ახალი ამბები
ჩინეთის პრეზიდენტი ქვეყნებს საერთაშორისო მოგზაურობის აღსადგენად გლობალური მექანიზმის შექმნისკენ მოუწოდებს
ჩინეთის პრეზიდენტი სი ძინპინი ქვეყნებს საერთაშორისო მოგზაურობის აღსადგენად გლობალური მექანიზმის შექმნისკენ მოუწოდებს, - ამის შესახებ ინფორმაციას BBC-ი ავრცელებს. „ჩვენ გვჭირდება პოლიტიკის ჰარმონიზაცია და სწრაფი გზა, რომელიც ადამიანების წესების დაცვით გადაადგილებას შეუწყობს ხელს“ , – განაცხადა სი ძინპინმა „დიდი ოცეულის“ სამიტზე. ჩინეთის ლიდერის განცხადებით, მოგზაურების ჯანმრთელობის სტატუსი ე.წ. QR-კოდებით უნდა გადამოწმდეს. სი ძინპინმა განმარტა, რომ კოდების გამოყენებით შესაძლებელია ნუკლეინის მჟავის ტესტის შედეგებზე დაყრდნობით ჯანმრთელობის სერთიფიკატების ამოცნობა. „იმედი გვაქვს, ამ მექანიზმს ბევრი ქვეყანა შემოუერთდება“, - აღნიშნა ჩინეთის პრეზიდენტმა. უფლებადამცველები ამ შეთავაზებაში საფრთხეს ხედავენ. მათი განმარტებით, ეს კოდები შესაძლოა, მოქალაქეთა პოლიტიკური მონიტორინგის გასაძლიერებლად გამოიყენონ.
ჩვენი საწოლფონდით ორჯერ დიდი ქვეყნის მომსახურეობა შეიძლება - ტიკარაძე
საქართველოში მობილიზებული საწოლფონდით შეიძლება მომსახურეობა გაეწიოს საქართველოს მოსახლეობის რაოდენობაზე ორჯერ დიდ ქვეყანას, - განცხადება ამის შესახებ ჯანდაცვის მინისტრმა, ეკატერინე ტიკარაძემ გააკეთა. როგორც მინისტრი ამბობს, აღნიშნული დასკვნის გაკეთების საშუალება მიეცა იმ ანალიზით, რომელიც გაკეთდა და მოიცავს პაციენტების დაყოფას, თუ რამდენად სწორად არიან ისინი მოთავსებული კლინიკებში. „შეიძლება ითქვას, რომ დღეს საქართველოში მობილიზებული საწოლფონდით შეიძლება მომსახურეობა გაეწიოს საქართველოს მოსახლეობის რაოდენობაზე ორჯერ დიდ ქვეყანას. აქედან გამომდინარე, მნიშვნელოვანია საწოლფონდის სწორად მართვა ასაკობრივ ჭრილში და ასევე იმ ქრონიკული დაავადებების ჭრილში, რაც შეიძლება პაციენტს ჰქონდეს და განსაზღვრავდეს მისი, როგორც რისკის პაციენტის სტატუსს. მნიშვნელოვანია ექიმების დროული ჩართულობა, დროული იდენტიფიცირება საჭიროების, ყველა კვლევის ჩატარების. მნიშვნელოვანია ბმების, კავშირების, მენეჯმენტის, ეფექტურობის და ხარისხის გაუმჯობესება. ამაზე სამინისტროს ყველა რგოლი ინტენსიურად მუშაობს“, - განაცხადა ეკატერინე ტიკარაძემ "იმედის" ეთერში. მინისტრი დარწმუნებულია, რომ ის ხარვეზები, რომელიც არსებობს და იდენტიფიცირებულია, დროულად აღმოიფხვრება. მისივე თქმით, ქვეყანაში საველე ჰოსპიტლების მოწყობის საკითხი არ განიხილება. „ჩვენ გვაქვს არაერთი სივრცე გამოყოფილი, რომელიც მზადდება, მაგრამ ეს არის ძირითადად საავადმყოფოების ბაზაზე და სასტუმროებში, სადაც გვაქვს სრული სამედიცინო მეთვალყურეობა. ამ ეტაპისთვის საქართველოს გააჩნია საკმარისი რესურსი, რომ თუკი სწორად ვმართავთ პაციენტების ნაკადს, მათ მეტად კომფორტულ გარემოში გაიარონ ინფიცირების პერიოდი, ექიმების მეთვალყურეობის ქვეშ“, - აღნიშნა მან.
მოსკოვმა და სოხუმმა “ერთიანი სოციალური და ეკონომიური სივრცის ფორმირების პროგრამა” დაამტკიცეს
ოკუპირებულმა აფხაზეთმა რუსეთთან “ერთიანი სოციალური და ეკონომიკური სივრცის ფორმირების პროგრამა” დაამტკიცა. ამის შესახებ დე ფაქტო პრეზდენტ ასლან ბჟანიას პრეს-სამსახური იუწყება. "აფხაზეთისა და რუსეთის პრეზიდენტების 12 ნოემბრის შეხვედრის შედეგად დამტკიცებულია რუსეთის ფედერაციასა და აფხაზეთის რესპუბლიკას შორის ერთიანი სოციალური და ეკონომიკური სივრცის ფორმირების პროგრამა, რომელიც ორი ქვეყნის კანონმდებლობების ჰარმონიზაციის საფუძველზე განხორციელდება. ეს დოკუმენტი ლოგიკური გაგრძელებაა ქვეყნებს შორის 2014 წლის 24 ნოემბერს მოკავშირეობისა და სტრატეგიული პარტნიორობის შესახებ გაფორმებული შეთანხმების. დამტკიცებული პროგრამა მიმართულია ნაყოფიერი საფუძვლის შექმნისაკენ რუსეთის მიერ ან მისი ინიციატივით მიმდინარე საინტეგრაციო პროცესებში აფხაზეთის რესპუბლიკის სრულფასოვანი მონაწილეობისათვის”, - ნათქვამია პრეს-რელიზში, შესაბამისი ღონისძიებების განხორციელების ვადებად კი 2-3 წელია დასახელებული. სწორედ ამ ვადებში უნდა მოხდეს კანონმდებლობების ჰარმონიზაცია თითქმის ყველა სფეროში.
