ახალი ამბები
ბერლინში რუსეთის საელჩოსთან დიპლომატის ცხედარი იპოვეს
გერმანიაში, რუსეთის საელჩოსთან დიპლომატის ცხედარი იპოვეს. უცხოური მედიასაშუალებები იუწყებიან, დიპლომატი სავარაუდოდ, ფანჯრიდან არის გადავარდნილი. სხვადასხვა წყარო იმასაც წერს, რომ საელჩომ ექსპერტიზაზე უარი თქვა. თავად დიპლომატს კი, რომელიც მეორე მდივნად 2019 წლიდან მუშაობდა, გერმანელები მზვერავად მოიხსენიებენ. რაც შეეხება რუსულ წყაროებში მოძიებულ ცნობებს, გარდაცვლილი 35 წლის კირილ ჟალო, ეფესბეს კონსტიტუციური უსაფრთხოების დაცვის სამმართველოს უფროსის, გენერალ-ლეიტენანტ ალექსეი ჟალოს შვილია. ოპოზიციის ცნობით, სწორედ გარდაცვლილის მამა კურირებდა საზღვარგარეთ რუსი დისიდენტების ლიკვიდაციას.
პრეზიდენტი: დღესაც უნდა ვამტკიცებდეთ, რომ ვართ დამოუკიდებელი და არავინ უნდა წყვეტდეს ჩვენ მაგივრად, რა არის ჩვენი გზა და ორიენტაცია
"ჩვენ დღესაც უნდა ვამტკიცებდეთ, რომ ვართ დამოუკიდებელი, გვაქვს უფლება, რომ ვიყოთ საერთაშორისო თანამეგობრობის სრული წევრი და არავინ უნდა წყვეტდეს ჩვენ მაგივრად რა არის ჩვენი გზა და ორიენტაცია", ასე მიმართა საქართველოს პრეზიდენტმა დიპლომატიის დღისადმი მიძღვნილ ღონისძიებაზე შეკრებილებს. "მადლობა იმისთვის, რომ ჩვენ დღეს გვემსახურება ძლიერი დიპლომატია. ეს დიპლომატია მნიშვნელოვანია ჩვენი ქვეყნისთვის. ყოველთვის იყო მნიშვნელოვანი და მნიშვნელოვანია ახლაც. ამიტომ სულხან-საბა ორბელიანის მოღვაწეობა, 300 წლის წინ იყო არსებითად მნიშვნელოვანი საქართველოსთვის, რომ დიპლომატიურად ყოფილიყო აქტიური. მიღწეულ იქნა თუ არა იმ დროს ის გეგმები და ამბიციები, გაცხადებული მიზანი, ეს იყო იმ გზის დასაწყისი, რომელზეც დღეს ვდგავართ. ბევრად უფრო აქტიურად, სულ სხვა მდგომარეობაში, ასოცირებული ქვეყანა ვართ იმ ევროპის, რომელზეც სულხან - საბა ორბელიანი ოცნებობდა და მის შემდეგ ბევრი დიდი ქართველი. ეს არის ყველა იმ ადამიანის ღვაწლის შედეგი - ახსენეთ, პირველი რესპუბლიკა, პირველი ელჩები, რომლებიც ბევრად უფრო რთულ პირობებში იბრძოდნენ იმავე მიზნისთვის, რომ საქართველო ყოფილიყო საერთაშორისო თანამეგობრობის მიერ აღიარებული, როგორც ერთ-ერთი მათი ნაწილი, დემოკრატიული ქვეყანა, ქვეყანა, რომელსაც აქვს უფლება, იყოს სრულიად დამოუკიდებელი. დღესაც გვაქვს ეს გამოწვევა, ჩვენი ოკუპირებული ტერიტორიებიდან და სხვადასხვა გამოწვევიდან გამომდინარე. ჩვენ დღესაც უნდა ვამტკიცებდეთ, რომ ვართ დამოუკიდებელი, გვაქვს უფლება, რომ ვიყოთ საერთაშორისო თანამეგობრობის სრული წევრი და არავინ უნდა წყვეტდეს ჩვენ მაგივრად, რა არის ჩვენი გზა და ორიენტაცია. გეთანხმებით იმაში, რომ ეს არის ერთ-ერთი საკითხი, რომელზეც ყველანი ვართ გაერთიანებული. რატომღაც ზოგჯერ გვავიწყდება, პოლარიზაციის გაჩაღებულ მდგომარეობაში, რომ ვართ ამ საკითხის ირგვლივ გაერთიანებული, ყოველ შემთხვევაში საზოგადოებაა ამ საკითხის ირგვლივ გაერთიანებული“, - განაცხადა სალომე ზურაბიშვილმა. პრეზიდენტის აზრით, დღეს დიპლომატიის მთავარი მიზანი და ვალდებულებაა საერთაშორისო თანამეგობრობის წევრობის მიზანთან ქვეყანა რაც შეიძლება ჩქარა და ეფექტურად მიიყვანოს. „ვარ დარწმუნებული, რომ ყველა ჩვენი დიპლომატი არ დაიშურებს ძალისხმევას, რომ ვიაროთ ამ გზაზე სწრაფად და ეფექტურად.ასევე, მეორე გამოწვევაა მათი, ჩვენი ძალიან მტკივნეული - ოკუპაციის საკითხი. ესენი არიან ჩვენი ელჩები საზღვარგარეთ, რომლებიც მსოფლიოს ეუბნებიან რომ არ შევეგუებით. მე იმედი მაქვს, რომ მოვა დრო, მათ უფრო აქტიურად შეეძლებათ ჩარევა. ჟენევა არის ერთ-ერთი ადგილი. ერთ დღესაც დეოკუპაცია მათ ხელში იქნება და ამ საკითხსაც წარმატებულად წარმართავენ. დღეს მთავარია, რომ ჩვენ ამას არ შევეგუებით. ყველა ჩვენმა პარტნიორმა და არაპარტნიორმა უნდა იცოდეს, რომ ეს არის ერთიანი საქართველოს ხმა და ეს ხმა ყველგან გაისმევა. ბევრი ახალი გამოწვევაც გვაქვს, გაიზარდა დიასპორას რიცხოვნობა. ერთად უნდა ვმუშაობდეთ დიასპორა რომ იყოს ქვეყანასთან დაკავშირებული. ჩვენ ვნახეთ, პანდემიის დროს ყველა ჩვენი საელჩო როგორი ჩართული იყო. ჯერ ტესტირება, შემდეგ ვაქცინები, ჩვენი დიასპორის დაბრუნება. უცებ ბევრი ახალი პრობლემა შეიქმნა და ამ პრობლემის ახალი მეთოდები რომ დაეძლიათ. ეკონომიკა რჩება ჩვენი დიდი გამოწვევა და ინვესტორების მოზიდვა ქვეყანაში. კულტურა-ჩვენი ენის, იდენტობის, ისტორიის, ჩვენი თვითმყოფადობის გატანა გარეთ. ყველამ უნდა გაიგოს, რომ საქართველო არ არის პატარა ქვეყანა გადაკარგული და ეს არის ქვეყანა ძველი ცივილიზაციით. დღეს ჩვენს დიპლომატიას აქვს საბრძოლველი. ეს ბრძოლაა და წინა ხაზზე დგას დიპლომატია. ისინი უნდა იყვნენ ტექნიკოსები, ეკონომისტები, ისტორიკოსები, ენის მცოდნეები და სხვა", - განაცხადა სალომე ზურაბიშვილმა. "ეს მრავალფეროვნება ნიშნავს, რომ ჩვენ ძალიან ბევრს ვითხოვთ ჩვენი დიპლომატებისგან და ვიტყოდი, რომ კიდევ მეტსაც ვითხოვთ. ვიტყოდი, ერთი მხრივ, რომ, ეს სიტყვები წავართვა პოეტს, რომ - ხომ ლამაზია ჩემი ცოლი, მაგრამ მე კიდევ უფრო ლამაზი მინდა. კიდევ უფრო ლამაზი დიპლომატია მინდა, კიდევ უფრო ეფექტური, იმიტომ, რომ კიდევ ბევრი საქმეა, რომელსაც სჭირდება მეტი რესურსები, ბატონო პრემიერო“, - მიმართა სალომე ზურაშვილმა ირაკლი ღაბირაშვილს, რომელიც ამავე ღონიძიებას ესწრებოდა.
