ახალი ამბები
აშშ უკრაინისთვის მილიარდი დოლარის მოცულობის სამხედრო დახმარების პაკეტს ამზადებს - Reuters
შეერთებული შტატები უკრაინისთვის მილიარდი დოლარის მოცულობის სამხედრო დახმარების პაკეტს ამზადებს. ამის შესახებ ორმა ამერიკელმა ოფიციალურმა პირმა Reuters-ს განუცხადა. „დახმარების პაკეტში შედის მანქანები, Stinger-ის საჰაერო თავდაცვის საბრძოლო მასალები, დამატებითი საბრძოლო მასალა მაღალი მოძრავი საარტილერიო სარაკეტო სისტემებისთვის, 155 მილიმეტრიანი საარტილერიო საბრძოლო მასალა, TOW-ს და Javelin-ის ტანკსაწინააღმდეგო საბრძოლო მასალა და სხვა იარაღები, რომლებიც შეიძლება, დაუყოვნებლივ იყოს გამოყენებული ბრძოლის ველზე,“ წერს სააგენტო. აშშ-ის მიერ უკრაინისთვის გადასაცემი იარაღი ევროპის ქვეყნების საწყობებშია - მედია რა შევა დახმარების პაკეტში, რომელსაც აშშ უკრანისთვის ამზადებს შეგახსენებთ, მრავალთვიანი დისკუსიების შემდეგ, აშშ-ის კონგრესის ქვედა პალატამ - წარმომადგენელთა პალატამ მხარი დაუჭირა უკრაინისთვის 60,8 მილიარდი დოლარის სამხედრო დახმარების პაკეტს. კანონპროექტს მხარი წარმომადგენელთა პალატის 311 წევრმა დაუჭრა, 112 წინააღმდეგი იყო. უკრაინის პრეზიდენტი ვოლოდიმირ ზელენსკი რუსეთის წინააღმდეგ უკრაინის „გამარჯვების შანსს“ ხედავს მას შემდეგ, რაც შეერთებული შტატების კონგრესის წარმომადგენელთა პალატამ მიიღო კანონპროექტი, რომელიც კრიტიკულად მნიშვნელოვანია უკრაინის თავდაცვისთვის. რუსეთი ვერ გაიმარჯვებს მაშინაც კი, თუ მისმა სამხედროებმა უკრაინა დაიკავეს“: ორი წელი ომიდან
„ამ კანონპროექტის ისტორიული მნიშვნელობა პოლიტიკას სცილდება“ - ზელენსკი აშშ-ს მადლობას უხდის
უკრაინის პრეზიდენტმა ვოლოდიმირ ზელენსკიმ, მას შემდეგ, რაც აშშ-ის სენატმა დაამტკიცა უკრაინის მრავალმილიარდიანი სამხედრო დახმარების პაკეტი, მადლობა გადაუხადა სენატორებს, უმრავლესობის ლიდერს ჩაკ შუმერს და რესპუბლიკელ ლიდერს მიჩ მაკკონელს, ყველა ამერიკელა და აშშ-ის პრეზიდენტს ჯო ბაიდენს. „ეს კენჭისყრა აძლიერებს ამერიკის როლს, როგორც დემოკრატიის შუქურის და თავისუფალი სამყაროს ლიდერის,“ - აღნიშნა ზელენსკიმ. ზელენსკიმ ასევე განმარტა, რომ მადლიერია ყველა ამერიკელის, ვინც აგრძელებს უკრაინის მხარდაჭერას და აცნობიერებს, რომ "ამ კანონპროექტის ისტორიული მნიშვნელობა სცილდება პოლიტიკას." „შორი მოქმედების იარაღი, არტილერია და საჰაერო თავდაცვა უაღრესად მნიშვნელოვანი იარაღია სამართლიანი სამყაროს სწრაფი აღდგენისთვის," - განაცხადა ზელენკსიმ. პაკეტი, რომელიც უკრაინისთვის 61 მილიარდი დოლარის დახმარებას ითვალისწინებს, კონგრესის წარმომადგენელთა პალატამ მრავალთვიანი დავის შემდეგ, 20 აპრილს მიიღო. სენატის მიერ პაკეტის დამტკიცების შემდეგ კი, ახლა მას ხელი ჯო ბაიდენმა უნდა მოაწეროს.
დრონის თავდასხმის შემდეგ, რუსეთში, სმოლენსკის ნავთობგადამამუშავებელ ქარხანაში ხანძარია
რუსეთის ქალაქ სმოლენსკის ნავთობგადამამუშავებელ ქარხანაში ხანძარია. რეგიონის გუბერნატორმა ვასილი ანოხინმა დაადასტურა, რომ ხანძარი საწვავისა და ენერგეტიკის ობიექტებზე დრონის თავდასხმის შემდეგ გაჩნდა. ადგილობრივების თქმით, იარცევოს რაიონში ნავთობგადამამუშავებელ ქარხანას თავს დაესხნენ. ტელეგრამის არხი Astra თვითმხილველების მიერ გადაღებულ ვიდეოს აქვეყნებს. „დიდი ალბათობით, საწვავისა და ენერგეტიკულ სამოქალაქო ობიექტებზე მტრის თავდასხმის შედეგად, ხანძარი გაჩნდა სმოლენსკის და იარცევოს რაიონებში, საგანგებო სიტუაციების სამინისტრო შედეგების ლიკვიდაციას აწარმოებს," - წერს ანოხინი და მოსახლეობას სიმშვიდისკენ მოუწოდებს, ვინაიდან მისი თქმით საჰაერო თავდაცვის სისტემა მუშაობს. მანამდე რუსული ტელეგრამის არხი SHOT, ადგილობრივებზე დაყრდნობით წერდა, რომ ერთი ან მეტი დრონი სმოლენსკის მახლობლად მდებარე სოფელ რაზდოროში ნავთობის საცავს დაესხა თავს, რასაც ძლიერი ნათება და კვამლი მოჰყვა. „პირველი აფეთქება მოხდა დილის 3:15 საათზე, სოფელ რაზდოროს მახლობლად ნავთობის ბაზის მიდამოში. სამრეწველო ობიექტის მიდამოში აფეთქების ხმა ისმოდა." გასული კვირის ბოლოს სმოლენსკის ოლქის გუბერნატორმა ასევე განაცხადა, დრონის თავდასხმის შემდეგ საწვავ-ენერგეტიკული კომპლექსის ობიექტზე ხანძრის თაობაზე.
რუსეთის თავდაცვის მინისტრის მოადგილე ქრთამის აღების ბრალდებით დააკავეს
რუსეთში თავდაცვის მინისტრის მოადგილე ქრთამის აღების ბრალდებით დააკავეს. შესაბამის ინფორმაცის რუსეთის საგამოძიებო კომიტეტი და რუსული სახელმწიფო გამოცემა “ტასი” სამართალდამცავ ორგანოებზე დაყრდნობით ავრცელებენ. რუსეთის საგამოძიებო კომიტეტი აღნიშნავს, რომ რუსეთის თავდაცვის მინისტრის სერგეი შოიგუს მოადგილე ტიმურ ივანოვი ქრთამის აღების ბრალდებით არის დაკავებული, თუმცა სხვა დეტალებს არ ავრცელებს. რუსეთის პრეზიდენტის სპიკერმა დმიტრი პესკოვმა განაცხადა, რომ ვლადიმირ პუტინს ივანოვის დაკავების შესახებ შეატყობინეს, ხოლო რუსეთის თავდაცვის მინისტრი სერგეი შოიგუ დაკავების შესახებ წინასწარ გააფრთხილეს. ტიმურ ივანოვს რუსეთის თავდაცვის მინისტრის მოადგილის თანამდებობა 2016 წლიდან უკავია. აქამდე ის კომპანია “ობორონსტროის” ხელმძღვანელობდა, რომელიც თავდაცვის უწყებას ექვემდებარება.
