ახალი ამბები
თამარ გაბუნია: დღემდე მოქმედ 62 ონლაინკლინიკას კვირის ბოლომდე 40 ონლაინკლინიკა დაემატება
"დღემდე მოქმედ 62 ონლაინკლინიკას კვირის ბოლომდე დაემატება 40 ონლაინკლინიკა, რათა ინფიცირებულებს ოჯახის ექიმებისგან კონსულტაცია სათანადოდ გაეწიოთ", - ამის შესახებ საქართველოს ჯანდაცვის მინისტრის მოადგილემ თამარ გაბუნიამ ჟურნალისტებთან განაცხადა. მისივე თქმით, ჰოსპიტალური სექტორი მობიზებული რჩება. „ჰოსპიტალური სექტორის მობილიზებას. ჰოსპიტალური სექტორი მობიზებული რჩება. ჩვენ გავიარეთ კორონავირუსის რამდენიმე ტალღა, ამ პირობებში, როდესაც ვიცით, რომ „ომიკრონი“ ძირითადად შედარებით მსუბუქი, საშუალო სიმძიმისაა, რომლის მართვაც შესაძლებელია ბინაზე, განსაკუთრებით მნიშვნელოვანია პირველადი ჯანდაცვის მობილიზება. ამ მიმართულებით მუშაობა ჯერ კიდევ დეკემბერში დაიწყო, როდესაც ყველა ოჯახის ექიმი არის გადამზადებული კოვიდის მართვის საკითხებში. დღეს თუ მუშაობს 62 ონლაინკლინიკა, კვირის განმავლობაში კიდევ დაემატება 40 ონლაინკლინიკა, რათა ქსელი მაქსიმალურად იყოს გაშლილი და ყველა ადამიანს ჰქონდეს თავისი ოჯახის ექიმისგან კონსულტაციის მიღების საშუალება“, – განაცხადა თამარ გაბუნიამ.
სამთო კურორტებზე განსაკუთრებულად მომატებული ინფიცირების შემთხვევების გამო, საკოორდინაციო საბჭომ რეკომენდაციები გასცა
უწყებათაშორის საკოორდინაციო საბჭოსთან არსებული ოპერაციული შტაბის უფროსმა გიორგი ღიბრაძის თქმით, ტენდენცია აჩვენებს, რომ სამთო კურორტებზე განსაკუთრებულადაა მომატებული ინფიცირების შემთხვევები და ამიტომ, საბჭოს რეკომენდაციაა, რომ კურორტზე მყოფმა დამსვენებლებმა რეგულაციები, მათ შორის პირბადის ტარების წესი დაიცვან. “უწყებათაშორის საკოორდინაციო საბჭოზე განხილული იქნა ეპიდვითარება და მოგახსენებთ რამდენიმე რეკომენდაციას, რომლებიც დღეს განვიხილეთ და რომელთა შესრულებაც მნიშვნელოვანი იქნება, რათა ეპიდემიოლოგიური სიტუაცია კიდევ უფრო არ გაუარესდეს. ტენდენცია აჩვენებს, რომ სამთო კურორტებზე განსაკუთრებულადაა მომატებული ინფიცირების შემთხვევები, ამიტომ ძალზე მნიშვნელოვანია, რომ ვინცს სამთო კურორტებზე დასასვენებლადაა ჩასული, დაიცვას რეგულაციები, რაც ქვეყანაშია. განსაკუთრებით აქცენტი უნდა გაკეთდეს პირბადის ტარებაზე. ამასთან, გრძელდება ორასლარიანი წახალისება 50 წელზე ზემოთ პირებისთვის. მნიშვნელოვანია, ვაქცინაციის პროცესის კიდევ უფრო მეტად ინტენსიფიკაცია და „ბუსტერ“ დოზის გაკეთება“, - განაცხადა გიორგი ღიბრაძემ
თამარ გაბუნიას თქმით, რამდენიმე დღეში საკარანტინო პერიოდის განახლებული ვადები ჩამოყალიბდება
ჯანდაცვის მინისტრის პირველი მოადგილის, თამარ გაბუნიას განცხადებით, მომავალი რამდენიმე დღის განმავლობაში საკარანტინო პერიოდის განახლებული ვადები ჩამოყალიბდება. როგორც გაბუნიამ განმარტა, საკარანტინო ვადების ცვლილება განპირობებულია „ომიკრონის“ შტამის განსხვავებული მიმდინარეობით. „ჩვენ, როგორც მოგეხსენებათ, მივყვებით ევროპისა და ამერიკის დაავადებათა კონტროლისა და პრევენციის ცენტრის პროტოკოლებს საკარანტინო ვადებთან მიმართებით. სამინისტროში განხილვები და კონსულტაციები დაწყებულია. დღეს, ხვალ, საბოლოოდ ჩამოყალიბდება უკვე განახლებული ვადები კარანტინთან მიმართებით", - განაცხადა ხაზარაძემ. ასევე წაიკითხეთ: საქართველოში COVID19-ით ინფიცირების 5486 ახალი შემთხვევა დაფიქსირდა, გარდაიცვალა 46 პაციენტი
თამარ გაბუნია: სასწავლო პროცესის გადავადებასთან დაკავშირებით რეკომენდაცია ჯერჯერობით არ გვაქვს
დაავადებათა კონტროლის ეროვნული ცენტრი სასწავლო პროცესის გადავადებასთან დაკავშირებით რეკომენდაციას ჯერჯერობით არ იძლევა, – ამის შესახებ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე თამარ გაბუნიამ უწყებათაშორისი საკოორდინაციო საბჭოს დასრულების შემდეგ ბრიფინგზე განაცხადა. „დაავადებათა კონტროლის ეროვნული ცენტრი სასწავლო პროცესის გადავადებასთან დაკავშირებით რეკომენდაციას ჯერჯერობით არ იძლევა. ყველაფერი განხორციელდება ისევე, როგორც იყო დაგეგმილი. თუ დადგა ამის საჭიროება, რა თქმა უნდა, საბჭო ამ საკითხს დაუბრუნდება“, – განაცხადა თამარ გაბუნიამ.
