ეს ზეწოლა. გთხოვთ, წინააღმდეგობა გაუწიოთ სანქციების შემსუბუქების ნებისმიერ იდეას - ეს მნიშვნელოვანია. ასევე მადლობა მათ, ვინც იბრძვის რუსეთის ჩრდილოვანი ფლოტის წინააღმდეგ. ვიდრე ეს ომი გრძელდება - უკრაინის ძლიერი მხარდაჭერა უნდა გაგრძელდეს. ყველა დამხმარე პაკეტი მნიშვნელოვანია, განსაკუთრებით, საჰაერო თავდაცვა. PURL პროგრამაში ყველა წვლილი მნიშვნელოვანია. და ჩვენ გვჭირდება ახალი PURL პაკეტები წელს, მაისში. ეს გვეხმარება ბალისტიკური საფრთხეებისგან თავის დაცვაში. მე მჯერა, რომ ევროპას უნდა შეეძლოს ყველაფრის წარმოება, რაც მას სჭირდება ყველაფრისგან თავის დასაცავად - ყველა ბალისტიკური თავდასხმისგან და ყველა სხვა იარაღისგან - დამოუკიდებლად. ჩვენ ვთავაზობთ წვლილს ევროპის თავდაცვაში - ჩვენი დრონების შეთანხმებები. ისინი აერთიანებს ქვეყნებს. ჩვენ გვჭირდება ძლიერი დაცვა მთელ ევროპაში - დრონებისგან და ყველა თავდასხმისგან, პოტენციური თავდასხმებისგან, ჰაერში, ზღვაზე და ხმელეთზე. დრონების შესახებ შეთანხმებები ნიშნავს ერთობლივ მუშაობას, ერთობლივ წარმოებას, საერთო დაცვას. მოდით, წინ წავიდეთ ამ საკითხზე. და კიდევ ერთი რამ. ჩვენ უნდა გავამახვილოთ ყურადღება იმაზე, თუ რას გავაკეთებთ, თუ რუსეთი ამ ომს არ დაასრულებს. ჩვენ გვჭირდება ზეწოლის გაგრძელება - და ჩვენ გვჭირდება მშვიდობა. და რა თქმა უნდა, ეს ნომერ პირველია: ჩვენ უნდა ვიპოვოთ ქმედითი დიპლომატიური ფორმატი. და ევროპა უნდა იყოს ნებისმიერი მოლაპარაკების მაგიდასთან. და ჩვენ კონტაქტში ვართ შეერთებულ შტატებთან - და ჩვენ გვესმის მათი შეხედულებები და პოზიციები. მაგრამ კარგი იქნებოდა, რუსებთან მოლაპარაკებებისთვის ერთიანი, ევროპული ხმა ჩამოყალიბებულიყო. ზელენსკიმ, ევროპული პოლიტიკური საზოგადოების მე-8 სამიტზე გამოსვლისას, სომხეთსა და აზერბაიჯანს სტაბილური, ყოვლისმომცველი და ხანგრძლივი მშვიდობა უსურვა. ვოლოდიმირ ზელენსკიმ ხაზი გაუსვა ამ ფართომასშტაბიან ფორმატში სომხეთის მონაწილეობის მნიშვნელობას ყველა ევროპელთან ერთად. მან მნიშვნელოვან ფაქტად მიიჩნია ის, რომ 24 წლის განმავლობაში, უკრაინის პრეზიდენტი სომხეთს პირველად სტუმრობს. „გამოწვევები აშკარაა. უპირველეს ყოვლისა, ჩვენ ყველანი ვხედავთ, რომ ირანში ომი კვლავ გადაუჭრელი რჩება და ამან შეიძლება, დიდი ხნით გამოიწვიოს არასტაბილურობა. ამან კი, შესაძლოა, სერიოზულ პოლიტიკურ ცვლილებებამდე მიგვიყვანოს. ამიტომ, პირველ რიგში, ჩვენი ენერგეტიკული და უსაფრთხოების თანამშრომლობა უნდა იყოს რეალური და ჩვენ ერთმანეთს უნდა დავეხმაროთ ზამთრისთვის მომზადებასა და ენერგეტიკული გამოწვევების დაძლევაში. ასევე, ძალისხმევა უნდა მივმართოთ ჰორმუზის სრუტისა და ირანელი ხალხისთვის გრძელვადიანი გადაწყვეტის მოსაძებნად,“ - აღნიშნა ზელენსკიმ.
ალიევი ევროპული პოლიტიკური გაერთიანების სამიტზე: „ტრამპის გზა“ აზერბაიჯანს თავის ექსკლავთან, ნახიჩევანთან დააკავშირებს, ამავდროულად, ეს მარშრუტი შუა დერეფნის ნაწილი გახდება
აზერბაიჯანის პრეზიდენტმა ილჰამ ალიევმა სომხეთში მიმდინარე ევროპული პოლიტიკური გაერთიანების სამიტის მონაწილეებს ვიდეო ფორმატში მიმართა. ალიევის თქმით, სამიტში ბაქოს მონაწილეობა ნათლად აჩვენებს, რომ აზერბაიჯანსა და სომხეთს შორის მშვიდობა რეალობაა და სომხეთი და აზერბაიჯანი უკვე ხედავენ მშვიდობის პრაქტიკულ სარგებელს. „ევროპის საბჭოს პრეზიდენტის, ანტონიო კოშტას აზერბაიჯანში ვიზიტის დროს განვიხილეთ ჩემი მონაწილეობა სამიტში და შევთანხმდით, რომ ვიდეო ფორმატით შევუერთდებოდი. ასევე მინდა, აუდიტორიას ვაცნობო, რომ ერთი წლის წინ, პრეზიდენტ კოშტასთან და პრეზიდენტ ურსულა ფონ დერ ლაიენთან შეხვედრისას, მათ მკითხეს ჩემი აზრი სამიტის 2026 წლის მაისში სომხეთში ჩატარების იდეასთან დაკავშირებით. მე მხარი დავუჭირე ამ ინიციატივას და, თავის მხრივ, შევთავაზე შემდეგი სამიტებიდან ერთ-ერთის აზერბაიჯანში ჩატარება დაბალანსებული მიდგომის შესანარჩუნებლად. წინადადება მიღებულია და ამიტომ, წევრებს 2028 წლის მაისში აზერბაიჯანში ვპატიჟებ. სხვათა შორის, სომხეთმაც დაუჭირა მხარი ჩვენს კანდიდატურას. ეს ნათლად აჩვენებს, რომ აზერბაიჯანსა და სომხეთს შორის მშვიდობა რეალობაა,“ - განაცხადა ალიევმა. ალიევმა გაიხსენა თეთრ სახლში გაფორმებული შეთახმებაც. „გასული წლის აგვისტოში, ვაშინგტონში, თეთრ სახლში, სომხეთისა და აზერბაიჯანის ლიდერებმა ერთობლივ დეკლარაციას მოაწერეს ხელი. პრეზიდენტმა ტრამპმა, როგორც უკვე აღვნიშნეთ, მას მოწმის რანგშიც მოაწერა ხელი. სომხეთისა და აზერბაიჯანის საგარეო საქმეთა მინისტრებმა სამშვიდობო შეთანხმების ტექსტი პარაფირებული დადეს. ჩვენთვის და დარწმუნებული ვარ, ჩვენი სომეხი პარტნიორებისთვისაც - მშვიდობა მიღწეულია. მშვიდობის მიღწევის შემდეგ, აზერბაიჯანმა ცალმხრივად მოხსნა სომხეთისთვის 1990-იანი წლების დასაწყისში დაწესებული ყველა სატრანზიტო შეზღუდვა. დღეისათვის, სომხეთში აზერბაიჯანის ტერიტორიის გავლით 28 000 ტონა ტვირთია მიწოდებული. აზერბაიჯანი კიდევ უფრო შორს წავიდა: ჩვენ პირველად დავიწყეთ ჩვენი ნავთობპროდუქტების - ბენზინისა და დიზელის - მიწოდება სომხეთისთვის, რითაც სავაჭრო ურთიერთობები დაიწყო. ჯერჯერობით, ჩვენი ნავთობპროდუქტების 12 000 ტონა ექსპორტირებულია სომხეთში.