ძებნის რეზულტატი:
რუმინეთმა მის ტერიტორიაზე დრონის ფრაგმენტების პოვნის შემდეგ, რუსეთის დროებითი რწმუნებული დაიბარა
NATO-ს წევრის ქვეყნის რუმინეთის საგარეო უწყებამ რუსეთის ფედერაციის დროებითი რწმუნებული დაიბარა. მიზეზი ბუქარესტის მიერ რუმინეთის ტერიტორიაზე დრონის ფრაგმენტების აღმოჩენაა. „სახელმწიფო მდივანმა სტრატეგიულ საკითხებში, იულიან ფოტამ რუმინეთის საჰაერო სივრცის დარღვევასთან დაკავშირებით რუმინული მხარის პროტესტი გამოხატა მას შემდეგ, რაც უკრაინის საზღვართან მოხდა იდენტიფიცირება უპილოტო თვითმფრინავის ზოგიერთი იმ ფრაგმენტისა, რომლებიც რუსი სამხედროების მიერ გამოყენებულ დრონების მსგავსია. ამავდროულად, რუმინელმა ოფიციალურმა პირმა დაგმო რუსული ძალების სისტემატური, გაუმართლებელი და ბარბაროსული თავდასხმები უკრაინის მოსახლეობისა და სამოქალაქო ინფრასტრუქტურის წინააღმდეგ, მათ შორის, რუმინეთის საზღვართან, რაც საფრთხეს უქმნის რუმინეთის მოქალაქეებს,“ - ნათქვამია განცხადებაში. შეგახსენებთ, შაბათს, 9 სექტემბერს მედიაში გავრცელდა ინფორმაცია, რომ რუმინეთის ტერიტორიაზე სავარაუდოდ, რუსული დრონის ფრაგმენტები იპოვეს. პრეზიდენტმა კლაუს იოჰანისმა განაცხადა, რომ ფაქტი რუმინეთის საჰაერო სივრცის დარღვევაზე მიუთითებს. რუმინეთმა მომხდარის შესახებ NATO-ს გენერალურ მდივანს იენს სტოლტენბერგს აცნობა. ალიანსმა ბუქარესტს სოლიდარობა გამოუცხადა. რუმინეთის მიწაზე სავარაუდოდ, რუსული დრონის ფრაგმენტები მიმდინარე კვირის განმავლობაში უკვე მეორედ იპოვეს. რუმინეთის ტერიტორიაზე სავარაუდოდ, დრონის ნამსხვრევების ჩამოვარდნის ფონზე, სტოლტენბერგი რისკებზე მიუთითებს რუმინეთი უკრაინის მოსაზღვრე ქალაქებში რუსული თავდასხმების რისკების გამო, თავშესაფრებს ააშენებს
სამხრეთ კორეა უკრაინას $2,3 მილიარდის მოცულობის დახმარებას ჰპირდება - მედია
სამხრეთ კორეულ სააგენტო Yonhap-ის წყაროების ინფორმაციით, პრეზიდენტმა იუნ სუკ იოლმა პირობა დადო, რომ მისი ქვეყანა უკრაინას ჰუმაიტარული დახმარების სახით, 2,3 მილიარდ დოლარს გადასცემს. ინფორმაციას უკრაინული მედია ავრცელებს. სამხრეთ კორეა პირველ 300 მილიონ დოლარს ჰუმანიტარული დახმარების სახით, უკრაინას 2024 წელს გადასცემს, დანარჩენს კი, კიევი გრძელვადიანი, დაბალპროცენტიანი სესხების სახით, ქვეყნის დახმარების ფონდის, ეკონომიკური განვითარების თანამშრომლობის ფონდის (EDCF) მეშვეობით მიიღებს. შეგახსენებთ, იუნ სუკ იოლი კიევს პირველად ივლისში ეწვია და თავის უკრაინელ კოლეგას, ვოლოდიმირ ზელენსკის შეხვდა. Wall Street Journal-ის მიერ მაისში გამოქვეყნებული ანგარიშის თანახმად, სამხრეთ კორეა, მსოფლიოში მერვე უმსხვილესი იარაღის ექსპორტიორია.
