ძებნის რეზულტატი:
რუსეთის საოკუპაციო ძალების მიერ უკანონოდ დაკავებული ვასილ ქენქაძე თავისუფალია
სუს-ის ცნობით, რუსეთის საოკუპაციო ძალების მიერ ოკუპირებულ სოფელ ბალაანის მიმდებარედ უკანონოდ დაკავებული ვასილ ქენქაძე თავისუფალია და ცენტრალური ხელისუფლების მიერ კონტროლირებად ტერიტორიაზე იმყოფება. „ვასილ ქენქაძის უკანონო პატიმრობიდან გათავისუფლების პროცესში აქტიურად გამოიყენებოდა „ცხელი ხაზის“ მექანიზმი. უკანონო პატიმრობიდან მისი დაუყოვნებლივ გათავისუფლების საკითხი საქართველოს ცენტრალური ხელისუფლების მიერ დაყენებული იქნა ინციდენტების პრევენციისა და მათზე რეაგირების მექანიზმის (IPRM) 115-ე შეხვედრაზე. საქართველოს ცენტრალური ხელისუფლება ინფორმაციას მუდმივ რეჟიმში აწვდიდა საერთაშორისო პარტნიორებს. ცენტრალური ხელისუფლება, საერთაშორისო პარტნიორებთან ერთად, განაგრძობს აქტიურ მუშაობას ოკუპირებულ ტერიტორიებზე უკანონო პატიმრობაში მყოფი საქართველოს ყველა მოქალაქის გასათავისუფლებლად. ოკუპირებულ რეგიონებსა და საოკუპაციო ხაზის გასწვრივ განხორციელებულ ყველა დესტრუქციულ ქმედებაზე სრული პასუხისმგებლობა ეკისრება საოკუპაციო ძალას,“ - ნათქვამია გავრცელებულ ინფორმაციაში.
აზიის განვითარების ბანკის პრეზიდენტი საქართველოს პირველი სამუშაო ვიზიტით ეწვია
საქართველოს პირველი სამუშაო ვიზიტით აზიის განვითარების ბანკის (ADB) პრეზიდენტი მასაცუგუ ასაკავა ეწვია. ფინანსთა სამინისტროს ცნობით, მაღალი რანგის სტუმარს „სადახლოს“ საბაჟო-გამშვებ პუნქტზე დახვდნენ ფინანსთა მინისტრის მოადგილე ეკატერინე გუნცაძე და ეკონომიკისა და მდგრადი განვითარების მინისტრის მოადგილე გენადი არველაძე. „აზიის განვითარების ბანკის პრეზიდენტი თბილისში სიტყვით გამოვა ცენტრალური აზიის რეგიონული ეკონომიკური თანამშრომლობის (CAREC) ფორუმზე. დაგეგმილია მისი შეხვედრები მთავრობის ეკონომიკური გუნდის წევრებთან. თბილისში ვიზიტის ფარგლებში, აზიის განვითარების ბანკის პრეზიდენტი მასაცუგუ ასაკავა კოლეგებთან ერთად გაეცნობა 2024 წლის 2-5 მაისს, აზიის განვითარების ბანკის 57-ე წლიური შეხვედრის საორგანიზაციო სამუშაოს,“ - ნათქვამია გავრცელებულ ინფორმაციაში.
განათლების მინისტრის განცხადებით, დავალიანების გამო შეჩერებული სტატუსი 4 000-მდე სტუდენტმა აღიდგინა
განათლებისა და მეცნიერების მინისტრის, გიორგი ამილახვარის განცხადებით, 2023 წლის სექტემბრიდან, 4 000-მდე სტუდენტმა აღიდგინა სტუდენტის სტატუსი და დაუბრუნდა სასწავლო პროცესს. მინისტრმა პარლამენტის პლენარულ სხდომაზე ასევე ისაუბრა უნივერსიტეტებში სტუდენტების დავალიანების განულების პროგრამაზე და იმ კერძო უნივერსიტეტებზე, რომლებმაც ამ პროგრამაზე უარი განაცხადეს. ამილახვარის თქმით, სამინისტრო ვერავის დააძალებს პროგრამაში მონაწილეობას, მითუმეტეს კერძო უნივერსიტეტს, რადგან ამის არც სამართლებრივი ბერკეტი არსებობს და არც აკადემიური. მინისტრის თქმით, სამწუხაროდ, ორმა კერძო უნივერსიტეტმა ჩათვალა, რომ დამატებითი სოციალური ფინანსური სარგებელი თავიანთ სტუდენტებს არ უნდა მისცენ. „თავისუფალი ნების პირობებში, ყველა კერძო უნივერსიტეტს სრულიად ფინანსური გარიგება შევთავაზეთ. მხოლოდ ორი უნივერსიტეტი არ შემოუერთდა. არ დავასახელებ ამ უნივერსიტეტების სახელებს, საზოგადოებამ კარგად იცის. რატომ არ შემოუერთდნენ? არ ვიცი. კითხეთ თქვენ. როგორ შეიძლება არ შემოუერთდე ასეთ ინიციატივას, მაშინ როდესაც სახელმწიფო გეუბნება, რომ რაც საბაზრო ღირებულება არის ჩვენ ამ თანხას გადავიხდით და ყველა კერძო უნივერსიტეტი ბოლო თეთრამდე მიიღებს იმ თანხას, 2-3 თვე ავიღეთ ამისთვის და ეტაპობრივად ყველას ჩაერიცხება. ჩვენ რა შეგვიძლია გავაკეთოთო? როგორ შეიძლება დავაძალოთ და დავავალდებულოთ კერძო უნივერსიტეტი? ახლა რიტორიკულ კითხვას უკან გვიტრიალებენ ვიღაცების მეშვეობით, რომ თუ რა ეშველებათ ამ სტუდენტებს. ჩვენ ვერავის დავაძალებთ, ამის არც სამართლებრივი ბერკეტი არსებობს და არც აკადემიური, რომ ვინმე მობილობით ვაიძულოთ გადავიდეს. სამწუხაროდ, ამ უნივერსიტეტის მესვეურებმა, რატომღაც ჩათვალეს, რომ მათ დამატებითი სოციალური ფინანსური სარგებელი თავიანთ სტუდენტებს არ უნდა მისცენ. ამას იმით ასაბუთებენ, რომ ისინი საკმარისზე მეტს აკეთებენ ამ სტუდენტებისთვის, რომ სოციალურად დააკმაყოფილონ: აძლევენ სტიპენდიებს, შეღავათებს. სამწუხარო რეალობა ასეთი გვაქვს,“ - განაცხადა ამილახვარმა.
