ძებნის რეზულტატი:
შს მინისტრის მოადგილე: თუკი ხელოვნურად ხდება გზის გადაკვეტვა, პოლიციას აქვს უფლება, იმოქმედოს კანონის შესაბამისად
"თუკი ხელოვნურად ხდება გზის გადაკვეტვა და განზრახ დაბრკოლებების შექმნა, ასევე გამოყენებულია ავტომობილები და სხვა საშუალებები გზის ჩახერგვისთვის, პოლიციას აქვს უფლება იმოქმედოს კანონის შესაბამისად" , - ამის შესახებ შს მინისტრის მოადგილე ალექასანდრე დარახველიძემ ჟურნალისტებთან განაცხადა, რითაც "ნაციონალური მოძრაობის" აქციას გამოეხმაურა. მისი თქმით, "ნაციონალური მოძრაობა" ხელოვნურად გეგმავს გზის გადაკეტვას. "ჩვენ ყველამ კარგად ვნახეთ "ნაციონალური მოძრაობის" განცხადება, რომ ხელოვნურად გეგმავენ გზის გადაკეტვას და განზრახ დაბრკოლებების შექმნას ტრანსპორტისთვის. თუკი მონაწილეები არღვევენ კანონის მოთხოვნებს, პოლიციას აქვს უფლებამოსილება გამოიყენოს შესაბამისი მექანიზმები და სწორედ ამის თაობაზე იყო საუბარი, როცა შსს- მ გაავრცელა განცხადება. იმ შემთხვევაში, თუკი "ნაციონალური მოძრაობა" არ დაარღვევს კანონს და არ გასცდება შეკრებისა და მანიფესტაციის დაშვებულ იმ ფარგლებს, რაც არის განსაზღვრული კანონით, ბუნებრივია, მათ ისევე როგორც ნებისმიერ სხვა პირს, აქვთ უფლება შეკრებასა და მანიფესტაციაში მონაწილეობის. კანონში პირდაპირ ჩაწერილია, რომ თუკი ხელოვნურად ხდება გზის გადაკვეტვა და განზრახ დაბრკოლებების შექმნა, ასევე გამოყენებულია ავტომობილები და სხვა საშუალებები გზის ჩახერგვისთვის, პოლიციას აქვს უფლება იმოქმედოს კანონის შესაბამისად, ეს არის პირდაპირ კანონში განსაზღვრული, რომელიც ჯერ კიდევ 2011 წელს არის მიღებული", - განაცხადა დარახველიძემ.
ევროკავშირმა საქართველოს კოვიდპასპორტები აღიარა
ევროკომისიამ საქართველოს კოვიდპასპორტები აღიარების შესახებ გადაწყვეტილება მიიღო. შესაბამისი დოკუმენტი კომისიის ვებგვერდზე ცოტა ხნის წინ გამოქვეყნდა. გადაწყვეტილების თანახმად, საქართველოს მოქალაქეები, რომლებიც ფლობენ ვაქცინაციის სრული კურსის ჩატარების სერთიფიკატს, შეძლებენ ევროკავშირის ტერიტორიაზე გადაადგილებას. საქართველოს მიერ გაცემული კოვიდსერტიფიკატი ვაქცინაციის, ტესტებისა და კოვიდისგან გამოჯანმრთელების შესახებ აღიარებულია ევროკავშირის მიერ და გათანაბრებულია ევროკავშირის შესაბამისი რეგულაციით გაცემულ სერტიფიკატებთან, რომლის მიზანიცაა ადამიანთა თავისუფალი გადაადგილების ხელშეწყობა ევროკავშირის ტერიტორიაზე. ევროკომისიის გადაწყვეტილება ძალაშია გამოქვეყნებისთანავე და ასევე ასკვნის, რომ საქართველო უერთდება ევროკავშირის ციფრული კოვიდსერტიფიკატის სისტემას. ევროკომისარი ოლივერ ვარჰეი: დღეს გადაწყვეტილებას მივიღებთ კოვიდსერტიფიკატებზე მოლდოვისთვის, საქართველოსა და სერბეთისთვის
ბარათაშვილის ხიდის მიმდებარედ წყლის ჭავლის მანქანებია მობილიზებული
ნიკოლოზ ბარათაშვილის ხიდის მიმდებარე ტერიტორიაზე, სადაც „ნაციონალური მოძრაობის“ მიერ ორგანიზებული საპროტესტო აქციის მონაწილეები მსვლელობას მართავენ, ავტობუსებით სპეციალური დანიშნულების რაზმი და წყლის ჭავლის მანქანებია მობილიზებული. რიყის პარკის ტერიტორიაზე 10-მდე ე.წ. ყვითელი ავტობუსი გადაადგილდება, რომელსაც სავარაუდოდ, სპეციალური დანიშნულების რაზმის წევრები გადაჰყავს. ადგილზეა ასევე წყლის ჭავლის მანქანებიც. აქციის მონაწილეებმა მსვლელობა მეტრო "ავლაბრის" მიმდებარე ტერიტორიიდან დაიწყეს. შს სამინისტროს აღნიშნულ ფაქტთან დაკავშირებით კომენტარი ჯერ არ გაუკეთებია. შს მინისტრის მოადგილის, ლექასანდრე დარახველიძის განცხადებით, თუკი ხელოვნურად მოხდება გზის გადაკვეტვა და განზრახ დაბრკოლებების შექმნა, ასევე გამოყენებული იქნება ავტომობილები და სხვა საშუალებები გზის ჩახერგვისთვის, პოლიციას აქვს უფლება იმოქმედოს კანონის შესაბამისად.
NATO-მ უკრაინისა და საქართველოს საგარეო საქმეთა მინისტრები ალიანსის მინისტერიალზე მიიწვია
NATO-მ უკრაინისა და საქართველოს საგარეო საქმეთა მინისტრები ალიანსის მინისტერიალზე მიიწვია, რომელიც ლატვიის დედაქალაქ რიგაში, 30 ნოემბერს გაიმართება. ამის შესახებ უკრაინის საგარეო საქმეთა მინისტრმა, დმიტრო კულებამ იენს სტოლტენბერგთან ერთად გამართულ პრესკონფერენციაზე განაცხადა. „მადლობას გიხდით NATO-ს მოკავშირეების გადაწყვეტილებისთვის, რომ მე და ჩემი ქართველი კოლეგა რიგაში, NATO-ს მინისტერიალში მონაწილეობის მისაღებად მიგვიწვიეს. ეს ძალიან მნიშვნელოვანი გზავნილია“, - განაცხადა უკრაინის საგარეო საქმეთა მინისტრმა.
