ტექნოლოგიები
სამხრეთ აფრიკის რესპუბლიკა AstraZeneca-ს ვაქცინის გამოყენებას დროებით აჩერებს
სამხრეთ აფრიკის რესპუბლიკა კორონავირუსის ახალ შტამზე გავრცელებული კვლევების ფონზე, ბრიტანული პრეპარატით იმუნიზაციას დროებით აჩერებს. ინფორმაციას CNN-ი ავრცელებს. სამხრეთ აფრიკის რესპუბლიკის ჯანდაცვის მინისტრის, ზველი მკჰიზეს თქმით, ქვეყანა იმუნიზაციის პროცესს ბრიტანული ვაქცინით დროებით შეაჩერებს, ვიდრე დამატებითი ინფორმაცია არ გავრცელდება. AstraZeneca-ს წარმომადგენლის თქმით, კომპანია აქტიურად მუშაობს სამხრეთ აფრიკის ჯანდაცვის სამინისტროსთან, რათა იმუნიზაციის პროცესი მაქსიმალურად ეფექტურად გაგრძელდეს. სამხრეთ აფრიკის უნივერსიტეტისა და ოქსფორდის უნივერსიტეტის კვლევამ აჩვენა, რომ მნიშვნელოვნად შემცირდა ვაქცინის ეფექტურობა ვირუსის სამხრეთ აფრიკული ვარიანტის წინააღმდეგ. წინასწარი შედეგებზე დაყრდნობით ბრიტანული ვაქცინა ნაკლებად ეფექტურია ვირუსის მსუბუქი ფორმების წინააღმდეგ, თუმცა კომპანიის განცხადებით, ვაქცინას შეუძლია ვირუსის მძიმე ფორმების დაძლევა.
დანია ხელოვნურ კუნძულს აშენებს
დანია ელექტრო ენერგიის გამომუშავებითვის მსოფლიოს უდიდეს ქარის ენერგიის ხელოვნურ კუნძულს ააშენებს. ქარის ენერგიის მომავალი ჰაბი დანიას 34 მილიონი აშშ დოლარამდე დაუჯდება. კუნძულის ირგვლივ 200-მდე ქარის სადგური იქნება განლაგებული. მშენებლობა 2030 წლისთვის დასრულდება. სუფთა ენერგიის ჰაბი დასრულებიდან რამდენიმე წელში შეძლებს 10 გიგავატი ელექტროენერგიის გამომუშავებას. 2040 წლისთვის 150 გიგატავს გამოიმუშავებს, რაც 150 მილიონი სახლისთვის იქნება საკმარისი. გასულ წელს, დანიამ, რომელიც ევროკავშირში ნავთობის ყველაზე მსხვილი მწარმოებელია, პირობა დადო, რომ 2050 წლისთვის ნავთობისა და გაზის მოპოვებით სამუშაოებს ჩრდილოეთის ზღვაში შეამცირებს. მსგავსი კუნძულის აშენებას დანია გეგმავს ბალტიის ზღვაშიც და ისიც ასევე 2030 წლისთვის დასრულდება.
ბრიტანეთი Covid პასპორტის შემოღებას არ გემავს
ბრიტანეთი კორონავირუსით აცრილი ადამიანებისთვის პასპორტს არ შეიმუშავებს. ინფორმაციას Reuters-ი ავრცელებს. ამის შესახებ ვაქცინაციის საკითხებში მინისტრმა ნადიმ ზაჰავიმ განაცხადა. მისი თქმით, მოქალაქის აცრის შესახებ ინფორმაცია სხვა გზით იქნება ხელმისაწვდომი, კერძოდ, მოქალაქეს ინფორმაციის მიღება ექიმის მეშვებობით შეძლებს.
