პოლიტიკა
მოქალაქეს, ცესკოს აქციაზე მიღებული დაზიანების გამო, მხედველობა დაუქვეითდა
მოქალაქე გოგი ხოჭოლავა ცესკოსთან მიმდინარე აქციაზე დაშავდა და აცხადებს, რომ დარბევის დროს სცეცრაზმელმა სახეში სპრეი შეასხა, ამის შემდეგ კი მარცენა თვალში მხედველობის 70% დაკარგა. "არანაირ ძალადობრივ აქტს არ ჩავდიოდით არცერთი აქტივისტი, ამის კადრები ჩემსავე ლაივშია. სპეცრაზმელმა, რომელთანაც ერთ მეტრიანი დისტანცია მქონდა დაცული, სპეცრაზმის კორდონთან, ხელი გადმოყო და რაღაც სპრეი შემოგვასხა სახეში იქ მდგომ ადამიანებს. მაქვს ტრამვული კონიუქტივიტი, ბადურის ქიმიური დამწვრობა, დამიდასტურდა 70 პროცენტით მარცენა თვალში მხედველობის დაკარგვა". – ყვება მოქალაქე. გუშინ, 8 ნოემბერს, ოპოზიცის ლიდერები და სამოქალაქო აქტივისტები პარლამენტის შენობასთან 15:00 საათზე შეიკრიბნენ. აქციის დაწყებიდან მალევე მათ მთავარი მოთხოვნები წამოაყენეს. ოპოზიციამ ხელახალი არჩევნების ჩანიშვნა, ცესკოს მოქმედი თავმჯდომარის, თამარ ჟვანიას გადადგომა და პოლიტპატიმრების გათავისუფლება მოითხოვა. მათ ქართულ ოცნებას დრო 20:00 საათამდე მისცეს და წამზომი ჩართეს. მას მერე, რაც ხელისუფლებამ მოთხოვნები არ დააკმაყოფილა, ოპოზიციამ ხალხს სამოქმედო გეგმა გააცნო - მათ ცენტრალური საარჩევნო კომისიის შენობასთან გადანაცვლება გადაწყვიტეს. ენმ-ძალა ერთობაშიას ლიდერმა, ნიკა მელიამ თქვა, რომ ხელახალი არჩევნების ჩანიშვნამდე ცესკო-ს შენობაში ვერავინ შევიდოდა და ვერავინ გამოვიდოდა. მანამ, სანამ ოპოზიციის წევრები და აქციის მონაწილეთა უმრავლესობა გზაში იყო, ცესკოსთან აქტივისტთა ნაწილი შეიკრიბა. მათი ნაწილი რკინის ჯებირებზე ქვებს აბრახუნებდა. ჯებირებს მიღმა სპეცრაზმისა და პოლიციის მრავალრიცხოვანი შემადგენლობა და ტექნიკა იდგა. მომიტინგეები ძალოვნებმა წყლის ჭავლით დაშალეს. უწყებამ გადაწყვეტილება, რომელიც ადგილობრივი და საერთაშორისო არასამთავრობო ორგანიზაციების, ასევე სახალხო დამცველის მიერ დანაშაულად და უსაფუძვლოდ შეფასდა, "გადაუდებელი აუცილებლობით" ახსნა. აღსანიშნავია ისიც, რომ წყლის ჭავლი გაუფრთხილებლად გამოიყენეს. აქტივისტები ამის შესახებ წინასწარ არავის გაუფრთხილებია და მათთვის დაშლისკენ არავის მოუწოდებია. პარალელურად, ბრიფინგი გაიმართა შინაგან საქმეთა სამინისტროში, სადაც თქვეს, რომ აქციის მონაწილეების წინააღმდეგ პროპორციული ძალა გამოიყენეს. ქართულ ოცნებაში კი ამბობდნენ, რომ "როცა თავს დამესხმებით, გაფრთხილებას ვერ დავიწყებ, მარტივი იურიდიული კაზუსია." რუსთაველიდან ფეხით მომავალი ოპოზიციის ლიდერებისა და პროტესტტის სხვა მონაწილეების შემოერთებიდან მალევე, სპეცრაზმმა წყლის ჭავლის გამოყენება განაახლა. აქტივისტების დასარბევად იყენებდნენ ხელკეტებსაც. მოქალაქეთა ნაწილი ამბობს, რომ გაუშვეს აირიც, რასაც შინაგან საქმეთა სამინისტრო უარყოფს და დეზინფორმაციას უწოდებს. დარბევის დაშავდა რამდენიმე ადამიანი. დაშავებულებს შორის არიან მედიის წარმომადგენლები. მანამ, სანამ მოთხოვნები არ შესრულდება, ოპოზიციის წარმომადგენლები უწყვეტ საპროტესტო აქციებს გეგმავენ. პარლამენტსა და ცენტრალურ საარჩევნო კომისიასთან გამართული საპროტესტო აქციის შემდეგ ოპოზიცია, მხარდამჭერებთან ერთად, 9 ნოემბერს, 18:00 საათზე კვლავ შეიკრიბება.
თბილისში განვითარებულ მოვლენებს Reuters-ის შემდეგ, Bloomberg-ი ეხმაურება
თბილისში განვითარებულ მოვლენებზე Reuters-ის შემდეგ, ამერიკული Bloomberg-ი წერს. სტატიის ავტორი აღნიშნავს, რომ თბილისში, ცესკოს შენობასთან სპეცრაზმი აქციის მონაწილეთა დასაშლელად, წყლის ჭავლთან ერთად გამოჩნდა. პროტესტის მონაწილეებმა ჩატარებული საპარლამენტო არჩევნები გაყალბებულად გამოაცხადეს და ცესკოს თავმჯდომარის გადადგომის გარდა, რიგგარეშე არჩევნებს მოითხოვენ. „პოლიციამ ასევე გამოიყენა ფარი და კორდონი, რომ პროტესტის მონაწილეებს ცესკოს შენობის შესასვლელის ბლოკირება არ მოეხდინათ“, - აღნიშნულია სტატიაში. თბილისში მიმდინარე მოვლენებზე ბრიტანულმა სააგენტო Reuters-მაც დაწერა. მანამდე შსს-მ განაცხადა, რომ აქციის მონაწილეები შეეცადნენ, შეჭრილიყვნენ ცენტრალური საარჩევნო კომისიის შენობაში და ამის საშუალება მათ პოლიციამ არ მისცა. მმართველი პარტიიდან კი მომხდარს მამუკა მდინარაძე გამოეხმაურა. „ქართული ოცნების“ ერთ-ერთი ლიდერის თქმთ,„პროტესტის მონაწილეებმა ცესკოს შენობაში სცადეს შეჭრა და სხვადასხვა ნივთს ესროდნენ პოლიციას, ამას კი საპასუხო რეაქცია მოჰყვა სამართალდამცველების მხრიდან. ოფიცილური შედეგებით, მმართველი პარტია „ქართული ოცნება„ 48.23 პროცენტით იმარჯვებს. მეორე ადგილზეა „ერთიანი ნაციონალური მოძრაობა - გაერთიანებული ოპოზიცია, 27.18%. 8 ოპოზიციური პარტია აცხადებს, რომ პარლამენტს ბოიკოტს უცხადებს.