რუსთავის საკრებულოს ფრაქცია „ნაციონალური მოძრაობის“ ექვსმა წევრმა შიმშილობა დაიწყო
რუსთავის საკრებულოს ფრაქცია „ნაციონალური მოძრაობის“ ექვსმა წევრმა ყოფილი პრეზიდენტის, მიხეილ სააკაშვილის, მრავალპროფილურ კლინიკაში გადაყვანის მოთხოვნით შიმშილობა დაიწყო. ფრაქციის წევრმა ჯუბა მგელაძემ რადიო თავისუფლებას უთხრა, რომ შიმშილობა გაგრძელდება მათი მოთხოვნის დაკმაყოფილებამდე. „აქციას ფრაქციის ოთახში მოვაწყობთ“, თქვა მგელაძემ. ორი ოქტომბრის თვითმმართველობის არჩევნების შედეგად „ნაციონალურმა მოძრაობამ“ რუსთავის საკრებულოში 16 მანდატი მოიპოვა, თუმცა საკრებულოს უფლებამოსილება ჯერ არ არის ცნობილი. სააკაშვილის მრავალპროფილურ საავადმყოფოში გადაყვანის მოთხოვნით 14 ნოემბერს შიმშილობა დაიწყო ათმა პარლამენტარმა. მანამდე აქცია დაიწყო პარლამენტარმა ელენე ხოშტარიამ. ის მე-13 დღეა შიმშილობს. მიხეილ სააკაშვილი გლდანის მე-18 დაწესებულების კლინიკაში გადაიყვანეს 8 ნოემბერს, მისი ნების საწინააღმდეგოდ. სააკაშვილი თანახმაა, შეწყვიტოს შიმშილობა, სამოქალაქო მრავალპროფილურ კლინიკაში გადაყვანის სანაცვლოდ. მიხეილ სააკაშვილის ჯანმრთელობის მდგომარეობის შესახებ პენიტენციური სამსახურის მიერ 13 ნოემბერს გავრცელებულ განცხადებაში ნათქვამია, რომ მისი მდგომარეობა სტაბილურია.განსხვავებულია სააკაშვილის პირადი ექიმის, ნიკოლოზ ყიფშიძისა და მისი თანაპარტიელის, ეკა ხერხეულიძის მიერ გავრცელებული ცნობები. ისინი საუბრობენ იმაზე, რომ სააკაშვილი საწოლიდან ვერ დგება და ციხეში, სადაც იმყოფება, ვერ იღებს იმ სამედიცინო სერვისს, რომელიც მისი სიცოცხლის გადასარჩენად არის საჭირო.
საპატრულო პოლიციის დეპარტამენტის უფროსის განცხადებით, „ნაცმოძრაობის“ აქციის პარალელურად პოლიციის მობილიზება საზოგადოებრივი წესრიგის დაცვას ემსახურება
საპატრულო პოლიციის დეპარტამენტის უფროსის ვაჟა სირაძის განცხადებით, „ნაციონალური მოძრაობის“ აქციის პარალელურად პოლიციის მობილიზება საზოგადოებრივი წესრიგის დაცვას ემსახურება. ამის შესახებ სირაძემ ჟურნალისტებს განუცხადა. „პოლიცია აქ არის იმისთვის, რომ დაიცვას საზოგადოებრივი წესრიგი და უზრუნველყოს ქალაქში საზოგადოებრივი წესრიგის დაცვა. შსს-მ გააკეთა განცხადება ამ ყველაფრის თაობაზე და ყველას განუმარტა „შეკრებებისა და მანიფესტაციების“ შესახებ კანონი. ამასთან განუმარტა ისიც, თუ რა არის სამართალდარღვევა და რა არ არის. სწორედ ამისთვისაა აქ პოლიცია და პოლიცია სამართალდარღვევის შემთხვევაში, კანონით გათვალისწინებულ, შესაბამის, მყისიერ ზომებს მიიღებს. არავის მივცემთ შესაძლებლობას მოახდინოს ქალაქის პარალიზება და კოლაფსი“, - განაცხადა ვაჟა სირაძემ. ცნობისთვის, შს მინისტრის მოადგილის, ლექასანდრე დარახველიძის განცხადებით, თუკი ხელოვნურად მოხდება გზის გადაკვეტვა და განზრახ დაბრკოლებების შექმნა, ასევე გამოყენებული იქნება ავტომობილები და სხვა საშუალებები გზის ჩახერგვისთვის, პოლიციას აქვს უფლება იმოქმედოს კანონის შესაბამისად.
