პოლიტიკა
აშშ-ის ელჩის რეზიდენციაში ოპოზიციის ლიდერებისა და უმრავლესობის წარმომადგენლების მორიგი შეხვედრა მიმდინარეობს
აშშ-ის ელჩის რეზიდენციაში ოპოზიციის ლიდერებისა და უმრავლესობის წარმომადგენლების მორიგი შეხვედრა მიმდინარეობს. არსებული ინფორმაციით, შეხვედრაში ევროკავშირის წევრი ქვეყნების ელჩებიც მონაწილეობენ. შეგახსენებთ, რომ პირველი შეხვედრა ამერიკის ელჩის რეზიდენციაში 12 ნოემბერს გაიმართა. აღნიშნულ შეხვედრაზე მხარეებმა ელჩებს არჩევნებთან დაკავშირებით თავიანთი მტკიცებულებები წარუდგინეს. დღესვე, ოპოზიცია, რუსთაველის გამზირზე აქციას გამართავს.
მაიკ პომპეოს საქართველოში ვიზიტს გამოვიყენებთ როგორც შესაძლებლობას, დავადასტუროთ ჩვენი მხარდაჭერა - აშშ-ის სახელმწიფო დეპარტამენტი
მაიკ პომპეოს საქართველოში ვიზიტს გამოვიყენებთ როგორც შესაძლებლობას, დავადასტუროთ ჩვენი მხარდაჭერა საქართველოს სუვერენიტეტისა და ტერიტორიული მთლიანობის მიმართ მის საერთაშორისოდ აღიარებულ საზღვრებში, - ამის შესახებ აშშ-ის სახელმწიფო დეპარტამენტში გამართულ ბრიფინგზე ისაუბრეს, სადაც ოფიციალურმა პირებმა აშშ-ის სახელმწიფო მდივნის, მაიკ პომპეოს საქართველოში, საფრანგეთში, თურქეთსა და სხვა ქვეყნებში დაგეგმილ ვიზიტებზე იმსჯელეს. აშშ-ის სახელმწიფო დეპარტამენტის ვებგვედზე გამოქვეყნებულ ინფორმაციაში ხაზგასმულია, რომ აშშ გმობს რუსეთის მიერ საქართველოს ოკუპაციას. „კიდევ ერთხელ, ცალსახად აღვნიშნავთ, რომ ვგმობთ 2008 წელს რუსეთის შეჭრას საქართველოს რეგიონებში, აფხაზეთსა და სამხრეთ ოსეთში, რომლებიც კვლავ ოკუპირებულია რუსეთის მიერ,“- აღნიშნულია ინფორმაციაში. ბრიფინგზე ასევე აღინიშნა, რომ აშშ განაგრძობს საქართველოს დახმარებას ევრო-ატლანტიკური კავშირების გაძლიერებაში. „რა თქმა უნდა, ერთგულნი ვრჩებით, დავეხმაროთ საქართველოს, გააღრმავოს მისი ევრო-ატლანტიკური კავშირები, გააძლიეროს დემოკრატიული ინსტიტუტები და პროცესები. საპარლამენტო არჩევნების მეორე ტური, დაახლოებით 16 საპარლამენტო მანდატისთვის, 21 ნოემბერს ჩატარდება. რა თქმა უნდა, თავისუფალი და სამართლიანი საარჩევნო პროცესი კრიტიკულად მნიშვნელოვანია საქართველოში დემოკრატიის განმტკიცებისთვის და ქართველი ხალხი ამ პროცესში აქტიურად მონაწილეობს”, – განაცხადა სახელმწიფო დეპარტამენტის ოფიციალურმა პირმა. მისივე თქმით, საქართველოში ვიზიტის ფარგლებში, პრეზიდენტის, პრემიერ-მინისტრის, საგარეო საქმეთა მინისტრისა და პატრიარქის გარდა სახელმწიფო მდივანი შეხვდება სამოქალაქო საზოგადოების წარმომადგენლებს ქვეყანაში სასამართლო დამოუკიდებლობის და კანონის უზენაესობის საკითხების განსახილველად. „სახელმწიფო მდივანი საქართველოს აქტიური სამოქალაქო საზოგადოების წარმომადგენლებს შეხვდება, რათა მოისმინოს მათი შეხედულებები კანონის უზენაესობასა და დამოუკიდებელ სასამართლოსთან დაკავშირებით,“- განაცხადა სახელმწიფო დეპარტამენტში. შეგახსენებთ, მაიკ პომპეო საქართველოში 17 ნოემბერს ორდღიანი ვიზიტით ჩამოდის.
დღეს ოპოზიცია რუსთაველის გამზირზე საპროტესტო აქციას გამართავს
რუსთაველის გამზირზე ოპოზიცია დღეს საპროტესტო აქციას გამართავს. აქციაზე ოპოზიცია ცესკოს მიერ გამოცხადებულ 2020 წლის საპარლამენტო არჩევნების შედეგებს გააპროტესტებს. საპროტესტო აქცია საქართველოს პარლამენტის შენობის წინ 15:00 საათზე დაიწყება. მას სხვადასხვა ოპოზიციური პოლიტიკური პარტიების წარმომადგენლები შეუერთდებიან. "ევროპული საქართველოს" ლიდერები და მხარდამჭერები 14:30 საათზე, პირველ სკოლასთან შეიკრიბებიან, რის შემდეგაც მსვლელობით პარლამენტთან გადაინაცვლებენ. შეგახსენებთ, 13 ნოემბერს „ლელოს” ოფისში ოპოზიციური პარტიების წარმომადგენლებს შორის შეხვედრა გაიმართა. შეხვედრაზე ოპოზიციური სპექტრის წარმომადგენლებმა რუსთაველის გამზირზე დაგეგმილი აქციის საორგანიზაციო საკითხებზე ისაუბრეს.
