ძებნის რეზულტატი:
პრემიერი მოქალაქეებს აფრთხილებს, რომ ჯანდაცვის სისტემის რესურსი ამოუწურავი არ არის
პრემიერ-მინისტრ გიორგი გახარიას განცხადებით, მიუხედავად იმისა, კორონავირუსით ინფიცირების შემთხვევების გაზრდილი რაოდენობის ფონზე პრობლემები არ შექმნილა, ეს არ ნიშნავს იმას, რომ ჯანდაცვის სისტემის რესურსი არის შეუზღუდავი. მთავრობის მეთაურის განცხადებით, დაწესებულებებმა უნდა გამოიჩინონ პასუხისმგებლობა, უნდა განახორციელონ თერმოსკრინინგი, უზრუნველყონ დეზინფექციის საშუალებები და კონტროლი თავიანთ თანამშრომლებზე, იმისთვის, რომ საჭიროების შემთხვევაში სწრაფად მოხდეს მედიკოსების რეაგირება. „მიუხედავად იმისა, რომ ჩვენ დღეს ამ გაზრდილი რაოდენობის და სწრაფი გავრცელების მართვასთან დაკავშირებით პრობლემები არ გვაქვს, ეს არ ნიშნავს იმას, რომ ჯანდაცვის სისტემის რესურსი არის შეუზღუდავი. ყველას კარგად უნდა ავუხსნათ, რომ ნებისმიერ რესურსს და პირველ რიგში, ჯანდაცვის სისტემის რესურსს აქვს თავისი შეზღუდვები, რომელიც უნდა გავითვალისწინოთ. შეზღუდვებს რომ თავი ავარიდოთ, უნდა დავიცვათ ელემენტარული მოთხოვნები - პირბადე, დისტანცია, ჰიგიენის ნორმები და ხანდაზმულ ადამიანებზე ზრუნვა, განსაკუთრებით აჭარაში. ჩვენ არ ვამბობთ არავისთვის, რომ დარჩით სახლში, მაგრამ ხანდაზმულ ადამიანებს რომ ვუთხრათ, რომ დარჩით სახლში, ახლა არის სწორი მომენტი ამისთვის. დაწესებულებებს ყველას თავისი პასუხისმგებლობა უნდა ჰქონდეს, უნდა განახორციელონ თერმოსკრინინგი, უზრუნველყონ დეზინფექციის საშუალებები და კონტროლი თავიანთ თანამშრომლებზე, იმისთვის, რომ სადაც არის განგაშს აუცილებლობა, სწრაფად მოხდეს მედიკოსების რეაგირება. სახელმწიფოს ვალდებულებაა, პირველ რიგში სწრაფი ტესტირება, სწრაფი გამოვლენა, შემდგომ 112-ის და ცხელების ცენტრების სწრაფი ტრიაჟის სისტემა, შემდგომ კლინიკური ჯგუფის ახალი მიდგომა მსუბუქი და უსიმპტომო პაციენტები 112-ით, ტელემედიცინით და ჯანდაცვის პირველადი რომ სექტორით ვმართოთ, შემდგომ კარანტინები და მძიმე პაციენტები რა თქმა უნდა ჰოსპიტლებში“, - განაცხადა გიორგი გახარიამ.
საქართველო სეზონური გრიპის საწინააღმდეგო დაახლოებით 250 ათასზე მეტ ვაქცინას შეიძენს
ჯანდაცვის მინისტრის ეკატერინე ტიკარაძის გაცხადებით, საქართველო სეზონური გრიპის საწინააღმდეგო დაახლოებით 250 ათასზე მეტ ვაქცინას შეიძენს. ამის შესახებ მინისტრმა საკოორდინაციო საბჭოს დასრულების შემდეგ განაცხადა. „ვაქცინა შეძენილია. ჩვენ კიდევ ვზრუნავთ იმაზე, რომ ვაქცინების დამატებითი რაოდენობა შევიძინოთ, ვინაიდან ვხედავთ, რომ მოსახლეობაში გაზრდილია, როგორც ნდობა, ასევე სურვილი იმისა, რომ ისინი აცრილები იყვნენ. შემდეგი ერთი კვირის მანძილზე ჩვენ უკვე ველოდებით, რომ ვაქცინის პირველი ნაწილი ქალაქში იქნება და აღნიშნულის გათვალისწინებით, მოსახლეობის ვაქცინაციას დავიწყებთ. საერთო ჯამში ჩვენ 250 ათასზე მეტ ვაქცინას შევიძენთ“,-განაცხადა ტიკარაძემ.
ყოფილი იპოდრომის ადგილზე თბილისის ცენტრალური პარკი გაშენდება
ყოფილი იპოდრომის ადგილზე თბილისის ცენტრალური პარკი გაშენდება. როგორც თბილისის მერმა კახა კალაძემ განაცხადა, 36 ჰექტარი ფართობის ტერიტორია საერთაშორისო საქველმოქმედო ფონდმა „ქართუმ“ კერძო მესაკუთრეებისგან გამოისყიდა და თბილისის მუნიციპალიტეტს საჩუქრად გადასცა. მისივე თქმით, თბილისის ცენტრალური პარკიც ფონდის დახმარებით მოეწყობა. „საზოგადოებამ კარგად იცის, რომ დედაქალაქისთვის სხვადასხვა საჭირბოროტო საკითხებთან ერთად, ჩემი მერობის პირობებში, აქტიურად ვმუშაობთ იმისთვის, რომ თბილისში შეიქმნას უფრო მეტი მწვანე სივრცე, გასართობი პარკი თუ რეკრეაციული ზონა, სადაც თბილისელებს, დედაქალაქის სტუმრებს ექნებათ დროის გატარების ძალიან კარგი და სასიამოვნოდ გატარების შესაძლებლობა. მეტი მწვანე და ეკოლოგიურად სუფთა სივრცე, უფრო მეტი განაშენიანებული პარკი ნიშნავს მეტ სუფთა ჰაერსა და ჯანსაღ გარემოს, რაც, დამეთანხმებით, ჩვენს ქალაქს ნამდვილად სჭირდება. ჩვენ ამ მიმართულებით გადავდგით კონკრეტული ნაბიჯები და ეს გამოიხატება იმ პროექტების განხორციელებით, რომლებიც ბოლო წლების განმავლობაში გაკეთდა მთელი ქალაქის მასშტაბით. მზიურის განახლებული პარკი, რომელიც მართლაც ულამაზესია; გლდანში მეექვსე მიკრორაიონში, ადგილობრივი მოსახლეობის თხოვნით გაკეთებული პროექტი, ასევე, კიკვიძის პარკი რომელიც ყოველდღიურად დატვირთულია და იქ მცხოვრები ადამიანები ყოველდღიურად სარგებლობენ და ძალიან ბევრი პროექტი გვაქვს დაგეგმილი ამ მიმართულებით. მათ შორის, ვაკის პარკის რეაბილიტაცია, რომელიც დაწყებულია და ქალაქს ექნება ძალიან კარგი რეკრეაციული სივრცე ამ პროექტის სახით. საზოგადოებამ კარგად იცის, რომ უკვე ათწლეულებია, ფონდი „ქართუ“ უამრავ საქველმოქმედო პროექტს ახორციელებს. მათ შორის, ერთ-ერთი უმნიშვნელოვანესი მიმართულება სწორედ ბუნებაზე ზრუნვა, მთელი ქვეყნის მასშტაბით მწვანე სივრცეებისა და უნიკალური პარკების შექმნაა, რომელთაგან დიდი ნაწილი ჩვენი ქვეყნის სავიზიტო ბარათად იქცა. აქ, შემიძლია, მაგალითად მოვიყვანო ბოლოს განხორციელებული დენდროლოგიური პარკის პროექტი, რომელიც ულამაზესია, არა მხოლოდ ჩვენი ქვეყნისთვის, ვფიქრობ, რომ რეგიონში ერთ-ერთი წარმატებულია”, – განაცხადა კალაძემ.