“ აზერბაიჯანის პრეზიდენტის თქმით, სომხეთი და აზერბაიჯანი უკვე ხედავენ მშვიდობის პრაქტიკულ სარგებელს. „მშვიდობის კიდევ ერთი მნიშვნელოვანი მიღწევა — დაკავშირებადობაა. „ტრამპის მარშრუტი საერთაშორისო მშვიდობისა და კეთილდღეობისთვის“ აზერბაიჯანს მის ექსკლავ, ნახიჩევანთან დააკავშირებს. ამავდროულად, ეს მარშრუტი შუა დერეფნის ნაწილი გახდება. სომხეთი და აზერბაიჯანი უკვე ხედავენ მშვიდობის პრაქტიკულ სარგებელს. ამ შესაძლებლობით ვისარგებლებ და მინდა, მადლობა გადავუხადო ევროკომისიას სომხეთ-აზერბაიჯანის სამშვიდობო პროცესთან დაკავშირებით მისი პოზიციისთვის,“ - აღნიშნა ალიევმა. აზერბაიჯანის პრეზიდენტის თქმით, „სამწუხაროდ, ყველა ევროპული ინსტიტუტი ერთნაირ მიდგომას არ ავლენს. მათ შორისაა ევროპის პარლამენტი და ევროპის საბჭოს საპარლამენტო ასამბლეა (PACE). „აზერბაიჯანი ევროპის საბჭოს წევრია 2001 წლის იანვრიდან. სხვათა შორის, მე, როგორც აზერბაიჯანის დელეგაციის მაშინდელი ხელმძღვანელი და პარლამენტის წევრი, ვიყავი PACE-ს ერთ-ერთი აქტიური წევრი. ჩვენი დელეგაცია ევროპის საბჭოში 2024 წლის იანვრამდე არასდროს ყოფილა რაიმე შეზღუდვის ქვეშ. 2023 წლის სექტემბერში აზერბაიჯანმა ბოლო მოუღო სეპარატიზმს ყარაბაღში. ჩვენ თვითონ შევასრულეთ გაეროს უშიშროების საბჭოს 1993 წელს მიღებული ოთხი რეზოლუცია, რომელიც 30 წლის განმავლობაში ქაღალდზე დარჩა. ოთხი თვის შემდეგ, PACE-მ ჩვენს დელეგაციას სანქციები დაუწესა. სამწუხაროდ, ორმაგი სტანდარტები დღეს PACE-სთვის ერთგვარი მოქმედების წესია. აზერბაიჯანის ტერიტორიულ მთლიანობას იგივე ღირებულება აქვს, რაც ნებისმიერი სხვა ქვეყნის. ამ საკითხში ორმაგი სტანდარტები მიუღებელია. ახლა, რაც შეეხება ევროპის პარლამენტს, ეს ორგანო, სამშვიდობო პროცესის მხარდაჭერის ნაცვლად, მის საბოტაჟს ამჯობინებს. 2021 წლის მაისიდან, მეორე ყარაბაღის ომის დასრულებიდან ექვსი თვის შემდეგ, 2026 წლის 30 აპრილამდე, ევროპარლამენტმა მიიღო 14 რეზოლუცია, რომლებიც სავსეა აზერბაიჯანის შესახებ შეურაცხყოფითა და ტყუილით. წარმოიდგინეთ - ხუთ წელიწადში 14 რეზოლუცია ერთგვარი აკვიატებაა. ბოლო რეზოლუცია მხოლოდ ოთხი დღის წინაა მიღებული, განზრახ, სამიტის წინ. ზოგიერთი წევრი სახელმწიფოს ფუნდამენტური პრობლემების, როგორიცაა ქსენოფობია, ისლამოფობია, ანტისემიტიზმი, მიგრაცია, კონკურენტუნარიანობა და უსახლკარობა, მოგვარების ნაცვლად, ევროპარლამენტი აზერბაიჯანს ესხმის თავს, ავრცელებს ცილისწამებას და ტყუილს. მიზეზი კი ის არის, რომ აზერბაიჯანმა აღადგინა თავისი ტერიტორიული მთლიანობა და სუვერენიტეტი, ბოლო მოუღო სეპარატიზმს და ომის დამნაშავეები სამართლიანობის წინაშე წარადგინა. საპასუხოდ, აზერბაიჯანის პარლამენტმა პირველ მაისს გადაწყვიტა, ოფიციალურად შეჩერებულიყო ევროპარლამენტთან თანამშრომლობა ყველა სფეროში, შეწყვეტილიყო მონაწილეობა ევროკავშირ-აზერბაიჯანის საპარლამენტო თანამშრომლობის კომიტეტის საქმიანობაში და დაეწყო პროცედურები ევრონესტის საპარლამენტო ასამბლეაში წევრობის შეწყვეტის შესახებ. იმის გათვალისწინებით, რომ ევროპის ეკონომიკური თანამშრომლობის საბჭოს სამიტების დროს ჩვენ ღიად ვუზიარებთ ერთმანეთს ჩვენს შეხედულებებსა და შეშფოთებას, უბრალოდ მინდოდა, ჩვენი კოლეგებისთვის ამ კუთხით მიმდინარე მოვლენების შესახებ ინფორმაციის მიწოდება, რათა ამ გადაწყვეტილების შემდეგ, არ გავრცელდეს დეზინფორმაცია ან არ მოხდეს ინფორმაციის მანიპულირება. დასკვნის სახით, მინდა, მივულოცო პრემიერ-მინისტრ ფაშინიანს სომხეთში ევროპის ეკონომიკური თანამშრომლობის საბჭოს სამიტი და ვთქვა, რომ პროცესის შეფერხების მსურველთა ყველა მცდელობის მიუხედავად, აზერბაიჯანი ერთგულია სამშვიდობო დღის წესრიგის და ჩემი სომეხი კოლეგის შენიშვნები ამას ნათლად აჩვენებს. სამიტს წარმატებებს ვუსურვებ,“ - განაცხადა ილჰამ ალიევმა. ევროპარლამენტის პრეზიდენტი რობერტა მეცოლა აზერბაიჯანის პრეზიდენტის ილჰამ ალიევის განცხადებას გამოეხმაურა. „ევროპარლამენტი პირდაპირი წესით არჩეული წარმომადგენლებისგან შემდგარი დემოკრატიული ორგანოა, რომლის რეზოლუციებიც ხმათა უმრავლესობით მიიღება. ამის შედეგები, შესაძლოა, ბევრისთვის უხერხულობას ქმნიდეს, მაგრამ ჩვენ არასოდეს შევცვლით იმ გზას, რომლითაც მივდივართ და დავიცავთ იმ პოზიციებს, რომლებსაც ვიღებთ,“ - განაცხადა მეცოლამ.
