ძებნის რეზულტატი:
ევროკავშირმა შავი ზღვის წყალქვეშა კაბელის პროექტს ორმხრივი ინტერესის სტატუსი მიანიჭა
ევროკომისიამ 235 საზღვრისპირა ენერგეტიკულ პროექტს საერთო ინტერესის პროექტების (PCI) და ორმხრივი ინტერესის პროექტების (PMI) სტატუსი მიანიჭა - ეს 2023 წლის შემდეგ მეორე ასეთი სიაა. შერჩეულ პროექტებს ევროკავშირის დაფინანსების მისაღებად განაცხადის შეტანა შეეძლებათ. 2022 წლის 17 დეკემბერს აზერბაიჯანმა, საქართველომ, რუმინეთმა და უნგრეთმა ხელი მოაწერეს სტრატეგიული პარტნიორობის ხელშეკრულებას, რომელიც მოიცავს შავი ზღვის ქვეშ 1000 მეგავატიანი წყალქვეშა ენერგეტიკული კაბელის მშენებლობის გეგმებს, რომლის სიგრძე 1195 კილომეტრია. ეს კაბელი აზერბაიჯანსა და საქართველოში გამომუშავებულ მწვანე ელექტროენერგიას რუმინეთში გადასცემს, ხოლო შემდგომ ტრანსპორტირებას უნგრეთსა და ევროპის დანარჩენ ნაწილში მოახდენს, რაც გააძლიერებს ევროპის წვდომას კავკასიის რეგიონიდან განახლებად ენერგიაზე. ბულგარეთმაც გამოთქვა ინტერესი პროექტში მონაწილეობის მიმართ. 2024 წლის სექტემბერში, რუმინეთის გადამცემი სისტემის ოპერატორმა „ტრანსელექტრიკამ“, საქართველოს გადამცემი სისტემის ოპერატორმა „საქართველოს სახელმწიფო ელექტროსისტემამ“, აზერბაიჯანის ენერგოკომპანია „აზერენერჯიმ“ და უნგრეთის ენერგოკომპანია „MVM“-მა შავი ზღვის ქვეშ წყალქვეშა კაბელის გაყვანისთვის ერთობლივი ფირმა შექმნეს.
ევროკავშირის ყოფილი უმაღლესი წარმომადგენელი ფედერიკა მოგერინი დააკავეს - AFP
ევროკავშირის ყოფილი უმაღლესი წარმომადგენელი საგარეო პოლიტიკისა და უსაფრთხოების საკითხებში და ევროპის კოლეჯის მოქმედი რექტორი ფედერიკა მოგერინი კორუფციასთან დაკავშირებით მიმდინარე გამოძიების ფარგლებში დააკავეს. ბელგიის პოლიციამ იტალიელი პოლიტიკოსის გარდა კიდევ ორი პირი დააკავა. ინფორმაციას გამოცემა „ფრანს-პრესი“ წყაროებზე დაყრდნობით ავრცელებს. ცნობისთვის, მანამდე გამოცემა Euractiv-მა ინფორმაცია გაავრცელა, რომ ბელგიის პოლიციამ ევროკავშირის თანხების არამიზნობრივად გამოყენებასთან დაკავშირებით მიმდინარე გამოძიების ფარგლებში ევროკავშირის საგარეო ქმედებათა სამსახურსა და ევროპის კოლეჯში ჩხრეკა ჩაატარა. გამოცემის ინფორმაციით, გამოძიება ცდილობს, დაადგინოს, ევროპის კოლეჯის წარმომადგენლებს წინასწარ ჰქონდათ, თუ არა ინფორმაცია ევროკავშირის დიპლომატიური აკადემიის დაფინანსების მიზნით საჯარო ტენდერის გამოცხადების შესახებ. გამოძიება ევროპის კოლეჯის მიერ ბრიუგეში 3.2 მილიონი ევროს ღირებულების შენობის შეძენის გარემოებებს იკვლევს, რომელშიც ის დიპლომატები ცხოვრობენ, რომლებიც კოლეჯში სწავლობენ. გამოცემას წყაროებმა განუცხადეს, რომ კოლეჯმა შენობა 2022 წელს შეიძინა, იქამდე ცოტა ხნით ადრე, ვიდრე ევროკავშირის საგარეო ქმედებათა სამსახური ტენდერს გამოაცხადებდა და შემდეგ კოლეჯს დაფინანსების სახით 654 000 ევროს გადასცემდა. მოგრეინი საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენლის პოსტს 2014-2019 წლებში იკავებდა, 2022 წლის შემდეგ ის იყო ბრიუგეს დიპლომატიური აკადემიის დირექტორი. განახლება: ბელგიის პოლიციამ ევროკავშირის ყოფილი უმაღლესი წარმომადგენელი საგარეო პოლიტიკისა და უსაფრთხოების საკითხებში და ევროპის კოლეჯის მოქმედი რექტორი ფედერიკა მოგერინი და ევროკავშირის საგარეო ქმედებათა სამსახურის ყოფილი გენერალური მდივანი სტეფანო სანინო პატიმრობიდან გაათავისუფლა. Politico წერს, რომ ბრალდებები არ არის დადასტურებული და მოგერინი, სანინო და დაკავებული სხვა პირი უდანაშაულოდ ითვლებიან მანამ, სანამ სასამართლო მათ დამნაშავედ არ ცნობს.