დღეიდან მედიკამენტების 500-ლარიანი ვაუჩერის პროგრამა ამოქმედდა
მიმდინარე წლის ერთ-ერთი პირველი პროგრამა, რომელიც დღეიდან ამოქმედდება, მედიკამენტების 500-ლარიანი ვაუჩერის პროგრამაა, - ამის შესახებ დედაქალაქის მერმა, კახა კალაძემ მუნიციპალიტეტის მთავრობის დღევანდელ სხდომაზე განაცხადა. მისი თქმით, ამ პროგრამის ბენეფიციარები თბილისში რეგისტრირებული საპენსიო ასაკის მოქალაქეები იქნებიან, რომელთა ოჯახების სოციალური სარეიტინგო ქულა 200 000–ს არ აღემატება. „ეს არის ყოველწლიური და არა ერთჯერადი ვაუჩერი, რომლის გამოყენება ბენეფიციარებს მათი შეხედულებისამებრ, ექიმის დანიშნულებიდან გამომდინარე, მთელი წლის განმავლობაში, ლიმიტის ამოწურვამდე შეეძლებათ. მოქალაქეს ვაუჩერის მისაღებად მერიაში ან რაიონის გამგეობაში მისვლა არ დასჭირდება და კრიტერიუმების დაკმაყოფილებისთანავე, ავტომატურად გახდება პროგრამის მოსარგებლე“, - განაცხადა კახა კალაძემ. ამასთან, მთავრობის სხდომაზე დედაქალაქის მერმა აღნიშნული ვაუჩერი და საინფორმაციო ბუკლეტი წარადგინა, რომლის დარიგებაც გამგეობის თანამშრომლებს დაავალა.
მამუკა ხაზარაძე: როგორც არ უნდა დამთავრდეს დღევანდელი პროცესი, ბიძინა ივანიშვილმა ეს ბრძოლა ჩვენთან წააგო
"როგორც არ უნდა დამთავრდეს დღევანდელი პროცესი და რა გადაწყვეტილებაც არ უნდა მიიღოს მოსამართლემ, მინდა გითხრათ, რომ ბიძინა ივანიშვილმა ეს ბრძოლა ჩვენთან წააგო", - ამის შესახებ „ლელოს“ ლიდერმა, მამუკა ხაზარაძემ თბილისის საქალაქო სასამართლოში, ე.წ. ფულის გათეთრების საქმეზე სასამართლო პროცესის დაწყებამდე განაცხადა. „უფრო მეტი მოტივაცია მოგვცა მე და ჩვენს თანაგუნდელებს, ბადრის. ჩვენ გავაგრძელებთ ბრძოლას, რადგან ის, რაც ქვეყანაში ხდება, ის პოსტსაბჭოური მენტალიტეტი დამთავრდეს ამ ქვეყანაში, რათა ამ ქვეყანამ მიიღოს სამართლიანი არჩევნები, მართლმსაჯულება და სასამართლო და არა ის პროკურატურა და მოსამართლეები, რომლებიც ბიძინა ივანიშვილმა გადმოიბარა წინა ხელისუფლებიდან. თქვენ გახსოვთ, რომ 2012 წელს ბიძინა ივანიშვილის და „ქართული ოცნების“ ერთ-ერთი ლოზუნგი იყო „ღირსების შელახვის საწინააღმდეგოდ გალაშქრება“ და ღირსების აღდგენა იყო მთავარი თემა, რასაც ყველა მხარს ვუჭერდით. პირველი, რაც მან გააკეთა - სწორედ ის ადამიანები გადმოიბარა წინა ხელისუფლებიდან. საუბარია პროკურორებზე, მოსამართლეებზე და მთლიანად სისტემაზე, რომელიც ჩვენს მოქალაქეებს ღირსებას ულახავდა", - განაცხადა ხაზარაძემ. შეგახსენებთ, რომ ე.წ. ფულის გათეთრების საქმეზე ბრალდებულების: მამუკა ხაზარაძის, ბადრი ჯაფარიძისა და ავთანდილ წერეთლის განაჩენი, შესაძლოა, დღეს გამოცხადდეს ცნობისთვის, TBC ბანკის წინააღმდეგ 2008 წლის ტრანზაქციების საქმის შესწავლა პროკურატურამ 2019 წლის იანვარში დაიწყო, თებერვალში კი, საქართველოს ეროვნულმა ბანკმა განცხადება გაავრცელა და TBC ბანკის დამფუძნებლების, მამუკა ხაზარაძისა და ბადრი ჯაფარიძის, სამეთვალყურეო საბჭოდან გადადგომა მოითხოვა. განცხადებაში სებ-ი წერდა, რომ "ამ გადაწყვეტილების მიღების საფუძველია თიბისი ბანკის შემოწმებისას დაფიქსირებული ინტერესთა კონფლიქტის მარეგულირებელი კანონმდებლობის დარღვევის ფაქტები, რომლებიც 2007-2008 წლების ტრანზაქციებს უკავშირდება. საკითხის შესწავლისას გამოვლინდა თიბისი ბანკის სამეთვალყურეო საბჭოს თავმჯდომარისა და მოადგილის მიერ ინტერესთა კონფლიქტის მარეგულირებელი საკანონმდებლო მოთხოვნების დარღვევა". რაც შეეხება ავთანდილ წერეთელს, პროკურატურა ბიზნესმენს ბადრი ჯაფარიძისთვის და მამუკა ხაზარაძისთვის უკანონო შემოსავლების ლეგალიზებაში დახმარებას ედავება. ასევე წაიკითხეთ: მამუკა ხაზარაძე: მე და ბადრი ჯაფარიძეს ისეთ რაღაცას გვაბრალებენ, რაც ბიზნესში ადამიანის მკვლელობის ტოლფასია
ყაზახეთის პრეზიდენტი: ქვეყნიდან სამშვიდობო ძალების გაყვანა ორ დღეში დაიწყება
