ძებნის რეზულტატი:
რა განცხადებები გააკეთეს ბორელმა და ღარიბაშვილმა რუსეთთან ფრენების აღდგენისა და სანქციების გვერდის ავლის საკითხებზე
ევროკავშირის უმაღლეს წარმომადგენელმა, ევროკომისიის ვიცე-პრეზიდენტმა, ჯოზეფ ბორელმა საქართველოს პრემიერ-მინისტრთან, ირაკლი ღარიბაშვილთან ერთად გამართულ პრესკონფერენციაზე განაცხადა, რომ მიესალმება იმ მჭიდრო თანამშრომლობას, რომელიც სანქციების გვერდის ავლის წინააღმდეგ არის მიმართული ქვეყანაში. ამავდროულად, აღნიშნა, წუხს, რომ საქართველოსა და რუსეთს შორის ფრენები აღდგა. „ჩვენ მხარს ვუჭერთ უკრაინას და გავაგრძელებთ ამ პროცესს, ვიდრე საჭიროა. მკაფიოდ დავგმობთ მოძალადეს. საქართველოს ხელს შევუწყობთ ამ პროცესში, ქვეყნის მხარდაჭერაში. მნიშვნელოვანია, რომ ჩვენი ყველაზე მჭიდრო პარტნიორები კოორდინირებულად მუშაობდნენ საერთაშორისო დონეზე, რათა იზოლირებული იქნეს რუსეთი. ძალიან მივესალმებით იმ მჭიდრო თანამშრომლობას, რომელიც სანქციების გვერდის ავლის წინააღმდეგ არის მიმართული ქვეყანაში. მნიშვნელოვანია, მკაფიოდ ითქვას და იყოს აღიარებული ეს ფაქტი. ასევე უნდა ვთქვა, რომ ჩვენ ძალიან ვწუხვართ, რომ ფრენები აღდგა საქართველოსა და რუსეთს შორის. ეს არის ის გზავნილი, რომელიც უკავშირდება საქართველოს საგარეო პოლიტიკას. საქართველომ ასოცირების შეთანხმების ფარგლებში მიიღო გარკვეული ვალდებულება და უნდა ევროკავშირში წევრობა. ამ ეტაპზე ნამდვილად ბევრი მიმართულება არის გასაუმჯობესებელი. ჩვენ გვჭირდება რუსეთის ჰიბრიდული საქმიანობის აღკვეთა, საომარი პროპაგანდა და სხვა ინიციატივები. ზუსტად ამისთვის ევროკავშირში აქცენტი კეთდება დამოუკიდებელი სამოქალაქო საზოგადოების გაძლიერებაზე საქართველოში, მედეგობის გამყარებაზე, დეზინფორმაციასთან ბრძოლაზე და ყველაზე მნიშვნელოვანი არის ის, რომ ცოცხალი დემოკრატიული სისტემა არსებობდეს ქვეყანაში, იყოს თავისუფალი ინფორმაცია. ინფორმაციის მიწოდება არის მნიშვნელოვანი ამ პროცესში,“ – განაცხადა ბორელმა. „სანქციებთან დაკავშირებით მინდა გითხრათ, რომ თვეების განმავლობაში მიმდინარეობდა ორკესტრირებული დეზინფორმაციული კამპანია. აი, ამ პოლიტიკური ძალის, რომელსაც ეს ტელევიზია წარმოადგენს. მათი ლობისტების, მათი ინტერესჯგუფების მიერ დაფინანსებული კამპანიები მთელ მსოფლიოში, რომ თითქოს საქართველო სანქციებს არღვევს. რეალობა აღმოჩნდა შემდეგი, რომ როცა თქვენი წარმომადგენელი ჩამოვიდა საქართველოში, ასევე ამერიკის სანქციების მთავარი წარმომადგენელი და ასევე, ბრიტანეთის წარმომადგენელი, მათ ხმამაღლა და ღიად თქვეს, რომ საქართველო სრულად ასრულებს ამ ვალდებულებებს და სანქციების დარღვევის არც ერთი მაგალითი არ დაფიქსირებულა. აი, ეს არის მაგალითი სიცრუესა და სიმართლეს შორის. სიცრუეს, რა თქმა უნდა, აქვს თავისი მიზანი, ეს მიზანია ქვეყნის დისკრედიტაცია, მათი მიზანი არის ის, რომ ქვეყანამ არ მიიღოს სტატუსი, მაგრამ ჩვენ ვაკეთებთ ყველაფერს, რომ ქვეყანა კიდევ ერთხელ დავაახლოოთ ევროკავშირს“, - აღნიშნა თვის მხრივ, პრემიერ-მინისტრმა. საქართველოს პრემიერ-მინისტრი რუსეთთან ფენების აღდგენას გამოეხმაურა და განაცხადა, რომ „საქართველოში არც ერთი სანქცირებული ავიაკომპანია და არც ერთი სანქცირებული თვითმფრინავი არ დაფრინავს“. მისივე შეფასებით, საქართველოს ხელისუფლება ამ შემთხვევაშიც „აბსოლუტურად სუფთად და გამჭვირვალედ მუშაობს“. „რაც შეეხება რუსეთთან ფრენების აღდგენას, ჩვენ ამის თაობაზე მკაფიოდ განვმარტეთ, რომ საქართველოში არც ერთი სანქცირებული ავიაკომპანია და არც ერთი სანქცირებული თვითმფრინავი არ იფრენს და არ დაფრინავს. ასე რომ, აქაც ჩვენ ვიცავთ ჩვენ დისციპლინას და აბსოლუტურად სუფთად და გამჭვირვალედ ვმუშაობთ. ჩვენი ქვეყნის ეკონომიკა ბოლო სამი წელი იზრდება ძალიან სწრაფად, ჩვენ ვართ დღეს მსოფლიოში ერთ-ერთი ყველაზე სწრაფად მზარდი ეკონომიკა მსოფლიოში, ბოლო ორი წელი გვქონდა 10%-იანი ეკონომიკური ზრდა, ახლა ჩვენ გვაქვს 7%-ზე მეტი ეკონომიკური ზრდა. ინფლაცია არის დარეგულირებული - 0,9-ზე არის ინფლაცია.