ოპოზიციის მხრიდან საქართველოს პარლამენტის ბოიკოტს დასავლეთის მხარდაჭერა არ აქვს - უილიამ კორტნი
საქართველოში აშშ-ის ყოფილი ელჩი უილიამ კორტნი აცხადებს, რომ ოპოზიციის მხრიდან პარლამენტის ბოიკოტს, დასავლეთის მხარდაჭერა არ აქვს. ამის შესახებ ყოფილი ელჩი „ტვიტერის“ გვერდზე წერს. „დასავლეთმა ბელარუსში 9 აგვისტოს გამართული არჩევნები იმდენად კანონთან შეუსაბამოდ ჩათვალა, განაცხადა, რომ ახალი არჩევნების გამართვაა საჭირო. თუმცა საქართველოში 31 ოქტომბრის საპარლამენტო არჩევნები არ იყო იმდენად გაყალბებული, რომ ხმები გაუქმებულად გამოაცხადო. ოპოზიციის მხრიდან პარლამენტის ბოიკოტს დასავლეთის მხარდაჭერა არ აქვს“, - წერს საქართველოში აშშ-ის ყოფილი ელჩი. შეგახსენებთ, რომ საქართველოში საპარლამენტო არჩევნები 2020 წლის 31 ოქტომბერს გაიმართა. შედეგები არ ცნო ოპოზიციამ და პარლამენტს ბოიკოტი გამოუცხადა. 21 ნოემბერს გამართულ არჩევნების მეორე ტურში კი, მონაწილეობა მხოლოდ მმართველმა პარტიამ მიიღო. The West saw August 9 presidential #election in #Belarus as so tainted that new vote is required, but October 31 parliamentary election in #Georgia as not so rigged as to invalidate vote. Opposition boycott of parliament lacks Western support. https://t.co/unDeARqPAC — William Courtney (@courtneywmh) November 22, 2020
ალექსანდრ ლუკაშენკო ანათემას გადასცეს
ბელარუსის არაღიარებულმა მართმადიდებელმა ავტოკეფალიურმა ეკლესიამ ალექსანდრ ლუკაშენკო ანათემას გადასცა. ამის შესახებ მთავარეპისკოპოსმა სვიატოსლავ ლოგინმა ტორონტოში, წმინდა კირილის ტაძარში გამართულ ღვითისმსახურების განაცხადა. "ლუკაშენკო ჩადის უკანონობას, დევნის და კლავს მართლმადიდებლებს და უბრალო მოქალაქეებს. ლუკაშენკო და მისი მოკავშირეები აწყობენ სისხლიან შურისძიებას მშვიდობიანი მოსახლეობის წინააღმდეგ, მრავალტანჯულ ბელარუსში", – ნათქვამია ანათემის ტექსტში, სადაც რუსეთიცაა ნახსენები. "ეს ძალადობა და მართლწესრიგის აბუჩად აგდება ხდება ბელარუსის აღმოსავლეთ მეზობლის მხარდაჭერით, რომელიც თავს მართლმადიდებლად და უფროს ძმად მოიხსენიებს, მაგრამ მთელი ცივილიზებული სამყარო მხარს უჭერს ბელარუსი ხალხის ბრძოლას თავისუფლებისთვის", - წერია ტექსტში. თავად ლუკაშენკოს არაღიარებული ეკლესიის მთავარეპისკოპოსი ლოგინი ყოფილ პრეზიდენტად მოიხსენიებს და მას თვითმარქვიასა და ჯალათს უწოდებს. ბელარუსის არაღიარებული ავტოკეფალიური მართლმადიდებელი ეკლესია 1944 წლიდან ემიგრაციაში იმყოფება. ეკლესიის მთავარი ტაძარი ნიუ-იორკში მდებარე წმინდა კირილის საკათედრო ტაძარია. ეკლესიას მცირე მრევლი ყავს მინსკშიც. ბელარუსში საპროტესტო მოძრაობა 9 აგვისტოს გამართული საპრეზიდენტო არჩევნების შემდეგ განუწყვეტლად მიმდინარეობს. ოფიციალური მონაცემებით, არჩევნებში ხმების 80%-ით ალექსანდრ ლუკაშენკომ გაიმარჯვა, თუმცა არჩევნების შედეგები არ ცნო დემოკრატიული ქვეყნების უმრავლესობამ.
დიდ კლინიკებთან საველე ჰოსპიტლები უნდა გაიხსნას - კლინიკების ასოციაცია
საქართველოს კლინიკების ასოციაცია მთავრობას კორონავირუსის წინააღმდეგ რეგულაციებთან დაკავშირებით მიმართავს და აცხადებს, რომ დიდი კლინიკების მიმდებარედ უნდა გაიხსნას საველე ჰოსპიტლები - 100, 300, 500 პაციენტზე გათვლილი კარვები, რომლებიც აღჭურვილი იქნება შესაბამისი ინვენტარით. მათი განმარტებით, კორონავირუსთან ბრძოლის მწვავე ფაზაში ჯანდაცვის სისტემაში თავი იჩინა მთელმა რიგმა ნაკლოვანებებმა და ხარვეზებმა. როგორც კლინიკების ასოციაციაში აცხადებენ, სასიცოცხლოდ აუცილებლობას წარმოადგენს სისტემის დაკომპლექტება მხოლოდ და მხოლოდ პროფესიული ნიშნით შერჩეული მაღალკავალიფიციური კადრით, რომელიც მრავლადაა აკადემიურ წრეში. „ამავე დროს, სასურველია, არ დავკომპლექსდეთ და საჭიროების შემთხვევაში, მოვიწვიოთ უცხოეთიდან ჩვენი თანამემამულეები, რომელთაც დაუგროვდათ საკმაო კვალიფიკაცია კორონავირუსთან ბრძოლის საქმეში, კლინიკურ მენეჯმენტსა და ჯანდაცვის სისტემის მართვის საკითხებში. სასიცოცხლოდ მნიშვნელოვანია, ჯანდაცვის სამოქალაქო სექტორს დაეხმაროს სამხედრო სამედიცინო სამსახური, რეკომენდებულია დიდი კლინიკების მიმდებარედ როგორც დასავლეთ, ისე აღმოსავლეთ საქართველოში დაუყოვნებლივ გაიხსნას სამხედრო საველე ჰოსპიტლები, 100, 300, 500 პაციენტზე გათვლილი კარვები, რომლებიც აღჭურვილია შესაბამისი ინვენტარით, აპარატურით, გათბობისა და კონდიცირების სისტემებით. ვირუსთან ბრძოლის საქმეში აქტიურად უნდა ჩაერთონ სამხედრო ექიმები, სამხედრო მედდები და სანიტრები. კორონავირუსთან ბრძოლის გაუმჯობესების მიზნით, აუცილებლობას წარმოადგენს რეგულაციების გამკაცრება, მაგრამ არა „ლოკდაუნი“. სრულ შეზღუდვებს საქართველოს ეკონომიკა და სოციალური სფერო ვერ გაუძლებს. სამუშაო ადგილების შენარჩუნება სასიცოცხლოდ მნიშვნელოვანია. ყოველივეს გათვალისწინებით რეკომენდებულია: მოწყვლადი ჯგუფისთვის კვლავ ამოქმედდეს პრინციპი - „დარჩი სახლში“, შეიზღუდოს საზოგადოების თავშეყრის ადგილებში საპენსიო ასაკის ადამიანების გადაადგილება, ვინაიდან მათში ხშირია ქრონიკული დაავადებები. შეიზღუდოს საზოგადოებრივ ტრანსპორტში მგზავრთა რაოდენობა, რეკომენდებულია მიკროავტობუსში, ავტობუსსა და მეტროს ვაგონში მხოლოდ მჯდომარე მდგომარეობაში მგზავრობა, დისტანციის დაცვით. ფეხზე დგომით მგზავრობა არარეკომენდირებულია, ვინაიდან ვირუსს ახასიათებს დალექვა და ადვილად შესაძლებელია საფრთხე შეუქმნას ახლოს მჯდომ მგზავრს; სავაჭრო ობიექტებს დაერთოთ ნება განაგრძონ მუშაობა დისტანციის დაცვით, რეკომენდებულია 10 კვადრატული მეტრის მქონე ფართში ერთდროულად მხოლოდ 4 ადამიანის ყოფნა. ნებისმიერი კვების ობიექტი რეკომენდებულია, მუშაობდეს ღია სივრცეში და დაცული იყოს დისტანცია მაგიდებს შორის მინიმუმ 4 მეტრი. სილამაზის სალონებში რეკომენდებულია, დაცული იყოს დისტანცია სავარძლებს შორის, გამოვიყენოთ ერთჯერადი წინსაფრები და ყოველი მომსახურების შემდეგ, სტილისტის ხელსაწყოები დამუშავდეს სადეზინფექციო ხსნარით. სტომატოლოგიური კლინიკების უსაფრთხო საქმიანობისთვის რეკომენდებულია ყველა პაციენტს სტომატოლოგიური დახმარების გაწევამდე ადგილზე ჩაუტარდეს კორონავირუსის ანტიგენზე დამყარებული სწრაფი ტესტი, რომლის შემთხვევაშიც პასუხი ცნობილია 10-15 წუთში,“- ნათქვამია საქართველოს კლინიკების ასოციაციის განცხადებაში.
