ძებნის რეზულტატი:
იაპონია სტუდენტებისა და მედიკოსებისთვის საზღვრებს ხსნის, ტურისტებისთვის კი შეზღუდვებს ძალაში ტოვებს
იაპონია კორონავირუსის გამო ქვეყანაში შესვლასთან დაკავშირებით დაწესებული შეზღუდვების შემსუბუქებას იწყებს, - ამის შესახებ Asahi წერს. გამოცემის ინფორმაციით, შეზღუდვების შემსუბუქება ოქტომბრიდან დაიწყება და იმ მოქალაქეებს შეეხებათ, ვინც იაპონიაში 3 თვეზე მეტხანს დარჩენას აპირებენ, მათ შორის სტუდენტებსა და მედიკოსებს. აღსანიშნავია, რომ სიახლე არ ეხებათ ტურისტებს. გარდა ამისა, ქვეყანაში დღეში 1 000-ზე მეტი ადამიანის შესვლა ნებადართული არ იქნება. შეგახსენებთ, იაპონიამ სტუდენტებისა და ბიზნესმენებისთვის სასაზღვრო შეზღუდვები ივლისის ბოლოდან 7 ქვეყანასთან გააუქმა. ცნობისათვის, იაპონიაში, პანდემიის დაწყების დროიდან კორონავირუსის 80 000-მდე შემთხვევაა დადასტურებული, აქედან დაღუპულია 1 519 ადამიანი.
"ჩვენ არ მოვითმენთ ქიმიური იარაღის გამოყენებას" - მაკრონი რუსეთს ნავალნის საქმის განმარტებას სთხოვს
საფრანგეთის პრეზიდენტი, ემანუელ მაკრონი რუსეთისგან ითხოვს, დაუყოვნებლივ განმარტებას რუსი ოპოზიციონერი ლიდერის, ალექსეი ნავალნის მოწამვლის შესახებ. მან რუსეთი გააფრთხილა, რომ პარიზი არ დაუშვებს წითელი ხაზების გადაკვეთას ქიმიური იარაღის გამოყენების თაობაზე. ”ჩვენ არ მოვითმენთ ქიმიური იარაღის გამოყენებას ევროპაში, რუსეთში ან სირიაში,” - განაცხადა ემანუელ მაკრონმა გაეროს გენერალურ ასამბლეაზე ვიდეომიმართვისას და დასძინა, ”ეს განმარტება უნდა იყოს სწრაფი და უზადო, რადგან ჩვენ დავიცავთ ჩვენს წითელ ხაზებს“. მაკრონს არ დაუკონკრეტებია შემდგომი მოქმედებები, იმ შემთხვევაში, თუკი რუსეთი დამაკმაყოფილებელ განმარტებებს არ გააკეთებს. ცნობისთვის, ალექსეი ნავალნი, 20 აგვისტოს ომსკის კლინიკაში მას შემდეგ მოათავსეს, რაც თვითმფრინავში თავი შეუძლოდ იგრძნო, 22 აგვისტოს კი ახლობლების მოთხოვნით, ბერლინის კლინიკაში გადაიყვანეს. ტრანსპორტირებიდან რამდენიმე დღეში გერმანიის მთავრობამ განაცხადა, რომ ნავალნი „ნოვიჩოკის“ ტიპის ნერვული აგენტითაა მოწამლული. რუსეთი ნავალნის მოწამვლასთან კავშირს უარყოფს.
"პუტინი არ გამორიცხავს, რომ ნავალნიმ თავი მოიწამლა" - Le Monde
ფრანგულმა გამოცემა Le Monde-მა გამოაქვეყნა სტატია, რომელიც ალექსეი ნავალნის მოწამვლის შესახებ, საფრანგეთის და რუსეთის პრეზიდენტებს, ემანუელ მაკრონსა და ვლადიმირ პუტინს შორის 14 სეტემბერს გამართულ სატელეფონო საუბარს ეხება. გამოცემის თანახმად, პრეზიდენტებს შორის „ყრუთა დიალოგი“ შედგა. Le Monde-ის ინფორმაციით, პუტინმა მაკრონს უთხრა, რომ შესაძლოა, ნავალნიმ საწამლავი, დაუდგენელი მიზეზით, თავად მიიღო. გამოცემის წყაროების ცნობით, პუტინმა თქვა, რომ ნავალნი უბრალოდ, ინტერენტში არეულობის შემტანი პირია, რომელიც ადრე სხვადასხვა დაავადებას იგონებდა. მაკრონის მკაფიო პოზიცია იყო, რომ „ნოვიჩოკს“ კერძო პირი ვერ გამოიყენებდა. ალექსეი ნავალნის შეფასებით, პუტინს აქვს “კარგი ვერსია“, რომელიც ყურადღებით შესასწავლია. „სამზარეულოში მოვხარშე „ნოვიჩოკი“, თვითმფრინავში ჩუმად დავლიე. კომაში ჩავვარდი. მანამდე ცოლს, მეგობრებს და კოლეგებს მოველაპარაკე, რომ თუ ჯანდაცვის სამინისტრო მოითხოვს, რომ სამკურნალოდ გერმანიაში წამიყვანონ, არავითარ შემთხვევაში არ მისცენ ამის ნება. სიკვდილი ომსკის საავადმყოფოში, სადაც მიზეზად იმას დაადგენდნენ, რომ დიდხანს ცხოვრობდაო - ეს იყო ჩემი ეშმაკური გეგმის საბოლოო მიზანი. მაგრამ პუტინმა მომიგო. მას ასე უბრალოდ ვერ გააცურებ. საბოლოოდ, მე სულელივით კომაში ვიყავი 18 დღე, მაგრამ ჩემი ვერ გავიტანე. პროვოკაცია არ გამოვიდა!“ - წერს ალექსეი ნავალნი ინსტაგრამზე. 22 სექტემბერს, საფრანგეთის პრეზიდენტმა ემანუელ მაკრონმა გაეროს გენერალური ასამბლეის 75-ე სესიის მონაწილეებისადმი ვიდეომიმართვისას რუსეთს მოუწოდა, ნათელი მოჰფინოს ალექსეი ნავალნის მკვლელობის მცდელობას. მაკრონის განცხადებით, საფრანგეთი არ მოითმენს ევროპაში, ან რუსეთში ქიმიური იარაღის არსებობას. ოპოზიციონერმა ალექსეი ნავალნიმ, რომელიც 20 აგვისტოს ტომსკიდან მოსკოვში ბრუნდებოდა, თვითმფრინავში გონი დაკარგა. ავიალაინერი ომსკის აეროპორტში დაეშვა და ნავალნი გადაიყვანეს ადგილობრივ საავადმყოფოში, რომლის ექიმებმა ოჯახს ორი დღის შემდეგ მისცეს პაციენტის გერმანიაში გადაყვანის უფლება. 22 აგვისტოდან ნავალნი ბერლინის კლინიკა „შარიტეში“ იმყოფება. რუსი ოპოზიციონერი ხელოვნური კომიდან 7 სექტემბერს გამოიყვანეს. გერმანიის თავდაცვის სამინისტროს ლაბორატორიამ კვლევის შედეგად განაცხადა, რომ ნავალნი მოწამლულია ნივთიერებით „ნოვიჩოკის“ ჯგუფიდან. ეს დაადასტურეს საფრანგეთის და შვედეთის დამოუკიდებელმა ლაბორატორიებმაც. 2018 წელს, დიდ ბრიტანეთში „ნოვიჩოკით“ მოწამლეს რუსეთის სამხედრო დაზვერვის ოფიცერი, ორმაგი აგენტი სერგეი სკრიპალი და მისი ქალიშვილი. ლონდონი სკრიპალის მკვლელობის მცდელობაში რუსეთის სამხედრო დაზვერვას ადანაშაულებს, რასაც მოსკოვი დღემდე უარყოფს ისევე, როგორც ნავალნის მოწამვლასთან კავშირს.