მაკრონი ერევანში: რვა წლის წინ, აქ არავინ ჩამოვიდოდა, სომხეთი რუსეთის სატელიტად ითვლებოდა
საფრანგეთის პრეზიდენტმა ემანუელ მაკრონმა, ერევანში მიმდინარე ევროპული პოლიტიკური საზოგადოების მე-8 სამიტის ფარგლებში გამართულ პანელურ დისკუსიაზე, მაღალი შეფასება მისცა პრემიერ-მინისტრ ნიკოლ ფაშინიანის მიერ გატარებულ პოლიტიკას. „სხვათა შორის, ვფიქრობ, რომ ნიკოლ ფაშინიანის მუშაობა სომხეთში ბოლო წლებში ძალიან შთამბეჭდავია. მოდით, გულახდილები ვიყოთ: რვა წლის წინ აქ არავინ ჩამოვიდოდა. ის ფაქტი, რომ დღეს თქვენს ქვეყანაში ამდენი ვიზიტი ხორციელდება, კარგი სიგნალია,“ - განაცხადა მაკრონმა. საფრანგეთის პრეზიდენტის თქმით, წარსულში არაერთი ქვეყანა სომხეთს სხვანაირად აღიქვამდა. „რვა წლის წინ, ამ მაგიდის გარშემო მყოფი ბევრი ქვეყანა ამ ქვეყანას რუსეთის ნამდვილ სატელიტად განიხილავდა. ნიკოლ ფაშინიანმა მოაწყო ხავერდოვანი რევოლუცია და გადაწყვიტა, თავისი ქვეყანა რუსეთისგან დაეცვა. სწორედ ამის გამო, ის განიცდიდა და კვლავაც განიცდის ყოველდღიურ თავდასხმებს,“ - აღნიშნა საფრანგეთის პრეზიდენტმა. მან ასევე ხაზი გაუსვა სომხეთის ევროპული არჩევანის მნიშვნელობას. „ის ფაქტი, რომ მან მიიღო გადაწყვეტილება მსოფლიოსა და ევროპის სასარგებლოდ, ძალიან ძლიერი სიგნალია,“ - განაცხადა მაკრონმა. .საფრანგეთის პრეზიდენტმა აღნიშნა, რომ უკრაინის წინააღმდეგობა რუსეთისადმი, სომხეთის სტრატეგია და მოლდოვაში გადადგმული ნაბიჯები მოწმობს ევროპული ქვეყნების საერთო მიმართულებაზე. „ბოლო რამდენიმე წლის განმავლობაში ჩვენ, ევროპელებმა, გადავწყვიტეთ კოლექტიური განგაშის ატეხვა, რათა არ ვიყოთ დამოკიდებული არცერთ დიდ ძალაზე. ეს ასევე სტრატეგიული ავტონომიის ერთ-ერთი მნიშვნელოვანი წინაპირობაა,“ - განაცხადა მაკრონმა.
სომხეთმა და გაერთიანებულმა სამეფომ სტრატეგიული პარტნიორობის შეთანხმება გააფორმეს
სომხეთის პრემიერ-მინისტრმა ნიკოლ ფაშინიანმა და გაერთიანებული სამეფოს პრემიერ-მინისტრმა კირ სტარმერმა ხელი მოაწერეს ერთობლივ დეკლარაციას ორ ქვეყანას შორის სტრატეგიული პარტნიორობის შესახებ. ინფორმაციას სომხეთის პრემიერ-მინისტრი ნიკოლ ფაშინიანი ავრცელებს. „გაერთიანებული სამეფოს პრემიერ-მინისტრ კირ სტარმერთან ერთად დღეს გაფორმებული სტრატეგიული პარტნიორობის შესახებ დეკლარაციით, ვხსნით ახალ და პერსპექტიულ თავს გაერთიანებულ სამეფოსა და სომხეთს შორის ურთიერთობებში, რომელიც საერთო ღირებულებებსა და გაძლიერებულ თანამშრომლობაზეა აგებული,“ - აცხადებს ფაშინიანი. თავის მხრივ, გაერთიანებული სამეფოს პრემიერ-მინისტრმა ხაზი გაუსვა სომხეთთან მრავალსექტორული თანამშრომლობის გაფართოების მნიშვნელობას. თანამოსაუბრეებმა გაცვალეს მოსაზრებები როგორც ორმხრივი დღის წესრიგის, ასევე, რეგიონული მნიშვნელობის თემების შესახებ.
ფიცო: რუსეთთან ნებისმიერი სამშვიდობო შეთანხმება შეუძლებელია უკრაინის თანხმობის გარეშე
სლოვაკეთის პრემიერ-მინისტრ რობერტ ფიცო უკრაინის პრეზიდენტ ვოლოდიმირ ზელენსკისთან გამართული სატელეფონო საუბრის შემდეგ სოციალურ ქსელში წერს, რომ რუსეთთან არანაირი სამშვიდობო შეთანხმება არ არის შესაძლებელი უკრაინის თანხმობის გარეშე. ფიცოს თქმით, ზოგიერთ საკითხზე განსხვავებული აზრის მიუხედავად, მხარეებს სლოვაკეთსა და უკრაინას შორის კარგი და მეგობრული ურთიერთობების საერთო ინტერესი აქვთ. „დავადასტურე, რომ სლოვაკეთი მხარს უჭერს უკრაინის მისწრაფებებს, გახდეს ევროკავშირის წევრი, ვინაიდან სლოვაკეთს სურს, რომ ჩვენი მეზობელი უკრაინა სტაბილური და დემოკრატიული ქვეყანა იყოს. შევთანხმდით, რომ მოკლე შეხვედრა გვექნება ორშაბათს [4 მაისს] ერევანში ევროპული პოლიტიკური გაერთიანების სამიტზე და გავაგრძელებთ ერთობლივი სამთავრობო სხდომების ფორმატს, და ვიზიტები გვექნება ჩვენი ქვეყნების დედაქალაქებში. ასევე აღვნიშნე, რომ რუსეთის ფედერაციასთან სამხედრო კონფლიქტში არანაირი სამშვიდობო შეთანხმება შეუძლებელია უკრაინული მხარის თანხმობის გარეშე,“ - წერს ფიცო. მანამდე ზელენსკიმ ფიცოსთან საუბრის შესახებ ინფორმაცია გაავრცელა. ზელენსკიმ ხაზი გაუსვა ორ ქვეყანას შორის მჭიდრო ურთიერთობების აუცილებლობას. „მნიშვნელოვანი იყო იმის მოსმენა, რომ სლოვაკეთი მხარს უჭერს უკრაინის ევროკავშირში გაწევრიანებას და [ეს ქვეყანა] მზადაა, გაგვიზიაროს ევროკავშირში გაწევრიანების გამოცდილება,“ - წერდა ზელენსკი. უკრაინის პრეზიდენტმა ფიცო კიევში მიიწვია და თავის მხრივ, სლოვაკეთის პრეზიდენტს მადლობა გადაუხადა ბრატისლავაში მიწვევისთვის. უფრო ადრე, „დრუჟბას“ მილსადენის მეშვეობით ნავთობის ტრანზიტის აღდგენამდე, ფიცომ ბრიუსელს მოუწოდა, დაევიწყებინა სლოვაკეთის მხარდაჭერა უკრაინის ევროკავშირში დაჩქარებული გაწევრიანების მიმართ. 