არასამთავრობოები: კლეპტოკრატიის შედეგად, ადამიანების კონკრეტული ჯგუფის გამდიდრება ბიუჯეტის ხარჯზე, ძირს უთხრის დემოკრატიულ ინსტიტუტებს
არასამთავრობო ორგანიზაციების ნაწილის შეფასებით, შესაძლო დანაშაულის ნიშნების შემცველი ინფორმაციისა და პრემიერ-მინისტრის მიერ პირადი მიზნებისთვის სახელმწიფო რესურსის შესაძლო გამოყენების ფაქტზე გამოძიება უნდა დაიწყოს. ერთობლივ განცხადებაშია აღნიშნულია, რომ მაღალი საზოგადოებრივი ინტერესის დაკმაყოფილების მიზნით, სახელმწიფო უზრუნველყოფის სააგენტომ უნდა გაასაჯაროოს რეისთან დაკავშირებული ინფორმაცია, მათ შორის, ხელშეკრულება მხარეების მითითებით, ასევე, ხარჯთაღრიცხვასა და ანგარიშსწორებასთან დაკავშირებული დოკუმენტები. „მიგვაჩნია, რომ ხსენებულ სიუჟეტში გავრცელებული ინფორმაცია რამდენიმე მიმართულებით უნდა გახდეს სახელმწიფო ინსტიტუტების შესწავლის საგანი: კერძოდ, საქართველოს პრემიერ-მინისტრი ირაკლი ღარიბაშვილის ყოველთვიურ ხელფასის და 2022 წლის ქონებრივი მდგომარეობის დეკლარაციის გათვალისწინებით, მის შემოსავლებსა და სახელმწიფო უზრუნველყოფის სააგენტოს ბალანსზე არსებული თვითმფრინავით კომერციული ვიზიტების განხორციელებისთვის საჭირო ხარჯებს შორის შესაძლო დისპროპორციის გამო, საინტერესოა, თუ რა არის პრემიერის ფინანსური წყარო. აქვე, აღსანიშნავია, რომ საქართველოში კლეპტოკრატიის მზარდი ტენდენციების გათვალისწინებით, მნიშვნელოვანია, სახელმწიფო უწყებებმა ეფექტიანი რეაგირება მოახდინონ ამ და სხვა ფაქტებზე, ვინაიდან, ეს არ არის პირველი შემთხვევა, როცა პრემიერ-მინისტრისა და მისი ოჯახის წევრების ირგვლივ გავრცელებული ინფორმაცია იწვევს ღარიბაშვილის თანამდებობის ან მასთან დაკავშირებული შესაძლებლობის ბოროტად, ქონებრივი ან სხვა სიკეთის მიღების მიზნით გამოყენების, ეჭვებს. კლეპტოკრატიის შედეგად, ადამიანების კონკრეტული ჯგუფის გამდიდრება ბიუჯეტის ხარჯზე და შემდეგ აღნიშნული სიმდიდრის გამოყენება ძალაუფლების შენარჩუნებისთვის, ძირს უთხრის ქვეყანაში დემოკრატიულ ინსტიტუტებს. მოვუწოდებთ საქართველოს გენერალურ პროკურატურას ტელეკომპანია „პირველის“ გადაცემა - “ნოდარ მელაძის შაბათში” 2023 წლის 9 სექტემბერს გასულ სიუჟეტში გადმოცემული შესაძლო დანაშაულის ნიშნების შემცველი ინფორმაციის საფუძველზე დაუყოვნებლივ დაიწყოს გამოძიება. ამის პარალელურად, არსებითია შემთხვევაზე მაღალი საზოგადოებრივი ინტერესის დაკმაყოფილების მიზნით, სახელმწიფო დაცვის სპეციალური სამსახურის საჯარო სამართლის იურიდიულმა პირმა, სახელმწიფო უზრუნველყოფის სააგენტომ, გაასაჯაროოს რეისთან დაკავშირებული ინფორმაცია, მათ შორის, ხელშეკრულება მხარეების მითითებით, ასევე, ხარჯთაღრიცხვასა და ანგარიშსწორებასთან დაკავშირებული დოკუმენტები,“ - აღნიშნულია არასამთავრობო ორგანიზაციების განცხადებაში, რომელსაც ხელს აწერენ: „საქართველოს ახალგაზრდა იურისტთა ასოციაცია“; „საფარი“, „სამართლიანი არჩევნებისა და დემოკრატიის საერთაშორისო საზოგადოება“; „საერთაშორისო გამჭირვალობა საქართველო“; „ღია საზოგადოების ფონდი“; „დემოკრატიის მცველები“. ცნობისთვის, "ტვ პირველის" ინფორმაციით, პრემიერ-მინისტრმა ირაკლი ღარიბაშვილმა სამთავრობო თვითმფრინავი პირადი ვიზიტისთვის გამოიყენა. მთავრობის სტრატკომმა საპასუხო განცხადება გაავრცელა და სიუჟეტს დეზინფორმაცია უწოდა. სტრატკომის განცხადებით, რეისი, რომლითაც პრემიერ-მინისტრი მიუნხენში გაემგზავრა, იყო კომერციული და კერძო ვიზიტისას პრემიერ-მინისტრის მგზავრობის თუ ნებისმიერი სხვა ხარჯი სახელმწიფო ბიუჯეტიდან არ გაწეულა.
სტიქია გურიაში: 35 ოჯახზე გეოლოგიურად მდგრად ადგილზე გადაყვანის რეკომენდაცია გაიცა
გარემოს დაცვისა და სოფლის მეურნეობის სამინისტრო გურიის სტიქიასთან დაკავშირებით განცხადებას ავრცელებს. უწყების განცხადებაშია აღნიშნულია, რომ ოზურგეთის და ლანჩხუთის მუნიციპალიტეტებში, 9 სექტემბრის მდგომარეობით, შეფასდა 18 ინფრასტრუქტურული ობიექტი, 19 დასახლება და 80 ოჯახის საკარმიდამო ნაკვეთი და საცხოვრებელი სახლი. ასევე, 35 ოჯახზე გაიცა რეკომენდაცია გეოლოგიურად მდგრად ადგილზე გადაყვანის შესახებ. გარემოს დაცვისა და სოფლის მეურნეობის სამინისტროს განმარტებით, სპეციალისტების მიერ განხორციელებული კვლევების საფუძველზე გურიის მხარეში საფრთხის დონე სტიქიის პირველ დღესთან შედარებით შემცირებულია. „გარემოს დაცვისა და სოფლის მეურნეობის სამინისტროს გარემოს ეროვნული სააგენტოს სპეციალისტების ჯგუფები მოქალაქეების საკარმიდამო ნაკვეთებისა და საცხოვრებელი სახლების მეწყრული პროცესებისაგან დაზიანების ხარისხის შესაფასებლად სტიქიის ზონაში რჩებიან და რეგიონში