საქართველოში კორონავირუსის 227 ახალი შემთხვევა დაფიქსირდა, გარდაცვლილთა რიცხვი კი 24-მდე გაიზარდა
საქართველოში კორონავირუსის 227 ახალი შემთხვევა დაფიქსირდა, გარდაცვლილთა რიცხვი კი 24-მდე გაიზარდა. stopcov.ge-ის ინფორმაციით, 23 სექტემბრის მდგომარეობით, ინფიცირების შემთხვევათა რაოდენობა 4140 -ს შეადგენს. მიმდინარე სტატისტიკა: კორონავირუსის დადასტურებული შემთხვევა - 4140; გამოჯანმრთელებული - 1643; გარდაცვლილი - 24; კარანტინის რეჟიმში - 5390; სტაციონარში მეთვალყურეობის ქვეშ - 836; კოვიდ სასტუმროში მყოფი პირები - 640; უცხოეთიდან სამკურნალოდ გადმოყვანილი საქართველოს მოქალაქეები - 41;
ალექსეი ნავალნი საავადმყოფოდან გაწერეს
ალექსეი ნავალნი ბერლინის Charité-ის საავადმყოფოდან გაწერეს, - ამის შესახებ რუსული მედია საავადმყოფოს ვებვერდზე განთავსებულ ინფორმაციაზე დაყრდნობით იუწყება. კლინიკის ინფორმაცით, ნავალნი კლინიკიდან ჯანმრთელობის მდგომარეობის გაუმჯობესების ფონზე გაწერეს. საერთო ჯამში, პოლიტიკოსმა Charité-ში 32 დღის განმავლობაში იმკურნალა, აქედან 24 დღე მან რეანიმაციულ განყოფილებაში გაატარა. შეგახსენებთ, ალექსეი ნავალნი, 20 აგვისტოს ომსკის კლინიკაში მას შემდეგ მოათავსეს, რაც თვითმფრინავში თავი შეუძლოდ იგრძნო და გონება დაკარგა. ის 22 აგვისტოს, ახლობლების მოთხოვნით, ბერლინის კლინიკაში გადაიყვანეს. ტრანსპორტირებიდან რამდენიმე დღეში გერმანიის მთავრობამ განაცხადა, რომ ნავალნი „ნოვიჩოკის“ ტიპის ნერვული აგენტითაა მოწამლული. რუსეთი ნავალნის მოწამვლასთან კავშირს უარყოფს.
საქართველოში დღეს კორონავირუსით კიდევ ერთი, 25-ე პაციენტი გარდაიცვალა
საქართველოში ბოლო 24 საათში კორონავირუსისგან კიდევ ერთი პაციენტი გარდაიცვალა და მათი რაოდენობა 25-მდე გაიზარდა. ამის შესახებ ინფორმაცია მთავრობის მიერ სპეციალურად შექმნილ ვებ-გვერდზე, stopcov.ge-ზეა განთავსებული. მიმდინარე სტატისტიკა: კორონავირუსის დადასტურებული შემთხვევა - 4140; გამოჯანმრთელებული - 1643; გარდაცვლილი - 24; კარანტინის რეჟიმში - 5390; სტაციონარში მეთვალყურეობის ქვეშ - 836; კოვიდ სასტუმროში მყოფი პირები - 640; უცხოეთიდან სამკურნალოდ გადმოყვანილი საქართველოს მოქალაქეები - 41;
პარიზში 10-ზე მეტი პირის თავშეყრა აიკრძალება
საფრანგეთის მთავრობა დღეს კორონავირუსთან დაკავშირებით დედაქალაქში შეზღუდვების გამკაცრების შესახებ განცხადების გაკეთებას გეგმავს, - ამის შესახებ ინფორმაციას ფრანგული მედია ავრცელებს. მათივე ინფორმაციით, ახალი შეზღუდვების თანახმად, პარიზში 10-ზე მეტი პირის თავშეყრა აიკრძალება, დიდ ღონისძიებებზე დამსწრეთა დასაშვები რაოდენობა კი 5 000-დან 1 000-მდე შემცირდება. გარდა ამისა, იგეგმება საღამოს 20.00 საათის შემდეგ ალკოჰოლური სასმელების გაყიდვის აკრძალვაც. ცნობისათვის, ბოლო დღეების განმავლობაში კორონავირუსით ინფიცირების შემთხვევების მატება მთელ საფრანგეთში ფიქსირდება. Worldometers-ის ცნობით, ქვეყანაში, პანდემიის დაწყების დროიდან, კორონავირუსის 468 069 შემთხვევაა დადასტურებული, აქედან გამოჯანმრთელებულია 93 538 და დაღუპულია 31 416 ადამიანი.
საბავშვო ბაღები 1 ოქტომბერს გაიხსნებიან - რა წესების დაცვა მოგიწევთ
საბავშვო ბაღები 1 ოქტომბერს გაიხსნებიან. ბაგა-ბაღების გაერთიანება წესების შესახებ ინფორმაციას ავრცელებს, რომელთა შესრულება სავალდებულოა როგორც პედაგოგებისთვის, ისე მშობლებისთვისაც. აკრძალვები: ბაღში არ დაიშვებიან უცხო პირები, მათ შორის მშობლები; არ დაიშვებიან სიცხიანი და რესპირატორული სიმპტომების მქონე ბავშვები / პედაგოგები / ადმინისტრაცია; აკრძალულია სახლიდან სათამაშოების მოტანა; აკრძალულია ისეთი სათამაშოები, რომელთა რეცხვა და დეზინფიცირება ვერ ხერხდება; აკრძალულია ისეთი გასართობი ღონისძიებები, რომელიც ითვალისწინებს ბავშვთა დიდი ოდენობით თავშეყრას;აკრძალულია მისალმებისას ხელის ჩამორთმევა და სხვებთან შეხება. ვალდებულებები: ბაღის შესასვლელთან უნდა განხორციელდეს ბავშვების / პერსონალის ტემპერატურის კონტროლი; რესპირატორული სიმპტომების გამოვლენისას ბავშვი მაქსიმალურად სწრაფად უნდა წაიყვანოს მშობელმა; მშობლის დროულად არ მოსვლის შემთხვევაში ბაღი უკავშირდება 112; ბავშვების გარდა, ყველა სხვა პირი ბაღში დაიშვება მხოლოდ ნიღბით; ბაღებმა უნდა უზრუნველყონ გარე სივრცეში ხანგრძლივად თამაშის ხელშეწყობა; ბაღმა უნდა იცოდეს, ბავშვს აქვს თუ არა ალერგია ალკოჰოლზე, ან რომელიმე ისეთ ნივთიერებაზე, რომელიც შედის სადეზინფექციო სითხის შემადგენლობაში;სამზარეულოში ჭურჭელი უნდა გაივლოს არანაკლებ 65 C ტემპერატურის ცხელი გამდინარე წყლით, მანამდე ორჯერ გაირეცხოს არანაკლებ 40 C ტემპერატურის წყლითა და სარეცხი საშუალებების გამოყენებით. პერსონალი: პერსონალი ვალდებულია სამუშაო პროცესი განახორციელოს დამსაქმებლის/შრომის უსაფრთხოების მენეჯერის მიერ განსაზღვრული საგანგებო სიტუაციებში სამოქმედო გეგმის შესაბამისად; პერსონალი ვალდებულია დაიცვას პირადი ჰიგიენა; დღის განმავლობაში, როდესაც ბავშვები არ იმყოფებიან ოთახებში (მაგ. არიან ეზოში) უნდა მოხდეს სათამაშო და საძინებელი ოთახების დასუფთავება/დეზინფექცია და განიავება; დასუფთავებაზე პასუხისმგებელ პერსონალს დამატებით უნდა ჩაუტარდეს შესაბამისი ინსტრუქტაჟი; სამზარეულოში მუშაობის დროს გამოყენებული იქნეს ერთჯერადი ნიღაბი, თავსაბურავი და ხელთათმანი; სათამაშოები უნდა გაირეცხოს ყოველდღიურად წყლით, ჯაგრისით, საპნით ან საკვები სოდის 2%-იანი ხსნარით; მუშაობის პერიოდში პერსონალმა უნდა უზრუნველყოს თმის შეკვრა/მჭიდროდ დამაგრება, რათა მაქსიმალურად შეიზღუდოს თმების სახის ზედაპირთან შეხება. „ეს არის მცირე ჩამონათვალი იმ წესებისა, რომლის შესრულებაც მოუწევთ როგორც საჯარო, ისე კერძო ბაღებს“, - ნათქვამია ბაღების გაერთიანების მიერ გავრცელებულ ინფორმაციაში.