შავ ზღვაში ამერიკული სამხედრო გემი შევიდა
შავ ზღვაში ამერიკული სამხედრო გემი „დონალდ კუკი“ შევიდა. როგორც ევროპასა და აფრიკაში აშშ-ის საზღვაო შეიარაღებული ძალების სამეთაურო შტაბის განცხადებაშია აღნიშნული, ხომალდი ნატო-ს მისიის ფარგლებში შავ ზღვაში რეგულარულ პატრულირებას ჩაატარებს. „დონალდ კუკი“ უკვე მეშვიდედ შევიდა შავ ზღვის რეგიონში. აშშ-ის ფლოტის ხომალდები რეგულარულად პატრულირებენ შავ ზღვაში ნატო-ს მოკავშირეებისა და პარტნიორების თურქეთის, უკრაინის, რუმინეთის, ბულგარეთისა და საქართველოს მხარდასაჭერად!“ – ნათქვამია აშშ-ის სამხედრო საზღვაო ძალების სამეთაურო შტაბის განცხადებაში. სამხედრო ხომალდი„დონალდ კუკი“ პირველად საქართველოს 2007 წელს სტუმრობდა.
ნათია მეზვრიშვილმა თანამდებობა დატოვა
მთავრობის ადმინისტრაციის უფროსი ნათია მეზვრიშვილი თანამდებობას ტოვებს. "13-წლიანი უკიდურესად საინტერესო და გამოწვევებით სავსე საქმიანობის შემდეგ, დღეს დავტოვე საჯარო სამსახური. მინდა მადლობა გადავუხადო თითოეულ საჯარო მოხელეს, რომლებთან ერთადაც ბევრი წელი გავატარე. მადლობა ყველას - მთავრობაში, პარლამენტში, პოლიტიკაში თუ პოლიტიკის მიღმა, საერთაშორისო პარტნიორებს, არასამთავრობო ორგანიზაციებს, ჟურნალისტებს და ყველას, ვისთანაც ამ პერიოდის განმავლობაში მითანამშრომლია. გამორჩეული მადლობა გიორგი გახარიას, რომელმაც მისთვის სრულიად უცხო ადამიანს ნდობა გამომიცხადა და ბევრი კარგი საქმის კეთების შესაძლებლობა მომცა. იმედი მაქვს სადაც არ უნდა ვიყო, შევძლებ ქვეყნის პროგრესისა და წარმატებისთვის სასიკეთო საქმის კეთებას", - წერს ნათია მეზვრიშვილი "ფეისბუქზე".
სტამბოლში ქართული საკვირაო სკოლა გაიხსნა
საქართველოს ელჩმა გიორგი ჯანჯღავამ და სტამბოლში საქართველოს გენერალურმა კონსულმა ინგა კიკვაძემ, მსოფლიო საპატრიარქოს გენერალურ მდივანთან და ქართული სამრევლოს წინამძღვართან ერთად, მსოფლიო პატრიარქის, მისი ყოვლადუწმინდესობა ბართლომეოსის კურთხევით, სტამბოლის ქართული საკვირაო სკოლა საზეიმო ვითარებაში გახსნეს. საქართველოს ელჩმა, სკვირაო სკოლის მოსწავლეებს საქართველოს საგარეო საქმეთა სამინისტროს მიერ, „საკვირაო სკოლების მხარდაჭერის პროგრამის“ ფარგლებში შექმნილი სახელმძღვანელოები გადასცა. საგრანტო პროგრამის „დიასპორული ინიციატივების ხელშეწყობა“ ფარგლებში, საქართველოს საგარეო საქმეთა სამინისტრომ საკვირაო სკოლის ფუნქციონირებისთვის საჭირო ინვენტარი და სახელმძღვანელოები შეიძინა. სტამბოლის ედირნექაფის წმ. გიორგის ქართულ სამრევლო ტაძარში, ქართული დიასპორის წარმომადგენლებთან ერთად, საქართველოს ელჩი გიორგი ჯანჯღავა და სტამბოლში საქართველოს გენერალური კონსული ინგა კიკვაძე საღმრთო ლიტურგიას დაესწრნენ, რომელიც ქართული სამრევლოს წინაძღვარმა მამა ილია ჯინჯოლავამ აღასრულა. საღმრთო ლიტურგიას, ასევე, ესწრებოდა მსოფლიო პატრიარქის ოფიციალური წარმომადგენელი, მსოფლიო საპატრიარქოს გენერალური მდივანი არქიმანდრიტი იოაკიმე ბილისი. საღმრთო ლიტურგიის დასასრულს, საქართველოს ელჩმა, სიტყვით გამოსვლისას, ყურადღება გაამახვილა ქართული დიასპორის მნიშვნელოვან როლზე საქართველოს განვითარებისა და ქვეყნის პოზიტიური იმიჯის წარმოჩენის საქმეში და აღნიშნა, რომ დიასპორასთან ურთიერთობა და თანამშრომლობა როგორც საქართველოს მთავრობის და საგარეო საქმეთა სამინისტროს, ასევე, საზღვარგარეთ საქართველოს დიპლომატიური მისიების საქმიანობის ერთ-ერთი მთავარი მიმართულებაა.