ალიევი ფაშინიანს მოთხოვნებს უყენებს
აზერბაიჯანის პრეზიდენტი ილჰამ ალიევი აცხადებს, რომ მთიან ყარაბაღში შეიარაღებული დაპირისპირება იმ შემთხვევაში შეწყდება, თუ სომხური მხარე აზერბაიჯანის მიწას დატოვებს. სააგენტო Trend-ის ინფორმაციით, აზერბაიჯანელი ხალხისადმი მიმართვისას ილჰამ ალიევმა განაცხადა, რომ სანამ გვიანი არ არის, სომხეთის ხელისუფლება კარგად უნდა დაფიქრდეს. როგორც ალიევი ამბობს, სომხეთის პრემიერ-მინისტრის თხოვნით, ცეცხლის შეწყვეტის რეჟიმი ბოლო ორი წლის განმავლობაში აღდგენილი იყო: ფაშინიანმა მას უთხრა, რომ მძიმე შიდა სიტუაცია აქვს, ყველა მხრიდან ზეწოლას განიცდის და საკითხის გადასაჭრელად დრო სჭირდება, რაზეც ალიევი დათანხმდა, ერთი წლის შემდეგ კი სომხეთის პრემიერ-მინისტრმა თქვა, რომ ყარაბაღი სომხეთია, ხოლო დღეს აზერბაიჯანს შვიდ პირობას უყენებს. „ვინ ხარ, რომ პირობებს გვიყენებდე?!“ - მიმართა ალიევმა სომხეთის ხელისუფლებას. მისი ინფორმციით, ბოლო პერიოდში, სატელეფონო საუბრებისას ზოგიერთ შემთხვევაში ეკითხებიან, ბაქოს რა პირობები აქვს. „დატოვონ ჩვენი მიწები და დაპირისპირება გაჩერდება. ოღონდ არა სიტყვით, არამედ საქმით. თქვას, რომ აღიარებს აზერბაიჯანის ტრიტორიულ მთლიანობას, როგორც ეს განმტკიცებულია ფუძემდებლური პრინციპებით. აზერბაიჯანელ ხალხს პატიება თხოვოს და თქვას, რომ ყარაბაღი სომხეთი არ არის. ბოლო პირობაა, მოგვცეს ოკუპირებული ტერიტორიებიდან სომხური შეიარაღებული ძალების გაყვანის გრაფიკი. მაშინ, რა თქმა უნდა, აღვადგენთ ცეცხლის შეწყვეტის რეჟიმს“, - განაცხადა პრეზიდენტმა ილჰამ ალიევმა. აზერბაიჯანელი ხალხისადმი მიმართვისას ალიევმა ისიც თქვა, რომ ეუთოს მინსკის ჯგუფის თანათავმჯდომარე ქვეყნებს (რუსეთი, საფრანგეთი, აშშ) და ევროკავშირის წარმომადგენლებს არაერთხელ უთხრა, რომ სომხეთზე ზეწოლა და სანქციები იყო აუცილებელი, რადგან წინააღმდეგ შემთხვევაში, უფრო მეტად გათავხედდებოდა. ალიევი ირწმუნება, რომ საკითხის მშვიდობიანად გადაწყვეტა სურდა, მაგრამ არ დაუჯერეს და ჩათვალეს, რომ აზერბაიჯანელი ხალხი და პრეზიდენტი ამას შეეგუებოდნენ. ილჰამ ალიევის თქმით, ზოგიერთი ევროპული ქვეყანა აზერბაიჯანს უსამართლოდ ადანაშაულებს კონფლიქტის გაღვივებაში და მათ მოუწოდებს, "სარკეში ჩაიხედონ". „მთიანი ყარაბაღი ჩვენი მიწაა. ჩვენ იქ უნდა დავბრუნდეთ, ვბრუნდებით და დავბრუნდებით“, - განაცხადა აზერბაიჯანის პრეზიდენტმა. მთიანი ყარაბაღისთვის ინტენსიური ბრძოლა 27 სექტემბრიდან განახლდა. სხვადასხვა მონაცემებით, კონფლიქტს ათობით ან ასობით ადამიანი ემსხვერპლა.
ლინას ლინკევიჩუსი თვითიზოლაციაში გადადის
ლიეტუვას საგარეო საქმეთა მინისტრი ლინას ლინკევიჩუსი ერთკვირიან თვითიზოლაციაში გადადის, - ამის შესახებ ინფორმაციას Reuters-ი ავრცელებს. სააგენტოს ინფორმაციით, საგარეო საქმეთა მინისტრს შეხება ჰქონდა საფრანგეთის პრეზიდენტ ემანუელ მაკრონის დელეგაციასთან, რომლის რამდენიმე წევრს მოგვიანებით კორონავირუსი დაუდასტურდა. ჯერჯერობით უცნობია, გაიკეთა თუ არა კორონავირუსზე ტესტი ლინას ლინკევიჩუსმა. აღსანიშნავია, რომ ლიეტუვას საგარეო საქმეთა მინისტრი საფრანგეთის პრეზიდენტ ემანუელ მაკრონსაც შეხვდა, რომელიც ლიეტუვას 28-29 სექტემბერს სტუმრობდა. ლიეტუვას პრეზიდენტის ადმინისტრაციის მიერ გავრცელებულ განცხადებაში აღნიშნულია, რომ პრეზიდენტმა გიტანას ნაუსედამ, მისმა მეუღლემ და პრეზიდენტის ადმინისტრაციის რამდენიმე წევრმა გუშინ კორონავირუსზე ტესტები ჩაიტარეს, თუმცა ყველას მათგანის პასუხი უარყოფითი აღმოჩნდა.