თენგიზ ფხალაძე: ჰოჯესის გზავნილი პომპეოს ვიზიტის წინ საექსპერტო წრეებისთვის დროული თემაა განსახილველად
მაიკ პომპეოს საქართველოში ვიზიტის წინ, ევროპაში აშშ-ის სახმელეთო ჯარების ყოფილი სარდლის, გენერალ-ლეიტენანტ ბენ ჰოჯესის ინტერვიუ, რომელიც „ევროპათაიმმა“ ჩაწერა, მედიაში განხილვის მთავარი თემაა. საქართველოში ინფრასტრუქტურის გაზრდაზე ბენ ჰოჯესის განცხადებას დროულ აქცენტად მიიჩნევენ ექსპერტებიც. შეიძლება თუ არა განვიხილოთ ეს განცხადება აშშ-ის სახელმწიფო მდივნის მაიკ პომპეოს საქართველოში ვიზიტის წინ მთავარ გზავნილად, რა ფორმით შეიძლება იყოს განხილული აშშ-ის მიერ საქართველოში ინფრასტრუქტურის გაძლიერება, ამ საკითხებზე „ევროპათაიმი“ საქართველოს პრეზიდენტის მრჩეველს პოლიტიკის საკითხებში, (2014-2018) ჯიპა-ს ასოცირებულ პროფესორს, თენგიზ ფხალაძეს ესაუბრა. „ზოგადად, ინფრასტრუქტურის განვითარება საქართველოს სტრატეგიულ ინტერესებში შედის, ამიტომ, ნუ ვიტყვით მაინცდამაინც ამერიკულ ინფრასტრუქტურას - ჩვენ უნდა გავაძლიეროთ ჩვენი ინფრასტრუქტურა, რომელიც მნიშვნელოვანი და საინტერესო შეიძლება იყოს ჩვენი სტრატეგიული პარტნიორებისთვის. აქ ბევრი რამ მოიაზრება, თუმცა განსაკუთრებული მნიშვნელობა აქვს ჩვენს პორტებს და ამ კონტექსტში მნიშვნელოვანია ის პროექტი, რომელიც დღეს არის შეჩერებული - ანაკლიის პროექტი, რომელსაც კიდევ უფრო დიდი მნიშვნელობა ენიჭება ბოლო პერიოდში განვითარებული მოვლენების ფონზე, რადგან ეს არის საქართველოს ფუნქციის გამაძლიერებელი აღმოსავლეთ-დასავლეთის დერეფანში, ასევე ის პროექტი, რომელიც ჩვენი პარტნიორების, მათ შორის აშშ-ის მხრიდან განსაკუთრებულ ყურადღებას იპყრობს“, - აცხადებს თენგიზ ფხალაძე. რამდენად მოსალოდნელია ანაკლიის საკითხის აქტუალიზაცია, თენგიზ ფხალაძე იმედოვნებს, რომ ამ თემის აქტუალიზაცია ისევ მოხდება. „სახელმწიფო მდივანმა არაერთხელ აღნიშნა ამ პორტის მნიშვნელობა. უბრალოდ, კიდევ ერთხელ უნდა გვახსოვდეს - როდესაც აშშ ამაზე ლაპარაკობს, არ არის ხედვა, რომ ეს ამერიკული პორტი უნდა იყოს, მაშინაც თქვა, რომ ეს უნდა იყოს ის ქართული პორტი, რომელიც გააძლიერებს საქართველოს სახელმწიფოს და აშშ მზადაა, ამაში დაგვეხმაროს, როგორც სტრატეგიული პარტნიორი. ასე რომ, უნდა გავითავისოთ, რომ ეს პირველ რიგში ჩვენს ინტერესებშია და შემდგომში - ჩვენი სტრატეგიული პარტნიორების. ბენ ჰოჯესი ლაპარაკობს იმაზე, რომ შეიძლება საქართველოში გაძლიერდეს სამოქალაქო ინფრასტრუქტურა, ასევე სამხედრო - ამ კონტექსტში მნიშვნელოვანია, რომ ჩვენი გზა და სტრატეგიული არჩევანი არის ჩრდილო-ატლანტიკური ალიანსისკენ. საქართველო ის ქვეყანაა, რომელიც ნატოსკენ მიისწრაფვის, ძალიან ბევრს აკეთებს ამისთვის. მნიშვნელოვანია, ჩვენ გვქონდეს ის ინფრასტრუქტურა, რომელიც თავსებადი იქნება ამ თვალსაზრისითაც ალიანსისათვის. ეს უპირველეს ყოვლისა გააძლიერებს ჩვენს უსაფრთხოებას და თავდაცვის უნარიანობას, ამისთვის მნიშვნელოვანია როგორც მრავალმხრივი ფორმატის გამოყენება, რაშიც იგულისხმება საქართველო - ნატოს ურთიერთობები და იგივე შავი ზღვის უსაფრთხოების პროგრამა, ასევე ორმხრივი ურთიერთობები, კერძოდ, საქართველოსა და აშშ-ის ურთიერთობები თავდაცვისა და უსაფრთხოების სფეროში“, - აღნიშნავს თენგიზ ფხალაძე. რაც შეეხება ჰოჯესის გზავნილს „პომპეოს ვიზიტის წინ, საინტერესო რჩევა-შეთავაზებად შეიძლება განვიხილოთ საექსპერტო საზოგადოებისგან, რომელმაც ძალიან კარგად იცის, რას ნიშნავს საქართველოს, შავი ზღვის, ევროპის უსაფრთხოება, ხედავს საქართველოს როლს ამ დიდ სურათში, იცის ამერიკის ეროვნული ინტერესები და ეს არის ის რჩევა, რომლის განხორციელებაც როგორც საქართველოს, ასევე შეერთებული შტატების ეროვნულ ინტერესებშია. ასე რომ, ეს არის ძალიან დროული აქცენტი ანალიტიკური წრეებისთვის და კარგი იქნება, თუ ამას ყურადღებას მიაქცევენ და მის გამოყენებას და რეალიზაციას მაქსიმალურად შეეცდებიან“, - აღნიშნავს თენგიზ ფხალაძე. რაც შეეხება მაიკ პომპეოს ვიზიტისგან მოლოდინებს, უნდა ვივარაუდოთ, რომ პომპეოს ვიზიტიდან ორი თემაა მნიშვნელოვანი. 1. უსაფრთხოების კონტექსტი ჩვენს რეგიონში და ამ ჭრილში დიდი მნიშვნელობა აქვს საქართველო-ამერიკის ურთიერთობას. 2. საქართველოს დემოკრატიული განვითარება იმიტომ, რომ ეს არის ის თემა, რასაც ჩვენი ურთიერთობები ეფუძნება. „აქ არამხოლოდ დიდი მნიშვნელობა აქვს იმას, რას უნდა ველოდოთ, არამედ იმასაც, რა შეგვიძლია ჩვენ შევთავაზოთ, რა შეიძლება იყოს ის ინიციატივები, რომლებიც შეიძლება ჰქონდეს საქართველოს ხელისუფლებას, როგორი ხედვა შეიძლება ჰქონდეს. არის ერთგვარი კომენტარები, რომ პომპეო არის წამსვლელი ადმინისტრაციის სახელმწიფო მდივანი - ეს ასე არ უნდა განვიხილოთ, რადგან ამერიკის პოლიტიკა სხვანაირად მუშაობს. ყოველთვის უნდა გვახსოვდეს, რომ ძალიან მნიშვნელოვანია მემკვიდრეობითობა შეერთებული შტატების პოლიტიკაში“, - აღნიშნავს თენგიზ ფხალაძე. როგორც ცნობილია, ევროპაში ბოლო ქვეყანა, სადაც პომპეო ვიზიტის დროს ჩერდება, საქართველოა, რის შემდეგაც სახელმწიფო მდივანი ისრაელს ეწვევა. „ცხადია, რომ ძირითადი აქცენტი კეთდებოდა უსაფრთხოების თემატიკაზე და მთავარი თემა ამ ტურნეში იყო ახლო აღმოსავლეთი და აზიის საკითხი, თუმცა იმ მოვლენებიდან გამომდინარე, რომელიც ჩვენს რეგიონში ვითარდება, საქართველო არის ბოლო ქვეყანა ევროპაში, სადაც პომპეო ვიზიტის დროს ჩერდება, რაც კიდევ ერთელ ადასტურებს, რამხელა მნიშვნელობას ანიჭებს ამ ქვეყნის უსაფრთხოებას და რეგიონში საქართველოს უსაფრთხოებას“, - აღნიშნავს თენგიზ ფხალაძე. უნდა ველოოდთ თუ არა ნატოში ინტეგრაციის პროცესის დაჩქარებას, თენგიზ ფხალაძის თქმით, ნატოში ინტეგრაცია მრავალმხრივი ფორმატია და ეს არ არის მხოლოდ ამერიკა-საქართველოს ურთიერთობებზე დამოკიდებული, თუმცა თუ ჩვენ ორმხრივ ურთიერთობას განვავითარებთ და უსაფრთხოების სფეროში სხვა საფეხურზე გადასვლას შევძლებთ, ეს ნატოში ინტეგრაციაზეც იმოქმედებს.
ამერიკის ელჩთან გამართული შეხვედრის შემდეგ ოპოზიცია კონსულტაციებისთვის შეიკრიბა
ამერიკის ელჩთან გამართული შეხვედრის მიუხედავად, ოპოზიცია აცხადებს, რომ აქციებს არ წყვეტს. „ლელოს“ ოფისში დღეს მორიგი შეხვედრა გაიმართა. ხვალინდელ აქციამდე, ლიდერები აცხადებენ, რომ ოპოზიცია ამ პარლამენტში შესვლას არ აპირებს. „ხვალ, რუსთაველის გამზირზე დაგეგმილ მორიგ აქციაზე ლეგიტიმურ მოთხოვნას კიდევ ერთხელ გავახმაურებთ. „ამ პარლამენტში ქართული პოლიტიკური სპექტრი შესვლას არ აპირებს“,- განაცხადა „ლელოს“ წევრმა, საბა ბუაძემ პარტიის ოფისში ოპოზიციის შეხვედრის დასრულების შემდეგ. „ჩვენი მკაფიო მოთხოვნაა ახალი არჩევნები. შეგვიძლია ვისაუბროთ ვადებზე, სხვადასხვა ტექნიკურ დეტალზე, მაგრამ არსებითია, რომ ამ გაყალბებულ არჩევნებს საზოგადოება და პოლიტიკური ოპოზიცია არ იღებენ. ეს არის მთავარი, დანარჩენი მივანდოთ იმ ხალხს, ვინც მოლაპარაკებებშია“, - განაცხადა „ევროპული საქართველოს ერთ-ერთმა ლიდერმა გიგი უგულავამ. ოპოზიცია არჩევნების შედეგებს არ ცნობს და აქციებს ატარებს. მორიგი დემონსტრაცია ხვალ, 15:00 საათზეა დაგეგმილი. ამ შეკრებას წინ უძღოდა ამერიკის ელჩის რეზიდენციაში გამართული შეხვედრა. დიალოგის დაწყება ორივე მხარემ დადებითად შეფასა, თუმცა ოპოზიცია აცხადებს, რომ მათ მოთხოვნებში რჩება ხელახალი არჩევნები.
