ახალი ამბები
საფრანგეთი და საბერძნეთი თავდაცვის სფეროში თანამშრომლობას €3 მლრდ-იან გარიგებაზე ხელმოწერით აძლიერებენ
საფრანგეთი და საბერძნეთი €3 მლრდ-ის მოცულობის თავდაცვის ხელშეკრულებას აწერენ ხელს, რომლის მეშვეობითაც ათენი სამ ფრანგულ სამხედრო გემს შეიძენს. AP-ის ცნობით, ეს ხდება თავდაცვისუნარიანობის გაზრდის მიზნით, აღმოსავლეთ ხმელთაშუაზღვისპირეთში თურქეთთან დაძაბულობის ფონზე. საფრანგეთის პრეზიდენტმა ემანუელ მაკრონმა და საბერძნეთის პრემიერ -მინისტრმა კირიაკოს მიცოტაკისმა შეთანხმების შესახებ პარიზში ერთობლივი პრესკონფერენციის დროს გამოაცხადეს. „ეს პარტნიორობა გამოხატავს ჩვენს ნებას, გავაფართოოთ და გავაძლიეროთ ჩვენი თანამშრომლობა თავდაცვისა და უსაფრთხოების სფეროებში, საერთო ინტერესებიდან გამომდინარე,” - განაცხადა მაკრონმა. საბერძნეთი შეისყიდის სამ ფრანგულ ფრეგატს, რომელსაც Naval Group-ი შექმნის. გარიგებაში ასევე მოცემულია მეოთხე ფრეგატის შეძენის შესაძლებლობა. ცნობისთვის, ამ ხელშეკრულებას წინ უძღვის საფრანგეთის უკმაყოფილება აშშ-ის, ავსტრალიის და დიდი ბრიტანეთის თავდაცვის ალიანსის გამო. საფრანგეთის საგარეო საქმეთა მინისტრმა ვაშინგტონი და ავსტრალია ტყუილში დაადანაშაულა და განაცხადა, რომ ასეთი ქმედება მიუღებელია. ჟან-ივ ლე დრიანის ინფორმაციით, პარიზში ვაშინგტონის, ლონდონისა და კანბერას შეთანხმების შესახებ მის გაფორმებამდე ერთი საათით ადრე შეიტყვეს. ავსტრალიასთან პარიზის 40 მილიარდი დოლარის გარიგება ჩაიშალა. 2016 წელს, ავსტრალიამ ფრანგული გემთმშენებელი კომპანია Naval Group-ი შეარჩია, რომელსაც ახალი წყალქვეშა ფლოტი უნდა აეშენებინა და ჩაენაცვლებინა ორ ათწლეულზე მეტი ხნის Collins-ის წყალქვეშა ნავები.
კახა კალაძე: კოალიციური მთავრობის შექმნა, არც ქალბატონი პრეზიდენტის და არც ჩემი გადასაწყვეტი არ არის, ამას წყვეტს ხალხი
თბილისის მერი კახა კალაძე, კოალიციურ მთავრობასთან დაკავშირებით, პრეზიდენტ სალომე ზურაბიშვილის განცხადებას პასუხობს და აცხდებს კოალიციური მთავრობის შექმნა პრეზიდენტის გადასაწყვეტი არ არის. „ეს არც ქალბატონი პრეზიდენტის და არც ჩემი გადასაწყვეტია. ამას წყვეტს ხალხი - ვინ უნდა იყოს ხელისუფლებაში, როგორ უნდა იყოს წარმოდგენილი, კოალიციური უნდა იყოს მთავრობა თუ არა. 2024 წელს ამას გადაწყვეტს ჩვენი ქვეყნის მოსახლეობა და არა კახა კალაძე ან სალომე ზურაბიშვილი“, - განაცხადა კალაძემ. პარიზში ვიზიტის დროს, საქართველოს პრეზიდენტმა სალომე ზურაბიშვილმა ფრანგულ გამოცემას „კვირის ჟურნალს“ (JDD) ინტერვიუ მისცა, სადაც პრეზიდენტმა გაანცხადა, რომ საქართველოსთვის კოალიციური მთავრობის შექმნა აუცილებელია. კითხვაზე, ამოწურულია თუ არა ღრმა პოლიტიკური კრიზისი, რომელიც საქართველოს ბოლო თვეების განმავლობაში ჰქონდა, სალომე ზურაბიშვილი აცხადებს, რომ ამას მომავალი ადგილობრივი არჩევნები გვიჩვენებს. ,,პოლარიზაციის გადალახვა ძალიან რთულია. 9 წლის განმავლობაში სახელისუფლებო უმრავლესობის მიერ დაკომპლექტებული მთავრობის შემდეგ, ნათელია, რომ კოალუციური მთავრობა აუცილებელია. თუმცა, რთულია იმის დანახვა, თუ როგორ შეძლებს ფუნქციონირებას, როდესაც პოზიციები ამდენად ანტაგონისტურია", - აცხადებს ინტერვიუში საქართველოს პრეზიდენტი. ამავე თემაზე: პრეზიდენტი: 9 წლის განმავლობაში სახელისუფლებო უმრავლესობის მიერ დაკომპლექტებული მთავრობის შემდეგ, ნათელია, რომ კოალიციური მთავრობა აუცილებელია
რუსეთმა ალექსეი ნავალნის თანამოაზრე ლეონიდ ვოლკოვი ძებნილად გამოაცხადა