მიკროსაფინანსო ორგანიზაციაზე თავდამსხმელს პატიმრობა შეეფარდა
ლევან ზურაბაშვილს, რომელიც წერეთლის გამზირზე მიკროსაფინანსო ორგანიზაციას თავს დაესხა და მძევლები აიყვანა, აღკვეთის ღონისძიების სახით პატიმრობა შეეფარდა. აღნიშნული გადაწყვეტილება თბილისის საქალაქო სასამართლოს მოსამართლე ნატო ხუჯაძემ მიიღო. დღევანდელ სასამართლო პროცესზე ბრალდების მხარე დაკავებულის მიმართ აღკვეთის ღონისძიების სახით პატიმრობის გამოყენებას, დაცვის მხარე კი მისი 1000-ლარიანი გირაოს სანაცვლოდ გათავისუფლებას ითხოვდა. პროკურორის განმარტებით, მის მიერ ჩადენილი დანაშაული განსაკუთრებით მძიმე კატეგორიის დანაშაულს მიეკუთვნება, შესაბამისად, მის მიმართ აღკვეთის ღონისძიების სახით პატიმრობა უნდა გამოყენებულიყო. ამასთან, სახელმწიფო ბრალდების განმარტებით, ბრალდებულის მხრიდან ახალი დანაშაულის ჩადენის, მოწმეებზე ზემოქმედებისა და მიმალვის საფრთხე კვლავ არსებობდა. ამასთან, პროკურორის თქმით, ბრალდებულის ქცევიდან გამომდინარე, დანიშნულია ფსიქიატრიული ექსპერტიზა. ადვოკატის განცხადებით კი, ზურაბაშვილს არავისთვის შეუქმნია საფრთხე. მას უნდოდა პროტესტი საჯაროდ გამოეხატა და მისი პოზიციის მოსასმენად ჟურნალისტები მისულიყვნენ. უფლებასამცველის თქმითვე, ზურაბაშვილი გამოძიებასთან ითანამშრომლებს. სიტყვით ისარგებლა თავად ბრალდებულმაც. ცნობისთვის, წერეთლის გამზირზე მდებარე მიკროსაფინანსო ორგანიზაციაში 31 წლის ლევან ზურაბაშვილი შეიჭრა და 19 ადამიანი მძევლად აიყვანა. თავდამსხმელთან სამართალდამცავების მიერ რამდენიმესაათიანი მოლაპარაკებების შედეგად, ბრალდებულმა მძევლად აყვანილი ადამიანები ეტაპობრივად გაათავისუფლა. ზურაბაშვილს საქართველოს პროკურატურამ მძევლად ხელში ჩაგდების ფაქტზე ბრალი საქართველოს სსკ-ის 144-ე მუხლის მეორე ნაწილის ,,გ" ქვეპუნქტით წარუდგინა, რაც გულისხმობს ორი ან მეტი პირის მძევლად ხელში ჩაგდებას. ბრალდებულის ქცევიდან გამომდინარე, საქმეზე დაინიშნა ფსიქიატრიული ექსპერტიზა, რომელიც შეისწავლის მის ფსიქიკურ მდგომარეობას დანაშაულის ჩადენის დროს. დანაშაული, რომლის ჩადენასაც ზურაბაშვილს ედავებიან, 9-დან 14-წლამდე თავისუფლების აღკვეთას ითვალიდწინებს.
2021 წლის დასაწყისში ევროპაში "კოვიდ-19"-ის მესამე ტალღას პროგნოზირებენ
ჯანდაცვის მსოფლიო ორგანიზაციის სპეციალური წარმომადგენლის დევიდ ნაბაროს განცხადებით, 2021 წლის დასაწყისში ევროპაში "კოვიდ-19"-ის მესამე ტალღაა მოსალოდნელი. ამის შესახებ მან შვეიცარიულ მედიაკომპანიების წარმომადგენლებს განუცხადა. ნაბაროს თქმით, ევროპულმა ქვეყნებმა ვერ შეძლეს მეორე ტალღის თავიდან აცილება მას შემდეგ, რაც მათ პირველი ტალღის გაკონტროლება შეძლეს. „ევროპული რეაქცია იყო არასრული. მათ ხელიდან გაუშვეს შანსი, აეშენებინათ საჭირო ინფრასტრუქტურა ზაფხულის განმავლობაში, მას შემდეგ, რაც შეძლეს, ინფექციის პირველი ტალღის გაკონტროლება. ახლა მეორე ტალღაა. თუკი ისინი არ ააშენებენ საჭირო ინფრასტრუქტურას ახლა, მათ ექნებათ მესამე ტალღა მომდევნო წლის დასაწყისში“ , - განაცხადა ნაბარომ. ჯანმოს წარმომადგენელმა განაცხადა, რომ ბევრი დასავლეთევროპული ქვეყნის წინაშე დგას ამოცანა, კვლავაც გააკონტროლონ ვირუსი ისე, რომ არ გამოიყენონ ისეთი უხეში ზომა, როგორიც არის „ლოქდაუნი“ - მკაცრი იზოლაციის რეჟიმი, რისთვისაც, მისი თქმით, უწევთ მაღალი ფასის გადახდა.
იუსტიციის სახლებისა და საზოგადოებრივი ცენტრების მუშაობის გრაფიკი იცვლება
სახელმწიფო სერვისების განვითარების სააგენტოს ინფორმაციით, იუსტიციის სახლის ფილიალები და საზოგადოებრივი ცენტრები შაბათს და კვირას აღარ იმუშავებენ. მუშაობის გრაფიკის ცვლილების მიზეზად კორონავირუსის გავრცელების პრევენცია სახელდება. „პანდემიის პერიოდში, კორონავირუსის გავრცელების პრევენციის მიზნით, იუსტიციის სახლებმა და საზოგადოებრივმა ცენტრებმა სხვა არაერთი ღონისძიება გაატარა: მიმდინარე წლის 5 მაისიდან იუსტიციის სახლები და საზოგადოებრივი ცენტრები ვიზიტის წინასწარი დაჯავშნის პრინციპით მუშაობდნენ და მოქალაქეებს სერვისებს ყოველდღე, შაბათ-კვირის ჩათვლით აწვდიდნენ; პირველი ივნისიდან თბილისის, ბათუმისა და ქუთაისის იუსტიციის სახლები, ნაცვლად 09:00-დან 18:00 საათისა, 09:00-დან 24:00 საათამდე გასცემდნენ 400-ზე მეტ სერვისს, მოქალაქეებს მომსახურების მიღება კვლავ ყოველდღე, შაბათ-კვირის ჩათვლით შეეძლოთ; 9 ნოემბრიდან, ახალი შეზღუდვების გათვალისწინებით, თბილისის, ქუთაისისა და ბათუმის იუსტიციის სახლები მომხმარებლებს ყოველდღე, 09:00-დან 21:00 საათამდე ემსახურებოდნენ; 22 ნოემბრიდან კი, იუსტიციის სახლის ფილიალები და საზოგადოებრივი ცენტრები ორშაბათიდან პარასკევის ჩათვლით, 09:00-დან 21:00 საათამდე იმუშავებენ. რეგულარულად, მასშტაბური სადეზინფექციო სამუშაოები