სირიაში აფხაზეთის ე.წ. საელჩო იხსნება
სირიის დედაქალაქ დამასკოში, 6 ოქტომბერს, აფხაზეთის ე.წ. საელჩო გაიხსნება. “აფსნიპრესის” ინფორმაციით, აფხაზეთის დელეგაცია, დე ფაქტო პრეზიდენტის ადმინისტრაციის უფროსის, ალხას კვიცინიას ხელმძღვანელობით, უკვე სირიაში იმყოფება. ამავე დელეგაციაშია, სხვა თანამდებობის პირებთან ერთად არიან ე.წ. საგარეო საქმეთა მინისტრი დაურ კოვე, “პარლამენტარი” ომარ ჯინჯოლია და დე ფაქტო თავდაცვის მინისტრის მოადგილე ნოდარ ფილია. ვიზიტის ფარგლებში ასევე დაგეგმილია ორმხრივი შეხვედრები სირიის ხელისუფლების წარმომადგენლებთან. სირიამ აფხაზეთის დამოუკიდებლობა 2018 წლის 29 მაისს აღიარა. საპასუხოდ, თბილისმა დამასკოსთან დიპლომატიური ურთიერთობა გაწყვიტა.
საქართველოს საგარეო უწყების განცხადებით, რუსეთის წარმომადგენლებმა ჟენევის მოლაპარაკებების 51-ე რაუნდი ჩაშალეს
საქართველოს საგარეო საქმეთა სამინისტრო 6-7 ოქტომბერს დაგეგმილი ჟენევის საერთაშორისო მოლაპარაკებების 51-ე რაუნდის ჩაშლასთან დაკავშირებით განცხადებას ავრცელებს. საქართველოს საგარეო საქმეთა სამინისტრო შეშფოთებას გამოხატავს რუსეთის ფედერაციის წარმომადგენელთა მიერ ჟენევის საერთაშორისო მოლაპარაკებების 51-ე რაუნდის ჩაშლის გამო. „ნიშანდობლივია, რომ საქართველოს ოკუპირებულ ტერიტორიებზე გამწვავებული უსაფრთხოებისა და ჰუმანიტარული მდგომარეობის გათვალისწინებით, ჟენევის საერთაშორისო მოლაპარაკებების თანათავმჯდომარეების გადაწყვეტილებით, კორონავირუსის (COVID-19) პანდემიის მიუხედავად, 51-ე რაუნდის ჩატარება დაგეგმილი და შეთანხმებული იყო მიმდინარე წლის 6-7 ოქტომბერს. მსგავსი ნაბიჯები ძირს უთხრის სამშვიდობო პროცესს და ზიანს აყენებს საქართველოს ხელისუფლებისა და საერთაშორისო თანამეგობრობის ძალისხმევას კონფლიქტის შედეგად დაზარალებული მოსახლეობის პრობლემების გადაჭრის კუთხით. საგარეო საქმეთა სამინისტრო მოუწოდებს რუსეთის ფედერაციას, დაუბრუნდეს მოლაპარაკებების მაგიდას, შეასრულოს ნაკისრი საერთაშორისო ვალდებულებები, მათ შორის, 2008 წლის 12 აგვისტოს ევროკავშირის შუამავლობით დადებული ცეცხლის შეწყვეტის შეთანხმება. საქართველოს საგარეო საქმეთა სამინისტრო მიმართავს ჟენევის საერთაშორისო მოლაპარაკებების თანათავმჯდომარე საერთაშორისო ორგანიზაციებს - ევროკავშირს, გაერო-სა და ეუთო-ს, ქმედითი ზომები მიიღონ ჟენევის ფორმატში მოლაპარაკებების განახლებისა და რუსეთ-საქართველოს კონფლიქტის მშვიდობიანი მოგვარების პროცესში ხელშესახები პროგრესის მიღწევის მიზნით“, - ნათქვამია საგარეო უწყების განცხადებაში.
საქართველოში კორონავირუსის 508 ახალი შემთხვევა გამოვლინდა
საქართველოში კორონავირუსის 508 ახალი შემთხვევა გამოვლინდა და ინფიცირების შემთხვევათა რაოდენობა 9753-ს შეადგენს. ამის შესახებ ინფორმაცია მთავრობის მიერ სპეციალურად შექმნილ ვებ-გვერდზე, stopcov.ge-ზეა განთავსებული. გამოჯანმრთელდა კიდევ 268 პაციენტი და საერთო რაოდენობა 4887-ს შეადგენს. კარანტინის რეჟიმში იმყოფება 5655 მოქალაქე, ხოლო სტაციონარში მეთვალყურეობას 836 ადამიანი გადის. ამასთან, კოვიდსასტუმროში მყოფი პირების რაოდენობა 1 100-ს შეადგენს. ქვეყანაში კორონავირუსით 58 ადამიანი გარდაიცვალა.
BBC - ყირგიზეთში ხელისუფლება ოპოზიციამ ჩაიგდო ხელში
ყირგიზეთში ხელისუფლება ოპოზიციამ ჩაიგდო ხელში, ქვეყნის მოქმედ პრემიერ-მინისტრად კი პატიმრობიდან გათავისუფლებული ყოფილი პრემიერი, სადირ საფაროვი დანიშნეს, რომელიც 11-წლიან სასჯელს 8 წლის წინ ანტისამთავრობო აქციის დროს ერთ-ერთი რეგიონის გუბერნატორის გატაცებისთვის იხდიდა, - ამის შესახებ ინფორმაციას BBC-ი ავრცელებს. გამოცემის ცნობით, მთავრობის შეცვლის მიზნით ყირგიზეთის პარლამენტმა ბიშკეკის სასტუმროში საგანგებო სხდომა გამართა. ყირგიზეთის პრეზიდენტმა სოორონბაი ჟეენბეკოვმა BBC-სთან სატელეფონო ინტერვიუში განაცხადა, რომ მზადაა პასუხისმგებლობა „ძლიერ ლიდერებს“ გადააბაროს. მისივე თქმით, დემონსტრანტების მიზანი არა არჩევნების შედეგების გაუქმება, არამედ მისი გადაყენება იყო. ყირგიზეთში კვირას ჩატარებული საპარლამენტო არჩევნების შემდეგ საპროტესტო გამოსვლები დაიწყო. დემონსტრანტები არჩევნებს გაყალბებულად მიიჩნევდნენ და მისი შედეგების გაუქმებას მოითხოვდნენ. ისინი პარლამენტის, პრეზიდენტისა და მთავრობის შენობებში შეიჭრნენ. პატიმრობიდან გაათავისუფლეს ქვეყნის ექსპრეზიდენტი ალმაზბეკ ატამბაევი და ყოფილი პრემიერი სადირ საფაროვი. გუშინ, ყირგიზეთის ცენტრალურმა საარჩევნო კომისიამ არჩევნების შედეგები ბათილად ცნო. საპროტესტო აქციებზე დემონსტრანტებსა და სამართალდამცავებს შორის მომხდარი დაპირისპირების შედეგად 1 ადამიანი დაიღუპა, 700-მდე კი - დაშავდა.