ლინკოლნ მიტჩელი: ახლა რომ თბილისში ვიყო, ძალიან ბედნიერი ვიქნებოდი ჯო ბაიდენის გამარჯვებით
ანალიტიკოსი ლინკოლნ მიტჩელი აშშ-ის პრეზიდენტად ჯო ბაიდენის არჩევას საქართველოსთვის პოზიტიურ მოვლენად აფასებს. „ევროპათაიმთან“ საუბრისას ანალიტიკოსი აცხადებს, რომ ბაიდენის ადმინისტრაცია ჯორჯ ბუშისა და ბარაკ ობამას პოლიტიკას დაუბრუნდება. „ჯო ბაიდენის გამარჯვების შემდეგ ვნახავთ იმ პოლიტიკისკენ მიბრუნებას, რაც ჰქონდათ ჯორჯ ბუშს და ბარაკ ობამას ამ რეგიონის მიმართ, ვგულისხმობ პოსტ საბჭოთა ქვეყნებს და განსაკუთრებით საქართველოს, ბაიდენს ესმის ეს რეგიონი კარგად და რეალურად ადარდებს უკრაინა და საქართველო, ანუ ეს კარგია საქართველოსთვის. აქვე დავამატებ ერთ რამეს, ბაიდენი არ არის ახალგაზრდა. 70-იანი წლებიდან პოლიტიკაშია. მისი პოლიტიკური მოსაზრებები ჩამოყალიბდა ცივი ომის დროს, როცა ის იყო ახალგაზრდა და თითქმის ორი ათწლეული გაატარა სენატში. მის გარშემო ასევე არის ხალხი ვინც, კარგად იცნობს რეგიონს, საქართველოს და კეთილგანწყობილნი არიან. ასე რომ, ჩემი აზრით, ბაიდენის პრეზიდენტობა ძალიან კარგი იქნება საქართველოსთვის და ახლა რომ თბილისში ვიყო, ძალიან ბედნიერი ვიქნებოდი ჯო ბაიდენის გამარჯვებით“, - განაცხადა ლინკოლნ მიტჩელმა. ლინკოლნ მიტჩელი „ევროპათაიმს“ შიდა პოლიტიკაზეც ესაუბრა. „არჩევნები კარგად არ ჩატარდა, „ქართული ოცნება„ წინ ვერ წავიდა დემოკრატიზაციის გზაზე, განსაკუთრებით არჩევნების საკითხში და ეს ძალიან სამწუხაროა. ყველაზე სამწუხარო ის არის, რომ შეიძლებოდა, უკეთესი არჩევნები ჩატარებულიყო. ისინი იგებდნენ, მოიგეს და იცოდნენ, რომ მოიგებდნენ, ამიტომ სამწუხაროა ის, რაც მოხდა, რადგან ეს ლეგიტიმიზაციას ართმევს არჩევნებს. რაც შეეხება ოპოზიციის არშესვლას პარლამენტში, ვეცდები რაც შეიძლება დელიკატური ვიყო, მაგრამ ეს სულელური გადაწყვეტილებაა - ყველაფერი კი იმის ბრალია, რომ წინასაარჩევნო პერიოდში ოპოზიცია გამოდიოდა განცხადებებით, რომ ისინი იგებდნენ, როცა მსგავსი განწყობა დასავლეთშიც კი არ იყო. ის ხალხი, ვინც საქართველოს თემებზე მუშაობს, დარწმუნებული იყო რომ „ოცნება“ იგებდა ამ არჩევნებს. ოპოზიციამ შექმნა არასწორი მოლოდინი და ეს არ იყო სწორი, იფიქრეს რომ რევოლუცია მოხდებოდა რაც არ მოხდა და რა არის ახლა გამოსავალი, ეს არის შეკითხვა, რომელზეც პასუხი არ მაქვს. „ქართული ოცნება“ არის დემოკრატიზაციაზე პასუხისმგებელი. გასაგებია, რომ სააკაშვილის მოწოდებები რევოლუციისკენ, ძირს უთხრის დემოკრატიას, მაგრამ სააკაშვილი არ არის მთავრობაში, „ქართული ოცნებაა“ პასუხისმგებელი ქვეყნის დემოკრატიზაციაზე. რეალურად უნდა ეცადონ, რომ უკეთესი არჩევნები ჩაატარონ. რეალურად უნდა წაიყვანონ ქყვეყანა უკეთესი დემოკრატიისკენ. რაც შეეხება პარლამენტს, თუ მათ უნდათ ბოიკოტი მოახდინონ, გამოსავალი ოცნებისთვის არის, რომ ქვეყანა მართონ კარგად, დაეხმარონ ეკონომიკას ზრდაში, შეაჩერონ კოვიდის გავრცელება, უკეთესი გახადონ ქართველი ხალხის ცხოვრება“, - განაცხადა ლინკოლნ მიტჩელმა.
DRI: წყლის ჭავლის გამოყენება უკანონო, დაუსაბუთებელ, არაპროპორციულ ღონისძიებას წარმოადგენს
ორგანიზაცია დემოკრატიის კვლევის ინსტიტუტი გუშინ, 8 ნოემბერს ცესკოსთან შეკრებილიდემონსტრანტების დარბევას ეხმაურება და მიიჩნევს, რომ მშვიდობიან დემონსტრანტთა მიმართ წყლის ჭავლისა და ცრემლსადენი გაზის გამოყენებას არ გააჩნდა სამართლებრივი საფუძველი და შეკრების არაძალადობრივი ხასიათიდან, ასევე, მომიტინგეთა რიცხოვნობიდან გამომდინარე, უკანონო, დაუსაბუთებელი და ცალსახად არაპროპორციული იყო. მათი განმარტებით, „პოლიციის შესახებ“ საქართველოს კანონის თანახმად, ცრემლსადენი გაზი და წყალსატყორცნი არის აქტიური სპეციალური საშუალება. ასევე, პოლიციას ეკისრება აღნიშნული სპეციალური საშუალებების გამოყენების შესახებ წინასწარ გაფრთხილებისა და კანონიერი მოთხოვნის შესასრულებლად დემონსტრანტებისთვის გონივრული ვადის განსაზღვრის ვალდებულება. "მოცემულ შემთხვევაში, როგორც დემოკრატიის კვლევის ინსტიტუტის დამკვირვებლების, ასევე, მედია საშუალებების მეშვეობით გადმოცემულ მასალებში, არ იკვეთებოდა რომელიმე სპეციალური საშუალების გამოყენების საჭიროება. გარდა ამისა, სამართალდამცავებმა აღნიშნული ღონისძიებებისაწყის ეტაპზე წინასწარი გაფრთხილების გარეშე განახორციელეს". - წერია DRI-ს განცხადებაში. დემოკრატიის კვლევის ინსტიტუტი მოუწოდებს ხელისუფლების პოლიტიკური თანამდებობის პირებს: განსაკუთრებული სიფრთხილით მოეკიდონ განცხადებას აქციის დაშლის შესახებ, ვინაიდან აღნიშნული აღიქმება პირდაპირ მითითებად არაპროპორციული ძალის გამოყენებაზე დაუყოვნებლივ მიიღონ ყველა ზომა სიტუაციის განსამუხტად და კონსტიტუციურ ჩარჩოებში მოსაქცევად დაუყოვნებლივ დაიწყონ გამოძიება არაპროპორციული ძალის გამოყენების შედეგად ჯანმრთელობის დაზიანების ფაქტებზე. ოპოზიციურ პოლიტიკურ სპექტრს: იმოქმედონ მაღალი საზოგადოებრივი პასუხისმგებლობით და მოერიდონკანონსაწინააღმდეგო მოწოდებებს. შეგახსენებთ, რომ ოპოზიცია 31 ოქტომბრის საპარლამენტო არჩევნებს არ აღიარებს და ბოიკოტს უცხადებს. პროტესტის ნიშნად აქცია 8 ნოემბერს, 15:00სთ-ზე დაიწყო, სადაც ოპოზიციამ ბიძინა ივანიშვილს მოთხოვნები წაუყენა. ერთ-ერთი მათგანი ცესკოს თავმჯდომარის თამარ ჟვანიას გადადგომა და ხელახალი არჩევნები იყო. დათქმულ დროს, მოთხოვნის შეუსრულებლობის გამო, აქციის მონაწილეები ცესკოს შენობისკენ დაიძრნენ, რისკენაც მათ ლიდერებმა მოუწოდეს. ადგილზე მისული აქციის მონაწილეების წინააღმდეგ კი, გაფრთხილების გარეშე, წყლის ჭავლის გამოყენება მოხდა. ცესკოსთან მყოფი პირების ინფორმაციით, ადგილი ჰქონდა ცრემლსადენი გაზის გამოყენებასაც. წყლის ჭავლის ხელმეორედ გამოყენების შემდეგ კი, ლიდერებმა აქციის დასრულება გადაწყვიტეს და მხარდამჭერებს, 9 ნოემბერს, 18:00სთ-ზე, პარლამენტთან შეკრებისკენ მოუწოდეს.