ევროკავშირი TRIPP-ში ჩართვაზე მოლაპარაკებებს აწარმოებს
ევროკავშირი მოლაპარაკებებს აწარმოებს აშშ-სთან, აზერბაიჯანთან და თურქეთთან TRIPP-ში ევროკავშირის მონაწილეობის შესაძლებლობაზე. ამის შესახებ ევროკავშირის გაფართოების საკითხებში უმაღლესმა კომისარმა მარტა კოსმა განაცხადა. „ეს არის 42-კილომეტრიანი რკინიგზა. ჩვენთვის ძალიან მნიშვნელოვანია, რომ ყველაფერი, რასაც ვაკეთებთ, ეხებოდეს არამხოლოდ ამ 42-კილომეტრიან მონაკვეთს, არამედ, ყველაფერს, რაც აღმოსავლეთისა და დასავლეთის მიმართულებით მდებარეობს და ეს ყველაფერი ერთდროულად უნდა გაკეთდეს,“ - აღნიშნა კოსმა. კოსმა აღნიშნა, რომ სომხურმა მხარემ უნდა წარმოადგინოს სომხეთისთვის პრიორიტეტების სია ამ ყოვლისმომცველი კავშირის უზრუნველყოფის თვალსაზრისით. „ჩვენ გვაქვს საკუთარი იდეები. ამ საკითხებს თურქეთთან და აზერბაიჯანთან განვიხილავთ. ამიტომ, ჩვენთვის აზრი არ აქვს ამის ნაწილ-ნაწილ გაკეთებას. თუმცა ამ მხრივ, ამერიკის შეერთებული შტატების თანამშრომლობა ან მონაწილეობა ასევე ბევრად უფრო მნიშვნელოვანია, ვიდრე უბრალოდ 42-კილომეტრიანი რკინიგზის მშენებლობა,“ - განაცხადა მარტა კოსმა. აშშ „ტრამპის მარშრუტისთვის“ პირველი დაფინანსების გამოყოფას გეგმავს
პუტინმა აშშ-სთან მოლაპარაკებების შემდეგ, უკრაინის სამშვიდობო შეთანხმება უარყო
მედიის ცნობით, ვლადიმერ პუტინმა და აშშ-ის მომლაპარაკებლებმა ვერ მიაღწიეს გარღვევას უკრაინის სამშვიდობო შეთანხმების უზრუნველყოფაში. რუსი ოფიციალური პირების თქმით, მოლაპარაკებები „კონსტრუქციული“ იყო, მაგრამ უკრაინისთვის ტერიტორიული დათმობების საკითხზე „კომპრომისი“ არ არის. ამასთან, რუსეთის პრეზიდენტის თანაშემწემ იური უშაკოვმა განაცხადა, რომ ზოგიერთი ამერიკული წინადადება მეტ-ნაკლებად მისაღები ჩანს, მაგრამ ისინი განხილვას საჭიროებს. ეს მოხდა NATO-ს საგარეო საქმეთა მინისტრების შეხვედრის პარალელურად, ბრიუსელში მიმდინარე სამშვიდობო მოლაპარაკებების განხილვისას. მანამდე პუტინმა განაცხადა, რომ ევროპის სამშვიდობო შეთანხმების მოთხოვნები „მიუღებელია“: „ჩვენ არ ვაპირებთ ევროპასთან ბრძოლას, მაგრამ თუ ევროპას ჩვენთან ბრძოლა სურს, ჩვენ ახლავე მზად ვართ.“ NATO-ს გენერალურმა მდივანმა მარკ რუტემ განაცხადა, რომ რუსეთმა უნდა გააცნობიეროს, რომ უკრაინის დახმარება გაგრძელდება. „თუ პროცესი გაჭიანურდება ან შედეგს ვერ გამოიღებს, მაშინ რუსეთზე ზეწოლის ორი საუკეთესო გზა არსებობს: პირველ რიგში, რუსებმა უნდა გააცნობიერონ, რომ უკრაინის სწრაფი დახმარება გაგრძელდება. დღეს ეს ევროპელებისა და აშშ-ის დამსახურებით ხდება. მეორე, რუსეთზე ეკონომიკური ზეწოლა უნდა შენარჩუნდეს. აშშ და ევროპა ერთად მუშაობენ, რათა სანქციების მეშვეობით რუსეთის ეკონომიკაზე მაქსიმალურ ზეწოლას მიაღწიონ,” - განაცხადა მარკ რუტემ. უკრაინის პრეზიდენტმა ვოლოდიმირ ზელენსკიმ განაცხადა, რომ სამშვიდობო გეგმის პროექტში ზოგიერთი რამ „ჯერ კიდევ უნდა შემუშავდეს“, მაგრამ „ახლა უფრო მეტად, ვიდრე ოდესმე, არსებობს შანსი, რომ ეს ომი დასრულდეს.