ძებნის რეზულტატი:
ბრიტანული თვითმფრინავები უკრაინული მარცვლეულით დატვირთულ გემებს რუსეთის თავდასხმისგან იცავენ - The Telegraph
ბრიტანული გამოცემა The Telegraph-ი ავრცელებს ინფორმაციას, რომ ბრიტანული თვითმფრინავები უკრაინული მარცვლეულით დატვირთულ გემებს რუსეთის მხრიდან თავდასხმისგან იცავენ. მედია წერს, რომ დიდი ბრიტანეთის თავდაცვის სამინისტრომ საკუთარი საქმიანობა მას შემდეგ გაააქტიურა, რაც რუსეთის ფედერაციამ ივლისში “მარცვლეულის შეთანხმებიდან” გასვლის შემდეგ მარცვლეულის ინფრასტრუქტურაზე თავდასხმები დაიწყო. „ჩვენ გამოვიყენებთ ჩვენს დაზვერვასა და დაკვირვებას შავ ზღვაში რუსეთის საქმიანობაზე დაკვირვებისთვის. ამ სადამკვირვებლო ოპერაციის ფარგლებში დიდი ბრიტანეთის სამხედრო-საჰაერო ძალები ამ რეგიონში ფრენებს ახდენენ, რათა რუსეთი სამოქალაქო გემებზე უკანონო დარტყმებისგან შეაკავოს,” - ციტირებს The Telegraph-ი დიდი ბრიტანეთის პრემიერ-მინისტრის პრესსამსახურს.
ევროკავშირმა რუსეთის წინააღმდეგ სანქციები გააფართოვა
ევროკავშირის საბჭომ სანქციების სიას კიდევ ექვსი რუსი დაამატა დროებით ოკუპირებულ ყირიმში ადამიანის უფლებების დარღვევისთვის. უკრაინული მედიის ცნობით, ამის შესახებ ინფორმაცია ევროკავშირის ოფიციალურ ჟურნალში განთავსდა. სამქცირებულთა შორის არიან ФСБ-ის თანამშრომლები, პროკურორები, ყირიმელი თათრების დევნაში მონაწილე მოსამართლეები და ჟურნალისტი ვლადისლავ ესიპენკო. „ევროკავშირი შეშფოთებულია ყირიმის ნახევარკუნძულზე ადამიანის უფლებების მდგომარეობის გაუარესებით, განსაკუთრებით რუსეთის აგრესიული ომის კონტექსტში უკრაინის წინააღმდეგ,“ - წერია ევროკავშირის ვებგვერდზე განთავსებულ ცნობაში.
9 სექტემბრიდან 10 სექტემბრის დილამდე ძლიერი ნალექები, ელჭექი და სეტყვაა მოსალოდნელი
9 სექტემბრიდან 10 სექტემბრის დილამდე დასავლეთ საქართველოს უმეტეს და აღმოსავლეთ საქართველოს ზოგიერთ რეგიონში კვლავ ძლიერი ნალექები, ელჭექი და სეტყვაა მოსალოდნელი. იქროლებს დასავლეთის მიმართულების ძლიერი ქარი. შესაბამის ინფორმაციას გარემოს ეროვნული სააგენტო ავრცელებს. „ზღვაზე შესაძლებელია 3-4 ბალიანი შტორმული ღელვა. 9 სექტემბრიდან მოსალოდნელია ჰაერის ტემპერატურის მნიშვნელოვანი დაცემა და მაღალმთიან რეგიონებში შესაძლებელია, თოვლჭყაპი აღინიშნოს. მოსალოდნელმა ძლიერმა ნალექებმა საქართველოს მდინარეებზე წყალმოვარდნები, ხოლო მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს,” - აღნიშნულია ინფორმაციაში. ცნობისთვის, მოქალაქეებს 112-სგან გამაფრთხილებელი შეტყობინებები ტელეფონებზე დაეგზავნათ ტექსტით: „9 სექტემბრიდან 10 სექტემბრის დილამდე საქართველოს უმეტეს რაიონში ძლიერი ნალექია მოსალოდნელი. მოსახლეობას მოვუწოდებთ სიფრთხილისკენ.“
წალენჯიხის მერიამ მდინარის სიახლოვეს მცხოვრები მოსახლეობა გააფრთხილა, ამაღამ სახლებს გაერიდონ