"სამშვიდობო ძალების ძირითადი მისია წარმატებულად დასრულდა, ორ დღეში დაიწყება სამშვიდობო კონტინგენტის ეტაპობრივი გაყვანა", - ამის შესახებ ყაზახეთის პრეზიდენტმა ყასიმ-ჟომართ თოყაევმა განაცხადა. „კოლექტიური უსაფრთხოების ხელშეკრულების ორგანიზაციის სამშვიდობო ძალების ძირითადი მისია წარმატებულად დასრულდა, ორ დღეში დაიწყება სამშვიდობო კონტინგენტის ეტაპობრივი გაყვანა. კონტინგენტის გაყვანის პროცესი გაგრძელდება არა უმეტეს ათი დღისა“, – განაცხადა თოყაევმა პარლამენტში სიტყვით გამოსვლისას. თოყაევის განცხადებით, ქვეყანაში სახელმწიფო გადატრიალების მცდელობა ჩაიშალა და ამჟამად ყაზახეთში მდგომარეობა სტაბილურია. ცნობისთვის, მანიფესტაციების შედეგად, რომლებიც სწვავზე ფასების მომატებას მოჰყვა, ყაზახეთში მთავრობა გადადგა. ქვეყანაში კომენდანტის საათი 23:00 საათიდან 07:00 საათამდე იმოქმედებს. 5 იანვარს, ყაზახეთის ხელისუფლებამ ქვეყნის მთელ ტერიტორიაზე საგანგებო მდგომარეობა გამოაცხადა. მედიის ცნობით, 5 იანვარს აქციის მონაწილეები ალმათიში ადმინისტრაციის შენობაში შეიჭრნენ. დაიკავეს პრეზიდენტის რეზიდენციაც. პროტესტის მონაწილეებსა და პოლიციას შორის შეტაკება მოხდა. პოლიციამ ცრემლმდენი გაზი გამოიყენა. ქალაქის ადმინისტრაციის, პრეზიდენტის რეზიდენციის და პროკურატურის შენობებს ცეცხლი მოედო. ალმათის მერის მოადგილემ ქალაქში ანტიტერორისტული ოპერაციის დაწყების შესახებ განაცხადა. ამასთან აღნიშნა, რომ აეროპორტი საპროტესტო აქციის მონაწილეებისგან გაათავისუფლეს. ასევე წაიკითხეთ: ყაზახეთის პრეზიდენტმა ალიხან სმაილოვი პრემიერ-მინისტრად დანიშნა ვაშინგტონს ყაზახეთში რუსეთის ხელმძღვანელობით სამხედრო ძალების გაგზავნის მოთხოვნის კანონიერებაზე კითხვები აქვს
საქართველოში COVID19-ით ინფიცირების 5486 ახალი შემთხვევა დაფიქსირდა, გარდაიცვალა 46 პაციენტი
Stopcov.ge-ზე გამოქვეყნებული ინფორმაციის თანახმად, ინტენსიური ტესტირების ფარგლებში, ბოლო 24 საათში ქვეყნის მასშტაბით ჩატარდა 57 546 კვლევა ტესტით, მათ შორის 39 284 კვლევა ანტიგენის ტესტით და 18 262 PCR ტესტით. რაც შეეხება დადებითობის მაჩვენებელს, 10 იანვრის მდგომარეობით, დადებითობის დღიური მაჩვენებელი არის 9.53 %, ბოლო 14 დღის - 8.10% ხოლო 7 დღის - 9.63%. ბოლო 24 საათში ვირუსისგან გამოჯანმრთელდა 2 893 პაციენტი, ხოლო ჯამში გამოჯანმრთელებულთა რაოდენობა გაიზარდა 916 421. ბოლო 24 საათში კორონავირუსით გარდაცვალების 46 ახალი შემთხვევა დაფიქსირდა. პანდემიის გავრცელებიდან დღემდე ვირუსს ჯამში 14 264 პირი ემსხვერპლა. დღეს ქვეყანაში გამოვლენილი ინფიცირების 5 486 ახალი შემთხვევიდან: თბილისში გამოვლენილია 2 985 შემთხვევა, აჭარა - 569, იმერეთი - 563, ქვემო ქართლი - 205, შიდა ქართლი - 282, გურია - 145, სამეგრელო - ზემო სვანეთი - 290, კახეთი -192, მცხეთა-მთიანეთი -131, სამცხე-ჯავახეთი - 84, რაჭა-ლეჩხუმი და ქვემო სვანეთი -40. ამ ეტაპზე ინფიცირების მიმდინარე აქტიური შემთხვევა 37 602 საიდანაც: 4 431 ადამიანი მკურნალობს საავადმყოფოში, მათ შორის, თბილისის საავადმყოფოებში - 1 901, აჭარაში - 599, იმერეთში - 774. ამ ეტაპზე მძიმე პაციენტია 1 083 ადამიანი, მათ შორის, თბილისში - 519, აჭარაში - 130, იმერეთში - 254. ხელოვნური სუნთქვის აპარატზეა 281 პაციენტი, მათგან თბილისში - 161, აჭარაში - 39, იმერეთში - 25. 1 801 ადამიანი მოთავსებულია კლინიკურ-სასტუმროებში, მათ შორის 1 192 - თბილისში, 426- აჭარაში. 31 370 ადამიანი სახლში მკურნალობს. საკარანტინე სივრცეებში მოთავსებულია 69 ადამიანი, მათ შორის, თბილისში - 65, ხოლო აჭარაში - 4. სულ 2020 წლის 6 ოქტომბრიდან - მ/წ 10 იანვრის პერიოდში, სახელმწიფო საზღვრიდან საკარანტინე სივრცეებში გადაყვანილია - 25 299 პაციენტი. ამ ეტაპისთვის თვითიზოლაციაში იმყოფება 30 835 ადამიანი.