“ “უკრაინა ამერიკული დელეგაციისგან სიგნალებს დაელოდება მათი რუსეთში შეხვედრების შემდეგ. შეერთებული შტატების დელეგაცია ჩვენთვის პირდაპირ აპირებს ინფორმაციის მოწოდებას ამ შეხვედრების შემდეგ. შემდგომი ნაბიჯები ამ სიგნალებზე იქნება დამოკიდებული. ამა თუ ის სახეობის სიგნალებს მივიღებთ. თუ სიგნალები გარკვეულად იმუშავებენ - თუ ეს სამართლიანი იქნება ჩვენს პარტნიორებთან - მაშინ შეიძლება ძალიან მალე შევხვდეთ ამერიკულ დელეგაციას. რა დონეზე - ვნახავთ, დამოკიდებულია სიგნალებზე. თუ სიგნალები გლობალური, მაგრამ სწრაფი გადაწყვეტილებების შესაძლებლობასა და შანსს ხსნიან, მაშინ შეხვედრები უფრო მაღალ დონეზე გაიმართება. მზად ვარ ყველანაირი სიგნალების მისაღებად და მზად ვარ პრეზიდენტ ტრამპთან შეხვედრისთვის. ყველაფერი დღევანდელ საუბრებზეა დამოკიდებული,” - წერს ზელენსკი. „ვცდილობთ ვნახოთ, შესაძლებელია თუ არა ომის დასრულება ისე, რომ დაცული იყოს უკრაინის მომავალი, რაზეც ორივე მხარე შეთანხმდება, - ამის შესახებ აშშ-ის სახელმწიფო მდივანმა, მარკო რუბიომ Fox News-თან ინტერვიუში განაცხადა. „ვფიქრობ, გარკვეული პროგრესი გვაქვს, მაგრამ ჯერ იქამდე არ მივსულვართ“, - აღნიშნა რუბიომ. კითხვას, რამდენად დარწმუნებულია მშვიდობის პერსპექტივაში, რუბიომ უპასუხა,: „რთულია ამ საკითხზე დარწმუნების დონის განსაზღვრა, რადგან საბოლოო ჯამში, რუსეთის შემთხვევაში, გადაწყვეტილებები მხოლოდ პუტინმა უნდა მიიღოს. პუტინმა და არა მისმა მრჩევლებმა. მხოლოდ პუტინს შეუძლია ამ ომის დასრულება რუსეთის მხრიდან,“ - აღნიშნა რუბიომ. 2 დეკემბერს, რუსეთის პრეზიდენტი ვლადიმერ პუტინი და აშშ-ის პრეზიდენტ დონალდ ტრამპის სპეციალურ წარმომადგენელ სტივ უიტკოფსა და პრეზიდენტის სიძეს, ბიზნესმენ ჯარედ კუშნერს შეხვდა. შეხვედრა 5 საათზე მეტხანს გაგრძელდა. 2 დეკემბრის შეხვედრას წინ უძღოდა არაერთი შეხვედრა და მოლაპარაკება როგორც ვაშინგტონსა და კიევს, ისე კიევსა და ევროპის ქვეყნებს შორის. პირველ დეკემბერს ფლორიდაში უკრაინის დელეგაციას უმასპინძლა აშშ-ის სახელმწიფო მდივანმა მარკო რუბიომ, ტრამპის საგანგებო წარგზავნილ სტივ უიტკოფთან და ჯარედ კუშნერთან ერთად. უკრაინის დელეგაციას ეროვნული უსაფრთხოებისა და თავდაცვის საბჭოს მდივანი რუსტემ უმეროვი უძღვებოდა. უმეროვმა შეხვედრის შემდეგ განაცხადა: "ეს შეხვედრა იყო პროდუქტიული და წარმატებული". პარალელურად ევროპის ქვეყნებში შეხვედრებს მართავდა უკრაინის პრეზიდენტი ვოლოდიმირ ზელენსკი. 