ლუის ნავარო: შესაძლოა, საერთაშორისო პარტნიორების ჩართვით მოლაპარაკებების დაწყება გახდეს საჭირო
ევრაზიის პროგრამის, საგარეო პოლიტიკის კვლევითი ინსტიტუტის ანალიტიკოსი ლუის ნავარო საქართველოში მიმდინარე შიდა პოლიტიკურ პროცესებს „ევროპათაიმთან“ აფასებს. ლუის ნავარო ვარაუდობს, რომ საარჩევნო სისტემაზე მოლაპარაკებების მსგავსად, შესაძლოა, მიმდინარე პროცესებში საერთაშორისო შუამავლების ჩართვა გახდეს საჭირო. „არჩევნების ლეგიტიმურობაზე საერთაშორისო დამკვირვებლების ზოგადი შეფასების მიუხედავად, ოპოზიციამ მიიჩნია, რომ მათი გადაწყვეტილება არ შევიდეს პარლამენტში, დაასუსტებს მმართველ პარტიას. ამ გადაწყვეტილებამ გაანულა საქართველოს მოქალაქეების მიერ მიცემული ხმები, განსაკუთრებით მათი, ვინც მთავრობის ალტერნატივას დაუჭირეს მხარი. შესაძლოა, საჭირო გახდეს საერთაშორისო პარტნიორების ჩართვა, როგორც ეს ვნახეთ ოპოზიციასა და მთავრობას შორის ბოლო მოლაპარაკებების დროს, რამაც გამოიწვია პროპორციული სისტემით არჩევნების ჩატარება. მთავრობის მხრიდან ყველაზე დიდი შეცდომა, მისი წინამორბედის არასწორი გაკვეთილების გამეორებაა. - აცხადებს ლუის ნავარო. რაც შეეხება ამერიკაში ჩატარებულ არჩევნებს, ლუის ნავარო დონალდ ტრამპსა და ჯო ბაიდენს შორის განსხვავებას უსვამს ხაზს. „დონალდ ტრამპი ორიენტირებულია პირად ინტერესებზე, ხოლო ჯო ბაიდენი დიდი ხანია, საერთაშორისო ინსტიტუტებისა და მეორე მსოფლიო ომის შემდეგ დადგენილი ნორმების მომხრეა. ტრამპის ხასიათმა ევროპასთან აშშ-ის ურთიერთობა დააზიანა და ფოკუსირდა შიდა პოლიტიკურ საკითხებზე, რამაც ძირი გამოუთხარა ევროკავშირისა და ნატოს ეფექტურობას. ანალოგიური თავისებურებებით წარიმართა ტრამპის ურთიერთობა ვლადიმერ პუტინთან, რამაც ადამიანის უფლებების დაცვასთან დაკავშირებით აშშ-ის ერთგულების ირგვლივ კითხვები გააჩინა. ამის მაგალითია პუტინის ოპონენტის ალექსეი ნავალნის მკვლელობის მცდელობაზე დუმილი და აშშ-ს მხრიდან უკრაინის მხარდაჭერის კითხვის ქვეშ დაყენება, თუ ის არ მიიღებდა ზომებს ჯო ბაიდენის კანდიდატურის წინააღმდეგ. მიუხედავად იმისა, რომ ბაიდენს სკეპტიკურად უყურებენ მაშინდელი პრეზიდენტის, ბარაკ ობამას „გადატვირთვის“ პოლიტიკის გამო, ის საჯაროდ დაუპირისპირდა პუტინის ხელისუფლებას, ბაიდენმა ასევე განმარტა, რომ აშშ მხარს უჭერს ევროკავშირს და ნატო იქნება მისი მიდგომის მთავარი ქვაკუთხედი, ევროპასთან ურთიერთობაში, ის განსაკუთრებულად უჭერდა მხარს უკრაინაში ანტიკორუფციული ქმედებებს. უფრო მეტიც, 2008 წელს, ომის დროს, ჯო ბაიდენი, როგორც აშშ სენატის საგარეო ურთიერთობათა კომიტეტის თავმჯდომარე, საქართველოსთვის ერთმილიარდიანი დახმარების გამოყოფის ინიციატორი იყო“, - აცხადებს ნავარო.
მამუკა მდინარაძე: აქციის მონაწილეებმა ცესკოს შენობაში სცადეს შეჭრა, რასაც საპასუხო რეაქცია მოჰყვა
„პროტესტის მონაწილეებმა ცესკოს შენობაში სცადეს შეჭრა და სხვადასხვა ნივთს ესროდნენ პოლიციას, ამას კი საპასუხო რეაქცია მოჰყვა სამართალდამცველების მხრიდან“, - ამის შესახებ „ქართული ოცნების“ ერთ-ერთმა ლიდერმა მამუკა მდინარაძემ პარტიის ოფისში გამართულ ბრიფინგზე განაცხადა. მამუკა მდინარაძის განცხადებით, აქციის მონაწილეებმა არ გაითვალისწინეს საერთაშორისო პარტნიორების მოწოდება, რომელიც აქციის მშვიდობიანად ჩატარებას ეხებოდა. მისივე თქმით, პროტესტის მონაწილეებმა ცესკოს შენობაში სცადეს შეჭრა და სხვადასხვა ნივთს ესროდნენ პოლიციას, ამას კი საპასუხო რეაქცია მოჰყვა სამართალდამცველების მხრიდან. მამუკა მდინარაძის თქმით, როგორც ჩანს, აქციის მონაწილეებს არ მოსწონთ უპრეცედენტო გადაწყვეტილება, რომლის მიხედვითაც დაახლოებით 30 უბანზე გადაითვალა ხმები. ამ გადათვლის შედეგად რაიმე არსებითი დარღვევა, არც გაყალბების ფაქტი არ დაფიქსირებულა. ცენტრალური საარჩევნო კომისიის მიმდებარედ ვითარება დაიძაბა. დემონსტრანტების ნაწილი საარჩევნო კომისიასთან მივიდა, რასაც პოლიციასთან შეხლა–შემოხლა მოჰყვა. სამართალდამცველებმა მომიტინგეთა ერთი ჯგუფის წინააღმდეგ წყლის ჭავლის გამოიყენეს და მათ შენობასთან ახლოს მისვლის საშუალება არ მისცეს. ამ ფაქტმა აქციის მონაწილეთა გაღიზიანება გამოიწვია.
Reuters-ი ცესკოსთან განვითარებულ მოვლენებზე წერს
საქართველოს პოლიციამ წყლის ჭავლი და ცრემლმდენი გაზი გამოიყენა აქციის ასეულობით მონაწილის წინააღმდეგ, რომლებიც ცესკოსთან თამარ ჟვანიას გადადგომას და რიგგარეშე არჩევნებს მოითხოვდნენ. ამის შესახებ ბრიტანული სააგენტო Reuters-ი წერს. სტატიაში ნათქვამია, რომ აქციის ზოგიერთმა მონაწილემ პოლიციას ქვები ესროლა. „დემონსტრანტები ცესკოს შეობასთან რუსთაველის გამზირიდან მივიდნენ, საიდანაც დღეს აქციის ათასობით მონაწილის მშვიდობიანი პროტესტი დაიწყო. პოლიცია აცხადებს, რომ აქციის მონაწილეები ცესკოს შენობაში შეჭრას ცდილობდნენ. ოფიცილური შედეგებით, მმართველი პარტია „ქართული ოცნება„ 48.23 პროცენტით იმარჯვებს. მეორე ადგილზეა „ერთიანი ნაციონალური მოძრაობა - გაერთიანებული ოპოზიცია, 27.18%. 8 ოპოზიციური პარტია აცხადებს, რომ პარლამენტს ბოიკოტს უცხადებენ“, - აღნიშნულია სტატიაში.