ეუთოში აშშ-ის ელჩი: პანდემიის გამო საქართველოში კონფლიქტის გადაჭრის ამოცანა კიდევ უფრო გართულდა
„2008 წელს საქართველოს ტერიტორიაზე რუსეთის სამხედრო ძალის შეჭრამ დაარღვია საერთაშორისო სამართალი და უგულებელყო ჰელსინკის დასკვნითი აქტით დაცული პრინციპები, მათ შორის სუვერენიტეტის, ტერიტორიული მთლიანობისა და ძალის გამოუყენებლობის პრინციპები“, - ამის შესახებ ეუთოში აშშ-ის ელჩმა ჯეიმს გილმორმა განაცხადა. ტექსტს ამერიკის საელჩო ავრცელებს. „შეერთებული შტატები გულითადად მიესალმება მუდმივ საბჭოში ჟენევის საერთაშორისო მოლაპარაკებების თანათავმჯდომარეებს: სამხრეთ კავკასიასა და საქართველოში კრიზისის საკითხებში ევროკავშირის სპეციალურ წარმომადგენელ ელჩ კლაარს, გაეროს წარმომადგენელ ელჩ სულთანოღლუსა და სამხრეთ კავკასიაში ეუთოს სპეციალურ წარმომადგენელ ელჩ მიხალკას. მადლობას გიხდით ადგილზე არსებული სიტუაციის შესახებ თქვენი დაწვრილებითი ანგარიშებისთვის და ამ კონფლიქტის გადასაჭრელად გაწეული ძალისხმევისთვის. 2008 წელს საქართველოს ტერიტორიაზე რუსეთის სამხედრო ძალის შეჭრამ დაარღვია საერთაშორისო სამართალი და უგულებელყო ჰელსინკის დასკვნითი აქტით დაცული პრინციპები, მათ შორის სუვერენიტეტის, ტერიტორიული მთლიანობისა და ძალის გამოუყენებლობის პრინციპები. ეს არ შეიძლება განიხილებოდეს განცალკევებით და არის რუსეთის საგარეო პოლიტიკის ქმედებები და სიმბოლო. ეს ქმედებები გვახსენებს ყირიმში ჩადენილ უკანონო ქმედებებს, რომელზეც დღეს, მოგვიანებით ვისაუბრებთ. ჩვენ მოვუწოდებთ ეუთოს საგარეო საქმეთა მინისტრების საბჭოს, ჩაატაროს მოლაპარაკებები იმ ნაბიჯების გამოსარკვევად, რაც გადაჭრის ამ კონფლიქტს, აღადგენს საქართველოს ტერიტორიულ მთლიანობას და მოაცილებს ამ საფრთხეს რეგიონულ უსაფრთხოებას, განსაკუთრებით ამ ურთულეს პერიოდში. თქვენი ამოცანა, წარმომადგენლებო, რომ ეს კონფლიქტი გადაგეჭრათ, არასდროს ყოფილა მარტივი და კიდევ უფრო გართულდა გლობალური კორონავირუსის პანდემიის გამო. ჩვენ იმედგაცრუებული ვართ, რომ რუსეთმა და მისმა წარმომადგენლებმა ეს პანდემია საბაბად გამოიყენეს, გადაედოთ ჟენევის კვარტალური საერთაშორისო მოლაპარაკებები. მე დღეს ყურადღებით მოვისმინე სამი წარმომადგენლის მოხსენება და დიდი აქცენტი კორონავირუსზე, მაგრამ არ შეიძლება, პანდემია გახდეს წინაღობა ან შეაჩეროს იმ პოლიტიკური და სამხედრო გამოწვევების მოგვარება, რომელსაც ეუთოს რეგიონში ვხედავთ. შეერთებული შტატები აფასებს ჟენევის საერთაშორისო მოლაპარაკებების ფორმატის უნიკალურ როლს ცეცხლის შეწყვეტის ექვსპუნქტიანი შეთანხმების განხორციელებაში და ადგილზე უსაფრთხოების შენარჩუნებაში. ჟენევის საერთაშორისო მოლაპარაკებების ყველა მონაწილეს მოვუწოდებთ, 2020 წლის ეუთოს საგარეო საქმეთა მინისტრების საბჭოს შემდეგ, 10-11 დეკემბერს მოლაპარაკებების 51-ე რაუნდს შეუერთდნენ. რუსეთის ფედერაციის ქმედებები ამ საკითხში აღქმული უნდა იყოს როგორც რუსეთის ფედერაციის პოლიტიკის, ქმედებებისა და მიზნების ერთიანი სურათის ნაწილი. ეს არ უნდა იყოს აღქმული როგორც ცალკეული შემთხვევა.ამ შემთხვევაში, შეერთებული შტატები მოუწოდებს რუსეთს, როგორც კონფლიქტის მხარეს, 2008 წლის ცეცხლის შეწყვეტის შეთანხმების მიხედვით გაიყვანოს ძალები ომამდელ პოზიციებზე და უკან წაიღოს საქართველოს რეგიონების: აფხაზეთისა და სამხრეთ ოსეთის ე.წ. დამოუკიდებელ სახელმწიფოებად ცნობა. „სამხრეთ ოსეთი“ და აფხაზეთი საქართველოს ნაწილია და იმ მოქალაქეთა მომავალი უკეთესი იქნება ნამდვილი ქვეყნის შემადგენლობაში, ის ქვეყანა კი საქართველოა. რუსეთის პროვოკაციული ქმედებები არის მცდელობა, გააფართოვოს გავლენა ოკუპირებულ ტერიტორიებზე და ამ ტერიტორიებზე მცხოვრები ადამიანები მშობლიური ქვეყნისგან, საქართველოსგან იზოლაციაში მოაქციოს. ამ აგრესიას კვლავაც აქვს პირდაპირი და უარყოფითი გავლენა ადმინისტრაციული გამყოფი ზოლის ორივე მხარეს მცხოვრები, კონფლიქტით დაზარალებული მოსახლეობის კეთილდღეობაზე. კერძოდ, მოვუწოდებთ რუსეთსა და დე ფაქტო ხელისუფლებებს გაათავისუფლონ დაკავებული სამოქალაქო პირები, მათ შორის ზაზა გახელაძე და აღადგინონ ადმინისტრაციული გამყოფი ზოლის გასწვრივ მიმოსვლა და გადაუდებელ სამედიცინო დახმარებაზე ხელმისაწვდომობა. საქართველოს მოქალაქეების მკვლელობასა და თვითნებურ დაკავებებზე პასუხისმგებელი პირები პასუხს აგებენ. კმაყოფილი ვართ, რომ ივლისსა და სექტემბერში ერგნეთში ინციდენტების პრევენციისა და მათზე რეაგირების მექანიზმის შეხვედრები დადებით გარემოში ჩატარდა. ჩვენ ვემხრობით გალის ინციდენტების პრევენციისა და მათზე რეაგირების მექანიზმის განახლებას. ამ ინსტრუმენტებს კრიტიკული მნიშვნელობა აქვს დაძაბულობის განმუხტვასა და კონფლიქტით გამოწვეული დარტყმის შემსუბუქებაში. მოხარული ვიქნებოდით, საქართველოში ეუთოს საველე წარმომადგენლობის აღდგენით, რომელიც შეძლებდა ადმინისტრაციული გამყოფი ზოლის გასწვრივ შეუფერხებელად მუშაობას. საქართველოს საერთაშორისოდ აღიარებულ ტერიტორიაზე სრული წვდომის მქონე ეუთოს მისია აუცილებელია დაძაბულობის შესამცირებლად შესაძლებლობების ხელშეწყობისა და ადგილობრივი მოსახლეობის მხარდაჭერისთვის.შეერთებული შტატები მტკიცედ უჭერს მხარს საქართველს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში“, - განაცხადა ეუთოში აშშ-ის ელმა გილმორმა ჟენევის საერთაშორისო მოლაპარაკებების თანათავმჯდმარეებისადმი მიმართვისას.