შსს ბარსელონაში სპეცოპერაციისას კრიმინალური დაჯგუფების 9 წევრის, მათ შორის საქართველოს 8 მოქალაქის დაკავების შესახებ იუწყება
შსს აცხადებს, რომ ბარსელონაში სპეცოპერაციისას კრიმინალური დაჯგუფების 9 წევრი, მათ შორის საქართველოს 8 მოქალაქეა დაკავებული. უწყების ცნობით, ბარსელონაში ჩატარდა მასშტაბური სპეცოპერაცია, სახელწოდებით - „ბანუს". „საქართველოს შინაგან საქმეთა სამინისტრო, საერთაშორისო ორგანიზებული დანაშაულის წინააღმდეგ ეფექტიანი ბრძოლის მიზნით, ევროპის ქვეყნებში წარგზავნილი პოლიციის ატაშეების მეშვეობით, კვლავ აქტიურად განაგრძობს თანამშრომლობას ევროკავშირის წევრი ქვეყნების სამართალდამცავ უწყებებთან. მიმდინარე წლის 20 ოქტომბერს ქალაქ ბარსელონაში ჩატარდა მასშტაბური სპეცოპერაცია, სახელწოდებით - „ბანუს". სპეცოპერაციას წინ უძღოდა ესპანეთის სამეფოს კატალონიის ავტონომიური პოლიციის ტრანსნაციონალურ დანაშაულთან ბრძოლის დანაყოფის, ესპანეთის სამოქალაქო გვარდიისა და ესპანეთის სამეფოში საქართველოს შინაგან საქმეთა სამინისტროს ცენტრალური კრიმინალური პოლიციის დეპარტამენტის პოლიციის ატაშეს თანამშრომლობით დანაშაულის გამოვლენის, ზემოთ აღნიშნული ორგანიზებული დანაშაულებრივი ჯგუფის წევრების, ასევე, მათი კავშირების დადგენისა და ოპერაციის დაგეგმვის მიზნით განხორციელებული ერთწლიანი ინტენსიური ოპერატიულ-საგამოძიებო სამუშაოები. ესპანელმა სამართალდამცველებმა, სპეცოპერაციის შედეგად, კრიმინალური დაჯგუფების წევრები - 9 პირი დააკავეს, მათ შორის საქართველოს 8, ერთი კი რუსეთის ფედერაციის მოქალაქე. მათ ბრალად ედებათ ესპანეთის სისხლის სამართლის კოდექსის 237-ე და 570-ე მუხლებით გათვალისწინებული დანაშაულები, რაც გულისხმობს ესპანეთის სამეფოს ტერიტორიაზე ჩადენილ ბინების ქურდობას, ასევე კრიმინალურ-დანაშაულებრივი ჯგუფის წევრობას და 5 წლამდე ვადით პატიმრობას ითვალისწინებს. მოსამართლის განჩინების საფუძველზე გაიჩხრიკა დაკავებულების საცხოვრებელი 7 ბინა. ბრალდებულები სასამართლოს წინაშე 22 ოქტომბერს წარდგნენ“, - აღნიშნულია უწყების ინფორმაციაში.
საქართველოში მწვანე წყალბადის პოტენციალის შესწავლა იწყება
საქართველოში მწვანე წყალბადის პოტენციალის შესწავლა იწყება. ამ მიზნით, დღეს ხელი მოეწერა საქართველოს ეკონომიკისა და მდგრადი განვითარების სამინისტროსა და გერმანიის განვითარები ბანკს (KfW) შორის განზრახულობათა დეკლარაციას. ინფორმაციას ეკონომიკის სამინისტრო ავრცელებს. შედეგად, საქართველოში განხორციელდება პირველი საპილოტე პროექტი, რომელიც უზრუნველჰყოფს ქვეყანაში სუფთა და განახლებადი ენერგიების მიმართულების განვითარებას. ეკონომიკის მინისტრის განცხადებით, საქართველო იქნება რეგიონში ერთ-ერთი პირველი ქვეყანა, რომელიც გერმანელი პარტნიორების მხარდაჭერით მწვანე წყალბადის მომავლის ტექნოლოგიას რეალობად აქცევს. დღეს გაფორმებული დეკლარაციის ძირითადი მიზნებია: საქართველოში მწვანე წყალბადის პონტეციალისა და სარგებლის შეფასება; პირველი საპილოტე პროექტის განხორციელება, რომელიც უზრუნველჰყოფს ეკონომიკისთვის სარგებლის მოტანას და შესაბამისად ხელს შეუწყობს ქვეყანაში ინვესტიციების მოზიდვას სუფთა და განახლებადი ენერგიების მიმართულების გასავითარებლად; იმპორტირებულ გაზზე დამოკიდებულების შემცირება და მიწოდების უსაფრთხოების გაზრდა; განახლებადი ენერგიის პროექტების განვითარების ტემპის ზრდა, ნახშირბადის ემისიების შერბილება და ქვეყნისთვის ექსპორტის შესაძლებლობების შექმნა. ნათია თურნავას განცხადებით, ძალიან მნიშვნელოვანია, რომ საქართველო უკვე გაჩნდა მწვანე წყალბადის შესწავლის რუკაზე, კონკრეტულად, ენერგეტიკის განვითარების ფონდი აქტიურად მუშაობს საპილოტე პროექტის განვითარებაზე, რომელიც საქართველოში მწვანე წყალბადის პირველ წარმოებას შექმნის. მისივე განმარტებით, ეს არის ტექნოლოგია, რომელიც საშუალებას იძლევა, განსაკუთრებით ისეთი ქვეყნებისთვის, სადაც არის განახლებადი ენერგიის წყაროები, მათ შორის საქართველოსთვის - გადაიყვანოს ელექტროენერგია მწვანე წყალბადში.
