ძებნის რეზულტატი:
იენს სტოლტენბერგი: უკრაინამ ფაქტობრივად, შავი ზღვის დასავლეთ ნაწილიდან რუსეთის ფლოტის უკან დახევა შეძლო
NATO-ს გენერალური მდივანი, იენს სტოლტენბერგი უკრაინის შეიარაღებული ძალების მიერ შავ ზღვაში რუსეთის სადესანტო ხომალდის ჩაძირვის ფაქტთან დაკავშირებით აცხადებს, რომ უკრაინამ რუსეთის ფლოტისთვის მნიშვნელოვანი ზიანის მიყენება შეძლო. „მათ, ფაქტობრივად, შავი ზღვის დასავლეთ ნაწილიდან ფლოტის უკან დახევა შეძლეს და ეს დიდი მიღწევა და დიდი გამარჯვებაა,“ - განაცხადა იენს სტოლტენბერგმა. გენერალურმა მდივანმა აღნიშნა, რომ გასულ წელს შავი ზღვა რუსული ხომალდებისთვის სახიფათო გახდა და უკრაინის შეიარაღებული ძალების სამხედრო შესაძლებლობებთან დაკავშირებით მოკავშირეების ოპტიმიზმს უკანასკნელი წარმატებაც ზრდის. „ჩვენ ყველანი იმედგაცრუებულები ვართ, რომ გასული წლის კონტრშეტევა უფრო წარმატებული არ იყო, მაგრამ უნდა გვახსოვდეს, რომ ფრონტის ხაზის უმოძრაობის მიუხედავად, უკრაინამ მის მიღმა შეტევები განახორციელა. ხმელეთზე მნიშვნელოვანი ობიექტები გაანადგურა, მათ შორის აეროდრომებზე რუსული თვითმფრინავები, ასევე, ზღვაში რუსული ფლოტის განადგურება განაგრძო,“ - განაცხადა NATO-ს გენერალურმა მდივანმა.
გონიო-აფსაროსის ციხის ტერიტორიაზე რომაული ყაზარმის ანალოგი აშენდა
გონიო-აფსაროსის ციხის ტერიტორიაზე რომაული ყაზარმის ანალოგის მშენებლობა დასრულდა. აჭარის განათლების, კულტურისა და სპორტის სამინისტროს ცნობით, ეს იქნება ახალი სამუზეუმო სივრცე, სადაც გონიოს ციხის ვიზიტორებს შესაძლებლობა ექნებათ, „გაცოცხლებული" რომაელი ჯარისკაცების ყოფა-ცხოვრება ნახონ. შენობაში განთავსდება ჯარების მეთაურის ოთახი, ჯარისკაცების საძინებელი, იარაღის შესანახი ოთახი, რომაული სამზარეულო და სხვა დამხმარე სათავსოები. პარალელურად მიმდინარეობს გონიო-აფსაროსის სამუზეუმო სივრცის განახლების და პეტრას ციხეზე ახალი სამუზეუმო სივრცის მოწყობის სამუშაო, სადაც განთავსებული იქნება გონიოსა და პეტრას ციხეზე აღმოჩენილი არტეფაქტები. სამუშაო მიმდინარე წლის ზაფხულში დასრულდება.
მსოფლიოში მეთანის დონეზე მონაცემებს სატელიტური პროექტი შეაგროვებს
ტექნოლოგიური გიგანტი Google შეუერთდა სატელიტურ პროექტს, რომელიც მთელ მსოფლიოში მეთანის დონის შესახებ მონაცემებს შეაგროვებს. პროექტი მარტში დაიწყება. მეცნიერები მიიჩნევენ, რომ მეთანი გლობალური დათბობის მთავარი „კონტრუბუტორია“, რადგან სითბოს ინარჩუნებს. მეთანის დიდი წილი მეურნეობისა და ნარჩენების განადგურების შედეგად იწარმოება, მაგრამ Google-ის პროექტი ნავთობისა და გაზის ქარხნებში მეთანის ემისიებზე იქნება ფოკუსირებული. ფირმები, რომლებიც ნავთობს და გაზს იღებენ, რეგულარულად წვავენ მეთანს. თანამგზავრების მიერ დაფიქსირებული მონაცემები, ტექნოლოგიური გიგანტის ხელოვნური ინტელექტის ინსტრუმენტებით დამუშავდება და მეთანის რუკის შესაქმნელად გამოიყენება, რომელიც მიზნად ისახავს მეთანის გაჟონვის იდენტიფიცირებას ნავთობისა და გაზის ინფრასტრუქტურაზე, მთელ მსოფლიოში. როგორც Google-მა განაცხადა, კომპანიაში იმედოვნებენ, რომ მისი პროექტი „არსებულ ინსტრუმენტებს შორის ხარვეზებს შეავსებს.“ როგორც BBC წერს, მიუხედავად სხვადასხვა მცდელობისა, მეთანის დონე შემაშფოთებლად მაღალი რჩება. ნასა ამბობს, რომ ბოლო 200 წლის განმავლობაში მეთანის დონე გაორმაგდა და რომ მისი 60% ადამიანის აქტივობით არის შექმნილი. ამ პროცესში მთავარი წვლილი შეაქვს პირუტყვს: კონკრეტულად - ძროხებს. 2020 წელს აშშ-ის გარემოს დაცვის სააგენტომ გამოაქვეყნა მოხსენება, რომელშიც ნათქვამია, რომ ერთ ძროხას ყოველწლიურად, 154-264 ფუნტი მეთანის გაზის წარმოება შეუძლია.