ტარდება საქართველოში მოქმედ ყველა, 25-ვე იუსტიციის სახლსა და 85 საზოგადოებრივ ცენტრში. იუსტიციის სახლებსა და საზოგადოებრივ ცენტრებში სერვისის მიღება მხოლოდ წინასწარი დაჯავშნის პრინციპითაა შესაძლებელი პორტალიდან – my.gov.ge. ელექტრონული სისტემა მომხმარებელს ხუთენოვან სერვისს სთავაზობს – დაინტერესებული პირი ვიზიტის დაჯავშნას ქართულ, აფხაზურ, ინგლისურ, სომხურ და აზერბაიჯანულ ენებზე შეძლებს", - აღნიშნულია სახელმწიფო სერვისების განვითარების სააგენტოს ინფორმაციაში. იუსტიციის სახლსა და საზოგადოებრივ ცენტრში სერვისის მისაღებად მოქალაქე: ვიზიტის დასაჯავშნად უნდა ეწვიოს ვებგვერდს – my.gov.ge; პორტალზე განთავსებულ კალენდარში უნდა ჩანიშნოს თარიღი და დრო იუსტიციის სახლის ფილიალში ვიზიტისათვის, რის შემდეგაც მის მიერ მითითებულ ტელეფონის ნომერზე მიიღებს მოკლე ტექსტურ შეტყობინებას, სადაც აღნიშნული იქნება ვიზიტის თარიღი, ადგილი და დრო; ასევე, მომსახურების ერთჯერადი კოდი, რომელსაც ის წარადგენს იუსტიციის სახლში ვიზიტისას. წინასწარი დაჯავშნის გარეშე იუსტიციის სახლში მისული მომხმარებელი შენობაში ვერ მოხვდება; ფილიალში მისულ პირს აუცილებლად უნდა ეკეთოს პირბადე, ნიღბის გარეშე ის შენობაში არ დაიშვება;
თურქეთში კოვიდ 19-ის საწინააღმდეგო ვაქცინა უფასო იქნება
თურქეთში კორონავირუსის საწინააღმდეგო ვაქცინა უფასო იქნება, - თურქული მედიის ინფორმაციით, ამის შესახებ ქვეყნის ჯანდაცვის მინისტრმა ფაჰრეთინ კოჯამ განაცხადა. ამასთან, ჯანდაცვის მინისტრმა რამდენიმე დღის წინ აღნიშნა, რომ თურქეთი ჩინური კომპანია Sinovac Biotech-ის მიერ შექმნილი კანდიდატი ვაქცინის 20 მილიონი დოზის შესაძენად უახლოეს დღეებში კონტრაქტის გაფორმებას გეგმავდა. „დეკემბერში მინიმუმ 10 მილიონი დოზა ჩინური ვაქცინის შეძენას შევძლებთ. ჩვენ გვინდა, რომ ეს რიცხვი გავზარდოთ. იანვარშიც იგივე რაოდენობა გვექნება,”- განაცხადა კოჯამ. მისივე თქმით, ქვეყანა მოლაპარკებებს Pfizer-ისა და BioNTech-ის ვაქცინების შეძენის მიზნითაც აწარმოებს. ცნობისათვის, ბოლო მონაცემებით, თურქეთში კორონავირუსის 440 000-ზე მეტი შემთხვევაა დადასტურებული, დაღუპულთა რაოდენობა კი 12 000-ს აჭარბებს.
CNN - აშშ „ღია ცის ხელშეკრულებიდან“ ოფიციალურად გავიდა
აშშ "ღია ცის ხელშეკრულებიდან" ოფიციალურად გავიდა. ამის შესახებ CNN-ი წერს. ტელეკომპანია სახელმწიფო დეპარტამენტზე დაყრდნობით ინფორმაციას ავრცელებს, რომ ეს პრეზიდენტ დონალდ ტრამპის მიერ გადაწყვეტილების გამოცხადებიდან ექვსი თვის შემდეგ მოხდა. შეერთებულმა შტატებმა ღია ცის ხელშეკრულების დატოვების შესახებ 21 მაისს განაცხადა და ამის მიზეზად, რუსეთის მხრიდან შეთანხმების პირობების თვითნებური ინტერპრეტაცია და პერიოდული დარღვევა დაასახელა. სახელმწიფო ვალდებულია, ღია ცის შეთანხმებიდან გასვლის შესახებ ხელშემკვრელი მხარეები 6 თვით ადრე გააფრთხილოს. აშშ მზადაა, ამ 6-თვიან ვადაში გადახედოს საკუთარ გადაწყვეტილებას, თუ რუსეთი ნაკისრი ვალდებულებების სრულად შესრულებას დაუბრუნდება. რუსეთის მიერ ხელშეკრულების დარღვევის მაგალითებად აშშ-მა დაასახელა: საქართველოს ოკუპირებული ტერიტორიების – აფხაზეთისა და ცხინვალის რეგიონების – გასწვრივ სადამკვირვებლო ფრენებისთვის 10-კილომეტრიანი შემზღუდავი ზოლის დაწესება; საწვავის შემვსები აეროდრომის ანექსირებულ ყირიმის ტერიტორიაზე განსაზღვრა, რაც აშშ-ის შეფასებით, წარმოადგენს რუსეთის მცდელობას, განამტკიცოს უკანონო განაცხადი ნახევარკუნძულის ანექსიის შესახებ; დისტანციის დაწესება ფრენებზე კალინინგრადის ოლქთან, სადაც, მედიის ცნობით, რუსეთმა ბირთვული რაკეტები განათავსა და სამხედრო ინფრასტრუქტურა განაახლა. აშშ-ისა და კანადისთვის რუსეთის სამხედრო წვრთნებზე ერთობლივი სადამკვირვებლო ფრენის შეზღუდვა 2019 წელს. რუსეთის მიერ შეთანხმების დარღვევის გარდა, ხელშეკრულებიდან გასვლის ერთ-ერთ ოფიციალურ მიზეზად აშშ-მა ასევე დაასახელა კორონავირუსის პანდემიით გამოწვეული ეკონომიკური კრიზისის ფონზე სადამკვირვებლო მისიის ტექნიკის განახლებისთვის საჭირო ფინანსური ხარჯების თავიდან აცილება. New York Times-ის ინფორმაციით, აშშ-ის პრეზიდენტი დონალდ ტრამპი, ასევე, აღაშფოთა რუსეთის მიერ მონიტორინგის განხორციელებამ მის კუთვნილ გოლფის კლუბზე 2017 წელს. ამერიკული მხარე მიიჩნევს, რომ სამოქალაქო ობიექტების დაზვრევით რუსეთი ღია ცის შეთანხმების სულისკვეთებას არღვევს. ამას გარდა, გამოცემის ცნობით, გასაიდუმლოებულ შეტყობინებებში ამერიკელი სამხედროები და სპეცსამსახურის წარმომადგენლები ირწმუნებიან, რომ რუსები ღია ცის შეთანხმების ფარგლებში ფრენებს იყენებენ აშშ-ის ისეთი კრიტიკული ინფრასტრუქტურის შესახებ რუკების შესაქმენლად, რომლებიც შეიძლება, ჩვეულებრივი შეიარაღებული ან კიბერთავდასხმის ობიექტები