ჭყონდიდის ეპარქიიდან განკვეთილი სასულიერო პირების ნაწილი გამოკითხეს
ჭყონდიდის ეპარქიიდან განკვეთილი სასულიერო პირების ნაწილმა პოლიციის შენობა უკვე დატოვა. ბერი პეტრე ღუდუშაური აცხადებს, რომ მეუფე სტეფანეს მიერ მიყვანილი ჩოხოსნების მოთხოვნას ტაძრის დატოვების შესახებ არ დაემორჩილნენ, პოლიციამ კი, ისინი დააკავა. „საპატრიარქოსთვის გვაქვს მიწერილი წერილი, რომ მეუფე სტეფანეს არ აქვს უფლება, ბერი დაიყვანოს ერისკაცობამდე, ეკლესიის სასამართლოს გარეშე. საქართველოს ეკლესიას სასამართლო არ აქვს, გაუქმებულია. ამიტომ ჩვენ არ დავტოვეთ მონასტერი მეუფე სტეფანეს მოწოდებით, ვითხოვდით სინოდს და თუ ეთანხმებოდნენ დავტოვებდით, გადავაბარებდით მშვიდობით, მაგრამ რა ვნახეთ, დილის ექვს საათზე მეუფე სტეფანე თავის რაზმთან, ჩოხიანებთან ერთად დაგვესხა თავს და ყველა გამოგვყარეს გარეთ, ამასობაში ჩვენც გავუწიეთ წინააღმდეგობა. პოლიციამ ბერები დაგვიჭირა და ყველა წაგვიყვანეს მარტვილის სამმართველოში. დაჭერილები ვიყავით შვიდნი, დაგვკითხეს, სამი გამოგვიშვეს, ოთხი ჯერ იქ ჰყავთ", - განაცხადა პეტრე ღუდუშაურმა. თავის მხრივ, ჭყონდიდის ეპარქიიდან განკვეთილმა ერთ-ერთმა სასულიერო პირმა ამბროსი სხულუხიამ განაცხადა, რომ დილიდან მარტვილის პოლიციაში გამოკითხვაზე იმყოფებოდა. მისივე ინფორმაციით, პოლიციას მისგან აინტერესებდა დაბრუნდებოდა თუ არა სალხინოში, დადიანების საზაფხულო რეზიდენციაში. მისი თქმით, მონასტერში 200-300 პირი შევიდა, მათ შორის ჩოხოსნები და პოლიცია, რომლებმაც მამაოები კელიებიდან ლოცვის დროს გაიყვანეს. როგორც ცნობილია, ინციდენტის დროს დაზიანდა საპატრიარქოს კუთვნილი ტექნიკა - კერძოდ ვიდეოკამერა, აღნიშნულ ფაქტთან დაკავშირებით დაწყებულია გამოძიება სისხლის სამართლის კოდექსის 187-ე მუხლით, რაც სხვისი ნივთის დაზიანებას გულისხმობს. ცნობისათვის, ჭყონდიდის ეპარქიიდან განკვეთილ სასულიერო პირებს მონასტერში ყოფნის ვადა გუშინ ამოეწურათ. ამავე თემაზე: მიტროპოლიტმა სტეფანემ რამდენიმე სასულიერო პირს მღვდელმსახურების უფლება შეუჩერა
მეგის ქარდავა სისხლის სამართლის ახალი საქმის ფარგლებში, გამოძიებისთვის ჩვენების მიცემას არ აპირებს
სამხედრო პოლიციის დეპარტამენტის ყოფილი უფროსი, მსჯავრდებული მეგის ქარდავა ახალი საქმის ფარგლებში გამოძიებისთვის ჩვენების მიცემას არ აპირებს. აღნიშნულის შესახებ ჟურნალისტებს ქარდავას ადვოკატმა გია გოროზიამ რუსთავის მე-12 პენიტენციურ დაწესებულებასთან განუცხადა. ადვოკატი განმარტავს, რომ მეგის ქარდავა საგამოძიებო უწყებას უნდობლობას უცხადებს. „საგამოძიებო უწყებიდან მასთან შეხვედრა უკავშირდება ერთ-ერთ სისხლის სამართლის საქმეს, კონკრეტული დეტალიზაცია ჩემთვის უცნობია, ეს გახლავთ, როცა მეგის ქარდავა სამეგრელო-ზემო სვანეთის მთავარ სამმართველოში უფროსის მოადგილის თანამდებობაზე მუშაობდა. ჩვენ პოზიცია გახლავთ ის, რომ საგამოძიებო უწყებას არ ვენდობით, მათთან გულწრფელი ვერ ვიქნებით, შესაბამისად, საგამოძიებო უწყებას ჩვენებას არ მივცემთ. რაც შეეხება სისხლის სამართლებრივ დევნას, კონვენციის დათქმა არის ასეთი - იმ სისხლის სამართლის საქმეზე, რომელზეც საქართველოშია გადმოცემული, შეუძლებელია მის მიმართ სისხლის სამართლებრივი დევნა განხორციელდეს. ზოგადი ინფორმაცია მაქვს საგამოძიებო უწყებიდან, ეს ეხება სისხლის სამართლის 333-ე მუხლით დაწყებულ გამოძიებას - უფლებამოსილების ბოროტად გამოყენებას, დაზარალებული ვინ არის, ვერ გეტყვით, თუმცა, ახალი სისხლის სამართლის საქმეა. ვფიქრობ, ეს აბსურდული საქმეა, რადგან გამოძიება მას შემდეგ დაიწყო, რაც მეგის ქარდავა საქართველოში ჩამოიყვანეს. მეგის ქარდავა საგამოძიებო უწყებას სრულ უნდობლობას უცხადებს, ყველა ბრალდება, რომელიც მის მიმართ წარმოებულია და განაჩენია დამდგარი, აბსურდული, უკანონოა", - განაცხადა გია გოროზიამ. ამავე თემაზე მეგის ქარდავა: არავის წინააღმდეგ ჩვენების მიცემას არ ვაპირებ
აშშ საუდის არაბეთს $650 მილიონის ღირებულების იარაღს მიჰყიდის
ამერიკის შეერთებულმა შტატებმა საუდის არაბეთისთვის $650 მილიონის ღირებულების იარაღის მიყიდვის გადაწყვეტილება ოფიციალურად დაამტკიცა. პენტაგონის განცხადებით, ამ ნაბიჯის მიზანია, დაეხმაროს ქვეყანას მომავალ საფრთხეებთან გამკლავებაში. მედიის ცნობით, ეს ჯო ბაიდენის ადმინისტრაციის მხრიდან პირველი მასშტაბური შეთანხმებაა სპარსეთის ყურის ქვეყნისთვის იარაღის გადასაცემად. იარაღის მიყიდვაზე შეთანხმება კონგრესის თანხმობას არ საჭიროებს, მაგრამ კანონმდებლებს შეუძლიათ მისი დაბლოკვა სენატსა და წარმომადგენელთა პალატაში. უცხოური მედია იხსენებს, რომ დონალდ ტრამპმა ვეტო დაადო რამდენიმე ორპარტიულ რეზოლუციას, რომლითაც საუდის არაბეთისთვის იარაღის მიყიდვის დაბლოკვას და იემენში საუდის არაბეთის ხელმძღვანელობით ომისთვის აშშ-ის მხარდაჭერის შეწყვეტას ცდილობდნენ.