განვითარებული მოვლენების შესწავლას აგრძელებენ. სპეციალისტების მიერ ადგილზევე გაიცემა რეკომენდაციები შემდგომი ქმედებებისათვის. ოზურგეთის და ლანჩხუთის მუნიციპალიტეტებში, 9 სექტემბრის მდგომარეობით, შეფასდა 18 ინფრასტრუქტურული ობიექტი, 19 დასახლება და 80 ოჯახის საკარმიდამო ნაკვეთი და საცხოვრებელი სახლი. ასევე, 35 ოჯახზე გაიცა რეკომენდაცია გეოლოგიურად მდგრად ადგილზე გადაყვანის შესახებ. როგორც ცნობილია, 8 სექტემბერს, ღამის საათებში, გურიის მხარესა და აჭარაში მოსულმა უხვმა ნალექმა მდინარეებზე წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო მთიან ზონებში მეწყრული პროცესების ჩასახვა-გააქტიურება გამოიწვია. აქვე უნდა აღინიშნოს, რომ მაღალმთიანი გურია, ბუნებრივი საფრთხეებიდან გამომდინარე, განსაკუთრებით ბოლო 10-15 წლის განმავლობაში ერთ-ერთ რთულ მხარეს წარმოადგენს. ამ ეტაპზე სააგენტოს სპეციალისტების მიერ განხორციელებული კვლევების საფუძველზე გურიის მხარეში საფრთხის დონე სტიქიის პირველ დღესთან შედარებით შემცირებულია. ასევე, დღეს დილიდან გარემოს ეროვნული სააგენტოს სპეციალისტებმა ვერტმფრენით შემოვლა განახორციელეს სამეგრელო-ზემო სვანეთის რეგიონში, მდინარე მაგანას წყალშემკრები აუზის ტერიტორიაზე, სადაც გავრცელებული ინფორმაციით მდინარის შეგუბები აღინიშნებოდა. დათვალიაერების შედეგად მდ. მაგანას ხეობასა და მის შენაკადებზე შეგუბებები, ან რაიმე ტიპის მეწყრულ გრავიტაციული პროცესების კვალი არ დაფიქსირებულა,“ - აღნიშნულია განცხადებაში. მერიის განცხადებით, ლანჩხუთის მუნიციპალუტეტში სტიქიიდან მესამე დღეს აქტიურად მიმდინარეობს დაზიანებული ინფრასტრუქტურის გაწმენდითი სამუშაო. საგანგებო რეჟიმში აგრძელებს მუშაობას ყველა შესაბამისი სამსახური. მობილიზებულია მძიმე ტექნიკა.
მიღწეულია შეთანხმება მთიან ყარაბაღში ჰუმანიტარული დახმარების მიწოდებაზე
მთიანი ყარაბაღის ხელმძღვანელობამ განაცხადა, რომ აზერბაიჯანის ხელისუფლებასთან მიაღწია შეთანხმებას რეგიონისთვის ჰუმანიტარული დახმარების მიწოდებაზე. მას რუსეთიდან მიაწვდიან წითელი ჯვრის გზით და რუსეთის სამშვიდობო ძალების კონტროლით. პირველი სატვირთო მანქანები მთიან ყარაბაღში დღეს, 10 სექტემბერს უნდა მიემგზავრებიან. რადიო თავისუფლების ცნობით, ტრანსპორტისთვის გამოყენებულ იქნება აზერბაიჯანის ქალაქ აღდამზე გამავალი გზა. აზერბაიჯანის პრეზიდენტის თანაშემწემ ჰიქმეთ ჰაჯიევმა განმარტა, რომ აღდამის გავლით ტრანსპორტირება ცალკე ხელშეკრულებით რეგულირდება. ასევე განიხილება ჰუმანიტარული მარაგებისთვის ლაჩინის დერეფნის გახსნის შესაძლებლობა. ის ერთადერთი გზაა, რომელიც მთიან ყარაბაღს სომხეთთან აკავშირებს. ჰაჯიევმა თქვა, რომ მთიანი ყარაბაღის შესასვლელთან ყველა საკონტროლო-გამშვები პუნქტი და საგუშაგო აგრძელებს მუშაობას და ყველა ჰუმანიტარული ტვირთის განბაჟება აზერბაიჯანის წესების შესაბამისად უნდა მოხდეს. ერთი დღით ადრე, შაბათს, მთიანი ყარაბაღის პარლამენტმა თვითგამოცხადებული რესპუბლიკის ახალ მეთაურად აირჩია სამველ შაჰრამანიანი. აზერბაიჯანმა ამ გადაწყვეტილებას „ფიქციური და უკანონო“ უწოდა და პარლამენტის დაშლა მოითხოვა. ლაჩინის დერეფანი 15 ივნისიდან გადაკეტილია. რეგიონში ჰუმანიტარული მდგომარეობა კრიტიკულთან ახლოსაა: აღინიშნება საკვების, საწვავისა და მედიკამენტების დეფიციტი. ყარაბაღელები ამბობენ, რომ შიმშილის ზღვარზე არიან, ბენზინის ნაკლებობის გამო ტრანსპორტი არ მუშაობს. აზერბაიჯანი უარყოფს ბლოკადის მოწყობაში ბრალდებებს. ბაქომ ერევანი დაადანაშაულა, რომ თვითგამოცხადებული რესპუბლიკის იმ ტერიტორიაზე რომელსაც სომხეთის ხელისუფლება აკონტროლებს, მას გადაჰყავს სამხედრო მოსამსახურეები, გადააქვს იარაღი და საბრძოლო მასალა, ასევე ბაქო ერევანს ბრალს სდებს აზერბაიჯანის ტერიტორიიდან ბუნებრივი რესურსებისა და კულტურული ფასეულობების უკანონო გატანაში. მთიანი ყარაბაღის ტერიტორია საერთაშორისო სამართლის მიხედვით აზერბაიჯანის ნაწილად ითვლება. რეგიონის მოსახლეობა ძირითადად ეთნიკური სომხები არიან. 1990-იანი წლების დასაწყისიდან ბაქო ვერ აკონტროლებდა რეგიონის დიდ ნაწილს. სომხური თემის წარმომადგენლებმა გამოაცხადეს დამოუკიდებელი რესპუბლიკა, რომელიც არცერთმა ქვეყანამ, მათ შორის არც სომხეთმა, არ აღიარა. 2020 წლის შემოდგომაზე, მოკლევადიანი ომის შედეგად, აზერბაიჯანმა და სომხეთმა რუსეთის შუამავლობით ხელი მოაწერეს შეთანხმებას საომარი მოქმედებების შეწყვეტის შესახებ. შეთანხმების თანახმად, რამაც ერევანში ოპოზიციის პროტესტი გამოიწვია, ბაქომ ყარაბაღისა და მისი მიმდებარე აზერბაიჯანული ტერიტორიების მნიშვნელოვან ნაწილზე კონტროლი დაიბრუნა.