30 აპრილს ევროკომისიამ განაცხადა, რომ სლოვაკეთის პრემიერ-მინისტრი რობერტ ფიცო და სერბეთის პრეზიდენტი ალექსანდრ ვუჩიჩი 9 მაისს კიევში უნდა ჩავიდნენ თავიანთი მხარდაჭერის დემონსტრირებისთვის და არა — მოსკოვში. ევროპარლამენტი რეზოლუციით მოუწოდებს ევროკომისიას, გაყინოს ევროკავშირის დაფინანსება სლოვაკეთისთვის Reuters-ი რუსეთის სახელმწიფო ტელევიზიაზე დაყრდნობით წერს, რომ სლოვაკეთის პრემიერ-მინისტრი რობერტ ფიცო იმ მცირერიცხოვან ლიდერებს შორისაა, რომლებიც ამ თვეში მოსკოვში აღლუმს დაესწრებიან. ცნობისთვის, უნგრეთმა და სლოვაკეთმა რუსული გაზის მიღება განაგრძეს, მიუხედავად ევროკავშირის მცდელობისა, ბოლო მოეღოს ბლოკის რუსულ ენერგიაზე დამოკიდებულებას. ფიცომ ევროკავშირთან ურთიერთობა, რუსეთის მიერ უკრაინაში სრულმასშტაბიანი შეჭრიდან ორი წლის შემდეგ, 2024 წელს მოსკოვში ვიზიტითაც დაარღვია და გასულ წელს, წითელ მოედანზე გამართული აღლუმის შემდეგ კრემლში რუსეთის ლიდერს ვლადიმერ პუტინს შეხვდა, რასაც სლოვაკეთის ოპოზიციისა და ბრიუსელის მხრიდან კრიტიკა მოჰყვა. 9 მაისს გამართულ საზეიმო ღონისძიებებზე მოსკოვში ასევე იქნება ბელორუსის ლიდერი ალექსანდრე ლუკაშენკო.
ერევანი „ევროპის პოლიტიკური თანამეგობრობისა" და ევროკავშირი-სომხეთის სამიტებს უმასპინძლებს
სომხეთი “ევროპის პოლიტიკური თანამეგობრობის” სამიტს მასპინძლობს. რიგით მერვე სამიტი 4 მაისს სლოგანით — „მომავლის მშენებლობა: ერთიანობა და სტაბილურობა ევროპაში“ გაიმართება. ევროკავშირი-სომხეთის სამიტი ერთობლივი დეკლარაციისა და სხვა ორმხრივი დოკუმენტების ხელმოწერით დასრულდება. ერევანში 3 მაისს ჩავიდნენ: საფრანგეთის პრეზიდენტი ემანუელ მაკრონი, დიდი ბრიტანეთის პრემიერ-მინისტრი კირ სტარმერი, ირლანდიის პრემიერ-მინისტრი მაიკლ მარტინი, ევროკავშირის დელეგაცია, რომლის შემადგენლობაში არიან ევროკომისიის პრეზიდენტი ურსულა ფონ დერ ლაიენი, ევროპული საბჭოს პრეზიდენტი ანტონიუ კოშტა, ევროპარლამენტის პრეზიდენტი რობერტა მეცოლა და საგარეო და უსაფრთხოების საკითხებში ევროკომისარი კაია კალასი, ჩეხეთის პრემიერ-მინისტრი ანდრეი ბაბიში, ბელგიის პრემიერ-მინისტრი ბარტ დე ვევერი, მოლდოვის პრეზიდენტი მაია სანდუ, რუმინეთის პრეზიდენტი ნიკუშორ დანი, პოლონეთის პრემიერ-მინისტრი დონალდ ტუსკი, სერბეთის პრემიერ-მინისტრი ჯურო მაკუტი, მონაკოს პრინცი ალბერ II, საბერძნეთის პრეზიდენტი კონსტანტინოს ტასულასი, ლუქსემბურგის პრემიერ-მინისტრი ლუკ ფრიდენი, ბულგარეთის პრეზიდენტი ილიანა იოტოვა, ჩრდილოეთ მაკედონიის პრეზიდენტი გორდანა სილიანოვსკა-დავკოვა, კოსოვოს პრემიერ-მინისტრი ალბინ კურტი ჩავიდა, ლიეტუვის რესპუბლიკის პრემიერ-მინისტრი ინგა რუგინიენე, ევროპის საბჭოს გენერალური მდივანი ალენ ბერსე, კანადის ახალი პრემიერ-მინისტრი მარკ კარნი, ანდორის პრემიერ-მინისტრი ხავიერ ესპოტ სამორა, მონტენეგროს პრეზიდენტი იაკობ მილატოვიჩი, ეუთოს გენერალური მდივანი ფერიდუნ სინირლიოღლუ. დაგეგმილ ღონისძიებასთან დაკავშირებით ისაუბრა სომხეთის პრემიერმა. ნიკოლ ფაშინიანმა აღნიშნა, რომ 5 მაისს საფრანგეთის პრეზიდენტის ემანუელ მაკრონის სახელმწიფო ვიზიტი შედგება. ფაშინიანსა და მაკრონს შორის შეხვედრა გაიმართება, რასაც ორი ქვეყნის დელეგაციების გაფართოებული შეხვედრა მოჰყვება. დოკუმენტების ხელმოწერის ცერემონიის შემდეგ, პრემიერ-მინისტრი ნიკოლ ფაშინიანი და პრეზიდენტი ემანუელ მაკრონი მედიისთვის განცხადებებს გააკეთებენ. ფაშინიანის თქმით, 5 მაისს ასევე გაიმართება სომხეთი-ევროკავშირის პირველი სამიტი. „ხვალ ევროპა სომხეთში შეიკრიბება ევროპის პოლიტიკური საზოგადოების მერვე სამიტზე. კონტინენტის ლიდერები, მათ შორის, კანადა, განიხილავენ, თუ როგორ ითანამშრომლონ უსაფრთხოებისა და კოლექტიური მდგრადობის გასაძლიერებლად. სამშაბათს ჩვენ ჩავატარებთ სომხეთ-ევროკავშირის პირველ სამიტს, რომელიც გახდება მნიშვნელოვანი ეტაპი ჩვენი ორმხრივი თანამშრომლობის გაღრმავებისა და ჩვენი მოქალაქეებისა და ბიზნესისთვის ხელშესახები შეგედების მიღწევის თვალსაზრისით,“ - აღნიშნა თავის მხრივ, ანტონიუ კოშტამ. სომხეთში ჩავიდა უკრაინის პრეზიდენტიც. ვოლოდიმირ ზელენსკიმ განაცხადა, რომ ერევანში ვიზიტის დროს მან ფინეთის პრემიერ-მინისტრ პეტერი ორპოსთან არაერთი საკითხი განიხილა, მათ შორის, უკრაინის ევროპული ინტეგრაცია. „მადლობა გადავუხადე მას ფინეთის მიერ უკრაინისთვის თავდაცვის მხარდაჭერის დამატებით 300 მილიონი დოლარის გამოყოფის ბოლოდროინდელი გადაწყვეტილებისთვის. ჩვენ გულწრფელად ვაფასებთ ამას და განვიხილეთ ჩვენი თავდაცვის პრიორიტეტული სფეროები - პირველ რიგში, საჰაერო თავდაცვა, რომლის გაძლიერებაც სწორედ ამ პაკეტით შეიძლება. მე შევთავაზე პრემიერ-მინისტრს, რომ გავაძლიეროთ ჩვენი ორმხრივი პარტნიორობა დრონების შეთანხმების ფორმატში ხელმოწერით. უკრაინა მზადაა, გააზიაროს თავისი გამოცდილება და გააძლიეროს ისინი, ვინც სრულმასშტაბიანი შეჭრის დასაწყისიდანვე გვაძლიერებდა. ჩვენ ასევე ცალკე შევეხეთ საერთაშორისო ძალისხმევას, კერძოდ, ჩვენს ევროპულ ინტეგრაციას. ახლა არის კარგი შესაძლებლობა მოლაპარაკებების გასახსნელად და უკრაინა ამას სრულად იმსახურებს. მადლობა ფინეთს მხარდაჭერისთვის!