წალენჯიხის მერიამ მდინარის სიახლოვეს მცხოვრები მოსახლეობა გააფრთხილა, ამაღამ სახლებს გაერიდონ. „წალენჯიხის მუნიციპალიტეტში, ქალაქ ჯვარში, მდინარე მაგანას მიმდებარედ მცხოვრები მოსახლეობა მდინარის ნაკადის შემცირებას ხეობაში წყლის შესაძლო დაგუბებას უკავშირებს. ადგილზე სიტუაციის გასაცნობად სამეგრელო-ზემო სვანეთის სახელმწიფო რწმუნებული გიორგი გუგუჩია, საგანგებო სიტუაციების მართვის სამსახურის სამეგრელო-ზემო სვანეთის რეგიონულ უფროსთან და წალენჯიხის მერთან ერთად იმყოფებოდა. ამ ეტაპზე მოხდა ხეობის აეროგადაღების კამერით დათვალიერება, თუმცა ხოკოს ხეობის ზედა ნაწილის დათვალიერება დაღამების გამო ვერ მოხერხდა, შესაბამისად ხვალიდან ტერიტორიის შესწავლაში სპეციალისტები ჩაერთვებიან. ადგილზე მიღებული გადაწყვეტილების შესაბამისად, წალენჯიხის მერიამ მდინარე მაგანას მიმდებარედ მცხოვრები მოსახლეობის გაფრთხილება მოახდინა, რათა საშიშროების თავიდან აცილების მიზნით მდინარის სიახლოვეს მცხოვრები მოსახლეობა ამაღამ საცხოვრებელ სახლებს გაერიდოს,“ - წერია განცხადებაში. 9 სექტემბრიდან 10 სექტემბრის დილამდე ძლიერი ნალექები, ელჭექი და სეტყვაა მოსალოდნელი
ვილი სანიოლი: კატასტროფული თამაში იყო, ბოდიში გულშემატკივარს
საქართველოს ნაკრების მთავარმა მწვრთნელმა, ვილი სანიოლმა ესპანეთთან მატჩი პრესკონფერენციაზე შეაჯამა და სტუმართა უპირატესობა აღიარა. „უპირველესად, დარწმუნებული ვარ, იცით, რომ თქვენს კითხვებს ყოველთვის ვპასუხობ, მაგრამ დღეს ისეთი კატასტროფული ანგარიშით წავაგეთ, 300 კითხვაზე პასუხიც არ იქნება საკმარისი. პირველ რიგში ბოდიში ჩვენს შესანიშნავ გულშემატკივარს, რომელიც ცუდი თამაშის მიუხედავად, ბოლომდე მხარს გვიჭერდა, დღეს ქებას მხოლოდ ისინი იმსახურებდნენ. შეიძლება ითქვას, დღეს არაფერი გამოგვივიდა, არც ბურთით, არც უბურთოდ, არც ტექნიკაში, არც კონტრშეტევაზე და თამაში ყველა დონეზე ჩავაგდეთ. უახლოეს პერიოდში დაველაპარაკები მოთამაშეებს, გავარჩევთ, რაც დღეს მოხდა. ვიმეორებ, კატასტროფული თამაში იყო, ეს ეხება როგორც მოთამაშებს, ასევე მე. ჩვენ პატიოსნად უნდა დავილაპარაკოთ ერთმანეთთან და უნდა შევთანხმდეთ, რა დონეზე ვართ ახლა და რა დონეზე უნდა ვიყოთ მომავალ წელს ერთა ლიგის პლეიოფისთის, იმაზეც, ნორვეგიასთან მატჩისთვისი რა მოლოდინები გამაჩნია. ცუდი და კარგი თამაში ფეხბურეთის ნაწილია, მაგრამ ასეთი ჩავარდნა დაუშვებელია, დღეს ჩავთვალე, რომ გასახდელში ლაპარაკს აზრი არ ჰქონდა. ბოდიში რომ დღეს ვერ გიპასუხებთ კითხვებზე, სალაპარაკო კი ბევრია. კიდევ ერთხელ ბოდიში გიხდით. ყველა ერთად ვიმუშავებთ, რომ შემდეგ მატჩში სასურველ შედეგს მივაღწიოთ,“ – განაცხადა საქართველოს ნაკრების მთავარმა მწვრთნელმა. საქართველოს ნაკრებმა ესპანეთთან 1:7 წააგო.