კახა კუჭავა: ოპოზიციის რამდენიმე წარმომადგენელმა მთხოვა, სააკაშვილის გადაყვანაზე მეშუამდგომლა
"რამდენიმე ოპოზიციური პოლიტიკური პარტიის წარმომადგენელმა მთხოვა, პარლამენტის მხრიდან მეშუამდგომლა სააკაშვილის გადაყვანაზე და გორის ჰოსპიტალზეც იყვნენ თანახმა. ზუსტად მეორე დღეს ოპოზიციური სპექტრი ამბობს, რომ გორში აპირებენ გადაყვანას და შემდეგ ოსებზე გადაცემასო", – ამის შესახებ საქართველოს პარლამენტის თავმჯდომარე კახა კუჭავამ პარლამენტში, ბიუროს დღევანდელ სხდომაზე განაცხადა. მისივე თქმით, ტრაგედიაა, როდესაც ფაქტებით მანიპულირება ხდება. „მდგომარეობა რაც არის შექმნილი, ნამდვილად საჭიროებს სწორ ანალიზს და სწორ პასუხებს. ბოლო დღეების განმავლობაში სამწუხაროა განცხადებები, მათ შორის სხვადასხვა სექტორის წარმომადგენლებისგან, არა მხოლოდ ექიმებისგან. ერთი დღე იყო ძალიან მძიმედ, ცუდად, ვერ დადიოდა, რამდენიმე საათში გახდა კარგად, რადგან სასამართლოზე უნდოდათ მონაწილეობის მიღება. სიმართლე სადაა ვეღარ გავიგე. აი, ესაა რეალური ტრაგედია. ასევე ტრაგედიაა, როდესაც მანიპულირება ხდება ფაქტებით. სამწუხაროდ, საერთოდ დაკარგულია გულწრფელობა, როდესაც მით უმეტეს ჩემთან მოდიან, მთხოვენ დახმარებას. მაგალითისთვის, როდესაც მოსული იყო რამდენიმე ოპოზიციური პოლიტიკური პარტიის წარმომადგენელი, მთხოვეს, პარლამენტის მხრიდან მეშუამდგომლა გადაყვანაზე და გორის ჰოსპიტალზეც იყვნენ თანახმა, ზუსტად მეორე დღეს ოპოზიციური სპექტრი ამბობს, რომ გორში აპირებენ გადაყვანას და შემდეგ ოსებზე გადაცემასო. თან პრობლემის გადაჭრისთვის ვითომ გზებს გვთავაზობენ და ამავე დროს, ცდილობენ ამავე საკითხებით მანიპულირებას და წინსწრებით, გარკვეული სპეკულაციებით უფრო დაძაბონ მდგომარეობა. ფაქტი ერთია, არიან ექიმები, რომლებმაც უნდა მიიღონ გადაწყვეტილება და არა პოლიტიკოსებმა. ერთია, გვინდა საკითხის მოგვარება, მეორეა, ყველა მაქსიმალურად შევეცადოთ, რომ გულწრფელები იყოთ, როდესაც ცდილობთ, რაღაც საკითხებთან დაკავშირებით გარკვეულწილად მივიღო გადაწყვეტილება, ვიშუამდგომლო“, – განაცხადა კახა კუჭავამ.
გაბრიელიუს ლანდსბერგისი: სიტუაცია საქართველოში შეუმჩნეველი ვერ დარჩება. ეს დებატების საგანი იქნება
„სიტუაცია საქართველოში შეუმჩნეველი ვერ დარჩება, ეს დებატების საგანი იქნება“, - განუცხადა ლიეტუვის საგარეო საქმეთა მინისტრმა გაბრიელიუს ლანდსბერგისმა ქართველ ჟურნალისტებს ბრიუსელში. ამასთან, ლანდსბერგისმა ასოცირების ფორმატს, რომელშიც გაერთიანებულები არიან, საქართველო, მოლდოვა და უკრაინა, მნიშვნელოვანი გზა უწოდა ქვეყნების ევროინტეგრაციის პროცესის დასაჩქარებლად, თუმცა აღნიშნა, რომ ფორმატის შიგნით ვხედავთ განსხვავებებს, რაც ასევე უნდა აღინიშნოს. „სიტუაცია საქართველოში შეუმჩნეველი ვერ დარჩება - ყოფილი პრეზიდენტის, მიხეილ სააკაშვილის ჯანმრთელობის მდგომარეობის გაუარესება და მთავრობის რეაქცია მისთვის დახმარების აღმოჩენის მიმართულებით, დებატების საგანი იქნება”, - განაცხადა ლანდსბერგისმა. შეგახსენებთ, აღმოსავლეთ პარტნიორობის საგარეო საქმეთა მინისტერიალი ბრიუსელში დღეს იმართება. ცნობისთვის, მოშიმშილე ექსპრეზიდენტი 8 ნოემბერს გადაიყვანეს გლდანის ციხის საავამყოფოში. იუსტიციის სამინისტრომ გაავრცელა ვიდეოკადრები, სადაც ჩანს, რომ სააკაშვილი გლდანის ციხის სამკურნალო დაწესებულებაში იძულებით გადაიყვანეს. ევროსასამათლოს გადაწყვეტილების შემდეგ, მიხეილ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. თუმცა იუსტიციის მინისტრმა განაცხადა, რომ მოხარული იქნება, თუ სააკაშვილი შიმშილობას დათქმების გარეშე შეწყვეტს. 9 ოპოზიციონერმა დეპუტატმა ექსპრეზიდენტ სააკაშვილის სამოქალაქო კლინიკაში გადაყვანის მოთხოვნოთ, პარლამენტში შიმშილობა 14 ნოემბერს დაიწყო. მე-12 დღეა, ანალოგიური მოთხოვნით, პარლამენტში შიმშილობს „დროას“ ლიდერი ელენე ხოშტარია. შიმშილობა 14 ნოემბერს ასევე გამოაცხადა გიორგი ბარამიძე. შიმშილობს „გირჩი - მეტი თავისუფლების“ წევრი იმედა კლდიაშვილიც. 13 ნოემბერს, სააკაშვილის პირადმა ექიმმა განაცხადა, რომ სააკაშვილის მდგომარეობა დამძიმდა და ის ლოგინიდან ვერ დგება. სააკაშვილი პირველ ოქტომბერს დააკავეს.
