ძებნის რეზულტატი:
უკრაინამ პრორუსი პროპაგანდისტები და რუსეთის სამხედრო-სამრეწველო კომპლექსის მხარდამჭერი კომპანიები დაასანქცირა
უკრაინის პრეზიდენტმა ვოლოდიმირ ზელენსკიმ ხელი მოაწერა ორ დადგენილებას, რომლითაც ძალაში შევიდა უკრაინის ეროვნული უშიშროებისა და თავდაცვის საბჭოს მიერ პერსონალური, ეკონომიკური და სხვა შემზღუდავი ზომების გამოყენების შესახებ მიღებული გადაწყვეტილებები. პირველი დადგენილება ეხება პრორუს პროპაგანდისტებს - 14 პირს, რომლებიც ამართლებენ რუსეთის შეიარაღებულ აგრესიას, უარყოფენ უკრაინის ტერიტორიების ოკუპაციას და ფინანსდებიან დონბასის დროებით ოკუპირებულ ტერიტორიებზე ქვანახშირის სამრეწველო სფეროდან მიღებული მოგებით. მეორე დადგენილება სანქციებს უწესებს რუსეთის სამხედრო-სამრეწველო კომპლექსის მწარმოებლებსა და მომწოდებლებს - 10 ფიზიკურ და 31 იურიდიულ პირს, რომლებიც რუსეთის, ჩინეთისა და ირანის რეზიდენტები არიან. მათ შორის არიან კომპანიები, მათი აღმასრულებლები და მფლობელები, რომლებიც მონაწილეობენ რუსეთისთვის აღჭურვილობისა და კომპონენტების მიწოდებაში სანქციების გვერდის ავლით. სანქციები ასევე გამოყენებულია ირანის სახელმწიფო ორგანოებისა და იურიდიული პირების მიმართ, რომლებმაც რუსეთს სამხედრო პროდუქცია მიაწოდეს. „უკრაინა აგრძელებს მუშაობას სანქციების ახალი ნაბიჯების დანერგვაზე. ჩვენი ქვეყნის მთავარ პრიორიტეტებს შორისაა რუსეთის თავდაცვის ინდუსტრიისთვის კომპონენტების მიწოდების თავიდან აცილება, ნავთობიდან შემოსავლების შემცირება, ჩრდილოვანი ფლოტის წინააღმდეგ ბრძოლა და რუსული პროპაგანდის წინააღმდეგ ბრძოლა. წლის დასაწყისიდან მოყოლებული, ჩვენ 11 სანქციის პაკეტი სინქრონიზებული გვაქვს ჩვენს პარტნიორებთან - ექვსი - ევროკავშირელ კოლეგებთან. ასევე ამერიკის შეერთებულ შტატებთან, კანადასთან და გაერთიანებულ სამეფოსთან. მომავალ თვეში ჩვენ დავასრულებთ სინქრონიზაციის მიმართულებით ძალისხმევის გაწევას. ჩვენ შევასრულებთ ჩვენს ყველა გეგმას და ვალდებულებას. ახლა ჩვენთვის ძალიან მნიშვნელოვანია დიდი შვიდეულის ქვეყნებს შორის კოორდინაციის უზრუნველყოფა,“ - განაცხადა უკრაინის პრეზიდენტმა ვოლოდიმირ ზელენსკიმ სანქციებთან დაკავშირებით გამართულ ბრიფინგზე.
ხუთი წლის განმავლობაში პირველად, რუსეთის რკინიგზა წამგებიანი გახდა
სახელმწიფო მონოპოლიის ფინანსური ანგარიშგების თანახმად, 2020 წლის შემდეგ პირველად, რუსეთის რკინიგზა ზარალით მუშაობს. 2025 წლის იანვრიდან სექტემბრამდე რუსეთის რკინიგზამ 4.4 მილიარდი რუბლი დაკარგა, წინა წლის ანალოგიურ პერიოდში 44 მილიარდი მოგების ფონზე. კომპანიამ პირველი კვარტალი 13.3 მილიარდი რუბლის მოგებით დაასრულა, მაგრამ მას შემდეგ 17.7 მილიარდი რუბლის წმინდა ზარალი განიცადა, რაც წლის დასაწყისის მოგებას აღემატება. ფინანსური ანგარიშგების თანახმად, რუსეთის რკინიგზამ პირველი ცხრა თვის განმავლობაში ოპერაციული საქმიანობიდან 165.6 მილიარდი რუბლის წმინდა ფულადი ნაკადი გამოიმუშავა. ეს თანხა საკმარისი არ აღმოჩნდა მისი საინვესტიციო ხარჯების მეოთხედის დასაფარადაც კი, რომელიც სულ 705.8 მილიარდ რუბლს შეადგენდა. რუსეთის რკინიგზამ ფულადი დეფიციტი ვალების და რეზერვების ამოწურვის გზით დაფარა: მონოპოლიის ფულადი რეზერვები იანვრიდან სექტემბრამდე 12-ჯერ შემცირდა, 251.6 მილიარდიდან 21.7 მილიარდ რუბლამდე. „ზარალი, პირველ რიგში, მაღალი საპროცენტო განაკვეთის გამო გაზრდილი სესხების ხარჯებით არის განპირობებული,“ - განუმარტეს კომპანიაში RBC-ს. პირველი ცხრა თვის განმავლობაში რუსეთის რკინიგზამ ვალზე პროცენტის სახით 332,2 მილიარდი რუბლი გადაიხადა, რაც ორჯერ აღემატება ერთი წლით ადრე გადახდილ თანხას (158,1 მილიარდი). რუსეთის რკინიგზის მთლიანმა ვალმა 1,75 ტრილიონ რუბლს მიაღწია. წლის დასაწყისიდან ის 330 მილიარდი რუბლით, ხოლო 2023 წლის დასაწყისიდან 715 მილიარდით გაიზარდა. რუსეთის რკინიგზის ბიუჯეტი ტვირთბრუნვის მკვეთრი შემცირების გამო ივსება, რომელიც უკრაინაში რუსეთის შეჭრიდან მალევე დაიწყო და უკვე მეოთხე წელია, გრძელდება. 2022 წელს რუსეთის რკინიგზის ქსელის ტვირთბრუნვის მოცულობა 3,9%-ით, 2023 წელს 0,2%-ით, ხოლო 2024 წელს 4,1%-ით შემცირდა, რაც ბოლო 15 წლის განმავლობაში რეკორდული მაჩვენებელია. 2025 წლის იანვრიდან სექტემბრამდე, რუსეთის რკინიგზის გადაზიდვები წინა წელთან შედარებით, კიდევ 6.7%-ით შემცირდა. თითქმის ყველა ტვირთის კატეგორიამ განიცადა კლება. მონოპოლისტმა ასევე დააფიქსირა მარცვლეულის გადაზიდვების რეკორდული კლება 26.6%-ით. ბიუჯეტური პრობლემების გამო, რუსეთის რკინიგზამ ინვესტიციები ერთი მესამედით შეამცირა, ზოგიერთი თანამშრომელი იძულებით ანაზღაურების გარეშე შვებულებაში გაგზავნა (თვეში ორი დღე) და ოქტომბერში იძულებული გახდა, თანამშრომლების გათავისუფლება დაეწყო.