კეტჩუპის ნიმუშში სუდანის ჯგუფის საღებავი გამოვლინდა - სურსათის ეროვნული სააგენტო
სურსათის ეროვნული სააგენტოს სამცხე-ჯავახეთის რეგიონული სამმართველოს წარმომადგენლებმა, სახელმწიფო კონტროლის ფარგლებში, სუდანის ჯგუფის საღებავების გამოვლენის მიზნით, სურსათის ნიმუშები აიღეს. ლაბორატორიული კვლევის შედეგად, კეტჩუპი „PRIMO“-ს ნიმუშში (დამამზადებელი შპს „სანფუდი“, სომხეთი, ქ. ერევანი, შირაკის ქ. N 1/68. ნეტო: 200 გ.; დამზადების თარიღი: 03.06. 2023 წელი; დისტრიბუტორი საქართველოში: ი/მ გაგიკ კობალიან, ს/კ 07001011888, ქ. ახალქალაქი, ნალბანდიანის ქ. 61/10) აკრძალული სუდანის ჯგუფის საღებავი Sudan I გამოვლინდა. სააგენტოს ინსპექტორებმა ი/მ „გაგიკ კობალიანს“ აუკრძალეს აღნიშნული სურსათის რეალიზაცია და დაავალეს უმოკლეს ვადაში დასახელებული სურსათის ბაზრიდან გამოთხოვა, გამოთხოვილი სურსათის რაოდენობის აღრიცხვა და მიღებული ზომების შესახებ სააგენტოს დაუყოვნებლივ ინფორმირება. „ამავდროულად, სააგენტოს სამცხე-ჯავახეთის რეგიონული სამმართველოს უფლებამოსილი პირები ბიზნესოპერატორთან სახელმწიფო კონტროლს ახორციელებენ.სურსათის ეროვნული სააგენტო მოუწოდებს მომხმარებელს, არ შეიძინოს კეტჩუპი „PRIMO“-ს ზემოაღნიშნული პარტია. სუდანის ჯგუფის საღებავები განეკუთვნება ხელოვნურ აზო საღებავების ჯგუფს და წარმოადგენს სურსათის ქიმიურ დამაბინძურებელს, რომლის დამატება სურსათში აკრძალულია,“ - ნათქვამია საგენტოს მიერ გავრცელებულ ინფორმაციაში.
მიწის მასის ჩამოშლის გამო, შატილის მიმართულებით გადაადგილება შეზღუდულია - გზების დეპარტამენტი
შიდასახელმწიფოებრივი მნიშვნელობის ჟინვალი-ბარისახო-შატილის საავტომობილო გზის 90-ე კმ-ზე, ღამით მოსული ნალექის შედეგად, ჩამოიშალა მიწის მასა, რის გამოც აღნიშნულ მონაკვეთზე გაწმენდითი სამუშაოს ჩატარებამდე აკრძალულია ყველა სახის ავტოტრანსპორტის მოძრაობა. ინფორმაციას საავტომობილო გზების დეპარტამენტი ავრცელებს.
მაროკოში 6.8 მაგნიტუდის სიმძლავრის მიწისძრა მოხდა - დაღუპულია 300-მდე ადამიანი
მაროკოს ცენტრალურ ნაწილში 6,8 მაგნიტუდის სიმძლავრის მიწისძვრა მოხდა, რის შედეგადაც სულ მცირე 296 ადამიანი დაიღუპა. BBC-ის ცნობით, ქვეყნის შინაგან საქმეთა სამინისტრომ განაცხადა, რომ საავადმყოფოში გადაიყვანეს 150-ზე მეტი ადამიანი. აშშ-ის გეოლოგიური სამსახურის ცნობით, მიწისძვრა ადგილობრივი დროით 23:11 საათზე მოხდა. 19 წუთის შემდეგ კი, ძლიერი მიწისქვეშა ბიძგები განმეორდა. მათივე თქმით, სტიქიის ეპიცენტრი მარაკეშიდან სამხრეთ-დასავლეთით, ატლასის მთებში, 18,5 კილომეტრის სიღრმეში, დაფიქსირდა. სტიქიამ ყველაზე მეტად დააზიანა ქალაქი მარაკეში, რომელიც იუნესკოს მსოფლიო მემკვიდრეობის ძეგლთა სიაშია.
ბალტიის ზღვაში დაიწყო წვრთნები, რომელიც რუსული თავდასხმის მოგერიებაზეა ორიენტირებული
ბალტიის ზღვაში დღეს, 9 სექტემბერს დაიწყო საზღვაო წვრთნები, რომელშიც მონაწილეობას დაახლოებით, 30 ხომალდი და 3000-ზე მეტი დასავლელი სამხედრო მოსამსახურე მიიღებენ. შესაბამის ინფორმაციას Reuters-ი ავრცელებს. წვრთნების დაგეგმვასა და ჩატარებაზე პასუხისმგებელია გერმანიის საზღვაო ფლოტი, კერძოდ, გერმანიის საზღვაო ძალების შტაბი. „ეს არის პირველი წვრთნა, რომელიც ორიენტირებული იქნება იმაზე, თუ როგორ უპასუხონ რუსეთის თავდასხმას რეგიონში,“ - განაცხადა გერმანიის საზღვაო ძალების მეთაურმა. წვრთნებში მონაწილეობას მიიღებენ საზღვაო ძალები გერმანიიდან, შეერთებული შტატებიდან, პოლონეთიდან, ესტონეთიდან, ლატვიიდან, ლიეტუვიდან, დანიიდან, ფინეთიდან, საფრანგეთიდან, იტალიიდან, ნიდერლანდებიდან, ბელგიიდან, კანადიდან