იენს სტოლტენბერგი: რუსეთის მხრიდან, მეზობლების, საქართველოს, უკრაინისა და მოლდოვის წინააღმდეგ ძალის დემონსტრირების სურვილი უკვე ვნახეთ
NATO რუსეთს მოუწოდებს, გამჭვირვალე იყოს სამხედრო აქტივობასთან დაკავშირებით. ამის შესახებ განაცხადა NATO-ს გენერალურმა მდივანმა, იენს სტოლტენბერგმა უკრაინის საგარეო საქმეთა მინისტრთან, დმიტრო კულებასთან გამართულ ერთობლივ პრესკონფერენციაზე. „უკრაინის საზღვართან რუსეთის ძალების უჩვეულო კონცენტრაციას ვხედავთ. ჩვენ, რუსეთის მხრიდან მეზობლების, საქართველოს, უკრაინისა და მოლდოვის წინააღმდეგ ძალის გამოყენების დემონსტრირების სურვილი უკვე ვიხილეთ. რუსეთს მოვუწოდებთ, გამჭვირვალე იყოს სამხედრო აქტივობასთან დაკავშირებით, შეამციროს დაძაბულობა და თავიდან აიცილოს ესკალაცია. ეს მკაფიო გზავნილია NATO-ს ყველა მოკავშირისგან და ეს საკითხი განვიხილეთ დღეს უკრაინის საგარეო საქმეთა მინისტრთან“, - აღნიშნა NATO-ს გენერალურმა მდივანმა. იენს სტოლტენბერგმა ასევე უპასუხა შეკითხვას შავი ზღვის რეგიონში NATO-ს ყოფნაზე. NATO-ს შავი ზღვის რეგიონში წარმოდგენილია ნაწილობრივ იმიტომ, რომ შავი ზღვის სამი სახელმწიფო NATO-ს წევრია. გარდა ამისა, შავი ზღვის რეგიონში ჩვენი ორი ახლო პარტნიორია საქართველო და უკრაინა. შავი ზღვის რეგიონში ვმოქმედებთ და წარმომადგენლობა გვაქვს. თუმცა, ეს რუსეთისთვის საფრთხეს არ წარმოადგენს“, - განაცხადა NATO-ს გენერალურმა მდივანმა.
ფულადმა გზავნილებმა რეკორდულ $1.9 მლრდ-ს მიაღწია
საქსტატმა დღეს 2021 წლის ოქტომბრის ფულადი გზავნილების ანგარიში გამოაქვეყნა. დოკუმენტის თანახმად, გასული თვის განმავლობაში ქვეყანაში გზავნილების სახით $206.7 მილიონი შემოვიდა, რაც წინა წელთან შედარებით 25 მილიონით მეტია. ჯამურად, 2021 წლის 10 თვეში საქართველომ $1.9 მილიარდი დოლარის გზავნილები მიიღო, რაც 2020 წლის შედეგებს 26%-ით აღემატება. ქვეყნებს შორის კვლავ რუსეთის ფედერაცია ლიდერობს, საიდანაც $337 მილიონი გადმოირიცხა, მეორე ადგილზე $316 მილიონით იტალიაა, მესამეზე კი $234 მილიონის გზავნილებით აშშ იმყოფება. საქართველოს უმსხვილესი დონორი ქვეყნების რეიტინგი: 1. რუსეთის ფედერაცია - $337.3 მილიონი, მატება წინა წელთან 16%2. იტალია - $315.8 მილიონი, მატება წინა წელთან 31%3. აშშ - $233.7 მილიონი, მატება წინა წელთან 32%4. საბერძნეთი - $200.7 მილიონი, მატება წინა წელთან 12%5. ისრაელი - $152.1 მილიონი, მატება წინა წელთან 19%6. გერმანია - $90.8 მილიონი, მატება წინა წელთან 56%7. თურქეთი - $88.1 მილიონი, მატება წინა წელთან 0%8. უკრაინა - $77.4 მილიონი, მატება წინა წელთან 13%9. აზერბაიჯანი - $71.2 მილიონი, მატება წინა წელთან 67%10. ესპანეთი - $45.7 მილიონი, მატება წინა წელთან 17%11. ყაზახეთი - $39.1 მილიონი, მატება წინა წელთან 169%12. საფრანგეთი - $30.9 მილიონი, მატება წინა წელთან 38%13. პოლონეთი - $26.7 მილიონი, მატება წინა წელთან 18%14. ყირგიზეთი - $19.5 მილიონი, მატება წინა წელთან 270%15. კანადა - $18.3 მილიონი, მატება წინა წელთან 27%16. გაერთიანებული სამეფო - $17.3 მილიონი, მატება წინა წელთან 17%17. ირლანდია - $16.7 მილიონი, მატება წინა წელთან 49%18. კვიპროსი - $13.3 მილიონი, მატება წინა წელთან 23%19. სომხეთი - $10.5 მილიონი, მატება წინა წელთან 8%20. არაბთა გაერთიანებული საამიროები - $9.0 მილიონი, მატება წინა წელთან 20%. მსოფლიო ბანკის შეფასებით, საქართველო ფულად გზავნილებზე დამოკიდებულების მიხედვით მსოფლიოში 21-ე ადგილზეა. ქვეყნის ეკონომიკის 13.3%-ს სწორედ უცხოეთში დასაქმებული საქართველოს მოქალაქეების მიერ გამოგზავნილი სახსრები აგენერირებს. ამ თანხების გარეშე კი ქვეყნის ადგილობრივი მოთხოვნის ზომა ბევრად მცირე იქნებოდა.
კულებამ NATO-ს მოუწოდა, შავი ზღვის რეგიონში საქართველოსთან, უკრაინასთან და მოლდოვასთან უფრო მჭიდროდ ითანამშრომლოს
უკრაინის საგარეო საქმეთა მინისტრმა NATO-ს შავი ზღვის რეგიონში საქართველოსთან, უკრაინასთან და მოლდოვასთან თანამშრომლობის გაძლიერებისკენ მოუწოდა. მისი თქმით, ალიანსის წევრი და არაწევრი სახელმწიფოების ერთობლივი ძალისხმევა შავ ზღვაში უაღრესად დროული და სასარგებლო იქნება“. „უნდა გვახსოვდეს ძალიან დაძაბული და საშიში ვითარება შავი ზღვის რეგიონში. მოვუწოდებ ალიანსის წევრებს, უფრო მჭიდროდ ითანამშრომლონ საქართველოსთან, უკრაინასთან და მოლდოვასთან შავი ზღვის რეგიონის უსაფრთხოების კუთხით. ალიანსის წევრი და არაწევრი სახელმწიფოების ერთობლივი ძალისხმევა შავ ზღვაში უაღრესად დროული და სასარგებლო იქნება“, - განაცხადა კულებამ NATO-ს გენერალურ მდივან იენს სტოლტენბერგთან ერთად გამართულ პრესკონფერენციაზე.