ევროკომისიამ რუსული ბრილიანტის აკრძალვა დაამტკიცა - AFP
ევროკომისიამ რუსული ბრილიანტების გაყიდვის აკრძალვის შესახებ წინადადება დაამტკიცა და დოკუმენტი შესაძლოა, ევროკავშირის წევრ ქვეყნებს მალე გაეგზავნოს. უკრაინული მედიის ცნობით, ამის შესახებ AFP წერს. რუსეთის წინააღმდეგ ევროკავშირის სანქციების მე-12 პაკეტი შეიძლება, მოიცავდეს ორმაგი დანიშნულების საქონლის ექსპორტის აკრძალვას, რომელსაც რუსეთი უკრაინის წინააღმდეგ იარაღის წარმოებისთვის იყენებს. უკრაინული მედიის ცნობით, ამის შესახებ იტყობინება Bloomberg 15 ნოემბერს მის მიერ მოპოვებულ დოკუმენტებზე დაყრდნობით. სხვა წინადადებები, გავრცელებული ინფორმაციით, მოიცავს რუსული ბრილიანტების აკრძალვას და ზომებს, რაც რუსული ნავთობის შეზღუდვას ეხება. გასული წლის დეკემბერში ევროკავშირის, აშშ-ის და ჯგუფის შვიდეულის (G7) მიერ დაწესებული ფასის ლიმიტის თავდაპირველი წარმატების მიუხედავად, რუსული ნედლი ნავთობის აბსოლუტური უმრავლესობა ახლა 60 დოლარის ზღურბლს ზემოთ ვაჭრობს. მიუხედავად ამისა, სანქციებმა, რომლებიც დაკავშირებულია ფასების ლიმიტის დარღვევასთან და სხვა ზომებთან დაკავშირებით, მოსკოვის ნავთობის მოგების შემცირება მაინც მოახერხა. ევროკომისიამ, ევროკავშირის უმაღლესმა აღმასრულებელმა ორგანომ, ოთხშაბათს, 15 ნოემბერს მიიღო წინადადება რუსეთის ეკონომიკის წინააღმდეგ სანქციების ახალი, მე-12 პაკეტის შემოღების შესახებ. შეთავაზებულ ზომებს შორისაა ემბარგო რუსული ალმასებით ვაჭრობაზე. როგორ უჭერს მხარს ევროკავშირი უკრაინას: სანქციებიდან სამხედრო და ჰუმანიტარულ დახმარებამდე Politico-სა და Bloomberg-ის წყაროების თქმით, ევროკავშირი შეზღუდვებს დააწესებს რუსული თუჯისა და სარკისებრი თუჯის, სპილენძის, ალუმინის მავთულისა და ფოლგის, რუსული გათხევადებული გაზის იმპორტზე. გარდა ამისა, ევროკავშირი ანგარიშვალდებულებას გაამკაცრებს კომპანიებისთვის, რომლებიც რუსული ნავთობის იმპორტს ეწევიან. ვარაუდობენ, რომ ეს ხელს შეუწყობს ადრე შემოღებული ზღვრული ფასის, ბარელში 60 დოლარის, დაცვას.