სახელმწიფო დეპარტამენტი: მსგავსი სახის საკანონმდებლო აქტივობა ღრმად პრობლემურია და შეუსაბამოა ევროკავშირისკენ მისწრაფებებთან
ვაშინგტონი კვლავ აკრიტიკებს ე.წ. უცხოური აგენტების კანონპროექტს. აშშ-ის სახელმწიფო დეპარტამენტის სპიკერის მოადგილემ ვედანტ პატელმა ტრადიციულ პრესკონფერენციაზე განაცხადა, რომ მსგავსი სახის საკანონმდებლო აქტივობა ღრმად პრობლემურია და შეუსაბამოა ევროკავშირისკენ მისწრაფებებთან. „რაც შეეხება [საქართველოში] პროტესტებს, ჩვენ რა თქმა უნდა მხარს ვუჭერთ იმას, რაც შეერთებულ შტატებში პირველი შესწორების ფარგლებში, ხალხის მშვიდობიანი პროტესტითა და დემონსტრაციით გამოხატვის თავისუფლება იქნებოდა. ჩვენს მოწოდებად ისევ რჩება, რომ ეს მშვიდობიანი იყოს და ჩვენ, რა თქმა უნდა, დავგმობთ ნებისმიერ ნაბიჯებს, რომლებიც ამ სახის პროტესტებს უბიძგებს, გახდეს ძალადობრივი. მაგრამ ეს საბოლოო ჯამში კანონპროექტამდე მიდის, რომელზეც უკვე რამდენიმე კვირაა, ვსაუბრობთ. მსგავსი სახის საკანონმდებლო აქტივობა ღრმად პრობლემურია და შეუსაბამოა ევროკავშირისკენ მისწრაფებებთან. უნდა გახსოვდეთ, რომ იმაზე ვსაუბრობთ, რაც ზეწოლას ახდენს მედია ორგანიზაციებზე, სამოქალაქო საზოგადოების ორგანიზაციებსა და სხვა,” - განაცხადა პატელმა. შეგახსენებთ, ბოლოს, სპეციალური განცხადების გავრცელების შემდეგ, სახელმწიფო დეპარტამენტმა დღეს, 18 აპრილს ტრადიციული პრესკონფერენციის დროსაც გააკრიტიკა ე.წ. უცხოური აგენტების კანონპროექტი. უწყების პრესსპიკერის მთავარმა მოადგილემ ვედანტ პატელმა აღნიშნა, რომ მსგავს კანონებს იყენებენ კრემლი და სხვა რეპრესიული მთავრობები, რათა სამოქალაქო საზოგადოებისა და მედიის სისტემური რეპრესირება მოახდინონ. აშშ ყურადღებით ადევნებს თვალს ვითარებას. ცნობისთვის, „უცხოური გავლენის გამჭვირვალობის“ კანონპროექტის ხელახალ შემობრუნებას ხალხმრავალი პროტესტი მოჰყვა. აქციის მონაწილეები, მათ შორის, ახალგაზრდები, რომლებიც პარლამენტთან ყოველდღე იკრიბებიან, ხელისუფლებას კანონპროექტის უკან გაწვევისკენ მოუწოდებენ. ახალგაზრდები პარლამენტთან ყოველდღე იკრიბებიან და შემდეგ მსვლელობებს აწყობენ. საქართველოს საერთაშორისო პარტნიორების შეფასებით, ხსენებული კანონპროექტი მიღების შემთხვევაში საქართველოს ევროპულ გზას დააშორებს. ცნობისთვის, პარლამენტმა „უცხოური გავლენის გამჭვირვალობის“ სადავო კანონპროექტი, პირველი მოსმენით, პროტესტის ფონზე მიიღო. კანონის საბოლოოდ მისაღებად საჭიროა მეორე და მესამე მოსმენა, რომელიც მაისისთვის იგეგმება. ვინ დაუჭირა მხარი ე.წ. „უცხოური აგენტების კანონპროექტს“ პირველი მოსმენით
ევროპა მზად უნდა იყოს იმისთვის, რომ უკრაინას გრძელვადიან პერსპექტივაში დაეხმაროს - ბორელი
ევროპა მზად უნდა იყოს, დაეხმაროს უკრაინას ამ გამანადგურებელ ომში, თუნდაც დიდი ხნით. ამის შესახებ ევროპარლამენტის საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა ჯოზეფ ბორელმა სამშაბათს სტრასბურგში გამართულ შეხვედრაზე განაცხადა. „პუტინი გააგრძელებს ომს, რომ დაიპყროს უკრაინა - რაც შეიძლება მეტი ტერიტორია. ასე რომ, ის სწრაფად არ დასრულდება. პუტინი შეეცდება,, გაანადგუროს უკრაინელი ხალხის თავისუფლება და, ალბათ, უფრო შორს წავიდეს. ყოველ შემთხვევაში, ამას მუდმივად ამბობენ რუსი პროპაგანდისტები და ამას ამბობს ზოგიერთი რუსი ლიდერიც,“ - განაცხადა ბორელმა. მან აღნიშნა, რომ მომავალი კვირები რთული და ალბათ უფრო საშიში იქნება არამხოლოდ უკრაინისთვის, არამედ, ევროპისთვის. ბორელის თქმით, ევროპელებმა მეტი უნდა გააკეთონ უკრაინის მხარდასაჭერად, რადგან ევროპისთვის ეს სტრატეგიული პასუხისმგებლობის საკითხია. „ჩვენ უნდა ვიფიქროთ უფრო ღრმად, მოვემზადოთ ომისთვის, რომელიც მოითხოვს ჩვენს ძალისხმევას, ჩვენს ვალდებულებებს, ჩვენს ქმედებებს. ჩვენ უნდა დავუჭიროთ მხარი უკრაინას, მაგრამ არამხოლოდ სიტყვებით, და არა მხოლოდ ხვალ და ალბათ არამხოლოდ მომავალ წელს. ჩვენი ვალდებულებაა უკრაინის მხარდაჭერა, რომელიც იბრძვის ჩვენი ღირებულებებისა და უსაფრთხოებისთვის, ეს მოითხოვს ჩვენგან უპრეცედენტო ქმედებების განხორციელებას,“ აღნიშნა ბორელმა.