რუსეთმა ოპოზიციონერი ლიდერის, ალექსეი ნავალნის ერთ-ერთი უახლოესი თანამოაზრე ლეონიდ ვოლკოვი ძებნილად გამოაცხადა. რადიო თავისუფლების ცნობით, ვოლკოვი შეტანილია შსს-ს მიერ ძებნილთა ბაზაში. 28 სექტემბერს, რუსეთის საგამოძიებო კომიტეტმა ნავალნის და მისი თანამოაზრეების, მათ შორის, ვოლკოვის წინააღმდეგ აღძრა სისხლის სამართლის საქმეები ექსტრემისტული გაერთიანების შექმნის, ხელმძღვანელობის და მასში მონაწილეობის ბრალდებებით. ალექსეი ნავალნის თანამოაზრეთა უმრავლესობა რუსეთში აღარ იმყოფება. 2021 წლის მაისში, რუსული მედიით გავრცელდა ინფორმაცია, რომ ნავალნის მიერ დაფუძნებული “კორუფციასთან ბრძოლის ფონდის" წარმომადგენლები, მათ შორის, ლეონიდ ვოლკოვი საქართველოში გაემგზავრნენ და აპირებდნენ, რომ სტუდიას „ნავალნი ლაივი“ მაუწყებლობა თბილისიდან გაეგრძელებინა. ვოლკოვმა და ფონდის სხვა წარმომადგენლებმა ამ ინფორმაციას „ფეიკი“ უწოდეს. რუსული მედიის ბოლო ცნობებით, ლეონიდ ვოლკოვი ვილნიუსში იმყოფება. თავად ალექსეი ნავალნი სასჯელს იხდის რუსეთის ვლადიმირის ოლქის კოლონიაში. 2021 წლის თებერვალში, მოსკოვის სასამართლომ ე.წ. „ივ როშეს“ საქმეზე თაღლითობის მუხლით ადრე მისჯილი პირობითი პატიმრობა რეალური სასჯელით შეუცვალა. ნავალნიმ კოლონია 2023 წლის შემოდგომაზე უნდა დატოვოს, თუმცა, მის წინააღმდეგ სხვა არაერთი საქმეცაა აღძრული. ალექსეი ნავალნის პოლიტპატიმრად რამდენიმე ავტორიტეტიანი უფლებადამცველი ორგანიზაცია მიიჩნევს.
შსს-მ დიდი ოდენობით ნარკოტიკის უკანონო შეძენა-შენახვისა და გასაღების ფაქტზე, უცხო ქვეყნის ორი მოქალაქე დააკავა
შინაგან საქმეთა სამინისტროს აჭარის პოლიციის დეპარტამენტის ქობულეთის რაიონული სამმართველოს და იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, სხვადასხვა დროს ნარკოდანაშაულის ბრალდებით უცხო ქვეყნის ორი მოქალაქე - 1991 წელს დაბადებული უ.ჰ და 1975 წელს დაბადებული მ.ი. დააკავეს. ქობულეთის რაიონული სამმართველოს თანამშრომლებმა უ.ჰ. დიდი ოდენობით ნარკოტიკული საშუალების უკანონო შეძენა-შენახვისა და გასაღების ბრალდებით ბათუმში დააკავეს. დანაშაული 14 წლამდე ვადით თავისუფლების აღკვეთას ითვალისწინებს. გამოძიებით დადგინდა, რომ ბრალდებული სისტემატურად ახდენდა ნარკოტიკების უკანონო რეალიზაციას.სამართალდამცველებმა, მოსამართლის განჩინების საფუძველზე, ბრალდებულისგან ნარკოტიკული საშუალების საკონტროლო შესყიდვა და აღნიშნული შესყიდვის ფარული აუდიო-ვიდეოჩაწერა განახორციელეს.პოლიციამ ბათუმში, ბრალდებულის პირადი ჩხრეკის შედეგად, ნივთმტკიცების სახით ამოიღო ნარკოტიკის უკანონო რეალიზაციის შედეგად მიღებული ფული - 5000 ლარი. სამართალდამცველებმა ასევე ნივთმტკიცებად ამოიღეს დაკავებულის მიერ უკანონოდ გაყიდული დიდი ოდენობით ნარკოტიკული ნივთიერება „კოკაინი“. ბრალდებული მ. ი. კი იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის თანამშრომლებმა, განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ბრალდებით ხელვაჩაურის მუნიციპალიტეტის სოფელ ახალსოფელში დააკავეს. სამართალდამცველებმა დაკავებულის პირადი ჩხრეკისას, ნივთმტკიცების სახით ნარკოტიკული საშუალება „ბუპრენორფინის“ შემცველი „სუბოქსინის“ 147 აბი და ფული ამოიღეს. დანაშაული 8-დან 20 წლამდე ან უვადო თავისუფლების აღკვეთას ითვალისწინებს. განსაკუთრებით დიდი ოდენობით ნარკოტიკული საშუალების უკანონო შეძენა-შენახვის, დიდი ოდენობით ნარკოტიკული საშუალების უკანონო შეძენა-შენახვისა და გასაღების ფაქტებზე გამოძიება საქართველოს სისხლის სამართლის კოდექსის 260-ე მუხლის მე-3 მე-5 და მე-6 ნაწილების „ა“ ქვეპუნქტებით მიმდინარეობს.