ლარი ისევ გამყარდა
ეროვნული ბანკის მონაცემებით, დღევანდელი ვაჭრობის შედეგად 1 აშშ დოლარის ღირებულება 2.6483 ლარი გახდა. კურსი, რომელიც დღეს მოქმედებდა, 2.6517 ლარი იყო. რაც შეეხება ევროს, მისი კურსი 2.8339 ლარია. დღეს მოქმედი კურსი 2.8569 ლარს შეადგენდა. დღევანდელი ვაჭრობის შედეგად მიღებული კურსები ძალაში ხვალ შევა. მეორე დღეა, ლარი დოლართან და ევროსთან მყარდება
„არ უნდა დავტოვოთ სივრცე არასწორი გათვლებისთვის“ - სტოლტენბერგის გზავნილი დონალდ ტრამპს
NATO-ს გენერალური მდივანის კიდევ ერთ კომენტარს აკეთებს აშშ-ის ყოფილი პრეზიდენტის სადავო განცხადებაზე, რომელიც ბოლო რამდენიმე დღეს, საერთაშორისო აქტირების განხილვის თემად იქცა. „NATO-მ ალიანსზე თავდასხმის აღკვეთა 75 წლის განმავლობაში შეძლო. NATO-ს იდეა და აქცენტი ომის თავიდან აცილებაა. ნებისმიერი წინადადება, რომ ჩვენ ერთმანეთს არ დავიცავთ, ჩვენს უსაფრთხოებას ძირს უთხრის,“ - აღნიშნა გენერალურმა მდივანმა, როდესაც ჰკითხეს BBC-მ შემდეგი შეკითხვა დაუსვა: თქვენ უკვე გაავრცელეთ განცხადება, რომელშიც ნათქვამია, რომ ძირს უთხრიან NATO-ს უსაფრთხოებას და ჯარისკაცებს საფრთხეში აყენებენ. შეგიძლიათ, განმარტოთ, რას გულისხმობთ ამაში? და იზიარებთ პრეზიდენტ ბაიდენის მოსაზრებას, რომ დონალდ ტრამპის განცხადებები სულელური და საშიში იყო? ცალკე, ხარჯებთან დაკავშირებით, თქვენ ხაზი გაუსვით NATO-ს ხარჯების ზრდას, ზრდას, იმ მოლოდინით, რომ 18 ქვეყანა დააკმაყოფილებს 2%-იან მიზანს, რომელიც თავდაცვაზე უნდა დაიხარჯოს. რას იტყვით, არის თუ არა ეს მუქარა დონალდ ტრამპისგან? თუ ეს არის ვლადიმერ პუტინის მუქარა, რა იყო ამის მთავარი მოტივატორი? იენს სტოლტენბერგი: 75 წლის განმავლობაში, NATO ნებისმიერი მოკავშირის წინააღმდეგ სამხედრო თავდასხმის აცილებას ახერხებდა. ჩვენ ეს გავაკეთეთ, რადგან NATO-ს ყველა მოკავშირისგან აბსოლუტურად მკაფიოდ იყო ნათქვამი, რომ ჩვენ ჩვენს მოკავშირეებს ვიცავთ. NATO-ს მთელი იდეაც ხომ ის არის, რომ თავდასხმა ერთ მოკავშირეზე გამოიწვევს პასუხს მთელი ალიანსისგან. NATO-ს მიზანის სწორედ ომის თავიდან აცილებაა, მშვიდობის შენარჩუნება, მოკავშირეებზე თავდასხმის აღკვეთა და ათწლეულებია, ჩვენ ამას წარმატებით ვაკეთებთ. ამდენად, ნებისმიერი წინადადება იმის შესახებ, რომ ჩვენ ერთმანეთის მხარდასაჭერა არ ვართ; რომ არ ვაპირებთ ერთმანეთის დაცვას, ძირს უთხრის ყველა ჩვენგანის უსაფრთხოებას და ზრდის რისკებს. ამიტომ, ძალიან მნიშვნელოვანია, რომ ჩვენ მოქმედებით, მაგრამ ასევე სიტყვებით, მკაფიოდ დავამტკიცოთ, რომ ჩვენ მხარს ვუჭერთ NATO-ს ვალდებულებას, დავიცვათ და დავიცვათ ყველა მოკავშირე. კარგი ამბავი ის არის, რომ სწორედ ამას აკეთებენ NATO-ს მოკავშირეები. NATO-ს აქვს შესაძლებლობებ იდა ჩვენ ვერ ვხედავთ რაიმე გარდაუვალ საფრთხეს რომელიმე მოკავშირის წინააღმდეგ. იმის გამო, რომ 2014 წლიდან ჩვენ მნიშვნელოვნად გავაძლიერეთ ჩვენი კოლექტიური დაცვა. _BBC-მ სტოლტენბერგს დამაზუსტებელი შეკითხვა დაუსვა: რა არის თქვენი გზავნილი კონკრეტულად დონალდ ტრამპისთვის? სტოლტენბერგი: ჩვენ არ უნდა შევლახოთ NATO-ს შეკავებისადმი სანდოობა. და ეს ეხება იმ შესაძლებლობებსაც, რომლებშიც ჩვენ ინვესტირებას ვახორციელებთ. ჩვენ არ უნდა დავტოვოთ სივრცე არასწორი გათვლებისთვის ან გაუგებრებისთვის მოსკოვში, ჩვენი მზადყოფნისა და ჩვენი ვალდებულების შესახებ. ამის მიზეზი კი არა კონფლიქტის პროვოცირება, არამედ, კონფლიქტის თავიდან აცილებაა, როგორც ამას NATO წარმატებით აკეთებდა 75 წლის განმავლობაში. NATO-ში აშშ-ის ელჩმა ტრამპის განცხადებას უპასუხისმგებლო უწოდა _ვაშინგტონში თქვენი ვიზიტის დროს თქვენ თქვით, რომ გქონდათ საშუალება, გესაუბროთ რესპუბლიკელ ლიდერებთან, კონგრესის ორივე პალატაში და ასევე რესპუბლიკელებთან აფილირებულ ანალიტიკურ ცენტრებთან. და იქ თქვენი მოლაპარაკებების ფონზე, იყო თუ არა თქვენთვის მოულოდნელი გასულ კვირას ტრამპის განცხადება? ან შეესაბამება იმას, რაც გსმენიათ ვაშინგტონში ყოფნის დროს? მიმართა ჟურნალისტმა გენერალურ მდივანს. იენს სტოლტენბერგი: მე შევხვდი ბევრ რესპუბლიკელს და ორივე მხარის წარმომადგენელეს როგორც პალატაში, ასევე სენატში, ყველა მათგანის გზავნილი და ფართო შეთანხმება იყო ძლიერი მხარდაჭერა NATO-სადმი და ძლიერი მხარდაჭერა უკრაინისადმი, ამიტომ მივესალმები აშშ-ის სენატის გადაწყვეტილებას უკრაინის დახმარების პაკეტის შესახებ და იმედი მაქვს, რომ პალატა შეთანხმდება, ან იპოვიან წინსვლის გზას, რათა უკრაინამ გააგრძელოს არსებითი სამხედრო მხარდაჭერის მიღება. ვფიქრობ, ჩვენ უნდა გავაცნობიეროთ, რომ ძლიერი NATO მნიშვნელოვანია ევროპისთვის, მაგრამ ძლიერი NATO ასევე კარგია შეერთებული შტატებისთვის. იმის გამო, რომ NATO-ს მეშვეობით, შეერთებულ შტატებს აქვს ის, რაც სხვა [დიდ ძალას არ აქვს]. და ეს არის 30-ზე მეტი მეგობარი და მოკავშირე NATO-ში. და ეს შეერთებულ შტატებს უფრო ძლიერს და უსაფრთხოს ხდის. შეერთებული შტატების ეროვნული უსაფრთხოების ინტერესებშია ძლიერი NATO-ს შენარჩუნება. და ჩვენ უნდა გავითვალისწინოთ შემდეგი: კრიტიკა, რომელიც გვესმის, პირველ რიგში NATO არ ეხება. საუბარია იმაზე, რომ მოკავშირეები არ ხარჯავენ საკმარისს NATO-ზე. და ეს არის პუნქტი და გზავნილი, რომელიც გადმოცემულია შეერთებული შტატების ადმინისტრაციების მიერ, რომ ევროპელმა მოკავშირეებმა და კანადამ მეტი უნდა დახარჯონ, რადგან ჩვენ არ გვინახავს ალიანსში ტვირთის სამართლიანად განაწილება. კარგი ამბავი ის არის, რომ სწორედ ამას აკეთებენ ახლა მოკავშირეები. გასულ წელს თავდაცვის ხარჯების რეკორდულად მაღალი ზრდით, ახლა 18 მოკავშირე 2% ან მეტს ხარჯავს. უფრო და უფრო მეტი მოკავშირე უახლოვდება 2%-ს და გვპირდებიან, რომ იქ იქნებიან ძალიან მალე. და ის ფაქტი, რომ ახლა ჩვენ ვხედავთ რეკორდულ მაღალ ხარჯებს ევროპაში, უბრალოდ ხაზს უსვამს იმას, რომ ამ გზავნილმა გავლენა მოახდინა. ევროპელი მოკავშირეები და კანადა გაძლიერდნენ და მე მათი იმედი მაქვს, რომ გააგრძელებენ ამას. ძლიერი NATO ასევე მნიშვნელოვანია შეერთებული შტატებისთვის, რადგან ის აძლიერებს შეერთებულ შტატებს. შეერთებულ შტატებს არასოდეს უბრძოლია ომი მარტო. ისინი ყოველთვის იბრძვიან მოკავშირეებთან და ეს აძლიერებს შეერთებულ შტატებს. კორეის ომიდან ავღანეთამდე, NATO-ს მოკავშირეები ამერიკელ ჯარისკაცებთან ერთად იბრძოდნენ. და ჩვენ უნდა გვახსოვდეს, რომ ერთადერთი შემთხვევა, როდესაც ჩვენ გამოვიყენეთ მეხუთე მუხლი, იყო შეერთებულ შტატებთან დაკავშირებით - ავღანეთში - 9/11 თავდასხმის შემდეგ. და ასობით ათასი კანადელი და ევროპელი ჯარისკაცი მსახურობდა ავღანეთში შეერთებული შტატების დასაცავად და ბევრმა მათგანმა გადაიხადა საბოლოო ფასი. ასე რომ, ეს არის მიზეზი იმისა, რომ შეერთებულ შტატებში არის NATO-ს ძლიერი მხარდაჭერა. იმიტომ, რომ მათ, რა თქმა უნდა, ისე ესმით, როგორც ევროპელებს ესმით, რომ ჩვენ ერთად უფრო ძლიერები ვართ. და რა თქმა უნდა, რაც უფრო მეტად აშფოთებთ მათ ჩინეთი, მით უფრო მნიშვნელოვანია ძლიერი NATO-ს შენარჩუნება, რადგან შეერთებული შტატები მსოფლიო მშპ-ს 25%-ს წარმოადგენს.NATO-ს მოკავშირეებთან ერთად ჩვენ წარმოვადგენთ მსოფლიო ეკონომიკის 50%-ს და მსოფლიო სამხედრო ძალის 50%-ს.