ახალგაზრდებმა ე.წ. უცხოური აგენტების კანონპროექტი ევროკავშირის წარმომადგენლობამდე მსვლელობით გააპროტესტეს
სტუდენტებმა, რომლებიც “უცხოური გავლენის გამჭვირვალობის შესახებ” კანონპროექტს აპროტესტებენ, პარლამენტის მიმდებარე ტერიტორიიდან საქართველოში ევროკავშირის წარმომადგენლობის ოფისთან მსვლელობით მივიდნენ. აქციის მონაწილეთა განმარტებით, ევროკავშირის წარმომადგენლობის ოფისთან გადანაცვლება სიმბოლურია და გადაწყვეტილება მთავრობის წარმომადგენლების მიერ ევროპარლამენტარების მისამართით გამოთქმულ კრიტიკულ განცხადებებს უკავშირდება. მანამდე, საქართველოს პარლამენტის უმრავლესობის დეპუტატ, "ხალხის ძალის" წევრ დავით კაჭარავასა და აქციის მონაწილეებს შორის სიტყვიერი დაპირისპირება იყო. კერძოდ, ინცინდენტი იმ დროს დაიწყო, როდესაც “უცხოური გავლენის გამჭვირვალობის შესახებ“ კანონპროექტის მოწინააღმდეგეები საქართველოში ევროკავშირის წარმომადგენლობისკენ მსვლელობით მიემართებოდნენ. აქციის მონაწილეებმა მელიქიშვილის გამზირზე ავტომობილში დეპუტატი კაჭარავა შენიშნეს და მას ჰკითხეს, რატომ დაუჭირა მხარი ამ კანონპროექტს. დემონსტრანტებმა მას გზა გადაუკეტეს და კითხვები დაუსვეს. აქციის მონაწილეები მას სთხოვდნენ, საჯაროდ, ტელეეთერების მეშვეობით განეხილათ "აგენტების კანონი" მათთან ერთად, რა დროსაც დეპუტატი გადმოვიდა მანქანიდან და შეკრებილების დარწმუნება დაიწყო, რომ "ეს კანონი ქართულია." „ეს კანონი არის ქართული და ემსახურება საქართველოს ინტერესებს, ესაა მეტი დამოუკიდებლობა საქართველოსთვის, მეტი დამოუკიდებლობა ავტომატურად ნიშნავს მეტ პასუხისმგებლობას ჩვენი ხელისუფლებისთვის. ამიტომ ჩვენ ამ გზაზე ვივლით და ყოველდღიურად გავხდებით უფრო მეტად დამოუკიდებელი და მიგვიღებენ ევროკავშირში ამაყად, ჩვენი ფასეულობებით,“ - მიმართა მან აქციის მონაწილეებს, რის შემდეგაც დატოვა მსვლელობის ტერიტორია. ადგილზე მობილიზებული იყო საპატრულო პოლიცია. შეგახსენებთ, „უცხოური გავლენის გამჭვირვალობის“ კანონპროექტის ხელახალ შემობრუნებას ხალხმრავალი პროტესტი მოჰყვა. აქციის მონაწილეები, მათ შორის, ახალგაზრდები, რომლებიც პარლამენტთან ყოველდღე იკრიბებიან, ხელისუფლებას კანონპროექტის უკან გაწვევისკენ მოუწოდებენ. ახალგაზრდები პარლამენტთან ყოველდღე იკრიბებიან და შემდეგ მსვლელობებს აწყობენ. საქართველოს საერთაშორისო პარტნიორების შეფასებით, ხსენებული კანონპროექტი მიღების შემთხვევაში საქართველოს ევროპულ გზას დააშორებს. ცნობისთვის, პარლამენტმა „უცხოური გავლენის გამჭვირვალობის“ სადავო კანონპროექტი, პირველი მოსმენით, პროტესტის ფონზე მიიღო. კანონის საბოლოოდ მისაღებად საჭიროა მეორე და მესამე მოსმენა, რომელიც მაისისთვის იგეგმება. ვინ დაუჭირა მხარი ე.წ. „უცხოური აგენტების კანონპროექტს“ პირველი მოსმენით
WSJ: რუსეთის დახმარების გამო, აშშ ჩინეთის ბანკების წინააღმდეგ სანქციებს ამზადებს
შეერთებული შტატები ამზადებს სანქციების პროექტს, რამაც, შესაძლოა ჩინეთის ზოგიერთ ბანკს დაარტყას. მიზანი რუსული სამხედრო-ინდუსტრიული კომპლექსისთვის მხარდაჭერის შეჩერებაა. ამერიკელი ოფიციალური პირების თქმით, ჩინეთის ბანკების წინააღმდეგ სანქციები ესკალაციის ვარიანტია იმ შემთხვევაში, თუ დიპლომატიური ზომები ვერ დაარწმუნებს პეკინს, შეზღუდოს ექსპორტი რუსეთის ფედერაციაში. შესაბამის სტატიას გამოცემა Wall Street Journal-ი აქვეყნებს. დოლარზე ბანკების წვდომის შეწყვეტა ხშირად გამოიყენება როგორც უკანასკნელი საშუალება, რადგან ასეთი სანქციები ხშირად, ინსტიტუტების გაკოტრებას იწვევს. ეს ასევე განსაკუთრებულ რისკს უქმნის ჩინეთს ნელი ეკონომიკური აღდგენისა და მზარდი ვალის ფონზე. მასალაში არ არის მითითებული, რომელ ბანკები შეიძლება, დაექვემდებაროს სანქციებს. ამ დრომდე ვაშინგტონს არ სურდა სანქციების დაწესება მსხვილ ჩინურ ბანკებზე, რადგან ანალიტიკოსები დიდი ხანია, განიხილავდნენ ამ ვარიანტს, როგორც "ბირთვულ" ვარიანტს, რადგან მას შეუძლია, ჰქონდეს გავლენა გლობალურ ეკონომიკაზე და აშშ-ჩინეთის ურთიერთობებზე. მანამდე აშშ-ის სახელმწიფო მდივანმა ენტონი ბლინკენმა გააკრიტიკა ჩინეთი რუსეთის თავდაცვის ინდუსტრიის მხარდაჭერისთვის და განაცხადა, რომ პეკინი ახლა უკრაინის წინააღმდეგ რუსული აგრესიული ომისთვის კრიტიკული კომპონენტების მთავარი მიმწოდებელია. მანამდე, შეერთებული შტატების ხაზინის მდივანმა ჯანეტ იელენმა განაცხადა, რომ აშშ-მ ჩინური ბანკები და ექსპორტიორები გააფრთხილა, რუსეთს სამხედრო შესაძლებლობების გაძლიერებაში არ დაეხმარონ, წინააღმდეგ შემთხვევაში კი, ვაშინგტონი მათ სანქციების დაწესებით დაემუქრა. ცნობისთვის, შეერთებული შტატები ვერ ხედავს მტკიცებულებას, რომ ჩინეთი პირდაპირ სამხედრო დახმარებას უწევს რუსეთს.