მედია: რუსი მილიარდერისთვის ჩამორთმეული იახტა ტრამპის ბიზნესპარტნიორმა შეიძინა
რუსეთის სახელმწიფო სათათბიროს წევრ სულეიმან კერიმოვის საკუთრებაში არსებული 106-მეტრიანი სუპერიახტა Amadea აშშ-ის ხელისუფლების ბრძანებით, 10 სექტემბერს აუქციონზე გაიყიდა. გემის ახალი მფლობელი დუბაიდან, მილიარდერ ჰუსეინ საჯვანის ოჯახი გახდა. 10 ოქტომბრიდან Amadea-ს მფლობელი ბრიტანეთის ვირჯინიის კუნძულებზე რეგისტრირებული კომპანია Beyond Holdings Group-ია, იტყობინება Verstka Equasis მონაცემთა ბაზაზე დაყრდნობით. მიმდინარე წლის მარტამდე Beyond Holdings Group ცნობილი იყო, როგორც AHS Four Company. ახალი კომპანია, რომელმაც Amadea შეიძინა, რეგისტრირებულია დუბაის ბარშა ჰაითსის რაიონში მდებარე Executive Heights-ის საოფისე კომპლექსში, რომელიც Damac Group-ის საკუთრებაა. აბრევიატურა „AHS“, სავარაუდოდ, აბას ჰუსეინ საჯვანის ნიშნავს. შესაბამის პორტალებზე ჩამონათვალში გვხვდება კომპანია სახელწოდებით „AHS Four Company Yacht“, რომელიც 66-მეტრიან იახტა AHS-თან არის დაკავშირებული. ის აბას ჰუსეინ საჯვანის, დეველოპერული კომპანია Damac Properties-ის საბჭოს წევრს და ჰუსეინ საჯვანის შვილს ეკუთვნოდა. ჰუსეინ საჯვანი DAMAC ჯგუფის დამფუძნებელი და თავმჯდომარეა, რომელიც ახლო აღმოსავლეთში ერთ-ერთი უდიდესი დეველოპერია და სპარსეთის ყურეში, დიდ ბრიტანეთსა და აშშ-ში უძრავი ქონების განვითარებაშია სპეციალიზირებული. საჯვანი დიდი ხანია ცნობილია, როგორც დონალდ ტრამპის ახლო თანამოაზრე. ის 2017 წელს ტრამპის ინაუგურაციას დაესწრო და ტრამპმა მას „დიდი კაცი“ და „ოჯახის მეგობარი“ უწოდა. ტრამპის მიერ 2017 წელს წარდგენილი დოკუმენტების თანახმად, მან Damac-თან ერთობლივი პროექტიდან 5 მილიონი დოლარი გამოიმუშავა. კომპანიამ დუბაიში Trump International Golf Club გახსნა, ხოლო ტრამპის 2024 წლის არჩევნებში გამარჯვების შემდეგ, ბიზნესმენი კვლავ ეწვია ამერიკას. ერთობლივ პრესკონფერენციაზე მათ Damac-ის გეგმების შესახებ გამოაცხადეს, რაც შეერთებულ შტატებში მონაცემთა ცენტრების მშენებლობაში 20 მილიარდი დოლარის ინვესტიციის ჩადებას გულისხმობდა. იახტა „ამადეა“ ფიჯიზე 2022 წლის მაისში, შეერთებული შტატების მოთხოვნით, სანქციების გამო ჩამოართვეს კარიმოვს და მოგვიანებით სან დიეგოში გადაიყვანეს. 2025 წლის ივნისში ნიუ-იორკის ფედერალურმა სასამართლომ მისი გაყიდვა დაამტკიცა და გემი იმავე შემოდგომაზე აუქციონზე გაიტანეს. აშშ-ის იუსტიციის დეპარტამენტმა იახტის ღირებულება 300 მილიონ დოლარამდე შეაფასა, მაგრამ დამოუკიდებელმა ექსპერტებმა მისი ღირებულება 230 მილიონ დოლარამდე შეამცირეს. გაყიდვის საბოლოო ფასი არ გახმაურებულა. გერმანული გემთმშენებელი ქარხნის „ლიურსენის“ მიერ აშენებული სუპერიახტა თავისი ფუფუნებით გამოარჩევენ. ბორტზე ექვსი გემბანია, საცურაო აუზი, ჯაკუზი, ორი სპა, კინოთეატრი, საკონფერენციო დარბაზი, სპორტული დარბაზი, ღვინის მარანი და უნიკალური Pleyel-ის როიალი, რომელიც ხელით არის მოხატული და 24-კარატიანი ოქროთი მოჭედილი. იახტის ეკიპაჟის ერთ-ერთ წევრს რუსი მილიარდერის საყვარელი სპორტული ფეხსაცმლის წყვილის ხელმისაწვდომ ადგილას შენახვა დაევალა. საჯვანი ტრამპის მეორე ბიზნესპარტნიორია, რომელმაც იახტა ყოფილი რუსი მფლობელისგან შეიძინა. ადრე, 74-მეტრიანი იახტა „კაზინო როიალი“, რომელიც ადრე რუსეთის ყოფილ პრეზიდენტ დიმიტრი მედვედევს უკავშირდებოდა, ამერიკელმა ბიზნესმენმა ჯონ სტალუპიმ შეიძინა. სტალუპი ავტომაგნატი და დონალდ ტრამპის ყოფილი თანამოაზრეა. 1988 წელს სტალუპიმ დონალდ ტრამპთან გარიგება დადო, რომლის მიხედვითაც, ლიმუზინების გაქირავების კომპანიისთვის მისი სახელის გამოყენების უფლება მოიპოვა.
მილიარდერების საერთო ქონება 10%-ით გაიზარდა
მილიარდერთა აღწერის 2025 წლის უახლესი მონაცემების თანახმად, მსოფლიოს მილიარდერების ჯამურმა ქონებამ 2024 წელს რეკორდულ 13.4 ტრილიონ დოლარს მიაღწია, რაც წინა წელთან შედარებით, 10%-ით მეტია. კვლევითი ფირმა Altrata-ს მიერ გამოქვეყნებულ ანგარიშში აღნიშნულია, რომ ეს მსოფლიოს ულტრამდიდრებს შორის ქონების ზრდის ზედიზედ მესამე წელია. მილიარდერების საერთო რაოდენობა 3,508-მდე გაიზარდა, რაც წინა წელთან შედარებით, 5.6%-ით მეტია. შეერთებულმა შტატებმა წამყვანი პოზიცია 1,135 მილიარდერით - გლობალური რაოდენობის თითქმის ერთი მესამედით შეინარჩუნა, ხოლო ევროპამ პირველად გადააჭარბა 1,000 მილიარდერის ნიშნულს, რასაც ხელი შეუწყო მსხვილი ეკონომიკების ზრდამ. Altrata-ს აღმასრულებელმა დირექტორმა ბრაიან ალსტერმა განაცხადა, რომ მონაცემები აჩვენებს, რომ მილიარდერთა პოპულაცია დინამიური რჩება, რაც ტექნოლოგიების, ბაზრებისა და გეოპოლიტიკის ცვლილებებით არის განპირობებული.
ინდოეთმა და აშშ-მ თავდაცვის 10-წლიან პაქტს მოაწერეს ხელი
აშშ-მა და ინდოეთმა თავდაცვის 10-წლიან ჩარჩოხელშეკრულებას ხელი მოაწერეს. ამის შესახებ აშშ-ის თავდაცვის მდივანმა, პიტ ჰეგსეტმა განაცხადა. ხელშეკრულებას ხელი მოაწერეს პიტ ჰეგსეტმა და ინდოეთის თავდაცვის მინისტრმა, რაჯნატ სინგჰმა. „ეს ხელს უწყობს თავდაცვის სფეროში ჩვენი პარტნიორობის წინსვლას, რაც რეგიონული სტაბილურობისა და შეკავების ქვაკუთხედია. ჩვენ ვაძლიერებთ კოორდინაციას, ინფორმაციის გაზიარებასა და ტექნოლოგიურ თანამშრომლობას. ჩვენი თავდაცვის კავშირები არასდროს ყოფილა ასეთი ძლიერი,“ – წერს ჰეგსეტი. შეთანხმება მოჰყვა თვეების განმავლობაში დაძაბულ ურთიერთობებს მას შემდეგ, რაც ვაშინგტონმა ინდოეთის ექსპორტზე ტარიფები დააწესა. ორივე მხარემ მას შემდეგ ნდობის აღდგენაზე იმუშავა.