ჯო ბაიდენი - თუ ტრამპი ისევ კოვიდით იქნება ინფიცირებული, ჩვენი დებატები არ გაიმართება
აშშ-ის პრეზიდენტობის „დემოკრატი“ კანდიდატი ჯო ბაიდენი აცხადებს, რომ 15 ოქტომბრისთვის მაიამიში დაგეგმილი დებატები არ გაიმართება, თუკი აშშ-ის პრეზიდენტი დონალდ ტრამპი ისევ კორონავირუსით იქნება ინფიცირებული. „თუ მას კიდევ კოვიდი ექნება, დებატებს არ გავმართავთ. მოუთმენლად ველი დებატებს, თუმცა, იმედი მაქვს, ყველა პროტოკოლი დაცული იქნება,“-განაცხადა ბაიდენმა. ბაიდენის განცხადებაზე კომენტირებისას დონალდ ტრამპის პრესსპიკერმა განაცხადა, რომ პრეზიდენტი გამოჯანმრთელებული იქნება და დებატებში მონაწილეობას მიიღებს.
ქართველი მსახიობის წარმატების გზა იტალიაში და რჩევა ახალგაზრდებს
26 წლის ქართველი მსახიობი, ლუკა ჩქოვანი, კანის კინოფესტივალის შემდეგ, ვენეციის ბიენალეზე გამოჩნდა. ლუკა 1994 წელს, თბილისში დაიბადა და 6 წლის იყო, როცა დედამ იტალიაში წაიყვანა. მან პოპულარობა ცნობილი მომღერლების ქავერების შესრულებით მოიპოვა და მალე იტალიელი თინეიჯერების რჩეულიც გახდა. 2016 წელს, გამოუშვა საკუთარი ალბომი და კლიპიც გადაიღო. მისი სამსახიობო დებიუტი, ორი წლის წინ, ალიჩე რორვახერის ფილმში Lazzaro felice-ით შედგა. როგორც ის „ევროპათაიმს“ უყვება, რეჟისორმა სრულიად შემთხვევით, MTV-ის ეთერში ნახა, აგენტების საშუალებით მოძებნა და ფილმში მთავარი როლი შესთავზა. ვენეციის ბიენალეზე მსახიობი მოკლემეტრაჟიანი ფილმის Revenge Room-ის პრემიერით გამოჩნდა, რომელიც როგორც თავად ამბობს, ახალგზარდებისთვის აქტუალურ თემაზეა გადაღებული. “ფილმი Revenge Room საკმაოდ ღრმა აზრის მატარებელი პროექტია და განკუთვნილია როგორც ახალგაზრდებისთვის, ისე მშობლებისთვის, რათა გაზარდოს მათი მგრძნობელობა იმ ახალი მედიარეალობის მიმართ, რომლის წინაშეც ინტერნეტმა დაგვაყენა და რომელსაც ხშირად ჩვენი პირადი ცხოვრება ეწირება. ბოლო დროს, ინტერნეტში, არცთუ იშვიათად ვრცელდება გოგონების პიკანტური ფოტო თუ ვიდეომასალა, რომელსაც ძირითადად შურისძიების მიზნით, ყოფილი შეყვარებულები ავრცელებენ. ფილმში, ჩემი გმირი, 18 წლის დავიდეც, ყოფილ შეყვარებულზე ბრაზდება, მსგავსი ტიპის ფოტოებს მეგობრებს უგზავნის და ეს ფოტოები ღია ინტერნეტსივრცეში ხვდება. თავდაპირველად, დავიდე უარყოფითი პერსონაჟია, მაგრამ ერთხელაც ის ბნელ ოთახში, ერთგვარ გაურკვევლობაში იღვიძებს და ხვდება საულს, სულიერ გზამკვლევს, ირთვება 15 წუთიანი წამზომი, რა დროშიც ჩემმა პერსონაჟმა უნდა გააცნობიეროს საკუთარი ცოდვები და მოინანიოს. ფილმი საკმაოდ მეტაფორულია და ბიბლიურ და სპირიტუალურ პასაჟებს შეიცავს.” ახალგაზრდა ქართველი, ჟურნალმა ELLE-მ ფესტივალის ყველაზე ლამაზ მონაწილეთა შორის დაასახელა, რაც მსახიობის თქმით, მისთვის მოულოდნელი იყო. „ამას ნამდვილად არ ველოდი. ჩემთვის უფრო მნიშვნელოვანია მივიღო შეფასებები, როგორც მსახიობმა და არა როგორც ლამაზმა ახალგაზრდამ, მაგრამ არ დავმალავ, გამიხარდა. წითელ ხალიჩაზე გავლის შემდეგ, ყველას ეშინოდა კრიტიკის და ასეთი შეფასებების მოსმენა, ძალიან სასიამოვნო იყო, მაგრამ თუ ბოლომდე გულწრფელი ვიქნები, გეტყვით რომ ასე ჩაცმული, როგორც კინოფესტივალზე ვიყავი, ხშირად არ დავდივარ. ჩემს გარდერობში ძირითადად ვინტაჟური, ან მეორეული ტანსაცმლის მაღაზიების სამოსია. ამჯერად, ჩემს ჩაცმულობაზე კარლო პინიატელიმ იზრუნა და ბედნიერი ვარ რომ პრესისა და ELLE-ს სიმპათია დავიმსახურე“. მსახიობს ხშირად აქვს საკუთარი ქვეყნის ნოსტალგია და ამბობს, რომ როცა საქართველოში ბრუნდება, ყოველ ჯერზე ყველაფერი უფრო ახლობელი, ბუნებრივი და ძლიერი ხდება, იქნება ეს მეგობრობა, სიყვარული თუ სხვა რამ. ყოველ ჯერზე უფრო მძლავრად გრძნობს, რომ ამ მიწას ეკუთვნის. “ბევრი მიმოგზაურია, გავეცანი ბევრ კულტურას და ვფიქრობ, რომ ჩვენ, ქართველები, ჯერ კიდევ ვინარჩუნებთ გარკვეულ ტრადიციებსა და