და შვედეთიდან. ბალტიის ზღვის გავლით საზღვაო მარშრუტების დაცვა არის წვრთნების კიდევ ერთი მიმართულება, რომელიც ლატვიისა და ესტონეთის სანაპიროებთან ჩატარდება. „ფინეთი და ბალტიის ქვეყნები თითქმის 100%-ით არიან დამოკიდებულნი ბალტიის ზღვის გავლით საზღვაო მიწოდების მარშრუტებზე,“ - აღნიშნა კრისტიან კააკმა. „თუ სუვალკის დერეფანი დაიბლოკება - და ეს შეიძლება გაკეთდეს მარტივად, რადგან არის მხოლოდ ორი გზა და ერთი სარკინიგზო ხაზი - მაშინ ჩვენ დაგვრჩება მხოლოდ საზღვაო მარშრუტები და სწორედ აქ მოგვიწევს გავლა,“ - განმარტა გერმანიის საზღვაო ძალების მეთაურმა. ამასთან, ადმირალის თქმით, აშშ-ის საზღვაო ძალები წვრთნებისთვის გაგზავნის ამფიბიური თავდასხმის Mesa Verde-ს - 200 მეტრზე მეტი სიგრძის ხომალდს, რომელიც 800 საზღვაო ქვეითის გადაყვანაზეა გათვლილი. 100 კილომეტრის სიგრძის სუვალკის დერეფანს ექსპერტები NATO-სთვის სტრატეგიული დანიშნულების გეოგრაფიულ პუნქტს უწოდებენ. ეს დერეფანი წარმოადგენს ქალაქების სუვალკის, ავგუსტოვისა და სეინის გარშემო არსებულ ტერიტორიას, რომელიც ერთმანეთთან აკავშირებს პოლონეთსა და ლიეტუვასა და, იმავდროულად, ერთმანეთისგან რუსეთის კალინინგრადის ოლქსა და ბელორუსს ჰყოფს.
მაროკოში ძლიერი მიწისძვრის მსხვერპლთა რაოდენობამ 600-ს გადააჭარბა
მაროკოში ძლიერი მიწისძვრის მსხვერპლთა რაოდენობამ 600-ს გადააჭარბა. სტიქიის შედეგად დაშავდა სულ მცირე 330 ადამიანი. მიწისძვრის სიმძლავრე 6.8 მაგნიტუდას შეადგენდა. სტიქიის ეპიცენტრი ქალაქ მარაკეშიდან სამხრეთ-დასავლეთით ატლასის მთებში, 71 კმ-ის სიღრმეში დაფიქსირდა. 20 წუთის შემდეგ კი, ძლიერი განმეორებითი მიწისქვეშა ბიძგები დაფიქსირდა. The Guardian-ის ინფორმაციით, მარაკეშში, რომლის ცენტრი იუნესკოს მსოფლიო მემკვიდრეობის ობიექტთა სიაში არის შეტანილი, რამდენიმე ისტორიული შენობა, მათ შორის, მეჩეთის მინარეთი დაინგრა.
ზელენსკი პუტინთან შესაძლო მოლაპარაკებებზე: ნახეთ რაიმე კომპრომისი საქართველოსთან? მოლდოვასთან?
უკრაინის პრეზიდენტმა, ვოლოდიმირ ზელენსკიმ CNN-თან ინტერვიუში უპასუხა შეკითხვას რუსეთთან შესაძლო კომპრომისზე. კერძოდ, იმაზე, რომ ამის შესახებ უკრაინას რიგი ლიდერები მოუწოდებენ. გადაცემის წამყვანმა მას ბრაზილიის ლიდერის მაგალითი მოუყვანა. „ნახეთ რაიმე კომპრომისი პუტინის მხრიდან სხვა საკითხებში? ჩეჩნეთში? საქართველოში? მოლდოვაში? მან მოახდინა ქვეყნების ოკუპაცია, გაყო ხალხი, გამოიწვია კონფლიქტი,“ - ამბობს ზელენსკი.
თემურ მღებრიშვილი: გურიაში, სტიქიის ზონაში ვერტმფრენის საჭიროება თუ დადგება, მზადყოფნაში ვართ
გურიის რეგიონში, სტიქიის ზონაში შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველები, საგანგებო რეჟიმში მუშაობას განაგრძობენ. შინაგან საქმეთა სამინისტროს საგანგებო სიტუაციების მართვის სამსახურის უფროსმა თემურ მღებრიშვილმა მედიასთან კომენტარი გააკეთა. მისი თქმით სამაშველო ღონისძიებები მთელი ღამის განმავლობაში გრძელდებოდა და ამ ეტაპზეც აქტიურად მიმდინარეობს. „მაშველების მიერ უსაფრთხო ადგილზე გადაყვანილია 62 მოქალაქე, როგორც ნავების დახმარებით, ისე ფეხით და ავტოსატრანსპორტო საშუალებით. ამ წუთებშიც მიმდინარეობს მსგავსი ღონისძიებები. მობილიზებულია, შინაგან საქმეთა სამინისტროს დანაყოფები. მობილიზება გაკეთებულია, როგორც მძიმე ტექნიკის, ასევე მეხანძრე-მაშველების მიმართულებით. ვერტმფრენის საჭიროება თუ დადგება, მზად ყოფნაში ვართ,“ - განაცხადა თემურ მღებრიშვილმა. გურიაში სტიქიის ზონაში 8 სექტემბერს სამი ადამიანის ცხედარი იპოვეს.