ტრამპი ნიგერიის მთავრობას აფრთხილებს
აშშ-ის პრეზიდენტმა დონალდ ტრამპმა ნიგერიაში ისლამისტი მებრძოლი დაჯგუფებების წინააღმდეგ ბრძოლისთვის მომზადების ბრძანება გასცა და ნიგერიის მთავრობა ქრისტიანების დაცვის უუნარობაში დაადანაშაულა. ამის შესახებ დონალდ ტრამპი სოციალურ ქსელში წერს. BBC-ის ცნობით, ტრამპმა არ დააკონკრეტა, თუ რომელ მკვლელობებს გულისხმობდა, თუმცა ბოლო კვირებისა და თვეების განმავლობაში, ნიგერიის ქრისტიანების წინააღმდეგ გენოციდის შესახებ ბრალდებები გავრცელდა აშშ-ის ზოგიერთ მემარჯვენე წრეში. „ნიგერიის მთავრობა ქრისტიანების მკვლელობას კვლავ თუ დაუშვებს, აშშ დაუყოვნებლივ შეუწყვეტს ნიგერიას ყოველგვარ დახმარებას და, შესაძლოა, „ცეცხლითა და მახვილით“ შევიდეს ამ ახლა უკვე შერცხვენილ ქვეყანაში, რათა მთლიანად გაანადგუროს ისლამისტი ტერორისტები, რომლებიც ამ საშინელ სისასტიკეს იჩენენ. ამით ვაძლევ მითითებას ჩვენს ომის დეპარტამენტს, მოემზადოს შესაძლო მოქმედებისთვის. ჩვენ თავს თუ დავესხმებით, ეს იქნება სწრაფი და სასტიკი ისევე, როგორც ტერორისტი ბანდიტები ესხმიან თავს ჩვენს ძვირფას ქრისტიანებს! გაფრთხილება: ნიგერიის მთავრობამ უნდა იმოქმედოს სწრაფად!“- წერს ტრამპი. „ომის დეპარტამენტი მოქმედებისთვის ემზადება. ან ნიგერიის მთავრობა დაიცავს ქრისტიანებს, ან ჩვენ მოვკლავთ ისლამისტ ტერორისტებს, რომლებიც ამ საშინელ სისასტიკეს სჩადიან,“ - გამოეხმაურა ტრამპის გზავნილს პენტაგონის ხელმძღვანელი პიტ ჰეგსეთი. აშშ-ის პრეზიდენტის შეფასებით, ნიგერიაში ქრისტიანობა ეგზისტენციალური საფრთხის წინაშე დგას და რადიკალი ისლამისტები არიან პასუხისმგებელი „მასობრივ ხოცვა-ჟლეტაზე“. 31 ოქტომბერს დონალდ ტრამპმა სოციალურ ქსელში დაწერა, რომ ნიგერიაში მოვლენები სახიფათოდ ვითარდება, რადგან ათასობით ქრისტიანს კლავენ. ტრამპის განცხადების საპასუხოდ, ნიგერიის მთავრობამ პირობა დადო, რომ ძალადობრივი ექსტრემიზმის წინააღმდეგ ბრძოლას გააგრძელებს და ამ მიმართულებით ვაშინგტონთან თანამშრომლობაზე მზაობა გამოთქვა. ქვეყნის საგარეო საქმეთა სამინისტროს განცხადებაშია ნათქვამია, რომ ნიგერია ღვთისმოშიში ქვეყანაა, სადაც პატივს სცემენ რწმენას, ტოლერანტობას, მრავალფეროვნებას და ინკლუზიურობას.
„ზანგეზურის დერეფანი“ TRACECA-სთვის ძალიან მნიშვნელოვანი მარშრუტია“ - გენერალური მდივანი
TRACECA-ს გენერალურმა მდივანმა ზანგეზურის დერეფანს მნიშვნელოვანი პროექტი უწოდა და აღნიშნა, რომ აქტიურად გრძელდება მუშაობა 110 კილომეტრიან ჰორადიზ-აღბენდის რკინიგზაზე, რომლის 67 კილომეტრიან მონაკვეთზე სამუშაო დასრულებულია. „დარწმუნებული ვარ, რომ „ზანგეზურის დერეფნის“ გახსნა, რომელიც ევროპას აზიასთან დააკავშირებს და, რაც მთავარია, აზერბაიჯანის ძირითად ნაწილს [მის] ნახიჩევანთან [ანკლავთან], მნიშვნელოვნად გაზრდის აზერბაიჯანის, როგორც რეგიონული სატრანსპორტო ცენტრის სტატუსს. მინდა, აღვნიშნო, რომ ზანგეზურის დერეფანი TRACECA-სთვის ძალიან მნიშვნელოვანი მარშრუტია,“ განაცხადა ასეტ ასავბაევმა. სამთავრობათაშორისო კომისიის (PS IGC) TRACECA-ს მუდმივი სამდივნოს გენერალურმა მდივანმა ევროპისა და კავკასიის სატრანსპორტო დერეფანში (TRACECA) „ზანგეზურის დერეფნის“ შესაძლო ჩართვაზე უფრო ადრეც გააკეთა კომენტარი. მისი თქმით, ხსენებული დერეფანი მნიშვნელოვან როლს ასრულებს აზერბაიჯანისა და ნახიჩევანის დამაკავშირებლად, ასევე, უზრუნველყოფს თურქეთსა და სხვა ქვეყნებთან წვდომას. TRACECA-ში მისი ჩართვა კი, მომავალში საერთაშორისო სატრანზიტო მიმოსვლისთვის კარგ პირობებს შექმნის. ასავბაევმა ხაზგასმით აღნიშნა, რომ TRACECA-ს მუდმივი სამდივნო (PS) მიესალმება რეგიონში ყველა ეკონომიკურ და სატრანსპორტო კავშირს, ასევე, ზოგიერთი მარშრუტის განვითარებას. „ყველა ეს მოვლენა სატრანსპორტო მარშრუტების დივერსიფიკაციას უზრუნველყოფს. ჩვენი აზრით, სატრანსპორტო კომუნიკაციების ადრეული გახსნა გაზრდის რეგიონის გამტარუნარიანობას და ქვეყნებს საშუალებას მისცემს, ისარგებლონ გარკვეული სატრანზიტო ტვირთების მოზიდვით. ამ დერეფნის გახსნის საკითხები პოლიტიკური ჩარჩოდან გამომდინარეობს. აუცილებელია, გადაწყდეს დერეფნის გამტარუნარიანობასთან, საკონტროლო პუნქტებთან, საჭირო ინვესტიციების მოცულობასთან და სხვა რიგ ასპექტებთან დაკავშირებული საკითხები, რომლებიც მნიშვნელოვანია „ზანგეზურის დერეფნის“ სტაბილური ფუნქციონირებისთვის,“ - განაცხადა გენერალურმა მდივანმა. ცნობისთვის, TRACECA არის საერთაშორისო სატრანსპორტო პროგრამა, რომელშიც ევროკავშირი და აღმოსავლეთ ევროპის, კავკასიისა და ცენტრალური აზიის რეგიონის 12 წევრი ქვეყანაა ჩართული. პროგრამის მიზანია ეკონომიკური ურთიერთობების, ვაჭრობისა და ტრანსპორტის გაძლიერება შავი ზღვის აუზის, სამხრეთ კავკასიისა და ცენტრალური აზიის რეგიონებში. ევროპა-კავკასია-აზიის სატრანსპორტო დერეფანი 1993 წელს, ბრიუსელის დეკლარაციის საფუძველზე, საქართველოს, აზერბაიჯანის, სომხეთის, ყაზახეთის, ყირგიზეთის, თურქმენეთისა და უზბეკეთის მონაწილეობით შეიქმნა. ფაშინიანის თქმით, ტერმინი „ზანგეზურის დერეფანი“ „კონფლიქტის ნარატივთან ასოცირდება“
მეუფე შიო: თუ ჩვენს თავში ჯერ კიდევ ვხედავთ ამ უმოწყალო მდიდრის თვისებებს, გონს მოვიდეთ
