ძებნის რეზულტატი:
ილჰამ ალიევი: ჩემმა ძმამ, რეჯეფ თაიფ ერდოღანმა მორალური და პოლიტიკური მხარდაჭერა გაგვიწია
„44 დღის განმავლობაში, მორალური და პოლიტიკური მხარდაჭერა თურქეთის რესპუბლიკამ, ჩემმა ძმამ, რეჯეფ თაიფ ერდოღანმა და რამდენიმე სხვა მუსლიმური და არამუსლიმური ქვეყნების ლიდერებმა გაგვიწიეს“, - ამის შესახებ აზერბაიჯანის პრეზიდენტმა, ილჰამ ალიევმა განაცხადა. მისივე თქმით, აზერბაიჯანმა გამარჯვებას ერთიანობით, მონდომებით, მტკიცე განზრახვითა და სიძლიერით მიაღწია. 10 ნოემბერს, ნიკოლ ფაშინიანმა მთიან ყარაბაღში საომარი მოქმედებების შეწყვეტის შესახებ განაცხადა. სომხეთის პრემიერმა შესაბამის შეთანხმებას ხელი რუსეთისა და აზერბაიჯანის პრეზიდენტებთან ერთად მოაწერა. ვლადიმერ პუტინმა განაცხადა, რომ სომხეთი და აზერბაიჯანი მთიან ყარაბაღში რუსი მშვიდობისმყოფელების განლაგებაზე შეთანხმდნენ.
აშშ-მა სამ რუსულ კომპანიას სანქციები დაუწესა
აშშ-ის ხელისუფლებამ სამ რუსულ კომპანიას, მასობრივი იარაღის გაუვრცელებლობის შესახებ აშშ-ის კანონმდებლობის გვერდის ავლით ირანთან, სირიასთან და ჩრდილოეთ კორეასთან თანამშრომლობის გამო, სანქციები დაუწესა. აშშ-ის სახელმწიფო დეპარტამენტის თანახმად, სანქციები 6 ნოემბრიდან ამოქმედდა კომპანია „ავიანაწილების“, სააქციო საზოგადოება „ელეკონის“ და Nilco Group-ის მიმართ. ვაშინგტონის მტკიცებით, აღნიშნული კომპანიები, ირანს, სერიასა და ჩრდილოეთ კორეას,მასობრივი განადგურების იარაღის შექმნისათვის გამოსადეგ ტექნოლოგიებსა და მასალებს გადასცემდნენ. სანქციები ძალაში იქნება ორი წლის განმვალობაში. სახელმწიფო დეპარტამენტის მიერ სანქცირებულ კომპანიათა შორის ორი ჩინური კომპანიაცაა. ერთი თვის წინ ევროპის კავშირმა რუსეთის ექვსი ფიზიკური და ერთი იურიდიული პირის წინააღმდეგ სანქციები შემოიღო აგვისტოში რუსეთის ოპოზიციონერი პოლიტიკოსის, ალექსეი ნავალნის მოწამვლის გამო. გადაწყვეტილება და სანქციების სია 15 ოქტომბერს გამოქვეყნდა ევროკავშირის ოფიციალურ ბიულეტენში. სანქციებს მხარი დაუჭირა დიდმა ბრიტანეთმაც. ყველა პირს ევროკავშირში ტურისტული მიზნებით შესვლა ეკრძალება, გაიყინება ევროკავშირში მათი აქტივები, თუკი ისინი არსებობს. გარდა ამისა, ევროკავშირის ფიზიკურ და იურიდიულ პირებს ეკრძალებათ სანქციების სიაში შემავალ პირებთან ფინანსური ურთიერთობები.
უკრაინა-საქართველოს ნატოს წევრობა, შესაძლოა, რაიმე ახალი, ასოცირებული წევრის სტატუსის შექმნით მოხდეს - ვერშბოუ
ჩვენ პირობა დავდეთ, რომ უკრაინა და საქართველო ნატო-ს წევრები გახდებიან, მაგრამ ვერ გავითვალისწინეთ, როგორ შეიძლება მივაღწიოთ ამას, - ამის შესახებ ნატო-ს გენერალური მდივნის ყოფილმა მოადგილემ, ალექსანდერ ვერშბოუმ განაცხადა. „ამერიკის ხმის“ ქართული რედაქცია ვერშბოუს მიერ „ატლანტიკური საბჭოს“ ორგანიზებულ ღონისძიებაზე გაკეთებულ კომენტარს აქვეყნებს. ნატო-ს გენერალური მდივნის ყოფილი მოადგილე განმარტავს, რომ უკრაინასა და საქართველოს ნატო-ში გაწევრიანებისთვის, შესაძლოა, ახალი სტატუსის შექმნა კარგი იყოს, მაგალითად, ასოცირებული წევრის სტატუსის. „ნატო-ში რუსეთის წვერობის საკითხი, სერიოზულად იყო განხილული კლინტონსა და ელცინს შორის. თუმცა, საქმე ამაზე შორს არასდროს წასულა. ვეთანხმები მოსაზრებას, რომ შესაძლებელია ამ საკითხს რაიმე ფორმით დავუბრუნდეთ. მაგალითად, უკეთესი სამოქალაქო ურთიერთობა ნატო-სა და რუსეთს შორის, რათა არ ჰქონდეთ განცდა, რომ ნატო-რუსეთის პარტნიორობა მხოლოდ ფასადური მიდგომაა. ეს შეიძლება გაკეთდეს ერთგვარი ყოვლისმომცველი მეთოდით. თუ რას ვაკეთებთ უკრაინასა და საქართველოს წევრობისკენ სწრაფვის შესახებ: ჩვენ პირობა დავდეთ, რომ უკრაინა და საქართველო ნატო-ს წევრები გახდებიან, მაგრამ ვერ გავითვალისწინეთ, როგორ შეიძლება მივაღწიოთ ამას. შესაძლოა, ეს მოხერხდეს რაიმე ახალი, ასოცირებული წევრის სტატუსის შექმნით, უკრაინისთვის და საქართველოსთვის“ - განაცხადა ვერშბოუმ.
აზერბაიჯანის სამხედრო ნაწილები ქელბაჯარის რაიონში შევიდნენ
მთიანი ყარაბაღის ქელბაჯარის რაიონში აზერბაიჯანის არმიის დანაყოფები შევიდნენ, - ამის შესახებ ინფორმაციას ადგილობრივი მედია ავრცელებს. ქელბაჯარის რაიონი სომხეთის შეიარაღებული ძალების ბოლო ქვედანაყოფებმა გუშინ დატოვეს. აზერბაიჯანის, სომხეთისა და რუსეთის მიერ ხელმოწერილი სამმხრივი შეთანხმების თანახმად, რაიონი დღეიდან აზერბაიჯანის იურისდიქციაში გადავიდა. აზერბაიჯანის არმია ქელბაჯარში 15 ნოემბერს უნდა შესულიყო, მაგრამ სომხეთის თხოვნით ვადამ 10 დღით გადაიწია.