ADB-ის მხარდაჭერით ავჭალის ტერიტორიაზე საუბნო პარკის მოწყობა იგეგმება
თბილისის მუნიციპალიტეტის მერიისა და აზიის განვითარების ბანკის მჭიდრო თანამშრომლობით, ავჭალის ტერიტორიაზე საუბნო პარკის მოწყობა იგეგმება, - ამის შესახებ დედაქალაქის მერმა, კახა კალაძემ მუნიციპალიტეტის მთავრობის დღევანდელ სხდომაზე განაცხადა. როგორც მან აღნიშნა, დედაქალაქის მასშტაბით, კიდევ ბევრი მწვანე სივრცე შეიქმნება. „ავჭალაში, სადგურის მიმდებარედ, დაახლოებით, ორი ჰექტარი ფართობის ტერიტორია იქნა მოძიებული. აზიის განვითარების ბანკთან მჭიდრო თანამშრომლობით, ამ პარკის დაპროექტება და შემდეგ მისი მოწყობა მოხდება. მინდა, აზიის განვითარების ბანკს თანამშრომლობისთვის მადლობა გადავუხადო. ძალიან მიხარია, რომ ავჭალაში საუბნო პარკი გაშენდება. ჩვენ ამ ტენდეციას შევინარჩუნებთ, თბილისში რაც შეიძლება მეტი მწვანე სივრცე უნდა შევქმნათ. გზაგამყოფ კუნძულებსაც კი არ ვტოვებთ ქალაქში. ვცდილობთ, ყველაფერი მაქსიმალურად გავალამაზოთ. წლების განმავლობაში სერიოზული პრობლემა იყო, რომ სკვერების, პარკების, საფეხბურთო მოედნების ხარჯზე საცხოვრებელ კორპუსებს აშენებდნენ. მთავარია, რომ საზოგადოების მხრიდან არის მხარდაჭერა. ერთიანი ძალისხმევით, ყველაფერი უნდა გავაკეთოთ იმისთვის, რომ ქალაქში რაც შეიძლება ბევრი მწვანე სივრცე შევქმნათ. ეს ჩვენი შვილებისთვის აუცილებელია. მითუფრო, იმ პირობებში, როდესაც კერძო ავტომობილების რაოდენობა იზრდება და გამონაბოლქვის პრობლემა ჩვენს ჯანმრთელობაზე აისახება“, - აღნიშნა კახა კალაძემ. პროექტის განხორციელების შედეგად, პარკის ტერიტორიაზე მოეწყობა თანაბრად ხელმისაწვდომი და კომფორტული სივრცეები მოსახლეობის ყველა ჯგუფისთვის. საუბნო პარკის მოწყობის პროექტირების პროცესში, გაზიარებული იქნება საუკეთესო სართაშორისო გამოცდილება და ადგილობრივი მცხოვრებლების საჭიროებები. თანამონაწილეობითი პრინციპების გათვალისწინებით, დაგეგმარების პროცესი მოსახლეობის გამოკითხვას და მათთან კონსულტაციების გამართვას ითვალისწინებს, რათა ადგილობრივი მცხოვრებლების, როგორც პარკის მთავარი მომხმარებლების ინტერესები და საჭიროებები გამოვლინდეს.
საქართველოში 5 თვის განმავლობაში 5.4 მილიონი პირბადე შეიკერა
5 თვის განმავლობაში საქართველოში 5.4 მილიონი მრავალჯერადი პირბადე შეიკერა. ამის შესახებ „ინტერპრესნიუსს“ ეკონომიკისა და მდგრადი განვითარების სამინისტროში განუცხადეს. „ინტერპრესნიუსი“ დაინტერესდა, რა რაოდენობის თანხა დაიხარჯა ბიუჯეტიდან მრავალჯერადი დოლბანდის პირბადის წარმოებაზე, რომლის საცალო ფასი მოსახლეობისთვის 50 თეთრია. როგორც სააგენტოს უწყებაში განუცხადეს, სახელმწიფოს მხრიდან 5.4 მილიონი პირბადის წარმოებაზე გაწეული ხარჯი 3.6 მილიონ ლარს შეადგენს. „ადგილობრივი პირბადეების წარმოების საჭიროება ქვეყანაში პანდემიის პერიოდში ინდივიდუალური დაცვის ამ უმნიშვნელოვანესი საშუალების მკვეთრმა დეფიციტმა განაპირობა. უწყებათაშორისი საბჭოს გადაწყვეტილებით, ეკონომიკისა და მდგრადი განვითარების სამინისტრომ, მის დაქვემდებარებაში არსებული სსიპ „აწარმოე საქართველოში“ დახმარებით ორგანიზება გაუწია დოლბანდის მრავალშრიანი პირბადეების მასიურ წარმოებას. აღნიშნულ პროცესს წინ უძღვოდა მოსამზადებელი პერიოდი, რომლის დროსაც შემუშავდა და ლუგარის ლაბორატორიაში გაიტესტა პირბადის პროტოტიპები, შემუშავდა დოლბანდის პირბადის წარმოების სტანდარტი, ლუგარის ლაბორატორიის მიერ დამტკიცდა დოლბანდის პირბადის პროტოკოლი, განხორციელდა დოლბანდის მარაგების შეძენა, ტექსტილის საწარმოებთან მოლაპარაკება და სხვა ტექნიკური და ლოგისტიკური საკითხების გადაჭრა. საერთო ჯამში პროექტის ფარგლებში, 5 თვის განმავლობაში განხორციელდა 5.4 მილიონი პირბადის წარმოება. წარმოების პროცესში პროექტის სხვადასხვა ეტაპზე ჯამურად ჩართული იყო 16 საწარმო, სადაც 900-მდე თანამშრომელი დასაქმდა. საწარმოთა ნაწილმა პირბადეების გარკვეული რაოდენობის წარმოება განახორციელა უსასყიდლოდ“, - აღნიშნავენ ეკონომიკის სამინისტროში. რაც შეეხება საკითხს, იგეგმება თუ არა მრავალჯერადი პირბადეების წარმოების გაგრძელება, სამინისტროში აცხადებენ, რომ ეს დამოკიდებული იქნება ეპიდემიოლოგიურ ვითარებასა და ბაზრის მოთხოვნაზე.
ალექსანდრე ლუკაშენკომ ფიცი დადო
ალექსანდრე ლუკაშენკო ბელარუსის პრეზიდენტის მოვალეობების შესრულებას ოფიციალურად შეუდგა, - ამის შესახებ ინფორმაციას ბელარუსული მედია ავრცელებს. მათივე ინფორმაციით, ფიცის დადების ცერემონია დამოუკიდებლობის სასახლეში გაიმართა და მას ასობით ადამიანი დაესწრო, მათ შორის პოლიტიკოსები და საზოგადო მოღვაწეები. შეგახსენებთ, ბელარუსში საპრეზიდენტო არჩევნები 9 აგვისტოს ჩატარდა. მას შემდეგ ქვეყანაში საპროტესტო აქციები არ წყდება. საზოგადოების ნაწილი არჩევნების ოფიციალურ შედეგებს არ ცნობს და ალექსანდრე ლუკაშენკოს გადადგომას მოითხოვს. დემონსტრაციები სამართალდამცველებმა ძალის გამოყენებით რამდენჯერმე დაშალეს და ათასობით ადამიანი დააკავეს.
კორონავირუსით ინფიცირებულთა მისაღებად ამ დროისთვის 715 საწოლია თავისუფალი
ჯანდაცვის სამინისტროს ინფორმაციით, კორონავირუსით ინფიცირებულთა მისაღებად ამ დროისთვის 715 თავისუფალი საწოლია. როგორც „ინტერპრესნიუსს“ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროში განუცხადეს, ქვეყნის მასშტაბით კოვიდპაციენტების მიერ დაკავებულია 1342 საწოლი. “სულ მობილიზებულია 2522 საწოლი, დაკავებულია - 1342, ტრიაჟისთვის დაკავებულია -207 საწოლი, ხოლო თავისუფალია 715 საწოლი“, - აცხადებენ უწყებაში. შეგახსენებთ, რომ საქართველოში კორონავირუსის დადასტურებული 4140 შემთხვევაა, მათ შორის გამოჯანმრთელებულია 1643 ადამიანი და გარდაცვლილი 25. კარანტინის რეჟიმში 5390 პირი იმყოფება, სტაციონარში მეთვალყურეობის ქვეშ - 836, ხოლო კოვიდ სასტუმროში - 640. უცხოეთიდან სამკურნალოდ გადმოყვანილია საქართველოს 41 მოქალაქე.