სახელმწიფო ინსპექტორის სამსახური მიხეილ სააკაშვილთან დაკავშირებით განცხადებას ავრცელებს
სახელმწიფო ინსპექტორის სამსახური მოუწოდებს ყველას, განსაკუთრებული სიფრთხილით მოეკიდონ მოშიმშილე თავისუფლებააღკვეთილი პირის მიმართ თითოეული გადაწყვეტილების მიღებას და ყოველ ინდივიდუალურ შემთხვევაში შეაფასონ ადამიანის უფლებათა დარღვევის რისკები. ამის შესახებ ინფორმაციას სახელმწიფო ინსპექტორი ავრცელებს. მათივე ინფორმაციით, ჯანმრთელობის მდგომარეობასთან დაკავშირებული პერსონალური მონაცემი, მისი სენსიტიური ხასიათის გამო, განსაკუთრებული კატეგორიის მონაცემს მიეკუთვნება. “საქართველოს მესამე პრეზიდენტის მიხეილ სააკაშვილის უფლებების დაცვის უზრუნველსაყოფად მიღებული ზომების, მისი ჯანმრთელობის მდგომარეობის მიმართ მაღალი საზოგადოებრივი ინტერესის გათვალისწინებითა და შესაძლო დარღვევების პრევენციის მიზნით, სახელმწიფო ინსპექტორის სამსახური განმარტავს: ერთი მხრივ, თავისუფლების აღკვეთის დაწესებულება ვალდებულია, პატივი სცეს მოშიმშილე პატიმრის სურვილს - უარი თქვას საკვების მიღებაზე, თუმცა მასვე ეკისრება პოზიტიური ვალდებულება ეფექტური და დროული მოქმედების გზით დაიცვას თავისუფლებააღკვეთილი პირის სიცოცხლე და ჯანმრთელობა. წინააღმდეგ შემთხვევაში, თავისუფლებააღკვეთილი პირის შიმშილობის დროს, შესაბამისი ორგანოების ან/და პირთა მხრიდან მიღებულმა არასათანადო ზომებმა, შესაძლებელია წარმოშვას ადამიანის უფლებათა დარღვევის რისკი. ადამიანის უფლებათა ევროპული სასამართლოს მიერ დადგენილი პრაქტიკის თანახმად, თავისუფლების აღკვეთის დაწესებულებაში მყოფი პირი დროულად უნდა იყოს უზრუნველყოფილი სიცოცხლისა და ჯანმრთელობის დაცვისთვის აუცილებელი სამედიცინო დახმარებით, ყველა გონივრულად შესაძლო სამედიცინო გამოკვლევითა და მკურნალობით. საპატიმრო დაწესებულებებში გაწეული სამედიცინო მკურნალობა უნდა იყოს იმ დონის შესაბამისი, რასაც სახელმწიფო უზრუნველყოფს ზოგადად მოსახლეობისათვის. ეს არ ნიშნავს იმას, რომ თავისუფლებააღკვეთილი ყველა პირი უნდა მოთავსდეს ციხის დაწესებულებების გარეთ არსებულ საუკეთესო სამედიცინო დაწესებულებაში. თუმცა, საჭიროების შემთხვევაში, პატიმრის ჯეროვანი მკურნალობისათვის სამოქალაქო საავადმყოფოში გადაყვანაზე გაუმართლებელმა უარმა, შესაძლოა წარმოშვას ადამიანის უფლებათა და ძირითად თავისუფლებათა დაცვის კონვენციის მე-3 მუხლის დარღვევის საფრთხეები. თავისუფლებააღკვეთილი პირის ჯანმრთელობის მდგომარეობის გაუარესების ფაქტი, ცალკე აღებული, ცხადია არ არის საკმარისი საპატიმრო დაწესებულებაში გაწეული მკურნალობის არაეფექტიანად შესაფასებლად, თუმცა თავისუფლების აღკვეთის ადგილებში პირის ჯანმრთელობის მდგომარეობის მკვეთრმა გაუარესებამ შესაძლოა გააჩინოს ეჭვი დაწესებულებაში გაწეული სამედიცინო მომსახურების ადეკვატურობასთან დაკავშირებით. გარდა ზემოაღნიშნულისა, სახელმწიფო ინსპექტორის სამსახური აღნიშნავს, რომ მნიშვნელოვანია დაცული იყოს მოშიმშილე თავისუფლებააღკვეთილი პირის პირადი ცხოვრების ხელშეუხებლობა, მისი პერსონალური, განსაკუთრებით კი, მისი ჯანმრთელობის მდგომარეობის შესახებ, მონაცემები. ჯანმრთელობის მდგომარეობასთან დაკავშირებული პერსონალური მონაცემი, მისი სენსიტიური ხასიათის გამო, განსაკუთრებული კატეგორიის მონაცემს მიეკუთვნება. ეროვნული და საერთაშორისო კანონმდებლობა, ასეთი ინფორმაციის დაცვის მიზნით, აწესებს მკაცრი კონფიდენციალურობის პრინციპს. პირს უნდა ჰქონდეს განცდა და ლეგიტიმური მოლოდინი, რომ მისი ჯანმრთელობის მდგომარეობის შესახებ ინფორმაცია კონფიდენციალური იქნება. წინააღმდეგ შემთხვევაში შესაძლოა მან თავი შეიკავოს სამედიცინო მომსახურების მიღებისაგან, სამედიცინო პერსონალისთვის მნიშვნელოვანი ინფორმაციის მიწოდებისაგან, რომლითაც საფრთხე ექმნება მისთვის სწორი დიაგნოზის დასმას და ადეკვატური მკურნალობის გაწევას. სწორედ ამიტომ, დაწესებულება/პირი, რომელიც ფლობს ინფორმაციას პირის ჯანმრთელობის შესახებ, ვალდებულია დაიცვას მის ხელთ არსებული ინფორმაციის კონფიდენციალურობა და მონაცემები გაამჟღავნოს მხოლოდ კანონით გათვალისწინებულ შემთხვევაში. ამასთან, შესაბამისმა დაწესებულებამ/პირმა უნდა მიიღოს ზომები, რომლებიც უზრუნველყოფს მონაცემთა დაცვას შემთხვევითი ან უკანონო გამჟღავნებისგან და ნებისმიერი სხვა ფორმით უკანონო გამოყენებისგან. იმ შემთხვევაშიც კი, როცა პირის ჯანმრთელობის მდგომარეობის მიმართ არსებობს მაღალი საზოგადოებრივი ინტერესი, აუცილებელია დაცული იყოს ბალანსი საზოგადოებრივი ინტერესის დაკმაყოფილებასა და პირის პერსონალური მონაცემების დაცვის უფლებას შორის. პირის ჯანმრთელობის მდგომარეობის შესახებ ზოგადი ინფორმაციის საზოგადოებისთვის მიწოდება შესაძლოა გამართლებული იყოს საზოგადოებრივი ინტერესიდან გამომდინარე, თუმცა, როგორც წესი, ვერ იქნება გამართლებული პირის ჯანმრთელობის მდგომარეობის შესახებ დეტალების გასაჯაროება. კანონმდებლობის თანახმად, პირის ჯანმრთელობის მდგომარეობის შესახებ დეტალების გასაჯაროება და მესამე პირთათვის გამჟღავნება დასაშვებია თავად ამ პირის (მონაცემთა სუბიექტის) თანხმობით. ამ შემთხვევაშიც, ინფორმაციის გასაჯაროება უნდა მოხდეს მინიმალური მოცულობით, მონაცემთა სუბიექტის ღირსების შეულახავად და მკაფიოდ განსაზღვრული კანონიერი მიზნით. სახელმწიფო ინსპექტორის სამსახური მოუწოდებს ყველას, განსაკუთრებული სიფრთხილით მოეკიდონ მოშიმშილე თავისუფლებააღკვეთილი პირის მიმართ თითოეული გადაწყვეტილების მიღებას და ყოველ ინდივიდუალურ შემთხვევაში შეაფასონ ადამიანის უფლებათა დარღვევის რისკები”, - აღნიშნულია განცხადებაში.
პარლამენტი ევროპის საბჭოს წამებისა და არაადამიანური მოპყრობის დასჯის ან აღკვეთის ევროპული კომიტეტის წევრობის კანდიდატთა შერჩევას იწყებს
საქართველოს პარლამენტი ევროპის საბჭოს წამებისა და არაადამიანური ან დამამცირებელი მოპყრობის ან დასჯის აღკვეთის ევროპული კომიტეტის წევრობის კანდიდატთა შერჩევისთვის ემზადება. კანდიდატთა შესარჩევი ღია საკონკურსო კომისიის შემადგენლობისა და საქმიანობის შესახებ დღეს, სპეციალური კომისიის პირველ სხდომაზე იმსჯელეს. საკონკურსო კომისიის თავმჯდომარის, გივი მიქანაძის განცხადებით, განისაზღვრა გრაფიკი და შესაბამისი კრიტერიუმების მითითებით, გამოცხადდა კონკურსი. მისივე თქმით, საბუთები 18 ნოემბრის ჩათვლით მიიღება. კომისიის თავმჯდომარემ აღნიშნა, რომ ამ მიზნით, ინფორმაციის გავრცელება ეთხოვება საქართველოს სახალხო დამცველის აპარატს, პარლამენტის ღია მმართველობის მუდმივმოქმედი საბჭოს სამდივნოს, ამასთან, თბილისსა და რეგიონებში მოქმედ უმაღლეს სასწავლებლებში ინფორმაციას გაავრცელებს კანდიდატთა შესარჩევი ღია საკონკურსო კომისიის მდივანიც. „ვგეგმავთ, რომ ნოემბრის ბოლომდე დავასრულოთ პირველი ეტაპი, რომელიც ითვალისწინებს საბუთების მიღება-გადარჩევას და მეორე ეტაპზე გადასული კანდიდატების გამოვლენას, ხოლო დეკემბერში განვახორციელოთ მეორე ეტაპზე გადასული კანდიდატებთან გასაუბრება. ამ გასაუბრების საფუძველზე, როგორც კონვენციით, ასევე, პარლამენტის თავმჯდომარის მიერ დამტკიცებული დებულებით გვაქვს ვალდებულება, რომ უნდა შევარჩიოთ სამი კანდიდატი, რომელთაგან ერთი აუცილებლად იქნება განსხვავებული სქესის. ამ სამ კანდიდატს, შესაბამისი კრიტერიუმებიდან და შეფასებებიდან გამომდინარე, ოფიციალურად წარვადგენთ ევროსაბჭოს საპარლამენტო ასამბლეაში საქართველოს დელეგაციის ხელმძღვანელთან, რომელიც თავისი ოფიციალური წერილით, კანდიდატების შესახებ ინფორმაციას გადაუგზავნის ევროპის საბჭოს საპარლამენტო ასამბლეას, სადაც განხორციელდება ამ სამი კანდიდატის შერჩევის შემდგომი პროცედურები და შეირჩევა უკვე მათ მიერ ერთი კანდიდატი, რომელსაც მიეცემა ოთხწლიანი მანდატი, საქართველოს სახელით წარმოდგენილი იყოს წამების პრევენციის ევროპულ კომიტეტში“,- განაცხადა გივი მიქანაძემ.