ამერიკა დაბრუნდა და მზად არის უხელმძღვანელოს მსოფლიოს - ჯო ბაიდენი
ჯო ბაიდენი აცხადებს, რომ შეერთებული შტატები მზად იქნება, გლობალურ არენაზე კვლავ წამყვანი როლი შეასრულოს. არჩეულმა პრეზიდენტმა დელავერის შტატის ქალაქ უილმინგტონში საგარეო პოლიტიკისა და ეროვნული უსაფრთხოების გუნდის წარდგენისას განაცხადა, რომ ამერიკა დაბრუნდა. „ეს არის გუნდი, რომელიც გამოხატავს, რომ ამერიკა დაბრუნდა, მზად არის უხელმძღვანელოს მსოფლიოს, არ დაიხიოს უკან, კვლავ დაჯდეს მაგიდის თავში, მზად არის წინააღმდეგობა გაუწიოს მეტოქეებს და არ უარყოს ჩვენი მოკავშირეები, მზად არის მტკიცედ დაიცვას ჩვენი ღირებულებები“, – განაცხადა ჯო ბაიდენმა. აღსანიშნავია, რომ ჯო ბაიდენის ეს მიდგომა განსხვავდება დონალდ ტრამპის საგარეო პოლიტიკისგან, რომლის პრიორიტეტული ლოზუნგი იყო „ამერიკა უპირველეს ყოვლისა".
2021 წელს სესხებზე საპროცენტო განაკვეთების შემცირების შანსი არსებობს - ძნელაძე
საქართველოს საბანკო ასოციაციის პრეზიდენტი ალექსანდრე ძნელაძე “საქმიან დილასთან” ინტერვიუში აცხადებს, რომ იპოთეკური სესხების სუბსიდირების პროექტი მიმდინარე წელს საკმაოდ წარმატებული იყო. მისივე განმარტებით, პროექტის გაგრძელებაზე მსჯელობა ამჟამად არ მიმდინარეობს. “5 700 სესხია სუბსიდირებული, რაც 550 მლნ ლარის თანხას შეადგენს. 5 700 სესხიდან 1 500 სესხამდე საკრედიტო საგარანტიო სქემაშია ჩართული, რაც, ჯამში, 150 მლნ ლარია. წლის ბოლომდე აღნიშნული პროექტი გრძელდება და არ არის მოლოდინები, რომ ეს პროექტი მომავალ წელსაც გაგრძელდება. აქ რისკიც არსებობს, პროექტიდან ერთბაშად გამოსვლა იქნება კარგი გამოსავალი, თუ ნელ-ნელა გამოსვლა. მუდმივად სუბსიდია ვერ იქნება, თუ აღნიშნულ პროექტზე საუბარი შედგება, მსჯელობა უფრო მეტად პროექტიდან გამოსვლის მექანიზმზე იქნება და არა - მის გაგრძელებაზე. სუბსიდირების პროექტმა სესხების გაცემის რაოდენობით მოლოდინებს მკვეთრად გადააჭარბა, აქტივობა ახლაც მაღალია და ამ კუთხით წლის ბოლომდე მნიშვნელოვან ზრდას ველოდებით. ასევე, პროექტმა ხელი ლარიზაციის პროექტსაც შეუწყო", - აღნიშნა საბანკო ასოციაციის პრეზიდენტმა. ალექსანდრე ძნელაძემ ბანკების ფინანსური შედეგების ანალიზიც გააკეთა და აღნიშნა, რომ სამომხმარებლო სესხების ნაწილში გადახდები აღდგა. “ბანკები უკვე მოგებაზე გავიდნენ, თუმცა ეს არ იქნება ის მოგება, რაც 2018-2019 წლებში იყო და მიმდინარე წელს 0-თან ახლოს დავასრულებთ. კონკრეტული პრობლემური სექტორების და მოწყვლადი ჯგუფების გარდა გადახდები აღდგენილია. რაც შეეხება საპროცენტო განაკვეთებს, მას მზარდი ხასიათი აქვს, მაგრამ ვხედავ, რომ არსებულმა მდგომარეობამ იმის შანსი მოგვცა, რომ მომავალ წელს საპროცენტო განაკვეთები კიდევ უფრო შემცირდეს", - აღნიშნა ძნელაძემ.
კახა კალაძემ მიტაცებულ მიწებზე არსებული ნაგებობების დემონტაჟის დავალება გასცა
დედაქალაქის მერმა კახა კალაძემ მუნიციპალური ინსპექციის ხელმძღვანელს, ლევან ჯღარკავას, თბილისში მუნიციპალური და სახელმწიფო მიწების თვითნებურად მიტაცების საკითხის მოწესრიგება და პრობლემის აღმოფხვრის მიზნით, ამ მიწებზე არსებული შენობა-ნაგებობების დემონტაჟი დაავალა. ამის შესახებ მან დედაქალაქის მთავრობის სხდომაზე განაცხადა. "დედაქალაქში ძალიან ბევრი შემთხვევაა, სადაც უკანონოდ ხდება მუნიციპალური და სახელმწიფო მიწების დატაცება, რაც კატეგორიულად მიუღებელია და ჩვენ ამას არავითარ შემთხვევაში არ დავუშვებთ. ამან უკვე მიიღო სისტემატური ხასიათი და ასეთი ძალიან ბევრი შემთხვევა გვაქვს. მინდა მუნიციპალური ინსპექციის ხელმძღვანელს, ლევან ჯღარკავას დავავალო, რომ დღეიდანვე დაიწყოთ უკვე ქმედებები. ვიცი, რომ რამდენიმე კონკრეტულ ლოკაციაზე გაფრთხილებები გაქვთ მიცემული და მიმართეთ, რომ ის პატარა შენობა-ნაგებობები, რომელიც მათ აშენებული აქვთ, თავადვე მოახდინონ დემონტაჟი, თუ ეს არ განხორიციელდება, შეგიძლიათ მიხვიდეთ და თქვენვე გაუკეთოთ ამას დემონტაჟი. კატეგორიულად მიუღებელია ეს უკანონობა. სახელმწიფო და მუნიციპალური საკუთრება, ქონება, ეს არც ჩემია, არც თქვენი, ეს არის სახლმწიფოსი. არავის უნდა მივცეთ იმის უფლება და შესაძლებლობა, რომ ეს ყველაფერი მიიტაცოს. იმ ადამიანებს რას ვპასუხობთ, ვინც კეთილსინდისიერად იქცევა და კანონს ემორჩილება?! შესაბამისად, ეს დამოკიდებულება კატეგორიულად მიუღებელია და დღესვე დაიწყეთ ქმედება. შეგიძლიათ დაიხმაროთ ამაში შსს, მე მქონდა მინისტრთან კონსულტაციები და ყველანაირად გექნებათ მხარდაჭერა და თანადგომა, რომ ეს უმსგავსობა დედაქალაქში დავამთავროთ",- განაცხადა კახა კალაძემ.