ტოივო კლაარი თბილისშია
საქართველოს სახელმწიფო უსაფრთხოების სამსახურის უფროსი გრიგოლ ლილუაშვილი სამხრეთ კავკასიასა და საქართველოში კრიზისის საკითხებში ევროკავშირის სპეციალურ წარმომადგენელს და ჟენევის საერთაშირისო დისკუსიების თანათავმჯდომარეს ტოივო კლაარს შეხვდა. სუს-ის მიერ გავრცელებული ინფორმაციით, მხარეებმა განიხილეს ოკუპირებულ ტერიტორიებსა და საოკუპაციო ხაზის გასწვრივ არსებული ვითარება და უსაფრთხოების სფეროში არსებულ გამოწვევები. ყურადღება გამახვილდა უკანონო ე.წ. ბორდერიზაციის პროცესზე. „საუბარი შეეხო რეგიონში წარმოქმნილ ურთულეს გამოწვევებს და მათი შესაძლო ზეგავლენის პერსპექტივებს, როგორც გლობალური, ასევე რეგიონული უსაფრთხოების კონტექსტში. განსაკუთრებული ყურადღება დაეთმო ოკუპირებულ ტერიტორიებზე უკანონო პატიმრობაში მყოფი საქართველოს მოქალაქეების უპირობოდ გათავისუფლების საკითხს. ხაზგასმით აღინიშნა ჟენევის საერთაშორისო დისკუსიების თანათავმჯდომარეების ოკუპირებულ აფხაზეთსა და ცხინვალის რეგიონში მიმდინარე პროცესებში აქტიური ჩართულობის კუთხით გაწეული ძალისხმევა. ასევე, აღინიშნა ევროკავშირის სადამკვირვებლო მისიის (EUMM) განსაკუთრებული როლი საოკუპაციო ხაზის გასწვრივ სტაბილურობის უზრუნველყოფის კონტექსტში. ყურადღება გამახვილდა მანდატის თანახმად, მისიის ოკუპირებულ ტერიტორიებზე შეუზღუდავი წვდომის გადაუდებელ საჭიროებაზე. შეხვედრაზე ხაზი გაესვა მოლაპარაკებების არსებული ფორმატების, კერძოდ, ჟენევის საერთაშორისო დისკუსიებისა და ინციდენტების პრევენციისა და მათზე რეაგირების მექანიზმის შეხვედრების პოტენციალის ეფექტურად გამოყენებისა და გაძლიერების აუცილებლობას,“ - ნათქვამია სუს-ის მიერ გავრცელებულ ინფორმაციაში. მანამდე სამხრეთ კავკასიასა და საქართველოში კრიზისების საკითხებში ევროკავშირის სპეციალური წარმომადგენელი საგარეო ურთიერთობათა კომიტეტის თავმჯდომარე ნიკოლოზ სამხარაძეს შეხვდა. პარლამენტის ცნობით, „მხარეებმა საქართველოს უსაფრთხოების საკითხები და სამხრეთ კავკასიის რეგიონში მიმდინარე პროცესები განიხილეს. „შეხვედრისას ხაზი გაესვა სომხეთსა და აზერბაიჯანს შორის ურთიერთობების დარეგულირების პროცესში საქართველოს მნიშვნელოვან როლს. ნიკოლოზ სამხარაძემ ევროკავშირის სპეციალურ წარმომადგენელთან ოკუპირებულ რეგიონებში არსებული მძიმე ვითარება და რუსეთის ფედერაციის უკანონო ქმედებები განიხილა, მათ შორის ბოლო დროს, სოხუმში მიმდინარე მოვლენები და დე ფაქტო ხელისუფლების გადაწყვეტილება, არ დაეშვათ ევროკავშირის სპეცწარმომადგენელი აფხაზეთში. შეხვედრის დასასრულს, ნიკოლოზ სამხარაძემ და ევროპელმა დიპლომატმა მოკლედ მიმოიხილეს ქვეყნის შიდაპოლიტიკური ვითარება და წინასაარჩევნო პროცესის გავლენა ოკუპირებულ ტერიტორიებთან მიმართებით.“
კანადა უკრაინის თავდაცვისთვის 44 მილიონ დოლარს გამოყოფს
კანადა უკრაინის დასაცავად 60 მილიონ კანადურ დოლარს (დაახლოებით 44 მილიონი აშშ დოლარი) გამოყოფს, განაცხადა კანადის ეროვნული თავდაცვის მინისტრმა ბილ ბლერმა რამშტეინის შეხვედრაზე. ბლერი აცხადებს, რომ კანადა 60 მილიონი დოლარის ახალ კონტრიბუციას შეიტანს უკრაინის თავდაცვის საკონტაქტო ჯგუფის (UDCG) საჰაერო ძალების კოალიციაში. კანადა უკრაინას სამხედრო და ფინანსურ დახმარებას სრულმასშტაბიანი შეჭრის დაწყებიდან უწევს.