Pfizer-ის ცნობით, მათი აბები კოვიდის დროს ჰოსპიტალიზაციისა და სიკვდილიანობის მაჩვენებელს თითქმის 90%-ით ამცირებს
ამერიკული ფარმაცევტული კომპანია Pfizer-ი აცხადებს, რომ კოვიდსაწინააღმდეგო აბები ჰოსპიტალიზაციისა და სიკვდილიანობის მაჩვენებელს თითქმის 90%-ით ამცირებს. Associated Press-ი იტყობინება, რომ Pfizer-მა 775 ზრდასრული ადამიანში ჩატარებული კვლევის წინასწარი შედეგები გამოაქვეყნა. კომპანია მალე მიმართავს აშშ-ის სურსათისა და მედიკამენტების ადმინისტრაციასა (FDA) და საერთაშორისო რეგულატორებს, რომ ახალი პრეპარატი დაამტკიცონ. პაციენტებში, რომლებიც კომპანიის პრეპარატს სხვა ანტივირუსულ პრეპარატთან ერთად იღებდნენ, ჰოსპიტალიზაციის ან სიკვდილიანობის მაჩვენებელი ერთი თვის შემდეგ 89%-ით შემცირდა. კვლევის მონაწილეები არავაქცინირებულნი იყვნენ. მათ ჰქონდათ მსუბუქი და საშუალო სიმძიმის დაავადება და ჯანმრთელობის პრობლემების, მათ შორის სიმსუქნის, დიაბეტის ან გულის დაავადების გამი ჰოსპიტალიზაციის მაღალ რისკ-ჯგუფს მიეკუთვნებოდნენ.
მიხეილ სააკაშვილი: მტრის ჯინაზე არ მოვკვდები
მიხეილ სააკაშვილის გზავნილი მედიას ექსპრეზიდენტის ადვოკატმა შოთა თუთბერიძემ #12 დაწესებულიდან გამოსვლის შემდეგ გააცნო. ექსპრეზიდენტი სააკაშვილი აცხადებს, რომ საზოგადოებამ 30-ში უკვე მოახდინა საარჩევნო რევოლუცია, ახლა ამ საარჩევნო რევოლუციის განვითარებისა და რიგგარეშე არჩევნებში გადაზრდის დროა. „ჩემი დაკვირვებითა და გამოცდილებით, მინდა გითხრათ, რომ დღეს საზოგადოება ბევრად უფრო მზადაა ძირეული ცვლილებებისთვის, ვიდრე „ვარდების რევოლუციის“ წინ. ბევრად უფრო წინ წასულია, ინფორმირებულია და რაც მთავარია, ერთიანია, ვიდრე მაშინ. ჩვენმა საზოგადოებამ 30-ში უკვე მოახდინა საარჩევნო რევოლუცია, ახლა ამ საარჩევნო რევოლუციის განვითარებისა და რიგგარეშე არჩევნებში გადაზრდის დროა. მთლიანად მხარს ვუჭერ გამარჯვებული მერებისა და სხვა ლიდერებისგან შემდგარ კოალიციას და იმას, რომ ერთდროულად გაიმართოს აქციები ბევრ ადგილას. ეს ეფუძნება სერბულ მაგალითს. ჯერ მილოშევიჩმა მიითვისა ადგილობრივი არჩევნები იუგოსლავიაში, მას შემდეგ რაც გაიმარჯვა ოპოზიციამ, ხოლო ოპოზიციამ ჯერ მოაწყო აქციები ბევრ ადგილას და შემდეგ წავიდნენ ბელგრადისკენ. რატომაა მნიშვნელოვანი აქციები ბევრ ადგილას ერთდროულად?- იმიტომ, რომ ივანიშვილს ჰყავს ძალიან შეზღუდული რაოდენობის ბოლომდე ლოიალური საპოლიციო შენაერთები და მათ დაატარებს წინ და უკან. ამგვარად, მოუხდება ძალების დაფანტვა და ვერ შეძლებს საქართველოს მოქალაქეების, ქართველი ხალხის კონსტიტუციური უფლებების შეზღუდვას. საჭიროა, განსაკუთრებით ოდიოზურ ადგილობრივ თვითმმართველებზე და მათ მიერ ჩადენილ უსამართლობებზე მუდმივი შეტევა და მხილება და, რა თქმა უნდა, მთელი საქართველო უნდა დაიძრას თბილისში შემდეგ კვირას და როგორც კი თარიღი გამოცხადდება, ემიგრანტებმა ის ერთი დღე უნდა აჩუქონ საქართველოს, რომელზეც გუშინ მოგმართეთ. ახლა მთავარია მრავალრიცხოვნობა და თქვენ, დიახაც, რომ წარმოადგენთ და არჩევნებმა ეს დაადასტურა, ქართული საზოგადოების აბსოლუტურ უმრავლესობას. ჩვენ უნდა ვიყოთ მშვიდობიანი, მაგრამ ძალიან მტკიცე და მობილური. არ ვიცი ჩემი შიმშილობის რომელი დღე იქნება, მაგრამ მტრის ჯინაზე არ მოვკვდები და აუცილებლად დაგელოდებით, რათა მოვიპოვოთ და ვიზეიმოთ გამარჯვება, საქართველოს გამარჯვება. ასევე, მივესალმები ელენე ხოშტარიას. დიახ, ელენე ნამდვილად არ დამვიწყებია და რა დამავიწყებს შენს სახელს, პარლამენტთან და ციხესთან სოლიდარობის შიმშილობის მონაწილეებს. გავიგე, რომ ციხესთან მოშიმშილე 24 წლის გოგონა, ჩემი საყვარელი ნეკრესელი მეუფის სერგის შვილიშვილი ყოფილა. მეუფე ახლახან წავიდა ამ ქვეყნიდან, მაგრამ, ზუსტად ვიცი, რომ იამაყებდა ნინოს სამოქალაქო გმირობით. მასაც და ყველა სხვა მოშიმშილესაც მინდა ვუთხრა, მაქსიმალურად გაუფრთხილდნენ და იზრუნონ საკუთარ ჯანმრთელობაზე. ამ საქმისთვის ერთი მსხვერპლიც საკმარისია. კიდევ ერთხელ, მეგობრებო, შაბათის აქციაზე უნდა გამოვიდეთ ბევრნი და მრავალრიცხოვანი. არ აქვს მნიშვნელობა პოლიტიკურ კუთვნილებას. აქციების მოთხოვნაა - რიგგარეშე არჩევნები და ჩემი გათავისუფლება, მაგრამ არცერთი ეს არ არის თვითმიზანი, არამედ არის საშუალება იმისთვის, რომ შევაჩეროთ ფასების უღმერთო ზრდა; ქართველების საქართველოდან მასობრივი გადინება; ქართველების საკუთარ ქვეყანაში უმცირესობაში აღმოჩენის პროცესი; კორუფცია; თქვენს ჯიბეებში მთავრობის მიერ ხელის ჩაყოფა; სიღატაკე და ერთხელ და სამუდამოდ ამოვიყვანოთ ჩვენი ქვეყანა ჭაობიდან“, - ნათქვამია მიხეილ სააკაშვილის წერილში. ცნობისთვის, 4 ნოემბერს, სახალხო დამცველმა მიხეილ სააკაშვილის მიღებისთვის N18 სამკურნალო დაწესებულების მზადყოფნის ხარისხი კიდევ ერთხელ შეამოწმა. რუსთავის #12 დაწესებულებაში მყოფი ექსპრეზიდენტი მიხეილ სააკაშვილი, რომელიც პირველ ოქტომბერს დააკავეს, თითქმის ერთი თვეა, შიმშილობს. იუსტიციის მინისტრის მოწვევით ჯანდაცვის სამინისტრომ ექიმთა კონსილიუმი შექმნა, რომელმაც ექსპრეზიდენტის ჰოსპიტალიზების რეკომენდაცია გასცა. სააკაშვილის ადვოკატები და პირადი ექიმი მის კერძო კლინიკაში გადაყვანას ითხოვენ. იუსტიციის სამინისტრო კი აცხადებს, რომ მსჯავრდებულზე გამონაკლის ვერ დაუშვებენ მისი გადაყვანა მხოლოდ გლდანის ციხის საავადმყოფოშია შესაძლებელი.