დმიტრო კულება: უკრაინამ და NATO-მ რუსეთის შესაკავებლად და უარესი სცენარის თავიდან ასაცილებლად კოორდინირებულად უნდა იმოქმედონ
უკრაინის საგარეო საქმეთა მინისტრის განცხადებით, ქვეყანა მზად უნდა იყოს რუსეთის ყველა სცენარისთვის. დმიტრო კულებამ ხაზი გაუსვა კოორდინირებული ქმედებების მნიშვნელობას. „რთული სათქმელია, რა იქნება რუსეთის სცენარი. ჩვენ ყველა სცენარისთვის მზად უნდა ვიყოთ, თუმცა ყველაზე მნიშვნელოვანია, ყველა ჩვენგანმა, უკრაინმა და NATO-ს მოკავშირეებმა ყველა ზომა უნდა მიიღონ რუსეთის შესაკავებლად და უარესი სცენარის თავიდან ასაცილებლად“, - განაცხადა კულებამ NATO-ს გენერალურ მდივან იენს სტოლტენბერგთან ერთად გამართულ პრესკონფერენციაზე. ამავე თემაზე: იენს სტოლტენბერგი: რუსეთის მხრიდან, მეზობლების, საქართველოს, უკრაინისა და მოლდოვის წინააღმდეგ ძალის დემონსტრირების სურვილი უკვე ვნახეთ
დავით ზალკალიანი: რიგის სამიტზე უკრაინასთან ერთად საქართველოს მიწვევა პროგრესის კიდევ ერთი აღიარებაა
"რიგის სამიტზე უკრაინასთან ერთად საქართველოს მიწვევა იმ ხელშესახები პროგრესის კიდევ ერთი აღიარებაა, რომელიც საქართველოსა და უკრაინას, როგორც ასპირანტ ქვეყნებს ნატოში ინტეგრაციის გზაზე გააჩნიათ", - ამის შესახებ საქართველოს ვიცე-პრემიერმა, საგარეო საქმეთა მინისტრმა დავით ზალკალიანმა ბრიუსელში, ჟურნალისტებთან განაცხადა. მინისტრის თქმით, მანამდე, კერძოდ, 2018 წელს, NATO-ს ბრიუსელის სამიტზე საქართველომ პირველად მიიღო მონაწილეობა მოკავშირეთა შეხვედრაში სახელმწიფო მეთაურების და მთავრობის დონეზე, რომელიც ნატო-საქართველო-უკრაინის ფორმატში გაიმართა. ამის შემდგომ, საქართველო და უკრაინა სხვა მინისტერიალებზეც მიიწვიეს ერთობლივად. „რაც შეეხება დეკემბერში საქართველოს მინისტერიალზე მიწვევას, ეს არის ძალიან პოზიტიური და სერიოზული გზავნილი ჩვენი ნატოელი პარტნიორების მხრიდან" - აღნიშნა ზალკალიანმა. მან იმედი გამოთქვა, რომ რიგის მინისტერიალზე მოკავშირეები კიდევ ერთხელ დაუჭერენ მხარს საქართველოს ინიციატივებს, მათ შორის, არსებით ღონისძიებათა განახლებულ პაკეტს, შავი ზღვის უსაფრთხოების კონტექსტში NATO საქართველოს თანამშრომლობასა და სხვა პრაქტიკული ინსტრუმენტების გაძლიერებას. ვიცე-პრემიერის თქმით, ურთიერთქმედების ის მტკიცე მექანიზმები, რომლებიც NATO-სა და საქართველოს შორის არსებობს, ქვეყანას საბოლოო მიზანთან - ალიანსის წევრობასთან მიიყვანს.
დმიტრო კულება: უკრაინა აძლიერებს საზღვარს ბელარუსთან, კოორდინაციაში ვართ პოლონეთთან და ლიეტუვასთან
„უკრაინა ბელარუსთან საზღვარს აძლიერებს და ლუკაშენკოს რეჟიმის მიერ ხელოვნურად შექმნილი, „მიგრანტების კრიზისის“ გათვალისწინებით, კოორდინაციაშია პოლონეთისა და ლიეტუვის ქმედებებთან“, - ამის შესახებ უკრაინის საგარეო საქმეთა მინისტრმა დმიტრო კულებამ NATO-ს გენერალურ მდივან იენს სტოლტენბერგთან ერთად გამართულ პრესკონფერენციაზე განაცხადა. „გასულ კვირას, უკრაინის უსაფრთხოებისა და თავდაცვის უწყებების ლიდერები შეხვდნენ ქალაქ ლუცკში, ბელარუსის საზღვრიდან არც თუ ისე შორს, და მოიწვიეს პოლონეთისა და ლიეტუვის ელჩები, რადგან ჩვენ გვჭირდება კოლექტიური რეაგირება ბელარუსში არსებულ ვითარებაზე. დღეს ჩვენ ხელოვნურად შექმნილ კრიზისზე გავამახვილეთ ყურადღება, მაგრამ ხვალ რა მოხდება, არ ვიცით. სამი ქვეყანა დღეს უნდა გაუმკლავდეს ამ კრიზისს და გვახსოვდეს, რომ ეს ამით არ დასრულდება, რუსეთი ხვალ რაღაც ახალს გააკეთებს. სამივე ქვეყანა მზად უნდა იყოს ნებისმიერი სცენარისთვის“, - განაცხადა უკრაინის საგარეო საქმეთა მინისტრმა დმიტრო კულებამ ბრიუსელში, ევროკავშირის წევრი ქვეყნების საგარეო საქმეთა მინისტრებთან შეხვედრის შემდეგ. მისივე თქმით, უკრაინა ამჟამად აძლიერებს საზღვარს ბელარუსთან. „ჯერჯერობით არ გვინახავს მიგრანტების შემოდინება ჩვენს ქვეყანაში, რაც კიდევ ერთხელ ადასტურებს, რომ ეს კრიზისი ხელოვნურია, ეს მიზანმიმართულად ხდება პოლონეთისა და ლიეტუვის წინააღმდეგ, რათა მათი პროვოცირება მოახდინოს და საზოგადოებებში დათესოს უთანხმოება ამ კრიზისის მოსაგვარების გზებზე“, - განაცხადა კულებამ. ცნობისთვის, კრიზისი ივნისის ბოლოდან გრძელდება. ლიეტუვა, პოლონეთი და ლატვია ბელარუსს მიგრანტებზე მიზანმიმართულ ზეწოლაში ადანაშაულებენ. ისინი ბელარუსს ასევე ადანაშაულებენ ამ ქვეყნებსა და მთლიანად ევროკავშირზე „ჰიბრიდულ თავდასხმაში“. ევროკავშირი საზღვარზე არსებული ვითარების გამო, ბელარუსისთვის სანქციების მეხუთე პაკეტს ამზადებს. შეგახსენებთ, 10 ნოემბერს, ევროკომისიის პრეზიდენტმა ვაშინგტონში, ჯო ბაიდენთან გამართული შეხვედრის შემდეგ განაცხადა, რომ ევროკავშირი ბელარუსის წინააღმდეგ სანქციებს გააფართოებს. ამასთან, ურსულა ფონ დერ ლაიენმა ბელარუსი „ჰიბრიდულ თავდასხმაში“ დაადანაშაულა. ბელარუსს რუსეთი მხარს უჭერს. 