ყველა ვთვლით, რომ ქვეყანაში პოლიტიკური კრიზისია და შეთანხმებაა მისაღწევი - ზურაბ ჯაფარიძე
"ყველა ვთვლით, რომ პოლიტიკური კრიზისია ქვეყანაში, რომელიც უნდა განიმუხტოს და რაღაცა ტიპის პოლიტიკური შეთანხმება არის მისაღწევი", - ამის შესახებ „გირჩის“ ლიდერმა, ზურაბ ჯაფარიძემ ჟურნალისტებთან, ამერიკის შეერთებული შტატების ელჩის რეზიდენციაში, ოპოზიციის ლიდერებისა და უმრავლესობის წარმომადგენლების შეხვედრის დასრულების შემდეგ განაცხადა. „ამ შეხვედრაზე იყო პოზიციების გაცვლა, პარტიებმა მოვყევით ჩვენი ხედვა, თუ როგორ ვაფასებთ საპარლამენტო არჩევნებს, რომელიც ჩატარდა ცოტა ხნის წინ და ჩვენი პოზიცია იყო ის, რაც არაერთხელ გვაქვს გაცხადებული და იყო ასევე ხელისუფლების წარმომადგენლის პოზიცია - ისინი როგორ აფასებენ ჩატარებულ არჩევნებს. ეს იყო და ეს ამ შეხვედრაზე, რაზეც შევთანხმდით არის ის, რომ კიდევ ერთი შეხვედრა გაიმართება, რომლის დრო და ადგილი ჯერჯერობით არ ვიცით. ჩვენი ფასილიტატორების სურვილი, ისევე როგორც ჩვენი ყველასი და ატმოსფერო არის ასეთი, რომ ყველა ვთვლით, რომ პოლიტიკური კრიზისია ქვეყანაში, რომელიც უნდა განიმუხტოს და რაღაცა ტიპის პოლიტიკური შეთანხმება არის მისაღწევი,"- განაცხადა ჯაფარიძემ.
ბაქოში, აფხაზეთიდან ყარაბაღში ჩასული მოხალისეების წინააღმდეგ, სისხლის სამართლის საქმე აღძრეს
ბაქოში, აფხაზეთიდან ყარაბაღში ჩასული მოხალისეების წინააღმდეგ, სისხლის სამართლის საქმე აღძრეს - ამის შესახებ ინფორმაციას აზერბაიჯანის გენერალური პროკურატურა ავრცელებს. პრესრელიზში მითითებულია, რომ ადამიანების ჯგუფმა, „რომელიც საქართველოში აფხაზეთის ტერიტორიაზე ცხოვრობს“, აზერბაიჯანის წინააღმდეგ ბოროტმოქმედება ჩაიდინა. „ჩატარებული გამოძიებით დაგინდა, რომ აფხაზეთში მცხოვრებმა სეირან კოჯამანიანმა, გალუსტ ტრაპიზონიანმა და სხვებმა 2020 წლის ოქტომბერში მოახდინეს 20-ზე მეტი პირისგან შემდგარი ჯგუფის მობილიზება, რომლებმაც გამოგონილი "მთიანი ყარაბაღის" რეჟიმის ხელმძღვანელობასთან შეხვედრა ჩაატარეს, სადაც სამხედრო ოპერაციებში მონაწილეობაზე ისაუბრეს. დანაშაულებრივი გაერთიანების ზემოთჩამოთვლილი წევრები, სახელმწიფო სტრუქტურების ხელშეწყობით სომხეთში ჩასვლის შემდეგ, დანაშაულებრივ კავშირში შევიდნენ პირებთან, რომლებიც აზერბაიჯანის ოკუპირებულ ტერიტორიებზე იმყოფებოდნენ. დანაშაულებრივ ჯგუფში გაერთიანების შემდეგ მათ აუცილებელი დოკუმენტების გარეშე, უკანონოდ გადაკვეთეს აზერბაიჯანის სახელმწიფო საზღვარი, საკონტროლო-გამშვები პუნქტების გვერდის ავლით, ანუ სომხეთიდან, საიდანაც ქალაქ ხანკენდსა და სხვა ოკუპირებულ ტერიტორიებზე შეაღწიეს. დადგინდა, რომ ისინი სომხეთის სამხედრო-პოლიტიკური რეჟიმის მიერ გამოიყენებოდნენ დაქირავებულების როლში სამოქალაქო მოსახლეობისა და ანტიტერორისტულ ოპერაციაში მონაწილე აზერბაიჯანის ძალების წინააღმდეგ“, - ნათქვამია განცხადებაში. ბაქოში აცხადებენ, რომ „დანაშაულებრივი დაჯგუფების წევრები“ საბრძოლო მასალისა და სამხედრო ტექნიკის გამოყენებით მშვიდობიანი მოსახლეობის წინააღმდეგ დანაშაულს ჩადიოდნენ. სისხლის სამართლის საქმე აღძრულია აზერბაიჯანის სისხლის სამართლის კოდექსის რამდენიმე მუხლით, რომლებიც თავისუფლების აღკვეთას 12-დან 20 წლამდე ითვალისწინებს. გამოძიების ჩატარება გენერალური პროკურატურის საგამოძიებო სამმართველოს დაევალა. ყარაბაღში აფხაზეთიდან მოხალისეთა ჯგუფის გაგზავნის შესახებ ცნობილი 6 ნოემბერს გახდა. აფხაზეთის სომხური სათვისტომოს თავმჯდომარემ, გალუსტ ტრაპიზონიანმა „ეხო კავკაზას“ განუცხადა, რომ „მათ ერთი დღე მოასწრეს ამ მოვლენებში მონაწილეობა,“ რის შემდეგაც ხელმოწერილ იქნა სამმხრივი სამშვიდობო განცხადება ომის შეწყვეტის შესახებ. წყარო
ახალი არჩევნების ჩატარების გარეშე, ქვეყანაში კონსოლიდაცია ვერ მოხდება - დავით ბაქრაძე
"ნუ გვექნება მოლოდინი, რომ ერთი ან თუნდაც ორი შეხვედრით რაიმე გადაწყდება, ეს არის უმძიმესი თემა", - ამის შესახებ „ევროპული საქართველოს“ ერთ-ერთმა ლიდერმა, დავით ბაქრაძემ ამერიკის შეერთებული შტატების ელჩის რეზიდენციაში ოპოზიციის ლიდერებისა და უმრავლესობის წარმომადგენლების შეხვედრის დასრულების შემდეგ ჟურნალისტებს განუცხადა. მისი თქმით, ახალი არჩევნების ჩატარების გარეშე, ქვეყანაში კონსოლიდაცია ვერ მოხდება. „ქვეყანა არის პოლიტიკურ კრიზისში. განსხვავებები არის უზარმაზარი. ჩვენი, როგორც პასუხისმგებლიანი ძალების ამოცანა არის, რომ თანდათან, ნაბიჯ-ნაბიჯ ვეცადოთ კომპრომისის გამოძებნა. იმედი მაქვს, საბოლოოდ მოვახერხებთ შეთანხმებისკენ წასვლას. არ გამოვრიცხავ, რომ შეთანხმება ვერ შედგეს. ამის მაღალი ალბათობა არსებობს. ჩვენი პოზიცია აბსოლუტურად ნათელი და მტკიცეა. ახალი არჩევნების გარეშე ქვეყანაში კონსოლიდაცია ვერ მოხდება. თუ მმართველი გუნდიც ბოლომდე იქნება იმ პოზიციაზე, რომ მათი აზრით, ამ კრიზისში დარჩენა სჯობს და ერთპარტიული პარლამენტი, ვიდრე ახალი და სამართლიანი არჩევნები, ბუნებრივია, მაღალი ალბათობა არსებობს, რომ შეთანხმება ვერ შედგება“, - განაცხადა ბაქრაძემ.