უმუშევრობა, სიღარიბე არის ისტორიულ მინიმუმზე. ქვეყნის რეზერვები არის ისტორიულ მაქსიმუმზე. ქვეყანა ძლიერდება, ვითარდება, მდიდრდება. ეს არის ჩვენი პირდაპირი ვალდებულება და მოვალეობა, ჩემი როგორც მთავრობის მეთაურის, რომ ქვეყანა დავიცვათ და გავაძლიეროთ“, - განაცხადა ღარიბაშვილმა. ირაკლი ღარიბაშვილმა ჯოზეფ ბორელთან გამართული შეხვედრის შემდეგ ასევე განაცხადა: „ჩვენ არაღიარების პოლიტიკა განსაზღვრული გვაქვს, როგორც ჩვენი საგარეო პოლიტიკის ერთ-ერთი მთავარი პრიორიტეტი. შესაბამისად, იმ რეზოლუციებს და განცხადებებს, რომელსაც ჩვენ არ ვუერთდებით, ამას სწორედ ჩვენი ეროვნული ინტერესებიდან გამომდინარე ვაკეთებთ. იმიტომ, რომ ვითვალისწინებთ ჩვენი ქვეყნის ოკუპირებული ტერიტორიების არაღიარების პოლიტიკას, საფრთხეებს და რისკებს ვზომავთ. დამერწმუნეთ, მხოლოდ ეს მოტივაცია გვაქვს.“
ღარიბაშვილი ბორელს: უსამართლობას არ ვეგუებით, მნიშვნელოვანია, ის გადაწყვეტილება, რომელსაც მიიღებთ, სამართლიანი იყოს - ნებისმიერი საწინააღმდეგო გადაწყვეტილება რუსეთისთვის პოზიტიური გზავნილი იქნება
ქართველებს ყველაზე მეტად რაც არ გვიყვარს, ეს არის უსამართლობა. ჩვენ უსამართლობას არ ვეგუებით. რა თქმა უნდა, ჩვენთვის ძალიან მნიშვნელოვანია, რომ ის გადაწყვეტილება, რომელსაც თქვენ მიიღებთ, სამართლიანი იყოს- ნებისმიერი საწინააღმდეგო გადაწყვეტილება რუსეთისთვის პოზიტიური გზავნილი იქნება, - ასე მიმართა საქართველოს პრემიერ-მინისტრმა, ირაკლი ღარიბაშვილმა საგარეო საქმეთა და უსაფრთხოების პოლიტიკის საკითხებში ევროკავშირის უმაღლეს წარმომადგენელს ევროკომისიის ვიცე-პრეზიდენტ, ჯოზეფ ბორელს შეხვედრის შემდეგ გამართულ პრესკონფერენციაზე. პრემიერმა აღნიშნა, რომ გასულ წელს უკრაინამ და მოლდოვამ ბონუსად, ავანსად მიიღეს სტატუსი ისე, რომ მათ არცერთი რეკომენდაცია არ ჰქონდათ შესრულებული, „ჩვენ კი სამართლიან მოპყრობას ვითხოვთ“. „ჩვენ გაცილებით სერიოზულ და რთულ მოცემულობაში მოვყევით. ჩვენი მთავარი არგუმენტი არის შემდეგი, ჩვენ სამართლიან მოპყრობას ვითხოვთ. გასულ წელს უკრაინამ და მოლდოვამ ბონუსად, ავანსად მიიღეს სტატუსი ისე, რომ მათ არ ჰქონდათ შესრულებული არცერთი რეკომენდაცია, ჩვენ არ მივიღეთ. ქართველებს ყველაზე მეტად რაც არ გვიყვარს, ეს არის უსამართლობა. ჩვენ უსამართლობას არ ვეგუებით. რა თქმა უნდა, ჩვენთვის ძალიან მნიშვნელოვანია, რომ ის გადაწყვეტილება, რომელსაც თქვენ მიიღებთ სამართლიანი იყოს. ბორელი თბილისში სამი ძირითადი გზავნილით ჩამოვიდა რაც შეეხება იმას, თუ რა გზავნილი იქნება, როდესაც არავინ იცის, როდის დასრულდება უკრაინაში ომი, როგორი წესრიგი ჩამოყალიბდება მსოფლიოში, ასეთ რთულ ვითარებაში, რთულ გეოპოლიტიკურ ვითარებაში, არაპროგნოზირებად გარემოში ნებისმიერი საწინააღმდეგო გადაწყვეტილება, ნებისმიერი ნეგატიური გზავნილი, პოზიტიური გზავნილი იქნება რუსეთისთვის. ამიტომ, ჩვენ კარგად გვესმის, რომ ეს პროცესი რთულია, ეს არის დამსახურებაზე დაფუძნებული დამოკიდებულება, მაგრამ ამავდროულად კარგად გვესმის, რომ ეს არის პოლიტიკური გადაწყვეტილება, ეს არ არის მხოლოდ დამსახურებაზე დაფუძნებული გადაწყვეტილება. კიდევ ვიმეორებ, მოლდოვის და უკრაინის შემთხვევაში თქვენ მხოლოდ პოლიტიკური გადაწყვეტილებით იხელმძღვანელეთ. მინდა იმედი გამოვთქვა, რომ თუ ჩვენ ნამდვილად გვსურს პოლარიზაციის დასრულება ქვეყანაში, როგორც თქვენ ბრძანეთ, თუ თქვენ ნამდვილად გსურთ, რომ საქართველო ევროპული ოჯახის წევრი გახდეს, კიდევ უფრო დაახლოვდეს, მაშინ ჩვენი პოზიციაა შემდეგი, საქართველომ უნდა მიიღოს კანდიდატის სტატუსი წლის ბოლოს,“- აღნიშნა პრემიერმა. ბორელის ვიზიტის პრიორიტეტული მიმართულება: ევროკავშირის საგარეო პოლიტიკასთან საქართველოს თავსებადობის მაჩვენებელი უნდა გაუმჯობესდეს