არჩევნების დღეს, საერთაშორისო და ადგილობრივ დამკვირვებლებს, საარჩევნო სუბიექტებისა და მედიის წარმომადგენლებს კოვიდტესტი ჩაუტარდებათ
არჩევნების დღეს ცენტრალურ საარჩევნო კომისიაში (ცესკო) და საოლქო საარჩევნო კომისიებში შესვლისას საერთაშორისო და ადგილობრივ დამკვირვებლებს, საარჩევნო სუბიექტებისა და მედიის წარმომადგენლებს „კოვიდ-19“ ანტიგენის სწრაფი ტესტით ტესტირება ჩაუტარდებათ. კოვიდკონტროლს ასევე გაივლიან ე.წ. ხმის გადათვლის ცენტრებშიც. ტესტირება 2 ოქტომბრის დილის 08:00 საათიდან 3 ოქტომბრის დილის 06:00 საათამდე იქნება უზრუნველყოფილი როგორც ცესკოში, ისე ყველა საოლქო საარჩევნო კომისიაში. 2021 წლის 2 ოქტომბრის არჩევნების ჯანმრთელობისთვის უსაფრთხო გარემოში ჩატარების მიზნით, კენჭისყრის დღეს ტესტირებას საარჩევნო ადმინისტრაცია საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსთან თანამშრომლობით უზრუნველყოფს.
კორონავირუსით ინფიცირების 1 929 ახალი შემთხვევა, 33 გარდაცვლილი და 1 068 მძიმე პაციენტი
საქართველოში კორონავირუსის 1 929 ახალი შემთხვევა გამოვლინდა. ინფორმაციას დაავადებათა კონტროლის ეროვნული ცენტრი ავრცელებს. ქვეყანაში ბოლო 24 საათში 1 914 ადამიანი გამოჯანმრთელდა. ბოლო დღე-ღამეში კორონავირუსით გარდაიცვალა 33 პაციენტი. ამ ეტაპზე მძიმე პაციენტია 1 068. ხელოვნური სუნთქვის აპარატზე იმყოფება 272 პაციენტი. ამ ეტაპზე ინფიცირების მიმდინარე აქტიური 19 521 შემთხვევა ფიქსირდება. აქედან 4 278 ადამიანი მკურნალობს საავადმყოფოში. stopcov.ge-ს მონაცემებით, ბოლო 24 საათში ქვეყანაში ჩატარდა 32 522 ტესტი, მათ შორის ანტიგენის სწრაფი ტესტით – 18 251, „პისიარ“ ტესტით – 14 271. ქვეყანაში კორონავირუსის გამოვლენის დადებითობის მაჩვენებლებია: დღიური – 5,93%, ბოლო 14 დღის – 6,16%, ბოლო შვიდი დღის – 5,82%. საქართველოში კორონავირუსით ინფიცირების სულ 611 269 შემთხვევაა გამოვლენილი, მათგან 582 805 გამოჯანმრთელდა, 8 917 კი, გარდაიცვალა. სულ ჩატარდა 1 774 769 აცრა, დღიურად აცრილია 12 469. კარანტინის რეჟიმშია 45, სტაციონარში მეთვალყურეობას 4 278 ადამიანი გადის, კლინიკურ სასტუმროში იმყოფება 726 პირი. ამასთან, 28 სექტემბრის მდგომარეობით, საქართველოში კორონავირუსის 2 185 ახალი შემთხვევა გამოვლინდა, გამოჯანმრთელდა 2 010 პაციენტი, გარდაიცვალა 40 პირი. საქართველო COVID19-ის საწინააღმდეგო ორ უახლეს პრეპარატს მიიღებს
ჯოზეფ ბორელი: უთანხმოებების მიუხედავად, ევროკავშირმა და ჩინეთმა თანამშრომლობა უნდა განაგრძონ
"უთანხმოებების მიუხედავად, ევროკავშირმა და ჩინეთმა თანამშრომლობა უნდა განაგრძონ" - ამის შესახებ, საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჟოზეფ ბორელმა განაცხადა. გავრცელებულ რელიზში აღნიშნულია, რომ ჩინეთის საგარეო საქმეთა მინისტრთან ვიდეოზარის დროს, ჟოზეფ ბორელმა ხაზი გაუსვა ადამიანის უფლებების საკითხებში ჩართვის აუცილებლობასა და ევროკავშირი-ჩინეთის ადამიანის უფლებების დიალოგის განახლებას, როგორც მომწიფებული ურთიერთობის მთავარ კომპონენტს. „ჩინეთის საგარეო საქმეთა მინისტრთან ვიდეოზარის დროს უმაღლესმა წარმომადგენელმა აღნიშნა, რომ უთანხმოებების მიუხედავად, ევროკავშირმა და ჩინეთმა უნდა გააგრძელონ ინტენსიური ჩართულობა რიგ მნიშვნელოვან საკითხებზე“, - ნათქვამია განცხადებაში. ტაივანზე მსჯელობისას უმაღლესმა წარმომადგენელმა ხაზგასმით აღნიშნა, რომ ევროკავშირი განაგრძობს ერთი ჩინეთის პოლიტიკის გატარებას. ამავე დროს, ევროკავშირი და მისი წევრი ქვეყნები დაინტერესებულნი არიან ტაივანთან თანამშრომლობა განავითარონ.