ელეგანტურობას, იმის ფონზე როცა გლობალიზაცია “ანადგურებს” ქვეყნებს და ერთმანეთის მსგავსს ხდის“. იქნება თუ არა მისი რჩეული ქართველი, ლუკას პასუხის გაცემა უჭირს, თუმცა არც გამორიცხავს. “მიმაჩნია, რომ ჩვენ გვაქვს პასუხისმგებლობა შევინარჩუნოთ ჩვენი ტრადიციები და ის ელეგანტურობა, რომლის მატარებლებიც არიან ქართველი ქალები. მაბედნიერებს იმაზე ფიქრი, რომ ქართველი ქალი არასდროს ყოფილა დაჩაგრული. საქართველოში ქალები ყოველთვის ძლიერები და გამბედავები იყვნენ. ეს არის ის, რაც ქართველ გოგონებში მიყვარს. ვნახოთ რა მოხდება მომავალში, როდესაც სიყვარულზეა საუბარი, რთულია რაიმე გათვალო“. მსახიობი, იმ ახალგზარდებს, რომლებიც ახლა დგამენ მნიშნელოვან ნაბიჯებს, ურჩევს იყვნენ შეუპოვრები და არ დანებდნენ მანამ, სანამ მიზანს არ მიაღწევენ. “ახალგაზრდებს, მოვუწოდებ იყვნენ შეუპოვრები. ბევრს შეუძლია დაიწყოს წარმატებულად, მაგრამ ცოტას თუ შეუძლია მიზნების ბოლომდე მიყოლა და ოცნების ახდენა. გჯეროდეთ ყოველდღიურად, გჯეროდეთ, სანამ არ მიაღწევთ მიზანს. ვიღაც შეიძლება სხვაზე ნიჭიერი დაიბადოს, მაგრამ უნდა გვახსოვდეს, რომ ადამიანის შესაძლებლობები განუსაზღვრელია და იგი სცდება იმ ჩარჩოებს, რომელსაც თანამედროვე სოციუმი გვიწესებს. საზოგადოებას ურჩევნია ერთი სქემის მიხედვით დაგვყოს და გვმართოს და როდესაც შენ ამ ჩარჩოებს გაარღვევ, ყველაფერს აკეთებს, რომ შეგაშინოს. გახსოვდეთ, რომ სწორედ იქ და მაშინ უნდა იბრძოლო. ხშირად, სირთულეები ჩვენს წინ, როგორც ბარიკადები ისე აღიმართებიან-ხოლმე. ჩემი რჩევაა, ეს დაბრკოლებები მიიღოთ ისე, როგორც ცხოვრებისეული გამოცდები, რომლის გადალახვის შემდეგაც, მორიგ საფეხურზე ახვალთ, უფრო ძლიერები და გამოცდილებით სავსენი. იყავით ბედნიერები, როდესაც სირთულეებს აწყდებით, რადგან ეს ნიშნავს, რომ სწორ გზას ადგახართ“. ცნობისთვის, ამ ეტაპზე, ლუკა, ორ ახალ იტალიურ, კინემატოგრაფიულ და სატელევიზიო პროექტზე მუშაობს. იმედოვნებს, რომ მალე გამოსცემს ახალ მუსიკალურ ექსპერიმენტალურ ალბომს, რომელზეც ორი წელია მუშაობს და რომელიც ნეირომეცნიერულ კვლევაზეა დაფუძნებული. ის, მუსიკის სიხშირეების ნეირონულ აქტივობაზე ზეგავლენას ეხება. ნინა მამუკაძე, სპეციალურად "ევროპათაიმისთვის", იტალიიდან
BBC - კორონავირუსის შემთხვევების ზრდის გამო ევროპის ქვეყნები ახალ რეგულაციებს აწესებენ
BBC-ის ინფორმაციით, ბოლო კვირების განმავლობაში კორონავირუსის შემთხვევების ზრდის გამო ევროპის ქვეყნებიახალ რეგულაციებს აწესებენ. გამოცემის ცნობით, გერმანიის დედაქალაქ ბერლინში 23:00 საათიდან 06:00 საათამდე ყველა რესტორანი და ბარი დახურება. იტალიის პრემიერ-მინისტრის ჯუზეპე კონტეს გადაწყვეტილებით, ხვალიდან ქვეყანაში ქუჩაში გასვლის დროს მოაქალაქეები ვალდებულები იქნებიან სახის დამცავი ნიღბები ატარონ. 9 ოქტომბრიდან ბელგიაში ოჯახის წევრების გარდა 3 ადამიანზე მეტის შეკრება აიკრძალება. ჩეხეთის რესპუბლიკაში კი, გუშინ კორონავირუსის რეკორდული 4 457 ახალი შემთხვევა დაფიქსირდა, რის გამოც ქვეყნის ხელისუფლება რეგულაციების თავიდან დაწესებას აპირებს.
რუსეთში კორონავირუსის 11 115 ახალი შემთხვევა გამოვლინდა, 202 ადამიანი გარდაიცვალა
რუსეთში, ბოლო დღე-ღამის განმავლობაში, კორონავირუსის 11 115 ახალი შემთხვევა გამოვლინდა და დაინფიცირებულთა საერთო რაოდენობამ 1 248 619-ს მიაღწია, - ამის შესახებ ინფორმაციას კორონავირუსთან ბრძოლის მიზნით შექმნილი ოპერატიული შტაბი ავრცელებს. მათივე ინფორმაციით, კორონავირუსით რუსეთში კიდევ 202 ადამიანი გარდაიცვალა და ლეტალური შემთხვევების რიცხვმა, საერთო ჯამში, 21 900-ს გადააჭარბა. ოფიციალური სტატისტიკით, რუსეთში კოვიდ 19-სგან 995 000-მდე პაციენტი გამოჯანმრთელდა, აქედან 6 699 - ბოლო 24 საათში. ცნობისთვის, მსოფლიოში ინფიცირებულების რაოდენობით, აშშ-ს, ინდოეთისა და ბრაზილიის შემდეგ რუსეთი მეოთხე ადგილზეა.