„ვინ ვართ ჩვენ - მდიდარი თუ ლაზარე? და თუ ჩვენს თავში ჯერ კიდევ ვხედავთ ამ უმოწყალო მდიდრის თვისებებს, გონს მოვიდეთ, სანამ კიდევ გვაქვს ფიზიკური და სულიერი ძალები, რომ ფერი ვიცვალოთ და გამოვსწორდეთ... ამის შესახებ საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი)სულთმოფენობიდან ოცდამეერთე კვირას, ღირსი გაბრიელ აღმსარებლისა და სალოსის ხსენების დღეს ქადაგების დროს განაცხადა: „დღეს წაკითხული იყო იგავი სახარებიდან მდიდარსა და ლაზარეზე. ეს ორი ადამიანია, ორი სახეა წარმოდგენილი ჩვენ წინაშე. მდიდარს საერთოდ არ ენაღვლებოდა, რომ მის კართან იწვა მძიმე ავადმყოფი და გლახაკი, სრულიად გულგრილი იყო მისი ბედისადმი. ლაზარე კი ძალიან მოკრძალებული იყო. მას ის კი არ უნდოდა, რომ მდიდრის სუფრიდან ლანგრით მიეტანათ მისთვის საჭმელი, არამედ, იმას ნატრობდა, რომ ძირს დაცვენილი ნამცეცი მაინც შეხვედროდა. იმდენად ავად იყო, რომ სიარულიც კი არ შეეძლო. ამ მდიდარს ეს ამბავი სრულიად არ აღელვებდა, ის იმდენად გართული იყო თავისი ნადიმებით და ფუფუნებით. გარდაცვალების შემდეგ ყველაფერი შეიცვალა, ღარიბი აღმოჩნდა აბრაამის წიაღში, მდიდარი კი - ცეცხლოვან გეენიაში, ჯოჯოხეთში. რატომ მოხდა ასე? რაზეა ეს იგავი, საერთოდ? ეს იგავი არის მოწყალებაზე. ასე იმიტომ მოხდა, ძვირფასო ძმებო და დებო, რომ ღმერთი არის მოწყალე. მხოლოდ გულმოწყალე, მოწყალე გულის მქონე ადამიანმა შეიძლება, დაიმკვიდროს სასუფეველი. ვერცერთი ულმობელი, ვერცერთი უსიყვარულო, სასტიკი, ბოროტი ადამიანი სასუფეველს ვერ დაიმკვიდრებს, რაგინდ ბევრი დამსახურება ჰქონდეს ამ დედამიწაზე, იმიტომ, რომ ცათა სასუფეველი არ არის ის, რაც გაიცემა რაღაც დამსახურებების სანაცვლოდ, არამედ ცათა სასუფევლის დამკვიდრებისთვის საჭიროა, ისე მოვალბოთ ჩვენი გული, რომ მასში შემოვიდეს სულიწმინდის მადლი, რომელიც ფერს უცვლის ადამიანს და ხარბიდან გადააქცევს ხელგაშლილად, ამპარტავნიდან - თავმდაბლად, შურიანიდან - მოსიყვარულედ, ნაყროვანიდან - მმარხველად და ა. შ. არცერთი ულმობელი ადამიანისთვის, ვინც არ არის მოწყალე გულის მქონე, ეს ფერისცვალება შესაძლებელი არ არის. ვერ მოხდება ეს სასწაული მის სულში. ვიმეორებ: რატომ? - იმიტომ, რომ ასეთი ადამიანის სულში სულიწმინდის მადლი ვერ შემოდის. ამიტომ, მთელი ცხოვრება უნდა იღვაწოს ადამიანმა ქმედით სიყვარულში, რომ ეს ლმობიერება და მოწყალება ისწავლოს. სწორედ ამაზეა დღევანდელი იგავი, რომ ვისწავლოთ ეს თვისებები, ეს სათნოებები და ჩვენი ცხოვრების შედეგად ამ მდიდრის მსგავსად არ აღმოვჩნდეთ ცეცხლოვან გეენიაში, არამედ, მოვემზადოთ მარადისობასთან შესახვედრად. ეს ცხოვრება იმისთვის გვაქვს მოცემული, რომ ღირსეულად მოვემზადოთ მარადისობაში გადასვლისთვის, როცა იქნება სამსჯავრო ჩვენი, როცა წარვდგებით სამსჯავროზე. თუმცა სამსჯავრო არის მთელი ცხოვრება, ადამიანი ამ ცხოვრებაშივე გამოუტანს განაჩენს თავის თავს და აკეთებს არჩევანს, თუ სად იქნება მარადისობაში. თუ ამ ცხოვრებაში შეიძინე შური, უმოწყალობა, სიძვა, ვერცხლისმოყვარეობა, ამპარტავნება და სხვა ასეთი ვნებები, მარადისობაშიც თან წაგყვება ეს თვისებები, იქაც ასეთი იქნები. მაგრამ უფალს უნდა, რომ შეიძინო სიმდაბლე, სიყვარული, ლოცვა, მოთმინება, სულგრძელება, მოწყალება. რატომ? - იმიტომ, რომ თვითონ არის ასეთი უფალი ჩვენი იესო ქრისტე; და თუ ეს თვისებები გექნება, მაშინ ის თავისთან წაგიყვანს და გაცხონებს. ძვირფასო ძმებო და დებო, მაგრამ ეს ადამიანის დახმარების გარეშე შეუძლებელია. თუ ადამიანს ეს არ უნდა, ყველაფერი ამაო იქნება, ხოლო თუ უნდა და იღვწის ამისთვის, მაშინ უფალი აუცილებლად შეეწევა მას, განკურნავს ამ ვნებებისგან და აცხონებს. ასე რომ, დავფიქრდეთ ამ იგავზე: ვინ ვართ ჩვენ - მდიდარი თუ ლაზარე? და თუ ჩვენს თავში ჯერ კიდევ ვხედავთ ამ უმოწყალო მდიდრის თვისებებს, გონს მოვიდეთ, სანამ კიდევ გვაქვს ფიზიკური და სულიერი ძალები, რომ ფერი ვიცვალოთ და გამოვსწორდეთ.“ „დღეს, დღევანდელ მსოფლიოში, როდესაც ასეთი სულიერი ძნელბედობაა, ჩვენ განსაკუთრებით გვამხნევებს ღირსი გაბრიელის სიტყვები, რომ სულიწმინდის მადლს არასდროს დაუტოვებია საქართველო, საქართველოს არასდროს მოჰკლებია სულიწმინდის მადლი და არც არასდროს მოაკლდება.“
გერმანიამ უკრაინას Patriot-ის სისტემები გადასცა
უკრაინის პრეზიდენტმა ვოლოდიმირ ზელენსკიმ დაადასტურა, რომ ბერლინმა კიევს Patriot-ის დამატებითი საჰაერო თავდაცვის სისტემები მიაწოდა. უკრაინის პრეზიდენტი აღნიშნავს, რომ უკრაინის საჰაერო თავდაცვის გაძლიერება ომის დასრულებისკენ გადადგმული მნიშვნელოვანი ნაბიჯია. „რუსეთის საჰაერო დარტყმები არის პუტინის მთავარი ფსონი ამ ომში - ტერორის გზით ის ცდილობს თავისი გიჟური მიზნების მიღწევაში საკუთარი უუნარობის კომპენსაციას. შესაბამისად, ჩვენი ანტისაჰაერო თავდაცვის გაძლიერებისკენ გადადგმული ყოველი ნაბიჯი პირდაპირ გვაახლოებს ომის დასრულებასთან, რომელსაც ველოდებით. რაც ნაკლებს მიაღწევს რუსეთი, მით უფრო დიდი იქნება მისი მოტივაცია დაასრულოს ეს ომი. მადლობას ვუხდი გერმანიას და პირადად კანცლერ ფრიდრიხ მერცს მისი ამ ერთობლივი ნაბიჯისთვის რუსეთის ტერორისგან ადამიანების სიცოცხლის დასაცავად. გარკვეული ხნის განმავლობაში ვამზადებდით ჩვენი ანტისაჰაერო თავდაცვის გაძლიერებას და ახლა მიღწეული შეთანხმებები სრულდება. მადლობას ვუხდი ყველას, ვინც ამ ძალისხმევაში წვლილი შეიტანა!" ამბობს ვოლოდიმირ ზელენსკი.