2 დეკემბერს, ირლანდიაში ყოფნისას, აშშ-დან დაბრუნებული უკრაინის დელეგაციის წევრებთან პირისპირ შეხვედრისას მოისმინა მან მაიამიში გამართული შეხვედრის დეტალები. მოგვიანებით, ირლანდიელი კანონმდებლების წინაშე სიტყვით გამოსვლისას, ზელენსკიმ განაცხადა, რომ უკრაინა დღეს ყველაზე ახლოს არის მშვიდობასთან, ვიდრე ოდესმე ყოფილა, რომ ამისი რეალური შანსი არსებობს, მაგრამ ეს შანსი გამოსაყენებელია. "მოგიწოდებთ შეეწინააღმდეგოთ ნებისმიერ გადაწყვეტილებას, რომელიც ასუსტებს რუსეთზე ზეწოლას, სანამ ომი და ოკუპაცია, სიძულვილის პროპაგანდა გრძელდება. რუსეთზე ზეწოლა სრულად უნდა შენარჩუნდეს, რომ რუსეთს არ ეგონოს, ის დაჯილდოვდება ამ ომის, უკრაინის მიწის მიტაცების ან ათასობით უკრაინელი ბავშვის გატაცების გამო," - განაცხადა ზელენსკიმ 2 დეკემბერს ირლანდიის პარლამენტში გამოსვლისას.
მარკო რუბიო: თეორიულად, 10 წელიწადში უკრაინის მთლიანი შიდა პროდუქტი შეიძლება, რუსეთის მშპ-ზე მეტი იყოს
აშშ-ის სახელმწიფო მდივანმა მარკო რუბიომ Fox News-თან ინტერვიუში განაცხადა, რომ თეორიულად, 10 წელიწადში უკრაინის მთლიანი შიდა პროდუქტი შეიძლება, რუსეთის მშპ-ზე მეტი იყოს. „როდესაც პრეზიდენტი ამბობს, რომ ეს ყველაზე მარტივი კონფლიქტია, ვფიქრობ, პრეზიდენტი გულისხმობს იმას, რომ ეს ყველაზე არალოგიკური ომია. თუ ამას ლოგიკურად შეხედავთ, დაასკვნით, რომ ეს ომი უნდა დასრულდეს, რადგან ტრადიციული გაგებით მასში არავინ იმარჯვებს. კვირაში 7000 რუსი ჯარისკაცი იღუპება, უკრაინის მხარეს ნგრევაზე რომ არაფერი ვთქვათ. ახლა რისთვისაც იბრძვიან 30-50 კილომეტრი და დონეცკის რეგიონის 20%-ია. ჩვენ ვცადეთ და გარკვეულ პროგრესსაც მივაღწიეთ, იმის გასარკვევად, თუ რა არის ის, რასაც უკრაინელები დაეთანხმებიან და მათ უსაფრთხოების გარანტიებს მისცემს, რომ თავს არასდროს დაესხმებიან. ვცადეთ, დაგვედგინა, რა არის ის, რაც მათ საშუალებას მისცემს, რომ ეკონომიკა აღადგინონ და ქვეყანა წარმატებული გახდეს. თეორიულად, სწორი ნაბიჯების გადადგმის შემთხვევაში, 10 წელიწადში უკრაინის მთლიანი შიდა პროდუქტი შესაძლოა რუსეთის მშპ-ზე მეტი იყოს,“ - განაცხადა რუბიომ. რუბიოს თქმით, მნიშვნელოვანია, რომ უკრაინა მარიონეტული სახელმწიფო არ გახდეს და ნამდვილად სუვერენული იყოს. „მსგავს საკითხებს განვიხილავთ: ომის დასრულება, იმის უზრუნველყოფა, რომ მათ თავს არასდროს დაესხმებიან, უკრაინის ხანგრძლივი სუვერენიტეტისა და დამოუკიდებლობის დაცვა, რომ ის მარიონეტული სახელმწიფო არ გახდეს, ეკონომიკის არა მხოლოდ აღდგენა, არამედ აყვავება. სწორედ ამის მიღწევას ვცდილობთ,“ - განაცხადა აშშ-ის სახელმწიფო მდივანმა.