გახდნენ. რუსეთის საგარეო საქმეთა სამინისტრომ ღია ცის შესახებ ხელშეკრულების პირობების დარღვევა უარყო და აშშ-ის ნაბიჯს სამწუხარო და დესტრუქციული უწოდა. ამავდროულად, მოსკოვმა თქვა, რომ მზადაა ღია ცის შეთანხმების გათვალისწინებით სადამკვირვებლო მისია დაუშვას კავკასიის საზღვრის გასწვრივ 10 კილომეტრიან ზონებში, თუ საქართველო რუსეთს მის ტერიტორიაზე ფრენის ნებას მისცემს. რა არის ღია ცის შეთანხმება? ღია ცა არის საჰაერო სივრცესთან დაკავშირებული საერთაშორისო სამართლებრივი რეჟიმი, რომელიც შექმნილია განიარაღების შესახებ არსებული ხელშეკრულებების შესრულების კონტროლის მიზნით. ღია ცის შეთანხმება აწესებს შეუიარაღებელი სადამკვირვებლო ფრენების რეჟიმს წევრი სახელმწიფოების ტერიტორიაზე. მათ შორის, ზუსტად განსაზღვრავს სადამკვრივებლო ფრენების კვოტებს და შეტყობინებებს შესვლის წერტილების შესახებ. ღია ცის იდეა, თავდაპირველად როგორც აშშ-სა და საბჭოთა კავშირს შორის ორმხრივი შეთანხმება, აშშ-ის პრეზიდენტმა დუაიტ ეიზენჰაუერმა ჯერ კიდევ 1955 წელს გაახმოვანა. ინიციატივა ცივი ომით დაპირისპირებულ მხარეებს შორის ნდობის ჩამოყალიბებას ემსახურებოდა. თუმცა იდეის ხორცშესხმა მრავალმხრივ ფორმატში მხოლოდ 37 წლის შემდეგ გახდა შესაძლებელი. ხელშეკრულება ღია ცის შესახებ ჰელსინკიში 1992 წლის 24 მარტს გაფორმდა და 2002 წელს შევიდა ძალაში. ამ დროისთვის შეთანხმების მონაწილეა 35 ქვეყანა (ბელარუსი, ბელგია, ბოსნია და ჰერცოგოვინა, ბულგარეთი, კანადა, ხორვატია, ჩეხეთი, დანია, ესტონეთი, ფინეთი, საფრანგეთი, საქაღთველო, გერმანია, საბერძნეთი, უნგრეთი, ისლანდია, იტალია, ლატვია, ლიეტუვა, ყირგიზეთი, ლუქსემბურგი, ნიდერლანდები, ნორვეგია, პოლონეთი, პორტუგალია, რუმინეთი, რუსეთი, სლოვაკეთი, სლოვენია, ესპანეთი, შვედეთი, თურქეთი, უკრაინა, გაერთიანებული სამეფო და შეერთებული შტატები), თუმცა აქედან ერთს – ყირგიზეთს – საერთაშორისო ხელშეკრულება ჯერ რატიფიცირებული არ აქვს. ჩამოთვლილი სახელმწიფოები სამხედრო საქმიანობის კონტოლის მიზნით ერთმანეთს საჰაერო სივრცეს უხსნიან.
3958 ახალი შემთხვევა და 36 გარდაცვლილი - 23 ნოემბრის სტატისტიკა
23 ნოემბრის მდგომარეობით, ბოლო 24 საათის განმავლობაში გამოვლენილია ვირუსით ინფიცირების 3 958 ახალი დადასტურებული შემთხვევა, - ამის შესახებ უწყებათაშორის საკოორდინაციო საბჭოსთან არსებული საოპერაციო შტაბის უფროსის მოადგილემ, ბერდია სიჭინავამ, მთავრობის ადმინისტრაციაში გამართულ ბრიფინგზე განაცხადა. მან კორონავირუსთან დაკავშირებით არსებულ უახლეს სტატისტიკურ მონაცემებზე ისაუბრა. „დღეის მდგომარეობით, ბოლო 24 საათის განმავლობაში გამოვლენილია ვირუსით ინფიცირების 3 958 ახალი დადასტურებული შემთხვევა. ქვეყანაში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 108 690-ს. გამოჯანმრთელებული ადამიანების ზრდის კუთხით დღეის მდგომარეობითაც ვინარჩუნებთ პოზიტიურ დინამიკას. კერძოდ, ბოლო 24 საათში გამოჯანმრთელდა 3 531 პირი, ხოლო ჯამში გამოჯანმრთელებულთა რაოდენობა გაიზარდა 89 170-მდე. სამწუხაროდ, უკანასკნელი 24 საათის განმავლობაში გვაქვს კორონავირუსით გარდაცვალების 36 ახალი შემთხვევა. 2020 წლის 26 თებერვლიდან დღემდე სულ გვაქვს 1 012 გარდაცვალების შემთხვევა. დღეს გამოვლენილი ინფიცირების 3 958 ახალი შემთხვევიდან, დედაქალაქისა და რეგიონების მიხედვით მაჩვენებლები გამოიყურება შემდეგი სახით: თბილისში გამოვლენილია 2 157 შემთხვევა, აჭარა - 417, იმერეთი - 537, ქვემო ქართლი - 190, შიდა ქართლი - 137, გურია - 78, სამეგრელო - ზემო სვანეთი - 159, კახეთი - 140, მცხეთა-მთიანეთი - 89, სამცხე-ჯავახეთი - 40, რაჭა-ლეჩხუმი და ქვემო სვანეთი - 14. ამ ეტაპზე ინფიცირების მიმდინარე აქტიური შემთხვევა არის 18 482. მათ შორის, 6 221 ადამიანი მკურნალობს საავადმყოფოში, მათ შორის, თბილისის საავადმყოფოებში - 2 762, აჭარაში - 1 048, იმერეთში - 1 226. ამ ეტაპზე მძიმე პაციენტია 881 პირი, მათ შორის, თბილისში - 406, აჭარაში - 147, იმერეთში - 201. მათ შორის ხელოვნური სუნთქვის აპარატზე იმყოფება 330 პირი, მათგან თბილისში - 161, აჭარაში - 60, იმერეთში - 41. 3 736 ადამიანი მოთავსებულია კოვიდ-სასტუმროში, მათ შორის 1 120 - თბილისში, 1 988 - აჭარაში, 316 - იმერეთში. 8 525 პირი ვირუსის მკურნალობს კურსს გადის საცხოვრებელ ბინაზე. საკარანტინე სივრცეებში მოთავსებულია 2 137 ადამიანი, მათ შორის, თბილისში - 480, აჭარაში -1 062, ხოლო იმერეთში - 26. სულ 6 ოქტომბრიდან - 22 ნოემბრის პერიოდში, სახელმწიფო საზღვრიდან საკარანტინე სივრცეებში გადაყვანილია - 17 419 პირი. ამ ეტაპისთვის თვითიზოლაციაში იმყოფება 54 167 ადამიანი, მათ შორის თბილისში - 17 563 პირი, აჭარაში - 14 449, იმერეთში - 5 280“, - განაცხადა ბერდია სიჭინავამ.