10 ნოემბერს, რუსეთის სამხედრო-საჰაერო ძალების კუთვნილმა Ту-22М3-ის კლასის ბომბდამშენებმა საჰაერო პატრულირება ბელარუსის სახელმწიფო საზღვრის გასწვრივ დაიწყეს. Europetime-თან ექსკლუზიურ კომენტარში, NATO-ს ოფიციალური პირი მიგრანტთა ხელოვნურ კრიზისზე პასუხისმგებლობას ბელარუსს აკისრებს. NATO-ს შეფასებით, ლუკაშენკოს რეჟიმის მიერ მიგრანტების „ჰიბრიდული ტაქტიკის“ ნაწილად გამოყენება უკანონო, მიუღებელი და არაჰუმანურია. „NATO-ს ელჩებმა ამ კვირაში განიხილეს პოლონეთისა და ბელარუსის საზღვარზე არსებული ვითარება. NATO-ს მოკავშირეები პოლონეთის მიმართ სრულ სოლიდარობას გამოხატავენ. ალიანსი ასევე დგას სხვა მოკავშირეების გვერდით, რომლებზეც გავლენა მოახდინა ბელარუსის მიერ მიგრანტების ინსტრუმენტალიზაციამ. ბელარუსს ეკისრება პასუხისმგებლობა კრიზისზე და ლუკაშენკოს რეჟიმის მიერ მიგრანტების, როგორც „ჰიბრიდული ტაქტიკის“ ნაწილად გამოყენება არაჰუმანური, უკანონო და მიუღებელია. NATO სიტუაციის ახლოდან მონიტორინგს განაგრძობს. გენერალური მდივანი ამ საკითხზე მჭიდრო კავშირშია მოკავშირე მთავრობებთან. NATO მზადაა, შემდგომი დახმარება გაუწიოს ჩვენს მოკავშირეებს და განამტკიცოს თავდაცვა და უსაფრთხოება რეგიონში“, - განუცხადა Europetime-ს NATO-ს ოფიციალურმა პირმა. ამავე თემაზე: ჯო ბაიდენი: ჩვენი შეშფოთება რუსეთსა და ბელარუსს გავაცანით
ასოცირებული ტრიოს ქვეყნების საგარეო საქმეთა მინისტრებმა სამომავლო გეგმები დასახეს
ბრიუსელში აღმოსავლეთ პარტნიორობის საგარეო საქმეთა მინისტერიალის ფარგლებში, ასოცირებული ტრიოს ქვეყნების საგარეო საქმეთა მინისტრების შეხვედრა გაიმართა. საქართველოს საგარეო უწყების ინფორმაციით, საქართველოს, მოლდოვას და უკრაინის საგარეო საქმეთა მინისტრებმა, დავით ზალკალიანმა, დმიტრო კულებამ და ნიკუ პოპესკუმ შეხვედრაზე მიმოიხილეს ასოცირებული ტრიოს სამომავლო გეგმები, მათ შორის აღმოსავლეთ პარტნიორობის სამიტის გათვალისწინებით და ხაზი გაუსვეს სამიტზე ევროკავშირის მხრიდან ასოცირებული ტრიოს ქვეყნების ევროპული მისწრაფების აღიარების და პრინციპის მეტი-მეტისთვის გათვალისწინების მნიშვნელობას. მინისტრებმა ისაუბრეს ასოცირებული ტრიოს თანამშრომლობის სხვადასხვა ფორმატის გააქტიურების, ასევე ევროკავშირთან მეტი დაახლოების, პოლიტიკური დიალოგის გაძლიერების და ეკონომიკური და სექტორული ინტეგრაციის მიმართულებით მჭიდრო კოორდინაციის საკითებზე. საუბარი შეეხო კონკრეტულ ნაბიჯებს ევროკავშირის ერთიან ბაზარზე სრული ინტეგრაციის ხელშეწყობის ასევე ევროკავშირსა და ასოცირებულ ტრიოს შორის დიალოგის შემდგომ განვითარებას, ისეთი პრიორიტეტულ დარგებში, როგორიცაა ტრანსპორტი, ენერგეტიკა, ციფრული ტრანსფორმაცია, მწვანე ეკონომიკა, სტრატეგიული კომუნიკაციები და სხვა. ხაზი გაესვა ტრიოს ფარგლებში მაღალი დონის ვიზიტებისა და შეხვედრების ორგანიზების მნიშვნელობას
დავით ზალკალიანი აღმოსავლეთ პარტნიორობის სამიტზე საქართველოს პროგრესის აღიარებას ელის
საგარეო საქმეთა მინისტრი დავით ზალკალიანი აღმოსავლეთ პარტნიორობის სამიტზე საქართველოს პროგრესის აღიარებას ელის. ამის შესახებ მან ჟურნალისტებს ბრიუსელში განუცხადა, სადაც საგარეო საქმეთა მინისტერიალი იმართება. აღმოსავლეთ პარტნიორობის სამიტის ფარგლებში უნდა იყოს გაჟღერებული მკაფიო პოზიცია ჩვენს ევროპულ მისწრაფებასა და არჩევანთან დაკავშირებით, აღიარებული იყოს ის პროგრესი, რომელიც საქართველოს აქვს ამ მიმართულებით. ჩვენი მოლოდინია ჩვენი მოლოდინია, რომ ევროკავშირის პოზიციები რეგიონის უსაფრთხოების კუთხით იყოს მკაფიოდ დაფიქსირებული, ევროკავშირის როლი კონფლიქტების მოგვარების პროცესში გამოკვეთილი, მხარდაჭერილი საქართველოს სუვერენიტეტი და ტერიტორიული მთლიანობა და ასევე ის მნიშვნელოვანი თანამშრომლობა რაც არის განპირობებული დაკავშირებადობით, ასევე ჩვენი ფიზიკური ინტეგრაციით და სექტორული კუთხით