თეთრი სახლის პრესსპიკერი: 2 500 ამერიკელი ჯარისკაცი რომ ავღანეთში დაგვეტოვებინა, ამერიკა „თალიბანთან“ ომში იქნებოდა
"2 500 ამერიკელი ჯარისკაცი რომ ავღანეთში დაგვეტოვებინა, ამერიკა „თალიბანთან“ ომში იქნებოდა" ამის შესახებ თეთრი სახლის პრესმდივანმა, ჯენ ფსაკიმ განაცხადა. ინფორმაციას სააგენტო „როიტერი“ ავრცელებს. შეგახსენებთ, სენატში გამართულ მოსმენაზე, გენერალმა ფრენკ მაკკენზიმ განაცხადა, რომ ავღანეთის შეიარაღებული ძალების სტაბილურობის უზრუნველსაყოფად ამერიკის მთავრობას 2 500 ამერიკელი ჯარისკაცის დატოვება ურჩია. ჯო ბაიდენმა კი, ცოტა ხნის წინ განაცხადა, რომ მას არასდროს მიუღია არანაირი რეკომენდაცია ავღანეთში ჯარის ნაწილის დატოვების საკითხზე. ავღანეთიდან ჯარების ქაოსური გაყვანის თაობაზე კონგრესში გამართულ მოსმენაზე თავის პირველ გამოსვლაში აშშ-ის შტაბების უფროსთა გაერთიანებული კომიტეტის თავმჯდომარემ, გენერალმა მარკ მილიმ ავღანეთში 20-წლიან ომს „სტრატეგიული შეცდომა“ უწოდა და თქვა, რომ, მისი აზრით, აშშ-ს რამდენიმე ათასი სამხედრო უნდა შეენარჩუნებინა ქვეყანაში, რათა ხელი შეეშალა თალიბანის გამარჯვებისთვის. სენატში მოსმენამ დაძაბულად ჩაიარა. რესპუბლიკელების თქმით, ბაიდენმა ყური არ ათხოვა სამხედროთა რჩევას. თუმცა მილიმ აღნიშნა, რომ პრეზიდენტი არაა ვალდებული, ყველაფერში დაუჯეროს სამხედროებს. „პრეზიდენტი არაა ვალდებული, დაეთანხმოს ჩვენს რჩევებს. ის არაა ვალდებული, მიიღოს ეს გადაწყვეტილებები, ვინაიდან ჩვენ გენერლები ვართ,“ თქვა მილიმ.
ტრანსგენდერი ქალის ცემის ფაქტზე პოლიციამ გორში 23 წლის ახალგაზრდა მამაკაცი დააკავა
ტრანსგენდერი ქალის ცემის ფაქტზე პოლიციამ გორში 23 წლის ახალგაზრდა მამაკაცი დააკავა. გამოძიების ინფორმაციით, ინციდენტი თბილისში მოხდა. სახის არეში მიყენებული დაზიანებების გამო საჭირო გახდა ტრანსგენდერი ქალის საავადმყოფოში გადაყვანა. დაკავებული "ნაციონალური მოძრაობის" ადგილობრივი კანდიდატის, ლევან ბიძინაშვილის შვილია. მომხდარს კანდიდატი პოლიტიკური მოტივებით ხსნის. სისხლის სამართლის საქმე ძალადობის მუხლით მიმდინარეობს. დაკავებულს ერთი წლით პატიმრობა ემუქრება. "მეგობრისგან გავიგე, რომ გაგვაჩერესო, გვარები გვკითხეს და გვარების მიხედვით მერე, ჩემს შვილს, ლუკას უთხრეს, რომ დაბრძანდი მანქანაში, რაღაც საქმეები გვაქვს შენთან გასარკვევიო. ვერ გაგვიგია ჯერ სად ჰყავთ დაკავებული და მიზეზი საერთოდ არ ვიცით. მე პოლიტიკურ მიზეზს ვუკავშირებ, სახვა არაფერი არ შემიძლია ვთქვა," - ამბობს სოფელ კარბის მაჟორიტარობის კანდიდატი "ერთიანი ნაციონალური მოძრაობიდან" ლევან ბიძინაშვილი.