ჯოზეფ ბორელი: 12 პრიორიტეტიდან 9 შესასრულებელია - ევროპის გზაზე შემდგომი ნაბიჯები დამსახურებაზე იქნება დამოკიდებული
საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჯოზეფ ბორელმა საქართველოს პრემიერ-მინისტრთან, ირაკლი ღარიბაშვილთან გამართული შეხვედრის შემდეგ პრესკონფერენციაზე განაცხადა, რომ 12 პრიორიტეტიდან 9 შესასრულებელია. ბორელი თბილისში სამი ძირითადი გზავნილით ჩამოვიდა „ამ ეტაპზე ყველა ძალისხმევა უნდა იყოს აქცენტირებული იმაზე, რომ პოლიტიკური დაძაბულობა შემცირდეს, ეს პოლიტიკური და ისტორიული შანსი არ იქნეს დაკარგული და ამისთვის ერთად უნდა იმუშაოთ, რადგან შემდგომი ნაბიჯები ევროპის გზაზე დამოკიდებული იქნება დამსახურებაზე და მიღწეულ შედეგზე და შედეგი მიღწეული იქნება გაერთიანებული ძალისხმევის საფუძველზე, ყველა ძალის გაერთიანების შედეგად. ამოცანები არის კარგად და მკაფიოდ გაწერილი 12 პრიორიტეტის სახით და ჩვენ უკვე განვაცხადეთ, ეს ჩვენს დასკვნაში, რომ ივნისის შემდეგ თქვენ შეასრულეთ 3 მათგანი და დანარჩენი 9 შესასრულებელია. თუმცა დრო მაინც გვაქვს მათ შესასრულებლად. უპირველესად უნდა მოხდეს დეპოლარიზაციას, დეოლიგარქიზაციას, პოლიტიკური, ეკონომიკური და სოციალური სფეროების, ასევე სასამართლო სისტემის რეფორმა, საარჩევნო სისტემის რეფორმა, მედიის პლურალიზმი და ადამიანის უფლებები. მოკლე გზა ამის შესასრულებლად არ არსებობს, ყველაფერს სჭირდება ძალიან დიდი გულდასმით მუშაობა, პოლიტიკური ნება და მკაფიო ერთგულება ევროკავშირის ღირებულებებისადმი. ჩემი გამოცდილებით მინდა გითხრათ, რომ ეს მუშაობა ნამდვილად ღირს შედეგად არა მარტო იმისთვის, რომ ევროკავშირის წევრი გახდეთ, არამედ, ყოველდღიურობა რომ გაუუმჯობესოთ თქვენს მოქალაქეებს. ევროკავშირის წევრობა არის ყველაზე დიდი ტრანსფორმაციული ძალა და უსაფრთხოების ვალდებულება, რაც შეიძლება ქვეყანამ აიღოს, მე ჩემი ქვეყნის მაგალითზე ვამბობ ამ ყველაფერს,“ - განაცხადა ბორელმა. ბორელის ვიზიტის პრიორიტეტული მიმართულება: ევროკავშირის საგარეო პოლიტიკასთან საქართველოს თავსებადობის მაჩვენებელი უნდა გაუმჯობესდეს
ევროპასა და აფრიკაში აშშ-ის სარდლობა სომხეთში დაგეგმილ წვრთნებზე დეტალებს ავრცელებს
ევროპასა და აფრიკაში აშშ-ის სარდლობის ცნობით, სომხეთში დაგეგმილ სამხედრო წვრთნებში 85 ამერიკელი ჯარისკაცი მიიღებს მონაწილეობას. აშშ-ის პირველი ბრიგადის, 101-ე საჰაერო-სადესანტო დივიზიისა და კანზასის ეროვნული გვარდიის მეომრები, ასევე სომხური მე-12 სამშვიდობო ბრიგადის ჯარისკაცები წვრთნას ჩაატარებენ ზარისა და არმავირის საწვრთნელ ზონებში, ერევნის მახლობლად. სომეხი და ამერიკელი ჯარისკაცები ერთობლივ წვრთნებს 11-დან 20 სექტემბრამდე ჩაატარებენ. „პარტნიორი არწივი“ არის სასიცოცხლო შესაძლებლობა ჩვენი ორი ერის ჯარისკაცებისთვის, რათა დაამყარონ ახალი ურთიერთობები ტაქტიკურ დონეზე და გაზარდონ თავსებადობა სამშვიდობო ოპერაციებისთვის. ის ასევე ეფუძნება 20-წლიან ურთიერთობას, რომელიც კანზასის ეროვნულმა გვარდიამ განავითარა სომხეთთან,“ – წერია ევროპასა და აფრიკაში აშშ-ის სარდლობის განცხადებაში.