ზაპოროჟიეს ოლქში, ბოლო 24 საათში გათავისუფლებულია 1,5 კვადრატული კილომეტრი ტერიტორია - უკრაინა
უკრაინულმა ძალებმა ბოლო 24 საათის განმავლობაში 1,5 კვადრატული კილომეტრი ტერიტორია გაათავისუფლეს ზაპორიჟჟის ოლქში, რობოტინის მახლობლად. ამის შესახებ 10 სექტემბერს ტავრიის ჯარების ჯგუფების წარმომადგენელმა, ოლექსანდრ შტუპუნმა განაცხადა. ამასთან, ტავრიის მეთაურმა, გენერალმა ალექსანდრე ტარნავსკიმ განაცხადა, რომ უკრაინელი სამხედროები გასული დღის განმავლობაში კიდევ ერთი კილომეტრით დაწინაურდნენ. უკრაინის არმიამ რუსეთის თავდაცვის პირველი ხაზი სექტემბრის დასაწყისში გაარღვია.
ერდოღანი: მექნება საუბარი ნიკოლ ფაშინიანთან და განვუცხადებ, რომ ყარაბაღში ჩატარებული „არჩევნები" მიუღებელია
თურქეთის პრეზიდენტი, რეჯეფ თაიფ ერდოღანი აცხადებს, რომ ხვალ, 11 სექტემბერს პრემიერ-მინისტრ, ნიკოლ ფაშინიანთან სატელეფონო საუბარს გეგმავს. ერდოღანი ამბობს, რომ ყარაბაღში არსებული ვითარების განხილვას გეგმავს. „ორშაბათს, დიდი ალბათობით, მექნება საუბარი სომხეთის პრემიერ-მინისტრ ფაშინიანთან ყარაბაღში არსებულ ვითარებასთან დაკავშირებით. მე მას ვეტყვი, რომ ყარაბაღში ჩატარებული არჩევნები ჩვენთვის მიუღებელია, რაც უკვე არაერთმა დასავლურმა ქვეყანამ განაცხადა,“ - აღნიშნა ერდოღანმა. ყარაბაღში არსებულ ვითარებაზე რეჯეფ თაიფ ერდოღანი აზერბაიჯანელ კოლეგას, ილჰამ ალიევს უკვე ესაუბრა. ევროკავშირი მთიან ყარაბაღში გუშინ ჩატარებულ ე.წ. "საპრეზიდენტო არჩევნებს" არ აღიარებს. "2023 წლის 9 სექტემბერს ხანკენდში/სტეფანაკერტში ე.წ. „საპრეზიდენტო არჩევნების“ ჩატარებასთან დაკავშირებით, ევროკავშირი იმეორებს, რომ არ ცნობს იმ კონსტიტუციურ და სამართლებრივ ჩარჩოს, რომლის ფარგლებშიც ის ჩატარდა", - აღნიშნულია საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის, ჯოზეფ ბორელის პრესსპიკერის, ნაბილა მასრალის განცხადებაში. მისი თქმით, ამასთან მნიშვნელოვანია ყარაბაღელი სომხები გაერთიანდნენ დე-ფაქტო ლიდერების გარშემო, რომლებსაც შეუძლიათ და სურთ, ბაქოსთან შედეგზე ორიენტირებულ დისკუსიებში ჩაერთონ. ცნობისათვის, არაღიარებულ მთიან ყარაბაღში, 9 სექტემბერს ე.წ. "საპრეზიდენტო არჩევნები" ჩატარდა და "პრეზიდენტად" სამველ შაჰრამანიანი აირჩიეს.