Bloomberg - რომელმა ქვეყნებმა შეძლეს ვირუსის ყველაზე უკეთ მართვა
მსოფლიოს რომელმა ქვეყანამ შეძლო COVID-19-ის მიერ გამოწვეული კრიზისის საუკეთესოდ მართვა? - ამ კითხვაზე პასუხის დასადგენად, Bloomberg-მა მოამზადა ინდექსი, რომელიც როგორც ეპიდემიური ვითარების მართვის, ასევე სოციალური და ეკონომიკური მიმართულებებით ქვეყნების შედეგებს აერთიანებს. ინდექსის მიხედვით, ყველა პარამეტრის გათვალისწინებით, 2020 წლის უმთავრეს გამოწვევას საუკეთესოდ ახალი ზელანდია გაუმკლავდა. საზღვრების ადრეული ჩაკეტვის, მკაცრი ლოქდაუნისა და კონტაქტების მოძიების სამუშაოების შედეგად, ახალ ზელანდიაში COVID-19-ის მხოლოდ 2,031 შემთხვევა გამოვლინდა. 0-დან 100-ბალიან სკალაზე ახალ ზელანდიას ამ პარამეტრების გათვალისწინებით, 85.4 ქულა აქვს მინიჭებული. სიაში მეორე ადგილზეა იაპონია, რომელმაც ახალ ზელანდიასთან შედარებით უფრო ნაკლები შეზღუდვებით შეძლო ვირუსის მართვა, რაც მოსახლეობის მხრიდან სოციალური დისტანცირების მკაცრი ნორმების დაცვასთან იყო დაკავშირებული. მესამე ადგილზე კი ტაივანია, რომელშიც ვირუსით ინფიცირების მხოლოდ 618 შემთხვევა არის გამოვლენილი. ინდექსის პირველ ათეულში ევროკავშირის ქვეყნებიდან ყველაზე წინ ფინეთია, რომელმაც მთელი EU-ს მასშტაბით ეპიდემიის გავრცელება ყველაზე უკეთ მართა. ფინეთში ინფიცირების მხოლოდ 22,289 შემთხვევა გამოვლინდა. თუმცა, ამ ქვეყანაშიც უკანასკნელი ორი კვირის განმავლობაში ვირუსის გავრცელების მზარდი ტრენდი ფიქსირდება. სხვა პარამეტრებთან ერთად, რეიტინგი სახელმწიფოების მხრიდან პანდემიის პერიოდში მოსახლეობის სოციალური დაცვისთვის გადადგმულ ნაბიჯებსაც აფასებს. თუმცა, მთავარ კრიტერიუმს სწორედ ვირუსის შეკავების პოლიტიკის წარმატებულობა წარმოადგენს. რეიტინგში საქართველო არ შედის, რადგან ის მხოლოდ იმ ქვეყნებს შეეხება, რომელთა ეკონომიკის ზომაც $200 მილიარდს აღემატება. ასეთი კი სულ 53 ქვეყანაა. Bloomberg-ის ინდექსი: 1 ახალი ზელანდია 85.4 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2 2 იაპონია - 85 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 29 3 ტაივანი - 82.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 0 4 სამხრეთ კორეა - 82.3 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 10 5 ფინეთი - 82 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 129 6 ნორვეგია - 81.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 281 7 ავსტრალია - 81.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1 8 ჩინეთი - 80.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 0 9 დანია - 77 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 550 10 ვიეტნამი - 74.3 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 0 11 სინგაპური - 74.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 4 12 ჰონგ კონგი - 73.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 5 13 კანადა - 73.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 316 14 გერმანია - 71.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 604 15 ტაილანდი - 70.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 0 16 შვედეთი - 68.7 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 967 17 არაბთა გაერთიანებული საამიროები - 67.5 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 371 18 შეერთებული შტატები - 66.5 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,129 19 ინდონეზია - 66.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 42 20 ირლანდია - 65.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 308 21 ისრაელი - 65 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 232 22 რუსეთი - 65 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 412 23 ნიდერლანდები - 64.4 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,247 24 ბანგლადეში - 64.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 31 25 ეგვიპტე - 63.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 7 26 შვეიცარია - 62.3 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2,160 27 პაკისტანი - 61.7 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 23 28 გაერთიანებული სამეფო - 61.5 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,004 29 მალაიზია - 61.4 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 93 30 თურქეთი - 60.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 106 31 საბერძნეთი - 59.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 600 32 საუდის არაბეთი - 59.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 32 33 პორტუგალია - 59.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,455 34 ინდოეთი - 58.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 93 35 სამხრეთ აფრიკა - 57.8 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 93 36 ავსტრია - 56.3 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,918 37 ბრაზილია - 56.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 338 38 ჩილე - 55.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 218 39 ერაყი - 54.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 222 40 იტალია - 54.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,528 41 ესპანეთი - 54.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,092 42 ნიგერია - 53.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2 43 რუმინეთი - 53.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,131 44 პოლონეთი - 52.2 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,673 45 საფრანგეთი - 51.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 1,695 46 ფილიპინები - 48.9 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 48 47 ირანი - 48.7 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 354 48 კოლუმბია - 48.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 490 49 ჩეხეთის რესპუბლიკა - 46.8 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2,371 50 ბელგია - 45.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 2,339 51 პერუ - 41.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 207 52 არგენტინა - 41.1 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 666 53 მექსიკა - 37.6 ქულა; ბოლო ერთ თვეში 100,000 მოსახლეზე ინფიცირებულთა რაოდენობა 113
3071 ახალი შემთხვევა და 34 გარდაცვლილი - 25 ნოემბრის სტატისტიკა
25 ნოემბრის მდგომარეობით, ბოლო 24 საათის განმავლობაში გამოვლენილია ვირუსით ინფიცირების 3 071 ახალი დადასტურებული შემთხვევა, - ამის შესახებ უწყებათაშორის საკოორდინაციო საბჭოსთან არსებული საოპერაციო შტაბის უფროსის მოადგილემ, ბერდია სიჭინავამ, მთავრობის ადმინისტრაციაში გამართულ ბრიფინგზე განაცხადა. მან კორონავირუსთან დაკავშირებით არსებულ უახლეს სტატისტიკურ მონაცემებზე ისაუბრა. „დღეის მდგომარეობით, ბოლო 24 საათის განმავლობაში გამოვლენილია ვირუსით ინფიცირების 3 071 ახალი დადასტურებული შემთხვევა. ქვეყანაში კოვიდ-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 114 889-ს. დღევანდელი მონაცემებით, გამოჯანმრთელებულ ადამიანთა რაოდენობა აჭარბებს ინფიცირებულები პირების რიცხვს. ბოლო 24 საათში გამოჯანმრთელდა 3 366 პირი, ხოლო ჯამში გამოჯანმრთელებულთა რაოდენობა გაიზარდა - 95 581-მდე. სამწუხაროდ, უკანასკნელი 24 საათის განმავლობაში გვაქვს კორონავირუსით გარდაცვალების 34 ახალი შემთხვევა. 2020 წლის 26 თებერვლიდან დღემდე სულ გვაქვს 1 085 გარდაცვალების შემთხვევა. დღეს გამოვლენილი ინფიცირების 3 071 ახალი შემთხვევიდან, დედაქალაქისა და რეგიონების მიხედვით მაჩვენებლები გამოიყურება შემდეგი სახით: თბილისში გამოვლენილია 1 314 შემთხვევა, აჭარა - 523, იმერეთი - 264, ქვემო ქართლი - 104, შიდა ქართლი - 44, გურია - 106, სამეგრელო - ზემო სვანეთი - 232, კახეთი - 214, მცხეთა-მთიანეთი - 165, სამცხე-ჯავახეთი - 84, რაჭა-ლეჩხუმი და ქვემო სვანეთი - 21. ამ ეტაპზე ინფიცირების მიმდინარე აქტიური შემთხვევა არის 18 197. მათ შორის, 6 145 ადამიანი მკურნალობს საავადმყოფოში, მათ შორის, თბილისის საავადმყოფოებში - 2 712, აჭარაში - 1 010, იმერეთში - 1 241. ამ ეტაპზე მძიმე პაციენტია 886 პირი, მათ შორის, თბილისში - 405, აჭარაში - 140, იმერეთში - 214. მათ შორის ხელოვნური სუნთქვის აპარატზე იმყოფება 324 პირი, მათგან თბილისში - 165, აჭარაში - 49, იმერეთში - 42. 3 723 ადამიანი მოთავსებულია კოვიდ-სასტუმროში, მათ შორის 1 108 - თბილისში, 2 047 - აჭარაში, 262 - იმერეთში. 8 329 პირი ვირუსის მკურნალობს კურსს გადის საცხოვრებელ ბინაზე. საკარანტინე სივრცეებში მოთავსებულია 2 071 ადამიანი, მათ შორის, თბილისში - 434, აჭარაში -1 021, ხოლო იმერეთში -33. სულ 6 ოქტომბრიდან - 24 ნოემბრის პერიოდში, სახელმწიფო საზღვრიდან საკარანტინე სივრცეებში გადაყვანილია - 17 814 პირი. ამ ეტაპისთვის თვითიზოლაციაში იმყოფება 51 936 ადამიანი, მათ შორის თბილისში - 17 231 პირი, აჭარაში - 13 768, იმერეთში - 4 951“, - განაცხადა ბერდია სიჭინავამ.