"იტალიის სკოლამ, ონლაინ სწავლებისთვის, მოსწავლეები, კომპიუტერებით თავად უზრუნველჰყო"
როდის და რა ფორმით განახლდა სასწავლო პროცესი იტალიაში და რა სირთულეებისა და გამოწვევების წინაშე დგას პანდემიისგან ერთ-ერთი ყველაზე მეტად დაზარალებული ქვეყნის სასკოლო სისტემა... მაშინ, როდესაც საქართველო, უამრავი სხვა ქვეყნის მსგავსად, ჯერ კიდევ შორიდან აკვირდებოდა კოვიდ-19-თან დაკავშირებულ ამბებს, იტალია ნამდვილ ომში ჩაერთო ამ ერთი შეხედვით არცთუ საშიშ, მაგრამ როგორც ადამიანურად, ისე ფინანსურად, ძალიან დიდი ზარალის, მომტან ვირუსთან. სკოლები და სხვა საგანმანათლებლო დაწესებულებები, ერთ-ერთი პირველი მოხვდა იმ ობიექტების სიაში, რომლებიც ჯერ კიდევ საყოველთაო საგანგებო მდგომარეობის გამოცხადებამდე დაიხურა. იტალიამ, პირველმა მიიღო ძლიერი დარტყმა და ერთ-ერთმა პირველმავე დაიწყო მძიმე მდგომარეობიდან გამოსვლა. საწყის ეტაპზე მძიმე შეზღუდვების გათვალისწინების შედეგად და ჯერ კიდევ მთელი რიგი რეგულაციების ფონზე, რაც დახურულ და ღია სივრცეში ნიღბების ტარებას, საზოგადოებრივი თავშეყრის ადგილებში საღამოს 6-დან დილის 6 საათამდე, დისტანციის დაცვის აუცილებლობას და სხვა სახის შეზღუდვებს გულისხმობს. ამ ეტაპზე, შეგვიძლია თამამად ვთქვათ, რომ იტალია ძველ, საოცრად ცოცხალ და ლამაზ ყოველდღიურობას ნელ-ნელა უბრუნდება. იმის ფონზე, რომ საქართველოში სასწავლო პროცესი ისევ დისტანციურ რეჟიმში დაიწყო, ალბათ უცნაურად მოგეჩვენებათ ის ფაქტი, რომ იტალიის სკოლების დიდმა ნაწილმა, სასწავლო პროცესი, ჩვეულ რეჟიმში განაახლა. სწორედ ამ საკითხებთან დაკავშირებით ვესაუბრეთ ფლორენციის, სკანდიჩის, რასელ-ნიუტონის სახელობის „HIGH SCHOOL“-ის, იტალიური ენისა და ლიტერატურის პედაგოგს, მასიმო სერიაკოპის, რომელსაც 29 წლიანი გამოცდილება აქვს, მოსწავლეები და სკოლის პერსონალი კი ბავშვების სიყვარულის ამდენივეწლიანი სტაჟით ახასიათებენ. მასიმო სერიაკოპი: იტალიაში შექმნილი პანდემიური მდგომარეობიდან გამომდინარე, 5 მარტს, სრულიად მოულოდნელად, პირველი კომუნიკაციიდან, სულ რამდენიმე საათში დავხურეთ სკოლა. მოგვიწია შუა გზაზე მიგვეტოვებინა არა მხოლოდ ძირითადი სასწავლო პროგრამა და პროცესი, არამედ მთელი რიგი პროექტები და აქტივობები, რომელთა ნაწილი დღემდე დაუსრულებელია. სრულიად პარალიზებულნი აღმოვჩნდით, როგორც დირექცია და პედაგოგები, ასევე მოსწავლეები და მათი მშობლები, მაგრამ ვაცნობიერებდით, რომ შექმნილ ვითარებაში, ეს უბრალოდ გარდაუვალი იყო. - მას შემდეგ, რაც გაიგეთ, რომ სკოლები იხურებოდა, როგორი იყო პირველი რეაქცია და შემდეგ უკვე პირველი ნაბიჯები სკოლის მხრიდან? - მიუხედავად იმისა, რომ ერთი თვის განმავლობაში მიდიოდა საუბრები, მაინც მეხის გავარდნის ეფექტი ჰქონდა იტალიის მთავრობის მიერ ამ გადაწყვეტილების გამოცხადებას. სემესტრი ისე დასრულდა, რომ სასწავლო პროცესის განახლება ვერ მოხერხდა. ბავშვები მერხებს ახალ სასწავლო წელს, 14 სექტემბერს დაუბრუნდნენ, მაგრამ ბოლო მომენტამდე არ ვიცოდით, გავიხსნებოდით თუ არა. სკოლის დახურვის შემდეგ, არ დავლოდებივართ განათლების სამინისტროს ინსტრუქციებს და დამოუკიდებელად დავიწყეთ ნაბიჯების გადადგმა. მაშინვე სრული დატვირთვით ავამუშავეთ სკოლის ინფორმატიკის განყოფილება და თამამად შემიძლია ვთქვა, რომ მიუხედავად ტექნიკური და ტექნოლოგიური სირთულეებისა, შევძელით მოსწავლეებთან და ოჯახებთან კონტაქტის შენარჩუნება. არ ვგულისხმობ მხოლოდ მკაცრად გაწერილ სასწავლო პროგრამას, გვინდოდა ჩვენი ბავშვებისთვის გვეგრძნობინებინა, რომ მათ გვერდით ვიყავით და რომ ისინი არავის მიუტოვებია. მასწავლებლებიც მუდმივად ხაზზე ვიყავით ერთმანეთთან და ვცვლიდით ინფორმაციას. რამდენიმე კვირაში, განათლების სამინისტროს ინსტრუქციებიც წამოგვეწია. პასუხისმგებლობის გრძნობის საკმაოდ მაღალი დონე გამოავლინეს. - დისტანციური სწავლებისას საქართველოში, განსაკუთრებით იმ ოჯახებში, სადაც ერთზე მეტი ბავშვია, თავი იჩინა საკმაოდ მწვავე პრობლემამ, ხშირ შემთხვევაში, ოჯახში მხოლოდ ერთი კომპიუტერია, მაგრამ ონლაინგაკვეთილები ყველა ბავშვისთვის ერთდროულად მიმდინარეობს. ეს საკითხი როგორ მოაგვარეთ? - ჩვენ გამოვავლინეთ ყველა ის მოსწავლე, რომელსაც არ ჰქონდა პერსონალური კომპიუტერი და სკოლამ საკუთარი რესურსებით, უფასოდ უზრუნველჰყო ისინი ტაბლეტებით. მაქსიმალურად ვეცადეთ, რომ დისტანციური სწავლის პროცესშიც ყველა მოსწავლე თანაბარ მდგომარეობაში ყოფილიყო. - განაახლეთ სასწავლო პროცესი, მაგრამ თქვენი სკოლა ძალიან დიდია მასშტაბებით, როგორ ახერხებთ უზრუნველჰყოთ უსაფრთხო გარემო მოსწავლეებისთვის პანდემიასთან მიმართებაში? - პარადოქსია, მაგრამ მიუხედავად თავისი მასშტაბებისა, იგულისხმება როგორც ფართობი, ასევე მოსწავლეებისა და პერსონალის რაოდენობა, 1800 მოსწავლე, 200 მასწავლებელი და პლიუს მომსახურე პერსონალი. სკოლა იქცა ყველაზე უსაფრთხო და სამაგალითო სივრცედ. მოსწავლეებიც და მასწავლებლებიც, სრულიად ითვალისწინებენ იმ რეგულაციებს, რაც სკოლის გახსნისთვის, აუცილებელი პირობა იყო. ბავშვებმა კარგად გააცნობიერეს, რომ ძალიან დაზარალდნენ გასული თვეების განმავლობაში და ახლა ცდილობენ წესების დაცვით, თავიდან აიცილონ სიტუაციის განმეორება. მინდა ხაზი გავუსვა, რომ მოზარდები საოცარ მაგალითს იძლევიან საზოგადოების ზრდასრული ნაწილისთვის. პირდაპირაც ვეუბნები-ხოლმე, რომ ქედს ვიხრი მათ წინაშე. - როგორია ახალი რეგულაციები და შეზღუდვები სკოლებისთვის? - სკოლამ უზრუნველჰყო რამდენიმე