საქართველოს სჭირდება ქმედითი პარლამენტი - ევროკავშირის წარმომადგენლობა განცხადებას ავრცელებს
საქართველოს სჭირდება ქმედითი პარლამენტი, როგორც ცენტრალური ფორუმი პოლიტიკური დებატებისთვის, - ამის შესახებ 2020 წლის საპარლამენტო არჩევნებთან დაკავშირებით საქართველოში ევროკავშირის წარმომადგენლობის მიერ გავრცელებულ განცხადებაშია ნათქვამი. “2020 წლის საპარლამენტო არჩევნების წინასწარი შედეგების გამოცხადების შემდეგ, კვლავ ვადასტურებთ, რომ მხარს ვუჭერთ საერთაშორისო დამკვირვებლების ერთობლივ განცხადებას, რომელიც პირველი ტურის შემდეგ გამოქვეყნდა და ველოდებით ეუთო/ოდირის საბოლოო ანგარიშს, რეკომენდაციების ჩათვლით, გამოვლენილი ხარვეზების მოსაგვარებლად. წუხილს გამოვთქვამთ იმ უნდობლობასთან დაკავშირებით, რომელმაც საარჩევნო პროცესზე ზეგავლენა მოახდინა, ასევე, იმის გამო, რომ მეორე ტურში ოპოზიციის კანდიდატებმა საპარლამენტო ადგილებისთვის ბრძოლაში მონაწილეობა არ მიიღეს. ევროკავშირი მტკიცედ უჭერს მხარს დემოკრატიულ პროცესებს და სამართლებრივი ჩარჩოების დაცვას. საქართველოს სჭირდება ქმედითი პარლამენტი, როგორც ცენტრალური ფორუმი პოლიტიკური დებატებისთვის, სადაც ასოცირების შეთანხმებით გათვალისწინებული ჩვენი საერთო ვალდებულებების შესაბამისად – ყველა პარტია რეფორმების გასატარებლად ერთად იმუშავებს. ამიტომ, იმედი გვაქვს და მოველით, რომ ყველა პოლიტიკური პარტია შეძლებს მათ შორის არსებული განსხვავებების გადალახვას, რომ პარლამენტის ყველა არჩეულმა წევრმა, მიუხედავად მათი მხრიდან საარჩევნო პროცესის განსხვავებულად შეფასებისა, პარლამენტში თავისი ადგილი დაიკავოს. მოვუწოდებთ პარლამენტის წევრებს გამოიყენონ საქართველოს მოქალაქეების მიერ მათთვის მინიჭებული მანდატები, რომ განიხილონ მოუგვარებელი პოლიტიკური საკითხები და შექმნან უკეთესი საფუძველი მომავალი არჩევნებისთვის, ამბიციური საარჩევნო და სასამართლო რეფორმების გზით. პარლამენტმა, ასევე, სრულად უნდა შეასრულოს თავისი როლი ჯანდაცვისა და სოციალურ-ეკონომიკურ სფეროებში არსებული საგანგებო გამოწვევების გადასაჭრელად, რომლის წინაშე ქვეყანა პანდემიის გამო აღმოჩნდა. სრულად ვუჭერთ მხარს თითოეული მოქალაქის მიერ სიტყვისა და შეკრების თავისუფლების მშვიდობიანი გზით გამოყენების უფლებას და ვგმობთ ძალადობის ნებისმიერ ფაქტს თუ ძალადობის შემცველ მუქარას. მოვუწოდებთ ყველა მხარეს, თავი შეიკავონ პროვოკაციული ქმედებებისაგან, ხოლო ხელისუფლებას - დაიცვას კანონის უზენაესობა, მათ შორის ნებისმიერი ბრალდების სანდო და სწრაფი გამოძიების გზით, რასაც გამჭვირვალე და სამართლიანი სასამართლო პროცესები მოჰყვება. დღეს დიდი პასუხისმგებლობა ეკისრება როგორც უმრავლესობის, ისე ოპოზიციური პარტიების პოლიტიკურ ლიდერებს, რომ გამონახონ საერთო ენა საერთო მიზნის მისაღწევად, რაც საქართველოს შესაძლებლობას მისცემს ეფექტიანად გააგრძელოს დემოკრატიული გზით სვლა და ევროპული დღის წესრიგის განხორციელება საქართველოს, მისი მოქალაქეების ინტერესებისა და ევროკავშირი-საქართველოს ურთიერთობების გათვალისწინებით. ევროკავშირი კვლავ მზად არის დაეხმაროს საქართველოს ამ ძალისხმევაში“, - ნათქვამია საქართველოში ევროკავშირის წარმომადგენლობის მიერ გავრცელებულ განცხადებაში.
„ქართულ ოცნებას“ მეათე მოწვევის პარლამენტში 90 მანდატი აქვს
მეორე ტურის შედეგები უკვე ცნობილია. კენჭისყრის შედეგების მიხედვით, რომელიც ოპოზიციის ბოიკოტის პირობებში და აქციების გარეშე ჩატარდა, „ქართულმა ოცნებამ“ გაიმარჯვა. ოპოზიციის მოთხოვნად ხელახალი არჩევნები რჩება, პარალელურად, საერთაშორისო პარტნიორებს მოლაპარაკების მესამე რაუნდის გამართვის იმედი აქვთ. ევროკავშირის ელჩმა ოპოზიციისა და ხელისუფლების წარმომადგენლებთან გამართულ შეხვედრებს დღეს ნაყოფიერი უწოდა და განაცხადა, რომ მცდელობა იქამდე გაგრძელდება, ვიდრე წინსვლა არ იქნება. კარლ ჰარცელის თქმით, აბსოლუტურად აუცილებელი და არსებითია, რომ საბოლოდ მივიდეთ იმ მდგომარეობამდე, როდესაც საქართველო შეძლებს, ჰყავდეს სრულფასოვანი პარლამენტი, რომელიც მზად იქნება, გაუმკლავდეს იმ პასუხისმგებლობებს, რომელსაც საქართველოს თითოეული მოქალაქე ელოდება. ამ დროისთვის არსებული მონაცემებით: „ქართულ ოცნებას“ 90 მანდატი აქვს, 60 - პროპორციული, 30 - მაჟორიტარული წესით. სია ასეთია: გიორგი გახარია; არჩილ თალაკვაძე; ირაკლი კობახიძე; თეა წულუკიანი; მამუკა მდინარაძე; კახაბერ კუჭავა; გიორგი კახიანი; მარიამ ქვრივიშვილი; მიხეილ სარჯველაძე; მაია ბითაძე; მიხეილ დაუშვილი; გიორგი ამილახვარი; ვიქტორ სანიკიძე; მარიამ ბოჭორიშვილი; შალვა პაპუაშვილი; დავით კაჭარავა; ნიკოლოზ სამხარაძე; გიორგი ხელაშვილი; მარიამ ლაშხი; ბექა დავითულიანი; ანრი ოხანაშვილი; დიმიტრი ხუნდაძე; დიმიტრი სამხარაძე; ნინო წილოსანი; ირაკლი კოვზანაძე; ირაკლი ბერაია; ირაკლი სესიაშვილი; ეკა სეფაშვილი; რატი იონათამიშვილი; გურამ მაჭარაშვილი; დავით მათიკაშვილი; ელისო ბოლქვაძე; ლადო კახაძე; ირაკლი მეზურნიშვილი; სავალან