თავდაცვის ახალმა მინისტრმა უკრაინის თავდაცვის საკონტაქტო ჯგუფის შეხვედრაში მიიღო მონაწილეობა
საქართველოს თავდაცვის მინისტრმა უკრაინის თავდაცვის საკონტაქტო ჯგუფის შეხვედრაში მიიღო მონაწილეობა. „ე.წ. რამშტანის ჯგუფის მე-19 შეხვედრას უკრაინის მხარდამჭერი ქვეყნების თავდაცვის უწყების ხელმძღვანელი პირები და უმაღლესი რანგის ოფიციალური პირები დაესწრნენ. საერთაშორისო ჯგუფის პირველი შეხვედრა 2022 წლის აპრილში გაიმართა,“ წერს თავდაცვის სამინისტრო გავრცელებულ ინფორმაციაში. კანადა უკრაინის თავდაცვისთვის 44 მილიონ დოლარს გამოყოფს
უკრაინაში ომის გათვალისწინებით, შვეიცარია თავდაცვისთვის დამატებით, $22,58 მილიარდს დახარჯავს
ნეიტრალური შვეიცარიის მთავრობამ ოთხშაბათს განაცხადა, რომ მომდევნო წლების განმავლობაში სამხედრო ხარჯებს გაზრდის, რაც გახდება ბოლო ევროპული ქვეყანა, რომელმაც ასეთი ნაბიჯი უკრაინაში რუსეთის სრულმასშტაბიანი შეჭრის შემდეგ გადადგა. ამის შესახებ The Guardian იუწყება. პრეზიდენტმა ვიოლა ამჰერდმა განაცხადა, რომ დაახლოებით 20 მილიარდი შვეიცარიული ფრანკი - 22,58 მილიარდი აშშ დოლარი - დამატებითი დაფინანსება გამოიყოფა თავდაცვისთვის 2035 წლამდე. „უსაფრთხოების პოლიტიკის ვითარება აშკარად რთულია, თუ გავითვალისწინებთ ამჟამინდელ არასტაბილურობას, ომს ევროპის კონტინენტზე, შეიარაღებული კონფლიქტები ახლო აღმოსავლეთში და სხვა ცხელ წერტილებში მსოფლიოში,” - განაცხადა მან ოთხშაბათს გამართულ პრესკონფერენციაზე. ამჰერდმა, რომელიც ასევე თავდაცვის მინისტრია, აღნიშნა, რომ „ახლა ამდენი კრიზისია“ და გეგმა ნაწილობრივ ითვალისწინებს უკრაინაში რუსეთის მიერ წარმოებული ომიდან მიღებული გაკვეთილებს.
კატარის კომპანიებმა შუა დერეფნის განვითარებაში ინვესტირება უნდა განიხილონ - თოყაევი
კატარის კომპანიებს შეუძლიათ, ისარგებლონ ინვესტიციებით ტრანსკასპიური საერთაშორისო სატრანსპორტო მარშრუტის (TITR, შუა დერეფნის) განვითარებაში, განაცხადა ყაზახეთის პრეზიდენტმა ყასიმ-ჟომართ თოყაევმა დოჰაში, ყაზახეთ-კატარული საინვესტიციო მრგვალი მაგიდის დროს. „ჩვენი ძირითადი ინფრასტრუქტურული პროექტები მოიცავს აქტაუს პორტს, კასპიის ზღვის ერთ-ერთ უდიდეს კერას, ასტანასა და ალმათის საერთაშორისო აეროპორტებს, მრავალ დინამიკურად განვითარებად სარკინიგზო და საგზაო ქსელებს, ასევე, მაღალი ხარისხის ლოგისტიკური კვანძებს. ჩვენ დიდი იმედი გვაქვს ტრანსკასპიური საერთაშორისო სატრანსპორტო მარშრუტის განვითარების. გვჯერა, რომ კატარის კომპანიებსა და ფინანსურ ინსტიტუტებს შეუძლიათ, მიიღონ მნიშვნელოვანი სარგებელი ამ სფეროში ბიზნესისა და საინვესტიციო შესაძლებლობების გამოკვლევით. დღეს ჩვენ ვაფორმებთ სხვადასხვა კომერციულ დოკუმენტს, რომელთა საერთო ღირებულებაა 18 მილიარდი აშშ დოლარი. ეს ასახავს ჩვენს ვალდებულებას საიმისოდ, რომ განვავითაროთ ეკონომიკური თანამშრომლობა,“ - განაცხადა თოყაევმა. როგორც აზერბაიჯანული მედია წერს, კატარის პრემიერ-მინისტრთან და საგარეო საქმეთა მინისტრთან შეიხ მუჰამედ ბინ აბდულრაჰმან ალ-თანთან შეხვედრისას თოყაევმა განაცხადა, რომ პრიორიტეტი ენიჭება ყურის ძირითად ბაზრებზე წვდომის გაფართოებასა და ახალი სატრანზიტო მარშრუტების შესწავლას. ამასთან, თოყაევმა მოუწოდა კატარის კომპანიებს, ითანამშრომლონ ყაზახეთში მსხვილი ინფრასტრუქტურული პროექტების განვითარებაში. ყაზახეთი მოუწოდებს ნიდერლანდებსა და ბელგიას, ერთობლივად განავითარონ შუა დერეფანი ყაზახეთმა ევროპელ ინვესტორებს პორტებისა და აეროპორტების მართვა შესთავაზა
სომხეთის ეკონომიკის მინისტრი გადადგა, მისი მოადგილე კორუფციის ბრალდებით ორი კვირის წინ დააკავეს
სომხეთში თანამდებობიდან გადადგა ეკონომიკის მინისტრი, ვაჰან ქერობიანი მას შემდეგ, რაც მისი მოადგილე და სხვა პირები ორი კვირის წინ, კორუფციის ბრალდებებით დააპატიმრეს. ქერობიანმა თქვა, რომ თუ ბრალდებები დადასტურდება, პასუხისმგებლობას ისიც იკისრებს, თუმცა მის გადადგომას აღნიშული პირების დაკავებას არ უკავშირებს. ქერობიანმა თავისი ნაბიჯი დეტალების დაკონკრეტების გარეშე, პრემიერ-მინისტრ ნიკოლ ფაშინიანთან უთანხმოებას დაუკავშირა. მან ეკონომიკის მინისტრის პოსტზე სამ წელიწადზე მეტი ხნის განმავლობაში იმუშავა. საგამოძიებო კომიტეტმა 14 თებერვალს გამოაცხადა, რომ გამოძიებას განაგრძობს და შესაძლოა, კორუფციაში ბრალდებულთა წრე გაფართოვდეს.