შესასვლელი, რათა ზარის დარეკვისას, ბევრმა მოსწავლემ ერთად არ მოიყაროს თავი, სავალდებულოა ტემპერატურის კონტროლი მასწავლებლებისთვის, ყველა კუთხეში დგას ხელების სადეზინფექციო ხსნარი, აუცილებელია ნიღბების ტარება და ისინი მოსწავლეებს და მასწავლებლებს ურიგდებათ სკოლაში. გარდა დასუფთავების ძირითადი მეთოდისა, კლასების დასუფთავება ხდება განსაკუთრებული წესითაც. მასწავლებლებს გვაძლევენ დეზინფექციის ჩასატარებელ ხელსახოცებს, ჩვენი მაგიდის გასაწმენდად ყოველი გაკვეთილის დაწყების წინ. ვიცავთ დისტანციას საკლასო ოთახებში და ასევე სკოლის თავისუფალ სივრცეში. დირექციამ გვთხოვა, მოვერიდოთ პირდაპირ კონტაქტს, თუნდაც დიდაქტიკური მასალების გაცვლის დროს, თუ მაინც მიწევს შეხება, ხელთათმანებს ვიყენებ. რაც შეეხება საშინაო დავალებებს, ნამუშევრები ე.წ. კარანტინს გადიან, სამი დღის განმავლობაში ვაკონსერვებთ და მხოლოდ შემდეგ ვამოწმებთ. ასევე, სკოლამ სამინისტროსგან დამოუკიდებლად, მასწავლებლების მიერ გამართული კენჭისყრის შედეგად, მიიღო გადაწყვეტილება, შევადგინეთ ცხრილი და კვირაში ერთი დღე, როტაციის პრინციპით, თითოეულ კლასს აქვს ონლაინგაკვეთილები. ამგვარად, შევამცირებთ მოსწავლეების რაოდენობას ყოველდღიურად და ეს საშუალებას მოგვცემს შენობის კონკრეტული სექტორები დავტოვოთ თავისუფალი, სადეზინფექციო სამუშაოების ჩასატარებლად. - სწავლის პროცესის დაწყებიდან რამდენიმე დღეში, ფლორენციის სკოლებში დაინფიცირების 42 შემთხვევა გამოვლინდა, ხომ არ არის იმის საშიშროება, რომ სასწავლო პროცესი ისევ სრულიად დისტანციურ სწავლებაზე გადავიდეს? - აუცილებლად უნდა აღვნიშნოთ, რომ ამ 42 მოსწავლეს ვირუსი სკოლაში არ შეხვედრიათ. სამწუხაროდ, სკოლის გარეთ არც თუ ისე ყურადღებით არიან რეგულაციების მიმართ და შედეგიც სახეზეა. საშიშროება, რომ ისევ დაგვხურონ, არსებობს, მაგრამ არა იმის გამო, რაც სკოლაში ხდება, არამედ იმის გამო, რასაც სკოლის გარეთ ვხედავთ. - როგორ აფასებთ დისტანციურ სწავლებას, შესაძლოა შევადაროთ ის ჩვეულებრივ სასწავლო პროცესს? - ვირტუალური რეალობა, რეალობას ვერასდროს შეცვლის. ეს შედარება, ვერანაირ კრიტიკას გაუძლებს, მაგრამ იმ ეტაპზე ერთადერთი გამოსავალი იყო, რომელიც მაქსიმალურად უნდა გამოგვეყენებინა და ასეც მოვიქეცით. ვეცადეთ მოვრგებოდით არსებულ რეალობას. დამატებით მოგვიწია პროგრამის გადახედვა, რომ ყველაზე მნიშვნელოვანი ამოგვეღო ძირითადი პროგრამიდან და ისეთი ფორმით მიგვეტანა ბავშვებამდე, რაც დისტაციური სწავლებისთვის იქნებოდა ადექვატური. მასალებს ვამზადებდით სპეციალურ ფორმატში, იქნებოდა ეს წერილობითი, გრაფიკული, ვიდეო თუ სხვა. შევხედოთ ამ ყველაფერს დადებითი კუთხიდან. წარმოიდგინეთ ასეთ სიტუაციაში ოცი წლის წინ რომ აღმოვჩენილიყავით. მაშინ მართლაც „ლოქდაუნში“ მოვხვდებოდით. შევხედოთ დისტანციურ სწავლებას როგორც საშუალებას, რომ ასიათასობით მოზარდი, სრულიად მოწყვეტილი არ აღმოჩნდა სასწავლო პროცესს. - იტალიურ უმაღლეს სკოლებში სწავლა, საკმაოდ რთულია და ხშირია საშემოდგომო გამოცდები, ან კლასში ჩარჩენის ფაქტები. წელს, მსგავსი არაფერი მომხდარა, საატესტატო გამოცდებიც შედარებით მარტივად ჩატარდა, ყოველივე ეს, ცუდ ზეგავლენას ხომ არ მოახდენს მოზარდებზე? - სხვანაირად არ გამოვიდოდა. მინდა აღვნიშნო, რომ ჩვენი, მასწავლებლების აზრით, განათლების მინისტრმა დაუშვა შეცდომა, როდესაც მარტშივე განაცხადა, რომ ყველა გადავიდოდა კლასიდან კლასში და ყველა დაამთავრებდა სკოლას, პრობლემების გარეშე. ბავშვების დაიმედება და ამის თავიდან აცილება შეიძლებოდა. სკოლის დამამთავრებელი გამოცდა, დაგეთანხმებით, რომ გაცილებით მარტივი და მხოლოდ ზეპირი ფორმით ჩატარდა, მიუხედავად ამისა, მოსწავლეებმა პასუხისმგებლობის საკმაოდ მაღალი გძნობა გამოიჩინეს და მომზადებულები მოვიდნენ. - აკრძალვები, რომ ბავშვები ერთმანეთს კონკრეტულ მანძილზე არ უნდა მიუახლოვდნენ, ერთმანეთს არ უნდა შეეხონ, უხეშად რომ ვთქვათ, ერთმანეთს უნდა მოერიდონ, სამომავლოდ ხომ არ იქონიებს გავლენას მათ ხასიათსა და დამოკიდებულებებზე? - სამწუხაროდ, ეს ყველაფერი, მოზარდებზე კვალს დატოვებს. ამის შედეგს აუცილებლად ვნახავთ, მაგრამ არ შემიძლია არ აღვნიშნო, რამდენად სოლიდარულები არიან ისინი ერთმანეთის მიმართ, როგორ უფრთხილდებიან ერთმანეთს, მაგრამ შეხება, ჩახუტება, თუნდაც ერთმანეთში კამათი, ჰაერივით აუცილებელია მათთვის. აშკარად იგრძნობა, თუ რამდენად აკლიათ მათ ეს ყველაფერი. - რა იქნება თქვენი მესიჯი ქართველი მასწავლებლებისთვის ამ რთულ სიტუაციაში, საკუთარი გამოცდილებიდან გამომდინარე? - ნუ დავივიწყებთ, რამდენად ვჭირდებით ბავშვებს როგორც გზამკვლევები და რომ მათთვის მისაბაძი მაგალითი ვართ. ნუ დაგვავიწყდება, რომ მათ ჩვენი სითბო სჭირდებათ, ნუ შევიკავებთ თავს ამ სითბოს გამოხატვისგან. ნუ დავივიწყებთ მათ ასაკს და გვახსოვდეს თუ რამხელა დაბრკოლებების გადალახვა უწევთ ამ რთულ ასაკში. გამოვიყენოთ ყველა საშუალება იმისთვის, რათა ვაგრძნობინოთ, რომ მათ გვერდით ვართ, თუნდაც ზოგჯერ სიმკაცრით გამოვხატოთ ჩვენი სიახლოვე. დამიჯერეთ, ეს მათ სჭირდებათ და აფასებენ. თუ იგრძნობენ რამდენად ძვირფასები არიან ჩვენთვის, იგივეს დაგვიბრუნებენ. ნინა მამუკაძე-სორდინი - სპეციალურად „ევროპატაიმისთვის“ იტალიიდან
Johnson & Johnson's-ის ვაქცინა კლინიკური კვლევის მესამე ეტაპზეა