უკრაინა ევროპარლამენტში წარმომადგენლობით ოფისს გახსნის
უკრაინა ვროპარლამენტში წარმომადგენლობით ოფისს გახსნის, რათა თანამშრომლობის გაძლიერებასა და კავშირებს დაეხმაროს. ამის შესახებ პარლამენტის თავმჯდომარემ რუსლან სტეფანჩუკმა ეროვნულ განაცხადა. მან ასევე აღნიშნა, რომ იგეგმება ევროპარლამენტის ოფისის გახსნა კიევში. 28 ნოემბერს გამართულ პრესკონფერენციაზე ევროპარლამენტის პრეზიდენტმა რობერტა მეცოლამ განაცხადა, რომ სტეფანჩუკთან ერთად ხელი მოაწერა ურთიერთგაგების მემორანდუმს, რომელიც "შემდეგ დონეზე" გადასაყვანად თანამშრომლობას ითვალისწინებს. ევროპარლამენტი კიევში ოფისს გახსნის - მედია
სტოლტენბერგი: NATO უკრაინის მხარდაჭერას არ შეწყვეტს - ეს არის გზავნილი რუსეთისთვის
NATO არ შეწყვეტს უკრაინის მხარდაჭერას რუსეთის აგრესიის წინააღმდეგ ბრძოლაში და უკრაინელი ხალხის მხარდაჭერის ბოლო განცხადებები რუსეთისთვის მკაფიო გზავნილია. ამის შესახებ NATO-ს გენერალურმა მდივანმა იენს სტოლტენბერგმა სამშაბათს ბრიუსელში გამართულ პრესკონფერენციაზე განაცხადა, სადაც NATO-ს საგარეო საქმეთა მინისტრების შეხვედრა მიმდინარეობს. სტოლტენბერგის თქმით, მოკავშირეები, მათ შორის შეერთებული შტატები და ფინეთი, აგზავნიან მეტ საჰაერო თავდაცვას და საბრძოლო მასალას უკრაინაში. მან ხაზი გაუსვა სხვა მოკავშირეებიე მიერ აღებულ ვალდებულებებს. „ეს ყველაფერი ხელს უწყობს უკრაინელების სიცოცხლის გადარჩენას. და გზავნილს უგზავნის რუსეთს, რომ ჩვენი მხარდაჭერა არ შეფერხდება,“ - აღნიშნა NATO-ს გენერალურმა მდივანმა. სტოლტენბერგი და ბლინკენი ბრიუსელში ადასტურებენ, რომ უკრაინისადმი მტკიცე მხარდაჭერა გაგრძელდება
რა გადაწვეტილებები მიიღეს NATO-ს საგარეო საქმეთა მინისტერიალზე
NATO-ს გენერალურმა მდივანმა განაცხადა, რომ საგარეო საქმეთა მინისტრებმა ალიანსის პირველი კვანტური სტრატეგია დაამტკიცეს. იენს სტოლტენბერგის თქმით, მოკავშირეები ცოტა ხნის წინ შეთანხმდნენ NATO-ს საჰაერო ხომალდების AWACS-ის ფლოტის განახლებაზე, რაც ალიანსის ყველაზე დიდი შესყიდვაა. როგორც 15 ნოემბერს გახდა ცნობილი, NATO-მ ექსპლუატაციის ვადის გასვლის გამო, AWACS-ის Boeing-ის ექვსი ახალი E-7A Wedgetail-ის ტიპის თვითმფრინავით შეცვლის გადაწყვეტილება მიიღო. საგარეო საქმეთა მინისტრებმა ასევე ისაუბრეს იმ გამოწვევებზე, რომლებსაც ჩინეთი წარმოადგენს ევროატლანტიკური უსაფრთხოებისთვის. სტოლტენბერგმა მან ხაზი გაუსვა პარტნიორებთან უფრო მჭიდრო თანამშრომლობის აუცილებლობას, მათ შორის ინდო-წყნარ ოკეანეში. NATO-ს სამხრეთ სამეზობლოსთან დაკავშირებით, სტოლტენბერგმა განაცხადა, რომ მან დანიშნა ექსპერტთა დამოუკიდებელი ჯგუფი, რათა შეისწავლოს რეგიონიდან წამოჭრილი გამოწვევები. ჯგუფი რეკომენდაციებს მომავალ გაზაფხულზე წარადგენს. NATO-ს საგარეო საქმეთა მინისტრებმა განიხილეს უსაფრთხოების აქტუალური საკითხები, მათ შორის NATO-ს შეკავება და თავდაცვა, უკრაინის მხარდაჭერა და პარტნიორ ქვეყნებთან უფრო მჭიდრო თანამშრომლობა. შეხვედრის შემდეგ გენერალურმა მდივანმა იენს სტოლტენბერგმა განაცხადა, რომ მოკავშირეებმა ასევე გამოხატეს შეშფოთება ახლო აღმოსავლეთში ომის გამო. ის მიესალმა ისრაელსა და „ჰამასს“ შორის საომარი მოქმედებების პაუზის გახანგრძლივებას, რამაც საშუალება მისცა ღაზის სექტორში მცხოვრებთათვის საჭირო დახმარებას, მეტი მძევლების გათავისუფლებას და მეტი ჰუმანიტარული დახმარების მიწოდებას. სტოლტენბერგი: NATO უკრაინის მხარდაჭერას არ შეწყვეტს - ეს არის გზავნილი რუსეთისთვის
კულება სლოვაკეთის ახალი მთავრობის მინისტრს პირველად შეხვდა
საგარეო საქმეთა მინისტრმა დმიტრო კულებამ, რომელიც ორდღიანი ვიზიტით ბრიუსელში იმყოფება, სლოვაკეთის საგარეო საქმეთა სამინისტროს ახალ ხელმძღვანელ იურაი ბლანართან პირველი შეხვედრა გამართა. ამის შესახებ მან Twitter-ზე (X) დაწერა. კულებამ თავის სლოვაკ კოლეგასთან შეხვედრას "კონსტრუქციული" უწოდა. მან სლოვაკეთს მადლობა გადაუხადა უკრაინის სუვერენიტეტისა და ტერიტორიული მთლიანობისადმი ცალსახა მხარდაჭერისთვის, მის საერთაშორისოდ აღიარებულ საზღვრებში. ასევე მნიშვნელოვანია, რომ სლოვაკეთი მზადაა, მხარი დაუჭიროს ევროკომისიის გადაწყვეტილებას უკრაინასთან გაწევრიანების მოლაპარაკებების გახსნის