სტოლტენბერგი უკრაინისთვის „ძლიერ გადაწყვეტილებებს“ აანონსებს
NATO-ს სურს, შექმნას მიდგომები, რომლებიც უკრაინის მხარდაჭერას „უფრო მტკიცე და პროგნოზირებადს“ გახდის. ამის შესახებ ალიანსის გენერალურმა მდივანმა იენს სტოლტენბერგმა სამშაბათს ვარშავაში დიდი ბრიტანეთის პრემიერ-მინისტრ რიში სუნაკთან ერთად გამართულ პრესკონფერენციაზე განაცხადა. მისი თქმით, NATO-ში ახლა განიხილავენ უკრაინისადმი უფრო მყარ და პროგნოზირებად საფუძვლებზე დამყარებულ მხარდაჭერას, მათ შორის, მრავალწლიანი ფინანსური ვალდებულებით. მისი თქმით, გადაწყვეტილებებს, რომლებიც დღეს მიიღება, მომავალი თაობებისთვის ექნება შედეგები. მან ასევე განაცხადა, რომ რუსეთი აგრესიული ომისთვის მხარდაჭერას იღებს ჩინეთიდან, ირანიდან და ჩრდილოეთ კორეიდან. „ეს გვახსენებს, რომ უსაფრთხოება არ არის რეგიონული, უსაფრთხოება გლობალურია. ჩვენ უნდა ვიმუშაოთ ჩვენს თანამოაზრე პარტნიორებთან მთელ მსოფლიოში, რათა შევინარჩუნოთ და დავიცვათ ტრანსატლანტიკური უსაფრთხოება," - აღნიშნა სტოლტენბერგმა. მან დასძინა, რომ NATO არის თავდაცვითი ალიანსი, რომელიც არ ესწრაფვის კონფლიქტს რუსეთთან. ამასთან, მან აღნიშნა, რომ ალიანსი აპირებს, უზრუნველყოს მოკავშირე ქვეყნების ტერიტორიაზე მცხოვრები ადამიანების უსაფრთხოება. „NATO-ს 10,000 ჯარისკაცი, რომელიც აქ პოლონეთშია განთავსებული, აგზავნის უტყუარ გზავნილს, რომ NATO დაიცავს ყველა მოკავშირეს,“ - აღნიშნა სტოლტენბერგმა. სუნაკმა პოლონეთში ვიზიტის დროს, უკრაინისთვის ახალი სამხედრო დახმარების შესახებ გამოაცხადა
სუნაკმა პოლონეთში ვიზიტის დროს, უკრაინისთვის ახალი სამხედრო დახმარების შესახებ გამოაცხადა
გაერთიანებული სამეფო უკრაინას უგზავნის 500 მილიონი ფუნტის ღირებულების სამხედრო დახმარების პაკეტს, რომელიც მოიცავს 160 Husky-ს ტიპის ჯავშანმანქანას, 162 სხვა ტიპის ჯავშანმანქანას, 78 ყველგანმავალ მანქანას, 60 ნავსა და კატერს, 1 600 თავდასხმისა და საჰაერო თავდაცვის რაკეტებს, მათ შორი,ს Storm Shadow-ს ტიპის ფრთოსანი რაკეტების ახალ პარტიას, დაახლოებით, ოთხ მილიონ ვაზნას. აღნიშნული პაკეტი ბრიტანეთის მიერ უკრაინისთვის წელს აღმოჩენილ სამხედრო დახმარებას 3 მილიარდ ფუნტამდე გაზრდის. დიდი ბრიტანეთი უკრაინას სამხედრო დახმარების უმსხვილეს პაკეტს გადასცემს ამის შესახებ ბრიტანეთის პრემიერ-მინისტრმა რიში სუნაკმა სამშაბათს, ვარშავაში, NATO-ს გენერალურ მდივან იენს სტოლტენბერგთან ერთად გამართულ პრესკონფერენციაზე განაცხადა. სუნაკმა აღნიშნა, რომ პუტინს სურს, დააბრუნოს დასავლეთი სამყაროში, სადაც უხეში ძალა და არა თავისუფალი ხალხების დემოკრატიული ნება აყალიბებს საზღვრებს და გადაწყვეტს მომავალს. მან ხაზი გაუსვა, რომ თუ რუსი დიქტატორი გაიმარჯვებს უკრაინაში, ის არ გაჩერდება და გათამამდება.
მარინა კალიურანდი: ეს არ ეხება მხოლოდ ამ კანონპროექტს, სამწუხაროდ, ეს ევროკავშირის ღირებულებებისთვის ძირის გამოთხრის უფრო ხანგრძლივი პროცესია
ევროპარლამენტარმა მარინა კალიურანდმა „უცხოური გავლენის გამჭვირვალობის შესახებ“ კანონპროექტთან დაკავშირებით გამართულ დებატებზე განაცხადა, რომ საქართველოს მიმართ ორი გზავნილი აქვს. მან ასევე მიმართა საქართველოს ხელისუფლებას, მმართველ პარტიას, რომ გამოიყენოს ისტორიული შესაძლებლობა საკუთარი მოსახლეობის ოცნების ასასრულებლად და არ გააწბილოს ქართველი ხალხი. „დღეს ჩემი ბოლო მიმართვაა პლენარულ სხდომაზე სამხრეთ კავკასიის დელეგაციის თავმჯდომარის და ევროაკავშირ-საქართველოს საპარლამენტო ასოცირების კომიტეტის თანათავმჯდომარის რანგში. მე მაქვს ორი გზავნილი, პირველი - საქართველოს პოლიტიკოსების მიმართ, კერძოდ, მმართველი პარტიის, „ქართული ოცნების“, მიმართ, გთხოვთ, შეწყვიტეთ საქართველოს ევროპული მისწრაფებებისთვის საფრთხის შექმნა. ეს არ ეხება მხოლოდ ამ კანონპროექტს, სამწუხაროდ, ეს ევროკავშირის დემოკრატიული პრინციპებისა და ღირებულებებისთვის ძირის გამოთხრის უფრო ხანგრძლივი პროცესია. თქვენ გაქვთ ისტორიული შესაძლებლობა, შეასრულოთ თქვენი ხალხის ოცნება ევროკავშირში გაწევრიანებასთან დაკავშირებით. არ გააწბილოთ ხალხი. მეორე - მე მსურს დავარწმუნო საქართველოს მოსახლეობა, რომ თქვენ გაქვთ ჩვენი ურყევი მხარდაჭერა თქვენს ევროპულ მისწრაფებებში და დარწმუნებული ვარ, შემდეგი ევროპარლამენტი, ასევე, გააგრძელებს თქვენს მხარდაჭერას ევროპულ ოჯახში ადგილის მოპოვებისთვის ბრძოლაში, მაგრამ თქვენი წილი უნდა გააკეთოთ-წადით არჩევნებზე ოქტომბერში და აირჩიეთ ნამდვილად პროევროპული და პროგრესული ეროვნული პარლამენტი,“ - განაცხადა მარია კალიურანდმა. 23 აპრილს ევროპარლამენტის პლენარულ სესიაზე, სადაც საქართველოს პარლამენტში წარდგენილი „აგენტების კანონი“ განიხილეს, ევროპარლამენტარებმა სიტყვებით გამოსვლისას მოითხოვეს ბიძინა ივანიშვილის, ქართული ოცნების დეპუტატებისა და პოლიციის მაღალჩინოსნებისთვის სანქციების დაწესება. ევროპარლამენტარმა პეტრას აუსტრევიჩუსმა ევროკომისიას მოუწოდა, „აგენტების კანონის“ საწინააღმდეგ დემონსტრანტებისადმი ძალადობრივი ქმედებების ორგანიზების გამო, სანქციები დაუწესდეთ შსს-ს განსაკუთრებულ დავალებათა დეპარტამენტის დირექტორს ზვიად ხარაზიშვილსა და თბილისის პოლიციის უფროსს ვაჟა სირაძეს. „მოვუწოდებ ევროკავშირის ინსტიტუტებს, დაუწესდეს პერსონალური სანქციები საქართველოს მოქალაქეებს, რომლებიც ძირს უთხრიან დემოკრატიულ პროცესებსა და აორგანიზებენ მშვიდობიანი დემონსტრაციების დარბევას - ზვიად ხარაზიშვილსა და ვაჟა სირაძეს“, - განაცხადა სტრასბურგში პეტრას აუსტრევიჩუსმა, ლიეტუველმა ევროპარლამენტარმა პოლიტიკური ჯგუფიდან, „განაახლე ევროპა“. ხარაზიშვილი ახსენა კიდევ ერთმა ევროპარლამენტარმა, მარკეტა გრეგოროვამ, რომელმაც განაცხადა: „მას შემდეგ, რაც ევროკავშირის კანდიდატის სტატუსი მიიღეს, მთავრობამ გატეხა პირობა და ძალით ცდილობს კანონის მიღებას. აქვთ გეგმები ლგბტ ადამიანების უფლებების ჩასახშობად. დემონსტრანტები რეპრესიების წინაშე დგანან. ამჯერად, ზვიად ხარაზიშვილისგან.“ ვაჟა სირაძე საპატრულო პოლიციის დეპარტამენტის უფროსია, ზვიად ხარაზიშვილი კი, განსაკუთრებულ დავალებათა დეპარტამენტის დირექტორი. ბიძინა ივანიშვილისთვის სანქციების დაწესების საჭიროებაზე რამდენიმე გამომსვლელმა ისაუბრა, მათ შორის ანა ფოტიგამ და მაიკლ გალერმა.