ოკუპირებულ აფხაზეთში კორონავირუსით გამოწვეული შეზღუდვების ვადა გახანგრძლივდა
რუსეთის მიერ ოკუპირებული აფხაზეთის დე ფაქტო პრეზიდენტმა ასლან ბჟანიამ ხელი მოაწერა განკარგულებას, რომლის თანახმადაც კორონავირუსის ეპიდემიის გამო დაწესებული შეზღუდვები, 2021 წლის 12 იანვრამდე გაგრძელდა. 12 იანვრამდე ისევ იკრძალება სკოლამდელი და ზოგადსაგანმანათლებლო დაწესებულებების და თეატრების, მუზეუმების, ბიბლიოთეკებისა და კულტურის სახლების მუშაობა, ქორწილები და სხვა მასობრივი ღონისძიებები საბანკეტო დარბაზებში, რესტორნებში, კაფეებსა და სხვა მსგავს ობიექტებში, დახურულ სივრცეებში სპორტული, საქმიანი, გასართობი და სხვა სახის ღონისძიებები, სავარჯიშო დარბაზების და აუზების მუშაობა და სხვა. ბჟანიას განკარგულებით, საზოგადოებრივი თავშეყრის ადგილებში სავალდებულოა დამცავი ნიღბების გამოყენება, შეზღუდულია სამგლოვიარო ღონისძიებებში მონაწილეთა რაოდენობა, 60 წელზე უფროსი ასაკის მოქალაქეები კი გათავისუფლებულნი არიან სამსახურში მისვლის ვალდებულებისგან. გარდა ამისა, აფხაზეთის მცხოვრებთ ურჩევენ, რელიგიური დღესასწაულების დროს თავი შეიკავონ საკულტო ობიექტებზე მისვლისგან. აფხაზეთის დე ფაქტო მთავრობას აპრილის შემდეგ აღრიცხული აქვს კორონავირუსით ინფიცირების 5442 შემთხვევა. მათგან გამოჯანმრთელებულია 3623. COVID-19-ით გარდაცვლილია 70 ადამიანი.
მემანქანეების დიდი ნაწილი ინფიცირებულია - ერთობა 2013 მეტროს გაჩერებას მოითხოვს
"თბილისის მეტროპოლიტენის მემანქანეთა დამოუკიდებელი პროფესიული კავშირი ერთობა 2013"-ის ინფორმაციით, მეტროპოლიტენის მემანქანეებისა და სხვა პოზიციებზე დასაქმებული თანამშრომლების დიდი ნაწილი ინფიცირებულია. პროფესიულ კავშირში აცხადებენ, რომ არსებობს მეტროპოლიტენის მუშაობის შეჩერების საფრთხე. "ახლა არსებული სიტუაცია ურთულესია, მეტროს მემანქანეებისა და სხვა პოზიციებზე დასაქმებული თანამშრომლების დიდი ნაწილი ინფიცირებულია. ეს იმ დროს, როდესაც საკოორდინაციო საბჭოს რეკომენდაცია, რომელიც ყოველდღიურ რეჟიმში ტელევიზიით გადაიცემა, რაც დამსაქმებელს მოუწოდებს რომ თანამშრომლის ინფიცირების დადასტურების შემთხვევაში, მოიძიოს მისი კონტაქტები და გადაიყვანოს თვითიზოლიაციაში. მეტროს შემთხვევაში კი ეს ხშირად არ ხორციელდებოდა. რამაც გამოიღო შედეგი და როგორც აღვნიშნეთ თანამშრომლების დიდი რაოდენობა დაინფიცირებულია, რომლებმაც თავის მხრივ დააინფიცირეს ოჯახის წევრები და არამარტო", - აცხადებენ ერთობა 2013-ში. პროფესიული კავშირი შექმნილ ვითარებაზე სრულ პასუხისმგებლობას სატრანსპორტო კომპანიის გენერალურ დირექტორსა და მენეჯმენტს აკისრებს. პროფკავშირში აცხადებენ, რომ მათ სატრანსპორტო კომპანიას შესთავაზეს მემანქანეების რესურსის განაწილება - 10 დღე ერთი ჯგუფის მუშაობას, ხოლო 10 დღე მეორე ჯგუფის. თუმცა, სატრანსპორტო კომპანიამ შეთავაზება უარყო. "სექტემბრის თვეში, როდესაც ვირუსმა მნიშვნელოვნად დაიწყო გავრცელება, შევხვდით სატრანსპორტო კომპანიის დირექციას. სადაც, ჩვენის მხრიდან იყო შეთავაზება ვირუსთან დაკავშირებით პრევენციული ღონისძიებების შესახებ. შეთავაზება კი გულისხმობდა, დილით 7:00 საათზე მეტროს გახსნას და საღამოს 21:00 ზე ჩაკეტვას. გვესმის, რომ მგზავრებისათვის შესაძლოა მცირედ დისკომფორტი გამოეწვია ამ ყველაფერს, მაგრამ მეტროს მუშაობის შეწყვეტას (რისი საშიშროებაც რეალურად დგას) აშკარად აჯობებდა. ეს წინადადება დარჩა უყურადღებოდ", - ნათქვამია განცხადებაში. გარდა ამისა, "ერთობა 2013"-ში აცხადებენ, რომ მემანქანეებს არასათანადოდ ჩაუტარდათ კოვიდ ტესტები, რამაც ინფექციის გავრცელებას შეუწყო ხელი: "ასევე მოვითხოვეთ თანამშრომლებისათვის ჩაეტარებინათ კოვიდის ტესტები, ეს კი განახორციელეს ისე, რომ ტესტი ჩაატარეს სისხლის ანალიზებზე, რაც რეალურ სურათს ვერ ასახავს, რადგან დაინფიცირებიდან 5-7 დღეის შემდეგ აჩვენებს ზუსტ პასუხს ხსენებული ტესტი. ანუ, სიმპტომის შემჩნევის მეორე დღეს მიდიოდნენ ტესტზე, სადაც პასუხი, რა თქმა უნდა, უარყოფითი იყო, დამშვიდებული და "ჯანმრთელი" თანამშრომელი ბრუნდებოდა სამსახურში, (რომელსაც, სამი-ოთხი დღის შემდეგ PCR ტესტით დაუდასტურდა კოვიდი, რაც თავისი ხარჯებით გააკეთა) რომელიც, იქცა სხვა თანამშრომლების ინფიცირების წყაროდ. გასულ კვირას კი ერთობა 2013_ის თავმჯდომარის დაჟინებული მოთხოვნით, მემანქანეები გააგზავნეს ლუგარის ლაბორატორიაში ტესტირებაზე, რომელთა ნაწილს მეორე დღეს, სამუშაოს შესრულების დროს, მოუვიდათ დადებითი პასუხები. ამ დროს მათთან კონტაქტი ქონდა კიდევ სხვა ბევრ თანამშრომელს. (მგონი ხვდებით რასთან გვაქვს საქმე",. "ერთობა 2013"-ში მკაცრი შეზღუდვების შემოღებას ითხოვენ, მათ შორის გარკვეული დროით მეტროპოლიტენის მუშაობის გაჩერებასაც, "რადგან არ მოხდეს ვირუსის უკონტროლო გავრცელება".