შესახებ. „მე ასევე მადლობელი ვარ ჩემი სლოვაკი კოლეგის, რომ თავდაცვის ინდუსტრიის თანამშრომლობა ჩვენს კომპანიებს შორის გაგრძელდება და სლოვაკეთის სარემონტო ცენტრი ასევე გააგრძელებს მუშაობას,“ - აღნიშნა კულებამ. ბლანარი სლოვაკეთის პრემიერ-მინისტრის რობერტ ფიცოს ახალი მთავრობის მინისტრია, რომელმაც მუშაობა ოქტომბერში დაიწყო. დანიშვნის შემდეგ ფიცომ დაადასტურა, რომ უკრაინის სამხედრო დახმარებას მხარს არ დაუჭერს. ის ასევე ეწინააღმდეგება რუსეთის წინააღმდეგ ევროკავშირის სანქციებს. ამასთან, სლოვაკეთის პრემიერ-მინისტრმა პირობა დადო, რომ არ დაბლოკავს უკრაინის ჰუმანიტარულ და გარკვეულ პირობებში ფინანსურ დახმარებას. რობერტ ფიცოს პარტიამ 30 სექტემბრის საპარლამენტო არჩევნებში გაიმარჯვა. ფიცომ 6 ნოემბერს განაცხადა, რომ მისი მთავრობა სლოვაკური კომპანიებისგან იარაღის მიყიდვას ხელს არ შეუშლის. „თუ რომელიმე კომპანიას სურს იარაღის წარმოება და სადმე ექსპორტი, ამას არავინ შეუშლის ხელს, რა თქმა უნდა," - აღნიშნა ფიცომ. ზელენსკი მიიჩნევს, რომ უკრაინის მხარდაჭერას ნიდერლანდების არჩევნების შედეგები ახლო მომავალში გამოწვევას არ შეუქმნის
„ჰამასის“ ტყვეობიდან კიდევ 12 მძევალი გათავისუფლდა
„ჰამასმა" 10 ისრაელელი და უცხოეთის 2 მოქალაქე მძევალი გაათავისუფლა. ისრაელის თავდაცვის ძალების თანახმად, „ჰამასმა“ 12 მძევალი „წითელ ჯვარს” გადასცა, რომელიც მათ ისრაელში ჩაიყვანს. „წითელი ჯვრისგან” მიღებულ ინფორმაციაზე დაყრდნობით, 12 მძევალი - მათ შორის ათი ისრაელელი და ტაილანდის ორი მოქალაქე - ისრაელის ტერიტორიისკენ მოემართებიან,” - ნათქვამია ისრაელის თავდაცვის ძალების განცხადებაში. კატარის საგარეო საქმეთა სამინისტროს სპიკერი ადასტურებს, რომ "ჰამასმა" ისრაელის ათი მოქალაქე გაათავისუფლა - ცხრა ქალი და ერთი ბავშვი. მან აღნიშნა, რომ "ჰამასმა" ასევე ფილიპინების მოქალაქე გაათავისუფლა. მძევლების სანაცვლოდ დღეს ისრაელი 30 პალესტინელ პატიმარს გაათავისუფლებს.
აშშ-ის კონგრესის წარმომადგენელთა პალატამ ისრაელის არსებობის უფლების მხარდამჭერი რეზოლუცია მიიღო
აშშ-ის წარმომადგენელთა პალატამ მიიღო რეზოლუცია, რომელიც ისრაელის არსებობის უფლებას ადასტურებს და „ჰამასს“ მძევლების გათავისუფლებისკენ მოუწოდებს. რეზოლუციას აშშ-ის კონგრესის წარმომადგენელთა პალატის 412-მა წევრმა დაუჭირა მხარი. დემოკრატმა, რაშიდა ტლაიბიმ, რომელიც მიჩიგანს წარმოადგენს კენჭისყრაში მონაწილეობისგან თავი შეიკავა, ხოლო რესპუბლიკელმა, ტომას მასიმ რეზოლუციის წინააღმდეგ მისცა ხმა.
Politico-მ ევროპაში ყველაზე გავლენიანი ადამიანების რეიტინგი შეადგინა
ამერიკულმა გამოცემა Politico-მ ევროპაში ყველაზე გავლენიანი ადამიანების ტრადიციული რეიტინგი შეადგინა. გამოცემის შეფასება 4 კატეგორიისგან შედგება, თითოეულ სამ კატეგორიაში კი, 9 ადამიანი განთავსდა. კატეგორიები ასე განაწილდა - „მოღვაწეები“, „მეოცნებეები“ და „ამრევები“. პირველი ორი დადებით გავლენას აფასებს, მესამე კი, ძირითადად, უარყოფითს. Politico-მ ყველაზე გავლენიან ევროპელად პოლონელი პოლიტიკოსი, პოლონეთის ყოფილი პრემიერ-მინისტრი და ევროპული საბჭოს ყოფილი პრეზიდენტი დონალდ ტუსკი აღიარა. შარშან ყველაზე გავლენიან ევროპელად უკრაინის პრეზიდენტი ზელენსკი იყო დასახელებული. წელს მას ამერიკულმა გამოცემამ ყველაზე გავლენიან ევროპელად „მეოცნებეთა“ რეიტინგში მიაკუთვნა პირველი ადგილი. „მოღვაწეებს“ შორის პირველია იტალიის პრემიერ-მინისტრი ჯორჯია მელონი. „ამრევების“ კატეგორიაში პირველ ადგილზეა რუსეთის ცენტრალური ბანკის ხელმძღვანელი ელვირა ნაბიულინა. მას Politico უწოდებს მთავარ ტექნოკრატს, რომელიც მუშაობაში ეხმარება პუტინის სამხედრო მანქანას. ამავე კატეგორიაში მესამე და მეოთხე არიან უნგრეთის პრემიერ-მინისტრი ვიქტორ ორბანი და გერმანიის საგარეო საქმეთა მინისტრი ანალენა ბერბოკი. ამერიკული გამოცემა ორბანის შესახებ წერს, რომ მან უნგრეთში ხელყო კანონის უზენაესობა და მედიის თავისუფლება, ვეტოს უფლებით ევროკავშირი მძევლად აიყვანა და მეგობრულის მსგავსი ურთიერთობები დაამყარა რუსეთის პრეზიდენტ პუტინთან. რაც შეეხება ბერბოკს, ის ამ კატეგორიაში არა რომელიმე კონკრეტული უარყოფითი ფაქტის, არამედ, ხისტი და აგრესიული საგარეო პოლიტიკის გამო მოხვდა.