“ - დაწერა ზელენსკიმ სოციალურ ქსელში. ზელენსკიმ ასევე განაცხადა, რომ ნორვეგიის პრემიერ-მინისტრ იონას გარ შტორესთან განიხილა დრონების შესახებ შეთანხმება და საჰაერო თავდაცვის გაძლიერება. უკრაინის პრეზიდენტის თქმით, მან მადლობა გადაუხადა სტორეს უკრაინისთვის გაწეული მხარდაჭერისთვის, კერძოდ, PURL პროგრამაში თითქმის ერთი მილიარდი დოლარის ოდენობის ინვესტიციებისთვის. „რუსეთი აგრძელებს ბალისტიკური რაკეტებით დარტყმებს, ამიტომ PURL-ის დროული დაფინანსება კრიტიკულად მნიშვნელოვანია. ჩვენ განვიხილეთ ჩვენი სტრატეგიული პარტნიორობა - დრონების შესახებ შეთანხმება და საჰაერო თავდაცვის გაძლიერების მცდელობები, ასევე, კერძო და საჯარო სექტორებს შორის თანამშრომლობა. ასევე, განსაკუთრებული ყურადღება გავამახვილეთ უკრაინის ენერგეტიკული მხარდაჭერის საკითხზე. მე მას ვაცნობე ჩვენი საჭიროებების შესახებ, კერძოდ — ბუნებრივი აირის საკითხზე მომავალი ზამთრისთვის. უკრაინა სრულად მომზადებული უნდა იყოს,“ - წერს ზელენსკი. სომხეთის რესპუბლიკას ეწვია საქართველოს პრემიერ-მინისტრიც. ირაკლი კობახიძე ევროპული პოლიტიკური გაერთიანების მე-8 სამიტში მიიღებს მონაწილეობას. საქართველოს პრემიერ-მინისტრი დღეს ესწრება ოფიციალურ მიღებას, რომელიც სომხეთის რესპუბლიკის პრეზიდენტ ვაჰაგნ ხაჩატურიანისა და პრემიერ-მინისტრ ნიკოლ ფაშინიანის სახელით, ევროპული პოლიტიკური გაერთიანების მე-8 სამიტში მონაწილე ლიდერთა პატივსაცემად იმართება. ირაკლი კობახიძე ერევანს დელეგაციასთან ერთად ეწვია, რომლის შემადგენლობაში საქართველოს ვიცე-პრემიერი, საგარეო საქმეთა მინისტრი მაკა ბოჭორიშვილი და მთავრობის ადმინისტრაციის უფროსი ლევან ჟორჟოლიანი არიან. რაც შეეხება სამიტს, ევროპული საბჭოს განცხადებით, გეოპოლიტოკური ტრანსფორმაციის ხანაში, ლიდერები იმსჯელებენ, როგორ ითანამშრომლონ უფრო მჭიდროდ და იმოქმედონ კოორდინირებულად დემოკრატიული მედეგობის განსამტკიცებლად, დაკავშირებადობის განსავითარებლად და ეკონომიკური და ენერგოუსაფრთხოების გასაძლიერებლად.“
ევროკავშირმა სერბეთს დაფინანსება გაუყინა, ვიდრე ბელგრადი ვენეციის კომისიის რეკომენდაციებს არ შეასრულებს
ევროკავშირმა სერბეთს დაფინანსება გაუყინა, ვიდრე ბელგრადი ვენეციის კომისიის რეკომენდაციებს არ შეასრულებს. გაფართოების საკითხებში ევროკომისარმა მარტა კოსმა განაცხადა, რომ ევროკავშირი სერბეთისგან ელოდება ვენეციის კომისიის რეკომენდაციების შესრულებას, რომლებიც ეხება სასამართლო სისტემასა და პროკურატურაში დამტკიცებულ ცვლილებებს. სერბეთი კრემლის ახლო მოკავშირეა და ერთ-ერთი იმ მცირერიცხოვან ევროპულ სახელმწიფოთაგანია, რომელიც რუსეთს უკრაინაში ომის გამო სანქციებს არ უწესებს.
“ეხო კავკაზა“ დაიხურა
2026 წლის პირველი მაისიდან მუშაობა შეწყვიტა რადიო თავისუფლების რუსულენოვანმა განყოფილებამ — “ეხო კავკაზა“, რომელიც ოკუპირებულ აფხაზეთსა და სამხრეთ ოსეთის აუდიტორიაზე იყო ორიენტირებული. ამის შესახებ ოფიციალური განცხადება „ეხო კავკაზას“ რედაქციამ 3 მაისს გაავრცელა. როგორც განცხადებაშია აღნიშნული, RFE/RL-ის პრეზიდენტმა და გენერალურმა დირექტორმა გადაწყვეტილება რესტრუქტურიზაციის აუცილებლობით ახსნა. რადიო „ეხო კავკაზა“ 2009 წლის 2 ნოემბერს შეიქმნა. 2022 წლიდან „ეხო კავკაზას“ ვებგვერდი რუსეთის ტერიტორიაზე დაბლოკილი იყო. მას შემდეგ, რაც RFE/RL რუსეთში „არასასურველ ორგანიზაციად“ გამოცხადდა, რედაქცია ოკუპირებულ აფხაზეთსა და ე.წ. სამხრეთ ოსეთში წყაროებთან მხოლოდ ანონიმურ ფორმატში მუშაობდა. „ეხო კავკაზას“ რედაქციის განცხადებით, ვებსაიტი www.ekhokavkaza.com აღარ განახლდება, თუმცა ის ხელმისაწვდომი დარჩება არქივის რეჟიმში. რედაქცია იმედოვნებს, რომ წლების განმავლობაში დაგროვილი მასალები მომავალშიც მნიშვნელოვანი ინფორმაციის წყაროდ დარჩება მათთვის, ვინც რეგიონს იკვლევს. ცნობისთვის, 31 მარტს „რადიო თავისუფალი ევროპა/რადიო თავისუფლებამ“ ბულგარეთში, რუმინეთსა და ჩრდილოეთ მაკედონიაში მომუშავე სამსახურები დახურა.