შსს: აქციის მონაწილეები შეეცადნენ, შეჭრილიყვნენ ცენტრალური საარჩევნო კომისიის შენობაში
შინაგან საქმეთა სამინისტრო ცენტრალურ საარჩევნო კომისიასთან მომიტიმგეთა მცირე ჯგუფის წინააღმდეგ სპეციალური ღონისძიებების გამოყენების საჭროებას მომიტინგეთა მხრიდან შენობაში შეჭრისგან დაცვით ხსნის, - ამის შესახებ შსს–ს სპეციალურ განცხადებაშია ნათქვამი. „საქართველოს შინაგან საქმეთა სამინისტრო წარმოადგენს საზოგადოების უსაფრთხოებასა და მართლწესრიგის დაცვაზე პასუხისმგებელ უწყებას. სამინისტრო მთელი დღის განმავლობაში, აქციაზე უზრუნველყოფდა, როგორც საზოგადოებრივი უსაფრთხოებისა და მართლწესრიგის დაცვას, ასევე, თითოეული ადამიანის გამოხატვის თავისუფლებას, რომელიც არ გასცდა კანონით დასაშვებ ფარგლებს. დღის ბოლოს, ცენტრალურ საარჩევნო კომისიასთან მიმდინარე აქციის დროს, აქციის მონაწილეები შეეცადნენ, შეჭრილიყვნენ ცენტრალური საარჩევნო კომისიის შენობაში, რაც კადრებშიც კარგად ჩანს და რისი საშუალებაც მათ პოლიციამ არ მისცა. ვინაიდან აქციის მონაწილეები იყენებდნენ ძალადობრივ მეთოდებს და არ ემორჩილებოდნენ პოლიციის მითითებებს, შინაგან საქმეთა სამინისტრომ მისთვის კანონით მინიჭებული უფლებამოსილების ფარგლებში გამოიყენა პროპორციული ძალა. შინაგან საქმეთა სამინისტრო, როგორც მართლწესრიგის დაცვაზე პასუხისმგებელი უწყება, მოუწოდებს ყველა მოქალაქეს, აქციის ორგანიზატორებსა და მონაწილეებს, დაიცვან მართლწესრიგი და დაემორჩილონ პოლიციის კანონიერ მოთხოვნებს. აქციის მიმდინარეობისას, სამართალდარღვევის ნებისმიერი ფაქტი პოლიციის მიერ, კანონის ფარგლებში, დაუყოვნებლივ იქნება აღკვეთილი“, - ნათქვამია განცხადებაში.
ცესკოსთან აქციის დასაშლელად წყლის ჭავლი გამოიყენეს
ცენტრალური საარჩევნო კომისიის მიმდებარედ ვითარება დაიძაბა. დემონსტრანტების ნაწილი საარჩევნო კომისიასთან მივიდა, რასაც პოლიციასთან შეხლა–შემოხლა მოჰყვა. სამართალდამცველებმა მომიტინგეთა ერთი ჯგუფის წინააღმდეგ წყლის ჭავლის გამოიყენეს და მათ შენობასთან ახლოს მისვლის საშუალება არ მისცეს. ამ ფაქტმა აქციის მონაწილეთა გაღიზიანება გამოიწვია.
ოპოზიცია თამარ ჟვანიას გადადგომას და ხელახალ არჩევნებს მოითხოვს
გაერთიანებული ოპოზიცია, ცესკოს თავმჯდომარის, თამარ ჟვანიას გადადგომას, ბიძინა ივანიშვილთან შეხვედრას, ხელახალ არჩევნებსა და პოლიტპატიმრების გათავისუფლებას მოითხოვს. როგორც რუსთაველზე მიმდინარე აქციაზე, ოპოზიციის ერთ-ერთმა ლიდერმა, ნიკა მელიამ განაცხადა, ივანიშვილს დრო 20:00სთ-მდე აქვს. აქცია, რომელიც 31 ოქტომბრის ბოიკოტს უკავშირდება, ოპოზიციის ლიდერების გამოსვლებით მიმდინარეობს. საქართველოს ექს პრეზიდენტი გიორგი მარგველაშვილი უცხოელ პარტნიორებს მოუწოდეს, რუსთაველზე მდგარი ხალხის გვერდით დადგნენ. “მინდა, მივმართო ჩვენს უცხოელ პარტნიორებს - მადლობა თანადგომისთვის და მინდა, ერთი რამ გითხრათ, მე ვიცნობ ქართულ საზოგადოებას და ქართველ ერს, თქვენც იცნობთ, მაგრამ, ალბათ, მე უკეთესად ვიცნობ. ეს იცოდეთ, როდესაც რუსთაველი ასე ივსება და როდესაც ქართველი ერის მოთმინების ფიალა ივსება, არ ყოფილა, რომ ამ ხალხს გამარჯვებისთვის არ მიეღწიოს. დროზე დადექით ამ ხალხის გვერდით", - განაცხადა მარგველაშვილმა.
ქალაქი შუშა სომხური ოკუპაციისგან გათავისუფლებულია - ილჰამ ალიევი
აზერბაიჯანის პრეზიდენტის ილჰამ ალიევის განცხადებით, აზერბაიჯანის არმიამ მთიანი ყარაბაღის ქალაქი შუშა გაათავისუფლა. "დიდი სიამაყით ვაცხადებ, რომ ქალაქი შუშა გათავისუფლებულია სომხური ოკუპაციისგან. შუშა ჩვენია! ყარაბაღი ჩვენია!" - განაცხადა მან. პარალელურად კი, სოციალურ მედიაში ვრცელდება კადრები თუ როგორ ტოვებს სომხური მოსახლეობა ქალაქ შუშასა და მის შემოგარენში არსებულ დასახლებებს. აღსანიშნავია, რომ ქალაქი შუშა სტრატეგიულად მნიშვნელოვანი ქალაქია და ის არაღიარებული მთიანი ყარაბაღის ე.წ. დედაქალაქ სტეპანაკერტიდან რამდენიმე კილომეტრში მდებარეობს.
რუსთაველზე ოპოზიციის აქცია მიმდინარეობს
რუსთაველის გამზირზე მიმდინარე აქციაზე პოლიტიკური პარტიები და მათი აქტივისტები იკრიბებიან. ოპოზიციური პარტიები უნდობლობას უცხადებენ 31 ოქტომბრის საპარლამენტო არჩევნების შედეგებს და მის ლეგიტიმურობას არ ცნობენ. „ევროპული საქართველოს“ ერთ-ერთი ლიდერის გიგი უგულავას თქმით, როგორც არ უნდა აიზიდოს ცაში ხელისუფლების პროპაგანდისტული დრონები, ივანიშვილმა ხალხის სიმრავლესა და ბრაზს თვალი უნდა გაუსწოროს. უგულავას შეფასებით, რუსთაველის გამზირზე ადგილი აქვს გაბრაზებული და შეურაცხყოფილი ადამიანების პროტესტს, რომელიც ივანიშვილისგან თავისუფალი არჩევანის დაბრუნებას ითხოვს. „ხალხი ბევრს ითმენდა იმ იმედითა და მოლოდინით, რომ არჩევნები ჩატარდებოდა და თავისუფალი არჩევანის გაკეთება შეგვეძლებოდა. დღეს ეს თავისუფალი არჩევანი წართმეული და ფეხქვეშ გათელილია. დღეს რუსთაველზე ყველა პოლიტიკური გემოვნების, ყველა ფერის საქართველო დგას ერთადერთი მოთხოვნით - არჩევნები იყოს თავისუფალი და სამართლიანი. თუ ადამიანის არჩევნებზე წასვლას აზრი არ ექნება, სულ სხვა სივრცეში გადავალთ. ცვლილებების სურვილი ადამიანის ბუნებრივი მოთხოვნაა. თუ ამას სახელმწიფო ჩაკეტავს, ცვლილებების სურვილი არსად გაქრება, პირიქით, უფრო გამძაფრდება და უფრო მეტად აგრესიული გახდება“, - განაცხადა გიგი უგულავამ.