Reuters: თურქეთი რუსული ნავთობის იმპორტს ამცირებს
თურქეთის უმსხვილესმა ნავთობგადამამუშავებელმა ქარხნებმა რუსეთის წინააღმდეგ ბოლო დროს დაწესებული დასავლური სანქციების საპასუხოდ, მეტი რაოდენობით არარუსული ნავთობის შესყიდვა დაიწყეს. ინფორმაცია Reuters-მა საკითხთან უშუალოდ დაკავშირებულ ორ პირსა და ინდუსტრიის რამდენიმე წყაროზე დაყრდნობით გაავრცელა. წყაროების ცნობით, თურქეთის ერთ-ერთმა უმსხვილესმა ნავთობგადამამუშავებელმა ქარხანამ, SOCAR Turkey Aegean Refinery-მ (STAR), რომელიც აზერბაიჯანულ კომპანია SOCAR-ს ეკუთვნის, ცოტა ხნის წინ დეკემბრის მიწოდებისთვის ერაყიდან, ყაზახეთიდან და სხვა არარუსული მწარმოებლებიდან ნავთობის ოთხი პარტია შეიძინა. Reuters-ის გათვლებით, ეს არარუსული მარაგების 77,000–129,000 ბარელს შეადგენს დღეში, რაც იმას ნიშნავს, რომ SOCAR -ი ნაკლებ რუსულ ნავთობს გამოიყენებს. კიდევ ერთი მსხვილი თურქული ნავთობგადამამუშავებელი ქარხანა, Tupras, ზრდის არარუსული წარმოების ნავთობპროდუქტების შესყიდვებს. წყაროების ცნობით, Tupras-ი, რომელიც თურქეთში ორ მსხვილ ნავთობგადამამუშავებელ ქარხანას ფლობს, სავარაუდოდ, მალე სრულად შეწყვეტს რუსული ნავთობის იმპორტს თავის ერთ-ერთ ნავთობგადამამუშავებელ ქარხანაში, რათა გააგრძელოს საწვავის ექსპორტი ევროპაში ევროკავშირის ახალი სანქციების დარღვევის გარეშე. თურქეთი რუსეთის ერთ-ერთი მთავარი ნავთობის შემსყიდველია ჩინეთთან და ინდოეთთან ერთად. 25 სექტემბერს, აშშ-ის პრეზიდენტმა დონალდ ტრამპმა თურქეთის ლიდერ რეჯეფ ერდოღანთან შეხვედრის დროს განაცხადა, რომ მას სურს, რომ ანკარამ შეწყვიტოს რუსული ნავთობის შეძენა.
ვუჩიჩი არ არის წინააღმდეგი, ევროპამ სერბეთიდან უკრაინისთვის საბრძოლო მასალა შეიძინოს
სერბეთის პრეზიდენტმა განაცხადა, რომ სერბეთის საბრძოლო მასალის მარაგი სავსეა და მან ევროკავშირს გრძელვადიანი მიწოდების კონტრაქტები შესთავაზა. ვუჩიჩმა აღნიშნა, რომ მყიდველებს შეუძლიათ საბრძოლო მასალის გამოყენება „როგორც სურთ“, მათ შორის - უკრაინაში. „მიუხედავად იმისა, რომ არ მინდა, ისეთი შთაბეჭდილება შეიქმნას, თითქოს, ომში მყოფ ქვეყანას საბრძოლო მასალით ვამარაგებ, ევროპას საბრძოლო მასალა სჭირდება. შევთავაზე ჩვენს მეგობრებს ევროპაში, შეთანხმება დადონ და ჩვენგან შეიძინონ ყველაფერი, რაც გვაქვს. ეს გრანდიოზული წვლილი იქნება ევროპის უსაფრთხოებისთვის,“ – განაცხადა ვუჩიჩმა. როდესაც ჰკითხეს სერბეთიდან შეძენილი საბრძოლო მასალის უკრაინაში გადაცემის შესაძლებლობის შესახებ, ვუჩიჩმა უპასუხა, რომ მყიდველებს შეეძლებათ, რაც სურთ, ის გააკეთონ. „გრძელვადიანი კონტრაქტები გვჭირდება. ყოველთვის ვამბობდი, რომ სერბეთი ნეიტრალური ქვეყანაა, მაგრამ აბსოლუტურად მზად ვართ, ვითანამშრომლოთ ევროპელებთან,“ – აღნიშნა სერბეთის პრეზიდენტმა. ის ამჟამად ევროპული ქვეყნებისგან პასუხს ელოდება.
უზბეკეთი აშშ-ის მოქალაქეებისთვის უვიზო რეჟიმს 2026 წლიდან აამოქმედებს
პრეზიდენტის განკარგულებით, უზბეკეთი 2026 წლის პირველი იანვრიდან გააუქმებს ვიზების მოთხოვნას შეერთებული შტატების მოქალაქეებისთვის. ეს ღონისძიება აშშ-ის მოქალაქეებს საშუალებას მისცემს, უზბეკეთში უვიზოდ 30 დღემდე დარჩნენ. ამჟამად, აშშ-ის მოქალაქეების უმრავლესობას უზბეკეთში ტურისტული ან საქმიანი მიზნით შესასვლელად ვიზა სჭირდება, თუმცა რსებობს გამონაკლისი: 55 წლის და უფროსი ასაკის აშშ-ის მოქალაქეები უკვე სარგებლობენ 30-დღიანი უვიზო რეჟიმით, ხოლო 16 წლამდელებს შეუძლიათ უზბეკეთში უვიზოდ ყოფნა ტურისტული მიზნით არაუმეტეს 90 დღის ვადით, იმ პირობით, რომ ისინი წარმოადგენენ მოქმედ პასპორტს ან ბიომეტრიულ სამგზავრო დოკუმენტს და ასევე, მათ თან უნდა ახლდეთ მათი კანონიერი მეურვეები.