დღეიდან Johnson & Johnson's-ის ვაქცინა კლინიკური კვლევის მესამე ეტაპზეა. CNN-ი ფარმაცევტული კომპანიაზე დაყრდნობით აცხადებს, რომ აცრისათვის ვაქცინის მხოლოდ ერთი დოზაა საკმარისი. აშშ-ს და მსოფლიოს მასშტაბით კვლევა დაახლოებით 60,000-მდე მოხალისეზე ჩატარდა. Johnson & Johnson's-ის მთავარი მეცნიერის პოლ შტოფელის განცხადებით, კლინიკური ცდის მესამე ეტაპი სტარტს დღესვე აიღებს. რაც შეეხება პირველ და მეორე კლინიკურ ტესტირებებს, ირკვევა, რომ ვაქცინა აყალიბებს იმუნიტეტეს და უსაფრთხოა მასშტაბური ცდების ჩატარების თვალსაზრისით. კლინიკური ცდის მესამე ეტაპზე, კიდევ უფრო დეტალურად შეისწავლიან მედიკამენტის უსაფრთხოებას და გაარკვევენ საკმარისია თუ არა ერთი დოზა ვაქცინა კორონავირუსის წინააღმდეგ იმუნიტეტის შესაქმნელად. ამასთანავე Johnson & Johnson აპირებს დიდი ბრიტანეთის მთავრობასთან თანამშრომლობით შეისწავლოს ვაქცინის ორი დოზის ეფექტიანობა. მედიკამენტის კლინიკური ტესტირება ჩატარდება არგენტინაში, ბრაზილიაში, ჩილეში, კოლუმბიაში, მექსიკაში, პერუში, სამხრეთ აფრიკასა და შეერთებულ შტატებში. Johnson & Johnson-ი აღნიშნავს, რომ თუ ვაქცინა წარმატებით გაივლის კლინიკური ტესტირების მესამე ეტაპს, ის ფართო მოხმარებისთვის ხელმისაწვდომი 2021 წლის დასაწყისში გახდება. აღსანიშნავია, რომ კლინიკური ცდების მესამე ეტაპს გადიან Moderna, Pfizer/BioNTech და AstraZenec-ს ვაქცინები.
აშშ-ს 3 ყოფილი ელჩი საქართველოში დემოკრატიის და ბიზნესგარემოს გაუარესებაზე სტატიას აქვეყნებს
საქართველოში ამერიკის შეერთებული შტატების სამი ყოფილი ელჩი, ჯონ ტეფტი, უილიამ კორტნი და კენეტ იალოვიცი საქართველოში დემოკრატიისა და ბიზნესგარემოს უკუსვლის შესახებ გამოცემა The National Interesrt-ში ერთობლივ სტატიას აქვეყნებენ. დიპლომატები აღნიშნავენ, რომ პოლარიზებული პოლიტიკური ვითარება, საარჩევნო პროცესში არსებული დარღვევები და საერთაშორისო ინვესტორთა შევიწროების შემთხვევები საქართველოს საერთაშორისო იმიჯს აზიანებენ. ამასთან, ეს საკითხები საქართველოს დასავლელ მოკავშირეებს ქვეყნის პოლიტიკური კურსის შესახებ დამატებით კითხვებს უჩენენ. სწორედ ამიტომ, მათი თქმით, აშშ-ის წარმომადგენელთა პალატის საბიუჯეტო კომიტეტმა მხარი დაუჭირა ინიციატივას, რომელიც საქართველოსთვის გამოსაყოფი დახმარების 15%-ის შეჩერებას ითვალისწინებს, რისი წინაპირობებიც დემოკრატიული ინსტიტუტების გამყარება, კორუფციასთან ბრძოლა და საერთაშორისო ინვესტორთა უფლებების დაცვაა. “ამ კანონპროექტმა შესაძლოა, კანონის ძალა ვერ შეიძინოს, თუმცა ის მომავალი არჩევნებისთვის სიგნალს წარმოადგენს,”- აღნიშნავენ დიპლომატები. ყოფილი ელჩები წინასაარჩევნო პერიოდზეც საუბრობენ და ამბობენ, რომ რუსეთის ფედერაციამ შესაძლოა საქართველოს საპარლამენტო არჩევნებში ჩარევა სცადოს, რის შესახებაც განცხადება მოქმედა ელჩმა, კელი დეგნანმაც გააკეთა. “2018 წლის საპრეზიდენტო არჩევნები ძალადობით, ამომრჩეველთა დაშინებით და საერთაშორისო არასამთავრობო ორგანიზაციების მიმართ მუქარისშემცველი განცხადებებით გამოირჩეოდა. 2019 წლის ივნისში სახელმწიფომ საპროტესტოდ გამოსული მოქალაქეების წინააღმდეგ გაფრთხილების გარეშე რეზინის ტყვიები და ცრემლსადენი გაზი გამოიყენა. 2019 წლის დეკემბერში, ეროვნულ დემოკრატიული ინსტიტუტის (NDI) მიერ ჩატარებულ კვლევაში მოსახლეობის 53%-მა აღნიშნა, რომ საქართველო არასწორი მიმართულებით ვითარდებოდა, არსებულ მიმართულებას კი სწორად მოსახლეობის მხოლოდ 19% მიიჩნევს. ამავე ანგარიშის მიხედვით, მოსახლეობის 59% ამბობს, რომ საქართველო დემოკრატიული ქვეყანა არაა, ერთი წლით ადრე ამ აზრს მოსახლეობის 46% იზიარებდა,”- ნათქვამია სტატიაში. საქართველოში აშშ-ის ყოფილი ელჩები აღნიშნავენ, რომ 8 მარტს, ამერიკელი და ევროპელი დიპლომატების მედიაციის შედეგად საკონსტიტუციო ცვლილებებზე მიღწეული შეთანხმება ქვეყანაში პროპორციულ საარჩევნო სისტემაზე გადასვლას ითვალისწინებს. დიპლომატების თქმით, საარჩევნო შეთანხმება და ბარიერის დაწევა, ასევე წამყვანი ოპოზიციური პარტიების წევრების, გიგი უგულავასა და ირაკლი ოქრუაშვილის გათავისუფლება ვითარების დასტაბილურებისკენ გადადგმული მნიშვნელოვანი ნაბიჯები იყო. “საარჩევნო კამპანია უკვე დაწყებულია, თუმცა არსებობს გართულებები. ორგანიზაციამ “რეპორტიორები საზღვრებს გარეშე” უკვე გამოთქვა შეშფოთება ქვეყანაში რეპრესიული კანონმდებლობის მიღების თაობაზე, რაც კომუნიკაციების კანონში დაჩქარებული წესით შესულ ცვლილებებს უკავშირდება. ორგანიზაცია აღნიშნავს, რომ ეს ცვლილებები სახელმწიფოს მხრიდან ტელე და რადიომაუწყებლებზე კონტროლის მოპოვების მცდელობას შეიძლება წარმოადგენდეს,”- ნათქვამია სტატიაში. დიპლომატები წერენ, რომ კორონავირუსის პანდემიამ საქართველოს ეკონომიკას მნიშვნელოვანი დარტყმა მიაყენა, რის გამოც EBRD-ის შეფასებით წელს ქვეყნის მშპ 5.5%-ით შემცირდება. გასული ათწლეულის განმავლობაში კი საქართველოს ეკონომიკა საშუალოდ 4-5 პროცენტით იზრდებოდა, თუმცა უმუშევრობა კვლავ აქილევსის ქულს წარმოადგენს, ხოლო ქვეყნის რაიონებში კი სიღარიბე განსაკუთრებით გავრცელებულია. “ქვეყანა დაუყოვნებლივ საჭიროებს ახალ ინვესტიციებს, თუმცა კანონის უზენაესობაში არსებული ხარვეზები, დავების მოგვარების სისტემის ნაკლოვანებები, კვლავ მნიშვნელოვან გამოწვევად რჩება,”- ნათქვამია სტატიაში. ანაკლიის ღრმაწყლოვანი პორტის და ციფრული აბრეშუმის გზის პროექტები: დიპლომატები წერენ ორ უმსხვილეს საინვესტიციო პროექტზე, რომელთა განვითარებასაც მათი შეფასებით სახელმწიფოს ჩარევა აფერხებს, საუბარია ანაკლიის ღრმაწყლოვანი პორტისა და ახალი ციფრული