ელჩების შუამავლობით, უახლოეს დღეებში კიდევ ერთი შეხვედრა გაიმართება
პარტია „მოქალაქეების“ ლიდერის ალეკო ელისაშვილის განცხადებით საქართველოში აშშ-ს ელჩის კელი დეგნანის რეზიდენციაში ოპოზიციური პარტიების ლიდერებსა და უმრავლესობას შორის გამართულ შეხვედრაზე შეთანხმდნენ იმაზე, რომ საარჩევნო საკითხთან მიმართებით ოპოზიციასა და უმრავლესობას შორის ელჩების შუამავლობით შეხვედრის მორიგი რაუნდი გაიმართება. როგორც მან შეხვედრის დასრულების შემდეგ ჟურნალისტებს განუცხადა, მომდევნო შეხვედრა უახლოეს მომავალში იქნება, თუმცა როდის დაზუსტებით ახლა ვერ იტყვის. „იმის მოლოდინი, რომ დღეს შევთანხმდებოდით და ამით განიმუხტებოდა ვითარება, რა თქმა უნდა, არ გვქონია. დღეს, ერთადერთი რაზეც შევთანხმდით იყოს ის, რომ უახლოეს დღეებში კიდევ ერთი შეხვედრა გაიმართება ელჩების შუამავლობით. ჩვენ გვქონდა ჩვენი ხედვა და არგუმენტები, თუ რატომ გაყალბდა არჩევნები და რატომ გაყალბდა ტოტალურად. ასევე, ოპოზიციის წარმომადგენლებმა ვთქვით ჩვენი ხედვით გამოსავალი. ბატონ თალაკვაძეს ჰქონდა თავის არგუმენტები, რომ არჩევნები მასშტაბურად არ გაყალბებულა და გამოსავალის მსგავსი, გარკვეული რაღაც შემოგვთავაზა. ბოდიშს გიხდით, მაგრამ ამ დეტალებზე ვერ ვისაუბრებ, წესი არ არის დახურულ კარს მირმა მოლაპარაკებების დეტალების გამოტანა, როცა შეხვედრა არ არის დასრულებული. პროცესი რომ დაიძრა და მოლაპარაკებები რომ მიმდინარეობს ეს არის კარგი. ჩვენ, ჩვენი მოთხოვნების გადახედვას არ ვაპირებთ. ჩვენი მოთხოვნების შესახებ ვუთხარით. პრინციპში, ჩვენი მოთხოვნა ერთსულოვანი იყო. დანარჩენი,მომდევნო რაუნდზე უფრო მკაფიო იქნება“, - განაცხადა ელისაშვილმა.
ეუთო-ს მუდმივი საბჭოს სხდომაზე, ქართულმა მხარემ, პუტინისა და ასლან ბჟანიას შეხვედრაზე, შეშფოთება გამოთქვა
ეუთო-ს მუდმივი საბჭოს სხდომაზე, ქართულმა მხარემ, რუსეთის პრეზიდენტ ვლადიმერ პუტინსა და დე ფაქტო პრეზიდენტ ასლან ბჟანიას შეხვედრაზე, შეშფოთება გამოთქვა. ამის შესახებ ინფორმაციას საგარეო საქმეთა სამინისტრო ავრცელებს. მათივე ინფორმაციით, 2020 წლის 12 ნოემბერს, ეუთო-ს მუდმივი საბჭოს სხდომაზე ანგარიშით წარდგენენ ჟენევის საერთაშორისო დისკუსიების თანათავმჯდომარეები გაეროდან, ეუთოდან და ევროკავშირიდან, ჯიჰან სულთანოღლუ, რუდოლფ მიხალკა და ტოივო კლაარი. "მომხსენებლებმა ისაუბრეს ჟენევის საერთაშორისო მოლაპარაკებების და მის ფარგლებში არსებული ინციდენტების პრევენციისა და მათზე რეაგირების მექანიზმების (IPRM) მნიშვნელობაზე და მწუხარება გამოთქვეს, რომ მიმდინარე წელს, პანდემიის გამო, ვერ მოხერხდა მოლაპარაკებების რაუნდის ჩატარება. მათ იმედი გამოთქვეს, რომ პირისპირ შეხვედრა დეკემბერში მოხერხდება. ჟენევის საერთაშორისო მოლაპარაკებების თანათავმჯდომარეებმა ისაუბრეს საქართველოს აფხაზეთისა და ცხინვალის რეგიონებში ადამიანის უფლებებისა და ჰუმანიტარული კუთხით არსებულ მძიმე მდგომარეობაზე, მათ შორის გადაადგილების შეზღუდვაზე. ამ კონტექსტში ყურადღება გამახვილდა სამედიცინო სერვისებზე წვდომის შეზღუდვის შემთხვევებზე, რაც ზოგ შემთხვევაში, ტრაგიკულად დასრულდა. საპასუხო განცხადებაში, საქართველოს მუდმივმა წარმომადგენელმა ეუთო-ში ქეთევან ციხელაშვილმა დაადასტურა ჟენევის საერთაშორისო მოლაპარაკებების ფორმატის მნიშვნელობა, რომელიც შეიქმნა ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმების შედეგად, რუსეთ-საქართველოს კონფლიქტიდან მომდინარე უსაფრთხოებისა და ჰუმანიტარული გამოწვევების გადასაჭრელად. ქართულმა მხარემ ყურადღება გაამახვილა დისკუსიების მთავარ საკითხებზე - ძალის არგამოყენება, ადგილზე უსაფრთხოების საერთაშორისო მექანიზმების შექმნა და ლტოლვითა და იძულებით გადაადგილებულ პირთა დაბრუნება - ხელშესახები პროგრესის არარსებობაზე, რუსეთის დესტრუქციული მიდგომის გამო, რომელიც ახედნეს ჰუმანიტარული თემების პოლიტიზირებას. ქართულმა მხარემ დააფიქსირა შეშფოთება, რომ მიმდინარე წელს ვერ მოხდა ჟენევის საერთაშორისო მოლაპარაკებების რაუნდის გამართვა და გამოთქვა იმედი, რომ თანათავმჯდომარეების ერთობლივი ძალისხმევით, მორიგი რაუნდი 10-11 დეკემბერს გაიმართება. საქართველოს ელჩი პოზიტიურად გამოეხმაურა ერგნეთში ინციდენტების პრევენციისა და მათზე რეაგირების მექანიზმების მუშაობის აღდგენას და აღნიშნა, გალის შეხვედრების დაუყოვნებლივ და ფუძემდებლურ პრინციპებზე დაყრდნობით აღდგენის აუცილებლობა. საქართველოს დელეგაციამ ეუთო-ს მონაწილე ქვეყნებს მიაწოდა ვრცელი ინფორმაცია ოკუპირებულ რეგიონებში უსაფრთხოებისა და ადამიანის უფლებების კუთხით შექმნილ მძიმე ვითარებასთან დაკავშირებით. ყურადღება გამახვილდა ეთნიკური ქართველების დისკრიმინაციასა და მათი უფლებების უხეშ დარღვევებზე, მათ შორის, საოკუპაციო ხაზის დაკეტვასა და გადაადგილების თავისუფლების შეზღუდვაზე, რასაც ახალგორში 16 ადამიანი ემსხვერპლა, რომელთაც ვერ მოახერხეს საქართველოს ხელისუფლების კონტროლირებად ტერიტორიაზე გადმოსვლა გადაუდებელი მკურნალობისთვის. საქართველოს ელჩმა ასევე ისაუბრა ე.წ. ბორდერიზაციის პროცესსა და საქართველოს მოქალაქეების უკანონო დაკავებებზე. ამ კონტექსტში მან ხაზი გაუსვა ამა წლის ივლისში, საქართველოს მშვიდობიანი მოქალაქის, ზაზა გახელაძის უკანონო დაკავებას, და მოითხოვა მისი და რეჟიმის უკანონო პატიმრობაში მყოფი პირების დაუყოვნებლივ გათავისუფლება. მუდმივ საბჭოზე, საქართველოს ელჩმა სთხოვა პარტნიორებს, დამატებით აღმოუჩინონ დახმარება გამყოფ ხაზთან მცხოვრებ მოსახლეობას და ითანამშრომლონ ამ მიზნით შექმნილ უწყებათაშორის კომისიასთან. ელჩმა შეშფოთება გამოთქვა ადგილზე არსებული მძიმე ვითარების ფონზე რუსეთის ფედერაციის პრეზიდენტ ვლადიმერ პუტინსა და საოკუპაციო რეჟმის ლიდერ ასლან ბჟანიას შორის დღეს სოჭში გამართული შეხვედრის გამო, რაც ნათლად მოწმობს, რომ რუსეთი აგრძელებს საქართველოს სუვერენიტეტისა და ტერიტორიული მთლიანობის სრულ უგულველყოფას, რითაც ირღვევა საერთაშორისო სამართლის ფუნდამენტური პრინციპი. ქეთევან ციხელაშვილმა გამოსვლაში ყურადღება გაამახვილა საქართველოს სამშვიდობო პოლიტიკაზე. ელჩმა ხაზი გაუსვა საქართველოს მიერ ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმების შესრულებას, ძალის არგამოყენების პრინციპის ცალმხრივად დადასტურებას და განხორციელებას, მოლაპარაკებების ფორმატების ეფექტურად გამოყენებისკენ მიმართულ ძალისხმევას. ელჩმა ისაუბრა ასევე კონფლიქტით დაზარალებულ მოსახლეობას შორის ნდობის აღდგენაზე, რაც სამშვიდობო პოლიტიკის მნიშვნელოვან მიმართულებას წარმოადგენს. ამკუთხით, მან ყურადღება გაამახვილა საქართველოს მთავრობის სამშვიდობო ინიციატივაზე - ნაბიჯი უკეთესი მომავლისკენ, რომელიც კონფლიქტის მშვიდობიანი მოგვარების მნიშვნელოვან ჰუმანიტარულ კომპონენტს წარმოადგენს და მადლობა გადაუხადა პარტნიორებს ამ ინციატივის მხარდაჭერისთვის. გამოსვლის დასასრულს მან ხაზი გაუსვა რუსეთის მიერ თავისი საერთაშორისო ვალდებულებების, მათ შორის 2008 წლის 12 აგვისტოს ცეცხლის შეწყვეტის შეთანხმების შესრულების აუცილებლობას. სხდომაზე საქართველოს მხარდამჭერი განცხადებები გააკეთეს ევროკავშირის, გაერთიანებული სამეფოს, აშშ-ს, თურქეთის, შვეიცარიისა და უკრაინის დელეგაციებმა. გამომსვლელებმა ერთხმად გამოხატეს საქართველოს სუვერენიტეტისა და ტერიტორიული მთლიანობის მტკიცე მხარდაჭერა საერთაშორისოდ აღიარებულ საზღვრებში და აღნიშნეს, რომ არსებული კონფლიქტის მოგვარება უნდა მოხდეს ხსენებული პრინციპების დაცვით. შეხვედრაზე ხაზი გაესვა რუსეთის მიერ ძალის არგამოყენების შესახებ ვალდებულების დადასტურებისა და შესრულების აუცილებლობას. აშშ-სა და უკრაინის დელეგაციებმა ცალსახად აღნიშნეს, რომ რუსეთი განაგრძობს საერთაშორისო სამართლის ნორმების უხეშ დარღვევას და საქართველოს ტერიტორიების ოკუპაციას. აშშ-ის წარმომადგენელმა თავის განცხადებაში ასევე აღნიშნა, რომ აშშ-სთვის მიუღებელია რუსეთის მიერ აფხაზეთისა და ცხინვალის რეგიონების ე.წ. დამოუკიდებელ სახელმწიფოებად აღიარება და მოუწოდა რუსეთს ამ გადაწყვეტილების გაუქმებისკენ", - ნათქვამია სამინისტროს განცხადებაში.
დიალოგის დაწყება პოზიციების დაახლოებას ემსახურება, პირველ შეხვედრას პოზიტიურად შევაფასებდი - თალაკვაძე
პარლამენტის თავმჯდომარე არჩილ თალაკვაძე აშშ-სა და ევროკავშირის ელჩებთან და ოპოზიციის ლიდერებთან შეთანხმებას პოზიტიურად აფასებს და აღნიშნავს, რომ დიალოგის დაწყება მათ შორის პოზიციების დაახლოებას ემსახურება. „პირველ რიგში პოზიტიურია, რომ პოლიტიკურ პარტიებს შორის დიალოგი დაიწყო და მნიშვნელოვანია, რომ ჩვენ შევთანხმდით, რომ პოლიტიკური კონსულტაციების კიდევ ერთი რაუნდი შედგება, რაც შეეხება საკითხებს და იმ პოზიციებს, რომელიც განსხვავებულია პარტიებს შორის, ჩვენი პასუხი და პოზიცია არის მკაფიო - მოდით, ერთად გადავამოწმოთ ყველა ის საკითხი, კითხვა, რომელიც ოპოზიციის მხრიდან იყო დასმული. ჩვენ გვაქვს ძალიან კონსტრუქციული და გახსნილი პოზიცია. გვსურს, მივიდეთ იმ შედეგთან, როდესაც ყველა, საბოლოო ჯამში პატივს სცემს არჩევნების შედეგებს. საზოგადოებას არ უნდა ჰქონდეს მოლოდინი, რომ პირველ შეხვედრაზე ძირითადი შეთანხმებები მოხდებოდა, თუმცა კიდევ ერთხელ ვამბობ, რომ პოლიტიკური დიალოგის დაწყება არის პოზიტიური. გავცვალეთ არგუმენტები. რაც მთავარია კონსტრუქციულ გარემოში მოვუსმინეთ ერთმანეთს. მჯერა და იმედს ვიტოვებ, რომ ეს პოლიტიკური დიალოგი კონკრეტული შედეგით დასრულდება“, - თქვა თალაკვაძემ. დღეს აშშ-ს ელჩის, კელი დეგნანის რეზიდენციაში ოპოზიციური პარტიების ლიდერებს, არჩილ თალაკვაძესა და ევროკავშირის ელჩს შორის შეხვედრა გაიმართა. შეგახსენებთ, 31 ოქტომბრის საპარლამენტო არჩევნების შედეგების გამოქვეყნებას ოპოზიცური პარტიებისა და ამომრჩევლების პროტესტი მოჰყვა. ისინი არჩევნების შედეგებს არალეგიტიმურად – გაყალბებულად მიიჩნევენ და რიგგარეშე არჩევნების ჩატარებას მოითხოვენ. არც ერთი ოპოზიციური პარტია საქართველოს მე-10 მოწვევის პარლამენტში არ შედის და საქართველოს ისტორიაში პირველად პარლამენტი ერთპარტიულად შეიკრიბება. მანდატებზე უარი თქვეს ევროპულმა საქართველომ, ლელომ, ლეიბორისტულმა პარტიამ, გირჩმა, ენმ-ძალა ერთობაშიამ, სტრატეგია აღმაშენებელმა, მოქალაქეებმა და პუტინისტურმა პატრიოტთა ალიანსმა.