პატრიარქი გურიაში მომხდარი ტრაგედიის გამო სამძიმრის წერილს აქვეყნებს
საქართველოს კათოლიკოს-პატრიარქი მწუხარებას გამოხატავს, გურიაში, სტიქიის შედეგად სამი ადამიანის დაღუპვის გამო. „სტიქიურმა უბედურებებმა მსოფლიოს სხვა ქვეყნებთან ერთად საქართველოც მოიცვა. უხვმა ნალექმა დიდი ზარალი მიაყენა კახეთს, მაგრამ ის, რაც ამ დღეებში გურიაში მოხდა, ფაქტობრივად, შოვის ტრაგედიის გაგრძელებად იქცა. დიდად ვწუხვართ ყმაწვილების, თორნიკე ჩხარტიშვილისა და იური (გიორგი) გუჯაბიძის, ასევე ქალბატონ თინათინ რუხაძის გარდაცვალების გამო, რომელნიც ჩამოწოლილმა მეწყერმა შეიწირა. აღვავლენთ ლოცვებს მათ უკვდავ სულთათვის, რათა უფალმა ჩვენმა იესო ქრისტემ იგინი სავანესა მართალთასა განაწესოს, ხოლო მათი ოჯახის წევრებსა და ახლობლებს მოანიჭოს შინაგანი ძალა ამ ტკივილის დასაძლევად და რწმენაში გასაძლიერებლად. ღმერთმა დალოცოს და მშვიდობით აკურთხოს გურია, მისი მკვიდრნი და სრულიად საქართველო,” - ნათქვამია სამძიმრის წერილში. ძლიერი წვიმის შედეგად, 8 სექტემბერს, გურიის რეგიონის სოფლები დაიტბორა და დაიმეწყრა. სამი ადამიანი დაიღუპა. სტიქია გურიაში: 35 ოჯახზე გეოლოგიურად მდგრად ადგილზე გადაყვანის რეკომენდაცია გაიცა
გერმანიის საკალათბურთო ნაკრები ისტორიაში პირველად მსოფლიო ჩემპიონია
გერმანიის ნაკრები ისტორიაში პირველად მსოფლიო ჩემპიონია. პლანეტის პირველობის ფინალში გერმანიამ სერბეთის ნაკრები 83:77 დაამარცხა. გერმანიამ 2023 წლის მსოფლიო ჩემპიონატი წაუგებლად დაამთავრა, გუნდმა 8 დან 8 მატჩი მოიგო. ფინალური შეხვედრის საუკეთესო მოთამაშე გერმანელი ფრანც ვაგნერი გახდა, ხოლო ტურნირის უძვირფასეს კალათბურთელად (MVP) დენის შრიოდერი დაასახელეს. 2023 წლის მსოფლიო ჩემპიონატზე მესამე ადგილი კანადის ნაკრებმა დაიკავა, რომელმაც ბრინჯაოს მედლებისთვის მატჩში აშშ 127:118 დაამარცხა.
ბორის ჯონსონი ლვოვის უნივერსიტეტის საპატიო დოქტორი გახდა
დიდი ბრიტანეთის ყოფილ პრემიერ-მინისტრს, ბორის ჯონსონს მიენიჭა ივან ფრანკოს სახელობის ლვოვის ეროვნული უნივერსიტეტის საპატიო დოქტორის ჯილდო მიენიჭა. საზეიმო მიღება და დაჯილდოება უნივერსიტეტის აკადემიური საბჭოს სხდომაზე გაიმართა, სადაც ჯონსონს ივან ფრანკოს დოქტორის დიპლომი მიენიჭა. ჯონსონი ლვოვში 9 სექტემბერს ჩავიდა. პრემიერ-მინისტრობის დროს ჯონსონი არაერთხელ იმყოფებოდა უკრაინაში და ომის დროს კიევს მტკიცე მხარდაჭერა აღუთქვა.
ემანუელ მაკრონი: „დიდი ოცეულის" სამიტის დეკლარაცია რუსეთისთვის გამარჯვება არ არის
საფრანგეთის პრეზიდენტმა, ემანუელ მაკრონმა განაცხადა, რომ „დიდი ოცეულის" სამიტის დეკლარაცია რუსეთისთვის დიპლომატიური გამარჯვება არ არის. „დიდი ოცეულის" ეს სამიტი კიდევ ერთხელ ადასტურებს რუსეთის იზოლაციას. "დიდი ოცეულის" წევრების აბსოლუტური უმრავლესობა გმობს უკრაინის ომს და მის გავლენას,“ - განაცხადა მაკრონმა სამიტის დახურვის ცერემონიის შემდეგ გამართულ პრესკონფერენციაზე. შეგახსენებთ, 9 სექტემბერს, „დიდი ოცეულის" ქვეყნებმა ერთობლივი დეკლარაცია შეათანხმეს. დეკლარაციის ტექსტში არ არის საუბარი უკრაინის წინააღმდეგ ომთან დაკავშირებით რუსეთის ქმედებების დაგმობაზე, ამის ნაცვლად აღნიშნულია, რომ ომმა ადამიანების უზარმაზარი ტანჯვა გამოიწვია. ტექსტის შინაარსმა კიევის უკმაყოფილება გამოიწვია. „დიდი ოცეულის“ ჯგუფმა ერთობლივი დეკლარაცია შეათანხმა, კიევი ტექსტის შინაარსით უკმაყოფილოა
ბაიდენი ვიეტნამშია
აშშ-ის პრეზიდენტი, ჯო ბაიდენი ვიეტნამში ჩავიდა. მან Twitter-ზე დაწერა, რომ სჯერა, ეს ვიზიტი ისტორიული იქნება. აშშ ვიეტნამთან სტრატეგიული შეთანხმების გაფორმებით, ინდო-წყნარი ოკეანის რეგიონში გავლენას აძლიერებს. ამის შესახებ გამოცემა POLITICO 21 აგვისტოს წერდა. ბაიდენი ვიეტნამთან სტრატეგიული პარტნიორობის შეთანხმებას მოაწერს ხელს - POLITICO მედია ბაიდენის ვიზიტს რეგიონში ჩინეთის წინააღმდეგ ბრძოლის უახლეს მცდელობას უწოდებს. „ახალი სტრატეგიული პარტნიორობის შეთანხმება ხსნის კარს უფრო მჭიდრო დიპლომატიური, ეკონომიკური და ტექნოლოგიური თანამშრომლობისთვის ყოფილ მტერთან - და ჩინეთის მეზობელ - ჰანოისთან“, - წერს Politico. „ვიეტნამი არ უერთდება აშშ-ის ჩინეთის წინააღმდეგ... ისინი სიამოვნებით აუმჯობესებენ ურთიერთობებს აშშ-სთან, მაგრამ ეს არ ნიშნავს, რომ ისინი ჩინეთის წინააღმდეგ მოქმედებენ - გააგრძელებენ პოზიციონირებას ძალიან ფრთხილად,” - განაცხადა სკოტ მარსიელმა, აშშ-ის სახელმწიფო მდივნის თანაშემწის ყოფილმა მოადგილემ, რომელმაც ჰანოიში 1993 წელს სახელმწიფო დეპარტამენტის პირველი ოფისი გახსნა. ახლა აშშ ჰანოის უმსხვილესი სავაჭრო პარტნიორია.