საქართველო COVID-19-ის საწინააღმდეგო ორ უახლეს პრეპარატს მიიღებს
ინფექციური პათოლოგიის ცენტრის ხელმძღვანელის თენგიზ ცერცვაძის განცხადებით,საქართველო უახლოეს დღეებში, COVID19-ის საწინააღმდეგო ორ უახლეს პრეპარატს მიიღებს. ცერცვაძის განმარტებით, ორივე მედიკამენტი პაციენტის დამძიმების რისკებს მკვეთრად ამცირებს, რადგან რემდისივირთან შედარებით, კოვიდინფიცირების ორივე სტადიის დროს გამოიყენება. „ორი პრინციპულად ახალი მედიკამენტი შემოვა. ორივე მედიკამენტი არის სულ ბოლო სიტყვა კოვიდის მკურნალობაში და დღეისთვის ყველაზე იმედისმომცემ მედიკამენტებად ითვლება. ჯერჯერობით რამდენიმე წამყვანი ქვეყანა თუ იყენებს. რამდენადაც ვიცით ამერიკის შეერთებული შტატები, ბრიტანეთი, იტალია. საქართველო იქნება ერთ-ერთი პირველი რომელიც ამ ორი მედიკამენტის გამოყენებას დაიწყებს“, - აღნიშნა ცერცვაძემ.
საქართველოს პრემიერ-მინისტრი სამუშაო ვიზიტით აზერბაიჯანს ეწვია
საქართველოს პრემიერ-მინისტრი ირაკლი ღარიბაშვილი დღეს სამუშაო ვიზიტით აზერბაიჯანის რესპუბლიკას ეწვევა. მთავრობის მეთაურის ვიზიტი ბაქოში აზერბაიჯანის რესპუბლიკის პრეზიდენტ ილჰამ ალიევთან პირისპირ შეხვედრით დაიწყება, რომელიც „ზაგულბას“ სასახლეში გაიმართება. პირისპირ შეხვედრის შემდეგ, პრეზიდენტი ალიევი, საქართველოს მთავრობის მეთაურს, დელეგაციის წევრებთან ერთად, სამუშაო სადილზე უმასპინძლებს. სამუშაო ვიზიტის ფარგლებში, საქართველოსა და აზერბაიჯანის რესპუბლიკის პრემიერ-მინისტრების თავმჯდომარეობით, ორი ქვეყნის მთავრობათაშორისი ეკონომიკური კომისიის სხდომა გაიმართება, რომლის დასრულების შემდეგ, თანამშრომლობის შესახებ მემორანდუმები გაფორმდება. საქართველოს დელეგაციაში, რომელსაც პრემიერ-მინისტრი ხელმძღვანელობს, ვიცე-პრემიერი, საგარეო საქმეთა მინისტრი დავით ზალკალიანი, ეკონომიკისა და მდგრადი განვითარების მინისტრი ნათია თურნავა და მთავრობის ადმინისტრაციის უფროსი ილია დარჩიაშვილი იმყოფებიან. ცნობისთვის, საქართველოს პრემიერმა ირაკლი ღარიბაშვილმა ბაქოში დღევანდელ ვიზიტამდე, სომხეთ-აზერბაიჯანის მედიაციის საკითხში საკუთარ როლზე ისაუბრა და აღნიშნა, რომ ამ საქმეს ბოლომდე მიიყვანს. „30 წლის განმავლობაში ჩვენ პირველად, ჩემი მედიაციით და ჩვენი ამერიკელი მეგობრების ჩართულობით, შევძელით წარმატებული მედიაციის შექმნა ჩვენს მოძმე აზერბაიჯანთან და სომხეთთან. ეს ფაქტი მოწონებული იქნა ამერიკის მთავრობის, ევროკავშირის მხრიდან და არის წახალისებული პირად საუბრებში თუ საჯაროდ აღნიშნული ინიციატივის ბოლომდე მიყვანა და გაგრძელება. მე ამ მიმართულებით ბოლომდე დავიხარჯები. ხვალ მიემგზავრები ბაქოში, მექნება შეხვედრა ბატონ ალიევთან, რომელსაც მე დიდ პატივს ვცემ დ მაქვს ძალიან კარგი ურთიერთობა და გვაქვს ნდობა, რაც მთავარია. და როცა ნდობა არსებობს ქვეყნებსა და ლიდერებს შორის ვფიქრობ, ყველა საკითხი გადაწყდება. ასეთივე ურთიერთობა მაქვს ბატონ ფაშინიანთან, რომელიც სულ რამდენიმე კვირის წინ იმყოფებოდა თბილისში. მეც ვაპირებ სომხეთში ჩასვლას უახლოეს მომავალში. ვფიქრობ, ამ მამართულებით მაქსიმალურად დავიხარჯები და გარკვეულ როლს შევასრულებ ორ ქვეყანას შორის”, - განაცხადა ღარიბაშვილმა „იმედის“ ეთერში. ნიკოლ ფაშინიანმა ირაკლი ღარიბაშვილს მედიაციის პროცესში მისი პირადი წვლილისთვის საქართველოში უკანასკნელი ოფიციალური ვიზიტის დროსაც გადაუხადა მადლობა. ილჰამ ალიევის განცხადებით, სომხეთის პრემიერთან შეხვედრის წინააღმდეგი არ არის