ვენეციის ბიენალეს ჟიურის თავმჯდომარე და წევრები ღონისძიების გახსნამდე 9 დღით ადრე გადადგნენ
ხელოვნების საერთაშორისო გამოფენის ვენეციის ბიენალეს ჟიურის თავმჯდომარე და წევრები ღონისძიების გახსნამდე 9 დღით ადრე გადადგნენ. ბიენალეს ოფიციალურ ვებგვერდზე გამოქვეყნებულ პრესრელიზში დასახელებული არ არის გადადგომის მიზეზი. ჟიურის წევრებმა რამდენიმე დღის წინ განაცხადეს, რომ ჯილდოებზე წარსადგენად არ განიხილავდნენ ხელოვანებს იმ ქვეყნებიდან, რომელთა ლიდერებსაც საერთაშორისო სისხლის სამართლის სასამართლო კაცობრიობის წინააღმდეგ ჩადენილ დანაშაულებში ადანაშაულებს. ვენეციის ბიენალე კრიტიკის ქარცეცხლში მოექცა მას შემდეგ, რაც ორგანიზატორებმა რუსეთს ღონისძიებაზე პავილიონის ხელახლა გახსნის უფლება მისცეს. ევროკომისიამ განაცხადა, რომ ბიენალეს წერილი გაუგზავნა, რომლითაც აცნობა 2 მილიონი ევროს ოდენობის გრანტის შეწყვეტის ან შეჩერების განზრახვის შესახებ, მას შემდეგ, რაც მათ მოსკოვის მონაწილეობის უფლება მისცეს. „თავიდანვე, ვენეციის ბიენალეს მხდლური არჩევანი, ეღიარებინა რუსეთი, სამარცხვინო იყო. დღეს ჩვენ ვხედავთ, თუ როგორ აგრძელებს ის ვენეციის ბიენალესთვის ზიანის მიყენებას. უკრაინა მადლიერია ყველა იმ ადამიანის, ვინც, მორალური პასუხისმგებლობითა და დემოკრატიული ღირებულებებისადმი ერთგულებით ხელმძღვანელობით, უარს ამბობს ამ სირცხვილის მიღებაზე. მოვუწოდებთ ვენეციის ბიენალეს, შეცვალოს თავისი გადაწყვეტილება და არ დაუშვას რუსეთი. ჯერ კიდევ არის დრო, რომ დავუბრუნდეთ პრინციპულ პოზიციას, რომელსაც ხელოვნების საერთაშორისო საზოგადოება ინარჩუნებს რუსეთის მიერ უკრაინის წინააღმდეგ სასტიკი სრულმასშტაბიანი ომის დაწყებიდან,“ - აცხადებს თავის მხრივ უკრაინის საგარეო საქმეთ მინისტრი ანდრი სიბიჰა. ცნობისთვის, ვენეციის ბიენალე - თანამედროვე ხელოვნების საერთაშორისო გამოფენა ორ წელიწადში ერთხელ იმართება. ვენეციის 61-ე ბიენალე წელს 9 მაისს იხსნება და 22 ნოემბრამდე გაგრძელდება.
აზერბაიჯანის პარლამენტი ევროპარლამენტთან ურთიერთობას წყვეტს
აზერბაიჯანმა ევროპარლამენტთან თანამშრომლობა შეაჩერა. აზერბაიჯანი წყვეტს მონაწილეობას ევროკავშირი-აზერბაიჯანის საპარლამენტო თანამშრომლობის კომიტეტში და იწყებს ევრონესტის საპარლამენტო ასამბლეაში აზერბაიჯანის წევრობის შეწყვეტის პროცედურას. მილი მეჯლისის გადაწყვეტილებაში ნათქვამია, რომ აზერბაიჯანის რესპუბლიკის მილი მეჯლისი, უცხო ქვეყნების პარლამენტებთან და საერთაშორისო საპარლამენტო ორგანიზაციებთან ურთიერთობებში, ხელმძღვანელობს მშვიდობის, უსაფრთხოებისა და მდგრადი განვითარების მიზნით ერთობლივი საქმიანობით და ხელს უწყობს ღია, გულწრფელ და კონსტრუქციულ დიალოგს, რომელიც დაფუძნებულია საპარლამენტო ღირებულებებსა და საერთო ინტერესებზე. დოკუმენტში აღნიშნულია, რომ ევროპარლამენტის დესტრუქციული პოზიცია, რომელიც უარყოფს აღნიშნულ პრინციპებს, ამ ორგანოსთან ორმხრივი და მრავალმხრივი თანამშრომლობის ურთიერთობების განვითარებისთვის მთავარი დაბრკოლება გახდა. „მიუხედავად იმისა, რომ აზერბაიჯანის რესპუბლიკის მილი მეჯლისმა 2015 წელს ამ დამოკიდებულების გამო ევროპარლამენტთან ყველანაირი ურთიერთობა შეწყვიტა, მოგვიანებით მან მეორე მხარის მრავალი მოწოდებისა და დაპირების საფუძველზე აღადგინა თანამშრომლობა. ამის მიუხედავად, ევროპარლამენტმა არ შეასრულა თავისი დაპირებები და თანმიმდევრულად განაგრძო ანტიაზერბაიჯანული პოლიტიკა, ცილისწამების კამპანია,“ - აღნიშნულია დოკუმენტში. აზერბაიჯანის მილი მეჯლისში აცხადებენ, რომ ოკუპირებული ტერიტორიების გათავისუფლების და ქვეყნის ტერიტორიული მთლიანობისა და სუვერენიტეტის აღდგენის შემდეგ ევროპარლამენტის ამ საქმიანობამ კიდევ უფრო დიდი მასშტაბები შეიძინა. დოკუმენტში ხაზგასმულია, რომ ზემოაღნიშნულის გათვალისწინებით, მილი მეჯლისმა მიიღო შემდეგი გადაწყვეტილებები: „შეჩერდება აზერბაიჯანის რესპუბლიკის მილი მეჯლისის თანამშრომლობითი ურთიერთობები ევროპის პარლამენტთან ყველა მიმართულებით. შეწყდება აზერბაიჯანის რესპუბლიკის მილი მეჯლისის მონაწილეობა ევროკავშირი-აზერბაიჯანის საპარლამენტო თანამშრომლობის კომიტეტის საქმიანობაში. ევრონესტის საპარლამენტო ასამბლეის წესდების შესაბამისად, დაიწყება აზერბაიჯანის რესპუბლიკის მილი მეჯლისის ამ ორგანიზაციაში წევრობის შეწყვეტის პროცედურული წესების ამოქმედება და პროცედურის პერიოდში მილი მეჯლისის დელეგაცია არ მიიღებს მონაწილეობას ევრონესტის საპარლამენტო ასამბლეის ღონისძიებებში,“ - აღნიშნულია დოკუმენტში. დღეს აზერბაიჯანის რესპუბლიკაში ევროკავშირის ელჩი მარიანა კუიუნჯიჩი საგარეო საქმეთა სამინისტროში დაიბარეს. აზერბაიჯანის საგარეო საქმეთა სამინისტროს ცნობით, შეხვედრაზე მკაცრად დაგმეს ევროპარლამენტის მიერ 30 აპრილს აზერბაიჯანის წინააღმდეგ მიღებულ რეზოლუციაში შემავალი „უსაფუძვლო და მიკერძოებული დებულებები და ამასთან დაკავშირებით მეორე მხარეს პროტესტის ნოტა გადაეცა.“
დიდი ბრიტანეთის მეფის ვიზიტის შემდეგ, ტრამპმა ვისკიზე ტარიფები გააუქმა
აშშ-ის პრეზიდენტმა დონალდ ტრამპმა განაცხადა, რომ მეფე ჩარლზისა და დედოფალ კამილას აშშ-ში სახელმწიფო ვიზიტის პატივსაცემად, ის შოტლანდიური ვისკის იმპორტზე ყველა ტარიფსა და შეზღუდვას მოხსნის. დიდი ბრიტანეთის მთავრობამ დაადასტურა, რომ ეს ეხება ვისკის ყველა ტარიფს, მათ შორის, ირლანდიურ ვისკის. Truth Social-ზე გამოქვეყნებულ პოსტში ტრამპმა განაცხადა, რომ ეს ნაბიჯი „დიდი ბრიტანეთის მეფისა და დედოფლის პატივსაცემად გადადგა. „მეფემ და დედოფალმა ისეთი რამის გაკეთება მაიძულეს, რისი გაკეთებაც სხვას არავის შეეძლო, თითქმის თხოვნის გარეშე! დიდი პატივია, რომ ისინი აშშ-ში იმყოფებიან,“ – განაცხადა ტრამპმა. დონალდ ტრამპმა გაერთიანებული სამეფოს მეფე ჩარლზი შეაქო და განაცხადა, რომ პრემიერ-მინისტრმა კირ სტარმერმა მისგან უნდა ისწავლოს.