ირაკლი ბებუას მხარდასაჭერად სამოქალაქო აქტივისტებმა აქცია გამართეს
დღეს, 7 ოქტომბერს სამოქალაქო აქტივისტებმა ოკუპირებული აფხაზეთის დე ფაქტო რესპუბლიკის მიერ უკანონოდ დაკავებული ირაკლი ბებუას მხარდასაჭერად საქართველოს კანცელარიის შენობასთან მშვიდობიანი აქცია-პერფორმანსი გამართეს. აქციის მონაწილეები მოუწოდებენ საქართველოს ხელისუფლებას, განსაკუთრებით კი საგარეო საქმეთა სამინისტროს, რომ შეასრულონ პოლიტიკური და სამართლებრივი ვალდებულება, დაიცვან საქართველოს მოქალაქეები და უზრუნველყონ მათი უსაფრთხოება. „ქართული მხრიდან, სუსის ერთჯერადი განცხადების მიხედვით, მიმდინარეობს მოლაპარაკებები საერთაშორისო ორგანიზაციებთან. მსგავსი მძიმე საქმის შემთხვევაში ერთჯერადი განცხადებები საკმარისი არაა – ჩვენ გვახსოვს ამ რეჟიმს შეწირული ადამიანების სახელები“, – ამბობენ აქტივისტები. ოკუპირებული აფხაზეთის გალის მუნიციპალიტეტში საქართველოს მოქალაქე ირაკლი ბებუა დააკავეს. ინტერნეტში გავრცელებულ ვიდეოში ჩანს, რომ მას აფხაზეთის დროშის დაწვას ედავებიან. ირაკლი ბებუა ვიდეოში ამბობს, რომ დროშა შეგნებულად დაწვა, თუმცა თავად არც აფხაზური დროშის საწინააღმდეგო აქვს რამე და არც აფხაზების, მისი თქმით, მას არ მოსწონს 27 სექტემბერს სოხუმის დაცემის დღის აფხაზეთში ზეიმით აღნიშვნა და „ქართველებისა და აფხაზების ძმურად ყოფნა სურს“. მოქალაქის დაკავების შესახებ სახელმწიფო უსაფრთხოების სამსახური აცხადებს, რომ ირაკლი ბებუა 30 სექტემბერს დააკავეს, აფხაზეთიდან მიღებული ცნობით, ის გალშია და მის სიცოცხლეს საფრთხე არ ემუქრება. სუს-ის განცხადებით, მათ უკანონო დაკავების ფაქტზე ინფორმაცია აცნობის ჟენევის დისკუსიების თანათავმჯდომარეებისა და საერთაშორისო პარტნიორებს, გააქტიურებულია ცხელი ხაზი და მიმდინარეობს აქტიური მუშაობა ირაკლი ბებუას გასათავისუფლებლად. „საქართველოს ოკუპირებულ ტერიტორიებზე განხორციელებულ ადამიანების უკანონო დაკავების ფაქტებზე, მათი ჯანმრთელობის მდგომარეობაზე სრული პასუხისმგებლობა ეკისრება რუსეთის ფედერაციას. საოკუპაციო რეჟიმის მიერ მართული აღნიშნული პროცესი მნიშვნელოვნად აუარესებს საოკუპაციო ხაზს გასწვრივ, ასევე ოკუპირებულ ტერიტორიებზე არსებულ უსაფრთხოების გარემოს და ართულებს ადგილობრივი მოსახლეობის ყოველდღიურობას. აღნიშნულიდან გამომდინარე მნიშვნელოვანია უკანონოდ დაკავებული პირის უპირობო გათავისუფლება“, – აცხადებს სახელმწიფო უსაფრთხოების სამსახური.
"ჟენევის მოლაპარაკებების ჩაშლა ჩვენთვის სრულიად მიუღებელია, განსაკუთრებით, პანდემიის პირობებში"
საქართველოს პრემიერ-მინისტრის, გიორგი გახარიას განცხადებით, ნებისმიერი ნაბიჯი, რომელიც ჟენევის ფორმატს ეჭვქვეშ დააყენებს, საქართველოსთვის სრულიად მიუღებელია. „ჟენევა ჩვენთვის არის უკიდურესად მნიშვნელოვანი ფორმატი, რადგან ის არის ერთადერთი ქმედითი ფორმატი. ყველაფერი, ყველა ნაბიჯი, რომელიც ჟენევის ქმედითობას დააყენებს კითხვის ნიშნის ქვეშ ჩვენთვის კატეგორიულად მიუღებელია, განსაკუთრებით, გლობალური პანდემიის პირობებში, მაშინ როდესაც საოკუპაციო ხაზზე გადასვლის შესაძლებლობა ჩაკეტილია და ადამიანებს სამედიცინო დახმარების მიღების ელემენტარული შესაძლებლობა არ აქვთ, მიუხედავად იმისა, რომ ჩვენ ვცდილობთ დავეხმაროთ ჩვენს მოქალაქეებს საოკუპაციო ხაზის მიღმა, მაგრამ სამწუხაროდ, ხშირ შემთხვევაში ამის საშუალება არ გვეძლევა. ამიტომ, ჟენევის მოლაპარაკებების, განსაკუთრებით ასეთ დროს ჩაშლა სრულიად მიუღებელია“, – განაცხადა პრემიერმა. ეუთოს საპარლამენტო ასამბლეის პრეზიდენტი, „ევროპული საქართველოს“ ერთ-ერთი ლიდერი, გიგი წერეთელიც გამოეხმაურა ჟენევის მოლაპარაკებების 51-ე რაუნდის ჩაშლას. მის კომენტარს პარტიის პრესსამსახური ავრცელებს. გიგი წერეთლის განცხადებით, რუსეთი ცდილობს, რომ მუშაობა არ იყოს კონსტრუქციული. „რუსეთი ჯიუტად აგრძელებს თავის სტრატეგიას, რომ არ შედგეს მოლაპარაკება და არ აღიაროს ამ კონფლიქტში თავისი როლი, არ მოაწეროს ხელი ძალის გამოუყენებლობას, არ შეუწყოს ხელი დევნილების დაბრუნებას და ეს მცდელობები სახეზეა. კიდევ ერთი ჩაშლილი მოლაპარაკება იმის გამო, რომ რუსეთი არ გამოცხადდა საერთოდ და ყველა მიზეზს პოულობს იმისათვის, რომ რაიმე კონსტრუქციული ნაბიჯი არ იყოს გადადგმული“, – განაცხადა წერეთელმა. „სტრატეგია აღმაშენებლის“ ერთ-ერთმა ლიდერმა გიორგი ვაშაძემ მოლაპარაკებების 51-ე რაუნდის ჩაშლა „ქართული ოცნების“ საგარეო პოლიტიკას დაუკავშირა. „ყველაზე ცუდი ის არის, რომ „ქართული ოცნების” პირობებში, მთლიანად მოშლილია ჩვენს საგარეო ასპარეზზე აქტიური მუშაობა და რუსეთი ბედავს ისეთ ნაბიჯების გადადგმას, რომ საერთოდ ჩაშალოს და მოლაპარაკებებიც კი არ შედგეს. მთავარი კითხვა უნდა დავსვათ – რამ მიგვიყვანა აქამდე? აქამდე მიგვიყვანა სწორედ „დამსხვრეული ოცნებების პარტიის” არასწორმა ქმედებებმა საერთაშორისო ასპარეზზე“, – განაცხადა მან. ჟენევის საერთაშორისო მოლაპარაკებების თანათავმჯდომარეების გადაწყვეტილებით, კორონავირუსის (COVID-19) პანდემიის მიუხედავად, 51-ე რაუნდის ჩატარება დაგეგმილი და შეთანხმებული იყო მიმდინარე წლის 6-7 ოქტომბერს. ჟენევის მოლაპარაკებების 51-ე რაუნდის ვერჩატარების მიზეზად, თანათავმჯდომარეების მიერ გავრცელებულ განცხადებაში დასახელებულია ის, რომ დისკუსიაზე დასწრება ყველა მონაწილემ ვერ შეძლო. მოლაპარაკებების ახალი რაუნდის ჩასატარებლად 2020 წლის დეკემბერი განისაზღვრა. საქართველოს საგარეო საქმეთა სამინისტრო შეშფოთებას გამოხატავს რუსეთის ფედერაციის წარმომადგენელთა მიერ ჟენევის საერთაშორისო მოლაპარაკებების 51-ე რაუნდის ჩაშლის გამო. „მსგავსი ნაბიჯები ძირს უთხრის სამშვიდობო პროცესს და ზიანს აყენებს საქართველოს ხელისუფლებისა და საერთაშორისო თანამეგობრობის ძალისხმევას კონფლიქტის შედეგად დაზარალებული მოსახლეობის პრობლემების გადაჭრის კუთხით. საგარეო საქმეთა სამინისტრო მოუწოდებს რუსეთის ფედერაციას, დაუბრუნდეს მოლაპარაკებების მაგიდას, შეასრულოს ნაკისრი საერთაშორისო ვალდებულებები, მათ შორის, 2008 წლის 12 აგვისტოს ევროკავშირის შუამავლობით დადებული ცეცხლის შეწყვეტის შეთანხმება“, – აცხადებს საგარეო.
აზერბაიჯანი - 27 სექტემბრიდან დღემდე კონფლიქტს 28 სამოქალაქო პირი ემსხვერპლა, დაჭრილია 144 ადამიანი
აზერბაიჯანის გენერალური პროკურატურის ინფორმაციით, 27 სექტემბრიდან, მას შემდეგ, რაც მთიან ყარაბაღში კონფლიქტის ესკალაცია განხორციელდა, დღემდე, გარდაცვლილთა რაოდენობა 28-მდე გაიზარდა, დაჭრილია 144 ადამიანი. „სომხური მხრიდან დასახლებული პუნქტების დაბომბვის შედეგად, 27 სექტემბრიდან დღემდე დაღუპულია 28, ხოლო 144 სამოქალაქო პირი დაჭრილია“ - ნათქვამია უწყების მიერ გავრცელებულ პრესრელიზში. მათივე ინფორმაციით, დაზარალდა 66 სამოქალაქო ობიექტი და 427 საცხოვრებელი სახლი. აზერბაიჯანსა და სომხეთს შორის მთიანი ყარაბაღის რეგიონში საომარი ვითარება 27 სექტემბრიდან განახლდა, რაშიც მხარეები ერთმანეთს ადანაშაულებენ.
კორონავირუსით ინფიცირებული პეტრო პოროშენკოს ჯანმრთელობის მდგომარეობა გაუარესდა
უკრაინის ყოფილი პრეზიდენტის პეტრო პოროშენკოს ჯანმრთელობის მდგომარეობა დამძიმდა. პოროშენკო 3 ოქტომბრიდან კორონავირუსით გამოწვეული ორმხრივი პნევმონიის გამო საავადმყოფოში იმყოფება. ამის შესახებ ინფორმაციას მისი მეუღლე მარინა პოროშენკო ავრცელებს. „მისი მდგომარეობა გაუარესებულია. მას ორმხრივი ფილტვების ანთება აქვს და კომპლექსურად მკურნალობს. სამწუხაროდ, გაუუარესდა სისხლის მდგომარეობა, რომელიც ძალიან შედედდა და ექიმებსაც კი არ შეუძლიათ მისთვის სისხლის აღება ანალიზის ჩასატარებლად, რათა გააკონტროლონ მისი ჯანმრთელობის მდგომარეობის მიმდინარეობა“, - განაცხადა მარინა პოროშენკომ. მათი ქალიშვილის მდგომარეობა, რომელიც ასევე კორონავირუსით არის დაინფიცირებული, შედარებით უკეთესია. პეტრო პოროშენკოს კორონავირუსი 29 სექტემბერს დაუდგინდა. მისი ჰოსპიტალიზაცია 3 ოქტომბერს განხორციელდა.