აშშ-ს საელჩო და ევროკავშირის წარმომადგენლობა ერთობლივ განცხადებას ავრცელებენ
საქართველოში აშშ-ს საელჩო და ევროკავშირის წარმომადგენლობა ერთობლივ განცხადებას ავრცელებენ. განცხადებაში ისინი პოლიტიკურ პარტიებს მოუწოდებენ განაგრძონ საარჩევნო დარღვევების მტკიცებულებების სამართლებრივი საშუალებების გამოყენებით განხილვა, რაც უმნიშვნელოვანესია საზოგადოების მიერ არჩევნების ლეგიტიმურად ცნობის პროცესში "მოვუწოდებთ პოლიტიკურ პარტიებს, განაგრძონ საარჩევნო დარღვევებთან დაკავშირებული მტკიცებულებების განხილვა სამართლებრივი საშუალებების გამოყენებით, იმ დემოკრატიული პროცესების ფარგლებში, რომელიც საქართველომ ბოლო 20 წლის განმავლობაში შექმნა. დასაბუთებული საარჩევნო დარღვევების გამოსასწორებლად აუცილებელია სანდო და ინკლუზიური სამართლებრივი პროცესი, რათა მოხდეს ამომრჩეველთა ნების პატივისცემა, საარჩევნო პროცესისადმი საზოგადოების ნდობის განმტკიცება და საზოგადოებამ შეძლოს არჩევნების შედეგების ლეგიტიმურად ცნობა. მზად ვართ, ამ მიზნების მისაღწევად, საჭიროებისამებრ, ჩვენი წვლილი შევიტანოთ. საქართველოს სჭირდება პარლამენტი, რომელიც შეძლებს თავისი როლის შესრულებას გადაუდებელი პრობლემების გადაჭრაში, როგორიცაა ეკონომიკური არასტაბილურობა, პანდემია და რეგიონული დაძაბულობა; ამასთანავე, გაატარებს დამატებით რეფორმებს ქვეყნის სამომავლო დემოკრატიული, სამართლებრივი და საარჩევნო პროცესების გასაუმჯობესებლად. ყველა პოლიტიკურმა მხარემ დაუყოვნებლივ უნდა აიღოს პასუხისმგებლობა ასეთი შედეგის უზრუნველსაყოფად". – ნათქვამია განცხადებაში. საქართველოში აშშ-ს საელჩო და ევროკავშირის წარმომადგენლობა მოქალაქეებს ასევე მოუწოდებენ, რომ 8 ნოემბრის შეკრება პანდემიასთან დაკავშირებული უსაფრთხოების ზომების დაცვით განხორციელდეს. "საქართველოს ყველა მოქალაქეს, ვინც 8 ნოემბერს შეკრების უფლების გამოყენებას აპირებს, მოვუწოდებთ განახორციელონ ეს მშვიდობიანად და კოვიდ-19-თან დაკავშირებული უსაფრთხოების ზომების დაცვით; ასევე, მოვუწოდებთ საქართველოს ხელისუფლებას ხელი შეუწყოს სათანადო გარემოს შექმნას". – ვკითხულობთ განცხადებაში.
ჯო ბაიდენი: მე ვიქნები ყველა ამერიკელის პრეზიდენტი
„ამერიკა, დიდი პატივია, რომ ამირჩიე ამ შესანიშნავი ქვეყნის ლიდერად. რთული სამუშაო გველის, თუმცა გპირდები, მე ვიქნები ყველა ამერიკელის პრეზიდენტი, განურჩევლად იმისა, დამიჭირეთ თუ არა მხარი“, - ეს ახლად არჩეული პრეზიდენტის ჯო ბაიდენის სიტყვებია. 48 წლის შემდეგ, საპრეზიდენტო არჩევნებში ორგზის დამარცხების და უფროსი შვილის - ბოს გარდაცვალების შემდეგ, რეკორდული მხარდაჭერით, 74 მილიონი ხმით, ჯო ბაიდენი აშშ-ის 46-ე პრეზიდენტია. გამარჯვებისადმი მიძღვნილ სიტყვაში მან აღნიშნა, რომ ქვეყნის გამაერთიანებლის როლს შეასრულებს და არა გაყოფის. „მოდით, ერთმანეთს შანსი მივცეთ“, - განაცხადა პრეზიდენტმა დელავერის შტატში გამართულ ღონისძიებაზე. ბაიდენმა იმ ხალხს მიმართა, ვინც მას ხმა არ მისცა. ვინ არის ჯო ბაიდენი და რა გზა გაიარა მან პრეზიდენტობამდე, ჯო ბაიდენის შესახებ სტატია „ევროპათაიმმა“ უცხოურ მედიაზე დაყრდნობით მოამზადა. 77 წლის ჯო ბაიდენი პენსილვანიის შტატში, ქალაქ სკრანტონში დაიბადა. ცხოვრობს უილმინგტონში, დელავერის შტატის უდიდეს ქალაქში. ბაიდენი დელავერის სენატორად ექვსჯერ აირჩიეს, პირველად - 1972 წელს. ბარაკ ობამას ადმინისტრაციის დროს იყო აშშ-ის ვიცე პრეზიდენტი. New York Times-ი აღნიშნავს, რომ მისთვის ჯანმრთელობის დაცვა და მასზე ზრუნვა მთავარ პრიორიტეტად რჩება, ამისკენ კი უფრო მეტად უბიძგა პირადმა ტრაგედიამ. 1972 წელს, ბაიდენმა ავტოკატასტროფის დროს ცოლი და ერთი წლის ქალიშვილი დაკარგა. ვაჟები კი დაშავდნენ. თავის წიგნში „Promise Me Dad“ ბაიდენი ყვება, მამაჩემი მეუბნებოდა, როცა დაეცემი, ძალა მოიკრიბე და ადექიო“. ბაიდენმა მამის რჩევა არაერთხელ შეასრულა, მაგალითად, 1972 წლის 7 ნოემბერს, როდესაც დელავერის შტატის არჩევნებში გამარჯვების შემდეგ, მგლოვიარემ სენატორის ფიცი საავადმყოფოს ოთახში, მისი შვილების საწოლის თავთან დადო და თქვა, რომ 6 თვით ცდიდა ბედს და თუ სენატორობა კარგ მამობაში ხელს შეუშლიდა, პოლიტიკაზე უარს იტყოდა. ბაიდენმა სენატში 36 წელი, თეთრ სახლში კი 8 წელი გაატარა. გამოცემა ახლად არჩეული პრეზიდენტის შესახებ სამ შეკითხვას სვამს. 1. იქნება თუ არა ის ამერიკის ყველაზე ასაკოვანი პრეზიდენტი, დიახ, 20 ნოემბერს მას 78 წელი უსრულდება. 2. საიდან არის ბაიდენი წარმოშობით? სკრანტონში დაბადებული, 1942 წელს, დელავერში გადავიდა. როგორც პოლიტიკოსს, მას მჭიდრო კავშირები აქვს ორივე შტატთან, ტრამპი მას პენსილვანიის მიტოვებაში ადანაშაულებდა. „მე მაშინ მესამე კლასში ვიყავი“, - ასეთი იყო ჯო ბაიდენის პასუხი. ის პენსილვანიასთან კავშირების შენარჩუნებას განაგრძობს. 2016 წელს, საპრეზიდენტო მარათონი აქ ტრამპმა მოიგო და წელს, ბაიდენმა ამ შტატში დააფუძნა მთავარი შტაბი. 3. რა როლს თამაშობს ობამას ეპოქა ჯო ბაიდენის კამპანიაში? _როლი დიდია. ბაიდენმა და აშშ-ის 44-ე პრეზიდენტმა მჭიდრო ურთიერთობები დაამყარეს. ის ხშირად საუბრობდა ობამასთან მეგობრობაზე, ისინი ერთად მუშაობდნენ ჯანდაცვის და საგარეო პოლიტიკის საკითხებზე. ჯო ბაიდენის გზა თეთრ სახლამდე 77 წლის ბაიდენი ორჯერ იყრიდა კენჭს აშშ-ის პრეზიდენტობისთვის - 1988 და 2008 წლებში. 2017 წელს გამოქვეყნებულ მემუარებში, ყოფილმა ვიცე-პრეზიდენტმა აღიარა, რომ თავადაც აპირებდა საარჩევნო კამპანიაში ჩართვას, რომ არა ამ გადაწყვეტილების მთავარი მხარდამჭერის, მისი ვაჟის გარდაცვალება თავის ტვინის აგრესიული სიმსივნით. ბოს ჩემსავით სჯეროდა, რომ მზად ვიყავი პრეზიდენტობისთვის; არავინ იყო ჩემზე მეტად მზად“, - დაწერა ბაიდენმა მის წიგნში Promise me Dad“. 