ევროპარლამენტი “ქართული ოცნების” წევრებისა და ბიძინა ივანიშვილის სანქცირების მოთხოვნაზე რეზოლუციის პროექტს განიხილავს
ევროპარლამენტი “ქართული ოცნების” წევრებისა და ბიძინა ივანიშვილისთვის სანქციების მოთხოვნაზე რეზოლუციის პროექტს განიხილავს, კენჭისყრას კი 25 აპრილს გამართავს. შესაბამისი რეზოლუციის პროექტი სახელწოდებით - რეზოლუციის პროექტი "საქართველოში უცხოური აგენტების კანონპროექტის ხელახლა წარდგენის მცდელობებსა და სამოქალაქო საზოგადოების შეზღუდვაზე" ევროპარლამენტის ვებგვერდზეა ატვირთული. რეზოლუციის ავტორები არიან ევროპარლამენტარები: მირიამ ლექსმანი, მაიკლ გალერი, რასა იუკნევიჩიენე, დავიდ მაკალისტერი, ანდრიუს კუბილიუსი, ისაბელ ვაისლერ-ლიმა, ტრაიან ბასესკუ, ვლადიმირ ბილჩიკი, ანჯეი ჰალიცკი, სანდრა კალნიეტე, ლეოპოლდო ლოპეზ გილი, ანტონიო ლოპეზ-ისტურიზ ვაითი, მიქაელა შოიდროვა და ეუჯენ ტომაკი. 23 აპრილს იგეგმება რეზოლუციის პროექტის განხილვა, რომელშიც ევროპარლამენტარებთან ერთად მონაწილეობას ევროკავშირის უმაღლესი წარმომადგენელი, ჯოზეფ ბორელი მიიღებს. 25 აპრილს კი, რეზოლუციას კენჭს უყრიან. რეზოლუციის პროექტში აღნიშნულია, რომ მისი მიღების შემთხვევაში ევროკავშირმა სანქციები უნდა შემოიღოს საქართველოს პარლამენტის ყველა წევრის წინააღმდეგ, ვინც “უცხოური გავლენის გამჭვირვალობის შესახებ” კანონპროექტს მიღებას მისცა ხმა. რეზოლუციის დამტკიცების შემთხვევაში, ევროპარლამენტი ევროკავშირის საბჭოსადმი თავის მოწოდებას გაიმეორებს, რომ “ქართული ოცნების” საპატიო თავმჯდომარის, ბიძინა ივანიშვილის, წინააღმდეგ სანქციების იქნას შემოღებული. მიღების შემთხვევაში ევროპარლამენტი, ასევე, ევროკომისიას მიმართავს, რომ საქართველოსთვის მთელი ფინანსური დახმარება დამოკიდებული გახდეს იმაზე, რომ “უცხოური გავლენის გამჭვირვალობის შესახებ“ კანონპროექტი გაწეული იქნება. რეზოლუციის კანონპროექტი აღნიშნავს, რომ კანონპროექტის ხელახლა წარდგენა საქართველოს ოფიციალური პირების მიერ 2023 წელს გაკეთებულ საჯარო კომენტარებს ეწინააღმდეგება, შესაბამისად საქართველოს რეპუტაცია დაზიანებულია და მის ევროატლანტიკურ მისწრაფებებს ძირი აქვს გამოთხრილი, ვინაიდან “უცხოური გავლენების” კანონპროექტი საქართველოს იმავე გზაზე აყენებს, რომელზეც რუსეთის ფედერაცია და მსგავსი ქვეყნები არიან. რეზოლუციის პროექტში ასევე აღნიშნულია, რომ “ქართული ოცნების” მიერ წარდგენილი “უცხოური გავლენის” კანონმდებლობა რუსეთში 2012 წელს მიღებულ კანონის მიხედვითაა მოდელირებული, ხოლო მსგავსი კანონპროექტები ცოტა ხნის წინ მიღებული იქნა ყირგიზეთსა და ოკუპირებულ აფხაზეთში. რეზოლუციის პროექტში ნათქვამია, რომ მსგავსი რუსული სტილი “უცხოური გავლენის აგენტების” კანონპროექტი მნიშვნელოვნად დააზიანებს საქართველოს პროევროპულ გზას და კანონპროექტის მიღების შემთხვევაში, საქართველოსთვის ევროკავშირში გაწევრიანების შესახებ მოლაპარაკებების დაწყვებისადმი მიმავალი ნებისმიერი გადაწყვეტილება პერმანენტულად უნდა შეჩერდეს. რეზოლუციის ოთხი პროექტის ავტორები, სავარაუდოდ, ხვალ, 24 აპრილს შეაჯერებენ, ზუსტად რა უნდა ჩაწერონ და რა არა რეზოლუციაში, რომლითაც საქართველოს, ასევე, ევროკომისიას, ევროკავშირსა და მის წევრ ქვეყნებს მიმართავენ. ჯერჯერობით ევროპარლამენტში „უცხოეთის აგენტების კანონზე“ მისაღები რეზოლუციის ოთხი სამუშაო ვერსია, ოთხი პროექტია წარდგენილი. საბოლოო კენჭისყრამდე ევროპარლამენტარები საერთო ტექსტზე შეთანხმდებიან.