კვიპროსის სანაპიროსთან 6.6 მაგნიტუდის სიმძლავრის მიწისძვრა მოხდა
კვიპროსის სანაპიროსთან ძლიერი მიწისძვრა გამთენიისას მოხდა. ინფორმაციას Times of Israel- ი ავრცელებს. მედიის ცნობით, შეშინებული მოსახლეობა სახლებს ტოვებდა. მიწისქვეშა ბიძგები საბერძნეთში, თურქეთსა და ეგვიპტეშიც იგრძნობოდა.
ყაზახეთის პრეზიდენტმა ალიხან სმაილოვი პრემიერ-მინისტრად დანიშნა
ყაზახეთის პრეზიდენტმა, ყასიმ-ჟომართ თოყაევმა ალიხან სმაილოვის პრემიერ-მინისტრად დანიშვნის განკარგულებას ხელი მოაწერა. ამის შესახებ ინფორმაციას უცხოური მედია ავრცელებს. ამასთან, 5 იანვარს საპროტესტო გამოსვლებისა და არეულობის ფონზე ყაზახეთის პრეზიდენტმა პრემიერ-მინისტრ ასკარ მამინის ხელმძღვანელობით მოქმედი მთავრობა დაითხოვა. ცნობისთვის, მანიფესტაციების შედეგად, რომლებიც სწვავზე ფასების მომატებას მოჰყვა, ყაზახეთში მთავრობა გადადგა. ქვეყანაში კომენდანტის საათი 23:00 საათიდან 07:00 საათამდე იმოქმედებს. 5 იანვარს, ყაზახეთის ხელისუფლებამ ქვეყნის მთელ ტერიტორიაზე საგანგებო მდგომარეობა გამოაცხადა. მედიის ცნობით, 5 იანვარს აქციის მონაწილეები ალმათიში ადმინისტრაციის შენობაში შეიჭრნენ. დაიკავეს პრეზიდენტის რეზიდენციაც. პროტესტის მონაწილეებსა და პოლიციას შორის შეტაკება მოხდა. პოლიციამ ცრემლმდენი გაზი გამოიყენა. ქალაქის ადმინისტრაციის, პრეზიდენტის რეზიდენციის და პროკურატურის შენობებს ცეცხლი მოედო. ალმათის მერის მოადგილემ ქალაქში ანტიტერორისტული ოპერაციის დაწყების შესახებ განაცხადა. ამასთან აღნიშნა, რომ აეროპორტი საპროტესტო აქციის მონაწილეებისგან გაათავისუფლეს. ასევე წაიკითხეთ: მედიის ინფორმაციით, ყაზახეთის ყოფილმა პრეზიდენტმა ქვეყანა დატოვა რუსეთის სამხედრო ავიაციამ ყირგიზეთიდან ყაზახეთში 150 ჯარისკაცი ჩაიყვანა ვაშინგტონს ყაზახეთში რუსეთის ხელმძღვანელობით სამხედრო ძალების გაგზავნის მოთხოვნის კანონიერებაზე კითხვები აქვს
ე.წ. ფულის გათეთრების საქმეზე ბრალდებულების: მამუკა ხაზარაძის, ბადრი ჯაფარიძისა და ავთანდილ წერეთლის განაჩენი, შესაძლოა, დღეს გამოცხადდეს
ე.წ. ფულის გათეთრების საქმეზე ბრალდებულების: მამუკა ხაზარაძის, ბადრი ჯაფარიძისა და ავთანდილ წერეთლის ბრალდების სისხლის სამართლის საქმეზე განაჩენი, შესაძლოა, დღეს გამოცხადდეს. ამასთან, პროცესი მხარეების რეპლიკებით განახლდება, რის შემდეგაც, ბრალდებულები საბოლოო სიტყვებს წარმოთქვამენ. ცნობისთვის, TBC ბანკის წინააღმდეგ 2008 წლის ტრანზაქციების საქმის შესწავლა პროკურატურამ 2019 წლის იანვარში დაიწყო, თებერვალში კი, საქართველოს ეროვნულმა ბანკმა განცხადება გაავრცელა და TBC ბანკის დამფუძნებლების, მამუკა ხაზარაძისა და ბადრი ჯაფარიძის, სამეთვალყურეო საბჭოდან გადადგომა მოითხოვა. განცხადებაში სებ-ი წერდა, რომ "ამ გადაწყვეტილების მიღების საფუძველია თიბისი ბანკის შემოწმებისას დაფიქსირებული ინტერესთა კონფლიქტის მარეგულირებელი კანონმდებლობის დარღვევის ფაქტები, რომლებიც 2007-2008 წლების ტრანზაქციებს უკავშირდება. საკითხის შესწავლისას გამოვლინდა თიბისი ბანკის სამეთვალყურეო საბჭოს თავმჯდომარისა და მოადგილის მიერ ინტერესთა კონფლიქტის მარეგულირებელი საკანონმდებლო მოთხოვნების დარღვევა". რაც შეეხება ავთანდილ წერეთელს, პროკურატურა ბიზნესმენს ბადრი ჯაფარიძისთვის და მამუკა ხაზარაძისთვის უკანონო შემოსავლების ლეგალიზებაში დახმარებას ედავება. ასევე წაიკითხეთ: ხაზარაძე-ჯაფარიძე-წერეთლის საქმეზე დასკვნითი სასამართლო სხდომა 11 იანვრამდე გადაიდო მამუკა ხაზარაძე პროკურორს: რაღაცაში გაერკვიეთ, რაღაც ზღვარი ხომ არსებობს, უცოდინრობის მამუკა ხაზარაძე: მე და ბადრი ჯაფარიძეს ისეთ რაღაცას გვაბრალებენ, რაც ბიზნესში ადამიანის მკვლელობის ტოლფასია
ევროპარლამენტის პრეზიდენტი გარდაიცვალა