ევროპარლამენტიდან თვითმმართველობის არჩევნებზე დამკვირვებელთა დელეგაცია საქართველოს 30 სექტემბერს ეწვევა
ევროპარლამენტიდან სადამკვირვებლო მისია საქართველოს 30 სექტემბრიდან 3 ოქტომბრამდე ეწვევა. ამის შესახებ ინფორმაცია Europetime-ს ევროპარლამენტში დაუდასტურეს. არჩევნების შესახებ განცხადება კი საქართველოში მისიის დასრულების შემდეგ გავრცელდება. ევროპარლამენტარმა, ევროკავშირი-საქართველოს საპარლამენტო ასოცირების კომიტეტის თავმჯდომარე მარინა კალიურანდმა 9 სექტემბერს დაწერა Twitter-ზე, რომ ევროპარლამენტმა საქართველოს ადგილობრივ არჩევნებზე დამკვირვებლების გაგზავნის გადაწყვეტილება მიიღო. უფრო ადრე კი, ამასთან დაკავშირებით, პირველად, Europetime-თან ექსკლუზიურ ინტერვიუში ისაუბრა ევროპარლამენტარმა ვიოლა ფონ კრამონ-ტაუბადელმა. „მიუხედავად იმისა, რომ ადგილობრივი არჩევნებია, ეს არჩევნები უკიდურესად მნიშვნელოვანია. მას აქვს გავლენა ეროვნულ და საერთაშორისო დონეზე. შედეგი, ისევე როგორც არჩევნების შემდგომი მოვლენები, დიდწილად განსაზღვრავს ევროკავშირი-საქართველოს ურთიერთობების მიმართულებას. ამიტომაც ვამზადებთ ევროპარლამენტიდან სრულფასოვან სადამკვირვებლო მისიას. ვიცი, რომ ბევრი სხვა დამკვირვებელიც გეგმავს ჩამოსვლას. ეს არის ძლიერი სიგნალი ყველასთვის საქართველოში, ვისაც დემოკრატიულ ქვეყანაში ცხოვრება სურს“, - განაცხადა ვიოლა ფონ კრამონმა Europetime-თან. მანამდე, ევრონესტის საპარლამენტო ასამბლეის თანათავმჯდომარემ, ევროპარლამენტარმა ანდრიუს კუბილიუსმა (ევროპის სახალდო პარტიის ჯგუფი, ქრისტიან დემოკრატები) Europetime-თან ექსკლუზიურ ინტერვიუში განაცხადა, რომ ევროპარლამენტიდან არჩევნებზე დამკვირვებლების ჩამოსვლა იგეგმებოდა. ცნობისთვის, არჩევნებამდე რამდენიმე დღით ადრე, Europetime-მა ევროპარლამენტარებთან ექსკლუზიური ინტერვიუები ჩაწერა და მას მოგვიანებით შემოგთავაზებთ. ამავე თემაზე: ევროპარლამენტარების მთავარი გზავნილები საქართველოს ადგილობრივი არჩევნებისთვის
სალომე ზურაბიშვილი საფრანგეთის პრეზიდენტს ემანუელ მაკრონს შეხვდა
საქართველოს პრეზიდენტი სალომე ზურაბიშვილი საფრანგეთის პრეზიდენტს, ემანუელ მაკრონს შეხვდა. შეხვედრა პარიზში შედგა. საქართველოს და საფრანგეთის პრეზიდენტებმა ტრიუმფალურ თაღთან უცნობი ჯარისკაცის საფლავთან საფრანგეთისათვის დაღუპულ მებრძოლთა ხსოვნას მიაგეს პატივი. ცერემონიაზე შესრულდა საქართველოს და საფრანგეთის სახელმწიფო ჰიმნები, პრეზიდენტებმა გვირგვინით შეამკეს და წუთიერი დუმილით პატივი მიაგეს საფრანგეთისთვის დაღუპულ მებრძოლთა ხსოვნას, რის შემდეგაც ემანუელ მაკრონმა და სალომე ზურაბიშვილმა ერთმანეთს დელეგაციები წარუდგინეს. ცერემონიის შემდეგ სალომე ზურაბიშვილმა და ემანუელ მაკრონმა შეხვედრა გამართეს. სალომე ზურაბიშვილი საფრანგეთში, სამუშაო ვიზიტით 26 სექტემბერს გაემგზავრა. მაკრონთან შეხვედრამდე მან ქართული ემიგრაციის წარმომადგენლები დააჯოლდოვა. ვიზტის ფარგლებში პრეზიდენტმა სოხუმის დაცემის დღეს, აფხაზეთიდან დევნილი, მოდის დიზაინერი დემნა გვასალია ღირსების მედლით დააჯილდოვა. დიმიტრი ამილახვარს, სიკვდილის შემდეგ, საქართველოს ეროვნული გმირის წოდება მიენიჭა. საქართველოს პრეზიდენტმა საფრანგეთში სამუშაო ვიზიტი დღეს ემანუელ მაკრონთან შეხვედრით დაასრულა.