სვენ მიქსერი: საქართველო არის კანდიდატი ქვეყანა, მაგრამ თუ ის „უცხოური აგენტების“ კანონს მიიღებს, არ უნდა ელოდოს, რომ ევროკავშირის წევრობას შეძლებს
საქართველო არის კანდიდატი ქვეყანა, მაგრამ თუ ის მიიღებს „უცხოური აგენტების“ კანონს, ის არ უნდა ელოდოს, რომ შეძლებს ევროკავშირის წევრობას. ამის შესახებ ევროპარლამენტარმა სვენ მიქსერმა „უცხოური გავლენის გამჭვირვალობის შესახებ“ კანონპროექტთან დაკავშირებით გამართულ დებატებზე განაცხადა. მისი თქმით, სამწუხაროდ, საქართველოს ხელისუფლება ხდება სულ უფრო მეტად არალიბერალური და ანტიევროპული. „საქართველოს მოსახლეობის აბსოლუტური უმრავლესობა საკუთარ მომავალს ევროკავშირში ხედავს. საქართველოს არსებული ხელისუფლება, მმართველი პარტია, „ქართული ოცნება“, ასევე, აცხადებს, რომ სურს ევროკავშირს შეუერთდეს. სამწუხაროდ, ის, რასაც „ქართული ოცნება“ აკეთებს, განსხვავებულია. სამწუხაროდ, საქართველოს დემოკრატიისა და კანონის უზენაესობის თვალსაზრისით უკან დაიხია უკანასკნელი წლების განმავლობაში. მათ აქვთ პრობლემა საბაზისო თავისუფლებასთან, სასამართლოს სისტემის დამოუკიდებლობასთან, მედია თავისუფლებასთან. ლგბტქ+ უფლებებთან. ევროპარლამენტმა და საქართველოს სამოქალაქო საზოგადოებამ აღნიშნეს ეს ნაკლი. სამწუხაროდ, საქართველოს ხელისუფლება ხდება სულ უფრო მეტად არალიბერალური და ანტიევროპული. სამწუხაროდ, „უცხოური აგენტების“ კანონი კიდევ ერთი მაგალითია იმ გზის, რომელსაც, როგორც ჩანს, საქართველო მიჰყვება. ეს კანონპროექტი, მიღების შემთხვევაში, შეზღუდავს სამოქალაქო საზოგადოების მოქმედების არეალს, შეამცირებს გამოხატვის თავისუფლებას და გაუხსნის გზას დისკრიმინაციას. სამწუხაროდ, ამას ექნება თავისი შედეგი საქართველოს ევროპულ მისწრაფებებზე. საქართველო არის კანდიდატი ქვეყანა, მაგრამ თუ ის მიიღებს „უცხოური აგენტების“ კანონს, ის არ უნდა ელოდოს, რომ შეძლებს ევროკავშირის წევრობას,“ - განაცხადა სვენ მიქსერმა. შეგახსენებთ, „უცხოური გავლენის გამჭვირვალობის“ კანონპროექტის ხელახალ შემობრუნებას ხალხმრავალი პროტესტი მოჰყვა. აქციის მონაწილეები, მათ შორის, ახალგაზრდები, რომლებიც პარლამენტთან ყოველდღე იკრიბებიან, ხელისუფლებას კანონპროექტის უკან გაწვევისკენ მოუწოდებენ. ახალგაზრდები პარლამენტთან ყოველდღე იკრიბებიან და შემდეგ მსვლელობებს აწყობენ. საქართველოს საერთაშორისო პარტნიორების შეფასებით, ხსენებული კანონპროექტი მიღების შემთხვევაში საქართველოს ევროპულ გზას დააშორებს. ცნობისთვის, პარლამენტმა „უცხოური გავლენის გამჭვირვალობის“ სადავო კანონპროექტი, პირველი მოსმენით, პროტესტის ფონზე მიიღო. კანონის საბოლოოდ მისაღებად საჭიროა მეორე და მესამე მოსმენა, რომელიც მაისისთვის იგეგმება. ვინ დაუჭირა მხარი ე.წ. „უცხოური აგენტების კანონპროექტს“ პირველი მოსმენით
USAID: პირველი მცურავი მზის ელექტროსადგური საქართველოს ენერგეტიკული უსაფრთხოებისთვის ძალიან მნიშვნელოვან როლს თამაშობს
პირველი მცურავი მზის ელექტროსადგური ნათელი მაგალითი იმისა, თუ როგორ აძლიერებს USAID-ის მიერ განახლებად ენერგიის მიმართულებით განხორციელებული ინვესტიციები საქართველოს ეკონომიკას და მოსახლეობას. შესაბამის ინფორმაციას აშშ-ის განვითარების სააგენტო (USAID) ავრცელებს. „დედამიწის დღის აღსანიშნავად, USAID-ის მხარდაჭერით შექმნილ, საქართველოში პირველ მცურავ მზის ელექტროსადგურს ვესტუმრეთ. სადგური, რომელიც შპს Agro-Impex-ის მიერ USAID-ის ფინანსური მხარდაჭერით ამოქმედდა, საქართველოს ენერგეტიკული უსაფრთხოებისთვის ძალიან მნიშვნელოვან როლს თამაშობს. მზის ელექტროსადგური გარდაბნის მუნიციპალიტეტის სოფელ ლემშვენიერაში მდებარეობს. იგი მიმდებარე ხეხილის ბაღების მოსარწყავად ყოველწლიურად დაახლოებით 300 000 კვტ/სთ ენერგიას გამოიმუშავებს და შესაბამისად, შეამცირებს როგორც ბიზნეს ხარჯებს, ასევე სათბურის აირების გამოყოფას. ეს ნათელი მაგალითი იმისა, თუ როგორ აძლიერებს USAID-ის მიერ განახლებად ენერგიის მიმართულებით განხორციელებული ინვესტიციები საქართველოს ეკონომიკას და მოსახლეობას,“ წერს USAID/საქართველოს მიერ გავრცელებულ ინფორმაციაში. USAID-ის მხარდაჭერით, საქართველოში პირველი მცურავი მზის სადგური დამონტაჟდა
ევროკომისარი კრიზისების მართვის საკითხებში: ჩვენი კარი ღიაა, მოვუწოდებ საქართველოს ლიდერებს, ქვეყანას ევროპული გზიდან არ გადაახვევინონ
„ჩვენი კარი ღიაა, ასე რომ, მოვუწოდებ საქართველოს ლიდერებს, ასახონ მოქალაქეების მოლოდინები და ქვეყანას ევროპული გზიდან არ გადაახვევინონ,“ - ამის შესახებ ევროკომისარმა კრიზისების მართვის საკითხებში, იანეზ ლენარჩიჩმა ევროპარლამენტის პლენარულ სხდომაზე განაცხადა. „ბოლო კვირების განმავლობაში საქართველოს ათასობით მოქალაქე ქუჩებში გავიდა, რათა მშვიდობიანი დემონსტრაციის თავისი უფლება გამოეყენებინა. ისინი კიდევ ერთხელ ითხოვდნენ, რომ ოფიციალურმა პირებმა გაიწვიონ “უცხოური გავლენის გამჭვირვალობის შესახებ” კანონპროექტი. შთამბეჭდავი სცენები გასულ წელს უკვე ვნახეთ საქართველოდან. ყველა ასაკის მოქალაქეს ეკავა საქართველოს და ევროკავშირის დროშები, აჩვენებდნენ ძლიერ კავშირს დემოკრატიასთან, ჩვენს საერთო ევროპულ ღირებულებებთან და ევროკავშირისადმი საქართველოს გზასთან. მაშინ მმართველმა პარტიამ და მთავრობამ საჯარო პირობა მისცა საქართველოს მოქალაქეებს, რომ მსგავსი კანონპროექტი არასდროს დაბრუნდებოდა. საქართველოს პოლიტიკურ ლიდერებს მოვუწოდებ, გაიწვიონ კანონპროექტი, როგორც ეს გასულ წელს მოხდა. ნათელია, რომ ეს კანონპროექტი არ შეესაბამება ევროკავშირის ნორმებსა და ღირებულებებს. თუ მიღებული იქნება, ის ძირს გამოითხრის საქართველოს პროგრესს ევროკავშირისკენ გზაზე. ქართველების მომავალი ევროკავშირშია. კანდიდატის სტატუსმა, რომელიც გასულ წელს მიენიჭა [საქართველოს], ჩვენი ურთიერთობები ყველაზე მეტად დააახლოვა. ჩვენი კარი ღიაა, ასე რომ, მოვუწოდებ საქართველოს ლიდერებს ასახონ მოქალაქეების მოლოდინები და ქვეყანას ევროპული გზიდან არ გადაახვევინონ. სამოქალაქო საზოგადოებისა და მედია ორგანიზაციები მუშაობა კრიტიკულად მნიშვნელოვანია ნებისმიერი დემოკრატიისთვის. საქართველოს ძალიან ცოცხალი სამოქალაქო საზოგადოება ჰყავს, რომელმაც წვლილი შეიტანა ქვეყნის ევროკავშირის წევრობისკენ წარმატებასა და პროგრესში. შემოთავაზებული კანონპროექტი სამოქალაქო საზოგადოებისა და მედია ორგანიზაციების თავისუფლად მუშაობის შესაძლებლობებს შეზღუდავს. გამოხატვის თავისუფლებას შეზღუდავს და არასამართლიანად მოახდენს სამოქალაქო საზოგადოებების სტიგმატიზაციას, რომლებსაც სარგებელი მოაქვთ საქართველოს მოქალაქეებისთვის. ეს ასევე გავლენას მოახდენს ევროკავშირის საქართველოს ხალხისადმი მხარდაჭერაზე, ვინაიდან მისი ნაწილი არასამთავრობო ორგანიზაციების მეშვეობით ხორციელდება. გამჭვირვალობა სამოქალაქო საზოგადოების თავისუფლად მოქმედების შესაძლებლობების შეზღუდვის ინსტრუმენტად არ უნდა იქცეს,” - განაცხადა ლენარჩიჩმა. მისი თქმით, ისინი ევროკავშირის კანდიდატი ქვეყნისგან დემოკრატიის პრინციპებისადმი, კანონის უზენაესობისადმი და ადამიანის უფლებებისადმი ერთგულებას ითხოვენ. „ევროკომისიამ თავის გაფართოების ანგარიშში ხაზი გაუსვა იმ სამუშაოს, რომელიც საქართველომ უნდა შეასრულოს, კონკრეტულად კი 9 ნაბიჯი. როგორც ევროკავშირის კანდიდატი ქვეყნისგან, საქართველოსგან ელიან, რომ კოპენჰაგენის კრიტერიუმებთან შესაბამისობაში იქნება. კონკრეტულად მოვითხოვთ დემოკრატიის პრინციპებისადმი, კანონის უზენაესობისადმი და ადამიანის უფლებებისადმი ერთგულებას. ამ ძირითად სფეროებში მხოლოდ არსებითი და შეუქცევადი პროგრესი ადგენს გაწევრიანების შესახებ მოლაპარაკებების გახსნასა და სისწრაფეს,” - აღნიშნავს ევროკომისარი.