სტოლტენბერგი განმარტავს, რა თვალსაზრისით განსხვავდება ერთმანეთისგან ღაზის სექტორისა და უკრაინის საკითხი
NATO-ს გენერალურმა მდივანმა იენს სტოლტენბერგმა განაცხადა, რომ ღაზის სექტორსა და უკრაინაში ვითარება მრავალი თვალსაზრისით განსხვავებულია, უკრაინა არასოდეს წარმოადგენდა საფრთხეს რუსეთისთვის. სტოლტენბერგის თქმით, მნიშვნელოვანია იმის აღიარება, რომ სიტუაცია ღაზაში და სიტუაცია უკრაინაში ბევრი რამით განსხვავებულია. „უკრაინა არასოდეს წარმოადგენდა საფრთხეს რუსეთისთვის. უკრაინა არასოდეს შეუტევია რუსეთისთვის. რუსეთის შეჭრა უკრაინაში იყო არაპროვოცირებული შეჭრა, სრულმასშტაბიანი შეჭრა სხვა ქვეყანაში,“ - განაცხადა ალიანსის ხელმძღვანელმა. მან ასევე ხაზგასმით აღნიშნა, რომ უკრაინას აქვს არაპროვოცირებული თავდასხმისგან თავდაცვისა და ტერიტორიული მთლიანობის დაცვის უფლება. სტოლტენბერგმა განმარტა, რომ ჰუმანიტარული სამართალი ყველა კონფლიქტში უნდა იყოს დაცული და მშვიდობიანი მოქალაქეების სიცოცხლე ყოველთვის დაცული უნდა იყოს. „თავდაცვის უფლება გათვალისწინებულია გაეროს წესდებაში, ამიტომ საერთაშორისო სამართალი, ჰუმანიტარული სამართალი მოქმედებს ყველა კონფლიქტში და ჩვენ ვაგრძელებთ უკრაინის მხარდაჭერას, რადგან ეს ეხება ეროვნული კანონმდებლობის დაცვას,“ - განაცხადა სტოლტენბერგმა. შეგახსენებთ, სამშაბათს, 28 ნოემბერს ბელგიის დედაქალაქში NATO-ს საგარეო საქმეთა მინისტრების ორდღიანი შეხვედრა დაიწყო.
თურქეთი საერთაშორისო სამხედრო წვრთნებს მასპინძლობს
თურქეთი ჩრდილო-დასავლეთ ჩანაქკალეს პროვინციასა და საროსის ყურეში სამხედრო წვრთნებს (NUSRET-2023) ატარებს. სწავლება 6 დეკემბრამდე გაგრძელდება. ცხრადღიან წვრთნებში მონაწილეობენ თურქეთის საზღვაო და საჰაერო ძალების სარდლობის ნაწილები, ასევე, სანაპირო დაცვის სარდლობა, 15 ქვეყნის დამკვირვებელთა პერსონალთან ერთად. თურქეთის მასპინძლობით სამხედრო წვრთნები დაიწყო "მეგობრული და მოკავშირე ქვეყნების" ელემენტების მონაწილეობით. სწავლების მიზანია მონაწილე ქვედანაყოფების/სარდლობის მომზადება ნაღმების ომის დაგეგმვაში, შესრულებასა და შეფასებაში. „სწავლება მიზნად ისახავს ქვეყნების თავსებადობის გაძლიერებას, მათი ერთობლივად მუშაობის უნარის ხელშეწყობას,“ - ნათქვამია თურქეთის თავდაცვის სამინისტროს განცხადებაში. ინფორმაცია თურქულმა მედიამ გაავრცელა, თუმცა ქვეყნების ჩამონათვალი ცნობაში მითითებული არ არის.