Forbes-ის რეიტინგით, ილონ მასკი კვლავ ყველაზე მდიდარი ადამიანია
Forbes-ის რეიტინგით, ილონ მასკი კვლავ ყველაზე მდიდარი ადამიანია. 203,4 მილიარდი ქონებით მასკი კვლავ რეიტინგის სათავეში მოექცა. Amazon-ის დამფუძნებელმა ჯეფ ბეზოსმა მეორე ადგილზე გადაინაცვლა, რომელმაც ილონ მასკს დროებით ჩამოართვა მსოფლიოს უმდიდრესი ადამიანის ტიტული. რეიტინგში მესამე ადგილს Louis Vuitton Moet Hennessy-ს მფლობელი ბერნარ არნო იკავებს. რეიტინგი Forbes Real-Time რეალურ დროში, უმსხვილესი კომპანიების აქციების მიმდინარე ღირებულების მიხედვით ახლდება. მასკი ისტორიაში მესამე ადამიანია გახდა (ბეზოსისა და არნოს შემდეგ), რომლის ქონებამაც Forbes Real-Times-ში 200 მილიარდ დოლარს გადააჭარბა.
ბრაზილიამ "ბუსტერ" დოზით აცრის გადაწყვეტილება მიიღო
ბრაზილიის ჯანდაცვის მინისტრის მარსელუ კეიროგამბის განცხადებით, ქვეყანაში 60 წლის ზემოთ ასაკის პირების კორონავირუსის საწინააღმდეგო ვაქცინების მესამე დოზით აცრა შესაძლებელი გახდება. „Covid-19-თან საბრძოლველად, ვაქცინის გამაძლიერებელ დოზას 60 წლის ზემოთ ასაკის პირებში გავავრცელებთ. ეს გადაწყვეტილება ვაქცინაციის კამპანიის პროგრესის შედეგია, რომელიც სწრაფი ტემპებით გრძელდება“, - განაცხადა ბრაზილიის ჯანდაცვის მინისტრმა.
ჯანმო მათი თანამშრომლების მიერ, კონგოში ჩადენილი სექსუალური დანაშაულების გამო, ბოდიშს იხდის
BBC-ის ცნობით, ჯანდაცვის მსოფლიო ორგანიზაცია მათი თანამშრომლების მიერ კონგოში ჩადენილი სექსუალური დანაშაულების გამო, ბოდიშს იხდის საერთაშორისო მედიის ცნობით, გამოძებამ დაადასტურა, რომ „2018-2020 წლებში საერთაშორისო ორგანიზაციის ადგილობრივი და უცხოელი თანამშრომლები კონგოში მცხოვრებ ქალებს ალკოჰოლით აბრუებდნენ და სექსუალურ კავშირს აიძულებდნენ. ჯანდაცვის მსოფლიო ორგანიზაციის დირექტორის ტედროს გებრეიესუსის თქმით, ისინი შეძრწუნებული არიან კონგოს დემოკრატიულ რესპუბლიკაში მათი თანამშრომლების ქცევის გამო, რადგან ეს „უპატიებელი“ ქმედებაა. „მინდა, ბოდიში მოვუხადო იმისთვის, რაც ჯანდაცვის მსოფლიო ორგანიზაციის მიერ დაქირავებულმა ადამიანებამა გააკეთეს. მათ თქვენს დაცვაზე უნდა ეზრუნათ. ჩემთვის პრიორიტეტულია, რომ დამნაშავეებმა პასუხი აგონ“, – განაცხადა გებრეიესუსმა. დანაშაულში ეჭვმიტანილია 83 პირი, აქედან ჯანდაცვის მსოფლიო ორგანიზაციის თანამშრომელი 21 ეჭვმიტანილია. საუბარია როგორც ადგილობრივ კადრებზე, ისე უცხოელ თანამშრომლებზე. ჯანმოს ცნობით ეჭვმიტანილების ნაწილთან კონტრაქტი უკვე გაწყვიტეს და დამატებით ზომებსაც მიიღებენ. გამოძიება მას შემდეგ ჩატარდა, რაც კონგოს დემოკრატიულ რესპუბლიკაში მცხოვრებმა 50 ქალმა ჯანდაცვის მსოფლიო ორგანიზაციისა და სხვა ჰუმანიტარული ორგანიზაციების წარმომადგენლები ძალადობაში დაადანაშაულა.