ბადრი ჯაფარიძე: ხელისუფლების შეფასებები ფუნდამენტურად განსხვავდება ჩვენი შეფასებებისგან
„ხელისუფლების შეფასებები ფუნდამენტურად განსხვავდება ჩვენი შეფასებებისგან“, - ამის შესახებ „ლელოს“ ლიდერმა ბადრი ჯაფარიძემ ამერიკის ელჩის რეზიდენციაში გამართული შეხვედრის შემდეგ განაცხადა. მისივე თქმით, დღევანდელ შეხვედრაზე ყველა მხარემ დააფიქსირა თავის პოზიცია და დაიგეგმა მორიგი შეხვედრა. „გადავეცით მოთხოვნები, გავუზიარეთ ჩვენი შეფასებები ერთმანეთს. ჩვენი შეფასება იგივეა, არჩვენების შედეგები გაყალბდა და საჭიროა ახალი არჩევნები, რათა გამოვიდეთ კრიზისიდან. ოპოზიციის პოზიცია ამაზე არის უცვლელი. ხელისუფლებას აქვს თავის შეფასებები, რომელიც ფუნდამენტურად განსხვავდება ჩვენი შეფასებებისგან“, - განაცხადა ბადრი ჯაფარიძემ. ისევ გაიმართება თუ არა აქცია, ჯაფარიძემ განაცხადა, რომ შაბათის აქცია ძალაშია. დიპლომატიური კორპუსის წარმომადგენლებთან შეხვედრას ცხრა პარტიის წარმომადგენლები ესწრებოდნენ.
"რუსეთი რჩება აფხაზეთის ნომერ პირველ პარტნიორად" - ვლადიმერ პუტინი
დღეს, 12 ნოემბერს, სოჭში რუსეთის პრეზიდენტის ვლადიმირ პუტინისა და ოკუპირებული აფხაზეთის დეფაქტო პრეზიდენტის ასლან ბჟანიას შეხვედრა გაიმართა. რუსეთის პრეზიდენტის ადმინისტრაციის თანახმად, ვლადიმირ პუტინმა შეხვედრაზე განაცხადა, რომ თვითაღიარებული რესპუბლიკის ე.წ. პრეზიდენტთან შეხვედრა არის შესაძლებლობა მშვიდ გარემოში განიხილონ სახელმწიფოთშორისი ურთიერთობების განვითარება. ვლადიმირ პუტინმა შეხვედრაზე სინანულით აღნიშნა, რომ კორონავირუსის პანდემია უარყოფით ზეგავლენას ახდენს ეკონომიკაზე, თუმცა მისი თქმით, რუსეთი რჩება ოკუპირებული აფხაზეთის ნომერ პირველ ეკონომიკურ პარტნიორად, რადგან ეკონომიკური ბრუნვის 70 პროცენტზე მეტი აფხაზეთს რუსეთთან აქვს. „ჩვენ გვაქვს ურთიერთთანამშრომლობის მნიშვნელოვანი მიმართულებები, აღარაფერს ვამბობ ტურიზმზე. ტურიზმის გარდა აღსანიშნავია სოფლის მეურნეობა, ტელეკომუნიკაციები. ყველაფერი ეს უნდა იყოს ჩვენი დღევანდელი განხილვის საგანი“, - განაცხადა ვლადიმირ პუტინმა შეხვედრაზე და გამოთქვა ასევე იმედი, რომ მნიშვნელოვანია ის დახმარება, რომელსაც პანდემიის წინააღმდეგ ბრძოლაში რუსი სამედიცინო პერსონალი უწევს ოკუპირებულ აფხაზეთს. ასლან ბჟანიამ თავის მხრივ შეხვედრაზე აღნიშნა, რომ მსგავს ფორმატში შეხვედრა რუსეთის პრეზიდენტთან პირველად იმართება. მან პუტინს აფხაზი ხალხის სახელით მადლობა გადაუხადა წლების განმავლობაში გაწეული დახმარებისთვის. „მეგობრები უბედურებაში გამოიცდებიან: პანდემიის პირობებში ჩვენს ეს მხარდაჭერა კიდევ ერთხელ ვიგრძენით. მადლობა მინდა გადავუხადო თავდაცვის სამინისტროს იმ ჰოსპიტალისთვის, რომელიც ჩვენ გადმოგვცეს. დიდ დახმარებას გვიწევენ ასევე რუსი მედიკოსები. ისინი თვეების განმავლობაში მორიგეობით ჩამოდიან გუდაუთის საავადმყოფოში. ეს არის უდავოდ შეუფასებელი დახმარება შექმნილ პირობებში“, - განაცხადა შეხვედრაზე ასლან ბჟანიამ. მისი თქმით, დეფაქტო აფხაზეთის ხელმძღვანელობა აპირებს რუსეთთან დადებული ყველა ხელშეკრულების რეალიზებას, რადგან ისინი „სრულად შეესაბამებიან აფხაზეთის ინტერესებს“. „ეს ყველაფერი ხელს უწყობს აფხაზეთის სახელმწიფოებრიობისა და სუვერენიტეტის განმტკიცებას“, - აღნიშნა ასლან ბჟანიამ. მან ვლადიმირ პუტინი აფხაზეთში მიიწვია: „მინდა იცოდეთ, თქვენ ყოველთვის სასურველი სტუმარი ხართ აფხაზეთში, გიწვევთ სტუმრად“, - უთხრა ოკუპირებული აფხაზეთის დეფაქტო პრეზიდენტმა ასლან ბჟანიამ რუსეთის პრეზიდენტს, ვლადიმირ პუტინს სოჭში გამართულ შეხვედრაზე. ოკუპირებული აფხაზეთის დე ფაქტო პრეზიდენტი ასლან ბჟანია მოსკოვში ვიზიტით ოქტომბრის ბოლოდან იმყოფება. რუსეთის პრეზიდენტის პრესმდივანმა დმიტრი პესკოვმა მაშინ განაცხადა, რომ უახლოეს მომავალში პუტინი ბჟანიასთან შეხვედრას არ გეგმავდა. მოსკოვში ვიზიტის ფარგლებში ბჟანია რუსეთის პრეზიდენტის ადმინისტრაციის ხელმძღვანელის მოადგილეს, დმიტრი კოზაკოვს შეხვდა.
სომხეთის თავდაცვის ინფორმაციით, სომხეთი და მთიანი ყარაბაღი არასაფრენ ზონად გამოცხადდა
სომხეთის თავდაცვის სამინისტროს პრეს-მდივნის შუშან სტეფანიანის განცხადებით, სომხეთი და მთიანი ყარაბაღი არასაფრენ ზონად გამოცხადდა. მისივე თქმით, სომხეთისა და მთიანი ყარაბაღის საჰაერო სივრცის არასაფრენ ზონად გამოცხადებას სომხეთის შეიარაღებული ძალების ანტისაჰაერო სისტემები და რუსეთის სამხედრო კოსმოსური ძალები ერთობლივად უზრუნველყოფენ. სტეფანიანის განცხადებით, გამონაკლისს წარმოადგენს სამხედრო ავიაცია და სამოქალაქო თვითმფრინავები, რომელთა გადაადგილებაც ერევანთან წინასწარ უნდა იყოს შეთანხმებული. წყარო
ოპოზიციის პოზიცია უცვლელია - ნათელაშვილი აშშ-ის ელჩთან შეხვედრის შემდეგ
"ოპოზიციის პოზიცია უცვლელია და ხელახალ არჩევნებს მოითხოვს", - ამის შესახებ ლეიბორისტული პარტიის ლიდერმა შალვა ნათელაშვილმა ამერიკის ელჩის სახლში გამართული შეხვედრის შემდეგ განაცხადა, რომელსაც რიგი ოპოზიციონერი ლიდერები, ელჩები და საქართველოს პარლამენტის თავმჯდომარე არჩილ თალაკვაძე ესწრებიან. „როგორც მოსალოდნელი იყო, სრულ პოლიტიკურ კრიზისის დარეგულირებაში, რაც მასობრივად გაყალბებული არჩევნების შედეგეად წარმოიქმნა, ჩვენი პარტნიორები – ევროკავშირის წარმომადგენლობა და აშშ–ის საელჩო ჩაერთო. შეხვედრას ესწრებიან იმ პარტიების ლიდერები, რომლებმაც ვითომ გადალახა ბარიერი, მაგრამ მე დავაყენე საკითხი, რომ დაესწრონ ისინიც ვინც ვითომ ვერ გადალახა – დარწმუნებული ვარ, ბევრმა გადალახა. შეხვედრები გაგრძელდება, დეტალიზაციას შეთანხმებისდა მიხედვით, მედიასთან ვერ მოვახდენ, მაგრამ შემიძლია, გითხრათ, რომ ოპოზიცია ასეთი ერთიანი, როგორიც ახლაა, არ მინახავს. ყველა დგას იმ პოზიციაზე, რომელზეც ვოყავით“, - განაცხადა ნათელაშვილმა. მისივე თქმით, კომპრომისის შესაძლებლობა ყოველთვის არსებობს, მაგრამ არა კრიმინალის თანამონაწილეობის გზით. ის კრიმინალში თანამონაწილეობდ სწორედ 31 ოქტომბრის არჩევნების ცსკ-ის მიერ წარმოდგენილი შედეგების აღიარებას განიხილავს. შეგახსენებთ, რომ ოპოზიცია 31 ოქტომბრის საპარლამენტო არჩევნებს არ აღიარებს და ბოიკოტს უცხადებს.