"სტუმარი ღვთისაა" - "რასაცა გასცემ, შენია - რას არა, დაკარგულია" - ენტონი ბლინკენის განცხადებები
ამერიკის ახალი პრეზიდენტის ჯო ბაიდენის ადმინისტრაციაში სახელმწიფო მდივნის თანამდებობას, 20 იანვრიდან გამოცდილი დიპლომატი ენტონი ბლინკენი დაიკავებს. ენტონი ბლინკენი გამოცდილი დიპლომატი და მტრულად განწყობილი ქვეყნების მიმართ მოზომილად მკაცრია. ის რუსეთის მიმართ მუდმივად კრიტიკული პოზიციებით გამოირჩევა. ბლინკენს ეკუთვნის სიტყვები "უნდა გავაძლიეროთ ზეწოლა რუსეთზე". მომავალი სახელმწიფო მდივანი საქართველოს მიმართ ახლო და მეგობრული პოზიციებით გამოირჩევა. პირველი, რაც შეიძლება ენტონი ბლინკენის და საქართველოს კონტექსტში გავიხსენოთ, ვაშინგტონში 2015 წელს მის მიერ გაკეთებული განცხადებებია. თეთრ სახლში გამართული შეხვედრის შემდეგ, ენტონი ბლინკენი გიორგი კვირიკაშვილთან ერთად ჟურნალისტებთან გამოჩნდა, საუბრი კი დაიწყო შემდეგი სიტყვებით "როგორც მე ვიცი, საქართველოში ხშირად ამბობენ, სტუმარი ღვთისაა. დღეს კი მე შემიძლია ვთქვა, რომ თქვენი აქ ყოფნა არის ჩვენთვის საჩუქარი". ბლინკენი ამ პერიოდში ამერიკის სახელმწიფო მდივნის მოადგილის თანამდებობას იკავებდა და პრესკონფერენციაზე საქართველო-ამერიკის პარტნიორულ და ახლო ურთიერთობებს გაუსვა ხაზი. ბლინკენმა კიდევ ერთხელ დაადასტურა ამერიკის მხარდაჭერა საქართველოს ტერიტორიული მთლიანობის მიმართ და აღნიშნა, რომ ამერიკა რჩებოდა ერთგული ნატოს ბუქარესტის სამიტზე მიღებული გადაწყვეტილების, რომელიც ამბობს, რომ საქართველო აუცილებლად გახდება ნატოს წევრი ქვეყანა. ამავე განცხადებაში, მან მადლობა გადაუხადა საქართველოს სამშვიდობო მისიაში მონაწილეობისთვის. საუბრის შუაში კი მან შოთა რუსთაველის ვეფხისტყაოსნიდან მოიყვანა ციტატა და თქვა "რასაცა გასცემ, შენია - რას არა, დაკარგულია". ამერიკის მომავალი სახელმწიფო მდივანი 58 წლისაა და მას სხვადასხვა ადმინისტრაციის დროს სხვადასხვა წამყვანი თანამდებობა ეკავა. ის 2013 - 2015 წლებში ამერიკის ეროვნული უსაფრთხოების მრჩევლის მოადგილე იყო, შემდეგ 2 წლის განმავლობაში კი სახელმწიფო მდივნის მოადგილის თანამდებობას იკავებდა. მისი პოლიტიკური კარიერა ბილ კლინტონის დროს დაიწყო, როცა ის უსაფრთხოების მრჩეველის თანამდებობას იკავებდა. შემდეგ, მან ჯო ბაიდენი გაიცნო და 2001-2008 წლებში სენატის საგარეო კომიტეტის ადმინისტრაციის ხელმძღვანელი იყო. მას შემდეგ, მისი და ჯო ბაიდენის თანამშრომლობა არაერთხელ გადაიკვეთა. ბლინკენი ობამას ადმინისტრაციაში მნიშვნელოვან პროცესებში იყო ჩართული, მათ შორის ოსამა ბინ ლადენის ლიკვიდაციის და "ისლამური სახელმწიფოს" წინააღმდეგ ომის დროს. საუბრობენ, რომ ბლინკენმა მნიშვნელოვანი წვლილი შეიტანა ერაყიდან ამერიკელი სამხედროების გამოსვლის საქმეშიც. თუმცა, ის წინააღმდეგია სირიიდან ამერიკელი სამხედროების გამოყვანის. გასულ წელს, ენტონი ბლინკენმა თქვა, რომ დაუშვებელი იყო ამერიკას მიეტოვებინა ქურთი მოკავშირეები. მეტიც, მან თქვა, "ეს ქმედება ამერიკას სანდოობას აკარგვინებს". გამოცდილი დიპლომატი ევროპასთან და პარტნიორ/მოკავშირე ქვეყნებთან უფრო მჭირდო თანამშრომლობის მომხრეა და ამერიკის შეერთებული შტატების აქტიურ როლს მიესალმება. მას მიაჩნია, რომ ასეთი თანამშრომლობა ქვეყნისთვის მნიშვნელოვან გეოპოლიტიკურ სურათს ქმნის. აღსანიშნავია, რომ ამერიკის ახალი პრეზიდენტი საქართველოს მხარდაჭერით გამოირჩევა. "ჩვენ, ამერიკის შეერთებული შტატები თქვენს გვერდით ვდგავართ, გაერთიანებული საქართველოს გვერდით. ჩვენ არასდროს ვაღიარებთ აფხაზეთსა და სამხრეთ ოსეთს დამოუკიდებელ სახელმწიფოებად," - განაცხადა ჯო ბაიდენმა წლების წინ საქართველოში ვიზიტის დროს, როცა ამერიკის ვიცე-პრეზიდენტი იყო. ბაიდენი თბილისში მაშინ იმყოფებოდა, როცა ბარაკ ობამას ადმინისტრაციამ რუსეთთან გადატვირთვის პოლიტიკა წამოიწყო. მაშინ, ბაიდენმა საქართველოში ყოფნისას თქვა, რომ მიმდინარე პროცესში რუსეთი საქართველოზე ზეწოლას ვერ გააძლიერებდა - "ეს არ ხდება და არ მოხდება".