ევროპარლამენტის პრეზიდენტი დავიდ სასოლი გარდაიცვალა. BBC-ის ცნობით,დავიდ სასოლის პრესსპიკერმა განაცხადა, რომ ევროპარლამენტის პრეზიდენტი იტალიაში, ავიანოს საავადმყოფოში იმუნურ სისტემასთან დაკავშირებული სერიოზული პრობლემით 26 დეკემბერს მოათავსეს. ის სექტემბერშიც მკურნალობდა მძიმე პნევმონიის დიაგნოზით და ავადმყოფობის გამო ბოლო პერიოდში რამდენიმე ღონისძიებაც გამოტოვა. დავიდ სასოლი ევროპარლამენტის წევრი 2009 წელს გახდა. 2014-2019 წლებში ევროპარლამენტის ვიცე-პრეზიდენტი იყო. 2019 წლის ივლისში კი ევროპარლამენტის პრეზიდენტად აირჩიეს. მას ვადა მიმდინარე თვეს ეწურებოდა. ამავე თემაზე https://europetime.eu/ka/article/19110-evroparlamentis-prezidenti-klinikashi-gadaiqvanes
უკრაინის უსაფრთხოების სამსახური რუსეთის სპეცსამსახურების აგენტის დაკავების შესახებ იუწყება
უკრაინის უსაფრთხოების სამსახურში რუსეთის სპეცსამსახურების აგენტის დაკავების შესახებ იუწყება. უკრაინული მედია წერს, რომ დაკავებული ოდესაში ტერაქტებს გეგმავდა. უკრაინის უსაფრთხოების სამსახურის განცხადებით, ეჭვმიტანილის მთავარი ამოცანა ოდესის რეგიონში პოლიტიკური ვითარების დესტაბილიზაცია წარმოადგენდა. დაკავებული მოლდოვის მოქალაქე, 47 წლის კაცია, რომელიც, უკრაინული სპეცსამსახურების ცნობით, თავდასხმების შესასრულებლად უკრაინაში თანამზრახველების რეკრუტირებას ცდილობდა. რუსეთის საგარეო საქმეთა და თავდაცვის სამინისტროებში კომენტარი ჯერ არ გაკეთებულა.
მედიის ცნობით, დანიის საგარეო დაზვერვის განყოფილების უფროსი „უაღრესად გასაიდუმლოებული ინფორმაციის გაჟონვის“ საქმეზე დააკავეს
დანიის საგარეო დაზვერვის განყოფილების ხელმძღვანელს, ლარს ფინდსენს, „უაღრესად გასაიდუმლოებული“ ინფორმაციის გაჟონვის საქმეში მონაწილეობის გამო, პატიმრობა შეეფარდა. Reuters-ი დანიის საზოგადოებრივ მაუწყებელზე დაყრდნობით იტყობინება, რომ დანიის სპეცსამსახურების ოთხი ყოფილი და მოქმედი თანამშრომელი ჯერ კიდევ დეკემბერში დააკავეს, ლარს ფინდსენი კი ერთადერთია, რომელიც 4 თებერვლამდე წინასწარ პატიმრობაში დარჩება. ის ბრალს არ აღიარებს. ბრიტანული მედიის ცნობითვე, საქმე ეხება მკაცრად გასაიდუმლოებული ინფორმაციის გასაჯაროებას, სახელმწიფო ღალატის მუხლს. დანიის საზოგადოებრივი მაუწყებელი იუწყება, რომ საუბარია ინფორმაციის მედიისთვის მიწოდებაზე. ოფიციალური პირები ამბობენ, რომ ინფორმაციის გასაჯაროებამ დანიას, ან ევროკავშირისა და NATO-ს რომელიმე ქვეყანას შესაძლოა, სერიოზული ან უკიდურესად სერიოზული ზიანი მიაყენოს. დაკავებულს 12 წლამდე პატიმრობა ემუქრება. ლარს ფინდსენის დაკავების შესახებ ინფორმაცია მას შემდეგ გავრცელდა, რაც სასამართლომ მისი სახელის გასაჯაროებაზე აკრძალვა გააუქმა.
NATO-ს გენერალური მდივნის მოადგილე: საქართველო NATO-ს ღირებული პარტნიორია
საქართველო NATO-ს ღირებული პარტნიორია, განაცხადა NATO-ს გენერალური მდივნის მოადგილემ და დაამატა, რომ ალიანსი მხარს უჭერს ყველა ერის უფლებას, თავისუფლად აირჩიოს საკუთარი უსაფრთხოების ზომები“. „კარგი საუბარი მქონდა საქართველოს საგარეო საქმეთა მინისტრ დავით ზალკალიანთან. განვიხილეთ უკრაინის საზღვართან რუსეთის სამხედროების თავმოყრის საკითხი, NATO-რუსეთის საბჭოს წინ. საქართველო NATO-ს ღირებული პარტნიორია და ჩვენ მხარს ვუჭერთ ყველა ერის უფლებას, თავისუფლად აირჩიოს საკუთარი უსაფრთხოების ზომები“, - აღნიშნულია მირჩა ჯოანას Twitter პოსტში. ამავე თემაზე: დავით ზალკალიანსა და NATO-ს გენერალური მდივნის მოადგილეს შორის სატელეფონო საუბარი გაიმართა
ნედ პრაისი: აშშ დიპლომატიის ერთგულია, თუმცა რუსეთის აგრესიის შემთხვევაში კოორდინირებული პასუხისთვის მზადაა