აშშ–ის ელჩის სახლში ოპოზიციონერი ლიდერები იმყოფებიან
საქართველოში აშშ-ის ელჩის საცხოვრებელ სახლში საარჩევნო ბარიერგადალახული ოპოზიციური პარტიების ლიდერები იკრიბებიან. ადგილზე ასევე მივიდნენ საქართველოში ევროკავშირისა და საფრანგეთის ელჩები. როგორც ოპოზიციონერმა ლიდერებმა განმარტეს, შეხვედრა ელჩის თხოვნით ჩაინიშნა და სასაუბრო თემა ქვეყანაში არსებული პოლიტიკური კრიზისი და გამოსავლის გზები იქნება. შეხვედრაზე მივიდა საქართველოს პარლამენტის თავმჯდომარე არჩილ თალაკვაძეც. მას მედიასთან კომენტარი არ გაუკეთებია.
თურქეთის ინფორმაციით, ნახიჩევანთან დამაკავშირებელი რკინიგზის მშენებლობა იგეგმება
თურქეთის ტრანსპორტისა და ინფრასტრუქტურის მინისტრი ადილ კარაისმაილოღლუ აცხადებს, რომ ყარაბაღის შეთანხმების ფონზე ანკარა აზერბაიჯანის რეგიონ ნახიჩევანთან დამაკავშირებელი რკინიგზის მშენებლობას გეგმავს. მინისტრის თქმით, პროექტის წინასწარი დაგეგმვის და შესწავლის შედეგები მალე გახდება ცნობილი. მანამადე, თურქეთის საგარეო საქმეთა მინისტრმა მევლუთ ჩავუშოღლუმ განაცხადა, რომ ყარაბაღის შეთანხმების ფარგლებში ნახიჩევანის დერეფნის გაჩენით სარგებელს რეგიონის ქვეყნების გარდა, ჩინეთიც მიიღებს. ნახიჩევანი არის რეგიონი, რომელიც ირანსა და სომხეთს შორისაა მოქცეული. ამასთან, ნახიჩევანს 8კმ-იანი საზღვარი აქვს თურქეთთან. გარდა ამისა, სომხეთის სახელმწიფო ტერიტორიებს გარდა, მთიან ყარაბაღსა და ნახიჩევანს შორის მოქცეულია ის ტერიტორიებიც, რომელთაც აზერბაიჯანი ოკუპირებულად მიიჩნევდა და რომელთა ნაწილიც მიმდინარე წლის 27 სექტემბერს დაწყებული ომის შემდეგ დაიკავა.
ოპოზიცია პომპეოს ვიზიტისას მდუმარე აქციას გამართავს
ოპოზიცია აშშ-ს სახელმწიფო მდივნის, მაიკ პომპეოს ჩამოსვლისას მდუმარე აქციას გამართავს. როგორც ევროპული საქართველოს ლიდერმა, გიგი უგულავამ თქვა, აქციაზე არ იქნება პოლიტიკური გამოსვლები და მთავარი მესიჯი იქნება, რომ არჩევნები გაყალბებულია. "ჩვენ ვგეგმავთ აბსოლუტურად განსხვავებული ფორმატის აქციას 17 ან 18 ნოემბერს, რომელიც იქნება ერთი მხრივ მიძღვნილი ტოტალური გაყალბების წინააღმდეგ და ამავე დროს იქნება ერთგვარი საზეიმო დახვედრა ბატონი პომპეოსი. იქნება დაკრული სტიკერები, სოციალური დისტანცია აბსოლუტურად დაცული, მოქალაქეებს ექნებათ შესაძლებლობა, მოვიდნენ, დადგნენ და თქვან ერთადერთი – გაყალბებულია. იქნება მხოლოდ მდუმარე ფორმა საზოგადოების უდიდესი ნაწილის ერთი მესიჯით, რომ არჩევნები გაყალბებულია და ვესალმებით ჩვენს სტრატეგიულ პარტნიორს", – თქვა გიგი უგულავამ. საგარეო საქმეთა სამინისტროს ინფორმაციით, 17 ნოემბერს, საქართველოში აშშ-ს სახელმწიფო მდივანი, მაიკ პომპეო ჩამოვა. ვიზიტი ორდღიანია. შეგახსენებთ, 31 ოქტომბრის საპარლამენტო არჩევნების შედეგების გამოქვეყნებას ოპოზიცური პარტიებისა და ამომრჩევლების პროტესტი მოჰყვა. ისინი არჩევნების შედეგებს არალეგიტიმურად – გაყალბებულად მიიჩნევენ და რიგგარეშე არჩევნების ჩატარებას მოითხოვენ. არც ერთი ოპოზიციური პარტია საქართველოს მე-10 მოწვევის პარლამენტში არ შედის და საქართველოს ისტორიაში პირველად პარლამენტი ერთპარტიულად შეიკრიბება. მანდატებზე უარი თქვეს ევროპულმა საქართველომ, ლელომ, ლეიბორისტულმა პარტიამ, გირჩმა, ენმ-ძალა ერთობაშიამ, სტრატეგია აღმაშენებელმა, მოქალაქეებმა და პუტინისტურმა პატრიოტთა ალიანსმა.
სერგეი ლავროვი - ყარაბაღში არანაირი თურქი სამშვიდობოების გაგზავნა არ მოხდება
თურქეთის სამშვიდობო მისიები მთიანი ყარაბაღის ტერიტორიაზე არ გაიგზავნება, - რუსული მედიის ინფორმაციით, ამის შესახებ რუსეთის საგარეო საქმეთა მინისტრმა სერგეი ლავროვმა განაცხადა. ”თურქეთის რესპუბლიკის სამშვიდობო ნაწილები არ გაიგზავნება მთიან ყარაბაღში. ეს ლიდერების მიერ ხელმოწერილ განცხადებაში გარკვევითაა ნათქვამი,“- განაცხადა სერგეი ლავროვმა. მისი თქმით, თურქი დამკვირვებლების მობილობის საზღვრები შემოიფარგლება იმ გეოგრაფიული კოორდინატებით, რომლებიც განისაზღვრება რუსულ-თურქული მონიტორინგის ცენტრის განსათავსებელად აზერბაიჯანის ტერიტორიაზე, ტერიტორიის იმ ნაწილში, რომელიც არ არის ყარაბაღთან ახლოს და რაზეც შეთანხმება დამატებით მოხდება. ცნობისათვის, რუსეთის თავდაცვის სამინისტროს ინფორმაციით, თურქეთმა და რუსეთმა ხელი მოაწერეს მემონარდუმს, რომელიც ცეცხლის შეწყვეტის მონიტორინგის განმახორციელებელი ერთობლივი ცენტრის შექმნას ითვალისწინებს. გავრცელებული ინფორმაციით, რუსულ-თურქული ერთობლივი ცენტრი აზერბაიჯანში განთავსდება. თურქული მედიის ინფორმაციით კი, თურქეთის პრეზიდენტმა, რეჯეფ თაიფ ერდოღანმა განაცხადა, რომ „თურქეთი მთიან ყარაბაღში სამშვიდობო ძალებს შეუერთდება და ცეცხლის შეწყვეტის შეთანხმების განხორციელებას რუსეთთან ერთად გააკონტროლებს“.