მუშავდება საკომპენსაციო პაკეტი, რომელიც მოქალაქეებსა და კონკრეტულ დარგებს შეეხება - თურნავა
ეკონომიკის მინისტრის, ნათია თურნავას ინფორმაციით, მუშავდება საკომპენსაციო პაკეტი, რომელიც როგორც მოქალაქეებს, ასევე იმ დარგებს შეეხება, რომელთა წერტილოვანი შეზღუდვაც შეიძლება საჭირო გახდეს. თურნავას თქმით, მთავრობის სურვილია, ეპიდემიოლოგოური ვითარების გართულებიდან გამომდინარე, წერტილოვანი შეზღუდვები დაბალანესებული იყოს. “ამავდროიულად გვინდა ერთობლივად გადავტეხოთ ის ნეგატიური ტენდენცია, რაც ინფიცირებულთა რაოდენობის ზრდის თვალსაზრისით გვაქვს. პარალელურად ვეძებთ გზებს, ბიზნესი ძალიან არ დავაზარალოთ და მათი გაჯანსაღების ტენდენცია შევინარჩუნოთ. პარალელურ რეჟიმში, ვმუშაობთ საკომპენსაციო პაკეტზე, რომელიც ერთი მხრივ, მოქალაქეებისკენ იქნება მიმართული და მეორეს მხრივ, იმ დარგებისკენ, რომელთა პრობლემებსაც ვხედავთ, ვხვდებით მათ ყოველდღიურად და წერტილოვანი შეზღუდვა მოგვიწევს“, - განაცხადა ნათია თურნავამ.
აშშ-ს ელჩის რეზიდენციაში ოპოზიციური პარტიების ლიდერებთან ინდივიდუალური შეხვედრები მიმდინარეობს
საქართველოში ამერიკის შეერთებული შტატების ელჩის, კელი დეგნანის რეზიდენციაში ოპოზიციური პარტიების ლიდერებთან ინდივიდუალური შეხვედრები მიმდინარეობს. შეხვედრას ევროკავშირის მისიის ხელმძღვანელი კარლ ჰარცელიც ესწრება. როგორც „ლეიბორისტული პარტიის“ ლიდერმა შალვა ნათელაშვილმა ჟურნალისტებთან საუბარში განაცხადა, ისინი ბიძინა ივანიშვილისგან არჩევნების ახალი თარიღის დანიშვნას ელოდებიან. „ოპოზიციურ პარტიებს ხელი გვაქვს დეკლარაციაზე მოწერილი, რომლის თანახმადაც, არავინ ვაპირებთ ამ გზით შეთითხნილ პარლამენტში შესვლას და ხელახალ არჩევნებს ვითხოვთ. შესაბამისად, ველოდებით ივანიშვილისგან ახალი არჩევნების თარიღს და მხოლოდ ამ თემაზე შეიძლება იყოს კონსულტაციები. შეთანხმების რესურსი რა თქმა უნდა, არის და ეს გახლავთ ივანიშვილის მილიარდები ჩვენგან მოპარული დაბანდებული ევროპა-ამერიკის ბანკებში, არ დაავიწყდეს, სად ინახება მისი სიმდიდრე. მესამე რაუნდამდეც, მეორე და პირველ რაუნდამდეც იყო ერთი-ერთზე კონსულტაციები იმ ლიდერებთან, ვისთანაც ეს საჭიროდ ჩაითვალა. შესაბამისად, ამის რეგალამენტაცია შეუძლებელი გახლავთ, ვინაიდან ფასილიტატორი ელჩები თავისი პრობლემების წინაშე დგანან, მათი ამოცანაა, რაც შეიძლება მალე გამოვიდეთ შექმნილი ჩიხური ვითარებიდან, დღეს ასე ჩათვალეს საჭიროდ. არ ვიცი ამას, მესამე რაუნდი დაერქმევა, თუ მეხუთე, მაგრამ ველოდებით ივანიშვილის წარომადგენლებს უკვე წინადადებით, რომ ამა და ამ დროს ინიშნება არჩვენები და არსებული საარჩევნო კომისიების ბუნდღა არ იქნება ქართულ რეალობაში. ინდივიდუალური შეხვედრების შემცვლელი ფორმატი საკაცობრიო დიპლომატიამ ვერ გამონახა. სად ერთი-ერთზე კონტაქტი, სადაც ბევრად იოლადაა შესაძლებელი მეტი არგუმენტები გადმოალაგო შენი არგუმენტების დასაცავად და სად, მრავალფორმატიანი კონსულტაცია, სადაც რეგლამენტიც და დროც შეზღუდულია. ისევ ჩვენ გვიფრთხილდებიან ელჩები, როცა გვაძლევენ საშუალებას, უფრო ფართო და მეტი არგუმენტებით დავუსაბუთოთ ჩვენი პოზიციები“, - განაცხადა ნათელაშვილმა.
ნახიჩევანის ავტონომიურ რესპუბლიკაში მიმავალი რკინიგზის გახსნის დავალება უკვე გაცემულია - ალიევი
აზერბაიჯანის პრეზიდენტის, ილჰამ ალიევის თქმით, ნახიჩევანის ავტონომიურ რესპუბლიკაში მიმავალი რკინიგზის გახსნის დავალება უკვე გაცემულია. ამის შესახებ განცხადება ილჰამ ალიევმა სატელევიზო მიმართვის დროს გააკეთა, რომელიც ქელბაჯარის რაიონში აზერბაიჯანის არმიის შესვლას ეხებოდა. ამ რაიონზე კონტროლი, აზერბაიჯანის პრეზიდენტის, სომხეთის პრემიერ-მინისტრისა და რუსეთის პრეზიდენტის მიერ 9 ნოემბერს ხელმოწერილი შეთანხმების საფუძველზე, აზერბაიჯანს გადაეცა. „ჩვენ ისევ აღვადგენთ ყველა რაიონს და ქალაქს. დიდი გეგმები გვაქვს. უკვე დაიწყო ქალაქ შუშაში მიმავალი ახალი გზის მშენებლობა. ეს გზა ფიზულის რაიონიდან დაიწყება და ხოჯევანის რაიონის ნაწილზე გაივლის. მე უკვე გავეცი განკარგულება, რომ ეს გზა უახლოეს ხანში გაიყვანონ. ეს რთული პროცესია, მაგრამ ამას შევძლებთ. ჩვენ აღვადგენთ რკინიგზასაც. მათ შორის, წინასწარ გაცემულია დავალება, რომ დაიწყოს ნახიჩევანის ავტონომიური რესპუბლიკაში მიმავალი რკინიგზის აღდგენა“, – განაცხადა ილჰამ ალიევმა.