ნიუ-იორკში, იანკის სტადიონი ვაქცინაციის ცენტრად გადაკეთდა
ნიუ-იორკის მერმა მოსახლეობას იანკის სტადიონის ვაქცინაციის ცენტრად გადაკეთების შესახებ სიტყვით გამოსვლისას ამცნო. „განსაკუთრებული დღეა, ბრონქსის მცხოვრებნი ახლა დაცულები იქნებიან. ეს ნამდვილად ისტორიული დღეა, დღეიდან ამ სტადიონიდან შევძლებთ მოსახლეობის სიცოცხლის გადარჩენას, - აცხადებს ნიუ-იორკის მერი, ბილ დე ბლაზიო. მისივე თქმით, ამ ეტაპზე იმუნიზაციის ახალი ცენტრი მხოლოდ საღამოს 8 საათამდე იმუშავებს, თუმცა ძალიან მალე სტადიონი სრული დატვირთვით, მთელი დღის განმავლობაში შეძლებს ფუნქციონირებას. ჯანდაცვის ექსპერტის თქმით, ვაქცინაციის ცენტრში, დღეში 15,000 დოზა ვაქცინის გაკეთებაა შესაძლებელი.
წინასწარი კვლევით, AstraZeneca-ს პრეპარატი კორონავირუსის ახალი შტამის წინააღმდეგ ეფექტურია
AstraZeneca-ს პრეპარატი კორონავირუსის ახალი შტამის წინააღმდეგ ეფექტურია. ინფორმაციას NY Times-ი ავრცელებს. გამოცემის ცნობით, გამოვკლევის წინასწარი შედეგები გამოქვეყნდა, რომლის თანახმად ბრიტანული პრეპარატი კორონავირუსის ახალი შტამის წინააღმდეგ 74.6%-თ ეფექტურია. კვლევის წინასწარი შედეგებით, მსოფლიოს მასშტაბით ხელმისაწვდომი ხუთივე პრეპარატი ასევე ეფქტურია ახალი შტამის წინააღმდეგ. აღსანიშნავია, რომ მუტაციას შეუძლია პრეპარატების ეფექტურობა საკმაოდ დაწიოს, რის გამოც ქვეყნებს რაც შეიძლება სწრაფი იმუნიზაცია სჭირდებათ. ოქსფორდის მეცნიერები ვაქცინის ცდებში მონაწილე მოხალისეების ცხვირის ნაცხს რამდენიმე თვის განმავლობაში ამოწმებდნენ, რათა პრეპარატის ეფექტურობაში დარწმუნებულიყვნენ. AstraZeneca-ს ვაქცინა მსოფლიოს 50 ქვეყანაშია დაშვებული, თუმცა არა აშშ-ში, სადაც ამერიკული მარეგულირებელი საცდელი ფაზის დეტალებს ელის. NY Times-ის ცნობით, FDA 30,000-მდე მოხალისე ამერიკელზე ჩატარებული პრეპარატის გამოცდის პასუხებს თვის ბოლოსკენ მიიღებს. ბრიტანულ კომპანიას იმედი აქვს, რომ პრეპარატის უსაფრთხოებაში FDA-ის დასარწმუნებლად ყველა საჭირო მონაცემს წარადგენს. ბრიტანულ ვაქცინას ევროკავშირის რამდენიმე ქვეყანასთან მიწოდების პრობლემა შეექმნა. ამავდროულად, ევროკავშირის რამდენიმ წევრი ქვეყანა ხანდაზმული მოქალაქეებისთვის ბრიტანული ვაქცინის გეკეთებას არ აპირებს.