ყაზახეთი ესტონეთს შუა დერეფნის განვითარებისთვის თანამშრომლობას სთავაზობს
ყაზახეთს ტრანსკასპიური საერთაშორისო სატრანსპორტო მარშრუტის (TITR, შუა დერეფანი) განვითარებისთვის ესტონეთთან თანამშრომლობა სურს. ამის შესახებ ყაზახეთის საგარეო საქმეთა მინისტრის მოადგილის რომან ვასილენკოსა და ესტონეთის საგარეო საქმეთა სამინისტროს კანცლერის ჯონატან ვსევიოვის შეხვედრისას გახდა ცნობილი. ვასილენკომ ხაზი გაუსვა ესტონეთთან თანამშრომლობის გაფართოების მნიშვნელობას ყაზახეთისთვის საინტერესო სფეროებში, როგორიცაა, ტრანსპორტი და ლოგისტიკა, ასევე დიგიტალიზაცია და მწვანე ეკონომიკა. განსაკუთრებული ყურადღება დაეთმო სავაჭრო, ეკონომიკურ და საინვესტიციო საქმიანობას. მხარეებმა აღნიშნეს ორმხრივი სავაჭრო ბრუნვის განვითარების კარგი დინამიკა და აქტიური თანამშრომლობა ორი ქვეყნის ბიზნეს წრეებს შორის. მხარეებმა დაადასტურეს მზადყოფნა, სრულად დაუჭირონ მხარი და ხელი შეუწყონ დისკუსიას ყაზახეთ-ესტონეთის ურთიერთობების განვითარების შესახებ. ცნობისთვის, „ტრანსკასპიური საერთაშორისო სატრანსპორტო მარშრუტი“(TITR) არის სატრანსპორტო და სავაჭრო მარშრუტი, რომელიც აზიასა და ევროპას აკავშირებს. ის რეგიონის რამდენიმე ქვეყანაზე გადის. მარშრუტი ჩინეთიდან იწყება და შუა აზიის ქვეყნებს (ყაზახეთი, უზბეკეთი და თურქმენეთი) კვეთს. ვიდრე ევროპას მიაღწევს, გადის კასპიის ზღვაში, აზერბაიჯანში, საქართველოსა და თურქეთში. შეგახსენებთ, ევროკავშირისა და EBRD-ის კვლევის დასკვნის თანახმად, ცენტრალური ტრანსკასპიური ქსელი (CTCN - მასაც „შუა დერეფნად“ მოიხსენიებენ), ტრანსევროპულ სატრანსპორტო ქსელთან (TEN-T) ინტეგრაციისთვის, ყველაზე მდგრად ვარიანტად განიხილება. მის მნიშვნელოვნად გასაუმჯობესებლად, საინვესტიციო საჭიროება დაახლოებით, 18,5 მილიარდ ევროდ შეფასდა. შეგახსენებთ, ევროკავშირისა და EBRD-ის კვლევის დასკვნის თანახმად, ცენტრალური ტრანსკასპიური ქსელი (CTCN - მასაც „შუა დერეფნად“ მოიხსენიებენ), ტრანსევროპულ სატრანსპორტო ქსელთან (TEN-T) ინტეგრაციისთვის, ყველაზე მდგრად ვარიანტად განიხილება. მის მნიშვნელოვნად გასაუმჯობესებლად, საინვესტიციო საჭიროება დაახლოებით, 18,5 მილიარდ ევროდ შეფასდა. კვლევის ავტორების თანახმად, ზემოთ აღნიშნული კვლევა მყარ საფუძველს ქმნის იმისთვის, რომ ერთობლივი მუშაობის შედეგად, „ტრანსკასპიური საერთაშორისო სატრანსპორტო მარშრუტი“ (ასევე შუა დერეფანი) რაც შეიძლება, მალე გახდეს უფრო ეფექტიანი. სახელმწიფო დეპარტამენტი: აშშ საქართველოს ეკონომიკურ განვითარებას მხარს უჭერს. ვაღიარებთ შუა დერეფნის კონცეფციის მხარდასაჭერად საჭირო ინფრასტრუქტურის განვითარების შესაძლებლობებს - ექსკლუზივი
რუმინეთი: ევროკავშირის გაფართოება დაეფუძნება კანდიდატების ინდივიდუალურ ძალისხმევას და მათ დამსახურებას, შეასრულონ აღებული ვალდებულებები
საქართველოს საგარეო უწყება ავრცელებს ინფორმაციას, რომ რუმინეთის პარლამენტმა დეპუტატთა პალატისა და სენატის გაერთიანებულ სხდომაზე დაამტკიცა „რეზოლუცია მოლდოვის რესპუბლიკის, უკრაინის, საქართველოსა და დასავლეთ ბალკანეთის ევროპული პერსპექტივის შესახებ“. უწყების ცნობით, რეზოლუციაში ხაზგასმულია, რომ რუმინეთი როგორც საქართველოს სტრატეგიული პარტნიორი ადასტურებს საქართველოს დამოუკიდებლობის, სუვერენიტეტისა და ტერიტორიული მთლიანობისადმი მტკიცე მხარდაჭერას, ითვალისწინებს რა 2022 წელს გაფორმებული სტრატეგიული პარტნიორობის დეკლარაციის პრინციპებისა და მიზნების მნიშვნელობას ორივე ქვეყნისთვის. დოკუმენტში აღნიშნულია შავ ზღვაში სტაბილურობის, უსაფრთხოებისა და კეთილდღეობის კონსოლიდაციისათვის დაკავშირებადობის როლი, აგრეთვე, მისი მნიშვნელობა ევროპულ სივრცეში ინტეგრირებისათვის. ევროკავშირის გაფართოების