Politico-ს ინფორმაციით, ჯო ბაიდენის მიერ დაგეგმილ დემოკრატიის ვირტუალურ სამიტზე საქართველოც არის მიწვეული
ჯო ბაიდენის მიერ დაგეგმილ დემოკრატიის ვირტუალურ სამიტზე საქართველოც არის მიწვეული, ასეთ ქვეყნებს შორის ასევე არიან უკრაინა მოლდოვა და პოლონეთი. აღსანიშნავია, რომ მიწვეულთა შორის, Politico-ს ვერსიით, არ არის თურქეთი, რასაც წინ უძღოდა ამ ქვეყნის უთანხმოება დასავლეთის რიგ ქვეყნებთან. შეგახსენებთ, რეჯეფ თაიფ ერდოღანი 10 ქვეყნის ელჩის პერსონა ნონ გრატად გამოცხადებას აპირებდა, თუმცა საელჩოების მიერ განმარტების გავრცელების შემდეგ „დიპლომატიური კრიზისი“ განიმუხტა. ცნობისთვის, აშშ-ის პრეზიდენტი დემოკრატიის სამიტს გამართავს. მიწვევები უკვე დაეგზავნათ რიგ ქვეყნებს. Foreign Policy სექტემბერში ოფიციალური პირებზე დაყრდნობით იტყობინებოდა, რომ სამიტზე მოსალოდნელია 100-ზე მეტი ლიდერის დასწრება, რომელიც 9 -10 დეკემბერს, ვირტუალურად გაიმართება. „სიაში შედიან გეოგრაფიულად და ეკონომიკურად მრავალფეროვანი ქვეყნები“, - განაცხადა ოფიციალურმა წარმომადგენელმა. მისივე თქმით, ადმინისტრაცია ცდილობს, რაც შეიძლება მეტი ერი შეინარჩუნოს დემოკრატიულ წრეში. სამხრეთ კორეა, იაპონია, კენია, განა, ზამბია, ინდონეზია და ურუგვაი მოწვეულთა შორის არიან. ჯო ბაიდენმა პირობა დადო, რომ მისი მმართველობის პირველი წლის განმავლობაში გამართავდა სამიტს, რათა ავტორიტარული ქვეყნები ჩინეთი და რუსეთი დააბალანსოს. „ჩვენ ვცდილობთ, ჩავატაროთ სამიტი დემოკრატიისთვის, მისი მიზანია დემოკრატიული განახლების სტიმულირება მთელ მსოფლიოში”, - აღნიშნა ადმინისტრაციის მაღალჩინოსანმა უცხოურ მედიასთან. ცოტა ხნის წინ, საქართველოს მთავრობის ადმინისტრაციამ დაადასტურა, რომ დემოკრატიის სამიტზე, რომელსაც ჯო ბაიდენი 9-10 დეკემბერს გამართავს, მიწვეულია საქართველოს პრემიერ-მინისტრი ირაკლი ღარიბაშვილი. მათივე ცნობით, პრემიერი დაესწრება აშშ-ის პრეზიდენტის მიერ ორგანიზებულ სამიტს, რომელიც ვირტუალურ რეჟიმში გაიმართება. სამიტში მონაწილეობას მიიღებენ მთავრობების, სამოქალაქო საზოგადოებებისა და კერძო სექტორის წარმომადგენლები. ის ფოკუსირებული იქნება დემოკრატიის წინაშე მდგარ გამოწვევებსა და შესაძლებლობებზე და პლატფორმას უზრუნველყოფს ლიდერებისთვის, რათა როგორც ინდივიდუალური, ასევე კოლექტიური ვალდებულებები აიღონ დემოკრატიისა და ადამიანის უფლებების დასაცავად.
გერმანია საქართველოს €5.2 მლნ-ს გამოუყოფს
დღეს, საქართველოს ფინანსთა მინისტრმა, ლაშა ხუციშვილმა და გერმანიის ფედერაციული რესპუბლიკის ელჩმა საქართველოში, ჰუბერტ ქნირშმა ხელი მოაწერეს შეთანხმებას საქართველოს მთავრობასა და გერმანიის ფედერაციული რესპუბლიკის მთავრობას შორის ფინანსური თანამშრომლობის შესახებ (2020). ინფორმაცია ფინანსთა სამინისტრომ გაავრცელა. ხელმოწერის ცერემონიის დაწყებამდე სიტყვით გამოსვლისას, მათ საქართველო-გერმანიას შორის თანამშრომლობის მნიშვნელობაზე ისაუბრეს. დღეს ხელმოწერილი დოკუმენტი წარმოადგენს ჩარჩო შეთანხმებას, რომელიც ითვალისწინებს გერმანიის მიერ საქართველოსთვის 5.2 მლნ ევროს ოდენობით დამატებითი გრანტის გამოყოფას პროექტისათვის: „ბიომრავალფეროვნება და მდგრადი ადგილობრივი განვითარება - საქართველო“. პროექტისთვის გამოყოფილი საგრანტო თანხის საერთო ოდენობა შეადგენს 23.7 მლნ ევროს. ფინანსთა მინისტრმა, ლაშა ხუციშვილმა გერმანიის ფედერაციული რესპუბლიკის ელჩს კიდევ ერთხელ მადლობა გადაუხადა იმ მხარდაჭერისთვის, რომელსაც გერმანიის ფედერაციული რესპუბლიკის მთავრობა უწევს ჩვენს ქვეყანას მნიშვნელოვანი პროექტების დაფინანსების, ასევე, ევროპასთან ურთიერთობების გაღრმავების მიმართულებით. მხარეებმა იმედი გამოთქვეს, რომ გერმანიასთან, როგორც საქართველოს განვითარების წამყვან პარტნიორთან, შემდგომი თანამშრომლობა კვლავ ნაყოფიერი იქნება და გერმანიის ფედერაციული რესპუბლიკის მთავრობის მხარდაჭერით დაფინანსებული პროექტები და პროგრამები ქვეყნის მნიშვნელოვანი მიმართულებების განვითარებას მოხმარდება.