Pfizer-ი წელს, ვაქცინის გაყიდვებიდან $15 მილიარდის მიღებას ელოდება
Pfizer-ი აცხადებს, რომ მიმდინარე წელს, კორონავირუსის ვაქცინის გაყიდვებიდან შემოსავლების სახით, $15 მილიარდის მიღებას ელოდება. ინფორმაციას CNN-ი ავრცელებს. კომპანიაში აცხადებენ, რომ 2021 წლის ბოლომდე, ორი მილიარდი დოზა ვაქცინის წარმოება აქვთ გეგმაში. კომპანიის აღმასრულებელი ხელმძღვანელის ალბერტ ბურლას თქმით, ისინი არაერთ ინიციატივაზე მუშაობენ, რათა წარმოება გაზარდონ. ამერიკული ფარმაცევტული კომპანიის განცხადებით, გასული წლის მეოთხე კვარტალში ვაქცინის გაყიდვებით 154 მილიონი დოლარი მიიღეს. 31 იანვრის მდგომარეობით, Pfizer-მა მსოფლიოს უკვე 65 მილიონი დოზა ვაქცინა, ხოლო აშშ-ს 200 მილიონი დოზა მიაწოდა. მაისის ბოლომდე აშშ-ს დამატებით 200 მილიონი დოზა ვაქცინა უნდა მიაწოდოს.
ნიდერლანდები Covid19-ის გამოსავლენად ახალ მეთოდს გამოიყენებს
ნიდერლანდები კორონავირუსის დასადგენად სწრაფ ახალ ტესტებს გამოიყენებს. ინფორმაციას Reuters-ი ავრცელებს. ამსტერდამის კლინიკებში SpiroNose-ის აპარატების დამონტაჟება დაიწყეს, რომლებიც ვირუსზე ტესტს ადამიანის მიერ ამონასუნთქი ჰაერის ანალიზით გაკეთებს. ეს მეთოდი სტანდარტულ ნაცხის ტესტზე ბევრად მოსახერხებელია და 95%-თ ეფექტურია. SpiroNose-ზე ჰოლანდიური კომპანია რამდენიმე თვე მუშაობდა. იმ შემთხვევაში, თუ სუნთქვის სწრაფი ტესტი დადებით პასუხს აჩვენებს, PCR ტესტის გავლა მაინც სავალდებულოა. ბელგიელი ვირუსოლოგის, მარკ ვან რასთის თქმით, (SpiroNose) „დამაიმედებელი ტექნოლოგია შედეგს რამდენიმე წუთში იძლევა“.
Emirates-ის ავიახაზები განვითარებად ქვეყნებს ვაქცინის მიწოდებაში დახმარებას სთავაზობს
არაბთა გაერთიანებული საემიროები ავიახაზები ვაქცინის მიწოდებაში განვითარებად ქვეყნებს დაეხმარება. ავიახაზები ადგილობრივ ლოჯისტიკურ კომპანიასთან და ჰუმანიტარული დახმარების მიმწოდებელ კომპანიებთან გაერთიანდა და დუბაიში ვაქცინის დისტრიბუციის ჰაბის ჩამოყალიბება გადაწყვიტა. Emirate Airline-ს საკმაოდ დიდი გამოცდილება აქვს სხვადასხვა წამლის მიწოდებაში და სათანადო ინფრასტრუქტურა აქვს სპეციალური პირობების შესაქმნელად კორონავირუსის საწინააღმდეგო ვაქცინის გადასატანად. დუბაი აქტიურად ცდილობს, ვაქცინის მიწოდების პროცესში ჩართვას. ავიაკომპანიამ ეს ინიციატივა კვირა დღეს გააცნო საზოგადოებას. მათი მიზანია, დაჩქარდეს კორონავირუსის ვაქცინების განაწილება მსოფლიოში, განსაკუთრებით კი განვითარებად ქვეყნებში. ეს საკითხი მას შემდეგ გახდა აქტუალური, რაც ჯანდაცვის მსოფლიო ორგანიზაციამ რამდენჯერმე გააკეთა განცხადება, რომ მსოფლიოს ღარიბი ქვეყნები იჩაგრებოდნენ ვაქცინების მიწოდების კუთხით.