დეკანოზი გიორგი მამალაძე თავისუფალია - თორნიკე მამალაძე
დეკანოზი გიორგი მამალაძე თავისუფალია - ინფორმაციას მისი ძმა თორნიკე მამალაძე ავრცელებს. თორნიკე მამალაძე „ტვპირველთან“ პირდაპირი ჩართვის დროს ამბობს, რომ მისთვის უცნობია, რის საფუძველზე გაათავისუფლეს მისი ძმა, თუმცა დანამდვილებით იცის, რომ დეკანოზმა საპყრობილე უკვე დატოვა. „ორი ან სამი საათის წინ მაცნობა ამის შესახებ,“ ამბობს თორნიკე მამალაძე. დეკანოზ გიორგი მამალაძის ადვოკატის, გიორგი ფანცულაიას განცხადებით, დეკანოზი ე.წ. უდოს კომისიის (პირობით ვადამდე გათავისუფლების) საშუალებით გათავისუფლდა. მამალაძეს, დაახლოებით 1 წელი და 9 თქვე ჰქონდა დარჩენილი პატიმრობის მოხდამდე. ცნობისთვის, დეკანოზი გიორგი მამალაძე მკვლელობის მომზადების ბრალდებით თბილისის აეროპორტში 2017 წლის 10 თებერვალს დააკავეს. ის სასამართლომ შურისძიების მოტივით ციანიდის გამოყენებით შორენა თეთრუაშვილის მკვლელობის მომზადებაში ცნო დამნაშავედ და 9-წლიანი პატიმრობა მიუსაჯა. თბილისის საქალაქო სასამართლომ დეკანოზი გიორგი მამალაძე დამნაშავედ 2017 წლის 5 სექტემბერს ცნო და 9 წლით თავისუფლების აღკვეთა მიუსაჯა. მოსამართლე ბესიკ ბუგიანიშვილმა მას ბრალდება - ანგარებით მკვლელობის მომზადება გადაუკვალიფიცირადა დამნაშავედ განზრახ მკვლელობის მომზადებაში ცნო. ამასთან, დამამძიმებელი გარემოება მოუხსნა. ბესიკ ბუგიანიშვილმა მამალაძის დანაშაულის მოტივად ანგარების ნაცვლად, შურისძიება დაასახელა.
გერმანია პირობას დებს, რომ უკრაინისთვის ჭურვების მიწოდებას სულ მცირე სამჯერ გაზრდის
გერმანია აგრძელებს ინვესტიციებს საბრძოლო მასალის წარმოებაში, ამიტომ 2024 წელს უკრაინა შეძლებს სულ მცირე სამჯერ მეტი ჭურვის მიღებას, განაცხადა გერმანიის თავდაცვის მინისტრმა ბორის პისტორიუსმა. მისი თქმით, ქვეყანამ საბრძოლო მასალის წარმოებაში 3,5 მილიარდი ევროს ინვესტიცია მოახდინა. მანვე განმარტა, რომ 2024 წელს გერმანია უკრაინას სამჯერ ან ოთხჯერ მეტ საარტილერიო ჭურვებს მიაწვდის, ვიდრე 2023 წელს. მინისტრმა აღნიშნა საბრძოლო მასალის საკითხში მზარდი დინამიკა, რამაც დადებითად იმოქმედა როგორც უკრაინაზე, ასევე გერმანიაზე.