დემოკრატი ზოჰრან მამდანი ნიუ-იორკის არჩეული მერია
„ჩვენ პოლიტიკური დინასტია დავამხეთ“ - ნიუ-იორკის მერის არჩევნებში 34 წლის ზოჰრან მამდანიმ გაიმარჯვა. 34 წლის მამდანი, რომელიც თავს სოციალისტს უწოდებს და რომელსაც პრეზიდენტი ტრამპი კომუნისტად მოიხსენიებს, 1892 წლის შემდეგ, ქალაქის ყველაზე ახალგაზრდა და პირველი მუსლიმი მერი გახდა. „პოლიტიკური სიბნელის ამ მომენტში ნიუ-იორკი იქნება სინათლე,“ - ამბობს მამდანი გამარჯვების სიტყვაში, სადაც ის პირდაპირ ტრამპს მიმართავს. "თუ ვინმეს შეუძლია, რომ დონალდ ტრამპის მიერ ნაღალატევ ერს აჩვენოს, თუ როგორ დაამარცხოს იგი, ეს სწორედ ის ქალაქია, რომელმაც ის წარმოშვა. დესპოტის შეშინების გზა თუ არსებობს, ეს არის იმ პირობების განადგურება, რომლებმაც მას ძალაუფლების მოპოვების საშუალება მისცეს. ეს არ ეხება მხოლოდ იმას, როგორ შევაჩეროთ ტრამპი, არამედ, როგორ შევაჩეროთ შემდეგი დესპოტი. დონალდ, ვიცი, რომ მიყურებ, სამი სიტყვა მაქვს შენთვის სათქმელი: ტელევიზორს ხმა აუწიე," - მიმართა მამდანიმ აშშ-ის ლიდერს. „ნიუ-იორკი იმიგრანტების ქალაქად დარჩება, იმიგრანტების მიერ აშენებულ, იმიგრანტების მიერ მართულ ქალაქად და დღეიდან უკვე ქალაქად, რომელსაც იმიგრანტი უხელმძღვანელებს,“ - აღნიშნა მამდანიმ. აშშ-ის პრეზიდენტი ნიუ-იორკის ფედერალური დაფინანსების შემცირებით დაიმუქრა, თუ მამდანი დამოუკიდებელ ენდრიუ კუომოს და რესპუბლიკელ კურტის სლივას დაამარცხებდა. ტრამპმა მხარდაჭერა არჩევნების წინა დღეს, ენდრიუ კუომოს გამოუცხადა. ის დემოკრატიული პარტიის პრაიმერიზში ზოჰრან მამდანისთან დამარცხდა და არჩევნებში დამოუკიდებელი კანდიდატის სტატუსით მონაწილეობდა. ნიუ-იორკის ამჟამინდელმა მერმა ერიკ ადამსმა ახალი ვადით კენჭისყრაზე უარი თქვა. დამოუკიდებელი კანდიდატი კომო აცხადებდა, რომ აშშ-ის პრეზიდენტი რეალურად არა მისი მხარდამჭერი, არამედ, მამდანის მოწინააღმდეგე იყო. არჩევნების შედეგებს გამოეხმაურა აშშ-ის პრეზიდენტი. „საარჩევნო ბიულეტენზე არ იყო დონალდ ტრამპი და „შათდაუნი“, ეს ის ორი მიზეზია, რესპუბლიკელებმა არჩევნები რატომაც წააგეს,“ – წერს დონალდ ტრამპი სოციალურ ქსელში გამოქვეყნებულ პოსტში. დონალდ ტრამპის თეთრ სახლში დაბრუნების შემდეგ, ეს პირველი არჩევნებია, სადაც დემოკრატებმა გაიმარჯვეს. შეგახსენებთ, საარჩევნო კამპანიის დროს მამდანიმ პირობა დადო, რომ გამარჯვების შემთხვევაში, ბავშვებზე ზრუნვის უნივერსალურ პირობებს შექმნიდა, სუბსიდირებულ საცხოვრებლებში ქირის გადასახადს გაყინავდა, უფასო საზოგადოებრივ ავტობუსებისა და ქალაქის მიერ მართულ სასურსათო მაღაზიების ფუნქციონირებას უზრუნველყოფდა. ხსენებული გეგმის განსახორციელებლად საჭირო თანხის დაფარვას ის გეგმავს მილიონერებისა და კორპორაციების ახალი გადასახადებით, რითაც 9 მილიარდ დოლარს მოიზიდავს. ზოჰრან მამდანი უგანდაში დაიბადა. ოჯახი ნიუ-იორკში დასახლდა, როცა ზოჰრან მამდანი შვიდი წლის იყო. უმაღლესი განათლება მიღებული აქვს ჰუმანიტარულ მეცნიერებათა ბოუდინ-კოლეჯში, რომელიც მენის შტატში მდებარეობს. ზოჰრან მამდანის მამა ინდოეთში დაბადებული უგანდელია, დედა - ინდოელი. მამა ისტორიკოსი და ანთროპოლოგი, კოლუმბიის უნივერსიტეტის პროფესორი მაჰმუდ მამდანია, დედა - კინორეჟისორი მირა ნაირი. 2020 წელს ზოჰრან მამდანი ნიუ-იორკის შტატის ასამბლეის წევრად აირჩიეს. 2024 წლის ოქტომბერში, როცა ნიუ-იორკის მერად კენჭისყრის გადაწყვეტილების შესახებ გამოაცხადა, ბევრი ფიქრობდა, რომ მამდანის შანსი ნულის ტოლია, თუმცა მან დამაჯერებლად გაიმარჯვა კანდიდატის შესარჩევად დემოკრატიული პარტიის მიერ ჩატარებულ პრაიმერიზში და ფავორიტად ითვლებოდა მერის არჩევნებამდე ჩატარებული გამოკითხვებითაც. მამდანიმ თავისი საარჩევნო კამპანია ააგო სოციალური საკითხების გადაჭრაზე, რაც განსაკუთრებით დაბალშემოსავლიან ამერიკელებს აწუხებთ. კამპანიისთვის მამდანი აქტიურად იყენებდა სოციალურ ქსელებს. ინფორმაციისთვის, „დემოკრატებმა“ ნიუ-იორკის გარდა სამ რბოლაში გაიმარჯვეს. აბიგაილ სპანბერგერი ვირჯინიის პირველი ქალი გუბერნატორი გახდება და კონტროლს რესპუბლიკელი გუბერნატორი გლენ იანგკინისგან გადაიბარებს, მიკი შერილი კი, ტრამპის მოკავშირე ჯეკ ჩიატარელს დაამარცხებს და ნიუ-ჯერსის პირველი ქალი „დემოკრატი“ გუბერნატორი გახდება.
აშშ-ში „შათდაუნი“ ქვეყნის ისტორიაში ყველაზე ხანგრძლივი გახდა
აშშ-ის მთავრობის ე.წ. შათდაუნმა 36-დღიან ნიშნულს გადააჭარბა და ქვეყნის ისტორიაში ყველაზე ხანგრძლივი გახდა. ამერიკის შეერთებულ შტატებში ე.წ. შათდაუნი, რომელიც დაფინანსების შეწყვეტის გამო ფედერალური უწყებების ნაწილის მუშაობის შეჩერებას ნიშნავს, 1-ელი ოქტომბრიდან გამოცხადდა. მიზეზი „დემოკრატებსა“ და „რესპუბლიკელებს“ შორის ბიუჯეტის ახალ პროექტში ჯანდაცვის ხარჯებთან დაკავშირებული აზრთა სხვადასხვაობა გახდა. მიმდინარე „შათდაუნმა“ გადააჭარბა დონალდ ტრამპის პრეზიდენტობის პირველი ვადის დროინდელ „შათდაუნის“ ხანგრძლივობას, რომელიც 2018-2019 წლის დეკემბერ-იანვრის პერიოდში, 35 დღის განმავლობაში გაგრძელდა.