უკრაინის კონტრშეტევა რთულია, მაგრამ პროგრესი შთამბეჭდავია - ნულანდი
უკრაინის შეიარაღებული ძალების კონტრშეტევა რთულია, მაგრამ მიღწეული პროგრესი იმ პირობების გათვალისწინებით, რომელშიც ის მიმდინარეობს, შთამბეჭდავია. ამის შესახებ აშშ-ის სახელმწიფო მდივნის მოვალეობის შემსრულებელმა, ვიქტორია ნულანდმა განაცხადა. „ეს კონტრშეტევა იყო კილომეტრობით, მაგრამ ჩვენ აღფრთოვანებული ვართ მიღწეული პროგრესით, განსაკუთრებით სამხრეთში,“ - განაცხადა ნულანდმა. მისი თქმით, მოსკოვმა თვეების განმავლობაში ააშენა ძლიერი თავდაცვითი ხაზი უკრაინის სამხრეთით, დროებით ოკუპირებულ მხარეში. „ჩვენ ვცდილობთ, მჭიდროდ ვითანამშრომლოთ უკრაინის მთავრობასთან, მივაწოდოთ აღჭურვილობა მექანიზებული განაღმვისთვის, შორი მოქმედების არტილერია და სხვა იარაღები,“ - განაცხადა აშშ-ის სახელმწიფო მდივნის მოვალეობის შემსრულებელმა. ნულანდი: პუტინი თუ გაიმარჯვებს, ეს ნიშნავს, რომ ბოროტება ნორმად იქცევა მსოფლიოში, ამიტომ უნდა დავეხმაროთ უკრაინას ცნობისთვის, უკრაინის პრეზიდენტმა, ვლადიმირ ზელენსკიმ განაცხადა, რომ შეტევითი ოპერაციების დაჩქარება დამოკიდებულია იმაზე, თუ რამდენად სწრაფად მიიღებს უკრაინა ძლიერ იარაღს.
ბრიტანეთის არმიის სარდალი და ამერიკელი გენერალი უკრაინის კონტრშეტევაზე
შეერთებული შტატების შტაბის უფროსთა გაერთიანებული შტაბის თავმჯდომარე, გენერალი მარკ მილი, მიიჩნევს, რომ უკრაინის არმიას დაახლოებით, ერთ თვე აქვს, რომ აქტიური საბრძოლო მოქმედებები ჩაატაროს არასასურველი ამინდის დაწყებამდე. ამის შესახებ მან BBC-ს განუცხადა. მილის თქმით, კონტრშეტევის შედეგების შეჯამება ნაადრევია. გენერალმა ხაზი გაუსვა, რომ ცივი პირობები უკრაინას მანევრირებას უფრო გაურთულებს. „მე ვთქვი ამ [ომის] დასაწყისშივე, რომ ეს იქნებოდა ხანგრძლივი, ნელი, რთული და დიდი მსხვერპლის გამომწვევი და ზუსტად ასეა,“ - განაცხადა გენერალმა. ამერიკელი გენერალი: უკრაინულმა ძალებმა გარკვეულ მონაკვეთზე რუსეთის თავდაცვის მთავარი ხაზი გაარღვიეს ამინდის გავლენის შესახებ კითხვას, უკრაინის სამხედრო დაზვერვის ხელმძღვანელმა, გენერალ-ლეიტენანტმა კირილო ბუდანოვმაც უპასუხა და განაცხადა, რომ „ბრძოლა ასე თუ ისე გაგრძელდება.“ მან ხაზგასმით აღნიშნა, რომ რუსეთის მიერ ფართო ტანკსაწინააღმდეგო თავდაცვისა და კამიკაძე-დრონების გამოყენება ისეთივე გამოწვევაა. „ასე რომ, უმეტეს შემთხვევაში, სამწუხაროდ, ჩვენი შეტევა ფეხით გადაადგილებაზეა ორიენტირებული,“ - აღნიშნა ბუდანოვმა. ამავე ინტერვიუში, გაერთიანებული სამეფოს თავდაცვის შტაბის უფროსმა, ადმირალმა ტონი რადაკინმა განაცხადა, რომ „უკრაინა იმარჯვებს და რუსეთი მარცხდება.“ „რუსეთის მიზანი იყო უკრაინის დამორჩილება და მისი კონტროლის ქვეშ მოქცევა. ეს არ მომხდარა და არც არასდროს მოხდება და ამიტომაც იმარჯვებს უკრაინა,“ - განაცხადა რადაკინმა. მან აღნიშნა, რომ უკრაინა პროგრესირებს ბრძოლაში თავისი ტერიტორიის დასაბრუნებლად, რომელმაც დაიბრუნა რუსეთის მიერ მიტაცებული მიწის 50%. რადაკინის შეფასებით, უკრაინის პროგრესი ასევე განპირობებული იყო საერთაშორისო თანამეგობრობის „ეკონომიკური და დიპლომატიური ზეწოლით.