პოლიტიკა აღიარებულია, როგორც ყველაზე წარმატებული ინსტრუმენტი დემოკრატიული ტრანსფორმაციის სტიმულირებისათვის აღმოსავლეთ სამეზობლოსა და დასავლეთ ბალკანეთში. ასევე ხაზგასმულია, რომ გაფართოება დაეფუძნება კანდიდატების ინდივიდუალურ ძალისხმევას და მათ დამსახურებას, შეასრულონ აღებული ვალდებულებები, ევროპული ღირებულებების შესაბამისად. „რუმინეთის პარლამენტი მტკიცედ უჭერს მხარს უკრაინის, მოლდოვასა და საქართველოს ევროპული ინტეგრაციის პროგრესს და ასევე მოუწოდებს გაგრძელდეს ევროპული მხარდაჭერა, რათა საქართველომ გადადგას შემდგომი ნაბიჯები ევროპული ინტეგრაციის გზაზე, მათ შორის მიიღოს ევროკავშირის წევრობის კანდიდატის სტატუსი. ეს სულისკვეთება ეფუძნება საქართველოს მოქალაქეების მკაფიო პროევროპულ ორიენტაციას და ასევე მოლოდინს, რომ საქართველო გააგრძელებს ძალისხმევას ევროკომისიის რეკომენდაციების ყოვლისმომცველი და მდგრადი განხორციელებისთვის. რეზოლუცია ყურადღებას ამახვილებს ევროკავშირის მზარდი ძალისხმევის აუცილებლობაზე, აღმოსავლეთ სამეზობლოში მშვიდობის, სტაბილურობის და უსაფრთხოების უზრუნველყოფისათვის, ასევე, ხაზს უსვამს ევროკავშირთან დაკავშირებადობის ყველა განზომილების განვითარების საჭიროებას რეგიონის ქვეყნებისთვის. რუმინეთის პარლამენტი გამოხატავს კანდიდატი ქვეყნების პარლამენტებთან თანამშრომლობის და მხარდაჭერის სრულ მზაობას, ამ ქვეყნების ევროკავშირში გაწევრიანების პროგრესის ხელშესაწყობად,“ - აცხადებს საგარეო უწყება. შეგახსენებთ, რუმინეთის პარლამენტმა საქართველოსთვის ევროკავშირის წევრობის კანდიდატის სტატუსის მინიჭებას რეზოლუციის მიღებით დაუჭირა მხარი
ევროკავშირის სპეციალური წარმომადგენელი: ყაზახეთმა ორმაგი დანიშნულების პროდუქციის რუსეთში რეექსპორტი საგრძნობლად შეამცირა
ევროკავშირის სპეციალური წარმომადგენელი სანქციების განხორციელების საკითხებში დევიდ ო'სალივანი, 28 ნოემბერს ასტანაში შეხვდა ყაზახეთის ოფიციალურ პირებს და განაცხადა, რომ ცენტრალური აზიის ქვეყანამ მნიშვნელოვნად შეამცირა ორმაგი დანიშნულების საქონლის რეექსპორტი რუსეთში, მაგრამ გაზარდა სხვა ექსპორტი მის ჩრდილოელ მეზობელთან. ო'სალივანმა ხაზგასმით აღნიშნა, რომ ევროკავშირს მიაჩნია, რომ სანქციები, რომლებიც დასავლეთმა რუსეთს დაუწესა უკრაინაში მისი მიმდინარე შეჭრის გამო, ხელს არ შეუშლის მის თანამშრომლობას ყაზახეთთან. ო'სალივანი, სავარაუდოდ, 29 ნოემბერს ეწვევა უზბეკეთს, რათა ყურადღება გაამახვილოს იმავე საკითხზე. პრესკონფერენციის დროს ევროკავშირის წარმომადგენელს არ განუმარტავს, თუ რა სახის პროდუქციის ექსპორტის გაზრდაზეა საუბარი. ყაზახეთის პრეზიდენტმა განაცხადა, რომ ქვეყანა შეასრულებს რუსეთის წინააღმდეგ სანქციების რეჟიმს, ხოლო ყაზახეთის ოფიციალური პირები ამბობენ, რომ სამხედრო საქონლის ექსპორტი რუსეთში სრულმასშტაბიანი შემოჭრის დაწყებიდან მალევე შეწყდა. ამავდროულად, ასტანამ დაიმსახურა კრიტიკა იმის გამო, რომ მოსკოვს უფლება მისცა, გვერდი აეარა დაწესებული საერთაშორისო სანქციებისთვის. ეს მოიცავდა საქონლის იმპორტს და შემდეგ რეექსპორტს, რომელსაც რუსული თავდაცვის ინდუსტრია იარაღის წარმოებისთვის იყენებს. ყაზახეთის ვაჭრობის მინისტრის მოადგილემ კაირატ ტორებაევმა 19 ოქტომბერს განაცხადა, რომ ყაზახეთი შეწყვეტს 100-ზე მეტი ორმაგი დანიშნულების საქონლის ექსპორტს რუსეთში პოტენციური სამხედრო დანიშნულებით, მაგრამ ვაჭრობის სამინისტრომ იმავე დღეს გაავრცელა განცხადება, რომლითაც ტორებაევის კომენტარები უარყო. რუსეთის წინააღმდეგ სანქციების მე-12 პაკეტით, რომელიც ამჟამად განხილვის პროცესშია, ევროკავშირი სავარაუდოდ, შეეცდება, შეზღუდოს რუსეთის შესაძლებლობა, თავი აარიდოს სანქციებს მესამე მხარის ქვეყნების გამოყენებით.