დერეფანის განვითარების პროექტებზე. “ანაკლიის ღრმაწყლოვანი პორტი, რომელიც $2.5-მილიარდიანი ინვესტიციებს ითვალისწინებდა, საქართველოს ევროპასა და აზიას შორის ვაჭრობის მნიშვნელოვან პუნქტად აცქევდა. პორტის განვითარება კი როგორც ჩანს საქართველოს მთავრობის მიერ მის პოლიტიზირებას უკავშირდება, რის გამოც, საქართველოს მთავრობამ უარი თქვა საერთაშორისო დონორთა მოთხოვნის დაკმაყოფილებაზე მოეხდინა პროექტის ფინანსირებისთვის საჭირო სესხების გარანტირება. შედეგად, პროექტის განვითარებაში ჩართული საერთაშორისო კონსორციუმი მისმა ამერიკელმა პარტნიორებმა დატოვეს. ანაკლიის გარდა, მეორე შემთხვევა ოპტიკურ-ბოჭკოვანი ინფრასტრუქტურის განვითარების პროექტს ეხება, რომლის განვითარებაშიც საერთაშორისო კონსორციუმი არის ჩართული. პროექტი შავი ზღვის ფსკერზე არსებული კაბელის მეშვეობით, ევროპასა და აზიას დააკავშირებს. კონსორციუმმა ამ პროექტის განხორციელებისთვის, საქართველოს ერთ-ერთი ინტერნეტ პროვაიდერის მფლობელ კომპანიაში 49%-იანი წილი შეიძინა. საქართველოს მთავრობამ კი დაჩქარებული წესით მიღებული კანონით ამ ტრანზაქციის შებრუნება და კომპანიაზე სრული გავლენის მოპოვება გადაწყვიტა. ორივე შემთხვევა აჩვენებს, რომ საქართველოში ინვესტირების საბოლოო შედეგი კომპანიებისთვის საერთაშორისო საარბიტრაჟო სასამართლოსთვის მიმართვა იყოს, რაც ახლა ხდება ანაკლიის შემთხვევაში. ამან კი პოტენციური უცხოური ინვესტორების დაფრთხობა გამოიწვიოს. მოლაპარაკებათა შედეგად მიღწეულ შეთანხმებებს ამ რისკების შემცირება შეუძლიათ. გასული სამი ათწლეულის განმავლობაში საქართველომ მძიმე გამოწვევები და ომები გამოიარა, რათა სუვერენიტეტი და დემოკრატიული და ეკონომიკური განვითარება შეენარჩუნებინა. ჩვენ გვაქვს იმედი, რომ ქვეყანას ამ გამოწვევების გადალახვაც შეეძლება,”- ნათქვამია ჯონ ტეფტის, კენეტ იალოვიცის და უილიამ კორტნის მიერ The National Interesrt-ში გამოქვეყნებულ ერთობლივ სტატიაში. წყარო
"ძალიან დიდია საპარლამენტო არჩევნების მიმართ ინტერესი და მოლოდინია, რომ იქნება თავისუფალი, ღია და სამართლიანი, უკეთესი, ვიდრე წინა"
საქართველოში აშშ-ის ელჩი კელის დეგნანის შეფასებით, ძალიან მნიშვნელოვანია, რომ ოქტომბერში დაგეგმილი არჩევნები სამართლიან, გამჭვირვალე და თავისუფალ გარემოში ჩატარდეს. მან დადებითად შეაფასა ის ფაქტი, რომ ოპოზიციურმა პარტიებმა საარჩევნოდ „ქცევის კოდექსს“ ხელი მოაწერეს. „ზოგადად, წინასაარჩევნო გარემოსთვის დამახასიათებელია ტემპერატურის მატება, თუმცა, ძალიან პოზიტიური იყო ის ფაქტი, რომ ბევრმა პოლიტიკურმა პარტიამ ხელი მოაწერა არჩევნებთან დაკავშირებით „ქცევის კოდექსს“. ძალიან სასიამოვნოა იმის ხილვა, რომ მათ არა მხოლოდ ხელი მოაწერეს, არამედ ლიდერები მისი შემუშავების პროცესში იყვნენ ჩართული და მათ გარკვეული ეთიკური სტანდარტები შეიმუშავეს.სამწუხარო იქნება, თუ დაფიქსირდება ისეთი ფაქტები, როგორიც არის ამომრჩეველთა დაშინება, ადმინისტრაციული რესურსის ბოროტად გამოყენება. ზოგიერთმა ორგანიზაციამ ასეთ ფაქტებთან დაკავშირებით ისაუბრა. მართლაც ძალიან მნიშვნელოვანია, რომ ეს არჩევნები იყოს სამართლიანი, გამჭვირვალე და თავისუფალი. ეს ქვეყნისთვის ძალიან მნიშვნელოვანი იქნება“, - განაცხადა დეგნანმა. ამასთან, დიპლომატის თქმით, ძალიან სასარგებლო და მნიშვნელოვანია, როდესაც არსებობს პირდაპირი კომუნიკაცია აშშ-ში გადაწყვეტილებების მიმღებ პირებსა და საქართველოს მთავრობის წარმომადგენლებს შორის. „საელჩო საქართველოსთან კომუნიკაციის ერთ-ერთი წყაროა, თუმცა, მნიშვნელოვანი და ძალიან სასარგებლოა, როდესაც არსებობს პირდაპირი არხი აშშ-ში გადაწყვეტილებების მიმღებ პირებსა და საქართველოს მთავრობის წარმომადგენლებს შორის იმისთვის, რომ განხილული იყოს ძალიან ბევრი მნიშვნელოვანი საკითხი, როგორიცაა ოკუპირებული ტერიტორიები, რუსეთის აგრესია, კოვიდ 19-ით გამოწვეული სიტუაცია, ასევე თანამშრომლობის გაღრმავებისთვის სხვადასხვა საშუალებები. ძალიან დიდია ინტერესი ამ არჩევნების მიმართ და არის მოლოდინი იმისა, რომ ეს არჩევნები იქნება თავისუფალი, ღია და სამართლიანი. უკეთესი, ვიდრე წინა არჩევნები“,-განაცხადა დეგნანმა.
ევროკავშირი, საქართველოს ოკუპირებულ ტერიტორიებზე რუსეთის სამხედრო წვრთნებთან დაკავშირებით შეშფოთებას გამოთქვამს
„მსგავსი სამხედრო წვრთნები სუვერენული სახელმწიფოს ტერიტორიაზე, ამ სახელმწიფოს თანხმობის გარეშე, არღვევს საერთაშორისო სამართლის ნორმებს და პრინციპებს, რაც ასახულია გაეროს ქარტიაში, ჰელსინკის საბოლოო აქტსა და პარიზის ქარტიაში.“ - ნათქვამია ეუთო-ში ევროკავშირის მისიის მიერ გავრცელებულ განცხადებაში, რომელიც ოკუპირებულ აფხაზეთსა და ცხინვალის რეგიონში მიმდინარე რუსეთის ფართომასშტაბიან სამხედრო წვრთნებს - „კავკასია 2020“ - ეხება. ევროკავშირი ადასტურებს თავის მტკიცე მხარდაჭერას საქართველოს სუვერენიტეტისა და ტერიტორიული მთლიანობის მიმართ, საერთაშორისოდ აღიარებული საზღვრების ფარგლებში და მოუწოდებს რუსეთს შეასრულოს საერთაშორისოდ ნაკისრი ვალდებულებები, მათ შორის, „ცეცხლის შეწყვეტის შესახებ“ ევროკავშირის შუამავლობით 2008 წლის 12 აგვისტოს ხელმოწერილი შეთანხმებით გათვალისწინებული ვალდებულებები. დღეს, ეუთო-ს უსაფრთხოების თანამშრომლობის ფორუმზე წევრი ქვეყნების დელეგაციებმა დაგმეს რუსეთის სამხედრო წვრთნები „კავკასია 2020“; საქართველოს მხარდამჭერი განცხადებები გააკეთეს ასევე აშშ-ის, კანადის, გაერთიანებული სამეფოსა და უკრაინის დელეგაციებმა.