“ მან ჩრდილოეთ კორეასთნ რუსეთის კავშირებზეც ისაუბრა. „ვლადიმერ პუტინის ალიანსი ჩრდილოეთ კორეასთან გვიჩვენებს, რომ რუსეთის პრეზიდენტი „სასოწარკვეთილ მდგომარეობაშია," - აღნიშნა ადმირალმა რადაკინმა. მისი თქმით, ორ ქვეყანას შორის კავშირებმა აჩვენა, თუ რამდენი პარტნიორი დარჩა რუსეთს. გავრცელებული ინფორმაციით, ჩრდილოეთ კორეის ლიდერი კიმ ჩენ ინი ამ თვეში რუსეთს ეწვევა, რომ პუტინს იარაღზე მოლაპარაკებებისთვის შეხვდეს. „თქვენ უნდა დააკვირდეთ იმ ფაქტს, რომ [რუსეთის] ეკონომიკა ზეწოლის ქვეშაა, სანქციები უფრო დიდ გავლენას ახდენს. მას არ ჰყავს ბევრი საერთაშორისო პარტნიორი,“ - აღნიშნა რადაკინმა. „დაკარგა ნახევარი მილიონი ადამიანი, ვინც გაიქცა ქვეყნიდან. კიდევ მილიონს მაინც სურს ქვეყნიდან წასვლა. ომი რომ გააგრძელოს, საკმარისი ხალხია საჭირო,“ - ხაზს უსვამს ადმირალი. NATO-ს სამხედრო მაღალჩინოსნებმა ზალუჟნისთან პოლონეთის საზღვარზე შეხვედრა გამართეს უკრაინულმა ძალებმა შეტევითი მოქმედებები ზაპოროჟიეს რეგიონში ამ ზაფხულს გააძლიერეს. ბრძოლები მიმდინარეობს ორ ფრონტზე - მელიტოპოლსა და ბერდიანსკის მიმართულებაზე.
კობახიძის თქმით, პირადი საჭიროებისთვის ბიუჯეტიდან არცერთი თეთრი არ დახარჯულა
პარტია „ქართული ოცნების“ თავმჯდომარის, ირაკლი კობახიძის განცხადებით, წინა ხელისუფლების წარმომადგენლები თავის დროზე ბიუჯეტს უყურებდნენ, როგორც საკუთარ სალაროს, დღეს კი, პირადი საჭიროებისთვის ბიუჯეტიდან არცერთი თეთრი არ იხარჯება. კობახიძის თქმით, ირაკლი ღარიბაშვილთან დაკავშირებით სპეკულაციები გრძელდება. „გახსოვთ, დიდი ხნის განმავლობაში ოპოზიცია ამტკიცებდა, რომ სააკაშვილის მიერ გაწეული ხარჯები არ იყო პრობლემა, ეს არ იყო დანაშაული, მაშინ, როდესაც რეალურად ბიუჯეტის ხარჯზე ხდებოდა მისთვის იმ საკითხების მოგვარება, რომლებიც მის პირად საჭიროებას განეკუთვნებოდა. დღეს გვაქვს ვითარება, რომ პრემიერმა ისარგებლა ჩარტერით, ბიუჯეტიდან არცერთი თეთრი არ დახარჯულა ამისთვის. ეს არის რეალობა. რაც შეეხება თავად ხარჯებს, ის იქნება დეკლარირებული და საზოგადოებისთვის ცნობილი, როგორც შემოსავლები, ასევე ხარჯები. აქედან გამომდინარე, ყველაფერი დღესავით ნათელია. მაინც გრძელდება სპეკულაციები ამ თემასთან დაკავშირებით. კიდევ ერთხელ გავიმეორებ, ჩვენ გვაქვს აბსოლუტურად სხვა სტანდარტი. თავის დროზე, წინა ხელისუფლების წარმომადგენლები ბიუჯეტს უყურებდნენ, როგორც საკუთარ სალაროს. დღეს საკუთარი, პირადი საჭიროებისთვის ბიუჯეტიდან არცერთი თეთრი არ დახარჯულა. ეს იყო პრემიერის პირადი ხარჯი და ხარჯებთან დაკავშირებით ყველაფერი იქნება ასახული დეკლარაციაში“, – განაცხადა ირაკლი კობახიძემ. არასამთავრობოები: კლეპტოკრატიის შედეგად, ადამიანების კონკრეტული ჯგუფის გამდიდრება ბიუჯეტის ხარჯზე, ძირს უთხრის დემოკრატიულ ინსტიტუტებს ცნობისთვის, "ტვ პირველის" ინფორმაციით, პრემიერ-მინისტრმა ირაკლი ღარიბაშვილმა სამთავრობო თვითმფრინავი პირადი ვიზიტისთვის გამოიყენა. მთავრობის სტრატკომმა საპასუხო განცხადება გაავრცელა და სიუჟეტს დეზინფორმაცია უწოდა. სტრატკომის განცხადებით, რეისი, რომლითაც პრემიერ-მინისტრი მიუნხენში გაემგზავრა, იყო კომერციული და კერძო ვიზიტისას პრემიერ-მინისტრის მგზავრობის თუ ნებისმიერი სხვა ხარჯი სახელმწიფო ბიუჯეტიდან არ გაწეულა.
მედია: რუსეთმა ფინეთის საზღვართან სამხედრო ბაზების მოწყობა დაიწყო
ფინური მედიის ცნობით, სატელიტური ფოტომასალა ადასტურებს, რომ რუსეთმა ფინეთის საზღვართან სამხედრო ბაზების მოწყობა დაიწყო. მას შემდეგ, რაც ფინეთი NATO-ში გაწევრიანდა, რუსეთის თავდაცვის მინისტრის, სერგეი შოიგუს ბრძანებით, ფინეთის საზღვართან შეიარაღებული ძალები ძლიერდება. ფინეთის არმიის გადამდგარი მაიორი, მარკო ეკლუნდი ამბობს, რომ საზღვართან აგებული სამხედრო საწყობი სარემონტო მდგომარეობაშია და სავარაუდოდ, შემოდგომა-ზამთრის ნალექიან ამინდებში ტექნიკის შესანახად გამოიყენებენ.