ჩინეთი უზბეკეთს 14 პროექტისთვის $190 მილიონ დოლარს გამოუყოფს
ჩინეთი უზბეკეთში პროექტების განსახორციელებლად გრანტებს გასცემს. ამის შესახებ უზბეკეთის ინვესტიციების, მრეწველობისა და ვაჭრობის სამინისტრომ განაცხადა. ხელმოწერილი მემორანდუმის ფარგლებში, ჩინური მხარე 190 მილიონ დოლარზე მეტს გამოყოფს 14 პროექტის განსახორციელებლად ისეთ სფეროებში, როგორიცაა, სოფლის მეურნეობა და წყლის მართვა, ჯანდაცვა, განათლება და ინსტიტუციური განვითარება. „ჩინურმა მხარემ მაღალი შეფასება მისცა უზბეკეთში ბოლო წლებში განხორციელებულ რეფორმებს და გამოთქვა მზადყოფნა, კიდევ უფრო გააძლიეროს ურთიერთქმედება სოციალურად მნიშვნელოვანი პროექტების განხორციელებაში,“ - აცხადებენ სამინისტროში.
იაპონიის საგარეო საქმეთა მინისტრი მოულოდნელი ვიზიტით უკრაინაში ჩავიდა
იაპონიის საგარეო საქმეთა მინისტრი იოშიმასა ჰაიაში უკრაინას ეწვია. ქვეყნის საგარეო უწყების ცნობით, უკრაინაში ვიზიტის დროს საგარეო საქმეთა მინისტრი უკრაინელ კოლეგას, დმიტრო კულებას შეხვდება და კიდევ ერთხელ დაუდასტურებს მას, რომ იაპონია რუსეთის წინააღმდეგ მკაცრი სანქციების დაწესების კუთხით საერთაშორისო თანამეგობრობასთან თანამშრომლობას აგრძელებს. ასევე განიხილება უკრაინის ეკონომიკური აღდგენის ხელშეწყობის ორმხრივი კონფერენციის ორგანიზებისა და ჩატარების საკითხიც. უკრაინაში რუსეთის შეჭრის შემდეგ ეს იაპონელი მინისტრის პირველი ვიზიტია ქვეყანაში. პრემიერი კიშიდა უკრაინაში მიმდინარე წლის მაისში იმყოფებოდა.
მაროკოში ძლიერი მიწისძვრის მსხვერპლთა რაოდენობამ 800-ს გადააჭარბა
მაროკოში ძლიერი მიწისძვრის მსხვერპლთა რაოდენობამ 800-ს გადააჭარბა. სტიქიის შედეგად დაშავდა სულ მცირე 672 ადამიანი. შესაბამის ინფორმაციას Associated Press-ი ავრცელებს. მიწისძვრის სიმძლავრე 6.8 მაგნიტუდას შეადგენდა. სტიქიის ეპიცენტრი ქალაქ მარაკეშიდან სამხრეთ-დასავლეთით ატლასის მთებში, 71 კმ-ის სიღრმეში დაფიქსირდა. 20 წუთის შემდეგ კი, ძლიერი განმეორებითი მიწისქვეშა ბიძგები დაფიქსირდა. The Guardian-ის ინფორმაციით, მარაკეშში, რომლის ცენტრი იუნესკოს მსოფლიო მემკვიდრეობის ობიექტთა სიაში არის შეტანილი, რამდენიმე ისტორიული შენობა, მათ შორის, მეჩეთის მინარეთი დაინგრა.
აეროპორტის თანამშრომლების გაფიცვის გამო, იტალიაში 100-ზე მეტი ფრენა გაუქმდა
აეროპორტის პერსონალის გაფიცვამ პარასკევს, იტალიაში მრავალი ფრენის გაუქმება გამოიწვია. ინფორმაციას სააგენტო Anadolu აეოპორტის ადმინისტრაციაზე დარყრდნობით ავრცელებს. მილანის მალპენსის აეროპორტში 80 ფრენა გაუქმდა, 68 რეისი კი, ფლორენციასა და პიზაში აღარ შესრულდა. ასევე რეისები გაუქმდა კატანიის აეროპორტში. აეროპორტის თანამშრომლებმა ერთდღიანი გაფიცვა მოაწყვეს და ინფლაციის პირობებში ხელფასების გაზრდა მოითხოვეს.