თურქეთმა სომხეთთან სახმელეთო საზღვარი შესაძლოა, ექვს თვეში გახსნას - Bloomberg
Bloomberg-ის ცნობით, თურქეთი სომხეთთან სახმელეთო საზღვრის მომდევნო ექვსი თვის განმავლობაში გახსნას განიხილავს. სააგენტო საკითხზე ინფორმცირებულ წყაროებზე დაყრდნობით წერს, რომ ცივი ომის ეპოქის ევროპაში უკანასკნელი დახურული საზღვარი გაიხსნება, რითაც კავკასიაში ვაჭრობის განახლება შესაძლებელი გახდება. თურქეთმა სომხეთთან საზღვარი 1993 წელს დახურა აზერბაიჯანის სოლიდარობის ნიშნად. სამხრეთ კავკასიის ეს ზღვაზე გასასვლელი არმქონე მთიანი რეგიონი აზერბაიჯანს საბჭოთა კავშირის დაშლის შემდეგ მალევე გამოეყო, რამაც ათწლეულების განმავლობაში მიმდინარე კონფლიქტი გამოიწვია. წელს აშშ-ის პრეზიდენტმა დონალდ ტრამპმა ხელი მოაწერა ერთობლივ სამშვიდობო დეკლარაციას სომხეთისა და მეზობელი აზერბაიჯანის ლიდერებთან, კონფლიქტის დასრულების მიზნით. თურქეთის საგარეო საქმეთა მინისტრმა ჰაკან ფიდანმა გასულ თვეში განაცხადა, რომ თურქეთი აზერბაიჯანსა და სომხეთს შორის საბოლოო სამშვიდობო შეთანხმების გარეშე ურთიერთობებს არ აღადგენს. „თუ ახლავე მოვაწესრიგებთ ურთიერთობებს, სომხეთს სამშვიდობო შეთანხმების ხელმოწერის უმთავრეს მიზეზს წავართმევთ,“ - განმარტა ფიდანმა. სომხეთისა და თურქეთის საგარეო საქმეთა სამინისტროებმა Bloomberg-ის ინფორმაციაზე ამჯერად კომენტარის თხოვნას არ უპასუხეს.
სენატის უმრავლესობის ლიდერმა, თავდაცვის ავტორიზაციის აქტში „MEGOBARI აქტის“ დამატებაზე, სპიკერ ჯონსონის თხოვნა დაბლოკა - The Hill
The Hill-ი წყაროებზე დაყრდნობით ავრცელებს ინფორმაციას, რომ აშშ-ის სენატის უმრავლესობის ლიდერმა ეროვნული თავდაცვის ავტორიზაციის აქტში „MEGOBARI აქტის“ დამატების შესახებ წარმომადგენელთა პალატის სპიკერის თხოვნა დაბლოკა. გამოცემის ინფორმაციით, აშშ-ის წარმომადგენელთა პალატის სპიკერმა მაიკ ჯონსონმა („რესპუბლიკური პარტია“) აშშ-ის სენატის უმრავლესობის ლიდერს, ჯონ ტუნის („რესპუბლიკური პარტია“) პირადი თხოვნით გასულ თვეში მიმართა. ამავე წყაროს ცნობით, ბოლო სამი თვის განმავლობაში ტუნიმ „MEGOBARI აქტის“ ეროვნული თავდაცვის ავტორიზაციის აქტში (NDAA) დამატების თხოვნა უკვე მეორედ დაბლოკა. The Hill-ი წერს, რომ „MEGOBARI აქტის“ მხარდასაჭერად ჯონსონის ჩარევა მოულოდნელი იყო. „სპიკერი ჯონსონის ლობირება მისასალმებელი იყო, თუმცა არსაიდან გაჩნდა. ვფიქრობდით, რომ კანონპროექტი მკვდარი იყო, მას შემდეგ რაც ტუნიმ იგი სექტემბერში დაბლოკა. ვცადეთ, რომ კანონპროექტი სპიკერის თხოვნით ბოლო წამს NDAA-ში შეგვეტანა, თუმცა ტუნის წინააღმდეგობა ვერ გადავლახეთ“, - განუცხადა გამოცემას ერთ-ერთი კონგრესმენის თანაშემწემ. წყაროების თქმით, ჯონსონი 21 ნოემბრის შემდეგ ცდილობდა, რომ თანაშემწეები მხარდაჭერისთვის „რესპუბლიკელებსა“ და „დემოკრატებს“ დაკავშირებოდნენ, რათა „MEGOBARI აქტის“ NDAA-ში დამატება მომხდარიყო. „ტუნიმ კატეგორიული უარი განაცხადა,“ - აღნიშნა ერთ-ერთმა თანაშემწემ. ცნობისთვის, The Hill-მა ჯერ კიდევ სექტემბერში გაავრცელა ინფორმაცია, რომ სენატის უმრავლესობის ლიდერმა ჯონ ტუნიმ „MEGOBARI აქტის“ აშშ-ის ეროვნული თავდაცვის ავტორიზაციის აქტში დამატება სენატორი მარკუეინ მალინის („რესპუბლიკური პარტია“) თხოვნით დაბლოკა. ჯონსონისა და ტუნის ოფისებმა უარი თქვეს კომენტარის გაკეთებაზე.