მსოფლიო ბანკი: საქართველოს ეკონომიკა 2020 წელს 6%-ით შემცირდება
მსოფლიო ბანკმა ევროპისა და ცენტრალური აზიის რეგიონისთვის ეკონომიკური პროგნოზები განაახლა. ახალი შეფასებით ბანკი 2020 წელს საქართველოს ეკონომიკის 6%-ით შემცირებას პროგნოზირებს. ამასთან, COVID-19-ის კრიზისით გამოწვეული უმუშევრობის გამო, მსოფლიო ბანკის პროგნოზით, 160,000 მოქალაქე წელს შეიძლება სიღარიბეში აღმოჩნდეს. "საქართველოში ეკონომიკის მკვეთრი ვარდნა შენელდა ფისკალური მხარდაჭერით, კრედიტების სტაბილური ზრდით და ფულადი გზავნილების აღდგენით. მიუხედავად ამისა, 2020 წელს ეკონომიკის ზომა, სავარაუდოდ, 6%-ით შემცირდება, რაც ასახავს პანდემიის დასაწყისში მობილობაზე დაწესებულ მკაცრ შეზღუდვებს, სამუშაო ადგილების შემცირებას, ისევე როგორც საერთაშორისო ტურიზმზე დაწესებულ შეზღუდვებს, რომელიც პანდემიამდე საქართველოს მთლიანი შიდა პროდუქტის 8 პროცენტს შეადგენდა. ზემოქმედება ასევე მწვავე იქნება სოციალური თვალსაზრისით, 2020 წელს საქართველოს დაახლოებით 160,000 მოქალაქე შეიძლება სიღარიბეში აღმოჩნდეს, ხოლო 400,000 ადამიანს შემოსავალი შეუმცირდეს. სავარაუდოდ, ეკონომიკის ზრდა 2021 წელს 4 პროცენტს მიაღწევს, რამდენადაც პანდემიასთან დაკავშირებული შოკები გაიფანტება და ტურიზმი აღდგენას დაიწყებს მომხმარებლებისა და ბიზნესის თავდაჯერებულობის მატებასთან ერთად," - ნათქვამია მსოფლიო ბანკის განცხადებაში. სამხრეთ კავკასიაში მსოფლიო ბანკის ხელმძღვანელის, სებასტიან მოლინეუსის განცხადებით, ბანკი სრულ მზადყოფნას გამოთქვამს, მონაწილეობა მიიღოს საქართველოს ეკონომიკის პოსტ-პანდემიური აღდგენის პროცესში. „საქართველოს ძალისხმევა COVID-19-ით გამოწვეული კრიზისის ეკონომიკური და სოციალური შედეგების დაძლევის მიმართ მტკიცეა და შესაძლებელი გახდა პანდემიამდე ეკონომიკის გონივრული მართვით, თუმცა გასაკეთებელი კვლავაც ბევრია სიღარიბის სავარაუდო ზრდაზე რეაგირების თვალსაზრისით. მსოფლიო ბანკი ჩართული იყო COVID-19-ის მიმართ საქართველოს მთავრობის საპასუხო ღონისძიებებში ჯანდაცვისა და სოციალური დაცვის მიმართულებების მხარდაჭერის კუთხით. და ახლაც, კერძო სექტორისთვის დაგეგმილი დახმარებითა და ბიუჯეტის მიზნობრივი მხარდაჭერით, მზად ვართ მონაწილეობა მივიღოთ ქვეყნის პოსტპანდემიური აღდგენის პროცესში“, - განაცხადა მსოფლიო ბანკის რეგიონულმა დირექტორმა სამხრეთ კავკასიაში სებასტიან მოლინეუსმა.
"საქართველოს ბრალდება რუსეთის მისამართით ჟენევის მოლაპარაკებათა პროცესის ჩაშლის თაობაზე, უსაფუძვლო და პოლიტიზებულია"
საქართველოს ბრალდება რუსეთის მისამართით მოლაპარაკებათა პროცესის ჩაშლის თაობაზე, უსაფუძვლო და პოლიტიზებულია. „ტასს“-ის ინფორმაციით, ამის შესახებ საუბარია რუსეთის საგარეო უწყების ოფიციალური წარმომადგენლის მარია ზახაროვას მიერ გავრცელებულ კომენტარში. „გაოცებულები ვართ საქართველოს საგარეო საქმეთა სამინისტროს 6 ოქტომბრის განცხადებით, თითქოსდა რუსეთის წარმომადგენლების მიერ ჩაიშალა კავკასიაში უსაფრთხოებისა და სტაბილურობის შესახებ ჟენევის საერთაშორისო დისკუსიების 51-ე რაუნდი, რომელიც გადაიდო. მიგვაჩნია, რომ ბრალდება ჩვენი მისამართით არის დაუსაბუთებელი და პოლიტიზებული“ , - განაცხადა ზახაროვამ. მისივე თქმით, გადაწყვეტილება 6-7 ოქტომბერს მოლაპარაკებათა მორიგი რაუნდის ჩატარებაზე თავშეკავების შესახებ მიღებულია, მაგრამ არა მხოლოდ რუსეთის, არამედ აფხაზეთისა და სამხრეთ ოსური დელეგაციების მიერ იმ სერიოზული შეზღუდვების და ლოგისტიკური პრობლემების გათვალისწინებით, რაც გამოწვეულია პანდემიისგან. შეგახსენებთ, რომ საქართველოს საგარეო საქმეთა სამინისტრომ 6-7 ოქტომბერს დაგეგმილ ჟენევის საერთაშორისო მოლაპარაკებების 51-ე რაუნდის ჩაშლასთან დაკავშირებით განცხადება გაავრცელა. საქართველოს საგარეო საქმეთა სამინისტრო შეშფოთებას გამოხატავს რუსეთის ფედერაციის წარმომადგენელთა მიერ ჟენევის საერთაშორისო მოლაპარაკებების 51-ე რაუნდის ჩაშლის გამო.
უცხო ქვეყნიდან შემოსულებს 8-დღიანი კარანტინის შემდეგ, სწრაფი ტესტი ჩაუტარდებათ
დაავადებათა კონტროლის ეროვნული ცენტრის ხელმძღვანელის ამირან გამყრელიძის თქმით, უცხოეთიდან შემოსულ მოქალაქეებს 8-დღიანი საკარანტინო პერიოდის ამოწურვის შემდეგ, ანტიგენზე დაფუძნებული სწრაფი ტესტი ჩაუტარდებათ. როგორც გამყრელიძემ აღნიშნა, PCR ტესტის ჩატარება მხოლოდ იმ შემთხვევაში მოხდება, თუ სწრაფი ტესტის პასუხი საეჭვო იქნება. "კარანტინში უცხოეთიდან შემოსული ადამიანებზე იცით, რომ მოქმედებს მერვე დღეს ტესტირების პროტოკოლი და მერვე დღეს დაშვებული იქნა უკვე საკმაოდ მაღალი ხარისხის ანტიგენზე დაფუძნებული სწრაფი ტესტები. ეს ხალხი რომ არ დაყოვნდეს დიდი ხნის განმავლობაში, მათ შეიძლება ჩაუტარდეთ სწრაფი ტესტი ანტიგენით და თუ უარყოფითი იქნება, რა თქმა უნდა, ისინი თავისუფლდებიან, თუ არის საეჭვო ტესტი პასუხი, მაშინ რა თქმა უნდა, ტარდება PCR ტესტირება", - განაცხადა გამყრელიძემ. საქართველოში დღეს, 7 ოქტომბერს, კორონავირუსის 508 ახალი შემთხვევა გამოვლინდა. ვირუსისგან განიკურნა 348 ადამიანი, 4 კი გარდაიცვალა. ამ დროისთვის კარანტინის რეჟიმში 5 824 ადამიანი იმყოფება, ხოლო სტაციონარში მეთვალყურეობის ქვეშ - 836. კოვიდ სასტუმროებში 1 310 პაციენტია მოთავსებული.