იუსტიციის მინისტრის მოადგილე: გამოძიება დაადგენს, როგორ მოხდა კინოფირების აალება
იუსტიციის მინისტრის მოადგილის, ბუბა ლომუაშვილის განცხადებით, არქივის ეზოში მდებარე ცალკე შენობაში ხანძრის შედეგად, რა გადარჩა და ამჟამად რა სიტუაციაა, ამაზე მოგვიანებით გაკეთდება განცხადება, ამ დროისთვის კი, გამოძიება მიმდინარეობს. ლომუაშვილმა ჟურნალისტებთან განაცხადა, რომ დამონტაჟებული იყო ყველა სახის დაცვითი სისტემა, თუმცა როგორ მოხდა კინოფირების აალება, ამას გამოძიება დაადგენს. „ახლა, ამ შენობაში ხანძარი აღარ არის. რაც შეეხება იმას, თუ რა განადგურდა, ამჟამად გამოძიება მიმდინარეობს, ჩვენ უფლება არ გვაქვს, რომ შევიდეთ. შსს, როდესაც დაამთავრებს ყველა იმ სამართლებრივ პროცედურას, რომელიც უკავშირდება გამოძიებას, მხოლოდ ამის შემდგომ შეგვიძლია, ვნახოთ, რა დაზიანდა. რა გადარჩა, ამჟამად რა სიტუაციაა, ამაზე მოგვიანებით მოგახსენებთ, მაგრამ სასიხარულო ფაქტი ის, არის, რომ ჩვენ ვიცოდით ამ რისკების შესახებ, გვქონდა ყველა სახის დაცვითი სისტემა, თუმცა მოგეხსენებათ, რომ ეს არის აალებადი კინოფირები, თუ როგორ მოხდა ამის აალება, გამოძიება დაადგენს, მაგრამ ის ძვირფასი მასალა, რომელიც აღნიშნულ ტერიტორიაზე იყო განლაგებული, გაციფრულებულია და ჩვენ ამის ასლები გვაქვს. ყველა საჭირო პროცედურა და სისტემა, რომელიც აუცილებელია თვითაალებადი კინოფირების დასაცავად, ამ შენობაში იყო განთავსებული. პირველადი დეტექციაც, ასევე ის სახანძრო სპეციალური სისტემა, რომელიც შიგნით იყო დამონტაჟებული ეს ჩაირთო, ამან იმუშავა და რაც ყველაზე მთავარი იყო, ის ჰიდრანტები, რითაც აღჭურვილია მთლიანად არქივის შენობა გამართულად მუშაობს ამ წუთშიც და მომავალში, რა თქმა უნდა, ჩვენ კიდევ უფრო ვეცდებით, რომ მსგავსი ტიპის შემთხვევები თავიდან იყოს აცილებული. თუმცა, გეტყვით,რომ საჭირო დაცვის სისტემებიც აუცილებელი იყო, ყველაფერი იყო აქ,“ - განაცხადა ბუბა ლომუაშვილმა. ცნობისთვის, საქართველოს ეროვნული არქივის ეზოში გუშინ ის შენობა დაიწვა, რომელშიც ნიტროფუძიანი ძველი კინოფირები ინახებოდა. ეროვნული არქივის მიერ გავრცელებული ინფორმაციით, მასალა, რაც კინოფირებში იყო, გაციფრულებულია. ადგილზე სახანძრო-სამაშველო ბრიგადები რამდენიმე საათის განმავლობაში მუშაობდნენ. „საქართველოს ეროვნული არქივის ტერიტორიაზე არსებულ ცალკე მდგომ შენობაში ხანძარი გაჩნდა. შენობაში ინახებოდა ნიტროფუძიანი კინოფირები. ყველა ფირი გაციფრულებულია და მათი ასლები კინოარქივში ინახება. ცეცხლი ეროვნული არქივის სხვა შენობებზე არ გავრცელებულა. ამ დროისთვის ხანძარი ლოკალიზებულია. ხანძრის შედეგად არავინ დაშავებულა,“ - ნათქვამია ეროვნული არქივის განცხადებაში.