ოკუპირებულ მარიუპოლში „ტურის“ მონაწილე ჩინელ ბლოგერებსა და შემსრულებელს უკრაინა ქვეყანაში შესვლას აუკრძალავს
ჩინელი ბლოგერების ჯგუფი დროებით ოკუპირებულ მარიუპოლში ჩავიდა, რასაც უკრაინა უკანონოს უწოდებს. უკრაინის საგარეო საქმეთა სამინისტრო იწყებს უკრაინაში შესვლის აკრძალვას „ტურის“ მონაწილე ყველა ჩინელი ბლოგერისთვის. „ჩვენს ხელთ არსებული ინფორმაციით, ჩინელი ბლოგერების ჯგუფი ჩავიდა დროებით ოკუპირებულ ქალაქში [მარიუპოლში – რედ.]. მათი ჩამოსვლა უკანონოა. ეს უხეშად არღვევს უკრაინის კანონმდებლობას, რომელიც არეგულირებს სახელმწიფო საზღვრის კვეთას უცხოელების მიერ,“ - წერს უწყების სპიკერი, ოლეგ ნიკოლენკო სოციალურ ქსელში. ნიკოლენკომ ხაზგასმით აღნიშნა, რომ უკრაინა პატივს სცემს ჩინეთის ტერიტორიულ მთლიანობას და მოელის, რომ ჩინური მხარე განმარტავს ჩინეთის მოქალაქეების მარიუპოლში ყოფნის მიზანზე, ასევე იმაზე, თუ როგორ შევიდნენ ისინი დროებით ოკუპირებულ უკრაინულ ქალაქში. ნიკოლენკომ ასევე გააზიარა ჩინელი „ოპერის მომღერლის“ ვან ფანის ვიდეო, რომელიც სიმღერას (Katyusha) ასრულებს მარიუპოლის დრამატული თეატრის ნანგრევებზე, სადაც რუსეთის არმიამ 600-ზე მეტი უდანაშაულო ადამიანი მოკლა (კატიუშა არის პოპულარული საბჭოთა სიმღერა და მეორე მსოფლიო ომის ერთ-ერთი არაოფიციალური სიმბოლო რუსებისთვის – რედ.). ჩინელი მომღერალი ქალის ვიდეო თვითგამოცხადებული „დონეცკის სახალხო რესპუბლიკის“ ე.წ. მმართველმა, დენის პუშლინმა გამოაქვეყნა. მას ქალს "ოპერის მომღერალი ვან-ფანი" უწოდა. შეგახსენებთ, მარიუპოლის თეატრი 2022 წლის მარტში განადგურდა, უკრაინაში რუსეთის სრულმასშტაბიანი შეჭრის დაწყებიდან მალევე. შენობას თავს ასობით მშვიდობიანი მოქალაქე აფარებდა. Associated Press-ის გათვლებით, ადგილზე 600-მდე ადამიანი შეიძლებოდა, დაღუპულიყო. Amnesty International-ი მიიჩნევს, რომ რუსმა სამხედროებმა განზრახ ჩამოაგდეს ორი საავიაციო ბომბი თეატრზე, რომლის მახლობლად დიდი ასოებით ეწერა - „ბავშვები“. ეუთო და უფლებადამცველი ორგანიზაცია Amnesty International-ი აფეთქებაში რუსეთის არმიას ადანაშაულებენ.
ბორელი ზურაბიშვილთან შეხვედრის შემდეგ: ჩვენ მხარს ვუჭერთ ძლიერ ინსტიტუტებს, რომლებიც ევროკავშირში მომავლისთვის ერთად მუშაობენ
საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი, ჯოზეფ ბორელი პრეზიდენტ ზურაბიშვილთან შეხვედრის შემდეგ აცხადებს, რომ ევროკავშირი მხარს უჭერს ძლიერ ინსტიტუტებს, რომლებიც ერთად მუშაობენ. „კარგი შეხვედრა მქონდა საქართველოს პრეზიდენტთან, ვისაუბრეთ საქართველოს გზაზე ევროკავშირისკენ და რეგიონული უსაფრთხოების ვითარებაზე. საქართველო ჩვენი ძლიერი პარტნიორია. ჩვენ მხარს ვუჭერთ ძლიერ ინსტიტუტებს, რომლებიც ევროკავშირში მომავლისთვის პროგრესზე ერთად მუშაობენ,“ - წერს ბორელი. ბორელმა თბილისში შეხვედრები ევროკავშირის საგარეო პოლიტიკასთან საქართველოს შესაბამისობის გაზრდის მნიშვნელობაზე საუბრით დაიწყო
პუტინმა მოკლა პრიგოჟინი, ყოველ შემთხვევაში ჩვენ გვაქვს ასეთი ინფორმაცია - ზელენსკი
უკრაინის პრეზიდენტი, ვოლოდიმირ ზელენსკი აცხადებს, რომ ამბობს, კერძო სამხედრო კომპანია „ვაგნერის" დამფუძნებელი, ევგენი პრიგოჟინი რუსეთის პრეზიდენტმა პუტინმა მოკლა. „მან მოკლა პრიგოჟინი - ყოველ შემთხვევაში, ჩვენ გვაქვს ასეთი ინფორმაცია," - განაცხადა ზელენსკიმ BBC-ის ცნობით. მისი თქმით, უკრაინისთვის ეს უბრალოდ „ერთი ნაკლები ტერორისტია.“ ზელენსკის შეფასებით, რუსების მორალური მხარე დაცემულია, რადგან ისინი იმალებოდნენ „ვაგნერელების" უკან. „ვფიქრობ, რომ ეს თავდაცვა, რომელიც იმალება დაქირავებული მებრძოლების, ვაგნერელების სიცოცხლის მიღმა, - დაკარგეს. ეს ჩვენთვის ნამდვილად პლუსია," - განაცხადა ზელენსკიმ.