საფრანგეთმა და გერმანიამ უკრაინის საჰაერო თავდაცვის გაძლიერებისთვის კოალიცია შექმნეს
საფრანგეთმა და გერმანიამ უკრაინის საჰაერო თავდაცვის გაძლიერებისთვის კოალიცია შექმნეს. სებასტიან ლეკორნუმ აღნიშნა, რომ უკრაინის საჰაერო თავდაცვის შესაძლებლობების გაძლიერება „მნიშვნელოვანია მომავალი კონფლიქტისთვის და მშვიდობიანი მოსახლეობის დასაცავად.“ „საჰაერო თავდაცვის კოალიციის“ შექმნის შესახებ შეთანხმების ხელმოწერა ბრიუსელშიб NATO-ს ქვეყნების თავდაცვის დეპარტამენტების ხელმძღვანელების შეხვედრის ფარგლებში შედგა. ის მიზნად ისახავს უკრაინის ეფექტიანი მხარდაჭერის უზრუნველყოფას გრძელვადიან პერიოდში, სახმელეთო საჰაერო თავდაცვის სფეროში. პისტორიუსმა ასევე გამოაცხადა, რომ გერმანია უხელმძღვანელებს „ჯავშანტექნიკის კოალიციას“ პოლონეთთან და სურს, შეუერთდეს არტილერიის, საზღვაო უსაფრთხოების, განაღმვისა და თვითმფრინავების კოალიციებს. შეგახსენებთ, რომ უკრაინის საჰაერო თავდაცვის განვითარების კოალიციის შექმნა პრეზიდენტმა ვოლოდიმირ ზელენსკიმ უკრაინის თავდაცვის საკითხებზე საკონტაქტო ჯგუფის (რამშტაინის ფორმატი) მე-17 შეხვედრის შემდეგ გამოაცხადა.
ზელენსკი რუსული ხომალდის განადგურებაზე: შავ ზღვაში უსაფრთხოების დონე გავზარდეთ
უკრაინის პრეზიდენტმა ვოლოდიმირ ზელენსკიმ მადლობა გადაუხადა თავდაცვის ძალებს რუსული დიდი სადესანტო ხომალდის ცეზარ კუნიკოვის განადგურების გამო. „მადლობა უკრაინის შეიარაღებულ ძალებს, მადლობა მთავარი დაზვერვის სამმართველოს ჯარისკაცებს - მე-9 დეპარტამენტის მე-13 ჯგუფს! დღეს ჩვენ შავ ზღვაში უსაფრთხოების დონე გავზარდეთ და მეტი მოტივაცია მივეცით ჩვენს ხალხს. ეს მნიშვნელოვანია. ეტაპობრივად გავწმენდთ შავ ზღვას რუსული ტერორისტული ობიექტებისგან," - განაცხადა უკრაინის პრეზიდენტმა.
უკრაინა არმიისა და თავდაცვის ინდუსტრიის დამაკავშირებელ სისტემას შექმნის
უკრაინის პრეზიდენტმა ვოლოდიმირ ზელენსკიმ მთავრობის, სამხედრო და თავდაცვის ინდუსტრიის წარმომადგენლებთან შეხვედრა გამართა და ბრძანება გასცა, შეიქმნას ყოვლისმომცველი სისტემა, რომელიც არმიასა და ინდუსტრიას დააკავშირებს. შეხვედრის თემა იყო ახალი და თანამედროვე იარაღი მტრის სადაზვერვო თვითმფრინავებთან საბრძოლველად. „ჩვენ გვჭირდება სისტემური მიდგომა, იდენტიფიკაციიდან, ელექტრონული ომის და განადგურების საშუალებების ეფექტიან გამოყენებამდე,“ - განაცხადა ზელენსკიმ. არმიისა და მრეწველობის დამაკავშირებელი სისტემის შექმნის კომენტირებისას, მან ხაზი გაუსვა, რომ მწარმოებლებმა ნათლად უნდა გააცნობიერონ ფრონტის ხაზის საჭიროებები, ხოლო ჯარმა უნდა იცოდეს წარმოების შესაძლებლობები ყველა რეგიონში. „ფრონტის ხაზი მოითხოვს სწრაფ რეაგირებას გამოწვევებსა და საფრთხეებზე. ჩვენ ყველა ღონეს ვხმარობთ დავიცვათ ის, რაც ყველაზე მნიშვნელოვანია ბრძოლის ველზე: ჩვენი მეომრების სიცოცხლე," - აღნიშნა ზელენსკიმ.
რუსეთის კურსკის ოლქში ნავთობბაზა იწვის
რუსული მხარის განცხადებით, რუსეთში, კურსკის ოლქში, უკრაინული დრონით თავდასხმის შედეგად ნავთობბაზაში ხანძარი გაჩნდა. მისი თქმით, წინასწარი ინფორმაციით, ხანძრის შედეგად არავინ დაღუპულა, ან დაშავებულა. „კურსკის ოლქში უკრაინული უპილოტო საფრენი აპარატის თავდასხმის შედეგად, ნავთობის საცავში ხანძარი გაჩნდა. წინასწარი ინფორმაციით, არავინ დაშავებულა. ადგილზე ყველა შესაბამისი სამსახური მუშაობს. გთხოვთ შეინარჩუნოთ სიმშვიდე," - დაწერა გუბერნატორმა ტელეგრამ არხზე. უკრაინულ მხარეს ჯერ კომენტარი არ გაუკეთებია.