აშშ-ის სახელმწიფო მდივნის მოადგილის ვენდი შერმანისა და რუსეთის საგარეო საქმეთა მინისტრის მოადგილის სერგეი რიაბკოვის შეხვედრაზე, სახელმწიფო დეპარტამენტში კომენტარი გაკეთდა. პრესსპიკერ ნედ პრაისის თქმით, ჟენევაში აშშ-ის დელეგაციამ მოისმინა რუსეთის შეშფოთება, თავის მხრივ დააფიქსირა თავისი შეშფოთება და წარმოადგინა თავისი იდეები ორმხრივ ქმედებებზე, სტრატეგიული სტაბილურობის გასაუმჯობესებლად. მდივნის მოადგილე შერმანმა მკაფიოდ განაცხადა, რომ დიპლომატიური გზა რუსეთისა და შეერთებული შტატების უსაფრთხოების პრობლემების ერთადერთ მტკიცე გადაწყვეტას იძლევა. „სახელმწიფო მდივნის მოადგილე ვენდი შერმანი ხელმძღვანელობდა აშშ-ის უწყებათაშორის დელეგაციას (სახელმწიფო დეპარტამენტის, თავდაცვის დეპარტამენტის, გაერთიანებული შტაბისა და ეროვნული უშიშროების საბჭოს) ჟენევაში, შვეიცარიაში აშშ-რუსეთის სტრატეგიული სტაბილურობის დიალოგის საგანგებო სესიაში მონაწილეობის მისაღებად. რუსეთის დელეგაციას რუსეთის საგარეო საქმეთა მინისტრის მოადგილე სერგეი რიაბკოვი ხელმძღვანელობდა. დღეს ჟენევაში აშშ-ის დელეგაციამ მოისმინა რუსეთის შეშფოთება და თავის მხრივ დააფიქსირა თავისი შეშფოთება და წარმოადგინა თავისი იდეები ორმხრივ ქმედებებზე, სტრატეგიული სტაბილურობის გასაუმჯობესებლად. მდივნის მოადგილე შერმანმა მკაფიოდ განაცხადა, რომ დიპლომატიური გზა რუსეთისა და შეერთებული შტატების უსაფრთხოების პრობლემების ერთადერთ მტკიცე გადაწყვეტას იძლევა. მდივნის მოადგილემ ხაზგასმით აღნიშნა, რომ მიუხედავად იმისა, რომ შეერთებული შტატები ერთგულია დიპლომატიის მიმართ, თავის მოკავშირეებთან და პარტნიორებთან მჭიდრო კოორდინაციით, აშშ მზადაა, თუ რუსეთი უკრაინის წინააღმდეგ აგრესიულ ქმედებებს გააძლიერებს, რუსეთს მნიშვნელოვანი ეკონომიკური და პოლიტიკური ფასის გადახდა დააკისროს. მან ასევე გაიმეორა, შეერთებული შტატები არ განიხილავს ევროპის უსაფრთხოებას ჩვენი მოკავშირეებისა და პარტნიორების მონაწილეობის გარეშე. მდივნის მოადგილე შერმანი 11 იანვარს გაემგზავრება ბრიუსელში, ბელგიაში, სადაც NATO-ს შტაბ-ბინაში, ჩრდილოატლანტიკური საბჭოს წინაშე მოხსენებით გამოვა, ხოლო 11 იანვარს ის ასევე შეხვდება ევროკავშირის პოლიტიკურ და უსაფრთხოების კომიტეტს. მდივნის მოადგილე შერმანი უხელმძღვანელებს აშშ-ის დელეგაციას NATO-რუსეთის საბჭოს (NRC) სხდომაზე 12 იანვარს“, - განაცხადა ნედ პრაისმა.
ვენდი შერმანი: მკაფიოდ ვუთხარი სერგეი რიაბკოვს, რომ უკრაინაში შეჭრის შემთხვევაში რუსეთს დიდი ფასის გადახდა მოუწევს
აშშ-ის სახელმწიფო მდივნის მოადგილემ ვენდი შერმანმა რუს კოლეგასთან შეხვედრის დეტალები ტელეკონფერენციის ფორმატში განიხილა. ამერიკელი დიპლომატის თქმით, შეერთებული შტატები დღევანდელ რიგგარეშე შეხვედრაზე მომზადებული მივიდა, რათა მოესმინა რუსეთის შეშფოთება და თავის მხრივ, აშშ-ის მხარეს გაეზიარებინა თავისი შეშფოთება. შერმანის პოზიციიდან ირკვევა, რომ დიალოგი კვლავ გაგრძელდება და ეს პროცესი საკმაოდ ხანგრძლივი იქნება. ამასთან, შეერთებული შტატების პოზიცია უცვლელია პრინციპულ საკითხებთან მიმართებით - „არავის მივცემთ უფლებას, შეწყვიტოს NATO-ს „ღია კარის“ პოლიტიკა, რომელიც ყოველთვის ცენტრალური იყო NATO-სთვის“, - ეს პასუხია რუსეთის „მოლოდინებზე“, NATO არ გაფართოვდეს აღმოსავლეთით. „ცოტა ხნის წინ, ჟენევაში, ჩვენ დავასრულეთ ორმხრივი სტრატეგიული დიალოგის რიგგარეშე სესია რუსეთის დელეგაციასთან. ჩვენ გვქონდა გულწრფელი და პირდაპირი დისკუსია თითქმის რვა საათის განმავლობაში. ეს არის მესამე შემთხვევა, როდესაც აშშ-რუსეთის სტრატეგიული სტაბილურობის დიალოგი შეიკრიბა მას შემდეგ, რაც პრეზიდენტი ბაიდენი და პრეზიდენტი პუტინი შეხვდნენ გასული წლის ივნისში ჟენევაში. ეს არის მესამე შემთხვევა, როდესაც აშშ-რუსეთის სტრატეგიული სტაბილურობის დიალოგი გაიმართა მას შემდეგ, რაც პრეზიდენტი ბაიდენი და პრეზიდენტი პუტინი შეხვდნენ გასული წლის ივნისში ჟენევაში. შეერთებული შტატები დღევანდელ რიგგარეშე შეხვედრაზე მომზადებული მივიდა, რათა მოესმინა რუსეთის უსაფრთხოების შეშფოთება და ასევე გაგვეზიარებინა ჩვენი შეშფოთება. ჩვენ მოვედით მთელი რიგი იდეებით, რომლითაც ორ ქვეყანა შეძლებდა, გაეუმჯობესებინა სტრატეგიულ სტაბილურობა, რაც შეესაბამება ჩვენს უსაფრთხოების ინტერესებს. შეერთებულმა შტატებმა რუსეთს შესთავაზა კიდევ ერთხელ შეხვედრა ორმხრივი საკითხების უფრო დეტალურად განსახილველად. ჩვენ არავის მივცემთ უფლებას, შეწყვიტოს NATO-ს „ღია კარის“ პოლიტიკა, რომელიც