მირზოევი; რიმა ბერაძე; სუმბატ კიურეღიან; ალეკო ტაბატაძე; ალუდა ღუდუშაური; ირმა ზავრადაშვილი; ირაკლი ზარქუა; გივი მიქანაძე; ბექა ლილუაშვილი; ქეთი დუმბაძე; ლექსო დალაქიშვილი; ლევან ქარუმიძე; ირაკლი მეძმარიაშვილი; ხატია წილოსანი; ვლადიმერ ჩაჩიბაია; ისკო დასენი; ვიქტორ ჯაფარიძე; მაია მენაღარიშვილი; ედიშერ თოლორაია; გოდერძი ჩანქსელიანი; ელგუჯა გოცირიძე; ანა ბუჩუკური; გია ბენაშვილი; დაჩი ბერაია; შოთა ხაბარელი; თამარ ტალიაშვილი; თუ გიორგი გახარია უარს იტყვის პარლამენტის წევრობაზე, (რაც მოსალოდნელია, რადგან ის მმართველმა გუნდმა პრემიერობის კანდიდატად დაასახელა) მის ნაცვლად დეპუტატი, ლევან მგალობლიშვილი გახდება. მეორე ტურში, ოპოზიციის ბოიკოტის პირობებში, „ქართული ოცნების“ გამარჯვებული მაჟორიტარი კანდიდატები არიან: დავით სერგეენკო; ლევან კობიაშილი; ნოდარ ტურძელაძე; ბექა ოდიშარია; გია ვოლსკი;მიხეილ ყაველაშვილი; კახა კახიშვილი; სოზარ სუბარი; ირაკლი ჩიქოვანი; რესან კონცელიძე; ანზორ ბოლქვაძე; ზაზა ლომინაძე; ბეჟან წაქაძე; ზაალ დუგლაძე; შალვა კერესელიძე; ნინო ლაცაბიძე; ირაკლი ქადაგიშვილი; დავით სონღულაშვილი; ზაურ დარგალი; გოგი მეშველიანი; გიორგი ხოჯევანიშვილი; ანტონ ობოლაშვილი; სამველ მანუკიანი; გოჩა ენუქიძე; პაატა კვიჟინაძე; გივი ჭიჭინაძე; ვასილ ჩიგოგიძე; ალექსანდრე მოწერელია; ირაკლი ხახუბია; ზაალ მიქელაძე. „ნაციონალური მოძრაობა“ - „ძალა ერთობაშია“ - (36 მანდატი) ბუბა კიკაბიძე; გრიგოლ ვაშაძე; ნიკა მელია; ხატია დეკანოიძე; კობა ნაყოფია; დევი ჭანკოტაძე; ლევან ვარშალომიძე; სალომე სამადაშვილი; ზაალ უდუმაშვილი; ხათუნა სამნიძე; რომან გოცირიძე; თემურ ჯანაშია; ნატო ჩხეიძე; რამაზ ნიკოლაიშვილი; კახაბერ ოქრიაშვილი; გუბაზ სანიკიძე; აბდულა ისმაილოვი; ცეზარ ჩოჩელი; თამარ კორძაია; სულხან სიბაშვილი; გიორგი გოდაბრელიძე; დავით ხაჯიშვილი; დილარ ხაბულიანი; თინათინ ბოკუჩავა; როსტომ ჩხეიძე; დავით კირკიტაძე; გიორგი ბოტკოველი; ეკატერინე ხერხეულიძე; მანუჩარ კვირკელია; ნიკა მაჭუტაძე; აკაკი მინაშვილი; ნონა მამულაშვილი; ლევან ბეჟაშვილი; ბაჩუკი ქარდავა; ლევან ხაბეიშვილი; ანა წითლიძე. „ევროპული საქართველო“ - (5 მანდატი) დავით ბაქრაძე; შალვა შავგულიძე; ელენე ხოშტარია; არმაზ ახვლედიანი; ტარიელ ნაკაიძე. „სტრატეგია აღმაშენებელი“ - (4 მანდატი) გიორგი ვაშაძე; თამარ ჩარკვიანი; პაატა მანჯგალაძე; თეონა აქუბარდია.„ლელო“ - 4 მამუკა ხაზარაძე; ბადრი ჯაფარიძე; დავით უსუფაშვილი;ანა ნაცვლიშვილი.„პატრიოტთა ალიანსი“ - 4 ირმა ინაშვილი; გიორგი ლომია; გოჩა თევდორაძე; ავთანდილ ენუქიძე. „გირჩი“ - (4 მანდატი) ზურაბ ჯაფარიძე; იაგო ხვიჩია; ვახტანგ მეგრელიშვილი; სალომე მუჯირი.„მოქალაქეები“ - 2 - ალეკო ელისაშვილი; ლევან იოსელიანი. "ლეიბორისტული არტია" - (1 მანდატი) შალვა ნათელაშვილი.
საქართველოში დღეს კოვიდინფექციის დადასტურებულმა შემთხვევებმა 4000-ს გადააჭარბა
გასული 24 საათის განმავლობაში საქართველოში კორონავირუსის ყველაზე მეტი შემთხვევა გამოვლინდა. რაოდენობამ 4000-ს (4048) პირველად გადააჭარბა. მაღალია გამოჯანმრთელებულთა რიცხვი, რომელიც 3 856-ს შეადგენს. გარდაიცვალა 49 პაციენტი. დედაქალაქისა და რეგიონების მიხედვით განაწილება ასეთია: თბილისში - 1 602 შემთხვევა, აჭარა - 447, იმერეთი - 772, ქვემო ქართლი - 223, შიდა ქართლი - 241, გურია - 114, სამეგრელო - ზემო სვანეთი - 389, კახეთი - 164, მცხეთა-მთიანეთი - 48, სამცხე-ჯავახეთი - 44, რაჭა-ლეჩხუმი და ქვემო სვანეთი - 4.
სოფელ ზარდიანთკარის მიმდებარედ, ოკუპანტებმა საქართველოს მოქალაქე დააკავეს
20 ნოემბერს ოკუპანტებმა გორის მუნიციპალიტეტის სოფელ ზარდიანთკარის მიმდებარედ არსებულ ოკუპირებულ ტერიტორიაზე, საქართველოს მოქალაქე უკანონოდ დააკავეს. სახელმწიფო უსაფრთხოების სამსახურის ინფორმაციით, უკანონო დაკავების ფაქტთან დაკავშირებით, მყისიერად გააქტიურდა ცხელი ხაზი და ინფორმირებულ იქნა ევროკავშირის სადამკვირვებლო მისია. "მომხდარის შესახებ ეცნობა ჟენევის საერთაშორისო დისკუსიების თანათავმჯდომარეებსა და ჩვენს საერთაშორისო პარტნიორებს. საოკუპაციო ძალების მიერ განხორციელებული უკანონო დაკავების ფაქტები აზიანებს ადგილზე არსებულ უსაფრთხოების გარემოს და უკიდურესად ართულებს ადგილობრივი მოსახლეობის ყოველდღიურ ცხოვრებას", - აცხადებენ უწყებაში.
ბელარუსისთვის დაწესებულ სანქციებს კიდევ შვიდი ქვეყანა შეუერთდა
ევროკავშირის მიერ ბელარუსისთვის დაწესებულ სანქციებს კიდევ შვიდი ქვეყანა შეუერთდა. კერძოდ, სანქციებს შეურთდნენ ჩრდილოეთ მაკედონია, მონტენეგრო, ალბანეთი, ისლანდია, ლიხტენშტეინი, ნორვეგია და უკრაინა. ევროკავშირმა ბელარუსის წინააღმდეგ სანქციების პირველი პაკეტი 2 ოქტომბერს დაამტკიცა, 6 ნოემბერს კი სანქციები გააფართოვა. სანქციების ფარგლებში შედგენილი შავი სია 60-მდე პირს მოიცავს, მათ შორის ქვეყნის პრეზიდენტს – ალექსანდრ ლუკაშენკოს და მის დამხმარეს ვიქტორ ლუკაშენკოს, ასევე ლუკაშენკოს პრესმდივან ნატალია ეისმონტს.