გარემოს ეროვნული სააგენტო: მოსალოდნელია ჰაერის ტემპერატურის მნიშვნელოვანი დაცემა, მაღალმთიან რეგიონებში შესაძლებელია თოვლჭყაპი
გარემოს ეროვნული სააგენტოს ცნობით, 8 სექტემბერს დღის მეორე ნახევრიდან საქართველოს ტერიტორიის უმეტეს, ხოლო 9 სექტემბრიდან 10 სექტემბრის დილამდე დასავლეთ საქართველოს უმეტეს და აღმოსავლეთ საქართველოს ზოგიერთ რეგიონში კვლავ ძლიერი ნალექები, ელჭექი და სეტყვაა მოსალოდნელი. უწყების თანახმად, მოსალოდნელმა ძლიერმა ნალექებმა საქართველოს მდინარეებზე წყალმოვარდნები, ხოლო მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს. „8 სექტემბერს დღის მეორე ნახევრიდან საქართველოს ტერიტორიის უმეტეს, ხოლო 9 სექტემბრიდან 10 სექტემბრის დილამდე დასავლეთ საქართველოს უმეტეს და აღმოსავლეთ საქართველოს ზოგიერთ რეგიონში კვლავ ძლიერი ნალექები, ელჭექი და სეტყვაა მოსალოდნელი. იქროლებს დასავლეთის მიმართულების ძლიერი ქარი. ზღვაზე შესაძლებელია 3-4 ბალიანი შტორმული ღელვა. 9 სექტემბრიდან მოსალოდნელია ჰაერის ტემპერატურის მნიშვნელოვანი დაცემა და მაღალმთიან რეგიონებში შესაძლებელია, თოვლჭყაპი აღინიშნოს. მოსალოდნელმა ძლიერმა ნალექებმა საქართველოს მდინარეებზე წყალმოვარდნები, ხოლო მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს”,- აღნიშნულია ინფორმაციაში.
რუმინეთი უკრაინის მოსაზღვრე ქალაქებში რუსული თავდასხმების რისკების გამო, თავშესაფრებს ააშენებს
რუმინეთის საგანგებო სიტუაციების ეროვნული კომიტეტის გადაწყვეტილებით, უკრაინის მოსაზღვრე ქალაქებში რუსული საჰაერო თავდასხმების მაღალი რისკების გამო, თავშესაფრები აშენდება. კომიტეტის გადაწყვეტილების შესაბამისად, რუმინეთის თავდაცვის სამინისტროს ეძლევა უფლება, თავშესაფრებისთვის შესაბამისი ადგილები დუნაის რუმინული მხარის სანაპიროზე შეარჩიოს. დუნაის უკრაინულ მხარეს მდებარე პორტები რენი და იზმაილი რუსული საჰაერო ძალების მხრიდან აქტიურად იბომბება, რის გამოც, რუმინეთი დაცვის ზომების მიღებას აპირებს. ეს ზომები მოიცავს გაფრთხილების საშუალებების დამონტაჟებას, რომელიც საბრძოლო მასალის ნაწილის ჩამოვარდნის შემთხვევაში იმოქმედებს.
არძინბა: უნდა ვიყოთ კონკურენტუნარიანები, წინააღმდეგ შემთხვეაში გეოპოლიტიკის მიღმა აღმოვჩნდებით
რუსეთის მიერ ოკუპირებული აფხაზეთის დე ფაქტო საგარეო საქმეთა მინისტრმა საქართველოსა და რუსეთს შორის ეკონომიკური ურთიერთობებაზე გააკეთა კომენტარი. „დღეს, მათ შორის სავაჭრო ბრუნვა 2,5 მილიარდი დოლარია. რამდენი იქნება ხვალ, საჰაერო მიმოსვლის ამოქმედებისა და უვიზო რეჟიმის გათვალისწინებით? ეს ყველაფერი მნიშვნელოვან გავლენას მოახდენს ჩვენზე და ჩვენს საგარეო პოლიტიკაზე. ჩვენ უნდა ვიყოთ კონკურენტუნარიანი, წინააღმდეგ შემთხვევაში აღმოვჩნდებით გეოპოლიტიკის განაპირას“, - განაცხადა არძინბამ გულრიფშის რაიონის აქტივისტებთან შეხვედრაზე. არძინბას თქმით, რუსეთში არსებული ქართული დიასპორა აქტიურად მუშაობს რუსეთში საქართველოს ჰუმანიტარული, ეკონომიკური და პოლიტიკური ინტერესების გასაძლიერებლად. „ჩვენ ამ კონკურენციაში არ უნდა დავმარცხდეთ, ამისთვის ეფექტურად, ჰარმონიულად და დინამურად მუშაობაა საჭირო. ჩვენ დაბალი კონკურენტუნარიანობის უფლება არ გვაქვს. მორიგ ჯერზე ვიმყოფებით ისტორიულ გზაჯვარედინზე. დღეს წყდება, ჩვენი სახელმწიფოს ხვალინდელი დღე,“ - განაცხადა არძინბამ. ბიჭვინთის აგარაკის რუსეთისთვის გადაცემაზე საუბრისას აღნიშნა, რომ „საკითხის განხილვასთან თანმდევმა საინფორმაციო გაშუქებამ“ ზიანი მიაყენა აფხაზურ-რუსულ დიალოგს. რუსეთი კი, მისი თქმით, „აფხაზეთის საგარეო პოლიტიკის ბირთვია“. „თუ რუსეთთან ურთიერთობა დავკარგეთ, დავკარგავთ ჩვენს მთავარ მოკავშირეს და მსოფლიო ძალას.“ არძინბას თქმით, აფხაზეთმა ეკონომიკური ზრდის ახალ წყაროებზე უნდა იფიქროს. არძინბამ დე ფაქტო პრეზიდენტს ასლან ბჟანიას ამ საკითხისადმი მხარდაჭერისკენ მოუწოდა. 2023 წლის იანვარ-აპრილში სავაჭრო ბრუნვამ 848 მლნ აშშ დოლარს მიაღწია, რაც გასულ წელთან შედარებით 51%-ით მეტია. რუსეთი საქართველოს რიგით მეორე სავაჭრო პარტნიორია. 2023 წლის 10 მაისს რუსეთის პრეზიდენტმა პუტინმა ხელი მოაწერა ბრძანებულებებს საქართველოსთან 2019 წლის ზაფხულიდან გაუქმებული პირდაპირი ავიამიმოსვლის აღდგენის და 2000 წლიდან მოქმედი სავიზო რეჟიმის გაუქმების შესახებ. დოკუმენტს ბიჭვინთის ყოფილი სახელმწიფო აგარაკის კომპლექსის რუსეთის საკუთრებაში გადაცემის შესახებ 2022 წლის 19 იანვარს მოსკოვში მოეწერა ხელი. აფხაზეთი რუსეთის მიერ არის ოკუპირებული. 2008 წლის აგვისტოს ომის შემდეგ, მოსკოვმა საქართველოს რეგიონების ე.წ. დამოუკიდებლობა გამოაცხადა. საერთაშორისო საზოგადოება მტკიცედ უჭერს მხარს საქართველოს ტერიტორიულ მთლიანობას და მოუწოდებს რუსეთს, გაიყვანოს ჯარები ქვეყნის ტერიტორიიდან.