ნანუკა ჟორჟოლიანი წყალტუბო-სამტრედიის მაჟორიტარობის კანდიდატია
ნანუკა ჟორჟოლიანი წყალტუბო-სამტრედიის მაჟორიტარობის კანდიდატია. მისი კანდიდატურა, რამდენიმე წუთის წინ, “ერთიანი ნაციონალური მოძრაობა – ძალა ერთობაშია”-ს მაჟორიტარების წარდგენაზე დასახელდა. სხვა რეგიონებში კანდიდატები შემდეგნაირად გადანაწილდნენ: გრიგოლ ვაშაძე – ქუთაისის საარჩევნო ოლქში მაჟორიტარი დეპუტატობის კანდიდატი ნიკა მელია – გლდანის საარჩევნო ოლქში მაჟორიტარი დეპუტატობის კანდიდატი ხატია დეკანოიძე – ისნის საარჩევნო ოლქში მაჟორიტარი დეპუტატობის კანდიდატი ლევან ხაბეიშვილი სამგორის საარჩევნო ოლქში მაჟორიტარი დეპუტატობის კანდიდატი ლევან ბეჟაშვილი – გურჯაანის, სიღნაღის, დედოფლისწყაროს და საგარეჯოს საარჩევნო ოლქში მაჟორიტარი დეპუტატობის კანდიდატი გიორგი ბოტკოველი – თელავის, ახმეტის, ყვარლისა და ლაგოდეხის საარჩევნო ოლქში მაჟორიტარი დეპუტატობის კანდიდატი დავით კირკიტაძე – რუსთავისა და გარდაბნის საარჩევნო ოლქში მაჟორიტარი დეპუტატობის კანდიდატი აზერ სულეიმანოვი – მარნეულისა და გარდაბნის საარჩევნო ოლქში მაჟორიტარი დეპუტატობის კანდიდატი ბადრი ბასიშვილი – გორისა და კასპის საარჩევნო ოლქში მაჟორიტარი დეპუტატობის კანდიდატი ნატო ჩხეიძე – ხაშურის, ქარელის, გორის საარჩევნო ოლქში მაჟორიტარი დეპუტატობის კანდიდატი ვაჟა ჩიტაშვილი – ახალციხის, ადიგენის, ბორჯომისა და ასპინძის საარჩევნო ოლქში მაჟორიტარი დეპუტატობის კანდიდატი მელიქ რაისიანი – ახალქალაქისა და ნინოწმინდის საარჩევნო ოლქში მაჟორიტარი დეპუტატობის კანდიდატი გიორგი კაპანაძე – საჩხერის, ჭიათურისა და ხარაგაულის საარჩევნო ოლქში მაჟორიტარი დეპუტატობის კანდიდატი კახა გეწაძე – ზესტაფონის, ბაღდათის, თერჯოლისა და ტყიბულის საარჩევნო ოლქში მაჟორიტარი დეპუტატობის კანდიდატი ნანუკა ჟორჟოლიანი – წყალტუბოს, ხონის, ვანისა და სამტრედიის საარჩევნო ოლქში მაჟორიტარი დეპუტატობის კანდიდატი რომან ფიფია – მარტვილის, აბაშის, ჩხორყუსა და წალენჯიხის საარჩევნო ოლქში მაჟორიტარი დეპუატატობის კანდიდატი მურთაზ ზოდელავა – ფოთის, სენაკისა და ხობის საარჩევნო ოლქში მაჟორიტარი დეპუტატობის კანდიდატი მალხაზ ჯალაღონია – ზუგდიდის საარჩევნო ოლქში მაჟორიტარი დეპუტატობის კანდიდატი ლევან ვარშალომიძე – ბათუმის საარჩევნო ოლქში მაჟორიტარი დეპუტატობის კანდიდატი ბონდო თევდორაძე – ქობულეთის საარჩევნო ოლქში მაჟორიტარი დეპუტატობის კანდიდატი მიშა ბოლქვაძე – ხელვაჩაურის, ქედის, შუახევისა და ხულოს საარჩევნო ოლქში მაჟორიტარი დეპუტატობის კანდიდატი კახა ოქრიაშვილი – დმანისის, ბოლნისისა და თეთრიწყაროს საარჩევნო ოლქში მაჟორიტარი დეპუტატობის კანდიდატი ცეზარ ჩოჩელი – თიანეთის, დუშეთისა და მცხეთის საარჩევნო ოლქში მაჟორიტარი დეპუტატობის კანდიდატი დილარ ხაბულიანი – ონის, ამბროლაურის, ცაგერის, ლენტეხისა და მესტიის საარჩევნო ოლქში მაჟორიტარი დეპუტატობის კანდიდატი მანუჩარ კვირველია – ოზურგეთის, ლანჩხუთისა და ჩოხატაურის საარჩევნო ოლქში მაჟორიტარი დეპუტატობის კანდიდატი
რუსეთი ევროკავშირის მაღალჩინოსნებისთვის "შავ სიას" აფართოებს
რუსეთი ევროკავშირის მთელი რიგი მაღალჩინოსნებისთვის ე.წ. შავ სიას აფართოებს, რაც ქვეყანაში შესვლის აკრძალვას ითვალისწინებს. ინფორმაციას რუსეთის საგარეო საქმეთა სამინისტრო ავრცელებს. როგორც სამინისტროს პრესსპიკერმა მარია ზახაროვამ განაცხადა, რუსეთი "შავ სიას" ევროკავშირის მხრიდან სანქციების საპასუხოდ გააფართოებს. „ევროკავშირის ქმედებებზე საპასუხოდ, რუსულმა მხარემ მიიღო საპასუხო გადაწყვეტილება ევროკავშირის წევრი ქვეყნების და ინსტიტუტების წარმომადგენელთა სიის გაფართოების შესახებ, რომლებსაც რუსეთის ფედერაციის ტერიტორიაზე შესვლა აეკრძალათ“, - განაცხადა ზახაროვამ. მისივე განმარტებით, რუსეთის "შავ სიაში" შეყვანილთა რაოდენობა განისაზღვრა ევროკავშირის სიის პარიტეტის საფუძველზე. ზახაროვას განცხადებით, „ბოლო დროს ევროკავშირმა მთელი რიგი არამეგობრული ნაბიჯები გადადგა რუსეთთან და მის მოქალაქეებთან დაკავშირებით და აბსურდული საბაბით განაგრძობს სანქციების გაფართოებას“. პრესკონფერენციაზე მას არ დაუსახელებია, კონკრეტულად, რომელ ინსტიტუტებს შეეხება ეს გადაწყვეტილება.
ოკუპირებულ აფხაზეთში კორონავირუსის 62 ახალი შემთხვევა გამოვლინდა, ერთი პაციენტი გარდაიცვალა
გასული დღე-ღამის განმავლობაში ოკუპირებულ აფხაზეთში კორონავირუსის 62 ახალი შემთხვევა გამოვლინდა. ინფორმაციას ადგილობრივი მედია ე.წ. ოპერატიულ შტაბზე დაყრდნობით ავრცელებს. ამჟამად გუდაუთის საავადმყოფოში მკურნალობა 89 კოვიდინფიცირებულს უტარდება. მათგან 5 პაციენტის მდგომარეობა მძიმეა. გარდა ამისა, ვირუსს ბოლო დღე-ღამეში კიდევ ერთი პაციენტი ემსხვერპლა და გარდაცვლილთა საერთო რიცხვი 8-მდე გაიზარდა. ამ დრომდე ოკუპირებულ რეგიონში კორონავირუსი სულ 1116 ადამიანს დაუდასტურდა. გამოჯანმრთელდა 330 ადამიანი.