დამატებითი შეზღუდვების ჩამონათვალი, ხვალ გახდება ცნობილი
კორონავირუსის პანდემიის გამო დაწესებული დამატებითი შეზღუდვების შესახებ საზოგადოებისთვის ხვალ გახდება ცნობილი. ამის შესახებ ჯანდაცვის მინისტრმა ეკატერინე ტიკარაძემ საკოორდინაციო საბჭოს სხდომის დასრულების შემდეგ განაცხადა. „ჩვენ დღესაც ვაგრძელებთ კონსულტაციებს ბიზნესთან და ყველა სფეროს წარმომადგენელთან, ჩვენ გვაქვს უკვე ორი ვერსია იმასთან დაკავშირებით, თუ რომელ ფორმატში შეიძლება განხორციელდეს შეზღუდვები და ხვალ საზოგადოებისთვის გახდება ცნობილი ეს ინფორმაცია. მნიშვნელოვანია, გავითვალისწინოთ, რომ ის შეზღუდვები, რომელსაც ეპიდემიოლოგები და ექსპერტები სთავაზობენ ჯანდაცვის სამინისტროს და მთავრობას, არ გულისხმობს იმას, რომ ჩვენ ამის შემდეგ ველოდებით ინფიცირებულების რაოდენობის მნიშვნელოვან შემცირებას. ეს იქნება ეტაპობრივი, დავაკვირდებით კლების პროცენტს, როგორი იქნება შედეგი. გარკვეული შეფასების შემდეგ, 2 - კვირიანი პერიოდის შემდეგ, ჩვენ შეიძლება შემოვიღოთ მეტად გამკაცრებული სქემა, ან პირიქით შევეცადოთ ეკონომიკური საქმიანობის მოქნილ გრაფიკზე გადაყვანა“,-აცხადებს ტიკარაძე. მისივე თქმით, მთავრობა დააკვირდება პროცესებს და მაქსიმალურად ეცდება, მოსახლეობა ახალ წელს თავისუფლად შეხვდეს. „გამომდინარე იქედან, რომ ჩვენ ერთის მხრივ ვითვალისწინებთ ზიანს, რაც ადამიანის ჯანმართელობას კოვიდინფექციის მასშტაბური გავრცელების შედეგად შეიძლება მიადგეს, ასევე ჩვენი მოქალაქეების ფსიქოლოგიურ მდგომარეობას ვითვალისწინებთ, როდესაც ყველა ახალ წელსა და შობას ველოდებით. ასევე, რა თქმა უნდა, ბიზნესის აქტიურ ფაზას ვითვალისწინებთ, რომელიც არის დეკემბერში. ჩვენ მიზანი არ არის, იმგვარი და იმ ვადით შეზღუდვები მოხდეს, რომ ყველა ეს კომპონენტი ზარალში მოჰყვეს. აქედან გამომდინარე, ჩვენ, რა თქმა უნდა, დავაკვირდებით პროცესს იმ პერიოდის შემდეგ, რაც შეზღუდვებს დავაწესებთ და მაქსიმალურად ვეცდებით, რომ ჩვენმა მოქალაქეებმა შეძლონ, თავისუფლად და შესაფერისად აღნიშნონ ახალი წელი“, - განუცხადა ჟურნალისტებს ჯანდაცვის მინისტრმა.
საკოორდინაციო საბჭო დიდ ქალაქებში საზოგადოებრივი ტრანსპორტის შეზღუდვაზე მსჯელობს
დაავადებათა კონტროლის ეროვნული ცენტრის დირექტორის, ამირან გამყრელიძის თქმით, საკოორდინაციო საბჭო დიდ ქალაქებში საზოგადოებრივი ტრანსპორტის შეზღუდვაზე მსჯელობს. "მე ჩემს რეკომენდაციებს ვსაუბრობ საკოორდინაციო საბჭოზე. მე გიდასტურებთ, რომ არის მსჯელობა იმასთან დაკავშირებით, რომ საზოგადოებრივი ტრანსპორტი დიდ ქალაქებში შეიზღუდოს". - თქვა გამყრელიძემ. მისივე თქმით, ქვეყანა შევიდა პიკში და ძალიან რთულია ორ კვირაში ან სამ კვირაში ინფიცირებულთა რიცხვის რადიკალური ქვესვლა. „ჩვენ პიკში შევედით, ეს პიკი და აღმასვლა გაგრძელდება, თუ ჩვენ არ მივიღეთ გარკვეული გამკაცრებული ზომები, მაგრამ ხაზს ვუსვამ, რომ არამარტო გამკაცრებული მექანიზმები, არამედ ტესტირების მეტი ხელმისაწვდომობა, უფრო მეტი მზად ყოფნა პირველადი ჯანდაცვის სექტორში და მაქსიმალურად ინფიცირებულთა დაახლოებით 85%-ის მართვა პირველადი ჯანდაცვის სექტორის ანუ ოჯახის ექიმების მიერ, ხოლო ვისაც სჭირდება სტაციონალური დახმარება მათი დახმარება ჰოსპიტალურ სექტორში. ასეთია ზოგადი მიდგომა, რა თქმა უნდა, ახალ ველოსიპედს ვერ გამოვიგონებთ - მივყვებით ამ მიმართულებებს. ჩვენ პიკში შევედით და ამიტომაც უნდა გამკაცრდეს ღონისძიებები და ვფიქრობ, რომ ხვალ უნდა გამოცხადდეს ამის შესახებ”, - განაცხადა გამყრელიძემ. ჯანდაცვის მინისტრის, ეკატერინე ტიკარაძის თქმით, დამატებითი შეზღუდვების შესახებ ხვალ გახდება ცნობილი.
შეიძლება დღეს, დღეში 10 000-მდე ინფიცირებული გვყავდეს - პაატა იმნაძე
შეიძლება დღეს 10 ათასამდე ინფიცირებული გვყავდეს დღეში,- ამის შესახებ დაავადებათა კონტროლის და საზოგადოებრივი ჯანმრთელობის ეროვნული ცენტრის დირექტორის მოადგილემ, პაატა იმნაძემ დღევანდელ ბრიფინგზე განაცხადა. მისი თქმით, ქვეყანაში შეზღუდვების დაწესების შემდეგ, ინფიცირებულების რიცხვი აღარ მოიმატებს. „შეზღუდვების შემდეგ ნაკლებს კი არ დაველოდებით, ინფიცირებულების რიცხვი აღარ მოიმატებს“,-განაცხადა იმნაძემ. მან დაადასტურა ინფორმაცია, რომ საქართველო კორონავირუსის გავრცელების თვალსაზრისით პიკში იმყოფება. „ამ დაავადების ერთ-ერთი ვერაგულობა არის ის, რომ ახასიათებს, როგორც უსიმპტომო მიმდინარეობა, ასევე ძალიან მცირე სიმპტომატიკა შეიძლება გამოუვლინდეს ადამიანების დიდ ნაწილს, რომელიც საერთოდ არ მიაკითხავს სამედიცინო დაწესებულებას იმისთვის, რომ გამოიკვლიოს“,-განაცხადა იმნაძემ.