ფრიდონ ინჯია: კარგი იქნება „ქართული ღირებულებების“ სახელმძღვანელო შევქმნათ, რომელსაც სკოლაში ასწავლიან
„კარგი იქნება, რომ შეიქმნას „ქართული ღირებულებების“ სახელმძღვანელო, რომელსაც სკოლაში ასწავლიან. სწორედ ამ „ქართულ ღირებულებებშია“ როგორც ოჯახის ღირებულებები, ასევე ქრისტიანობის, მამულიშვილობის და მრავალი სხვა. არანაკლებ მნიშვნელოვანი იქნება, რომ ასეთი სახელმძღვანელო გადაითარგმნოს და ევროპაში დაიწყოს სწავლება „ქართული ღირებულებების,“ - განაცხადა ფრაქცია „ევროპელი სოციალისტების“ თავმჯდომარემ ფრიდონ ინჯიამ „საქართველოს კონსტიტუციაში ცვლილების შეტანის შესახებ“ და „ოჯახურ ღირებულებათა და არასრულწლოვანთა დაცვის შესახებ“ საქართველოს კონსტიტუციურ კანონპროექტებთან დაკავშირებით საყოველთაო-სახალხო განხილვაზე ამბროლაურში. ფრიდონ ინჯიას თქმით, მისი პარტია სრულად ეთანხმება მმართველი პარტიის მიერ კონსტიტუციაში წარმოდგენილი ცვლილების პროექტს. ფრაქცია „ევროპელი სოციალისტების“ თავმჯდომარის შეფასებით, იყო ოპოზიციონერი არ ნიშნავს იყო ქვეყნის წინააღმდეგი. ფრიდონ ინჯიას მოსაზრებით, კანონპროექტში „ოჯახური ღირებულებები“ უნდა შეიცვალოს ტერმინით „ქართული ღირებულებები.“ „ვფიქრობ, „ოჯახური ღირებულებები“ უნდა შევცვალოთ „ქართული ღირებულებებით“, ვინაიდან „ქართული ღირებულებები“ უფრო ფართო ცნებაა და იგი მოიცავს „ოჯახურ ღირებულებებსაც“, მართლმადიდებლობასა და პატივისცემას ქრისტიანობის წინაშე, სხვა ტრადიციებსაც. სწორედ „ქართულ ღირებულებებშია“ დედაენისადმი დიდი სიყვარული და პატივისცემაც“, - განაცხადა ფრიდონ ინჯიამ.
უკრაინელებმა ხერსონის ოლქის მარცხენა სანაპიროზე, კოზაჩი ლაგერში დროშა დაამონტაჟეს
ხერსონის ოლქის დროებით ოკუპირებულ მარცხენა სანაპიროზე მდებარე სოფელ კოზაჩი ლაგერში, უკრაინელმა ჯარისკაცებმა ადგილობრივ წყლის კოშკზე უკრაინის დროშა დაამონტაჟეს, იტყობინება უკრაინის შეიარაღებული ძალების ლეიტენანტი. "35-ე საზღვაო ბრიგადის ბიჭებმა ხელით დაამონტაჟეს დროშა ხერსონის რაიონის მარცხენა სანაპიროზე მდებარე სოფელ კოზაჩი ლაგერში წყლის კოშკზე," - აღნიშნა უკრაინელმა სამხედრომ და დასძინა, რომ რუსმა ჯარისკაცებმა უკვე მიიღეს გადაუდებელი ბრძანება კოშკიდან უკრაინის დროშის ნებისმიერი გზით ამოღების შესახებ. აღსანიშნავია, რომ კოზაჩი ლაგერს ამჟამად დროებით დაკავებული დასახლების სტატუსი აქვს. ხერსონი და რეგიონის მარჯვენა სანაპირო ნაწილი რუსული ძალებისგან 2022 წლის შემოდგომაზე გათავისუფლდა. ამის შემდეგ რუსეთის არმიამ რეგიონის ყოველდღიური დაბომბვა დაიწყო უპილოტო თვითმფრინავებითა და არტილერიით. 2023 წლის შემოდგომაზე ცნობილი გახდა, რომ უკრაინელი ჯარისკაცები ხერსონის ოლქის მარცხენა სანაპიროზე, კერძოდ, კრინკის დასახლების მახლობლად, ხიდთან კონსოლიდაციას ახდენდნენ. ამჟამად, უკრაინის შეიარაღებული ძალები აგრძელებენ ხიდის დაკავებას კრინკიში და გრძელდება საბრძოლო მოქმედებები.