ბერბოკი ომის დროს უკრაინაში მეოთხედ ჩავიდა
გერმანიის საგარეო საქმეთა მინისტრი, ანალენა ბერბოკი დღეს დილით, მოულოდნელი ვიზიტით უკრაინაში ჩავიდა. წერს „დოიჩე ველე". „უკრაინა იცავს ყველა ჩვენგანის თავისუფლებას დიდი გამბედაობით და მონდომებით", - განაცხადა ბერბოკმა კიევში და ხაზი გაუსვა, რომ უკრაინას შეუძლია გერმანიის დახმარების იმედი ჰქონდეს. გერმანიის საგარეო საქმეთა მინისტრის ვიზიტი, უსაფრთხოების მიზეზების გამო, წინასწარ არ გამოცხადებულა. რუსეთის უკრაინაში შეჭრის შემდეგ ბერბოკი ქვეყანაში მეოთხედ ჩავიდა.
11 სექტემბრის ტერაქტებიდან 22 წელი გავიდა
11 სექტემბრის ტერაქტებიდან 22 წელი გავიდა. 2001 წელს, დილით, ალ-ქაიდას 19-მა თვითმკვლელმა ტერორისტმა ამერიკული ავიახაზების 4 თვითმფრინავი გაიტაცა. მათგან ორი, ნიუ-იორკში, მანჰეტენზე, მსოფლიო სავაჭრო ცენტრის ცათამბჯენებს შეეჯახა. 08:46 საათზე - ჩრდილოეთ კოშკზე, 09:03 საათზე კი, სამხრეთ კოშკზე მოხდა დაჯახება. მესამე გატაცებული თვითმფრინავი 09:37 საათზე პენტაგონის შენობას დაეცა. ერთ-ერთმა კი მიზნამდე ვერ მიაღწია და გზაში ჩამოვარდა. საერთო ჯამში, 2 977 ადამიანი დაიღუპა.
უკრაინა აცხადებს, რომ დონეცკის ოლქში მდებარე ოპიტნეს ნაწილი გაათავისუფლა
უკრაინულმა ძალებმა გაათავისუფლეს სოფელ ოპიტნეს ნაწილი, რომელიც ავდიივკასა და ოკუპირებულ დონეცკს შორის მდებარეობს. ამის შესახებ თავდაცვის მინისტრის მოადგილე, ჰანა მალიარი აცხადებს. „ოპიტნის რაიონში წინსვლა იყო, თავდაცვის ძალებმა დასახლების ნაწილი აიღეს,“ - ამბობს მალიარი. მალიარის თქმით, უკრაინა ბოლო შვიდი დღის განმავლობაში სამხრეთ ფრონტზე დაწინაურდა. „წარმატება იყო რობოტინის სამხრეთით და ვერბოვის დასავლეთით, ზაპოროჟიეს ოლქში. გასულ კვირას სამხრეთით დაახლოებით 1,5 კვადრატული კილომეტრი გაათავისუფლეს,“ - განაცხადა მალიარმა.
დიდი ბრიტანეთის პარლამენტის მკვლევარი ჩინეთის სასარგებლოდ ჯაშუშობის ბრალდებით დააკავეს - მედია
დიდი ბრიტანეთის პარლამენტის მკვლევარი ჩინეთის სასარგებლოდ ჯაშუშობის ბრალდებით დააკავეს The Sunday Times-ის ცნობით, მკვლევარს პარლამენტის მაღალჩინოსნებთან ჰქონდა კავშირი. მედია წერს, რომ დეპუტატები, რომლებთანაც ის იყო დაკავშირებული, საიდუმლო ან ძალიან მგრძნობიარე ინფორმაციას ფლობენ. „ეს არის ჩინეთის მხრიდან მნიშვნელოვანი ესკალაცია. მსგავსი რამ აქამდე არასდროს გვინახავს,“ - განუცხადა წყარომ The Sunday Times-ს. მეტროპოლიტენის პოლიციის კონტრტერორისტული სარდლობის თანამშრომლები, რომლებიც ჯაშუშობასთან დაკავშირებულ დანაშაულებს იძიებენ. ივლისში, დაზვერვისა და უსაფრთხოების კომიტეტმა (ISC) განაცხადა, რომ ჩინეთი წარმოადგენს გამოწვევას ბრიტანეთის სადაზვერვო სააგენტოებისთვის. ISC, რომელიც შედგება მრავალპარტიული დეპუტატებისაგან, გამოაქვეყნა მოხსენება, რომელშიც ნათქვამია, რომ ჩინეთმა შეძლო, „წარმატებით შეეღწია დიდი ბრიტანეთის ეკონომიკის ყველა სექტორში." 2022 წლის იანვარში ასევე გააფრთხილეს დეპუტატები, რომ ჩინეთის მთავრობის აგენტი მუშაობდა პარლამენტში „პროცესების ჩასაშლელად." წერილში, რომელიც დეპუტატებს სპიკერმა სერ ლინდსი ჰოილმა გაუგზავნა, ნათქვამი იყო, რომ ვინმე კრისტინ ლი, „პროცესებში ჩართული იყო ჩინეთის კომუნისტური პარტიის სახელით. 59 წლის ქალი ბრალდებებს უარყოფდა.