ევროკავშირი საქართველოსთვის 100 მილიონი ევროს ოდენობის დახმარებას გამოყოფს
დღეს ევროკავშირმა მაკროფინანსური დახმარების პროგრამების ფარგლებში საქართველოს მისი საგადამხდელო ბალანსის მხარდასაჭერად და საბიუჯეტო საფინანსო საჭიროებების შესამსუბუქებლად 100 მილიონი ევროს ოდენობის ტრანში გადმოურიცხა. როგორც საქართველოში ევროკავშირის წარომადგენლობის მიერ გავრცელებულ განცხადებაშია ნათქვამია, მაკროფინანსური დახმარების პროგრამა მიზნად ისახავს მდგრადი საგარეო საფინანსო მდგომარეობის აღდგენას და იგი საერთაშორისო სავალუტო ფონდის დაფინანსების თანმდევია. 2008 წლიდან ევროკავშირმა საქართველოში მაკროფინანსური დახმარების ოთხი ოპერაცია განახორციელა. ამ დახმარების შემდგენელი ნაწილებია: 75 მილიონი ევრო 2020 წლის აპრილში გამოცხადებული მაკროფინანსური დახმარების ახალი პროგრამიდან, რომელიც მიზნად ისახავდა კორონავირუსის პანდემიით გამოწვეული სოციალურ-ეკონომიკური შედეგების შერბილებას; 25 მილიონი ევრო არის ბოლო ტრანში 2018 წლის აპრილში დამტკიცებულ წინა მაკროფინანსური დახმარების პროგრამიდან. საერთო ჯამში, 95 მილიონი ევრო ხელსაყრელი პირობების მქონე სესხების, ხოლო დანარჩენი 5 მილიონი ევრო - გრანტის სახით გაიცემა. მათივე ინფორმაციით, 75 მილიონი ევროს ოდენობის ტრანში კოვიდ-19 პანდემიასთან გასამკლავებლად მიმართული მაკროფინანსური დახმარების პროგრამიდან ევროკავშირის საქართველოს მთავრობასთან რეფორმების განხორციელებასთან დაკავშირებულ შეთანხმებას მოჰყვება. რეფორმები სახელმწიფო ფინანსების მართვის, მმართველობის (განსაკუთრებით მართლმსაჯულების სისტემის დამოუკიდებლობის, ანგარიშვალდებულებისა და ხარისხის ასამაღლებლად), ენერგეტიკის სექტორისა და შრომის ბაზართან დაკავშირებული პოლიტიკის სფეროებში უნდა განხორციელდეს. თუ მთავრობამ ეს შეთანხმებული რეფორმები გაატარა, 2021 წლის დასაწყისში შესაძლებელი იქნება ამ მაკროფინანსური დახმარების პროგრამის ფარგლებში დამატებით 75 მილიონი ევროს გამოყოფა. 2018 წლის აპრილში დამტკიცებული მაკროფინანსური დახმარების პროგრამის ტრანშის მეორე ნაწილი (25 მილიონი ევრო) სესხების (20 მლნ ევრო) და გრანტის (5 მლნ ევრო) სახით გასაცემი თანხებისგან შედგება. პოლიტიკის სფეროში არსებული კონკრეტული შეთანხმებული პირობების შესრულებამ ამ მეორე ტრანშისთვის შესაძლებელი გახდა რეფორმების გატარება სახელმწიფო ფინანსების მართვის, ფინანსური სექტორის, სოციალური და შრომის ბაზართან დაკავშირებული პოლიტიკისა და ბიზნეს გარემოს სფეროებში. ”ევროკავშირი აგრძელებს საქართველოს მხარდაჭერას კოვიდ-19 პანდემიასთან ბრძოლის დროს. ვამაყობთ, რომ ამ თანხებს გამოვყოფთ, რაც ქვეყნის მაკროეკონომიკურ სტაბილურობას უზრუნველყოფს, რათა მთავრობამ თავისი მოქალაქეებისა და კომპანიების საუკეთესო მხარდაჭერაზე ყურადღების გამახვილება შეძლოს. ეს არის ევროკავშირის საქართველოსთვის კოვიდ-19 პანდემიასთან გასამკლავებლად მიმართული უფრო ფართო 1.5 მილიარდი ლარის ოდენობის დახმარების პაკეტის ნაწილი. ასევე მიგვაჩნია, რომ ამ განსაკუთრებულ დახმარებასთან დაკავშირებული შეთანხმებული რეფორმები ხელს შეუწყობს საქართველოს ევროპულ სტანდარტებთან შემდგომი დაახლოვების გრძელვადიან პერსპექტივას და საქართველოს მოქალაქეებისთვის იქნება კონკრეტული სარგებელს მომტანი ისეთ ასპექტებში, როგორიცაა მართლმსაჯულება, შრომის უსაფრთხოება და პენსიები”, - აღნიშნა ევროკავშირის ელჩმა კარლ ჰარცელმა. დღევანდელი ტრანში ევროკავშირის მიერ საქართველოსთვის, იორდანიასა და მოლდოვასთვის უფრო ფართო, 400 მილიონი ევროს ოდენობის მაკროფინანსური დახმარების პაკეტის ნაწილია.
საპატრიარქო - ვინც თავს შეუძლოდ გრძნობს ან რისკის ჯგუფს განეკუთვნება, თავი შეიკავოს მსახურებებზე დასწრებისგან
კორონავირუსის გავრცელების ზრდასთან დაკავშირებით საქართველოს საპატრიარქოს განცხადებას ავრცელებს. მათი განმარტებით, აუცილებელია, ტაძარში ყოფნის დროს მრევლმა დაიცვას დისტანცია და ეკეთოს პირბადე, ხოლო ვინც თავს შეუძლოდ გრძნობს ან რისკის ჯგუფს განეკუთვნება, სჯობს თავი შეიკავოს მსახურებებზე დასწრებისგან. როგორც საპატრიარქოში აღნიშნავენ, ზიარების ან სხვა საჭიროების შემთხვევაში, მათ მოძღვარი სახლში მიაკითხავს. „COVID-19-ის მეორე ტალღის აქტიური გავრცელების გამო, სრულიად საქართველოს კათოლიკოს-პატრიარქის კურთხევით, მივმართავთ საქართველოს ეკლესიის მღვდელმთავრებს, წინამძღვრებს, სასულიერო პირებს: აუცილებელია, ტაძარში ყოფნის დროს მრევლმა დაიცვას დისტანცია და ეკეთოს პირბადე, ხოლო ვინც თავს შეუძლოდ გრძნობს ან რისკის ჯგუფს განეკუთვნება, სჯობს თავი შეიკავოს მსახურებებზე დასწრებისგან. ზიარების ან სხვა საჭიროების შემთხვევაში მათ მოძღვარი სახლში მიაკითხავს. ზოგადად, აუცილებელია, შესრულდეს ყველა ის წესი, რაც პანდემიის I ეტაპის დროს იყო რეკომენდებული და ჩვენი მხრიდან გამოყენებული“, - აღნიშნულია საქართველოს საპატრიარქოს მიერ გავრცელებულ განცხადებაში.