ევროკომისიამ გაფართოების ყოველწლიურ ანგარიშში, საქართველოს შესახებ კრიტიკული დასკვნა გამოაქვეყნა
ევროკავშირის ელჩმა საქართველოში პაველ ჰერჩინსკიმ საქართველოს ხელისუფლებას გადასცა ანგარიში 2025 წლის გაფართოების შესახებ. ევროკავშირის წარმომადგენლობის ცნობით, ანგარიშში ასახულია სერიოზული შეშფოთება საქართველოში სიტუაციის მკვეთრი გაუარესების გამო, აღნიშნულია უპრეცედენტო უკუსვლა გაწევრიანებისთვის საჭირო ფუნდამენტური პრინციპებისა და 9 ნაბიჯის მიმართებაში. მასში ასევე მკაფიოდ აღწერილია ის ქმედებები, რომლებიც საჭიროა საქართველოსთვის ევროკავშირის გზაზე დასაბრუნებლად. ევროკავშირის კარი საქართველოსთვის ღია რჩება, თუ ხელისუფლება ევროკავშირის ღირებულებებსა და პრინციპებს დაუბრუნდება. ევროკომისია აცხადებს, რომ საქართველოს „კანდიდატი ქვეყნის მხოლოდ სახელი აქვს“ და რომ ქვეყანამ „სერიოზული დემოკრატიული უკუსვლა“ განიცადა, მათ შორის კანდიდატ ქვეყნებს შორის „უპრეცედენტო“ შემზღუდავი კანონების გამო. ევროკავშირის გაფართოების პოლიტიკის შესახებ კომუნიკაციაში, 60-გვერდიან დოკუმენტში, რომელიც 4 ნოემბერს გამოქვეყნდა, კომისიამ განაცხადა, რომ სიტუაცია „მნიშვნელოვნად გაუარესდა“ მას შემდეგ, რაც ევროპულმა საბჭომ 2024 წლის დეკემბერში სინანული გამოთქვა თბილისის მიერ გაწევრიანების პროცესის 2028 წლამდე შეჩერების გადაწყვეტილებასთან დაკავშირებით. რაც შეეხება საგარეო და უსაფრთხოების პოლიტიკასთან შესაბამისობას, კომისია აცხადებს, რომ საქართველოს შესაბამისობა „დაბალი რჩება“. ანგარიშში ასევე გაკრიტიკებულია არჩევნები, დოკუმენტის თანახმად, 2024 წლის ოქტომბრის საპარლამენტო და 2025 წლის ოქტომბრის ადგილობრივი არჩევნები მაღალი პოლარიზაციით გამოირჩეოდა, სადაც ადგილი ჰქონდა „ამომრჩეველთა დაშინებას, იძულებას და ზეწოლას“, რაც ძირს უთხრის თავისუფალ არჩევანს. ანგარიში კიდევ ერთხელ იმეორებს ეუთო/ოდირისა და ვენეციის კომისიის რეკომენდაციებს. კომისია აღნიშნავს, რომ სამართლებრივმა ცვლილებებმა „მნიშვნელოვნად შეარყია სასამართლო სისტემის დამოუკიდებლობა და მთლიანობა“, რაც ამძაფრებს „სასამართლო ხელისუფლების მიტაცების“ რისკებს. ევროკავშირის ელჩი, პაველ ჰერჩინსკი ამბობს, რომ იმ შანსის დაკარვა, რომელიც ახლა საქართველოს ევროკავშირში გაწევრიანების სახით აქვს, ისტორიული შეცდომა იქნება. ასე უპასუხა მან რადიო თავისუფლების ჟურნალისტის კითხვას, რამდენ ხანს იქნება ევროკავშირის კარი ღია საქართველოსთვის“ და რამდენად ახლოს არის საქართველო იმ წერტილთან, როცა შეიძლება, ითქვას, რომ ქვეყანა ვეღარ მიიღებს მონაწილეობას ევროკავშირის გაფართოებაში? „[ევროკომისარმა კოსმა] ახსენა ოთხი ქვეყანა კონკრეტული თარიღების მითითებით ევროკავშირის შემდგომი გაფართოების კონტექსტში. მას, სამწუხაროდ, არ უხსენებია საქართველო გაფართოების შემდეგი ეტაპის ფარგლებში. თქვენი კითხვა იყო, არის თუ არა ძალიან გვიან. ჩემი პასუხია, არასდროს არის ძალიან გვიან. მას შემდეგ, რაც ვიცხოვრე და გავიცანი ქართველები, მე დარწმუნებული ვარ, რომ თუ იქნება სურვილი, იქნება ამის მიღწევის საშუალება. რა გვაკლია ახლა?! - მზადყოფნა, სურვილი. მე იმედი მაქვს, რომ კვლავაც არსებობს შანსი საქართველო გახდეს ევროკავშირის ნაწილი შემდეგი გაფართოებით. იმ შემთხვევაშიც, თუკი ასე არ მოხდება იმ ტრაექტორიიდან გამომდინარე, რომელიც საქართველოს ხელისუფლებამ ამჟამად აიღო, შემდეგი გაფართოება არ იქნება უკანასკნელი გაფართოება. ასე რომ, კვლავაც იქნება იმედი მომავალში. მაგრამ ჩვენ ყველამ ვიცით, რა რთულად იბრძოლეს საქართველოს თაობებმა, რომ ამ მომენტისთვის მიეღწიათ. როგორ იბრძოდა საქართველოს მოსახლეობა, რომ გამხდარიყო ევროკავშირის სრულუფლებიანი წევრი. ამ შესაძლებლობის დაკარგვა იქნება შეცდომა,“ - განაცხადა ელჩმა. ევროკავშირის საგარეო საქმეთა და უსაფრთხოების პოლიტიკის უმაღლესი წარმომადგენლის, კაია კალასის განცხადებით, საქართველო ერთადერთია ევროკავშირის წევრობის კანდიდატებს შორის, რომელსაც რეგრესი - და მნიშვნელოვანი რეგრესი - აქვს ევროკავშირის წევრობის გზაზე. საქართველოს საგარეო საქმეთა სამინისტრო ევროკავშირის გაფართოებაზე საქართველოს შესახებ მომზადებულ კრიტიკულ დასკვნაზე ამბობს, რომ „მოულოდნელი არ ყოფილა“. უწყების განმარტებით, დოკუმენტი „უსაფუძვლო ნეგატიური შეფასებების გასაჟღერებლად და მორიგი პოლიტიკური სპეკულაციებისთვის არის გამოყენებული“. საქართველო ევროკავშირის წევრობის კანდიდატია
ევროკავშირმა სომხეთს ვიზალიბერალიზაციის სამოქმედო გეგმა გადასცა