ეკატერინე ტიკარაძე „მწვანე საშვის“ ამოქმედებაზე: 40 000 მოქალაქეზე მეტი ბინაზე მკურნალობს და მნიშვნელოვანია, მათი გადაადგილება გაკონტროლდეს
ჯანდაცვის მინისტრის განცხადებით, მწვანე საშვის ამოქმედება მნიშვნელოვანი ინსტრუმენტია, როგორც ვაქცინაციის პროცესის ხელშეწყობისთვის, ასევე მოქალაქეების უსაფრთხოების დაცვის ნაწილში. ამის შესახებ ეკატერინე ტიკარაძემ ამერიკის ელჩთან შეხვედრის შემდეგ განაცხადა. „აშშ-ის ელჩთან ვისაუბრეთ ქვეყანაში არსებულ ეპიდვითარებასთან დაკავშირებით, განვიხილეთ ვაქცინაციის პროცესი და არსებული გამოწვევები. მისგან მოვისმინეთ რეკომენდაციები, თუ როგორ წარიმართა პროცესი აშშ-ში, რა ეტაპები გაიარა მწვანე საშვის ამოქმედებამ, რა რეზისტენტობა იყო, როგორც ბიზნესის ასევე მოქალაქეების მხრიდან, თუ როგორ შეიძლება აქტიურად ვიმუშაოთ იმისათვის, რომ საქართველოშიც შემოღებული იყოს ეს პასპორტი კოვიდპანდემიის მართვის სასარგებლოდ. ჯანდაცვის სამინისტროსთვის მნიშვნელოვანია „მწვანე პასპორტის“ ამოქმედება, ვინაიდან 40 000-ს მოქალაქეზე მეტი მოქალაქე მკურნალობს ბინაზე და რა თქმა უნდა მნიშვნელოვანი არის, რომ მათი გადაადგილება გაკონტროლდეს, რითიც ეს დაიცავს სხვა მოქალაქეების უსაფრთხოებას და ვირუსის კიდევ უფრო გავრცელებას“, - აღნიშნა ეკატერინე ტიკარაძემ. შეხვედრას მინისტრის პირველი მოადგილე თამარ გაბუნია, აშშ ს დაავადებათა კონტროლის ცენტრის რეგიონალური ოფისის დირექტორი ჩარლზ ვიტეკი და USAID-ის მისიის დირექტორი პიტერ ვებლერი ესწრებოდნენ. ბოლო 24 საათში, საქართველოში კორონავირუსით ინფიცირების 5340 ახალი შემთხვევა დაფიქსირდა, გარდაიცვალა კიდევ 62 პაციენტი.
კელი დეგნანი: ყველანი შეწუხებული ვართ. ვფიქრობთ, რა შეიძლება გაკეთდეს ვაქცინაციის მაჩვენებლის გასაზრდელად
ამერიკის შეერთებული შტატების ელჩმა კელი დეგნანმა ჯანდაცვის მინისტრთან შეხვედრის შემდეგ, ვაქცინაციის გააქტიურების მნიშვნელობაზე ისაუბრა. ელჩის თქმით, ნორმალურ ცხოვრებას ვერ დავუბრუნდებით, ვიდრე საქართველოში ვაქცინაციის მაჩვენებელი არ გაიზრდება. ამიტომ, შეხვედრის დროს ისაუბრეს, თუ როგორ შეუძლია შეერთებული შტატების მთავრობას, გააგრძელოს საქართველოს ძალისხმევის მხარდაჭერა პანდემიაზე რეაგირების კუთხით. „მინისტრთან და პირველ მოადგილესთან ძალიან მნიშვნელოვანი შეხვედრა გვქონდა. ჩვენ ყველანი შეწუხებული ვართ საქართველოში COVID19-ის ძალიან მაღალი მაჩვენებლებით და რა თქმა უნდა, ვფიქრობთ იმაზე, თუ რა შეიძლება გაკეთდეს დაავადების შემთხვევათა შესამცირებლად და რაც მთავარია, ვაქცინაციის მაჩვენებლის გასაზრდელად. აქ ორი წლის წინ ჩამოვედი, მაშინ ცოტა რამ თუ იყო COVID19-ზე ცნობილი. ბოლო ორი წლის განმავლობაში ბევრი რამ ვისწავლეთ მის შესახებ და რაც მთავარია, ჩვენ შევიტყეთ რომ, ვაქცინას სიცოცხლის გადარჩენა შეუძლია. ვაქცინაცია არის ერთადერთი გზა, რომ დაიცვათ თქვენი საყვარელი ადამიანები ამ ვირუსისგან. საქართველოში ბევრმა გადაიტანა კოვიდი ან იცნობს ადამიანებს, რომლებმაც მძიმედ გადაიტანეს დაავადება და საავადმყოფოში აღმოჩდნენ ან გარდაიცვალნენ. სამწუხაროდ,10 000-ზე მეტი ქართველია გარდაცვლილი COVID19-ით. ეს სერიოზული დაავადებაა, მაგრამ მეცნიერების დახმარებით, ჩვენ გვაქვს პასუხი ამ გამოწვევაზე, რაც არის ვაქცინაცია. დღეს მინისტრთან განვიხილეთ სხვადასხვა მიდგომა ვაქცინაციის წასახალისებლად, რათა დავიცვათ ჩვენი საყვარელი ადამიანები და საზოგადოება, რათა ისევ დავუბრუნდეთ ნორმალურ ცხოვრებას. ამას კი ვერ გავაკეთებთ, ვიდრე საქართველოში ვაქცინაციის მაჩვენებელი არ გაიზრდება. შეხვედრის დროს ასევე ნაყოფიერი იყო საუბარი იმაზე, თუ როგორ შეუძლია შეერთებული შტატების მთავრობას, გააგრძელოს საქართველოს ძალისხმევის მხარდაჭერა პანდემიაზე რეაგირების კუთხით. ჩვენ ორი წელია, ვმუშაობთ ჯანდაცვის სამინისტროსთან, საქართველოს მთავრობასა და ქართველ ხალხთან, ასევე საქართველოს წითელ ჯვართან, პანდემიის წინააღმდეგ ბრძოლაში დასახმარებლად. რა თქმა უნდა, მზად ვართ დაგეხმაროთ ყველანაირად, რაც შეგვიძლია. განსაკუთრებით მნიშვნელოვანია ხალხისთვის ზუსტი ინფორმაციის მიწოდება იმის შესახებ, თუ რატომ არის ეს ვაქცინა უსაფრთხო და მნიშვნელოვანი მათთვის და მათი საყვარელი ადამიანებისთვის. იმედია, რომ შევძლებთ დახმარებას ამ მნიშვნელოვან დროს. რაც შეეხება მწვანე პასპორტის ინიციატივას, ის ძალიან წარმატებულია ამერიკის ბევრ შტატში, საფრანგეთში, უკრაინასა და რუმინეთში. ის დაეხმარა ადამიანებს, გააცნობიერონ, რომ ვაქცინაცია გვაძლევს საშუალებას, დავუბრუნდეთ ნორმალურ ყოველდღიურ ცხოვრებას. ეს ასევე ხელსაყრელია ეკონომიკის აღდგენისთის, რადგან ბიზნესს ფუნქციონირების საშუალებას აძლევს. ასე რომ, მწვანე პასპორტს ნამდვილად შეუძლია, ითამაშოს ძალიან მნიშვნელოვანი როლი ამ ვითარებაში და ის ძალიან ეფექტური აღმოჩნდა სხვა ქვეყნებში. იმედია, საქართველოშიც ასე იქნება“, - აღნიშნა კელი დეგნანმა შეხვედრის დასრულების შემდეგ.