Bloomberg-ი : მსოფლიოში კორონავირუსის საწინააღმდეგო ვაქცინაცია 94 მილიონზე მეტ ადამიანს ჩაუტარდა
მსოფლიოში კორონავირუსის საწინააღმდეგო ვაქცინაცია 94 მილიონზე მეტ ადამიანს ჩაუტარდა. სტატისტიკას Bloomberg-ი ავრცელებს. Bloomberg-ი საკუთარ ონლაინსტატისტიკის გვერდს ყოველდღიურ რეჟიმში ანახლებს. ყველაზე ბევრი დოზა აშშ-ში გაკეთდა, 30 მილიონი მოსახლე უკვე აიცრა. იმუნიზაციის მაჩვენებლით მეორე ადგილზე ჩინეთია, სადაც 23 მილიონ ადამიანს ჩაუტარდა აცრა, ხოლო მესამეზე ევროკავშირია, სადაც 12 მილიონზე მეტ ადამიანს ჩაუტარდა ვაქცინაცია. პროცენტულად ყველაზე მეტი ვაქცინა ისრაელში გაიკეთეს. 100 მოსახლეზე საშუალოდ ვაქცინა 51-მა ადამიანმა გაიკეთა. ისრაელის გარდა, ვაქცინაცია სწრაფი ტემპით არაბთა გაერთიანებულ საამიროებსა და გაერთიანებულ სამეფოში მიმდინარეობს. მსოფლიოში დღეში საშუალოდ 4.3 მილიონამდე ადამიანი იცრება.
ევროპის წამლების სააგენტომ AstraZeneca-ს ვაქცინა დაამტკიცა
ევროპის წამლების სააგენტომ ევროკავშირის ტერიტორიაზე კომპანია AstraZeneca-ს ვაქცინის გამოყენება დაუშვა. იტყობინება BBC. „პრეპარატების კომიტეტი რეკომენდაციით გამოვიდა, AstraZeneca-ს ვაქცინისთვის დროებითი სარეგისტრაციო მოწმობა გაიცეს“, - ნათქვამია განცხადებაში. ეს უკვე მესამე ვაქცინაა, რომელიც ევროპულმა მარეგულირებელმა ევროკავშირის ტერიტორიაზე გამოყენებისთვის დაამტკიცა. მანამდე ევროკავშირმა Pfizer-ისა და Moderna-ს ვაქცინები დაამტკიცა. AstraZeneca-ს ვაქცინას დიდ ბრიტანეთში მიმდინარე ვაქცინაციის პროგრამის ფარგლებში უკვე იყენებენ.
თბილისში ელექტრო მოპედების გაზიარების სერვისი გამოჩნდა
თბილისში ელექტრო მოპედების გაზიარების სერვისი სახელწოდებით "Qari Electric"-ი გამოჩნდა. გაქირავების სერვისის გამოსაყენებლად საჭიროა კომპანიის აპლიკაციის ჩამოტვირთვა. რეგისტრაციის შემდეგ მოხმარებელს შეეძლება რუკაზე მითითებული მოპედების აყვანა და მგზავრობა. მოპედით სარგებლობის შემდეგ, მომხმარებელს მოპედის დატოვება პარკერებისა დასრულებისთვის სპეციალურად გამოყოფილ ზონებში შეუძლია, რომლებიც აპლიკაციაშია მითითებული. კომპანიის მოპედის სამართავად მართვის მოწმობა აუცილებელია. Qari-ს თქმით, მათი მოპედები ელექტროა და გარემოსთვის უსაფრთხოა. ამ ეტაპზე აპლიკაცია სატესტო რეჟიმში მუშაობს.
პანდემიის მიუხედავად Apple–ის გაყიდვებმა რეკორდულ ნიშნულს მიაღწია
პანდემიის მიუხედავად Apple–ის გაყიდვებმა რეკორდულ ნიშნულს მიაღწია. ინფორმაციას BBC ავრცელებს. უახლეს ტელეფონებზე, ლეპტოპებსა და გაჯეტებზე განსაკუთრებულმა მოთხოვნამ ბოლო სამი თვის განმავლობაში კომპანიას 111 მილიარდი დოლარის შემოსავალი მოუტანა. გამოცემის თქმით, ახალი რეკორდი განპირობებულია პანდემიის პერიოდში ონლაინაქტივობების გაზრდით. კომპანიის თქმით, მათ გაყიდვებს დადებითი გავლენა ჩინეთის ბაზარზე Apple-ის პროდუქტის მოთხოვნის ზრდის დამსახურებაცაა. Apple-ის თქმით, 5G ტექნოლოგიების განვითარებამაც საგრძნობი როლი ითამაშა მათი შემოსავლის რეკორდულ მაჩვენებელზე. კომპანიის გაყიდვები ჩინეთში 57%-ით გაიზარდა. ევროპაში გაყიდვების წილმა 17% შეადგინა, ხოლო ამერიკაში - 11%.