თანამშრომლობის თვალსაზრისით“, - განაცხადა დავით ზალკალიანმა. საგარეო საქმეთა მინისტრმა ბრიუსელში ვიზიტის ფარგლებში, აღმოსავლეთ პარტნიორობის სამიტსა და მასთან დაკავშირებით საქართველოს მოლოდინებზე ისაუბრა. მან ასევე აღნიშნა, რომ ევროკომისარ ვარჰეის მიერ წარმოდგენილი ევროკავშირის პროექტები, რომლებიც დაკავშირებულია ინტეგრაციის პროცესებთან უნდა ითარგმნოს პრაქტიკულ განზომილებაში და ეს იქნება მნიშვნელოვანი, ხელშესახები პროგრესი საქართველოს ევროკავშირში ინტეგრაციის გზაზე და კიდევ ერთი დადასტურება, რომ აღმოსავლეთ პარტნიორობა არის უაღრესად მნიშვნელოვანი ინიციატივა, რომ მიუხედავად პრობლემებისა გარკვეულ ქვეყნებთან მიმართებით, არიან ასოცირებული ქვეყნები, ასოცირებული ტრიო - საქართველო, უკრაინა, მოლდოვა, რომელთაც აქვთ დიდი პროგრესი და ამიტომ პრინციპი მეტი მეტისთვის იყოს უზრუნველყოფილი.
რევოლუციურმა კვლევამ აჩვენა, რომ ალცჰაიმერის ახალი ვაქცინა მეხსიერებას აღადგენს
გარღვევა ალცჰაიმერის სამკურნალო საშუალებაში, ახალი ვაქცინა მეხსიერებას აღადგენს და მხოლოდ 18 ევრო ეღირება. ამ სათაურით სტატია უცხოურ მედიასაშუალებებში გამოქვეყნდა. კვლევა ლესტერის და გოტინგენის უნივერსიტეტების თანამშრომლობით ჩატარდა. კერძოდ, თაგვებზე ჩატარებულმა ექსპერიმენტებმა დაადგინა, რომ ვაქცინა თავის ტვინში არსებულ ცილებს ანადგურებს და მეხსიერებას აღადგენს. როგორც ანტისხეულმა, ასევე ვაქცინამ ტვინის ნეირონების ფუნქცია აღადგინა და ტვინში გლუკოზის მეტაბოლიზმი გაზარდა, რაც თაგვებს მეხსიერებას უბრუნებს. ბრიტანელი და გერმანელი მეცნიერების აზრით, ახალ თერაპიას ალცჰაიმერის მკურნალობის მეთოდებში რევოლუციის მოხდენა შეუძლია. გერმანიის გოტინგენის უნივერსიტეტის პროფესორმა თომას ბაიერმა, რომელიც კვლევის თანაავტორია, განაცხადა, რომ კლინიკური კვლევების დროს, არცერთმა პოტენციურმა მკურნალობამ არ აჩვენა დიდი წარმატება ალცჰაიმერის სიმპტომების შემცირების თვალსაზრისით. ზოგიერთმა უარყოფითი გვერდითი მოვლენებიც კი გამოავლინა. „ამიტომ გადავწყვიტეთ განსხვავებული მიდგომა“, - აღნიშნა პროფესორმა. მკვლევრები ახლა კომერციულ პარტნიორს ეძებენ, რომ თერაპიული ანტისხეული და ვაქცინა კლინიკური კვლევების მეშვეობით მიიღონ.
საქართველოს სახელმწიფო საზღვრის უკანონო კვეთის საქმეზე მიხეილ სააკაშვილის სასამართლო პროცესი გაიმართება
საქართველოს სახელმწიფო საზღვრის უკანონო კვეთის საქმეზე მიხეილ სააკაშვილის სასამართლო პროცესი გაიმართებაამის შესახებ საქართველოს ყოფილი პრეზიდენტის, მიხეილ სააკაშვილის ადვოკატმა, დიმიტრი საძაგლიშვილმა განუცხადა. ადვოკატის თქმით, მიხეილ სააკაშვილის ჯანმრთელობის მდგომარეობა გაუარესებულია. ბექა ბასილაიამ განაცხადა, რომ სასამართლო პროცესზე მიხეილ სააკაშვილის დასწრების ეშინიათ და სავარაუდოდ, ეცდებიან, მიზეზად კვლავ „სუს-ის მითიური გამოძიება და მიხეილ სააკაშვილის ჯანმრთელობის მდგომარეობა მოიტანონ“. „დღესაც არ მომხდარა კონსილიუმის ვიზიტი პენიტენციურ დაწესებულებაში და მიხეილ სააკაშვილი მოითხოვს კონსილიუმთან შეხვედრას. ასევე, პარიტეტის საფუძველზე დაკომპლექტებული კონსილიუმის დაშვებას მასთან, თუმცა, ხელისუფლების მიერ შექმნილი კონსილიუმის შემადგენლობის შესვლაც გარეშე, პარიტეტის საფუძველზე დაკომპლექტებული კონსილიუმის გარეშეც არის მისი მოთხოვნა“, - განაცხადა საძაგლიშვილმა“, - განაცხადა ადვოკატმა. ცნობისთვის, 16 ნოემბერს, თბილისის საქალაქო სასამართლოში საქართველოს სახელმწიფო საზღვრის უკანონო კვეთის საქმეზე მიხეილ სააკაშვილის სასამართლო პროცესი გაიმართება. სხდომა 11:00 საათზეა ჩანიშნული. პენიტენციურმა სამსახურმა მიხეილ სააკაშვილის სასამართლოში გადაყვანაზე კვლავ უარი თქვა შეგახსენებთ, 14 ნოემბერს გახდა ცნობილი, რომ გლდანის სასჯელაღსრულების სამკურნალო დაწესებულებიდან, სადაც ასევე იმყოფება მიხეილ სააკაშვილი, მსჯავრდებული დეკანოზი გიორგი მამალაძე კორონავირუსის დადასტურების გამო სამოქალაქო კლინიკაში გადაიყვანეს. ამასთან, ექსპრეზიდენტის პირადმა ექიმმა, 13 ნოემბერს განაცხადა, რომ მიხეილ სააკაშვილს ძლიერი სისუსტე აქვს და ის ლოგინიდან ვეღარ დგება. მოგვიანებით, N18 სამკურნალო დაწესებულების მთავარმა ექიმმა ექსპრეზიდენტ სააკაშვილის მდგომარეობაზე კომენტარი გააკეთა და აღნიშნა, რომ სააკაშვილის სიცოცხლეს საფრთხე არ ემუქრება.