ევროკომისარი მარტა კოსი სომხეთი-აზერბაიჯანი-თურქეთი-ევროკავშირის ფორმატის შექმნის წინადადებით გამოვიდა
ევროკავშირის გაფართოების საკითხების კომისარი მარტა კოსი გამოვიდა წინადადებით, რომ შეიქმნას ოთხმხრივი ფორმატი – სომხეთი-აზერბაიჯანი-თურქეთი-ევროკავშირი, რომელიც სატრანსპორტო კავშირების საკითხებზე იმუშავებს. ამის შესახებ კოსმა სომხეთის საგარეო საქმეთა მინისტრ არარატ მირზოიანთან და ევროკავშირის საგარეო პოლიტიკისა და უსაფრთხოების საკითხების უმაღლეს წარმომადგენელ კაია კალასთან ერთობლივ პრესკონფერენციაზე განაცხადა, როდესაც უპასუხა აზერბაიჯანული მედიის შეკითხვას იმის შესახებ, თუ რას გააკეთებს ევროკავშირი შუა დერეფნის განვითარებისთვის. მან განაცხადა, რომ „ტრამპის მარშრუტი“ (TRIPP დერეფანი) სატრანსპორტო კავშირის ერთ-ერთი კომპონენტია, მაგრამ ის უნდა იყოს დაკავშირებული როგორც დასავლეთთან, ასევე, აღმოსავლეთთან. „ოქტომბერში დავიწყეთ ამ თემის განხილვა. დღეს მინისტრს ვთხოვე, წარმოგვედგინა სომხეთის პრიორიტეტები ტრანსპორტის დაკავშირებადობის დღის წესრიგში და შემდეგ, ერთად განვიხილავთ მათ,“ – აღნიშნა კოსმა. მისი თქმით, შესაძლებელია, გადაიდგას მრავალი ნაბიჯი დაკავშირებადობის მიმართულებით, თუმცა ეს შესაძლებელი იქნება მხოლოდ მშვიდობიან გარემოში. ბრიუსელში გაიმართა სომხეთ-ევროკავშირის პარტნიორობის საბჭოს მეექვსე შეხვედრა. შეხვედრის შედეგებით სომხეთმა და ევროკავშირმა ხელი მოაწერეს სტრატეგიული პარტნიორობის ახალ დღის წესრიგს. დოკუმენტს ხელი მოაწერეს სომხეთის საგარეო საქმეთა მინისტრმა არარატ მირზოიანმა და ევროკავშირის საგარეო და უსაფრთხოების პოლიტიკის საკითხების უმაღლესმა წარმომადგენელმა კაია კალასმა. დოკუმენტი ცვლის 2017 წლის პარტნიორობის პრიორიტეტებს და ადგენს უფრო ამბიციურ გზამკვლევს, რომელიც ეფუძნება ყოვლისმომცველი და გაფართოებული პარტნიორობის შეთანხმებას (CEPA). ევროკავშირი სომხეთს ენერგეტიკული დივერსიფიკაციისა და არჩევნებზე უცხოური ჩარევის საწინააღმდეგოდ, ფინანსურ დახმარებას გამოუყოფს