2020 წლის არჩევნებში მონაწილეობის შესახებ ჯო ბაიდენმა 2019 წლის აპრილში გამოაცხადა. ამ დროს საარჩევნო რბოლაში დემოკრატიული პარტიიდან უკვე ოცზე მეტი სხვა კანდიდატი იყო ჩართული - ბევრად უფრო ახალგაზრდა, ან უფრო ლიბერალი, უფრო მემარცხენე და პოლიტიკაში ბევრად ახალბედა, ვიდრე ბაიდენი. ჯო ბაიდენი შეეცადა, სტაბილურობის ბურჯად წარმოედგინა თავი ქვეყანაში, რომელიც, მისი თქმით, „ბრძოლის ველად“ იქცა პრეზიდენტ დონალდ ტრამპის მმართველობის განმავლობაში, ტრამპს მან ბრალი დასდო მოსახლეობის გახლეჩასა და საფრთხის შექმნაში. „ჩვენ ამ ერის სულისთვის ვიბრძვით“, - განაცხადა ბაიდენმა, როდესაც თავისი კანდიდატურის შესახებ გამოაცხადა. მისი თქმით, თუ ტრამპს კიდევ ოთხი წლით დაუთმობდნენ მართვის სადავეებს, ის „სამუდამოდ და ფუნდამენტურად შეცვლიდა ამ ერის ხასიათს. ბაიდენს პრობლემები ჰქონდა დემოკრატების მხარდამჭერ პროგრესულ ახალგაზრდებს შორის, რომლებიც იხრებოდნენ ან უფრო ლიბერალური კანდიდატებისკენ, როგორებიც არიან ბერნი სანდერსი და ელიზაბეთ უორენი, ან - უფრო ახალგაზრდებისკენ. საწყის ეტაპზე ბაიდენის სუსტმა შედეგებმა ნიუ-იორკის ყოფილ მერს, მილიარდერ მაიკ ბლუმბერგს, უბიძგა, მარათონში ჩართულიყო დამოუკიდებელი კანდიდატის სტატუსით. მაგრამ თებერვალში, პირველი ადგილი მოიპოვა სამხრეთ კაროლინაში, რასაც ის მედიის ცნობით, ძირითადად აფრიკელი ამერიკელების მხარდაჭერას უნდა უმადლოდეს. ჯო ბაიდენის მიერ თანამებრძოლის დასახელებას განსაკუთრებული ყურადღებით ორი ფაქტორის გამო ელოდნენ. დიდია შანსი, რომ მან ამ პოსტზე მხოლოდ ერთი ვადა დაჰყოს და ამ დროს ვიცე-პრეზიდენტის მნიშვნელობა განუზომლად იმატებს. მეორე, არანაკლებ ყურადსაღები ფაქტორი ამერიკაში შექმნილი პოლიტიკური კლიმატია. რასობრივი დაპირისპირებისა და სოციალური ცვლილებების ფონზე დემოკრატიული პარტიის ამომრჩევლისთვის შეიძლება ძველი ყაიდის, ასაკოვანი თეთრკანიანი კანდიდატი საკმარისად მომხიბლავი არ აღმოჩენილიყო. ჯო ბაიდენმა თანამებრძოლის ვინაობა მრავალკვირიანი ფიქრისა და კონსულტაციების შემდეგ დაასახელა. მან თავიდანვე დადო პირობა, რომ ვიცე-პრეზიდენტობის კანდიდატი ქალი იქნებოდა, თუმცა კონკრეტულად ვისზე შეაჩერებდა არჩევანს, დიდი ხნის განმავლობაში თავად მისთვისვე იყო უცნობი. ამერიკულმა პრესამ არაერთი სტატია მიუძღვნა კანდიდატის შერჩევის პროცესს. სერიოზულად განიხილებოდა პოპულარული სენატორის ელიზაბეტ უორენის კანდიდატურა, თუმცა ის კამპანიას არც ასაკობრივ და არც რასობრივ მრავალფეროვნებას შესძენდა. ფიქრობდნენ ბაიდენის მეგობარ სიუზან რაისზე, რომლის ძლიერ მხარესაც საგარეო პოლიტიკა წარმოადგენს, მაგრამ ის არჩევნებში მონაწილეობის გამოცდილების ნაკლებობის გამო დაიწუნეს. საბოლოოდ არჩევანი კალიფორნიელ სენატორ კამალა ჰარისზე შეაჩერეს, რომელიც დემოკრატიული პარტიის პრაიმარიში ბაიდენის კონკურენტი იყო. კამალა ჰარისი დემოკრატიულ პარტიაში ცენტრისტად მიიჩნევა (თუმცა, ოპონენტებმა მას უკვე დასდეს ბრალი რადიკალიზმში). მას თავად მოუგია არაერთი რთული არჩევნები, რაც ამ დაძაბული კამპანიის დროს დემოკრატებს ნამდვილად გამოადგებათ. ჯო ბაიდენისთვის პოლიტიკასთან ერთად ასევე ძალიან მნიშნელოვანია პირადი ურთიერთობები. ამ მხრივ კი კამალა ჰარისს განსაკუთრებული უპირატესობა ჰქონდა - ის ბაიდენის გარდაცვლილი შვილის მეგობარი იყო. არჩევნებში მნიშვნელოვანი იქნება ვიცე-პრეზიდენტობის კანდიდატის წარმომავლობაც. კამალა ჰარისი იამაიკელი მამის და ინდიელი დედის შვილია, რაც ბაიდენის კამპანიას მრავალფეროვნებას სძენდა. ვიცე-პრეზიდენტობის კანდიდატის დასახელებიდან 24 საათის განმავლობაში ჯო ბაიდენის კამპანიამ 26 მილიონი დოლარის მიღება შეძლო. საარჩევნო კამპანიის დროს ბაიდენმა განაცხადა, რომ უკრაინას აქცევს „აშშ-ის საგარეო პოლიტიკის პრიორიტეტად“ და ევროპელ მოკავშირეებთან ითანამშრომლებს, რათა რუსეთს ძვირად დაუჯდეს უკრაინაში თავისი მოქმედებები. ბაიდენი ობამას ადმინისტრაციის დროს მთავარი ფიგურა გახდა უკრაინის საკითხებში. ჯოზეფ ბაიდენი საქართველოში ორჯერ არის ნამყოფი - პირველად 2008 წლის ომის დროს, როდესაც ჯერ კიდევ სენატორი იყო. ბაიდენი გახდა საქართველოსთვის ერთმილიარდიანი დახმარების გამოყოფის ინიციატორი. „მაშინ მირჩიეს, არ წამოვსულიყავი, მაგრამ მე ვიცოდი რატომ არის ჩემი ქვეყნისთვის ასე მნიშვნელოვანი თქვენი ქვეყნის თავისუფლება და სუვერენიტეტი. მე ჩამოვედი აქ და ვთქვი, რომ ვარ და ვიქნები თქვენს გვერდით და ამ ჩემს აღთქმას ამჯერად ვასრულებ, როგორც ამერიკის შეერთებული შტატების ვიცე-პრეზიდენტი“, - განაცხადა ამერიკის შეერთებული შტატების ვიცე-პრეზიდენტის რანგში საქართველოში 2009 წლის ივლისში დაბრუნებულმა ჯოზეფ ბაიდენმა საქართველოს პარლამენტში გამოსვლისას. „მე ვლაპარაკობ არამარტო ჩემი სახელით, ასევე პრეზიდენტ ბარაკ ობამას სახელითაც. თბილისში ეს სტუმრობა მართლაცდა გამიზნულად მოჰყვა პრეზიდენტ ობამას მოსკოვში ვიზიტს. სწორედ ამიტომ გეგმავდა და სწორედ ამიტომ მომცა მეც დარიგება, თბილისში ვიზიტი დამეგეგმა. მე ვიცი, ბევრი წუხს და სვამს შეკითხვას, რუსეთთან ურთიერთობის გაუმჯობესება საქართველოს ხარჯზე ხომ არ უნდა მოხდეს. ნება მიბოძეთ მკაფიოდ ვთქვა, რომ არა, საქართველოს ხარჯზე არ მოხდება რუსეთთან ურთიერთობის გაუმჯობესება და რომ ეს შეუძლებელია. როგორც პრეზიდენტმა ობამამ ორი კვირის წინ დაადასტურა მოსკოვში, ჩვენ პრინციპების დამცველი ხალხი ვართ. ხალხებმა თვითონ უნდა აირჩიონ პარტნიორები, თვითონ უნდა გადაწყვიტონ თავიანთი ბედი. ჩვენ წინააღმდეგნი ვართ მეცხრამეტე საუკუნის ცნებებისა, გავლენის სფეროების ადგილი არ არის 21-ე საუკუნეში. ჩვენ არ მივიჩნევთ „სამხრეთ ოსეთსა“ და აფხაზეთს დამოუკიდებელ სახელმწიფოებად, ჩვენ არ ვაღიარებთ მათ როგორც დამოუკიდებელ სახელმწიფოებს და მოვუწოდებთ რუსეთს, პატივი სცეს საერთაშორისო ვალდებულებებს, მკაფიოდ ჩამოყალიბებულს, მათ შორის - თქვენი ტერიტორიიდან ყველა შეიარაღებული ძალის გაყვანისა და ცეცხლის შეწყვეტის ვალდებულებას”, - აღნიშნა ბაიდენმა 2009 წელს. საქართველოში 2019 წლის ვიზიტის დროს დაჯილდოებულია საქართველოს წმინდა გიორგის სახელობის გამარჯვების ორდენით. მომზადებულია New York Times-ის, BBC-ის და რადიო თავისუფლების მიხედვით.