ინდოეთში გადაარჩინეს 41 მუშა, რომლებმაც 17 დღე გვირაბის ნანგრევებში გაატარეს
ინდოეთში ჰიმალაის მთებში ჩამონგრეული გვირაბის ქვეშ მოყოლილი მუშების გადარჩენის ოპერაცია დასრულდა. ოპერაცია 17 დღეს გაგრძელდა. 28 ნოემბერს ღამით, მაშველებმა ნანგრევებიდან უვნებლად ამოიყვანეს 41-ვე მუშა. ინდოეთის ჩრდილოეთში მდებარე უტარახანდის შტატში, ერთ-ერთ ჩქაროსნულ ავტომაგისტრალზე მშენებარე გვირაბი 12 ნოემბერს ჩამოინგრა. ასეულობით მეტრის სიღრმეზე მოყოლილთა გადარჩენის ოპერაციის პირველ ეტაპზე მაშველებმა შეძლეს და ტონობით ნანგრევებში გააკეთეს ხვრელი, საიდანაც მუშებს ჟანგბადს, საკვებს და მედიკამენტებს აწვდიდნენ. მათ გადარჩენას ხელი შეუწყო იმ გარემოებამ, რომ მუშების გარშემო გარკვეული სივრცე დარჩენილი იყო.
რუსეთი მოსკოვზე დრონით შეტევის შესახებ იუწყება
მოსკოვის მერმა სერგეი სობიანინმა განაცხადა, რომ რუსეთის საჰაერო თავდაცვამ 29 ნოემბერს რუსეთის დედაქალაქთან დრონი ჩამოაგდო. რუსეთის თავდაცვის სამინისტროს ცნობით, უკრაინული უპილოტო თვითმფრინავი ჩამოაგდეს ადგილობრივი დროით დილის 7:30 საათზე პოდოლსკის რაიონში, მოსკოვის სამხრეთით დაახლოებით 20 კილომეტრში. სობიანინის თქმით, თვითმფრინავის ნამსხვრევების შეჯახების ადგილზე ზიანი ან მსხვერპლი არ დაფიქსირებულა. უკრაინული მედია წერს, რომ ცნობების დამოუკიდებლად გადამოწმება ვერ ხერხდება. უკრაინის ოფიციალურმა პირებმა მომხდარ ინციდენტზე კომენტარი არ გააკეთეს. გავრცელებული ინფორმაციით, 26 ნოემბერს, უკრაინამ რუსეთს დაახლოებით 35 თვითმფრინავით შეუტია რუსეთის მიერ ერთი დღით ადრე უკრაინის წინააღმდეგ განხორციელებული მასობრივი თავდასხმის საპასუხოდ. რუსეთი ამტკიცებდა, რომ 24 უკრაინული დრონი ჩამოაგდო. რუსეთის მიერ უკრაინაში წარმოებული ომის ფონზე, რუსეთის სხვადასხვა რეგიონზე, მათ შორის მოსკოვსა და მოსკოვის ოლქზე, უპილოტო საფრენი აპარატებით შეტევა განსაკუთრებით 2023 წლის გაზაფხულიდან გახშირდა.
კულებამ უკრაინის სტრატეგიული მიზანი დაასახელა
უკრაინის საგარეო საქმეთა მინისტრმა, დმიტრო კულებამ განაცხადა, რომ კიევის სტრატეგიული მიზანი უკრაინის მთელ ტერიტორიაზე კონტროლის დაბრუნებაა. დმიტრო კულებამ NATO-ს შტაბ-ბინაში საგარეო საქმეთა მინისტრების დონეზე შემდგარ უკრაინა-NATO-ს საბჭოს პირველი შეხვედრის წინ აღნიშნა, რომ რუსეთთან ტერიტორიული კომპრომისები არ იქნება. „ჩვენი სტრატეგიული მიზანი, 1991 წლის საზღვრებზე კონტროლის აღდგენა, უცვლელი რჩება და მის განხორციელებაში ხელს არაფერი შეგვიშლის. ადამიანებმა, ვინც ამას გვთავაზობენ, უპირველეს ყოვლისა, თავიანთ მთავრობებს იგივე უნდა შესთავაზონ, გადასცენ სხვას თავისი ტერიტორიისა და ხალხის ნაწილი. გააკეთონ ეს და ვნახოთ, რამდენად შესაძლებელია ამაზე საუბარი,“ - აღნიშნა უკრაინის საგარეო საქმეთა მინისტრმა.
იაპონიის სანაპიროსთან ამერიკული სამხედრო თვითმფრინავი ჩამოვარდა
ამერიკული სამხედრო თვითმფრინავი რომელშიც 8 ადამიანი იმყოფებოდა, სამხრეთ იაპონიის მახლობლად ოკეანეში ჩამოვარდა. იაპონიის თავდაცვის სამინისტროს ინფორმაციით, შემთხვევა კაგოშიმის პრეფექტურის კუნძულ იაკუშიმასთან ახლოს მოხდა. ამერიკული სამხედრო თვითმფრინავი იოკოტის საჰაერო ბაზას ეკუთვნოდა და ოკინავასკენ მიფრინავდა. ოფიციალური პირების ინფორმაციით, ბორტზე მყოფი პირების სტატუსი უცნობია და იაპონიის სანაპირო დაცვა ადგილზე სამძებრო-სამაშველო სამუშაოს ატარებს. კატასტროფამდე იაკუშიმის აეროპორტმა ამერიკელი სამხედროებისგან მიიღო შეტყობინება, რომ თვითმფრინავს საგანგებო ვითარებაში დაშვება სჭირდებოდა. სხვა დეტალები ჯერჯერობით უცნობია.