უკრაინამ დონეცკის ოლქში კლიშჩიივკის უმეტეს ნაწილზე კონტროლი დაამყარა - უკრაინული მედია
უკრაინულმა ძალებმა კონტროლი დაამყარეს სოფელ კლიშჩიივკას ნახევარზე მეტზე, რომელიც ბახმუტის სამხრეთით მდებარეობს. უკრაინული მედიის ცნობით, ამის შესახებ მე-3 თავდასხმის ბრიგადის მეთაურის მოადგილემ, მაქსიმ ჟორინმა განაცხადა. „ჩვენ შევქმენით ისეთი პირობები ამ მიმართულებით, რომ რუსული ძალები ვერ ახერხებენ თავიანთი ტექნიკის სათანადოდ გამოყენებას,“ - ამბობს სამხედრო. ოფიცრის თქმით, უკრაინულმა ძალებმა ამ სექტორში თითქმის ყველა რუსული ტექნიკა გაანადგურეს, მათ შორის ტანკები და ქვეითთა საბრძოლო მანქანები. თუმცა ჟორინმა ხაზგასმით აღნიშნა, რომ საჰაერო თავდასხმები რჩება სერიოზულ პრობლემად უკრაინის ჯარებისთვის, მათ შორის თვითმფრინავები და მართვადი საჰაერო ბომბები. ელექტრონული ომის სისტემები ასევე ქმნის გამოწვევებს უკრაინის დამცველებისთვის. ბახმუტის მიმდებარე ტერიტორია უკრაინის კონტრშეტევის ერთ-ერთი მთავარი მიმართულებაა. თავდაცვის მინისტრის მოადგილემ, ჰანა მალიარმა 4 სექტემბერს განაცხადა, რომ უკრაინას კლიშჩიივკის მახლობლად წინსვლა აქვს. ISW: უკრაინელებმა ზაპოროჟიეს ოლქსა და ბახმუტის მახლობლად, ტაქტიკურ წინსვლას მიაღწიეს
ჯოზეფ ბორელი საოკუპაციო ხაზთან იმყოფებოდა
საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი, ჯოზეფ ბორელი საოკუპაციო ხაზთან, ხურვალეთის სიახლოვეს იმყოფებოდა. ევროკავშირის მონიტორინგის მისიის ცნობით, დელეგაციას დამკვირვებლებმა მიაწოდეს ინფორმაცია საოკუპაციო ხაზის გასწვრივ უსაფრთხოების გარემოს შესახებ. „ევროკავშირის სადამკვირვებლო მისიის ადგილზე ყოფნა ბოლო 15 წლის განმავლობაში ადასტურებს ევროკავშირის გრძელვადიან მხარდაჭერას საქართველოსა და უფრო ფართო რეგიონში მშვიდობისა და უსაფრთხოების ხელშეწყობის მიმართ. 15 წლის განმავლობაში ევროკავშირის სადამკვირვებლო მისია გადამწყვეტ როლს თამაშობს რეგიონში სტაბილურობის უზრუნველყოფაში და დაძაბულობის შემცირებაში. ევროკავშირის სადამკვირვებლო მისიის მიღწევების აღნიშვნასთან ერთად, მე ასევე ვიყურები მომავლისკენ. ევროკავშირის ერთგულება რეგიონული მშვიდობისა და სტაბილურობის ხელშეწყობის მიმართ სამხრეთ კავკასიის რეგიონში რჩება ურყევი,“ - განაცხადა ბორელმა. „ვესაუბრე მათ, ვისაც მოუწია საკუთარი სახლების დატოვება და მითხრეს, რომ ჩვენი მისია მათ აძლევს უსაფრთხოების შეგრძნებას. ჩვენ არ გვაქვს ჯადოსნური ჯოხი, სასწაულებს ვერ ვახდენთ, მაგრამ პატრულირების 100 ათასი საათი ძალიან შთამბეჭდვია. ემოციურია ამ ადამიანების ცხოვრების პირობების ხილვა. ძალიან ემოციურია ამ ადამიანების მოსმენა, რომლებიც გვებნებიან, შეხედეთ ეს არის ჩემი სახლი, ჩემი მიწა არის ოკუპირებულ ტერიტორიაზე და მისი დამუშავება არ შემიძლია. ჩვენ მათ უნდა დავეხმაროთ, რითიც შეგვიძლია,“ – აღნიშნა ჯოზეფ ბორელმა საზოგადოებრივი მაუწყებლის ცნობით.