ოთხშაბათს, 5 ნოემბერს, სომხეთში ვიზიტის დროს, ევროკომისიის (EU) მიგრაციისა და შინაგან საქმეთა გენერალური დირექტორის მოადგილემ იოჰანეს ლუხნერმა, ვიზალიბერალიზაციის დიალოგის საკითხებში სომხური მხარის წარმომადგენელს, სომხეთის შინაგან საქმეთა მინისტრ არპინე სარგსიანს სომხეთ-ევროკავშირის ვიზალიბერალიზაციის სამოქმედო გეგმა გადასცა. დოკუმენტის მიღებისთანავე, სარგსიანმა აღნიშნა, რომ ეს სომხეთსა და ევროკავშირს შორის პარტნიორობის მნიშვნელოვან ეტაპს აღნიშნავს. ორივე მხარემ კმაყოფილება გამოთქვა მიღწეული პროგრესის გამო და განაცხადა, რომ ევროკავშირის ვიზების ლიბერალიზაციის სამოქმედო გეგმის ოფიციალური გადაცემა ნამდვილი ერთობლივი ძალისხმევის დასტურია. სომხურმა მხარემ კიდევ ერთხელ დაადასტურა თავისი ერთგულება სამოქმედო გეგმაში ასახული ზომების განხორციელების მიმართ, რომლის საბოლოო მიზანია სომხეთის მოქალაქეებისთვის ევროკავშირში ღირსეული, უსაფრთხო და მარტივი მოგზაურობის უზრუნველყოფა. სამოქმედო გეგმის წარდგენა მოჰყვა სომხეთსა და ევროკავშირს შორის სავიზო რეჟიმის ლიბერალიზაციის შესახებ ოფიციალური მოლაპარაკებების დაწყებას 2024 წლის სექტემბერში. ევროკავშირის წარმომადგენლებმა ხაზგასმით აღნიშნეს, რომ სანამ ევროკავშირის საბჭო და ევროპარლამენტი საბოლოო გადაწყვეტილებას მიიღებენ, სომხეთმა ყველა კრიტერიუმი სრულად უნდა დააკმაყოფილოს. მარტში სომხეთის პარლამენტმა მიიღო კანონპროექტი, რომელიც მთავრობას მოუწოდებდა ევროკავშირში წევრობაზე განაცხადის შეტანის პროცესის დაწყებისკენ. კანონპროექტი, რომელიც ცნობილია როგორც „ევროკავშირში ინტეგრაციის აქტი“, მომდევნო თვეში ქვეყნის პრეზიდენტმა მოაწერა ხელი, რამაც ის ოფიციალურად სომხეთის კანონმდებლობის ნაწილად აქცია. ფაშინიანი: სომხეთის ევროკავშირში ინტეგრაცია საქართველოს ევროპულ პერსპექტივასთან არის დაკავშირებული
აზერბაიჯანის გავლით, სომხეთში ყაზახური ხორბლის პირველი პარტია გაიგზავნა
აზერბაიჯანის გავლით ყაზახური მარცვლეულის სომხეთში ტრანსპორტირება ოფიციალურად დაიწყო. Report-ის ცნობით, ყაზახეთიდან ხორბლის 15 ვაგონისგან შემდგარმა ტვირთმა 5 ნოემბერს აზერბაიჯანის საზღვარი გადაკვეთა და საქართველოსკენ მიემართება. იალამა-ბილაჯარი-ჰაჯიგაბული-ბოიუკ კასიკის მარშრუტით გადაზიდული ტვირთი სომხეთის დალარიკის სადგურზე გაიგზავნება რუსეთიდან ჩამოსული 15 ვაგონის შემდეგ. აზერბაიჯანის პრეზიდენტმა ილჰამ ალიევმა ყაზახეთში ვიზიტის დროს განაცხადა, რომ სომხეთში ტვირთების ტრანზიტზე შეზღუდვები მოიხსნა. აზერბაიჯანული APA-ს ცნობით, 15 სატვირთო ვაგონი, რომელიც რუსული ხორბლით იყო დატვირთული, სომხეთის დალარიკის სადგურზე აზერბაიჯანისა და საქართველოს გავლით ჩავიდა, რაც სომხეთსა და აზერბაიჯანს შორის ტვირთის პირდაპირ გადაზიდვის პირველი შემთხვევა იყო 1991 წელს საბჭოთა კავშირის დაშლის შემდეგ.
ევროკავშირის დამკვირვებლები სომხეთში, აზერბაიჯანთან სამშვიდობო ხელშეკრულებაზე ხელმოწერამდე დარჩებიან
ევროკავშირის დამკვირვებლები სომხეთში დარჩებიან, ვიდრე აზერბაიჯანთან სამშვიდობო შეთანხმებას ხელი არ მოეწერება. ამის შესახებ სომხეთის პრემიერ-მინისტრმა ნიკოლ ფაშინიანმა ერევანში გამართულ ორბელის ფორუმზე განაცხადა. ფაშინიანმა დასძინა, რომ სამშვიდობო შეთანხმებაზე ხელმოწერისა და მისი რატიფიკაციის შემდეგ, ფორმატში ცვლილებები იქნება და სომხეთი ამ საკითხზე უფრო არსებით დისკუსიებს გამართავს ევროპელ პარტნიორებთან. სომხეთის პრემიერ-მინისტრმა კიდევ ერთხელ გაუსვა ხაზი პროექტ „ტრამპის მარშრუტი საერთაშორისო მშვიდობისა და კეთილდღეობისთვის“ (TRIPP) განხორციელების მნიშვნელობას. „ეს უკვე გარანტიაა იმისა, რომ ეს პროექტი არამხოლოდ განხორციელდება, არამედ, თანამედროვე ისტორიაში ყველაზე წარმატებულ პროექტად იქცევა, რომელიც ქვეყნებს შემოსავალს, უსაფრთხოებას და სტაბილურობას მოუტანს,“ - განაცხადა ფაშინიანმა.
ტრამპი: ვიდრე მე თეთრ სახლში ვარ, აშშ კომუნისტური არ გახდება
„ვიდრე მე თეთრ სახლში ვარ, აშშ კომუნისტური არ გახდება,“ - ამის შესახებ აშშ-ის პრეზიდენტმა, დონალდ ტრამპმა ამერიკის ბიზნეს ფორუმზე სიტყვით გამოსვლისას განაცხადა. „ამ სისულელეს დავასრულებთ. ნიუ-იორკელებს არჩევანი კომუნისტსა და თაღლითს შორის უნდა გაეკეთებინათ და მათ კომუნისტი აირჩიეს. კანდიდატების თვალსაზრისით ოდნავ უკეთესი შეგვეძლო,“ - განაცხადა დონალდ ტრამპმა. აშშ-ის ლიდერის შეფასებით, „დემოკრატებმა“ ნიუ-იორკში მერად კომუნისტი დანიშნეს.“ „ამერიკელების წინაშე არსებული არჩევანი ნათელია. ჩვენ არჩევანი კომუნიზმსა და საღ აზრს შორის გვაქვს,“ - აღნიშნა აშშ-ის პრეზიდენტმა. დემოკრატი ზოჰრან მამდანი ნიუ-იორკის არჩეული მერია
რომელ ადგილზეა თბილისი ცხოვრების ღირებულების მიხედვით
საერთაშორისო პლატფორმა Numbeo-ს მონაცემებით, თბილისმა ცხოვრების ღირებულების გლობალურ რეიტინგში 302-ე ადგილი დაიკავა. ოქტომბერში, საქართველოს დედაქალაქმა სექტემბერთან შედარებით სამი პოზიციით, წინ წაიწია. თბილისმა ისეთ ქალაქებს გაუსწრო, როგორიცაა, ბაქო (333-ე), მინსკი (361-ე) და კიევი (336-ე), მაგრამ მოსკოვს (229-ე) და სანქტ-პეტერბურგს (267-ე) ჩამორჩა. თბილისში ცხოვრების ღირებულება უფრო დაბალია, ვიდრე მეზობელ ერევანსა (253-ე) და სტამბოლში (247-ე), ასევე, ბელგრადში (226-ე). Numbeo-ს შეფასებით, სექტემბერთან შედარებით, თბილისში სავარაუდო ყოველთვიური ხარჯები ოდნავ შემცირდა. ოთხსულიანი ოჯახისთვის, ქირის გამოკლებით, სავარაუდო ყოველთვიური ხარჯები 6,237 ლარია, ხოლო მარტოხელა ადამიანისთვის - 1,690 ლარი. ერევანში ოთხსულიანი ოჯახი (ქირის გამოკლებით) 7,289 ლარს დახარჯავს, სტამბოლში - 7,207 ლარს, ხოლო ბელგრადში - 7,252 ლარს. ერევანში საშუალოდ ადამიანი 2,004 ლარს ხარჯავს, სტამბოლში - 1,928 ლარს, ხოლო ბელგრადში - 2,087 ლარს. ერევანში ცხოვრების ღირებულება თბილისთან შედარებით, 18.7%-ით მეტია, ხოლო ქირა საშუალოდ 4.6%-ით მეტი. სტამბოლი თბილისს ცხოვრების ღირებულებით 20.8%-ით და ქირით 30.9%-ით აღემატება, ხოლო ბელგრადი თბილისს ხარჯებით 31.3%-ით და ქირით 25.4%-ით აღემატება.