The Guardian-ი: Johnson & Johnson -ის ერთდოზიანი ვაქცინა კორონავირუსის წინააღმდეგ ეფექტურია
Johnson & Johnson -ის ერთდოზიანი ვაქცინა კორონავირუსის წინააღმდეგ ეფექტურია. ინფორმაციას The Guardian-ი ავრცელებს. აშშ-ის კომპანიების მეხუთე ვაქცინის გამოცდა რამდენიმე ქვეყანაში მიმდინარეობდა და ყველგან დამაჯერებელი შედეგი აჩვენა. ის ფაქტი, რომ ვაქცინას მხოლოდ ერთი დოზა სჭირდება კორონავირუსის დასაძლევად, განვითარებადი და მცირე შემოსავლის მქონე ქვეყნებისთვის საკმაოდ დამაიმედებელია. "ერთდოზიანი ვაქცინა პანდემიის პირობებში, ჯანმოს სტანდარტებით საუკეთესო ვარიანტია. ვაქცინა გააუმჯობესებს მიწოდების პროცესებსა და ხილმისაწვდომობასაც",- აცხადებს Johnsons & Johnson-ის მთავარი სამეცნიერო ოფისერი, პოლ სტოფელსი. Janssen-ის შვილობილ კომპანიას 44,000-ზე მეტი მოხალისე სამ ქვეყანაში ჰყავდა, კომპანია მომავალ კვირას FDA-ისგან საგანგებო სიტუაციებში გამოყენების ნებართვას ელის. Johnson & Johnson-ს აშშ-ისთან უკვე შეთანხმება აქვს. აშშ კომპანიისგან 100 მილიონ დოზას შეისყიდის. კომპანია ასევე მოელაპარაკა Covax-ს, პლატფორმა კომპანიის 50 მილიონ დოზას შეიძენს.
მსოფლიოში კორონავირუსის საწინააღმდეგო ვაქცინაცია 82.5 მილიონ ადამიანს ჩაუტარდა
მსოფლიოში კორონავირუსის საწინააღმდეგო ვაქცინაცია 82.5 მილიონ ადამიანს ჩაუტარდა. ინფორმაციას Bloomberg-ი ავრცელებს. აშშ-ში 25.6 მილიონზე მეტი ადამიანი აიცრა, რაც მოსახლეობის 7.81%-ს შეადგენს. აშშ-ის ჩინეთი მოჰყვება 23 მილიონზე მეტი ვაქცინირებული პაციენტით, რაც მოსახლეობის 1.64%-ს შეადგენს. ჯო ბაიდენის განცხადებით, აშშ-ის ხელისუფლება კორონავირუსის საწინააღმდეგო ვაქცინის დამატებით 200 მილიონი დოზის შეძენას გეგმავს. ევროკავშირში კი ვაქცინაცია 10.1 მილიონ ადამიანს ჩაუტარდა. ევროკომისიის პრეზიდენტის, ურსულა ფონ დერ ლეიენის განცხადებით, ევროკავშირი Pfizer/BioNTech-ის ვაქცინის დამატებით 300 მილიონ დოზას შეისყიდის, რაც კონტრაქტით გათვალისწინებული დოზებს ორჯერ აღემატება. ყველაზე სწრაფი ტემპით მოსახლეობის ვაქცინაცია ისრაელში მიმდინარეობს, სადაც უკვე 4.2 მილიონი ადამიანი აიცრა, რაც მთლიანი მოსახლეობის 47%-ს შეადგენს. ისრაელის გარდა, ვაქცინაცია სწრაფი ტემპით არაბთა გაერთიანებულ საამიროებსა და გაერთიანებულ სამეფოში მიმდინარეობს, სადაც შესაბამისად, მოსახლეობის 25 და 11%-ს ვაქცინაცია უკვე ჩაუტარდათ.