რუსთავში უხვი ნალექის შედეგად, რამდენიმე ქუჩა დაიტბორა
რეგიონული გამოცემა "ინფო რუსთავი" წერს, რომ უხვი ნალექის შედეგად ქალაქის ქუჩებში, საავტომობილო გზებზე მომატებული წყლის ნაკადებია. დატბორილია ლეონიძისა და შარტავას გამზირები, მესხიშვილისა და კლდიაშვილის ქუჩები, მე-19 მიკრორაიონის მიმდებარე ტერიტორია. სატრანსპორტო საშუალებები შეფერხებით გადაადგილდებიან.
ზურაბიშვილი ბორელთან შეხვედრის შემდეგ: ევროინტეგრაცია წინსვლის ერთადერთი გზაა
საქართველოს პრეზიდენტმა, სალომე ზურაბიშვილმა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელ, ჯოზეფ ბორელთან შეხვედრის შემდეგ განაცხადა, რომ „ევროინტეგრაცია წინსვლის ერთადერთი გზაა.“ „კარგი შეხვედრა მქონდა ჯოზეფ ბორელთან, ამ გადამწყვეტ მომენტში მისი ვიზიტის დროს. თქვენი ვიზიტით კიდევ ერთხელ მოწმენი ვართ საქართველოს ევროპული გზის მიმართ გამოხატული შეუქცევადი მხარდაჭერის. ევროინტეგრაცია წინსვლის ერთადერთი გზაა!“ წერს ზურაბიშვილი. ბორელი ზურაბიშვილთან შეხვედრის შემდეგ: ჩვენ მხარს ვუჭერთ ძლიერ ინსტიტუტებს, რომლებიც ევროკავშირში მომავლისთვის ერთად მუშაობენ
გურიის რეგიონში, სტიქიის ზონაში მესამე ცხედარი იპოვეს
შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველებმა, გურიის რეგიონში, სტიქიის ზონაში მესამე ცხედარი იპოვეს. ამის შესახებ ინფორმაციას შინაგან საქმეთა სამინისტრო ავრცელებს. უწყების ცნობით, ამ ეტაპზე, სტიქიის ზონიდან უსაფრთხო ადგილზე გადაყვანილია 50-მდე მოქალაქე. „ნაპოვნია სამი ცხედარი, მათ შორის ორი მოზარდის. შინაგან საქმეთა სამინისტროს საგანგებო სიტუაციების მართვის სამსახურის უფროსი თემურ მღებრიშვილი სტიქიის ზონაში რჩება და საგანგებო შტაბს უწევს კოორდინაციას. გურიის რეგიონში, შინაგან საქმეთა სამინისტროს შესაბამისი დანაყოფებიდან მობილიზებულია როგორც ცოცხალი ძალა, ასევე მძიმე ტექნიკა, მცურავი საშუალებები და კინოლოგთა ჯგუფი. სტიქიის ზონაში მონიტორინგი სპეციალური დრონებით მიმდინარეობს“, – ნათქვამია შსს-ს ინფორმაციაში.
თბილისში, არქივის მიმდებარე ტერიტორიაზე ხანძარია
თბილისში, ვაჟა-ფშაველას გამზირზე, არქივის მიმდებარე ტერიტორიაზე ხანძარია. ადგილზე მობილიზებულია საგანგებო სიტუაციების მართვის სამსახურის ჯგუფები და სასწრაფო სამედიცინო დახმარების ბრიგადა. უცნობია ხანძრის გამომწვევი მიზეზი და ის, თუ რას ტერიტორიაზეა ხანძარი გავრცელებული. განახლება: შსს-ს ცნობით, არქივის ეზოს ტერიტორიაზე, ცალკე მდგომ შენობაში ხანძარი ლოკალიზებულია. საქართველოს ეროვნული არქივის განცხადებით, შენობა, რომელსაც ცეცხლი, გაუჩნდა ეროვნული არქივის საკუთრებაში იყო. ეროვნულ არქივში განაცხადეს, რომ ხსენებული შენობა ეროვნული არქივის ეზოში მდებარე ცალკე ნაგებობა იყო. „საქართველოს ეროვნული არქივის ტერიტორიაზე არსებულ ცალკე მდგომ შენობაში ხანძარი გაჩნდა. შენობაში ინახებოდა ნიტროფუძიანი კინოფირები. ყველა ფირი გაციფრულებულია და მათი ასლები კინოარქივში ინახება. ცეცხლი ეროვნული არქივის სხვა შენობებზე არ გავრცელებულა. ამ დროისთვის ხანძარი ლოკალიზებულია. ხანძრის შედეგად არავინ დაშავებულა,“ - ნათქვამია ეროვნული არქივის განცხადებაში.