დეკანოზმა გიორგი მამალაძემ ციხიდან გათავისუფლების შემდეგ მედიასთან პირველად ისაუბრა
„მადლობას ვწირავ ღმერთს თითოეული წამისთვის - მადლობა მეუფე პეტრეს, რომელიც ჩემს მსგავსად უდანაშაულოდ დაისაჯა,“ - ამის შესახებ პატიმრობიდან გათავისუფლებულმა დეკანოზმა გიორგი მამალაძემ ჟურნალისტებთან განაცხადა. ის საპატიმრო დაწესებულებიდან ქობულეთში, საკუთარ სახლში რეანიმობილით გადაიყვანეს. დეკანოზი ამბობს, რომ ბრძოლა გრძელდება. „მადლობას ვუხდი ოჯახს, თორნიკეს. ყველა გულშემატკივარს, ვინც ჩემთან ერთად ამტკიცებდა და დარწმუნებული იყო ჩემს უდანაშაულობაში. ყველა ჩემს უფლებადამცველს, მეუფე პეტრეს, რომელიც ჩემს მსგავსად უდანაშაულოდ დაისაჯა. მადლობა არასამთავრობო ორგანიზაციებს, ადგილობრივს და საერთაშორისოს. ამერიკის და ნიდერლანდების მთავრობას, რომელიც იცავდა ჩემს უფლებას. ასევე ყველა ჟურნალისტს ვუხდი მადლობას. მადლობა ყველას, ცხოვრება გრძელდება, ბრძოლა გრძელდება. საზოგადოების დიდმა ნაწილმა სიმართლე იცის. ჩემი მთავარი გეგმაა ჯანმრთელობის მდგომარეობის გამოსწორება. ვწუხვარ, რომ მეუფე დიმიტრის არ აღმოაჩნდა სული ჭეშმარიტი მწყემსისა, რომელიც მისცემდა უფლებას და საშუალებას, დღეს აქ ჩემთან ერთად მდგარიყო რკინის ქალამნებით, მე მაინც მიყვარს ის," - აღნიშნა დეკანოზმა.
აშშ-ის კონგრესის დაზვერვის ხელმძღვანელი გამოდის გაფრთხილებით "სერიოზულ საფრთხეზე ეროვნული უშიშროებისთვის"
აშშ-ის წარმომადგენელთა პალატის დაზვერვის კომიტეტის ხელმძღვანელმა, მაიკ ტერნერმა 14 თებერვალს განაცხადა "სერიოზულ საფრთხეზე ეროვნული უშიშროებისთვის" . CNN-ის წყაროს ცნობით, ეს საფრთხე უკავშირდება რუსეთს. რესპუბლიკელი კანონმდებელი, მაიკ ტერნერი ითხოვს, რომ პრეზიდენტმა ჯო ბაიდენმა გრიფი "საიდუმლო" მოხსნას ყველა ინფორმაციაზე, რომელიც ამ საფრთხეს უკავშირდება, საიმისოდ, რომ "კონგრესმა, ადმინისტრაციამ და ჩვენმა მოკავშირეებმა ღიად შეძლონ ამ საფრთხეზე პასუხისთვის საჭირო ნაბიჯების განხილვა." ტერნერს დეტალები არ დაუკონკრეტებია, თუმცა Reuters-ი ორ წყაროზე დაყრდნობით წერს, რომ ტერნერის განცხადება ეხებოდა მკაცრად გასაიდუმლოებულ ინფორმაციას, რომელიც ეხებოდა რუსეთს და ოპერაციებს კოსმოსში. შეგახსენებთ, კონგრესში მიმდინარეობს ინტენსიური დებატები იმაზე, თუ როგორ უნდა გაუმკლავდეს აშშ გლობალურ გამოწვევებს რუსეთისგან და სხვა მეტოქეებისგან. კონგრესმენთა ნაწილი თვლის, რომ საჭიროა მეტი გლობალური ჩართულობა, თუმცა ზოგიერთი კანონმდებელი, მეტწილად რესპუბლიკელი დონალდ ტრამპის მოკავშირეები ამ მოსაზრებას არ იზიარებენ. თეთრი სახლის ეროვნული უსაფრთხოების მრჩეველმა, ჯეიკ სალივანმა, განაცხადა, რომ კონგრესის კომიტეტების ხელმძღვანელებთან შეხვედრა, რომლებიც პასუხისმგებელნი არიან ეროვნულ უსაფრთხოებაზე, დღეს არის დაგეგმილი. ამასთან, აშშ-ის წარმომადგენელთა პალატის სპიკერმა, მაიკ ჯონსონმა აღნიშნა, რომ ტერნერის განცხადებასთან დაკავშირებით შეშფოთების საფუძველი არ არსებობს.
უკრაინის მთელ ტერიტორიაზე საჰაერო განგაშია
უკრაინის მთელ ტერიტორიაზე, შავი ზღვიდან „კალიბრის“ რაკეტების გაშვების და რუსული Ту-95мс ბომბდამშენებიდან რაკეტების გაშვების გამო, საჰაერო თავდასხმის მაუწყებელი განგაში გამოცხადდა. ინფორმაციას უკრაინული მედია ავრცელებს. კიევის მერის, ვიტალი კლიჩკოს განცხადებით, დედაქალაქში აფეთქებების ხმები ისმის. მისი ინფორმაციით, კიევში საჰაერო თავდაცვა მუშაობს. მერმა დედაქალაქის მოსახლეობას სთხოვა, არ დატოვონ თავშესაფრები. უკრაინული მედიის ინფორმაციით, ძლიერი აფეთქებების ხმები ისმის დნიპროში, ზაპოროჟიესა და ლვოვშიც. ამ დროისთვის არსებული ინფორმაციით, ზაპოროჟიეში ქალაქის ინფრასტრუქტურას დაარტყეს, დაშავებულია ერთი ადამიანი, სხვა დაშავებულების შესახებ ინფორმაცია ზუსტდება. დღევანდელი მასირებული შეტევის წინ რუსეთის სამხედრო ძალებმა სარაკეტო იერიში მიიტანეს პოლტავის ოლქის ქალაქ მირგოროდზე. ამ ქალაქში უკრაინის არმიის საავიაციო ბაზა მდებარეობს. სარაკეტო დარტყმის შედეგები ჯერჯერობით უცნობია.