Pfizer-ის ვაქცინის ორი დოზის გაკეთების შემდეგ, ისრაელში კორონავირუსით მოსახლეობის მხოლოდ 0.04% დაინფიცირდა
Pfizer-ის ვაქცინის ორი დოზის გაკეთების შემდეგ, ისრაელში კორონავირუსით მოსახლეობის მხოლოდ 0.04% დაინფიცირდა. ინფორმაციას The Jerusalem Post-ი ავრცელებს. დღეის მდგომარეობით, ისრაელში ვაქცინის ორივე დოზით 715,425 ადამიანი აცრეს, მათგან ვირუსი მხოლოდ 0,004%-ს, 317 ადამიანს შეხვდა. ისრაელის კვლევით ფონდმა- Maccabi Health-მა რამდენიმე დღის წინ, გაავრცელა ინფორმაცია,რომ 163,000 პირიდან ვინც კორონავირუსის ორი დოზა გაიკეთა, Covid-ით 0,001% დაინფიცირდა. ისრაელში დღეში 200 000 ადამიანი იცრება. ამ კვირაში 35 წელს გადაცილებული ადამიანების ვაქცინაცია მიმდინარეობს. ისრაელი Pfizer-ს დამატებითი დოზების სანაცვლოდ ვაქცინირებული მოსახლეობის სამედიცინო მონაცემებს გაუზიარებს. ისრაელში 5 იანვირდან Moderna-ს კორონავირუსის საწინააღმდეგო ვაქცინა დაამტკიცეს.
Facebook-ი პოლიტიკური ჯგუფების რეკლამირებას სამუდამოდ აჩერებს
Facebook-ი პოლიტიკური ჯგუფების რეკლამირებას სამუდამოდ აჩერებს, ინფორმაციას CNBC ავრცელებს. სოციალური ქსელის აღმასრულებელი დირექტორის, მარკ ცუკერბერგის თქმით, პლატფორმა მომხმარებლებს პოლიტიკურ და სამოქალაქო ჯგუფებს აღარ შესთავაზებს. პლატფორმის პოლიტიკაში ცვლილება განპირობებულია კაპიტოლიუმის შტურმის პერიოდში მომხდარი მოვლენისგან. სოციალური ქსელები და მათ შორის Facebook-ი ექსტრემისტული ჯგუფების აგიტაციის ადგილი ხშირად ხდება. მკვლევარები ხშირად ამბობენ, რომ Facebook-ის ჯგუფები ხშირად კონსპირაციული თეორიების და დეზინფორმაციების გასავრცელებლად გამოიყენება. კომპანიის აღმასრულებელი დირექტორის თქმით, ახალ წესებთან ერთად, სოციალური ქსელი საკუთარ გვერდზე პოლიტიკური რეკლამების რაოდენობას შეამცირებს.
Moderna-ს ვაქცინა კორონავირუსის ახალი ვარიანტის წინააღმდეგ ეფექტურია
ამერიკულ კომპანია Moderna-ს ვაქცინა კორონავირუსის ახალი ვარიანტის წინააღმდეგ ეფექტურია, ინფორმაციას BBC ავრცელებს. ვაქცინაციის შედეგად ორგანიზმში კორონავირუსის ახალი ვარიანტების გამანეიტრალებელი ანტისხეულები წარმოიქმნება. კომპანიაში აცხადებენ, რომ კორონავირუსის ახალი ვარიანტის წინააღმდეგ ვაქცინაცია ასევე 2-ჯერ იქნება საჭირო. კორონავირუსის ახალი სახეობა გაერთიანებულ სამეფოში 14 დეკემბერს აღმოაჩინეს. ის გაცილებით უფრო სწრაფად ვრცელდება, თუმცა მაღალი სიკვდილიანობა არ ახასიათებს. რატომ არის უსაფრთხო Covid-19-ის ვაქცინები - ექსპერტების შეფასება.