ABC News: აშშ უკრაინას სავარაუდოდ, ATACMS-ის ტიპის ტაქტიკურ სარაკეტო სისტემას გაუგზავნის
ამერიკელი ოფიციალური პირების თქმით, ვაშინგტონი სავარაუდოდ, დახმარების უახლოესი პაკეტის ფარგლებში გაუგზავნის უკრაინას ATACMS-ის ტიპის შორი რადიუსის ტაქტიკურ სარაკეტო სისტემებს, რომელსაც კიევი კრიტიკულად მნიშვნელოვნად მიიჩნევს. უკრაინული მედიის ცნობით, ამის შესახებ წყარომ ABC News-ს განუცხადა. ბაიდენი ადასტურებს, რომ უკრაინაში ATACMS-ის ტიპის ტაქტიკური სარაკეტო სისტემის გაგზავნას კვლავ განიხილავს 2022 წლის ივლისში, ეროვნული უსაფრთხოების საკითებში ჯო ბაიდენის მრჩეველმა, ჯეიკ სალივანმა განაცხადა, რომ ვაშინგტონი არ იყო მზად ATACMS-ის მიწოდებისთვის, იმის შიშით, რომ კონლფიქტი მესამე მსოფლიო ომში არ გადაიზარდოს. კრიტიკოსები ამტკიცებდნენ, რომ მოკავშირეების ასეთმა უხალისო დამოკიდებულებამ შესაძლოა, ხელი შეუშალოს კიევს უკრაინის დანარჩენი ტერიტორიის გათავისუფლებაში. კიევმა შორ მანძილზე მოქმედი იარაღი (Storm Shadow) უკვე მიიღო დიდი ბრიტანეთისგან. მისი მოქმედების რადიუსი 250 კილომეტრზე მეტია. Europetime-თან ინტერვიუში, უკრაინასა და უზბეკეთში აშშ-ის ყოფილი ელჩი, ატლანტიკური საბჭოს ევრაზიის ცენტრის დირექტორი, ჯონ ჰერბსტი ამახვილებდა ყურადღებას უკრაინისთვის საჭირო იარაღის ტიპსა და მის უპირატესობაზე. „სიაში შედის უფრო შორ მანძილზე მოქმედი არტილერია, ATACMS-ის ტიპის ტაქტიკური სარაკეტო სისტემა, თანამედროვე ტანკები და ჯავშანტრანსპორტიორები. საგულისხმოა, რომ ATACMS-ებით უკრაინას ნამდვილად შეეძლო, ყირიმში მდებარე ინსტალაციის განადგურება, რომლებიც უკრაინის წინააღმდეგ, ირანული თვითმფრინავების გასაშვებად გამოიყენებოდა, რაც ასევე მკვეთრად შეამცირებდა მის ინფრასტრუქტურაზე მიყენებულ ზიანს“, - აღნიშნავდა ჯონ ჰერბსტი Europetime-თან. ინფორმაციისთვის, MGM-140 ATACMS - ამერიკული კომპანია Lockheed Martin-ის წარმოების ხმელეთი-ხმელეთი ტიპის ტაქტიკურ-ბალისტიკური რაკეტაა. ATACMS-ის გაშვება შესაძლებელია ზალპური ცეცხლის რეაქტიული სისტემებიდან, როგორიცაა, M270 და M142 HIMARS. ტაქტიკური სარაკეტო სისტემა ATACMS-ის მოქმედების რადიუსი 310 კილომეტრია.
ერდოღანი G-20-ის ლიდერებს მოუწოდებს, „მარცვლეულის შეთანხმებასთან“ დაკავშირებით რუსეთის მოთხოვნები დააკმაყოფილონ - Bloomberg
თურქეთის პრეზიდენტი, რეჯეფ თაიფ ერდოღანი, რომელიც ნიუ-დელიში მიმდინარე G-20-ის სამიტში მონაწილეობს, ჯგუფის ლიდერებს რუსეთის ფედერაციის მოთხოვნების დაკმაყოფილებასა და შავი ზღვის მარცვლეულის ინიციატივისკენ მოუწოდებს. ინფორმაციას Bloomberg-ი სამიტის მონაწილე თურქ მაღალჩინოსნებზე დაყრდნობით ავრცელებს. გამოცემის თანამოსაუბრეების თქმით, ერდოღანი მსოფლიო ლიდერებს სურსათისა და სასუქის რუსული ექსპორტის დაზღვევის შემსუბუქებასა და საერთაშორისო გადახდების განსახორციელებლად SWIFT-ის სისტემაში მოსკოვის ხელახალი ჩართვისკენ მოუწოდებს. აღსანიშნავია, რომ აშშ და მისი მოკავშირეები სანქციების შერბილების შესახებ რუსეთის ფედერაციის მოთხოვნას არ განიხილავენ. უკრაინული მედია წერს, რომ ერდოღანმა „მარცვლეულის შეთანხმების“ აღდგენის თაობაზე პუტინი „ვერ დაარწმუნა“. ცნობისთვის, შავი ზღვის გავლით მარცვლეულის ექსპორტი, უკრაინაში რუსეთის შეჭრის შემდეგ შეჩერდა. უკრაინის პორტებიდან მარცვლეულის