ევროკავშირი ბელარუსის წინააღმდეგ სანქციებს აფართოებს
ევროკავშირმა ახალი სასანქციო კრიტერიუმები დაამტკიცა. ახალი პაკეტი შეზღუდვებს ითვალისწინებს იმ ფიზიკური და იურიდიული პირებისთვის, რომლებიც ევროკავშირში მიგრანტთა არაკანონიერ გადაყვანას ახორციელებენ. ევროკავშირის საბჭოს განცხადებით, დღევანდელი გადაწყვეტილება ევროკავშირის მტკიცე განწყობას ასახავს, წინ აღუდგეს მიგრანტების ინსტრუმენტალიზაციას პოლიტიკური მიზნებისთვის. „ჩვენ აღვკვეთავთ ამ არაადამიანურ და უკანონო პრაქტიკას. ამავდროულად, ჩვენ ხაზგასმით აღვნიშნავთ რეჟიმის მიერ საკუთარი მოსახლეობის წინააღმდეგ მიუღებელ რეპრესიებს და შესაბამის რეაგირებას მოვახდენთ“, - განაცხადა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჯოზეფ ბორელმა. შეგახსენებთ, 10 ნოემბერს, ევროკომისიის პრეზიდენტმა ვაშინგტონში, ჯო ბაიდენთან გამართული შეხვედრის შემდეგ განაცხადა, რომ ევროკავშირი ბელარუსის წინააღმდეგ სანქციებს გააფართოებს. ამასთან, ურსულა ფონ დერ ლაიენმა ბელარუსი „ჰიბრიდულ თავდასხმაში“ დაადანაშაულა. ცნობისთვის, Europetime-თან ექსკლუზიურ კომენტარში, NATO-ს ოფიციალური პირი მიგრანტთა ხელოვნურ კრიზისზე პასუხისმგებლობას ბელარუსს აკისრებს. NATO-ს შეფასებით, ლუკაშენკოს რეჟიმის მიერ მიგრანტების „ჰიბრიდული ტაქტიკის“ ნაწილად გამოყენება უკანონო, მიუღებელი და არაჰუმანურია. „NATO-ს ელჩებმა ამ კვირაში განიხილეს პოლონეთისა და ბელარუსის საზღვარზე არსებული ვითარება. NATO-ს მოკავშირეები პოლონეთის მიმართ სრულ სოლიდარობას გამოხატავენ. ალიანსი ასევე დგას სხვა მოკავშირეების გვერდით, რომლებზეც გავლენა მოახდინა ბელარუსის მიერ მიგრანტების ინსტრუმენტალიზაციამ. ბელარუსს ეკისრება პასუხისმგებლობა კრიზისზე და ლუკაშენკოს რეჟიმის მიერ მიგრანტების, როგორც „ჰიბრიდული ტაქტიკის“ ნაწილად გამოყენება არაჰუმანური, უკანონო და მიუღებელია. NATO სიტუაციის ახლოდან მონიტორინგს განაგრძობს. გენერალური მდივანი ამ საკითხზე მჭიდრო კავშირშია მოკავშირე მთავრობებთან. NATO მზადაა, შემდგომი დახმარება გაუწიოს ჩვენს მოკავშირეებს და განამტკიცოს თავდაცვა და უსაფრთხოება რეგიონში“, - განუცხადა Europetime-ს NATO-ს ოფიციალურმა პირმა.
ლიეტუვის, ლატვიისა და ესტონეთის პრეზიდენტები: ლუკაშენკოს მთავრობამ ადამიანით ვაჭრობისთვის პასუხი უნდა აგოს
ლიეტუვის, ლატვიისა და ესტონეთის პრეზიდენტები ერთობლივ განცხადებას ავრცელებენ, რომელშიც ნათქვამია, რომ ბელარუსი მიგრანტებს ევროკავშირთან საზღვრების დარღვევას აიძულებს და ალექსანდრე ლუკაშენკოს მთავრობამ ადამიანით ვაჭრობისთვის პასუხი უნდა აგოს. განცხადების ავტორები გმობენ „ლუკაშენკოს რეჟიმის მიერ მიგრანტების პოლიტიკური მიზნებისთვის ინსტრუმენტალიზაციას“. ლიეტუვის პრეზიდენტმა, გიტანას ნაუსედამ განაცხადა, რომ ვიდეოჩანაწერები, სურათები და სხვა მტკიცებულებები, კრიზისის გაღვივებაში ბელარუსის ოფიციალური პირების და რუსეთის მონაწილეობას ადასტურებს. თავის მხრივ, ლატვიის პრეზიდენტმა ეგილს ლევიტსმა აღნიშა, რომ NATO-მ უნდა შეცვალოს თავისი სტრატეგია და სამხედრო გეგმები. ესტონეთის პრეზიდენტმა ალარ კარისმა ევროკომისიას მოუწოდა, დაუყოვნებლივ შეიტანოს ცვლილებები ევროკავშირის კანონმდებლობაში, რაც გულისხმობს თავშესაფრის მიღების შესაძლებლობის გამკაცრებას.