ევროკავშირმა ლუკაშენკოს, მის ვაჟს და 13 მაღალჩინოსანს სანქციები დაუწესა
6 ნოემბერს ევროკავშირმა ბელარუსის დამატებით 15 მაღალჩინოსანი, მათ შორის, ალექსანდერ ლუკაშენკო და მისი 44 წლის ვაჟი და ეროვნული უშიშროების მრჩეველი, ვიქტორ ლუკაშენკო, სანქციების სიაში შეიყვანა. ევროკავშირის განცხადებაში წერია, რომ ლუკაშენკო, რომელსაც სახელმწიფო ინსტიტუტებზე ძალაუფლება აქვს, პასუხისმგებელია სახელმწიფო აპარატის მიერ ძალადობრივ რეპრესიაზე 2020 წლის საპრეზიდენტო არჩევნებამდე და მას შემდეგ. კერძოდ, მთავარი ოპოზიციონერების გაშვებით, თვითნებური დაკავებებით, მშვიდობიანი მომიტინგეების არასათანადო მოპყრობით, ასევე ჟურნალისტების დაშინებითა და ძალადობით. სანქცირებულებს შორის ასევე არიან ლუკაშენკოს შტაბის უფროსი, იგორ სერგეენკო და ბელარუსის KGB-ს უფროსი, ივან ტარტელი. ტარტელს ბრალად ედება სახელმწიფო აპარატის მიერ დარბევის წინამძღოლობა. ევროკავშირის სანქციების სიაში შესულ პირებს ევროკავშირის ქვეყნებში სამოგზაურო ვიზა ეკრძალებათ და ევროკავშირის ქვეყნებში არსებული ნებისმიერი აქტივი ეყინებათ. ამას გარდა, ევროკავშირის მოქალაქეებსა და კომპანიებს მათთვის სესხის გაცემა ეკრძალებათ. 5 ნოემბერს ეუთო-მ განაცხადა, რომ არჩევნების შემდეგ ადამიანთა უფლებების დარღვევა "აღმოჩნდა მასიური და სისტემატური და [ეს] ეჭვგარაშე დადასტურებულია". ეუთო-მ "პროცესის ყველა ეტაპზე არსებული დარღვევების გამო" ლუკაშენკოს გამარჯვების ანულირების მოწოდებით გამოდის. გაერთიანებული სამეფოს საგარეო მდივანმა, დომინიკ რააბი შეუერთდა ეუთოს მოწოდებას ბელარუსში თავისუფალი და სამართლიანი არჩევნების გამართვის შესახებ. ლუკაშენკოს საპრეზიდენტო ვადა ოფიციალურად 5 ნოემბერს დასრულდა. 12 ოქტომბერს გერმანიის საგარეო საქმეთა მინისტრმა ჰეიკო მაასმა თქვა, რომ ალექსანდრ ლუკაშენკო ევროკავშირმა სანქციების ახალ სიაში უნდა შეიყვანოს. აღსანიშნავია, რომ 2 ოქტომბერს ევროკავშირის მიერ დაწესებული სანქციები ეხება 40 ოფიციალურ პირს, რომლებსაც ბელარუსის საპრეზიდენტო არჩევნების გაყალბებასა და საპროტესტო აქციების ძალადობრივ დარბევაში ადანაშაულებენ. ეს სანქციები არ შეეხო ალექსანდრ ლუკაშენკოს. მაშინ საფრანგეთის პრეზიდენტი, ემანუელ მაკრონი ამბობდა, რომ სანქციების დაწესების შემთხვევში ლუკაშენკომ შეიძლება აღარ შეასრულოს ევროკავშირის მოთხოვნები, არ დაიწყოს დიალოგი ოპოზიციასთან და არ გაათავისუფლოს პოლიტპატიმრები. ბელარუსის ხელისუფლბის წევრებს სანქციები უკვე დაუწესეს დიდმა ბრიტანეთმა, აშშ-მ, კანადამ და ბალტიის ქვეყნებმა. საპროტესტო აქციები ბელარუსში ორი თვეა, გრძელდება. დემონსტრაციები 9 აგვისტოს ჩატარებული საპრეზიდენტო არჩევნების შემდეგ დაიწყო, მოსახლეობა არჩევნების შედეგებს აპროტესტებს. არჩევნების შედეგების თანახმად ალექსანდრ ლუკაშენკო მეექვსე ვადით გახდა ბელარუსის პრეზიდენტი. მან ხმების 80%-ზე მეტი მოაგროვა. ბელარუსის ცეესკოს მონაცემების თანახმად, სვეტლანა ტიხანოვსკაიამ ხმების 10% დააგროვა. ოპოზიცია არჩევნების შედეგებს არ ცნობს და ხელახალი არჩევნების ჩატარებას მოითხოვს. აქციების დაწყების შემდეგ ქვეყანაში 12 000-ზე მეტი ადამიანი დააკავეს. 26 ოქტომბერს ბელარუსში საყოველთაო გაფიცვა დაიწყო. საყოველთაო გაფიცვის დაწყება ბელარუსის ოპოზიციონერმა ლიდერმა სვეტლანა ტიხანოვსკაიამ მას შემდეგ გამოაცხადა, რაც ხელისუფლებამ "სახალხო ულტიმატუმი" არ შეასრულა.
Facebook-მა კოორდინირებული არაავთენტური ქცევის გამო ალტ-ინფოსთან დაკავშირებული ქსელი წაშალა
Facebook-მა კოორდინირებული არაავთენტური ქცევის გამო ჰომოფობიურ და ქსენოფობიურ გამოცემა Alt-info-სთან დაკავშირებული ქსელი წაშალა. კომპანიის განცხადებაში აღნიშნულია, რომ წაიშალა 50 ანგარიში, 49 გვერდი, 4 ჯგუფი, 8 ღონისძიება და 19 ინსტაგრამის ანგარიში. Alt-info კი ამ ეტაზე დაბლოკილია ფეისბუქზე. Facebook-ის განცხადებით, ქსელის ნაწილის იდენტიფიცირება ISFED-ის საჯარო ანგარიშების საფუძველზე მოხდა. ორგანიზაციიაში ამბობენ, რომ 2020 წლის ოქტომბერში ანგარიშების, ჯგუფებისა და გვერდების 14 ქსელი წაშალეს, საიდანაც 8 საქართველოში, მიანმარში, უკრაინასა და აზერბაიჯანში ფიქსირდებოდა, რომელთა სამიზნეც ამავე ქვეყნების მოსახლეობა იყო. ბოლო სამი წელია, Facebook-ი იკვლევს კოორდინირებულ არაავთენტურ ქცევას და მსგავს ქსელებს საკუთარი პლატფორმიდან შლის. აქამდე საქართველოში ქართულ ოცნებასთან, სარეკლამო კამპანია პანდასთან, კოკა ყანდიაშვილთან და ნაციონალურ მოძრაობასთან დაკავშირებული გვერდები წაშალეს. ოქტომბერში კი სოციალური ქსელის გიგანტმა, თავისი პლატფორმიდან პატრიოტთა ალიანსთან დაკავშირებული ქსელიც წაშალა.