უსაფრთხო მიწოდების შესახებ ხელშეკრულება სტამბოლში, გასული წლის 22 ივლისს გაფორმდა. თურქეთის პრეზიდენტის მიერ დაანონსებული შესაძლო „შეთანხმების“ მიუხედავად, კრემლმა მიმდინარე წლის 17 ივლისს გამოაცხადა, რომ „მარცვლეულის გარიგება“ შეჩერებულია. უკრაინამ 10 აგვისტოს გამოაცხადა, რომ შავ ზღვაში სამოქალაქო გემებისთვის „დროებითი დერეფანი“ შექმნა. თურქეთის ეროვნული თავდაცვის მინისტრმა, იასარ გულერმა 13 აგვისტოს განაცხადა, რომ პრეზიდენტი რეჯეფ თაიფ ერდოღანი „მარცვლეულის შეთანხმების“ აღდგენას ცდილობს. გულერი დარწმუნებულია, რომ თურქეთს „მარცვლეულის შეთანხმების“ აღდგენა შეუძლია. ასევე წაიკითხეთ: რა ალტერნატიული მარშრუტები არსებობს უკრაინული მარცვლეულის ექსპორტისთვის დროებითი დერეფნის ამოქმედების შემდეგ, ოდესის პორტი პირველმა გემმა 16 აგვისტოს დატოვა. ვოლოდიმირ ზელენსკიმ 17 აგვისტოს განაცხადა, რომ ოდესის პორტიდან გასულმა პირველმა სამოქალაქო გემმა ახალი ჰუმანიტარული დერეფანი გაიარა. მედია: თურქეთი უკრაინული მარცვლეულით დატვირთულ გემებს სრუტეების შეუფერხებლად გავლის გარანტიას მისცემს დროებითი დერეფანი გამოიყენება იმ გემებისთვის, რომლებიც უკრაინაში რუსეთის ფართომასშტაბიანი შეჭრის მომენტისთვის უკრაინულ პორტებში „ჩერნომორსკი“, „ოდესა“ და „იუჟნი“ იმყოფებოდნენ. დროებითი მარშრუტები, საერთაშორისო საზღვაო ორგანიზაციასთან (IMO) შეთანხმებით ამოქმედდა. კონტეინერმზიდი „იოზეფ შულტე“ სტამბოლის პორტში შევიდა. ამას ადასტურებს MarineTraffic-ის იმ სამსახურის მონაცემებიდან, რომელიც გემების მოძრაობას აკონტროლებს. ხომალდის ბორტზე 30 ათას ტონაზე მეტი ტვირთია, სურსათის ჩათვლით. ჰონგ-კონგის დროშით მცურავი „იოზეფ შულტე“ ოდესის პორტში წელიწად-ნახევრის განმავლობაში - 2022 წლის 23 თებერვლიდან იდგა. 2 სექტემბერს ზელენსკიმ განაცხადა, რომ მარცვლეულის დროებითი დერეფანი კიდევ ორმა გემმა წარმატებით გაიარა.
ნიკოლ ფაშინიანი ევროპელ ლიდერებთან სატელეფონო საუბრებს მართავს
სომხეთის პრემიერ-მინისტრ, ნიკოლ ფაშინიანსა და საფრანგეთის პრეზიდენტ, ემანუელ მაკრონს შორის სატელეფონო საუბარი გაიმართა. სომხეთის რესპუბლიკის მთავრობის პრესსამსახურის ინფორმაციით, „საუბრის დროს ლაჩინის დერეფნის დაბლოკვის შედეგად მთიან ყარაბაღში შექმნილი ჰუმანიტარული კრიზისის, მთიანი ყარაბაღის ირგვლივ აზერბაიჯანული ჯარების კონცენტრირებასა და სომხეთ-აზერბაიჯანის სახელმწიფო საზღვარზე დაძაბულობის ზრდის ტენდენციების საკითხებზე იმსჯელეს.“ ამავე წყაროს ცნობით, ფაშინიანმა პრაღასა და ბრიუსელში მიღწეული შეთანხმებებისადმი და ყველა საკითხის მოგვარებისთვის მხოლოდ დიპლომატიური საშუალებებით და კონსტრუქციულ ატმოსფეროში მიდგომებისადმი ერთგულება დაადასტურა. „მზად ვარ, აზერბაიჯანის პრეზიდენტთან სასწრაფო მოლაპარაკებები გავმართო, რომელიც საზღვრის გასწვრივ დაძაბულობის შემცირებაზე იქნება მიმართული,“ - განაცხადა სომხეთის პრემიერმა. თავის მხრივ, ემანუელ მაკრონმა რეგიონში მშვიდობისა და სტაბილურობის დამყარებისთვის მიმართული ძალისხმევის მხარდაჭერისთვის მზადყოფნა დაადასტურა. ფაშინიანმა სატელეფონო საუბარი გერმანიის კანცლერ, ოლაფ შოლცთანაც გამართა. საუბრის დროს გერმანიის კანცლერსაც დაუდასტურა, რომ მზად არის. აზერბაიჯანის პრეზიდენტ, ილჰამ ალიევთან სასწრაფო მოლაპარაკებები გამართოს.