ყოველთვის ცენტრალური იყო NATO-სთვის. ჩვენ უარს არ ვიტყვით ორმხრივ თანამშრომლობაზე სუვერენულ სახელმწიფოებთან, რომლებსაც სურთ შეერთებულ შტატებთან მუშაობა. ჩვენ არ მივიღებთ გადაწყვეტილებებს უკრაინაზე უკრაინის გარეშე, ევროპაზე ევროპის გარეშე და NATO-ზე NATO-ს გარეშე. როგორც ჩვენ ვეუბნებით ჩვენს მოკავშირეებს და პარტნიორებს - "შენ შესახებ შენ გარეშე არაფერი გადაწყდება“. შეერთებული შტატები მოწოდებულია რუსეთთან შინაარსიანი ორმხრივი დიალოგისკენ, ისევე როგორც ჩვენ ვართ მოწოდებული ჩვენს მოკავშირეებთან და პარტნიორებთან კონსულტაციებისა და კოორდინაციისკენ. ჩვენ მზად ვართ, რაც შეიძლება მალე გავაგრძელოთ დისკუსია იმ ორმხრივ საკითხებზე, რომლებიც დღეს გამოვავლინეთ. ჩვენ გვექნება დისკუსიები ჩვენს მოკავშირეებთან და პარტნიორებთან უახლოეს დღეებში და ამ კვირის ბოლოს, ამ დისკუსიებზე ინფორმირებულები, აშშ-ისა და რუსეთის მთავრობები განიხილავენ წინსვლის გზას. რუსმა ოფიციალურმა პირებმა საჯაროდ და პირადად განაცხადეს, რომ მათ სურთ სწრაფი წინსვლა და შეერთებული შტატები მზად არის ამისათვის. ამავდროულად, მოლაპარაკებები რთულ თემებზე, როგორიცაა შეიარაღების კონტროლი, არ შეიძლება, დასრულდეს რამდენიმე დღეში ან თუნდაც კვირაში. ეს არის ის, რაც ჩემს კოლეგას, საგარეო საქმეთა მინისტრის მოადგილეს რიაბკოვს ძალიან კარგად ესმის. ჩვენ უნდა მივცეთ დიპლომატიას და დიალოგს დრო და სივრცე, რომელიც საჭიროა ასეთ რთულ საკითხებში პროგრესის მისაღწევად. ჩვენ ამას რიგგარეშე სხდომა ვუწოდეთ, რადგან ის ჩატარდა ორი საექსპერტო სამუშაო ჯგუფის წინასწარი შეხვედრის გარეშე, რომლის შექმნაზეც მხარეები შეთანხმდნენ ჩვენს ბოლო შეხვედრაზე სექტემბერში. მაგრამ ეს იყო ასევე არაჩვეულებრივი სესია იმ კონტექსტის გამო, რომელშიც ჩვენ აღმოვჩნდით. რუსეთმა 100 000-ზე მეტი ჯარისკაცი დააგროვა უკრაინის საზღვრებთან. იმავდროულად, მოსკოვი აცხადებს, რომ უკრაინა ეძებს კონფლიქტს და იქცევა პროვოკაციულად და არა რუსეთი. სწორედ რუსეთი შეიჭრა უკრაინაში 2014 წელს. სწორედ რუსეთი აგრძელებს ომს აღმოსავლეთ უკრაინაში, რომელმაც თითქმის 14000 უკრაინელი სიცოცხლე შეიწირა. ახლა კი რუსეთის ქმედებები განახლებულ კრიზისს იწვევს არამხოლოდ უკრაინისთვის, არამედ მთელი ევროპისთვის. ერთ ქვეყანას არ შეუძლია, ძალით შეცვალოს მეორის საზღვრები, ან უკარნახოს სხვა ქვეყნის საგარეო პოლიტიკის პირობები, ან აუკრძალოს სხვა ქვეყანას საკუთარი ალიანსების არჩევა. ეს არის საერთაშორისო სისტემის ძირითადი პრინციპები და ეს არის პრინციპები, რომლებსაც რუსეთი წლების განმავლობაში არაერთხელ დათანხმდა. ჩვენ ვიყავით და ვრჩებით მკაფიო პოზიციაზე, რომ შეერთებული შტატები მიესალმება ნამდვილ პროგრესს დიპლომატიის გზით. ჩვენ ასევე გავიმეორეთ, რომ გვჯერა, ნამდვილი პროგრესი შეიძლება მიიღწეს მხოლოდ დეესკალაციის და არა ესკალაციის პირობებში. თუ რუსეთი დარჩება მაგიდასთან და კონკრეტულ ნაბიჯებს გადადგამს დაძაბულობის დეესკალაციისთვის, ჩვენ გვჯერა, რომ პროგრესს მივაღწევთ. მაგრამ თუ რუსეთი დიპლომატიურ გზას დატოვებს, შეიძლება სრულიად აშკარა გახდეს, რომ ისინი სერიოზულად არც არასოდეს მიჰყვებოდნენ დიპლომატიის გზას. ჩვენ მკაფიოდ განვაცხადეთ, რომ თუ რუსეთი კვლავ შეიჭრება უკრაინაში, ამას ექნება მნიშვნელოვანი შედეგები. პრეზიდენტმა ბაიდენმა იგივე უთხრა პრეზიდენტ პუტინს თავის ბოლო სატელეფონო საუბრისას, მე კი ეს მკაფიოდ ვუთხარი საგარეო საქმეთა მინისტრის მოადგილე რიაბკოვს. რუსეთს მკაფიო არჩევანი აქვს გასაკეთებელი. ჩვენ, ყველა დონეზე ვართ კოორდინაციაში ჩვენს მოკავშირეებთან და პარტნიორებთან და გავაგრძელებთ ამას მომავალ დღეებსა და კვირებშიც. ამ კვირაში რუსეთი მოისმენს თანმიმდევრულ გზავნილს შეერთებული შტატებისგან და ჩვენი მოკავშირეებისგან და პარტნიორებისგან - კერძოდ, რუსეთის ვალია, დაძაბულობის დეესკალაცია, რათა ჩვენ გვქონდეს რეალური დიპლომატიური გადაწყვეტილებების პოვნის შანსი“, - აღნიშნა ვენდი შერმანმა.