კელი დეგნანი: „მწვანე პასპორტის“ ინიციატივა ძალიან წარმატებულია ამერიკის ბევრ შტატში. იმედია, საქართველოშიც ასე იქნება
მწვანე საშვების ამოქმედების საკითხი ჯანდაცვის მინისტრთან განიხილა დღეს ამერიკის ელჩმა. კელი დეგნანმა აღნიშნა, რომ მწვანე პასპორტის ინიციატივა ძალიან წარმატებულია ამერიკის ბევრ შტატში, საფრანგეთში, უკრაინასა და რუმინეთში. „ის დაეხმარა ადამიანებს, გააცნობიერონ, რომ ვაქცინაცია გვაძლევს საშუალებას, დავუბრუნდეთ ნორმალურ ყოველდღიურ ცხოვრებას. ეს ასევე ხელსაყრელია ეკონომიკის აღდგენისთის, რადგან ბიზნესს ფუნქციონირების საშუალებას აძლევს. ასე რომ, მწვანე პასპორტს ნამდვილად შეუძლია, ითამაშოს ძალიან მნიშვნელოვანი როლი ამ ვითარებაში და ის ძალიან ეფექტური აღმოჩნდა სხვა ქვეყნებში. იმედია საქართველოშიც ასე იქნება“, - აღნიშნა კელი დეგნანმა შეხვედრის დასრულების შემდეგ.
აშშ-ის ელჩმა ეპიდსიტუაცია და მწვანე საშვების ამოქმედების საკითხი ჯანდაცვის მინისტრთან განიხილა
ჯანდაცვის მინისტრი ეკატერინე ტიკარაძე ამერიკის შეერთებული შტატების ელჩს კელი დეგნანს შეხვდა. შეხვედრაზე მხარეებმა ქვეყანაში არსებული ეპიდემიოლოგიური მდგომარეობა და საპასუხო ღონისძიებები განიხილეს. ინფორმაციას ჯანდაცვის სამინისტრო ავრცელებს. შეხვედრის ერთ-ერთი მთავარი თემა ვაქცინაციის პროგრამის გაფართოება, ამ კუთხით ბიზნესის აქტივაცია და ასევე მწვანე საშვების საკითხი იყო. ჯანდაცვის მინისტრმა აღნიშნა, რომ მწვანე საშვის ამოქმედება მნიშვნელოვანი ინსტრუმენტია, როგორც ვაქცინაციის პროცესის ხელშეწყობისთვის, ასევე მოქალაქეების უსაფრთხოების დაცვის ნაწილში. „აშშ-ის ელჩთან ვისაუბრეთ ქვეყანაში არსებულ ეპიდვითარებასთან დაკავშირებით, განვიხილეთ ვაქცინაციის პროცესი და არსებული გამოწვევები. მისგან მოვისმინეთ რეკომენდაციები, თუ როგორ წარიმართა პროცესი აშშ-ში, რა ეტაპები გაიარა მწვანე საშვის ამოქმედებამ, რა რეზისტენტობა იყო, როგორც ბიზნესის ასევე მოქალაქეების მხრიდან, თუ როგორ შეიძლება აქტიურად ვიმუშაოთ იმისათვის, რომ საქართველოშიც შემოღებული იყოს ეს პასპორტი კოვიდპანდემიის მართვის სასარგებლოდ. ჯანდაცვის სამინისტროსთვის მნიშვნელოვანია „მწვანე პასპორტის“ ამოქმედება, ვინაიდან 40 000 მოქალაქეზე მეტი მკურნალობს ბინაზე და რა თქმა უნდა მნიშვნელოვანი არის, რომ მათი გადაადგილება გაკონტროლდეს, რითიც ეს დაიცავს სხვა მოქალაქეების უსაფრთხოებას და ვირუსის კიდევ უფრო გავრცელებას“, - აღნიშნა ეკატერინე ტიკარაძემ. შეხვედრას მინისტრის პირველი მოადგილე თამარ გაბუნია, აშშ ს დაავადებათა კონტროლის ცენტრის რეგიონალური ოფისის დირექტორი ჩარლზ ვიტეკი და USAID-ის მისიის დირექტორი პიტერ ვებლერი ესწრებოდნენ.
საქართველოში სრულად ვაქცინირებულია 33.2%
4 ნოემბერს 4 063 ადამიანი აიცრა. 5 ნოემბრის მონაცემებით სულ ჩატარებულია 1 995 150 აცრა სულ მცირე 1 დოზით ვაქცინირებულია 1 044 096 ადამიანი - მოზრდილი მოსახლეობის 36.7 %. სრულად ვაქცინირებულია 948 507 ადამიანი - მოზრდილი მოსახლეობის 33.2%. ვაქცინაციის მარათონი საქართველოში 15 ოქტომბრიდან დაიწყო მას შემდეგ, რაც სექტემბრის შუა რიცხვებში აცრების რაოდენობამ მკვეთრად იკლო, როცა მანამდე დღეში თითქმის 30 000 ადამიანი იკეთებდა ვაქცინას. ბოლო 24 საათში, საქართველოში COVID19-ით ინფიცირების 5206 ახალი შემთხვევა დაფიქსირდა, გარდაიცვალა კიდევ 53 პაციენტი. საქართველო ამ დროისთვის „მწვანე პასპორტის“ შემოღების საკითხს განიხილავს.
კახა კუჭავა: ელენე ხოშტარია უბრალოდ მოვინახულე
"ელენე ხოშტარია უბრალოდ მოვინახულე, მაინტერესებდა, ჰქონდა თუ არა ყველანაირი პირობა", - ამის შესახებ საქართველოს პარლამენტის თავმჯდომარემ კახა კუჭავამ ჟურნალისტებთან განცხადა. როგორც კუჭავამ შეხვედრის დასრულების შემდეგ განაცხადა, პარლამენტში მუშაობს ექიმი, რომლისთვის მიმართვა ხოშტარიას ნებისმიერ დროს შეეძლება და თავად ის, როგორც პარლამენტის თავმჯდომარე, ასევე იქნება კავშირზე. „უბრალოდ მოვინახულე, მაინტერესებდ,ა ჰქონდა თუ არა ყველანაირი პირობა. მინდა ყველამ იცოდეს, რომ პარლამენტში მთელი დღის განმავლობაში ექიმი მუშაობს და თუ საჭირო იქნება, გამოყენებული იქნება მისი მომსახურებაც. უბრალოდ მაინტერესებდა, თუ რამე პირობები აკლდა. ის ყველაფრით არის კმაყოფილი და ხაზზე ვიქნები, თუ საჭირო იქნება“,- განაცხადა კახა კუჭავამ.
სალხინოს მონასტრიდან განკვეთილი რამდენიმე სასულიერო პირი პოლიციის განყოფილებაშია გადაყვანილი
ჭყონდიდის ეპარქიაში მიმდინარე დაპირისპირებაში მონაწილე ორივე მხარის წარმომადგენლები და ინციდენტში მონაწილე პირები, გამოკითხვის მიზნით პოლიციის განყოფილებაში არიან გადაყვანილი. როგორც ცნობილია, ინციდენტის დროს დაზიანდა საპატრიარქოს კუთვნილი ტექნიკა - კერძოდ ვიდეოკამერა, აღნიშნულ ფაქტთან დაკავშირებით დაწყებულია გამოძიება სისხლის სამართლის კოდექსის 187-ე მუხლით, რაც სხვისი ნივთის დაზიანებას გულისხმობს. ცნობისათვის, ჭყონდიდის ეპარქიიდან განკვეთილ სასულიერო პირებს მონასტერში ყოფნის ვადა გუშინ ამოეწურათ.