ფარული ჩანაწერების ფრიალი რომ დაიწყო, მაშინ დაადგა ნაც მოძრაობის ხელისუფლება დაისის გზას - სამადაშვილი
ფარული ჩანაწერების ფრიალი რომ დაიწყო, მაშინ დაადგა "ნაცმოძრაობის" ხელისუფლება დაისის გზას, ახლაც ასეა, წრეზე არა, მაგრამ სპირალზე ტრიალებს ისტორია , - ამის შესახებ "ნაციონალური მოძრაობის" ერთ-ერთი ლიდერი სალომე სამადაშვილი სოციალურ ქსელში წერს, რითაც ეხმაურება obozrevatel-ზე გავრცელებულ ჩანაწერებს. სალომე სამადაშვილის შეფასებით, ჩანაწერების შინაარსის განხილვაში არ შევა და ეს არის სხვადასხვა დროს ფარული მიყურადებით განხორციელებული პირადი საუბრების ჩანაწერების მონტაჟი. "ბევრი ადამიანი მწერს, ამიტომ აქ ვუპასუხებ: დღეს გავრცელებული ჩანაწერის შინაარსის განხილვაში არ შევალ-ეს არის სხვადასხვა დროს, ფარული მიყურადებით განხორციელებული პირადი საუბრების ჩანაწერების მონტაჟი. ანუ, რომ გესმოდეთ, შესაძლოა თქვენ საუბარს იწერდნენ, როდესაც ყავას სვამთ მეგობართან ერთად რომელიმე კაფეში ან რესტორანში. არაა გამორიცხული გისმენდნენ საკუთარ სამზარეულოშიც. ქართული ოცნება ისე გაიხრწნა, აღარც მალავს, რომ უსმენს, იწერს, უთვალთვალებს... ფარული ჩანაწერების ფრიალი რომ დაიწყო, მაშინ დაადგა ნაც მოძრაობის ხელისუფლება დაისის გზას. ახლაც ასეა, წრეზე არა, მაგრამ სპირალზე ტრიალებს ისტორია. ქოცების ადგილზე ამაზე უფრო ვიდარდებდი, ვიდრე ამ ჩანაწერის შინაარსზე. კოვიდის კარგი წამალი ისე კარგი ძილია-მადლობა ტელეიმედს, კიდევ ერთხელ დაგვარწმუნა დღეს ოცნების აგონიაში",- წერს სამადაშვილი სოციალურ ქსელ "ფეისბუქზე". ცნობისთვის, უკრაინული ვებ-გვერდი obozrevatel.com აუდიოჩანაწერს ავრცელებს, რომელშიც მათი ინფორმაციით, ოპოზიციონერი გუბაზ სანიკიძე და თემურ ალასანია ფიგურირებენ. ვებ-გვერდის ინფორმაციით, ჩანაწერში განიხილება სამოქმედო გეგმა ხელისუფლებისთვის ძალაუფლების ძალადობრივი გზით ჩამორთმევის მიზნით. obozrevatel - ის მიერ გავრცელებულ კიდევ ერთ ჩანაწერში, მათივე ინფორმაციით, "ნაციონალური მოძრაობის" ერთ-ერთი ლიდერი სალომე სამადაშვილი საუბრობს, თუმცა ვის ესაუბრება, იდენტიფიცირებული არ არის. ავთენტურია თუ არა ჩანაწერი, ამ ეტაპზე უცნობია.
60 486 ახალი შემთხვევა და 828 გარდაცვლილი - საფრანგეთი დღეს
საფრანგეთში, ბოლო 24 საათში კორონავირუსის 60 486 ახალი შემთხვევა გამოვლინდა, რაც რეკორდულად მაღალი დღიური მაჩვენებელია ქვეყნისთვის, - შესაბამის მონაცემებს ჯონს ჰოპკინსის უნივერსიტეტი ავრცელებს. ამავე მონაცემების თანახმად, საფრანგეთში დაინფიცირებულთა საერთო რაოდენობა 1.7 მილიონამდე გაიზარდა. ამასთან, ქვეყანაში ვირუსს კიდევ 828 ადამიანის სიცოცხლე ემსხვერპლა და დაღუპულთა რიცხვმა 40 000-ს მიაღწია. შეგახსენებთ, ერთი კვირაა საფრანგეთში საკარანტინო რეჟიმი მოქმედებს. შეზღუდვების ფარგლებში მოქალაქეებს საცხოვრებელი სახლების დატოვება მხოლოდ იმ შემთხვევაში შეუძლიათ, თუ ისინი სამსახურში, აუცილებელი პროდუქციის შესაძენად, სამედიცინო მომსახურების მიღების მიზნით, ან დღეში 1 საათის განმავლობაში სავარჯიშოდ მიდიან. ქვეყანაში დახურულია რესტორნები და ბარები, თუმცა სკოლები და ბაგა-ბაღები ღიაა. გარდა ამისა, საფრანგეთში ღამის 22:00 საათიდან დილის 06:00 საათამდე ე.წ. „კომენდანტის საათი“ მოქმედებს. ახალი შეზღუდვები ძალაში, სავარაუდოდ, 1-ელ დეკემბრამდე დარჩება.
ბაიდენმა ტრამპს ჯორჯიის შემდეგ პენსილვანიაშიც გადაასწრო
აშშ-ს საპრეზიდენტო არჩევნებში ხმების დათვლა გრძელდება. ჯო ბაიდენმა დონალდ ტრამპს კიდევ ერთ შტატში, პენსილვანიაში გადაასწრო, სადაც უკვე ხმების 98%-ია დათვლილი. ამ დროისთვის ბაიდენს 49.5% (3 295 315 ხმა) აქვს, ტრამპს კი - 49.4% (3 289 731 ხმა). მანამდე ბაიდენმა ტრამპს გადაასწრო ჯორჯიის შტატში, სადაც ხმების 99%-ია დათვლილია და ბაიდენს 1 097 ხმით მეტი აქვს მიღებული. ხმების დათვლა გრძელდება ალიასკას და ჩრდილოეთ კაროლინას შტატებშიც, სადაც ტრამპი ლიდერობს. ასევე ნევადაში და არიზონაში, სადაც ბაიდენია პირველ ადგილზე. ბოლო მონაცემებით ბაიდენს საარჩევნო კოლეგიაში 253 ხმა აქვს მოპოვებული, მას კიდევ ჩვიდმეტი ხმა სჭირდება. პენსილვანიის მოგების შემთხვევაში ის 20 ხმას მიიღებს. დონალდ ტრამპი არჩევნების მოპარვაზე საუბრობს და ხმების დათვლის შეწყვეტას ითხოვს. მის გუნდში ამბობენ, რომ იმ შტატებში, სადაც ტრამპი მცირე სხვაობით დამარცხდა, ხმების გადათვლას მოითხოვენ.
დავივიწყოთ სიბრაზე და დემონიზაცია, შეიძლება ოპონენტები ვართ, მაგრამ არა მტრები - ბაიდენი
აშშ-ის პრეზიდენტობის „დემოკრატი“ კანდიდატი ჯო ბაიდენი ამერიკელ ხალხს მოუწოდებს, ერთიანობა შეინარჩუნონ და სიბრაზე დაივიწყონ. „მკაცრი არჩევნების შემდეგ დაძაბულობა მაღალია. სერიოზული პრობლემები გვაქვს, პარტიზანულ ბრძოლაზე გასაფლანგი დრო არ გვაქვს. დავივიწყოთ სიბრაზე და დემონიზაცია, შეიძლება ოპონენტები ვართ, მაგრამ არა მტრები,“- განაცხადა ჯო ბაიდენმა. მან კიდევ ერთხელ გაუსვა ხაზი, რომ გამარჯვებაში დარწმუნებულია. „რიცხვები გვეუბნება, რომ ამ არჩევნებს მოვიგებთ. ჩვენ 74 მილიონზე მეტი ხმა ავიღეთ, ეს იმაზე მეტია, ვიდრე ამერიკის შეერთებული შტატების ისტორიაში პრეზიდენტობის რომელიმე კანდიდატს აუღია,“- აღნიშნა ბაიდენმა. მისი თქმით, ვიცე-პრეზიდენტობის კანდიდატ კამალა ჰარისთან ერთად ექსპერტებს ხვდება, ვინაიდან ისინი თეთრი სახლისთვის ემზადებიან. ბოლო მონაცმებით, ჯო ბაიდენი დონალდ ტრამპს ქვეყნის მასშტაბით 4.1 მილიონი ხმით უსწრებს. ამ ეტაპზე, საარჩევნო კოლეგიაში „დემოკრატ“ კანდიდატს გამარჯვებისთვის საჭირო 270 ხმიდან 253 აქვს, დონალდ ტრამპს კი -214.