აშშ-მ ხორვატიასთან უვიზო მიმოსვლა დააწესა
აშშ-ის მთავრობის გადაწყვეტილებით, ხორვატია დაემატება იმ ქვეყნების სიას, რომელთა მოქალაქეებიც 90 დღის განმავლობაში აშშ-ში მოგზაურობას უვიზოდ შეძლებენ. ამის შესახებ ინფორმაციას „როიტერი“ ავრცელებს. აშშ-ში უვიზოდ მოგზაურობა სულ 39 ქვეყნის მოქალაქეს შეუძლია. მათ შორის არიან ბელგია, ავსტრალია, ჩილე, ავსტრია, ჩეხეთი, დანია, ესტონეთი, შვედეთი, დიდი ბრიტანეთი, პორტუგალია, ნიდერლანდები, ლიეტუვა, უნგრეთი, საფრანგეთი, ფინეთი, მალტა, საბერძნეთი, პოლონეთი და სხვები. გაბრიელ ესკობარი: აშშ-ს დასავლეთ ბალკანეთის ქვეყნების ევროკავშირში ინტეგრაციის პროცესის დაჩქარება სურს
დმანისის რაიონში 18 წლის ახალგაზრდა უბედურ შემთხვევას ემსხვერპლა
დმანისში უბედური შემთხვევა მოხდა. ახალგაზრდა მამაკაცი ხევში გადავარდა და დაიღუპა. 18 წლის ახალგაზრდა, სოფელ ვერისუბნის მიმდებარე ტყეში, პიკნიკზე მეგობრებთან ერთად იმყოფებოდა. ახალგაზრდა მამაკაცი სასწრაფო სამედიცინო დახმარების ჯგუფის მისვლამდე გარდაიცვალა. საქმეზე დაწყებულია გამოძიება.
ცესკო ოპოზიციის საწინააღმდეგო ბანერების გამოკვრაში სამართალდარღვევას ვერ ხედავს
ცენტრალური საარჩევნო კომისიის განცხადებით, ოპოზიციის საწინააღმდეგო ბანერებზე, რომლებიც სხვადასხვა ქალაქში წინასაარჩევნოდ განთავსდა, სამართალდარღვევის ოქმს ვერ შეადგენს, რადგან კანონმდებლობა არ დარღვეულა. ცესკო-ში განმარტავენ, რომ საჩივრებში მითითებული ბანერების დამზადება/განთავსება არ მომხდარა რომელიმე პოლიტიკური პარტიის, საარჩევნო სუბიექტის დაფინანსებით, ასევე, მოკვლევის თანახმად, ბანერების განმათავსებელი პირი არ წარმოადგენს არც ერთ პოლიტიკურ პარტიას, საარჩევნო სუბიექტს ან მათ ოფიციალურ მხარდამჭერს. "საარჩევნო ადმინისტრაციამ დეტალურად მოიკვლია ბანერების თემა და დაადგინა კიდეც, რომ ბანერების დამკვეთი არის ფიზიკური პირი, რომელმაც შპს „ალმას“ შეუკვეთა მათი დამზადება/განთავსება. სწორედ ამ კერძო პირის წერილობითი პასუხებიდან ირკვევა, რომ საჩივრებში მითითებული ბანერების დამზადება/განთავსება არ მომხდარა რომელიმე პოლიტიკური პარტიის, საარჩევნო სუბიექტის დაფინანსებით. ჩვენი მოკვლევის თანახმად, - ეს პირი ასევე არ წარმოადგენს არც ერთ პოლიტიკურ პარტიას, საარჩევნო სუბიექტს ან მათ ოფიციალურ მხარდამჭერს და არც საარჩევნო სუბიექტის წარმომადგენლად არის რეგისტრირებული. ის არ არის არც ერთი პოლიტიკური გაერთიანების შემომწირველი", - აცხადებენ ცესკოში. აქვე აღნიშნულია, რომ ამ გარემოების გათვალისწინებით, არ დარღვეულა საარჩევნო კოდექსის 45-ე მუხლის მე-3 ნაწილი და არ არსებობს სამართალდარღვევათა ოქმის შედგენის საფუძველი. ე.წ სისხლიან ბანერებს ISFED ცესკო-ში ასაჩივრებს და აუდიტის სამსახურისგან ბანერების დამფინანსებლის გასაჯაროებას ითხოვს
ამერიკამ რუსეთს 2015 წელს დაპატიმრებული რუსი ჰაკერი გადასცა
აშშ-მა რუსეთს პატიმრობაში მყოფი რუსი ჰაკერი გადასცა, რომელსაც ჰაკერული დანაშაულებებისთვის, ცხრა წლით პატიმრობა ჰქონდა მისჯილი. ალექსეი ბურკოვის გადაცემის შესახებ ინფორმაციას რუსეთის შინაგან საქმეთა სამინისტრო ავრცელებს. ბურკოვი 2015 წელს ისრაელში დააკავეს. 2019 წელს ისრაელიდან მისი ექსტრადიცია მოხდა აშშ-ში. ბურკოვის დაპატიმრების შემდეგ, რუსეთმა აშშ რუსეთის მოქალაქეებზე „ნადირობაში“ დაადანაშაულა. გავრცელებული ინფორმაციის თანახმად, ალექსეი ბურკოვი 2020 წლის ივნისში, ვირჯინიის შტატის საოლქო სასამართლოში გაასამართლეს. ამერიკულმა სასამართლომ დამნაშავედ ცნო ორი ვებსაიტით ოპერირებისთვის, რომლებითაც ის მოპარულ, ძირითადად ამერიკულ, საბანკო ბარათებს ყიდდა. ასევე ის შუამავლობდა მოპარული ელექტრონული მონაცემებით ვაჭრობასა და უკანონო მომსახურებაში. ალექსეი ბურკოვი მას ბრალად ედებოდა საკრედიტო ბარათების თაღლითური სქემით აშშ-ში 20 მილიონ დოლარზე მეტის მოპარვა.