აშშ-სა და ვენესუელას შორის კომერციული ფრენები განახლდა
შვიდი წლის შემდეგ პირველად, აშშ-სა და ვენესუელას შორის კომერციული ფრენები განახლდა. American Airlines-ის პირველი რეისი, რომელიც სამ საათამდე გაგრძელდა, მაიამიდან კარაკასში, სიმონ ბოლივარის საერთაშორისო აეროპორტში ჩაფრინდა. ამერიკული ავიახაზების რეისიები ვენესუელის მიმართულებით ყოველდღიურად შესრულდება. მედიის ცნობით, თვითმფრინავის ბორტზე მგზავრებს შორის უმეტესობას მედიის წარმომადგენლები და ოფიციალური პირები შეადგენდნენ. ვენესუელაში გამგზავრების საფასური თარიღისა და ბილეთის ტიპის მიხედვით იცვლება, თუმცა ორმხრივი ბილეთის ფასი დაახლოებით 1 000 დოლარს შეადგენს. ვენესუელაში აშშ-ის საელჩომ მუშაობა ოფიციალურად განაახლა
ევროპარლამენტი რეზოლუციით მოუწოდებს ევროკომისიას, გაყინოს ევროკავშირის დაფინანსება სლოვაკეთისთვის
ევროპარლამენტმა ევროკომისიას მოუწოდა, განიხილოს სლოვაკეთისთვის ევროკავშირის დაფინანსების გაყინვის საკითხი, რადგან პრემიერ-მინისტრ რობერტ ფიცოს მმართველობის დროს კანონის უზენაესობის დარღვევის გამო, შეშფოთება იზრდება. პარლამენტმა 418 ხმით 207-ის წინააღმდეგ დაამტკიცა რეზოლუცია, რომელიც ევროკომისიას ოფიციალურად მოუწოდებს, ე.წ. პირობითობის მექანიზმი პირველად გამოიყენოს და ევროკავშირის ბიუჯეტიდან სლოვაკეთის დაფინანსება შეწყვიტოს. ცნობისთვის, პარლამენტის გადაწყვეტილება პოლიტიკური სიგნალია და არა — სავალდებულო ბრძანება. კომისიას შეუძლია, გადაწყვიტოს, რა რეაგირება უნდა მოახდინოს, ხოლო ნებისმიერი ფინანსური ზომა კვლავ საჭიროებს ევროკავშირის წევრი სახელმწიფოების კვალიფიციური უმრავლესობის მიერ საბჭოში დამტკიცებას.
დიდი ბრიტანეთი და მისი მოკავშირეები „ჩრდილოეთის ფლოტის“ ალიანსს ქმნიან
დიდი ბრიტანეთი რუსეთის მხრიდან საფრთხის ზრდის ფონზე, არქტიკასა და ჩრდილო-დასავლეთ ევროპაში თავდაცვის გაძლიერების მიზნით, მრავალეროვნულ საზღვაო ძალებს აერთიანებს. „ჩრდილოეთის ფლოტის“ ალიანსის სრულ საბრძოლო მზადყოფნაში მოყვანა 2029 წლისთვის იგეგმება. გენერალმა გვინ ჯენკინსმა განაცხადა, რომ გასულ კვირას გამართული შეხვედრის შემდეგ, ჩრდილოეთ ევროპის საზღვაო ძალების უფროსებმა ხელი მოაწერეს „განზრახვების განცხადებას“, რათა „ჩრდილოეთის საზღვაო ძალების ინიციატივის“ დეტალები შემუშავებულიყო. მისი ინფორმაციით, ახალი ალიანსის შექმნა იგეგმება გაერთიანებული საექსპედიციო ძალების ბაზაზე, რომელშიც შედიან დიდი ბრიტანეთის, დანიის, ფინეთის, ესტონეთის, ისლანდიის, ლატვიის, ლიეტუვის, ნიდერლანდების, შვედეთისა და ნორვეგიის სამხედროები. „დიდი ბრიტანეთი ჩრდილოეთ მოკავშირეებისგან შემდგარი საზღვაო ძალების ახალ მრავალეროვნულ ძალას აერთიანებს, რათა რუსეთის მხრიდან მზარდი საფრთხის ფონზე საბრძოლველად და საკუთარი ზღვების დასაცავად მზად იყვნენ,“ განაცხადა სამეფო საზღვაო ძალების მთავარსარდალმა გვინ ჯენკინსმა. მისი შეფასებით, ახლა „გარდამტეხი ეტაპია“, როდესაც „დროის დაკარგვა აღარ შეიძლება.“ ალიანსის მართვა ლონდონიდან განხორციელდება.