სომხეთის ბოლოდროინდელ ნაბიჯებს მოსკოვის საპროტესტო ნოტა მოჰყვა
სომხეთის ელჩი ვაღარშაკ ჰარუთუნიანი რუსეთის საგარეო საქმეთა სამინისტროში დაიბარეს. მას საპროტესტო ნოტა გადასცეს, რაც რუსეთის განცხადებით, „ერევნის მხრიდან არამეგობრულ ნაბიჯებს უკავშირდება.“ რუსული მედიის თანახმად, სამინისტროში აღნიშნეს, რომ საუბარია რესპუბლიკაში საერთაშორისო სისხლის სამართლის სასამართლოს რომის სტატუტის რატიფიცირების პროცესის დაწყებაზე, პრემიერ - მინისტრ ნიკოლ ფაშინიანის მეუღლის უკრაინაში ვიზიტზე და კიევში ჰუმანიტარული დახმარების გადაცემაზე, ასევე, ქვეყანაში სამხედრო წვრთნებზე შეერთებული შტატების მონაწილეობით. გარდა ამისა, ელჩს საპროტესტო ნოტა გადაეცა სომხეთის ეროვნული ასამბლეის თავმჯდომარის ალენ სიმონიანის მიერ რუსეთის საგარეო საქმეთა სამინისტროს ოფიციალური წარმომადგენლის მარია ზახაროვას და მთლიანად, სამინისტროს მიმართ „შეურაცხმყოფელი განცხადებების“ გამო. ასევე, სამინისტროში შეშფოთება გამოთქვეს ბლოგერის, მიქაელ ბადალიანის და „Sputnik სომხეთის“ მიმომხილველის აშოტ გევორკიანის რესპუბლიკის ტერიტორიაზე დაკავების გამო. ვრცლად გაეცანით Europetime-ის მასალას სომხეთის ნაბიჯებთან დაკავშირებით: ფაშინიანი იყენებს მომენტს სომხეთის საგარეო პოლიტიკის რეორიენტაციისთვის - მეთიუ ბრაიზა
ზელენსკი: დღეისთვის ჩვენი ნაბიჯები უფრო სწრაფია, ვიდრე ახალი სასანქციო პაკეტები
უკრაინის პრეზიდენტის განცხადებით, კონტრშეტევა უფრო სწრაფად მიმდინარეობს, ვიდრე ახალი სანქციები მიიღება. ვოლოდიმირ ზელენსკიმ იალტის ევროპული სტრატეგიის მე-18 შეხვედრის პანელურ დისკუსიაზე განაცხადა, რომ უკრაინის კონტრშეტევის დასაჩქარებლად კონკრეტული ტექნიკა არის საჭირო, კერძოდ, კი თანამედროვე ავიაგამანადგურებლები. „ომი ნელდება. ეს არის, ამას ვაღიარებთ. რთულდება და ნელდება ყველა პროცესი: სანქციებიდან იარაღის მიწოდებამდე… როდესაც ზოგიერთი პარტნიორი ამბობს: რა ხდება იქ კონტრშეტევასთან, როდის იქნება შემდეგი ნაბიჯი? ჩემი პასუხია: დღეისთვის ჩვენი ნაბიჯები ნამდვილად უფრო სწრაფია, ვიდრე ახალი სასანქციო პაკეტები… ყოველი გათავისუფლებული მეტრი - ეს ადამიანის სიცოცხლეა… რაც უფრო შორს, მით უფრო მეტი ადამიანი იტანჯება. როგორ მოქმედებს იარაღი? კონკრეტულად და უშუალოდ, აბსტრაქციებისა და რიტორიკის გარეშე. არის კონკრეტული იარაღის კონკრეტული გავლენა. რაც უფრო ძლიერი, შორს მოქმედია, მით უფრო სწრაფად მიმდინარეობს კონტრშეტევა, ჩვენი ტერიტორიის აღდგენა. თუ ცაში არ ვართ, მაგრამ რუსეთი არის, ციდან გვაჩერებენ. ჩვენს კონტრშეტევას აჩერებენ,” - განაცხადა ზელენსკიმ. შეგახსენებთ, რუსეთი უკრაინაში გასული წლის თებერვალში შეიჭრა და ამ დრომდე აწარმოებს სრულმასშტაბიან ომს. დასავლეთი რუსეთს სანქციებს უწესებს, უკრაინას კი, სამხედრო და სხვა დახმარებით უზრუნველყოფს.
გერმანიაში დაზვერვის თანამშრომელს რუსეთისთვის საიდუმლო დოკუმენტების გადაცემაში სდებენ ბრალს
გერმანიის საგარეო დაზვერვის სამსახურის თანამშრომელს და გერმანელ ბიზნესმენს რუსეთისთვის საიდუმლო დოკუმენტების სავარაუდო გადაცემაში - ღალატში წაუყენეს ბრალი. DW-ს ცნობით, ამის შესახებ გერმანიის პროკურატურამ განაცხადა. დაზვერვის ოფიცერი დეკემბერში, ბერლინში დააკავეს, ხოლო მეორე - იანვარში დააპატიმრეს. ფედერალური პროკურორები აცხადებენ, რომ ბრალდებულს ჰქონდა კონტაქტი რუსეთში მცხოვრებ ბიზნესმენთან, რომელიც დაკავშირებულია რუსეთის უშიშროების ფედერალურ სამსახურთან. ეს სამი პირი ერთმანეთს, სავარაუდოდ, 2022 წლის სექტემბერში შეხვდა. გამოძიებს ვერსიით, ისინი რუსეთის ეფ-ეს-ბე-სთვის გერმანიის საგარეო დაზვერვის კონფიდენციალური ინფორმაციის მიწოდების შესახებ შეთანხმდნენ.
აშშ და რუმინეთი, უკრაინასთან ერთად, შავ ზღვასა და მდინარე დუნაის დელტაში სამხედრო წვრთნებს ჩაატარებენ
აშშ და რუმინეთი, უკრაინასთან ერთად, შავ ზღვასა და მდინარე დუნაის დელტაში სამხედრო სწავლებას ჩაატარებენ. წვრთნები - „Sea Breeze 23.3,“ 11-დან 15 სექტემბრამდე გაიმართება. მასში ასევე მიიღებენ მონაწილეობას სამხედროები საფრანგეთიდან, გაერთიანებული სამეფოდან და თურქეთიდან. კერძოდ, სპეციალისტები, მათ შორის მყვინთავ-გამნაღმველები გაივლიან წვრთნებს ასაფეთქებელი მოწყობილობების გაუვნებელყოფაში. წვრთნების მიზანს საზღვაო ნაღმების წინააღმდეგ კონტრმოქმედების დამუშავება წარმოადგენს.