სომხეთ-აზერბაიჯანის სახელმწიფო საზღვრის ტავუშ-ღაზახის მონაკვეთზე პირველი სასაზღვრო ნიშანი დამონტაჟდა
აზერბაიჯანული მედიის ცნობით, 23 აპრილს, აზერბაიჯანის რესპუბლიკისა და სომხეთის რესპუბლიკის საზღვარზე, ადგილზე გეოდეზიური გაზომვების საფუძველზე, პირველი სასაზღვრო მარკერი დამონტაჟდა. ორი ქვეყნის ექსპერტთა ჯგუფების მუშაობა გრძელდება. თავის მხრივ, სომხეთის პრემიერ-მინისტრმა ნიკოლ ფაშინიანმა Facebook-ზე დაწერა, რომ პირველი სასაზღვრო ნიშანი სომხეთ-აზერბაიჯანის სახელმწიფო საზღვრის ტავუშ-ღაზახის მონაკვეთზე დამონტაჟდა. მან შესაბამისი ფოტოც გამოაქვეყნა. აზერბაიჯანი და სომხეთი საზღვრის მონაკვეთის დელიმიტაციაზე პირველად შეთანხმდნენ
ქვეშეთის კობთან დამაკავშირებელი 9 კმ-იანი გვირაბი გაიჭრა
ქვეშეთი-კობის გზის მშენებლობის პროექტის ფარგლებში, სოფელ ქვეშეთის სოფელ კობთან დამაკავშირებელი 9 კმ-იანი გვირაბის გაჭრა დასრულდა. საქართველოს რეგიონული განვითარებისა და ინფრასტრუქტურის სამინისტროს ცნობით, გვირაბის ბურღვის სამუშაოები ქვეშეთი-კობის პროექტისთვის სპეციალურად დამზადებული TBM-ით (Tunnel Boring Machine) - გვირაბის საბურღი დანადგარით წარმოებდა, რომელიც მნიშვნელოვნად ამცირებს გარემოზე ზემოქმედებას და უზრუნველყოფს გარემოს მდგრადობის შენარჩუნებას. ამასთან, გრძელდება 9 კმ-იანი გვირაბის პარალელური საევაკუაციო გვირაბის მშენებლობა, რომელიც ამ ეტაპზე, 7 730 მ-ზეა გაჭრილი. „ახალი, 9 კმ სიგრძისა და 15 მ დიამეტრის გვირაბი საქართველოში ყველაზე გრძელი, ხოლო მსოფლიოს მასშტაბით, თავისი მახასიათებლებით, ერთ-ერთი უნიკალური იქნება. მოცემულ ეტაპზე, 9 კმ-იან გვირაბში დაიწყება საბოლოო მოსახვის, ელექტრო და საინჟინრო სისტემების მონტაჟისა და გზის საფარის მოწყობის სამუშაო. ქვეშეთი-კობის პროექტის ფარგლებში, ჯამში, შენდება განათების სისტემით უზრუნველყოფილი 23 კმ-იანი 2 ზოლიანი ასფალტ-ბეტონის გზა, რომელიც მოიცავს 5 ხიდისა და 5 გვირაბის მშენებლობას და 1 ხიდის რეაბილიტაციას. ამასთან, პროექტი ითვალისწინებს გუდაურამდე მისასვლელი 5 კმ-იანი ახალი გზის და ტურისტული ცენტრის მშენებლობას. საგზაო უსაფრთხოების ყველა საჭირო სტანდარტით უზრუნველყოფილი ახალი გზა შეამცირებს გადაადგილების დროსაც. თუ ამჟამად ქვეშეთიდან კობამდე მგზავრობას 1 საათი სჭირდება, ზვავსაშიშროების გამო კი, ხშირად მოძრაობა იკრძალება კიდეც, პროექტის დასრულების შემდეგ, მონაკვეთის გავლას მხოლოდ 15 წუთი დასჭირდება. ახალი გზა არა მხოლოდ ამცირებს მგზავრობის დროს და გვთავაზობს საიმედო გადაადგილების მარშრუტს, არამედ აუმჯობესებს კავშირებს ჩვენი ქვეყნის რეგიონებს და მთის სოფლებს შორის. პროექტი იქონიებს დიდ სოციალურ ეფექტს იმ ათი სოფლისთვის, რომელთა მოსახლეობა რამდენიმე თვის განმავლობაში საგზაო კავშირის გარეშე რჩებოდა და არ ჰქონდა წვდომა სამედიცინო, საგანმანათლებლო თუ საყოფაცხოვრებო მომსახურებებზე. ახალი გზა გადაჭრის ზამთრის პერიოდში სატრანზიტო მოძრაობის ხშირი შეზღუდვების პრობლემასაც. ქვეშეთი-კობის გზის მშენებლობის პროექტი აზიის განვითარების ბანკის (ADB) ფინანსური მხარდაჭერით და გვირაბის მშენებლობის ნაწილში - ევროპის რეკონსტრუქციისა და განვითარების ბანკის (EBRD) თანადაფინანსებით ხორციელდება. პროექტის საერთო ღირებულება 1.2 მილიარდი ლარია. ქვეშეთი-კობის 23 კმ-იანი გზის მშენებლობა, ეტაპობრივად, 2024-2025 წლებში დასრულდება,“ - აღნიშნულია გავრცელებულ ინფორმაციაში.
ლატვიის სკოლები მეორე უცხო ენად რუსულის სწავლებას შეწყვეტენ
ლატვიის მთავრობამ გადაწყვიტა, უარი თქვას რუსულის, როგორც მეორე უცხო ენის შესწავლაზე სკოლებში. გადაწყვეტილება მინისტრთა კაბინეტმა ერთხმად, დებატების გარეშე დაამტკიცა, იუწყება პორტალი „დელფი.“ დოკუმენტის მიხედვით, სკოლის მოსწავლეები, რომლებმაც 2025 წლის პირველ სექტემბრამდე მეორე უცხო ენად რუსული აირჩიეს, მისი სწავლა სასკოლო სასწავლო გეგმის დასრულებამდე შეეძლებათ. თუმცა, 2026 წლიდან დაწყებული სასწავლო წლიდან, რუსულის ნაცვლად, სტუდენტებს შესთავაზებენ ევროკავშირის, ევროზონის ქვეყნების ოფიციალურ ენებს ან განათლების შესახებ სამთავრობათაშორისო შეთანხმებებით რეგულირებულ უცხო ენას. ამ დროისთვის ლატვიელი სკოლის, მოსწავლეები სწავლის დაწყებიდანვე სწავლობენ ინგლისურს, როგორც პირველ უცხო ენას, მეორე უცხო ენის შესწავლას კი, მე-4 კლასიდან იწყებენ. თეორიულად, ბავშვებს შეუძლიათ ისწავლონ ფრანგული, გერმანული და სხვა ენები, როგორც მეორე უცხო ენა, მაგრამ პრაქტიკაში უფრო ხშირად ისწავლება რუსული, რადგან სკოლებში სხვა ენების საკმარისი მასწავლებელი არ არის. ამის გამო, ლატვიის განათლებისა და მეცნიერების სამინისტროს ცნობით, ლატვიის სკოლების თითქმის ნახევარში რუსული მეორე უცხო ენად ისწავლება. ზოგიერთი საგანმანათლებლო დაწესებულება არ სთავაზობს მოსწავლეებს რუსულის ალტერნატივას. მთავრობის მიერ დამტკიცებული წესების მიხედვით, რუსულის, როგორც მეორე უცხო ენის მიტოვება ეტაპობრივად მოხდება - ის თანდათან და არა ერთბაშად ჩანაცვლდება გერმანულით, ფრანგულად, ესპანურით და ა.შ. ეს მიდგომა აიხსნება იმით, რომ ქვეყანას სჭირდება შესაბამისი ენების მასწავლებლების მომზადება. ამასთან, იმ სკოლის მოსწავლეებს, რომლებსაც არ სურთ რუსულის, როგორც უცხო ენის შესწავლა, წელს შეუძლიათ, უარი თქვან მასზე. მათ უფლება აქვთ, არ ჩააბარონ გამოცდა ამ საგანში. გასულ შემოდგომაზე ლატვიის სეიმმა დაამტკიცა ქვეყნის ეროვნული უსაფრთხოების ახალი კონცეფცია, რომელიც უკრაინის ომის გათვალისწინებით მომზადდა. დოკუმენტი ავალდებულებს ლატვიურ საჯარო მედიას 2026 წლის პირველი იანვრიდან გამოიყენოს მხოლოდ ლატვიური ენა ან ენა, რომელიც „ევროპულ კულტურულ სივრცეს ეკუთვნის.“ რუსეთის საგარეო საქმეთა სამინისტრომ ლატვიურ მედიაში რუსული ენის აკრძალვას უხეში დისკრიმინაცია უწოდა. „როდესაც სახელმწიფო შეწყვეტს რუსულენოვანი კონტენტის დაფინანსებას, ერთიანი საინფორმაციო სივრცის შექმნის პროცესი დასრულდება და რუსულენოვანი კონტენტი კომერციულ მედიაში კერძო ხარჯებით გააგრძელებს არსებობას,“ - ნათქვამია სეიმის შეტყობინებაში.