SpaceX-მა კოსმოსში რეკორდული რაოდენობის თანამგზავრი გაუშვა
SpaceX-მა კოსმოსში რეკორდული რაოდენობის თანამგზავრი გაუშვა. ინფორმაციას CBS-ი ავრცელებს. Falcon 9-მ, ინდური კომპანიის მიერ დამყარებული რეკორდი გააუმჯობესა და კოსმოსში 143 მცირე ზომის სატელიტი გაუშვა. ილონ მასკის კომპანიამ შეძლო ინოვაციური ტექნოლოგიების დახმარებით კოსმოსში სხვადასხვა კომპანიისთვის განკუთვნილი რამდენიმე თანამგზავრი განათავსა. ხომალდზე SpaceX-ის 10 თანამგზავრია. ყველაზე ბევრი (48 თანამგზავრი) კი კომპანია San Francisco's Planet-ს ეკუთვნის. 2021 წლის 8 იანვარს, კოსმოსური ხომალდების მწარმოებელი და კოსმოსის ტრანსპორტირების კომპანია SpaceX-მა პირველი წარმატებული ფრენა შეასრულა.
მეცნიერები აფრიკული სპილოების რაოდენობას კოსმოსიდან ადგენენ
მეცნიერები აფრიკული სპილოების რაოდენობას კოსმოსიდან ადგენენ. ამის შესახებ ინფორმაციას BBC-ი ავრცელებს. სპილოებზე სურათები დედამიწის სადამკვირვებლო სატელიტიდან არის გადაღებული, რომელიც პლანეტის ზედაპირიდან 600 კმ-ზე (372 მილი) მდებარეობს. როგორც ცნობილია, ერთ დღეში შესაძლებელია 5000 კვადრატული კილომეტრის ტერიტორიის კვლევა. გამოთვლა ხდება ალგორითმით, რომელსაც შეუძლია სპილოების ამოცნობა სხვადასხვა ზედაპირზე, ღია საძოვრებზე, ტყეებში და სხვა. მეცნიერებმა ჯერ სამხრეთ აფრიკის ადდო სპილოების ეროვნული პარკს გადახედეს. მკვლევრების თანახმად, ბუნების დამცველებს ცხოველთა დათვლა ურჩევნიათ თვითმფრინავებიდან, მაგრამ კოსმოსური თანამგზავრები შესაძლებლობას იძლევა ეს მოხდეს იქაც, სადაც საჰაერო ფოტოგრაფირება აკრძალულია. მკვლევრები აცხადებენ, რომ დაკვირვების ეს მეთოდი ბრაკონიერობასთან ბრძოლაშიც შეიძლება გამოიყენონ.