იტალიისთვის აშშ-ის მიერ ჯარების შესაძლო შემცირების მიზეზი „გაუგებარია“
იტალიას არ ესმის, რა მიზეზით უნდა შეამციროს შეერთებულმა შტატებმა მის ქვეყანაში ჯარების რაოდენობა. თავდაცვის მინისტრ გვიდო კროსეტოს განცხადებით, იტალიამ ჰორმუზის სრუტეში საზღვაო უსაფრთხოების მისიაში მონაწილეობისთვის მზადყოფნა დააფიქსირა. „არ მესმის მიზეზი. როგორც ყველასთვის ნათელია, ჩვენ არ გამოგვიყენებია ჰორმუზის სრუტე და მზადყოფნაც კი, გამოვთქვით საზღვაო უსაფრთხოების მისიაში მონაწილეობისთვის, რასაც, სხვათა შორის, აშშ-ის სამხედროებმა მაღალი შეფასება მისცეს,“ - განაცხადა იტალიის თავდაცვის მინისტრმა აშშ-ის პრეზიდენტ დონალდ ტრამპის განცხადებასთან დაკავშირებით კომენტირებისას. ცნობისთვის, აშშ-ის პრეზიდენტის დონალდ ტრამპის განცხადებით, აშშ-ის ჯარების გაყვანას იტალიიდან და ესპანეთიდანაც განიხილავს. კითხვაზე, განიხილავს თუ არა აშშ-ის ჯარების იტალიიდან და ესპანეთიდან გაყვანას მას შემდეგ რაც მან მიანიშნა, რომ შესაძლოა, ეს გერმანიასთან დაკავშირებით გააკეთოს, ტრამპმა უპასუხა: „ალბათ. რატომ არ უნდა გავაკეთო ეს? იტალიამ არანაირი დახმარება არ გაგვიწია და ესპანეთი საშინელება იყო. როდესაც გვჭირდებოდნენ, ჩვენთან არ იყვნენ. ირანთან დაკავშირებით არანაირი დახმარება არ გვჭირდებოდა. მათი დახმარება არ მჭირდებოდა, მაგრამ ვუთხარი, რომ კი, ძალიან გვსურს თქვენი დახმარება, რადგან მინდოდა მენახა, გააკეთებდნენ თუ არა ამას და ყველა შემთხვევაში, მათ თქვეს, „არ გვინდა ჩარევა.“
უკრაინა: რუსეთის მიერ მოპარული მარცვლეულით დატვირთულ გემს ისრაელში არ მიიღებენ
უკრაინის განცხადებით, რუსეთის მიერ მოპარული მარცვლეულით დატვირთული გემი ისრაელში არ გადმოიტვირთება. მანამდე, კიევმა ისრაელს ტვირთის ჩამორთმევა მოსთხოვა. უკრაინის გენერალურმა პროკურორმა რუსლან კრავჩენკომ განაცხადა, რომ გემმა „პანორმიტისმა“ ისრაელის ტერიტორიული წყლები დატოვა და ნეიტრალურ წყლებში გადავიდა. უკრაინის გენერალური პროკურატურის განცხადებით, მის მიერ მიღებული პროცესუალური ზომებისა და ისრაელისთვის შესაბამისი მასალების გაგზავნის შედეგად, ჩაიშალა რუსეთის მცდელობა, მოეხდინა უკრაინის დროებით ოკუპირებული ტერიტორიებიდან უკანონოდ გატანილი ხორბლის ლეგალიზება. პროკურატურის განცხადებით, ნეიტრალურ წყლებში გემის შესვლა არ ნიშნავს სისხლისსამართლებრივი წარმოების შეწყვეტას და პასუხისმგებლობისგან არ ათავისუფლებს ამ საქმესთან კავშირის მქონე პირებს. „საერთაშორისო სამართლებრივი თანამშრომლობის ფარგლებში უკრაინული მხარის მიერ მოწოდებული მასალების საფუძველზე, ისრაელის კომპეტენტურმა ორგანოებმა მოთხოვნის დამუშავება დაიწყეს,“ - განაცხადა კრავჩენკომ. ისრაელის საგარეო საქმეთა სამინისტრომ განაცხადა, რომ სამშაბათს გვიან ღამით წარდგენილი იურიდიული დახმარების მოთხოვნა „შეიცავდა მნიშვნელოვან ფაქტობრივ ხარვეზებს და არ მოიცავდა რაიმე დამადასტურებელ მტკიცებულებას.“ სამინისტროს თქმით, მას აცნობეს, რომ გემმა, რომელიც მომავალ კვირას პორტში უნდა შესულიყო, ისრაელის ტერიტორიული წყლების დატოვება გადაწყვიტა. Reuters-ი წერს, რომ პანამის დროშის ქვეშ მცურავი გემის მენეჯერი კომენტარისთვის მიუწვდომელია. „ჩვენ ვაფრთხილებთ ყველა სუბიექტსა და ერს, რომ ჩვენი მარცვლეულის ნებისმიერ ქურდობაზე მკაცრ რეაგირებას მოვახდენთ,“ - განაცხადა საგარეო საქმეთა მინისტრმა ანდრი სიბიჰამ ამ კვირის დასაწყისში. „მისასალმებელია, რომ PANORMITIS, რომელსაც უკრაინის დროებით ოკუპირებული ტერიტორიებიდან მარცვლეული უკანონოდ გადააქვს, ისრაელში ტვირთს არ გადატვირთავს. ეს ადასტურებს, რომ უკრაინის სამართლებრივი და დიპლომატიური ქმედებები ეფექტიანი იყო. ასევე, ეს მკაფიო სიგნალია ყველა სხვა გემის, კაპიტნის, ოპერატორის, სადაზღვევო ორგანოსა და მთავრობისთვის: არ შეიძინოთ მოპარული უკრაინული მარცვლეული. ამ დანაშაულის ნაწილი არ გახდეთ,“ - წერს თავის მხრივ, უკრაინის საგარეო საქმეთა მინისტრი ანდრი სიბიჰა X-ზე. უკრაინის საგარეო საქმეთა სამინისტროში 28 აპრილს გამოძახებული იყო ისრაელის ელჩი, რომელსაც საპროტესტო ნოტა გადასცეს „რუსეთის მიერ მოპარული უკრაინული ხორბლით უკანონო ვაჭრობის გამო.“ მანამდე ისრაელის საგარეო საქმეთა მინისტრმა გიდეონ საარმა განაცხადა, რომ ბრალდებების დამადასტურებელი მტკიცებულებები არ ჰქონდათ. რუსეთის სახელმწიფო სააგენტო „ტასის" ცნობით, კრემლის პრესმდივანმა დმიტრი პესკოვმა უარი თქვა უკრაინა-ისრაელის დავის კომენტირებაზე. ისრაელის ოფიციალური პირის თქმით, პანამის დროშის ქვეშ მცურავი „პანორმიტისის“ ბორტზე ხორბლისა და ქერის მიღების შესახებ გადაწყვეტილება ისრაელელმა იმპორტიორმა მიიღო და არა მთავრობის წარმომადგენელმა. უკრაინაში რუსეთის არმიის სრულმასშტაბიანი შეჭრისა და უკრაინის ტერიტორიების ნაწილის ოკუპირების შემდეგ, უკრაინამ რუსეთი არაერთხელ დაადანაშაულა ამ ტერიტორიებიდან წაღებული ხორბლითა და სხვა პროდუქტებით უკანონოდ ვაჭრობაში. მოსკოვმა კომენტარი არ გააკეთა იმ რეგიონებში მოპოვებული მარცვლეულის იურიდიულ სტატუსზე, რომლებიც საერთაშორისოდ აღიარებულია, როგორც უკრაინული.