ევროპარლამენტის პრეზიდენტი კლინიკაში გადაიყვანეს
ევროპარლამენტის პრეზიდენტი დავიდ სასოლი იმუნური სისტემის დისფუნქციის გამო საავადმყოფოში გადაიყვანეს. 65 წლის სასოლი სექტემბერში, პნევმონიის მძიმე ფორმით საავადმყოფოში მოხვდა. ავადმყოფობის გამო მან ბოლო პერიოდში რამდენიმე ღონისძიება გამოტოვა. დავიდ სასოლის ევროპარლამენტის პრეზიდენტის პოსტზე ვადა მიმდინარე თვეს ეწურება.
ევროპული საბჭოს პრეზიდენტმა და ყაზახეთის ლიდერმა ონლაინშეხვედრა გამართეს
ევროპული საბჭოს პრეზიდენტმა, შარლ მიშელმა ყაზახეთის პრეზიდენტთან, ყასიმ-ჟომართ თოყაევთან ვიდეოშეხვედრა გამართა. „პრეზიდენტ თოყაევთან ერთად ყაზახეთში განვითარებული მოვლენები განვიხილეთ. მწუხარება გამოვთქვი დაღუპულთა გამო. ხაზი გავუსვით ევროკავშირისა და ყაზახეთის პარტნიორობის მნიშვნელობას. ასევე სუვერენიტეტის, უსაფრთხოებისა და სტაბილურობისადმი მხარდაჭერას, ადამიანის უფლებებისა და ძირითადი თავისუფლებების სრული პატივისცემით“, - წერს შარლ მიშელი Twitter-ზე. თავის მხრივ, ყასიმ-ჟომართ თოყაევმა აღნიშნა, რომ ყაზახეთი ევროკავშირთან პარტნიორობის გაძლიერებას გააგრძელებს. პრეზიდენტის თქმით, ყაზახეთი უპრეცედენტო აგრესიისა და სახელმწიფოებრიობაზე თავდასხმის წინაშე იყო და დაუყოვნებლივი ზომები მიიღო კონსტიტუციური წესრიგისა და კანონის უზენაესობის აღსადგენად. „ჩვენ არასდროს გამოგვიყენებია და არ გამოვიყენებთ შეიარაღებულ ძალას მშვიდობიანი მომიტინგეების წინააღმდეგ. ყველა ასეთი ბრალდება მცდარია. ყაზახეთი ევროკავშირთან პარტნიორობის გაძლიერებას გააგრძელებს“, - აღნიშნულია თოყაევის Twitter პოსტში. შეგახსენებთ, საწვავზე ფასების მატების გამო, 2 იანვარს დაწყებული მანიფესტაციების შედეგად, ყაზახეთში მთავრობა 5 იანვარს გადადგა. ხელისუფლებამ ქვეყნის მთელ ტერიტორიაზე საგანგებო მდგომარეობა გამოაცხადა. შეტაკებებს მსხვერპლი მოჰყვა. 6 იანვარს, ყაზახეთში, რუსეთის ხელმძღვანელობით, კოლექტიური უსაფრთხოების ხელშეკრულების ორგანიზაციამ ჯარები გაგზავნა.
ენტონი ბლინკენი: ვითხოვთ განმარტებებს ყაზახეთის ხელისუფლებისგან, რატომ მიმართეს ორგანიზაციას, სადაც რუსეთი დომინირებს
აშშ- ყაზახეთისგან განმარტებებს ითხოვს იმის თაობაზე, თუ რატომ იყვნენ იძულებულნი, მიეწვიათ ის ორგანიზაცია, სადაც რუსეთი დომინირებს. საუბარია კოლექტიური უსაფრთხოების ორგანიზაციაზე, რომლის სამხედროებიც რუსეთის ხელმძღვანელობით ყაზახეთში განლაგდნენ. „ყაზახეთის ხელისუფლებას უნდა შეეძლოს, მშვიდობიანად გაუმკლავდეს გამოწვევებს, რომელთა წინაშეც ისინი დგანან, დარწმუნდნენ, რომ დაცულია მშვიდობიანი პროტესტის მონაწილეთა უფლებები, დაიცვან სახელმწიფო ინსტიტუტები და კანონი და წესრიგი, მაგრამ ეს გააკეთონ ადამიანის უფლებების პატივისცემით. ჩვენ გვაქვს რეალური კითხვები იმის თაობაზე, თუ რატომ იყვნენ იძულებულნი, მიეწვიათ ის ორგანიზაცია, სადაც რუსეთი დომინირებს. ვითხოვთ განმარტებებს. მაგრამ ახლა აუცილებელია, რომ ეს ყველაფერი მოგვარდეს მშვიდობიანი გზით, პატივისცემით მათ მიმართ, ვინც ცდილობს თავისი ხმის მიწვდენას ჩვენ გვაქვს რეალური კითხვები იმის თაობაზე, თუ რატომ გრძნობდნენ თავს ვალდებულად, მიეწვიათ ის ორგანიზაცია, სადაც რუსეთი დომინირებს“, - აღნიშნა ბლინკენმა. ასევე წაიკითხეთ მეთიუ ბრაიზა: ყაზახეთის პრეზიდენტი დასავლეთთან რისკავს