დეტალები Pfizer-BioNTech-ის პრეპარატით ვაქცინაციაზე ნორვეგიაში
„ყველა შემთხვევის სიღრმისეული მოკვლევა მიმდინარეობს“, - აცხადებს ნორვეგიის მედიკამენტების სააგენტო 23 პაციენტის გარდაცვალებასთან დაკავშირებით, რომლებიც გავრცელებული ინფორმაციით, კორონავირუსის საწინააღმდეგო ინექციის მიღებიდან რამდენიმე დღეში გარდაიცვალნენ. სააგენტოს თანახმად, ვაქცინაზე გავრცელებული გვერდითი მოვლენები, როგორიცაა ღებინება და ტემპერატურის მატება, „შესაძლოა გამხდარიყო განსაკუთრებით მძიმე ავადმყოფების გარდაცვალების მიზეზი“. მათი თქმით, კომპანიის მიერ ჩატარებული მასშტაბური პრეტესტირების დროს, პრეპარატი არ იყო გამოცდილი არასტაბილურ, ან სუსტ და 85 წელს გადაცილებულ პაციენტებზე. ქვეყნის მასშტაბით ვაქცინაცია უკვე რამდენიმე კვირაა, რაც მიმდინარეობს. ძირითადად ვაქცინაცია ტარდება მოხუცთა სახლებში, სადაც ბევრ პაციენტს მძიმე მდგომარეობა აქვს. ნორვეგიაში ვაქცინაცია ამერიკულ-ბელგიური კომპანიის მიერ, Pfizer-BioNTech - ის პრეპარატით მიმდინარეობს. ქვეყნის მასშტაბით სულ მცირე ერთი დოზა 33,000-ზე მეტმა ადამიანმა გაიკეთა. მედიკამენტების სააგენტოს თქმით, თითოეული ლეტალური შემთხვევის დეტალური გამოკვლევა მიმდინარეობს და ნაადრევია იმის დასკვნა, რომ პაციენტების მდგომარეობის გართულება პრეპარატმა გამოიწვია. Bloomberg-ის ცნობით, ვაქცინის მწარმოებელი კომპანია და ნორვეგია ერთად სწავლობენ გარდაცვალების შემთხვევებს. ნორვეგიაში დაფიქსირებულ გარდაცვალების ფაქტზე ასევე დაუსვეს შეკითხვები ამირან გამყრელიძესაც. მისი თქმით, სავსებით გასაგებია, რომ ეს თემა საზოგადოების მაღალ ინტერესს იწვევს,თუმცა საჭიროა სიფრთხილე, რომ მოვლენებს წინ არ გავუსწროთ: „მე საფუძვლიანად გავეცანი ნორვეგიის მიერ ამ თემაზე გამოქვეყნებულ ლიტერატურას“, - ამბობს გამყრეილძე, მისი თქმით, ჯერ არავის უთქვამს, რომ ეს ადამიანები Pfizer-ის მიერ დამზადებული ვაქცინის მიღების გამო გარდაიცვალნენ. დაავადებათა კონტროლისა და საზოგადოებრივი ჯანმრთელობის ცენტრის გენერალური დირექტორის თქმით, საჭიროა, რომ ექსპერტიზის დასკვნას დაველოდოთ. Pfizer-BioNTech -ის კლინიკურ ცდებში 43,448 პაციენტი მონაწილეობდა. ცდების დროს არც ერთი მწვავე ალერგიული რეაქცია და/ან გარდაცვალება არ დაფიქსირებულა. აშშ-ის მასშტაბით Pfizer-ის ვაქცინა 1,893,360-მა ადამიანმა გაიკეთა, რომელთაგან მხოლოდ 21 შემთხვევაში დაფიქსირდა პრეპარატზე რეაქცია, აქედან 71% შემთხვევაში ალერგიული რეაქცია პრეპარატის მიღებიდან 15 წუთში შეინიშნებოდა. მხოლოდ 4 შემთხვევაში გახდა საჭირო პაციენტის ჰოსპიტალიზება, ხოლო მიღებიდან რამდენიმე დღეში ყველა პაციენტი სახლში გაწერეს. მსოფლიოს მასშტაბით ყველაზე მეტი დოზა ერთ სულ მოსახლეზე გაანგარიშებით, ისრაელში გაკეთდა. ქვეყანაში მოსახლეობის მეოთხედს გაუკეთდა ვაქცინის პირველი დოზა. ისრაელის მიერ გავრცელებული მონაცემების თანახმად, პირველი დოზის გაკეთებიდან 14 დღის შემდეგ, 60 წელს გადაცილებულ 200 000-კაციან ჯგუფში ინფექციის მაჩვენებელი 33 პროცენტით დაეცა მეორე, არავაქცინირებულ 200 000-კაციან ჯგუფთან შედარებით.
